ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಂಕರ್ - 11
ಮಟ್ವಿ ವಳೊಕ್: ಸಿಲ್ವೆಸ್ಟರ್ ಲೋಬೊ ಬರೊ ವಿಮರ್ಶಕ್ ತಶೆಂಚ್ ಪ್ರೇತನ್ ಕರಿತ್ ತರ್ ಹಾಚ್ಯಾನ್ ಬರ್ಯೊ ಕಾಣ್ಯೊ ಬರಂವ್ಕ್ ಸಾಧ್ಯ್ ಮ್ಹಣ್ಚ್ಯಾಕ್ ಹಿ ಕಾಣಿ ಗೊವಾಯ್ ದಿತಾ. ಅಜೀಕ್ ತೀನ್ ವರ್ಸಾಂಧಿಂ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಕ್ ಬರಯಿಲ್ಲಿ ಕಾಣಿ ಹಿ ಜಾವ್ನಾಸಾ. ಸಿಲ್ವೆಸ್ಟರ್ ಕೊಂಕ್ಣಿ ವಾಚ್ಪಿ ತರ್ಯೀ ಹಾಣೆಂ ಲೇಕನಾಂ, ಕಾಣ್ಯಾಂ ಶಿವಾಯ್ ಅಪ್ರೂಪ್ ಕವಿತಾಂಯ್ ಬರಯ್ಲ್ಯಾಂತ್. ಫುಡೆಂ ಕೊಂಕ್ಣೆಂತ್ ಏಕ್ ಬರೊ ಕಾಣ್ಯೆಗಾರ್ ಜಾವ್ನ್ ಹೊ ಉದೆವ್ನ್ ಯೇಂವ್ ಮ್ಹಣ್ ಆಶೆತಾಂ.
ಸಿಲ್ವೆಸ್ಟರ್ ಲೋಬೊ
ಕಥಾಂಕರ್ - 11. ತಿಸ್ರಿ ಬಾಯ್ಲ್.
ಸುಮಾರ್ ಮಧ್ಯಾನೆ ರಾತಿಚೊ ವೇಳ್. ರೋಶನ್ ಆನಿಂ ರೀನಾನ್ ಮೋಗ್ ಕರ್ನ್ ಹಾಂತುಳ್ನಾಕ್ ಪಾಟ್ ಲಾಗಯಿಲ್ಲಿ. ರೋಶನಾಕ್ ಮೋಗ್ ಕರ್ತಾನಾ, ಬಾಯ್ಲೆಚೊ ನ್ಹಂಯ್, ಫಾತ್ರಾಚೊ ಮೋಗ್ ಕೆಲ್ಲೊ ಅನ್ಬೊಗ್ ಜಾಲೊ. ತೊ ವಿಚಾರಿ, "ರೀನಾ ತುಂ ಕಾಂಯ್ಚ್ ಸಂತೊಸ್ಭರಿತ್ ದಿಸಾನಾಂಯ್. ಕಿತೆಂ ತರೀ ಚಡುಣೆಂ ಜಾಲಾಂ?’
ರೋಶನಾಚಾ ಸವಲಾನ್ ರೀನಾಚಾ ಕಾಳ್ಜಾಂತ್ ಉಜೊ ಪೆಟಯ್ಲೊ. ತಾಚಿ ಕೂಡ್ ತಾಣೆಂ ಘೊವಾಕ್ ಕಾಯ್ದ್ಯಾಖಾಲ್ ಅರ್ಪುನ್ ದಿಲ್ಲಿ. ಪುಣ್ ತಾಚಾ ಕಾಳ್ಜಾಂತ್ ಕೊಡ್ಸಾಣ್ ಭರ್ಲ್ಲಿ. "ಚಡುಣೆಂ ಜಾಂವ್ಚೆಂ ಕಸಲೆಂ? ತುಕಾ ಮ್ಹಜಿ ಕೂಡ್ ತುಜಿ ಗರ್ಜ್ ಪೂರ್ಣ್ ಕರುಂಕ್ ಮೆಳ್ಳ್ಯಾರ್ ಜಾಲೆಂ. ನಾತ್ಲ್ಯಾರ್ ಮ್ಹಜೆ ಖಾತಿರ್ ತುಜೆ ಕಡೆ ವೇಳ್ಚ್ಚ್ ನಾಂ. ತುಂ ಕಶೆಂ ಆಸಾಯ್? ಮ್ಹಣ್ ವಿಚಾರ್ಚೊಯ್ ಪಾವ್ಟ್ ನಾಂ ತುಜೆ ಕಡೆ" ಜಾಪ್ ದಿಲಿ ರೀನಾನ್.
ರೀನಾಚಾ ಹ್ಯಾ ಜವಾಬೆನ್ ರೋಶನಾಕ್ ತಳ್ಮಟ್ಯಾಕ್ ಬಡಯಿಲ್ಲೊ ಅನ್ಭೋಗ್ ಜಾಲೊ. ಖಟ್ಲ್ಯಾರ್ಚ್ಚ್ ಉಟೊನ್ ಬಸೊನ್ ತೊ ಚಿಂತುಂಕ್ ಪಡ್ಲೊ. ಹಾಂವೆಂ ಮ್ಹಜ್ಯಾ ಬಾಯ್ಲೆಕಡೆ ಲೈಂಗಿಕ್ ಸಂಬಂಧ್ ಜೊಡ್ಲೊ ತರ್ ತಾಚೊ ಅರ್ಥ್ ಕಿ ಹಾಂವ್ ತಾಚೊ ಮೋಗ್ ಕರ್ತಾಂ. ತರ್ ತಾಕಾ ಹಾಂವೆಂ "ತುಂ ಕಶೆಂ ಆಸಾಯ್? ಮ್ಹಣ್ ವಿಚಾರ್ಚೆಂ ಸವಾಲ್ಚ್ಚ್ ಯೇನಾ. ರೋಶನ್ ಸಾಂಗಾಲಾಗ್ಲೊ, "ತುಂ ಏಕ್ ನವಾಲ್ಚ್ಚ್ ಉಲಯ್ತಾಯ್ ರೀನಾ. ಸಕಾಳಿಂಚೆಂ ಹಾಂವ್ ಕಾಮಾ ವೆಚ್ಯಾ ಪಯ್ಲೆಂ ತುಂ ಇಸ್ಕಲಾಕ್ ತುಜ್ಯಾ ಕಾಮಾನ್ ಭಾಯ್ರ್ ಸರ್ತಾಯ್. ಸಾಂಜೆರ್ ವ ರಾತಿಂ ಹಾಂವ್ ಕಾಮಾ ಥಾವ್ನ್ ಪಾಟಿಂ ಯೆತಾನಾ, ತುಂ ಟ್ಯೂಶನಾಂ ದಿಂವ್ಚಾಂತ್ ಮಗ್ನ್ ಜಾವ್ನ್ ಆಸ್ತಾಯ್. ಜೆವ್ತಾನಾ ಆಮಿಂ ಟಿ.ವಿ. ಪಳೆವ್ನ್ ಆಸ್ತಾಂವ್. ತರ್ ಎಕ್ಮೆಕಾ ಸಾಂಗಾಂತಾ ಉಲಂವ್ಕ್ ವೇಳ್ಚ್ಚ್ ಖಂಯ್ ಆಸಾ?"
"ಆಫಿಸಾಚ್ಯಾ ಕಾಮಾಂತ್ ಸಂಸಾರ್ ಭವೊಂಕ್ ತುಜ್ಯೆ ಕಡೆ ದರಭಸ್ತ್ ವೇಳ್ ಆಸಾ. ಇಗರ್ಜೆಚ್ಯಾ ಕಾಮಾಕ್ ಲಾಗೊನ್ ಹೆಣೆ ತೆಣೆಂ ಧಾಂವೊಂಕ್ ವೇಳಾಚೆಂ ತುಜೆಕಡೆ ಖಾಂಯ್ಚ್ ಉಣೆಂಪಣ್ ನಾಂ. ಘರಾ ಯೇವ್ನ್ ಶೆಳ್ ಜಾಲ್ಯಾ ಮ್ಹಣ್ ಸಾಂಗೊನ್ ಬ್ರ್ಯಾಂಡಿ ಪಿಯೆಂವ್ಕ್ ತುಜ್ಯೆಕಡೆ ಪಾವ್ಟ್ ಮಸ್ತ್ ಆಸಾ. ಜೆವಾಣ್ ಜಾಲ್ಲೆಂಚ್ ಭಾಯ್ರ್ ವಚೊನ್ ಸಿಗ್ರೆಟಿಚೊ ಧುವರ್ ಸೊಡುಂಕ್ ತುಜ್ಯೆಕಡೆ ವೆಳಾಚೊ ಅಭಾವ್ ನಾಂ. ಪುಣ್ ಬಾಯ್ಲೆಕಡೆ ಮೊಗಾಚೆಂ ದೋನ್ ಸಬ್ದ್ ಉಲಂವ್ಕ್ ತುಜ್ಯೆಕಡೆ ವೇಳ್ಚ್ಚ್ ನಾಂ" ರೀನಾ ಆನಿಕೀ ಉಚಾಂಬಳ್ ಜಾಲೆಂ.
"ಅರೆ ಬಾಬಾ, ತುಂವೆಂ ಕೆಕಾಳಾಪುಣಿ "ರೋಶನ್ ಆಜ್ ಆಮಿಂ ಭೊವೊಂಕ್ ಯಾ ಮ್ಹಣ್ತಾನಾ ಹಾಂವೆಂ ನಾಕಾ ಮ್ಹಳ್ಳೆಂ ಆಸಾ?" ರೋಶನ್ ವಿಚಾರಿ.
"ಆಜ್ ಆಮಿಂ ಭೊಂವೊಂಕ್ ಯಾ ರೀನಾ ಮ್ಹಣ್ ತುಂವೆಂ ಏಕ್ ದೀಸ್ ಪುಣಿ ಮ್ಹಳ್ಳೆಂ ಆಸಾ? ತುಜೆ ಸಾಂಗಾಂತಾ ಭೊಂವೊಂಕ್ ವಚೊಂಕ್ ಹಾಂವ್ ಕಿತ್ಲೆಂ ಆಶೆಲಿಂ." ರೀನಾನ್ ಕಸ್ಕಸೊನ್ ರಡೊಂಕ್ ಸುರು ಕೆಲೆಂ.
ರೋಶನ್ ಕಾಲುಬುಲೊ ಜಾಲೊ. ಬಾಯ್ಲೆಚ್ಯಾ ಮಧ್ಯಾನೆ ರಾತಿಚ್ಯಾ ರಡ್ಣ್ಯಾನ್ ತಾಕಾ ದಖೊ ಬಸ್ಲೊ. ಹಾಂವೆಂ ಮ್ಹಜ್ಯಾ ಬಾಯ್ಲೆಕ್ ಖಂಚಾಂಯ್ತಿ ಕಾಂಯ್ ಉಣೆಂ ಕೆಲ್ಲೆಂನಾ, ತರ್ ತಾಚ್ಯಾ ರಡ್ಣ್ಯಾಚೊ ಮತ್ಲಬ್ ಕಸಲೊ? ರೋಶನ್ ಚಿಂತುಂಕ್ ಪಡ್ಲೊ ಆನಿಂ ಬಾಯ್ಲೆಕ್ ಭುಜಂವ್ಕ್ ಪ್ರಯತ್ನ್ ಕರಿಲಾಗ್ಲೊ. "ತುಂ ಜಾಣಾಂಯ್ ರೀನಾ, ತುಜೆಂ ರಡ್ನೆಂ ಮ್ಹಾಕಾ ಬಿಲ್ಕುಲ್ ಪಸಂದ್ ನಾಂ. ತುಜ್ಯಾ ಸಮಸ್ಯಾಂಚೊ ಎದೊಳ್ ಮ್ಹಣಾಸರ್ ಪ್ರಸ್ತಾಪ್ ಕಾಡಿನಾಸ್ತಾನಾ ಆಚಾನಕ್ ಹೆಂ ರಡೊಂಕ್ ಸುರು ಕೆಲ್ಲೆಂ ಮ್ಹಾಕಾ ಬರೆಂ ಲಾಗನಾ".
"ಮ್ಹಜೆಂ ರಡ್ಣೆಂ ತುಕಾ ಬರೆಂ ಲಾಗ್ಚೆಂ ಮ್ಹಳ್ಯಾರಿ ಕಶೆಂ? ಎದೊಳ್ ಮ್ಹಣಾಸರ್ ತುಜೆರ್ ಕಸಲೊಚ್ಚ್ ಭಾರ್ ಪಡೊಂಕ್ ನಜೊ ಮ್ಹಣ್, ತುಕಾ ಮೊಗಾನ್ ಲೆವ್ಲ್ಲ್ಯಾಚೊ ಫಳ್ ಹೊ. ಇಸ್ಕೊಲಾಚೆಂ ಕಾಮ್, ಭುರ್ಗ್ಯಾಂಚೆ ಕಾಮ್, ಘರ್ಚೆಂ ಕಾಮ್, ತಾಚೆ ಮಧೆಂ ಟೂಶನಾಂ ಆನಿಂ ರಾತಿಕ್ ತುಕ್ಯಾ ಕುಡಿಚೊ ಭೊರೊ ವಾವೊಂವ್ಚಿ ತಾಂಕ್ ಮ್ಹಜ್ಯಾ ಹ್ಯಾ ಜೀವನಾಂತ್ ವ ಕುಡಿಂತ್ ಆನಿಕ್ ಉರ್ಲಿ ನಾಂ. ಖಂಯ್ ತುಕಾ ಮ್ಹಜ್ಯಾ ಜೀವನಾಚೊ ಭೊರೊ ಸಮ್ಜೊನ್ ಘೆಂವ್ಕ್ ಪಾವ್ಟ್ ನಾಂಗಿ, ತರ್ ತುಜೆ ಒಟ್ಟುಕ್ ಹಾಂವೆಂ ಆನಿಂ ಜಿಯೆವ್ನ್ ಕಿತೆಂ ಫಾಯ್ದೊ?" ರೀನಾನ್ ರಡೊನ್ಂಚ್ ರೋಶನಾಕ್ ಸವಾಲ್ ವಿಚಾರ್ಲೆಂ.
ರೀನಾಚೆಂ ಸವಾಲ್ ರೋಶನಾಕ್ ಅರ್ಥ್ ಜಾಲೆಂನಾಂ. "ಹಾಂವ್ ದೀಸಾಕ್ ಆಟ್ - ಧಾ ಘಾಂಟೆ ಕಾಮ್ ಕರ್ತಾಂ ತರ್ ತೆಂ ಮ್ಹಜ್ಯಾ ಎಕ್ಲ್ಯಾಚಾ ಫಾಯ್ದ್ಯಾಕ್ವೆ? ಹಾಂವೆಂ ಕಾಮ್ ಕರ್ಚೆಂ ತುಜ್ಯಾ ಆನಿಂ ಭುರ್ಗ್ಯಾಂಚಾ ಬರ್ಯಾ ಫಾಲ್ಯಾಂ ಖಾತಿರ್. ಫಿರ್ಗೆಜೆಚ್ಯಾ ಚಟುವಟಿಕೆನಿಂ ಹಾಂವ್ ಪಾತ್ರ್ ಘೆತಾಂ ಜಾಲ್ಯಾರ್ ಮ್ಹಜಿ ತಾಲೆಂತಾಂ ದೆವಾಚೆ ಮಹಿಮೆ ಖಾತಿರ್ ಆನಿಂ ಲೊಕಾಚಾ ಬರೆಂಪಣಾಂ ಖಾತಿರ್ ವಾಪರ್ಚಾ ಖಾತಿರ್" ಜಾಪ್ ದಿಲಿ ರೋಶನಾನ್.
"ಹಿಚ್ಚ್ ತುಜಿ ಸಮಸ್ಯಾ ರೋಶನ್. ತುವೆಂ ಆತಾಂ ಜಿಯೆಂವ್ಚಾ ಪ್ರಕಾರ್ ಮ್ಹಾಕಾ ಭೊಗ್ತಾಕಿ ತುಂ ತುಜ್ಯಾ ಕಾಮಾಕಡೆ ಕಾಜಾರ್ ಜಾಲಾಯ್. ಹಾಂವ್ ತುಜಿ ಆತಾಂ ತಿಸ್ರಿ ಬಾಯ್ಲ್ ಜಾಲ್ಯಾಂ. ತುಜಿ ತಿಸ್ರಿ ಬಾಯ್ಲ್ ಜಾವ್ನ್ ಜಿಯೆಂವ್ಕ್ ಮ್ಹಾಕಾ ಬಿಲ್ಕುಲ್ ನಾಕಾ" ರೀನಾನ್ ಆನಿಕಿ ವಡ್ಲ್ಯಾನ್ ರಡೊಂಕ್ ಸುರು ಕೆಲೆಂ.
"ತಿಸ್ರಿ ಬಾಯ್ಲ್!" ರೀನಾಚೆಂ ಉಲವ್ಣ್ಯಾನ್ ರೋಶನಾಕ್ ಗೊಂದೊಳಾಂತ್ ಸಾಂಪ್ಡಾಯ್ಲೆಂ . ಕಾಜಾರ್ ಜಾವ್ನ್ ಆಟ್ ವರ್ಸಾಂನಿ ಹೆಂ ಪಯ್ಲೆಂ ಪಾವ್ಟಿಂ ರೀನಾ ತಾಚಾ ಕಾಜಾರಿ ಜಿಣ್ಯೆಂತ್ ರಡ್ಲ್ಲೆಂ. ಕಾಜಾರಿ ಜಿಣ್ಯೆಚ್ಯಾ ಸುರ್ವಿಲ್ಯಾ ವರ್ಸಾಂಚಿ ಗೊಡ್ಸಾಣ್ ಸವ್ಕಾಸ್ ರೀನಾಚಾ ಜೀವನಾಂತ್ ಕೊಡ್ಸಾಣ್ ಜಾವ್ನ್ ಪರಿವರ್ತಿತ್ ಜಾಲ್ಲಿ.
ಗಾಂವಾಂತ್ ಕಾಜಾರ್ ಜಾವ್ನ್ ಘೊವಾ ಪಾಟ್ಲ್ಯಾನ್ ಆಯಿಲ್ಲ್ಯಾ ರೀನಾನ್ ಥೊಡ್ಯಾಚ್ಚ್ ದಿಸಾಂನಿ ಟೀಚರಿಚೆಂ ಕಾಮ್ ಆಪ್ಣಾಯಿಲ್ಲೆಂ. ಇಸ್ಕಲಾಂತ್ ಕಾಮ್ ಅರ್ಧೊಚ್ಚ್ ದೀಸ್ ಆಸ್ಲ್ಲ್ಯಾನ್, ತಾಕಾ ಘರ್ಚಾ ಕಾಮಾಚೊ ಭೊರೊ ಚಡ್ ಭರಾಧಿಕ್ ಮ್ಹಣ್ ಕಳನಾತ್ಲ್ಲೆಂ.
ಬಾಡ್ಯಾಚಾ ಘರಾಂತ್ ರಾವೊನ್ ಆಸ್ಲ್ಲಿಂ ತಿಂ ಆಪ್ಣಾಚೆಂಚ್ ಏಕ್ ಘರ್ ಮೊಲಾಕ್ ಘೇಂವ್ಚ್ಯಾ ಆಲೋಚನೆರ್ ಪಡ್ಲ್ಲಿಂ. ಬೊಂಬಯ್ ಮೊಲಾಕ್ ಘರ್ ಘೆಂವ್ಚೆಂ ಮ್ಹಳ್ಯಾರ್ ಲಾಖಾನಿಂ ಪಯ್ಶೆಂ ಜಾಯ್. ದೆಕುನ್ ರೀನಾನ್ ಟೂಶನಾ ದೀಂವ್ಕ್ ಸುರು ಕೆಲ್ಲಿಂ.
ರೋಶನಾಚೆಂ ಕಾಮ್ ತಾಕಾ ವೇಳಾರ್ ಘರಾ ಪಾಟಿಂ ವಚೊಂಕ್ ಸೊಡ್ತಲೆಂ. ಪುಣ್ ಸಾಂಬಾಳ್ ಮಸ್ತ್ ಉಣೆಂ ಆಸ್ಲ್ಲೊ. ಘರ್ ಆಪ್ಣಾಂವ್ಚ್ಯಾ ಇರಾದ್ಯಾನ್ ಚಡ್ ಸಾಂಬಾಳಾಚೆಂ ಕಾಮ್ ರೋಶನ್ ಸೊದುನ್ಂಚ್ ಆಸ್ಲ್ಲೊ.
ಚಡ್ ಸಾಂಬಾಳಾಚೆಂ ಕಾಮ್ ತಾಚಾ ಹಾತಿಂ ಲಾಗ್ತಾನಾ , ತೆಣೆಂ ತಾಚಾ ಫಿರ್ಗಜೆಂತ್ ನವೊ ಪಾದ್ರ್ಯಾಬ್ ಆಯಿಲ್ಲೊ. ತೊ ಲೊಕಾ ಪಯ್ಕಿಂ ತಾಲೆಂತಾ ಆಸ್ಲೆಲಿಂ ಪಾರ್ಕುನ್, ತಿಂ ತಾಲೆಂತಾಂ ಫಿರ್ಗೆಜಿಚಾ ಬರೆಂಪಣಾಂ ಖಾತಿರ್ ಗಳ್ಸುಂಚ್ಯೊ ವಾಟೊ ಸೊಧ್ತಾಲೊ.
ರೋಶನಾಚಿಂ ತಾಲೆಂತಾ ಫಿರ್ಗಜ್ ಪಾದ್ರ್ಯಾಬಾನ್ ವೊಳ್ಕೊನ್ ಘೆತ್ಲ್ಲಿಂ. ತಾಚೆಂ ಥಂಯ್ ಮುಖೇಲ್ಪಣ್ ಆಸ್ಲ್ಲೆಂ. ಹಾತಿಂ ಘೆತ್ಲ್ಲೆಂ ಹರ್ಯೇಕ್ ಕಾಮ್ ಶೆಂಭರ್ ಠಕ್ಕೆ ಸಮರ್ಪಣಾನ್ ತೊ ಕರ್ತಾಲೊ. ಹೆಂ ಪಳೆವ್ನ್ ಪಾದ್ರ್ಯಾಬಾನ್ ರೋಶನಾಕ್ ಬುನ್ಯಾದಿ ಕ್ರೀಸ್ತೀಯ್ ಸಮುದಾಯೆಚ್ಯಾ ಕಾಮಾಚ್ಯೊ ಆನಿಂ ಫಿರ್ಗೆಜೆಚ್ಯಾ ಜೆರಾಲ್ ಸಮಿತಿಚ್ಯಾ ಕಾಮಾಚ್ಯೊ ಜವಬ್ದಾರ್ಯೊ ಆರ್ಪುನ್ ದಿಲ್ಲ್ಯೊ.
ತಿತ್ಲೆಂಚ್ ನ್ಹಂಯ್, ಆಯ್ತಾರಾಚೆಂ ರೋಶನ್ ಕ್ರಿಸ್ತಾಂವ್ ಭುರ್ಗ್ಯಾಂಕ್ ದೊತೊರ್ನ್ ಶಿಕಯ್ತಾಲೊ. ಸೊಮರಾಚೆಂ ಕಾರಿಜ್ಮಾತಿಕ್ ಮಾಗ್ಣ್ಯಾ ವಿಧಿಂತ್ ಪಾತ್ರ್
ಯೆತಾಲೊ.
ಚಡ್ ಸಾಂಬಾಳಾಚೆಂ ಕಾಮ್ ರೋಶನಾಕ್ ಮೆಳ್ಲ್ಲೆಂ ತೆಂ ತಾಚೆ ಖಾತಿರ್ ಚಡ್ ವೇಳ್ ಆನಿಂ ಚಡ್ ಜವಬ್ದಾರ್ಯೊ ತಾಣೆಂ ವಯ್ಸಿಜೆ ಪಡ್ಲ್ಯೊ. ಜವಬ್ದಾರೆ ಥಾವ್ನ್ ಇಲ್ಲೆಂ ಸುಖ್ ಜೊಡುಂಕ್ ಇಷ್ಟಾಂ ಸಾಂಗಾಂತಾ ಆಪ್ರೂಪ್ ಎಕೇಕ್ ಸಿಗ್ರೆಟ್ ವೊಡುಂಕ್ ತಾಣೆಂ ಸುರು ಕೆಲ್ಲೆಂ. ಆಫೀಸಾಚ್ಯಾ ಪಾರ್ಟೆ ವೆಳಾರ್ ಇಲ್ಲಿ ಬೀಯರ್ ವಾ ಏಕ್ ದೋನ್ ಪೆಗ್ಗ್ ವಿಸ್ಕಿ ಪಿಯೆವ್ನ್ ಆಸ್ಲ್ಲೊ ತೊ ಆಯ್ಲೆವಾರ್ ಘರಾ ಸನ್ವಾರಾ ಆನಿಂ ಆಯ್ತಾರಾ ಸಾಂಜೆಚೆಂ, ಶೆಳಿಕ್ ವಕಾತ್ ಮ್ಹಣ್ ರೀನಾಕ್ ಸಾಂಗೊನ್, ಏಕ್ ವ ದೋನ್ ಪೆಗ್ಗ್ ವಿಸ್ಕಿ ವ, ಬ್ರ್ಯಾಂಡಿ ಪಿಯೆಂವ್ಕ್ ತಾಣೆಂ ಸುರು ಕೆಲ್ಲೆಂ.
ಹ್ಯೊ ಸರ್ವ್ ಬದ್ಲಾವ್ಣ್ಯೊ ರೋಶನಾಚಾ ಜೀವನಾಂತ್ ಜಾತನಾ, ತಾಣೆಂ ರೀನಾಚಾ ಜೀವನಾಚ್ಯೊ ಗರ್ಜೊ ಕಿತೆಂ ಮ್ಹಳ್ಳೆಂ ಸಮ್ಜೊನ್ ಘೆಂವ್ಚೆಂ ಉಣೆಂ ಉಣೆಂ ಕೆಲ್ಲೆಂ.
ಹೆಣೆಂ ರೀನಾನ್ ಆಪ್ಣಾಚಾಚ್ಚ್ ಸ್ವಂತ್ ನವ್ಯಾ ಘರಾಚೆ ಆಷೆನ್ ಟೂಶನಾಂ ದೀಂವ್ಕ್ ಸುರು ಕೆಲ್ಲೆಂ ವ್ಹಯ್, ಪುಣ್ ವಾಡ್ಚಾ ದೋನ್ ಚೆಡ್ವಾಂಚಾ ಶಿಕ್ಪಾ ಪಾಟ್ಲ್ಯಾನ್ ತಾಚೊ ಚಡ್ ಆನಿಂ ಚಡ್ ವೇಳ್ ವೆತಾಲೊ. ಕಾಜಾರಾಚಾ ಸುರ್ವೆರ್ ಘರ್ಚಾ ಕಾಮಾಂತ್ ಇಲ್ಲೊ ಆಧಾರ್ ದೀವ್ನ್ ಆಸ್ಲ್ಲೊ ರೋಶನ್, ಆಯ್ಲ್ಯಾವಾರ್ ತಾಚಾ ನವ್ಯಾ ಕಾಮಾ ಧರ್ಮಾನ್ ಆನಿಂ ಫಿರ್ಗೆಜೆಂತ್ಲ್ಯಾ ಚಟುವಟಿಕ್ಯಾ ಧರ್ಮಾನ್, ರೀನಾಕ್ ಘರ್ಚಾ ಕಾಮಾಂತ್ ಬಿಲ್ಕುಲ್ ಸಹಯತಾ ದೀನಾತ್ಲೊ.
ಏಕ್ ದೋನ್ ಪಾವ್ಟಿಂ ಸಾಂಗೊಂಕ್ ತೋಂಡ್ ಕಾಡ್ಲ್ಯಾರಿ, ರೀನಾನ್ ತಾಚೆ ಕಷ್ಟ್ ರೋಶನಾಕಡೆ ಸಾಂಗೊಂಕ್ ನಾತ್ಲ್ಲೆ. ಘರ್ಚಾ ಇಸ್ಕೊಲಾಚಾ, ಭುರ್ಗ್ಯಾಂಚಾ ಆನಿಂ ಟೂಶನಾಚಾ ಕಾಮಾ ಧರ್ಮಾನ್ ರೀನಾಕ್ ಉಸ್ವಾಸ್ ಕಾಡುಂಕ್ ಪುರ್ಸತ್ ಮೆಳ್ನಾತ್ಲ್ಲಿ. ರೋಶನಾ ಥಾವ್ನ್ ಮೊಗಾಚಿಂ ದೋನ್ ಉತ್ರಾಂ ಆಯ್ಕೊಂವ್ಯಾ ಮ್ಹಳ್ಯಾರ್ ತಾಚೆಕಡೆ ವೇಳ್ಚ್ಚ್ ನಾತ್ಲ್ಲೊ.
ಆಸ್ಲ್ಲೊ ಇಲ್ಲೊ ವೇಳ್ ಸನ್ವರಾ ಆನಿಂ ಆಯ್ತಾರಾ ಸೊರ್ಯಾ
ಸಾಂಗಾಂತಾ ರೋಶನ್ ಖರ್ಚಿತಾನಾ, ರೀನಾಕ್ ಸೊಸುಂಕ್ ತಾಂಕಾ ನಾತ್ಲ್ಲೆಂ. ತಾಣೆಂ ರೋಶನಾ ಕಡೆಂ ಕಾಜಾರ್ ಜಾಂವ್ಕ್ ದೊಳೆ ದಾಂಪುನ್ ಹಾಂ ಮ್ಹಳ್ಳೆಂ ಕಿತ್ಯಾಗಿ ಮ್ಹಳ್ಯಾರ್ ತೊ ವಾಯ್ಟ್ ಸವಯಾಂಕ್ ಲಬ್ದೊನ್ ನಾತ್ಲ್ಲೊ. ಸೊರೊ ಸಿಗ್ರೆಟ್ ಬಿಲ್ಕುಲ್ ಆಪಡಿನಾತ್ಲ್ಲೊ. ಪುಣ್ ಆತಾಂ ಕಾಜಾರ್ ಜಾವ್ನ್ ಥೊಡ್ಯಾ ವರ್ಸಾಂನಿ ಹ್ಯಾ ಸವಯಾಂಕ್ ಬಲಿ ಜಾಲ್ಲ್ಯಾ ಆಫ್ಲ್ಯಾ ಘೊವಾಕ್ ಪಳೆಂವ್ಕ್ ಆನಿಂ ಅನ್ಭೋಗ್ಸುಂಕ್ ರೀನಾಕ್ ಆಸಾಧ್ಯ್ ಜಾಲ್ಲೆಂ.
ನಿರಾಸ್ಪಾಣಾಂತ್ ರೀನಾ ಚಡ್ಪಡೊನ್ ಆಸ್ತಾನಾ ರೋಶನಾ ಥಾವ್ನ್ ಮೊಗಾಚಿಂ ದೋನ್ ಉತ್ರಾಂ ಆಯ್ಕೊಂಕ್ ಮೆಳೆಂಯ್ ಆಪ್ರೂಪ್ ಜಾಲ್ಲೆಂ. ಕಾಯ್ದ್ಯಾಖಾಲ್ ಆಪ್ಲಿ ಕೂಡ್ ತೆಂ ಘೊವಾಕ್ ಆರ್ಪುನ್ ದಿತಾಲೆಂ ತರೀ ಮೋಗ್ ಕರ್ಚಾಂತ್ ತಾಕಾ ಕಾಂಯ್ಚ್ ಆಸಕ್ತಿ ನಾತ್ಲ್ಲಿ. ಅಪ್ರೂಪ್ ಮೋಗ್ ಕರ್ನ್ ಆಖೇರ್ ಆಖೇರ್ ಜಾತನ್ಂಚ್ ತಾಕಾ ತಾಚಾ ಕುಡಿಚಾ ಪುರಾಸಾಣೆನ್ ಥಂಯ್ಚ್ ನೀದ್ ಆಯಿಲ್ಲ್ಯೊ ರಾತಿ ಆಸ್ಲ್ಲ್ಯೊ.
ಆನಿಂ ಆಯ್ಚ್ಯಾ ರಾತಿಂ ಕೊಡ್ಸಾಣೆಚಾ ಭಗ್ಣಾಂನಿ ಭರ್ಲ್ಲಿ ರೀನಾಚಿ ಕೂಡ್ ರೋಶನಾಕ್ ಫಾತ್ರಾಬರಿ ಲಾಗ್ಲ್ಯಾಂತ್ ಆಜಾಪ್ ನಾತ್ಲ್ಲೆಂ.
ದುಸ್ರ್ಯಾ ದೀಸಾ ಸಕಾಳಿಂ ಉಟ್ತಾನಾ ರೋಶನಾನ್ ಚಿಂತ್ಲೆಂ ಕಿ ತಾಚಿ ಬಾಯ್ಲ್ ಸದಾಂಚೆಬರಿ ಇಸ್ಕಲಾಕ್ ಗೆಲಾಂ ಮ್ಹಣ್. ಸದಾಂ ಇಸ್ಕಲಾಕ್ ವೆಚಾ ಪಯ್ಲೆಂ ರೀನಾ ರೋಶನಾ ಖಾತಿರ್ ಮ್ಹಣ್ ಫ್ಲಾಸ್ಕಾಂತ್ ಚಾಯ್ ಭರ್ನ್ ದವರ್ನ್ ವೆತಾಲೆಂ.
ರೋಶನ್ ಚಾ ಪಿಯೆಂವ್ಕ್ ಮ್ಹಣ್ ಕುಜ್ನಾಕ್ ಆಯಿಲ್ಲೊ. ಸದಾಂಚಾ ಜಾಗ್ಯಾರ್ ಆಸ್ಲ್ಲ್ಯಾ ಫ್ಲಾಸ್ಕಾಕ್ ತಾಣೆಂ ಹಾತ್ ಲಾಯ್ಲೊ. ಫ್ಲಾಸ್ಕಾಂತ್ ಚಾ ನಾತ್ಲ್ಲಿ. ಬದ್ಲಾಕ್ ಫ್ಲಾಸ್ಕಾ ಪಂದಾ ರೋಶನಾಕ್ ರೀನಾಚಿ ಚೀಟ್ ರಾಕೊನ್ ಆಸ್ಲ್ಲಿ.
ರೀನಾನ್ ಬರಯಿಲ್ಲೆಂ, "ರೋಶನ್ ತುಜಿ ತಿಸ್ರಿ ಬಾಯ್ಲ್ ಜಾವ್ನ್ ಜಿಯೆವ್ನ್ ಮ್ಹಾಕಾ ಪುರೊ ಜಾಲೆಂ. ಆದೇವ್ಸ್!"ರೋಶನಾಚಾ
ಜಿಣ್ಯೆಂತ್ ಘಡ್ಗಡೊ ಪಡ್ಲ್ಲೊ!
ಕಥಾಂಕರ್ ಪಾನಾಕ್: 1, 2, 3, 4, 5, 6, 7, 8, 9, 10
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
