ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಸಾಹಿತ್ಯಾಚಿ ಆಯ್ಚಿ ಸ್ಥಿತಿಗತ್
ಎಡ್ವಿನ್ ವಾಸ್, ಕೆಲರಾಯ್
ಕೊಂಕ್ಣಿ ಸಾಹಿತ್ಯಾಚಿ ಆಯ್ಚಿ ಸ್ಥಿತಿಗತ್
ಹ್ಯಾ ವಿಶ್ಯಾಂತ್ ಆಜ್ ಆಮಿ ಅಟೊವ್ ಕೆಲ್ಯಾರ್ ಹಜಾರ್ ಸವಾಲಾಂ
ಮ್ಹಜಾ ಮತಿಂತ್ ರಾಜ್ಯ್ ಕರ್ತಾತ್. ಆಜ್ ಕೊಂಕ್ಣಿ ಸಾಹಿತ್ಯ್
ಹೆರ್ ಭಾಶೆಚಾ ಸಾಹಿತ್ಯಾ ಮಧೆಂ ತುಲನ್ ಕರ್ತಾನಾ ಬೋವ್
ಪಾಟಿಂ ಆಸಾ. ಹಾಕಾ ಕಾರಾಣಾಂ ಸಭಾರ್ ಆಸೊಂಕ್ ಪುರೊ. ಪುಣ್ ಹಿಂ ಕಾರಾಣಾಂ ಆಮಿಂಚ್ ರುತಾಂ ಕೆಲ್ಲಿಂ ಜಾವ್ನಾಸಾತ್.
ಆಯ್ಚಾ ಸಮಾಜೆಂತ್ ಆಮಿ ಜಿಯೆಂವ್ಚಿ ರೀತ್ ’ಸ್ಟೈಲ್’
ಮ್ಹಣ್ ಆಪೊವ್ಯೆತ್ ಆನಿ ಹ್ಯಾ ಸ್ಟೈಲಾ ಮಧೆಂ ಫಿಂರ್ಗಿ ಭಾಸ್ ಆಪವ್ನ್ ಕೊಂಕ್ಣಿ
ಸಾಹಿತ್ಯಾಕ್ ಆಮಿ ಎಕಾ ಕೊನ್ಶಾಕ್ ಜಾಗೊ ದಿಲಾ. ಆನಿ ಹೊ ಜಾಗೊ ಕಾಂಯ್
ಫಿಂರ್ಗ್ಯಾನಿ ದಿಲ್ಲೊ ನೈಂ ಆಮಿಂಚ್ಚ್ ದಿಲ್ಲೊ.
’ಕೊಂಕ್ಣಿ ಸಾಹಿತ್ಯಾಂತ್ ಕಿತೆಂ ಆಸಾ?’ ಮ್ಹಣ್ ಕೊಣೆಂಯ್ ಎಕ್ಲ್ಯಾನ್
ಸವಾಲ್ ಕೆಲ್ಯಾರ್ ’ಕೊಂಕ್ಣಿ ಸಾಹಿತ್ಯಾಂತ್ ಕಿತೆಂ ನಾಂ?’ ಮ್ಹಳ್ಳೆಂ
ಪಾಟಿಂ ಸವಾಲ್ ಕರ್ಚಿ ಸಕತ್ ಆಮ್ಚ್ಯಾ ಸಾಹಿತ್ಯಾಂತ್ ಆಸಾ.
ಕೊಂಕ್ಣಿ ಸಾಹಿತ್ಯಾಚಾ ಝರಿಂತ್ ಕೇವಲ್ ಉದಾಕ್ ಮಾತ್ರ್ ನೈಂ ಥಂಯ್ಸರ್ ಅಮೃತ್ಯೀ ವ್ಹಾಳ್ತಾ.
ಪುಣ್ ಆಮ್ಚಾ ಆಳ್ಸಾಯೆ ವರ್ವಿಂ, ಆಮ್ಚ್ಯಾ ನಕ್ರ್ಯಾ
ವರ್ವಿಂ ತ್ಯಾ ಝರಿ ವಯ್ರ್ ಮಾತಿ ಪಡ್ಲ್ಯಾ. ಆನಿ ತಿ ಝರ್
ಬಾರೀಕ್ ಜಾಲ್ಯಾ. ಪುಣ್ ತಿ ಪಡ್ಲ್ಲಿ ಮಾತಿ ಕೊರ್ಪುನ್ ಕಾಡುಂಕ್
ಹಾಂವ್ ತಯಾರ್ ನಾ. ಮ್ಹಜಾ ಹಾತಾಂ ಬೊಟಾಂಕ್ ಮಾತಿ ಕರ್ನ್ ಘೆಂವ್ಕ್
ಹಾಂವ್ ತಯಾರ್ ನಾಂ.
ಆಮ್ಚ್ಯಾ ಸಾಹಿತ್ಯಾಂತ್ ಹುಶಾರ್ ಹುಶ್ಯಾರ್ ಬರವ್ಪಿ ಆಸಾತ್, ಕವಿ ಆಸಾತ್,
ಪಂಡಿತ್ ಆಸಾತ್. ಕಾದಂಬರಿಯೊ, ಕಾಣಿಯೊ, ಕೊಂಕ್ಣಿ ಕವಿತಾಂ, ಕೊವ್ಳ್ಯೊ ಅಶೆಂ
ಹರ್ಯೆಕಾಂತ್ಯೀ ಕೊಂಕ್ಣಿ ಸಾಹಿತ್ಯಾಚಾ ವಾಡಾವಳೆಕ್ ಪ್ರಯತ್ನ್ ಕರ್ನ್ಂಚ್ ಆಸಾತ್.
ಪುಣ್ ಆಮ್ಚ್ಯಾ ಸಾಹಿತ್ಯಾಂತ್ಲೆ ಬೂಕ್, ಬರ್ಪಾಂ, ಕೆಸೆಟ್ಯೊ ವಿಕುನ್
ವಚಾಜಾಯ್ ತರ್ ಬರ್ಪ್ಯಾಂನಿ ಕಾಡ್ಚೆ ತೆ ಕಷ್ಟ್ ಪಳೈತಾನಾ ಆಮಿ ಆಮ್ಚ್ಯಾ
ಸಾಹಿತ್ಯಾ ಥಂಯ್ ದಾಖಂವ್ಚೆಂ ಶೆಳೆಪಣ್ ಹಾಕಾ ಏಕ್ ದಾಕ್ಲೊ ಜಾವ್ನಾಸಾ.
ಹಾಂಗಾಸರ್ ಸಗ್ಳ್ಯಾಂಕ್ಯಿ ದುರ್ಸೊಂಕ್ ಹಾಂವ್ ತಯಾರ್
ನಾಂ. ಕೊಂಕ್ಣಿ ಸಾಹಿತ್ಯಾ ವಯ್ರ್ ಮೋಗ್ ದವರ್ನ್ ಆಮ್ಚ್ಯಾ
ಸಾಹಿತ್ಯಾಂತ್ ಪ್ರಗಟ್ ಜಾಂವ್ಚೆ ಹರ್ ಏಕ್ ಬೂಕ್, ಪತ್ರಾಂ,
ಲೇಖನಾಂ, ಕೆಸೆಟ್ಯೊ ಇತ್ಯಾದಿ ಘೆವ್ನ್ ತಾಂಚೊ ಸಹಕಾರ್ ದಿತಾತ್.
ವಾಚ್ಪಿ, ಬರ್ಪಿ ಆನಿ ಸಾಹಿತಿಕ್ ವಿಮರ್ಸೊ ಖಂಚಾ ಭಾಶೆಚಾ ಸಾಹಿತ್ಯಾ ಥಂಯ್ ಜಿವಾಳುನ್ ಆಸಾಗೀ ತ್ಯಾ ಭಾಶೆಚೆಂ
ಸಾಹಿತ್ಯ್ ಗ್ರೇಸ್ತ್ ಆಸಾ ಮ್ಹಣ್ ಸಾಂಗ್ಯೆತ್. ಪುಣ್ ಆಮ್ಚ್ಯಾ
ಮಧೆಂ ಹೊ ವಿಶಯ್ ಗುಸ್ಪೊಡೆಕ್ ಕಾರಾಣ್ ಜಾಲಾ.
ಕೊಂಕ್ಣಿ ಸಾಹಿತ್ಯಾಂತ್ ಆಜ್ ಆಮಿ ಕರಿಜಾಯ್ ಜಾಲ್ಲೊ ವಾವ್ರ್ ಖೂಬ್
ಬಾಕಿ ಆಸಾ. ವಾವ್ರ್ ಮ್ಹಣ್ತಾನಾ ಆಮ್ಕಾಂ ಏಕ್ ಸವಾಲ್ ಧೊಸುಂಕ್
ಪುರೊ. "ಹಾಂವ್ ಕೊಂಕ್ಣೆಂತ್ ಬರಯ್ತಾಂ. ಹರ್ ಏಕ್ ಬೂಕ್,
ಪತ್ರಾಂ ಘೆವ್ನ್ ವಾಚ್ತಾಂ ಆನಿ ಕಸಲೊ ವಾವ್ರ್"? ಹೆಂ ಸವಾಲ್
ವಾಜ್ಬಿ ಜಾವ್ನಾಸಾ ಹಾಂವ್ ಹಾಂಕಾಂ ಮಾನ್ ಭಾಗಯ್ತಾಂ ಕಿತ್ಯಾಕ್ ಅಸಲ್ಯಾ
ವರ್ವಿಂ ಆಜ್ ಆಮ್ಚೆಂ ಸಾಹಿತ್ಯ್ ಜಿವಾಳುನ್ ಆಸಾ. ಪುಣ್ ಹೆರಾಂ ಭಾಶೆಚಾ
ಸಾಹಿತ್ಯಾ ಥಂಯ್ ಪಾವೊಂಕ್ ಆಮಿ ಹ್ಯಾ ಪರಿಧಿ ಥಾವ್ನ್ ಭಾಯ್ರ್ ಯೇಜಾಯ್
ಪಡ್ತಾ. ಆಮ್ಚೆಂ ಸಾಹಿತ್ಯ್ ಪಾಟಿಂ ಪಡೊಂಕ್ ಕಾರಾಣ್ ಕಿತೆಂ? ಖಂಯ್ ಆಮಿ ಚುಕೊನ್
ಪಡ್ಲ್ಯಾಂವ್? ಹಾಕಾ ಪರಿಹಾರ್ ಕಸಲೊ? ಆನಿ ಹ್ಯಾ ಸರ್ವ್
ಸವಾಲಾಂಕ್ ಪರಿಹಾರ್ ಜೊಡುಂಕ್ ಆಮಿಂಚ್ಚ್ ಕೊಂಕ್ಣ್ಯಾಂನಿ ತುರ್ತಾನ್ ಕಾರ್ಯಾಕ್ ದೆಂವಾಜಾಯ್.
ಏಕ್ ಸಾಹಿತ್ಯ್ ಗ್ರೇಸ್ತ್ಪಣಾಚಾ ಪಾವ್ಲಾಂನಿ ಫುಡೆಂ ಚಲಾಜಾಯ್ ತರ್ ತಾಂತು ಆಸ್ಲ್ಲ್ಯೊ ಆಡ್ಕಳ್ಯೊ, ಕಾಂಟೆ-ಖುಂಟೆ,
ವ್ಹಡ್ ವ್ಹಡ್ ಫಾತೊರ್ ಕಾಡ್ನ್ ಉಡೊವ್ನ್ ಆಮಿ ಮುಕಾರ್
ವಚಾಜಾಯ್. ಹೆರ್ ಭಾಶೆಚೆ ತಾಂಚಾ ಸಾಹಿತ್ಯಾಂತ್ ಭೋವ್
ಮುಕಾರ್ ಪಾವ್ಲ್ಯಾತ್. ಆಮಿ ಅಜೂನ್ ಆಸ್ಲ್ಲ್ಯಾ ಕಡೆಂಚ್ಚ್ ಆಸಾಂವ್.
ಆಮ್ಚ್ಯಾಂತ್ ಆಜ್ಕಾಲ್ ದೋನ್ ತೀನ್ ಬೊಡಾಂ ವರ್ತ್ಯಾ
ಹುಮೆದಿನ್ ವಾವ್ರ್ ಕರ್ಚೊ ದಿಸೊ ಯೆತಾ. ವ್ಹಡ್ಲೆ
ವ್ಹಡ್ಲೆ ಫಾತೊರ್ ತಕ್ಲೆರ್ ದವರ್ನ್ ವಾವೊನ್ ಆಸಾತ್. ಕೊಂಕ್ಣಿ
ಸಾಹಿತ್ಯಾಚಿ ಖಂತ್ ತಾಂಕಾಂ. ಹೆಂ ಕೊಣಾ ಖಾತಿರ್ ಆಮ್ಚ್ಯಾ ಖಾತಿರ್, ಆಮ್ಚ್ಯಾ
ಸಾಹಿತ್ಯಾ ಪಾಸತ್. ಪುಣ್ ಆಮಿ ತಾಂಕಾಂ ಹ್ಯಾ ವೇಳಾ ಕಸೊ
ಸಹಕಾರ್ ದಿತಾಂವ್ ಮ್ಹಳ್ಯಾರ್ ಪಯ್ಸ್ ಥಾವ್ನ್ ತಾಳಿಯೊ
ಪೆಟೊನ್ ತಾಂಕಾ ಹುಮೆದ್ ದಿತಾಂವ್. ತಾಚಾ ಬದ್ಲಾಕ್ ಆಮಿ
ಸರ್ವಾಂನಿ ಹಾತಾಕ್ ಹಾತ್ ದೀವ್ನ್ ತಾಂಕಾಂ ಸಹಕಾರ್ ದಿಲೊ ತರ್ ತಾಂಚೆ
ವೊಜೆಂಯಿ ಹಾಳು ಜಾಯ್ತ್ ಆನಿ ಆಮ್ಚೆಂ ಸಾಹಿತ್ಯ್ ಬೋವ್
ಮುಕಾರ್ ಪಾವಾತ್.
ಆಮ್ಕಾಂ ಹರ್ಯೆಕ್ಲ್ಯಾಕ್ ಆಮ್ಚ್ಯಾ ಜಿಣ್ಯೆಂತ್ ಏಕ್ ಜವಾಬ್ದಾರಿ ಆಸಾ. ಆನಿ ಹಿ ಕೊಂಕ್ಣಿ
ಸಾಹಿತ್ಯ್ ಆಮ್ಚಿ ಜಾವ್ನಾಸ್ತಾನಾ ತಿ ಊಂಚ್ ಉಭಾರಾಯೆಕ್ ಪಾವಂವ್ಚಿ ಆಮ್ಚೆಂ
ಹರ್ ಏಕ್ಲ್ಯಾಚೆಣ್ ಕರ್ತವ್ಯ್ ಜಾವ್ನಾಸಾ. ಹಿ ಕೊಂಕ್ಣಿ ಸಾಹಿತ್ಯ್ ಆಮ್ಚಿ, ತಿ
ಪರ್ಕ್ಯಾಂಚಿ ನ್ಹಂಯ್ ತರ್ ತಾಚಾ ಉದರ್ಗತೆ ಖಾತಿರ್ ಆಮ್ಚೆ
ನಕ್ರೆ ಕಿತ್ಯಾಕ್?
ಆಮ್ಚ್ಯಾ ಸೆಜಾರಾ ಕೇರಳಾ ರಾಜ್ಯಾಂತ್ ಪ್ರಗಟ್ ಜಾಂವ್ಚೆ ’ಮಲಯಾಳಂ
ಮನೋರಮಾ’ ಮ್ಹಳ್ಳೆಂ ಪತ್ರ್ ಇತ್ಲೆಂ ಫಾಮಾಧ್ ಜಾಲಾಂಕೀ ತಾಂಚಾ ಭಾಶೆಚೊ
ಲೋಕ್ ಸಂಸಾರಾಚಾ ಖಂಚಾ ಮುಲ್ಯಾಂತ್ ಆಸ್ಲ್ಯಾರೀ ತೆಂ
ಪತ್ರ್ ಮಾತ್ರ್ ಚುಕಾನಾಸ್ತಾಂ ವಾಚ್ತಾತ್. ಪುಣ್ ಆಮ್ಚ್ಯಾ ಥಂಯ್ ಕಿತೆಂ ಘಡ್ತಾ? ಆಮ್ಚ್ಯಾ ಭಾಶೆಚಿಂ
ಪತ್ರಾಂ ವಾಚಿಜಾಯ್ ತರ್ ಆಮಿ ಸರ್ಕಸ್ ಕರಿಜಾಯ್ ಪಡ್ತಾ.
ಆಜ್ ಆಮ್ಕಾಂ ವೇಳ್ ಆಯ್ಲಾ. ಆಮಿಂ ಸರ್ವಾಂನಿ ಜಾಗೆ ಜಾವ್ನ್
ಹಾತಾಕ್ ಹಾತ್ ದೀವ್ನ್ ಕಾರ್ಯಾಕ್ ದೆಂವಾಜಾಯ್. ಹರ್ಯೆಕಾ ಕೊಂಕ್ಣಿ ಕುಟ್ಮಾಂತ್ ಯಾ ಘರಾಂತ್ ಆನಿ
ಸಂಸಾರಾಚಾ ಮುಲ್ಯಾ ಮುಲ್ಯಾಕ್ ಶಿಂಪ್ಡಾಲ್ಲ್ಯಾ ಕೊಂಕ್ಣ್ಯಾಂಕ್ ಆಮ್ಚಿಂ ಕೊಂಕ್ಣಿ
ಪತ್ರಾಂ ವಾಚ್ಚ್ಯಾಪರಿಂ, ಆಮ್ಚ್ಯಾ ಸಾಹಿತ್ಯಾಚಾ ಗ್ರೇಸ್ತ್ಕಾಯೆ
ವಿಶ್ಯಾಂತ್ ತಾಂಕಾ ಕಳಂವ್ಚೆಂ. ಹ್ಯಾ ವರ್ವಿಂ ಸರ್ಪ್ ಕೊಂಕ್ಣಿ
ಲೊಕಾಂಕ್ ಪತ್ರಾಂ ಮಾಧ್ಯಮಾ ಮಾರಿಫಾತ್ ಸಾಂಗಾತಾ
ಹಾಡುಂಕ್ ಸಕ್ತಾಂವ್. ಹೆಂ ಕಾಮ್ ಕಶ್ಟಾಂಚೆ ತರೀ ಅಸಾಧ್ಯ್ ಮ್ಹಳ್ಳೆಂ ಕಾಂಯ್
ನಾ. ಕೊಂಕ್ಣಿ ಆಮ್ಚಿ ಮಾಂಯ್ ಭಾಸ್, ತ್ಯಾ ಭಾಶೆಂತ್ಲೆ
ಸಾಹಿತ್ಯ್ ಆಮ್ಚೆಂ ’ದಾಯ್ಜ್’ ಮ್ಹಣ್ ಮಾನುನ್ ಘೆವ್ನ್ ಕೊಂಕ್ಣಿ
ಸಾಹಿತ್ಯಾಕ್ ಉಂಚಾಯೆಕ್ ಪಾವಂವ್ಚಿ ಜವಾಬ್ದಾರಿ ಆಮ್ಚಿ ಹರ್ಯೆಕ್ಲ್ಯಾಚಿ ಜಾವ್ನಾಸಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications