ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲವ್ಪಿಣ್: ಪ್ರಿಯಾ ಸಿಕ್ವೇರಾ ಫೆರಾರ್, ಕುವೇಯ್ಟ್
ಲ್ಯಾನ್ಸಿ ಪಿಂಟೊ ನಾಯಕ್
ಸಾಹಿತಿವಿಶಿಂ ದೋನ್ ಉತ್ರಾಂ:
ಕೊಂಕ್ಣೆಂತ್ ಕಾದಂಬರಿಕಾರ್ ಜಾವ್ನ್, ವಿಡಂಬನ್ಕಾರ್ ಜಾವ್ನ್, ನಾಟಕ್ಕಾರ್ ಜಾವ್ನ್, ನಟ್ ಜಾವ್ನ್, ನಿರ್ದೇಶಕ್ ಜಾವ್ನ್, ತರ್ಭೆತೆದಾರ್ ಜಾವ್ನ್, ಕವಿ ಜಾವ್ನ್, ವಿಮರ್ಶಕ್ ಜಾವ್ನ್ ಫಾಮಾದ್ ಜಾಲ್ಲೊ ಲ್ಯಾನ್ಸಿ ಪಿಂಟೊ ನಾಯಕ್ ಏಕ್ ಸಂಘಟಕ್ಯೀ ಜಾವ್ನಾಸಾ.
ಸಂವಾದ್:
1. ಏಕ್ ಸಾಹಿತಿ ಜಾವ್ನ್ ಕೊಂಕ್ಣಿ ಸಾಹಿತ್ಯಾಚಾ ಆಯ್ಚಾ ಪರಿಗತೆಚೆರ್ ಜೆರಾಲ್ ರಿತಿನ್ ತುಮ್ಚೆ ವಿಚಾರ್ ಕಸಲೆ ಆನಿ ಕಿತ್ಯಾಕ್?
ವೆಳಾ ತೆಕಿದ್ ಕೊಂಕ್ಣಿ ಸಾಹಿತ್ಯ್ ಕ್ಶೇತ್ರಾಂತ್ ಮಸ್ತ್ ಬದ್ಲಾವಣ್ ಜಾಲ್ಯಾ. ಪ್ರಗತಿಚ್ಯಾ ದಿಶೆಂತ್ ಬಳಿಶ್ಟ್ ಮೆಟಾಂ ಕಾಡುನ್ ಆಸಾ. ಎಕಾ ಸಾಹಿತಿನ್ ಚಿಂತಿಜಾಯ್, ವಿಚಾರ್ ಕರಿಜಾಯ್, ಬರಯ್ಜಾಯ್. ಕಸಲೊಯಿ ಆಡ್ಕಳ್ಯೊ ಆಯ್ಲ್ಯಾರಿ ಬರವ್ನ್ಂಚ್ ವಚಾಜಾಯ್. ತೆದಾಳಾ ಮಾತ್ರ್ ಅಬಿವೃದ್ಧಿ ಸಾಧ್ಯ್ ಆಸಾ. ಬಾಪಾಯ್ನ್ ಪಳೆಂವ್ಕ್ ಸಕಾನಾತ್ಲ್ಲೆಂ ಪೂತ್ ಪಳೆಂವ್ಕ್ ಸಕ್ತಾಂ. ಚಿಮ್ಣಿಚ್ಯಾ ಉಜ್ವಾಡಾ ಥಾವ್ನ್ ಎಲೆಕ್ಟ್ರಿಸಿಟಿ ಆಯ್ಲಿ. ಹಿ ಏಕ್ ಬದ್ಲಾವಣ್ ಆನಿಂ ಅಬಿವೃದ್ಧಿ. ತಶೆಂಚ್ ನವ್ಯಾ ಸಾಹಿತಿಂ ಥಾವ್ನ್ ನವೆಂ ಆನಿಂ ಬರೆಂ ಸಾಹಿತ್ಯ್ ಯೇಜಾಯ್. ತಶೆಂಚ್ ಎಕಾ ಸಾಹಿತಿ ಥಂಯ್ ಆಪೇಕ್ಶಾ, ಸಂಸ್ಕೃತಿ ಮೋಗ್ ಆನಿಂ ಕೊಂಕ್ಣೆಚಿ ಪರಿಪೂರ್ಣ್ ಆಸಕ್ತ್ ಆಸೊಂಕ್ ಜಾಯ್.
2. ತುಮ್ಚೆ ಪ್ರಕಾರ್ ಕೊಂಕ್ಣಿ ಭಾಸ್, ಕೊಂಕ್ಣಿ ಸಾಹಿತ್ಯ್ ಆಜ್ ಖಂಚ್ಯಾ ಪಾಂವ್ಡಾರ್ ಆಸಾ? ಕೊಂಕ್ಣೆಚ್ಯಾ ವಾಡಾವಳೆಕ್ ಕಸಲಿಂ ಯೋಜನಾಂ ಭೋವ್ ಗರ್ಜೆಚಿಂ?
ಮೊಟಾಯ್ ಯೆತಾನಾ ಘಟಾಯ್ ಮೆಳ್ತಾ. ಕೊಂಕ್ಣಿ ಸಾಹಿತ್ಯಾಕ್ಯಿ ಘಟಾಯ್ ಮ್ಹಣ್ಜೆಂ ಲೊಕಾ ಥಾವ್ನ್ ಸಹಕಾರ್ ಮೆಳಾಜಾಯ್. ತೆದಾಳಾ ಕೊಂಕ್ಣೆಕ್ ಮೊಟಾಯ್ ಮೆಳ್ತಾ. ಸಾಹಿತ್ಯಾಚೆ ಪ್ರಕಾರ್, ಬರಂವ್ಚ್ಯಾ ರಿತಿಂತ್ ಬದ್ಲಾವಣ್ ಯೇಜಾಯ್.
ಆತಾಂ ಗೊಂಯ್ಚಾಚೆಂ ಚಡಾವತ್ ತಿಯಾತ್ರ್ ಸಾಹಿತ್ಯ್. ಸಾಹಿತ್ಯಾಂತ್ ತಿತ್ಲಿ ಅಬಿವ್ರದ್ಧಿ ಜಾಂವ್ಕ್ ನಾಂ. ಮಂಗ್ಳುರ್ಚ್ಯಾ ಕೊಂಕ್ಣಿ ಸಾಹಿತ್ಯಾಂತ್ ಭರ್ಪೂರ್ ನವೆಂಸಾಂವ್, ಅಬಿವೃದ್ಧಿ ಜಾಲ್ಯಾ. ಸಾಹಿತಿ ಕಿತ್ಯಾಕ್ ಬರಯ್ತಾ, ತಾಚಿ ಗರ್ಜ್ ಕಿತೆಂ ಮ್ಹಣ್ ಸಾಹಿತಿನ್ ಸಮ್ಜಂವ್ಚಿ ಗರ್ಜ್. ಆಪ್ಣೆಂ ಎಕಾ ಹಂತಾಕ್ ಪಾವೊಂಕ್ ಆಸಾ ಮ್ಹಳೆಂ ಗರ್ಜೆಚೆಂ.
3. ತುಮ್ಚ್ಯಾ ಕೊಂಕ್ಣಿ ಸೆವೆಖಾತಿರ್ ಸಭಾರ್ ರಿತಿಂಚೊ ಮಾನ್-ಸಮ್ಮಾನ್/ಪುರಸ್ಕಾರ್ ತುಮ್ಕಾಂ ಲಾಭೊನ್ ಆಸ್ತಾ, ಖರೆಂಪಣಿಂ ತುಮಿ ಕೆಲ್ಲ್ಯಾ ಕೊಂಕ್ಣಿ ವಾವ್ರಾಂತ್ ತುಮ್ಕಾಂ ತೃಪ್ತಿ ಆಸಾ?
ಪಯ್ಲ್ಯಾ ಸುವಾತೆರ್ ಸಾಂಗ್ಚೆಂ ತರ್ ಮಾನ್ ಸನ್ಮಾನಾ ಖಾತಿರ್ ಹಾಂವೆಂ ಕೊಂಕ್ಣಿ ಸೆವಾ ಕೆಲ್ಲಿ ನ್ಹಂಯ್. ಸೆವಾ ತಿ ಕಾಳ್ಜಾ ಥಾವ್ನ್ ಯೇಜಾಯ್ ನ್ಹಂಯ್ ಆಸ್ತಾ ಕೊಣೆಂಯ್ ಒತ್ತಾಯ್ ಕೆಲ್ಲ್ಯಾ ವರ್ವಿ ನ್ಹಂಯ್. ಖಂಚೆಯ್ ಕಾಮ್ ಕೇವಲ್ ಆಮ್ಕಾಂ ದುಸ್ರಿಂ ಪಳೆಯ್ತಾತ್, ಆಮ್ಕಾಂ ತಾಣಿಂ ಹೊಗೊಳ್ಸಿಜಾಯ್ ಮ್ಹಣ್ ಕೆಲ್ಯಾರ್ ತಾಕಾ ಅರ್ಥ್ ನಾ. Recognition ಖಾತಿರ್ ಸೆವಾ ನ್ಹಂಯ್. ಜೆಂ ಆಮಿಂ ಕರ್ತಾಂವ್ ತ್ಯಾ ಕಾಮಾ ಥಾವ್ನ್ ಆಮ್ಕಾಂ ಸಮಾಧಾನ್ ಮೆಳೊಂಕ್ ಜಾಯ್. ಕೊಂಕ್ಣಿಂ ಸಮಾಜೆಂತ್ ಸಭಾರ್ ರಿತಿಚೊ ಲೋಕ್ ಆಸಾ. ರುಕಾಚ್ಯಾ ಸಭಾರ್ ಫಾಂಟ್ಯಾ ಬರಿ. ಸಗ್ಳ್ಯಾ ಥಾವ್ನ್ ಬರೆಂಚ್ ಅಪೇಕ್ಶುಂಕ್ ಜಾಯ್ನಾಂ. ಪುಣ್ ಜೆಂ ಆಮಿಂ ಕಾಮಾಂ ಕರ್ತಾಂವ್ ದುಸ್ರ್ಯಾಂಕ್ ಫಾಯ್ದೊ ಮೆಳಾಜಾಯ್. ಆನಿಂ ಮ್ಹಜ್ಯಾ ಕೊಂಕ್ಣಿ ಕಾಮಾಂ ಥಾವ್ನ್ ಮ್ಹಾಕಾ ಮಸ್ತ್ ತೃಪ್ತಿ ಆಸಾ.
4. ಕೊಂಕ್ಣಿ ಎಕ್ವಟ್ ಚಡೊಂಕ್ ಕಿತೆಂ ಖರ್ಗ್ ಆಸಾ?
ಹ್ಯಾ ಪ್ರಸ್ತುತ್ ಕಾಳಾರ್ ಕೊಂಕ್ಣಿಂ ಸಮಾಜೆಂತ್ ಜಿಂ ಕಾಮಾಂ ಜಾತಾತ್ ಹಾಚ್ಯೆ ಥಾವ್ನ್ ಹಾಂವ್ ಮಸ್ತ್ ಖುಶ್ ಆಸಾಂ. ಸಬಾರ್ ತಾಲೆಂತಾಂ ಕೊಂಕ್ಣೆಂತ್ ಆಸಾತ್, ಸಮರ್ಥಿ ಆಸಾ. ಹ್ಯಾ ವರ್ವಿಂ ಆನಿಕೀ ಬರಿಂ ಕಾಮಾಂ ಕರ್ಯೆತಾ. ಸಾಹಿತ್ಯಾ ದಿಶೆನ್ ಮಸ್ತ್ ಕಾಮಾಂ ಕರ್ಯೆತ್. ಹಾಂವ್ಯಿ ಏಕ್ ಬರವ್ಪಿ. ವಾಚ್ಚೆಂ, ಬರಂವ್ಚೆಂ ಮ್ಹಜಿ ಆಸಕ್ತ್. ಹ್ಯಾ ದಿಶೆನ್ ಮ್ಹಜ್ಯಾ ಲಾಗಿಂ ಅಸ್ಚೊ ಅನ್ಭೋಗ್ ಹೆರಾಂ ಕಡೆನ್ ವಾಂಟುಂಕ್ ಹಾಂವ್ ಸದಾಂಚ್ ತಯಾರ್. ಆಶೆಂಚ್ ಹೆರಾಂನಿ ತಾಂಚೊ ಅನ್ಭೋಗ್ ವಾಡೊನ್ ಯೆಂವ್ಚ್ಯಾ ಕೊಂಕ್ಣಿ ತಾಲೆಂತಾ ಥಂಯ್ ವಾಂಟ್ಲ್ಯಾರ್ ಖಂಡಿತ್ ಕೊಂಕ್ಣಿ ಸಾಹಿತ್ಯಾಂತ್ ಖರ್ಗ್ ಯೆಂವ್ಚೆಂ ನಾಂ.
ಪುಣ್ ಕೊಂಕ್ಣೆಂತ್ ಖರ್ಗ್ ನಾಂ ಮ್ಹಣ್ ಹಾಂವ್ ಸಾಂಗಾನಾ. ಪಯ್ಲ್ಯಾ ಸುವಾತೆರ್ ಆಮ್ಚೆಂ ಚಿಂತಾಂಪ್. ದುಸ್ರ್ಯಾಂನಿ ಬರೆಂ ಕಾಮ್ ಕೆಲ್ಯಾರ್ ಕೊಡಿ ಕಾಡ್ಚ್ಯೊ, ತಾಕಾ ಆಡ್ ಪಾಂಯ್ ದಿಂವ್ಚೊ. ಹೆಂ ಸಾಮಾನ್ಯ್. ತ್ಯಾ ದೆಕುನ್ ಬರವ್ಪ್ಯಾಂಚೆಂ/ಲೊಕಾಚೆಂ ಚಿಂತಾಂಪ್ ಬದ್ಲಿಜಾಯ್. ಬರೆಂ ಕಾಮ್ ಕರ್ತೆಲ್ಯಾಕ್ ದುಸ್ರೆಂ ಕಾಂಯ್ ನಾಂ ಮ್ಹಣ್ ತೊ ತೆಂ ಕರಿನಾ. ಕೊಂಕ್ಣೆಚ್ಯಾ ಹ್ಯಾ ಹೆರಾಂಚ್ಯಾ ಬರ್ಯಾಪಣಾಂ ಖಾತಿರ್ ತೊ ಕರ್ತಾ. ತ್ಯಾ ದೆಕುನ್ ಆಮ್ಚೆಂ ಚಿಂತಾಂಪ್ ಬದ್ಲಾಜಾಯ್. ತಿತ್ಲೆಂಚ್ ನ್ಹಂಯ್ ಲಿಪಿಚೆ, ಭಾಸೆಚೆ ಸಮಸ್ಸೆ. ಕೊಂಕ್ಣೆಚ್ಯೊ ಪಾಂಚ್ ಲಿಪಿಯೊ ಆಸಾತ್. ಕನ್ನಡ್ ಲಿಪಿಯೆಂತ್ ಬರಲ್ಯಾರ್ ಸಬಾರಾಂಕ್ ವಾಚುಂಕ್ ಯೇನಾ, ಆನಿಂ ದೇವ್ನಾಗರಿಂತ್ ಬರಯ್ಲ್ಯಾರ್ ಆನಿಂ ಥೊಡ್ಯಾಂಕ್ ಸಮ್ಜಾನಾ. ಹೆಂ ಪೂರಾ ಸಮಸ್ಸೆ. ಪುಣ್ ಖಂಚಾಯಿ ಲಿಪಿಯೆಂತ್ ಬರಂವ್ದಿತ್ ಪುಣ್ ಕೊಂಕ್ಣೆಂ ಥಂಯ್ ಮೋಗ್ ಆಸಾಜಾಯ್. ತಾಂಚ್ಯಾ ಬೊಲಿಂನಿ ವಾವ್ರ್, ಸೆವಾ ಕರುಂಕ್ ಸೊಧಿಜಾಯ್.
5. ತುಮಿಂ ಸಭಾರ್ ರಿತಿಚಿಂ ಸಂಘಟನಾಂ ಸ್ಥಾಪನ್ ಕರ್ನ್ ವೆಗಿಂಚ್ ತಿಂ ಅರ್ಧ್ಯಾರ್ ಸೊಡ್ತಾತ್ ಮ್ಹಳ್ಳಿ ಜೆರಾಲ್ ರಿತಿಚಿ ಖೊಡ್ ಆಸಾ - ಹ್ಯಾವಿಶಿಂ ತುಮ್ಚೆ ವಿಚಾರ್?
ಹಾಂವ್ ಸಂಘಟನಾಂ ಸುರು ಕರ್ನ್ ಅರ್ಧ್ಯಾರ್ ಸೊಡಿನಾಂ. ಮ್ಹಜೊ ಉದ್ದೇಶ್ ಬರ್ಯಾ ಕಾಮಾಂ ಖಾತಿರ್ ಸಂಘಟನ್ ಸುರು ಕರ್ಚೆಂ, ಏಕ್ ಸುರ್ವಾತ್ ಕರ್ಚಿ. ಮುಖೇಲ್ಪಣ್ ಘೆಂವ್ಚೆಂ. ಆನಿಂ ಮ್ಹಜಿ ಆಶಾ ಹೆರಾಂನಿ ಲೀಡರ್ಶಿಪ್ ಘೆವ್ನ್ ಹೆಂ ಸಂಘಟನಾಂ ಮುಖಾರ್ ವರಿಜಾಯ್ ಮ್ಹಣ್. ಪುಣ್ ಕಿತೆಂ ಜಾತಾ ಮ್ಹಳ್ಯಾರ್ ಎಕ್ಲ್ಯಾಕ್ ಹುದ್ದೊ ಮೆಳ್ಳ್ಯಾ ಉಪ್ರಾಂತ್ ತಾಕಾ ತೊ ಹುದ್ದೊ ಸೊಡುಂಕ್ ನಾಕಾ. ಎಕಾ ಥರಾಚೊ ಸ್ವಾರ್ಥ್. ಸ್ವಾರ್ಥ್ ಆಸ್ಲ್ಯಾರ್ ಖಂಚೆಂಯೀ ಸಂಘಟನ್ ಬಾಳ್ವೊಂಕ್ ಸಾಧ್ಯ್ ನಾಂ. ಹಾಂವೆಂ ಪಯ್ಶೆ ದೀವ್ನ್ ಕೊಣಾಯ್ಕಿ ಹೆಂ ಕರ್, ತೆಂ ಕರ್ ಮ್ಹಣ್ ಸಾಂಗೊಂಕ್ ಜಾತಾಯೆ? ಮ್ಹಾಕಾ ಅರ್ಹತಾ ಆಸಾ ಮ್ಹಣ್ ಹಾಂವೆ ಹೆಂ ಕರ್ತಾ. ಪುಣ್ ಹಾಂವೆಂಚ್ ಸರ್ವ್ ಕಾಮಾಂ ಕರಿಜಾಯ್ ದುಸ್ರ್ಯಾಂನಿ ನಾಂವ್ ಜೊಡಿಜಾಯ್ ಮ್ಹಳ್ಯಾರ್ ತೆಂ ಜಾಯ್ನಾಂ. ದುಸ್ರ್ಯಾಂನಿ ಮುಖಾರ್ ಯೇಜಾಯ್ ಮ್ಹಳ್ಳಿ ಮ್ಹಜಿ ಆಶಾ.
6. ಆಯ್ಚಿ ಕೊಂಕ್ಣಿ ಪತ್ರಾಂ, ಕೊಂಕ್ಣಿ ಸಾಯ್ಟಾಂವಿಶಿಂ ತುಮ್ಚಿಂ ಜೆರಾಲ್ ಅಭಿಪ್ರಾಯ್ ಕಿತೆಂ?
ಸಾಯ್ಟಾಂಧ್ವಾರಿಂ ಸಾಹಿತ್ಯ್ ವೆಗ್ಗಿಂಚ್ ಲೊಕಾಕ್ ಮೆಳ್ತಾ. ಪತ್ರಾಂ ಮೆಳೊಂಕ್ ವೇಳ್ ಜಾತಾ ತರೀ ಸಾದ್ಯಾ ಲೊಕಾಕ್ ಪತ್ರಾಂಚ್ ರುಚ್ತಾತ್. ಸಭಾರ್ ಜಣಾಂ ಅಂತರ್ಜಾಳಾಚಿ ಸೌಲತಾಯ್ ನಾಂ. ಯಾ ತಾಂಕಾ ಅಂತರ್ಜಾಳ್ ಕಳಿತ್ಚ್ ನಾಂ. ಅಸಲ್ಯಾ ಲೊಕಾಕ್ ಖಂಡಿತ್ ಜಾವ್ನ್ ಪತ್ರಾಂಚ್ ರುಚ್ತಾತ್. ಘಂಟೆ, ಘಂಟೆ ಪತ್ರ್ ಹಾತಿಂ ಘೇವ್ನ್ ವಾಚ್ತಾನಾ ಮೆಳ್ಚೊ ಆನಂದ್ ಅಂತರ್ಜಾಳಾಂಧ್ವಾರಿಂ ಮೆಳಾನಾ. ಭಾಶೆಚೊ ಮೋಗ್ ಆಸ್ಲ್ಲೆ ಕಿತ್ಲೆ ಕಷ್ಟ್ ಜಾಲ್ಯಾರಿ ಪತ್ರಾಂ ವಾಚ್ಚೆಂ ಸೊಡಿನಾಂತ್. ಸಾಯ್ಟಾಂಧ್ವಾರಿಂ ಸಾಹಿತ್ಯ್ ಮಸ್ತ್ ವಾಡೊನ್ಂಚ್ ಆಸಾ. ಹೆಂಯೀ ಕೊಂಕ್ಣೆಚಾ ಮಟ್ಟಾಕ್ ಸಂತೊಸಾಚೆಂ ತಶೆಂಚ್ ದಾಧೊಸ್ಕಾಯೆಚೆಂ.
7. ಆಜ್ಕಾಲ್ ಕೊಂಕ್ಣೆಚ್ಯಾಕೀ ವ್ಯಕ್ತಿ ಪ್ರಮುಖ್ ಮ್ಹಳ್ಳೆಂ ಚಿಂತಾಪ್ ತುಮ್ಕಾಂ ಭಗಾನಾಂಗಿ? ಹ್ಯಾವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ?
ಹ್ಯಾ ಸವಾಲಾಕ್ ಹಾಂವ್ ಮೌನ್ ರಾವೊಂಕ್ ಖುಶಿ ವರ್ತಾಂ.
8. ಕುವೆಯ್ಟಾಂತ್ ಜಾಲ್ಲ್ಯಾ ವಾ ಜಾಂವ್ಚ್ಯಾ ಕೊಂಕ್ಣಿ ವಾವ್ರಾವಿಶಿಂ ತುಮ್ಚೆ ವಿಚಾರ್ ಕಸ್ಲೆ?
ಸಾಂಗ್ಚಾ ತಿತ್ಲೊ ವಾವ್ರ್ ಜಾಯ್ನಾಂ. ಚಡ್ ವಾವ್ರ್ ಕರ್ಯೆತಾ. ಲೊಕಾಚೊ ಸಹಕಾರ್ ಆಸಾ.
9. ಕೊಣೆಂಯ್ ಕೊಣಾಯ್ಕ್ಯೀ ಶಿಕವ್ನ್ ಸಾಹಿತಿ ಕರುಂಕ್ ಸಾಧ್ಯ್ ಆಸಾಗಿ? ಹ್ಯಾವಿಶಿಂ ತುಮ್ಚಿ ಅಭಿಪ್ರಾಯ್ ಕಸ್ಲಿ?
ಹೆಂ ಸಾಧ್ಯ್ ನಾಂ. ಹಿ ಎಕಾ ಥರಾಚಿ ವೋಡ್. ಎಕ್ಲೊ ಸಿಗ್ರೆಟ್ ವೊಡ್ತಾ ತರ್ ತೊ ಕಿತ್ಯಾಕ್ ವೊಡ್ತಾ, ತಾಕಾ ಸಿಗ್ರೆಟ್ ಥಂಯ್ ಎಕಾ ಥರಾಚಿ ವೋಡ್ ಆಸಾ. ಆಸಲಿ ವೋಡ್ ಆಸ್ಲ್ಯಾರ್ ಮಾತ್ರ್ ಕೊಂಕ್ಣಿ ಸಾಹಿತಿ ಜಾಂವ್ಕ್ ಸಾಧ್ಯ್. ಹುಮೆದ್ಯಿ ತಿತ್ಲಿಚ್ ಗರ್ಜೆಚಿ. ಆಮಿಂ ಮಾರ್ಗದರ್ಶನ್, ಪ್ರೇರಣ್ ದಿವ್ಯೆತ್. ತಾಂಚ್ಯೆ ಥಂಯ್ ಸ್ಪೂರ್ತಿ ಆಸಾಜಾಯ್. ಮ್ಹಾಕಾ ಕೊಂಕ್ಣಿ ಸಾಹಿತ್ಯಾ ಥಾವ್ನ್ ಕಿತೆಂ ಮೆಳ್ತಾ ಮ್ಹಳ್ಯಾರ್ ಸಾಹಿತಿ ಜಾಂವ್ಕ್ ಸಾಧ್ಯ್ ನಾಂ. ಆಪ್ಣೆಂ ಕಿತೆಂ ಕೊಂಕ್ಣೆಕ್ ದಿವ್ಯೆತ್, ಹ್ಯಾ ದಿಶೆನ್ ಕಿತೆಂ ಕರ್ಯೆತ್ ಆಶೆಂ ಚಿಂತ್ಲ್ಯಾರ್ ಮಾತ್ರ್ ಖರೊ ಸಾಹಿತಿ ಜಾಂವ್ಕ್ ಸಾಧ್ಯ್ ಆಸಾ.
10. ಕೊಂಕ್ಣೆಂತ್ ಎಕಾಮೆಕಾ ಫುಟ್ ಹಾಡುಂಕ್ ಜಾಯ್ತೆ ಆಸಾತ್ ಪುಣ್ ಎಕಾಮೆಕಾ ಜೊಡುಂಕ್ ಕಿತ್ಯಾಕ್ ಕೊಣ್ಯ್ ನಾಂತ್?
ಸಾಂಗಾಂ ಮ್ಹಾಕಾ ಖಂಯ್ಚಾ ಸಂಸರಾಂತ್ ನಾಂ. ಹೆಂ ಏಕ್ ಪ್ರಕೃತಿ ನಿಯಮ್ ಮ್ಹಣ್ಯೆತ್. ಜೊಡ್ಚಾ ಖಾತಿರ್ ಎಕ್ಲೊ ಮೊಡ್ತಾ. ಮೊಡ್ಚೆಂ ಆನಿಂ ಜೊಡ್ಚೆಂ ಹೆಂ ಸಾಮಾನ್ಯ್. ಕಶೆಂ ಆಡಳ್ತೆ ಪಾರ್ಟೆಕ್ ವಿರೋಧ್ ಪಾಡ್ತಿ ಸರ್ವಾಕ್ restrictions ಘಾಲ್ತಾ, ವಿರೋಧ್ ಕರ್ತಾ. ಹೆಂ ರಾಜಕೀಯಾಂತ್ ಸಾಮಾನ್ಯ್. ಪುಣ್ ಆಡಳ್ತೆ ಪಾರ್ಟಿ ತಾಂಚಿ ಕಾಮಾ ಕರ್ಚೆಂ ಸೊಡ್ತಾಯೆ? ನಾಂ ತಶ್ಂಚ್ ಕೊಂಕ್ಣೆಂತ್ ಕಿತ್ಲೆಂಯ್ ವಿರೋಧ್ ಆಸೊಂದಿ, ಖೊಡಿ ಕಾಡುಂದಿ, ತುಮಿಂ ತುಮ್ಚಿಂ ಕಾಮಾಂ ಕರ್ನ್ಂಚ್ ರಾವಾ.
11. ಕೊಂಕ್ಣಿ ಆನಿ ಮೊಸೊರ್ ಎಕಾ ನಾಣ್ಯಾಚ್ಯೊ ದೋನ್ ಕುಸಿ ಮ್ಹಣ್ಚೆಂ ಆಯ್ಕಾಲಾಂ ಹಾವೆಂ - ಹ್ಯಾವಿಶಿಂ ತುಮ್ಚೊ ಅನ್ಭೋಗ್ ಕಸ್ಲೊ?
ಹರ್ಯೆಕಾ ಬಾಶೆಂತ್ ಮೊಸೊರ್ ಆಸಾ. ಕೊಂಕ್ಣೆಂತ್ ಇಲ್ಲೊಸೊ ಚಡ್ಚ್ ಮ್ಹಣ್ಯೆತ್. ಚೊರಾಂಕ್ ಪೊಲಿಸ್, ಪೊಲಿಸಾಂಕ್ ಚೋರ್. ಆಶೆಂ ಕೊಂಕ್ಣೆಂತ್ ಮೊಸೊರ್. ಆತಾಂ ಪಳೆಯಾ, ಚೊರ್ ನಾಂತರ್ ಪೊಲಿಸ್ ಕಿತೆಂ ಕರುಂಕ್...? ಪೊಲಿಸ್ ಆಸಾತ್ ಮ್ಹಣ್ ಚೋರ್ ತಾಂಚೆ ಕಾಮ್ ಕರಿನಾಸ್ತಾನಾ ರಾವ್ತಾತ್ಗಿ ನಾಂ. ತಶೆಂಚ್ ಕೊಂಕ್ಣೆಂತ್ ಮೊಸೊರ್ ಆಸಾ ಮ್ಹಣ್ ಕೊಣೆಂಯ್ ತಾಂಚೆಂ ಬರೆಂ ಕಾಮ್ ರಾವೊಂಕ್ ನ್ಹಜೊ.
12. ತುಮಿ ಆಯ್ಲೆವಾರ್ ಬರಂವ್ಚೆಂ ಉಣೆಂ ಕರುಂಕ್ ಕಿತೆಂ ಕಾರಣ್?
ಜಿಣ್ಯೆಂತ್ ups - down ಆಸ್ಲ್ಲೆಂಚ್. ಮ್ಹಜ್ಯಾ ಬಿಜಿನೆಸಾಚೆ ತೊಂದ್ರೆ ಆಸ್ಲ್ಲೆ. ಮತಿಕ್ ಸಮಾಧಾನ್ ನಾಂತರ್ ಬರಂವ್ಕ್ ಸಾಧ್ಯ್ ಜಾಯ್ನಾಂ. ಬರಯ್ತಾನಾ ಮತಿಚೆ ಸಮಧಾನ್, concentration ಗರ್ಜೆಚೆಂ. ತಶೆಂ ಹಾಂವೆಂ ಬರಂವ್ಚೆಂ ಉಣೆಂ ಕೆಲ್ಲೆಂ ಶಿವಾಯ್ ರಾವಂವ್ಕ್ ನಾಂ.
13. ತುಮಿಂ ಕಾದಂಬರಿ ಬರಯ್ತಾತ್, ಕವಿತಾ, ಕಾಣ್ಯೊ ಬರಯ್ತಾತ್ - ತ್ಯೊ ಚಡ್ತಾವ್ ವಾಚ್ಪಿ ಪಸಂದ್ ಕರ್ತಾತ್. ಪುಣ್ ತುಮ್ಚ್ಯಾ ವಿಡಂಬನಾಂನಿ ತುಮಿ ಜಾಳ್ ವೊಂಕ್ತಾತ್ ಮ್ಹಣ್ಚಿ ಖೊಡ್ ಸಭಾರ್ ಉಚಾರ್ತಾತ್ - ತುಮ್ಚಿ ಅಭಿಪ್ರಾಯ್ ಕಸಲಿ?
ಹೆಂ ಸತ್. ಬರೆಂ ಆಸ್ಲ್ಯಾರ್ಯಿ ವಾಂಕ್ಡೆಂ ಸಾಂಗ್ಚೆಂ ಸಾಮಾನ್ಯ್. ತೊ ಆಶೆಂ ಕರ್ತಾ ತಶೆಂ ಕರ್ತಾ ಮ್ಹಣ್ ಸಾಂಗ್ತಾತ್ ಶಿವಾಯ್ ಚೂಕ್ ಆಸಾ ತರ್ ಕೊಣೆಂಯ್ ತಿದ್ವುಂಕ್ ತಯಾರ್ ನಾಂತ್. ಮ್ಹಜ್ಯಾ ಬರ್ಪಾಂತ್ ಬರೆಂಚ್ ಬರವ್ನ್ ಗೆಲ್ಯಾರ್ ತಾಕಾ ಅರ್ಥ್ ನಾಂ. ಆನಿಂ ಆಶೆಂ ಕೆಲ್ಲೆ ವರ್ವಿಂ ಸಮಸ್ಯೆ ಪರಿಹಾರ್ ಜಾಯ್ನಾಂತ್. ಮ್ಹಜ್ಯಾ ಬರ್ಪಾಚಿ ಮುಖ್ಯ ಉದ್ದೇಶ್ ಬರೆಂ ಸಾಹಿತ್ಯ್ ಲೊಕಾಕ್ ದಿಂವ್ಚೆಂ ಆನಿಂ ಸಂಸರಾಂತ್ ಜೆಂ ಕಿತೆಂ ಘಡ್ತಾ ಉಗ್ತಾಡಾಕ್ ಹಾಡ್ಚೆಂ.
14. ಕೊಂಕ್ಣೆಂತ್ ತುಮ್ಚಿ ಮಹತ್ವಾಕಾಂಕ್ಶಾ ಕಸ್ಲಿ?
ಮ್ಹಜಿ ಮಹತ್ವಾಕಾಂಕ್ಶಾ ಮೊರ್ತಾ ಮ್ಹಣಾಸರ್ ಬರಂವ್ಚಿಂ.
15. ಕೊಂಕ್ಣೆಂತ್ಲ್ಯಾ ಆಯ್ಲೆವಾರ್ಚ್ಯಾ ಕವಿತಾಶೆತಾಂತ್ ಜಾಲ್ಲ್ಯಾ ವಾ ಜಾವ್ನ್ ಯೆಂವ್ಚ್ಯಾ ಬದ್ಲಾವಣೆಚೆರ್ ತುಮ್ಚೆ ವಿಚಾರ್ ಕಸ್ಲೆ?
ಕವಿತಾ ಕ್ಶೇತ್ರಾಂತ್ ಮಸ್ತ್ ಅಭಿವೃದ್ಧಿ ಜಾಲ್ಯಾ. ಕೇವಲ್ ಆಪುಣ್ ಬರಯ್ತಾ ಮ್ಹಣ್ ಚಿಂತುನ್ ಬರಯ್ಲ್ಯಾರ್ ಪಾವಾನಾ. ತಾಕಾ ಕವಿತಾಚಿ ಅಬಿರುಚ್ ಆಸೊಂಕ್ ಜಾಯ್. ವಾಚಾಪ್ ವಾಚಿಜಾಯ್. ಆನಿಂ ಪರಿಸರ್, ಸಾಹಿತ್ಯ್ ಜ್ಞಾನ್ ಚಡಯ್ಜಾಯ್. ಕೇವಲ್ please ಕರ್ಚಾ ಖಾತಿರ್ ಆನಿಂ ನಾಂವಾಂ ಖಾತಿರ್ ಬರಂವ್ಚೆಂ ನ್ಹಂಯ್. ಆನಿಂ ಆಶೆಂ ಕೆಲ್ಲೆಂ ವರ್ವಿಂ ಫಲಿತಾಂಶ್ ಮೆಳಾನಾ. ಉದಾಹರಣೆಕ್ ಎನ್. ನರಸಿಂಹಕ್ ಮಸ್ತ್ ಬಿರುದಾಂ ಮೆಳ್ಳ್ಯಾಂತ್. ಪುಣ್ ತಾಚೆಂ ಬರಾಪ್ ಬರೆಂ ನಾಂ ಮ್ಹಣ್ ಮಸ್ತ್ ಜಣಾಂ ಖೊಡಿ ಕಾಡ್ತಾತ್. ತ್ಯಾ ದೆಕುನ್ ಕೇವಲ್ ಬರಂವ್ಚ್ಯಾ ಖಾತಿರ್ ಬರಂವ್ಚೆಂ ನ್ಹಂಯ್. ಬರ್ಪಾಕ್ ಅರ್ಥ್, ಆನಿಂ ಸರ್ವಾಂಕ್ ಫಾಯ್ದ್ಯಾಚೆಂ ಜಾಯ್ಜಾಯ್.
16. ತುಮ್ಚಿ ’ಪಾಟಿಂ ಗಲ್ಫಾಕ್’ ಕಾದಂಬರಿ ಭೋವ್ ಫಾಮಾದ್ ಮ್ಹಣ್ ಆಯ್ಕಾಲಾಂ ಹಾವೆಂ - ಹ್ಯಾ ಕಾದಂಬರೆಚೊ ದುಸ್ರೊ ಭಾಗ್ ಕಿತ್ಯಾಕ್ ಬರಂವ್ಕ್ ನಜೊ?.
’ಪಾಟಿಂ ಗಲ್ಫಾಕ್’ ಕಾದಂಬರಿಚೊ ಮುಖ್ಲೊ ಭಾಗ್ ಬರಂವ್ಕ್ ಹಾಂವೆಂ ಚಿಂತುಂಕ್ ನಾಂ. ಹಿ ಕಾದಂಬರಿ ಅಖೇರ್ ಕೆಲ್ಲಿ ರೀತ್ ವೆಗ್ಳಿಚ್ಚ್. ಪುಣ್ ಹಾಂವೆಂ ’ಚೆಡುಂ’ ಕಾದಂಬರಿಚೊ ದುಸ್ರೊ ಭಾಗ್ ಬರಂವ್ಕ್ ಚಿಂತ್ಲಾಂ.
17. ಕೊಂಕ್ಣೆಂತ್ ಆಸ್ಚ್ಯಾ ವಿಮರ್ಶ್ಯಾಗಾರಾಂಚೆರ್ ತುಮ್ಚಿ ಜೆರಾಲ್ ರಿತಿಚಿ ಅಭಿಪ್ರಾಯ್ ಕಸಲಿ?
ಬರೆ ವಿಮರ್ಶೆಗಾರ್ ಆಮ್ಚ್ಯಾ ಕೊಂಕ್ಣೆಂತ್ ಆಸಾತ್. ವಿಮರ್ಶೆಗಾರಾಂಕ್ ಕೊಣಿ ಬರೆಂ ಮ್ಹಣಾನಾಂತ್. ಕಿತ್ಯಾಕ್ ಮ್ಹಳ್ಯಾರ್ ಆತಾಂಚ್ಯಾ ಕಾಳಾರ್ ಒಪ್ಪಾಸಲೆ ಘಾಲ್ಯಾರ್ ಮಾತ್ರ್ ತಾಂಕಾ ಖುಶಿ ಜಾತಾ. ತಿದ್ವಣ್, ನೀಜ್ ವಿಮರ್ಸೊ ಕೆಲ್ಯಾರ್ ಸಭಾರಾಂಕ್ ಪಸಂದ್ ಜಾಯ್ನಾಂ. ಆಶೆಂ ಕೆಲ್ಲೆ ವರ್ವಿಂ ವಿಮರ್ಶೆಗಾರ್ ನಿಶ್ಟುರ್ ಜಾತಾತ್. ತಾಂಕಾ ಪಾಡ್ ಮ್ಹಣ್ತಾತ್. ಕಿತ್ಯಾಕ್ ಮ್ಹಳ್ಯಾರ್ ಆಮ್ಕಾಂ ಚಡ್ತಾವ್ ಜಣಾಂಕ್ ಪ್ರಶಂಸಾ ಜಾಯ್ಜಾಯ್, ಫುಲಾ ಮೆಳಾಜಾಯ್.
18. ಕೊಂಕ್ಣೆಂತ್ಲ್ಯಾ ಪ್ರಸ್ತುತ್ ಕಾಣ್ಯೆಗಾರಾಂಚೆರ್ ತುಮ್ಚಿ ಜೆರಾಲ್ ರಿತಿಚಿ ಅಭಿಪ್ರಾಯ್ ಕಸ್ಲಿ?
ಬರೆ ಕಾಣ್ಯೆಗಾರ್ ಆಸಾತ್. ಪುಣ್ ತಾಂಚಿ ಮಿನತ್ ಕೊಣಾಯ್ಕಿ ದಿಸಾನಾ. ತಾಕಾ ಕಾಂಯ್ ಕಾಮ್ ನಾಂ ತ್ಯಾ ದೆಕುನ್ ತೊ ಬರಯ್ತಾತ್ ಮ್ಹಣ್ ಚಿಂತಾತ್. ಪುಣ್ ಏಕ್ ಕಾದಂಬರಿ ಯಾ ಲಾಂಬ್ ಕಾಣಿ ಬರಯ್ಜೆ ತರ್ ತಾಂತುಂ ಕಿತ್ಲಿ ಮಿನತ್ ಆಸಾ ಮ್ಹಣ್ ಕಾದಂಬರಿಗಾರ್ ಜಾಲ್ಲ್ಯಾ ಮ್ಹಾಕಾ ಕಳಿತ್ ಆಸಾ. ಚಡಿತ್ ಕಾಣ್ಯೆಗಾರ್ ಕೊಂಕ್ಣೆಂತ್ ಉದೆವ್ದಿಂತ್ ಮ್ಹಳ್ಳಿಚ್ಚ್ ಮ್ಹಜಿ ಆಶಾ.
19. ದಾಯ್ಜ್.ಕೊಮ್ವಿಶಿಂ ತುಮ್ಚೆ ವಿಚಾರ್ ಕಸ್ಲೆ?
ದಾಯ್ಜಾಂತ್ ವಾವ್ರ್ ಕಠಿಣ್ ಚಲೊನ್ ಆಸಾ. ಬರೆಂ ವಾಚಪ್, ಬರೆಂ ಸಾಹಿತ್ಯ್ ಲೊಕಾಕ್ ಮೆಳ್ತಾ. ನಿಜಾಯ್ಕಿ ಸಂತೊಸಾಚಿ ಗಜಾಲ್. ಅನಿಕೀ ಸುದ್ರಾಪ್ ಹಾಡವ್ಯೆತಾ. ಅನಿಕ್ಯೀ ಚಡ್ ಬರೆಂ ಕರ್ಯೆತಾ.
20. ದಾಯ್ಜ್ ಥಾವ್ನ್ ಅನಿಕ್ಯ್ ಕಸಲ್ಯಾ ರಿತಿಚಿಂ ಬರಿಂ ಕಾಮಾಂ ಕರುಂಕ್ ಸಾಧ್ಯ್ ಆಸಾ?
ಬರಿ ಕಾಮಾಂ ಚಲೊನ್ಚ್ ಆಸಾತ್. ಆನಿಂ ಆಶಿಂಚ್ ಚಲೊಂದಿತ್ ಮ್ಹಳ್ಳಿ ಮ್ಹಜಿ ಆಶಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
