ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಸಯ್ರೆಂ
ಮೆಲ್ವಿನ್ ಜೆ. ವಾಸ್: ಪಂದ್ರಾ ವರ್ಸಾಂ ಥಾವ್ನ್ ತವಳ್ ತವಳ್ ಅಪ್ಲ್ಯಾ ಮಟ್ವ್ಯಾ ಕಾಣ್ಯಾಂನಿ ಕೊಂಕ್ಣೆಂತ್ ವಳ್ಕೆಚೊ ಜಾಲ್ಲೊ ಮೆಲ್ವಿನ್ ವಾಸ್, ಆಯ್ಲೆವಾರ್ ಸರಾಗ್ ರಿತಿಚಿ ಸಾಹಿತಿಕ್ ಕೃಷಿ ಕರುನ್ ಆಸಾ. ಕವಿತಾ, ವಿಮರ್ಸೊ, ಲೇಖನಾಂ, ಸಮೀಕ್ಶಾ, ಕಾಣ್ಯೊ, ಕಾದಂಬರಿ, ನಾಟ್ಕುಳೊ ಬರಂವ್ಕ್ ಸಕ್ಚೊ ಹೊ ಸಾಮಾಜಿಕ್ ಹುಸ್ಕೊ ಆಸೊನ್ ಸಾಹಿತ್ಯ್ ರಸ್ಚಾಂತ್ಲೊ ಎಕ್ಲೊ. ಗಂಭೀರ್ ವಿಚಾರ್, ಗೂಂಡ್ ಚಿಂತಾಪ್ ಆಪ್ಲ್ಯಾ ಕಾಣ್ಯಾಂನಿ ವ್ಹಾಳಂವ್ಕ್ ಸಕ್ಚಾಕ್ ತಾಚ್ಯೊ ಕಾಣ್ಯೊ ಗೊವಾಯ್ ದಿತಾತ್.
[ಕಥಾಝರ್ಚೆರ್ ಪರ್ಗಟ್ ಜಾಲ್ಲಿ ಹಾಚಿ ’ವಿಶೆವಾಚಿ ರಾತ್’, ಮೊನೆಂ ಝುಜ್, ಪರಿಧಿ ಮಟ್ವಿ ಕಾಣಿ]
ಮೆಲ್ವಿನ್ ಜೆ. ವಾಸ್
ಬಂಗಾರು ಕಾಟ್ಯಾಚಾ ರಸ್ತ್ಯಾನ್ ಪಾಶಾರ್ ಜಾಂವ್ಚೆಂ ಬಸ್ಸ್ ಬಂಗಾರು ಕಾಟ್ಯಾರ್ ಥಾಂಬಾತ್ ತರ್, ಕಾಟ್ಯಾ ಬಗ್ಲೆಚ್ಯಾ ಬಸ್ ಸ್ಟ್ಯಾಂಡಾಚಾ ಒತ್ತಾಕ್ ಆಸ್ಚ್ಯಾ ಸೊಜಾಮಾಚ್ಯಾ ಲೈನಾಂತ್ಲ್ಯಾ ದುಖಾನಾಂ ಪಯ್ಕಿ, ದಿನಸಿ ದುಖಾನಾಚಾ ಪೆಲಿಸಾಮಾಚಿ, ಹೊಟೆಲಾಚಾ ರಾಮಣ್ಣಚಿ, ಕೆಲ್ಶಿ ವೆಂಕಪ್ಪಚಿ, ವೈನ್ ಶೊಪಾಚಾ ಸೇಸಣ್ಣಚಿ ನದರ್ ಥಾಂಬ್ಲೆಲ್ಯಾ ಬಸ್ಸಾರ್ ಧಾಂವೊನ್, ಬಸ್ಸ್ ಫುಡೆಂ ಗೆಲ್ಯಾ ಉಪ್ರಾಂತ್ ತ್ಯಾ ಬಸ್ಸಾರ್ ಥಾವ್ನ್ ದೆಂವ್ಲೆಲ್ಯಾ ಪಯ್ಣಾರಿಂಚಾ ವಯ್ರ್ ಧಾಂವ್ತಾ.
ವೊರಾಂ ಧನ್ಫರಾಂಚಿಂ ಬಾರಾ ಜಾವ್ನ್ ಪಾಂಚ್ ಮಿನಿಟಾಂಕ್ ಬಂಗಾರು ಕಾಟ್ಯಾ ಲಾಗಿಂ ಪಾಂವ್ಚೆಂ ಬಸ್ಸ್ ಆಜ್ ವಗ್ತಾರ್ ಆಯಿಲ್ಲೆಂ. ಭರ್ಲ್ಲ್ಯಾ ಬಸ್ಸಾರ್ ಥಾವ್ನ್ ಪಯ್ಣಾರಿ ದೆಂವ್ತಾಲೆ. ಲೈನಾಂತ್ಲ್ಯಾ ದುಖಾನಾಚ್ಯಾಂಕ್ ಸರ್ವಾಂಕೀ ಆಜ್ ಆತುರಾಯ್. ಗಾಂವಾಂತ್ ಆಜ್ ತೀನ್ ಬರಿಂ ಕಾರ್ಯಿಂ. ಕಾಂಕ್ನಾಡಿ ಆಸ್ಪತ್ರೆಂತ್ ನರ್ಸ್ ಜಾವ್ನ್ ವಾವ್ರ್ ಕರ್ಚ್ಯಾ ದುಜಾಮಾಚಾ ಧುವೆಕ್ ಆಜ್ ಕರಾರ್ ತರ್, ದುಬಾಯಿ ಥಾವ್ನ್ ರಜೆರ್ ಗಾಂವಾಕ್ ಆಯಿಲ್ಲ್ಯಾ ಪೆರ್ನಾಂದಾಮಾಚಾ ದುಸ್ರ್ಯಾ ಪುತಾಚೊ ಆಜ್ಚ್ ರೋಸ್. ತ್ಯಾ ಭಾಯ್ರ್ ಸೊಜಾಮಾಚ್ಯಾ ಲೈನಾಂತ್ಲ್ಯಾ ಬಿಡಿಯಾಂ ಬ್ರೆಂಚಾಚಾ ಖಾದ್ರಿ ಬ್ಯಾರಿಚಾ ಸಾತ್ವ್ಯಾ ಪುತಾಕ್ ಆಜ್ ಮುಂಜಿ. ಗಾಂವಾಂತ್ಲ್ಯಾ ಹ್ಯಾ ಬರ್ಯಾ ಕಾರ್ಯಾಂಕ್ ಯೆಂವ್ಚಾ ಸಯ್ರ್ಯಾಂಕ್ ಪಳಂವ್ಚೆಂ ಲೈನಾಂತ್ಲ್ಯಾಂಕ್ ಆಜ್ ನವೆಂಸಾಂವ್. ವೊರಾಂ ಇಕ್ರಾ ಜಾವ್ನ್ ಪಂದ್ರಾ ಮಿನಿಟಾಂಚೆಂ ಬಸ್ಸ್ ಪಾಶಾರ್ ಜಾಲ್ಯಾ ಉಪ್ರಾಂತ್ ಹೆಂಚ್ ಬಸ್ಸ್. ತಶೆಂ ಬಸ್ಸಾರ್ ಸಯ್ರಿಂಯ್ ಧಾರಾಳ್.
ಸದಾಂ ಫಾಂತ್ಯಾಚಾ ಪಯ್ಲ್ಯಾ ಬಸ್ಸಾರ್ ರಾಂದ್ವಯೆಚೆಂ ವೊಜೆಂ ಘೆವ್ನ್ ಕೊಡ್ಯಾಳ್ ಪೆಂಟೆಕ್ ವೆಚ್ಯಾ ತೆರೆಜ್ ಬಾಯೆನ್ ಪೆಂಟೆ ಥಾವ್ನ್ ಪಾಟಿಂ ಯೆಂವ್ಚೆಂ ಹ್ಯಾಚ್ ಬಸ್ಸಾರ್! ತಿಕಾ ಸದಾಂಚೊ ಸಾಂಗಾತ್ ದಿಂವ್ಚೊ ಕೆಂಪುಗುಡ್ಯಾಚಾ ವ್ಯಾರ್ಕಾರ್ನ್ ದುಲ್ಸಿನ್ ಬಾಯೆನ್. ದೊಗಾಂಯ್ನಿ ಆಪ್ಲೊ ವ್ಯಾರ್ ವಿಕುನ್ ಸುಶೆಗಾತ್ ಹ್ಯಾ ಧನ್ಫರಾಂಚಾ ಬಸ್ಸಾರ್ ಪಾಟಿಂ ಯೆಂವ್ಚೆಂ. ಪುಣ್, ಆಜ್ ತೆರೆಜ್ ಬಾಯೆಕ್ ಹ್ಯಾ ಸದಾಂಚಾ ಬಸ್ಸಾರ್ ಸುಶೆಗ್ ಲಾಭೊಂಕ್ ನಾ.
ವೆನ್ ಲಾಕ್ ಆಸ್ಪತ್ರೆಲಾಗಿಂ ತಿಣೆಂ ಬಸ್ಸ್ ಧರ್ತಾನಾಂಚ್ ಬಸ್ಸ್ ಭರ್ಲ್ಲೆಂ. ಕಷ್ಟಾಂನಿ ಮ್ಹಳ್ಳ್ಯಾಬರಿ ತಿಕಾ ಡ್ರೈವರಾಚಾ ದಾವ್ಯಾ ಕುಶಿಚ್ಯಾ ಲಾಂಬ್ ಬಸ್ಕೆಚೆರ್ ಬಸ್ಕಾ ಲಾಭ್ಲ್ಲಿ. ತಿಯ್ ಬಸ್ಕಾ ತ್ಯಾ ದಯಾಳ್ ಕಾಳ್ಜಾಚ್ಯಾ ತರ್ನಾಟ್ಯಾ ಚಲಿಯೆನ್ ಕರುನ್ ದಿಲ್ಲ್ಯಾನ್! ನಾ ಜಾಲ್ಯಾರ್ ಆಯ್ಚಿಂ ಚೆಡ್ವಾಂ....? ತೆರೆಜ್ ಬಾಯ್ ಆಯ್ಚ್ಯಾ ಪ್ಯಾಶೆನಾಂಚಾ ಚೆಡ್ವಾಂಕ್ ಬರೆಂ ಕರುನ್ ಜಾಣಾಂ. ಪುಣ್ ಹಿ ಚಲಿ.....? ಆಯ್ಚ್ಯಾ ದಿಸಾ ಹ್ಯಾ ಚಲಿಯೆನ್ ಹಿ ದುಸ್ರ್ಯಾ ಪಾವ್ಟಿಂ ದಯಾಳಾಯೆಚಿ ಕರ್ನಿ ತೆರೆಜ್ ಬಾಯೆ ಥಂಯ್ ಕರುನ್ ದಾಕಯಿಲ್ಲಿ.
ವ್ಯಾರ್ ವಿಕುನ್ ಜಾವ್ನ್ ಬಸ್ಸ್ ಧರ್ಚಾ ಪಯ್ಲೆಂ ನಿಸ್ತ್ಯಾಕ್ ಥೊಡಿ ಮಾಸ್ಳಿ ಘೆಂವ್ಚ್ಯಾ ಖಾತಿರ್ ರಾಂದ್ವಯೆಚಾ ಮಾರ್ಕೆಟಿಚಾ ದಾವ್ಯಾ ಕುಶಿಚಿಂ ಮೆಟಾಂ ವೆವೆಗ್ಗಿಂ ಚಡ್ಚ್ಯಾ ತೆರೆಜ್ ಬಾಯೆಕ್ ಅಚಾನಕ್ ತಕ್ಲಿ ಘುಂವೊಳ್ ಆಯಿಲ್ಲ್ಯಾಬರಿ ಜಾವ್ನ್ ದೊಳ್ಯಾಂ ಮುಕಾರ್ ಕಾಳೊಕ್ ಜಸೊ ಮಾಂಡ್ತಾನಾ ಥಂಯ್ಚ್ ಮೆಟಾಂ ದೆಗೆಚಾ ಪೆಂಟಾಳೆಕ್ ಧರುನ್ ಥೊಡೊ ವೇಳ್ ರಾವ್ಲ್ಲ್ಯಾ ತಿಕಾ ವ್ಹಳೂ ಸಗ್ಳೆಂ ಸಾರ್ಕೆಂ ಜಾಲ್ಲ್ಯಾಬರಿ ಜಾಲೆಂ.
"ಹಾಂಗಾ ವಾಟೆರ್ ಕಾಂಯ್ ಕಿಸ್ ಜಾಂವ್ಚ್ಯಾ ಪಯ್ಲೆಂ ಏಕ್ ಪಾವ್ಟಿಂ ಘರಾ ವಚೊನ್ ಪಾವ್ಲ್ಯಾರ್ ಪುರೊ ದೆವಾ!" ಕಾಲ್ಚ್ಯಾ ಸಾಂಜೆರ್ ಥಾವ್ನ್ ತೆರೆಜ್ ಬಾಯೆಕ್ ತಿಚ್ಯಾ ಭಲಾಯ್ಕೆರ್ ದುಬಾವ್ ಉದೆಲ್ಲೊ.
"ವಾಟೆರ್ ಪಡೊನ್ ಮೊರ್ಚ್ಯಾ ಪ್ರಾಸ್ ಘೊವಾಚ್ಯಾ ಘರಾ ಮೆಲ್ಲೆಂಚ್ ಬರೆಂ!" ತಿಕಾ ತಿಚ್ಯಾ ಸಂಸಾರ್ ಸಾಂಡುನ್ ಗೆಲ್ಲ್ಯಾ ಘೊವಾಚೊ ಉಡಾಸ್ ಯೇವ್ನ್, ಬಸ್ಸ್ ಯೆಂವ್ಚೊ ವೇಳ್ ಲಾಗಿಂ ಜಾತಾ ತೆಂ ಚಿಂತುನ್ ತಿಣೆಂ ಮುಕಾರ್ ಮೆಟಾಂ ಕಾಡ್ಲಿಂ.
ಮಾರ್ಕೆಟಿಚಿಂ ಮೆಟಾಂ ಚಡೊನ್ ಹೆವ್ಶಿಂ ತೆವ್ಶಿಂ ಬಸೊನ್ ಆಸ್ಲ್ಲ್ಯಾ ಫುಲ್ಕಾರ್ನ್ಯಾಂ ಮಧ್ಲ್ಯಾನ್ ಪಾಶಾರ್ ಜಾವ್ನ್ ಮಾರ್ಕೆಟಿಚ್ಯಾ ದಾರ್ವಾಟ್ಯಾರ್ ಉಭಿಂ ಆಸ್ಲ್ಲ್ಯಾ ರೇಯ್ಲಿಂಗಾ ಲಾಗಿಂ ತಿ ಪಾವ್ಲ್ಯಾ ಮಾತ್ರ್! ತಿತ್ಲ್ಯಾರ್....
ಎಕಾಚ್ಚ್ಫರಾ ತಿಚ್ಯಾ ಕಾಳ್ಜಾಕ್ ಕೊಣೆಂಗೀ ಧರುನ್ ವೊಡ್ಲೆಲ್ಯಾಬರಿ ಜಾವ್ನ್ ತಿಚ್ಯಾ ಹರ್ಧ್ಯಾಂತ್ ’ಕಸ್ಕ್’ ಜಾಲೆಂ. ತಾಚ್ಯಾ ಪಾಟ್ಲ್ಯಾನ್ ಹರ್ಧ್ಯಾ ಭಿತರ್ ಹಳ್ಟಾಚಿ ದೂಕ್ ಮಿರ್ಮಿರ್ಲ್ಲ್ಯಾಬರಿ ಜಾವ್ನ್ ಆಪ್ಣಾಕ್ ಕಿತೆಂ ಜಾತಾ ತೆಂ ಕಾಂಯ್ಚ್ ಕಳಾನಾಸ್ತಾನಾ ತಿ ವ್ಹಳೂ ಧರ್ಣಿಕ್ ಗಳ್ಚ್ಯಾ ವಗ್ತಾರ್ ಅಚಾನಕ್ ತಿಚ್ಯಾ ಲಾಗ್ಸಾರ್ ಗಯ್ರೆಂ ಗಯ್ರೆಂ ದಿಸ್ಲ್ಲ್ಯಾ ಎಕಾ ಚಲಿಯೆನ್ ತಿಚ್ಯಾ ಬಾವ್ಳ್ಯಾಕ್ ಧರುನ್ ತಿಕಾ ಆಧಾರ್ ದಿಲ್ಲ್ಯಾಬರಿ ಜಾಲ್ಲೊ ಮಾತ್ರ್ ತಿ ಜಾಣಾಂ.
ತೆರೆಜ್ ಬಾಯ್ ಸ್ಥಿಮಿತಾಕ್ ಯೆತಾನಾ ತಿಚ್ಯಾ ಭೊಂವಾರಿ ಫುಲ್ಕಾರ್ನಿಂ ಬಾಯ್ಲಾಂ ಜಮೊ ಜಾಲ್ಲಿಂ. ತಾಂಚಾ ಮಧೆಂ ಥೊಡ್ಯಾಚ್ ವೆಳಾ ಪಯ್ಲೆಂ ಆಪ್ಣಾಕ್ ಸಾಂಗಾತ್ ದೀವ್ನ್ ಸಾಂಬಾಳ್ಲ್ಲ್ಯಾ ಚಲಿಯೆಕ್ ತಿಣೆಂ ತಿಚ್ಯಾ ನ್ಹೆಸ್ಣಾಚ್ಯಾ ಆಧಾರಾರ್ ಪಾರ್ಕಿಲೆಂ. ಬಸ್ಲೆಲ್ಯಾ ಥಾವ್ನ್ಚ್ ದೊಳೆ ಉಭಾರುನ್ ತ್ಯಾ ಚಲಿಯೆಚಾ ಮುಖಮಳಾಕ್ ಪಳೆಲ್ಲ್ಯಾ ತಿಕಾ ತ್ಯಾ ಚಲಿಯೆನ್ ಹಾಸೊ ಮಾತ್ರ್ ಪಾಟಯ್ಲ್ಯೊ.
ವ್ಹಳೂ ತಿಣೆಂ ಬಸ್ಲೆಲ್ಯಾ ಥಾವ್ನ್ ಉಟೊಂಕ್ ಪ್ರಯತ್ನ್ ಕೆಲೆಂ.
"ಬಸ್ ಸ್ಟ್ಯಾಂಡಾಕ್ ಪಾವೊಂವ್ಕ್ ಯೇಂವ್ಕ್ ಜಾಯೆ ಗೆ?" ಉಟೊಂಕ್ ಪ್ರಯತ್ನ್ ಕರ್ಚ್ಯಾ ತೆರೆಜ್ ಬಾಯೆಕ್ ಎಕಾ ಫುಲ್ಕಾರ್ನೆನ್ ಹಾತ್ ಧರುನ್ ಥೊಡೊ ಆಧಾರ್ ದಿಲೊ.
"ನಾಕಾ! ಹಾಂವ್ ರಿಕ್ಶಾರ್ ವೆತಾಂ." ತೆರೆಜ್ ಬಾಯೆನ್ ಸಾಂಗ್ತಾನಾ ವ್ಹಳೂ ತೆಂ ಚಲಿ ಜಮ್ಯಾ ಥಾವ್ನ್ ಮೆಕ್ಳೆಂ ಜಾವ್ನ್ ರಸ್ತ್ಯಾ ತೆವ್ಶಿಂ ಚಲ್ಲೆಂ. ತಾಕಾ ಪಳವ್ನ್ ಪಳವ್ನ್ ರಸ್ತ್ಯಾಕ್ ಆಯಿಲ್ಲ್ಯಾ ತೆರೆಜ್ ಬಾಯೆನ್ ರಿಕ್ಶಾ ಥಾಂಬಯ್ಲಿ.
"ಮಾಸ್ಳೆಕ್ ವಾಗ್ ಖಾಂವ್ದಿ!" ತಿ ಮಾಸ್ಳೆ ಮಾರ್ಕೆಟಿಕ್ ಗೆಲಿ ನಾ.
ರಿಕ್ಶಾರ್ ಬಸೊನ್ ಹೆವ್ಶಿಂ ತೆವ್ಶಿಂ ಪಳೆಲ್ಲ್ಯಾ ತಿಕಾ ಆಪ್ಣಾಕ್ ಆಧಾರ್ ದಿಲ್ಲೆಂ ಚಲಿ ರಸ್ತ್ಯಾ ವಯ್ಲ್ಯಾನ್ ಖಂಯ್ ಮಿಸ್ಳೊನ್ ಗೆಲೆಂ ತೆಂ ಕಳೊನ್ ಆಯ್ಲೆಂ ನಾ. ನಿಟ್ಟ್ ಸ್ಟೇಟ್ಬ್ಯಾಂಕಾ ಲಾಗಿಂ ರಿಕ್ಶಾ ಪಾವ್ತಾನಾ ಬಸ್ಸ್ ಎದೊಳ್ಚ್ಚ್ ಸುಟೊನ್ ಜಾಲ್ಲೆಂ.
"ವೆನ್ ಲಾಕ್ ಆಸ್ಪತ್ರೆ ಲಾಗಿಂ ರಾವ್ತಾ.... ಥಂಯ್ ಮೆಳ್ತೆಲೆಂ!" ರಿಕ್ಶಾ ಡ್ರೈವರಾನ್ ಆಸ್ಪತ್ರೆ ಮುಕಾರ್ ಥಾಂಬ್ಲೆಲ್ಯಾ ಬಸ್ಸಾರ್ ತಿಕಾ ಚಡಯ್ಲಿ.
ಸದಾಂಚಾ ದಿಸಾಂನಿ ಖಾಲಿ ಆಸ್ಚೆಂ ಬಸ್ಸ್ ಆಜ್ ಭರ್ಲಾಂ! ಬಸ್ಸಾ ಭಿತರ್ ಹೆವ್ಶಿಂ ತೆವ್ಶಿಂ ಪಳೆಲ್ಲ್ಯಾ ತೆರೆಜ್ ಬಾಯೆಕ್ ಖಂಯ್ಚರೀ ಬಸ್ಕಾ ಖಾಲಿ ದಿಸೊನ್ ಆಯ್ಲಿ ನಾ. ತಿಣೆಂ ಪಾಟಿಂ ಘುಂವೊನ್ ಡ್ರೈವರಾ ದೆಗೆಚ್ಯಾ ಬಸ್ಕೆರ್ ನದರ್ ಮಾರ್ಲಿ.
ಅಜ್ಯಾಪ್!
ತೆಂಚ್ ಚಲಿ! ತಿಕಾ ಪಾತ್ಯೆಂವ್ಕ್ ಜಾಲೆಂ ನಾ.
ಡ್ರೈವರಾ ದೆಗೆಲ್ಯಾ ಆಡ್ ಬಸ್ಕೆರ್ ಬಸೊನ್ ತ್ಯಾ ಬಸ್ಕೆರ್ ದುಸ್ರ್ಯಾಕ್ ಬಸ್ಚ್ಯಾ ತಿತ್ಲಿ ಸುವಾತ್ ನಾ ತರೀ ಆಪ್ಣಾಕ್ಚ್ ಥೊಡೆಂ ಚಿರ್ಡಾವ್ನ್ ಮ್ಹಳ್ಳ್ಯಾಬರಿ ಉಭಿ ಆಸ್ಲ್ಲ್ಯಾ ತೆರೆಜ್ ಬಾಯೆಕ್ ಬಸೊಂಕ್ ಆಪವ್ಣೆಂ ದಿಂವ್ಚೆ ತಿಕಾ ದಿಸ್ಲೆಂ.
ತಿಣೆಂ ಗಳಾಯ್ ಕೆಲಿ ನಾ.
"ದೇವ್ ಬರೆಂ ಕರುಂ!" ಬಸ್ಕೆರ್ ಕುಲೊ ತೆಂಕ್ತಾನಾ ತಿಣೆಂ ತ್ಯಾ ಚಲಿಯೆಕ್ ಪಳವ್ನ್ ವೊಂಟಾರ್ ಹಾಸೊ ಹಾಡ್ಲ್ಯೊ.
ಹ್ಯಾ ಉಪ್ರಾಂತ್ ತೆರೆಜ್ ಬಾಯೆನ್ ವ್ಹಳೂ ತ್ಯಾ ಚಲಿಯೆಲಾಗಿಂ ಉಲವ್ಣ್ಯಾಕ್ ಬುನ್ಯಾದ್ ಘಾಲಿ. ತಿಕಾ ಹಾಚ್ಯಾ ಪಯ್ಲೆಂ ತ್ಯಾ ಚಲಿಯೆಕ್ ಖಂಯ್ಚರೀ ಪಳೆಲ್ಲೊ ಉಡಾಸ್ ಆಯ್ಲೊ ನಾ. ತರೀ ತಾಚಿಂ ಮೊವಾಳಾಯೆಚಿಂ ಉತ್ರಾಂ, ದಾಕಂವ್ಚೊ ಅಭಿಮಾನ್, ವಿಪರೀತ್ ಮ್ಹಳ್ಳ್ಯಾಬರಿ ದಿಸ್ಚೆಂ ಭುರ್ಗ್ಯಾಪಣ್ ತಿಕಾ ತ್ಯಾ ಚಲಿಯೆ ಥಂಯ್ ಆಕರ್ಶಿತ್ ಕರುಂಕ್ ಲಾಗ್ಲೆಂ. ತಾಚ್ಯೆ ಲಾಗಿಂ ಉಲಯ್ತಾಂ ಉಲಯ್ತಾಂ ವ್ಹಳೂ ತಿಚಿ ಭಲಾಯ್ಕಿ ಸದಾಂಚಾ ಸ್ಥಿತೆಕ್ ಯೆತಾ ತಶಿ ತಿಕಾ ಭಗ್ಲೆಂ.
ಪ್ರಾಯೆಕ್ ಪಾವ್ಲೆಲ್ಯಾ ತರ್ನಾಟ್ಯಾ ಚಲಿಯೆಲಾಗಿಂ ತಿಚೆಂ ನಾಂವ್ ಗಾಂವ್ ಹಾಂವ್ ಕಶೆಂ ವಿಚಾರುಂ? ತೆರೆಜ್ ಬಾಯೆಕ್ ಮಿಸ್ತೆರ್ ಜಾಲೊ ತರೀ ತಿ ವೊಗಿ ರಾವ್ಲಿ ನಾ. ಆಪ್ಣಾಚಾ ಕಶ್ಟಾಂಚಾ ವೆಳಾರ್ ಆಧಾರ್ ದಿಲ್ಲೆಂ ಚಲಿ ಮ್ಹಣ್ತಾನಾ....
ತಿಣೆಂ ವಿಚಾರ್ನ್ಚ್ ಸೊಡ್ಲೆಂ!
************
"ಅನುಷಾ.....!?"
ಬಾತ್ರುಮಾ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ಅನುಷಾಕ್ ಆಪ್ಲ್ಯಾ ಆವಯ್ನ್ ಆಪಯಿಲ್ಲೆಂ ಆಯ್ಕೊನ್ ತಾಣೆಂ ಕುಜ್ನಾ ತೆವ್ಶಿಂ ಮೆಟಾಂ ಕಾಡ್ಲಿಂ.
"ಪುತಾ! ಡಾಡಾಕ್ ಕೊಡ್ತಿಕ್ ವಚೊಂಕ್ ಆಸಾ! ತಾಕಾ ಆಜ್ ವೇಳ್ ಮೆಳ್ಚೊ ನಾ!" ಅನುಷಾಚಾ ಹಾತಿಂ ಚಾಯೆಚೆಂ ಕಪ್ ದೀವ್ನ್ ತಾಚಿ ಆವಯ್ ಉಲಯ್ಲಿ. "ಬಂಗಾರು ಕಾಟ್ಯಾಕ್ ತುಕಾಚ್ ವಚೊಂಕ್ ಪಡ್ತೆಲೆಂ!"
"ಬಂಗಾರು ಕಾಟ್ಯಾಕ್.....?"
"ಅಂಕಲಾನ್ ಆಪಯ್ಲಾಂ ಮ್ಹಣ್ತಾನಾ.... ಆನಿ ಬರೆಂ ಕಾರ್ಯೆಂ ಮ್ಹಣ್ತಾನಾ..... ವಯ್ಲ್ಯಾನ್ ಸಯ್ರಿಂ ನೆ ಪುತಾ?"
"ತುಂ ವಚ್ ಮಾಂ!" ಅನುಷಾನ್ ನಾಖುಶಿ ದಾಕಯ್ಲಿ.
"ಮ್ಹಾಕಾ ಆಸ್ಪತ್ರೆಕ್ ವಚೊಂಕ್ ಆಸಾ ಪುತಾ! ತ್ಯಾ ಊರ್ವಶಿಕ್ ಪಳಂವ್ಕ್ ಜಾಯ್ನಾಂ. ಪೆಂಕ್ಡಾ ಸಕಯ್ಲ್ ಸಗ್ಳೆಂ ಪಿಟೊ ಜಾಲಾಂ. ಕಸಲೆಂ ಆಕ್ಸಿಡೆಂಟ್! ಹಾಂವ್ ಗೆಲ್ಯಾರ್ ತಾಕಾ ಕಾಂಯ್ ಥೊಡೆಂ ಸಮಾಧಾನ್ ಜಾಯ್ತ್!" ಲೊಣಿ ಸಾರಯಿಲ್ಲೊ ಉಂಡೊ ತಿಣೆಂ ಧುವೆಕ್ ವೊಡ್ಡಾಯ್ಲೊ. "ದಾಟ್ಟು ಆಯಿಲ್ಲೊ ಜಾಲ್ಯಾರ್...."
ಆಪ್ಣಾ ಮುಕಾರ್ ಆನಿ ದುಸ್ರಿ ವಾಟ್ ನಾ. ಆಪ್ಣೆಂ ಆವಯ್ಕ್ ಆಯ್ಕೊಂಕ್ಚ್ ಪಡ್ತೆಲೆಂ. ಪುಣ್ ಬಂಗಾರು ಕಾಟ್ಯಾಕ್.....? ಕೊಡ್ಯಾಳಾ ಥಾವ್ನ್ ಫಕತ್ತ್ ಚವ್ದಾ ಕಿಲೊಮೀಟರ್ ತರೀ ಶ್ಹೆರಾ ಭಾಯ್ಲೊ ಗಾಂವ್. ಕಾಜುಚಿ ಪಾಡ್, ಧರ್ಕಸ್, ದೊಂಗೊರ್ ದೆಂವೊನ್ ಶೆತಾಂ ಭಾಟಾಂ ಉತ್ರಾಲ್ಯಾರ್ ಮೆಳ್ಚಿಂ ಫಕತ್ತ್ ಬೊಟಾಂನಿ ಮೆಜ್ಚ್ಯಾ ತಿತ್ಲಿಂ ಘರಾಂ. ಥಕವ್ಣೆಚೆಂ ಪಯ್ಣ್! ತ್ಯಾ ಭಾಯ್ರ್ ಮುಕ್ಕಾಲ್ ವೊರಾಂಕ್ ರಾಕ್ಲ್ಯಾರ್ ಯೆಂವ್ಚೆಂ ಏಕ್ ಸಿಟಿ ಬಸ್ಸ್!
"ಮಾಂ....?" ಅನುಷಾ ನಾ ಖುಶೆನ್ ಪಿಂರ್ಗಾಲೆಂ.
"ಆಮ್ಚ್ಯಾ ಸಂಭಂಧಾಚೊ ಉಡಾಸ್ ದವರುನ್ ತಾಣಿಂ ಬರ್ಯಾ ಕಾರ್ಯಾಕ್ ವೊತ್ತಾಯೆನ್ ಆಪಯ್ಲಾಂ ಆಸ್ತಾಂ ಆಮಿ ನೆಗಾರ್ ಕರುಂಕ್ ನುಜೊ ಪುತಾ. ಉಪ್ರಾಂತ್ ಕೋಣ್ಗೀ.... ಕೆದಾಳಾಗೀ....! ಸಯ್ರ್ಯಾಂಚಾ ಆಪವ್ಣ್ಯಾಚೊ ಮಾನ್ ದಾವರುಂಕ್ ಜಾಯ್ ಪುತಾ!"
"ಬರೆಂ ತರ್!"
"ಸಾಂಗ್ಲ್ಲ್ಯಾಬರಿ ವೆತಾನಾ ಪೆಂಟೆ ಥಾವ್ನ್ ಗುಲೊಬ್ ಘೆಂವ್ಕ್ ವಿಸ್ರಾನಾಕಾ.... ಬಂಗಾರು ಕಾಟ್ಯಾರ್ ತುಕಾ ಖಂಯ್ಚರೀ ಫುಲಾಂ ಮೆಳ್ಚಿಂ ನಾಂತ್!"
**********
"ತುಜ್ಯಾ ಪ್ರಾಯೆಚಿಂ ಚೆಡ್ವಾಂ ಆವಯ್ ಬಾಪಾಯ್ಕ್ ಆಶೆಂ ಖಂಯ್ ಮಾನಾನ್ ಲೆಕ್ತಾತ್? ತಾಂಚಾ ಖುಶೆನ್ ತಿಂ ಸಿನೆಮಾಕ್, ಭೊಂವ್ಡೆಕ್, ರಂಗಂವ್ಕ್ ವೆತಿತ್! ಪುಣ್, ಸಯ್ರ್ಯಾಂಗೆರ್.....?"
ತೆರೆಜ್ ಬಾಯೆಚಿಂ ಉತ್ರಾಂ ಆಯ್ಕೊನ್ ಅನುಷಾಚಾ ತೊಂಡಾರ್ ಹಾಸೊ ಉದೆಲ್ಯೊ. ಅರ್ಧೆಂ ಕುರೆಂ ಫುಲ್ಲ್ಲ್ಯಾ ಚಾಂಪ್ಯಾ ಫುಲಾ ಭಾಶೆನ್ ತಾಚ್ಯೊ ತ್ಯೊ ಹಾಸೊ ತಿಕಾ ಭೋವ್ ಸೊಭಿತ್ ದಿಸ್ಲ್ಯೊ. ತಾಚ್ಯಾ ಸವೆಂ ಎಕಾ ಖಿಣಾಕ್ ಅಸಲ್ಯಾ ಚಲಿಯೆಕ್ ಆಪ್ಣಾಚೆಂ ಸುನ್ ಕರುನ್ ಹಾಡ್ಚಿ ಆಶಾ ತಿಚ್ಯಾ ಮತಿಂತ್ ನವ್ಯಾನ್ ಜಿವಿ ಜಾಲಿ. ಪುಣ್..., ಅನುಷಾಚೊ ಬಾಪಯ್....
"ತುಜೊ ಪಪ್ಪ ಕಿತೆಂ.... ಕೊಡ್ತಿಂತ್ ವಕೀಲ್?" ತಿಣೆಂ ವಿಚಾರ್ಲೆಂ.
"ಹಾವೆಂ ತಾಕಾ ’ಡಾಡಾ’ ಮ್ಹಣೊನ್ ಆಪಂವ್ಚೆಂ! ತೊ ಕೊಡ್ತಿಂತ್ ಜಡ್ಜ್!"
"ಜಡ್ಜ್?"
ತೆರೆಜ್ ಬಾಯೆಕ್ ಘಡ್ಗಡೊ ಮಾರ್ಲೆಲ್ಯಾಬರಿ ಜಾಲೊ. ತಾಚ್ಯೆ ಸವೆಂ ಅನುಷಾಚಾ ತೆವ್ಶಿಲ್ಯಾನ್ ಬಸ್ಲೆಲ್ಯಾ ದುಸ್ರ್ಯಾ ಬಾಯ್ಲೆನ್ ಹೆವ್ಶಿಂ ಘುಂವೊನ್ ಪಳೆಲೆಂ.
"ಜಡ್ಜಾಚೆಂ ಧುವ್? ಆನಿ ಇತ್ಲೆಂ ಸಾದೆಂ ಬೊಳೆಂ?" ತೆರೆಜ್ ಬಾಯೆಕ್ ಪಾತ್ಯೆಂವ್ಕ್ ಜಾಲೆಂ ನಾ.
"ಭುರ್ಗ್ಯಾಂಚಾ ಗೂಣಾಂತ್ ಆವಯ್ ಬಾಪಯ್ಚಾ ವಾಗವ್ಣೆಕ್ ಪಾರ್ಕಿಯೆತ್!" ತಿಣೆಂ ಆಪ್ಣಾಕ್ಚ್ ಸಮಾಧಾನ್ ಕೆಲೆಂ. ಆನಿ ಅನುಷಾಕ್ ಆಪ್ಲಿ ಸುನ್ ಕರ್ಚಿ ಅಶಾ ಸಾಂಡ್ಲಿ.
**********
"ಹಾಂವ್ ಬ್ಯಾಗ್ ಘೆತಾಂ ಆಂಟಿ! ತುಂ ಸಾಂಬಾಳುನ್ ದೇಂವ್!"
ಬಂಗಾರು ಕಾಟ್ಯಾಕ್ ಬಸ್ಸ್ ಲಾಗಿಂ ಲಾಗಿಂ ಜಾತಾನಾ ಬಸ್ಸಾಚಾ ಬೊನೆಟಾ ವಯ್ರ್ ಕೊನ್ಶ್ಯಾಕ್ ದವರ್ಲ್ಲ್ಯಾ ವ್ಯಾರ್ ವೆಲ್ಲ್ಯಾ ಗೊಣಿಯಾಂಕ್ ಬಾಂದ್ಲ್ಲೆಂ ಪೊತೆಂ ಹಾತಿಂ ಘೆಂವ್ಕ್ ಹಾತ್ ವೊಡ್ಡಾಯಿಲ್ಲ್ಯಾ ತೆರೆಜ್ ಬಾಯೆಕ್ ಸಾಂಗ್ಲ್ಲ್ಯಾ ಅನುಷಾನ್ ತಿಚೆಂ ಪೊತೆಂ ಹಾತಿಂ ಘೆತ್ಲೆಂ. ಕಾಟ್ಯಾರ್ ಥಾಂಬ್ಲೆಲ್ಯಾ ಬಸ್ಸಾರ್ ಥಾವ್ನ್ ವ್ಹಳೂ ದೊಗಾಂಯ್ ಸಕಯ್ಲ್ ದೆಂವ್ಲಿಂ. ತಾಂಚೆ ಸವೆಂ ಸಾದಾರ್ನ್ ಮುಕ್ಕಾಲ್ ಬಸ್ಸ್ ಹಾಂಗಾಚರ್ ಖಾಲಿ ಜಾಲೆಂ. ಬಸ್ಸಾರ್ ಥಾವ್ನ್ ದೆಂವ್ಲ್ಲ್ಯಾಂಚೊ ಆವಾಜ್ಚ್ ಆವಾಜ್. ಬಂಗಾರು ಕಾಟ್ಯಾಕ್ ಆಜ್ ಸಯ್ರಿಂಚ್ ಸಯ್ರಿಂ.
ಬಂಗಾರು ಕಟ್ಟೆ!
ಸಗ್ಳೆಂ ತಶೆಂಚ್! ಕಾಂಯ್ಚ್ ಬದ್ಲಾಪ್ ನಾ! ರಸ್ತ್ಯಾಚ್ಯಾ ಉಜ್ವ್ಯಾ ಕುಶಿನ್ ದೋನ್ ಚಿಂಚೆಚೆ ರೂಕ್. ತಾಚ್ಯಾ ಥೊಡೆಂ ಮುಕಾರ್ ಏಕ್ ಆಂಬ್ಯಾ ರೂಕ್. ದಾವ್ಯಾ ಕುಶಿಕ್ ಸೊಜಾಮಾಚೆಂ ಟೆರೆಸಿಚೆಂ ಘರ್. ಘರಾಕ್ ಲಾಗೊನ್ ಲೈನಾಂತ್ ಆಸ್ಚಿಂ ದುಖಾನಾಂ. ಸೊಜಾಮಾಚಾ ಘರ್ಚ್ಯಾ ಉಜ್ವ್ಯಾಕ್ ಪಂಚಾಯತಾನ್ ಆದಿಂ ಬಾಂದುನ್ ದಿಲ್ಲೆಂ ಆತಾಂ ಮೊಡುನ್ ಪಡ್ಲ್ಲೆಂ ಪರ್ನೆಂ ಬಸ್ಸ್ಟ್ಯಾಂಡ್. ಬಸ್ಸ್ಟ್ಯಾಂಡಾಚಾ ಉಜ್ವ್ಯಾಕ್ ಥೊಡೆಂ ಮುಕಾರ್ ವೊಡಾರೂಕ್.
ಬಸ್ಸ್ ದೆಂವೊನ್ ಭಂವ್ತಣಿ ದೀಶ್ಟ್ ಭೊಂವ್ಡಾಯಿಲ್ಲ್ಯಾ ಅನುಷಾಚಿ ನದರ್ ವೊಡಾರುಕಾರ್ ಥಾಂಬ್ಲಿ.
"ವೊಡಾ ರುಕಾಕ್ ಕಾಟೆಂ?" ತಾಚ್ಯಾ ಮತಿಂತ್ ಸವಾಲ್ ಉದೆಲೆಂ.
"ದೋನ್ ಮಹಿನೆ ಜಾಲೆ.... ರುಕಾಕ್ ಕಾಟೆಂ ಬಾಂದುನ್! .....ಹಿಂ ಸಗ್ಳಿಂ ತ್ಯಾ ಶೀನಚಿಂ ಕಾಮಾಂ!" ತೆರೆಜ್ ಬಾಯ್ ವ್ಹಳೂ ಪುಸ್ಪುಸ್ಲಿ.
"ಕೋಣ್ ಶೀನ?"
"ಪೋರ್ ಪಾಸೊನ್ ಬಚ್ಚಾಲ್ಯಾಂಬರಿ ಭೊಂವ್ತಾಲೊ. ಆತಾಂ ಥೊಡ್ಯಾ ಮಯ್ನ್ಯಾಂ ಥಾವ್ನ್ ಧವೆಂ ನ್ಹೆಸೊನ್ ಕೆದಾಳಾ ಪಳಯ್ಲ್ಯಾರೀ ಪಂಚಾಯತಾಂತ್ ಆಸ್ತಾ. ಹ್ಯಾ ಪಾವ್ಟಿಂಚಾ ಇಲೆಕ್ಶನಾಕ್ ರಾವ್ತಾ ಮ್ಹಳ್ಳಿ ಖಬಾರ್. ಗಾಂವ್ಚಾ ತರ್ನಾಟ್ಯಾಂಕ್ ಬರೊ ಪೊಸ್ತಾ!"
"ಆನಿ ಬಸ್ಸ್ತ್ಯಾಂಡ್.....?"
"ಬಸ್ಸ್ಟ್ಯಾಂಡಾಂತ್ ತಾಕಾ ಫಾಯ್ದೊ ಕಿತೆಂ ಆಸಾ? ಇಲೆಕ್ಶನಾಂತ್ ಜಿಕ್ಲೊ ತರ್ ನವೆಂ ಬಸ್ಸ್ಟ್ಯಾಂಡ್ ಬಾಂದವ್ನ್ ಮಾರ್ಬಲ್ ಫಾತ್ರಾರ್ ಆಪ್ಲೆಂ ನಾಂವ್ ಕಾಂತಯ್ತಲೊ!"
ಧನ್ಫರ್ ತಕ್ಲೆರ್ ಪಾವ್ಲ್ಲೊ. ತೆರೆಜ್ ಬಾಯೆನ್ ಪಾಲೊಂವ್ ಮಾತ್ಯಾಕ್ ವೊಡ್ಲೊ. ಬಸ್ಸಾರ್ ಥಾವ್ನ್ ದೆಂವ್ಲ್ಲೆ ಪಯ್ಣಾರಿ ಥೊಡೆ ಪೆಲಿಸಾಮಾಚಾ ದುಖಾನಾಂತ್ ಥಂಡ್ ಪಿಯೆಂವ್ಕ್ ಘುಸ್ಲೆ. ಚಡ್ತಾವಾಂನಿ ತ್ಯಾ ವೊಡಾ ರುಕಾಚಾ ಕಾಟ್ಯಾ ಬಗ್ಲೆನ್ ವೆಚ್ಯಾ ಪಾಂಯ್ ವಾಟೆನ್ ಚಲೊಂಕ್ ಶುರು ಕೆಲೆಂ.
ಸಯ್ರ್ಯಾಂ ಮಧೆಂ ಗಾಂವ್ಚಿಂ ಕೊಣೀ ತೆರೆಜ್ ಬಾಯೆಕ್ ಜಳ್ಕಾಲಿಂ ನಾಂತ್. ಆಜ್ ತಿಕಾ ಅನುಷಾಚೊ ಸಾಂಗಾತ್ ಚಡ್ ಲಾಗ್ಶಿಲೊ ಮ್ಹಳ್ಳ್ಯಾಬರಿ ಜಾಲೊ.
"ಚಲ್ಯಾಂ ಆಂಟಿ!"
ಬಸ್ಸ್ ದೆಂವೊನ್ ರಾವ್ಲ್ಲ್ಯಾ ಕಡೆಚ್ ರಾವ್ಲ್ಲ್ಯಾ ತೆರೆಜ್ ಬಾಯೆಕ್ ಅನುಷಾನ್ ಹುಕುಂ ದಿತಾನಾ ತಾಚ್ಯಾ ಉಲ್ಯಾಕ್ ಪಾಳೊ ದಿಂವ್ಚಾಬರಿ ತಿಣೆಂ ಮೆಟಾಂ ಕಾಡ್ಲಿಂ. ಜಶೆಂ ಬಂಗಾರು ಕಾಟ್ಯಾಕ್ ಸಯ್ರೆಂ ಅನುಷಾ ನ್ಹಯ್ ಬಗಾರ್ ತೆರೆಜ್ ಬಾಯ್ ಮ್ಹಳ್ಳ್ಯಾಬರಿ!
ಸೊಜಾಮಾಚ್ಯಾ ಲೈನಾಂತ್ಲ್ಯಾ ಸೇಸಣ್ಣಚಾ ವೈನ್ ಶೊಪಾಂತ್ ತೀಸ್ ರುಪ್ಯಾಂಚಿ ಕ್ವಾರ್ಟರ್ ವಿಸ್ಕಿ ಘೆವ್ನ್ ತಾಂತ್ಲಿ ಅರ್ಧಿ ವಿಸ್ಕಿ ಪಿಯಾವಾಚಾ ದೋನ್ ಶಿರಾಂ ಸವೆಂ ಗಳ್ಯಾಕ್ ದೆಂವಯಿಲ್ಲೊ ಗಂಗ ಖಾದರ್ ಬ್ಯಾರಿಚಾ ಬಂದ್ ಬಿಡಿಯಾಂ ಬ್ರೆಂಚಾಚಾ ಮೆಟಾರ್ ಬಸೊನ್ ತೆರೆಜ್ ಬಾಯೆಚಿ ರಾಕ್ವಣ್ ಕರುನ್ ಆಸ್ಲ್ಲೊ ತೊ ತೆರೆಜ್ ಬಾಯ್ ಬಸ್ಸಾರ್ ಥಾವ್ನ್ ಖಾಲಿ ಹಾತಾಂನಿ ದೆಂವ್ಲ್ಲಿ ಪಳವ್ನ್ ವಿಜ್ಮಿತ್ ಜಾಲೊ.
ಸದಾಂ ಕ್ಯಾಬೆಜ್ ಆನಿ ಕೋಲಿಪ್ಲವರಾಚೊ ಪಾಲೊ ಭರ್ಲ್ಲಿ ಏಕ್ ಗೊಣಿ ದುಕ್ರಾಂ ಖಾತಿರ್ ಬಸ್ಸಾರ್ ಘಾಲುನ್ ಹಾಡ್ಚ್ಯಾ ತೆರೆಜ್ ಬಾಯೆಕ್ ತಿ ಗೊಣಿ ಘರಾ ಪಾಸೊನ್ ಪಾವೊಂವ್ಕ್ ಗಂಗಚ್ ಯೆತಾಲೊ. ಗೊಣಿ ವಾವೊವ್ನ್ ಹಾಡ್ಲ್ಲ್ಯಾಚಾ ಫಳಾಕ್ ಮಾರ್ಕೆಟಿಕ್ ವರ್ಚಿ ನ್ಹಯ್ ಜಾಲ್ಲಿ ಕಸಲಿಯ್ ಬರ್ಶಿಚಿ ರಾಂದ್ವಯ್ ತೆರೆಜ್ ಬಾಯ್ ಗಂಗಚಾ ಹಾತಿಂ ಚೆಪ್ತಾಲಿ. ಗಂಗಚೊ ದಿಸಾಚಾ ನಿಸ್ತ್ಯಾಚೊ ಖರ್ಚ್ ವೆತಾಲೊ. ತರ್ ಆಜ್....?
ಗಂಗಕ್ ಪಳಂವ್ಕ್ಯ್ ವಿಸ್ರೊನ್ ತೆರೆಜ್ ಬಾಯ್ ಅನುಷಾ ಬರಾಬರ್ ವೊಡಾ ರುಕಾ ಕಾಟ್ಯಾ ತೆವ್ಶಿಂ ಮೆಟಾಂ ಕಾಡ್ತಾನಾ ತೆರೆಜ್ ಬಾಯೆಚೆಂ ಆಯ್ಚೆಂ ವರ್ತನ್ ಸಮ್ಜಾನಾತ್ಲೆಲ್ಯಾಬರಿ ಗಂಗ ಬಿಡಿಯಾಂ ಬ್ರೆಂಚಾಚಾ ಮೆಟಾ ವಯ್ಲೊ ಉಟೊನ್ ರಸ್ತ್ಯಾಕ್ ಆಯ್ಲೊ.
ವೊಡಾರುಕಾ ತೆವ್ಶಿಂ ಪಳವ್ನ್ಚ್ ತೊ ರಸ್ತೊ ಉತ್ರೊಂಕ್ ಲಾಗ್ಲೊ. ತಿತ್ಲೆಂಚ್!
"ಬರ್ರ್...ರ್ರ್.....ರ್...."
ಎಕಾ ಖಿಣಾಕ್ ಗಂಗಕ್ ಆಪ್ಲೊ ಜೀವ್ ಉಭ್ಲಲೊ ಅನ್ಭೋಗ್ ಜಾಲೊ. ತಾಚ್ಯೆ ಸವೆಂ ವೊಡಾ ರುಕಾ ಕಾಟ್ಯಾಲಾಗಿಂ ಪಾವ್ಲ್ಲ್ಯಾ ತೆರೆಜ್ ಬಾಯೆನ್ ಆನಿ ಅನುಷಾನ್ ಅಚಾನಕ್ ಆಯ್ಕಾಲ್ಲ್ಯಾ ಆವಾಜಾಕ್ ಪಾಟಿಂ ಘುಂವೊನ್ ಪಳೆಲೆಂ.
ಪೆಲಿಸಾಮಾಚಾ ದುಖಾನಾಂತ್ ಥಂಡ್ ಪಿಯೆಂವ್ಕ್ ಗೆಲ್ಲೆ ಸಯ್ರೆ, ಹೊಟೆಲಾಚೊ ರಾಮಣ್ಣ, ಕೆಲ್ಶಿ ವೆಂಕಪ್ಪ, ಸೇಸಣ್ಣ ರಸ್ತ್ಯಾಕ್ ಧಾಂವೊನ್ ಆಯ್ಲೆ.
ರಸ್ತ್ಯಾರ್!
ಗಂಗಚಾ ಪಾಯಾಂಕ್ ತೆಂಕೊನ್ ಮ್ಹಳ್ಳ್ಯಾಬರಿ ಏಕ್ ಅಂಬಾಸಿಡರ್ ಕಾರ್ ಥಾಂಬ್ಲ್ಲೆಂ. ರಸ್ತ್ಯಾಕ್ ಘಾಸ್ಲ್ಲ್ಯಾ ತಾಚ್ಯಾ ರೊದಾಂಚೊ ಕಾಳೊ ಧುಂವರ್ ವ್ಹಳೂ ವಾರ್ಯಾರ್ ವಿಲೀನ್ ಜಾಂವ್ಚೊ ಸಾರ್ಕೊ ದಿಸ್ತಾಲೊ.
ಥೊಡಿಂ ಖಿಣಾಂ ಕಾಟ್ಯಾಲಾಗಿಂ ರಾವ್ಲೆಲ್ಯಾ ಕಡೆಚ್ ರಾವೊನ್ ಹೆವ್ಶಿಂ ಪಳೆಲ್ಲಿಂ ತೆರೆಜ್ ಬಾಯ್ ಆನಿ ಅನುಷಾ ಕಾಂಯ್ ಆವ್ಗಡ್ ಜಾಂವ್ಕ್ ನಾ ತೆಂ ಸಮ್ಜಾತಾನಾ,
"ಕಾಂಯ್ ಜಾಂವ್ಕ್ ನಾ ಆಂಟಿ.... ಚಲ್ಯಾಂ!"
"ಹಾಂ ಚಲ್ಯಾಂ!" ತೆರೆಜ್ ಬಾಯೆನ್ ಅನುಷಾಚೊ ಪಾಟ್ಲಾವ್ ಕೆಲೊ.
ಆಕ್ಸಿಡೆಂಟ್ ಜಾಂವ್ಚೆಂ ಜಾಂವ್ಚೆಂ ಚುಕ್ಲ್ಲ್ಯಾ ಗಂಗಚಾ ತಕ್ಲೆಚೆಂ ಅಮಾಲ್ ಸಗ್ಳೆಂ ಪಿರ್ವೊನ್ ತೊ ಥರ್ಥರ್ಯಾಂ ಕಾಂಪ್ತಾಲೊ.
ಕಾಟೆಂ ಉತ್ರೊನ್ ಮುಕ್ಲ್ಯಾ ಟ್ರಾನ್ಸ್ಪಾರ್ಮರಾಚಾ ಬಗ್ಲೆಂತ್ಲ್ಯಾನ್ ಜಾವ್ನ್ ಉಭೊ ಆಸ್ಚಾ ವ್ಹಡ್ಲ್ಯಾ ಮುರ್ಯಾ ಫಾತ್ರಾ ಮುಳಾಂತ್ಲ್ಯಾನ್ ತಿಂ ಚಲ್ತಾತ್ ಮಾತ್ರ್. ಅಚಾನಕ್ ತೆರೆಜ್ ಬಾಯೆಕ್ ಥೊಡೆಂಚ್ ಮುಕಾರ್ ಸುಣಿಂ ಚಾಬೊನ್ ಪಡ್ಚೊ ಆವಾಜ್ ಆಯ್ಕಾಲೊ.
"ಕಾಂಯ್ ಆಮ್ಚೊ ಟೈಗರ್?"
ತೆರೆಜ್ ಬಾಯೆಚೊ ಟೈಗರ್ ಸಾಕಾಳಿಂಚಾ ಫಾಂತ್ಯಾರ್ ತಿಕಾ ಬಸ್ಸಾಲಾಗಿಂ ಪಾವೊವ್ನ್ ತಿ ಪಾಟಿಂ ಯೆಂವ್ಚಾ ಹ್ಯಾ ವಗ್ತಾರ್ ತಿಕಾ ಆಪವ್ನ್ ವರುಂಕೀ ಯೆತಾ. ಅನುಷಾನ್ ವೇಗ್ ಆರಾಯ್ಲೊ. ತೆರೆಜ್ ಬಾಯೆನ್ ಆಪ್ಲ್ಯಾ ಪಾಯಾಂಕ್ ಭಳ್ ದಿಲೆಂ.
ಥೊಡ್ಯಾಚ್ ಮುಕಾರ್ ತಿಚೊ ಟೈಗರ್ ಆನಿ ಸೊಜಾಮಾಗೆಲೊ ಟೊಮಿ ಮುಖಾಮುಖಿ ರಾವ್ಲ್ಲೆ.
"ಟೈಗರ್!" ತೆರೆಜ್ ಬಾಯ್ ಬೊಬಾಟ್ಲಿ.
ಪೆಟ್ಯಾನ್ ಗಣ್ಣೆ ಕೆಲೆಂ ನಾ. ತೆರೆಜ್ ಬಾಯೆನ್ ಹೆವ್ಶಿಂ ತೆವ್ಶಿಂ ಪಳವ್ನ್ ಏಕ್ ಫಾತರ್ ವಿಂಚ್ಲೊ.
"ಫಾತರ್ ಉಡಯ್ನಾಕಾ ಆಂಟಿ! ಝಗ್ಡೆಂ ವಾಡ್ತೆಲೆಂ!"
ಉಭಾರ್ಲ್ಲ್ಯಾ ಹಾತಾಕ್ ತಿಣೆಂ ದುಸ್ರಿ ವಾಟ್ ನಾಸ್ತಾಂ ಸಕಯ್ಲ್ ಗಳಯ್ಲೊ.
ಸುಣ್ಯಾಂಚಿ ಪರ್ವಾ ನಾತ್ಲೆಲೆಂ ಅನುಷಾ ಧನ್ಫಾರ್ ಭರಾಚ್ಯಾ ಕರ್ಕಟ್ಯಾ ವೊತಾಚೆಂ ಗಣ್ಣೆಂ ಕರಿನಾಸ್ತಾನಾ, ಮುಕ್ಲ್ಯಾ ವಾಟೆ ದೆಗೆಚಾ ಕಾಜುಚಾ ರುಕಾರ್ ಪಿಕ್ಲ್ಲ್ಯಾ ಕಾಜುಕ್ ಪಳವ್ನ್ ತ್ಯಾ ಕಾಜುಚೆರ್ ಆಕರ್ಶಿತ್ ಜಾವ್ನ್ ತೆವ್ಶಿಂ ಗೆಲ್ಲೆಂ ತೆಂ ಕಾಜ್ ಕಾಡುಂಕ್ ಏಕ್ ದೋನ್ ಪಾವ್ಟಿಂ ಉಡ್ಲೆಂ.
ಹಾತಾಕ್ ಮೆಳ್ಳಿನಾ.
ಕಾಜುಚ್ಯಾ ಫಾಂಟ್ಯಾಕ್ ವ್ಹಳೂ ಧರುನ್ ತೊ ಫಾಂಟೊ ತಾಣೆಂ ಭಾಗಯ್ಲೊ.
"ಕಾಮಿಲಾಮಾಚಿ ಕಾಜ್ಚಿ ಪಾಡ್! ತೊ ಖಂಯ್ ಪಳಯ್ತ್ ತರ್...." ತೆರೆಜ್ ಬಾಯೆಕ್ ಕಾಮಿಲಾಮಾನ್ ಯೆಟ್ಚ್ಯೊ ಗಾಳಿ ಉಡಾಸ್ ಆಯ್ಲ್ಯೊ. ತಿತ್ಲ್ಯಾರ್.....
"ಡಬ್ಬ್!"
ಪಿಕ್ಲ್ಲಿ ಕಾಜ್ ದೇಂಟ್ ತುಟೊನ್ ಧರ್ಣಿಕ್ ವೆಂಗ್ಲಿ. ತಾಚ್ಯಾ ಸವೆಂ ಗರ್ನಾಳಿ ಫುಟ್ತಾನಾ ಕಾಲುಬುಲು ಜಾವ್ನ್ ಧಾಂವ್ಚ್ಯಾ ಸುಣ್ಯಾಂ ಬರಿ ದೊಗೀ ಸುಣ್ಯಾಂನಿ ದಿಸಾನಾತ್ಲ್ಲ್ಯಾ ದಿಶೆನ್ ಧಾಂವ್ ಮಾರ್ಲಿ.
"ತಿಯ್ ಪಡ್ಲಿ!" ಅನುಷಾಚಾ ತೊಂಡಾರ್ ಬೆಜಾರಾಯ್ ಉಟೊನ್ ದಿಸ್ತಾಲಿ.
ರುಕಾ ವಯ್ಲೆಂ ಕಾಡ್ಲ್ಲೆಂ ಫಳ್ ಧುವ್ನ್ ಖಾಂವ್ಚಿಂ ಕೊಡ್ಯಾಳ್ಗರಾಂ ಮಾತಿಯೆಕ್ ಜಡ್ಲ್ಲೆಂ ಖಾತೆಲಿಂ? ತೆರೆಜ್ ಬಾಯ್ ವೊಗಿ ಜಾಲಿ. ಆಪ್ಣಾಚಿ ಆಸ್ತ್ ಜಾಲ್ಲಿ ಜಾಲ್ಯಾರ್ ಹಾಕಾ ದುಸ್ರಿ ಕಾಜ್ ಕಾಡುನ್ ದಿತಿಂ! ಪುಣ್, ಹಿ ಆಸ್ತ್ ಕಾಮಿಲಾಮಾಚಿ! ತಿ ಮೌನ್ ಜಾಲಿ.
ಕಾಜುಚಿ ಪಾಡ್ ಉತ್ರಾಲ್ಯಾರ್ ವಿಶಾಲ್ ಧರ್ಕಾಸ್. ಧರ್ಕಾಸಾಂತ್ ಪಾಚ್ವೆಂ ತಣ್ ಸುಕೊನ್ ಕರಡ್ ಜಾಲ್ಲೆಂ. ಹ್ಯಾ ಹಳ್ದುವ್ಯಾ ಕರಡಾ ಮಧ್ಲ್ಯಾನ್ ಲಾಂಬಾಯೆನ್ ದಿವೊಡಾ ಜಾತಿಚಿ ಜರ್ಲ್ಲಿ ವಾಟ್. ಸುಮಾರ್ ಅರ್ಧಿ ವಾಟ್ ಸಾರ್ತಾನಾ ಮುಕಾರ್ ಚಿರ್ಯಾ ಫಾತ್ರಾಂಚೆಂ ಕಲ್ಪಣೆ. ಕಾಮಿಲಾಮಾಕ್ ನವೆಂ ಟೆರೆಸಾಚೆಂ ಘರ್ ಭಾಂದ್ತಾನಾ ಹೆಂ ಕಲ್ಪನೆ ಖೊಂಡಯಿಲ್ಲೆಂ. ತಾಚ್ಯಾ ಘರಾಕ್ ಜಾಯ್ ಪುರ್ತೆ ತಾಂಬ್ಡೆ ಫಾತರ್ ಹ್ಯಾಚ್ ಕಲ್ಪಣ್ಯಾ ಥಾವ್ನ್ ತಾಣೆಂ ಕಾತ್ರಯಿಲ್ಲೆ.
ದರ್ಕಸ್ ಸಂಪ್ತಾನಾ ಲಾಂಭಾಯೆಕ್ ಮುರ್ಯಾ ಫಾತ್ರಾಂಚೊ ದೊರೊ. ಆದಿಂ ತ್ಯಾ ದೊರ್ಯಾಕ್ ಭಾರೀಕ್ ಅಕ್ಕಡೊ ಮಾತ್ರ್ ಆಸ್ಲ್ಲೊ. ಪುಣ್ ಆತಾಂ ತೊ ಅಕ್ಕಡೊ ಕಾಮಿಲಾಮಾನ್ ವ್ಹಡ್ ಕೆಲಾ.
ಅಕ್ಕಡ್ಯಾಚೆ ವಾಶೆ ಉತ್ರೊನ್ ಮುಕಾರ್ ದೆಂವ್ಣಿ. ಸಗ್ಳಿ ವಾಟ್ಭರ್ ಚಿಂಚಾರೆ ಫಾತರ್. ಥೊಡೊಚ್ ಪಾಂಯ್ ನಿಸ್ರಾಲ್ಯಾರ್ ’ಪಚಕ್ಕ್’ ಕುಲೆ ದಾಡಾವ್ನ್ ಘೆಂವ್ಕ್ಚ್ ಜಾಯ್.
"ಮೆಟಾಂ ಕಾಡ್ತಾನಾ ಜಾಗ್ರುತ್ ಬಾಯೆ!" ತೆರೆಜ್ ಬಾಯೆಚಿ ದೀಶ್ಟ್ ಆಪ್ಣಾ ಮುಕ್ಲ್ಯಾ ಧರ್ಣಿರ್ ಕೇಂದ್ರೀಕ್ರತ್ ಜಾಲ್ಲಿ.
ಫುಡೆಂ ಮೆಳ್ಚೆಂ ಪಯ್ಲೆಂ ಘರ್ ಕಾಮಿಲಾಮಾಚೆಂ.
ಕಾಲ್ಚ್ಯಾ ರಾತಿಕ್ ಗೊಟ್ಯಾಂತ್ಲ್ಯಾ ಗಾಯ್ಚಾ ಜೊಪಾಚೆರ್ ವಿಶೆವಾಕ್ ಗೆಲ್ಲ್ಯಾ ಕಾಮಿಲಾಮಾಕ್ ಜಲಾಂತ್ಲ್ಯಾ ಮಾಡಾಚೆಂ ಮೊಡಲ್ ಫಾಂತ್ಯಾ ಪಯ್ಲೆಂಚ್ ’ದಡಲ್ಲ್’ ಆವಾಜಾನ್ ಪಡ್ತಾನಾ ಜಾಗ್ ಜಾಲ್ಲಿ. ದುಬಾಯಿ ಥಾವ್ನ್ ಪುತಾನ್ ದಾಡ್ಲ್ಲೊ ಶಿಕಾರೆ ಟಾರ್ಚ್ ಉಶ್ಯಾ ಪಾಟ್ಲೊ ಆರಾವ್ನ್ ಸೊಪ್ಯಾಚೆಂ ದಾರ್ ಕಾಡುನ್ ತೊ ಗೊಟ್ಯಾಕ್ ಆಯ್ಲೊ. ಹಾತಾಂತ್ಲ್ಯಾ ಟಾರ್ಚಾಚೊ ಉಜ್ವಾಡ್ ತಾಣೆಂ ನಿಟ್ಟ್ ಗಾಯ್ಚಾ ಮೂಜಿ ಮುಕುಟಾ ಭೊಂವಾರಿ ಭೊಂವ್ಡಾಯ್ಲೊ.
ಗಾಯ್ ಅಜೂನ್ ಪ್ರಸೂತ್ ಜಾಂವ್ಕ್ ನಾತ್ಲ್ಲಿ.!
ದುಸ್ರೊ ಉಪಾಯ್ ನಾಸ್ತಾಂ ಗೊಟ್ಯಾಚಾ ದಾರಾರ್ಚ್ ಗಾಯ್ಚಾ ಪ್ರಸೂತ್ಪಣಾಕ್ ರಾಕೊನ್ ಬಸ್ಲ್ಲ್ಯಾ ಕಾಮಿಲಾಮಾಚೊ ದೀಸ್ ಉಜ್ವಾಡ್ತಾನಾ ಗಾಯ್ ಪುಡ್ಲದ್ ಪ್ರಸೂತ್ ಜಾಲ್ಲಿ.
ಪುಡ್ಲದ್ ವಾಸ್ರುಂ ಪಾಡಿ ತರೀ ಗಾಯ್ನ್ ವಾರ್ ಘಾಲುಂಕ್ ನಾ. ರಾಕೊನ್ ಬಸ್ಲ್ಲ್ಯಾ ಕಾಮಿಲಾಮಾನ್ ಕರುಂಕ್ ಜಾಯ್ ಜಾಲ್ಲೆಂ ಸಗ್ಳೆಂ ಕೆಲೆಂ. ವೇಳ್ ಧಾಂವ್ತಾಲೊ ಶಿವಾಯ್ ಗಾಯ್ ಉಲಯ್ಲಿ ನಾ.
ವೊರಾಂ ಧನ್ಫರಾಚಿಂ ಸಾಡೆ ಬಾರಾ ಉತಾರ್ತಾನಾ ಕಾಮಿಲಾಮಾನ್ ಗಾಯ್ಕ್ ಬಸೊಂಕ್ ಜಾಯ್ನಾತ್ಲ್ಲ್ಯಾಬರಿ ತಾಚ್ಯಾ ಗಳ್ಯಾಕ್ ದೊರಿ ಅಂರ್ದುನ್ ತಿಕಾ ಮಟ್ವೆಂ ಕರುನ್ ಕುಂಟಾಕ್ ಭಾಂದ್ಲೆಂ. ಥೊಡಿಚ್ ಗಳ್ಚಾ ತಿಚ್ಯಾ ವಾರಿಕ್ ಘರಾ ಪಾಟ್ಲ್ಯಾ ಸೊಂಶಿ ಮಾಡಾಚೊ ಜಿವೊ ಜಡ್ ನಾರ್ಲ್ ಕಾಡುನ್ ಬಾಂದ್ಲೊ ಆನಿ ಹಾತ್ ಧುಂವ್ಚ್ಯಾ ಖಾತಿರ್ ತೊ ಗೊಟ್ಯಾ ದಾರಾ ಬಗ್ಲೆಚಾ ಮಾಡಾ ಮುಳಾಂತ್ಲ್ಯಾ ಉದ್ಕಾನಳಾ ತೆವ್ಶಿಂ ಚಮ್ಕಾಲೊ.
ಮಾಡಾ ಮುಳಾಂತ್ಲೊ ಉದ್ಕಾ ನಳ್ ಉಗ್ತೊ ಕರುನ್ ಹಾತ್ ಧುತಾನಾ, ಮುಕ್ಲ್ಯಾ ವಾಟೆನ್ ಚಲೊನ್ ಯೆಂವ್ಚ್ಯಾ ತೆರೆಜ್ ಬಾಯೆನ್ ಉಲಂವ್ಚೊ ತಾಳೊ ಆಯ್ಕಾಲ್ಲೊ ತೊ ಬಾಗೊನ್ ಹಾತ್ ಧುಂವ್ಚೊ ನೀಟ್ ಜಾಲೊ.
ತಿತ್ಲೆಂಚ್!
"ಡಬ್ಬ್!"
ಆವಾಜಾ ಸವೆಂ ’ಪಚಕ್ಕ್’ ಕರುನ್ ಮಾಡಾ ಮುಳಾಂತ್ಲೆಂ ಮ್ಹೆಳೆಂ ದಾಟ್ ಉದಾಕ್ ಕಾಮಿಲಾಮಾಚಾ ಕುಡಿರ್ ಉಸ್ಳಾಲೆಂ. ಥೊಡಿಂಚ್ ಖಿಣಾಂ!
ಕಾಮಿಲಾಮಾನ್ ತಾಕಾಚ್ ಕಳಿತ್ ನಾತ್ಲೆಲ್ಯಾಬರಿ ಸವ್ಕಾಸ್ ಆಪ್ಲೊ ಹಾತ್ ಉಭಾರುನ್ ಆಪ್ಲ್ಯಾ ನಾಕಾಕ್ ಆಪಡ್ಲೆಂ. ’ಜುಮ್ಮ್’ ಕರುನ್ ಪಾಶಾರ್ ಜಾಲ್ಲ್ಯಾ ಹುನ್ ಹುನ್ ವಾರ್ಯಾಚಿ ಊಬ್ ತಾಚ್ಯಾ ನಾಕಾರ್ ಅಜೂನ್ ಖೆಳ್ತಾಲಿ. ತಾಣೆಂ ಆತಾಂ ವ್ಹಳೂ ಆಪ್ಲಿ ನದರ್ ಸಕಯ್ಲ್ ವೆಲಿ.
"ತರ್ನೊ ನಾರ್ಲ್!"
ಮಾಡಾ ಮುಳಾಂತ್ಲ್ಯಾ ಉಭಿರಾಂತ್ ತರ್ನೊ ನಾರ್ಲ್ ನಿಟ್ಟ್ ಬಸ್ಲ್ಲೊ. ಭುತಾನ್ ಪೇಟ್ ಕೆಲ್ಲೊ ನಾರ್ಲ್!
"ಕಸ್ರೆಕ್ ಕಾಂಯ್ ಮೋಲ್ ನಾ ಕಾಮಿಲಾಮಾ! ಹ್ಯಾ ಹಪ್ತ್ಯಾಂತ್ ಕಾಡಿನಾಕಾ!"
ತೆರೆಜ್ ಬಾಯೆಕ್ ಹ್ಯಾ ಕುಶಿಚಿ ಕಾಂಯ್ ಖಬಾರ್ ನಾತ್ಲ್ಲಿ. ತಿಣೆಂ ಮಾಡಾ ಮುಳಾಂತ್ ಉಭೊ ಆಸ್ಲ್ಲ್ಯಾ ಕಾಮಿಲಾಮಾಕ್ ಪಳವ್ನ್ ತಾಕಾ ದೀಂವ್ಕ್ ಜಾಯ್ ಜಾಲ್ಲಿ ವರ್ದಿ ದಿಲ್ಲಿ.
ಹ್ಯಾ ಸಂಸಾರಾಚಾ ಸ್ಥಿಮಿತಾರ್ ನಾತ್ಲ್ಲ್ಯಾ ಕಾಮಿಲಾಮಾಕ್ ವಾಟೆ ವಯ್ಲೊ ತೆರೆಜ್ ಬಾಯೆಚೊ ತಾಳೊ ಆಯ್ಕಾಲೊ ತರೀ ತೊ ಕಾಂಯ್ಚ್ ಉಲಯ್ಲೊ ನಾ. ತೊ ಫಕತ್ತ್ ತಿಕಾ ಪಳಂವ್ಚಾರ್ ಪಡ್ಲೊ.
ಎಕ್ಚ್ ಖಿಣ್!
"ವಾಟೆ ವಯ್ಲ್ಯಾನ್ ತೆರೆಜ್ ಬಾಯೆಚೊ ತಾಳೊ ಆಯ್ಕೊನ್ ಜರ್ ತರ್ ಆಪುಣ್ ಉದ್ಕಾಚಾ ನಳಾ ಮುಕ್ಲೊ ಉಟಾನಾ....?!"
ನಾರ್ಲ್ ಸಾರ್ಕೊಚ್ ತಕ್ಲೆರ್ ಬಸ್ತೊ! ಆನಿ....." ಕಾಮಿಲಾಮಾಕ್ ಮುಕಾರ್ ಚಿಂತುಂಕ್ ಜಾಲೆಂ ನಾ. ತೆರೆಜ್ ಬಾಯೆನ್ ದಿಲ್ಲ್ಯಾ ಮಾರ್ಕೆಟಿಚಾ ವರ್ದೆಕ್ ಕಾಂಯ್ಚ್ ಪಾಟಿಂ ಜವಾಬ್ ದೀನಾಸ್ತಾನಾ ತೊ ಮುಕ್ಲ್ಯಾ ವಾಟೆನ್ ಆಪ್ಲಿ ವಾಟ್ ಧರುನ್ ವೆಚಾ ತೆರೆಜ್ ಬಾಯೆಕ್ ಪಳವ್ನ್ ರಾವ್ಲೊ.
"ಹಾವೆಂ ತುಕಾ ಸಾಂಗ್ಲೆಂ ಪಳೆ...." ತೆರೆಜ್ ಬಾಯ್ ಉಲಯ್ಲಿ. "...ದುಜಾಮಾಚಾ ಧುವೆಚೆಂ ಆಜ್ ಕರಾರ್ ಮ್ಹಣೊನ್....?! ದುಜಾಮ್ ಹಾಚೊ ವ್ಹಡ್ಲೊ ಭಾವ್. ಪಾಜೆ ಲಾಗ್ಶಿಲ್ಯಾ ಹಿತ್ಲಾಂತ್ ತಾಂಚೆಂ ಮಾಲ್ಗಡೆಂ ಘರ್!" ವಾಟೆ ವಯ್ಲ್ಯಾ ಪಾಲ್ ಪೊಣ್ಸಾಚಾ ರುಕಾರ್ ದೀಶ್ಟ್ ವೆಲ್ಲಿ ತೆರೆಜ್ ಬಾಯ್ ರುಕಾರ್ ಭರ್ಲ್ಲ್ಯಾ ಪಾಲ್ ಪೊಣ್ಸಾಂಕ್ ಪಳವ್ನ್ ಏಕ್ ಘಡಿ ರಾವ್ಲಿ. ಉಪ್ರಾಂತ್ ರುಕಾ ಮುಳಾಂತ್ಲ್ಯಾನ್ ದಾವ್ಯಾಕ್ ಘುಂವ್ಚಾ ವಾಟೆಂತ್ಲ್ಯಾನ್ ಪಾವ್ಸಾಚೆಂ ಉದಾಕ್ ವೆಚ್ಯಾ ಖಣಿಯೆಕ್ ನಿದಾಯಿಲ್ಲ್ಯಾ ಪಾಜೆ ಫಾತ್ರಾ ವಯ್ಲ್ಯಾನ್ ಚಲೊನ್ ಕಾಮಿಲಾಮಾಚಾ ಸುವಾತೆಚಾ ಗಡಿರ್ ಆಸ್ಚಾ ಕೊಡ್ಶ್ಯಾ ಲಾಗಿಂ ಪಾವ್ಲಿಂ.
ಕೊಡ್ಶ್ಯಾರ್ ಉಭೊ ಕಾಟ್ ಆಂಬ್ಯಾರೂಕ್. ರೂಕ್ಭರ್ ಆಂಬೆ. ಕೊಡ್ಶ್ಯಾ ಮುಳಾಂತ್ಲ್ಯಾ ತ್ಯಾ ಕುಶಿಚಾ ಬೊಣ್ಕ್ಯಾಚಾ ಸುವಾತೆರ್ ಖಾದರ್ ಬ್ಯಾರಿಚೆಂ ದಾಕ್ಟುಲೆಂ ಘರ್. ತಾಚೊ ಬಾಪಯ್ ಬೊಣ್ಕ್ಯಾಚಾ ವೊಕ್ಲಾಂಚೊ. ಖಾದರ್ ಬ್ಯಾರಿಕ್ಯ್ ಆಜ್ ಬರೊ ದೀಸ್. ತಾಚ್ಯಾ ನೋವ್ ಜಣಾಂ ಭುರ್ಗ್ಯಾಂ ಪಯ್ಕಿ ಸಾತ್ವ್ಯಾಕ್ ಆಜ್ ಮುಂಜಿ. ಘರಾ ಮುಕಾರ್ ಶಾಮಿಯಾನಾ ವೊಡ್ಲ್ಲೆಂ. ಸಯ್ರ್ಯಾಂಕ್ ಬಸೊಂಕ್ ಕದೆಲಾಂ ದವರ್ಲ್ಲಿಂ. ಮಾಟ್ವಾಂತ್ ಧವೆಂ ನ್ಹೆಸ್ಲ್ಲೆ ನಾಯ್ತೆ ಘಜಾಲಿ ಕಾಡ್ತಾಲೆ ತರ್, ಸಗ್ಳ್ಯಾ ಪರಿಸರಾಂತ್ ಖಾದ್ರಿಚಾ ಘರಾಂತ್ ತುಪಾಂತ್ ಶಿಜಂವ್ಚಾ ಬೀಫಾಚಾ ಮಾಸಾಚೊ ಆನಿ ಬೊಕ್ರ್ಯಾಮಾಸಾಚಾ ಬಿರಿಯಾಣಿಚೊಚ್ ಪರ್ಮಳ್!
ಕೊಡ್ಶ್ಯಾ ವಯ್ಲ್ಯಾ ಆಂಬ್ಯಾ ರುಕಾ ಮುಳಾಕ್ ಪಾವ್ಲ್ಲ್ಯಾ ತೆರೆಜ್ ಬಾಯೆಚಾ ನಾಕಾಕ್ ತೂಪಾಚೊ ಪರ್ಮಳ್ ’ಗಮ್ಮ್’ ಕರುನ್ ಆದಾಳ್ಳೊ. ಆಂಬ್ಯಾ ರೂಕಾಚಾ ದಾವ್ಯಾ ಕುಶಿನ್ ಫುಟ್ಚ್ಯಾ ವಾಟೆಚಾ ದಿಶೆನ್ ದುಜಾಮಾಗೆರ್ ವ್ಹಾಜ್ಚಾ ಸಂಗೀತಾಚೊ ತಾಳೊ ಆಯ್ಕಾತಾಲೊ.
"ದುಜಾಮಾಚೆಂ ಘರ್!" ತೆರೆಜ್ ಬಾಯೆನ್ ದಾಕಯ್ಲೆಂ. "ಆಪವ್ಣೆಂ ಆಸ್ಲ್ಲೆಂ! ಪೆಲಿಸಾಕ್.... ಮ್ಹಜ್ಯ್ ಪುತಾಕ್ ವಚ್ರೇ ಮ್ಹಣೊನ್ ಸಾಂಗೊನ್ ಆಯಿಲ್ಲಿಂ!" ದೊಗಾಂಯ್ ಆಂಬ್ಯಾ ರುಕಾಚಾ ಮುಳಾಂತ್ ಥೊಡೆಂ ರಾವ್ಲಿಂ.
ತಿತ್ಲ್ಯಾರ್ ರುಕಾರ್ ಕಿತೆಂಗೀ ಹಾಲ್ಲ್ಲೊ ಆವಾಜ್ ಆಯ್ಕೊನ್, ಭಿಂಯಾನ್ ಕಾವ್ಜೆಲ್ಲ್ಯಾ ದೊಗಾಂಯ್ನಿ ದೊಳೆ ವಯ್ರ್ ಉಭಾರ್ತಾನಾ ’ಸರ್....ಸರ್’ ಕರುನ್ ಜಾಲ್ಲ್ಯಾ ಆವಾಜಾಕ್ ತಿಂ ಕಿತೆಂ ಪಳೆತೆಲಿಂ? ರುಕಾಚಾ ತಕ್ಲೆರ್ ಥಾವ್ನ್ ಖಾದರ್ ಬ್ಯಾರಿಚೊ ಪೂತ್ ’ಸರ್ ಸರ್’ ಕರುನ್ ಫಾಂಟ್ಯಾ ಥಾವ್ನ್ ಫಾಂಟ್ಯಾಕ್ ಪಡೊನ್ ಸಕಯ್ಲ್ ಪಡ್ಚೊ ತೊ ನಿಮಾಣ್ಯಾ ಫಾಂಟ್ಯಾಚಾ ಸುಕ್ಯಾ ಕುತಿಯೆಕ್ ಕೊಲ್ಸಾಂವ್ ಶಿರ್ಕೊನ್ ಉಮ್ಕಾಳ್ಳೊ.
ತೆರೆಜ್ ಬಾಯ್ ಆನಿ ಅನುಷಾಚಾ ದೊಳ್ಯಾಂ ಮುಕಾರ್! ರುಕಾಚಾ ತಕ್ಲೆರ್ ಥಾವ್ನ್....!
"ಮ್ಹಜ್ಯಾ ದೆವಾ! ಸಾಯ್ಬಾ ಭೊಗೊಸ್!" ತೆರೆಜ್ ಬಾಯ್ ಕಿಂಕ್ರಾಟ್ಲಿ.
ಥೊಡಿಂಚ್ ಖಿಣಾಂ!
"ಖಾದ್ರಿ... ಖಾದ್ರಿ!" ತಿಚ್ಯಾ ಬೊಬೆಕ್ ನಾಯ್ತ್ಯಾಂಚೊ ವ್ಹೊರ್ಚ್ ಧಾಂವೊನ್ ಆಯ್ಲೊ. ಬೋಬ್ಚ್ ಬೋಬ್!
ರುಕಾರ್ ಚಡೊನ್ ಚೆಡ್ಯಾಕ್ ಕೋಣ್ ಕಾಡ್ತಲೊ? ಚೆಡೊ ಸುಕ್ಯಾ ಕುತಿಯೆರ್ ಉಮ್ಕಾಳ್ತಾ! ಕುತಿ ಮೊಡ್ಲಿ ಜಾಲ್ಯಾರ್..... ಖಾದ್ರಿ ಬ್ಯಾರಿ ಘರಾ ನಾ. ತೊ ತಾಂಚಾ ಮೌಲಾನಾಕ್ ಆಪವ್ನ್ ಹಾಡುಂಕ್ ಚಮ್ಕಾಲ್ಲೊ.
"ಪೊರ್ಬುಲೆನ್ ಲೆಪ್ಪುಲೆ! ಪೊರ್ಬುಲೆನ್ ಲೆಪ್ಪುಲೆ!"
ಖಾದ್ರಿಚಾ ಭುರ್ಗ್ಯಾಂನಿ ಲಾಗಿಂಚ್ ಆಸ್ಚ್ಯಾ ದುಜಾಮಾಚಾ ಘರಾ ತೆವ್ಶಿಂ ಧಾಂವ್ ಮಾರ್ಲಿ.
ಥೊಡ್ಯಾಚ್ ವೆಳಾನ್ ಧಾಂವೊನ್ ಆಯಿಲ್ಲ್ಯಾ ದುಜಾಮಾನ್ ಧುವೆಚಾ ಕರಾರಾಕ್ ನ್ಹೆಸ್ಲ್ಲೆಂ ಪ್ಯಾಂಟ್ ನಿಕ್ಳಾವ್ನ್ ಉಡಯ್ಲೆಂ. ಆನಿ ತೊ ರುಕಾರ್ ಚಡ್ಲೊ. ರುಕಾರ್ ಚಡೊನ್ ಚೆಡ್ಯಾಕ್ ಹಾತಿಂ ಉಕ್ಲುನ್ ಧರ್ತಾನಾ ರುಕಾ ಮುಳಾಂತ್ಲ್ಯಾ ಲೊಕಾಂಕ್ ಜೀವ್ ಆಯಿಲ್ಲ್ಯಾಬರಿ ಜಾಲೊ.
"ಹ್ಯಾ ಧನ್ಫರಾ ಭರಾಕ್ ಹ್ಯಾ ಚೆಡ್ಯಾಕ್ ಹಂಕಾರ್ ನ್ಹಯ್ಗೀ? ಜಾತಿಚೊ ಗೂಣ್ ಸೊಡ್ಚೆ ನಾಂತ್! ಪಯ್ಲೆಂಚ್....." ತೆರೆಜ್ ಬಾಯ್ ಮುಕಾರ್ ಉಲಯ್ಲಿ ನಾ. ಧನ್ಫರಾ ಭರಾಚಾ ಮೆಲ್ಲ್ಯಾಂಚ್ಯೊ, ವಾಯ್ಟ್ ವಾರ್ಯಾಚ್ಯೊ, ನಾಡಿಚ್ಯೊ ಖಬ್ರೊ ತಿಣೆಂ ಖೂಬ್ ಆಯ್ಕಾಲ್ಲ್ಯೊ.
ಥೊಡ್ಯಾ ವೆಳಾನ್ ಸಗ್ಳೆಂ ಶಾಂತ್ ಜಾತಾನಾ ತೆರೆಜ್ ಬಾಯೆನ್ ಆನಿ ಅನುಷಾನ್ ಆಪ್ಲಿ ವಾಟ್ ಧರ್ಲಿ. ಖಾದರ್ ಬ್ಯಾರಿಚೆಂ ಘರ್ ಉತ್ರೊನ್ ಮುಕಾರ್ ಆಯ್ಲ್ಯಾರ್ ಮೆಳ್ಚೊ ಹಸ್ತಿಚಾ ಕಾಸ್ತಾಚೊ ಪಾಜೆ ಫಾತರ್. ಫಾತ್ರಾ ದೆಗೆನ್ ಉದ್ಕಾಚಿ ಖಣ್. ಖಣಿಯೆ ದೆಗೆಂತ್ಲ್ಯಾ ಮಾಮೂಲ್ ವಾಟೆಂತ್ಲ್ಯಾನ್ ಥೊಡೆಂ ಮುಕಾರ್ ಚಲ್ತಾನಾ ಮೆಳ್ಚೆಂ ಬೊಣ್ಕ್ಯಾಚೆಂ ಮಾಡಿಯಾಂ ತೋಟ್. ತ್ಯಾ ಮಾಡಿಯಾಂ ತೊಟಾಚಾ ತೆನ್ಕಾಚಾ ಕೊನ್ಶ್ಯಾಕ್ ಉಭೆಂ ಆಸ್ಚೆಂ ಗುಳಿಗ ಜಾರುಮಂತಾಯ ಭುತಾಂಚೆಂ ಸಾನ್. ಸಾನಾಚಾ ದಾವ್ಯಾಕ್ ಬೊಣ್ಕ್ಯಾಚೆಂ ವಿಶಾಲ್ ಘರ್. ಘರಾ ಮುಕ್ಲ್ಯಾ ಜಾಲಾಂತ್ ಸುಗ್ಗೆಚಿಂ ತೀನ್ ಜಯ್ತ್ ಬಾತೆಣಾ ಕುಡಿಂ. ಜಲಾಚಾ ಉಜ್ವ್ಯಾಕ್ ಪಾಶಾರ್ ಜಾಂವ್ಚಾ ವಾಟೆಕ್ ಆನಿ ಬೊಣ್ಕ್ಯಾಚಾ ಘರಾಕ್ ಆಡ್ ಜಾವ್ನ್ ಉಭೊ ಬೊಣ್ಕ್ಯಾಚೊ ಗೊಟೊ, ನಾಣಿ, ಆನಿ ಕೊಡ್ಕೆಂ. ಕೊಡ್ಕ್ಯಾಚಾ ಕೊನ್ಶ್ಯಾಕ್ ರೊಸಾಳ್ ಪೊಣ್ಸಾರೂಕ್. ರುಕಾರ್ ಮಿಸ್ತಾ ಪಿಕ್ಲ್ಲ್ಯಾ ಪೊಣ್ಸಾಕ್ ಚಾಣಿಯೆನ್ ಕಾಂತಯಿಲ್ಲೊ. ಸಗ್ಳ್ಯಾ ಪರಿಸರಾಂತ್ ಪೊಣ್ಸಾಚೊ ಪರ್ಮಳ್.
"ಚೆಡೊ ಧರ್ಣಿಕ್ ಪಡ್ಲ್ಲೊ ಜಾಲ್ಯಾರ್ ..... ಉರ್ತೊ?" ತೆರೆಜ್ ಬಾಯೆ ಮುಕ್ಲ್ಯಾನ್ ಚಲ್ಚೆಂ ಅನುಷಾ ಥಾಂಬ್ಲೆಂ. ಆನಿ ತಾಣೆಂ ಪಾಟಿಂ ಘುಂವೊನ್ ತೆರೆಜ್ ಬಾಯೆಕ್ ಪಳೆಲೆಂ.
"ಉಫ್!"
ತೆರೆಜ್ ಬಾಯೆನ್ ಏಕ್ ಭರಾಧೀಕ್ ಶ್ವಾಸ್ ಸೊಡ್ಲೊ. ಆನಿ ಆಪ್ಲ್ಯಾ ಪಾಯಾಂಕ್ ಖಾಡುಂ ಮಾರ್ಲೆಂ. ಖಾದ್ರಿಚಾ ಪುತಾಚೆಂ ಕಿತೆಂ ಜಾತೆಂ ತೆಂ ತಿಕಾ ಚಿಂತುಂಕ್ ಜಾಲೆಂ ನಾ. ತಿಚಿ ನದರ್ ತಿಚ್ಯಾ ಆನಿ ಬೊಣ್ಕ್ಯಾಚಾ ಘರಾ ಮಧ್ಲ್ಯಾ ಮಾಮೂಲ್ ವಾಟೆಕ್ ತೆಂಕುನ್ ಆಸ್ಲ್ಲ್ಯಾ ಗೊಟ್ಯಾಚಾ ವೊಣ್ತಿರ್ ಚರ್ಲಿ. ತಿತ್ಲೆಂಚ್!
ಬೊಣ್ಕ್ಯಾಚಾ ಗೊಟ್ಯಾ ಪಾಕ್ಯಾರ್ ಥಾವ್ನ್ ’ದರ.... ದರ....’ ಕರುನ್ ಲೊಳೊನ್ ಆಯಿಲ್ಲಿ ಕಸಲಿಗೀ ವಸ್ತ್ ತೆರೆಜ್ ಬಾಯ್ ಆನಿ ಅನುಷಾಚಾ ಮಧೆಂಚ್ ಭುಂಯ್ಕ್ ’ದೊಪ್ಪ್’ ಆವಾಜಾನ್ ಪಡ್ಲಿ.
"ಮ್ಹಜ್ಯಾ ದೆವಾ!" ಆಂಗ್ ಕಾಡ್ಲ್ಲ್ಯಾ ತೆರೆಜ್ ಬಾಯೆಚೊ ಜೀವ್ ತಿಚ್ಯಾ ತೊಂಡಾಂತ್ ಆಯ್ಲೊ.
ವ್ಹಡ್ಲ್ಯಾ ಕಾಸ್ತಾಚೊ ಸಾದಾರ್ನ್ ದೇಡ್ ಮೀಟರ್ ಲಾಂಭಾಯೆಚೊ ಮೊಟ್ಯಾ ಜಿವಾಚೊ ದಿವೊಡ್ ಬೊಣ್ಕ್ಯಾಚಾ ಪಾಕ್ಯಾರ್ ಥಾವ್ನ್ ಲೊಳೊನ್ ಧರ್ಣಿಕ್ ಶೆವ್ಟಾಲ್ಲೊ.
ತೆರೆಜ್ ಬಾಯೆಕ್ ಸ್ಥಿಮಿತಾಕ್ ಯೇಂವ್ಕ್ ಥೊಡೊ ವೇಳ್ ಲಾಗ್ಲೊ. ತರೀ ತಿಚೆ ಹಾತ್ ಪಾಂಯ್ ಕಾಂಪ್ತಾಲೆ.
ದೋನ್ಚ್ ಮೆಟಾಂ!
ಜರ್ ತರ್ ಅನುಷಾಚಿಂ ಉತ್ರಾಂ ಆಯ್ಕೊನ್ ತಿ ವಾಟೆರ್ ಥಾಂಬೊಂಕ್ ನಾತ್ಲ್ಲಿ ಜಾಲ್ಯಾರ್..... ತೊ ದಿವೊಡ್ ನಿಟ್ಟ್ ತಿಚ್ಯಾ ಕುಡಿರ್!
"ಖಂಯ್ಚಾ ನಮುನ್ಯಾಚಿ ಶನಿ ದೆವಾ!" ಶಿಣ್ ಉಚಾರುನ್ ತಿಣೆ ದುವ್ಡಾಕ್ ಪಳೆಲೊ. ಪಾಕ್ಯಾರ್ ಥಾವ್ನ್ ಪಡ್ಲ್ಲೊ ದಿವೊಡ್ ವ್ಹಳೂ ಹೆವ್ಶಿಂ ತೆವ್ಶಿಂ ಪಳವ್ನ್ ಆಂಗ್ ವೊಡೀತ್ತ್ ವಾಟೆ ದೆಗೆಚ್ಯಾ ಖಣಿಯೆಕ್ ದೆಂವ್ಲೊ.
ಅನುಷಾ ’ಅವಾಕ್ಕ್’ ಜಾವ್ನ್ ತಿಕಾಚ್ಚ್ ಪಳೆತಾಲೆಂ. ದಿವೊಡ್ ಪೋಟ್ ವೊಡುನ್ ಗೆಲ್ಲ್ಯಾ ತೆವ್ಶಿಂಚ್ ಪಳವ್ನ್ ಪರ್ತ್ಯಾಕ್ ಏಕ್ ಪಾವ್ಟಿಂ ಪಾಕ್ಯಾ ತೆವ್ಶಿಂ ನದರ್ ಧಾಂವ್ಡಾಯಿಲ್ಲ್ಯಾ ತೆರೆಜ್ ಬಾಯೆನ್ ಹಳ್ಟಾರ್ ಮುಕಾರ್ ಮೆಟಾಂ ಕಾಡ್ಲಿಂ.
ಬೊಣ್ಕ್ಯಾಚಾ ತೊಟಾ ಉಪ್ರಾಂತ್ಲಿಂ ತಾಚಿಂ ಶೆತಾಂ ಉತ್ರೊನ್ ಸುಗ್ಗಿಕ್ ಕಾಟ್ ಬಾಂದ್ಚ್ಯಾ ವ್ಹಡ್ಲ್ಯಾ ವ್ಹಳಾಕ್ ಪಂಚಾಯತಾನ್ ಬಾಂದುನ್ ದಿಲ್ಲ್ಯಾ ಸಾಂಖೊವಾ ಪಲ್ತೊಡಿಚಿಂ ತೀನ್ ಶೆತಾಂ ಪಿರೇರಿಗೆಲಿಂ. ತ್ಯಾ ಉಪ್ರಾಂತ್ ದಿಸ್ಚಿ ಆಸ್ತ್ ತೆರೆಜ್ ಬಾಯೆಚಾ ಘೊವಾಚಿ ಆನಿ ತಿಚ್ಯಾ ಭಾವ್ಯಾಚಿ.
ಆಪ್ಣಾಚಾ ಹಕ್ಕಾಚಾ ಶೆತಾಂತ್ ತೆರೆಜ್ ಬಾಯೆನ್ ವಾಳ್ಚೆ ಬಾಜಿ, ಪಡ್ವೊಳಿಂ, ಕಾರೆತಿಂ, ಆನಿ ಬೊಬ್ಳಿನ್ ಕೆಲ್ಲಿ.
"ಹಿ ಆಮ್ಚಿ ರಾಂದ್ವಯ್!"
"ಹುಂ!" ಏಕ್ ಘಡಿ ರಾವೊನ್ ಪಾಚ್ವಿ ಪಾಚ್ವಿ ದಿಸ್ಚ್ಯಾ ರಾಂದ್ವಯೆ ವಯ್ರ್ ಅನುಷಾನ್ ನದರ್ ವೆಲಿ. ತಾಚ್ಯಾ ತೊಂಡಾರ್ ಹಳ್ತಾರ್ ತ್ಯೊಚ್ ಚಾಂಪ್ಯಾ ಫುಲಾ ಸಾರ್ಕ್ಯಾಚ್ಯೊ ಹಾಸೊ ಉದೆಲ್ಯೊ. ತಿಕಾ ತೆಂ ಪಳಂವ್ಕ್ ಸೊಭಿತ್ ದಿಸ್ಲೆಂ.
ತೆರೆಜ್ ಬಾಯೆಚಾ ಆನಿ ತಿಚ್ಯಾ ಭಾವ್ಯಾಚಾ ಶೆತಾಂ ಮಧೆಂ ವಾಟೆಕ್ ತೆಂಕೊನ್ಚ್ ಆಸಾ ಉದ್ಕಾ ತಳೆಂ. ತಳ್ಯಾ ಸಾಮ್ಕಾರ್ ರಾವ್ಲ್ಲ್ಯಾ ಅನುಷಾನ್ ವ್ಹಳೂ ತಳ್ಯಾ ದೆಗೆನ್ ಯೇವ್ನ್ ತಳ್ಯಾಕ್ ತಿಳ್ಚೆಂ ಪ್ರಯತ್ನ್ ಕೆಲೆಂ.
"ಧನ್ಪರಾ ಭರಾಕ್ ತಳ್ಯಾಕ್ ತಿಳ್ಚೆಂ ಬರೆಂ ನ್ಹಯ್ ಬಾಯೆ!"
ತೆರೆಜ್ ಬಾಯೆಚಾ ಜಾಗ್ವಣೆಕ್ ಗಣ್ಣೆ ಕರಿನಾಸ್ತಾನಾ ಅನುಷಾ ಹಾಸ್ಲೆಂ. ತಳ್ಯಾಂತ್ ತೀಳ್ನ್ ಪಳೆಲ್ಲ್ಯಾ ತಾಕಾ ತಳ್ಯಾಂತ್ ಚಡ್ ಕಾಂಯ್ ಉದಾಕ್ ದಿಸ್ಲೆಂ ನಾ. ತರೀ ತೆಂ ತಳೆ ಕಿತ್ಲೆಂ ಗೂಂಡ್ ಆಸಾ ಮ್ಹಳ್ಳೊ ಅಂದಾಜ್ ತಾಕಾ ಜಾಲೊ.
"ಬಾಂಯ್ತ್ ನಾರ್ಲ್ ಪಡ್ಲಾ!" ಅನುಷಾ ವಿಜ್ಮಿತ್ ಜಾವ್ನ್ ಉದ್ಗಾರ್ಲೆಂ. ಬಾಂಯ್ ಆನಿ ತಳ್ಯಾ ಮಧೆಂ ತಾಕಾ ತಫಾವತ್ ಕಳಿತ್ ನಾತ್ಲ್ಲೊ.
"ನಾರ್ಲ್?"
ಉದ್ಗಾರ್ಲ್ಲ್ಯಾ ತೆರೆಜ್ ಬಾಯೆಕ್ ತಳ್ಯಾಂತ್ಲ್ಯಾ ನಾರ್ಲಾಚೊ ಉಡಾಸ್ ಆಯ್ಲೊ. ತಾಚ್ಯಾ ಸವೆಂ ತಿಚ್ಯಾ ತೊಂಡಾಚೊ ಛಾರೊ ಬದ್ಲಾಲೊ.
"ಕಾಲ್ಚ್ಯಾ ಸಾಂಜೆರ್ ತೆರೆಜ್ ಬಾಯ್ ಆನಿ ತಿಚೊ ಪೂತ್ ಪೆಲಿಸ್ ರಾಂದ್ವಯೆಕ್ ಉದಾಕ್ ಶಿಂಪ್ತಾನಾ ತಳ್ಯಾ ದೆಗೆ ವಯ್ಲ್ಯಾ ಚ್ಯಾರ್ ಮಾಡಾಂ ಪಯ್ಕಿ ಎಕಾ ಮಾಡಾಚೊ ಜಡ್ಲ್ಲೊ ನಾರ್ಲ್ ಪೆಲಿಸಾಕ್ ದಿಸ್ಲ್ಲೊ. ತಾಕಾ ತೊ ನಾರ್ಲ್ ಖಂಯ್ಚಾ ಮಾಡಾಚೊ ಪಡ್ಲಾ ತೆಂ ಕಳೊಂಕ್ ನಾ. ತಳ್ಯಾ ದೆಗೆಚಾ ಚ್ಯಾರ್ ಮಾಡಾಂ ಪಯ್ಕಿ ದೋನ್ ಮಾಡ್ ತೆರೆಜ್ ಬಾಯೆಚಾ ಸರ್ಲೆಲ್ಯಾ ಘೊವಾಚ್ಯಾ ವಾಂಟ್ಯಾಚೆ ಜಾಲ್ಯಾರ್ ದೋನ್ ಮಾಡ್ ತಿಚ್ಯಾ ಭಾವ್ಯಾಚಾ ವಾಂಟ್ಯಾಚೆ.
ಭಾವ್ಯಾನ್ ಆಜ್ ನಾರ್ಲ್ ಕಾಡಯ್ತಾನಾ ತಾಂಚಾ ದಿಶ್ಟೆಕ್ ಚುಕೊನ್ ಶೆತಾಚೆಂ ಉದಾಕ್ ವೆಚ್ಯಾ ಖಣಿಯೆಂತ್ ಉರ್ಲ್ಲೊ ನಾರ್ಲ್ಚ್ ಪೆಲಿಸಾಚಾ ನದ್ರೆಕ್ ಸಾಂಪಡ್ಲ್ಲೊ ನಾರ್ಲ್. ತಾಣೆಂ ತೊ ತೊ ಕಾಡುನ್ ಶೆತಾಚಾ ಮೆರೆರ್ ದವರ್ಲೊ.
ರಾಂದ್ವಯೆಕ್ ಉದಾಕ್ ಶಿಂಪುನ್ ಜಾವ್ನ್ ಡೀಸಲಾಚೊ ಪಂಪು ಮಾತ್ಯಾರ್ ಚಡವ್ನ್ ಪೆಲಿಸ್ ಘರ್ಚ್ಯಾ ವಾಟೆಕ್ ಲಾಗ್ತಾನಾ ನಾರ್ಲಾಚಿ ಖಬಾರ್ ನಾತ್ಲ್ಲ್ಯಾ ತೆರೆಜ್ ಬಾಯೆನ್ ಮೆರೆ ವಯ್ಲೊ ನಾರ್ಲ್ ಪುತಾನ್ ದವರ್ಲಾ ತೆಂ ಸಮ್ಜೊನ್ ತೊ ನಾರ್ಲ್ ಉಕ್ಲುನ್ ತಿ ಪುತಾ ಪಾಟ್ಲ್ಯಾನ್ ಘರಾ ಚಮ್ಕೊಂಚಾ ವಗ್ತಾ, ಅಚಾನಕ್ ತೆರೆಜ್ ಬಾಯೆಚೊ ಭಾವೊ ಖಂಯ್ ಥಾವ್ನ್ ಹಾಜರ್ ಜಾಲೊ ತೆಂ ತಿಕಾಚ್ಚ್ ಕಳೊಂಕ್ ನಾ.
"ಮ್ಹಜ್ಯಾ ವಾಂಟ್ಯಾಚೆಂ ಉದಾಕ್ ಸುಕವ್ನ್ ದವರ್ಲೆಂ. ಆತಾಂ ಹೊ ನಾರ್ಲ್ ಕೊಣಾಚಾ ಬಾಪಾಯ್ಚೊ ಮ್ಹಣೊನ್...." ಸರ್ ಸರ್ ಕರುನ್ ತೆರೆಜ್ ಬಾಯೆಚಾ ಲಾಗಿಂ ಆಯಿಲ್ಲ್ಯಾ ತಿಚ್ಯಾ ಭಾವ್ಯಾನ್ ತಿಚ್ಯಾ ಹಾತಾಂತ್ಲೊ ನಾರ್ಲ್ ವೊಡ್ಲೊ ಆನಿ ’ದಡಲ್ಲ್’ ಕರುನ್ ತೊ ನಾರ್ಲ್ ತಳ್ಯಾ ದೆಗೆಚಾ ಶೆತಾ ಮೆರೆಕ್ ಮಾರ್ಲೊ.
ಮೆರೆಕ್ ಮಾರ್ಲ್ಲೊ ನಾರ್ಲ್ ಮೆರೆರ್ ಥಾವ್ನ್ ಉಸ್ಳೊನ್ ’ಪಚಲ್ಲ್’ ಕರುನ್ ತಳ್ಯಾಂತ್ ಪಡ್ಲೊ. ಭಾವೊ ರಾಗಾನ್ ಖರ್ಶೆತಾಲೊ.
ಆಪ್ಣಾಚ್ಯಾ ಪಾಟ್ಲ್ಯಾನ್ ಅಚಾನಕ್ ಕಿತೆಂಗೀ ಘಡ್ಲೆಂ ತೆಂ ಕಳೊನ್ ವಾಟೆರ್ ಥಾಂಬೊನ್ ಪಾಟಿಂ ಘುಂವ್ಲ್ಲ್ಯಾ ಪೆಲಿಸಾಕ್ ಪಳೆಲ್ಲೊ ತಾಚೊ ಬಾಪ್ಲ್ಯೊ....
"ಹೊ ಎದೊಸೊ ಪಿಲೊ, ಎದೊಳ್ ಮ್ಹಜ್ಯಾ ಘರಾ ಮುಕ್ಲ್ಯಾನ್ ವೆತಾನಾ ಕಾಂಕಾರ್ತಾಲೊ... ಕಿತೆಂ ಮ್ಹಣೊನ್ ಚಿಂತಾ?"
ಬಾಪ್ಲ್ಯಾಚಾ ರಾಗಾಚೆಂ ಕಾರಾಣ್ ಕಿತೆಂ ತೆಂ ಪೆಲಿಸಾಕ್ ಸಮ್ಜಾಲೆಂ ನಾ. ತೊ ಪಂಪಾಚೆಂ ವೊಜೆಂ ಮಾತ್ಯಾರ್ ಘೆವ್ನ್ ತಸೊಚ್ ಉಭೊ ಜಾಲೊ.
"ಬಾಪಯ್ ಸಾರ್ಕೊ ಬಾಪಯ್ ಮ್ಹಣೊನ್ ಬಾಪ್ಲ್ಯಾಕ್ ಮರ್ಯಾದ್ ದಿತಾ! ಸೊರೊ ಪಿಯೆಲ್ಲ್ಯಾ ಮ್ಹಜ್ಯಾ ಘೊವಾಕ್... ತುಜ್ಯಾ ಭಾವಾಕ್ ’ಯೇರೆ ಪೆಟ್ಯಾ’ ಮ್ಹಣೊನ್ ತುಜೊ ಪೂತ್ ಮಾರುಂಕ್ ರಾವ್ಲ್ಲ್ಯಾಬರಿ ಮ್ಹಜೊ ಪೂತ್ ತುಕಾ ಮಾರುಂಕ್ ಯೇಂವ್ಕ್ ನಾ. ಮ್ಹಜೊ ಘೊವ್ ಸೊರೊ ಪಿಯೆವ್ನ್ ಮತಿ ಪಾಸ್ಟ್ ಜಾವ್ನ್ ಕರ್ತಾಲೊ. ತುಂ ಸೊರೊ ಪಿಯೆನಾಸ್ತಾನಾ ಮ್ಹಜ್ಯಾ ಘೊವಾ ಪ್ರಾಸ್ ಪಾಸ್ಟ್! ಚಲ್ಯಾಂರೆ ಪುತಾ!" ತೆರೆಜ್ ಬಾಯೆನ್ ಪುತಾಕ್ ಲೊಟುನ್ ಘರಾಚಿ ವಾಟ್ ಧರ್ಲಿ.
ತೊಚ್ಚ್ ನಾರ್ಲ್! ತೆರೆಜ್ ಬಾಯೆಚಾ ವಾಂಟ್ಯಾಚಾ ತಳ್ಯಾಂತ್ ಅಜೂನ್ ಉಪ್ಯೆತಾಲೊ.
ತೆರೆಜ್ ಬಾಯೆಕ್ ಕಾಲ್ಚೊ ಉಡಾಸ್ ಆಯ್ಲೊ. ಪುಣ್, ತಿ ಕಾಂಯ್ ಉಲಯ್ಲಿ ನಾ. ಕಾಲ್ಚ್ಯಾ ಸಾಂಜೆಚಾ ತ್ಯಾ ಘಡಿತಾ ಉಪ್ರಾಂತ್ ತಿಕಾ ಆಪ್ಲ್ಯಾ ಘೊವಾಚೊ ಮಸ್ತ್ ಉಡಾಸ್ ಆಯಿಲ್ಲೊ. ತಿಚ್ಯಾ ಮನಾಂತೀ ಆಪ್ಣೆ ಆಪ್ಲ್ಯಾ ಘೊವಾಚಿ ವಾಟ್ ಧರ್ಚಿ ಬರಿ ಮ್ಹಳ್ಳಿ ಆಲೋಚನ್ ಉದೆಲ್ಲಿ. ಘೊವಾ ವಿಣೆಂ ಹೊ ಸಂಸಾರ್ ತಿಕಾ ನಾಕಾ ಜಾಲ್ಲೊ.
ತಳ್ಯಾಂತ್ಲ್ಯಾ ನಾರ್ಲಾಚೊ ಉಡಾಸ್ ಕಾಡವ್ನ್ ಅನುಷಾನ್ ಪರ್ತ್ಯಾಕ್ ತಿಚ್ಯಾ ಸಿಂತಿಮೆಂತಾಂಕ್ ಜಾಗಯ್ಲೆಂ. ತಿಕಾ ಸಂಸಾರ್ ನಾಕಾ ಜಾಲೊ.
"ಪುತಾಚೆಂ ಕಾಜಾರ್ ಜಾವ್ನ್ ಮ್ಹಾಕಾ ಏಕ್ ಬರೆಂ ಮರಣ್ ಆಯಿಲ್ಲೆಂ ಜಾಲ್ಯಾರ್!" ತಿಣೆಂ ಮತಿಂತ್ಚ್ ಮಾಗ್ಲೆಂ.
"ಮಾಗ್ಲ್ಲೆಂ ಸಗ್ಳೆಂ ದೆವಾಕ್ ಮೆಚ್ವಾಲ್ಲೆಂ ಜಾಲ್ಯಾರ್!" ತಿ ಮನಾಂತ್ಚ್ ಹಾಸ್ಲಿ.
ತಳ್ಯಾಕ್ ಭೊಂವಾಡೊ ಕಾಡುನ್ ದಾವ್ಯಾಕ್ ವೆಚಿ ವಾಟ್ ಧರ್ಲ್ಲ್ಯಾ ಅನುಷಾಕ್ ಪಳವ್ನ್ ತೆರೆಜ್ ಬಾಯೆಚಿಂ ಆಪ್ಲಿಂ ಚಿಂತ್ನಾಂ ಪಯ್ಸ್ ಧಾಂವ್ಲಿಂ. "ಭೋವ್ಶ್ಯಾ ಹ್ಯಾ ಚೆಡ್ವಾಕ್ ವಾಟ್ ವಾಟ್ ಕಳಿತ್ ನಾ" ಸಮ್ಜೊನ್,
"ಅಬುಟಾಗೆರ್ ವೆಚಿ ವಾಟ್ ಆಶಿ! .....ಬಾಯೆ?" ತಿಣೆಂ ಅನುಷಾಕ್ ಆಪಯ್ಲೆಂ.
"ತಿ ನ್ಹಯ್ ಆಂಟಿ! ಹಿಚ್ಚ್ ವಾಟ್!"
"ಹಿಚ್ಚ್ ವಾಟ್?" ತೆರೆಜ್ ಬಾಯ್ ಆಜ್ಯಾಪ್ಲಿ. "ಹಿ ವಾಟ್ ಮ್ಹಜ್ಯಾ ಘರಾ ವೆತಾ!"
"ನಾ ಆಂಟಿ! ಅಂಕಲಾಚಾ ಘರಾ ವಚೊಂಕೀ ಹಿಚ್ಚ್ ವಾಟ್!"
"ಅಂಕಲಾಚಾ ಘರಾ.....? ಕಾಂಯ್ ಆಪುಣ್ಚ್ ಚುಕ್ಲ್ಯಾಂ?" ಚಿಂತ್ಲ್ಲಿ ತೆರೆಜ್ ಬಾಯ್ ’ಸಟ್ಟ್’ ಕರುನ್ ಕಿತೆಂಗೀ ಉಡಾಸ್ ಆಯಿಲ್ಲ್ಯಾಬರಿ ಜಾವ್ನ್
"ತುಂ ಪೆರ್ನಾಂದಾಮಾಗೆರ್ ಆಯಿಲ್ಲೆಂಯ್ ನ್ಹಯ್? ಆಜ್ ತಾಚ್ಯಾ ಪುತಾಚೊ ರೋಸ್!"
"ಪೆರ್ನಾಂದಾಮ್....?"
"ವ್ಹಯ್! ತುವೆಂ ಅಬುಟಾಗೆರ್ ಸಯ್ರೆಂ ಜಾವ್ನ್ ಆಯ್ಲಾಂಯ್ ಮ್ಹಳ್ಳೆಂಯ್ ನೆ?"
"ವ್ಹಯ್!"
"ತೊಚ್ಚ್ ಪೆರ್ನಾಂದಾಮ್! ಆಲ್ಬರ್ಟ್ ಪೆರ್ನಾಂಡಿಸ್! ತಾಚ್ಯಾ ಘರಾಚಿ ವಾಟ್ ಆಶಿ!" ತೆರೆಜ್ ಬಾಯೆನ್ ತಳ್ಯಾಚಾ ದೆಗೆನ್ ಉಜ್ವ್ಯಾಕ್ ವೆಚಾ ಶೆತಾಚಿ ಮೇರ್ ದಾಕಯ್ಲಿ.
"ಹಾಂವ್ ರೊಸಾಕ್ ಯೇಂವ್ಕ್ ನಾ ಆಂಟಿ! ಪೆರ್ನಾಂದಾಮಾಗೆರ್ ನ್ಹಯ್.... ಹಾಂವ್ ಅಲ್ಮೇಡಾಗೆರ್ ಆಯ್ಲ್ಯಾಂ ಆಳೆ... ಥಂಯ್ ತೋಟ್ ದಿಸ್ತಾ ಪಳೆ..... ತ್ಯಾ ತೊಟಾಚಾ ಕೊನ್ಶ್ಯಾಕ್ ಆಸ್ಚೆಂ ಘರ್ ಮ್ಹಜ್ಯಾ ಅಂಕಲಾಚೆಂ. ಹಾಂವ್....."
ತೆರೆಜ್ ಬಾಯೆಕ್ ಘಡ್ಗಡೊ ಮಾರ್ಲ್ಲ್ಯಾಬರಿ ಜಾಲೊ. ಅನುಷಾನ್ ತಿಕಾ ಆಲ್ಬರ್ಟ್ ಅಂಕಲಾಗೆರ್ ಸಯ್ರೆಂ ಜಾವ್ನ್ ಆಯ್ಲ್ಯಾಂ ಮ್ಹಣ್ತಾನಾ ತಿಣೆ ತಾಚೊ ಅಂಕಲ್ ಆಲ್ಬರ್ಟ್ ಪೆರ್ನಾಂಡಿಸ್ ಮ್ಹಣೊನ್ಚ್ ಚಿಂತ್ಲ್ಲೆಂ. ಪುಣ್...
ಆತಾಂ,
"ಆಲ್ಬರ್ಟ್ ಅಲ್ಮೇಡಾ!" ತೆರೆಜ್ ಬಾಯೆಚೊ ಭಾವೊ.
ಇತ್ಲಿಂ ವೊರಾಂ ಆಪುಣ್ ಹ್ಯಾ ಚೆಡ್ವಾಲಾಗಿಂ ತೆಂ ಆಲ್ಬರ್ಟ್ ಪೆರ್ನಾಂಡಿಸಾಚಾ ಪುತಾಚಾ ರೊಸಾಕ್ ಆಯ್ಲಾಂ ಮ್ಹಣೊನ್ ಇತ್ಲ್ಯಾ ಸಳ್ಗೆನ್ ಉಲಯ್ತಾಲಿಂಮೂ ದೆವಾ! ಭಾವ್ಯಾ ವಿಶಿಂ ಕಾಂಯ್ ಚಡುಣೆಂ ಉಲಯಿಲ್ಲಿಂ ಜಾಲ್ಯಾರ್....?
"ಚಲ್ಯಾಂ ಆಂಟಿ! ವೊತಾಕ್ ತಕ್ಲಿ ಭಾಜ್ತಾ!"
ಅನುಷಾ ಶೆತಾ ಮೆರೆ ವಯ್ಲ್ಯಾನ್ ಚಲೊಂಕ್ ಲಾಗ್ಲೆಂ. ತಾಚ್ಯಾ ಪಾಟ್ಲ್ಯಾನ್ ತೆರೆಜ್ ಬಾಯೆನ್ ತಿಚ್ಚ್ ವಾಟ್ ಧರ್ಲಿ. ತಿಚ್ಯಾ ಘರಾಕ್ಯ್ ತಿಚ್ಚ್ ವಾಟ್. ಭಾವ್ಯಾಚೆಂ ಆನಿ ತಿಚೆಂ ಘರ್ ದೊನೀ ಲಾಗಿಂ ಲಾಗಿಂಚ್ ಆಸ್ಲ್ಲಿಂ.
ಶೆತಾಂ ಉತ್ರೊನ್ ಮಾಡಿಯೆ ತೊಟಾ ದೆಗೆನ್ ಜಾವ್ನ್ ಮೆಟಾಂ ಚಡೊನ್ ಉಜ್ವ್ಯಾಕ್ ತಿಚೆಂ ಘರ್ ಜಾಲ್ಯಾರ್ ದಾವ್ಯಾಕ್ ತಿಚ್ಯಾ ಭಾವ್ಯಾಚೆಂ.
"ಭಾವ್ಯಾಗೆರ್ ಆಜ್ ಸಯ್ರಿಂ ಯೆತಾತ್ ತರ್ ತಾಂಗೆರ್ ಆಜ್ ಕಿತೆಂ ಆಸಾ?" ಚಿಂತುನ್ ಮೆಟಾಂ ಚಡ್ಚ್ಯಾ ತಿಕಾ ಉಸ್ವಾಸ್ ಬಾಂದ್ಲ್ಲ್ಯಾಬರಿ ಜಾವ್ನ್ ಎಕಾಚ್ಚಣೆಂ ತಿಚ್ಯಾ ದೊಳ್ಯಾಂಕ್ ಕಾಳೊಕ್ ಆಯಿಲ್ಲ್ಯಾಬರಿ ಜಾಲೊ.
"ಹಾಂವ್ ವೆತಾಂ ಆಂಟಿ! ಹೆಂ ತುಜೆಂ ಬ್ಯಾಗ್!" ಮೆಟಾಂ ಚಡ್ಲ್ಲೆಂ ಅನುಷಾ ಅಜೂನ್ ಮೆಟಾಂಚಾ ಮುಳಾಂತ್ ಆಸ್ಚಾ ತೆರೆಜ್ ಬಾಯೆಕ್ ಪಳವ್ನ್ ಉಲಯ್ಲೆಂ.
"ಥಂಯ್ ದವರ್ ಬಾಯೆ! ದೇವ್ ಬರೆಂ ಕರುಂ!" ತೆರೆಜ್ ಬಾಯ್ ಉಸ್ವಾಸ್ ಸೊಡುಂಕ್ ಕಶ್ಟೊಂಕ್ ಲಾಗ್ಲಿ.
"ತುಕಾ ತಾಂಕಾನಾ ಜಾಲ್ಯಾರ್ ಘರಾ ಪಾಸೊನ್ ಪಾಯ್ತಾಂ!"
"ನಾ ನಾ! ಥೊಡಿ ವೋಳ್ ಕಾಡ್ತಾಂ. ದೇವ್ ಬರೆಂ ಕರುಂ!" ತಿಕಾ ಸಗ್ಳೆಂಚ್ ಮಿಸ್ತೆರಾಚೆಂ ಜಾಲೆಂ.
ಸವ್ಕಾಸ್ ಮೆಟಾಂ ಚಡ್ಲ್ಲ್ಯಾ ತೆರೆಜ್ ಬಾಯೆಕ್ ಹಳ್ತಾರ್ ಹರ್ಧ್ಯಾಂತ್ ದೂಕ್ ಉಟ್ತಾ ತಶಿ ಜಾಲಿ. ’ವಾಟೆರ್ ಪಡೊನ್ ಮೊರ್ಚ್ಯಾ ಪ್ರಾಸ್ ಘರಾ ವಚೊನ್ ಪಡೊನ್ ಮೆಲ್ಯಾರ್ ಬರೆಂ!" ಚಿಂತ್ಲ್ಲ್ಯಾ ತಿಣೆಂ ಭಲಾತ್ಕಾರೆನ್ ಮ್ಹಳ್ಳ್ಯಾಬರಿ ಮೆಟಾಂ ಕಾಡ್ಲಿಂ.
ಘರಾ ಪಾವ್ಲ್ಲಿಚ್ ದಾರಾಚೆಂ ಬೀಗ್ ಉಗ್ತೆಂ ಕರುನ್ ತಿಣೆಂ ಘಾಮೆಂವ್ಚಾ ಕುಡಿಕ್ ಥಂಡ್ಸಾಣ್ ದೀಂವ್ಕ್ ಪ್ಯಾನ್ ಆನ್ ಕೆಲೆಂ.
"ಕರೆಂಟ್ ನಾ! ವಯ್ಲ್ಯಾನ್ ಪೆಲಿಸ್ಯ್ ಘರಾ ನಾ!" ತಿಕಾ ಕಿತೆಂ ಕರ್ಚೆಂ ತೆಂ ಕಳ್ಳೆಂ ನಾ.
ನ್ಹೆಸ್ಲ್ಲೆಂ ಕಾಪಾಡ್ ಸುಟವ್ನ್ ಮುಕ್ಲ್ಯಾ ಬಾಂಕಾರ್ ಉಡಯಿಲ್ಲ್ಯಾ ತಿಣೆಂ ಜನೆಲಾಚಾ ಕೊನ್ಶ್ಯಾಕ್ ದವರ್ಲ್ಲೆಂ ಕೋಂತ್ ಹಾತಿಂ ಧರ್ಲೆಂ ಆನಿ ತಿ ಸೊಪ್ಯಾರ್ಚ್ ಉದಾರಿ ಪಡ್ಲಿ. ತಿಚ್ಯಾ ಆಂಗಾರ್ ಘಾಮಾಚೆ ಥೆಂಬೆ ಫುಲ್ತಾನಾ ತಿಚ್ಯಾ ಹಾತಾಂತ್ ಕೋಂತ್ ವ್ಹಳೂ ಆಂರ್ದುಂಕ್ ಲಾಗ್ಲೆಂ.
*********
"ಮಾಂಯ್.... ಮಾಂಯ್!" ತೆರೆಜ್ ಬಾಯೆನ್ ’ಸಟ್ಟ್’ ಕರುನ್ ದೊಳೆ ಸೊಡ್ಲೆ.
""ಪ್ರೆಂಕಿ ತಳ್ಯಾಂತ್ ಪಡ್ಲೊ!" ದೊಳೆ ಸೊಡ್ಲ್ಲ್ಯಾ ತಿಚ್ಯಾ ದಿಶ್ಟೆಕ್ ಆಕಾಂತಾನ್ ಕಾಂಪ್ಚೊ ಪೆಲಿಸ್ ದಿಸ್ಲೊ. "ಪ್ರೆಂಕಿ ತಳ್ಯಾಂತ್ ಪಡ್ಲೊ! ಸೋಂಪಣ್ಣ ತೀನ್ ಪಾವ್ಟಿಂ ತಳ್ಯಾಂತ್ ದೆಂವೊನ್ ಆಯ್ಲೊ. ಉಭಿರ್ ಭರ್ಲಾ ಮ್ಹಣ್ತಾ. ಫಾಯರ್ ಸರ್ವಿಸಾಕ್ ಪೋನ್ ಕೆಲಾಂ!" ಆವಯ್ಕ್ ಖಬಾರ್ ದಿಲ್ಲೊ ಪೆಲಿಸ್ ಪರ್ತ್ಯಾಕ್ ಭಾಯ್ರ್ ಧಾಂವ್ಲೊ.
"ಕಿತೆಂ ಉಲಯ್ತಾಯ್ರೆ ಪುತಾ?" ಉಟೊನ್ ಉಭಿ ಜಾಲ್ಲಿ ತೆರೆಜ್ ಬಾಯ್ ಧಾಂವೊನ್ ಜಾಲಾಕ್ ಆಯ್ಲಿ. ತಳ್ಯಾ ಕಡೆನ್ ಲೋಕ್ ಜಮೊ ಜಾಲ್ಲೊ ತಿಕಾ ದಿಸ್ಲೊ. ವೆವೆಗ್ಗಿಂ ಕಾಪಾಡ್ ಆಂಗಾರ್ ವೊಡ್ಲ್ಲಿ ತಿ ತಳ್ಯಾಲಾಗಿಂ ಧಾಂವೊನ್ ಆಯ್ಲಿ.
"ಯೇ ದೆವಾ!" ತೆರೆಜ್ ಬಾಯೆನ್ ತಳ್ಯಾಂತ್ ತಿಳ್ಳೆಂ. ತಳ್ಯಾಂತ್ ಉಪ್ಯೆಂವ್ಚಾ ನಾರ್ಲಾ ಶಿವಾಯ್ ತಿಕಾ ಕಾಂಯ್ಚ್ ದಿಸ್ಲೆಂ ನಾ.
"ಸಯ್ರ್ಯಾಂನಿ ಸಾಂಗ್ಲೆಂ ಮ್ಹಣೊನ್ ಸಯ್ರ್ಯಾಂಕ್ ಘೆವ್ನ್ ತಳ್ಯಾಂತ್ಲೊ ನಾರ್ಲ್ ಕಾಡುಂಕ್ ಗೆಲ್ಲೊ ಖಂಯ್!" ಲಾಗ್ಶಿಲ್ಯಾನ್ ಕೋಣ್ಗೀ ಉಲಯ್ತಾಲೆಂ.
"ನೋಣಯ್ಯಚಾ ಪುತಾಕ್... ಭರ್ಲ್ಲ್ಯಾ ಪಾವ್ಸಾಂತ್ ಪ್ರೆಂಕಿನ್ಚ್ ತಳ್ಯಾ ಪಂದ್ಲ್ಯಾ ಉಭಿರಾ ಥಾವ್ನ್ ವೊಡುನ್ ವಯ್ರ್ ಹಾಡ್ಲ್ಲೊ! ತಸಲ್ಯಾ ಕಡೆನ್.... ಪಾತ್ಯೆಂವ್ಕ್ ಜಾಯ್ನಾ!" ಎಕ್ಲಿ ಬಾಯ್ಲ್ ಉಡಾಸ್ ಕಾಡ್ತಾಲಿ.
ತೊಂಡಾಂತ್ ನಾರ್ಲೆಲ್ ತೇಲ್ ಭರುನ್ ಪರ್ತ್ಯಾಕ್ ತಳ್ಯಾಂತ್ ದೆಂವ್ಲ್ಲೊ ಸೋಂಪಣ್ಣ ಖಾಲಿ ಹಾತಾಂನಿ ವಯ್ರ್ ಆಯ್ಲೊ. ತಾಕಾ ಉಭಿರಾಂತ್ ದೆಂವೊಂಕ್ ಜಾಲ್ನಾ.
ಪ್ರೆಂಕಿಚಿಂ ಭಾವ್ ಭಯ್ಣಿಂ ಬೊಬೊ ಮಾರ್ತಾಲಿಂ. ತಾಚ್ಯಾ ಆವಯ್ಕ್ ಬಾಯ್ಲ್ ಮನ್ಶ್ಯಾಂನಿ ಶೆತಾಚಾ ಮೆರೆರ್ ಘಟ್ ಧರುನ್ ಬಸಯಿಲ್ಲೆಂ. ತಿ ತಳ್ಯಾಕ್ ಉಡ್ಕಿ ಮಾರುಂಕ್ ಧಾಂವ್ತಾಲಿ.
"ನಾ ಜಾಲ್ಯಾರ್.... ಸಯ್ರ್ಯಾಂನಿ ಸಾಂಗ್ಲೆಂ ಮ್ಹಣೊನ್ ಹೊ ಚೆಡೊ ಉಭಿರಾಂತ್ ದೆಂವಾತ್ಗೀ?"
ತೆರೆಜ್ ಬಾಯೆಚೆ ಕಾನ್ ನೀಟ್ ಜಾಲೆ.
"ಸಯ್ರ್ಯಾಂನಿ....?"
ತೆರೆಜ್ ಬಾಯೆಚಿ ದೀಶ್ಟ್ ತಳ್ಯಾ ಭಂವ್ತಿಂ ಜಮೊ ಜಾಲ್ಲ್ಯಾ ಸಯ್ರ್ಯಾಂ ವಯ್ರ್ ಧಾಂವ್ಲಿ. ತಿತ್ಲ್ಯಾರ್!
"ಏ ದೆವಾ! ಮ್ಹಜ್ಯಾ ಪುತಾಕ್ ಹೆ ಕಿತೆಂ ಜಾಲೆಂ?" ತೆರೆಜ್ ಬಾಯೆಚೊ ಭಾವೊ ಹರ್ಧೆಂ ಬಡವ್ನ್ ಬೊಬಾಟುಂಕ್ ಲಾಗ್ಲೊ.
ತೆರೆಜ್ ಬಾಯೆಚಿ ದೀಶ್ಟ್ ಭಾವ್ಯಾಗೆರ್ ಆಯಿಲ್ಲ್ಯಾ ಸಯ್ರ್ಯಾಂಕ್ ಸೊದ್ತಾಲಿ. ಸೊದ್ನೆರ್ ಪಡ್ಲ್ಲ್ಯಾ ತಿಚ್ಯಾ ದೊಳ್ಯಾಂ ದಿಶ್ಟೆಕ್, ಸಾಕಾಳಿಂ ಆಪ್ಣೆ ಪೆಂಟೆಕ್ ವೆಲ್ಲ್ಯಾ ಗೊಣಿಯಾಂಕ್ ಭರ್ಲ್ಲ್ಯಾ ಪೊತ್ಯಾಕ್ ಆಪ್ಲ್ಯಾ ಹಾತಿಂ ಧರುನ್ ತಳ್ಯಾ ಕಾಟ್ಯಾ ದೆಗೆರ್ ರಾವ್ಲ್ಲೊ ಗಂಗ ಆಪ್ಣಾಕ್ಚ್ ಮಿಸ್ತೆರಾಚಾ ನದ್ರೆನ್ ಪಳಂವ್ಚೊ ದಿಸ್ಲೊ.
****************
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
