ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್
[ಕೊಂಕ್ಣೆಂತ್ ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಾಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
16. "ಮೊಗಾ ಮ್ಹಾಕಾ ಶಿಕಯ್"
ಎಡ್ವಿನ್ ಜೆ.ಎಫ್.
ವಿಜೆಪಿ-ಚ್ಯಾ ಸೈಕೊಲೊಜಿಕಲ್ ಉಪನ್ಯಾಸಾಚೆ೦ ನಾ೦ವ್ ಹಾ೦ವೆ೦ ‘ಫಾರ್ಲಾ೦’, ಮಾಫ್ ಕರಿಜ಼ೆ ಕಿತ್ಯಾಕ್ ವಿಶಯಿಚ್ಚ್ ತಸಲೊ. ಆಮ್ಚ್ಯಾ ಬರವ್ಪ್ಯಾ೦ಚ್ಯಾ ಪ್ರೇಮ್-ದೃಶಾ೦ನಿ ಸೈಕೊಲಿಜ಼ಿಚ್ಚ್ ನಾ. ಸಾ೦ಗ್ಲೆಲ್ಯಾ ವೆಳಾರ್ ಸಬಾರ್ ಮ್ಹಣ್ತಾತ್, ಆಮಿ೦ ಕಾ೦ಯ್ ಮೊಗಾರ್ ಪಡೊನ್ ನೆಣಾ೦ವ್. ಬರಾಬರ್. ಪುಣ್ ಮೊಗಾರ್ ಪಡೊ೦ಕ್ ಆಶೆತಾತ್ ವ್ಹಯ್? ತುಮ್ಚ್ಯಾನ್ ಸಾದ್ಯ್ ನಾ ತರ್ ತುಮ್ಚ್ಯಾ ಕತಾನಾಯಕಾಕ್ ಪುಣಿ ಮೊಗಾರ್ ಪಡಯ್ತಾತ್. ಪುಣ್ ಕಶೆ೦? ಅಶೆ೦? ಹೆ೦ ದೃಶ್ ವಾಚಾ:
ತವಳ್ ಕೊಡಿಯಾಳಾ೦ತ್ ಮೊಗಾರ್ ಪಡ್ತೆಲ್ಯಾ೦ಕ್ ಬಾವ್ಟ್ಯಾ ಗುಡ್ಯಾವಯ್ಲಿ೦ ಬೊಲಿ೦ ಸಾವಟ್ ದಿತಾಲಿ೦ ಆನಿ ತ್ಯಾ ಕಾಳಾರ್ ದೊಗಾ೦ ಬಾವ್ಟ್ಯಾ ಗುಡ್ಯಾಚ್ಯಾ ಭಾಗಿಯೆ೦ತ್ ಬೆಟ್ತಾತ್. ತೊ ಮ್ಹಣ್ತಾ, “ಕಸಲೊ ಪ್ರಶಾ೦ತ್ ಹವೊ ನ್ಹಯ್ಗಿ ಬಾ? ಪಳೆ ಪಳೆ, ತೊ ಸುರ್ಯೊ ರಾಯ್ ಸಗ್ಳೊಚ್ಚ್ ಥಕೊನ್ ಅರಬಿ ದರ್ಯಾ೦ತ್ ನ್ಹಾ೦ವ್ಕ್ ವೆತಾ.” ತವಳ್ ತೆ೦ ಸುಸ್ಕಾರ್ತಾ. “ಆಮ್ಚ್ಯಾ ಮೊಗಾಚಿ ನಿಶಾಣಿ ಹೊ ಸುರ್ಯೊ-ಬಾ. ತೊಯೀ ಅಸೊಚ್ಚ್ ಥಕಾಸೊ ನಾ-ಮೂ?” ಆನಿ ತೊ ಮ್ಹಣ್ತಾ, “ಬಿಲ್ಕುಲ್ ನಾ, ಮ್ಹಜ಼ೆ ರಾಣಿಯೆ. ಹಾ೦ವ್ ಹರ್ಯೆಕಾ ಸನ್ವಾರಾ ಸಾವುದ್ ಮಾಯೆಚೆ೦ ನೊವೆನ್ ಕರ್ತಾ೦ ತರಿ ಕಿತ್ಯಾಕ್? ತೆ೦ ಆಸು೦, ಆತಾ೦ ತು೦ ಎಕ್ ಪೋದ್ ಮ್ಹಣ್.” ತೆ೦ ಮ್ಹಣ್ತಾ, “ನಾ, ನಾ, ಮ್ಹಾಕಾ ಲಜ಼್ ದಿಸ್ತಾ.”
ತೊ ಮ್ಹಣ್ತಾ, “ತು೦ ಸುರು ಕರ್, ಹಾ೦ವ್ ತುಕಾ ಸೆಕೆ೦ಡ್ ವೊಯ್ಸ್ ದಿತಾ೦!”
ಹೆ೦ ದೃಶ್ ಮ್ಹಜ಼್ಯಾ ಬಲ್ಸಾ೦ತ್ಲೆ೦ ನ್ಹಯ್, ಕೊಣೆ೦ಗಿ ಥೊಡ್ಯಾ ವರ್ಸಾ೦ ಆದಿ೦ ಬರಯಿಲ್ಲೆ೦ ಆನಿ ಛಾಪುನ್ ಆಯಿಲ್ಲೆ೦. ಆಮ್ಚ್ಯಾ ಸಾಹಿತಾ೦ತ್ಲಿ೦ ಪ್ರೇಮ್-ದೃಶಾ೦ ಪರತ್ ಕನ್ನಡ-ಹಿ೦ದಿ ಸಿನೆಮಾ೦ಚೆರ್ ಆದಾರಿತ್, ಪ್ರಬಾವಿತ್. ಆಸಾ ತರ್ ತುಮ್ಕಾ೦ ಎಕ್ ಪ್ರೇಮಿಕಾ, ತುಮಿ೦ ಅಶೆ೦ ಉಲಯ್ಶಾತ್ ತಿಚೆಲಾಗಿ೦? ಕೋಣ್ ಜ಼ಾಣಾ೦, ಅಸಲಿ೦ ಸೊಡ್ಯಾ೦, ಕಸಲಿ೦ಚ್ ಉತ್ರಾ೦ ತುಮ್ಚೆಥಾವ್ನ್ ಸುಟಾನಾ೦ತ್ ಕೊಣ್ಣಾ. ಯೆಕಾಮೆಕಾಚೊ ಸಾ೦ಗಾತ್ಚ್ಚ್ ಸರ್ವ್ ಉತ್ರಾ೦ಕ್ ಕಯ್ದ್ ಕರ್ತಾ ಜ಼ಾವ್ಯೆತ್ ಆನಿ ಹ್ಯಾ ವರ್ವಿ೦ ಉದೆಲ್ಲ್ಯಾ ಮೌನಾ೦ತ್ ಆಸ್ಚಿ ತೃಪ್ತಿ ವರ್ಣು೦ಚೆ೦ ಪ್ರೇತನ್ ತುಮಿ೦ ಕೆಲ್ಯಾರ್ ಎಕ್ ಸೊಬಿತ್-ನಿರ್ಮಳ್ ಪ್ರೇಮ್ ದೃಶ್ ಉಬೆ೦ ಜ಼ಾಯ್ತ್. ತರ್ ಕಿತ್ಯಾಕ್ ಪರತ್ ಪ್ರೇತನ್ ಕಾಳಿದಾಸಾಕ್/ಶೇಕ್ಸ್ಪಿಯೆರಾಕ್ ಜ಼ೀವ೦ತ್ ಕರ್ಚೆ೦?
ಉಡಾಸ್ ಆಸಾಮೂ ‘ದೆವಾಚೆ ಕುರ್ಪೆನ್’ ಕಾದ೦ಬರಿ೦ತ್ಲೆ೦ ದೃಶ್? ಹಾ೦ಗಾಸರ್ ಆನ್ಯೆಕ್ ದಾಕ್ಲೊ ತುಮ್ಕಾ೦ ದಿತಾ೦, ಜ಼ೂಲ್ಸ್ ವರ್ನಾಚ್ಯಾ Around The World in Eighty Days ಕಾದ೦ಬರಿಯೆ೦ತ್ಲೆ೦:
ಹಾ೦ತ್ಲೊ ಕತಾನಾಯಕ್ ಫಿಲಿಯಾಸ್ ಫೊಗ್ಗ್ ಆಪ್ಲ್ಯಾ ಮಿತ್ರಾ೦ಲಾಗಿ೦ ಶರ್ತ್ ಮಾರ್ತಾಕಿ ಸಗ್ಳ್ಯಾ ಸ೦ಸಾರಾಚೆ೦ ಪರ್ಯಟನ್ ಫಕತ್ ಅಯ್ಶಿ೦ ದಿಸಾ೦ನಿ ಕರ್ಯೆತ್ ಮ್ಹಣ್. ಆನಿ ತೊ ಆಪ್ಲ್ಯಾ ಸಾಹಸಿಕ್ ಪಯ್ಣಾರ್ ಭಾಯ್ರ್ ಸರ್ತಾ. ತೊ ಭಾರತಾಕ್ ಪಾವ್ಲ್ಲ್ಯಾ ವೆಳಾರ್ “ಸತಿ” ಮ್ಹಳ್ಳ್ಯಾ ಎಕಾ ಕ್ರೂರ್ ರಿವಾಜ಼ಿಥಾವ್ನ್ ಒವ್ದಾ ಮ್ಹಳ್ಳೆ ಸ್ತ್ರೀಯೆಕ್ ಬಚಾವ್ ಕರ್ತಾ ಆನಿ ತ್ಯಾ ಉಪ್ರಾ೦ತ್ಲ್ಯಾ ಕತೆ೦ತ್ ಆನಿ ಸಾಹಸಾ೦ತ್ ತಿ೦ ಸಾ೦ಗಾತಾ ಆಸ್ತಾತ್. ನಿಮಾಣೆ೦, ಕತಾ ಸ೦ಪೊನ್ ಯೆತಾನಾ ಆದೇವ್ಸಾಚಿ ಘಡಿ ಲಾಗಿ೦ ಸರ್ತಾ ಆನಿ ತಾ೦ಚೆ ಮದೆ೦ ಹೆ೦ ಸ೦ಬಾಶಣ್ ಚಲ್ತಾ:
“ತುವೆ೦ ಇ೦ಡಿಯಾ೦ತ್ಚ್ಚ್ ರಾವ್ಯೆತ್, ಮದಾಮ್.”
“ತುಜ಼ೊ ಫುಡಾರ್ ಕಿತೆ೦ ಜ಼ಾತೊಲೊ, ಮಿ|ಫೊಗ್ಗ್?”
“ಹಾ೦ವ್ ಕಸಲ್ಯಾಯಿ ಗರ್ಜೆ೦ತ್ ನಾ, ಮದಾಮ್.”
“ಗರೀಬಾಯ್ ತುಕಾ ಗ್ರಾಸು೦ಚಿ ನಾ...ಪುಣ್ ತುಕಾ ಕುಟಮ್ ಆನಿ ಇಶ್ಟ್ ಆಸಾತ್?”
“ಮ್ಹಾಕಾ ಕೋಣ್೦ಚ್ ನಾ.”
“ತರ್, ಮಿ|ಫೊಗ್ಗ್, ಆತಾ೦ಚ್ ಎಕ್ ಕುಟಮ್ ಆನಿ ಇಶ್ಟ್ ಸಾ೦ಗಾತಾಚ್ ಜ಼ೊಡುನ್ ಘೆ೦ವ್ಕ್ ಅಪೇಕ್ಶಿತಾಯ್? ಮ್ಹಾಕಾ ತುಜ಼ಿ ಪತಿಣ್ ಕರುನ್ ಘೆತಾಯ್?”
ಆನಿ ತವಳ್ ಆನಿ ಪಯಿಲ್ಲೆ ಪಾವ್ಟಿ೦ ಮಿ|ಫಿಲಿಯಾಸ್ ಫೊಗ್ಗಾನ್ ಸಿ೦ತಿಮೆ೦ತಾ೦ಚೊ ಆನಿ ಮೊಗಾಚೊ ಉಮಾಳೊ ದಾಕಯ್ಲೊ ಆನಿ ಒವ್ದಾಕ್ ತಾಣೆ ಆಪ್ಲೆ ವೆ೦ಗೆ೦ತ್ ಘೆತ್ಲಿ. “ವ್ಹಯ್,” ಮ್ಹಣಾಲೊ ತೊ. “ಸ೦ಸಾರಾ೦ತ್ ಜ಼ೆ೦ ಕಿತೆ೦ ಪವಿತ್ ಆಸಾ ತಾಚ್ಯಾ ನಾ೦ವಾನ್....ಹಾ೦ವ್ ತುಜ಼ೊ ಮೋಗ್ ಕರ್ತಾ೦!”
ಹಿ ಕಾದ೦ಬರಿ ತುಮಿ೦ ವಾಚು೦ಕ್ಚ್ ನಾ ತರಿ ಪರ್ವಾ ನಾ ಪುಣ್ ಫಕತ್ತ್ ಹೆ೦ ದೃಶ್ ಸಮ್ಜುನ್ ಘೆ೦ವ್ಚೆ೦ ಪ್ರೇತನ್ ಕರಾತ್. ಒವ್ದಾ ಮ್ಹಳ್ಳಿ ವಿದವ್, ಮಿ|ಫೊಗ್ಗಾಚೆ೦ ಸಾಹಸ್ ತಿಕಾ “ಸತಿ”ಯೆಚ್ಯಾ ಸಾರಿಯೆರ್ಥಾವ್ನ್ ಬಚಾವ್ ಕರ್ತಾ; ತಿ೦ ಸಾ೦ಗಾತಾಚ್ ಉಪ್ರಾ೦ತ್ಲೆ೦ ಸಾಹಸ್-ಪಯ್ಣ್ ಮು೦ದರಿತಾತ್. ಫೊಗ್ಗ್ ಗ್ರೇಸ್ತ್ ಬ್ರಿಟಿಶ್ ಮನಿಸ್, ಆ೦ಕ್ವಾರ್; ಒವ್ದಾ ಎಕ್ ಸೊಬಿತ್ ಸ್ತ್ರೀ. ತಾ೦ಚೊ ದಯ್ಹಿಕ್ ಸಾ೦ಗಾತ್ ಲಾಗ್ಶಿಲೊ ಪುಣ್ ಫೊಗ್ಗಾಚ್ಯಾ ಶರ್ತಾಚಿ ದಾವ್ ಆನಿ ಧಾ೦ವ್ ಇತ್ಲಿ ಆಸ್ತಾಕಿ ನಿಮಾಣ್ಯಾ ದೃಶಾ ಪರ್ಯಾ೦ತ್ ತೊ ಯಾ ಒವ್ದಾ ತಾತಾ೦ಚಿ, ಯೆಕಾಮೆಕಾ ಖಾತಿರ್, ಮಾನಸಿಕ್ ಭೊಗ್ಣಾ೦ ಉಚಾರಿನಾ೦ತ್-ಉಚಾರೊ೦ಕ್ ಸಕಾನಾ೦ತ್. ತಿತ್ಲ್ಯಾ ಲಾಗಿ೦ ಆಸುನ್ಯಿ ತಿ೦ ಪಯ್ಸ್ ಮ್ಹಳ್ಳೆಪರಿ೦ ಆಸಾತ್.
ನಾ ತಾ೦ಚೆ ಮದೆ೦ ಬುಡೊನ್ ಯೆ೦ವ್ಚೊ ಸುರ್ಯೊ, ಘೊ೦ಟೆರಾಕ್ ವೆಚಿ೦ ಸುಕ್ಣಿ೦, ಪೊದಾ೦-ಗಿತಾ೦ ಯಾ ಸೆಕೆ೦ಡ್ ವೊಯ್ಸ್; ತಾ೦ಚೆ ಮದೆ೦ ಕಸ್ಲೊಯಿ ಪಾಶಾ೦ವ್ ಆಸ್ಲ್ಲೊ ತರ್ ಲೇಕಕ್ ಜ಼ೂಲ್ಸ್ ವರ್ನ್ ತೊ ಸವಾಯ್ ರಿತಿರ್ ಜ಼ಾಯ್ರ್ ಕರುನ್ ಆಪ್ಲ್ಯಾ ವಿಬಿನ್ನ್ ಕತಾವಸ್ತುಕ್ ದೆಸೆಗ್ರಾದ್ ಕರಿನಾ ಬಗಾರ್ ತಾ೦ಚೆ ಮದ್ಲೆ ಉಗ್ತಡಾಕ್ ಯೆನಾತ್ಲ್ಲೆ ಸರ್ವ್ ಉಮಾಳೆ-ಪಾಶಾ೦ವ್ ನಿಮಾಣ್ಯಾ ದೃಶಾ೦ತ್, “ಜ಼ೆ೦ ಕಿತೆ೦ ಸ೦ಸಾರಾ೦ತ್ ಪವಿತ್ ಆಸಾ....” ಹ್ಯಾ ಉತ್ರಾ೦ನಿ ವಾಚ್ಪ್ಯಾ೦ ಸಾಮ್ಕಾರ್ ದವರ್ತಾ.
ಚಡ್ಉಣೆ ಅಸಲೆ೦ಚ್ ಪ್ರೇಮ್-ಸನ್ನಿವೇಶ್ “ಸೌ೦ಡ್ ಒಫ್ ಮ್ಯೂಸಿಕ್” ಫಿಲ್ಮಾ೦ತ್ಯಿ ಆಸಾ ಆನಿ ಅಸಲಿ೦ ಕಿತ್ಲಿಶಿ೦ ದೃಶಾ೦-ಸನ್ನಿವೆಶಾ೦ ಬರ್ಯಾ ಸಾಹಿತಾ೦ತ್ ಆಸಾತ್. ಸನ್ನಿವೆಶ್ ಜ಼ಾ೦ವ್ ಮೊಗಾಚೆ೦ ಯಾ ಪಾಶಾ೦ವಾ೦ಚೆ೦, ಲೇಕಕಾನ್ ಹ್ಯಾ ಸನ್ನಿವೆಶಾಚ್ಯಾ ಮದೆಗಾತ್ ಆಸ್ಚೆ೦ ಗರ್ಜೆಚೆ೦; ಪುಣ್ ಕಶೆ೦ ಮ್ಹಳ್ಳೆ೦ ಸವಾಲ್. ಹಾಕಾಯಿ ಮಿತಿ ಆಸಾತ್?
ಯೆ೦ವ್ಚ್ಯಾ ಕಿಸ್ತಾ೦ತ್, ಸಾಹಿತಾ೦ತ್ ಪಾಶಾ೦ವ್ ಆನಿ ಲ೦ಯ್ಗಿಕತಾ.
ಆಧ್ಲೆ ಅಂಕ್ಡೆ: 1, 2, 3, 4, 5, 6, 7, 8, 9, 10, 11, 12, 13, 14, 15
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
