ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲವ್ಪಿಣ್: ವಾಯ್ಲೆಟ್ ಜೆ. ಪಿರೇರಾ
ವಿಕ್ಟರ್ ರೊಡ್ರಿಗಸ್
ಸಾಹಿತಿವಿಶಿಂ ದೋನ್ ಉತ್ರಾಂ:
ಕೊಂಕ್ಣಿ ಸಾಹಿತ್ಯಾಂತ್ ಆಪ್ಲ್ಯಾ ಲಾಂಬ್ ದೀಗ್ ಕಾದಂಬರಿಯಾಂಕ್ ಭೋವ್ ಫಾಮಾದ್ ಜಾಲ್ಲೊ ಹೊ ಫಕತ್ತ್ ಏಕ್ ಕಾಣ್ಯೆಗಾರ್ ಮಾತ್ರ್ ನ್ಹಂಯ್, ಬಗಾರ್ ಝಡಾಂ-ಪಾನಾಂಚಾ-ವಖ್ತಾಂವಿಶಿಂ ಹಾಚಿ ಜಾಣ್ವಾಯ್ ವರ್ತಿ. ಕೊಂಕ್ಣಿ ಪತ್ರಾಂನಿ ಹಾಚಿ ನವಿ ಕಾದಂಬರಿ ಸುರು ಜಾತಾ ಮ್ಹಣ್ತಚ್ಚ್ ಪತ್ರಾಚೊ ವಿಖ್ರೊ ಚಡ್ತಾಲೊ ಮಾತ್ರ್ ನ್ಹಂಯ್, ಹಳ್ಳೆ ಹಳ್ಳೆಂನಿ ಆತಾಂ ಸಯ್ತ್ ಸಭಾರ್ ವಾಚ್ಪ್ಯಾಂನಿ ಪತ್ರಾಂನಿ ಆಯಿಲ್ಲ್ಯೊ ತಾಚ್ಯೊ ಕಾದಂಬರಿಯಾಂಚಾ ಪಾನಾಂಕ್ ಗುಂತುನ್ ಬೂಕ್ ಕರ್ನ್ ದವರ್ಲಾ ಮಾತ್ರ್ ನ್ಹಂಯ್ ಸೆಜ್-ಸಾಂಬಾರಾಂ ವಾಚುಂಕ್ಯೀ ದಿತಾತ್.
ಸಂವಾದ್:
ಸ: ಪಯ್ಲೆಂ ಸಾಂಗಾ - ಆತಾಂ ತುಮ್ಚಿ ಭಲಾಯ್ಕಿ ಕಶಿ ಆಸಾ?
ಜಾ: ದೆವಾಚ್ಯಾ ದಯೆನ್ ಆನಿ ಮ್ಹಜ್ಯಾ ಜಾಯ್ತ್ಯಾ ಮೊಗಾಚ್ಯಾ ಅಭಿಮಾನಿಂಚ್ಯಾ ಮಾಗ್ಣ್ಯಾನ್ ದಿಸಾಂದೀಸ್ ಮ್ಹಜ್ಯಾ ಭಲಾಯ್ಕೆಂತ್ ಸುಧ್ರಾಪ್ ಜಾತೇ ಆಸಾ. ತರೀ ಅದ್ಲೊ ವಿಕ್ಟರ್ ರೊಡ್ರಿಗಸ್ ಜಾಂವ್ಕ್ ಸ ಮಹಿನೆ ತರಿ ವೆತಿತ್ ಮ್ಹಳಾಂ ದಾಕ್ತೆರಾನ್. ತಾಂಚ್ಯಾ ಸಲ್ಹಾಪ್ರಕಾರ್ ಹಾಂವ್ ಚಲ್ತೇ ಆಸಾ.
ಸ: "ಕೊಂಕ್ಣಿ ಕಾದಂಬರಿ ಬರಂವ್ಚಿ ವೋಡ್ ತುಮ್ಕಾಂ ಕೆದಾಳಾ ಆನಿ ಕಶಿ ಸುರು ಜಾಲ್ಲಿ"?
ಜಾ: ಲ್ಹಾನ್ ಥಾವ್ನ್ ಮ್ಹಾಕಾ ವಾಚ್ಪಾಚಿ ಉರ್ಭಾ ಚಡ್. ಕನ್ನಡ ಭಾಶೆಚ್ಯೊ ಸಬಾರ್ ಕಾದಂಬರಿ ಹಾಂವ್ ವಾಚ್ತಾಲೊಂ. ಹ್ಯಾ ವಗ್ತಾ ಮ್ಹಜ್ಯಾನ್ ಕಿತ್ಯಾಕ್ ಕಾದಂಬರಿ ಬರೊಂವ್ಕ್ ನ್ಹಜೊ ಮ್ಹಳ್ಳೆಂ ಸವಾಲ್ ಉದೆಲೆಂ. ಆನಿ 1967 ಇಸ್ವೆಂತ್ ಹಾಂವೆ "ವಿಭಾಡ್ಲೆಲೆಂ ಘರಾಣೆಂ" ಮ್ಹಳ್ಳಿ 200 ಪಾನಾಂಚಿ(ಹಾತ್ ಬರ್ಪಾಚಿ) ಕಾದಂಬರಿಚ್ಚ್ ಬರಯ್ಲಿ. ತ್ಯಾ ಪರ್ಯಾಂತ್ ಹಾಂವೆ ಖಂಚಾಚ್ ಪತ್ರಾಂನಿ ಕಸಲಿಂಚ್ ಬರ್ಪಾಂ ಬರಂವ್ಕ್ ನಾತ್ಲ್ಲಿಂ.
ಸ: ತುಮ್ಕಾಂ ಕೊಂಕ್ಣಿ ಕಾದಂಬರಿಕಾರ್ ಜಾಂವ್ಕ್ ಕೊಣೆಂ ಪ್ರೋತ್ಸಾಹ್ ದಿಲ್ಲೊ?
ಜಾ: "ಕಾದಂಬರಿ ಪಿತಾ" ದೆ|ಜೊ.ಸಾ.ಆಲ್ವಾರಿಸಾನ್. ತಾಕಾ ಹಾಂವೆ ಮ್ಹಜಿ ಪಯ್ಲಿ ಕಾದಂಬರಿ ವ್ಹರ್ನ್ ದಿಲ್ಲಿಚ್ಚ್ ಪಯ್ಲೆ ಪಾವ್ಟಿಂ ಆಮಿಂ ಎಕಾಮೆಕಾಚಿ ಮುಖಾಂ ಪಳೆಲ್ಲಿ ಆನಿ ಕಾದಂಬರಿ ವಾಚುನ್ ತಾಣೆ ಮ್ಹಳೆಂ "ತುಕಾ ಬರ್ಪಾಚೆ ದೆಣೆಂ ಆಸಾ, ಹಿಂ ಕಾದಂಬರಿ ಬರೀ ಆಸಾ. ಪೂಣ್ ವಾಚ್ಪ್ಯಾಂಕ್ ತುಜಿ ವಳಕ್ ಆನಿ ಬರ್ಪಾಚಿ ರೂಚ್ ಲಾಗ್ಚೆ ಖಾತಿರ್ ತುಂವೆ ಲ್ಹಾನ್ ಲ್ಹಾನ್ ಲೇಖನಾಂ ಭಾಶಾಂತರ್ ಬರ್ಪಾಂ.. ಇತ್ಯಾದಿ ಬರಯ್ಜಾಯ್. ಹಾಂವ್ ತೆಂ ಪರ್ಗಟುನ್ ತುಕಾ ವಾಚ್ಪಿ ಕಿತ್ಲೆ ಪಸಂದ್ ಕರ್ತಾತ್ ಪಳೆತಾಂ .. ಮುಖಾರ್ಸಿ...". ಆನಿ ಹಾಂವೆ ಮ್ಹಜೆಂ ಪ್ರಥಮ್ ಭಾಶಾಂತರ್ ಲೇಖನ್ "ಸ್ರೀಯಾಂಚ್ಯಾ ಸ್ತನಾಂ ಕ್ಯಾನ್ಸರ್" ವಿಶ್ಯಾಂತ್ ಮಾಹೆತ್ ಆಟಾಪ್ಣಿಂ ಬರವ್ನ್ ದಿಲಿಂ. ಆನಿ ತೆಂ ತ್ವರಿತ್ ಪ್ರಗಟ್ಲೆಂ. ತೆಂ ಪಳೆವ್ನ್ ಹಾಂವೆ "ಬಂಗ್ಲ್ಯಾಂತ್ಲಿ ಖುನ್" ಮ್ಹಳ್ಳಿ ಪತ್ತೇದಾರಿ ಕಾಣಿ ಬರಯ್ಲಿ ಆನಿ ಜೊ. ಸಾ. ಅಲ್ವಾರಿಸಾನ್ "ಝೆಲೊ" ಪತ್ರಾರ್ ಘಳಾಯೆವಿಣೆಂ ಫಾಯ್ಸ್ ಕೆಲಿ. ಆನಿ ತಿ ಸಬಾರ್ ವಾಚ್ಪ್ಯಾಂಕ್ ರುಚ್ಲಿ ಮ್ಹಳ್ಳಿ ಶಿಫಾರಸ್ ಪತ್ರಾಂಯೀ ಪ್ರಗಟ್ ಜಾಲ್ಲಿ ಪಳೆವ್ನ್ ಹಾಂವೆ ಸರಾಗ್ ಬರಂವ್ಕ್ ಸುರು ಕೆಲೆಂ.
"ವಿಧಿಚ್ಯಾ ದಾವ್ಲೆಂತ್" ಮ್ಹಳ್ಳಿ ಮೊಟಿ ಕಾದಂಬರಿ ಬರಯ್ಲಿ. ಆನಿ ಜೊ. ಸಾ. ಅಲ್ವರಿಸಾನ್ ಅಪ್ಲ್ಯಾ "ಮಿತ್ರ್" ಪತ್ರಾರ್ ಪ್ರಧಾನ್ ಸಾಂಖಳ್ ಕಾಣಿ ಜಾವ್ನ್ ಪ್ರಗಟ್ ಕೆಲಿ. ಆನಿ ಅಧಿಕ್ ಆತುರಾಯೆಭರಿತ್ ಜಾವ್ನಾಸೊನ್ "ಮಿತ್ರ್" ಪತ್ರಾಚೊ ವಿಕ್ರೊ ವಾಡೊನ್ ಆಯ್ಲೊ ಮ್ಹಳ್ಳಿ ಶಿಫಾರಸ್ ಜೊ. ಸಾ. ಅಲ್ವಾರಿಸಾನ್ಂಚ್ ಉಚಾರ್ಲಿ. ಹ್ಯಾ ವರ್ವಿಂ ಮ್ಹಾಕಾ ಲಾಭ್ಲ್ಲೊ ಪ್ರೋತ್ಸಾಹ್ ವರ್ತೊ. ಕಾಣ್ಯೆ ಸಾಂಗಾತಾ "ಮಿತ್ರ್" ಪತ್ರಾರ್ "ಭಲಾಯ್ಕೆ ರಾಜಾಂವ್" ಮ್ಹಳ್ಳೊ ಏಕ್ ವಿಭಾಗ್ ಹಾಂವೆ ಖಾಯಾಮ್ ಅಪ್ಣಾಯ್ಲೊ ಆನಿ ತ್ಯಾ ವರ್ವಿಂ ಜಾಯಿತ್ಯಾ ವಾಚ್ಪ್ಯಾಂಕ್ ಫಾಯ್ದೊ ಜಾಲಾ. ಉಪ್ರಾಂತ್ ಹಾಂವೆ ಬರಯಿಲ್ಲಿ. "ಮಾಯಾಕಾಚೆಂ ಭುಂಯಾರ್" ಪತ್ತೇದಾರಿ, ಭಯಾನಕ್ ಸನ್ನಿವೇಶಾಂಚಿ ಕಾದಂಬರಿ. ಆನಿ ತಿ ಕಾಣಿಕ್ ಪತ್ರಾಚೆರ್ ಪ್ರಗಟ್ ಜಾವ್ನ್ ಹಜಾರೊಂ ವಾಚ್ಪ್ಯಾಂಚ್ಯ್ ಮೆಚ್ವಣೆಕ್ ಪಾತ್ರ್ ಜಾಲಿ. "ಕಾಣಿಕ್" ಪತ್ರಾಚ್ಯೊ ವಿಕ್ರ್ಯೊ ವಾಡ್ಲ್ಯೊ. ವಾಚ್ಪಿ ಕಾಣ್ಯೆಕ್ ರಾಕೊನ್ ರಾವ್ತಾಲೆ. ಆಶೆಂ ಮ್ಹಜ್ಯೊ ಕಾದಂಬರಿ ಎಕಾಪ್ರಾಸ್ ಉತ್ತೀಮ್ ಮ್ಹಳ್ಳ್ಯಾ ಶಿಫಾರಸೆಕ್ ಪಾತ್ರ್ ಜಾಲ್ಯೊ. ಹೆಂ ಪಳೆವ್ನ್ "ಪಯ್ಣಾರಿ" ಪತ್ರಾನ್ ಮ್ಹಾಕಾ ಅಪ್ಲ್ಯಾ ಪತ್ರಾಕ್ ಆಮಂತ್ರಣ್ ದಿಲೆಂ... ತಿತ್ಲ್ಯಾರ್ಚ್ ಹಾಂವ್ ಕೊಂಕ್ಣಿ ಸಮಾಜೆಂತ್ ವಳ್ಕಿಚೊ ಜಾಂವ್ಕ್ ಪಾವ್ಲೊಂ.
ಸ: ವಿಕ್ಟರ್ ರೊಡ್ರಿಗಸಾಚಿ ಕಾದಂಬರಿ ಸುರು ಜಾತಾ ಮ್ಹಣ್ತೆಚ್ಚ್ ಕೊಂಕ್ಣಿ ಪರ್ತಾಂಚ್ಯಾ ವರ್ಗಾಣೆದಾರಾಂಚೊ ಸಂಖೊ ದೊಡ್ತೊ ಜಾತಾಲೊ" ಹ್ಯಾ ವಿಶಿಂ ತುಮ್ಕಾಂ ಕಿತೆಂ ಭಗ್ತಾ?
ಜಾ: ಮ್ಹಾಕಾ ಅಧಿಕ್ ಸಂತೊಸ್ ಭಗ್ತಾ ಆನಿ ಮ್ಹಜ್ಯಾ ದೆಣ್ಯಾವಯ್ರ್ ವರ್ತೊ ಆಭಿಮಾನ್ ಉಭ್ಜಾತಾ. ಹೆಂ ದೆಣೆಂ ಮ್ಹಾಕಾ ಫಾವೊ ಕೆಲ್ಲ್ಯಾ ಸರ್ಗಿಂ ಬಾಪಾಕ್ ಹಾಂವ್ ಅರ್ಗಾಂ ದಿತಾಂ.
ಸ: ತುಮ್ಚಾ ಸಭಾರ್ ಉತ್ತೀಮ್ ಕಾದಂಬರಿ ಪಯ್ಕಿ "ಶಿರಾಪಾಚಿ ಬಲಿ", "ರಗ್ತಾಚಿ ಬೊಬಾಟ್", "ಡೊನ್ ಮ್ಯಾಕ್ಸ್", "ಪ್ರತೀಕಾರ್", "ಪಾಪ್ ಆನಿ ಶಿರಾಪ್", "ಹಾಂವ್ ಫಾರಿಕ್ಪಣ್ ಘೆತೆಲಿಂ" ಹ್ಯಾ ಪಯ್ಕಿ ತುಮ್ಕಾಂ ಖಂಯ್ಚಿ ಚಡ್ ಮೊಗಾಚಿ ಕಾದಂಬರಿ? ಆನಿ ಕಿತ್ಯಾಕ್?
ಜಾ: ಖಂಚಾಯ್ ಆವಯ್ ಬಾಪಾಯ್ಕ್ ಅಪ್ಲಿಂ ಸಕ್ಕಡ್ ಭುರ್ಗಿಂ ಮೊಗಾಚಿಂಚ್ಚ್. ತಸೆಂಚ್ಚ್ ಹಾಂವೆ ಬರಯಿಲ್ಲ್ಯೊ ಸಕ್ಕಡ್ ಕಾದಂಬರಿ ಮ್ಹಜ್ಯಾ ಮೊಗಾಚ್ಯೊಚ್ಚ್. ಮ್ಹಾಕಾ ಕಳಾನಾ ತಾಂತುಂ ಚಡ್ ಮೋಗ್ ಆಟಾಪ್ಚಿ ಖಂಯ್ಚಿ ಮ್ಹಣ್. ತ್ಯಾ ತ್ಯಾ ಕಥಾ ಸಾರಾಂಶ್ ಪ್ರಕಾರ್ ಹರ್ಯೇಕ್ ಮ್ಹಜಿ ಕಾದಂಬರಿ ಉತ್ತೀಮ್ಂಚ್. ಜಾಲ್ಯಾರ್ಯೀ "ಪಾಪ್ ಆನಿ ಶಿರಾಪ್" ಹಿ ಕಾದಂಬರಿ ಕೊಂಕ್ಣೆಂತ್ ದಿಗಾಯೆಚಿ ಮ್ಹಣ್ ದಾಖ್ಲೊ ಜೊಡ್ಲೆಲಿ ಏಕ್ ಉತ್ತೀಮ್ ಕಥಾವಸ್ತುಚಿ ಜಾವ್ನಾಸೊನ್ ಮ್ಹಜ್ಯಾ ಮೊಗಾಕ್ ಆನಿ ಮ್ಹಾಕಾ ಗೌರವ್ ಹಾಡುಂಕ್ ಕಾರಾಣ್ ಜಾಲ್ಯಾ. ರುಜ್ವಾತ್ ಜಾವ್ನ್ ಮಂಗ್ಳುರ್ ಟೆಲಿಫಿಲ್ಮ್ಸ್ ಹಾಣಿ ಹಿಂ ಕಾದಂಬರಿ ಕೊಂಕ್ಣೆಂತ್ಲಿ ಪ್ರಥಮ್ ಟಿ.ವಿ. ಮೆಗಾ ಸೀರಿಯಲ್ ಕಾಡುಂಕ್ ವಿಂಚ್ಲ್ಯಾ. ಆನಿ ಹೆಂ ಸೀರಿಯಲ್ ಹ್ಯಾಚ್ 2006 ಅಕ್ಟೋಬರ್ 14 ತಾರಿಕೆರ್ ಥಾವ್ನ್ ಡಿ.ಡಿ. ಚಂದನಾಚೆರ್ ಪ್ರಚಾರ್ ಜಾತೆಲಿ ಮ್ಹಣ್ ಕಳಯ್ಲಾಂ. ಜರ್ತರ್ ಹಿ ಕಾದಂಬರಿ ಇತರ್ ಭಾಸಾಂನಿ ಪ್ರಗಟ್ ಜಾಲ್ಲಿ ತರ್ ಎದೊಳ್ಚ್ಚ್ ಭಾಸಾವಾರ್ ಸೀರಿಯಲಾಂ ಟಿ.ವಿಚೆರ್ ಪ್ರಸಾರ್ ಜಾವ್ನ್ ಆಸ್ತಿಂ. ಹೆಂ ಭಾಗ್ ಮ್ಹಾಕಾ ವಂಚಿತ್ ಜಾಲಾಂ.
ಸ: ತುಮ್ಚಾ ಕಾದಂಬರಿಯಾಂನಿ ವಖ್ತಾಂಕ್ ಸಂಬಂಧ್ ಜಾಲ್ಲಿ ಗುಂಡಾಯೆಚಿ ಜಾಣ್ವಾಯ್ ಲಾಭ್ತಾ, ತುಮ್ಕಾಂ ವಕ್ತಾಂವಿಶಿಂ ಮಾಹೆತ್-ಜಾಣ್ವಾಯ್ ಖಂಯ್ ಥಾವ್ನ್ ಲಾಭ್ಲಿ?
ಜಾ: ಹಾಂವ್ ಕಂಕ್ನಾಡಿ ಫಾ|ಮುಲ್ಲರ್ಸ್ ಆಸ್ಪತ್ರೆಂತ್ ಕಾಮ್ ಕರ್ತಾಲೊಂ. ಪಿಡೆ ವಿಶ್ಯಾಂತ್ ಸಮ್ಜೊಂಚೆ ಆನಿ ಪರಿಹರ್ ಸೊಧ್ಚೊ ಏಕ್ ಹವ್ಯಾಸ್ ತಸೆಂ ಜಾಲ್ಲೊ. ಮ್ಹಾಕಾ ಝಡ್ಫಾಲ್ಯಾಂಚೆರ್ ಪಾತ್ಯೆಣಿ ಚಡ್. ಹ್ಯಾ ಲಗ್ತಿ ಆಯುರ್ವೇದಿಕ್, ತಸೆಂ ಘರ್ ವಯ್ಜಾಂನಿ ದಿವ್ಚಾ ವಕ್ತಾಂ ಥಂಯ್ ಆಕರ್ಷಿತ್ ಜಾಲ್ಲ್ಯಾ ಮ್ಹಾಕಾ ತಾಂಚೆ ಥಂಯ್ ವೋಡ್ ಜಾಲಿ, ಆನಿ ತಸಲ್ಯಾಂಕ್ ಸೊಧುನ್ ಸೊಧುನ್ ತಾಂಚೆ ಥಾವ್ನ್ ವಕ್ತಾಂ ಮಾಹೆತ್ ಸಂಗ್ರಹ್ ಕರ್ನ್ 1972 ಇಸ್ವೆಂತ್ ಕೊಂಕ್ಣೆಂತ್ ಪಯಿಲ್ಲೆ ಪಾವ್ಟಿ "ಗಾಂವ್ಚ್ಯಾ ವಕ್ತಾಂಚೊ ಭಲಾಯ್ಕೆ ದಾಯ್ಜ್" ಮ್ಹಳ್ಳೊ ಬೂಕ್ ಪ್ರಗಟ್ ಕೆಲೊ. ಹ್ಯಾ ಶಿವಾಯ್ ಹಾಂವ್ ಆಯುರ್ವೇದ್ ವಕ್ತಾಂ ಸಂಬಂಧಿ ಸಭಾರ್ ಬೂಕ್ ವ ಬರ್ಪಾಂ ವಾಚ್ತಾಲೊ.
ಸ: ತುಮ್ಚಾ ಕಾಳಾಚ್ಯಾ ಮಾಲ್ಘಡ್ಯಾ ಸಾಹಿತಿಂಲಾಗಿಂ ತುಮ್ಚೊ ಸಂಪರ್ಕ್ ಸಂಬಂಧ್ ಕಸೊ ಆಸ್ಲ್ಲೊ? ತುಮ್ಚಾ ಪಸಂದೆಚೆ ಸಾಹಿತಿ ಕೋಣ್?
ಜಾ: ಮ್ಹಜ್ಯಾ ಕಾಳಾಚ್ಯಾ ಮಾಲ್ಘಡ್ಯಾ ಸಾಹಿತಿಂಲಾಗಿಂ ಮ್ಹಜೊ ಸಂಪರ್ಕ್ ದಾಟ್ ನಾತ್ಲ್ಲೊ. ಕಿತ್ಯಾಕ್ ಮ್ಹಳ್ಯಾರ್ ಹಾಂವ್ ಬಾವೀಸ್ ವರ್ಸಾಂ ವಿದೇಶಾಂತ್ ಆಸ್ಲ್ಲ್ಯಾನ್ ಆಮ್ಚೊ ಸಂಪರ್ಕ್ ಜಾಂವ್ಕ್ ಆವ್ಕಾಸ್ ನಾತ್ಲ್ಲೊ. ಪುಣ್ ತಾಂಚೆ ವಯ್ರ್ ಮ್ಹಾಕಾ ಗೌರವ್ ಆಸ್ಲ್ಲೊ. ಗಾಂವಾಕ್ ಆಯಿಲ್ಲ್ಯಾ ತವಳ್ ಆಮ್ಚಿ ಭೆಟ್ ಜಾತಾಲಿ. ಆಮಿಂ ಎಕಾಮೆಕಾ ಮಾನ್ ಆನಿ ಗೌರವಾನ್ ದೆಕ್ತಾಲ್ಯಾಂವ್.
ವಿವಿಧ್ ಪ್ರಕಾರಾಂನಿಂ ಹೆ ಸಾಹಿತಿ ಮ್ಹಜ್ಯಾ ಪಸಂದೆಚೆ ಜಾವ್ನಾಸ್ಲ್ಲೆ. ಸಾಮಾಜಿಕ್ ಕಾದಂಬರಿ ಸಾಹಿತ್ಯಾಂತ್ ಜೊ. ಸಾ. ಆಲ್ವಾರಿಸ್, ಚಾರಿತ್ರಿಕ್ ವಿಶಯಾಂನಿ ಖಡಾಪ್ (ಶ್ರೀ. ವಿ. ಜೆ. ಪಿ. ಸಲ್ದಾಞ್) ಸಮಾಜಿಕ್ ಸಾಹಿತ್ಯಾಂತ್ ಶ್ರೀ ಎ.ಟಿ. ಲೋಬೊ, ಮೊಗಾಚ್ಯಾ ಕಾಣಿಯಾಂನಿ ಶ್ರೀ ಗಬ್ಬು ಹೆ ಮ್ಹಜ್ಯಾ ಪಸಂದೆಚೆ. ಹೆ ಚವ್ಗ್ಯೀ ಸಾಹಿತಿ ಆಜ್ ದೆವಾರಾಜಾಂತ್ ಆಸಾತ್.
ಸ: ತುಮ್ಕಾಂ ಸಾಹಿತ್ಯಾಂತ್ ಚಡ್ ಪಸಂದೆಚೊ ಪ್ರಕಾರ್ ಖಂಚೊ? ಆನಿ ಕಿತ್ಯಾಕ್?
ಜಾ: ಕಾಲ್ಪನಿಕ್, ಪುಣ್ ಸ್ವಾಭಾವಿಕ್ಪಣಾಚ್ಯಾ ಕಥಾ ವಸ್ತುಚ್ಚ್ ಆಟಾಪ್ಚೆ ಕಾದಂಬರಿ ಸಾಹಿತ್ಯ್. ಹಾಂತು ಬರ್ಪ್ಯಾಕ್ ಬರವ್ನ್ ಬರವ್ನ್ ಸಂಪಾನಾ ತಿತ್ಲೆಂ ಸಾಹಿತ್ಯ್ ರಚುಂಕ್ ಸ್ವತಂತ್ರ್ಪಣಿ ಆವ್ಕಾಸ್ ಆಸಾ. ಹ್ಯಾ ಧ್ವಾರಿಂ ಸಾಹಿತ್ಯಾಂತ್ ತಾಣೆಂ ಬರ್ಫೂರ್ ಅಭಿವೃದ್ದೆಚಿ ಕ್ರಾಂತಿ ಕರ್ಯೆತ್.
ಸ: ತುಮ್ಚ್ಯಾ ಸಾಹಿತ್ಯಾಕ್ ವಾಖಣುನ್ ಜಾಯಿತ್ತ್ಯಾ ಅಭಿಮಾನಿನಿ ತುಮ್ಕಾಂ ಪತ್ರಾಂ ಬರಯ್ಲ್ಯಾಂತ್ ಆಸ್ತೆಲಿಂ. ತ್ಯಾ ವಿಶಿಂ ತುಮ್ಚೆ ವಿಚಾರ್ ಕಸ್ಲೆ?
ಜಾ: ಮ್ಹಜ್ಯಾ ಸಾಹಿತ್ಯಾ ಥಂಯ್ ಪತ್ರಾಂಚೆ ವಾಚ್ಪಿ ಅಕರ್ಸುನ್ ಮ್ಹಜೆ ಅಭಿಮಾನಿ ಜಾಲ್ಯಾತ್ ಮ್ಹಳ್ಳೊ ಸಂತೊಸ್. ಮ್ಹಜ್ಯಾ ಸಾಹಿತ್ಯಾವರ್ವಿಂ ಕೊಂಕ್ಣಿ ಭಾಸೆಚಿ ಅಭಿವೃದ್ಧಿ ಜಾಲ್ಯಾ ಆನಿ ಮಾಯ್ಭಾಸೆಚೆ ವಾಚ್ಪಿ ಚಡ್ಲ್ಯಾತ್ ಮ್ಹಳ್ಳಿ ತೃಪ್ತಿ. ಮ್ಹಜ್ಯಾ ಸಾಹಿತ್ಯಾ ಥಂಯ್ ವೊಡೊನ್ ಗೆಲ್ಲೊ ವಾಚ್ಪಿ ಕೊಂಕ್ಣಿ ಪತ್ರಾಂಚೆ ಕಾಂಯ್ ಗ್ರಾಹಕ್ ಜಾಲ್ಯಾತ್ ಆನಿ ಹ್ಯಾ ಧ್ವಾರಿಂ ಆಮ್ಚಾ ಕೊಂಕ್ಣಿ ಪತ್ರಾಂಚೊ ಪ್ರಚಾರ್ ವಾಡೊಂಕ್ ಕಾರಾಣ್ ಜಾಲಾ ಮ್ಹಳ್ಳ್ಯಾಚಿ ರುಜ್ವಾತ್. ತಶೆಂಚ್ಚ್ ಮ್ಹಜ್ಯಾ ಸಾಹಿತ್ ಸೆವೆಕ್ ಲಾಭ್ಲೆಲ್ಯೊ ಪ್ರಶಸ್ತ್ಯೊ ಮ್ಹಳ್ಳೆ ಭಗಾಪ್. ತಶೆಂಚ್ಚ್ ಮ್ಹಾಕಾ ಫುಡೆಂ ವಚೊಂಕ್ ಲಾಭ್ಲೊಲೊ ಪ್ರೋತ್ಸಾಹ್.
ಸ: ಕೊಂಕ್ಣೆಚಿ ಆಯ್ಚಿ ಪರಿಗತ್ ಕಶಿ ಆಸಾ? ಕೊಂಕ್ಣಿ ಲಿಪಿ, ಪತ್ರಾಂ, ಕೊಂಕ್ಣಿ ವೆಬ್ಸಾಯ್ಟಾಂ, ಇಸ್ಕೊಲಾಂನಿ ಕೊಂಕ್ಣಿ ಪಾಠ್ ಹೆಂ ಸರ್ವ್ ಕೊಂಕ್ಣೆಚ್ಯಾ ವಾಡಾವಳೆಕ್ ಉಪ್ಕಾರ್ತಿತ್?
ಜಾ: ಪ್ರಸ್ತುತ್ ಕೊಂಕ್ಣೆಚಿ ಪರಿಗತ್ ದೋನ್ ದಿಕ್ಕಾಂನಿ ವಾಳ್ತೇ ವೆತಾ. ಎಕಾ ರುಕಾಕ್ ಎಕೆ ಕುಶೆನ್ ತರ್ನೆ ತರ್ನೆ ನವೆ ನವೆ ಕೊಂಬ್ರೆ ಫುಟೊನ್ ಯೆತಾತ್ ಆನಿ ಆನ್ಯೇಕಾ ಮುಳಾ ಥಾವ್ನ್ ವ್ಹಾಳಯ್ ಚರೊನ್ ಯೆಂವ್ಚಿ ದಿಸ್ತಾ. ಜಾಲ್ಯಾರೀ, ಆಯ್ಲೆವಾರ್ಚಾ ಕೊಂಕ್ಣಿ ಅಭಿಮಾನಿಂಚ್ಯಾ ಖಳ್ಮಿತ್ ನಾತ್ಲ್ಲ್ಯಾ ಕೊಂಕ್ಣಿ ವಿಕಾಸಾಚ್ಯಾ ಪ್ರಯತ್ನಾಂಚೊ ಬರೊ ಫಳ್ ದಿಸೊನ್ ಯೆತಾ. ಹ್ಯಾ ಪ್ರಯತ್ನಿಕ್ ವಾವ್ರಾಂತ್ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ, ಕೊಂಕ್ಣಿ ಲೇಖಕಾಂಚೊ ಎಕ್ವಟ್, ಕೊಂಕ್ಣಿ ಭಾಷಾಮಂಡಳ್, ಕೊಂಕ್ಣಿ ವೆಬ್ಸಾಯ್ಟಾಂ, ಕೊಂಕ್ಣಿ ಪತ್ರಾಂ ದೀಸ್ ರಾತ್ ವಾವುರ್ತಾತ್. ಪುಣ್ "ಲಿಪಿ"ಚ್ಯಾ ವಾದಾಂತ್ ಥೊಡೆ ವಿಚಾರ್ವಾದಿ ಅಂಧ್ಕಾರಾಂತ್ ದೊಳೆ ಧಾಪುನ್ ತಾಲ್ವಾರಿ ಬಿಜಾಯ್ತಾತ್. ಆಸಲ್ಯಾಂಕ್ ಕಾಳೊಕಾಂತ್ಚ್ಚ್ ಸೊಡ್ನ್ ಆಮ್ಚಾ ಮಾಜ್ರಾ ದೃಶ್ಟೆಚೆ ಕೊಂಕ್ಣಿ ಮೋಗಿ ಅನಿ ಫುಡಾರಿ ಮುಖಾರ್ ಪಾವ್ಲ್ಯಾತ್. ಆನಿ ಶಾಳೆಂನಿ ಕೊಂಕ್ಣಿ ಭಾಸೆನ್ ಪಾಠ್ ಶಿಕಂವ್ಚಾ ಪ್ರಯತ್ನಾಂತ್ ಜಯ್ತೆವಂತ್ ಜಾಲ್ಯಾತ್. ಶಾಳೆಂನಿ ಕೊಂಕ್ಣಿ ಶಿಕಯಿಲ್ಲ್ಯಾನ್ ಕೊಂಕ್ಣೆಚ್ಯಾ ವಾಡಾವಳಿಕ್ ಮೊಟೆಂ ಪಾಳ್ ಫುಟ್ಲ್ಲೆ ಬರಿ ಜಾವ್ನ್ ಕೊಂಕ್ಣೆಚೊ ವಿಕಾಸ್ ಜಾತಲೊ ....
ಪುಣ್ !! ಆನ್ಯೇಕಾ ಮುಳಾ ತಾವ್ನ್ ಭಿತರ್ ಸರೊನ್ ಭರಾನ್ ವಯ್ರ್ ಚಡ್ಚಿ "ಇಂಗ್ಲೀಷ್ ಮಾಧ್ಯಮ್" ಮ್ಹಳ್ಳಿ ವ್ಹಾಳಯ್ ಮಾತ್ರ್ ಕೊಂಕ್ಣೆಚ್ಯಾ ವಿಕಾಸಾಂತ್ ಏಕ್ ಕಾಂಟೊ ಜಾವ್ನ್ ವಾಡೊನ್ಂಚ್ ವೆತಾ. ಆವಯ್ ಬಾಪಾಂಯ್ನಿ ಅಪ್ಲ್ಯಾ ಭುರ್ಗ್ಯಾಂಲಾಗಿಂ ಘರಾಂತ್ ಕೊಂಕ್ಣಿ ಉಲಂವ್ಕ್, ಬರಂವ್ಕ್, ವಾಚುಂಕ್ ದಬಾವ್ ಘಾಲ್ಚಿ ಗರ್ಜ್. ಪುಣ್ ಜಾಯಿತ್ತಿ ವ್ಹಡಿಲಾಂ ಅಪ್ಲ್ಯಾ ಭುರ್ಗ್ಯಾಂಕ್ ಕೊಂಕ್ಣಿ ಥಾವ್ನ್ ಪಯ್ಸ್ ಕರ್ನ್ ಇಂಗ್ಲೀಷ್ ಮ್ಹಳ್ಳ್ಯಾ ಪಿಂಜ್ರ್ಯಾಂತ್ಚ್ ವ್ಹಾಡಂವ್ಚೆ ಪ್ರಯತನ್ ಕರ್ತಾತ್. ಅಪ್ಣಾಕ್ ಕೊಂಕ್ಣಿ ಕಳಿತ್ ಆಸ್ಲ್ಯಾರ್ಯೀ, ಇಂಗ್ಲೀಷಾನ್ ಉಲಂವ್ಚೆ, ಇಂಗ್ಲೀಷಾನ್ಂಚ್ ಖಾಂವ್ಚೆ, ಜೆಂವ್ಚೆ, ಪಿಯೆಂವ್ಚೆ, ಇಂಗ್ಲೀಷ್ ಸಂಸ್ಕ್ರತೆಕ್ ವೆಂಗ್ಚೆ. ಹೊ ಕೊಂಕ್ಣೆಕ್ ಕರ್ಚೊ ಆಕ್ಮಾನ್ ಜಾವ್ನಾಸಾ ಆನಿ ಕೊಂಕ್ಣೆಚ್ಯಾ ವಾಡಾವಾಳೆಕ್ ಮಾರ್ಚಿ ಕುರಾಡ್. ಹಿಚ್ಚ್ ತಿಂ ಕೊಂಕ್ಣೆಕ್ ಲಾಗ್ಲ್ಲಿ ವ್ಹಾಳಯ್, ಜರ್ ಸುಟಂವ್ಚೆ ಪ್ರಯತ್ನ್ ಕೆಲೆಂ, ತವಳ್ ಮಾತ್ರ್ ಕೊಂಕ್ಣೆಚ್ಯಾ ವಾಡಾವಳೆಕ್ ಬರ್ಪೂರ್ ಈಟ್ ಮೆಳಾತ್.
ಸ: ಆತಾಂಚ್ಯಾ ತರ್ನ್ಯಾ ಬರವ್ಪ್ಯಾಂ ವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜಾ: ಆತಾಂಚೆ ಥೊಡೆ ತರ್ನೆ ಬರವ್ಪಿ ಅಪ್ಲಿಂ ಎಕ್ ದೋನ್ ಬರ್ಪಾಂ ಛಾಪುನ್ ಆಯ್ಲಿಂ ಮ್ಹಣ್ತೆಚ್ಚ್ ಅಪುಣ್ ವ್ಹಡ್ "ಸಾಹಿತಿ ಜಾಲೊ" ಮ್ಹಳ್ಳ್ಯಾ ಭಗ್ಣಾಂಚೆ ಜಾಂವ್ಕ್ ಪಾವ್ತಾತ್. ಸಂಪಾದಕಾನ್ "ತೊ ಮುಖಾರ್ ಯೇಂವ್ದಿ" ಮ್ಹಳ್ಳ್ಯಾ ಪ್ರೋತ್ಸಾಹಿಕ್ ಭಗ್ಣಾಂನಿ ತಾಚೆ ಲೇಖನ್ ವಯ್ಲ್ಯಾಬಾರ್ ಪಳೆವ್ನ್ ಫಾಯ್ಸ್ ಕೆಲ್ಲೆಂಯ್ ಆಸ್ಯೆತ್. ಪುಣ್ ತ್ಯಾ ಬರ್ಪಾಂನಿ ಖರೆಂಪಣಿ ಆಸ್ಲ್ಲ್ಯೊ ಸಭಾರ್ ಚುಕಿ ತೆಂ ತರ್ನೆ ಬರವ್ಪಿ ಮಾಂದುನ್ ಘೆಂವ್ಕ್ ತಯಾರ್ ಆಸಾನಾಂತ್. ತಸಲ್ಯಾಂಚ್ಯಾ ಬರ್ಪಾಂನಿ, ಕಾಣಿಯೊಂ, ಕಾದಂಬರಿಂನಿ ಚುಕಿ ಆನಿ ಅಸ್ವಾಭಾವಿಕತಾ ಭರೊನ್ ಆಸ್ತಾತ್. ತಸಲೆ "ಬರೆ ಬರವ್ಪಿ’ ಮ್ಹಣೊಂಕ್ ಜಾಯ್ನಾಂ. ಆಸಲ್ಯಾಂಕ್ ತರ್ಭೆತ್ ಕರ್ಚೆ ಖಾತಿರ್ ಕೊಂಕ್ಣಿ ಲೇಖಕಾಂಚೊ ಎಕ್ವಟ್ ಆನಿ ಸಮನ್ವಯ ಮಂಗ್ಳುರ್ ಹಾಣಿ ಫಿರ್ಗಜ್ ಫಿರ್ಗಜಾಂನಿ ತರ್ಭೆತಿ ಶಿಬಿರಾಂ ದವರ್ನ್ ಕಾಣಿಯೊ, ಲೇಖನಾ, ವರ್ದ್ಯೊ, ಖಬ್ರೊ, ಕವಿತಾಂ ಬರಂವ್ಕ್ ಶಿಕಂವ್ಚಿ ಪ್ರಯತ್ನಾಂ ಕೆಲಿಂ. ಪುಣ್ ಹ್ಯಾ ಶಿಬಿರಾಂಕ್ ಅಪೇಕ್ಷಿತ್ ಸಂಖ್ಯಾಚೆ ತರ್ನೆ ಬರವ್ಪಿ ಹಾಜರ್ ಜಾಲೆನಾಂತ್. ಬರವ್ಪಿ ತೊ ಕೆದೊಯ್ ಸಾಹಿತಿ ಜಾಂವ್ದಿ ತಾಚೆ ಥಂಯ್ ಖಾಲ್ತೆಂಪಣ್ ಆನಿ ಲಾನ್ವಿಕಾಯ್ ಆಸಾಜೆ. ಬರವ್ಪಿ ತೊ ಕಿತ್ಲೊಯ್ ಬುಧ್ವಂತ್ ಜಾಂವ್, ಅಪ್ಣಾಕ್ ಆನಿಕ್ಯೀ ಶಿಕೊಂಕ್ ಆಸಾ, ಅಪುಣ್ ಸರ್ವಜ್ಞ್ ನ್ಹಂಯ್ ಮ್ಹಳ್ಳೆ ಚಿಂತಾಪ್ ಬರವ್ಪ್ಯಾಂ ಥಂಯ್ ಉಣೆಂ ಆಸಾ.
ಸ: ಕೊಂಕ್ಣೆಂತ್ ಲಾಂಬ್ ಕಾದಂಬರಿ ಮ್ಹಣ್ ದಾಖ್ಲ್ಯಾರ್ ಆಸ್ಲ್ಲ್ಯಾ ದೆ| ಎ.ಟಿ. ಲೋಬೊಚ್ಯಾ "ವೇಳ್ ಘಡಿ" ಕಾದಂಬರಿಚೊ ದಾಖ್ಲೊ ಮೋಡ್ನ್ ತುಮಿ ತಾಚ್ಯಾಕೀ ಲಾಂಬ್ ಕಾದಂಬರಿ ’ಪ್ರತೀಕಾರ್’ ಬರವ್ನ್ ದಾಖ್ಲೊ ಅಪ್ಣಾಯ್ಲೊ. ಹ್ಯಾ ವಿಶಿಂ ತುಮ್ಚಿ ಮಹತ್ವಾಕಾಂಕ್ಷಾ ಕಸಲಿ ಆಸ್ಲ್ಲಿ?
ಜಾ: "ವೇಳ್ ಘಡಿ"ಚೊ ದಾಖ್ಲೊ ಮೊಡ್ಚೊ ಮ್ಹಜೊ ಇರಾದೊ ಬಿಲ್ಕುಲ್ ನ್ಹಂಯ್, ಪುಣ್ ಸಂಸಾರಾಂತ್ ಸ್ವತಾಚ್ಯಾ ಪ್ರಯತ್ನಾನ್ ಮುಖಾರ್ ವೆಚೆಂ ಹಕ್ಕ್ ಹರ್ಯೇಕ್ಲ್ಯಾಕ್ ಆಸಾ. ಮ್ಹಜ್ಯಾನ್ಯೀ ಏಕ್ ಲಾಂಬ್ ಕಾದಂಬರಿ ಕಿತ್ಯಾಕ್ ಬರಂವ್ಕ್ ನ್ಹಜೊ? ಜರ್ತರ್ ವಾಚ್ಪಿ ಮ್ಹಜ್ಯಾ ಸಾಂಖಳ್ ಕಾಣಿಯಾಂ ಥಂಯ್ ಇತ್ಲೆ ಆಕರ್ಷಿತ್ ಜಾಲ್ಯಾತ್ ಆಸ್ತಾಂ ಹಾವೆಂ ಪಾಟಿಂ ರಾಂವ್ಚೆ ಲಕ್ಷಣ್ ನ್ಹಂಯ್. ಹಾಂವ್ಯೀ ಬರಯ್ತಲೊಂ, ಉತ್ತೀಮ್ ಕಥಾವಸ್ತ್ ರಚ್ತಲೊ ಮ್ಹಳ್ಳೆಂ ಏಕ್ ಹಠ್ ಹಾಂವೆ ಪೊಂತಾಕ್ ಪಾವಯ್ಲೆಂ. ಆನಿ 198 ಅವಸ್ವರಾಂಚೆ(ವೇಳ್ ಘಡಿ 131 ಅವಸ್ವರ್) "ಪ್ರತೀಕಾರ್" ಬರೈಲಿ. ಉಪ್ರಾಂತ್ "ಪಾಪ್ ಆನಿ ಶಿರಾಪ್" 219 ಅವಸ್ವರಾಂಚಿ ಆನ್ಯೇಕ್ ದಿಗಾಯೆಚಿ ಕಾದಂಬರಿ ಬರವ್ನ್ ಆನ್ಯೇಕ್ ದಾಖ್ಲೊ ರಚ್ಲೊ. ತೊ ಆತಾಂಯ್ ಚಾಲ್ತೇರ್ ಆಸಾ. ಮ್ಹಜಿ ಮಹತ್ವಾಕಾಂಕ್ಷಾ ಹಿಚ್ಚ್ ಜಾವ್ನಾಸ್ಲ್ಲಿ.
ಸ: ತುಂಮಿ ಕೊಂಕ್ಣೆಂತ್ ಚಡ್ ಫಾಮಾದ್, ಪುಣ್ ತುಮ್ಚಾ ಸರ್ವ್ ಕಾದಂಬರಿಂನಿ "ಫಾರಿಕ್ಪಣ್" ಉಟೊನ್ ದಿಸ್ಚೆ ಅಂಶ್ ವಾಚುಂಕ್ ಮೆಳ್ತಾತ್ ಕಿತ್ಯಾಕ್? ಜಶೆಂ ಎ.ಟಿ. ಲೋಬೊಚ್ಯಾ " ತುಂ ಬರೊ ಜಾ" ಕಾದಂಬರಿ ಬರಿ ತುಮ್ಚಿ ಖಂಚಿಚ್ಚ್ ಕಾದಂಬರಿ ನಾ. ಆಶೆಂ ಚಡಾವತ್ ವಾಚ್ಪಿ ಮ್ಹಣ್ತಾತ್. ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ಎ.ಟಿ. ಲೋಬೊಚ್ಯಾ ಆನಿ ಮ್ಹಜ್ಯಾ ಕಥಾವಸ್ತುಂತ್ ಮಸ್ತ್ ಫರಕ್ ಅಸಾ. ತಾಚ್ಯಾ ಆನಿ ಮ್ಹಜ್ಯಾ ಕಾಲ್ಪನಿಕ್ ಚಿಂತ್ಪಾಧಾರೆಂತ್ ವೆವೆಗ್ಳೆ ವಿಚಾರ್ ಆಸಾತ್. ತೊ ಖಂಚೊಯ್ ಏಕ್ ವಿಷಯ್ ಘೆವ್ನ್ ತ್ಯಾಚ್ ವಿಷಯಾಚೆರ್ ಅಪ್ಲಿ ಕಥಾ ಬರಯ್ತೇ ವೆತಾ ತರ್, ಹಾಂವ್ ಮನ್ಶಾಚ್ಯಾ ಜಿವಿತಾ ಆವ್ದೆಂತ್ ರೆವ್ಡೊನ್ ಆಸ್ಚೆ ಸರ್ವ್ ವಿಷಯ್ ಪಿಂತ್ರಾಯ್ತಾ. ಹಾಂತು ಮೋಗ್, ರಾಗ್, ಹಗೆಂ, ದ್ವೇಷ್, ಫಾರಿಕ್ಪಣ್, ಸೊಸ್ಣಿಕಾಯ್, ತ್ಯಾಗ್ ಸರ್ವ್ ಆಟಾಪ್ತಾ. ಹೆಂಚ್ಚ್ ಜಿವಿತ್ ಏಕ್ ಕಾದಂಬರಿ ಜಾವ್ನ್ ಹಾಂವೆ ಪಿಂತ್ರಾಯ್ತಾನಾ, ಫಾರಿಕ್ಪಣ್ ತಾಂತ್ಲೊ ಏಕ್ ವಾಂಟೊ ಜಾಯ್ಜಯ್ಚ್ಚ್. ಆನಿ ಫಾರಿಕ್ಪಣಾಚ್ಯಾ ಸನ್ನಿವೇಶಾಂ ಥಂಯ್ ವಾಚ್ಪಿ ಚಡ್ ಆತುರಾಯ್ ದಾಕಯ್ತಾತ್. ಮ್ಹಜ್ಯಾ ಹರ್ ಕಾದಂಬರಿಂನಿ ಬರೆಂ ವಾಯ್ಟ್ ಉಟೊನ್ ದಿಸ್ತಾ. ಬರ್ಯಾಕ್ ಕಸ್ಟಾ ಉಪ್ರಾಂತ್ ಸುಖ್, ವಾಯ್ಟಾಕ್ ಫಾವೊತಿ ಸಜಾ ಹ್ಯಾಚ್ಚ್ ಸಂಸಾರಾಂತ್ ಮೆಳ್ತಾ ಮ್ಹಳ್ಳೆ ದಾಖವ್ನ್ ದಿಂವ್ಚ್ಯೊ ಕಥಾ ವಸ್ತು ಮ್ಹಜ್ಯಾ ಕಾದಂಬರಿಂಚೊ ಜೀವ್ ಜಾವ್ನಾಸಾತ್ ಮ್ಹಣ್ತೆಚ್ಚ್ ಎ.ಟಿ. ಲೋಬೊಚ್ಯಾ ಆನಿ ಮ್ಹಜ್ಯಾ ಕಾಣಿಯಾಂ ಥಂಯ್ ವಾಚ್ಪ್ಯಾಂಕ್ ಫರಕ್ ದಿಸ್ಚೆಂ ಸ್ವಾಭಾವಿಕ್ ಜಾವ್ನಾಸಾ ನ್ಹಂಯ್ಗೀ?
ಸ: ಕೊಂಕ್ಣೆಂತ್ ತುಮಿ ರಚ್ಲೆಲ್ಯಾ ದಾಖ್ಲ್ಯಾಂಚಿ ಏಕ್ ಝಳಕ್ ದಾಕಯ್ಶ್ಯಾತ್ಗೀ?
ಜಾ: ವ್ಹಡಾ ಅಬಿಮಾನಾನ್, ಪ್ರತೀಕಾರ್(198), ಪಾಪ್ ಆನಿ ಶಿರಾಪ್(219) ಕೊಂಕ್ಣೆಂತ್ಲ್ಯೊ ದಿಗಾಯೆಚ್ಯೊ ಕಾದಂಬರಿ ಮ್ಹಳ್ಳೊ ಮ್ಹಜೊ ದಾಖ್ಲೊ. ಎಕಾಚ್ ಕಾಳಾರ್ 5 ಪತ್ರಾಂನಿ 5 ಸಾಂಖಳ್ ಕಾಣಿಯೊ ಪ್ರಗಟ್ ಜಾಲ್ಲೊ ಆನ್ಯೇಕ್ ದಾಖ್ಲೊ. 13 ಕಾದಂಬರಿ ದೊದೋನ್ ಪಾವ್ಟಿಂ, 2 ಕಾದಂಬರಿ 3 ಪಾವ್ಟಿಂ ಪ್ರಗಟ್ ಜಾಲ್ಲೊ ಆನೇಕ್ ದಾಖ್ಲೊ. ಕೊಂಕ್ಣೆಂತ್ ಪಯ್ಲೆ ಪಾವ್ಟಿಂ ಟಿ.ವಿ. ಮೆಗಾಸೀರಿಯಲ್ ಜಾವ್ನ್ "ಪಾಪ್ ಆನಿ ಶಿರಾಪ್" ಮ್ಹಜಿ ಕಾದಂಬರಿ ವೆಗಿಂಚ್ಚ್ ಟಿ.ವಿ.ರ್ ಪ್ರಸಾರ್ ಜಾಂವ್ಚೊ ಆನ್ಯೇಕ್ ದಾಖ್ಲೊ. "ಪ್ರಜಾರಂಗ" ಮ್ಹಳ್ಳ್ಯಾ ಕನ್ನಡ ಮಾಸಿಕ್ ಪತ್ರಾರ್ ಮುಖ್ಪಾನಾರ್ ಮ್ಹಜಿ ತಸ್ವೀರ್ ಛಾಪುನ್ ಸಂಪಾದಕಾನ್ಂಚ್ 11 ಪಾನಾಂಚೆ ಮ್ಹಜೆಂ ಸಂದರ್ಶನ್ ಘೆವ್ನ್ ಅಂಖೊ ಪ್ರಗಟ್ಲೊಲೊ, ಎಕಾ ಕೊಂಕ್ಣಿ ಬರೆಯ್ಣಾರಾಕ್ ಕನ್ನಡ ಪತ್ರಾನ್ ಅಪ್ಲ್ಯಾ ಪತ್ರಾರ್ ಪ್ರಚಾರ್ ದಿಲ್ಲೊ ಆನ್ಯೇಕ್ ದಾಖ್ಲೊ. ಕೊಂಕ್ಣೆಂತ್ ಹಾಂವೆ ಬರಯಿಲ್ಲೊ "ಭಲಾಯ್ಕೆ ದಾಯ್ಜ್ 300 ಪಾನಾಂಚೊ ಪುಸ್ತಕ್ ಭೋವ್ಚ್ಚ್ ಮಟ್ವ್ಯಾ ಅವ್ದೆರ್ 6000 ಪ್ರತಿಯೊ ವಿಕೊನ್ ಗೆಲ್ಲೊ ಆನ್ಯೇಕ್ ದಾಖ್ಲೊ ..... ಆಸಲೆ ದಾಖ್ಲೆ ಕೊಂಕ್ಣಿ ಸಾಹಿತಿಕ್ ಶೆತಾಂತ್ ಮ್ಹಜೆ ಮಾತ್ರ್" ಮ್ಹಣ್ ಹಾಂವ್ ಮಾಂಯ್ ಭಾಸೆಚ್ಯಾ ಅಭಿಮಾನಾನ್ ಸಾಂಗ್ತಾ.
ಸ: ಕೊಂಕ್ಣಿ ವೆಬ್ಸಾಯ್ಟಾಂ ವಿಶಿಂ ಆನಿ ತಾಂಚ್ಯಾ ಕೊಂಕ್ಣಿ ವಾವ್ರಾವಿಶಿಂ ತುಮ್ಚಿ ಅಭಿಪ್ರಾಯ್ ಕಸ್ಲಿ?
ಜಾ: ಹೆ ಕೊಂಕ್ಣೆಚೆ ಖರೆ ಮೋಗಿ, ಭೋವ್ ಉಂಚ್ಲೆಂ ಕಾಮ್ ಕರ್ತಾತ್. ಅಪ್ಲ್ಯಾ ವೆಬ್ಸಾಯ್ಟಾಂ ಮುಖಾಂತ್ರ್ ವಿವಿಧ್ ಪ್ರಕಾರಾಂನಿ ಹಾಣಿಂ ಕರ್ಚಿ ಕೊಂಕ್ಣೆಚಿ ಸೆವಾ ವಾಖಣ್ಚೆ ತಸಲಿ. ಹ್ಯಾ ವೆಬ್ಸಾಯ್ಟಾಂ ಮುಖಾಂತ್ರ್ ಕೊಂಕ್ಣಿ ಮಾಂಯ್ಭಾಸೆಚೊ ಅವಾಜ್ ಆನಿ ಗ್ರೇಸ್ತ್ಕಾಯ್ ಸಗ್ಳ್ಯಾ ಸಂಸಾರಾಚ್ಯಾ ಕೊನ್ಶಾಂ ಕೊನ್ಶಾಂನಿ ಶಿಂಪ್ಡೊನ್ ಆಸ್ಲ್ಲ್ಯಾ ಕೊಂಕ್ಣಿ ಪ್ರಜೆಕ್ ಪಾವಂವ್ಚೆಂ ತಾಂಚೆ ಸಾಹಸ್ ವರ್ತೆಂ. ಹ್ಯಾ ವರ್ವಿಂ ಕೊಂಕ್ಣೆಚೊ ಬರೊಚ್ ಪ್ರಚಾರ್ ಜಾಲಾ, ವಿಕಾಸ್ ಜಾಲಾಂ, ಅಭಿವೃದ್ಧಿ ಜಾಲ್ಯಾ. ಹಾಂಕಾ ಹೊಗ್ಳಿಕ್ ದೀಜಾಯ್.
ಸ: ದಾಯ್ಜ್.ಕೋಮ್ ವಿಶಿಂ ತುಮ್ಚೆ ವಿಚಾರ್ ಆನಿ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: "ದಾಯ್ಜ್.ಕೋಮ್" ಹ್ಯಾ ವಿಶಿಂ ಉಲಂವ್ಕ್ ನಾ. ಪಕ್ಕಾ! ಕೊಂಕ್ಣಿ ಮಾಂಯ್ ಭಾಸೆಚಿ ಪುಷ್ಠಿಕಾಯೆನ್ ಸೆವಾ ಕರ್ಚಾ ಶ್ರೇಷ್ಠ್ ವೆಬ್ಸಾಯ್ಟಾಂ ಪಯ್ಕಿ "ದಾಯ್ಜ್.ಕೋಮ್" ಏಕ್ ಜಾವ್ನಾಸಾ. ತುಮ್ಚಾ ದಾಯ್ಜಾಂತ್ಲೆ ವಾವ್ರಾಡಿ, ಕೊಂಕ್ಣಿ ಮೋಗಿ, ಅಪ್ಲ್ಯಾ ಸಾಧನಾಂತ್ ದಿಸಾಂದೀಸ್ ಅಭಿವೃದ್ಧೆಚ್ಯಾ ಪಾವ್ಲಾಂನಿ ಶಿಖರ್ ಚಡ್ಚೆಂ ದಿಸೊನ್ ಯೆತಾ. ಆಸೊಚ್ಚ್ ತುಮ್ಚೊ ವಾವ್ರ್ ಮುಖಾರ್ ವಚೊಂದಿ. ವಾಡೊನ್ ಯೆಂವ್ಚಾ ಪಿಳ್ಗೆಕ್, ಜೆಂ ಜಲ್ಮಾತಾನಾಂಚ್ಚ್ ಕೊಂಕ್ಣಿ ಅವಯ್ಚಾ ಉಸ್ಕ್ಯಾರ್ ಜಲ್ಮಾತಾ ಆನಿ ಇಂಗ್ಲೀಷ್ಮಾಯೆಚೊ ಮೊಮೊ ಖಾತಾ, ತಸಲ್ಯಾಂಕ್ ಪಾಟಿಂ ವೊಡುನ್ ಅಪ್ಲ್ಯಾ ಖರ್ಯಾ ಅವಯ್ಚೆ ಅಪುಟ್ ದೂದ್ ಚುವಂವ್ಚೆಂ ಸಾಧನ್ ದಾಯ್ಜ್.ಕೋಮ್ ಕರ್ತೇ ಆಸೊಂದಿ. ಆನಿ ಹರ್ ಕುಟ್ಮಾಂನಿ, ಹರ್ ಕೊಂಕ್ಣಿ ಮನ್ಯಾಂಚ್ಯಾ ಶಿರಾಂನಿ ಕೊಂಕ್ಣಿ ಮಾಂಯ್ಭಾಸೆಚೊ ಸ್ಪಿರಿತ್ ಉಮಾಳೊನ್ ವಾಡೊನ್ ಭರುನ್ ಯೆಂವ್ದಿ. ಹ್ಯಾ ವಾವ್ರಾಂತ್ ದಾಯ್ಜ್.ಕೋಮ್ ತುಮ್ಕಾ ಹಾಂವ್ ಜಯ್ತ್ ಮಾಗ್ತಾಂ.
ಸ: ದೇವ್ ಬರೆಂ ಕರುಂ ತುಮ್ಕಾಂ ವಿಕ್ಟರಾಬಾ, ತುಮ್ಚೊ ಅಮೂಲ್ಯ್ ವೇಳ್ ಆಮ್ಕಾ ದಿಲ್ಲ್ಯಾ ಖಾತಿರ್.
ಜಾ: ದೇವ್ ತುಮ್ಕಾಂಯೀ ಬರೆಂ ಕರುಂ. ಧನ್ಯವಾದ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
