ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 20. ಮೂಳ್ ಶಿಕಾಪ್
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಹಿ ಸಕ್ಡಾಂಕೀ ಕಳಿತ್ ಆಸ್ಚಿ ದೊಗಾಂ ಕಿರಾಂಚಿ ಏಕ್ ಲ್ಹಾನ್ ಕಾಣಿ.
ಎಕಾ ಗಾಂವಾಂತ್ ದೋನ್ ಕೀರ್ ಆಸ್ಲ್ಲ್ಯೊ. ತಾಂತುಂ ಎಕಾ ಕಿರಾಕ್ ಎಕ್ಲೊ ಸನ್ಯಾಸಿ ವರ್ನ್ ಗೆಲೊ ಆನಿಂ ಆಪ್ಲ್ಯಾ ಘರಾಂತ್ ತ್ಯಾ ಕಿರಾಕ್ ಪೊಸುಂಕ್ ಲಾಗ್ಲೊ. ತಾಕಾ ಬರೆಂ ಶಿಕಾಪ್ ದಿಲೆಂ. ಆನಿಂ ಹ್ಯಾ ಸನ್ಯಾಸಿಚಿ ಬರಿ ಜಿಣಿ ದೆಖೊನ್ ತಿ ಕೀರ್ ವ್ಹಡ್ ಜಾಲಿ.
ತಶೆಂಚ್ ಅನ್ಯೇಕಾ ಕಿರಾಕ್ ಎಕ್ಲೊ ಕಾಸಾಪ್ಪಿ ವ್ಹರ್ನ್ ಗೆಲೊ. ಖುನಿ ಕರ್ಚಿ, ಲೂಟ್ಮಾರ್ ಆನಿ ಅನೀತೆನ್ ಲೊಕಾಂಚೆ ಪೊಯ್ಶೆ ಲುಟ್ಚೆಂ ಕಾಮ್ ಕರ್ಚಾ ಹ್ಯಾ ಕಾಸಾಪ್ಪ್ಯಾಚಾ ಘರಾಂತ್ ಹಿ ಅನ್ಯೇಕ್ ಕೀರ್ ವ್ಹಡ್ ಜಾಲಿ.
ಸುಮಾರ್ ತೆಂಪಾ ಉಪ್ರಾಂತ್ ಎಕ್ಲೊ ವಾಟ್ಸುರಿ ವಾಟ್ ಚುಕೊನ್ ಹ್ಯಾ ಸನ್ಯಾಸಿಚಾ ಘರಾ ಯೆತಾನಾ ಭಾಯ್ರ್ ಆಸ್ಚಿ ಕೀರ್ ಬೊಭಾಟಿಲಾಗ್ಲಿ
"ಯೇ.. ಭಿತರ್ ಯೇ.. ಪುರಾಸಣೆಂತ್ ಆಯ್ಲೊಯ್ ದಿಸ್ತಾ.. ಇಲ್ಲೆಂ ಉದಾಕ್ ಪಿಯೆ ಆನಿಂ ಇಲ್ಲೊ ವಿಶೆವ್ ಘೆ."
ವಾಟ್ ಮುಖಾರ್ಸುನ್ ಗೆಲ್ಲೊ ಹೊ ವಾಟ್ಸುರಿ ತ್ಯಾ ಕಾಸಾಪ್ಪಿಚಾ ಘರಾಸಮೊರ್ ವೆತಾನಾ ತಿ ಕೀರ್ ಬೊಭಾಟ್ಲಿ;
"ಮಾರ್ ತಾಕಾ.. ಎಕಾ ಮಾರಾಕ್ ದೋನ್ ಕೂಡ್ಕೆ ಜಾಂವ್ ತಾಚಿ ಕೂಡ್. ತಾಚೊ ಗಳೊ ಕಾಪ್....".
ಸಂದೇಶ್: ಹರ್ಯೆಕಾ ಮನ್ಶಾಂಚಾ ಜಿಣ್ಯೆಂತ್ ಏಕ್ ಮೂಳ್ ಶಿಕಾಪ್ ಮ್ಹಳ್ಳೆಂ ಆಸ್ತಾ. ಚಡಾವತ್ ಜಾವ್ನ್ ಆಪ್ಲ್ಯಾ ಆವಯ್ ಬಾಪಾಯ್ ಥಾವುನ್ ಶಿಕ್ಚೆಂ.
ಕಸಲ್ಯಾಯ್ ಕಾರಾಣಾಂಕ್ ಜಾವ್ಯೆತ್ ಹೆಂ ಮೂಳ್ ಶಿಕಾಪ್ ಬರೆಂ ಆಸಾ ತರ್ ಥಂಯ್ ಖಂಡಿತ್ ಜಾವ್ನ್ ಏಕ್ ಬರ್ಯಾ ವೆಕ್ತಿತ್ವಾಚೆಂ ಜನನ್ ಜಾತಾ ಆನಿಂ ಖೊಟ್ಯಾ ಮೂಳ್ ಶಿಕ್ಪಾಂತ್ ಖಂಡಿತೀ ಖೊಟೆಂ ವೆಕ್ತಿತ್ವ್ ಜನನ್ ಘೆತಾ. ದೆಖುನ್ಂಚ್ ಜಾಣಾರಿ ಮ್ಹಣ್ತಾತ್ "ಎಕಾ ಬುರ್ಗ್ಯಾಕ್ ಆಪ್ಲೆಂ ಘರ್ಚ್ ಪಯ್ಲೆಂ ಇಸ್ಕೊಲ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
