ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 13. ರಾಗ್
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಎಕಾ ಕುಟ್ಮಾಂತ್ ಏಕ್ ಆವಯ್ ಬಾಪುಯ್ ಆನಿ ಏಕ್ ಪೂತ್ ಆಸ್ಲ್ಲೊ. ದೇವ್ ಭಿರಾಂತೆನ್, ಸಮಾಧಾನೆನ್ ತಿಂ ಮಯಾಮೊಗಾನ್ ಜಿಯೆವ್ನ್ ಆಸ್ಲ್ಲಿಂ. ಪುಣ್ ಪುತಾಕ್ ತವಳ್ತವಳ್ ಕಠೀಣ್ ರಾಗ್ ಯೆತಾಲೊ ಆನಿ ತ್ಯಾ ರಾಗಾರ್ ತೊ ಹಾತಾಂತ್ ಮೆಳ್ಲ್ಲೆಂ ಕಿತೆಂಯ್ ಕಾಡ್ನ್ ಉಡಯ್ತಾಲೊ ಆನಿ ಫುಟಯ್ತಾಲೊ.
ಕಠೀಣ್ ಉತ್ರಾಂನಿ ಗಾಳಿ ಸೊವ್ತಾಲೊ. ಆನಿ ಪುತಾಚೊ ಹೊ ರಾಗ್ ಆವಯ್ ಆನಿ ಬಾಪಾಯ್ಚಾ ಖಂತಿಕ್ ಕಾರಣ್ ಜಾಲೊ.
ಏಕ್ ದೀಸ್ ಚಿಂತುನ್ ಆಸ್ಚಾ ಬಾಪಾಯ್ನ್ ಪುತಾಕ್ ಲಾಗಿಂ ಆಪವ್ನ್ ಏಕ್ ಪೊತೆಂಭರ್ ಖಿಳೆ ಆನಿ ಏಕ್ ಮೊಡ್ತೆಲ್ ದಿವುನ್ ತಾಕಾ ರಾಗ್ ಯೆತಚ್ಚ್ ಎಕೆಕ್ಚ್ಚ್ ಖಿಳೆ ರಾಗ್ ಸಂಪ್ತಾಸರ್ ಘರ್ಚಾ ವೊಣೊದಿಕ್ ಮಾರುಂಕ್ ಸಾಂಗ್ಲೆಂ.
ಪುತಾಕ್ ಏಕ್ ದೀಸ್ ಪರತ್ ರಾಗ್ ಆಯ್ಲೊ ಆನಿ ಖಿಳೆ ವಿಂಚುನ್ ಎಕೆಕ್ಚ್ಚ್ ಕರ್ನ್ ಘರ್ಚಾ ವೊಣದಿಕ್ ಮಾರುಂಕ್ ಲಾಗ್ಲೊ. ಪಯ್ಲ್ಯಾ ದಿಸಾ ಚಡುಣೆ ಸಾಟ್ ಖಿಳೆ ತಾಣೆ ವೊಣದಿಕ್ ಮಾರ್ಲೆ. ಆನಿ ಅಶೆಂಚ್ ದುಸ್ರ್ಯಾ ದಿಸಾಯ್ ತಾಕಾ ರಾಗ್ ಆಯ್ಲೊ ಆನಿ ಪರ್ತುನ್ ಘರ್ಚಾ ವೊಣೊದಿಚೆರ್ ಖಿಳೆ ಮಾರುಂಕ್ ಲಾಗ್ಲೊ. ಪುಣ್ ಹ್ಯೆ ಪಾವ್ಟಿಂ ಪನ್ನಾಸ್ ಖಿಳೆ ಮಾತ್ರ್ ಮಾರ್ಲೆ.
ಸುಮಾರ್ ದಿಸಾಂ ಉಪ್ರಾಂತ್ ತೊ ರಾಗಾಕ್ ಆಪ್ಲೆ ಸ್ತಿಮಿತಾಕ್ ಹಾಡುಂಕ್ ಶಿಕ್ಲೊ ಆನಿ ದಿಸಾನ್ ದೀಸ್ ತಾಣೆ ಮಾರ್ಚೆ ಖಿಳೆ ಉಣೆ ಜಾವುನ್ ಆಯ್ಲೆ.
ಆನಿ ಏಕ್ ದೀಸ್ ಪುತಾನ್ ಎಕೀ ಖಿಳೊ ವೊಣೊದಿಕ್ ಮಾರುಂಕ್ ನಾತ್ಲ್ಲೊ. ತೊ ಸಂತೊಸಾನ್ ಧಾಂವೊನ್ ಯೇವ್ನ್ ಬಾಪಾಯ್ಲಾಗಿಂ ಸಾಂಗಾಲಾಗ್ಲೊ
’ಪಪ್ಪಾ ಹಾಂವ್ ರಾಗಾಕ್ ಮುಟಿಭಿತರ್ ದವ್ರುಂಕ್ ಸಕ್ಲೊ. ಆಜ್ ಹಾಂವೆ ಎಕೀ ಖಿಳೊ ಮಾರುಂಕ್ನಾ’ ತಾಚಿಂ ಉತ್ರಾಂ ಆಯ್ಕಲ್ಲ್ಯಾ ಬಾಪಾಯ್ಕ್ ಸಂತೊಸ್ ಜಾಲೊ ಆನಿ ತೊ ಪುತಾಕ್ ವೊಣೊದಿಚೆರ್ ಮಾರ್ಲ್ಲೆ ಎಕೆಕ್ಚ್ಚ್ ಖಿಳೆ ಕಾಡುಂಕ್ ಸಾಂಗಾಲಾಗ್ಲೊ. ಆನಿ ಪುತಾನ್ ತಶೆಂಚ್ಚ್ ಕೆಲೆಂ ಆನಿ ಯೇವ್ನ್ ಬಾಪಾಯ್ಕ್ ಹ್ಯಾ ವಿಶ್ಯಾಂತ್ ಸಾಂಗ್ಲೆಂ. ಬಾಪಾಯ್ನ್ ಪುತಾಕ್ ಆತಾಂ ವೊಣೊದಿಲಾಗಿಂ ಆಪವ್ನ್ ಹಾಡ್ಲೊ ಆನಿ ತಿ ವೊಣೊದ್ ದಾಖವ್ನ್ ಸಾಂಗಾಲಾಗ್ಲೊ.
"ಬರೆಂ ಕೆಲೆಂಯ್ ಪುತಾ. ಪಳೆ ಪುತಾ, ಹ್ಯಾ ವೊಣೊದಿಚೆರ್ ತುಂವೆ ಖಿಳೆ ಮಾರ್ಲೆಯ್ ಆನಿ ಕಾಡ್ಲೆಯ್. ಆತಾಂ ಥಂಯ್ಚರ್ ಖಿಳೆ ನಾಂತ್ ತರ್ಯೀ ತೆ ಘಾಯ್ ಆಜೂನ್ ಆಸಾತ್. ತಶೆಂಚ್ಚ್ ರಾಗಾರ್ ತುಂವೆಂ ಉಲಂವ್ಚಿ ಉತ್ರಾಂ ಕೊಣಾಯ್ಕೀ ಅಶೆಂಚ್ಚ್ ದುಖಂವ್ಕ್ ಸಕ್ತಾತ್. ಆನಿ ತುಂವೆ ಕಿತ್ಲೆ ಪಾವ್ಟಿಂಯೀ ತಾಂಚೆಲಾಗಿಂ ಭಗ್ಸಾಣೆಂ ಮಾಗ್ಲ್ಯಾರೀ ತಿ ದೂಖ್ ಥಂಯ್ಚ್ ಉರ್ತಾ"
ಸಂದೇಶ್: ರಾಗ್ ಹರ್ಯೆಕಾ ಮನ್ಶಾಕ್ ಆಸ್ತಾ ಆನಿ ಚಡಾವತ್ ಜಾವ್ನ್ ಹೊ ರಾಗ್ ಮನ್ಶಾಕ್ ಕುಡ್ಡೊ ಕರ್ತಾ. ಆಪುಣ್ ಕಿತೆಂ ಕರ್ತಾಂ? ಕಿತೆಂ ಉಲಯ್ತಾಂ ಮ್ಹಳ್ಳೆಂ ವಿಸರ್ತಾ. ಹೊ ರಾಗ್ಚ್ಚ್ ಮನ್ಶಾಚೊ ಏಕ್ ವ್ಹಡ್ ದುಸ್ಮಾನ್ ಮ್ಹಣೊನ್ ಲೆಖುನ್ ರಾಗ್ ಯೆತಚ್ಚ್ ಮೌನ್ ರಾವ್ಲ್ಯಾರ್ ಆಮ್ಚೆ ಥಾವುನ್ ಜಾಂವ್ಕ್ ಸಾಧ್ಯ್ ಆಸ್ಚೊ ಮೊಸ್ತ್ ಚುಕಿ ಆಡಾಂವ್ಕ್ ಸಾಧ್ಯ್ ನಾಂತ್ಗಿ?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
