ಕವಿತಾकविताPoem
ಸರ್ಯಾಂ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪಿಂತುರಾಚೆರ್ ಪ್ರೇರಣ್ ಜೊಡುನ್ ಕವಿತಾ ಬರಂವ್ಕ್ ’ತಿಂತೆರಾಂತ್ ಪಿಂತುರಾಂ’ ಅಂಕಣಾಕ್ ಭೆಟ್ ದಿ
ಸಕ್ಕಡ್ ಸಾಂಗಾತಾ ಮೆಳ್ಯಾಂ ಸಕ್ಕಡ್ ಲಾಗಿಂ ಸರ್ಯಾಂ ಆಮ್ಚೆ ತಾಳೆ ಏಕ್ ಕರ್ಯಾಂ ಮರಿಯೆಕ್ ಹೊಗಳ್ಸಿಯಾಂ
ಕವಿತಾಕ್ ಸಂದರ್ಭ್: ಮೊಂತಿ ಸಾಯ್ಭಿಣಿಚೆಂ ಫೆಸ್ತ್ (8 ಸಪ್ತೆಂಬರ್)
-ಮ್ಯಾಕ್ಸಿಮ್ ಲೋಬೊ
ಸ್ತ್ರೀ
ಸಂಯ್ಭಾ ತ್ರಾಸ್ ಜಿಣಿಬರ್ ಸೊಸುನ್
ಉಂಚ್ಲೆಂ ರಚನ್ ಗರ್ಭಾಂತ್ ಪೊಸುನ್
ಜೀವ್ ವಿಕಾಸುಂಕ್ ಭುಮಿಚ್ ಕೊಸುನ್
ಭಿಂಯಾಂ ಕಿರ್ಲಯ್ತಾ ಹಿ ಸ್ತ್ರೀ.
ಅಬ್ಳಾಯೆ ಧೊಲಿಂತ್ ಭರ್ಪೂರ್ ಖರ್ಶೆವ್ನ್
ಕಾಮುಕತೆ ಬಿಳಾಂತ್ ಅಪ್ಣಾಕ್ ಹೊಗ್ಡಾವ್ನ್
ಫುಡಾರ್ ಬಾಂದುಕ್ ಜೀವ್ಚ್ ಕೊಸಾವ್ನ್
ರಗ್ತಾನ್ ಪೊಸ್ತಾ ಹಿ ಸ್ತ್ರೀ.
ಕಾಂಟ್ಯಾಂ ಖಟ್ಲ್ಯಾರ್ ರಾತ್ ಫಾಲೆಂ ಕರ್ನ್
ದಿಸಾ ಉಜ್ವಾಡಾರ್ ಜೀವ್ ಗಾಣ್ಯಾಕ್ ದೀವ್ನ್
ವೆಳಾಕಾಳಾ ಪಿಂಪ್ರ್ಯಾಂಕ್ ಪಾನೊ ಚಿಂವವ್ನ್
ವೈಂಕುಟ್ ಬಾಂದ್ತಾ ಹಿ ಸ್ತ್ರೀ.
ಫಳಾನಿಂ ವಾಟ್ಲ್ಲೆಂ ಅಂಬೊಟ್ ಪಿಯೆವ್ನ್
ಝರ್ಲ್ಲ್ಯಾ ಜಿವಾಕ್ ಪಿಡೆನ್ ಗ್ರಾಸುನ್
ಭರ್ಲ್ಲ್ಯಾ ಘರಾಬ್ಯಾ ಎಕ್ಸುರಿ ಕರ್ಗೊನ್
ಸರ್ಗಾ ವಾಟ್ ಧರ್ತಾ ಹಿ ಸ್ತ್ರೀ.
ಹಿ ಸ್ತ್ರೀ,
ಹಿಚೆಂ ಮ್ಹನ್ಶಾರೂಪ್ ಏಕ್ ಭ್ರಮಿದ್,
ಪರತ್ ಪರತ್,
ದೇವ್ ಇಮ್ಮಾನುಎಲ್ ಹ್ಯಾ ಭುಮಿರ್.
-ಓಸ್ಟಿನ್ ಪ್ರಭು, ಚಿಕಾಗೊ
ಸಕ್ಕಡ್ ಸಾಂಗಾತಾ ಮೆಳ್ಳ್ಯಾಂ!
ಕಿತೆಂ ಹುರುಪ್, ಕಿತೆಂ ಉಲ್ಲಾಸ್
ಮೊಂತಿ ಫೆಸ್ತ್ ತೆಂ ಯೆತಾನಾ
ನಿದ್ಚ್ಯಾ ಪಯ್ಲೆಂ ಫುಲಾಂ ಹುಮ್ಟುನ್
ಬೊಶ್ಯೆಂತ್ ಸೊಭೀತ್ ಮಾಂಡುನ್ ದವ್ರುನ್
ನಿದೊಂಕ್ ವೆಚೆಂ ಆಮಿಂ ಸದಾಂ
ಆಮ್ಚ್ಯಾ ಹಿತ್ಲಾಂತ್ ಫುಲಾಂ ನಾಸ್ಲ್ಯಾರ್
ಸೆಜಾರ್ಚ್ಯಾಂಚಿ ವ್ಹಳೂ
ಚೊರುನ್
ದಸ್ಮಿಚೆ ಬೊಂಗೆ ಆದ್ಲ್ಯಾ ದಿಸಾಚ್
ಫುಲ್ಚ್ಯಾ ಪಯ್ಲೆಂಚ್ ಹುಮ್ಟುನ್ ಕಾಡುನ್
ಉದ್ಕಾ ಗೊಬ್ಳ್ಯಾಂತ್ ಫುಲೊಂಕ್
ದವ್ರುನ್
ಸಕಾಳಿಂ ಫುಡೆಂ ವೆಗಿಂಚ್ ಉಟೊನ್
ಪಯ್ಲೆಂ ಬೊಶ್ಯೆಂತ್ಲಿಂ ಫುಲಾಂ ಪಳೆವ್ನ್
ಉಪ್ರಾಂತ್ ತುರ್ಥಾನ್ ದಾಂತ್ ಘಾಸುನ್
ನ್ಹೆಸೊನ್ ವೆಚೆಂ ಬೆಂದುರ್ ಇಗರ್ಜೆಕ್
ಹಾತಿಂ ಬೊಶಿ ಧರುನ್ ವ್ಹಳೂ ವ್ಹಳೂ ಚಲೊನ್
ಸಕ್ಕಡ್ ಸಾಂಗಾತಾ ಮೆಳ್ಳ್ಯಾಂ ಗಾಯನ್ ಗಾಂವ್ಚೆಂ
ಬೊಶ್ಯೆಂತ್ಲಿಂ ಫುಲಾಂ ಏಕಾಮೆಕಾಕ್ ಮಾರ್ಚೆಂ
ಫುಲಾಂ ಉಡವ್ನ್ ಜಾತಚ್ ಆಂಗಾರ್ ಪಡ್ಚೆಂ
ಧರ್ಣಿ ವಯ್ಲಿಂ ತಿಂ ಶಿಂವ್ತಿಂ ವಿಂಚುನ್
ದುಸ್ರ್ಯಾ ದಿಸಾಕ್ ಬೊಶ್ಯೆಂತ್ ಘರಾ ವ್ಹರ್ಚೆಂ
ಸದಾಂಯ್ ಆಮಿಂ ಫುಲಾಂ ವ್ಹೆಲ್ಯಾರ್
ಫೆಸ್ತಾ ದಿಸಾ ಆಮ್ಕಾಂ ಕೊಬು ಮೆಳ್ತಾ
ಕಿತೆಂ ಸಂತೊಸ್, ಕಿತೆಂ ಉಲ್ಲಾಸ್ ಆಮ್ಕಾಂ
ತೊ ಕೊಬು ಘೆವುನ್ ಘರಾ ಯೆಂವ್ಚ್ಯಾಕ್
ಆನಿಂ ಜೆವಾಣ್ ಜಾತಚ್ ಖಾಂವ್ಕ್ ಲಾಗ್ಚ್ಯಾಕ್
-ದಿನಿಜ್ ಮಾರ್ಕುಸ್
ಸಪ್ಣಾಂ
ಚಿಂತಾಂ ಚಿಂತಾಂ ದೆಖ್ಲಿಂ
ಸಪ್ಣಾಂ
ಉಲಯ್ತಾಂ
ಉಲಯ್ತಾಂ ಜಾಲಿಂ ಅಜ್ಯಾಪಾಂ
ಧಾಂವ್ತಾಂ ಧಾಂವ್ತಾಂ
ಉಘಡ್ಯೊ ವಾಟೊ
ಖಿಣಾ ಖಿಣಾಂತ್
ಘಡ್ಲ್ಯೊ ಘಡಿಯೊ
ಪಳೆವ್ನ್
ಪಳೆವ್ನ್ ದೊಳೊ ವೊಳ್ಳೊ
ಚಲ್ತಾಂ ಚಲ್ತಾಂ ದೀಸ್
ಪರ್ತಾಲೊ
ಪಾವೊನ್ ರಾವೊನ್
ವೇಳ್ ಸಂಪ್ಲೊ
ತರ್ಯ್ ಅಖಂಡ್
ರಾವ್ಲೊಂ ಉಭೊ
ಕಸ್ಲೆ ಆಶೆಕ್ ತೊ
ಆಶೆಲೊ?
ವೊತಾ ಗರ್ಮೆನ್
ಘಾಮ್ ಗಳಯ್ಲೊ
ಪಳೆವ್ನ್ ತಾಕಾ ಸುರ್ಯಾ
ಕಾಕುತ್ಲೊ
ಸುರ್ಯಾ ಕಿರ್ಣಾಂನಿ
ಸಾವೊಳ್ ದಿಲೊ
ಅಜ್ಯಾಪಾಂಚೊ ಮಾರುನ್
ವಾರೊ
ಹಿತ್ಲಾಂತ್ ಪಡ್ಲೊ ಫುಲಾ
ತುರೊ
ಸುರ್ಯೊ ಬುಡೊನ್
ಚಂದ್ರೆಮ್ ಉದೆಲೊ
ತರ್ಯ್ ಆಂದ್ಳೊ
ದಾರಾಂತ್ ಉಭೊ
ದಿಸಾಚಿಂ ತಾಕಾ ನೆಕೆತ್ರಾಂ
ದಿಸ್ಲಿಂ
ಸುರ್ಯಾನ್ ಅಪ್ಲಿಂ
ಕಿರ್ಣಾಂ ದಾಂಪ್ಲಿಂ
ಘಡ್ಘಡೊ ನಾಸ್ತಾಂ
ಝಗ್ಲಾಣೆ ಮಾರ್ಲಿ
ಧೊವಾ ಶಿಂಪಿಯಾನ್
ಕರ್ಡಾಂ ಫುಲ್ಲಿಂ
ವಾರ್ಯಾರ್ ಉಭೊನ್
ಘರಾ ಭಾಂದ್ಲಿಂ
ರೆಂವೆಂ ಘರಾ ಲ್ಹಾರಾಂನಿ
ಮೊಡ್ಲಿಂ
ತರ್ಯ್ ಮನಾಂತ್
ಸಪ್ಣಾಂ ಕುಪ್ಶಿಂ
ಜಿವಿಂ ಕರುಂಕ್ ಸಾಧನಾಂ
ನಿಣ್ಯೆಚಿಂ.
SOPNAM
Chinta, chinta deklim sopnam
Uloita, uloita zalim ojeapam
Danvta, danvta ugodleo vatto
Kinna, kinnat godleo godneo
Pollen, pollen dollo vovlo
Cholta, cholta dis portolo
Pavon, ravon veoll somplo
Toruim okhond ravlo ubo
Kosle axek to axelo?.
Vota gormen gam golloilo
Polloun taka surya kakutlo
Surya kirnani savoll dilo
Ojeapancho marun varo
Hatan podlo fula turo
Surya budon chondrim udelo
Toruim andlo darant ubo
Dissachim taka noketra disli
Suryan aplim kirnam dampli
Godd, godd nastana zogla marli
Dova ximpnean kordam ful'lim.
Varear ubon ghara bhandli
Renve ghara lharani modli
Toruim monat sopnam kupxim
Jivim korunk sadnam jinnechi.
- ಆರ್ಯನ್ ತಾಕೊಡೆ
ಮನಾಂ ನವಿಂ ಕರ್ಯಾಂ
ಸಕ್ಕಡ್ ಸಾಂಗಾತಾ ಮೆಳ್ಯಾಂ
ಸಕ್ಕಡ್ ಲಾಗಿಂ ಸರ್ಯಾಂ
ಆಮ್ಚೆ ತಾಳೆ ಏಕ್ ಕರ್ಯಾಂ
ಮರಿಯೆ ಮಾಯೆಕ್ ವ್ಹಡಾ ದಬಾಜ್ಯಾನ್
ಜಲ್ಮಾ ದಿಸಾಚೆ ಶುಭಾಶಯ್ ದಿವ್ಯಾಂ
ವೊಡ್ತಾ ಹಿತ್ಲಾಂನಿ ಧಾಂವ್ಯಾಂ
ಜಿಡ್ಡೆ, ಮಿಠಾಯ್ ಫುಲಾಂ ಎಕ್ಟಾಂಯ್ ಕರ್ಯಾಂ
ಶಿಂವ್ತಿಂ, ಆಬೊಲಿಂ ಸಾಂಗಾತಾಂ ಗುಂತ್ಯಾಂ
ವ್ಹಡಾ ಉಲ್ಲಾಸಾನ್ ಫುಲಾಂ
ಆರ್ಪುನ್
ಮರಿಯೆ ಮಾಯೆಕ್ ಹೊಗಳ್ಸಿಯಾಂ
ಆಂಜಾಳ್ ನೆಣ್ತ್ಯಾ ಭುರ್ಗ್ಯಾಂ ಸವೆಂ
ಗಾಯನ್ ಕರುನ್, ಸಂಗೀತ್ ವ್ಹಾಜವ್ನ್
ಸರ್ಗಿಂ ಮಾಂಯ್ಚಿಂ ಬೆಸಾಂವಾಂ ಘೆವ್ಯಾಂ
ನವ್ ದೀಸ್ ಮಾನ್ ಕರುನ್
ಮರಿಯೆ ಮಾಯೆಕ್ ವಾಖಣುಯಾಂ
ನವಿ ಕಣ್ಶಿ ಆಶಿರ್ವಾದಿತ್ ಜಾಂವ್ಚಾಕ್
ನವೆಂ ಬೆಳೆಂ, ಫಳಾಂ, ಧಾರಾಳ್ ಮೆಳ್ಚ್ಯಾಕ್
ಮರಿಯೆ ಮಾಯೆಕ್ ವಿನತಿ ಕರುಯಾಂ
ನವಿ ತರ್ಕಾರಿ ರಾಂಕುನ್, ನವೆಂ ಜೆವಾಣ್
ಕುಟ್ಮಾಸಂಗಿಂ ಜೆವುನ್, ಮಾಂಯ್ಚಿ
ಪರಬ್ ಕರ್ಯಾಂ
ಗಡ್ದ್ ಗಮ್ಮತ್ ಜೆವಾಣ್ ಕರುನ್
ವೊರ್ನಾ ಬೊಶಿಯೆಂತ್ ಬುಡ್ಲೆಲಿಂ ಬೊಟಾಂ ಲೆಂವುನ್
ರೊಸಾಳ್ ಕೊಟ್ಟಾಚೊ ಶಿರೊ ಚಿಂವೊನ್
ನವ್ಯಾ ಜೆವ್ಣಾಸಂಗಿಂ
ಆಮ್ಚಿಂ ಮನಾಂ ನವಿಂ ಕರುಯಾಂ..
-ವಿನ್ಸಿ ಮೆಲ್ಕಾರ್
ಮೊಂತಿ ಫೆಸ್ತ್ ಆಯ್ಲೆಂ ಮ್ಹಣ್ತಾನಾ
ಸಗ್ಳ್ಯಾ ಘರಾಂ ಘರಾಂನಿ
ಸಬ್ದಾಂ ಗೊಂದೊಳ್
ಘರಾಂತ್ಲಿಂ ಆಯ್ದಾನಾ ದೊರ್ಯಾ ಥಾವ್ನ್ ದೊರ್ಯಾರ್ ಪಾಶಾರ್
ರಾಂದ್ವಯ್ ಕಿತ್ಲ್ಯಾ ನಮುನ್ಯಾಂಚಿ ರಾಂದ್ಚಿ ಮ್ಹಳ್ಳಿ ಖಂತ್
ನೋವ್, ಪಾಂಚ್, ವ ತೀನ್..?
ಲ್ಹಾನ್ ಭುರ್ಗ್ಯಾಂಚೊ ಸಂತೊಸ್ ವರ್ಣುಂಕ್ ಸಕಾನಾತ್ಲ್ಲೊ
ತಾಂಚಿ ದೀಷ್ಟ್ ಫಕತ್ ಫುಲಾಂಚೆರ್
ನಿಸ್ರೊನ್ ಪೆಂಕಾಡ್ ಮೊಡ್ಲ್ಯಾರೀ, ಕಾಂಟೆ ತೊಪ್ಲ್ಯಾರೀ ಫರಕ್
ನಾ
ಫುಲಾಂ ಎಕ್ಟಾಂಯ್ ಕರ್ಚಿ, ಲಾಡು ಖಾಂವ್ಚಿ ಆಶಾ..
ಮಿಸಾ ವೆಳಾರ್ ಪಾದ್ರಿಂಚೆಂ ಲೆಖಾನ್
ಕೊಬು ಹ್ಯಾ ಪಾವ್ಟಿಂ ಕಿತ್ಲೊ ಹಾಡ್ಚೊ
ಚಡ್ ಪಯ್ಶೆ ದಿಲ್ಲ್ಯಾಂಚಿಂ ನಾಂವಾಂ ವಾಚ್ತಾಂ
ಉರುಲ್ಲ್ಯಾಂಕ್ ಕೊಬು ಏಕ್ ಚಡ್ ದಿತಾಂ..
ಪಯ್ಶಿಲ್ಯಾ ಕುಟ್ಮಾಂ ಸಾಂದ್ಯಾಂಕ್
ಮೆತಾತ್ ಕಾಗ್ದಾಂ, ಭಾತಾ ಕಶ್ಯೊ
ಥೊಡೊಚೊ ಸಂತೊಸ್, ಇಲ್ಲಿಶಿಂ ದುಃಖಾಂ
ಉರ್ಲ್ಲೆಂ ಖಂತ್ ಬೆಜಾರಾಯೆಚೆಂ ಗಾಯನ್
ಫೆಸ್ತಾ ದಿಸಾ ಕಸಲೊ ಸಂಭ್ರಮ್
ವಿವಿಧ್ ರಂಗಾಚ್ಯಾ ಫುಲಾಂನಿ ಮರ್ಯೆ ಮಾಯೆಕ್ ಮಾನ್
ಬೆಂಡಾ ಮುಖಾಂತ್ರ್ ಜಲ್ಮಾ ದಿಸಾಚೆಂ ಗಾಯನ್
ನಿಮಾಣೊ ದೀಸ್ ಸಂಪಯ್ತಾತ್ ನೋವ್ ದಿಸಾಚ್ಯಾ ನೊವೆನಾನ್
ಘರಾಂತ್ ಮಾಲ್ಘಡಿಂ ಆಸ್ಲ್ಯಾರ್ ಆಧ್ಲಿ ರಿವಾಜ್
ನಾ ಜಾಲ್ಯಾರ್ ಮೆಲ್ಲ್ಯಾ ಗೆಲ್ಲ್ಯಾಂಚ್ಯಾ ಉಡಾಸಾನ್
ಮಾಗ್ಣ್ಯಾಂ ಮುಖಾಂತ್ರ್ ಪಾಶಾರ್
ಉಪ್ರಾಂತ್ ನವೆಂ ವಾಂಟ್ಚೆಂ, ಗಡ್ದ್ ಜೆವಾಣ್ ಜೆಂವ್ಚೆಂ
ಜಾಯ್ತ್ಯಾ ಕುಟ್ಮಾಂತ್ ನಾ ಸಮಧಾನ್
ರಾಗ್ ಮೊಸೊರ್ ದವ್ರುನ್ ಜಾಲ್ಯಾಂತ್ ವಿಂಗಡ್
ಮರ್ಯೆ ಮಾಯೆ ಆಜ್ ತುಜ್ಯಾ ಜಲ್ಮಾ ದಿಸಾ ತರೀ
ವಿಂಗಡ್ ಜಾಲ್ಲ್ಯಾ ಕುಟ್ಮಾಂಕ್ ಏಕ್ ಕರುನ್
ಕುಟ್ಮಾ ಸಾಂಗಾತಾ ಜೆವಾಣ್ ಸಂಪಯ್ಶೆಂ ಕರ್..
-ವಾಯ್ಲೆಟ್ ಜೆ. ಪಿರೇರಾ
ಕೊಬು
ಆಮಿಂ ವಾಡೊನ್ ವಾಡೊನ್ ಆಯ್ಲ್ಯಾಂವ್
ಪಾಂಚ್ ಫುಟ್ ವಯ್ರ್ ವಾಡ್ಲ್ಯಾಂವ್
ಮೊಂತಿ ಫೆಸ್ತಾಕ್ ಆಯ್ತೆ ಕಿತೆಂ ಜಾಲ್ಯಾಂವ್
ಧನ್ಯಾದ್ವಾರಿಂ ಇಗರ್ಜೆ ಬಾಗ್ಲಾರ್ ಯೇವ್ನ್ ದೆವ್ಲ್ಯಾಂವ್
ಸಪ್ಟೆಂಬರಾಚಿ ತಿ ಆಟ್ ತಾರಿಕ್
ಬಾಳೊಕ್ ಮರ್ಯೆಚಾ ಜಲ್ಮಾದಿಸಾಚೊ ಸಂತೊಸ್
ಫುಲಾಂ ಹಾಡ್ನ್ ಆಯಿಲ್ಲಿ ಭುರ್ಗಿಂ ಇಗರ್ಜೆಕ್
ಉಪ್ರಾಂತ್ ವಾಂಟ್ತಾಲೆ ಆಮ್ಕಾಂ ತ್ಯಾ ಭುರ್ಗ್ಯಾಂಕ್
ಮೀಸ್ ಜಾತಾಚ್ಚ್ ಸುರು ಜಾಲೆಂ ವಾಂಟಾಪ್
ಗೆಲ್ಯಾಂವ್ ಭುರ್ಗ್ಯಾಂ ಸಂಗಿಂ ಘರಾಕ್
ತಾಸುಂಕ್ ಲಾಗ್ಲಿಂ ಆಮ್ಚೆಂ ಅಂಗ್ ಸುರ್ಯೆನ್
ಕುಡ್ಕೆ ಕರ್ನ್ ಆಯ್ತಿಂ ಜಾಲಿಂ ಆಮ್ಕಾಂ ಚಾಬೊಂಕ್
ಚಾಬ್ತಾಂ ಕರ್ತಾಲೊಂ ಹಾಂವ್ ದಾಂತ್ ತಾಂಚೆ ನಿತಳ್
ಪಿಯತಾಲಿಂ ಆಮ್ಚೊ ರೋಸ್ ಅಂಗ್ ಆಮ್ಚೆಂ ಪೀಳ್ನ್
ರೋಸ್ ಸುಕ್ತಾನಾ ಉಡಯ್ಲೆಂ ಆಮ್ಕಾಂ ಕಚ್ರ್ಯಾಕ್
ಆತಾಂ ಯೇವ್ನ್ ಪಾವ್ಲ್ಯಾಂವ್ ಕಾಗ್ದಾಂ ಕರ್ಚಾ ಕಂಪ್ಣೆಕ್
ಎಕ್ಟಾಂಯ್ ಕರ್ನ್ ದವರ್ಲಾ ಆಮಾ ಸರ್ವಾಂಚಿ ಕೂಡ್
ನಾ ತಾಂತು ರೋಸ್, ಫಕತ್ ಉರ್ಲ್ಯಾ ಕೂಸ್
ಯಂತ್ರಾಕ್ ದೀವ್ನ್ ದಿತಲೊ ಆಮ್ಕಾಂ ಕಾಗ್ದಾ ರೂಪ್
ಉರ್ತೆಲ್ಯಾಂವ್ ಸದಾಂಚ್ಚ್ ಸರ್ವಾಂ ಸಂಗಿ ಭಂವೊನ್
ಕೊಬು ಆಮಿಂ ಗೊಡ್ಶೆ ಅಪುಟ್ ಸಾಕ್ರಿಚೆ
ಭುರ್ಗ್ಯಾ ಥಾವ್ನ್ ವ್ಹಡಾಂ ಪರ್ಯಾಂತ್ ರುಚ್ಚೆ
ಮೆಲ್ಯಾನಂತರೀ ಸರ್ವಾಂಚ್ಯಾ ಉಪ್ಕಾರಾಕ್ ಪಡ್ಚೆ
ಆಯ್ಚಾ ದಿಸಾ ಸರ್ವಾಂಕೀ ಸಂತೊಸಾಂವ್ಚೆ
-ನಿರ್ಮಲಾ ಗೋವಿಯಸ್
ಅಮೂಲ್ಯ್ ದೆಣೆಂ
ಮನ್ಶಾಕುಳಾಚೆಂ ಅಮೂಲ್ಯ್ ದೆಣೆಂ
ತಿಚೆಂ ೠಣ್ ಫಾರಿಕ್ ಕೆಲಾಂ ಕೊಣೆಂ?
ಆವಯ್ ನಾತ್ಲ್ಲೆಂ ರಿತೆಂ ಜಿಣೆಂ
ಸಾಳ್ಕಾಚೆಂ ಜೀವನ್ ಸುರ್ಯಾವಿಣೆಂ
ನೋವ್ ಮಯ್ನೆ ಗರ್ಭಾಂತ್ ತಿಚಾ ವ್ಹಾವವ್ನ್
ಭುಂಯ್ ಪಡ್ತಾಂ ದುಃಖ್ ಧಯ್ರಾನ್ ಸೊಸುನ್
ರಾತ್ಚಿ ನೀದ್ ಸಾಂಡುನ್, ಪಾನೊ ದೀವ್ನ್ ಪೊಶೆವ್ನ್
ಕಶ್ಟ್ ದುಃಖ್ ಖಿರವ್ನ್ ಪಿಯೆವ್ನ್
ಮೊಗಾನ್ ಸಾಂಬಾಳ್ಳಾಂ ಅಜೂನ್ ಪರ್ಯಾಂತ್
ತಿಚೊ ಮೋಗ್ ನಿಸ್ವಾರ್ಥಿ ಮೋಗ್
ಪ್ರತಿಫಳ್ ಆಶೆನಾತ್ಲ್ಲೊ ತ್ಯಾಗ್
ಆತಾಂ ಭಗ್ತಾಂ ಸಂಸಾರಿ ಸುಕ್
ಆವಯ್ಚಾ ಮೊಗಾತ್ಯಾಗಾಚೊ ಶಿರಾಂದಾರಿಂ ಪಾವ್ಸ್
ಕೇಸ್ ಪಿಕ್ಲ್ಯಾತ್ ತರೀ, ತೊಂಡಾರ್ ಮಿರಿಯೊ ಪಡ್ಲ್ಯಾತ್ ತರೀ
ವೆಂಗೆಂತ್ ಆರಾವ್ನ್ ಮೋಗ್ ತಿಚೊ ಹಾಂವ್ ಕರ್ತಾಲಿಂ
ತಿಚಾ ಮೊಗಾಕ್ ಪಾಟಿಂ ಮೋಗ್ ದೀವ್ನ್
ಸದಾಂಚ್ ಸಂತುಸ್ಟ್ ಉರ್ತೆಲಿಂ.
ದೇವ್ ಝರಿ ಮ್ಹಾಕಾ ವಿಚಾರಿ
ಜಾಯ್ ಕಿತೆಂ ಹ್ಯಾ ಸಂಸಾರಿಂ
ಮಾಂಯ್ ಮೋಗ್ ಜಿಣ್ಯೆ ಪಯ್ಣಾರಿ
ಉದಾರ್ ಘೆವುನ್ ಆವಯ್ ಜಾವ್ನ್
ತಿಚಿಂ ಮೆಟಾಂ ಚಲ್ತಾಂ ಜಿಣಿ ಸರಾಸರಿ
ಆವಯ್ ಥಾವ್ನ್ ಮೆಕ್ಳೆಂ ಜಿವಿತ್ ಖಂಡಿತ್ ನಾಕಾ
ಉತಾರ್ ಪ್ರಾಯ್ ತಿಚಿ ಅಡ್ಹೂಕ್ ಜಾಣಾಂ
ತಿಚೆವಿಣೆಂ ಹೆಂ ಜಿಣೆಂ ಸಾರುಂಕ್ ನೆಣಾಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.