ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಪಾತ್ಕಾಂ
ಜೆಮ್ಮಾ ಪಡೀಲ್: ಕೊಂಕ್ಣಿ ಸಾಹಿತ್ಯಾಂತ್ ಸಿಂತಿಮೆಂತಾಳ್ ಕಾಣ್ಯಾಂಕ್ ಭೋವ್ ಫಾಮಾದ್ ಜಾಲ್ಲೊ ಕಾಣ್ಯೆಗಾರ್ ಜಾವ್ನಾಸಾ. ಹಾಚ್ಯಾ ಮಟ್ವ್ಯಾ ಕಾಣ್ಯಾಂಚೆ ತೀನ್ ಬೂಕ್, ಆಶಾ ಭಾಗಯ್ಲಿ (1967), ಸಿಂತಿಮೆಂತಾಂ (1991) ಆನಿ ದುಖಾಂ (2001) ಪರ್ಗಟ್ಲ್ಯಾತ್. ಹಾಚ್ಯಾ ಕಾಣ್ಯಾಂಚಿ ವಿಶೇಸ್ ಸೊಭಾಯ್ ಹಿ ಜಾವ್ನಾಸಾ - ವಾಚ್ಪ್ಯಾಕ್ ಹಿ ಕಾಣಿ ವಾಚ್ತಾಂ ವಾಚ್ತಾಂ ಅಪ್ಲ್ಯಾ ದೊಳ್ಯಾಂ ಹುಜಿರ್ ಘಡ್ಚೆಂ ಏಕ್ ಘಡಿತ್ಗಾಯ್ ಮ್ಹಳ್ಳೆಂ ಚಿಂತಾಪ್ ಉಭ್ಜಾಯ್ತಾ ಮಾತ್ರ್ ನ್ಹಂಯ್, ಸಭಾರ್ ಕಾಳ್ ಪರ್ಯಾಂತ್ ಮತಿಂತ್ ಉರಂವ್ಚಿ ಶ್ಯಾಥಿ ಹಾಚಾ ಕಾಣ್ಯಾಂಕ್ ಆಸಾ ಮ್ಹಣ್ಚಾಕ್ ಹಿ ಕಾಣಿ ಅಪುರ್ಭಾಯೆಚಿ ಗೊವಾಯ್ ದಿತಾ. [’ಸಿಂತಿಮೆಂತಾಂ’ ಬುಕಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಜೆಮ್ಮಾ ಪಡೀಲಾಚ್ಯೊ ಹೆರ್ ಕಾಣ್ಯೊ: ಪಾಂತಿ, ಪರ್ನೆಂ ಕದೆಲ್, ಮೊಳಾಬ್ ಆನಿ ಮೊಡಾಂ
ಜೆಮ್ಮಾ ಪಡೀಲ್
ಸಕಾಳಿಂಚಾ ಧಾ ವೊರಾರ್ ಆಪ್ಲಿ ಪರ್ನಿ ಸತ್ರಿ ಉಸವ್ನ್, ಬೋಳ್ ಜಾಲ್ಲ್ಯೆ ತಕ್ಲೆಕ್ ಸುರ್ಯಾಚಿಂ ಕೀರ್ಣಾಂ ಪಡಾನಾಸೆಂ, ಹಗುರ್ ಹಗುರ್ ಮೆಟಾಂ ಕಾಡ್ನ್ ರಾಜ್-ರಸ್ತ್ಯಾರ್ ಚಲ್ತಾಲೊ
ಆಂತೊನಾಮ್. ಸದಾಂ ಹೆಂ ತಾಚೆಂ ಕಾರ್ಯಕ್ರಮ್. ನಿವೃತ್ತ್ ಜಾವ್ನ್ ವರ್ಸಾಂ ಸ ಉತ್ರಾಲ್ಲಿಂ ತರೀ, ಘರಾಂತ್ ಕಸಲೊಚ್ ಆವಾಜ್ ನಾತ್ಲೆಲ್ಯಾನ್, ಆಂಜೆಲಾನ್ ಕೆಲ್ಲಿ ಚಾ ಯಾ ಕಾಫಿ ಏಕ್ದಮ್ ಬರಿ ಲಾಗ್ತಾಲಿ ತರೀ, ತೊ ಸದಾಂಯ್ ಚ್ಯಾರ್ ಗಜಾಲಿ ಕಾಂತುಂಕ್ ವೇಳ್ ಪಾಶಾರ್ ಕರುಂಕ್ ಅಸಲೊ ಏಕ್ ವಿಭಿನ್ನ್ ಸಂದರ್ಭ್ ಅಪ್ಲೆಸ್ತಕಿಂ ರಚುನ್ ಆಯಿಲ್ಲೊ. ಆನಿ ಆತಾಂ ಹೆಂ ತಾಕಾ ಸವಯೆರ್ ಪಡ್ಲ್ಲೆಂ.
ಚಾಳೀಸ್ ವರ್ಸಾಂ ಥಾವ್ನ್ ಕೊಡ್ತೆಚಿ ಪೆದೊ ಜಾವ್ನ್ ಕಾಮ್ ಕೆಲ್ಲ್ಯಾ ತಾಕಾ, ಸಕಾಳಿಂಚಾ ಧಾ ವೊರಾಂ ಥಾವ್ನ್ ಸಾಂಜೆಚಾ ಪಾಂಚ್ ವೊರಾಂ ಪರ್ಯಾಂತ್ ಕಾಮಾನ್ ತಲ್ಲೀನ್ ಜಾಲ್ಲ್ಯಾ ತಾಕಾ, ಉತ್ರಾಲ್ಲ್ಯಾ ಸ ವರ್ಸಾಂನಿ ವೇಳ್ ಪಾಶಾರ್ ಕರುಂಕ್ ಕಳಿತ್ ನಾಸ್ತಾಂ ನಿವೃತ್ತ್ಪಣಾಂತ್ ಎಕ್ಸುರ್ಪಣ್ ಧೊಸ್ತಾಲೆಂ. ಖಂಡಿತ್ ಎಕ್ಸುರೊ ನ್ಹಂಯ್ ತೊ! ಕಿತ್ಯಾಕ್, ತಾಕಾ ತಾಚೆಂ ಆಂಜೆಲ್ ಆಸಾ.
ತೊ ಆನಿ ತಾಚೆಂ ಆಂಜೆಲ್! ಆಂಜೆಲ್ ಆನಿ ತೊ ಮಾತ್ರ್ ತ್ಯಾ ಘರಾಂತ್. ಪಾಂಚ್ ಕುಡಾಂಚಾ ತ್ಯಾ ’ಆಂಟನಿ ವಿಲ್ಲಾ’ -ಂತ್ ಆತಾಂ ಹೆರ್ ಮನ್ಶಾಂ ಮ್ಹಳ್ಳಿಂ ನಾಂತ್. ಕೊಡ್ತಿನ್
ಮೆಳ್ಚಾ ಸಾಂಭಾಳಾನ್ ತಸೆಂ ಹೆಣೆಂ-ತೆಣೆಂ ಮೆಳ್ಲ್ಲ್ಯಾ ಕುಮ್ಕೆನ್ ಪಾಂಚ್ ಕುಡಾಂಚೆಂ ಘರ್ ತಾಣೆಂ ಭಾಂದ್ಲ್ಲೆಂ ತರೀ, ಆತಾಂ’ತಾಂ ತೆಂ ಪಳೆಂವ್ಕ್ ’ವ್ಹಡ್’ ದಿಸ್ತಾ! ಘರಾಂತ್ ತಿಂ ದೊಗಾಂ
- ದೆಕುನ್ ತ್ಯಾ ಪಾಂಚ್ ಕುಡಾಂತ್ಲ್ಯಾ ತ್ಯಾ ಘರಾಚಿಂ ತೀನ್ ಕುಡಾಂ ಕೆದಾಳಾಯ್ ಬಂಧ್! ಅಪ್ರೂಬ್ ವರ್ಸಾಂತ್ ಏಕ್ ಮಹಿನೊ ತಾಚಾ ಘರ್ಚೆಂ ಎಕೇಕ್ ಕೂಡ್ ಉಗ್ತೆಂ ಜಾತಾ ನ್ಹಂಯ್ - ಉಗ್ತೆಂ ಕರ್ಚೆಂ ತಾಂಚಿಂ ಭುರ್ಗಿಂ ಗಾಂವಾಕ್ ಆಯಿಲ್ಲ್ಯಾ ವೆಳಾರ್ ಮಾತ್ರ್!
ಭುರ್ಗಿಂ...
ತಾಂಕಾಂ ತೆಗಾಂ ಭುರ್ಗಿಂ, ತೆಗಾಂ ಮಾತ್ರ್! ಆಜ್ಕಾಲ್ ಸರ್ಕಾರಾನ್ ಪ್ರಗಟ್ ಕರ್ಚೊ ತೊ ’ತಾಂಬ್ಡೊ ತ್ರಿಕೋನ್’ ಅಸ್ಥಿತ್ವಾಕ್ ಯೆಂವ್ಚ್ಯಾ ಪಯ್ಲೆಂಚ್, ನೆಣಾಸ್ಲೆಲ್ಯಾ ಆಂತೊನಾಮಾಕ್ ತಸೆಂ ಆಂಜೆಲಾಕ್ ಜಾಲ್ಲಿಂ ಭುರ್ಗಿಂ ತೆಗಾಂ ಮಾತ್ರ್! ತಶೆಂ ಕಸೆಂ ತೆಗಾಂ ಜಾಲಿಂ ಮ್ಹಳ್ಳೆಂ ಮಾತ್ರ್ ತಿಂ ನೆಣಾಂತ್. ತಾಂತ್ಲೊ ಪಯ್ಲೊ ರೋಬರ್ಟ್.
ರೋಬರ್ಟ್ ಮ್ಹಳ್ಳೆಂ ನಾಂವ್ ತಾಕಾ ದವರ್ಲೆಲೆಂ ತರೀ, ಲ್ಹಾನ್ ಆಸ್ತಾನಾ, ಆಂಜೆಲ್ ಪಡೊನ್ ತಿಚೆ ಮುಕ್ಲೆ ದೋನ್ ದಾಂತ್ ಗೆಲ್ಲೆ ಜಾಲ್ಲ್ಯಾನ್, ಜೀಬ್ ಉಲಯ್ತಾನಾ ಘುಸ್ಪಡ್ತಾಲಿ. ದೆಕುನ್ ಆಂಜೆಲಾನ್ ಆಪ್ಲ್ಯೆ ಜಿಬೆಚ್ಯೆ ಸುಲಭಾಯೆ ಖಾತಿರ್ ರೋಬರ್ಟಾಕ್ ’ರುಬಿ’ ಮ್ಹಣ್ ಉಲೊ ಮಾರುಂಕ್ ಸುರು ಕೆಲೆಂ. ಆನಿ ತಸೆಂ ಆತಾಂ ’ರೋಬರ್ಟ್’ ಸರ್ವಾಂಕ್ ’ರುಬಿ’ ಮ್ಹಳ್ಳ್ಯಾ ನಾಂವಾನ್ ಮಾತ್ರ್ ವಳ್ಕಾತಾ. ಆಪ್ಲೆಂ ಶಿಕಾಪ್ ಸಾಂ.ಲುವಿಸ್ ಕೊಲೆಜಿಂತ್ ಪ್ರಥಮ್ ಹಂತಾರ್ ಉತ್ತೀರ್ಣ್ ಜಾವ್ನ್, ಬೊಂಬೊಯ್ ರಿಜರ್ವ್ ಬ್ಯಾಂಕಾಂತ್ ಕಾಮ್ ಜೊಡ್ಲ್ಲೆಂ ತಾಣೆಂ. ಆಯ್ಲೆವಾರ್ ತಾಕಾ ಬ್ಯಾಂಕಾ ಥಾವ್ನ್ ಘರ್ ಮೆಳ್ಲ್ಲೆಂ. ಮಹಿನ್ಯಾ ಮಹಿನ್ಯಾಕ್ ಆವಯ್ಕ್ ಕಾಗಾದ್ ಬರಯ್ಲೆಂ ಮ್ಹಣ್ ಆಂತೊನಾಮಾಕ್ ರಾಗ್ ನಾತ್ಲೊ. ಕಿತ್ಯಾ! ಆಯಿಲ್ಲೆಂ ಕಾಗದ್ ವಾಚ್ಚೆಂ ತಾಣೆಂಚ್! ಆನಿಂ ಪಯ್ಶೆ ಘೆಂವ್ಚೆಯೀ ತಾಣೆಂಚ್! ರುಬಿಕ್ ಕಾಜಾರ್ ಜಾವ್ನ್ ತೀನ್ ವರ್ಸಾಂಚೊ ಚೆರ್ಕೊ ಆಸಾ ಆತಾಂ. ನಾಂವ್ ತಾಚೆಂ - ಜೇಕ್ಸನ್.
ರುಬಿಚೆಂ ಕಾಜಾರ್ ಜಾಲ್ಲೆಂ ಬೊಂಬೊಯಾಂತ್. ಕಾಜಾರಾಕ್ ಆಂಜೆಲ್ ಆನಿ ಆಂತೊನಾಮ್ ವಚೊಂಕ್ ನಾಂತ್. ತಾಚಿ ವ್ಹಕಾಲ್ ಬೊಂಬೊಯ್ಚಿ ತರೀ, ತಾಚೆಂ ಘರಾಣೆಂ ಮಂಗ್ಳುರ್ಚೆಂ. ವ್ಹಕ್ಲೆಚೆಂ ನಾಂವ್ ವೀರಾ. ಹೆಂ ವೀರಾ ಆನಿ ರುಬಿ ಎಕಾ ದಫ್ತರಾಂತ್ ಕಾಮ್ ಕರ್ತಾನಾ ತಾಂಕಾಂ ವಳೊಕ್ ಜಾವ್ನ್, ವಳೊಕ್ ಮೊಗಾಂತ್ ಬದ್ಲೊನ್ ನಂತರ್ ತಿಂ ಕಾಜ್ರಾಂ-ಬಾಂದಾಂತ್ ಎಕ್ವಟ್ಲೆಲಿಂ.
ಆಂತೊನಾಮಾಕ್ ಮಾತ್ರ್ ಪುತಾಚೆಂ ಕಾಜಾರ್ ಬೊಂಬೊಯ್ ಜಾತಾ ತೆಂ ಕಳಿತ್ ಜಾತಾನಾ ರಾಗ್ ಆಯಿಲ್ಲೊ. ಪುತಾಕ್ ಗಾಂವಾಂತ್ಲೆಂ ಚೆಡುಂ ಪಳೆವ್ನ್ ಕಾಜಾರ್ ಕರುಂಕ್ ಮನ್ ಆಸ್ಲ್ಲೆಂ. ’ಕಾಜಾರ್ ಬರ್ಯಾ ಥರಾನ್ ಕರಿಜಾಯ್. ಗಡ್ದ್ ಕರಿಜಾಯ್..’ ಇತ್ಯಾದಿ ಚಿಂತುನ್ ಆಸ್ಲೆಲ್ಯಾ ತಾಕಾ, ಪೂತ್ ಬೊಂಬೊಯ್ ಕಾಜಾರ್ ಜಾತಾ ಮ್ಹಳ್ಳೆಂ ಆಯ್ಕೊನ್ ಬೆಜಾರ್ ಜಾಲ್ಲೆಂ. ಆತಾಂ ತೊ ಮ್ಹಾತಾರೊ-ನಿವೃತ್ತ್ ಮ್ಹಾತಾರೊ! ನಿವೃತ್ತ್ ಜಾವ್ನ್ ವರ್ಸಾಂ ತೀನ್ ಜಾಲ್ಯಾಂತ್. ತಾಳ್ವೆಚೆ ಕೇಸ್ ಝಡೊನ್ ಗೆಲ್ಯಾತ್. ಆದಿಂ ಜಾಲ್ಲೊ ತರ್ ಕಿತೆಂ ಕರ್ತೊಗೀ? ಕಿತ್ಯಾ ತವಳ್ ಕಠಿಣ್ ರಾಗೀಷ್ಟ್ ತೊ. ಭುರ್ಗ್ಯಾಂಕ್ ಶಿಕ್ಷಾ ದಿಂವ್ಚ್ಯಾಂತ್ ತಾಚೊ ಉಕಲ್ಲಲೊ ಹಾತ್! ತಾಣೆಂ ಶಿಕ್ಷಾ ದಿಲ್ಲೆಪರಿಂ ತ್ಯಾ ವಾಡ್ಯಾಂತ್ ವಾ ವಾರಾಡ್ಯಾಂತ್ ಹೆರ್ ಕೊಣೀ ಜನ್ಮಾಲ್ಲೊ ನಾ ಮ್ಹಣ್ ಅಜೂನ್ ಮ್ಹಣ್ತಾತ್ ಥೊಡೆ. ಕೊಡ್ತಿಂತ್ ಕಾಮ್ ಕರ್ನ್ ಆಸ್ಲೆಲ್ಯಾ ತಾಕಾ, ತಾಚ್ಯೆ ಹರ್ಯೆಕ್ಯೆ ಚಾಲಿಂತ್ ಕೊಡ್ತ್ಚ್ ಮುಕಾರ್ ಯೆತಾಲಿ. ನೀತ್ ಆನಿ ಶಿಕ್ಷಾ ಪಳೆವ್ನ್ ತಾಚಾ ಲಾಗ್ಶಿಲ್ಯಾ ಇಷ್ಟಾನ್ ಜೆರುಕ್ ಸಾಂಗ್ಲೆಲೆಂ ಆಸಾ -
"ಆಂತೊನಿ. ಜೀವನ್ ಮ್ಹಳ್ಯಾರ್ ಏಕ್ ಕೊಡ್ತಿಚೆಂ ಥಳ್ ನ್ಹಂಯ್, ಜೀವನಾಂತ್ ಸೊಡ್-ದೊಡ್ ಕರುಂಕ್ ಜಾಯ್. ಜೀವನಾಂತ್ಲ್ಯಾ ಕೊಡ್ತಿಂತ್ ಶಿಸ್ತ್ ನ್ಹಂಯ್, ಬಗಾರ್ ಮೋಗ್.. ಮಾಯ್ಪಾಸ್ ಆನಿ ಸಮ್ಜಣಿ."
ಜೆರುಚಿಂ ತಿಂ ಉತ್ರಾಂ ಆಂತೊನಾಮಾನ್ ಎಕಾ ಕಾನಾಂತ್ ಆಯ್ಕೊನ್ ಅನ್ಯೇಕಾ ಕಾನಾ ಥಾವ್ನ್ ಭಾಯ್ರ್ ನಿಸ್ರಾಯಿಲಿಂ.
ತಾಚಿಂ ಭುರ್ಗಿಂ ಲ್ಹಾನ್ ಆಸ್ತಾನಾ ತಾಂಕಾಂ ತಾಣೆಂ ದಿಲ್ಲಿ ಶಿಕ್ಷಾ ತರೀ ಕಿತ್ಲಿ? ಭುರ್ಗ್ಯಾಂಕ್ ಶಿಕ್ಷಾ ದಿತಾನಾ ಆಂಜೆಲ್ ತೊಂಡಾಂತ್ ಆಪ್ಲ್ಯಾ ಕಾಪ್ಡಾಚೆಂ ಪೋಂತ್ ದವರ್ನ್ ಮೌನ್ಪಣಿ ಪಳೆತಾಲಿ. ಘೊವಾಚೊ ರಾಗ್ ತಿ ಜಾಣಾ. ಉಲಂವ್ಕ್ ಸಕಾನಾತ್ಲೆಲ್ಯಾ ಮನ್ಜಾತಿಪರಿಂ, ಸರ್ವ್ ದೊಳ್ಯಾಂನಿ ಪಳೆವ್ನ್ ಉಪ್ರಾಂತ್ ಕಾಳ್ಜಾಂತ್ ರಡ್ತಾಲಿ. ತಿಚಿ ದೂಖ್ ತಿಕಾ ಮಾತ್ರ್ ಕಳಿತ್ ಪಾಪ್.
ಏಕ್ ಪಾವ್ಟಿಂ ಫೈಲ್ ಜಾಲ್ಲ್ಯಾ ರುಬಿಕ್ ಫಲಿತಾಂಶ್ ಪಳೆವ್ನ್ ಆಂತೊನಾಮಾನ್ ತಾಕಾ ರಾಜ್ವಾನ್ ಬಾಂಧುನ್ ಘಾಲ್ನ್ ಮಾರ್ಲ್ಲೆಂ ತರೀ ಕಿತ್ಲೆಂ? ದುಖಿನ್ ಬೋಬೊ ಘಾಲ್ಲ್ಯಾ ರುಬಿಚಾ ಬೋಬೆಕ್ ಸೆಜಾರ್ಯಾಂನಿ ಯೇವ್ನ್ ಆಂತೊನಾಮಾಕ್ ಸಮ್ಜಾಯ್ಲ್ಯಾರೀ ಕಾಂಯ್ ಪ್ರಯೋಜನ್ ಜಾಲೆಂ ನಾ. ಕೊಣೆಂಗೀ ಧಾಂವೊನ್ ವಚೊನ್ ತಾಚಾ ಇಶ್ಟಾಕ್ ಜೆರುಕ್ ಆಪವ್ನ್ ಹಾಡಯ್ಲೊ.
"ಕಿತೆಂ ಆಂತೊನೀ, ರುಬಿಕ್ ಮಾರ್ನ್ ತುಂ ಆಮ್ಕಾಂ ತುವೆಂ ಕಾಮ್ ಕರ್ಚಾ ಕೊಡ್ತಿಕ್ ವ್ಹರುಂಕ್ ಪಳೆತಾಯ್ಗೀ? ಸಾಕ್ಸ್ ಸಾಂಗೊಂಕ್? ತೊ ಲ್ಹಾನ್ ಭುರ್ಗೊ! ಕಾಂಯ್ ಚಡುಣೆ ಜಾಲ್ಯಾರ್ ಉಪ್ರಾಂತ್ ಚುರ್ಚುರ್ನಾಕಾ. ಇಸ್ಕೊಲಾಂತ್ ಪರಿಕ್ಷೆಂತ್ ನಾಪಾಸ್ ಜಾಲ್ಯಾರ್ ಕಿತೆಂ ಜಾಲೆಂ? ಜೀವನಾಂತ್ ಏಕ್ ಪಾವ್ಟಿಂ ನಾಪಾಸ್ ಜಾಲ್ಯಾರ್ ಮಾಗಿರ್ ತಾಕಾ ಸಾಲ್ವಾಸಾಂವ್ ನಾಂಗಿ? ತುಂ ತಾಕಾ ಮಾರ್ನ್ ತಾಚಿ ಮತ್ ಆನಿ ಕೂಡ್ ಧಾರುಣ್ ಕರಿನಾಕಾ!" ಜೆರುನ್ ಬೂಧ್ಬಾಳ್ ದಿಲ್ಲಿ.
"ತುಕಾ ಕಿತೆಂ ಜೆರು? ಹಾಂವ್ ಶಿಕ್ಲಾಂ ದುಸ್ರಿ ಕ್ಲಾಸ್ ಮಾತ್ರ್! ಮ್ಹಜಾ ಪುತಾನ್ ಬರೆಂ ಕರ್ನ್ ಶಿಕೊನ್ ಹುಶಾರ್ ಜಾಯ್ಜಾಯ್ ಮ್ಹಳ್ಳಿ ಆಶಾ ಮ್ಹಜಿ. ಹಾವೆಂ ಕರುಂಕ್ ನಾ ತಸ್ಲೆಂ ಮ್ಹಜಾ ಭುರ್ಗ್ಯಾಂನಿ ವ್ಹರ್ತೆಂಪಣ್ ಜೊಡಿಜಾಯ್! ವ್ಹಡ್ ಮನಿಸ್ ಜಾಯ್ಜಾಯ್.. ಪುಣ್ ಹೊ ಆತಾಂ ಪರೀಕ್ಷೆಂತ್ ಫೈಲ್ ಜಾಲಾ.."
ಆಂತೊನಾಮ್ ಆಪ್ಲೆಂ ಕಡಕ್ಕ್ ರಾಜಾಂವ್ ಉಲಯ್ಲೊ.
"ಮನ್ಶಾಕ್ ಜೀವನಾಂತ್ ಏಕ್ಚ್ ಪರಿಕ್ಶಾ ನ್ಹಂಯ್, ಆಂತೊನಿ, ಇಸ್ಕೊಲಾಂತ್ ಪರಿಕ್ಷೆಂತ್ ತೊ ಪಾಸ್ ಜಾಲ್ಲ್ಯಾ ತಕ್ಷಣ್ ಆಪ್ಲ್ಯಾ ಮುಖ್ಲ್ಯಾ ಜೀವನಾಂತ್ಯೀ ಪಾಸ್ ಜಾತಾ ಮ್ಹಣ್ ಕೊಣೆಂಯ್ ಧಯ್ರಾನ್ ಬರವ್ನ್ ಘಾಲುಂಕ್ ನಾ. ಮನ್ಶಾಂನಿ ಜೀವನಾಂತ್ಲ್ಯಾ ಪರಿಕ್ಷೆಂತ್ ಪಾಸ್ ಜಾಯ್ಜಾಯ್. ಆಂತೊನಿ.. ತುಂ ತಕ್ಲೆಂತ್ ಪಿಸೊ ಜಾಲಾಯ್. ತ್ಯಾ ಕೊಡ್ತಿಂತ್ ಕಾಮ್ ಕರ್ನ್ ತುಜಾ ಭುರ್ಗ್ಯಾಂಕ್ಯೀ ಕೊಡ್ತಿಂತ್ಲಿ ನೀತ್ ದಾಕಯ್ತಾಯ್ ತೆಂ ಬಿಲ್ಕುಲ್ ಸಮಾ ನ್ಹಂಯ್" ಜೆರುನ್ಯೀ ಆಂತೊನಾಮಾಕ್ ಸೊಡ್ನ್ ದಿಲೆಂ ನಾ.
ತರೀ ಆಂತೊನಾಮಾಕ್ ಹೆಂ ಸಮ್ಜಾನಾತ್ಲ್ಲೆಂ. ಜಸೆಂ ಘೊಡೊ ತಾಚಾ ದೊಳ್ಯಾಂ ವಯ್ರ್ ಕವಚಾಂ ಘಾಲ್ಲ್ಯಾನ್ ಕುಶಿನ್ ಪಳೆಂವ್ಕ್ ಸಕಾನಾ, ತಸೆಂ ಸಂಸಾರಾಂತ್ ರಾಜಾಂವ್ ಕಿತೆಂ, ಜಿವಿತ್ ಕಿತೆಂ ತೊ ನೆಣಾಂ. ತಾಕಾ ಕಳಿತ್ ಆಸ್ಚ್ಯೊ ಸಂಗ್ತಿ ಮ್ಹಳ್ಯಾರ್ ದೋನ್ಂಚ್-ನೀತ್ ಆನಿ ಕೋಡ್ತ್, ಝುಜ್ ಆನಿ ಜೀಕ್. ಆಂತೊನಾಮಾಕ್ ಘರ್ಚಿಂ ಸರ್ವಾಂ ಕಾಪ್ತಾಲಿಂ. ತ್ಯಾ ದಿಸಾಚಾ ಮಾರಾ ನಂತರ್, ರುಬಿ ಮಾತ್ರ್ ಪರತ್ ಫೈಲ್ ಜಾಲ್ಲೊಚ್ ನಾ! ಬಾಪಯ್ ಮ್ಹಳ್ಯಾರ್ ಭಿಂಯಾನ್ ಕಾಂಪ್ತಾಲೊ ತೊ. ತಾಚಾ ಉಪ್ರಾಂತ್ ಹಜಾರ್ ಚೂಕಿ ಕೆಲ್ಯಾತ್ ತಾಣೆ. ಹಜಾರಾಂನಿ ಶಿಕ್ಷಾ ಭಗ್ಲ್ಯಾತ್. ಬಾಪಾಯ್ ಥಾವ್ನ್ ಕಿತ್ಲೆಶೆ ಪಾವ್ಟಿಂ ಶಿಕ್ಷಾ ಫಕತ್ ಉದಾಕ್ ಪಿಯೆವ್ನ್ ಖಾಲಿ ಪೊಟಾರ್ ನಿದ್ಲ್ಲೊ ತೊ.
ಆತಾಂ ದುಸ್ರೆಂ ಭುರ್ಗೆಂ ಚೆಡುಂ. ನಾಂವ್ ರೊಜ್ಲಿ. ಪುಣ್ ಆತಾಂ ತೆಂ ಖಂಯ್ ಗೆಲಾಂ ತೆಂ ತಾಂಕಾಂ ಕಳಿತ್ ನಾ. ಲ್ಹಾನ್ ಆಸ್ತಾನಾ ಶಿಕ್ಪಾಂತ್ ಹುಶಾರ್ ಆಸ್ಲ್ಲ್ಯಾನ್ ಬಾಪಾಯ್ಕ್ ತೆಂ ಮ್ಹಳ್ಯಾರ್ ಭಾರಿ ಮೋಗ್. ತಸೆಂ ಜಾಲ್ಲ್ಯಾನ್ ರೊಜ್ಲಿಕ್ ಬಾಪಾಯ್ ಥಾವ್ನ್ ಸದಾಂನೀತ್ ಕಿತೆಂಯ್ ತರೀ ಖಾಂವ್ಕ್ ಖಾಣ್ ಮೆಳ್ತಾಲೆಂ. ಮೊಗಾಚೆಂ ವ್ಹಯ್ ತರೀ, ತಾಣೆಂಯ್ ಚ್ಯಾರ್ ಮಾರ್ ಖೆಲ್ಯಾತ್. ಪರ್ಕ್ಯಾಂಚಾ ಹಿತ್ಲಾಂತ್ಲಿಂ ಕೆಳಿಂ, ತೊರಾಂ ಚೊರುನ್ ಖಾತಾನಾ ಪಳೆವ್ನ್ ಕೊಣೆಂಗೀ ದೂರ್ ದಿಲ್ಲ್ಯಾನ್ ’ಅಡಿ ಕೊಲಾ’ಂತ್ ತಾಕಾ ಸರ್ಸರಿ ಚ್ಯಾರ್ ವ್ಹಾಜಯಿಲ್ಲೆಂ ಆಸಾ. ರೊಜ್ಲಿಕ್ ಮಾರ್ ಮಾತ್ರ್ ಅಪ್ರೂಪ್.
ಮೆಟ್ರಿಕ್ ಜಾವ್ನ್ ಪಿ.ಯು.ಸಿ. ಕರಿತ್ ಆಸ್ಲ್ಲೆಂ ರೊಜ್ಲಿ ಮಾತ್ರ್ ಏಕ್ ದೀಸ್ ಘರಾ ಆಯ್ಲೆಂಚ್ ನಾ. ಆಂತೊನಾಮ್ ಸಗ್ಳೊಚ್ ಗಂಭೀರ್ ಜಾವ್ನ್ ಪೊಲೀಸ್ ಸ್ಟೇಶನಾಕ್ ದೂರ್ ದೀಂವ್ಕ್ ತಯಾರಾಯ್ ಕರ್ತಾನಾ ಸ್ಥಳೀಯ್ ಪೋಸ್ಟ್ ಆಫಿಸಾಂತ್ಲ್ಯಾ ತಪ್ಪಾಲ್ ಪೆದ್ಯಾನ್ ದಿಲ್ಲೆಂ ತಾರ್ ಮೆಳ್ಳೆಂ ತಾಕಾ.
"ಬಾಬಾ,
ಹಾಂವ್ ನವೀನಾ ಸಂಗಿಂ ಕಾಜಾರ್ ಜಾಲ್ಯಾಂ. ತುಜ್ಯೆ ಕೊಡ್ತಿಂತ್ ಸದಿಳಾಯ್ ನಾ. ದೆಕುನ್ ಹಾಂವ್ ಮೊಗಾರ್ ಪಡೊನ್ ಕಾಜಾರ್ ಜಾವ್ನ್ ಬೊಂಬೊಯ್ ಪಾವ್ಲ್ಯಾಂ.."
- ’ರೊಜ್ಲಿ’ ಆತಾಂ ’ರಮಾ’.
ತೆಂ ತಾರ್ ವಾಚುನ್ ಆಂತೊನಾಮಾನ್ ಕಿತೆಂಯ್ ಜಾಲೆಂ ನಾ. ತಕ್ಲಿ ಘುಂವ್ಲಿ ನಾ. ದೊಳ್ಯಾಂ ಥಾವ್ನ್ ದುಕಾಂ ಗಳ್ಳಿಂನಾಂತ್. ಹಾಕ್ ಬೊಬ್ ಮಾರುಂಕ್ ನಾ ತಾಣೆ. ಕಿತೆಂಯ್ ಜಾಂವ್ಕ್ ನಾ ಮ್ಹಳ್ಳೆಂ ವರ್ತನ್ ತಾಚೆಂ. ರೊಜ್ಲಿ ಮಾಯಾಗ್ ಜಾಲ್ಲೆಂ ಪಳೆವ್ನ್ ರಾಗಾನ್ ಚಡ್ಪಡೊನ್ ದಡ್ಬಡೊನ್ ಆಸ್ಲ್ಲೊ ತೊ ಆತಾಂ ಹೆಂ ರೊಜ್ಲಿಚೆಂ ತಾರ್ ವಾಚುನ್ ಆಪ್ಣಾಗೆರ್ ಕಿತೆಂಯ್ ಘಡೊಂಕ್ನಾ ಮ್ಹಳ್ಳ್ಯಾ ಸ್ಥಿತೆರ್ ಪಾವ್ಲ್ಲೊ. ಪುಣ್ ಹಿ ತಾಚಿ ಸ್ಥಿತಿ ಫಾತ್ರಾ ರೂಪಾಚಿ ತರ್ ಆಂಜೆಲಾಚಿ ವೆಗ್ಳಿಚ್! ತಿ ಹಿ ಅವ್ಚಿತ್ತ್ ಖಬಾರ್ ಆಯ್ಕೊನ್ ಮತಿಹೀನ್ ಜಾವ್ನ್ ಪಡ್ಲ್ಲಿ! ಏಕ್ ಮಹಿನೊ ತಿ ಘರಾ ಭಾಯ್ರ್ ಆಯ್ಲಿನಾ. ಮೀಸಾಕ್ ವಚಾನಾಸ್ತಾಂ ಎಕಾ ಮಹಿನ್ಯಾ ಉಪ್ರಾಂತ್ ಖಬಾರ್ ಗಾಂವಾಂತ್ ನಿಂವ್ಲ್ಯಾ ನಂತರ್ ಮಾತ್ರ್ ತಿ ಇಗರ್ಜೆಕ್ ವಚೊನ್ ಕುಮ್ಸಾರ್ ಜಾಲ್ಲಿ.
ಏಕ್ಚ್ ಧುವ್ ಮ್ಹಣ್ ಆಂತೊನಾಮಾನ್ ಮೊಗಾನ್ ವಾಗಯಿಲ್ಲೆಂ ರೊಜ್ಲಿಕ್ ತರೀ ಹ್ಯಾ ಘಡಿತಾ ನಂತರ್ ’ರೊಜ್ಲಿ’ ಮ್ಹಳ್ಳೆಂ ನಾಂವ್ ಆಂತೊನಾಮಾಚಾ ಮತಿಚಾ ಪಡ್ದ್ಯಾ ಥಾವ್ನ್ ನಪಂಯ್ಚ್ ಜಾಲ್ಲೆಂ. ತೊ ಸದಾಂಚೆ ಪರಿಂ ಕಾಮಾಕ್ ವೆತಾಲೊ. ಕೊಣೆಂಯ್ ತಾಚ್ಯೆ ಧುವೆ ವಿಶ್ಯಾಂತ್ ವಿಚಾರ್ಲ್ಯಾರ್, ಬೊಲ್ಸಾಂತ್ ದವರ್ಲೆಲೆಂ ಧುವೆಚೆಂ ತಾರ್ ದಾಕಯ್ತಾಲೊ. ಉಲಂವ್ಚಿ ಗರ್ಜ್ ನಾತ್ಲೆಲಿ. ತಾಚಾ ಫಾತ್ರೆಲ್ಲ್ಯಾ ಕಾಳ್ಜಾಕ್ ಜಪಾನಾಚಾ ಹಿರೋಶಿಮಾ ಗಾಂವಾಕ್ ಅಮೆರಿಕಾನ್ ಘಾಲ್ಲೊ ಅಣುಬೊಂಬ್ ಸೈತ್ ಲಾಗ್ತೊನಾ ಕೊಣ್ಣಾ.
ಆನಿ ಆತಾಂ ತಿಸ್ರೊ ಭುರ್ಗೊ - ನಿಮಾಣೊ ಮೆಕ್ಸಿಮ್. ಮಟ್ವ್ಯಾನ್ ಮೆಕ್ಸಿ. ಪಾದ್ರಿ ಜಾವ್ನ್. ಉತ್ತರ್ ಭಾರತಾಂತ್ ಮಿಶಿಯೋನರಿ ಜಾವ್ನ್ ಆತಾಂ ಲೊಕಾಚಿ ಸೆವಾ ಕರ್ತಾ. ತ್ಯಾ ಪಾಂಚ್ ಕುಡಾಂಚಾ ಘರಾಂತ್ ಕಿತೆಂಯ್ ಜಾಲಾಂ ತರ್ ತೆಂ ’ಪಯ್ಲೆಂ ಮೀಸ್’ ಫಾದರ್ ಮೆಕ್ಸಿಚೆಂ! ಧುವೆಚೆಂ ಕಾಜಾರ್.. ರುಬಿಚೆಂ ಕಾಜಾರ್ ಸರ್ವ್ ಪಯ್ಲ್ಯಾ ಒಡ್ದಿಚ್ಯಾ ಕಾರ್ಯಾಂತ್ ಸರ್ವ್ ಆಂತೊನಾಮಾನ್ ಉಟೊನ್ ದಾಕಯ್ಲೆಂ.
ಮೆಕ್ಸಿ ಆಂತೊನಾಮಾಚಾ ಭುರ್ಗ್ಯಾಂ ಪೈಕಿ ಉಪ್ರಾಳಿ. ಸದಾಂಯ್ ಮಾರ್ ಖಾಯ್ನಾಂ ತರ್ ತಾಕಾ ’ಕಿತೆಂಗೀ’ ಚುಕ್ಲ್ಲೆಬರಿಂ ಜಾತಾಲೆಂ. ಬಾಪಾಯ್ಚೆಂ ಕ್ರೂರ್ಪಣ್ ತೊ ಕಾಂಠಾಳ್ತಾಲೊ. ರುಬಿ ಪರಿಕ್ಷೆಂತ್ ನಾಪಾಸ್ ಜಾಲ್ಲ್ಯಾಕ್ ದೊರಿಯೆನ್ ಬಾಂಧುನ್ ತಾಕಾ ಮಾರ್ಲ್ಲೆಂ ಪಳೆವ್ನ್, ತಾಕಾ ಕಿತೆಂ ಭಗ್ಲೆಂ ತೆಂ ತೊಚ್ ನೆಣಾ. ತೊ ಭಿತರ್ಲ್ಯಾ ಭಿತರ್ ಬಾಪಾಯ್ ವಯ್ರ್ ಝಳ್ತಾಲೊ.
ಪುಣ್ ಆತಾಂ ಪರಿಗತ್ ವೆಗ್ಳಿ! ತೊ ವ್ಹಡ್ ಜಾಲಾ! ಪಾದ್ರಿ ಜಾಲಾ. ಆನಿ ಸ್ವಾಮಿ
ದಯಾಮಯಾ ಮ್ಹಳ್ಳೆಂ ನಾಂವ್ ಘೆವ್ನ್ ಲೊಕಾಚಿ ಸೆವಾ
ಕರೀತ್ ಆಸಾ. ತಾಣೆಂ ಕರ್ಚಿಂ ಬರೆಪಣಾಂ ಸರ್ವ್ ಧಾರ್ಮಿಕ್ ಪತ್ರಾಂನಿ ಘಣ್ಗಣಿತ್ ರಿತಿನ್ ಛಾಪುನ್ ಯೆತಾತ್.
ಪುಣ್ ಆತಾಂ ತ್ಯಾ ಘರಾಂತ್ ದೊಗಾಂ ಮಾತ್ರ್! ಆಂಜೆಲ್ ಆನಿ ಆಂತೊನಾಮ್. ತಾಂಚೆ ಮಧೆಂ ಉಲವ್ಣೆಂ ತಿತ್ಲೆಂ ತಿತ್ಲೆಂ. ತೊ ನಿವೃತ್ತ್ ಜಾವ್ನ್ ಮ್ಹಾತಾರ್ಯಾಂಚಾ ಫಂಗ್ತಿಂತ್ಯೀ ಸೆರ್ವಾಲೊ ಮ್ಹಣ್ ಯೆದೊಳ್ ಪರ್ಯಾಂತ್ ತಾಕಾ ಮುಕಾರ್ ರಾವೊನ್ ಉಲಂವ್ಕ್ ತಿಣೆಂ ಧೈರ್ ಘೆತ್ಲ್ಲೆಂ ನಾ. ಅರ್ಧೆಂ ಚಾಬೊನ್ ಅರ್ಧೆಂ ಉಲವ್ನ್ ತಿ ಆಂತೊನಾಮಾ ಸಂಗಿಂ ದೀಸ್ ಸಾರ್ತಾ.
ಆಂಜೆಲ್ ಏಕ್ ಗೊರುಂ. ಪಾಪ್! ಜೀವಂತ್ ಆಸ್ಲ್ಯಾರೀ ಮೆಲ್ಲ್ಯಾ ಬರಿ. ತ್ಯಾ ಘರಾಂತ್ ಆಂತೊನಾಮ್ ಆಸ್ಲೆಲ್ಯಾ ವೆಳಾರ್ ತಿಚೊ ತಾಳೊ ಭಾಯ್ರ್ ಆಯ್ಕಾನಾತ್ಲ್ಲೊ. ಆದಿಂ ಥಾವ್ನ್ ಆಪ್ಲ್ಯಾ ಘೊವಾನ್ ಭುರ್ಗ್ಯಾಂಕ್ ಮಾರ್ತಾನಾ, ಪಳೆಂವ್ಕ್ ಜಾಯ್ನಾಸ್ತಾಂ ತಿಚೆ ದೊಳೆ ಕಾಪ್ಡಾಚಾ ಪಾಲ್ವಾ ಭಿತರ್ ದುಖಾನ್ ಧಾಂಪ್ತಾಲೆ. ತಿಚೆಂ ಕಾಳಿಜ್ ದುಃಖಿನ್ ಕಾಂಪ್ತಾಲೆಂ. ಥೊಡೆಪಾವ್ಟಿಂ ಹೆಂ ಪಳೆವ್ನ್ ಕಿತೆಂಚ್ ಕರುಂಕ್ ಜಾಯ್ನಾಸ್ತಾಂ ರಾಗಾನ್ ಫುಮಾರ್ ಜಾವ್ನ್ ತಿಣೆಂ ತಿಚೆಚ್ ವೊಂಟ್ ಚಾಬ್ಲ್ಲೆ ಆಸಾತ್. ಬಾಪಾಯ್ಚಾ ಮಾರಾನ್ ಪಾಟ್ ಫುಟೊನ್ ರಡ್ಚಾ ಭುರ್ಗ್ಯಾಂಚಾ ಪಾಟಿಕ್ ತೇಲ್ ಪುಸ್ತಾನಾ ತಿಚೆಂ ಕಾಳಿಜ್ ಭೆಸಾಂ ಜಾಲ್ಲೆಂ ಆಸಾ. ಜೀವಂತ್ ಆಸೊನ್ಯೀ ತಿ ಮೆಲ್ಲ್ಯಾಪರಿಂ ಜಾಲ್ಲಿ. ತಿಚಿ ಧುವ್ ’ರೊಜ್ಲಿ’ ’ರಮಾ’ ಜಾಲ್ಲೆಂ ಕಳಿತ್ ಜಾವ್ನ್ ಮತಿಹೀನ್ ಪಡ್ಲೆಲಿ ತಿ ಪರತ್ ಮತಿರ್ ಯೆತಾನಾ ಜಾಯ್ತಿಂ ವೊರಾಂ ಗೆಲ್ಲಿಂ ಮ್ಹಣ್ ಸೆಜಾರ್ಚಾ ಲೊಕಾನ್ ಖುದ್ದ್ ತಿಕಾಚ್ ಸಾಂಗ್ಲ್ಲೆಂ ಆಸಾ.
ನಿಮಾಣೊ ಮೆಕ್ಸಿ "ಹಾಂವ್ ಪಾದ್ರಿ ಜಾತಾ ಮಾಂಯ್.." ಮ್ಹಣ್ ತಿಕಾ ಸಾಂಗ್ತಾನಾ ತಿಚೆಂ ಕಾಳಿಜ್ ಶಿಂದ್ಲ್ಲೆಂ. ತರೀ ಪೂತ್ ಕಿತ್ಯಾ ಸೆಮಿನರಿಕ್ ಗೆಲಾ ತಿ ಜಾಣಾ. ಪುತಾನ್ ಘೆತ್ಲ್ಲೊ ನಿರ್ಧಾರ್ ಬದ್ಲುಂಕ್ ಜಾಯ್ನಾತ್ಲೆಲ್ಯಾ ವಗ್ತಾ, ತಿಣೆ ಕುಡ್ಕೆ ಕುಡ್ಕೆ ಉತ್ರಾಂನಿ ಅಸೆಂ ಮ್ಹಳ್ಳೆಂ "ತುಂ ಘರ್ ಸೊಡ್ನ್ ವೆತಾಯ್ ಪುತಾ, ವಚ್. ತುಂ ಮ್ಹಾಕಾ ನಿಮಾಣೊ, ಆನಿ ಮೊಗಾಚೊ. ತುಂ ಪಾದ್ರಿ ಜಾಂವ್ಕ್ ಚಿಂತಾಯ್. ಬರೆಂ. ಪಾದ್ರಿ ಜಾ. ಮ್ಹಾಕಾ ಮಾತ್ರ್ ತುಜಾ ಮೊಗಾಂತ್ಲೊ ಮೆಕ್ಳೊ ಕರಿನಾಕಾ. ಖಂಯ್ಚಾಯ್ ಕಾರಣಾನ್ ತುಂ ಪಾದ್ರಿ ಜಾಯ್ನಾಸ್ತಾಂ ಪಾಟಿಂ ಯೇನಾಕಾ. ತುವೆಂ ಬಾಪಾಯ್ ಮುಕಾರ್ ಜೀವಂತ್ ಲಾಸಾಜಾಯ್ ಪಡ್ತೆಲೆಂ. ದೇವ್ ತುಕಾ ಬರೆಂ ಕರುಂದಿ."
ತಸೆಂ ಗೆಲ್ಲೊ ಮೆಕ್ಸಿ ಮಧೆಂ ಮಧೆಂ ಆವಯ್ಕ್ ಪಳೆಂವ್ಕ್ ಆಯಿಲ್ಲೊ ಖರೆಂ. ಪಾದ್ರಿಪಣಾಚಿ ದೀಕ್ಷಾ ಮಾತ್ರ್ ತಾಣೆ ಘೆತ್ಲ್ಲಿ.
ದೋನ್ ದಿಸಾಂ ಆದಿಂ ರುಬಿ ಆನಿ ತಾಚೆಂ ಕುಟಾಂಬ್ ಗಾಂವಾಕ್ ದೆಂವ್ಲ್ಲೆಂ. ಘರಾ ಆಯಿಲ್ಲ್ಯಾ ಪುತಾಕ್, ಸುನೆಕ್ ತಸೆಂ ನಾತ್ವಾಕ್-ಜೇಕ್ಸನಾಕ್ ಪಳೆವ್ನ್ ಆಂತೊನಾಮಾಚೊ ಜೀವ್ ಆನಂದಾನ್ ಭರ್ಲ್ಲೊ. ಕಿತೆಂಗೀ ಆಂತೊನಾಮಾ ಥಂಯ್ ಬದ್ಲಾವಣ್.. ವ್ಹಯ್ ಕಸಲಿಗೀ ಬದ್ಲಾವಣ್ ಉಟೊನ್ ದಿಸ್ತಾಲಿ. ಭುರ್ಗಿಂ ಲ್ಹಾನ್ ಆಸ್ತಾನಾ ತೊ ಘರಾ ಆಯಿಲ್ಲ್ಯಾ ನಂತರ್ ಉಲಂವ್ಕ್ಚ್ ನಾತ್ಲ್ಲೆಂ. ಆವಾಜ್ ಉಟಂವ್ಕ್ ನಾತ್ಲ್ಲೊ! ಸಗ್ಳೊ ದೀಸ್.. "ವಾಚ್.. ವಾಚ್.. ವಾಚ್.." ಮ್ಹಳ್ಳೆಂ ವಾಕ್ಯ್ ಘಡ್ಗಡ್ಯಾಪರಿಂ ಗುಡ್ಗುಡ್ತಾಲೆಂ ಆಂತೊನಾಮಾ ಥಾವ್ನ್.
"ಕಿತೆಂ ರುಬಿ.. ಕಸೊ ಆಸಾಯ್ ಪುತಾ? ಕಸೆಂ ಆಸಾಯ್ ವೀರಾ? ತುವೆಂ ಕಾಂಯ್ ಕಾಗದ್ ಬರಯ್ನಾಸ್ತಾಂ ಶೀದಾ ಯೇಂವ್ಕ್ ಕಾರಾಣ್ ಕಿತೆಂ?"
ಹಿಂ ಸವಾಲಾಂ ಜಾವ್ನಾಸ್ಲಿಂ ಆಜ್ ಆಂತೊನಾಮಾಚಿಂ. ವ್ಹಯ್, ಆಜ್ ರಾಜ್ ರಸ್ತ್ಯಾರ್ ಚಲೊನ್ ವೆತೆಲ್ಯಾ ಆಂತೊನಾಮಾಕ್ ವಾಟೆರ್ ಕೊಣೆಂಗೀ ಎಕ್ಲ್ಯಾನ್ ಸಾಂಗ್ಲ್ಲೆಂ - "ತುಜೊ ಪೂತ್ ತಾಚಾ
ಕುಟ್ಮಾಸಂಗಿಂ ಗಾಂವಾಕ್ ಆಯ್ಲಾ" ಮ್ಹಣ್. ತಿತ್ಲೆಂ ಆಯ್ಕಾಲ್ಲೆಂಚ್ ಉಟಾಉಟಿಂ ಮುಕಾರ್ ವೆಚೊ ಆಂತೊನಾಮ್ ಪಾಟಿಂ ಘುಂವೊನ್ ಆಬ್ಳೆ ಆತಾಂ ಘರಾ ಪಾವ್ಲ್ಲೊ ಆನಿ ರುಬಿಕ್ ತಾಣೆ ಮೊಗಾನ್ ವಿಚಾರ್ಲೆಲೆಂ.
"ಕಾಂಯ್ ನಾ, ಮಾಂಯ್ಕ್ ಪಳೆಂವ್ಕ್ ಆಯಿಲ್ಲೊಂ" ತಿತ್ಲೆಂ ಸಾಂಗಾತ್ತ್ ರುಬಿ ಭಿತರ್ ಗೆಲೊ. ಆಂತೊನಾಮಾನ್ ತಾಚಿ ಪಾಟ್ ಧರ್ಲಿ. "ಕಸೆಂ ಆಸಾಯ್ ವೀರಾ?" ಪರತ್ ಸುನೆಕ್ ವಿಚಾರ್ಲೆಂ ಆಂತೊನಾಮಾನ್.
"ಬರಿಂ ಆಸಾಂ" ಮ್ಹಳ್ಳೆಪರಿಂ ತಕ್ಲಿ ಹಾಲಯ್ಲಿ ವೀರಾನ್. ಆತಾಂ ಆಂತೊನಾಮ್ ನಾತ್ವಾಕ್ ಸೊಧುನ್ ಗೆಲ್ಲೊ. ಹಾತಾಂತ್ ಮಾಜ್ರಾಕ್ ಘೆವ್ನ್ ಪೊಶೆತಾಲೊ ಜೆಕ್ಸನ್ - ಆಂಜೆಲಾಚಾ ಉಸ್ಕ್ಯಾರ್ ಬಸೊನ್.
"ಜೆಕ್ಸನ್.. ಜೆಕ್ಸನ್.." ಉಲೊ ಕರಿತ್ತ್ ನಾತ್ವಾ ಮುಖಾರ್ ಬಸ್ಲೊ ತೊ. ಆಂಜೆಲಾಕ್ ಏಕ್ ಪಾವ್ಟಿಂ ಪಳೆಲೆಂ ತಾಣೆ. ಸಬಾರ್ ತೆಂಪಾ ನಂತರ್ ಸಂತೊಸಾಚೊ ಸುರ್ಯೊ ದಿಸ್ಲೊ ತಾಕಾ.
"ಜೆಕ್ಸನ್.." ಪರತ್ ಉಲೊ ಕೆಲೆಂ ಆಂತೊನಾಮಾನ್. ಬಾಗ್ವೊನ್ ತಾಚೊ ಉಮೊ ಘೆಂವ್ಕ್ ಪ್ರಯತ್ನ್ ಕೆಲ್ಲ್ಯಾ ತಾಕಾ ಪ್ರತಿಕ್ರಿಯಾ ಜಾವ್ನ್ ಚೆರ್ಕ್ಯಾಚಿ ವ್ಹಡ್ಲ್ಯಾನ್ ಬೋಬ್ ಆಯ್ಕಾಲಿ.
’ಕಾಂಯ್ ಮಾಜ್ರಾನ್ ಭೊಕುರ್ಲೆಂನಾಯ್?’ ಮ್ಹಣ್ ಚಿಂತ್ಲೆಂ ಆಂತೊನಾಮಾನ್.. "ಕಿತೆಂ ಜಾಲೆಂ ಆಂಜೆಲಾ?" ವಿಚಾರ್ಲೆಂ ತಾಣೆಂ.
ತಾಚೆಂ ಉತಾರ್ ಆಂಜೆಲಾಕ್ ಆಯ್ಕಾಲೆಂ ತರೀ, ಜೆಕ್ಸನ್ ಘುಟಾನ್ ಮ್ಹಳ್ಳೆಬರಿ ತಿಚೆಲಾಗಿಂ ಕಿತೆಂಗೀ ಸಾಂಗ್ತಾಲೊ; ವಿಚಾರ್ತಾಲೊ..
ತಿತ್ಲ್ಯಾರ್ ರುಬಿ ಆನಿ ವೀರಾ ಧಾಂವೊನ್ ಆಯ್ಲಿಂ.
"ಕಿತೆಂ ಮಾಂಯ್?" ದೊಗಾಂಯ್ನಿ ಸಾಂಗಾತಾಚ್ ವಿಚಾರ್ಲೆಂ ಆಜೆಚಾ ಉಸ್ಕ್ಯಾ ಥಾವ್ನ್ ಜೆಕ್ಸನ್ ವೀರಾ ಸರ್ಶಿಂ ಧಾಂವ್ಲೊ.
"ಹೊಚ್ಗೀ.. ಗ್ರ್ಯಾಂಡ್ಪಾ? ಜ್ಯೋರ್ ಆಸಾ ಮ್ಹಣ್ ಮ್ಹಣ್ತಾಲೊ ಪಪ್ಪಾ? ತಾಕಾ ಪಳೆತಾನಾ ಭ್ಯೆಂ ದಿಸ್ತಾ ಮ್ಹಾಕಾ! ಪಪ್ಪಾಕ್ ಮಾರ್ಲ್ಲೆಬರಿಂ ಮ್ಹಾಕಾರ್ ತೊ ಮಾರ್ತಾಗಿ ಮಮ್ಮಾ?"
ಜೆಕ್ಸನ್ ಅಸೆಂ ಉಲಯ್ತಾನಾ, ಎಕಾಚ್ಚಾಣೆಂ ಚಾರ್ ಘಡ್ಗಡೆ ಯೇವ್ನ್ ಮಾರ್ಲ್ಲೆಪರಿಂ ಜಾಲೆಂ ಆಂತೊನಾಮಾಕ್. ಕಸಲಿಗೀ ಅನಿರೀಕ್ಶಿತ್ ದೂಕ್ ಚರೊನ್ ಆಯ್ಲಿ ತಾಚಾ ಆಂಗಾರ್. ಆಪ್ಲ್ಯಾ ನಾತ್ವಾ ಥಾವ್ನ್ ತಸಲಿಂ ಉತ್ರಾಂ ಅಪೇಕ್ಸುಂಕ್ ನಾತ್ಲ್ಲೆಂ ತಾಣೆಂ.
ತಿತ್ಲ್ಯಾರ್..
"ತುಂ ಜೆಕ್ಸನಾಲಾಗಿಂ ಖೆಳಾನಾಕಾ. ತುಕಾ ಪಳೆತಾನಾ.. ಭಿಂಯೆತಾ ತೊ!..." ರುಬಿ ಬಾಪಾಯ್ಕ್ ಉದ್ದೇಸುನ್ ಉಲಯ್ಲೊ.
".. ತಾಕಾ ಹಾವೆಂ ಕಿತೆಂ ಕೆಲಾಂ? ಮ್ಹಾಕಾ ಭಿಂಯೆಂವ್ಕ್ ಹಾಂವ್ ಕಿತೆಂ ರಾನ್ ಮನ್ಜಾತ್ವೆ?"
"ತುವೆಂ ಕಿತೆಂ ಕರುಂಕಾಂಯ್ ತೆಂ ಸಾಂಗ್. ಶೆರಾಂತ್ ಜಿಯೆಂವ್ಚೊ ರಾನ್-ಮನಿಸ್ ತುಂ!!"
"ರುಬಿ..!" ಪಯಿಲ್ಲೆಪಾವ್ಟಿಂ ಆಂಜೆಲ್ ಮಧೆಂ ಆಯ್ಲಿ. ವ್ಹಯ್.. ಪಯಿಲ್ಲೆಪಾವ್ಟಿಂ ತಸಲೊ ತಾಳೊ ಕಾಡ್ನ್ ತಿಣೆಂ ಆಂತೊನಾಮಾ ಮುಖಾರ್ ಉಲಂವ್ಚೆಂ.. "ಕಿತೆಂ ಉಲಯ್ತಾಯ್ ತುಂ? ತುಜೊ ಬಾಬ್ ತೊ.. ತುಜಿಂ ಉತ್ರಾಂ ಮ್ಹಾಕಾ ಸಾರ್ಕಿಂ ದಿಸಾನಾಂತ್.."
"ತುಂ ಕಿತ್ಯಾಕ್ ತಾಕಾ ಸಾಂಭಾಳ್ತಾಯ್ ಮಾಂಯ್? ತುಂ ಏಕ್ ಶೆಳಿ. ತುವೆಂ ಕಾಡ್ಲ್ಲಿಂ ದುಃಖಾಂ ಆನಿ ಭೊಗ್ಲ್ಲಿ ತಿ ದೂಖ್ ಕಿತೆಂ ಹಾಂವ್ ನೆಣಾಂ?" ಆಂತೊನಾಮ್ ಹಾಂಚೆಂ ಉಲವ್ಣೆಂ ಆಯ್ಕಾತಾಲೊ - ವೊಣ್ತಿಕ್ ಪಾಟ್ ತೆಂಕುನ್.
ಆತಾಂ ತಾಕಾ ಸವ್ಕಾಸ್ ಕಳಿತ್ ಜಾವ್ನ್ ಆಯ್ಲೆಂ. ಪುತಾಕ್ ’ಉಲಂವ್ಕ್’ ವೇಳ್ ಆಯಿಲ್ಲೊ. ತಾಳೊ ಬಾಂಧುನ್ ಆಯ್ಲೊ ತಾಕಾ. ತಾಕಾಚ್ ಸಾಂಭಾಳುನ್ ಮ್ಹಳ್ಳೆಪರಿಂ ತಾಣೆಂ ಆತಾಂ ಉಲಂವ್ಕ್ ಸುರು ಕೆಲೆಂ.
"ಹಾವೆಂ ತುಮ್ಕಾಂ ಮ್ಹಜಾ ಭುರ್ಗ್ಯಾಂಕ್ ಮಾರ್ ಆನಿ ಶಿಕ್ಷಾ ದಿಲ್ಲಿ ತಿ ಮ್ಹಜಾ ಬರೆಪಣಾಕ್ ನ್ಹಂಯ್, ಬಗಾರ್ ತುಮ್ಚ್ಯಾ ಬರೆಪಣಾಕ್ ಹಾವೆಂ ಮ್ಹಜಿ ಜಿಣಿ ಕೊಡ್ತಿಂತ್ ಖರ್ಚಿಲ್ಲಿ. ಕೋಡ್ತ್ ಮ್ಹಜೆ ತಸಲ್ಯಾ ದೋನ್ ಕ್ಲಾಸ್ ಶಿಕ್ಲೆಲ್ಯಾ ’ಶಿಕ್ಪ್ಯಾಕ್’ ಎಕಾ ಥರಾನ್ ಗಿನ್ಯಾನಾಚೆಂ ಇಸ್ಕೊಲ್ ಜಾಲ್ಲಿ. ಝಡ್ತಿ-ನ್ಯಾಯ್ ಆನಿ ಶಿಕ್ಷಾ ಥಂಯ್ಚರ್ ಪಳೆವ್ನ್ ಶಿಕ್ಲೊಂ ಆನಿ ಮ್ಹಜಾ ಜೀವನಾಂತ್ ಜ್ಯಾರಿಯೆಕ್ ಹಾಡ್ಲೆಂ. ಹಾಂವ್ ಕಾಂಯ್ ಶಿಕೊಂಕ್ನಾ. ಶಿಕೊಂಕ್ ಮ್ಹಾಕಾ ಇಸ್ಕೊಲ್ ನಾತ್ಲೆಲ್ಯಾ ವಗ್ತಾ-ಕೊಡ್ತ್ ಮ್ಹಜಾ ಇಸ್ಕೊಲಾ ಸಮಾನ್ ಜಾಲಿ. ತುಮಿ ಶಿಕ್ಪಿ. ತುಮ್ಕಾಂ ನೀತಿಚೊ ಉಜ್ವಾಡ್ ಆನಿ ರಾಜಾಂವಾಚೊ ಉಜ್ವಾಡ್ ತುಮ್ಚ್ಯಾ ಇಸ್ಕೊಲಾಂತ್ ಆನಿ ಕೊಲೆಜಿಂತ್
ಶಿಕಯ್ಲಾಂ ಆನಿ ತುಮಿ ಪಳೆಲಾಂ. ತುಮ್ಕಾಂ ಮಾರ್ನ್ ಹಾವೆಂ ದುಖಯಿಲ್ಲೆಂ ತುಮಿ ಪಾಡ್ ಜಾಂವ್ಚಾಕ್ ಖಂಡಿತ್ ನ್ಹಂಯ್"
"ತುವೆಂ ಕೆಲ್ಲೆಂ ಬರೆಂ ತರೀ ಕಿತೆಂ?" ರುಬಿ ವಿಚಾರಿ.
"ಜೆಂ ತುವೆಂ ತುಜಾ ಪುತಾಕ್ ಶಿಕಯ್ಲಾಂಯ್ ತೆಂ ಬರೆಂ ನ್ಹಂಯ್. ಜೆಂ ತುವೆಂ ತುಜಾ ಭುರ್ಗ್ಯಾ ಮುಕಾರ್ ಮ್ಹಜೆ ಗೂಣ್ ವಿವರ್ಸಿಲ್ಲೆ ತೆಂಯ್ ಬರೆಂ ನ್ಹಂಯ್..! ಹಾಂವ್ ಅಶಿಕ್ಪಿ... ಮ್ಹಜಿ ರೀತ್ ಆನಿ ನೀತ್ ಅಶಿಕ್ಪ್ಯಾಚಿ - ತೆಂ ಹಾಂವ್ ಖುದ್ದ್ ಮಾಂದ್ತಾಂ. ಹಾವೆಂ ತುಮ್ಕಾಂ ’ಬರೆಂ’ ಕರುಂಕ್ ಚಿಂತ್ಲೆಲೆಂ ತೆಂ ’ಖರೆಂ ಪಾಪ್’ ಮ್ಹಳ್ಳೆಂ ಆಜ್ ಕಳ್ಳೆಂ ಮ್ಹಾಕಾ. ಆಮಿ ಮ್ಹಾತಾರಿಂ ಜಾವ್ನ್ ಆಯ್ಲ್ಯಾಂವ್. ತುಮ್ಚ್ಯಾ ಯೆಣ್ಯಾಕ್ ಆಮಿ ಕಿತ್ಲ್ಯಾ ಆತುರಾಯೆನ್ ರಾಕೊನ್ ರಾವ್ಲ್ಲ್ಯಾಂವ್ ತೆಂ ತುಕಾ ಕಳಿತ್ ಆಸಾ?" ಆಂತೊನಾಮ್ ಉಸ್ಮಡ್ಲೊ.
"ತುಂ.. ’ಆಮಿ’ ಮ್ಹಣಾನಾಕಾ.. ಕಿತ್ಯಾ ಆಮ್ಚಿ ಮಾಂಯ್ ಮಾತ್ರ್ ಆಮ್ಕಾಂ ರಾಕೊನ್ ರಾವ್ಲ್ಲಿ.." ರುಬಿಚೆ ದೊಳೆ ರುಂದಾಲೆ.
"ರುಬಿ!" ಆಂಜೆಲ್ ಪರತ್ ಮಧೆಂ ಆಯ್ಲಿ.
"ಕಿತೆಂ ಪುತಾ.. ಹೆಂ? ತುವೆಂ ಹ್ಯಾ ಥರಾನ್ ತುಜಾ ಬಾಬಾಲಾಗಿಂ.."
"ಮಾಂಯ್, ತುಂ ಮಧೆಂ ಪಡಾನಾಕಾ. ತುಜಾ ಯೆದೊಳ್ಚಾ ಜೀವನಾಂತ್ ತುಕಾ ಕಿತೆಂ ಮೆಳ್ಳಾಂ? ರಾತ್ ಆನಿ ದೀಸ್ ಹ್ಯಾ ಘರಾಂತ್ ಕಿತೆಂ ಆಸ್ಲ್ಲೆಂ? ಉಜೊ ಆನಿ ಕಾಳೊಕ್ ಮಾತ್ರ್! ತುಕಾ ಹಾಂವ್ ಬೊಂಬಯ್ ವ್ಹರುಂಕ್ ಆಯ್ಲಾಂ.. ತುವೆಂ ಹಾಂಗಾಸರ್ ರಾವ್ಲ್ಲೆಂ ಪುರೊ!"
"ರುಬಿ..! ಆಂಜೆಲಾಚೊ ತಾಳೊ ವಯ್ಲ್ಯಾ ಮಟ್ಟಾರ್ ಸಾದ್ಲೊ. ಆಂತೊನಾಮಾಚೆ ಕಾನ್ ಏಕ್ ಪಾವ್ಟಿಂಚಾಕ್ ನೀಟ್ ಜಾಲೆ. ತ್ಯಾ ಆವಾಜಾಕ್ ತಾಚೆ ದೊಳೆ ರುಂದಾಲೆ. ಆಂಜೆಲಾಕ್ ತಿತ್ಲೊ ವ್ಹಡ್ ’ತಾಳೊ’ ಆಸಾ ಮ್ಹಣ್ ತಾಕಾ ಯೆದೊಳ್ ಪರ್ಯಾಂತ್ ಕಳಿತ್ ನಾತ್ಲೆಂ. ತಾಚಾ ದೊಳ್ಯಾಂಚಾ ಖಾಂಚಿಂನಿ ದುಃಖಾಂ ಉದೆಂವ್ಕ್ ಸುರು ಜಾಲಿಂ. ತಾಚೊ ಪೂತ್ ತಾಚಿಂ ಪಾತ್ಕಾಂ ಉಸ್ತಿತಾಲೊ. ತಾಚಿ ಮತ್ ಪ್ರಾಚಿತಾಕ್ ತಯಾರಾಯ್ ಕರ್ತಾಲಿ.
"ಕಿತೆಂರೇ.. ತುಮ್ಕಾಂ ನವೆಂ ಘರ್ ಮೆಳ್ಳ್ಯಾ ನಂತರ್ ಕಾಮಾಕ್ ಏಕ್ ಮನಿಸ್ ನಾಂವೆರೆ? ಹಾವೆಂ ತುಜೆಸಂಗಿಂ ರಾವಾಜಯ್? ಕಿತ್ಯಾಕ್? ತುಂ ತುಜಾ ಬಾಪಾಯ್ಕ್ ಮ್ಹಜಾ ಘೊವಾಕ್ ಹ್ಯಾ ಥರಾನ್ ಧುತಾಯ್ಮೂ? ಕಿತೆಂ? ತುಕಾ ತೊ ನಾಕಾ ತರ್ ಮ್ಹಾಕಾ ನಾಕಾ? ತುಮ್ಕಾಂ ತಾಣೆಂ ಶಿಕ್ಷಾ ದಿಲಿ- ತುಮ್ಕಾಂ ಬರೆಂ ಕರುಂಕ್. ತುವೆಂ ’ವ್ಹಡ್’ ಜಾಯ್ಜಯ್ ಮ್ಹಳ್ಳಿ ಆಶಾ ಆಸ್ಲಿ ತಾಚಿ. ತುಕಾ ತಾಣೆಂ ಶಿಕಯ್ಲೆಂ, ಪೊಸ್ಲೆಂ, ವ್ಹಡ್ ಕೆಲೆಂ.. ಆನಿ ಆತಾಂ.."
"ತೆಂ ತಾಚೆಂ ಕರ್ತವ್ಯ್.." ಗಂಭೀರ್ ಜಾಲೊ ರುಬಿ.
"ತುಂ ಕೊಲೆಜ್ ಶಿಕ್ಲಾಯ್ ಮ್ಹಣ್ ತಾಚೆಂ ಕರ್ತವ್ಯ್ ಮ್ಹಣ್ತಾಯ್? ತುಮ್ಕಾಂ ಪಾಡ್ ಕರುಂಕ್ ಮನ್ ಕೆಲ್ಲೆಂ ತರ್ ತುಮ್ಕಾಂ ಕೊಲೆಜ್ ಸೊಡ್, ಇಸ್ಕೊಲಾಚೆಂ ಮೇಟ್ ಪರ್ಯಾಂತ್ ಚಡೊಂಕ್ ಜಾಯ್ನಾಸೆಂ ತಾಣೆ ಕರ್ಯೆತೆಂ! ಆತಾಂ ತುಂ ಶಿಕ್ಲಾಯ್ ಮ್ಹಣ್ ಕಾನೂನಾಂ ಉಲಯ್ತಾಯ್? ಹಾಂವ್ ಹೆಂ ಘರ್ ಸೊಡ್ನ್ ಖಂಯೀ ವಚಾನಾ. ತುಜೊ ಬಾಪುಯ್ ಮ್ಹಜೊ ಆಸ್ರೊ ಆನಿ ರಾಕ್ವಣ್. ಹಾಂವ್ ಸದಾಂಕಾಳ್ ತಾಚೆಸಂಗಿಂ ರಾವ್ತೆಲಿಂ. ತೊ ಅಂತರ್ಲ್ಯಾ ನಂತರ್ ತಾಚಾಚ್ ಉಗ್ಡಾಸಾನ್ ಜಿಯೆತೆಲಿಂ.."
ಆಂತೊನಾಮ್ ಸ್ತಬ್ಧ್ ಜಾಲ್ಲೊ. ಆಂಜೆಲ್ ’ಹ್ಯಾ’ ಥರಾನ್ ಉಲಯ್ತಾ ಆನಿ ಉಲಂವ್ಕ್ ಸಕ್ತಾ ತೆಂ ಆಜ್ ಪಯಿಲ್ಲೆ ಪಾವ್ಟಿಂ ಕಳಿತ್ ಜಾಲೆಂ ತಾಕಾ. ಆಂಜೆಲಾಚೆಂ ಖರೆಂ ರೂಪ್ ಆಜ್ ದೆಖ್ಲೆಂ ತಾಣೆಂ.
"ಆಂಜೆಲಾ.. ಹಾಂವ್ ಪಾತ್ಕಿ. ತುಂ ಆಂಜ್.." ತಾಚೆಂ ಕಾಳಿಜ್ ಉಲಯ್ಲೆಂ.
"ತುವೆಂ ತುಜಾ ಭುರ್ಗ್ಯಾಂಕ್ ಶಿಕಯ್ಲಾಂ ತೆಂ ಬರ್ಯಾಕ್ ನ್ಹಂಯ್. ತುಮಿಂ ಎಕಾಮೆಕಾ ತಿದ್ವಿಯಾ-ತುಮ್ಚಿ ತಿ ಚಾಲ್-ಚಮ್ಕಾಣ್, ನಾಂ ತರ್ ಎಕಾ ದಿಸಾ ತುಕಾಚ್ ಮ್ಹಾರಗ್ ಪಡ್ಲೆಲೆಂ.."
ಆಂಜೆಲಾನ್ ವಯ್ಲೆಂ ಉತಾರ್ ಉಲಯಿಲ್ಲ್ಯಾ ನಂತರ್, ಥಂಯ್ಸರ್ ನಿಶಬ್ಧತೆನ್ ವಿರಾಜ್ ಕೆಲೊ.
ದುಸ್ರ್ಯಾ ದಿಸಾ ವೀರಾ, ರುಬಿ ತಸೆಂ ಜೆಕ್ಸನ್ ಪಾಟಿಂ ಗೆಲಿಂ.
"ಬೆಸಾಂವ್ ದಿ ಬಾಬಾ.. ಮಾಂಯ್" ತಿತ್ಲೆಂ ಸಾಂಗೊನ್ ತಿಂ ಗೆಲ್ಲಿಂ.
ಆಜ್ ಆಂತೊನಾಮ್ ಸದಾಂಚೆಪರಿಂ ಹೊಟೆಲಾಕ್ ಗೆಲೊ. ಉಭೊ ರಾವೊನ್ ಹೊಟೆಲ್ಗಾರಾಕ್ ದೋನ್ ಪೊಟ್ಲ್ಯೊ ’ಗೋಳಿಬಜೆ’ ಬಾಂಧುಂಕ್ ಸಾಂಗ್ಲೆಂ ತಾಣೆಂ. ’ಹರ್ಶೆ ಚ್ಹಾ ಪಿಂಯೆಂವ್ಚೊ ಆಜ್ ಕಿತ್ಯಾಕ್ ಪಿಯೆನಾಗಾಯ್?’ ಚಿಂತ್ಲೆಂ ಹೊಟೆಲ್ಗಾರಾನ್. ತಾಚೆ ಪಯ್ಶೆ ದೀವ್ನ್ ತೊ ಎಕಾ ಆಂಗ್ಡಿ ಸರ್ಶಿಂ ಗೆಲೊ.
"ದೋನ್ ಕಾಟ್ ಪೂಡ್.." ವಿಚಾರ್ಲೆಂ ಆಂತೊನಾಮಾನ್. ಪೂಡ್ ಘೆತಚ್ ಪಯ್ಶೆ ದೀವ್ನ್ ಸವ್ಕಾಸ್ ಮೆಟಾಂ ಕಾಡ್ಲಿಂ ತಾಣೆಂ.
ಆಂಜೆಲಾಚಿ ಚ್ಹಾ ಪಿಯೆಂವ್ಕ್ ಆಜ್ ತಾಚೊ ಗಳೊ ಆಶೆಲೊ...
ತಾಚೊ ತಾಳೊ ತಗ್ಸಾಲ್ಲೊ..
ಪಾತ್ಕಾಂಚೆಂ ಪ್ರಾಚಿತ್ ಆರಂಭ್ ಜಾಲ್ಲೆಂ ಮಾತ್ರ್..!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
