ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[ಎಚ್ಚೆಮಾಚ್ಯಾ ಮುಕ್ತ್ ಉಲವ್ಪಾಚೆರ್ ವಲ್ಲಿ ಕ್ವಾಡ್ರಸಾಚೆಂ ಸ್ವಶ್ಟೀಕರಣ್ ಆನಿ ಪ್ರತಿಕ್ರಿಯಾ]
ಹೆಂ ಮುಕ್ತ್ ಉಲವ್ಪ್ ವಾ ಸವಾಯೆಚೆಂ (ಚೀಪ್) ಉಲವ್ಪ್?
ಕೊಂಕ್ಣೆಂತ್ ಸಾಹಿತಿಕ್ ವಾದ್-ವಿವಾದ್ ಕಾಂಯ್ ನವೆ ನ್ಹಯ್. ಖಂಚ್ಯಾಯ್ ಸಂಗ್ತೆಚಿ ಭಲಾಯ್ಕೆಭರಿತ್ ವಾಡಾವಳ್ ಜಾಯ್ಜಯ್ ತರ್, ವಾದ್-ವಿವಾದ್, ತರ್ಕ್-ಸಂವಾದ್ ಭೋವ್ ಗರ್ಜೆಚೊ. ಜೆದ್ನಾಂ ಪರ್ಯಾಂತ್ ತೊ ತರ್ಕ್-ಸಂವಾದ್, ವಿಶ್ಲೇಷಣ್-ವಿಮರ್ಸೊ ಎಕಾ ಪರಿಧಿಭಿತರ್ ಆಸೊನ್, ಪ್ರಾಮಾಣಿಕ್ ಹುಸ್ಕೊ ಆಸಾ ತರ್ ಮಾತ್ರ್ ಥಂಯ್ ವ್ಹಾಡಾವಳ್ ಸಾಧ್ಯ್. ನಾಂವೇ ಕಸ್ಲೀಯ್ ಭಾಸಾ-ಭಾಸ್ ಜಾಂವ್, ತರ್ಕ್-ವಾರ್ಜಿಕ್ ಜಾಂವ್ ಖಡ್ಪಾಚೆರ್ ವೊತ್ಲ್ಲ್ಯಾ ದುದಾಪರಿಂ.
ಎಚ್ಚೆಮಾಚೆಂ ಮುಕ್ತ್ ಉಲವ್ಪ್ ವಾಚುನ್ ಮ್ಹಾಕಾ ಸಂತೊಸ್ ಜಿತ್ಲೊ ಜಾಲೊಕೀ, ತಿತ್ಲೊಚ್ ನಿರಾಸ್ ಜಾಲೊಂ; ಸಂತೊಸ್ ಹೊ ಕೀ; ಎಚ್ಚೆಮಾನ್ ಜ್ಯೆ ವಿಚಾರ್ ಧಯ್ರಾನ್ ವಿಂಚ್ಲ್ಯಾತ್ ಆನಿ ಕೊಂಕ್ಣಿ ಭಾಸೆಚ್ಯಾ ಊಣ್-ಅವ್ಗುಣಾಂಚೆರ್ ಆರ್ಸೊ ಧರ್ಲಾ ತೆಂ ಪಳೆವ್ನ್ ಖರೆಂಚ್ ಸಂತೊಸ್ ಜಾಲೊ, ಖರೆಚ್ಚ್ ಭೋವ್ ಅರ್ಥಾಭರಿತ್ ವಿಚಾರ್ ತೆ. ಪುಣ್ ನಿರಾಸ್ಯೀ ಜಾಲೊಂ; ಪಯ್ಲೊ ನಿರಾಸ್ - ಹಾಂತುಂ ವ್ಹಾಪಾರ್ ಜಾಲ್ಲಿ ಭಾಸ್, ವಿಮರ್ಶಕಾಚಿ(?) ಮನೋಗತ್ ಆನಿ ಅಜೂನ್ ಪಾಸೊನ್ ಫಕತ್ತ್ ಕಾಲ್ಪನಿಕ್ (theoretical) ಜಾವ್ನ್ ಚಿಂತಾಂ ಶಿವಾಯ್ ಕೆದಿಂಚ್ ಕಾರ್ಯಾಳ್ (ಕ್ರಿಯಾತ್ಮಕ್) ರಿತಿಚೆಂ ಚಿಂತಾಪ್ ಚಿಂತುಂಕ್ ನಾ, ವಾ ತೆಂ ಪ್ರೇತನ್ ಕೆಲ್ಲೆಂಯ್ ನಾ, ಆನಿ ಹೆಂಚ್ ವೇದಾಂತ್ ಮ್ಹಣ್ ಭಾಸ್ಚಿ ರೀತ್ ಪಾರ್ಕಿತಾನಾ ಆಜ್ ಕೊಂಕ್ಣಿ ಸಾಹಿತ್ಯಾಚೆಂ ಲಾಚಾರ್ಪಣ್ ಸುಸ್ತಾತಾ. ಜಾಂವ್ಕ್ ಪುರೊ ತಾಣೆಂ ಬರಯಿಲ್ಲ್ಯಾ ಪಾಟ್ಲೊ ಮಿಸ್ತೆರ್ ಆನಿ ಸುಪ್ತ್ ಇರಾದೊ ಕಸ್ಲೊಯ್ ಆಸೊಂದಿ.
ಕೊಂಕ್ಣಿ ಭಾಸೆಂತ್ಲೆಂ ಸಾಹಿತ್ಯ್ ’ಅಮೂಲ್ಯ್’ ಮ್ಹಣ್ ಖಂಚೊ ಬೇಕೂಫ್ ಬರಯ್ಣಾರ್ ವಾದ್ ಮಾಂಡ್ತಾ? ಬೇಕೂಫಾಂತ್ಲ್ಯಾ ಬೇಕೂಫ್ ಬರಯ್ಣರಾಕ್ ಸಯ್ತ್ ಕಳಿತ್ ಆಸಾಕೀ ಕೊಂಕ್ಣಿ ಸಾಹಿತ್ಯಾಂತ್ ಹೆರ್ ಭಾಸೆಂಚ್ಯಾ ಸಾಹಿತ್ಯಾ ಮುಕಾರ್ ಮಟ್ಟ್ ನಾ ಮ್ಹಳ್ಳೆಂ. ಎಚ್ಚೆಮಾನ್ಯೀ ಪರತ್ ಆನಿ ಪರತ್ ಹೆಂಚ್ ಸಾಂಗ್ಲಾಂ/ಸಾಂಗ್ತಾ ಶಿವಾಯ್ ಹಾಚ್ಯಾಕೀ ಮುಖ್ಲೆಂ ಚಿಂತಾಪ್ ಹಾಚ್ಯಾಯ್ ಕಟ್ಟ್ಯಾರ್ ರಿಗಾನಾ ಮ್ಹಳ್ಳೆಂ ಕೊಂಕ್ಣೆಚೆಂ ದುರ್ಭಾಗ್ಪಣ್ ಮ್ಹಣೊಂ?
ವೆಕ್ತಿಗತ್ ಜಾವ್ನ್ ಎಚ್ಚೆಮ್ ಮ್ಹಜೊ ಖಾಸ್ ಮಿತ್ರ್, ವಿಚಾರಾಂನಿ ಆಮ್ಚೆ ವಿಚಾರ್ ಚಡ್ತಾವ್ ಜಾವ್ನ್ ತಾಳ್ ಮೆಳ್ತಾತ್; ಹಾಂವ್ ಕಾರ್ಯಾಳ್ (practical) ಜಾವ್ನ್ ಚಿಂತ್ತಾಂ ತರ್ ತೊ ಕಾಲ್ಪನಿಕ್ (theoretical) ಜಾವ್ನ್ ಚಿಂತಾ. ಕೊಂಕ್ಣಿ ಸಾಹಿತಾಂತ್ ಕಾಳೊಕ್ ಆಸಾ ಮ್ಹಣ್ ಫಕತ್ತ್ ದುರ್ಸೊನ್ ಬೊಸ್ಲ್ಯಾರ್ ಉಜ್ವಾಡಾಚಿ ವಾತ್ ಪೆಟಂವ್ಕ್ ಕಾಂಯ್ ಸಾಂ|ಪೆದ್ರು ಯೆತಾ? ವಾ ಹೆರ್ ಕೊಣಿ ಕೊಂಕ್ಣಿ ಸಾಂತ್/ಸಾಂತಿಣ್ ಯೆತಾ? ಆಮಿಂಚ್ ವಾತ್ ಪೆಟಯ್ಜಾಯ್ ಮ್ಹಣ್ ನಾ - ಖರೆಂ. ಆಮ್ಕಾಂ ಶಿಮ್ಟಿ ಉಕ್ಲುನ್ ಶೆಣ್ ಘಾಲ್ಚಿ ತಾಂಕ್ ನಾ ತರ್ ಬರೆಂ - ಪುಣ್ ತ್ಯೊ ವಾಟೊ ತರ್ಯೀ ಸಾಂಗ್ಯೆತ್ ನ್ಹಯ್? ಪುಣ್ ತೆಂ ಆಮ್ಚೆಂ ಕಾಮ್ ನ್ಹಯ್, ಆಮ್ಚೆಂ ಕಾಮ್ ಫಕತ್ತ್ ಖೊಡಿ ಕಾಡ್ಚ್ಯೊ ಮಾತ್ರ್ ಮ್ಹಣ್ ಹಾತ್ ಭಾಂಧುನ್ ಅಸಲ್ಯಾ ಭಾಸೆಂತ್ ಬರಯಿಲ್ಲ್ಯಾಕ್ ಕಿತ್ಲೊ ಮಹತ್ವ್ ದೀಜಾಯ್?
ರೆಗಾಮ್ ತಾಕೊಡೆನ್ ಥೊಡ್ಯಾ ತೆಂಪಾಧಿಂ ಬರಯಿಲ್ಲಿಂ ಉತ್ರಾಂ ಅಶಿಂ ಆಸಾತ್; "ವಿಮರ್ಶಕ್ ಮ್ಹಳ್ಳೆಂ ಉತರ್ ಕೊಂಕ್ಣೆಂತ್ ಚಿಕ್ಕೆ ಉಪ್ರಾಳಿ ಚಿಂತ್ಪಾಕ್ ಕಾರಣ್ ಜಾಲಾಂ; ಜೆ ಥೊಡೆ ವಿಮರ್ಸೊ ಬರಯ್ತಾತ್ ತೆ ಚಿಂತಾತ್ಕೀ ಆಮಿ ಕಿತೆಂ ಖೊಡಿ ಕಾಡ್ಲ್ಯಾರೀ ತೊ ವಿಮರ್ಸೊ ಜಾತಾ ಮ್ಹಣ್! ದೆಕುನ್ ಅಪ್ರೂಪ್ ಕೋಣ್ ಖಂಚ್ಯಾ ಪತ್ರಾಕ್ ವಿಮರ್ಸೊ ಬರಯ್ತಾನಾ, ತೊ ವಿಮರ್ಸೊ ಫಕತ್ತ್ ಖೊಡಿ ಮಾತ್ ಜಾತಾ ಶಿವಾಯ್ ವಿಮರ್ಸೊ ಜಾಯ್ನಾ. ಖೊಡಿ ಮ್ಹಳ್ಯಾರ್ ಮಾಂಯ್ನ್/ಬಾಯ್ಲೆನ್/ ಆಯಾನ್ ಕೆಲ್ಲೆಂ ಜೆವಣ್ ಸಮಾ ಜಾಂವ್ಕ್ ನಾ ಮ್ಹಣ್ ಭಾಯ್ರ್ ಉಲಂವ್ಚೆಂ; ಸೆಜಾರ್ಚಿ ಚಲಿ ಅನ್ಯೇಕಾ ಚಲ್ಯಾಲಾಗಿಂ ಉಲಯ್ಲೆಂ ಮ್ಹಣ್ ತಾಂಕಾಂ ಬಾಂಧುನ್ ದಿಂವ್ಚೆಂ; ಸರ್ವ್ ಕಾರಣಾವಿಣೆ! ಫಕತ್, ಹಾಂವೆಂ ಪಳೆಲಾಂ; ಮ್ಹಾಕಾ ಅಶೆಂ ಭಗ್ತಾ, ಮ್ಹಳ್ಳ್ಯಾ ನಿಬಾಕ್ ಲಾಗೊನ್. ಪುಣ್ ತಾಕಾ ವಿಮರ್ಸೊ ಮ್ಹಣಾನಾಂತ್. ಅಸಲ್ಯೆ ಖೊಡಿಂಕ್ ಮೋಲ್ ನಾ; ಸರ್ವ್ಜಣಿಕ್/ಪಬ್ಲಿಕ್ ಜಾಗ್ಯಾಂನಿ ಅಸಲ್ಯೆ ಖಬ್ರೆಂಕ್ ಅಂತಸ್ತ್ ನಾ. ಗವ್ರವಾನ್ ಆಮಿ ಹೆಂ ಹೆರಾಂಲಾಗಿಂ ಉಲಂವ್ಚೆ ಪರಿಂ ನಾ". ಹಿಂ ಉತ್ರಾಂ ನಿಜಾಯ್ಕೀ ಅರ್ಥಾಭರಿತ್ ಆನಿ ಸತ್ ಸಯ್ತ್.
ಹಾಂಗಾಸರ್ ಥೊಡ್ಯಾಚೊ ತರ್ಯೀ ದಾಖ್ಲೊ ದಿತಾಂ;
ಎಚ್ಚೆಮಾನ್ ದಾಯ್ಜಾಚೆರ್ ಪರ್ಗಟ್ಲ್ಲ್ಯಾ ಥೊಡ್ಯಾ ಬರ್ಪಾಂಚೆರ್ ಅಪ್ಲೊಚ್ ಅರ್ಥ್ ಕರುನ್ ತೊ ಅರ್ಥ್ಚ್ ಸಾರ್ಕೊ ಮ್ಹಳ್ಳೆಪರಿಂ ಫಯ್ಸಲ್ ದಿಲಾಂ. ಪಯ್ಲೆಂ - ’ಲತಾ ಮಂಗೇಶ್ಕರಾಕ್ ಆನಿ ಕೊಂಕ್ಣಿ ಸಾಹಿತ್ಯಾಕ್ ತುಲನ್ ಕೆಲ್ಲೆವಿಶಿಂ’. ಹಾಂವೆಂ ಸ್ಪಶ್ಟ್ ಉತ್ರಾಂನಿ ಉಲ್ಲೇಕ್ ಕೆಲಾಂ ಕೀ; ಹಾಂವೆಂ ತೆಂ ಲೇಖನ್ ಬರಂವ್ಚ್ಯಾ ಸಂಧರ್ಭಾರ್ ’ವೋಯ್ಸ್ ಓಫ್ ಇಂಡಿಯಾ’ ಕಾರ್ಯಾಂತ್ ಜಿಕ್ಪ್ಯಾಚೆಂ ನಾಂವ್ ಘೋಶಿತ್ ಕರುಂಕ್ ತಿ ಆಯಿಲ್ಲೆವೆಳಾರ್ ಥಂಯ್ ಹಾಜರ್ ಆಸ್ಲ್ಲ್ಯಾ ಸಂಗೀತ್ಕಾರಾಂನಿ/ಲೊಕಾಂನಿ ತಿಕಾ ದಿಲ್ಲೊ ಮಾನ್ ಪಳೆತಾನಾ, ಕೊಂಕ್ಣೆಂತ್ ಹಿ ಪರಿಗತ್ ಉದೆಲ್ಲಿ ತರ್ ಕಿತೆಂ ಘಡ್ತೆಂ ಮ್ಹಳ್ಳ್ಯಾಚೆಂ ಕಲ್ಪನ್ ಹಾವೆಂ ಕೆಲ್ಲೆಂ ಮ್ಹಣೊನ್. ಹಾಂಗಾಸರ್ ಕೊಂಕ್ಣಿ ಸಾಹಿತ್ಯ್ ಕಶೆಂ ಮಧೆಂ ಉದೆಲೆಂ?. ಕೊಂಕ್ಣಿ ಮ್ಹಳ್ಯಾರ್ ಎಚ್ಚೆಮಾಕ್ ಸಾಹಿತ್ಯ್ ಮಾತ್ರ್ ಆಸ್ಯೆತ್, ಪುಣ್ ಹಾಂವ್ ’ಕೊಂಕ್ಣಿ ಮ್ಹಳ್ಯಾರ್ ಸಾಹಿತ್ಯ್ ಮಾತ್ರ್’ ಮ್ಹಣಾನಾ. ಕೊಂಕ್ಣಿ ಏಕ್ ಬಾಂಯ್ ಮ್ಹಣ್ ಹಾಂವ್ ಲೆಖಿನಾ. ಕೊಂಕ್ಣಿ ಏಕ್ ಸಾಗೊರ್ ಮ್ಹಣ್ ಹಾಂವ್ ಲೆಖ್ತಾಂ. ಹಾಂಗಾಸರ್ ಸಂಗೀತ್, ರಂಗ್ಮಂಚ್, ಸಾಹಿತ್ಯ್, ಪತ್ರಿಕೋಧ್ಯಮ್, ಕಲಾ.... ಸಭಾರ್ ಪ್ರಕಾರ್ ಆಸಾತ್. ಅಶೆಂ ಮ್ಹಣ್ತಾನಾ ಎಚ್ಚೆಮಾನ್ ಹಾವೆಂ ಲತಾ ಮಂಗೇಶ್ಕರಾಕ್ ಆನಿ ಕೊಂಕ್ಣಿ ಸಾಹಿತ್ಯಾಕ್ ತುಲನ್ ಕೆಲಾಂ ಮ್ಹಣ್ ಚಿಂತ್ಚ್ಯಾಂತ್ ಕಿತ್ಲೊ ಅರ್ಥ ಆಸಾ? ತರ್ ಹಾಂವೆಂ ಮ್ಹಜ್ಯಾ ಬರ್ಪಾಂತ್ ಜೆಜುಚಿಂ ಉತ್ರಾಂ ವ್ಹಾಪಾರ್ಲಿಂ ಮ್ಹಣೊನ್ ವಲ್ಲಿನ್ ಕ್ರಿಸ್ತಾಂವ್ ಧರ್ಮಾಕ್ ಆನಿ ಕೊಂಕ್ಣಿ ಸಾಹಿತ್ಯಾಕ್ ತುಲನ್ ಕೆಲಾಂ ಮ್ಹಣ್ಚೆಂ? ವಯ್ರ್ ರೆಗಾಮಾಚಿಂ ಉತ್ರಾಂ ವಾಪಾರ್ಲಿಂ ಮ್ಹಣ್ ವಲ್ಲಿನ್ ತಾಕೊಡೆಗಾರಾಂಕ್ ಆನಿ ಕೊಂಕ್ಣಿ ಸಾಹಿತ್ಯಾಕ್ ತುಲನ್ ಕೆಲಾಂ ಮ್ಹಣ್ಚೆಂ? ಹೆರ್ ಸಂಗೀತ್ ಮಹಾಶಯಾಂಚೆರ್ ಆನಿ ಕೊಂಕ್ಣಿ ಸಂಗೀತ್ಕಾರಾಂಚೆರ್ ತುಲನ್ ಕರ್ತಾನಾ ಎಚ್ಚೆಮಾನ್ ಉಲ್ಲೇಕ್ ಕೆಲ್ಲ್ಯಾ ನಾಂವಾಂ ಪಟ್ಟೆರ್ ನಾತ್ಲ್ಲ್ಯಾ ಸಂಗೀತ್ಕಾರಾಂಚಿಂ ನಾಂವಾಂ ಮ್ಹಾಕಾಯ್ ಕಳಿತ್ ಆಸಾತ್ - ತಿಂ ಹಾಂಗಾ ಗರ್ಜೆಭಾಯ್ಲಿಂ, ಗರ್ಜ್ ಯೆತಾನಾ ಉಲ್ಲೇಕ್ ಕರ್ತಾಂ. ಅಸಲ್ಯಾ ಅಸ್ಕತ್/ಅಶೀರ್ ಚಿಂತ್ಪಾಕ್ಚ್ ’ಸತ್’ ಮ್ಹಣ್ ಪಾತ್ಯೆಂವ್ಚ್ಯಾಂಚ್ಯಾ ತಕ್ಲೆಂತ್ ಕಿತೆಂ ಆಸಾ ಮ್ಹಳ್ಳೆಂಚ್ ಪಯ್ಲೆಂ ಸವಾಲ್.
ದುಸ್ರೆಂ ದುರ್ಸೊಣೆಂ ಎಚ್ಚೆಮಾನ್ ಕೆಲಾಂ ’ತಾಂಚಿಂಚ್ ಸಂಪಾದಕೀಯಾಂ ಆನಿ ತಾಂಚಿಂಚ್ ಪ್ರತಿಕ್ರಿಯಾ’; ಹ್ಯಾ ಉತ್ರಾಂಕ್ ಮುಖಾಮುಖಿ ಉಲಯ್ತಾನಾ ’ಹಾಂವೆಂ ತುಮ್ಚೆರ್ ಬರಯಿಲ್ಲೆಂ ನ್ಹಯ್, ಥೊಡ್ಯಾ ಪತ್ರಾಂಚ್ಯಾ ಸಂಪಾದಕಾಂಚೆರ್ ಬರಯಿಲ್ಲೆಂ’ ಮ್ಹಣ್ ಎಚ್ಚೆಮಾನ್ ಸ್ಪಶ್ಟ್ ಕೆಲೆಂ ತರ್ಯೀ, ಏಕ್ ಸಂಗತ್ ಹಾಂಗಾಸರ್ ಭೋವ್ ಗರ್ಜೆಚಿ ಉಲ್ಲೇಕ್ ಕರ್ತಾಂ. ಥೊಡ್ಯಾಚ್ ತೆಂಪಾಧಿಂ ಕೊಂಕ್ಣೆಚೊ ಮಹಾನ್ ಸಾಹಿತಿ (?) ಮ್ಹಣ್ ಲೆಖ್ಚ್ಯಾ ಎಕ್ಲ್ಯಾಚೆಂ ಸಂದರ್ಶನ್ ದಾಯ್ಜಾಚೆರ್ ಪರ್ಗಟ್ ಕೆಲೆಂ. ತಾಂತುಂ ತಾಣೆಂ ದಿಲ್ಲ್ಯಾ ಜಾಪಿಚೆರ್ ಎಕಾ ವಾಚ್ಪ್ಯಾನ್ ಸವಾಲ್ ಕರುನ್ ಮ್ಹಾಕಾ ಧಾಡ್ಲಿ ಆನಿ ಹಾಂವೆಂ ತಿ ಆಸಾ ತಶಿ ಪರ್ಗಟ್ ಕೆಲಿ. ತುರಂತ್ ಮ್ಹಾಕಾ ತ್ಯಾ ಮಹಾನ್ ಬರಯ್ಣಾರಾನ್ ಅಶೆಂ ಬರಯ್ಲೆಂ; "ವಲ್ಲಿ, ಮ್ಹಾಕಾ ತ್ಯಾ ವಾಚ್ಪ್ಯಾಚೊ ವಿಳಾಸ್ ಧಾಡ್, ಹಾಂವ್ ತಾಕಾ ಸಾರ್ಕೆಂ ಸಮ್ಜಾಯ್ತಾಂ/ಶಿಕಯ್ತಾಂ". ಪುಣ್ ಸಂಪಾದಕ್ ಜಾವ್ನ್ ಮ್ಹಾಕಾ ಮ್ಹಜೆ ಥೊಡೆ ಭಾಂದ್ಪಾಸ್ ಆಸಾತ್, ಹಾಂವೆಂ ಘೆಜಯ್ ಜಾಲ್ಲೆ ಥೊಡೆ ನಿರ್ಣಯ್ ಆಸಾತ್, ಹಾಂವೆಂ ತಾಕಾ ಜವಾಬ್ ದಿಲಿ; "ತುಮ್ಚಿ ಪ್ರತಿಕ್ರಿಯಾ/ಸ್ಪಶ್ಟನ್ ಕಾಂಯ್ ಆಸಾ ತರ್ ತಿ ಧಾಡಾ, ಪರ್ಗಟ್ ಕರ್ಯೆತ್, ಪುಣ್ ವಿಳಾಸ್ ದಿಂವ್ಚ್ಯಾಧಿಂ ಮ್ಹಾಕಾ ತ್ಯಾ ವಾಚ್ಪ್ಯಾಲಾಗಿಂ ವಿಚಾರ್ಚಿ ಗರ್ಜ್ ಆಸಾ". ತ್ಯೇ ಉಪ್ರಾಂತ್ ತ್ಯಾ ಮಹಾನ್ ಬರಯ್ಣಾರಾನ್ ಸರ್ವಾಂಕ್ ಸಾಂಗೊಂಕ್ ಧರ್ಲೆಂ "ವಲ್ಲಿನ್ ಕರಯ್ಲಾಂ, ವಲ್ಲಿಕ್ ಮಾಲ್ಘಡ್ಯಾ ಬರಯ್ಣರಾಂಕ್ ಮಾನ್ ದೀನಾ" ಮ್ಹಣ್.
ದುಸ್ರೆಂ - ಅನ್ಯೇಕ್ಲ್ಯಾ ಮಹಾನ್ ಬರಯ್ಣಾರಾಚ್ಯಾ ಸಂದರ್ಶನಾಚೆರ್ ಸಭಾರ್ ಸವಾಲಾಂ ಥೊಡ್ಯಾ ವಾಚ್ಪ್ಯಾಂನಿ ಬರಯಿಲ್ಲಿಂ ಹಾಂವೆಂ ಥೊಡಿಂ ಪರ್ಗಟ್ ಕೆಲಿಂ. ಸಮಾಜೆ ಮುಕಾರ್ ಏಕ್ ಉಲವ್ಪ್ ಆನಿ ಮ್ಹಜೆಲಾಗಿಂ ಅನ್ಯೇಕ್ ಉಲವ್ಪ್ - ಅಸಲೆಂ ದೊಡೆಂ ಧೋರಣ್ ಹೊ ಕಿತ್ಯಾಕ್ ಕರ್ತಾ ಮ್ಹಣ್ ಮ್ಹಾಕಾ ಸಮ್ಜಾನಾ. ತುರಂತ್ ಮ್ಹಾಕಾ ಹಾಚೆಂ ತಿಕ್ಶೆಂ ಇಮೇಯ್ಲ್ ಆಯ್ಲೆಂ; "ತುವೆಂ ತುಜ್ಯಾ(?) ವಾಚ್ಪ್ಯಾಂಕ್ ಧರ್ನ್ ಅಸಲಿ ಪ್ರತಿಕ್ರಿಯಾ ದೀಶೆಂ ಕೆಲಾಂ". ತಾಚ್ಯಾ ಇಮೇಯ್ಲಾಸವೆಂ ಎಕಾ ಬರವ್ಪಿಣೆನ್ ಅಪ್ಲಿ ಪ್ರತಿಕ್ರಿಯಾ ಸಯ್ತ್ ಧಾಡ್ಲಿ "ಆಯ್ಚಿಂ ಥೊಡಿಂ ಭುರ್ಗಿಂ ಶೋಪಿಂಗ್ ಮಾಲ್-ಮಲ್ಟಿಪ್ಲೆಕ್ಸಾಂನಿ ಭಂವ್ತಾತ್ ಮ್ಹಣ್ ಸರ್ವ್ ಭುರ್ಗಿಂ ತಶಿಂ ಮ್ಹಣ್ ಸಾಂಗ್ಚೆಂ ಬರೆಂ ನ್ಹಯ್" ಅಶೆಂ ತಿಣೆಂ ಬರಯಿಲ್ಲೆಂ ಇಮೇಯ್ಲ್ ಆಸಾ ತಶೆಂ ತಾಕಾ ಧಾಡ್ಲೆಂ (ಕೊಣಾಚೆಂ ಮ್ಹಣ್ ತಾಕಾ ಸಾಂಗ್ಲೆಂ ನಾ).
ಅಸಲೆ ಸಭಾರ್ ಧಾಖ್ಲೆ ಹಾಂಗಾಸರ್ ದಿವ್ಯೆತಾ, ಪುಣ್ ಲಿಸಾಂವ್; ಆಮ್ಚ್ಯಾ ಖಂಚ್ಯಾಯ್ ಬರಯ್ಣಾರಾಕ್, ತಾಂಕಾಂ ಫುಗಾರ್ನ್ ಬರಯ್ಜೆ, ಆನಿ ತಿ ಮಾತ್ರ್ ಪ್ರತಿಕ್ರಿಯಾ. ಆಮ್ಚ್ಯಾ ಬರ್ಪಾಂಚೆರ್ ಕೊಣೆಂಯ್ ಠೀಕಾ ಕೆಲಿ ತರ್ ತಿ ಸಂಪಾದಕಾಂನಿ ಕೆಲ್ಲಿ ಘುಟ್ಮಳ್. ಸತ್ ಸಾಂಗ್ಚೆಂ ತರ್ ಆಯ್ಲೆವಾರ್ ಹಾಂವೆಂ ದಾಯ್ಜಾಚೆರ್ ಖಂಚ್ಯಾಯ್ ಬರ್ಪಾಂಚೆರ್ ಆಯಿಲ್ಲಿ ಠೀಕಾ ಪರ್ಗಟುಂಚೆಂ ರಾವಯ್ಲಾಂ. ಕಿತ್ಯಾಕ್ ಆಮ್ಕಾಂ ಸರ್ವಾಂನಿ ಫಕತ್ತ್ ಧುಂಪವ್ನ್ ಬರಯ್ಜೆ - ಅನಿ ಅಸಲ್ಯಾ ಖಾಸ್ತಾಚೆಂ ಚಿಂತಾಪ್ ಚಿಂತೆಲೆ ಕೊಂಕ್ಣೆಚೆ ಬರಯ್ಣಾರ್/ಕವಿ/ವಿಮರ್ಶಕ್ ತರ್ ಕೊಂಕ್ಣೆಚೊ ಫುಡಾರ್ ಕಿತ್ಲೊ ಸೊಭಿತ್ ಮ್ಹಣ್ ಅಂದಾಜ್ ಕರಾ. ಮ್ಹಳ್ಯಾರ್ ಆಮ್ಚೆಂಚ್ ಸಾರ್ಕೆಂ ಆನಿ ಹೆರಾಂಚೆಂ ಸರ್ವ್ ಸಾರೆಂ. ಹಾಂತುಂ ವಿಮರ್ಶಕ್ ಸಯ್ತ್ ಅಪ್ವಾದ್ ನ್ಹಯ್ ಮ್ಹಳ್ಳೆಂ ಸತ್ ಎಚ್ಚೆಮಾನ್ ರುಜು ಕೆಲಾಂ.
ಅಖ್ರೇಚೊ ಬದ್ನಾಮ್ ಎಚ್ಚೆಮಾನ್ ಘಾಲಾ, ’ನಿಷ್ಪಕ್ಶ್, ನಿಶ್ಟುರ್, ನಿರ್ಭೀತ್’ ಮ್ಹಣ್ ಹಾಣೆಂಚ್ ವೊಲಾಯಿಲ್ಲ್ಯಾ ಮ್ಹಜ್ಯಾ ಸಂಪಾದಕಿಯಾಂತ್ ಬರಯಿಲ್ಲ್ಯಾ ಉತ್ರಾಂಚೆರ್; ಹಾಕಾ ಅಜೂನ್ ’ಆಮಿ ಕರ್ಯಾಂ’ ಆನಿ ’ತುಮಿ ಕರಾ’ ಹ್ಯಾ ದೋನ್ ವಾಖ್ಯಾಂ ಮಧ್ಲೊ ಫರಕ್ ಕಳಿತ್ ನಾ. ಹಾಂವೆಂ ಬರಯ್ಲಾಂ; ’ಆಮಿ ಕೊಣಾಚೆಂ ಶೆಣ್ ಮ್ಹಣ್ ದುರ್ಸೊಂಚೆಂ ನಾಕಾ, ಬಗಾರ್ ಆಮಿ ಅಮೃತ್ ರಚ್ಯಾಂ’. ಹಾಂಗಾಸರ್ ಆಮಿ ಸಭ್ದಾಂತ್ ಹಾಂವ್ಯೀ ಎಕ್ಲೊಂ. ತಶೆಂ ಆಸ್ತಾಂ ಎಚ್ಚೆಮಾನ್ "ಸರ್ಕಸ್ ಬರೆಂ ನಾ ಮ್ಹಣ್ತೆಲ್ಯಾಂನಿ ಸರ್ಕಸ್ ಕರ್ನ್ ಧಾಖಂವ್ಚಿ ಗರ್ಜ್ ಆಸಾಗಿ?" ಮ್ಹಳ್ಳೆಂ ಸವಾಲ್ ಕೆಲಾಂ. ಭಿಲ್ಕುಲ್ ಗರ್ಜ್ ನಾ ಎಚ್ಚೆಮ್. ಪುಣ್ ಅಶೆಂ ಕೊಣ್ ಸಾಂಗ್ತಾ ತೆಂ ಪ್ರಮುಖ್. ಜರ್ ತರ್ ಏಕ್ ವೀಕ್ಶಕ್ ತಶೆಂ ಸಾಂಗ್ತಾ ತರ್ ತಾಣೆಂ ಸರ್ಕಸ್ ಕರ್ನ್ ಧಾಖಂವ್ಚಿ ಗರ್ಜ್ ನಾ. ಜರ್ ತರ್ ತೊ ಸರ್ಕಸಾಚೊ ಪಂಡಿತ್ ಜಾವ್ನ್ ಉಲಯ್ತಾ ತರ್, ತಾಕಾ ಸರ್ಕಸ್ ಕರ್ನ್ ಧಾಖಯ್ಜೆ ಪಡಾತ್. ಜಿಣ್ಯೆಂತ್ ರಾಂದಾಪ್ ಕರಿನಾತ್ಲ್ಲ್ಯಾನ್ ರಾಂದ್ಪಾಸ್ಪರ್ಧ್ಯಾಚೊ ಜಡ್ಜ್ ಕಸೊ ಜಾಂವ್ಚೆಂ? ಜಿಣ್ಯೆಂತ್ ಕ್ರಿಕೆಟ್ ಖೆಳೊಂಕ್ ನೆಣಾಸ್ಚೊ ಕೋಚ್ ಜಾಂವ್ಕ್ ಸಕ್ತಾ? ಎಚ್ಚೆಮಾಚೆಂ ಮುಕ್ತ್ ಉಲವ್ಪಾಂತ್ ಸುರ್ವಾತ್ ಕರ್ತಾ ಏಕ್ ವಾಚ್ಪಿ ಜಾವ್ನ್, ಪುಣ್ ಅಖೇರಿಂತ್ ವಿಮರ್ಶಕಾಚೆರ್ ಬರಯಿಲ್ಲೆಂ ಉತಾರ್ ಆಪ್ಣಾಚೆರ್ ವೋಡ್ನ್ ಘೆತಾ. ಹೆಂ ಸವಾಲ್ ವಿಮರ್ಶಕ್ ಎಚ್ಚೆಮಾಕ್ ಶಿವಾಯ್ ವಾಚ್ಪಿ ಎಚ್ಚೆಮಾಕ್ ನ್ಹಯ್.
ಕೊಂಕ್ಣಿ ಸಾಹಿತ್ಯಾಂತ್ ಬದ್ಲಾವಣ್ ಜಾಯ್ಜಯ್ ಮ್ಹಣ್ ಸರ್ವ್ ಸಾಂಗ್ತಾತ್, ಕೊಂಕ್ಣೆಂತ್ ವೃತ್ತಿಪರತಾ ಅಜೂನ್ ನಾ (ವ ಅಸ್ಲ್ಯಾರೀ ತಿ ಥೊಡ್ಯಾಂಕ್ ಮಾತ್ರ್), ಆನಿ ಆಮ್ಚೆ ಚಡ್ತಾವ್ ಸಂಸ್ಥೆ ತಾಂಚ್ಯಾ ತಾಂಕಿಚೊ ವಾವ್ರ್ ಕರ್ತಾ ತರ್ಯೀ ಹಾಂಗಾಸರ್ ವಿಶೇಸ್ ಬದ್ಲಾವಣ್ ಆಯಿಲ್ಲಿ ನಾ. ಕಿತ್ಯಾಕ್ ಮ್ಹಳ್ಯಾರ್ ಹಾಂಗಾಸರ್ ಕೊಣ್ಯೀ ಕೂಲ್ ಜೊಡಿನಾ, ಹ್ಯಾ ಕಾಮಾಂನಿ ಕೊಣಾಚೆಂಯ್ ಪೊಟ್ ಭರಾನಾ. ಆಮ್ಚ್ಯಾ ಸಂಸಾರಾಂತ್ ಸಮಸ್ಸೆ ಆಸಾತ್, ಆಸ್ತೆಲೆ, ಪುಣ್ ಸಮಸ್ಸೆ ಆಸಾತ್ ಮ್ಹಣೊನ್ ಸಂಸಾರ್ ಹುಲ್ಪಾಂವ್ಚೆಂ ಚಿಂತಾಪ್ ಆಣ್ವೆಂ ನಾಸ್ತಾಂ ಆನಿ ಕಿತೆಂ?. ಹರ್ಯೆಕಾ ಸಮಸ್ಸ್ಯಾಂಕ್ ಜೊಕ್ತೊ ಪರಿಯಾರ್ ಆಸ್ತಲೊ, ಆಮಿ ಸಾಹಿತ್ಯಾಚ್ಯಾ ಸಮಸ್ಸ್ಯಾಚೆರ್ ಪರಿಯಾರ್ ಸೊಧ್ಚೊ ತರ್, ತ್ಯೊ ವಾಟೊ ತಯಾರ್ ಕರಿಜಾಯ್, ವಾ ಕರ್ತೆಲ್ಯಾಂಕ್ ಪಾಟಿಂಬೊ ದೀಜಯ್ ಶಿವಾಯ್ ಮತಿಕ್ ಆಯಿಲ್ಲೆಂ ಬರಂವ್ಚೆಂ, ತೊಂಡಾಕ್ ಆಯಿಲ್ಲೆಂ ಉಲಂವ್ಚೆಂ ಆಲ್ಬೆಂ/ಅಣ್ವೆಂ ಚಿಂತಾಪ್ ನಾಸ್ತಾಂ ಆನಿ ಕಿತೆಂ?
ಕೊಂಕ್ಣಿ ಸಾಹಿತ್ಯಾಚ್ಯಾ ಬರೆಪಣಾಪಾಸೊನ್ ಮಿನತ್ ಕರ್ತೆಲೆ ಸಭಾರ್ ಆಸಾತ್, ತಾಂಚಿಂ ಥೊಡ್ಯಾಂಚಿಂ ನಾಂವಾಂ ತರ್ಯೀ ಹಾಂವೆಂ ಕಾಡಿಜಯ್ಚ್ಚ್; ಡಾ|ಎಡ್ವರ್ಡ್ ನಜ್ರೆತ್. ವೃತ್ತೆನ್ ತೊ ಏಕ್ ದೊತೊರ್, ತರ್ಯೀ ಕೊಂಕ್ಣಿ ಸಾಹಿತಾಕ್ ತಾಣೆಂ ದೀವ್ನ್ ಆಸ್ಚಿ ದೇಣ್ಗಿ ಕೊಣಾಕೀ ಲಜೆರ್ ಘಾಲ್ಚೆ ತಸ್ಲಿ. ಮಾಚ್ಚಾ ಮಿಲಾರ್ - ವೃತ್ತೆನ್ ಬ್ಯಾಂಕ್ ಆಫಿಸರ್, ಪುಣ್ ಕೊಂಕ್ಣಿ ಸಾಹಿತಾಕ್ ತಾಣೆ ದೀವ್ನ್ ಆಸ್ಚೊ ವಾವ್ರ್ ವಾಖಣ್ಣೆಕ್ ಫಾವೊ. ಅಸಲೆಚ್ಚ್ ಹೆರ್ ಸಭಾರ್ ಆಸಾತ್; ವಲ್ಲಿ ವಗ್ಗ ವೃತ್ತೆನ್ ಇಂಡಸ್ಟ್ರಿಯಲಿಸ್ಟ್, ದೊ|ಜೆರಿ ನಿಡ್ಡೋಡಿ ವೃತ್ತೆನ್ ಪ್ರಾಧ್ಯಾಪಕ್, ರೆಗಾಮ್ ತಾಕೊಡೆ ಏಕ್ ಪ್ರಾಧ್ಯಾಪಕ್, ತರ್ಯೀ ಹಾಂಣಿ ಕೊಂಕ್ಣೆಕ್ ದಿಲ್ಲಿ/ದೀವ್ನ್ ಆಸ್ಚಿ ದೇಣ್ಗಿ ಜಾಯ್ತಿ ಆಸಾ. ಹಿಂಚ್ ನ್ಹಯ್, ಹೆರ್ ಸಭಾರ್ ಆಸಾತ್; ದೊ|ವಿಲ್ಲಿ ಸಿಲ್ವಾ, ಮಾ|ಪ್ರತಾಪ್ ನಾಯ್ಕ್, ಹಾಣಿಂ ಕೆಲ್ಲೊ/ಕರುನ್ ಆಸ್ಚೊ ವಾವ್ರ್ ಕೊಣಾಯ್ಕೀ ದಿಸಾನಾ?. ಗ್ಲೇಡಿಸ್ ರೇಗೊ, ಜೆರಿ ಕುಲ್ಶೇಕರ್ ತಸಲ್ಯಾಂನಿ ಪರ್ಗಾಂವಾಂತ್ ಕೆಲ್ಲೊ ವಾವ್ರ್ ಆಮಿ ಚಿಲ್ಲರ್ ಮ್ಹಣ್ಚೊ?. ಅಸಲ್ಯಾಂನಿ ಕೊಂಕ್ಣಿ ವಾವ್ರ್ ಕೆಲಾ/ಕರುನ್ ಆಸಾತ್ ತರ್ ಭಿಲ್ಕುಲ್ ಕಸ್ಲ್ಯಾಯ್ ನಾಂವಾಚ್ಯಾ/ಮಾನಾಚ್ಯಾ ಅಂಗಲಾಪಾನ್ ನ್ಹಯ್. ಪುಣ್ ಆಜ್ ಪರಿಗತ್ ಮಾತ್ಶಿ ಸುಧಾರ್ಲ್ಯಾ, ಅಸಲ್ಯಾ ವಾವ್ರಾಡ್ಯಾಂಕ್ ಕೊಂಕ್ಣಿ ಲೋಕ್ ವಳ್ಕತಾ, ಮಾತ್ ದಿತಾ. ಆಜ್ ಜರ್ ಅಸಲ್ಯಾ ವ್ ಮಾನ್ ಮೆಳ್ತಾ ತರ್ ಪೊಡ್ಕಾಣಿ ಕಿತ್ಯಾಕ್?. (ಆಮ್ಚ್ಯಾ ನಾಪಾಸ್ ಬುದಿಂಕ್ ಜರ್ ಸಮಾಜ್ ಪಯ್ಸ್ ಕರ್ತಾ ತರ್ ತೆಂ ಆಮ್ಚೆಂ ಉಣೆಂಪಣ್ ಶಿವಾಯ್ ಸಮಾಜೆಚಿ ಚೂಕ್ ನ್ಹಯ್) ಆಮ್ಕಾಂ ಜೊಕ್ತ್ಯಾಂಕ್ ಮಾನ್ ದೀಂವ್ಕ್ ನಾಕಾ ತರ್ ಕಾಂಯ್ ವ್ಹಡ್ ನಾ. ಪುಣ್ ಮಾನ್ ಕಾಡ್ಚೆಂ ಹಕ್ಕ್ ಆಮ್ಕಾಂ ಕೊಣೆಂ ದಿಲಾಂ? ಹಾಂಚೆರ್ ಕೀಳ್ ರಿತಿಚೆಂ ಉಲವ್ಪ್/ಬರವ್ಪ್ ಉಲವ್ನ್/ಬರವ್ನ್ ಆಮ್ಕಾಂ ಆಮಿ ಪಂಡಿತ್ ಮ್ಹಣ್ ಲೆಖ್ಚ್ಯಾಚಿಂ ನಾಕ್ಶೆಇಡ್ಯಾಂತ್ ಪುಣಿಂ ಇಲ್ಲಿ ಲಜ್ ಆಸಾಗೀ ಮ್ಹಳ್ಳೆಂ ಸವಾಲ್.
ಆತಾಂ ಕೊಣ್ಯೀ ವಿಚಾರಿತ್, ’ಫಕತ್ತ್ ಕೊಂಕ್ಣಿ ವಾವ್ರ್ ಕೆಲಾ ದೆಕುನ್ ತಾಂಚೆಂ ಸಾಹಿತ್ ಉಂಚ್ಲೆಂಗೀ?’. ಕೊಣ್ ಮ್ಹಣ್ತಾಕೀ ಕೊಂಕ್ಣಿ ವಾವ್ರ್ ಕೆಲ್ಲ್ಯಾಂಚೆಂ ಸಾಹಿತ್ ಉಂಚ್ಲೆಂ ಮ್ಹಣ್? ಸಾಹಿತಾಚಿ ಮಾಪ್ಣಿ ಏಕ್ ವೆಗ್ಳೊಚ್ ವಿಶಯ್ ಆನಿ ತೊ ಮಾಪ್ ಕರ್ಚ್ಯಾ ಘಡ್ಯೆ ಆಮಿ ನಿರ್ದಯ್ ಜಾವ್ನ್ ದುದಾಕ್ ದೂದ್ ಮ್ಹಣ್ಯಾಂ ಆನಿ ದಿಕಾಕ್ ದೀಕ್ ಮ್ಹಣ್ಯಾಂ. ಆಮಿ ಸಾಹಿತ್ಯಾಚೆರ್ ಮಾಪನ್ ಕರ್ಚ್ಯಾ ಸಂಧರ್ಭಾರ್ ತೆಂ ಜರೂರ್ ಕರ್ಯಾಂ, ಹಾಂಗಾಸರ್ ಕಸಲಿಂಚ್ ಪೊಕೊಳ್ ಸಿಂತಿಮೆಂತಾಂ ಹಾಡ್ಚಿಂ ನಾಕಾತ್. ಪುಣ್ ಹೆರ್ ಸರ್ವ್ ಸಂಧರ್ಭಾಂನಿ ಹರ್ಯೆಕ್ಲ್ಯಾಂಚೆರ್ ಕೀಳ್ ಮಾಪಾಚೆಂ ಉಲವ್ಣೆಂ, ಅಮಿಂಚ್ ಪಂಡಿತ್, ಅಮಿಂಚ್ ಸಾರ್ಕೆಂ ಆನಿ ಹೆರಾಂ ಸರ್ವ್ ಕೀಳ್ ಮ್ಹಣ್ ಲೆಖ್ಚೆಂ, ನಾಕಾ ಜಾಲ್ಲಿಂ ಇಮೇಯ್ಲಾಂ, ಎಸ್ಸೆಮೆಸ್ಸಾಂ ಕರ್ಚಿಂ, ಕಾರ್ಟುನಾಂ ಕರ್ಚಿಂ ಆಮ್ಕಾಂ ಸೊಭ್ ದಿತಾತ್? ನಾಂತ್ ತರ್ ಆಯ್ಲೆವಾರ್ ಝೆಲೊ ಪತ್ರಾಂತ್ ಬೋಳ್ ತಕ್ಲೆಚ್ಯಾ ಸಾಹಿತಿನ್, ’ಶಿರಾಪ್’ ಬೂಕ್ ಹಾತಿಂ ಘೆವ್ನ್ ಬೊಸ್ಚೆಂ ಪಿಂತುರ್ ಕಿತ್ಯಾಕ್ ಸೊಡಯ್ಲಾಂ? ಹೆಂಚ್ ಪಿಂತುರ್ ಆಮ್ಚ್ಯಾ ಬಾಪಾಯ್ಚೆರ್ ಆಮಿ ಸೊಡಯ್ತ್ಯಾಂವ್? ವಾ ಹೆರಾಂ ಕೊಣೆಂಯ್ ಸೊಡಯಿಲ್ಲೆಂ ತರ್ ಆಮ್ಕಾಂ ಕಿತೆಂ ಭಗ್ತೆಂ? ಹೆಂ ಚಿಂತ್ಲಾಂ?
ಕಾನಡಿಂತ್ ಅಶೆಂ ಆಸಾ ದೆಕುನ್ ಕೊಂಕ್ಣೆಂತ್ ಅಶೆಂ ಜಾಯ್ ಮ್ಹಣ್ ಹಿಂ ಸಾಂಗ್ತಾತ್. ಕಾನಡಿಂತ್ ವಿಮರ್ಶಕ್ ಅಶೆಂ ಕರ್ತಾತ್, ತಶೆಂ ಕರ್ತಾತ್ ಮ್ಹಳ್ಳೊ ಭುತ್ ಹಾಂಚ್ಯಾ ಆಂಗಾರ್ ಆಯಿಲ್ಲೊ ಅಜೂನ್ ವಚೊಂಕ್ ನಾ. ಕಾನಡಿಂತ್ ಜಾಯ್ ಆಸ್ಚೆಂ ಸರ್ವ್ ಕೊಂಕ್ಣೆಂತ್ ಜಾಯ್ ಮ್ಹಣ್ತಾತ್ ತರ್ ಕಾನಡಿಂತ್ ಆಸ್ಚೆಂ ಪುಣ್ ಕೊಂಕ್ಣೆಂತ್ ನಾತ್ಲ್ಲೆವಿಶಿಂ ಹಾಂಚೆಂ ಗಮನ್ ಕಿತ್ಯಾಕ್ ವಚಾನಾ?
ವಿಮರ್ಸೊ/ಖೊಡಿ ಕಾಡ್ಚ್ಯಾ ಪಾಟ್ಲ್ಯಾನ್ ದೋನ್ ಪ್ರಮುಖ್ ಇರಾದೆ ಆಸ್ತಾತ್; ಪಯ್ಲೊ - ಹುಸ್ಕೊ, ದುಸ್ರೊ - ಫಕತ್ತ್ ದುರ್ಸೊಂಕ್. ಹಾಂಗಾಸರ್ ಆಮ್ಕಾಂ ಹುಸ್ಕೊ ಆಸೊನ್ ಆಮಿ ವಿಮರ್ಸೊ ಕರ್ಚೊಗೀ ವಾ ಕೊಣಾಕ್ಗೀ ಅಮಿ ಅಪ್ವಂತ್/ಮಹಾನ್ ಮ್ಹಣ್ ಧಾಖಂವ್ಚ್ಯಾಕ್ ಹೆರಾಂಕ್ ಲ್ಹಾನ್ ಧಾಖಂವ್ಚ್ಯಾ ಇರಾದ್ಯಾನ್? ಆಮ್ಕಾಂ ಖರೊ ಹುಸ್ಕೊ ಆಸಾ ತರ್, ಹೆರಾಂನಿ ಕೆಲ್ಲಿಂ ಬರಿಂ ಕಾಮಾಂ ಕಿತ್ಯಾಕ್ ದಿಸಾನಾಂತ್? ಆಮಿಂ ಎಕಾಮೆಕಾ ಜೊಕ್ತೊ ಮಾನ್ ಕಿತ್ಯಾಕ್ ದೀನಾಂವ್?
ಮಾನ್ ದಿಂವ್ಚೆವಿಶಿಂ ಎಚ್ಚೆಮಾಲಾಗಿಂ ಮುಖಾಮುಖಿ ಕೆಲ್ಲೆವೆಳಾರ್ ಎಚ್ಚೆಮಾಚಿ ಜವಾಬ್ ಅಶಿ "ಮಾನ್ ದಿಂವ್ಚೆಂ ಕಾಮ್ ಕಥೊಲಿಕ್ ಸಭೆಚೆಂ, ಆಮ್ಚೆಂ ನ್ಹಯ್". ತೆದ್ನಾಂ ಎಚ್ಚೆಮಾಕ್ ಸವಾಲ್ ಕೆಲೆಂ "ತುಜ್ಯಾ ಆವಯ್-ಬಾಪಾಯ್ಕ್, ತುಜ್ಯಾ ಬಾಯ್ಲ್-ಭುರ್ಗ್ಯಾಂಕ್, ತುಜ್ಯಾ ಸಯ್ರ್ಯಾಂ-ಮೊಗಾಚ್ಯಾಂಕ್ ಕೊಣ್ ಕಥೊಲಿಕ್ ಸಭಾ ಮಾತ್ರ್ ಮಾನ್ ದಿತಾಗಿ?". ಮ್ಹಳ್ಯಾರ್ ಎಚ್ಚೆಮಾಕ್ ’ಮಾನ್’ ಮ್ಹಳ್ಯಾರ್ ಫಕತ್ತ್ ವೆದಿಚೆರ್ ಆಪವ್ನ್ ಫುಲಾಂ ಘಾಲ್ಚೆಂ ಮಾತ್ರ್ ದಿಸ್ತಾ. ಅಸಲ್ಯಾ ಅಶೀರ್ ಚಿಂತ್ಪಾನ್ ಕೆಲ್ಲೆ ವಿಮರ್ಶೆ ಕಿತ್ಲ್ಯಾ ಮೊಲಾಚೆ ವ ಮಹತ್ವಾಚೆ? ಅಸಲ್ಯಾ ಪಿಡೆಸ್ತ್ ವಿಮರ್ಶ್ಯಾಂತ್ ಖಂಚಿ/ಕೊಣಾಚಿ ಕೊಂಕ್ಣಿ ಉದ್ದಾರ್ ಜಾಯ್ತ್?
ಪಿಚ್ಚರಾಕ್ ಗೆಲ್ಲೆ ಕೊಣೀ ಸಾಂಗ್ತಿತ್ ’ಎಂಚಿ ಸಾವ್ದ ಪಿಚ್ಚರ್ಯಾ’ - ತಿ ತಾಂಚಿ ಮನೋಗತ್/ಕ್ಲಾಸ್. ಪುಣ್ ಆಮಿ ಖಂಚ್ಯಾ ಹಂತಾರ್ ಆಸಾಂವ್? ಆಮ್ಚೆಂ ಆನಿ ತಾಂಚೆಂ ಹಂತ್ ಏಕ್? ಆಮಿ ಸಾಹಿತಿ ತರ್ ಆಮಿ ವಾಪಾರಿಜಯ್ ಜಾಲ್ಲಿಂ ಉತ್ರಾಂ ಆನಿ ತಾಂಣಿ ವಾಪಾರ್ಲೆಲಿಂ ಉತ್ರಾಂ ಏಕ್ಚ್? ಆಮ್ಕಾಂ ಆನಿ ತಾಂಕಾಂ ಕಾಂಯ್ ತಫಾವತ್ ನಾ? ಆಮ್ಕಾಂ ಅಸಲೆಂ ಸಾಹಿತ್ಯ್ ಜಾಯ್?
ಸ್ಟೇನ್ ಅಗೇರಾಚಿ ಪ್ರತಿಕ್ರಿಯಾ ವಾಚಾ, ಕಿತ್ಲೆ ಪ್ರಭುದ್ದ್ ವಿಚಾರ್ ತಾಂತುಂ ಆಸಾತ್, ಆಯ್ಲೆವಾರ್ ಜೆರಿ ರಾಸ್ಕಿಞಾನ್ ಸುರು ಕೆಲ್ಲೆಂ ಅಂಕಣ್ ’ಭಗ್ಲ್ಲೆಂ ಭಗ್ಲ್ಲೆಪರಿಂ’ ವಾಚಾ, ತಾಂತುಂ ತಾಣೆಂ ವಾಪಾರ್ಲ್ಲಿ ಭಾಸ್ ಪಳೆಯಾ, ಕಿತ್ಲಿ ಪ್ರಭುದ್ದ್, ಕಿತ್ಲಿ ನಾಜೂಕ್? ಪುಣ್ ದೊನಾಂಯ್ತೀ ಎಕ್ಚ್ಚ್ ವಿಚಾರ್, ಕೊಂಕ್ಣೆಂತ್ ಬರಯ್ಣರಾಂಚೆಂ ವಾಚಾಪ್ ಪಾವಾನಾ, ಕೊಂಕ್ಣಿ ಸಾಹಿತ್ ಜೊಕ್ತ್ಯಾ ಪಾಂವ್ಡಾರ್ ಯೇಂವ್ಕ್ ನಾ. ಹೆಂ ಸರ್ವಾಂಕೀ ಕಳಿತ್ ಆಸಾ. ಪುಣ್ ಹಾಚ್ಯಾಕೀ ಮುಖ್ಲೆಂ ಚಿಂತುಂಕ್ ಕೊಣಾಕ್ಯೀ ನಾಕಾ. ಕಿತ್ಯಾಕ್ ತೆಂ ಆಮ್ಚೆಂ ಕಾಮ್ ನ್ಹಯ್ ಮ್ಹಳ್ಳೆಂ ಬೇಜವಭ್ದಾರಿ ಚಿಂತಾಪ್.
ತರ್ ತೆಂ ಚಿಂತಾಪ್ ಕೊಣಾಚೆಂ? ಪತ್ರಾಚೆಂ? ಪತ್ರ್ ಚಲಯ್ತೆಲ್ಯಾಂಚೆಂ? ಸಂಪಾದಕಾಂಚೆಂ? ಮಾಯ್ಗಾಂವ್ಚ್ಯಾಂಚೆಂ? ಗಲ್ಫಾಗಾರಾಂಚೆಂ? ಸಂಸ್ಥ್ಯಾಂಚೆಂ? ಆಮಿ ಹಾಂಚೆ ಪಯ್ಕಿಂತ್ಲೆ? ವಾ ಭಾಯ್ಲೆ? ಆಮಿ ಕೊಂಕ್ಣೆ ಖಾತಿರ್ ಕಿತೆಂಯ್ ಕರುಂಕ್ ಸಾಧ್ಯ್ ಆಸಾ? ಕೆಲಾಂ? ಕರ್ತಾಂವ್? ಆಮಿ ಕೆಲ್ಲ್ಯಾಚೆರ್ ಆಮ್ಕಾಂ ಸಮಧಾನ್ ಆಸಾ? ಕೊಂಕ್ಣೆಕ್ ಕಾಂಯ್ ಫಾಯ್ದೊ ಆಸಾ? ಹ್ಯೆ ವಿಚಾರಾಂಚೆರ್ ಆರ್ಸೊ ಧರ್ಲಾ?
ಕೊಂಕ್ಣಿ ಸಾಹಿತಾಚೊ ಹುಸ್ಕೊ ಆಸ್ಚ್ಯಾಂನಿ ಏಕ್ ಸಂಗತ್ ಉಡಾಸಾಕ್ ದವರ್ಚಿ ಭೋವ್ ಗರ್ಜ್ ಆಸಾ; ಆಮಿ ಸಾಂಗ್ಚೆಂ ವೇದಾಂತ್ ತರ್ಯೀ ಸಾಂಗ್ಚಿ ರೀತ್ ಸಾರ್ಕಿ ನಾಂ ತರ್, ತೆಂ ಸಾಂಗೊನ್ ಕಾಂಯ್ ಫಾಯ್ದೊ ನಾ. ಜಶೆಂ ಗಡಂಗಾಂನಿ ಪಿಯೆವ್ನ್ ಟಾಯ್ಟ್ ಜಾವ್ನ್ ಖಣಿಂತ್ ಪಡೊನ್ ಥೊಡೆ ಸಾಂಗ್ತಾತ್; ಆಮ್ಚೊ ಪ್ರಧಾನ್ ಮಂತ್ರಿ ಪಿಸೊ, ಆಮ್ಚೊ ರಾಜ್ಯಾಚೊ ಮುಖೆಲ್ ಮಂತ್ರಿ ಪಿಸೊ. ಆನಿ ಹುಸ್ಕೊ ಆಸ್ಚಿಂ ಬರ್ಪಾಂ ಜರೂರ್ ತ್ಯಾ ಖಣಿಂತ್ ಪಡೊನ್ ಬೋಬ್ ಘಾಲ್ತೆಲ್ಯಾಚ್ಯಾ ಭಾಸೆಪ್ರಾಸ್ ಉಂಚ್ಲಿಂ ಜಾಂವ್ ಮ್ಹಣ್ ಆಶೆತಾಂ. ನಾಂ ತರ್ ತೆಂ ಮುಕ್ತ್ (ಫ್ರೀ) ಉಲವ್ಪ್ ಆಸ್ಚೆಂ ’ಚೀಪ್ ಉಲವ್ಪ್’ ಮಾತ್ರ್ ಜಾತಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications