ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಾಂವ್ ಸರ್ವಾಂಚೊ ಬಾಪ್
ಗಿಬ್ಬಾ ಕುಲ್ಶೇಕರ್
ನಾಂವ್ : ಗಿಲ್ಬರ್ಟ್ ಸಲ್ಡಾನ್ಹಾ
ಲಿಖ್ಣೆ ನಾಂವಾಂ : ಗಿಬ್ಬಾ ಕುಲ್ಶೇಕರ್
ಜನನ್ : 08 ಫೆಬ್ರೆರ್ 1953.
ಜಲ್ಮಾಲ್ಲೊ ಗಾಂವ್ : ಕುಲ್ಶೇಕರ್
ವಳೊಕ್: ಗಿಬ್ಬಾ ಕುಲ್ಶೇಕರ್ ಪಾಟ್ಲ್ಯಾ ಪಾಂತೀಸ್-ಚಾಳಿಸ್ ವರ್ಸಾಂ ಥಾವ್ನ್ ಅಪ್ರೂಪ್ ತರ್ಯೀ ಬರವ್ನ್ ಆಯ್ಲಾ. ಹಾಚ್ಯೊ ಕಾಣ್ಯೊ ಮನರಂಜನಾಚ್ಯೊ ತಶೆಂಚ್ ಸಸ್ಪೆನ್ಸ್/ಥ್ರಿಲ್ಲರ್. ಹಿಂದಿ ಕಾದಂಬರಿಂಕ್ ಚಡ್ ಖಾಯ್ಸ್ ಕರ್ಚಾ ಹಾಣೆಂ ಎದೊಳ್ ಕೊಂಕ್ಣೆಂತ್ ಬರಯಿಲ್ಲ್ಯೊ ಮಟ್ವ್ಯೊ ಕಾಣ್ಯೊ ಥೊಡ್ಯೊಚ್ ತರ್ಯೀ, ವಾಚ್ಪ್ಯಾಂಕ್ ಅಪ್ಲೆಚ್ಚ್ ಶೈಲೆರ್ ತಾಣೆಂ ಭರ್ಪೂರ್ ಮನರಂಜನ್ ದಿಲಾಂ ತೆಂ ಖಂಡಿತ್. ಕೊಂಕ್ಣಿ ಸಾಹಿತ್ಯಾಚೊ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚೊ ಆದರ್ಶ್ ಆನಿ ಪ್ರೇರಣ್ ಮ್ಹಣ್ಚಾ ಹಾಣೆಂ ಕಾಣ್ಯಾಂ ಶಿವಾಯ್ ಸಭಾರ್ ನೀಳ್ಗಥಾ/ಸಾಂಕಳ್ ಕಥಾ ಹಾಣೆಂ ಬರಯ್ಲ್ಯಾತ್. ತಾಂತ್ಲಿ ಏಕ್ ಜಾವ್ನಾಸಾ ರಗ್ತಾಳೊ ಖೆಳ್.
ಸುರ್ವಿಲಿಂ ದೋನ್ ಉತ್ರಾಂ
ಸಾಹಿತ್ಯಾಂತ್ ಹರ್ಯೆಕ್ ಪ್ರಕಾರಾಚ್ಯಾ ಸಾಹಿತಾಕ್ ಅಪ್ಲೊಚ್ ಮಹತ್ವ್ ಆನಿ ಗರ್ಜ್ ಆಸ್ತಾಚ್. ಮ್ಹಜ್ಯಾ ಭುರ್ಗ್ಯಾಪಣಾಚ್ಯಾ ಕಾಳಾರ್ ಲೊಕಾಕ್ ಮನರಂಜನಾಕ್ ಹೆರ್ ಮಾಧ್ಯಮಾ ನಾತ್ಲಿಂ, ಅಶೆಂ ಲಾಂಬ್ ಸಾಂಕಳ್ ಕಾಣ್ಯೊ, ಕಾದಂಬರಿ ಲೋಕ್ ಖೂಬ್ ವಾಚ್ತಾಲೊ ಆನಿ ಪಸಂದ್ ಕರ್ತಾಲೊ. ಪುಣ್ ಆಯ್ಚೊ ಕಾಳ್ ತಸೊ ಜಾವ್ನ್ ಉರೊಂಕ್ ನಾ, ಮನರಂಜನಾಚಿ ಜಾಯ್ತಿಂ ಮಾಧ್ಯಮಾಂ ಆಜ್ ಆಮ್ಚ್ಯಾ ಲೊಕಾಂಕ್ ಉಪಲಬ್ಧ್ ಜಾವ್ನ್ ಆಸಾತ್. ಹ್ಯಾ ಪ್ರಮುಕ್ ಕಾರಣಾ ಪಾಸತ್ ಆಜ್ ಸಾಹಿತ್ಯ್ ವಾಸ್ಚ್ಯಾ ಲೊಕಾಂಚೊ ಸಂಖೊ ಉಣೊಂಚ್ ಜಾಲಾ, ತರ್ಯೀ ವಾಚ್ತೆಲೆ ವಾಚ್ಪಿ ಅಜೂನ್ ಆಸಾತ್ ಮ್ಹಳ್ಳೆಂಯ್ ಖರೋಖರ್ ಸತ್ಚ್.
ಲಾಂಬ್/ಸಾಂಕಳ್ ಕಾಣ್ಯಾಂನಿ ಹಾಂವ್ ವಾಚ್ಪ್ಯಾಕ್ ಕಿತೆಂ ದೀಂವ್ಕ್ ಆಶೆತಾಂ ಮ್ಹಣ್ಚ್ಯಾಧಿಂ, ವಾಚ್ಪಿ ಕಿತೆಂ ಆಶೆತಾತ್ ಮ್ಹಳ್ಳೆಂ ಪಯ್ಲೆಂ ಉಲ್ಲೇಕ್ ಕರುಂ ತರ್; ಆಯ್ಚ್ಯಾ ಕಾಳಾರ್, ತೆಂಯೀ ಕೊಂಕ್ಣೆಂತ್, ಎಕಾ ವಾಚ್ಪ್ಯಾಕ್ ಶಿಕ್ಶಿತ್ ಕರ್ಚಿ, ತಾಣೆಂ ದಿಂವ್ಚ್ಯಾ ವೆಳಾಕ್ ಜೊಕ್ತೆಂ ರಿಟರ್ನ್ಸ್ ದಿಂವ್ಕ್ ಜಾಂವ್ ವೈಗ್ಯಾನಿಕ್, ತಾತ್ವಿಕ್, ಜಾಣ್ವಿಕ್, ವಾ ಹೆರ್ ರಿತಿಂನಿ ಭರ್ಪೂರ್ ಮಾಹೆತ್ ದಿಂವ್ಚ್ಯಾ ಕಾದಂಬರೆಂಚಿ ಸುಕಿಧಾಡ್ ಕೊಂಕ್ಣೆಂತ್ ಆಸ್ಚಿ ಉಟೊನ್ ದಿಸ್ತಾ; ತಿ ಮ್ಹಜ್ಯಾ ತಾಂಕಿಭಾಯ್ಲಿ. ಪುಣ್ ಸಾಂಕಳ್ ಕಾಣ್ಯಾಂನಿ ಥ್ರಿಲ್ಲರ್, ಸಸ್ಪೆನ್ಸ್, ಆನಿ ಖೂಬ್ ಮನರಂಜನ್ ದಿಂವ್ಚ್ಯಾ ಕಾಣ್ಯಾಂಚೊಯ್ ಸುಕಿಧಾಡ್ ಆಸಾ ಆನಿ ಮ್ಹಜಿ ವಿಂಚವ್ಣ್ ಹಿಚ್ಚ್ ಜಾವ್ನಾಸಾ. ಯೆದೊಳ್ ಮ್ಹಣಾಸರ್ ಪತ್ರಾಂನಿ ಮಾತ್ರ್ ಕಾದಂಬರಿ/ಸಾಂಕಳ್ ಕಾಣ್ಯೊ ಪರ್ಗಟ್ ಜಾತಾಲ್ಯೊ ತರ್, ಆತಾಂ ಅಂತರ್ಜಾಳಿ ಮುಖಾಂತ್ರ್ ಜಾಯ್ತ್ಯಾ ವಾಚ್ಪ್ಯಾಂಕ್ ಪಾವ್ತಾತ್ ಮ್ಹಳ್ಳೆಂ ಭೋವ್ ಸಮಧಾನೆಚೆಂ. ಮ್ಹಜಿ ’ರಗ್ತಾಳೊ ಖೆಳ್’ ಸಾಂಕಳ್ ಕಾಣಿ ವಾಚ್ಲ್ಲ್ಯಾ ಸಭಾರ್ ಇಶ್ಟಾಂನಿ, ವಳ್ಕಿಚ್ಯಾಂನಿ ಮ್ಹಾಕಾ ಶಾಭಾಸ್ಕಿ ಪಾಟಯ್ಲ್ಯಾ. ಹೊ ಆವ್ಕಾಸ್ ಮ್ಹಾಕಾ ಫಾವೊ ಕೆಲ್ಲ್ಯಾ ಮ್ಹಜ್ಯಾ ಮೊಗಾಚ್ಯಾ ದಾಯ್ಜ್ ಪಂಗ್ಡಾಕ್ ಉಲ್ಲಾಸ್ ಆನಿ ಧಿನ್ವಾಸ್.
ಆಯ್ಚ್ಯಾ ಚಾಲು ಸಂಸಾರಾಂತ್ ಜಿಯೆಂವ್ಕ್ ಜಾಯ್ ತರ್, ಹ್ಯಾ ಚಾಲುಮನ್ಶ್ಯಾಂಚೊ ಬಾಪುಯ್ ಜಾಂವ್ಚಿ ಗರ್ಜ್ ಆಸಾ. ಹೆಂಚ್ ತೀರ್ಳ್ ಹ್ಯಾ ಕಾಣ್ಯೆಚೆಂ. ಚಡ್ತಾವ್ ಜಾವ್ನ್ ಹಿಂದಿ ಸಾಹಿತ್ಯಾಚೆಂ ಪ್ರೇರಣ್ ಆಸ್ಚ್ಯಾ ಹಾಂವೆಂಯೀ ಮ್ಹಜ್ಯಾ ತಾಂಕಿಪ್ರಕಾರ್ ವಾಚ್ಪ್ಯಾಕ್ ಮನರಂಜಿತ್ ಕರ್ಚೆಂ ಪ್ರೇತನ್ ಕೆಲಾಂ, ಹಿ ಕಾದಂಬರಿ ತುಕಾ ಮೆಟಾಂ ಮೆಟಾಂಕ್ ಫುಡೆಂ ಕಿತೆಂ ಜಾತಾ ಕೊಣ್ಣಾ ಮ್ಹಣ್ ರಾಕಾಶೆಂ ಕರ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ. ಹ್ಯೇ ಕಾಣ್ಯೆವಿಶಿಂ ತುಜೆ ವಿಚಾರ್ ಮ್ಹಾಕಾ ಧಾಡ್ನ್ ದೀಂವ್ಕ್ ದಾಕ್ಶೆನಾಕಾತ್, ವಿಂಚ್ಣಾರ್ ವಿಚಾರ್ ದಾಯ್ಜ್.ಕೊಮ್ಚೆರ್ ಪರ್ಗಟ್ತೆಲೆ.
ತುಮ್ಚೆಥಂಯ್ ಮಯ್ಪಾಸಿ,
ಗಿಬ್ಬಾ ಕುಲ್ಶೇಕರ್
ಹಾಂವ್ ಸರ್ವಾಂಚೊ ಬಾಪ್
ಕನಕ್ಪುರಿ ಶ್ಹೆರ್.
ಜನೆರ್ ಮಯ್ನ್ಯಾಚಿ ಇಕ್ರಾ ತಾರಿಕ್.
ಇರಾನಿ ಕೆಫೆಟೆರಿಯಾಂತ್ ಬಸೊನ್ ಆಸ್ಲ್ಲ್ಯಾ ಬಾಳು ಪಿಳ್ಳೆಚಿ ನದರ್ ಘಡಿಯೆ-ಘಡಿಯೆ ಜನೆಲಾಂತ್ಲ್ಯಾನ್ ಭಾಯ್ರ್ ಚರೊನ್ ಆಸ್ಲ್ಲಿ. ಖಾಲಿ ಜಾಲ್ಲೆಂ ಚ್ಹಾಯೆಚೆಂ ಕಪ್ ಮೆಜಾರ್ ದವರ್ನ್, ವಿದೇಶಿ ಸಿಗ್ರೇಟ್ ಪೆಕೆಟ್ ಉಗ್ತಿ ಕೆಲಿ. ಸಿಗ್ರೆಟಿಚ್ಯಾ ತುದಿಯೆಕ್ ಲಾಯ್ಟರಾನ್ ಉಜೊ ದೀವ್ನ್ ಹಾತ್ ವೊಚಾರ್ ನದರ್ ವ್ಹೆಲಿಂ. ವ್ಹೊರಾಂ ಸಕಾಳಿಂಚಿಂ ಆಟ್ ಜಾವ್ನ್ ವೀಸ್ ಮಿನುಟಾಂ ಪಾಶಾರ್ ಜಾಲ್ಲಿಂ.
"ಖಂಯ್ ಗೆಲೊ?" ಬಸ್ಲ್ಲ್ಯಾ ಜಾಗ್ಯಾರ್ ಚಡ್ಪಡ್ಲೊ ಪಿಳ್ಳೆ. ಸದಾಂಚೊ ವೇಳ್ ಉತ್ರೊನ್ ಗೆಲಾ. ನಾಕಾ ತೊಂಡಾಂತ್ಲ್ಯಾನ್ ಧುಂವರ್ ಸೊಡುಂಕ್ ಲಾಗ್ಲೊ. ತೀನ್ ದಿಸಾಂಚಿ ಮ್ಹಿನತ್ ನಿರ್ಫಳ್ ಜಾಯ್ತ್?" ತಾಚ್ಯಾ ಕಪಲಾರ್ ಮಿರಿಯೊ ಪಡ್ಲ್ಯೊ.
ಆನಿ ತ್ಯಾಚ್ ವೆಳಾ.. ಮುಖ್ಲ್ಯಾ ಗಲ್ಲೆಚ್ಯಾ ತೊಂಡಾರ್ ಪ್ರತ್ಯಕ್ಷ್ ಜಾಲೊ ತಾಣೆ ಪ್ರತೀಕ್ಷಾ ಕರುನ್ ಆಸ್ಲ್ಲೊ ತರ್ನಾಟೊ. ತರ್ನಾಟ್ಯಾಚ್ಯಾ ವೊಂಠಾಂ ಮಧೆಂ ಬಿಡಿ ಧುಂವರ್ತಾಲಿ.
ಝಗ್ಲಾಣ್ಯಾಚ್ಯಾ ವೇಗಾನ್ ಉಟೊನ್ ಉಭೊ ಜಾಲ್ಲ್ಯಾ ಪಿಳ್ಳೆನ್ ಮೆಜಾ ಮುಳಾಂತ್ಲಿ ಬ್ರೀಫ್ಕೇಜ್ ವಿಂಚ್ಲಿ ಆನಿ ಚ್ಹಾಯೆಚೊ ಐವಜ್ ಕೌಂಟರಾರ್ ಗಳವ್ನ್ ಅಮ್ಸೊರಾಣ್ ಭಾಯ್ರ್ ಆಯ್ಲೊ. ಫುಟ್ಪಾತಿ ವಯ್ಲ್ಯಾನ್ ಚಲೊನ್ ಆಸ್ಲ್ಲ್ಯಾ ತರ್ನಾಟ್ಯಾಚೊ ಪಾಟ್ಲಾವ್ ತೊ ಕರುಂಕ್ ಲಾಗ್ಲೊ. "ತುಜಿ ಹಾಂವೆಂ ವಿಂಚವ್ಣ್ ಕೆಲ್ಯಾ ಝೊಪಡ್ಪಟ್ಟೆಚ್ಯಾ ಚೆಡ್ಯಾ" ತಾಚ್ಯಾ ಮುಸ್ಕರಾರ್ ಮತ್ಲಾಬಿ ಹಾಸೊ ಉದೆಲೊ. "ತುಂ ಜಾವ್ನಾಸಾಯ್ ಪರ್ನ್ಯಾ ಮಯ್ದಾನಾ ವಯ್ರ್ ಧಾಂವ್ಚೊ ನವೊ ಘೊಡೊ. ತುಕಾ ಹಾಂವ್ ಕ್ಯಾಶ್ ಕರ್ತಲೊಂ" ತಾಣೆ ದುಸ್ರ್ಯಾ ಹಾತಾನ್ ಫುಡ್ವ್ಯಾಚೆಂ ಪೋಂತ್ ಸಾಂಭಾಳ್ಳೆಂ. "ಪೊಕೊಳ್ ಜಾಲ್ಲ್ಯಾ ಬೆಂಕ್ ಬೆಲೆನ್ಸಾಕ್ ಜೀವ್ ಯೆತಲೊ" ತಾಚ್ಯಾ ಚಾಲಿಂತ್ ಅಮ್ಸೊರ್ ಆಸ್ಲ್ಲೊ.
ಚಲೊನ್ ಆಸ್ಲ್ಲ್ಯಾ ತರ್ನಾಟ್ಯಾನ್ ಬಿಡಿಯೆಚೊ ನಿಮಾಣೊ ಧಮ್ ಮಾರುನ್ ಕುತಿ ಚರಂಡೆಕ್ ಉಡಯ್ಲಿ.
ಪಿಳ್ಳೆ ಲಾಗಿಂ ಪಾವ್ಲ್ಲೊ.
ತರ್ನಾಟ್ಯಾನ್ ಚಾಲ್ ರಾವಯ್ಲಿ ಆನಿ ರಾವ್ಲ್ಲ್ಯಾ ಜಾಗ್ಯಾರ್ಚ್ ಪಾಟಿಂ ಘುಂವ್ಲೊ. ತರ್ನಾಟ್ಯಾಚ್ಯಾ ಅನಿರೀಕ್ಷಿತ್ ವರ್ತನಾವರ್ವಿಂ ಪಾಟ್ಲಾವ್ ಕರುನ್ ಲಾಗಿಂ ಪಿಳ್ಳೆ ತರ್ನಾಟ್ಯಾಕ್ ಆಪ್ಟಾಲೊ.
"ತೀನ್ ದಿಸಾಂ ಥಾವ್ನ್ ತುಂ ಮ್ಹಜೊ ಪಾಟ್ಲಾವ್ ಕರುನ್ ಆಸಾಯ್" ತರ್ನಾಟ್ಯಾನ್ ಪಿಳ್ಳೆಚೊ ಕೊಲರ್ ಆರಾಯ್ಲೊ. "ಕೊಣ್ ತುಂ?" ತಾಚ್ಯಾ ದೊಳ್ಯಾಂನಿ ಕ್ರೋಧ್ ಆಸ್ಲ್ಲೊ.
"ತುಜೊ ಹಿತಚಿಂತಕ್, ಪುಣ್ ದುಸ್ಮಾನ್ ನ್ಹಯ್" ಪಿಳ್ಳೆ ನರ್ವಸ್ ಜಾಲ್ಲೊ ತರೀ, ಹಾಸ್ಚೆಂ ಪ್ರಯತ್ನ್ ಕರುಂಕ್ ಲಾಗ್ಲೊ. "ಉಗ್ತಿ ಸುವಾತ್, ಮರ್ಯಾದಿಚೆಂ ಸವಾಲ್ ನ್ಹಯ್?"
"ಕಾಳೊ ಕೋಟ್, ಧವೆಂ ಫುಡ್ವೆಂ ನ್ಹೆಸ್ಲ್ಲೊ ತುಂ ಟಪೋರಿ ಜಾಂವ್ಕ್ ಸಾಧ್ಯ್ ನಾ" ತರ್ನಾಟ್ಯಾನ್ ಕೊಲರ್ ಸೊಡ್ಲೊ.
ಫಾತ್ರೆಲ್ಲೆಂ ಮುಸ್ಕಾರ್ ಸವ್ಕಾಸ್ ನಿತ್ಳೊಂಕ್ ಲಾಗ್ಲೆಂ.
"ಟಪೋರಿ?" ಪಿಳ್ಳೆ ಪುಳಕಿತ್ ಜಾಲೊ. ವೆಗಿಂಚ್ ಹೆಂ ನಾಂವ್ ಚರಿತ್ರಾ ರಚ್ತೆಲೆಂ. ಬ್ರೀಫ್ಕೇಜ್ ಪಾಂಯಾಂ ಮುಳಾಂತ್ ಗಳಯ್ಲಿ. "ಎದೊಳ್ ಪರ್ಯಾಂತ್ ಆಸಾ ಕೆಲ್ಲೆ ಸರ್ವ್ ದಾಖ್ಲೆ ಮೊಡ್ತೆಲೆಂ ಹೆಂ ನಾಂವ್."
"ತುಜ್ಯಾ ಉಲೊವ್ಣ್ಯಾಂತ್ ಫಿಲ್ಮಾಂಚೊ ಪ್ರಭಾವ್ ಝಳ್ಕಾತಾ ಮಾನೆಸ್ತಾ."
"ಗರೀಭ್ ತುಂ ಜಾವ್ನಾಸ್ಲ್ಯಾರ್ಯೀ, ಸೊಭಾಯೆ ಸವೆಂ ಬರಿ ಪರ್ಸನಾಲಿಟಿ ಆಸಾ ತುಜ್ಯಾ ವೆಕ್ತಿತ್ವಾಂತ್" ಪಿಳ್ಳೆನ್ ದುಸ್ರ್ಯಾಚಿಂ ಉತ್ರಾಂ ಕಾತರ್ಲಿಂ. ಕೊಟಾಚ್ಯಾ ಬೊಲ್ಸಾಂತ್ಲಿ ಸಿಗ್ರೆಟ್ ಪೆಕೆಟ್ ಭಾಯ್ರ್ ಕಾಡುನ್ ಉಗ್ತಿ ಕೆಲಿ. "ದಾಕ್ಷೆನಾಕಾ, ಸಿಗ್ರೆಟ್ ಆಪ್ಣಾಯ್."
ತರ್ನಾಟ್ಯಾನ್ ಸಿಗ್ರೆಟ್ ಆಪ್ಣಾಯ್ಲಿ.
"ಝೊಪಡ್ಪಟ್ಟೆಂತ್ ರಾವ್ತಾಯ್. ನಾಂವ್ ರೋಹಿತ್ ಪಾಠಕ್. ಮುನ್ಸಿಪಾಲಿಟಿ ಇಸ್ಕೊಲಾಂತ್ ಮೆಟ್ರಿಕ್ ಪರ್ಯಾಂತ್ ಶಿಕಾಪ್ ಜೊಡ್ಲಾಂಯ್. ಪ್ರಾಯ್ ಸತ್ತಾವೀಸ್ ವರ್ಸಾಂ. ವಿಧವ್ ಆವಯ್ ಆನಿ ದೊಗಾಂ ಭಯ್ಣಿಂಖಾತಿರ್ ಅನ್ವರ್ ಲಂಗ್ಡ್ಯಾಚ್ಯಾ ಗೆರೆಜಿಂತ್ ಮೆಕಾನಿಕಾಚೆಂ ಕಾಮ್ ಕರ್ತಾಯ್. ರೈಟ್?" ಪಿಳ್ಳೆಚೆ ಹಾಸ್ಕುರೆ ವೋಂಠ್ ಕಾನಾ ಪರ್ಯಾಂತ್ ಪಾವ್ಲೆ.
ತರ್ನಾಟ್ಯಾಚೆ ದೊಳೆ ವಿಜ್ಮಿತ್ಕಾಯೆನ್ ರುಂದಾಲೆ.
"ಬಿಗ್ ಡೆಡಿ, ಉರ್ಫ್ ಮಗನ್ಬಾಯಿ ಸಿಂಘಾನಿಯಾ ಖಾತಿರ್ ತುಕಾ ಹಾಂವೆಂ ವಿಂಚ್ಲಾ" ಸಿಗ್ರೆಟಿಚ್ಯಾ ತುದಿಯೆಕ್ ಉಜೊ ದಿಲೊ ಪಿಳ್ಳೆನ್. "ವೆಗಿಂಚ್ ತುಂ ಪಾಂಚ್ ಲಾಖಾಂಚೊ ಧನಿ ಜಾತೊಲೊಯ್."
"ಪಾಂಚ್ ಲಾಖ್?" ಉಡೊನ್ ಪಡ್ಳೊ ರೋಹಿತ್ ಪಾಠಕ್. "ಪಾಂಚ್ ಲಾಖಾಂ ಖಾತಿರ್ ಖುನಿ ಕರುಂಕ್ ಆಸಾ?"
"ನಾ"
"ಬೊಮ್ ಸ್ಪೋಟ್ ಕರುಂಕ್ ಆಸಾ?"
"ನಾ"
"ಕಿಡ್ನ್ಯಾಪ್ ಕರುಂಕ್ ಆಸಾ?"
"ನಾ"
"ಪಾಂಚ್ ಲಾಖ್ ಫುಂಕ್ಯಾಕ್ ಮೆಳ್ತೆಲೆ?" ರೋಹಿತಾನ್ ಸಿಗ್ರೆಟಿಚೊ ಲಾಂಬಾಯೆಚೊ ಧಮ್ ಮಾರ್ಲೊ.
"ಸಕಾಳಿಂ ಫುಡೆಂ ಎಕ್ಲೊ ಪಿಸೊ ಮ್ಹಜೊ ಅಮೊಲಿಕ್ ವೇಳ್ ವಿಭಾಡ್ತಾ?"
"ನೆಕೆತ್ರಾಂಚ್ಯಾ ಸಂಸಾರಾಂತ್ ತುಜೆಂ ನಾಂವ್ ಮೊಳ್ಬಾಕ್ ಉಮೊ ದಿತೆಲೆಂ"
ಹಾಸ್ಲೊ ಪಿಳ್ಳೆ. "ವಜ್ರಾಂ ಹಾಂವ್ ಬರ್ಯಾ ಥರಾನ್ ಪಾರ್ಕಿತಾಂ."
"ವಜ್ರಾಂ?" ದೊಳೆ ತೇವಾಭರಿತ್ ಜಾಲೆ ರೋಹಿತಾಚೆ.
"ಝೊಪಡ್ಪಟ್ಟಿಂತ್ ವಜ್ರಾಂ ನ್ಹಯ್, ಭಿಕಾರಿ ಜಿಯೆತಾತ್ ಮಾನೆಸ್ತಾ. ನಾಂವ್ ಕಿತೆಂ ಸಾಂಗ್ಲೆಂಯ್?"
"ಬಾಲಾಚಂದರ್ ಪಿಳ್ಳೆ. ಮಟ್ವ್ಯಾನ್ ಬಾಲು ಪಿಳ್ಳೆ ಮ್ಹಳ್ಳ್ಯಾ ನಾಂವಾನ್ ನೆಕೆತ್ರಾಂಚ್ಯಾ ಸಂಸಾರಾಂತ್ ಮ್ಹಾಕಾ ವಳ್ಕತಾತ್. ಮಗನ್ಭಾಯಿ ಸಿಂಘಾನಿಯಾಚೊ ಖಾಸ್ ಮನಿಸ್ ಹಾಂವ್ ಜಾವ್ನಾಸಾಂ."
"ಫುಟ್ಪಾತಿ ವಯ್ರ್ ಬಿಜ್ನೆಸ್ ಕರುಂಕ್ ಭಾಯ್ರ್ ಸರ್ಲಾಯ್ ಮಿಸ್ಟರ್ ಪಿಳ್ಳೆ?"
ರೋಹಿತಾನ್ ಸಿಗ್ರೆಟಿಚೆಂ ಮುಳ್ಕಾಟ್ ಚರಂಡೆಕ್ ಉಡಯ್ಲೆಂ. "ಪಾಂಚ್ ಲಾಖಾಂಚೊ ವ್ಯವಹಾರ್ ಪಾಕ್ಯಾ ಪಂದಾ ಜಾತಾ ನ್ಹಯ್?"
"ಥಂಯ್.. " ಪಿಳ್ಳೆನ್ ಕೆಫೆಟೇರಿಯಾ ತೆವ್ಶಿನ್ ಬೋಟ್ ಜೊಕ್ಲೆಂ. "ಆರಾಮಾಯೆನ್ ಬಸೊನ್ ಉಲವ್ಯಾಂ."
"ಪರ್ವಾನಾ" ರೋಹಿತಾನ್ ಭುಜಾಂ ಉಡಯ್ಲಿಂ.
ದೊಗಾಂಯ್ನೀ ಕೆಫೆಟೇರಿಯಾ ತೆವ್ಶಿನ್ ಮೆಟಾಂ ಕಾಡ್ಲಿಂ."
ಕೆಫೆಟೇರಿಯಾ ಭಿತರ್ ಪಾವ್ಲ್ಲ್ಯಾ ಉಪ್ರಾಂತ್ ಕೊನ್ಶ್ಯಾಚೆಂ ಮೇಜ್ ಆಪ್ಣಾಯ್ಲೆಂ ಪಿಳ್ಳೆನ್.
"ಟೀ ವ ಕೊಫಿ?"
"ಕುಚ್ ಭೀ ಚಲ್ತಾ ಹೈ" ಬಸ್ಕಾ ಆಪ್ಣಾಯ್ಲಿ ರೋಹಿತಾನ್.
ಲಾಗಿಂ ಪಾವ್ಲ್ಲ್ಯಾ ವೇಯ್ಟರಾಕ್ ಚ್ಹಾಯೆಚೆಂ ಒರ್ಡರ್ ದಿಲೆಂ ಪಿಳ್ಳೆನ್.
"ಮುಂಬಯ್ ಶ್ಹೆರಾಚೊ ನಿವಾಸಿ ಹಾಂವ್. ಎಕಾ ತರ್ನಾಟ್ಯಾಚ್ಯಾ ಸೊಧ್ನೆರ್ ಡೆಲ್ಹಿ, ಕೊಲ್ಕತಾ, ಯು.ಪಿ, ಬಿಹಾರ್, ಭಂವ್ಲೊಂ. ಪುಣ್.. ಮ್ಹಾಕಾ ಜಾಯ್ ಆಸ್ಲ್ಲೊ ತರ್ನಾಟೊ ಕನಕ್ಪುರಿ ಶ್ಹೆರಾಂತ್ ಭೆಟ್ಲೊ. ತುಜ್ಯಾ ವೆಕ್ತಿತ್ವಾಂತ್ ಮ್ಹಾಕಾ ಜಾಯ್ ಆಸ್ಲ್ಲ್ಯಾ ತರ್ನಾಟ್ಯಾಚಿ ಸಾವ್ಳಿ ಹಾಂವೆಂ ಪಳೆಲ್ಯಾ. ಬಾಲು ಪಿಳ್ಳೆಚ್ಯಾ ವಿಂಚವ್ಣೆಂತ್ ಕೆದ್ನಾಂಚ್ ಚುಕಿ ಆಸಾನಾಂತ್."
ವೇಯ್ಟರ್ ಒರ್ಡರಾಸವೆಂ ಹಾಜರ್ ಜಾಲೊ.
"ಕಸಲೊ ಫಾಯ್ದೊ ಮ್ಹಜೆಥಾವ್ನ್ ಅಪೇಕ್ಷಿತಾಯ್ ಮಿ|ಪಿಳ್ಳೆ?" ಚ್ಹಾಯೆಚೊ ಘೊಟ್ ಮಾರ್ಲೊ ರೋಹಿತಾನ್.
"ತರ್ ಆಯ್ಕ್.."
ತಗ್ಸಾಲ್ಲ್ಯಾ ತಾಳ್ಯಾನ್ ಕುಮ್ಸಾರ್ ಜಾಂವ್ಕ್ ಲಾಗ್ಲೊ ಪಿಳ್ಳೆ.
ದುಸ್ರ್ಯಾಚಿಂ ಉತ್ರಾಂ ಆಯ್ಕೊನ್ ರೋಹಿತ್ ಪಾಠಕಾಚೆ ದೊಳೆ ವಿಜ್ಮಿತ್ಕಾಯೆನ್ ರುಂದಾಲೆ. "ಝೊಪಡ್ಪಟ್ಟಿಚೊ ’ಗರೀಬ್ ನಿವಾಸಿ’ ಹಾಂವ್" ತಾಚ್ಯಾ ತಾಳ್ಯಾಂತ್ ಕಾಂಪ್ಣಿ ಆಸ್ಲ್ಲಿ. "ದಿಸಾ ಉಜ್ವಾಡಾಕ್ಚ್ ಸ್ವಪ್ಣಾಂ ದಾಕಯ್ತಾಯ್ ಮಿ|ಪಿಳ್ಳೆ?"
"ಸ್ವಪ್ಣಾಂ ನೀಜ್ ಕರುನ್ ದಾಕಂವ್ಚಿ ಶ್ಯಾಥಿ ಮಾನೆಸ್ತ್ ಶರದ್ ಜೋಶಿಲಾಗಿಂ ಆಸಾ ರೋಹಿತ್. ಖಡ್ಪಾ ಥಾವ್ನ್ ಝರ್ ಕಾಡುಂಕ್ ತೊ ಸಕ್ತಾ."
"ತುಕಾ ಮ್ಹಜೆ ವಯ್ರ್ ತಿತ್ಲೊ ಭರ್ವಸೊ ಮಿ|ಪಿಳ್ಳೆ?"
"ಮ್ಹಜ್ಯಾ ಫಿಲ್ಡಾಂತ್ ಹೆಳ್ಲ್ಲೊ ಮನಿಸ್ ಹಾಂವ್. ಪರ್ನ್ಯಾ ಮಯ್ದಾನಾ ವಯ್ರ್ ಜಾಯ್ತ್ಯಾ ನವ್ಯಾ ಘೊಡ್ಯಾಂಕ್ ಧಾಂವ್ಡಾಯ್ಲಾಂ ಹಾವೆಂ. ಮ್ಹಜೆ ವಿಂಚುನ್ ಕಾಡ್ಲ್ಲೆ ಘೊಡೆ ಕೆದ್ನಾಂಚ್ ಸಲ್ವಾನಾಂತ್. ಪರತ್ ಹಾಂವ್ ತುಕಾ ಸಾಂಗ್ತಾಂ. ಬಾಲು ಪಿಳ್ಳೆಚ್ಯಾ ವಿಂಚವ್ಣೆಂತ್ ಕೆದ್ನಾಂಚ್ ಚುಕಿ ಆಸಾನಾಂತ್."
"ಮುಂಬಯ್ ಶ್ಹೆರಾಕ್ ಹಾಂವೆಂ ಕೆದಾಳಾ ಪಾವೊಂಕ್ ಜಾಯ್?"
"ಹಫ್ತ್ಯಾ ಭಿತರ್.." ಚ್ಹಾಯೆಚೊ ಘೊಟ್ ಮಾರ್ಲೊ ಪಿಳ್ಳೆನ್. "ತಡವ್ ಕರಿನಾಕಾ, ನಶಿಬಾಚಿಂ ಬಾಗ್ಲಾಂ ಬಂಧ್ ಜಾಂವ್ಚ್ಯಾ ಪಯ್ಲೆಂ ಹ್ಯಾ ವಿಳಾಸಾರ್ ತುವೆಂ ಪಾವೊಂಕ್ ಆಸಾ" ವಿಜಿಟಿಂಗ್ ಕಾರ್ಡ್ ರೋಹಿತಾಕ್ ದಿಲೆಂ. "ರಾವ್ಪಾ ಪಾಸ್ವತ್ ಸುಸಜ್ಜಿತ್ ಫ್ಲೇಟ್ ತುಕಾ ತಯಾರ್ ಮೆಳ್ತೆಲೆಂ. ಕಾಮ್ ಆರಂಭ್ ಜಾಲ್ಲ್ಯಾ ದಿಸಾ ನೊವೊದ್ ಹಜಾರ್ ರುಪಯ್ ತುಕಾ ನಗ್ದೆನ್ ಮೆಳ್ತೊಲೊ. ಬಾಕಿಚೊ ಐವಜ್ ಕಾಮ್ ಸಂಪ್ಲ್ಯಾ ಉಪ್ರಾಂತ್."
"ನಿಜಾಯ್ಕೀ ಅಸೆಂ ಜಾಂವ್ಕ್ ಸಾಧ್ಯ್ ಆಸಾ?"
"ಹ್ಯಾ ಸಂಸಾರಾಂತ್ ಅಸಾಧ್ಯ್ ಮ್ಹಳ್ಳೆಂ ಕಿತೆಂಚ್ ನಾ. ಭೋವ್ ಥೊಡ್ಯಾಂಕ್ ವಿಂಚ್ಲಾಂ ನಶೀಬ್ ಮ್ಹಳ್ಳ್ಯಾ ಲಕ್ಷೀನ್"
ಪಿಳ್ಳೆನ್ ಕೊಪ್ ಖಾಲಿ ಕೆಲೆಂ. "ಮ್ಹಜಿ ವಿಂಚವ್ಣ್ ಚುಕಿಚಿ ಜಾಂವ್ಕ್ ಸಾಧ್ಯ್ ನಾ. ವೆಗಿಂಚ್ ಆಮ್ಚಿ ಮುಂಬಂಯ್ತ್ ಭೆಟ್ ಜಾತೆಲಿ" ಭ್ರೀಫ್ಕೇಜ್ ಉಗ್ತಿ ಕರುನ್ ಏಕ್ ಕವರ್ ಭಾಯ್ರ್ ಕಾಡ್ಲೆಂ. "ತುಜ್ಯಾ ಮೊಗಾಚ್ಯಾ ಮನ್ಶ್ಯಾಂಕ್ ತಾತ್ಕಾಲಾಚೊ ಅಧೇವ್ಸ್ ತುವೆಂ ಮಾಗೊಂಕ್ ಆಸಾ. ಕವರ್ ತಾಣೆ ರೋಹಿತಾಕ್ ದಿಲೆಂ. "ಹ್ಯಾ ಕವರಾಂತ್ ಧಾ ಹಜಾರ್ ರುಪಯ್ ಆಸಾತ್. ತುಜ್ಯಾ ಕಾಮಾಕ್ ಯೆತೆಲೆ."
"ಧಾ ಹಜಾರ್?" ಹಾಂಕ್ರೆಲೊ ರೋಹಿತ್.
"ಧಾಂವ್ಣಿ ಆರಂಭ್ ಜಾಲ್ಯಾ ತುಜ್ಯಾ ಜಿವಿತಾಂತ್ಲಿ. ಲಕ್ಷ್ಮೀಚಿ ಕೃಪ ತುಜೆ ವಯ್ರ್ ಪಡ್ಲ್ಯಾ. ಶೆವೊಟ್ ಜಿಕ್ಚೊ ವ ಶೆವೊಟಾಕ್ ವಾ ಶೆವೊಟಾಕ್ ಖೊಟಾಂವ್ಚೆಂ ತೆಂ ತುಜ್ಯಾ ಹಾತಾಂತ್ ಆಸಾ."
"ತುಂ ಮ್ಹಜ್ಯಾ ಜಿವಿತಾಂತ್ ಉಂಚ್ಲ್ಯಾ ಸ್ಥಾನಾರ್ ಅಸ್ತೊಲೊಯ್"
ಪಿಳ್ಳೆಚೆ ಹಾತ್ ಆರಾಯ್ಲೆ ರೋಹಿತಾನ್. "ಮ್ಹಜಿ ಆವಯ್, ಮ್ಹಜ್ಯೊ ಭಯ್ಣ್ಯೊ ಪಿಂಜ್ಕರ್ ಜಿವಿತಾ ಥಾವ್ನ್ ಮುಕ್ತಿ ಜೊಡ್ತೆಲಿಂ" ತಾಚ್ಯಾ ದೊಳ್ಯಾಂನಿ ದುಃಖಾಂ ಉದೆಲಿಂ.
"ಮಾಯೂಸ್ ಜಾಯ್ನಾಕಾ ಕನಕ್ಪುರಿಚ್ಯಾ ಚೆಡ್ಯಾ" ಪಿಳ್ಳೆಚೊ ತಾಳೊ ಸಾಮಾನ್ಯ್ ಆಸ್ಲ್ಲೊ. "ತುಂ ಏಕ್ ಮಾಮೂಲಿ ಚೆಡೊ ನ್ಹಯ್. ಲಾಖಾಂನಿ ಏಕ್ ತುಂ. ಹ್ಯಾ ಫುಡೆಂ ದುಡ್ವಾ ಪಾಟ್ಲ್ಯಾನ್ ತುಂ ಧಾಂವ್ಚೊನಾಂಯ್. ದುಡು ತುಜ್ಯಾ ಪಾಟ್ಲ್ಯಾನ್ ಧಾಂವೊನ್ ಯೆತಲೊ."
ರೋಹಿತಾನ್ ಭಿಜೊನ್ ಆಯಿಲ್ಲೆ ದೊಳೆ ಪುಸ್ಲೆ.
"ಪಯ್ಲ್ಯಾ ದಿಸಾಚ್ಯಾ ಕಾಮಾಂತ್ ತುಂ ಯಶಸ್ವಿ ಜಾಲೊಯ್ ತರ್, ನೊವೊದ್ ಹಜಾರ್ ರುಪಯ್ ತುಕಾ ನಗ್ದೆನ್ ಮೆಳ್ತೊಲೊ. ಆಮ್ಚೆ ಮಧೆಮ್ ಏಕ್ ಎಗ್ರಿಮೆಂಟ್ ಜಾತೆಲೆಂ. ತ್ಯಾ ಎಗ್ರಿಮೆಂಟಾಚ್ಯಾ ಶರ್ತಾ ಪ್ರಮಾಣೆ ವರ್ಸಾ ಭಿತರ್ ತುವೆಂ ಕಾಮ್ ಸಂಪಂವ್ಕ್ ಆಸಾ. ತ್ಯಾ ಆವ್ದೆ ಭಿತರ್ ದುಸ್ರಿಂ ಕಾಮಾಂ ತುಕಾ ಸೊಧುನ್ ಯೆತಿತ್ ತರ್, ತಿಂ ತುವೆಂ ನಿರಾಕರ್ಸುಂಕ್ ಆಸಾತ್. ಕಾಮ್ ಸಂಪ್ಲ್ಲ್ಯಾ ದಿಸಾಚ್ ಬಾಕಿಚೊ ಐವಜ್ ಚ್ಯಾರ್ ಲಾಖ್ ರುಪಯ್ ನಗ್ದೆನ್ ತುಕಾ ಮೆಳ್ತಲೊ."
"ದುಸ್ರಿಂ ಕಾಮಾಂ ಮ್ಹಾಕಾ ಸೊಧುನ್ ಯೆತೆಲಿಂ?"
"ಪಯ್ಲ್ಯಾ ಪ್ರಯತ್ನಾಂತ್ ತುಂ ಸಲ್ವಾಲೊಯ್ ತರ್... ಜಾಂವ್ಕ್ ಪುರೊ ರೋಹಿತ್ ಪಾಠಕ್ ಮ್ಹಳ್ಳ್ಯಾ ಚೆಡ್ಯಾಚೆಂ ದುಕಾನ್ ನಿಧಾನ್ ಚಲ್ತಾಲೆಂ. ನಶಿಬಾಚ್ಯಾ ಧಾಂವ್ಣೆಂತ್ ಜಿಕ್ಲೊಯ್ ತರ್.. ತುಕಾ ಕೇಶ್ ಕರುಂಕ್ ತುಜ್ಯಾ ದಾರಾರ್ ಬಾಲು ಪಿಳ್ಳೆ ತಸಲೆ ಜಾಯ್ತೆ ಮನಿಸ್ ದುಡ್ವಾ ಸವೆಂ ಲಾಯ್ನಿರ್ ಉಭೆ ರಾವ್ತೆಲೆ. ದುಡ್ವಾಚೊ ವ್ಹಾಳೊ ತುಜ್ಯಾ ಪಾಂಯಾಂಕ್ ಆಪ್ಟಾತಲೊ."
"ತುಜೊ ಹಾಟ್ ಮ್ಹಜ್ಯಾ ಮಾತ್ಯಾರ್ ಆಸ್ತಾ ಪರ್ಯಾಂತ್ ಹಾಂವ್ ಸಲ್ವೊಂಚೊಂನಾ" ರೋಹಿತಾಚ್ಯಾ ತಾಳ್ಯಾಂತ್ ಆತ್ಮ್ ವಿಶ್ವಾಸ್ ಆಸ್ಲ್ಲೊ. "ಲಕ್ಷ್ಮೀ ಮ್ಹಾಕಾ ಘಾತ್ ಕರ್ಚಿನಾ."
"ತುಜೊ ಆತ್ಮ್ ವಿಶ್ವಾಸ್ ಸದಾಂಚ್ ಜೀವಂತ್ ಉರೊಂದಿ" ಪಿಳ್ಳೆ ಉಟೊನ್ ಉಭೊ ಜಾಲೊ. "ದೊನ್ಪಾರಾಂಚೆಂ ಫ್ಲಾಯ್ಟ್ ಹಾವೆಂ ಧರುಂಕ್ ಆಸಾ."
ಚ್ಹಾಯೆಚೆಂ ಬಿಲ್ಲ್ ಫಾರಿಕ್ ಕರುನ್ ತೆ ಭಾಯ್ರ್ ಆಯ್ಲೆ.
"ಸ್ವಾರ್ಥಿ ಸಂಸಾರಾಂತ್ ದೆವಾಚೆ ದೂತ್ ಅಜೂನ್ ಜೀವಂತ್ ಆಸಾತ್. ಮ್ಹಜ್ಯಾ ಆವಯ್ನ್ ನಿಜಾಯ್ಕಿ ವಜ್ರಾಕ್ ಜನ್ಮ್ ದಿಲಾ. ಅಮ್ಮಾಚ್ಯಾ ವದನಾರ್ ಆಜ್ ಫುಲಾಂ ಫುಲ್ತೆಲಿಂ. ಉಸ್ತಾದ್ ಅನ್ವರ್ ಲಂಗ್ಡ್ಯಾಚೊ ಮೆಕ್ಯಾನಿಕ್ ಚೆಡೊ ಲಾಖಾಂನಿ ಖೆಳ್ತಲೊ" ರೋಹಿತ್ ಪಾಠಕಾಚೆಂ ಕಾಳಿಜ್ ಸಂತೊಸಾನ್ ಉಡ್ಕಾಣಾಂ ಘಾಲುಂಕ್ ಲಾಗ್ಲೆಂ.
"ಸಂತೊಸಾಚ್ಯಾ ಆಮಾಲಾರ್ ತಾಕಾ ತುಂ ವಿಸ್ರಾಲಾಯ್ ರೋಹಿತ್?"
"ಕೊಣಾಕ್?"
"ಸೀತಾ ದಾಂಬ್ಲೆಕ್"
"ದೆವಾರೆ ದೆವಾ!" ವಿಜ್ಮಿತ್ ಪಾವ್ಲ್ಲ್ಯಾ ರೋಹಿತಾನ್ ಮಾತೆಂ ಖೊರ್ಪಿಲೆಂ. "ಸೀತಾ ದಾಂಬ್ಲೆಚ್ಯಾ ಮೊಗಾರ್ ಹಾಂವ್ ಆಸಾಂ ಮ್ಹಣ್ ತುಂ ಜಾಣಾಂಯ್?"
ಪಿಳ್ಳೆ ವ್ಹಡ್ಲ್ಯಾನ್ ಹಾಸ್ಲೊ.
"ಮ್ಹಜಿ ಸಂಪೂರ್ಣ್ ಚರಿತ್ರಾ ತುವೆಂ ಉಸ್ತಿಲ್ಯಾಯ್?"
"ಉಸ್ತುಂಕ್ ಪಡ್ತಾ" ಫುಡ್ವ್ಯಾಚೆಂ ಪೊಂತ್ ಸಾಂಬಾಳ್ಳೆಂ ಪಿಳ್ಳೆನ್. "ಪಾಂಚ್ ಲಾಖಾಂಚಿ ಜುಗಾರ್ ಖೆಳ್ಚ್ಯಾ ಪಯ್ಲೆಂ ಚರಿತ್ರಾ ಉಸ್ತುಂಕ್ ಪಡ್ತಾ."
"ಮಾನ್ವಾಲೊಂ ಹಾಂವ್ ತುಕಾ" ರೋಹಿತಾಚ್ಯಾ ತಾಳ್ಯಾಂತ್ ಮೆಚ್ವಣಿ ಆಸ್ಲ್ಲಿ. "ನಿಜಾಯ್ಕಿ ತುಂ ಸಂಸಾರಾಕ್ ಮುಟಿಂತ್ ಧರುಂಕ್ ಸಕ್ತಾಯ್. ತುಂ ಮ್ಹಜೊ ಬಾಪ್ ಜಾವ್ನಾಸಾಯ್."
"ಚಾಲೂ ಸಂಸಾರಾಂತ್ ಹಾಂವ್ ಸರ್ವಾಂಚೊ ಬಾಪ್ ಜಾವ್ನಾಸಾಂ."
"ದುಭಾವ್ ನಾ"
"ಶುಕ್ರಿಯಾ" ಚಾಲ್ ರಾವಯ್ಲಿ ಪಿಳ್ಳೆನ್. ಮುಂಬಯ್ ಶ್ಹೆರಾಂತ್ ವೆಗಿಂಚ್ ಆಮಿ ಮೆಳ್ತೆಲ್ಯಾಂವ್. ಹಾವೆಂ ತುಜಿ ಪಾಟ್ ಖೊರ್ಪಿಲ್ಯಾ. ಮುಂಬಯ್ ಪಾವ್ಲ್ಲ್ಯಾ ಉಪ್ರಾಂತ್ ತುವೆಂ ಮ್ಹಜಿ ಖೊರ್ಪುಂಕ್ ಆಸಾ. ಹೆಂಚ್ ಜಾವ್ನಾಸಾ ವ್ಯವಹಾರಿಕ್ ಸಂಸಾರಾಚೆಂ ನಿಯಮ್" ಫುಡೆಂ ಚಮ್ಕಾಲೊ ಪಿಳ್ಳೆ.
"ಹಾಂವ್ ಸಮ್ಜಾಲೊಂನಾ" ಮಾತೆಂ ಖೊರ್ಪಿಲೆಂ ರೋಹಿತಾನ್.
"ಮುಂಬಯ್ ಪಾವ್ಲ್ಲ್ಯಾ ಉಪ್ರಾಂತ್ ಮ್ಹಜ್ಯಾ ಉತ್ರಾಂಚೊ ಅರ್ಥ್ ತುಜ್ಯಾ ಮೆಂದ್ವಾಂತ್ ರಿಗ್ತೊಲೊ."
ರೋಹಿತಾನ್ ಜಾಪ್ ದಿಲಿನಾ.
ಟೆಕ್ಸಿ ಸ್ಟೇಂಡಾಕ್ ತೆ ಪಾವ್ಲ್ಲೆ.
ಲಾಯ್ನಿ ವಯ್ಲಿ ಪಯ್ಲಿ ಟೆಕ್ಸಿ ವಿಂಚ್ಲಿ ಪಿಳ್ಳೆನ್.
"ಆತಾಂ ಹಾವೆಂ ವಚೊಂಕ್ ಆಸಾ"
ಟೆಕ್ಸೆಚೆಂ ಪಾಟ್ಲೆಂ ಬಾಗಿಲ್ ಉಗ್ತೆಂ ಕೆಲೆಂ.
"ಮೂನ್ರೊಕ್ ಹೊಟೆಲಾಕ್ ವಚೊನ್ ಚೆಕ್ಔಟ್ ಜಾಂವ್ಕ್ ಆಸಾ ಮ್ಹಾಕಾ."
"ಮುಂಬಂಯ್ತ್ ಆಮಿ ಮೆಳ್ತೆಲ್ಯಾಂವ್ ಮಿ|ಪಿಳ್ಳೆ. ನಮಸ್ಕಾರ್" ಹಾತ್ ಜೊಡ್ಲೆಂ ರೋಹಿತಾನ್.
"ನಮಸ್ಕಾರ್" ಪಿಳ್ಳೆನ್ ಪಾಟ್ಲಿ ಬಸ್ಕಾ ಆಪ್ಣಾಯ್ಲಿ.
ಟೆಕ್ಸಿ ಫುಡೆಂ ಚಮ್ಕಾಲಿ.
ರೋಹಿತಾನ್ ಅನ್ವರ್ ಲಂಗ್ಡ್ಯಾಚ್ಯಾ ಗೆರೆಜಿ ತೆವ್ಶಿನ್ ಮೆಟಾಂ ಕಾಡ್ಲಿಂ.
"ದೆವಾಚೊ ದೂತ್" ಮತಿ ಭಿತರ್ ಹಾಸ್ಲೊ ಪಿಳ್ಳೆ. "ಚಾಲೂ ಸಂಸಾರಾಂತ್ಲೊ ಚಾಲೂ ಮನಿಸ್ ಹಾಂವ್. ಸಯ್ತಾನ್ ಸಯ್ತ್ ಮ್ಹಜ್ಯಾ ಸಾವ್ಳೆಕ್ ಕಾಂಪ್ತಾ" ತಾಣೆ ಸಿಗ್ರೆಟ್ ಝಳಯ್ಲಿ. "ಸೀತಾ ದಾಂಬ್ಲೆ ಮ್ಹಳ್ಳ್ಯಾ ತರ್ನ್ಯಾ ತಲ್ಕಾಚೊ ಭೋಗ್ ಹಾಂವ್ ಕರ್ತಲೊಂ" ಜನೆಲಾಚೊ ಆರ್ಸೊ ಸಕ್ಲಾ ದೆಂವಯ್ಲೊ.
ಟೆಕ್ಸೆನ್ ವೇಗ್ ಆರಾಯ್ಲೊ.
’ಬೊಕ್ರೊ, ಧಾ ಲಾಖಾಂಚೊ ಬೊಕ್ರೊ’ ತಾಕಾ ಹಾಸೊಂಕ್ ಆಯ್ಲೆಂ ತರಿ ಹಾಸ್ಲೊನಾ. ’ಧಾ ಲಾಖಾಂಚಿ ತೊಪಿ ತುಕಾ ಹಾಂವ್ ಲಾಯ್ತಲೊಂ ಬಿಗ್ ಡೆಡಿ’
ಪಂದ್ರಾ ಮಿನುಟಾಂಚ್ಯಾ ಧಾಂವ್ಣೆ ಉಪ್ರಾಂತ್ ಟೆಕ್ಸಿ ಮೂನ್ರೊಕ್ ಹೊಟೆಲಾಚ್ಯಾ ಮೊರ್ಕಿಂತ್ ಯೇವ್ನ್ ಉಭಿ ಜಾಲಿ.
************
[ಮುಖಾರುಂಕ್ ಆಸಾ...]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
