ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸ್ಪಿರಿತಾಚೊ ವಾವ್ರ್ ಖಂಡಿತ್ ಫಳ್ ದಿತಾ.
ಶರೊ: ಹ್ಯಾ ಲೇಖನಾಂತ್ ಸಿಂತಿಮೆಂತಾನಿ ಭಳ್ ಆಸ್ಚಾ ಮ್ಹಜಾ ಹ್ಯಾ ಭಗ್ಣಾಂಕ್ ವಾಚ್ತಾನಾ, ಹೆಂ ಕಾಂಯ್ ತುಕಾಚ್ ಉದ್ದೇಶುನ್ ಲಿಖ್ಲಾಂ ಮ್ಹಳ್ಳೆಂ ತುಕಾ ಭೊಗ್ತಾ ತರ್ ಮ್ಹಾಕಾ ಮಾಫ಼್ ಕರ್, ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣೆಸವೆಂ ತುಂ ಆಸಾಯ್ ತರ್ ತುಕಾ ಉದ್ದೇಶುನ್ ಹಾಂವ್ ಅಶೆಂ ಬರಂವ್ಕ್ ಖಂಡಿತ್ ಸಾಧ್ಯ್ನಾ.
ಮೊಗಾಚಾ ಕೊಂಕಣಿ ಅಭಿಯಾನ್ ಸಮಿತಿಚಾ ಮುಖೆಲ್ಯಾಂನೊ, ಆನಿ ಸಾಂದ್ಯಾಂನೊ,
ತುಮ್ಚೆ ಮಧ್ಲೊ ಎಕ್ಲೊ ಜಾವ್ನ್ ಹಿಂ ದೋನ್ ಉತ್ರಾಂ, ಜಿಂ ಮ್ಹಜಾ ಕಾಳ್ಜಾ-ಮನಾಂತ್ ಉದೆಲ್ಲಿಂ ಆತಾಂ ತುಮ್ಚೆ ಹುಜಿರ್ ದವ್ರುಂಕ್ ಮ್ಹಾಕಾ ಭೋವ್ ವಡ್ ಅಭಿಮಾನ್ ಆನಿ ಗೌರವ್ ಭೊಗ್ತಾ. ಆಧ್ಲ್ಯಾ ಮಯ್ನ್ಯಾಂತ್ ಸುರ್ವಾತ್ ಕೆಲ್ಲ್ಯಾ ಹ್ಯಾ ಅಭಿಯಾನಂತ್ ಹಾಜರ್ ಜಾವ್ನ್ ಆಜ್ ಪರತ್ ಹಾಜರ್ ಜಾಲ್ಲ್ಯಾ ತುಮ್ಕಾಂ ಶಾಭಾಸ್ಕಿ ದೀಂವ್ಕ್ ಮ್ಹಜೆಲಾಗಿಂ ಉತ್ರಾಂ ನಾಂತ್. ಆಜ್ ಆಮ್ಚೆಸವೆಂ ಪರತ್ ಥೊಡೆ ನವೆ ಮುಖೆಲಿ ಆನಿ ಸಾಂದೆ ಹ್ಯಾ ಅಭಿಯಾನ್ ಸಮಿತಿಂತ್ ಮೆಳ್ಳ್ಯಾತ್ ತಿ ಭೋವ್ ವಡ್ ಸಂತೊಸಾಚಿ ಗಜಾಲ್. ತಾಂಕಾಂಯ್ ಆತಾಂ ಹಾಂವ್ ತುಮ್ಚೆ ನಾಂವಿಂ ಸ್ವಾಗತ್ ಕರ್ತಾಂ ಆನಿಂ ಆಮ್ಚಿಂ ಭಗ್ಣಾಂ ಎಕಾಮೆಕಾ ವಾಂಟುನ್ ಘೆಂವ್ಕ್ ಉಲೊ ದಿತಾಂ.
ತುಮ್ಚೆಸವೆಂ ತುಮಿಂ ಪಾಟ್ಲ್ಯಾ ಎಕಾ ಮಯ್ನ್ಯಾಂ ಥಾವ್ನ್ ಕೊಂಕ್ಣಿ ಪತ್ರಾಂಕ್ ಆಮ್ಚಾ ಕೊಂಕ್ಣಿ ಲೊಕಾಂಲಾಗಿಂ ಪಾವಂವ್ಕ್ ಕೆಲ್ಲ್ಯಾ ಪ್ರೇತನಾಂತ್ ಭೊಗುಂಕ್/ಆಯ್ಕೊಂಕ್ ಮೆಳ್ಲ್ಲ್ಯಾ ಸಂಗ್ತ್ಯಾಂವಿಶಿಂ ಏಕ್ ಆಟೊವ್ ಕರುನ್ ಆತಾಂ ಅಧುರೆಂ ಉರ್ಲ್ಲ್ಯಾ ಹ್ಯಾ ಕಾಮಾಕ್ ಶಾಬೀತಾಯೆನ್ ಪೊಂತಾಕ್ ಪಾವಂವ್ಕ್ ಪಾವಂವ್ಕ್ ಆಮಿಂ ಎಕ್ಟಾಂಯ್ ಜಾವ್ನ್ ಕಿತೆಂ ಕರ್ಯೆತಾ ಮ್ಹಳ್ಳ್ಯಾ ಸಂಗ್ತ್ಯಾಂಚೆರ್ ಏಕ್ ನಿಹಾಳ್ ಕರ್ಚೊಚ್ ಆಯ್ಚಾ ಜಮಾತೆಚೊ ಉದ್ದೇಶ್.
’ಕೊಂಬಿ ಪಯ್ಲಿಗೀ ಯಾ ತಾಂತಿಂಪಯ್ಲೆ?’ ಮ್ಹಳ್ಳ್ಯಾ ಎಕಾ ಪಿಸಾಂಟ್ ಸವಾಲಾಂತ್ ಸುರ್ವಾತ್ ಕರ್ಯಾಂ, ಹ್ಯಾ ಸವಾಲಾಕ್ ಜಾಪ್ ಸೊಧುಂಕ್ ಗೆಲ್ಯಾಂವ್ ತರ್ ಆಮ್ಕಾಂ ಮೆಳ್ಲ್ಲೆಂ ಆವ್ಕ್ ಪಾಂವ್ಚೆಂನಾ ತರ್ಯ್ ಹ್ಯಾ ಸವಾಲಾಕ್ ಜಾಪ್ಯ್ ಮೆಳ್ಚಿನಾ. ತಶೆಂಚ್ ’ನಾಂವ್’ ಪಯ್ಲೆಂಗೀ ಯಾ ’ಕಾಮ್’ ಪಯ್ಲೆಂ? ಮ್ಹಳ್ಳೆಂ ಅನ್ಯೇಕ್ ಸವಾಲ್ ಆತಾಂ ಆಮಿಂ ಏಕ್ ಘಡಿ ಚಿಂತ್ಯಾಂ.
’ನಾಂವ್ ಯೇಂವ್ಕ್ ಕಾಮ್ ಕರ್ಚಿ ಗರ್ಜ್ ಆಸಾ, ಪುಣ್ ಕಾಮ್ ಕರುಂಕ್ ನಾಂವ್ ಆಸಾಜಯಿಚ್ ಮ್ಹಳ್ಳಿ ಗರ್ಜ್ಗೀ?’ ಸಂಪ್ಯಾ ಉತ್ರಾಂನಿ ಹ್ಯಾ ಸವಾಲಾಕ್ ಜಾಪ್ ’ನಾ, ಕಾಮ್ ಕರುಂಕ್ ನಾಂವಾಚಿ ಗರ್ಜ್ ನಾ, ದಾಂಗ್ರೊ ಮಾರ್ಚಿ ಗರ್ಜ್ ನಾ, ಬೇಂಡ್ ವಾಜ್ಪಾಚಿ ಗರ್ಜ್ ನಾ, ಪುಣ್ ಕಿತೆಂ ಗರ್ಜ್ ಆಸಾ ಮ್ಹಳ್ಯಾರ್ ಏಕ್ ಬರೊ ಸೆವೆಚೊ ಸ್ಪಿರಿತ್.
ಅಶೆಂ ಸಾಂಗ್ತಾನಾ ಮ್ಹಾಕಾ ಅಜೀಕ್ ಸುಮಾರ್ ತೆರಾ ವರ್ಸಾಧಿಂ ಆಮ್ಚಾ ಅಜೆಕಾರ್ಚಾ ಫ಼ಿರ್ಗಜ್ ಪತ್ರಾಂತ್ (’ಝರ್’) ಮ್ಹಜಾ ಸಂಪಾದಕೀಯಾಂತ್ ಹಾವೆಂ ಸಾಂಗ್ಲ್ಲಿಂ ಥೊಡಿಂ ಉತ್ರಾಂ ಮ್ಹಜಾ ಮತಿಂತ್ ಖಡ್ಪಾಪರಿಂ ಖಂಚೊನ್ ಆಸ್ಚಿಂ ತಿಂ ಉತ್ರಾಂ ಉಡಾಸಾಕ್ ಯೆತಾತ್. "ಸೆವೆಚಾ ಸ್ಪಿರಿತಾನ್ ಭರೊನ್ ಕಾಮ್ ಕರ್ಚಾ ವಾವ್ರಾಡ್ಯಾಂಚಿ ಆಮ್ಕಾಂ ಗರ್ಜ್ ಆಸಾ, ಅಮ್ಚಾ ಕುಡಿಂತ್ ಸ್ಪಿರಿತ್ ಆಸ್ಚಿ ಗರ್ಜ್ ಆಸಾ. ಆತಾಂ ಆಮಿಂ ಸಂಕ್ಯಾನ್ ಭೋವ್ ಉಣಿಂ ತರ್ಯ್ ಆಮ್ಚಾನ್ ಕಾಮಾ ಕರ್ಚಿ ಶ್ಯಾಥಿ ಆಸಾ, ಕಿತ್ಯಾಕ್ ಮ್ಹಳ್ಯಾರ್ ಆಮ್ಚಾ ಕುಡಿಂತ್ ಸ್ಪಿರಿತ್ ಆಸಾ, ತೊ ಸ್ಪಿರಿತ್ ಕಾಮಾಂ ಕರ್ಚಾ ಹರ್ಯೆಕ್ಲ್ಯಾಂ ಥಂಯ್ ಆಸ್ಚಿ ಗರ್ಜ್ ಆಸಾ, ಪುಣ್ ತೊ ಸ್ಪಿರಿತ್ ಗಡಂಗಾನಿ ಮೆಳ್ಚೊ ವಾ ಆಂಗ್ಡಿನಿ ವಿಕ್ಚೊ ಸ್ಪಿರಿತ್ ನ್ಹಯ್, ಮನ್ಶಾಚಾ ಕಾಳ್ಜಾಂತ್ ಉದೆವ್ನ್ ಯೆಂವ್ಚೊ ತೊ ಸ್ಪಿರಿತ್. "
ತೆರಾ ವರ್ಸಾಂ ಉಪ್ರಾಂತ್ಯ್ ಮ್ಹಜಾ ಮತಿಂತ್ ತಿಂಚ್ ಚಿಂತ್ನಾಂ ಆಸಾತ್, ಕಾಳ್ಜಾಂತ್ ತಿಂಚ್ ಭಗ್ಣಾಂ ಆಸಾತ್. ಕಿತ್ಯಾಕ್ ಮ್ಹಳ್ಯಾರ್ ಝರಿಕ್ ಕೊಣೇಂಯ್ ಕಾಟ್ ಬಾಂದ್ಯೆತ್ ಪುಣ್ ತಿ ಝರ್ ಕೆದಿಂಕ್ಚ್ ಸುಕಾನಾ, ಏಕ್ ನ್ಹಯ್ ತರ್ ಎಕಾ ರಿತಿನ್ ತಿ ಭಾಯ್ರ್ ಯೆತಾ ಆನಿಂ ವಾಳ್ಯಾಂತ್ ಮೆಳ್ತಾಚ್.
ಅಶೆಂ ಬರಂವ್ಕ್ ಮ್ಹಾಕಾ ದಿಲ್ಲೆಂ ಪ್ರೇರಣ್ ತ್ಯಾ ವರ್ಸಾ ಆಮ್ಚಾ ಯುವ ಸಂಚಾಲನಾನ್ ಆಸಾ ಕೆಲ್ಲೆಂ ’ವಾರಾಡೊ ಅಭಿಯಾನ್’. ತೊ ಜೂನ್ ಮಯ್ನೊ, ಪಾವ್ಸಾಳೊ ಮಯ್ನೊ, ಆನಿಂ ಆಮಿಂ ಮ್ಹಳ್ಯಾರ್ ಅಜೆಕಾರ್ಚೆ ಯುವಸಂಚಾಲನಾಚೆ ಸಾಂದೆ; ಮಾನೆಸ್ತ್ ಸ್ಟೇನಿ ರೋಶನ್ ತೌರೊ (ಆತಾಂಚೊ ಸ್ಟೇನ್ರೊ -ತವಳ್ಚೊ ಆಮ್ಚೊ ಯುವಕ್ ಪ್ರತಿನಿದಿ ), ಭಾವ್ ರೊನಿ ಪ್ರಕಾಶ್ ಸೊಜ್ (ಆತಾಂ ಮಾನಾದಿಕ್ ಬಾಪ್ ರೋನಿ ಪ್ರಕಾಶ್ ಸೊಜ್ - ತವಳ್ಚೊ ಜೆರಾಲ್ ಕಾರ್ಯದರ್ಶಿ ), ಮಾನೆಸ್ತ್ ಸ್ಟ್ಯಾನಿ ಮಿನೇಜಸ್ (ಆತಾಂ ಕಟಪಾಡಿ ಸರ್ಕಾರಿ ಹೈಸ್ಕೂಲಾಚೊ ಶಿಕ್ಶಕ್ - ತವಳ್ಚೊ ಖಜಾಂಚಿ ), ಆನಿ ಹಾಂವ್ (ವಲ್ಲಿ ಕ್ವಾಡ್ರಸ್ - ತವಳ್ಚೊ ಅಧ್ಯಕ್ಶ್) - ಸರ್ವಾಂ ಮೆಳೊನ್ ಕಾರ್ಕೊಳ್ ವಾರಾಡೊಭರ್ ಘರಾನ್ ಘರ್ ಭಂವೊನ್ ’ಆಮ್ಚೊ ಯುವಕ್ ’ ಪತ್ರಾಚಿ ವರ್ಗಣಿ ಮಾಗೊಂಕ್ ವೆತಾನಾ ಆಮ್ಕಾಂ ಆಯ್ಕೊಂಕ್/ಭೊಗುಂಕ್ ಮೆಳ್ಲ್ಲೆಂ ಖಂಡಿತ್ ಮೊಲಾಧಿಕ್.
ತ್ಯಾ ದಿಸಾಂನಿ ಆಮ್ಚಿ ನದರ್ ಫ಼ಕತ್ತ್ ಕಶೆಂ ಪುಣೀಂ ಕರ್ನ್ ಎಕಾ ಮಯ್ನ್ಯಾಭಿತರ್ ’ಆಮ್ಚೊ ಯುವಕ್’ ಪತ್ರಾಕ್ ಶೆಂಭೊರ್ ವರ್ಗಣ್ಯೊ ಎಕ್ಟಾಂಯ್ ಕರಿಜಾಯಿಚ್ಚ್ ಮ್ಹಳ್ಳೆಂ ಹಟ್ ಆನಿಂ ಹ್ಯಾ ಹಟಾನ್ ಆಮಿಂ ಘರಾನ್ ಘರ್ ವೆತಾನಾ ಆಮ್ಕಾಂ ಆಯ್ಕೊಂಕ್ ಮೆಳ್ಲ್ಲಿಂ ಸವಾಲಾಂಯ್ ಹಿಂಚ್; ’ತುಮ್ಕಾಂ ದುಸ್ರೆಂ ಕಾಂಯ್ ಕಾಮ್ ನಾವೆ?’ ’ತುಮ್ಕಾಂ ಹಾಂತುಂ ಕಿತ್ಲೆಂ ಕಮಿಶನ್ ಮೆಳ್ತಾ?’ ’ಆಮ್ಗೆರ್ ಕೊಣಾಕ್ಯ್ ವಾಚುಂಕ್ ವೇಳ್ ನಾ’ ’ಯುವಸಂಚಾಲನ್ ಮ್ಹಳ್ಯಾರ್ ಬೆಕಾರಿ/ಪಾಡಾರಿ ಯುವಜಾಣಾಂಚೆಂ ಸಂಚಾಲನ್ ಮಾತ್ರ್, ಆಮ್ಚಾ ಬುರ್ಗ್ಯಾಂಕ್ ತಾಂತುಂ ರಿಗೊಂಕ್ ಆಮಿಂ ಸೊಡಿನಾಂವ್.’
ಹಾಂತುಂ ಆಸ್ಚಾ ಸವಾಲಾಂತ್ ಕಿತ್ಲೊ ಸಾರ್ ಆಸಾ ಕಿತ್ಲೊ ನಾ ಮ್ಹಳ್ಳೆಂ ಸೊಧುಂಕ್ ವೆಚೆಂ ನಾಕಾ. ಪುಣ್ ವಿಜ್ಮಿತ್ಕಾಯೆಚಿ ಗಜಾಲ್ ಸಾಂಗ್ಚಿ ತರ್ ಥೊಡೆ ದಾಖ್ಲೆ ಅಜೂನ್ ಮ್ಹಜಾ ಮತಿಚಾ ಪಡ್ದ್ಯಾರ್ ಖಂಚೊನ್ ಗೆಲ್ಲೆ ಅಶೆ ಆಸಾತ್;
ಪಾವ್ಸಾಕ್ ಭಿಜೊನ್ ಆಮಿಂ ಎಕಾ ಬಂಗ್ಲ್ಯಾಚಾ ಘರಾಕ್ ಪಾವ್ಲ್ಯಾಂವ್, ಬಾಂಧುನ್ ಘಾಲ್ಲೆ ದೋನ್ ಪೆಟೆ ಇತ್ಲ್ಯಾ ಜೊರಾನ್ ಘೊಂಕ್ತಾಲೆಕೀ ಕಾನ್ ಆಯ್ಕಾನಾತ್ಲ್ಲೆ ಕೆಪ್ಪೆ ಸಯ್ತ್ ಆಯ್ಕೊಂಕ್ ಸಕ್ತಿತ್, ತರ್ಯ್ ಘರಾಚೆಂ ಬಾಗಿಲ್ ಉಗ್ತೆಂ ಜಾಲೆಂನಾ.
ಆಮ್ಚಾ ಹಾತಾಂನಿ ಬಿಜ್ಲ್ಲಿಂ ಕೊಂಕ್ಣಿ ಪತ್ರಾಂ ಆಸ್ಚಿಂ, ಆನಿಂ ಬಿಜ್ಲ್ಲ್ಯಾಂವ್ ತರ್ಯ್ ಕೊಂಕ್ಣಿ ಭಾಸೆಂತ್ ಹಾಸೊನ್ ಉಲವ್ನ್ ಆಸ್ಲ್ಲ್ಯಾಂವ್ ದೆಕುನ್ ಕಾಂಯ್ ಆಮಿಂ ನಾಗಂವ್ಕ್ ಆಯಿಲ್ಲ್ಯಾಂವ್ ನ್ಹಯ್ ಮ್ಹಳ್ಳೆಂ ನಖ್ಖಿ ಜಾತಚ್ ಘರ್ಚೆಂ ಬಾಗಿಲ್ ಉಗ್ತೆಂ ಜಾಲೆಂ ಆನಿಂ ಆಮಿ ಸರ್ವಾಂ ಪಯ್ಲೆಂಚ್ ವಯ್ರ್ ಥಾವ್ನ್ ಸಕ್ಲಾ ಪರ್ಯಾಂತ್ ಭಿಜ್ಲ್ಲ್ಯಾಂವ್ ದೆಖುನ್ ಭಾಯ್ರ್ಚ್ ಬೊಲ್ಕಾಂವಾಂತ್ ಆಸ್ಚಾ ಬಾಂಕಾರ್ ಕಾಂಪೊನ್ ಕಾಂಪೊನ್ ಬೊಸ್ಲ್ಯಾಂವ್. ಘರ್ಚೆಂ ಬಾಗಿಲ್ ಉಗ್ತೆಂಚ್ ಆಸ್ಲ್ಲೆಂ, ಆನಿಂ ಇಸ್ಕೊಲಾಚಿ ತಿ ಶಿಕ್ಶಕಿ ಜಾಲ್ಲೆವರ್ವಿಂ ಆಮ್ಕಾಂ ಖಂಡಿತ್ ಏಕ್ ವರ್ಗಣಿ (ತವಳ್ಚೆ ಪಂದ್ರಾ ರುಪಯ್), ಮೆಳತ್ ಮ್ಹಳ್ಳೊ ಭರ್ವಸೊ ಆಮ್ಚೊ.
ತಿ ಭಾಯ್ರ್ ಆಯ್ಲಿ "ಕಿತೆಂ?" ಮ್ಹಣೊನ್ ಸವಾಲ್ ಕರಿಲಾಗ್ಲಿ’
"ಆಮಿಂ ಆಮ್ಚೊ ಯುವಕ್ ಪತ್ರಾಚಾ ವರ್ಗಣೆ ಖಾತಿರ್ ಆಯ್ಲ್ಯಾಂವ್"
"ತುಮಿಂ ಕೋಣ್?’
"ಆಮಿ ಅಜೆಕಾರ್ಚೆ ಯುವಸಂಚಾಲನಾಚೆ ಸಾಂದೆ"
"ಎಕಾ ವರ್ಗಣೆಕ್ ಕಿತ್ಲೆ ರುಪಯ್?"
"ಪಂದ್ರಾ ರುಪಯ್"
"ಧಾ ರುಪಯ್ ದಿಲ್ಯಾರ್ ಜಾಯ್ನಾಂಗೀ?"
ಅಸಲೆಂ ಸವಾಲ್ ಆಮಿಂ ಪಯ್ಲೆ ಆಯ್ಕಂವ್ಚೆಂ ದೆಕುನ್ ಆಮಿಂ ಎಕಾಂಎಕಾ ತೊಂಡಾಂ ಪಳೆಲಾಗ್ಲ್ಯಾಂವ್.
"ರಾವಾ ಹಾಂವ್ ಇಲ್ಲಿ ರಾಂದ್ವಯ್ ಸುಟಿ ಕರುನ್ ಯೆತಾಂ" ಮ್ಹಣೊನ್ ತಿ ಗೆಲಿ.
ಉಗ್ತ್ಯಾ ಬಾಗ್ಲಾಕ್ ಪಳೆತೆಚ್ ಆಮಿಂ ಸ್ವಪ್ಣಾಂ ದೆಖೊನ್ ಬೊಸ್ಲ್ಯಾಂವ್, ಆಮ್ಚಿಂ ಸ್ವಪ್ಣಾಂ ಘಡ್ಯಾಳಾಚ್ಯಾ ಕಾಂಟ್ಯಾಸವೆಂ ಮೋಗ್ ಕರುಂಕ್ ಪಡ್ಲಿಂ, ವೆಳಾಚೊ ಕಾಂಟೊ ಚಡುಣೆಂ ವೀಸ್ ಭಂವಾಡೊ ಘುಂವ್ಲೊ, ಬೊಸೊನ್ ಕಾಂಯ್ ಆಮ್ಕಾಂ ಪಾಳಾಂ ಫ಼ುಟ್ತಿತ್ಗೀ ಮ್ಹಳ್ಳೊ ದುಭಾವ್ಯ್ ಆಯ್ಲೊ, ತರ್ಯ್ ಆಮ್ಕಾಂ ವರ್ಗಣಿ ಜಾಯ್ ಆಸ್ಲ್ಲಿ, ದೆಕುನ್ ಸಯ್ರಣ್ ಘರ್ಜೆಚೆಂಚ್, ದೆಕುನ್ ಬೊಸ್ಲ್ಯಾಂವ್, ಬೊಸ್ಲ್ಯಾಂವ್ ಆನಿಂ ಬೊಸ್ಲ್ಯಾಂವ್, ಪಾವ್ಸ್ ರಾವೊನ್ ಆಯ್ಲೊ ಆನಿಂ ಸುಮಾರ್ ಪಂಚ್ವೀಸ್ ಮಿನುಟಾಂನಿ ತಿ ಭಾಯ್ರ್ ಆಯ್ಲಿಚ್;
"ತುಮಿಂ ಅನಿಕ್ಯ್ ಬೊಸ್ಲ್ಯಾತ್ಗೀ?"
ಆತಾಂ ಪರತ್ ಏಕ್ ಪಾವ್ಟಿಂ ಆಮಿಂ ಮಾ-ಪಾತಕ್ ಕೆಲ್ಲಿಂ ಭಗ್ಣಾಂ ಆಮ್ಚಾ ಕಾಳ್ಜಾಂತ್ ಉದೆಲಿಂ.
"ಏಕ್ ಕಾಮ್ ಕರಾ ತೊ ಎಡ್ರೆಸ್ ದಿಯಾ ಆನಿಂ ಪತ್ರಾಚಿ ವರ್ಗಣಿ ಹಾಂವ್ ಪೊಸ್ಟಾರ್ ದಾಡ್ತಾಂ"
ಮ್ಹಜಾ ರಾಗಾಚಿ ಶಿರ್ ಉಭಿ ಜಾಲಿ ಜಾಯ್ಜಯ್, ಎಕಾಚ್ಫ಼ರಾಂ ಹಾಂವೆಂ ಜಾಪ್ ದಿಲಿ; "ದೊತೊರ್ ಬಾಜ಼ಿಜ್ ಸಾಲ್ವಾದೊರ್ ಸೊಜ್, ಬಿಸ್ಪಾಚೆಂ ಘರ್, ಮಂಗ್ಳುರ್ -ಬರೆಂ ವೆತಾಂವ್"
ಅಶೆಂ ಸಾಂಗ್ತಾನಾ ಆಮಿಂ ಸಗ್ಳಿಂ ಉಟ್ಲ್ಯಾಂವ್ ಆನಿಂ ಎಕಾಚ್ ಮೆಟಾನ್ ತಾಂಚಿ ಗೇಟ್ ಉಗ್ತಿ ಕರ್ತಾನಾ ತಿಚಿಂ ಹಳ್ತಾಚಿಂ ಉತ್ರಾಂ ಜೊರಾನ್ ಆಯ್ಕಾಲಿಂ;
"ಕಾಂಯ್ ಪಿಯೆಂವ್ಕ್ ಪುಣೀಂ ಜಾಯ್ಗೀ?"
ಅಸಲಿಂ ಘಡಿತಾಂ ಘಡ್ಲಿಂ ತರ್ಯ್ ಆಮ್ಚೊ ಸ್ಪಿರಿತ್ ತಿತ್ಲೆವೆಗಿಂ ಉಭ್ಚೊ ಗಡಂಗಾಚೊ ಸ್ಪಿರಿತ್ ನ್ಹಯ್ ದೆಖುನ್ ಆಮಿಂ ನಿರಾಶಿ ಜಾಂವ್ನಾಂವ್, ಪರತ್ ಆಮ್ಚಿಂ ವಾಟ್ ಮುಖಾರುನ್ ಗೆಲ್ಯಾಂವ್ .
ಪುಣ್ ಆಮ್ಚಿ ತವಳ್ಚಿ ಪರಿಗತ್ಯ್ ಕಸಲಿ? ಭುಕಿಂ ಪೊಟಾಂ, ರಿತೆ ಬೋಲ್ಸ್, ಕಾಳಿಜ್ಭರ್ ಆಶಾ -ಕೊಂಕ್ಣೆಖಾತಿರ್ ಕಿತೆಂ ತರ್ಯ್ ಕರಿಜಾಯ್ ಮ್ಹಳ್ಳಿ. ಘರಾಂನಿ ಕಾನ್ ಥಕ್ತಾಪರ್ಯಾಂತ್ ಪುರ್ಪುರೆ ಸೊಸುನ್, ಘೆತ್ಲ್ಲ್ಯಾ ವಿಂಚವ್ಣೆಕ್ ಕಶೆಂ ಪುಣೀಂ ಪೊಂತಾಕ್ ಪಾವಯ್ಜೆ ಮ್ಹಳ್ಳೆಂ ಹಟ್ ಕಾಂಯ್ ಜೀವ್ ಸೊಡ್ತಾಗೀ ಮ್ಹಳ್ಳ್ಯಾ ಕಾವ್ಜೆಣೆಂತ್ ಆಮಿಂ ವಾವ್ರ್ ಮುಕಾರ್ಸಿಲೊ.
ಎಕಾ ಸಕಾಳಿಂ ಏಕ್ ಘೊಟ್ ಚಾ ಪಿಯೆವ್ನ್, ಆಸ್ಚಾ ದೋನ್ ಪರ್ನ್ಯಾ ಸಾಯ್ಕಲಾಂತ್ ದೊಗಾಂ ಬೊಸೊನ್ ಭಾಯ್ರ್ ಸರ್ತಾಲ್ಯಾಂವ್. ಆನಿಂ ಅಸಲ್ಯಾ ಹಠಾನ್ ಮಾತ್ರ್ ಆಮ್ಕಾಂ ಕಾಂಯ್ ಇಲ್ಲೆಂ ಸಾಧನ್ ಕರುಂಕ್ ಸಾಧ್ಯ್ ಜಾಲ್ಲೆಂ. ಆನಿಂ ಹಾಂವ್ ಹೆಂ ಭೋವ್ ವ್ಹಡ್ ಅಭಿಮಾನಾನ್ ಸಾಂಗ್ತಾಂ; ಆಮಿಂ ತ್ಯಾ ಮಯ್ನ್ಯಾಂತ್ ಎಕ್ಶೆಂ ಎಕುಣ್ತೀಸ್ ವರ್ಗಣ್ಯೊ ಜಮೊ ಕೆಲ್ಯೊ. ಆನಿಂ ತಾಂತ್ಲ್ಯೊ ನೊವೊದ್ ಆನಿ ನೋವ್ ಠಕ್ಕೆ ವರ್ಗಣ್ಯೊ ನಳ್ಯಾಂಚಾ ಯಾ ಕೊಲ್ವಾಂಚ್ಯಾ ಪಾಕ್ಯಾಚಾಂನಿ ದಿಲ್ಲ್ಯೊ ಶಿವಾಯ್ ಬಂಗ್ಲ್ಯಾಂನಿ ರಾವ್ತೆಲ್ಯಾಂನಿ ನ್ಹಯ್.
ಆತಾಂ ಹ್ಯಾ ಆಮ್ಚಾ ಅಭಿಯಾನಾಂತ್ ತರ್ಯ್ ಎದೊಳ್ ಮೆಳ್ಲ್ಲ್ಯೊ ಚಡ್ತಾವ್ ವರ್ಗಣ್ಯೊ ಧೊವ್ಯಾ ಕೊಲರಾಚಾ ಅಫ಼ಿಸಾನಿಂ ಆಸ್ಚಾಂನಿ ದಿಲ್ಲ್ಯೊ ನ್ಹಯ್, ಬಂಗ್ಲ್ಯಾಂನಿ ಕಾಮ್ ಕರ್ಚಾ ಲೊಕಾಂನಿ, ಜೊ ಲೋಕ್ ಹರ್ಯೆಕಾ ಹಾಪ್ತ್ಯಾಚಾ ರಜೆಚಾ ದಿಸಾಂನಿ ಸೊಧುನ್ ಸೊಧುನ್ ಕೊಂಕ್ಣಿ ಪತ್ರಾಂ ವಾಚ್ತಾ, ಕೊಂಕ್ಣಿ ಬೂಕ್ ವಾಚ್ತಾ ತಸಲ್ಯಾ ಲೊಕಾಂ ಥಾವ್ನ್. ಆತಾಂ ಹೆಂ ಅಭಿಯಾನಾಂತ್ ಆಮ್ಕಾಂ ಕಠೀಣ್ ನಿರಾಸ್ ಜಾಲ್ಯಾಗೀ? ಭ್ಯೆಂ ದಿಸ್ತಾಗೀ? ಲಜ್ ಭೊಗ್ತಾಗೀ?
ಪಯ್ಲೆಂ ಆಮಿಂ ಏಕ್ ಘಡಿ ಹೆಂ ಸವಾಲ್ ಆಮ್ಕಾಂಚ್ ಕರುನ್ ಏಕ್ ಘಡಿ ಚಿಂತ್ಯಾಂ. ಸ್ವಾಮಿ ವಿವೇಕಾನಂದಚಿಂ ತತ್ವಾಂ ಅಶಿಂ ಆಸಾತ್ ’ನಿರಾಶೆ ಹಾಗೂ ದುಹ್ಖಕ್ಕೆ ಆಶೆಯೇ ಮೂಲ’ - ಮ್ಹಣ್ಜೆ ’ನಿರಾಸೆಕ್ ಆಶಾಚ್ ಕಾರಣ್’ ಆಮಿಂ ಕಾಂಯ್ ಹ್ಯಾ ಅಭಿಯಾನಾಂತ್ ಆಮ್ಕಾಂ ಫ಼ುಲಾಂಚೆ ಹಾರ್ ಮೆಳ್ತೆಲೆ, ಘರಾಂನಿ ಆಮ್ಕಾಂ ಪರ್ಗಟ್ ಮಾನ್-ಸನ್ಮಾನ್ ಮೆಳ್ತಲೊ, ಏಕ್ ವರ್ಗಣಿ ವಿಚಾರ್ಲ್ಯಾರ್ ಚಾರ್ ವರ್ಗಣ್ಯೊ ಮೆಳ್ತಿತ್ಗಾಯ್ ಮ್ಹಳ್ಳಿ ಆಶಾ ಕೆಲ್ಲಿ ತರ್ ಆಮ್ಕಾಂ ನಿರಾಶಾ ಜಾಂವ್ಚಿ ಸಹಜ್. ಪುಣ್ ಹೆಂ ಜಾಯ್ತ್, ಹಾಚಾಕೀ ಕಡೂಸ್/ನಿಸ್ಟುರ್ ಉತ್ರಾಂ ಆಮ್ಕಾಂ ಆಯ್ಕೊಂಕ್ ಮೆಳ್ತಿತ್ ಮ್ಹಳ್ಳೆಂ ಆಮ್ಕಾಂ ಪಯ್ಲೆಂಚ್ ಗೊಮ್ಲ್ಲೆಂ ತರ್ ಆತಾಂ ಉರ್ತಾ ಫ಼ಕತ್ ಉಮೆದ್ ಆನಿ ಆಶಾ ಮಾತ್ರ್. ಖೈಂ ಆಸಾ ನಿರಾಶ್? ಭ್ಯೆಂ ಕಸಲೆಂ?
ಆಮಿಂ ವೆತಾಂವ್ ಆಮ್ಚಾ ಬಾಂವ್ಡಾಂಲಾಗಿಂ, ದೊಳ್ಯಾಂತ್ ಕಾಂಯ್ ಏಕ್ ದೋನ್ ಪೊಯ್ಶ್ಯಾಂಚಿ ಮಿಂಜಾಸ್ಕೆಚಿ ಸಾಯ್ ಮಾಂಡ್ಲೆಲ್ಯಾ ತಾಂಚಾ ದೊಳ್ಯಾಂಲಾಗಿಂ ವೆತಾಂವ್ ಆಮ್ಚಾಚ್ ಮಾಯ್ಭಾಸೆವಿಶ್ಯಾಂತ್ ಉಲಂವ್ಕ್, ಕಾನಾಂನಿ ತಾಂಚಾ ಪರ್ಕಿ ಸಂಸ್ಕ್ರತೆಚೊ ಕಾನ್ಪೊ ಬೊಸ್ಲಾ ದೆಕುನ್ ಕಾನಾಲಾಗಿಂ ವಚೊನ್ ಆಮಿಂ ಆಮ್ಚಾ ಮಾಯ್ಭಾಸೆವಿಶ್ಯಾಂತ್ ಹಾಕ್ ಬೋಬ್ ಮಾರ್ತಾಂವ್ ಶಿವಾಯ್, ಆಮಿಂ ಆಮ್ಚಿಂ ಘರಾಂ-ಬಂಗ್ಲೆಂ ಬಾಂದುಂಕ್ ರೀಣ್ ಮಾಗೊಂಕ್ ವಚಾನಾಂವ್, ಆಮ್ಚಾ ಘರಾಂನಿ ಆಸ್ಚಾ ಪಿಡೇಸ್ತಾಂಕ್ ಆಸ್ಪತ್ರೆಕ್ ವರುಂಕ್ ದುಡು ಮಾಗೊಂಕ್ ಆಮಿಂ ವಚಾನಾನಾಂವ್, ಬೆಕಾರಿ ಆಸ್ಚಾ ಆಮ್ಚಾ ಬಾಂವ್ಡಾಂಕ್ ಕಾಮಾಂ ವಿಚಾರ್ನ್ ಆಮಿಂ ವಚಾನಾಂವ್. ಆಮಿಂ ವೆತಾಂವ್ ಫ಼ಕತ್ ಮಾಯ್ಭಾಸೆಚಾ ವಾವ್ರಾ ಖಾತಿರ್ - ತರ್ ಕಸಲೆಂ ಭ್ಯೆಂ?
ಆಮ್ಚಾ ಲೊಕಾಂಲಾಗಿಂ ಆಮ್ಚಾ ಮಾಯ್ಭಾಸೆವಿಶಾಂತ್ ಉಲಂವ್ಕ್ ಭ್ಯೆಂ ತರ್ ಆಮಿಂ ಆಮ್ಚಾಚ್ ಘರ್ಚಿಂ ಪರ್ಕಿಂ ನ್ಹಯ್ಗೀ? ಆಮಿಂ ಪತ್ರಾಚಿ ವರ್ಗಣಿ ವಿಚಾರುಂಕ್/ಮಾಗೊಂಕ್ ಮಾತ್ರ್ ಗೆಲ್ಲ್ಯಾಂವ್ ತರ್ಯ್ ಥೊಡ್ಯಾಂನಿ ಆಮ್ಕಾಂಚ್ ಮೊಲಾಕ್ ಘೆಂವ್ಕ್ ಪಳೆಲ್ಲೆಂಯ್ ಆಸಾ. ಆಮ್ಚಾ ಸಂತಾನ್ಕುಟ್ಮಾಚಿ ಝಡ್ತಿ ಕೆಲ್ಲೀಯ್ ಆಸಾ. ಥೊಡ್ಯಾಂನಿ ಪೊಕೊಳ್ ಉಲವ್ಣ್ಯಾಂತ್ ಭುಲಂವ್ಕ್ ಪಳೆಲ್ಲೇಂಯ್ ಆಸಾ, ತರ್ಯ್ ಆಮ್ಚಿ ದೀಶ್ಟ್ ಗಯ್ರಿ ನ್ಹಯ್, ಆಮ್ಕಾಂ ಸಗ್ಳೆಂ ಸ್ವಶ್ಟ್ ದಿಸ್ತಾ, ಸಾರ್ಕೆಂ ಸಮ್ಜತಾ. ಆಮ್ಚೆಂ ಖಾಲ್ತೆಂಪಣ್ ಆನಿಂ ವಿಧೇಯ್ಪಣ್ ಆಮ್ಚಿ ಅಸ್ಕತ್ಕಾಯ್ ಮ್ಹಣೊನ್ ಥೊಡ್ಯಾಂನಿ ಘೆತ್ಲ್ಲೇಂಯ್ ಆಸಾ. ತರ್ಯ್ ಆಮಿಂ ಇತ್ತುನ್ ಪಾವ್ಲ್ಯಾಂವ್.
ಹ್ಯಾ ಖಂಯ್ಚಾಯ್ ಸಂಗ್ತ್ಯಾಂಕ್ ಚಿಂತುಂಕ್ ಆಮಿಂ ವೆಚೆಂ ನಾಕಾ. ಹಸ್ತಿನ್ ವಾಟೆರ್ ಚಲ್ತಾನಾ ಪಳೆಲ್ಲೆ ವಾಟೆವಯ್ಲೆ ಪೆಟೆ ಘೊಂಕ್ತಾತ್, ಪೆಟೆ ಘೊಂಕ್ತಾನಾ ಆಮಿಂ ಘೊಂಕುಂಕ್ ವೆಚೆಂ ನಾಕಾ . ಕಶೆಂ ಪೆಟ್ಯಾಕ್ ಆಪ್ಲೆಂ ಸ್ಥಾನ್ ಆಸಾಗೀ ತಶೆಂ ಆಮ್ಕಾಂ ಆಮ್ಚೆಂ. ಕಸಲಿ ಲಜ್? ಕಸಲೆಂ ಉಣೆಂಪಣ್? ಆಮಿಂ ಕೊಂಕ್ಣಿ, ಹೆಂಚ್ ಆಮೆಂ ಅಸ್ತಿತ್ವ್, ಆನಿಂ ಹಾಂತುಂ ಲಿಪಂವ್ಕ್ ಕಿತೆಂಚ್ ನಾಂ, ಲಜೆಂವ್ಕ್ ಕಾಂಯ್ ನಾ.
ಆಮಿಂ ಕೊಂಕ್ಣೆ, ಆಯ್ಕಯಾ ಆಮಿಂ ಕೊಂಕ್ಣೆ, ದೆಕುನ್ ಕೊಂಕ್ಣಿ ಉಲಂವ್ಕ್, ಕೊಂಕ್ಣಿ ಉರಂವ್ಕ್, ಕೊಂಕ್ಣಿ ಶಿಕಂವ್ಕ್ ಆಮ್ಕಾಂ ಲಜ್ ನಾ. ಕೊಂಕ್ಣಿ ಉಲಂವ್ಚೊ ಲೋಕ್ ದುಬ್ಳೊ ಜಾವ್ಯೆತ್ ಪುಣ್ ನೀಚ್ ನ್ಹಯ್. ಕೊಂಕ್ಣಿ ವಾಸ್ಚೊ ಲೋಕ್ ಉಣ್ಯಾ ಶಿಕ್ಪಾಚೊ ಜಾವ್ಯೆತ್ ಪುಣ್ ಅಶಿಕ್ಪಿ ನ್ಹಯ್, ಕೊಂಕ್ಣಿ ಭಾಸ್ ಉಲಂವ್ಚೆ ವಿಗ್ಯಾನಿ ನ್ಹಯ್ ಜಾವ್ಯೆತ್ ಪುಣ್ ಬೆಕೂಫ಼್ ನ್ಹಯ್ . ತರ್ ಆತಾಂ ಸಾಂಗಾ ಆಮ್ಕಾಂ ಲಜ್ ಕಿತ್ಯಾಕ್?
ಇತ್ಲೆಂ ಆಯ್ಕತಾನಾ ತುಮಿಂ ಹೆಂ ಅಭಿಯಾನಾಚಿ ಸುರ್ವಾತ್ ಕರ್ತಾನಾ ಆಮ್ಕಾಂ ಎಕಾ ರಿತಿಚಿ ಹಳ್ತಾಚಿ ಕಾಂಪ್ ಆಸ್ಲ್ಲಿ. ತಿ ಕಾಂಪ್ ಸಂಯ್ಬಿಕ್ಚ್. ದೇವ್ ಜಾವ್ನ್ ಮನಿಸ್ ಜಾವ್ನ್ ಆಯಿಲ್ಲೊ ಜೆಜು ಸಯ್ತ್ ರಗಾತ್ ಘಾಮೆಲ್ಲೊ, ಆನಿಂ ಆಪ್ಲ್ಯಾ ಸರ್ಗಿಂಚಾ ಬಾಪಾಯ್ಕ್ ಉಲೊ ದೀವ್ನ್ ಅಶೆಂ ಸಾಂಗ್ಲ್ಲೆಂ "ಬಾಪಾ ತುಕಾ ಸಾಧ್ಯ್ ತರ್ ಮ್ಹಜೆ ವಯ್ಲಿ ಹಿ ಕಾಲ್ಸ್ ತುಂ ನಿವಾರ್,ಪುಣ್ ನ್ಹಯ್ ಮ್ಹಜಿ ಖುಶಿ, ಬಗಾರ್ ತುಜಿ ಖುಶಿ ಜಾಂವ್" ತರ್ ಆಮಿಂ ಘಾಮೆಲ್ಲ್ಯಾಂತ್ ಕಾಂಯ್ ಚೂಕ್ ಆಸಾ?
ತರ್ಯ್ ಆಮಿಂ ಹ್ಯಾ ಸರ್ವಾಂಚಿ ಆಶಾ ಕೆಲ್ಲಿ, ಆಮ್ಚಾ ಕಾಳ್ಜಾಕ್ ಮನಾಂಕ್ ಮಾತ್ರ್ ನ್ಹಯ್, ಆಮ್ಚಾ ವೆಕ್ತಿತ್ವಾಕ್, ಆಮ್ಚಾ ಅಖ್ಖ್ಯಾ ಸಂತತೆಕ್ಚ್ ಖಿಳೆ ತೊಪ್ತೆಲೆ, ಭಾಲಿಯಾಂನಿ ಚಿರ್ತೆಲೆ ಮ್ಹಳ್ಳೆಂ ಚಿಂತಾಪ್ ಆಮಿಂ ಚಿಂತುನ್ ಆಸ್ಲ್ಲ್ಯಾಂವ್. ಹಾಚೆ ಥೊಡೆ ದಾಕ್ಲೆ ದಿಂವ್ಚೆಂ ತರ್ ಜಶಿ ಕೊಂಕ್ಣಿ ಅಭಿಯಾನಾಚಿಂ ಕಾಮಾಂ ಸುರು ಜಾಲಿಂಗೀ, ಅಂತರ್ಜಾಳಾಂತ್ ಥೊಡ್ಯಾಂನಿ ಆಮ್ಚಿಂ ನಾಂವಾಂ ಕಾಡ್ಲಿಂ, ಥೊಡ್ಯಾಂನಿ ಆಮಿಂ ಓನ್ಲಾಯ್ನ್ ಯೆತಾನಾ ಲಿಪೊನ್ ಬೊಸೊಂಕ್ ಧರ್ಲೆಂ, ಥೊಡ್ಯಾಂನಿ ಆಮ್ಕಾಂ ಕಿತೆಂಚ್ ಕಳಿತ್ ನಾ, ಮ್ಹಣೊನ್ ರೆಡ್ಯಾಚಾ ಪಾಟಿರ್ ಮೂಸ್ ಬೊಸ್ಲ್ಲೆಪರಿಂ ದಾಖಯ್ಲೆಂ ಪುಣ್ ಥೊಡ್ಯಾಂನಿ ತರ್ಯ್ ದೋನ್ ಸಬ್ದ್ ಬರಯ್ಲೆ; ದೋನ್ ಬರಿಂ ಉತ್ರಾಂ ಸಾಂಗ್ಲಿಂ; ಹಾಂವೆ ಎದೊಳ್ ಪಳೆವ್ನ್ ಸಯ್ತ್ ನೆಣಾಂ ಆಸ್ಚಾಂನಿ ಸಯ್ತ್ ಏಕ್ ವರ್ಗಣಿ ಧಾಡ್ಲಿ.
ಹಾಂಚೆ ಮಧೆಂ ಕೊಣಾಕ್ ಹೆಂ ಕೊಂಕ್ಣಿ ಅಭಿಯಾನ್ ನಾಂವ್ ರುಚ್ಲೆಂನಾ, ಕೊಣಾಕ್ ಹ್ಯಾ ಅಭಿಯಾನಾಚಿ ವರ್ದಿ ರುಚ್ಲಿನಾ. ತಿ ತಾಂಚಾ ಉಣ್ಯಾ ಭಾವಾಡ್ತಾಚಿ ದೂಖ್ ಆಮ್ಕಾಂ ನಾ; ಆಮಿಂ ಸಂತೊಸ್ ಪಾವ್ತಾಂವ್, ಗೊಂಯ್ಚಾ ಆಮ್ಚಾ ಭಾಂವಾಂನಿ ಸಯ್ತ್ ಜಾಪಿ ಬರಯ್ಲ್ಯೊ, ಆನಿಂ ಆಮ್ಚಾ ಹ್ಯಾ ಅಭಿಯಾನಾಂತ್ ತಾಂಚಾ ಪತ್ರಾಂ ಖಾತಿರ್ ವಾವ್ರುಂಕ್ಯ್ ಉಲೊ ದಿಲೊ. ಸಂಗತ್ ಹಾಂಗಾಚ್ ಸಂಪ್ತಾಗೀ? ಹಿ ಫ಼ಕತ್ತ್ ಏಕ್ ಸುರ್ವಾತ್, ಜಾಯ್ತಿಂ ಕಾಮಾಂ ಜಾಂವ್ಕ್ ಆಸಾತ್.
ಹ್ಯಾ ವರ್ದ್ಯಾಂನಿ ಕೊಣಾಕ್ ಫ಼ಕತ್ ನಾಂವಾ ದಿಸ್ಲಿಂ ತರ್ಯ್ ಪಾಟ್ಲಿಂ ಕಾಮಾಂ ನ್ಹಯ್ , ಮಿನತ್ ನ್ಹಯ್, ಸಭಾರಾಂಚಿ ನೀದ್ ಪಿಡ್ಡ್ಯಾರ್ ಜಾಲಿ, ಹ್ಯಾ ಕೊಂಕ್ಣಿ ವಾವ್ರಾಂತ್ ಸಭಾರ್ ನೆಣ್ತಿಂ ಬುರ್ಗಿಂ ನಿದ್ಲ್ಲೆಕಡೆ ಉಟ್ಲಿಂ, ಆಮ್ಚಾ ಫ಼ೊನಾಂನಿ ತಾಂಕಾಂ ಧೊಸ್ಲೆಂ, ಥೊಡ್ಯಾಂಕ್ ಆಮಿಂ ನಾಂವಾಚೆ ಅಂಗಲಾಪ್ ಕರ್ಚೆಪರಿಂ ಭೊಗ್ಲೆಂ. ಥೊಡ್ಯಾಂಕ್ ಆಮಿಂ ’ದಿವೊ’ ಪತ್ರಾಚೆ ಸೇಲ್ಸ್ಮೆನಾಂಪರಿಂ ಭೊಗ್ಲೆಂ. ತಾಂಚಾ ವಡ್ಪಣಾಂತ್ ’ಕೊಂಕ್ಣಿ’ ಮ್ಹಳ್ಳೊ ಸಬ್ಧ್ ಎಕಾ ಪಿಶ್ಯಾ ಪಾಕಾಪರಿಂ ಉಭೊನ್ ತಾಂಚೆಂ ಸಮಧಾನ್ ಪಿಡ್ಡ್ಯಾರ್ ಕರಿಲಾಗ್ಲೆಂ, ಥೊಡ್ಯಾಂನಿ ಅಣ್ಕಿಲೆಂ, ಥೊಡ್ಯಾಂನಿ ಧಮ್ಕಿ ದಿಲಿ, ಥೊಡ್ಯಾ ದೋನ್ ತೊಂಡಾಚಾ ಮನ್ಶಾಂನಿ ಕೊಣಾಕ್ ಸಾಂಗವ್ನ್ ಆಮ್ಕಾಂ ಕಠೀಣ್ ನಿರಾಸ್ಪಣ್ ಆನಿ ದೂಖ್ ಭೊಗ್ಚೆಪರಿಂ ಕೆಲೆಂ.
ತರ್ಯ್ ಆಮ್ಕಾಂ ಹಾಂತುಂ ನಿರಾಸ್ಪಣ್ ನಾ, ಸಂತೊಸ್ ಆಸಾ, ಸಂತೊಸ್ ಖಂಚೊ ಮ್ಹಳ್ಯಾರ್ ತಾಣಿಂ ಮೊರ್ಚಾಧಿಂ ಏಕ್ ಪಾವ್ಟಿಂ ಪುಣಿಂ ’ಕೊಂಕ್ಣಿ’ ಮ್ಹಳ್ಳೊ ಸಬ್ಧ್ ಆಯ್ಕಲೊ ನ್ಹಯ್ಗೀ ಮ್ಹಳ್ಳೊ. ಸಂತೊಸ್ ಥೊಡ್ಯಾಂನಿ ತರ್ಯ್ ಹ್ಯಾ ಅಭಿಯಾನಾಚಾ ಮುಖೆಲ್ಯಾಂಕ್ ಸಮ್ಜಾಲೆಂ ನ್ಹಯ್ಗೀ ಮ್ಹಳ್ಳೊ. ಸಂತೊಸ್ ಹೊಕೀ, ಹೆರ್ ಗಾಂವ್ಚಾ ಥೊಡ್ಯಾಂನಿ ತಾಂಚಾ ಗಾಂವಾಂತ್ಯ್ ಅಸಲಿ ಏಕ್ ಕೊಂಕ್ಣಿ ಅಭಿಯಾನ್ ಸಮಿತಿಚಿ ಸುರ್ವಾತ್ ಕರ್ಚಿ ಉರ್ಭಾ ದಾಖಯ್ಲಿ. ಆನಿಂ ಅಸಲ್ಯಾ ಉರ್ಭೆವಂತ್ ಮುಖೆಲ್ಯಾಂಚಿ ಖಂಡಿತ್ ಜಾವ್ನ್ ಆಮ್ಚಾ ಮಾಯ್ಭಾಸೆಕ್ ಭೋವ್ ಗರ್ಜೆಚಿ. ಹೆ ಮುಖೆಲ್ ಕಾಂಯ್ ಬೆಕಾರಿ ನ್ಹಯ್, ಘರಾನ್ ಘರ್ ವಸ್ತು ವಿಖ್ಚೆ ಸೇಲ್ಸ್ಮೇನ್ ನ್ಹಯ್. ಕೊಣಾಕ್ಯ್ ಸಾಂಬಾಳ್ ಜಾಂವ್ ಖಂಚಾಯ್ ರಿತಿಚೆಂ ಕಮಿಶನ್ ಮೆಳಾನಾ. ದೆಖುನ್ ಆಮ್ಚೆಮಧೆಂ ಆಸ್ಚೆ ಆಮಿಂ ಎಕಾಮೆಕಾ ಆಮ್ಕಾಂ ಕೊಣೇಂಯ್ ಸಾಂಗಾಜಯ್, ಆಮ್ಚೆ ಪಾಂಯ್ ಧರಿಜಯ್ ಆನಿಂ ವಿನತಿ ಕರಿಜಾಯ್ ಮ್ಹಣೊನ್ ರಾಕ್ಚೆಂ ನಾಕಾ. ಹಾಂತುಂ ಕೊಣಾಕ್ಯ್ ಕಿತೇಂಯ್ ಮೆಳಾನಾ, ಮೆಳ್ತಾ ತರ್ ಕಾಂಯ್ ತರ್ಯ್ ಕೆಲೆಂ ನ್ಹಯ್ಗೀ ಮ್ಹಳ್ಳಿ ಆತ್ಮ್ತೃಪ್ತಿ ಮ್ಹಳ್ಳೆಂ ಸಮ್ಜೊನ್ ಘೆಜಯ್ ಆನಿಂ ತೆಚ್ಚ್ ಖಾತಿರ್ ಆಮಿಂ ಹಾಂಗಾ ಜಮ್ಲ್ಯಾಂವ್ ಮೊಗಾಚಾನೊ.
ಆಮ್ಚಾ ಮಾಯ್ಭಾಸೆಕ್ ಆಮಿಂ ಸಗ್ಳಿಂ ಗರ್ಜೆಚಿಂ ಪುಣ್ ಕೋಣ್೦ಚ್ ಅನಿವಾರ್ಯ್ ನ್ಹಯ್. ಆಮಿಂ ದೊಳೆ ದಾಂಪ್ಲ್ಯಾರ್ಯ್ ಸುರ್ಯಾಚೊ ಪರ್ಜಳ್ ಕಾಂಯ್ ಸಂಪಾನಾ. ಯಾ ತಾಚಿ ದಾವ್ ಕಾಂಯ್ ಉಣಿಂ ಜಾಯ್ನಾ. ಆಮ್ಚಾ ಥೊಡ್ಯಾಂಲಾಗಿಂ ಗೆಲ್ಲೆವೆಳಾರ್ ಕಾಂಯ್ ಆಮಿಂ ವಾಟ್ ಚುಕೊನ್ ಪುಣೀಂ ಆಯ್ಲ್ಯಾಂವ್ಗಾಯ್ ಮ್ಹಳ್ಳೊ ದುಭಾವ್ಯ್ ಆಯಿಲ್ಲೊ ಆಸಾ, ಆಮಿಂ ಆಮ್ಚಾ ಲೊಕಾಂಲಾಗಿಂ ನ್ಹಯ್, ಬಗಾರ್ ಪರ್ಕ್ಯಾಂಗೆರ್ ಆಯ್ಲ್ಯಾಂವ್ ಮ್ಹಳ್ಳೆಂ ಭೊಗಾಪ್ ಏಕ್ ಘಡಿ ಆಮ್ಕಾಂ ಭೊಗ್ಲ್ಲೇಂಯ್ ಆಸಾ; ತವಳ್ ಮ್ಹಜಾ ಮತಿಂತ್ ಅಪಾಪಿಂಚ್ ಉದೆತಾತ್ ಹಿಂ ಉತ್ರಾಂ;
’ಪರ್ಕಿ ತಿಂ ಪರ್ಕಿಂಚ್ ರೆ ತಿಂ ಕಿತೆಂ ಜಾಣಾಂತ್ ಆಮ್ಚಿ ಮಾಯ್ಭಾಸ್ ಕಿತೆಂ ಮೆಳ್ಳಿ?
ಪರ್ಕಿ ತರ್ಯ್ ಫ಼ಕತ್ ಫ಼ಾತೊರ್ ಮಾರ್ತೆಲೆ ಆನಿ ಕಾಳ್ಜಾಂಕ್ ತೊಪಯ್ತೆಲೆ
ಪುಣ್ ಆಮ್ಚೆ ಕಾಳ್ಜಾಕ್ ಭಾಲ್ಯಾಂನಿ ಪಾಪ್ಸಿತೆಲೆರೆ’
ಹಿಂ ಉತ್ರಾಂ ತುಮ್ಕಾಂ ನಿರಾಸ್ಪಣಾಚಿ ಕುರುಃ ದಿತಾತ್ ತರ್ ಮ್ಹಾಕಾ ಮಾಫ಼್ ಕರಾ, ತೊ ಉದ್ದೇಶ್ ಮ್ಹಾಕಾ ಬಿಲ್ಕುಲ್ ನಾ, ಹಿ ಫ಼ಕತ್ ಏಕ್ ಸುರ್ವಾತ್, ಹಾಂವೆ ಆಧ್ಲ್ಯಾ ಮಯ್ನ್ಯಾಂತ್ಯ್ ಸಾಂಗ್ಲಾಂ; ಮ್ಹಜೆಂ ಫ಼ಾಲೆಂ ಹಾಂವ್ ನೆಣಾಂ, ಫ಼ಾಲ್ಯಾಂ ಹಾಂವ್ ಆಸಾಂಗೀ ನಾಂಗೀ ಮ್ಹಳ್ಳಿ ಖಾತ್ರಿ ಮ್ಹಜೆಲಾಗಿಂ ನಾ.
ಪುಣ್ ಮ್ಹಜಿಂ ಹಿಂಚ್ ಆಶಾವಾದಿ ಉತ್ರಾಂ ಜಾವ್ನಾಸಾತ್ ’ಮ್ಹಾಕಾ ಫ಼ಾಲೆಂ ಆಸೊಂ ಯಾ ನಾ ಆಸೊಂ, ಪುಣ್ ಫ಼ಾಲೆಂ ಜರೂರ್ ಆಸ್ತೆಲೆಂ, ರಾನ್ ಆಸೊಂ ಯಾ ವಾಳ್ವಾಟ್ ಆಸೊಂ ಪುಣ್ ಫ಼ುಲಾಂ ಜರೂರ್ ಫ಼ುಲ್ತೆಲಿಂ’ ಆಮ್ಕಾಂ ಆಯ್ಕೊಂಕ್/ಭೊಗುಂಕ್ ಮೆಳ್ಲ್ಲ್ಯಾ ಹರ್ಯೆಕಾ ವಾಯ್ಟಾಕ್ ಪಳೆವ್ನ್ ಆತಾಂ ಆಮಿಂ ನಿರಾಸ್ ಜಾಂವ್ಚೆಂ ನಾಕಾ. ತಿತ್ಲಿಂ ಆಸ್ಕತ್ ಮನ್ಶಾಂ ಆಮಿಂ ನ್ಹಂಯ್, ಆಮಿಂ ಧಯ್ರಾನ್ ಆಸ್ಚಿ ಗರ್ಜ್ ಆಸಾ, ಆಮ್ಕಾಂ ಆಯ್ಕೊಂಕ್ ಮೆಳ್ಲ್ಲ್ಯಾ ಬರ್ಯಾಕ್ ಪಳೆವ್ನ್ ಆತಾಂ ಸಂತೊಸ್ ಪಾವ್ಯಾಂ ನ್ಹಯ್ಗೀ?
ಕೊಂಕ್ಣೆಂತ್ಲ್ಯಾ ಸಭಾರ್ ಮಾಲ್ಘಡ್ಯಾ ಬರವ್ಪ್ಯಾಂನಿ ಆಮ್ಕಾಂ ಆಮ್ಚಾ ಕಾಮಾಂತ್ ಆಸ್ಚೊ ಅರ್ಥ್ ಆನಿ ಗರ್ಜ್ ಆಮ್ಕಾಂ ಸಮ್ಜಾಯ್ಲಾಂ ದೆಖುನ್ ಉಲ್ಲಾಸ್ ತುಮ್ಕಾಂ ಮುಖೆಲ್ಯಾಂನೊ, ಥೊಡ್ಯಾ ಸಂಪಾದಕಾಂನಿ ಆಮ್ಕಾಂ ಆಮ್ಚಾ ಹ್ಯಾ ಅಭಿಯಾನಾಂತ್ ಜಯ್ತ್ ಮಾಗ್ಲಾಂ ದೆಖುನ್ ಉಲ್ಲಾಸ್ ಪಾವ್ಯಾಂ ಮುಖೆಲ್ಯಾಂನೊ, ಕೊಂಕ್ಣೆವಿಶ್ಯಾಂತ್ ಚಾಟಿಂಗಾರ್ ಉಲಯ್ತಾನಾ ಕೊಣೇಂಯ್ ಆಮ್ಚಿಂ ನಾಂವಾಂ ಕಾಡ್ಲ್ಯಾಂತ್ ತರ್ ಉಲ್ಲಾಸ್ ಪಾವ್ಯಾಂ, ಕಿತ್ಯಾಕ್ ಮ್ಹಳ್ಯಾರ್ ಆತ್ಮೊ/ಜೀವ್ ನಾತ್ಲೆಲ್ಯಾಂಸವೆಂ ಆಸೊನ್ ಫ಼ಾಯ್ದೊ ತರ್ಯ್ ಕಸಲೊ? ಶೆಳೆರ್ ಮಾಂಡ್ಲೆಲ್ಯಾ, ಭಿಜುಡ್ಯಾಂಕ್ ಪಳೆವ್ನ್ ಜಾಂವ್ಚೆಂ ತರ್ಯ್ ಕಿತೆಂ ಆಸಾ?
ಆಮ್ಕಾಂ ಮುಖಾರ್ ವಚೊಂಕ್ ಆಸಾ, ಜಯ್ತಾಚೊ ಮುಕುಟ್ ಜೊಡುಂಕ್ ಆಸಾ, ಮುಕುಟ್ ತೆಂ ಕೊಣಾಕ್ಯ್ ಲಾಭೊಂ, ಆಮ್ಕಾಂ ಬಿಲ್ಕುಲ್ ನಾಕಾ, ಪುಣ್ ತಿತ್ತುನ್ ವೆಚಿ ವಾಟ್ ಮಾತ್ರ್ ಆಮ್ಕಾಂ ಸಾಂಗಾತಾ ಚಲೊಂಕ್ ಆಸಾ, ದೆಖುನ್ ಸ್ಪಿರಿತಾನ್ ಭರ್ಯಾಂ, ಆನಿಂ ಎಕಾ ಮನಾನ್, ಎಕಾ ಉದ್ದೇಶಾಕ್ ಆಮಿಂ ಎಕಾ ವಾಟೆರ್ ಯಾಗೀ?
ಕೊಂಕಣಿ ಥಂಯ್,
ವಲ್ಲಿ ಕ್ವಾಡ್ರಸ್, ಅಜೆಕಾರ್
ಏಕ್ ಕೊಂಕ್ಣಿ ಸೆವಕ್ - ಕೊಂಕ್ಣಿ ಅಭಿಯಾನ್ ಸಮಿತಿ
[ಹೆಂ ಲೇಖನ್ 2003 ಸಪ್ತಂಬರ್ 5 ತಾರಿಕೆರ್ ಕುವೆಯ್ಟಾಂತ್ ಜಾಲ್ಲ್ಯಾ ಕೊಂಕ್ಣಿ ಅಭಿಯಾನ್ ಸಮಿತಿಚಾ ದುಸ್ರ್ಯಾ ಜಮಾತೆರ್ ವಾಚುನ್ ಸಾಂಗ್ಲಾಂ]
ಕೊಂಕ್ಣಿ ಅಭಿಯಾನ್ ಸಮಿತಿಚಾ ವಾವ್ರಾಕ್ ಲಗ್ತಿ ಜಾಲ್ಲಿಂ ಲೇಖನಾಂ
ಕೊಂಕ್ಣಿ ಅಭಿಯಾನ್ ಸಮಿತಿಕ್ ಆಯಿಲ್ಲೆ ಸಂದೇಶ್-ಅಭಿಪ್ರಾಯ್
ಕೊಂಕ್ಣಿ ಅಭಿಯಾನ್ ಸಮಿತಿ ಮ್ಹಳ್ಯಾರ್ ಕಿತೆಂ? - ಲೇಖನ್
ಕೊಂಕ್ಣಿ ಭಾಸೆಚಿ/ಪತ್ರಾಂಚಿ ಆಯ್ಚಿ ಪರಿಗತ್
ಕೊಂಕ್ಣಿ ಅಭಿಯಾನ್ ಸಮಿತಿಚೊ ಎದೊಳ್ಚೊ ವಾವ್ರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications