ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಂಕರ್ - 4
ಮಟ್ವಿ ವಳೊಕ್: ಕವಿ ಜಾವ್ನ್ ಆಯ್ಲೆವಾರ್ ಉದೆಲ್ಲೊ ವಿನ್ಸಿ ಮೆಲ್ಕಾರ್, ಬೆಂಗ್ಳುರಾಂತ್ ಎಕಾ ಪ್ರತಿಷ್ಟಿತ್ ಸಂಸ್ಥ್ಯಾಂತ್ ವಾವ್ರ್ ಕರ್ನ್ ಆಸಾ ತರ್ಯ್ ಕೊಂಕ್ಣಿ ಭಾಸೆಚೊ ಹೊ ಮೊಗಿ. ಕೊಂಕ್ಣಿ ಸಾಹಿತ್ಯಾಚಿ ವೋಡ್ ಆಸ್ಚೊ ಹೊ ಕೊಂಕ್ಣೆಂತ್ ಬರೆಂ ಸಾಹಿತ್ಯ್ ರಚುಂಕ್ ಸಕ್ಚಿಂ ಭಳ್ವಂತ್ ಲಕ್ಶಣಾಂ ದಿಸೊನ್ ಯೆಂವ್ಚಿ ಹಿ ಕಾಣಿಂ ತುಮ್ಕಾಂ ಖಂಡಿತ್ ರುಚ್ತೆಲಿ. ಅಪ್ಲಿ ಮಿನತ್ ಅಶಿಚ್ ಮುಖಾರುನ್ ವರುನ್ ಎಕಾ ದಿಸಾ ಹೊ ಕೊಂಕ್ಣೆಂತ್ ಫಾಮಾದ್ ಸಾಹಿತಿ ಜಾಂವ್ ಮ್ಹಳ್ಳೆಂಚ್ ಮ್ಹಜೆಂ ಮಾಗ್ಣೆಂ ಜಾವ್ನಾಸಾ.
ವಿನ್ಸಿ, ಮೆಲ್ಕಾರ್
ಕಥಾಂಕರ್ - 4. ಶೆರ್ಮಾಂವ್
ಮಿಸಾಕ್ ವಚಾನಾತ್ಲ್ಲ್ಯಾ ಅಬುಟಾಮಾಕ್ ಕರೆಜ್ಮಾಂತ್ ಪುಣ್ ಮಿಸಾಕ್ ವತ್ತಾಯೆನ್ ಧಾಡುಂಕ್ ಸುರು ಕೆಲೆಂ ಬಾಯ್ಲ್ ಕಾರ್ಮಿಣ್ಬಾಯೆನ್. ಕಿತೆಂ ಕೆಲ್ಯಾರೀ ಆಯ್ಕಾನಾತ್ಲ್ಲ್ಯಾ ಅಬುಟಾಮಾಕ್ ಬಾಯ್ಲೆಚ್ಯಾ ಆನಿ ಪುತಾಚ್ಯಾ ಆವಾಜಾಕ್ ಭಿಂಯಾನ್ ವರ್ಸಾ ಉಪ್ರಾಂತ್ ಮಿಸಾಕ್ ಗೆಲೊ. ಇಗರ್ಜ್ಯೀ ಮಯ್ಲಾಂ ಪಯ್ಸ್ ಆಸ್ಲ್ಲಿ, ಗಾದೆ, ಗುಡೆ ಉತ್ರೊನ್ ವಚಾಜೆ, ಇಗರ್ಜೆಲಾಗಿಂ ಪಾವ್ಲೊ. ವರ್ಸಾಂ ಉಪ್ರಾಂತ್ ಪಳೆಲ್ಲಿ ಜಾಲ್ಲ್ಯಾನ್ ಭಾರಿಚ್ಚ್ ಸೊಭಿತ್ ದಿಸ್ಲಿ ತಾಕಾ. ಮಾತಾರ್ಯಾಂಕ್, ಬರೊ ಧವೊ ಪೇಂಟ್ ಕಾಡ್ಲ್ಲೊ. ಸವ್ಕಾಸ್ ಮುಖ್ಲಿಂ ಮೆಟಾಂ ತಾಣೆಂ ಕಾಡ್ಲಿಂ ಆನಿ ವ್ಹಾಣೊ ಭಾಯ್ರ್ ದವರುನ್ ದೆಗೆನ್ ಆಸ್ಲ್ಲ್ಯಾ ಲ್ಹಾನ್ಶ್ಯಾ ಆಯ್ದಾನಾಂತ್ಲೆಂ ಬೆಂಜಾರ್ ಕೆಲ್ಲೆಂ ಆಗ್ಮೆಂತ್ ಹಾತಾಂತ್ ಘೆವ್ನ್ ಮಾತ್ಯಾರ್ ಶೆಣಾವ್ನ್ ಇಗರ್ಜೆ ಭಿತರ್ ಪಾಂಯ್ ದವರ್ಲೆ. ಮೀಸ್ ಸುರು ಜಾಂವ್ಕ್ ಅನಿಕ್ಯೀ ಧಾ ಮಿನುಟಾಂ ಆಸ್ಲ್ಲಿಂ, ಲೋಕ್ ಥಂಯ್ ಥಂಯ್ ಬಾಂಕಾರ್ ಬಸ್ಲ್ಲೊ ಅಬುಟಾಮ್ ವಚೊನ್ ಮುಕ್ಲ್ಯಾ ಬಾಂಕಾರ್ ಬಸ್ಲೊ.
ಇಗರ್ಜೆ ಭಿತರ್ ವಚಾನಾಸ್ತಾಂ, ಮೀಸ್ ಆಯ್ಕಾನಾಸ್ತಾಂ, ಕುಮ್ಸಾರ್ ಜಾಯ್ನಾಸ್ತಾಂ ವರ್ಸ್ ಉತ್ರಾಲ್ಲೆಂ. ಫಕತ್ತ್ ತಾಚೆಂ ಘರ್ ಮಂದಿರ್ ಜಾಲ್ಲೆಂ. ಸಾತ್ ಎಕ್ರೊ ಜಾಗೊ ತಾಕಾ ಆಸ್ಲ್ಲೊ, ತಾಂತ್ಲೊ ದೋನ್ ಎಕ್ರೊ ಜಾಗ್ಯಾರ್ ಗಾದೆ ಆಸ್ಲ್ಲೆ, ತೀನ್ ಬೆಳಿಂ ತೊ ಕರ್ತಾಲೊ, ಪಾಂಚ್ ಜಣಾಂ ಭುರ್ಗಿಂ ಆಸ್ಲ್ಲಿಂ. ಕಾರ್ಮಿಣ್ಬಾಯ್ ಘರಾಂತ್ಲೆಂ ಕಾಮ್ ಕರ್ತಾಲಿ. ತೆಗಾಂ ಚೆಡ್ವಾಂಕ್ ಕಾಜಾರ್ ಕರ್ನ್ ದಿಲ್ಲೆಂ, ಎಕ್ಲೊ ಚೆಡೊ ಬೊಂಬೊಯ್ ಕಾಮಾರ್ ಆಸ್ಲ್ಲೊ ಅನ್ಯೇಕ್ಲೊ ಘರಾ ಸಾಂಗಾತ್ ದಿತಾಲೊ. ತೋಟ್, ಗಾದೆ, ಗೊರ್ವಾಂ. ಕುಂಕ್ಡಾಂ, ಸುಣಿಂ, ಮಾಜ್ರಾಂ ಮ್ಹಣ್ತಾನಾ ಖರ್ಚ್ಯೀ ಆಸ್ಲ್ಲೊ. ಪಯ್ಶೆಯೀ ಜಾತೆಲೆ, ದಿಸಾಕ್ ಆಟ್ ಲೀಟರ್ ದೂದ್ ಮೆಳ್ತಾಲೆಂ. ಅಬುಟಾಮ್ ಸಕಾಳಿಂ ಉಟೊನ್ ದೂದ್ ಕಾಡ್ನ್ ಹೊಟೆಲಾಂಕ್, ಘರಾಂ-ಘರಾಂನಿ ದಿತಾಲೊ. ಮೆಳ್ಲ್ಲೊ ದುಡು ಅರ್ಧೊ ಸೊರ್ಯಾಕ್ ಆನಿ ಅರ್ಧೊ ಘರಾಕ್ ಘಾಲ್ತಾಲೊ. ಸೊರೊ ಚಡ್ ಜಾಲ್ಯಾರ್ ಘರಾ ಯೇವ್ನ್ ಶೆರ್ಮಾಂವ್ ಜಾತಾಲೊ. ಥೊಡೆಪಾವ್ಟಿಂ ತೊಡಾಂತ್ಯೀ ಆಸ್ತಾಲೊ. ಪಿಯೆಲ್ಲ್ಯಾ ವೆಳಾರ್ ಘರಾಂತ್ ಸಮಾಧಾನ್ಂಚ್ ನಾ. ಬಾಪಯ್-ಪುತಾಚಿ ಲಡಾಯ್, ಕಾರ್ಮಿಣ್ ಬಾಎಕ್ ಮತ್ ಪಿಶಿ ಜಾತಾಲಿ.
ಪೂತ್ ಎಕ್ಲೊ ತೊಟಾಂತ್ ಘೊಳೊನ್ ಕಷ್ಟ್ ಕಾಡ್ನ್ ಸಗ್ಳೊ ದೀಸ್ ಘಾಮ್ ಕಾಡ್ತಾಲೊ. ಕಿತೆಂ ಕರ್ಚೆಂ ಹೊ ಮ್ಹಾತಾರೊ ಪಿಯೆವ್ನ್ ಖಾಲಿ ಕರ್ತಾಲೊ. ಬಾಪಯ್ ಮ್ಹಳ್ಳ್ಯಾ ಹಣೆಬರ್ಪಾಕ್, ಆವಯ್ಚ್ಯಾ ಉತ್ರಾಕ್ ಪಾಳೊ ದಿತಾಲೊ ಘರಾಂತ್ ಮಾಗ್ಣೆಂ ರಜಾರ್ ಆಸ್ಲ್ಯಾರೀ, ಜೇಂವ್ಕ್ ಖಾಂವ್ಕ್ ಆಸ್ಲ್ಯಾರೀ - ಸಮಧಾನ್ ಮತಿಕ್ ನಾ ಜಾಲ್ಯಾರ್ ಕಿತೆಂ ಫಾಯ್ದೊ..? ತ್ಯಾ ದೆಕುನ್ ಆವಯ್ನ್ ಆನಿ ಪುತಾನ್ ಒತ್ತಾಯೆನ್ ಅಬುಟಾಮಾಕ್ ಮಿಸಾಕ್ ಧಾಡ್ಲ್ಲೊ. ರೆತಿರ್ ನಾ ಸೊಡ್ಯಾಂ, ರೆತಿರ್ ಘರಾಚ್ಚ್ ಜಾತಾಲಿ. ಜಾಲ್ಯಾರ್ ಮಿಸಾ ವಚೊನ್ ಪಾದ್ರಿಚಿಂ ತರ್ಯೀ ದೋನ್ ಉತ್ರಾಂ ಆಯ್ಕೊಂವ್ದಿ ಮ್ಹಣೊನ್ ತಾಕಾ ಮಿಸಾಕ್ ಧಾಡ್ಲ್ಲೊ.
ಅಬುಟಾಮಾಚಿ ಪ್ರಾಯ್ ಸಾಟ್ ವರ್ಸಾಂ ಉತ್ರಾಲ್ಲಿಂ ಅಪುಣ್ ಮೊರ್ಚೊ ಮೀಸ್ ರಜಾರ್, ಬಾಜಾರ್ ಕಿತ್ಯಾಕ್.? ಹೆಂ ಸರ್ವ್ ಚಿಂತ್ಲ್ಲ್ಯಾ ತಾಕಾ ಸಗ್ಳೊ ಸಂಸಾರ್ ಪಿಂವ್ಡೊಚ್ಚ್ ದಿಸ್ತಾಲೊ. ಕಿತ್ಯಾ ಮ್ಹಳ್ಯಾರ್ ಸಗ್ಳೊ ದೀಸ್ ಪಿಯೆವ್ನ್ ಆಸ್ಲ್ಯಾರ್ ಆಮಾಲಾನ್ಂಚ್ ಆಸ್ತಾಲೊ ಆನಿ ಸಕ್ಕಡ್ ತಾಕಾ ಆಮಾಲ್ಶೆಂ ದಿಸ್ತಾಲೆಂ. ಕಿತೆಂಗೀ ಪುನ್ಯಾಕ್ ಆಜ್ ಇಗರ್ಜೆಚಿ ಗೇಟ್ ಪಳೆಲ್ಲಿ. ಇಗರ್ಜೆಂತ್ ಮುಕ್ಲ್ಯಾ ಬಾಂಕಾರ್ ಬಸ್ಲ್ಲೊ. ಅಪುಣ್ ಸಾಂತ್ ಮ್ಹಣೊನ್ ಧಾಖಂವ್ಕ್ಗೀ ಯಾ ದೇವ್ ಪಳೆತಾ ಮ್ಹಳ್ಳ್ಯಾ ಭಿಂಯಾನ್ಗೀ ಮ್ಹಣೊನ್ ಕಳೊಂಕ್ ನಾ. ಮಿಸಾಚೆಂ ಬಲಿದಾನ್ ಸುರು ಜಾಲೆಂ. ಆಧ್ಲ್ಯಾ ಕಾಂತಾರಾಧ್ವಾರಿಂ ಕಾಂತಾರಾಂ ಆಯ್ಕಾನಾಸ್ತಾನಾ ತೇಂಪ್ ಉತ್ರಾಲ್ಲೊ. ಇಲ್ಲೆಶೆಂ ಜೀಬ್ ಹಾಲಂವ್ಕ್ ಲಾಗ್ಲೊ.
ಪಾದ್ರಿ ಆಲ್ತಾರೆಕ್ ಆಯ್ಲೊ ಬಾಪಾಚೆ..ಪುತಾಚೆ.. ಮ್ಹಣೊನ್ ಮೀಸ್ ಸುರು ಕರಿಲಾಗ್ಲೊ. ಸದಾಂಚ್ಯೆಭರಿಂಚ್ ವಾಚ್ಪಾಂ, ಕಾಂತಾರಾಂ ಜಾಟೆಚ್ ಪಾದ್ರಿಚೆಂ ವಾಚಾಪ್ ಜಾವ್ನ್ ಶೆರ್ಮಾಂವ್ ಸುರು ಜಾಲ್ಲೊ. ಅಬುಟಾಮಾಚೆ ಕಾನ್ ನೀಟ್ ಜಾಳೆ ಆನಿ ದೊಳೆ ಮಾಜ್ರಾಪರಿಂ ಮಿಣ್ಕುಂಕ್ ಲಾಗ್ಲೆ. ಪಯ್ಲೆಂ ಮಿಸಾಕ್ ಯೆತಾಲೊ ಶೆರ್ಮಾಂವ್ ಮಾತ್ರ್ ಬರ್ಯಾನ್ ಆಯ್ಕಾತಾಲೊ ತಶೆಂಚ್ ಪಿಯೆವ್ನ್ ಪಾದ್ರಿಚ್ಯಾಕೀ ದೋನ್ ವಾಂಟೊ ಚಡ್ ಘರಾ ವಚೊನ್ ಶೆರ್ಮಾಂವ್ ದಿತಾಲೊ; ಶೆರ್ಮಾಂವ್ ಆಯ್ಕಾಲ್ಲೆಂಚ್ ಸಕ್ಡಾಂಚ್ಯಾ ಕಾನಾರ್ ಕಾಪುಸ್ ಆಸ್ತಾಲೊ. ಗೊರ್ವಾಂ ಹಾಂಬೆತಾಲಿಂ, ಪೆಟೆ ಘೊಂಕ್ತಾಲೆ, ಕುಂಕ್ಡಾ ಗೀದ್ ಆಯ್ಲೊ ಮ್ಹಣೊನ್ ಆರಾಬ್ಬಾಯೊ ದಿತಾಲಿಂ
ಪಾಸ್ಕಾಂಚೊ ಕಾಳ್ ಜಾಲ್ಲೆವರ್ವಿಂ ಪಾದ್ರಿಗಾರ್ ಫಕತ್ತ್ ಪಾತ್ಕಾಂ ರಡ್ಚೆವಿಶಿಂ, ಜಿಣಿ ಬದ್ಲುಂಚೆವಿಶಿಂ, ಕುಟ್ಮಾವಿಶಿಂ ಶೆರ್ಮಾಂವ್ ದಿತಾತ್. ಹ್ಯಾ ಮಿಸಾವೆಳಾರ್ ಅಶೆಂಚ್ ಜಾಲೆಂ, ಜಿಣಿ ಬದ್ಲಿಯಾ, ಬದ್ಲಿಯಾ ಮ್ಹಣೊನ್ ಪಾದ್ರಿ ತಾಳೊ ಪಿಂಜ್ತಾವರೇಗ್ ಬೊಬಾಟ್ಲೊ. ಮನ್ಶಾ ಜಿಣೆ ಫಕತ್ತ್ ಚಾರ್ ದಿಸಾಂಚಿ ತಿ ಬರ್ಯಾನ್ ಜಿಯೆಯಾ, ಆಯ್ತಾರಾಚೆಂ ಭಾಗೆವಂತ್ಪಣ್ ಸಾಂಬಾಳಾ ಮ್ಹಣೊನ್ ಬೊಬಾಟುನ್ ಮ್ಹಣ್ತಾಲೊ ಆನಿ ಸುಕೊ ಜಾಲ್ಲೊ ತಾಳೊ ಗ್ಲಾಸಾಚ್ಯಾ ಉದ್ಕಾನ್ ಥಂಡ್ ಕರ್ತಾಲೊ. ಶೆರ್ಮಾಂವ್ ಆಯ್ಕಾಲ್ಲ್ಯಾ ಅಬುಟಾಮಾಕ್ ಕಾಳ್ಜಾಕ್ ಭಾಲೊ ತೊಪ್ಲ್ಲ್ಯಾಬರಿ ಜಾತಾಲೆಂ ತರ್ಯೀ ಹೆಂ ಫಕತ್ತ್ ಜಿಣ್ಯೆಂತ್ ಜಾಯ್ನಾಂ ಮ್ಹಳ್ಳೆಂ ತೊ ಬರ್ಯಾನ್ ಜಾಣಾಸ್ಲ್ಲೊ. ಪಾದ್ರಿಚೊ ಶೆರ್ಮಾಂವ್ ಏಕ್ ಘಂಟೊಭರ್ ಆಸ್ಲ್ಲೊ.
ಥೊಡೆ ನಿದೆಂತ್ ಸ್ವಪ್ಣಾಂನಿ ಉಪ್ಯೆತಾಲೆ, ಆನಿ ಥೊಡೆ ಇಗರ್ಜೆ ಭಾಯ್ರ್ ರಾವೊನ್ ಪಟ್ಟಾಂಗಾ ಮಾರ್ತಾಲೆ. ಅಬುಟಾಮ್ ಕಾನ್ ದೀವ್ನ್ ಮನಾಂತ್ ಇಲ್ಲೆಂ ಇಲ್ಲೆಂ ರೊಂಬೊಯ್ಲಾಗ್ಲೊ, ದೊಳೆ ತಾಚೆ ಮಿರ್ಮಿರೊಂಕ್ಲಾಗ್ಲೆ. ಥೊಡಿಂ ದುಖಾಂ ತಾಚ್ಯಾ ದೊಳ್ಯಾಂತ್ ಯೆತಾಶೆಂ ತಾಕಾ ಭೊಗ್ಲೆಂ. ಕಿತೆಂ ಕರುಂಕ್ ನಾ ಹಾವೆಂ..? ಘರ್ಚ್ಯಾಂಕ್ ಕಿತ್ಲೆಂ ದುಖಂವ್ಕ್ ನಾ..? ಕಿತ್ಲೆ ಪಾವ್ಟಿಂ ತೊಡಾಂತ್ ಲೊಳೊಂಕ್ ನಾ..? ಕೊಣಾ ಕೊಣಾಚೊ ಕಿತ್ಲೊ ಶಿರಾಪ್ ಆಯ್ಕೊಂಕ್ನಾ? ತೊ ಚಿಂತುನ್ಂಚ್ ಗೆಲೊ..
ಶೆರ್ಮಾಂವ್ ಜಾತೆಚ್ಚ್ ಮಿಸಾಚೆಂ ಬಲಿದಾನ್ ಜಾವ್ನ್ ಕುಮ್ಗಾರಾಕ್ ತಯಾರಾಯ್ ಸವ್ಕಾಸ್ ವಚೊನ್ ಕುಮ್ಗಾರ್ ಕಾಣ್ಗೆಲಾಗ್ಲೊ. ಆತಾಂ ಚಡಾವತ್ ಹಾತಾಂನಿ ಪುಣ್ ಅಬುಟಾಮಾನ್ ಜಿಬೆರ್ ಕಾಣ್ಗೆಲೊ ಆನಿ ಆಪ್ಲಿ ಬಸ್ಕಾ ತಾಣೆ ಘೆತ್ಲಿ. ಮೀಸ್ ಜಾತೆಚ್ಚ್ ಇಗರ್ಜೆಭಾಯ್ರ್ ಯೇವ್ನ್ ಆಪ್ಲ್ಯಾ ವಳ್ಕಿಚಾಂಕ್ ಮೆಳ್ಳೊ ಆನಿ ಅಪ್ಲ್ಯಾ ಘರ್ಚಿ ವಾಟ್ ಧರಿಲಾಗ್ಲೊ.
ಚಲ್ತಾಂ ಚಲ್ತಾಂ ಅಬುಟಾಮಾಕ್ ಪಾದ್ರಿಚ್ಯಾ ಶೆರ್ಮಾಂವಾಚೆಂ ನಿಯಾಳ್ ಕರುನ್ ವೆತಾಲೊ. ತಾಣೆಂ ಸಾಂಗ್ಲ್ಲಿಂ ಉತ್ರಾಂ ತಾಚ್ಯಾ ಕಾಳ್ಜಾಂತ್ ದುಕ್ರಾಚ್ಯಾ ಗಳ್ಯಾಕ್ ಸುರಿ ಘಾಲ್ಲೆಬರಿಂ ಜಾಲ್ಲೆಂ. ಕಿತೆಂಯೀ ಜಾವ್ನ್ ಅಬುಟಾಮ್ ಸವ್ಕಾಸ್ ಮೆಟಾಂ ಕಾಡುನ್ ವೆತಾ ಜಾಲಾರೀ ಪಾದ್ರಿಚಿಂ ಉತ್ರಾಂ ಮಾತ್ರ್ ತಾಚ್ಯಾ ಮತಿಂತ್ಲಿಂ ಭಾಯ್ರ್ ವಚಾನಾತ್ಲ್ಲಿಂ. ಆಂಗಾಂತ್ ತಾಚ್ಯಾ ಕರೆಂಟ್ ಲಾಗ್ಲ್ಲ್ಯಾಬರಿಂ ಜಾತಾಲೆಂ, ವೋತ್ಯೀ ವಿಪ್ರೀತ್ ಆಸ್ಲ್ಲೆಂ. ಘಾಮಾನ್ ಭಿಜೊನ್ ಗೆಲ್ಲೊ ಖಾಂದ್ಯಾವಯ್ಲೊ ತುವಾಲೊ ಮಾತ್ಯಾರ್ ರೆವ್ಡಾಯ್ಲೊ ಆನಿ ಶರ್ಟಾಚೆ ಬುತಾಂಚ್ ತಾಣೆಂ ಕಾಡ್ನ್ ಅರ್ಧೊ ನಾಗ್ಡೊ ತೊ ಜಾಲೊ.
ತಾಚ್ಯಾ ಮತಿಂತ್ ಪರತ್ ಜಿಣಿ ಬದಲಾ ಮ್ಹಳ್ಳೆಂ ಉತ್ರಾರ್ ಖಂಚೊಂಕ್ ಲಾಗ್ಲೆಂ.
ಅಪುಣ್ ಕಿತೆಂ..? ಆಪ್ಣಾಚೆಂ ಜಿವಿತ್ ಕಿತೆಂ..? ಸಂಸಾರಾಚ್ಯಾ ಅಖ್ರೇಚ್ಯಾ ಪಾಂವ್ಡಾರ್ ಪಾವ್ಲಾಂ, ಹೆಂ ಜಿವಿತ್ ಶಾಸ್ವಿತ್ಗೀ ಮ್ಹಳ್ಳಿಂ ಚಿಂತ್ನಾಂ ಧೊಸ್ತಾಲಿಂ. ಘರಾ ಪಾವ್ತಚ್ಚ್ ಭಾಂದ್ಲ್ಲಿ ಲುಂಗಿ ಸುಟಯ್ಲಾಗ್ಲೊ ಆನಿ ಖಾಂದ್ಯಾರ್ ಘಾಲ್ನ್ ಆಪ್ಲ್ಯಾ ಘರಾ ಪಾವ್ಲೊ. ಕಾರ್ಮಿಣ್ ಬಾಯೆನ್ ಚೆಂಬಾಂತ್ ಉದಾಕ್ ಹಾಡ್ನ್ ದಿಲೆಂ. ವೊತಾಚ್ಯಾ ಧಾವೆಕ್ ತಾಣೆಂ ಮಾತಾರ್ಯಾಕ್ ಲಾಗ್ಲ್ಲಿ ಘೊಟಾಕ್ ಮ್ಹಣೊನ್ ಚೆಂಬಾಂತ್ಲೆಂ ಉದಾಕ್ ಪಿಯೆವ್ನ್ ತೋಂಡ್ ಧುವ್ನ್ ಭಿತರ್ ಆಯ್ಲೊ, ತಾಚೆಭರಿಚ್ಚ್ ಪರ್ನೆ ಜಾಲ್ಲ್ಯಾ ಬಾಗ್ವೊನ್ ಆಸ್ಚಾ ಕದೆಲಾರ್ ವೊಣ್ಕೊನ್ ಬಸ್ಲೊ.
ಕಿತೆಂಯೀ ಜಾಂವ್, ಆಜ್ ಮ್ಹಾಕಾ ಮೀಸ್ ಆಯ್ಕಾಲ್ಲೆಬರಿ ಜಾಲೆಂ. ತಾಚಿಂ ಭಗ್ಣಾಂ ಉಚಾರಿಲಾಗ್ಲೊ. ಭಾರಿಚ್ ಸಂತೊಸಾನ್ ತೊ ಆಸ್ಲ್ಲೊ, ಕಾರ್ಮಿಣ್ಬಾಯೆಕ್ ಅಜ್ಯಾಪ್. ಆಜ್ ಕಿತೆಂ ಪವಿತ್ರ್ ಅತ್ಮೊ ದೆಂವ್ಲಾಸ್ತಲೊ ಮ್ಹಣೊನ್ ಮನಾಂತ್ ಚಿಂತಿಲಾಗ್ಲಿ. ಪೂತ್ ಮಾಸ್ಳಿ ಹಾಡುಂಕ್ ಪೆಂಟೆಕ್ ಗೆಲ್ಲೊ. ಕರೆಜ್ಮ್ ಜಾಲ್ಯಾರೀ, ಮಾತಾರಿಂನೇ, ಬಾವ್ಡಿಂ.. ಮಾಸ್.. ಮಾಸ್ಳಿ ಹಾಫ್ತ್ಯಾಚಿ ಸೊಡುಂಕ್ ಜಾತಾಗೀ... ಅಬುಟಾಮ್ ಆಪ್ಣಾಯಿತ್ಲ್ಯಾಕ್ ಚಿಂತುನ್ ಬಸ್ಲೊ ಆನಿ ಕಾಮ್, ಪಯ್ಶೆ ಮಾಗಿರ್ ದೆವಾಚೆಂ ಉತರ್ ಪಯ್ಲೆಂ. ಸೊರೊ - ಸುರ್ ಮಾಗಿರ್ ಕುಮ್ಸಾರ್ ಪಯ್ಲೆಂ ಮ್ಹಣೊನ್ ಉಪ್ರಾಂತ್ಲ್ಯಾ ಹಾಫ್ತ್ಯಾಂನಿ ಮಿಸಾಕ್ ಗೆಲೊ ಆನಿ ಕುಮ್ಸಾರ್ ಜಾಲೊ, ಜಿಣಿ ಬದ್ಲಿಲಾಗ್ಲೊ ಆನಿ ಕುಟ್ಮಾಸಾಂಗಾತಾ ಮೊಗಾನ್ ಜಿಯೆಲಾಗ್ಲೊ.
ತಾಚಿಂ ಪಾತ್ಕಾಂ ದೆವಾನ್ ಭೊಗ್ಸಿಲಿಂ, ತಾಚೆಥಂಯ್ ಬರೆಪಣ್ ಜಾಲೆಂ, ಕಿತೆಂಚ್ ಉಣೆಂ ದೆವಾನ್ ಕರುಂಕ್ ನಾ, ಆಮೊರೆಚಿ ಘಾಂಟ್ ಜಾತಾನಾ ತಾಂಗೆರ್ ಆಮೊರಿ ಸುರು ಜಾತೆಲಿ ತಾಚೊ ಪ್ರತಿಫಳ್ ತಾಕಾ ದೋನ್ ವಾಂಟ್ಯಾಂನಿ ಮೆಳ್ಳೊ. ಫೆಸ್ತಾ ಪರ್ಬೆ-ವೆಳಾರ್ ಮಾತ್ರ್ ಅಬುಟಾಮ್ ಕಾರ್ಮಿಣ್ಬಾಯ್ ಇಲ್ಲೆಂ ಚಾಕ್ತಾಲಿಂ.. ಹೆರ್ ವೆಳಾ ಕಿತೆಂಚ್ ನಾತ್ಲ್ಲೆಂ.
ಆದ್ಲ್ಯಾ ಕಥಾಂಕರ್ ಪಾನಾಕ್: 1, 2, 3
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
