ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ನತಾಲಾಂಚಿ ಶೆಳಿ
ವಲ್ಲಿ ವಗ್ಗ: ಕೊಂಕ್ಣೆಂತ್ ಉಂಚ್ಲ್ಯೊ ಮಟ್ವ್ಯೊ ಕಾಣ್ಯೊ ಬರಂವ್ಚಾಂತ್ಲೊ ಎಕ್ಲೊ ಜಾವ್ನಾಸಾ ವಲ್ಲಿ ವಗ್ಗ. ಹೊ ಕೊಂಕ್ಣಿ ಮಾತ್ರ್ ನ್ಹಂಯ್, ಕಾನಡಿ ಭಾಸೆಂತ್ಯ್ ಕಾಣ್ಯೊ ಬರಂವ್ಚಾಂತ್ ಫಾಮಾದ್ ಜಾಲಾ. ಕಾನಡಿ ಭಾಸೆಂತ್ ರಾಜ್ಯ್ ಮಟ್ಟಾರ್ ಪಯ್ಲೆಂ ಇನಾಮ್ ಜೊಡ್ಲೆಲ್ಯಾ ಕಾಣ್ಯೆಚೆಂ (ಹೆಗಲಿಗೆ ಶಿಲುಬೆ) ಕೊಂಕ್ಣೆಚೆಂ ಅನುವಾದ್ ಹಿ ಕಾಣಿ ವಾಚ್ತಾಂ ವಾಚ್ತಾಂ ಹ್ಯಾ ಕಾಣ್ಯೆಚಿ ತಶೆಂಚ್ ಕಾಣ್ಯೆಗಾರಾಚಿ ತಾಂಕ್ ತುಮ್ಕಾಂ ಸಮ್ಜೊಂಕ್ ಪುರೊ.
ವಲ್ಲಿ ವಗ್ಗಚ್ಯೊ ಹೆರ್ ಮಟ್ವ್ಯೊ ಕಾಣ್ಯೊ: ಖಾಂದಿ ಖುರಿಸ್, ಮೊಂತಿ ಫೆಸ್ತ್ ಆನಿ ಮಿರ್ನ್ಯಾಮ್
ವಲ್ಲಿ ವಗ್ಗ
ಕ್ರಿಸ್ತಾಂವಾಂಚ್ಯಾ ಘರಾಂನಿ ನತಲಾಂ ಫೆಸ್ತಾಚಿ ತಯಾರಾಯ್ಚ್ ತಯಾರಾಯ್!
ನವೆ ಮುಸ್ತಾಯ್ಕೆಚಿ ಖಂತ್, ಕುಸ್ವಾರ್ ಕಸಲೊ ಕರ್ಚೊ ಮ್ಹಳ್ಳೆಂ ಯೋಜನ್. ಗರ್ದನ್ಯಾ ಗೊಟ್ಯಾಚಿ ಮಾಂಡಾವಳ್ ಇತ್ಯಾದಿ........... ಪುಣ್ ಲಿನಾಕ್ ತ್ಯಾ ವಿಶಿಂ ಕಸಲಿಚ್ ಖಂತ್ ನಾ. ತೀನ್ ದಿಸಾಂ ಥಾವ್ನ್ ರಡೊನ್, ರಡೊನ್, ಪೊಟಾಕ್ ಕಸಲೆಂಚ್ ಕಾಣ್ಗೆನಾಸ್ತಾಂ, ಎಕಾ ಕೊನ್ಶಾಕ್ ತಿ ಬಸ್ಲ್ಯಾ. ತಿಚ್ಯಾ ಸಯ್ರ್ಯಾ-ಧಯ್ರ್ಯಾಂನಿ ಆನಿ ಸೆಜಾರ್ಚ್ಯಾ ಲೊಕಾನ್ ಖಂಯ್ಚೆ ರಿತಿನ್ ಸಮ್ಜಯ್ಲ್ಯಾರ್ಯಿ ತಿಕಾ ಸಮದಾನ್ ನಾ ಆನಿ ತಿಚಿ ಖಂತ್ ನಿವಾರುಂಕ್ ನಾ.
ನತಾಲಾಂಚೆಂ ಫೆಸ್ತ್ ಧಾಂವೊನ್ ಯೆತಾ. ತೆಚ್ಪರಿಂ, ತಿಚೊ ತೀನ್ ವರ್ಸಾಂಚೊ ಭುರ್ಗೊ ಡೆನಿ ಮಾಯಾಕ್ ಜಾವ್ನ್, ಚಾರ್ ದೀಸ್ ಉತ್ರೊನ್ ವೆತಾತ್ ಆನಿ ತಿಕಾ ಆನಿಕ್ಯಿ ಚಡ್ ಕಳ್ವಳ್ಯಾಂಕ್ ವಳಗ್ ಕರ್ತಾತ್.
ತಿಚೊ ಭರ್ತಾರ್ ಸ್ಟೇನಿ ರಾತ್ ದೀಸ್ ಮ್ಹಳ್ಳಿ ಪರ್ವಾ ಕರಿನಾಸ್ತಾಂ, ಪಿಶ್ಯಾಪರಿಂ ಭೊಂವ್ತಾ. ಆತ್ತಾಂ ಪೊಲಿಸ್ ಚವ್ಕೆಕ್ ಆತ್ತಾಂ ಚರ್ಚ್ಗೇಟ್ ಸ್ಟೇಶನಾಕ್. ಆನ್ಯೆಕೆ ಘಡಿಯೆ ವಿ. ಟಿ. ಸ್ಟೇಶನಾಕ್!
ತಾಚೆಥಂಯ್ ಆಪುಣ್ ಖಂಯ್ ವೆತಾಂ?’ಮ್ಹಳ್ಳಿ ಥಿರಾಸಣ್ ನಾ. ಖಂಯ್ ವಚಜೆ’ಮ್ಹಳ್ಳೆಂ ಗಿನ್ಯಾನ್ ನಾ.
ಪಾಯಾಂನಿ ವೊಡುನ್ ವೆಲ್ಲೆಕಡೆ ತೊ ವೆತಾ!
’ತಾಂಕಾಂ ಡೆನಿ ಎಕ್ಲೊಚ್ ಪೂತ್ ನ್ಹಯ್.’ ತಾಚಾಕ್ಯಿ ವ್ಹಡ್ ದೋಗ್ ಆಸಾತ್ ಆನಿ ಡೆನಿ ಪಾಟ್ಲ್ಯಾನ್ ಎಕ್ಲೆಂ ಧುವ್ ಆಸಾ.
ಪುಣ್ ಆತಾಂ ತಾಂಕಾಂ ದೊಗಾಂಯ್ಕಿ ಆಪ್ಲ್ಯಾ ದೊಗಾಂ ಪುತಾಂಚೊ ಉಡಾಸ್ ನಾ ಆನಿ ತೆ ಧುವೆಚೊಯಿ!
ತಾಂಕಾಂ ಉಡಾಸ್, ತಾಂಕಾಂ ಖಂತ್, ಪಕತ್ ಡೆನಿಚಿ!
‘ಪುತಾ ಡೆನಿ ಖಂಯ್ ತುಂ ಗೆಲೊಯ್? ಕೊಣೆ ತುಕಾ ಅಪಹರ್ಸಿಲೊ?’’ಬೆಸ್ಟ್’ ಬಸ್ಸಾಚೆ ಮಾಳ್ಯೆರ್ ಬಸೊನ್, ಅಂಧೇರಿ ಕುಶಿಂ ಪಯ್ಣ್ ಕರ್ತಾನಾ, ಬಾಂದ್ಪಾಂಕ್ ಪಳೆವ್ನ್ ಸ್ಟೇನಿರಡ್ತಾ. ’ಆಪುಣ್ ಬಸ್ಸಾರ್ ಬಸ್ಲಾಂ’ ಮ್ಹಳ್ಳೊ ಉಡಾಸ್ ತಾಕಾ ನಾ.
ತಾಚೆ ಮತಿಂತ್ ಆಸಾ ಫಕತ್ ಡೆನಿ.
ತಾಚಿ ಸಾಂಡುನ್ ಗೆಲ್ಲಿ ಶೆಳಿ ಡೆನಿ!
’ಹಾಂವ್ ರಾಂದ್ಪಾಚ್ಯಾ ಕಾಮಾರ್ ಮಗ್ನ್ ಜಾಲ್ಲಿಂ. ಚೆರ್ಕೊ ಭಾಯ್ರ್ ಉದ್ಕಾಚ್ಯಾ ನಳಾಲಾಗಿಂ ಖೆಳ್ತಾಲೊ’ ಲಿನಾ ರಡೊನ್ಂಚ್ ಸೆಜಾರ್ಯಾಂಕ್ ವಿವರಿತಾ. ’ಥೊಡ್ಯಾ ವೆಳಾನ್ ಹಾಂವ್ ತಾಕಾ ಸೊದ್ತಾಂ ತರ್, ತೊ ನಾ’.”
’ಮ್ಹಜೆಂ ಬಾಳ್ ಮ್ಹಾಕಾ ಪಾಟಿಂ ಮೆಳ್ತಾ ಪರ್ಯಾಂತ್ ಮ್ಹಾಕಾ ಖಾಣ್ ನಾಕಾ. ಜೆವಾಣ್ ನಾಕಾ’ ತಿ ಕೊಣಾಯ್ಚಿ ಬೂದ್ಬಾಳ್ ಆಯ್ಕೊಂಕ್ ತಯಾರ್ ನಾ.
’ಲಿನಾ ಮ್ಹಾಕಾ ಆಯ್ಕ್’ ಕೋಣ್ ತರ್ಯೀ ತಿಕಾ ಸಮ್ಜಾಂವ್ಕ್ ಪ್ರಯತ್ನ್ ಕರ್ತಾ. ’ತುಕಾ ಹೆರ್ ತೆಗಾಂ ಭುರ್ಗಿಂ ಆಸಾತ್. ತಾಂಚೆಖಾತಿರ್ ಪುಣಿ..........’
’ನಾ............ ನಾ............ ನಾ............ ಮ್ಹಜೊ ಡೆನಿ ಮ್ಹಾಕಾ ಪಾಟಿಂ ಮೆಳ್ತಾ ಪರ್ಯಾಂತ್ ಮ್ಹಾಕಾ ಜೇಂವ್ಕ್ ನಾಕಾ, ಖಾಂವ್ಕ್ ನಾಕಾ.’ ಜರ್ತರ್ ತೊ ಮ್ಹಾಕಾ ಪಾಟಿಂ ಮೆಳ್ಳೊ ನಾ ತರ್, ಹಾಂವ್ ರಡೊನ್ ರಡೊನ್ ತಾಚೆ ಖಾತಿರ್ ಮಾಡ್ತಿರ್ ಮೊರ್ತೆಲಿಂ!”
ತಸಲಿಂ ತಿಚಿಂ ಕಾಳಿಜ್ ಕಡಂವ್ಚಿಂ ಉತ್ರಾಂ ಆಯ್ಕತಾನಾ, ಕೊಣಾಕ್ ತರ್ಯಿ ತಿಕಾ ಸಮ್ಜಾಂವ್ಕ್ ಯಾ ಸಮಾಧಾನ್ ಕರುಂಕ್ ಸಾದ್ಯ್ ಜಾಯ್ನಾ.
ತಾಂಚ್ಯಾ ಸೆಜಾರ್ಚೊ ಸಗ್ಳೊ ಲೋಕ್ ತಾಂಚ್ಯಾ ತಾಂಚ್ಯಾ ದೆವಾಲಾಗಿಂ ಭುರ್ಗೊ ಡೆನಿ ಪಾಟಿಂ ಮೆಳ್ಚೆ ಖಾತಿರ್ ಮಾಗ್ಣೆಂ ಕರ್ತಾ ಆನಿ ಆಂಗವ್ಣ್ಯೊ ಘಾಲ್ತಾ.
ತಿ ಮಾತ್ ಹೆವ್ಶಿನ್ ತೆವ್ಶಿನ್ ವೆತಾ. ಆಶೆನ್ ಆನಿ ಭರ್ವಸ್ಯಾನ್ ಮುಕ್ಲೆ ವಾಟೆಕ್ ತಿಳ್ತಾ ಆನಿ ನಿರಾಶೆನ್ ಕೊನ್ಶಾಕ್ ಬಸೊನ್, ಹುಸ್ಕಾರೊನ್ ರಡ್ತಾ!
****************
ಸ್ಟೇನಿ, ಲಿನಾಕ್ ಆನಿ ತಾಂಚೆ ತಸಲ್ಯಾ ಲಾಖೊಂ ದುಖಿ ಆನಿ ದುಬ್ಳ್ಯಾ ಲೊಕಾಕ್ ನತಾಲಾಂ ಫೆಸ್ತಾಚಿ ಪರ್ವಾ ನಾತ್ಲ್ಲಿ. ತರ್ಯಿ, ದಶೆಂಬರ್ ಚೊವಿಸ್ ತಾರಿಕ್ ಉತ್ರೊನ್ ಪಂಚ್ವಿಸಾವಿ ಉದೆಂವ್ಚೆ ತೆ ಮಧ್ಯಾನೆ ರಾತಿಂ ಸಗ್ಳ್ಯಾ ಸಂಸಾರಾರ್ ನತಾಲಾಂ ಫೆಸ್ತಾಚೊ ಸಂತೊಸ್ ಫಾಂಕ್ಲ್ಲೊ.
ತ್ಯಾ ವೆಳಾ ಸ್ಟೇನಿ ಮಾಹಿಮ್ಚೆ ಸಾಂ ಮಿಂಗೆಲಿಚೆ ಇಗರ್ಜೆಂತ್ ಎಕಾ ಕೊನ್ಶಾಕ್ ಉಬೊ ಆಸಾ. ತಾಚೆ ವೋಂಟ್ ಹಾಲನಾಂತ್ ತರ್ಯಿ, ತಾಚೆಂ ಕಾಳಿಜ್ ಸೊಮಿಯಾಲಾಗಿಂ ಉಲಯ್ತಾ. ವಿಶ್ವಾಸಾನ್ ಆನಿ ಭರ್ವಾಸಾನ್ ಭರ್ಲೆಲೆಂ ತಾಚೆಂ ಮಾಗ್ಣೆಂ ಸೊಮಿಯಾಚೆ ಕಾಕುತಿಚೆಂ ದಾರ್ ಬಡಯ್ತಾ!
’ಮ್ಹಜ್ಯಾ ಡೆನಿಕ್ ಮ್ಹಕಾ ಪಾಟಿಂ ದಿ ಸೊಮಿಯಾ.’ ಆತಾಂಚ್ ಹೆಚ್ ಘಡಿಯೆ ಮ್ಹಜ್ಯಾ ದೊಳ್ಯಾಂಕ್ ತೊ ದಿಸೊಂದಿ!’
ಪರತ್ ಪರತ್ ತಿಂಚ್ ಉತ್ರಾಂ ತೆಂಚ್ ಮಾಗ್ಣೆಂ ತಾಚೆ ಮತಿಂತ್ ಉದೆತಾ ಆನಿ ತಾಚೆ ಥಂಯ್ ಧಯ್ರ್ ಭರ್ತಾ!
****************
ದುಸ್ರ್ಯಾ ದಿಸಾ ಸಕಾಳಿಂ ಭರ್ತಿ ಸಾತ್ ವೊರಾಂಚೆರ್ ಸ್ಟೇನಿನ್ ಜಿಯೆಂವ್ಚ್ಯೆ ವಸ್ತೆ ಸರ್ಸಿಂ ಏಕ್ ಟೆಕ್ಶಿ ಯೇವ್ನ್ ಉಬಿ ಜಾಲಿ. ತೆ ಟೆಕ್ಶೆ ಥಾವ್ನ್ ಸಿವಿಲ್ ಇಂಜಿನಿಯರ್ ಮೆತ್ಯು ತೀನ್ ವರ್ಸಾಂಚ್ಯಾ ಡೆನಿಕ್ ಘೆವ್ನ್ ದೆಂವ್ಲೊ.
ಟೆಕ್ಶೆಚೆಂ ಬಾಡೆಂ ತಾಣೆ ಫಾರಿಕ್ ಕರ್ಚೆ ಭಿತರ್, ಡೆನಿಕ್ ಪಳೆಲ್ಲೊ ಲೋಕ್ ತಾಂಚೆ ಭೊಂವ್ತಣಿ ಕುಡ್ಸಾಲ್ಲೊ.
’ಕೋಣ್ ತುಂ.............?’
’ಹೊ ಭುರ್ಗೊ ತುಕಾ ಖಂಯ್ ಮೆಳ್ಳೊ?’
ಮೆತ್ಯುಕ್ ಸಬಾರ್ ಸವಾಲಾಂ ಆಯ್ಕೊಂಕ್ ಮೆಳ್ಳಿಂ.
’ತುಮಿ ಮ್ಹಾಕಾ ಸವಾಲಾಂ ಉಪ್ರಾಂತ್ ವಿಚಾರಾ. ಆತಾಂ ಮ್ಹಾಕಾ ಹ್ಯಾ ನೆಣ್ತ್ಯಾ ಭುರ್ಗ್ಯಾಚ್ಯಾ ವ್ಹಡಿಲಾಂಚಿ ವಸ್ತಿ ದಾಕಯಾ.”
ಮೆತ್ಯುಚೊ ಧಡಂಗ್ ಜೀವ್ ಆನಿ ಆಕರ್ಶಿಕ್ ಗಂಭೀರ್ ತಾಳೊ ಆಯ್ಕೊನ್, ತಾಚ್ಯಾ ಸವಾಲಾಂಚಿ ತಾಂಕಾಂ ವಿಸರ್ ಪಡ್ಲಿ.
’ಅಳೆ ತಿಚ್ ತಾಂಚಿ ಕೊಟ್ರಿ’ ತಶೆಂ ದಾಕವ್ನ್, ಮೆತ್ಯು ಸಾಂಗಾತಾ ಥಂಯ್ಸರ್ ಜಮೊ ಜಾಲ್ಲೊ ತೊ ಲೋಕ್, ಸ್ಟೇನಿ ಲಿನಾಚ್ಯಾ ಬಿಡಾರಾಕುಶಿಂ ಚಮ್ಕಾಲೊ.
ಲಾಗ್ಸರ್ಚ್ ಆಸ್ಚೆ ತಾಂಚೆ ವಸ್ತೆ ಸರ್ಶಿಂ ಪಾಂವ್ಚೆ ಪುಡೆಂಚ್ ಸ್ಟೇನಿ, ಲಿನಾಕ್ ಡೆನಿ ಪಾಟಿಂ ಪರ್ತಾಲ್ಲಿ ವರ್ತ್ಯಾ ಸಂತೊಸಾಚಿ ಖಬರ್ ಮೆಳೊನ್ ಜಾಲ್ಲಿ. ತಿ ಖಬರ್ ತಾಂಣಿ ಪಾತ್ಯೆಂವ್ಚೆ ಆದಿಂಚ್, ಮೆತ್ಯು ಡೆನಿಕ್ ಘೆವ್ನ್ ತಾಂಚೆ ಮುಕಾರ್ ಉಬೊ ಜಾಲ್ಲೊ.
ಆಪ್ಲೆ ಆವಯ್ಕ್ ಪಳೆಲ್ಲೆ ತಕ್ಶಣ್ ಡೆನಿ ವ್ಹಡ್ಲ್ಯಾನ್ ರಡ್ಲೊ!
ಡೆನಿಚ್ಯಾ ರಡ್ಣ್ಯಾ ವರ್ವಿಂ ಲಿನಾಚೆಂ ಕಾಳಿಜ್ ಉಮಾಳ್ಳೆಂ. ಸಂತೊಸ್ ಆನಿ ದೂಖ್ ಎಕ್ಚ್ ಪಾವ್ಟಿಂ ಮಿಲನ್ ಜಾತಾನಾ, ಜೊಂಪಯ್ ಮಾರುನ್ ಮ್ಹಳ್ಳೆಪರಿಂ ಮೆತ್ಯುಲಾಗ್ಚೊ ಡೆನಿಕ್ ತಿಣೆ ವೊಡುನ್ ಘೆತ್ಲೊ. ಆನಿ ಆಪ್ಲ್ಯಾ ಹರ್ದ್ಯಾಕ್ ದಾಂಬುನ್ ಧರ್ಲೊ!
ಹೆಂ ಘಡಿತ್ ಪಳೆವ್ನ್ ಆಸ್ಲ್ಲ್ಯಾ ಸ್ಟೇನಿಚ್ಯಾ ದೊಳ್ಯಾಂನಿ ಸಂತೊಸಾಚಿಂ ದುಖಾಂ ಉಮಾಳ್ಳಿಂ.
ನತಾಲಾಂಚ್ಯಾ ಬಾಳೊಕ್ ಜೆಜುಕ್ ಅರ್ಗಾಂ ಪಾಟವ್ನ್, ಆಪ್ಲ್ಯಾ ದೊನ್ಯಿ ಹಾತಾಂ ಮದೆಂ ಆಪ್ಲೆಂ ತೋಂಡ್ ಲಿಪವ್ನ್ ತೊ ಗಳ್ಗಳ್ಯಾಂ ರಡ್ಲೊ!
****************
ಅಂಧೇರಿ ಲಾಗ್ಸರ್ ಆಸ್ಚೆ ಎಕೆ ವ್ಹಡ್ ಇಂಜಿನಿಯರಿಂಗ್ ಕಂಪೆನಿಂತ್ ಮೆತ್ಯು ಸಿವಿಲ್ ಇಂಜಿನಿಯರ್ ಜಾವ್ನಾಸ್ಲ್ಲೊ. ತಾಚೆ ಕಂಪೆನಿನ್ ಆಪ್ಲ್ಯಾ ಕಾಮ್ಗಾರಾಂ ಖಾತಿರ್ ಕ್ಯಾಂಟಿನ್, ಲಾಯ್ಬ್ರೆರಿ ಆನಿ ಲೊಕರಾಂ ಆಟಾಪುನ್ ಆಸ್ಚೆಂ ಏಕ್ ಮಜ್ಬೂತ್ ಬಾಂದಪ್ ಉಬಾರೊಂಕ್ ಎಕೆ ಖಾಸ್ಗಿ ಕಂಪೆನಿಲಾಗಿಂ ಸೊಲ್ಲೊ ಕೆಲ್ಲೊ. ಸೊಲ್ಲ್ಯಾಚ್ಯಾ ಶರ್ತಾಂ ಪರ್ಮಾಣೆ, ಎಕಾ ವರ್ಸಾಭಿತರ್ ತೆಂ ಬಾಂದಪ್ ಉಬೆಂ ಜಾಯ್ಜಾಯ್ ಆಸ್ಲ್ಲೆಂ ತರ್ಯಿ, ದೇಡ್ ವರ್ಸಾ ಉಪ್ರಾಂತ್ಯಿ ಬಾಂದ್ಪಾಚ್ಯಾ ತೀನ್ ಮಾಳಿಯಾಂ ಪಯ್ಕಿ ಏಕ್ ಮಾಳಯ್ಯಿ ಉಬಾರುಂಕ್ ತೆ ಸಕೊಂಕ್ ನಾತಲ್ಲೆ.
ನಾನಾಂತೆ ಕಶ್ಟ್-ಸಂಕಶ್ಟ್ ತಾಂಚೆರ್ ಯೆತಾಲೆ. ಕೆಲ್ಲೆಂ, ಕೆಲ್ಲೆಂ ಕಾಮ್ ವಿಚಿತ್ರ್ ರಿತಿನ್ ಮ್ಹಳ್ಳೆಪರಿ ವ್ಯರ್ತ್ ಜಾತಾಲೆಂ. ತೆಂ ಕಾಮ್ ವಯ್ಸುನ್ ಘೆತ್ಲಲೆ ಕಂಪೆನಿಕ್ ಹೊ ಏಕ್ ವ್ಹಡ್ ಮಿಸ್ತೆರ್ಚ್ ಜಾಲೊ ಜಾಲ್ಲ್ಯಾನ್, ತಾಂಚೆಂ ಮನ್ ಆಕ್ರೇಕ್ ಫಿತಿಸ್ಪಣಾ ಕುಶಿನ್ ಘುಂವ್ಲೆಂ.
ತ್ಯಾ ಖಾತಿರ್, ಎಕಾ ನಾವಾಡ್ದಿಕ್ ಬಂಗಾಲಿ ಮಂತ್ರವಾದಿಚಿ ತಾಂಣಿ ಕುಮಕ್ ವಿಚಾರ್ಲಿ. ತಾಣೆ ಮಂತ್ರಾಂ, ತಂತ್ರಾಂ ಉಚಾರ್ನ್, ಪುಜಾ-ಪುರಸ್ಕಾರ್ ಕರುನ್, ’ತೆಂ ಬಾಂದಪ್ ಉಬಾರ್ಲ್ಲ್ಯಾ ಜಾಗ್ಯಾರ್ ಪಯ್ಲೆಂ ಎಕ್ಲಿ ದೇವಿ ಬಿಡಾರ್ ಕರುನ್ ಆಸ್ಲ್ಲಿ. ತಿಕಾ ಸಮಾದಾನ್ ಕರಿಜೆ ತರ್, ಉಣ್ಯಾರ್ ಸಾತ್ ವರ್ಸಾಂ ಭಿತರ್ಲ್ಯಾ ಚೆರ್ಕ್ಯಾ ಭುರ್ಗ್ಯಾಚಿ ಬಲಿ ದೀಜೆ. ನಾ ತರ್ ತೆಂ ಬಾಂದಪ್ ಬಾಂದುನ್ ಸಂಪಂವ್ಕ್ ಬಿಲ್ಕುಲ್ ಸಾದ್ಯ್ ನಾ.’ ಮ್ಹಳ್ಳೆಂ ತೀರ್ಪ್ ದಿಲೆಂ.
****************
’ಮ್ಹಜ್ಯಾ ಕಾರ್ ಚಾಲಕಾನ್ ಕಾಲ್ ಸಕಾಳಿಂ ಹಿ ಫಿತಿಸ್ಪಣಾಚಿ ಹಿ ಖಬರ್ ಮ್ಹಜ್ಯಾ ಕಾನಾಂತ್ ಘಾಲಿ.’ ಮೆತ್ಯೂ ಮ್ಹಣಾಲೊ, “ಆಮ್ಚ್ಯಾ ನವ್ಯಾ ಬಿಲ್ಡಿಂಗಾಕ್ ಬಲಿ ದಿಂವ್ಚೆ ಖಾತಿರ್ ಮಾಹಿಮ್ ವಠಾರಾಂತ್ಲ್ಯಾ ಎಕಾ ಲ್ಹಾನ್ ಭುರ್ಗ್ಯಾಕ್ ಉಸ್ಳಾವ್ನ್ ಹಾಡ್ಲಾ ಖಂಯ್ ಸರ್. ಮ್ಹಜ್ಯಾ ಡ್ರೈವರಾ ಥಾವ್ನ್ ಹೊ ವಿಶಯ್ ಮ್ಹಾಕಾ ಕಳಿತ್ ಜಾಲ್ಲ್ಯಾನ್, ತುಮ್ಚ್ಯಾ ಹ್ಯಾ ಬಾಳಾಕ್ ಹಾಂವ್ ವಾಂಚಂವ್ಕ್ ಸಕ್ಲೊಂ.”
’ರಾವಯ್ ಕರ್ಮಿ ಮನ್ಶಾ. ತುಜಿ ಅನ್ನಡ್ಪಣಾಚಿ ಕಥಾ ತಿತ್ಲ್ಯಾರ್ಚ್ ರಾವಯ್.’ ಲಿನಾ ರಾಗಾನ್ ಕಾಂಪ್ತಾಲಿ. ’ಮ್ಹಜ್ಯಾ ಹ್ಯಾ ನೆಣ್ತ್ಯಾ ಬಾಳಾಕ್ ದೇವಿಕ್ ರಗ್ತಾಚಿ ಬಲಿ ದೀಂವ್ಕ್ ತುಮಿ ಉಕ್ಲುನ್ ವ್ಹೆಲೊ. ತುಮ್ಚೆಂ ಬಾಂದಪ್ ಉಬಾರುಂಕ್ ನಿರಾಪ್ರಾಧಿ ಶೆಳಿ ಜಾವ್ನ್ ಕಾತ್ರುಂಕ್ ಮ್ಹಜ್ಯಾ ಡೆನಿ ಶಿವಾಯ್, ತುಮ್ಚಿಂ ಭುರ್ಗಿಂ ತುಮ್ಕಾಂ ಹಾತಾಕ್ ಮೆಳ್ಳಿಂನಾಂತ್!’
ತಿಚ್ಯಾ ದೊಳ್ಯಾಂನಿ ಜಗ್ಲಾಣ್ಯಾಚಿಂ ಕಿಟಾಳಾಂ ಉಸಾಳ್ಚಿಂ ಮೆತ್ಯುನ್ ದೆಕ್ಲಿಂ. ತಿ ಆತಾಂ ಆಪ್ಣಾಚ್ಯಾ ಆಂಗಾರ್ ಪಡೊನ್ ಆಪ್ಣಾಕ್ ಫಾಪ್ಸುನ್ ಉಡಯ್ತಾ ಮ್ಹಳ್ಳೆಪರಿ ಭೆಂ ತಾಕಾ ದಿಸ್ಲೆಂ.
ಲಿನಾನ್ ಚಿಂತ್ಚೆಪರಿ ಮೆತ್ಯು ಕರ್ಮಿ ಆನಿ ಅನ್ನಾಡಿ ನ್ಹಯ್ ಆಸ್ಲ್ಲೊ. ಆಪ್ಲ್ಯಾ ಕಾರ್ ಚಾಲಕಾನ್ ತಿ ಖಬರ್ ಸಾಂಗ್ಲ್ಲೆ ತಕ್ಶಣ್, ತಾಣೆ ಆಪ್ಲೆ ಕಂಪೆನಿಚೆಂ ಕಾರ್ ತ್ಯಾ ಕೊಂಟ್ರೆಕ್ಟರಾಚ್ಯಾ ಫ್ಲೆಟಾಕ್ ವ್ಹರೊಂಕ್ ಫರ್ಮಾಯಿಲ್ಲೆಂ.
ಥಂಯ್ಸರ್ ಪಾವ್ಲ್ಲ್ಯಾ ಉಪ್ರಾಂತ್, ಭುರ್ಗ್ಯಾ ಡೆನಿಕ್ ತಾಂಚ್ಯಾ ಘಾಸಾಥಾವ್ನ್ ಆನಿ ಮರ್ಣಾಚ್ಯಾ ತೊಂಡಾಥಾವ್ನ್ ಸುಟವ್ನ್ ಹಾಡುಂಕ್ ತೊ ಮಸ್ತ್ ಕಶ್ಟಾಲೊ. ಪೊಲಿಸಾಂಚೆಂ ಆನಿ ನಿತಿಚೆಂ ಭೆಶ್ಟಾವ್ಣೆಂ ದೀವ್ನ್, ಆಕ್ರೇಕ್ ’ತ್ಯಾ ಭುರ್ಗ್ಯಾಂಚ್ಯಾ ವ್ಹಡಿಲಾಂಥಾವ್ನ್ ಕಸಲೆಂಯಿ ದೂರ್ ಪೊಲಿಸಾಂಕ್ ವಚನಾಶೆಂ ಆಪುಣ್ ಪಳೆವ್ನ್ ಘೆತಾಂ ಮ್ಹಳ್ಳಿ ಭಾಸವ್ಣಿ ದೀವ್ನ್’ ಡೆನಿಕ್ ತಾಂಚ್ಯಾ ರಗ್ತಾಳ್ಯಾ ಹಾತಾಂ ಥಾವ್ನ್ ಆಪ್ಲ್ಯಾ ಹಾತಾಂನಿ ತಾಣೆ ಘೆತ್ಲೊ.
ತ್ಯಾ ವೆಳಾ ಮೆಥ್ಯುಚ್ಯಾ ಕಾಳ್ಜಾಂತ್ ಏಕ್ ವಿಚಿತ್ರ್ ಸಂತೊಸ್ ಉಮಾಳೊನ್, ತಾಚ್ಯಾ ದೊಳ್ಯಾಂನಿ ದುಖಾಂ ಭರ್ಲಿಂ. ಎಕಾ ನೆಣ್ತ್ಯಾ ಭುರ್ಗ್ಯಾಚೊ ಜೀವ್ ವಾಂಚಯ್ಲೆಲಿ ಆನಿ ತ್ಯಾ ಭುರ್ಗ್ಯಾಕ್ ತಾಚ್ಯಾ ವ್ಹಡಿಲಾಂಕ್ ವ್ಹರ್ನ್ ದಿಂವ್ಚಿ ತಿ ತೃಪ್ತಿ ತಾಕಾ ವರ್ತಿ ಧಾದೊಸ್ಕಾಯ್ ದೀಂವ್ಕ್ ಸಕ್ಲಿ.
****************
ಲಿನಾಚೊ ರಾಗ್ ಆಪ್ಣಾಚೆರ್ ಘುಂವ್ಲ್ಲೊ ಪಳೆವ್ನ್ ಮೆಥ್ಯು ಭಿಯೆಲ್ಲೊ ಆನಿ ತಿ ಆಪ್ಣಾಚ್ಯಾ ಆಂಗಾರ್ ಪಡೊನ್ ಫಾಪ್ಸುನ್ ಉಡಯ್ತಾ ಮ್ಹಳ್ಳೆಪರಿಂ ತಾಕಾ ಭೊಗ್ಲ್ಲೆಂ ತರ್ಯಿ, ತಶೆಂ ಕಾಂಯ್ ವಾಯ್ಟ್ ಘಡ್ಲೆಂ ನಾ.
ಡೆನಿಕ್ ಬಲಿ ದಿಂವ್ಚೆ ಖಾತಿರ್ ವೆಲ್ಲೊ ಚಿಂತುನ್ ಆಪ್ಲ್ಯಾ ಬಾಳಾಕ್ ಎಕೆ ನಿರ್ಬಾಗಿ ಶೆಳಿಯೆಪರಿಂ ಕಾತರ್ಚೆಂ ದೃಶ್ಯ್ ನಿಯಾಳ್ನ್ ತಿಚೆಂ ಕಾಳಿಜ್ ಎಕೆ ಭಾಲಿಯೆಚೆ ತೊಪ್ಣೆನ್ ಶಿಂದೊನ್ ಗೆಲೆ. ಆಪ್ಲ್ಯಾ ನೆಣ್ತ್ಯಾ ಬಾಳಾಕ್ ಹರ್ದ್ಯಾಕ್ ದಾಂಬುನ್ ಧರುನ್ ತಾಚ್ಯಾ ಮಾತ್ಯಾಚ್ಯಾ ಕೋಮಲ್ ಕೆಸಾಂ ಮದೆಂ ಆಪ್ಲೆಂ ವೋಂಟ್ ಲಿಪವ್ನ್ ಉಮ್ಯಾಂಚೊ ಶಿಂವೊರ್ ತಿಣೆ ವೊತ್ಲೊ. ಉಪ್ರಾಂತ್ ತ್ಯಾಚ್ ಭೊಗ್ಣಾಂನಿ ಫುಮಾರೊನ್ ಗಳ್ಗಳ್ಯಾಂ ತಿ ರಡ್ಲಿ.
ಪಯ್ಲೆಂಚ್ ಮಾನಸಿಕ್ ಧಮ್ಕೆಕ್ ಒಳಗ್ ಜಾಲ್ಲೊ ಆನಿ ಆತಾಂ ಡೆನಿ ಪಾಟಿಂ ಮೆಳ್ತಚ್, ಸಂತೊಸಾಚಿಂ ದುಖಾಂ ಗಳವ್ನ್ ಕೊನ್ಶಾಕ್ ಉಬೊ ಆಸ್ಲ್ಲೊ ಸ್ಟೇನಿ, ಲಿನಾ ಸರ್ಶಿಂ ಗೆಲೊ.
’ಲೀನಾ’ ಮ್ಹಣಾಲೊ ತೊ ಮೋವ್ ತಾಳ್ಯಾನ್. ’ಆಮ್ಚ್ಯಾ ಬಾಳಾಕ್ ಪಾಟಿಂ ಹಾಡುನ್ ದಿಲ್ಲ್ಯಾ ಮೆತ್ಯುಚೆರ್ ವಾಯ್ಟ್ ಚಿಂತಿನಾಕಾ. ಆಮ್ಚ್ಯಾ ಮಾಗ್ಣ್ಯಾಚೊ ಫಳ್ ಆಮ್ಕಾಂ ಮೆಳ್ಳಾ.’ ಆಮ್ಚೆರ್ ಆಯಿಲ್ಲೆಂ ಕಾಳೆಂ ಮೋಡ್ ಪಯ್ಸ್ ಕರುನ್ ನತಾಲಾಂಚೊ ಸಂತೊಸ್ ಆಮ್ಕಾಂ ದೀಂವ್ಕ್ ಸೊಮಿಯಾನ್ ಆಪ್ಲೆಂ ಹಾತೆರ್ ಜಾವ್ನ್ ಮೆತ್ಯುಕ್ ವಿಂಚ್ಲಾ!”
ತಾಣೆ ಮೆತ್ಯು ಥಂಯ್ ಆಪ್ಲೆಂ ಉಪ್ಕಾರಿ ಮನ್ ಪಾಟಿಂ ದಾಕಂವ್ಕ್, ಉತ್ರಾಂ ಮೆಳನಾಸ್ತಾಂ ಡೆನಿಕ್ಚ್ ಉಕ್ಲುನ್ ತಾಚ್ಯಾ ಹಾತಾಂತ್ ದಿಲೊ.
ಡೆನಿಕ್ ಆಪ್ಲ್ಯಾ ಹಾತಾಂನಿ ಘೆತಾನಾ, ಮೆತ್ಯುಚೆಂ ಕಾಳಿಜ್ ವಿಚಿತ್ರ್ ಉದ್ವೇಗಾಂನಿ ಫುಮಾರ್ ಜಾಲೆಂ ತಾಣೆ ಡೆನಿಚ್ಯಾ ನೆಣ್ತ್ಯಾ ಆನಿ ಕೋಮಲ್ ಮುಖಾಮಾಳಾಚೆರ್ ಉಮ್ಯಾಂಚೊ ಶಿಂವೊರ್ ಒತ್ಲೊ.!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
