ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 20. ಸರ್ಗಾ ವಯ್ಲಿ ಮಾಂಯ್
ರೊನಾಲ್ಡ್ ಒಲಿವೆರಾ ಪಡುಕೋಣೆ ಆಯ್ಲೆವಾರ್ ಉಣೆಂ ಬರಯ್ತಾ ತರ್ಯ್ ಕೊಂಕ್ಣೆಂತ್ ಹೊ ಏಕ್ ಬರೊ ಕಾಣ್ಯೆಗಾರ್ ಮ್ಹಣ್ ಎದೊಳ್ಚ್ ಫಾಮಾದ್ ಜಾಲಾ. ತಾಚಾ ಮಟ್ವ್ಯಾ ಕಾಣ್ಯಾಂಚೊ ಜಮೊ (ಪಯ್ಲೊ ಬೂಕ್) ’ಸರ್ಗಾವಯ್ಲಿ ಮಾಂಯ್’ ಏಕ್ ಅಪುರ್ಭಾಯೆಚೊ ಬೂಕ್ ಮ್ಹಣ್ ತೊ ಬೂಕ್ ವಾಚ್ಲ್ಲ್ಯಾ ಸಭಾರಾಂನಿ ಗೊವಾಯ್ ದಿಲ್ಯಾಸ್ತಾಂ ವಾಚ್ಪ್ಯಾಂಕ್ ತಾಚಾ ಕಾಣ್ಯೆಚಿ ರೂಚ್ ದಿಂವ್ಚಾ ದಿಶೆನ್ ಹಿ ಕಾಣಿ ಹಾಂಗಾಸರ್ ಪ್ರಸ್ತುತ್ ಕೆಲ್ಯಾ. ಮನ್ಶಾಪಣಾಚಿಂ ಮೊಲಾಂ ಆಪ್ಲ್ಯಾ ಬರ್ಪಾಂನಿ ಉಕ್ಲು ಧರ್ಚಿಂ ರೊನಾಲ್ಡ್ ಒಲಿವೆರಾಚಾ ಸಾಹಿತ್ಯಾಚಿ ವಿಶೇಷತಾ ಜಾವ್ನಾಸಾ.
ರೊನಾಲ್ಡ್ ಒಲಿವೆರಾ
’ನಮಾನ್ ತುಕಾ ಸರ್ಗಾ ರಾಣಿಯೆ
ಆಮಾ ಪರ್ದೆಶಾಂಚೆ ಮಾಯೆ
ಆಸಾಂವ್ ಪಯ್ಣಾರ್ ಮಾಗ್ತಾಂವ್ ಉಪ್ಕಾರ್
ಖಂತ್ ದುಖಿ ವಿಘ್ನಾಂ ನಿವಾರ್
ಕ್ರಿಸ್ತಾ ಮಾಯೆ ದರ್ಯಾ ಸುಕ್ರಾ
ಪಾವ್ ತುಂ ಪಯ್ಣಾರ್ಯಾಂಕ್ ಪಾವ್ ಮ್ಹಾಕಾ’
ಮ್ಹಹಿನ್ಯಾಚಿ ರಜಾ ಮುಗ್ದೊನ್, ಪರತ್ ’ಪೊಟಾಚೊ ಗ್ರಾಸ್’ ದಿಂವ್ಚ್ಯಾ ಪರ್ಗಾಂವಾಕ್ ಭಾಯ್ರ್ ಸರ್ಚಿ ನಿಶಾನಿ - ತೆಂ ಕಂತಾರ್!
ಪಯ್ಣಾಚಿ ಸುರ್ವಾತ್ ಕರ್ತಾನಾ, ಘರಾಂತ್ ಆಸ್ಚ್ಯಾ ಸರ್ವ್ ಕುಟ್ಮಾದಾರಾಂನಿ ಸಾಂಗಾತಾ ಮೆಳೊನ್, ಆಮೊರಿ ಮ್ಹಣೊನ್, ಆಕೆರಿಕ್ ಮರಿಯೆ ಮಾಯೆಚಿ ಸಸಾಯ್ ಮಾಗೊನ್ ಕಂತಾರ್ ಗಾಂವ್ಚಿ ತಿ ಬರಿ ಸವಯ್ ವರ್ಸಾಂ ಥಾವ್ನ್ ಆಮ್ಗೆರ್ ಚಲೊನ್ ಆಯ್ಲ್ಯಾ!
ಆಜ್ಯಿ ಹಾಂವ್ ಪರತ್ ಭಾಯ್ರ್ ಸರ್ಲಾಂ ತ್ಯಾ ಪರ್ಗಾಂವಾಕ್ ಆನಿ ಕಂತಾರಾಂ ರುಪಿಂ ಮಾಗೊನ್ ಆಸಾಂ ತೆ ಮರಿಯೆ ಮಾಯೆಚಿ ಸಸಾಯ್......
ಪುಣ್ ಆಜ್ ಮ್ಹಜ್ಯಾ ಕಾಳ್ಜಾ ಗುಂಡಾಯೆಂತ್ ಪಾಟ್ಲ್ಯಾ ವರ್ಸಾಂಪ್ರಾಸ್ ಚಡಿತ್ ದೂಕ್ ಭರ್ಲ್ಯಾ.
ಕಿತ್ಯಾಕ್.... ಹೆಂ ಆಪುರ್ಬಾಯೆಚೆಂ ಕಂತಾರ್ ಗಾಯ್ತಾಸ್ತಾನಾಂಚ್, ಮಧೆಂಚ್ ಗದ್ಗದಿತ್ ಜಾವ್ನ್ ಸರ್ವಾಂಚ್ಯಾ ದೊಳ್ಯಾಂನಿ
ವೆಗ್ಳಾಚಾರಾಚಿಂ ದುಕಾಂ ಹಾಡಂವ್ಚೊ ತೊ ಮಯ್ಪಾಸಿ ತಾಳೊ ಆಜ್ ನಾ!
ಮ್ಹಜೆ ಮಾಯ್ಚೊ ತೊ ಮೊಗಾಳಿ ತಾಳೊ ಸಾಸ್ಣಾಕ್ ಬಂದ್ ಪಡೊನ್ ಥೊಡೆಚ್ ದೀಸ್ ಸಂಪ್ಲ್ಯಾತ್!
ತಿಚೆ ನಿರ್ಜೀವ್ ಕುಡಿರ್ ಆಕೇರಿಚಿ ದೀಶ್ಟ್ ಘಾಲ್ಚೆ ಖಾತಿರ್ ಗಾಂವಾಕ್ ಆಯಿಲ್ಲೊಂ ಹಾಂವ್ ಪರತ್ ಪರ್ಗಾಂವಾಕ್ ವಚೊಂಕ್ ಭಾಯ್ರ್ ಸರ್ಲಾಂ. ಪುಣ್ ಮ್ಹಜಿ ಮತ್ ಆದ್ಲೆ ತೆ ದೀಸ್ ನಿಯಾಳ್ತಾತ್....
ಕಂತಾರ್ ಸಂಪ್ಲ್ಲೆಂಚ್ ’ಸಾಂತಾ ಖುರ್ಸಾಚಿ ಕುರ್ಹು’ ಕಾಡುನ್ ’ಬೆಸಾಂವ್ ದೀ ಮಾಂಯ್’ ಮ್ಹಣೊನ್ ಹಾಂವೆಂ ಹಾತ್ ಜೊಡ್ಚೆ. ತಿಣೆ ಭರ್ಲ್ಲ್ಯಾ ಕಾಳ್ಜಾನ್, ದುಕಾಂಚ್ಯಾ ಉಮಾಳ್ಯಾಂನಿ ಮ್ಹಾಕಾ ಬೆಸಾಂವ್ ದೀವ್ನ್ ವೆಂಗೆಂತ್ ಘೆತಾನಾ ಮ್ಹಾಕಾ ಭೊಗ್ಚೆ ತೆ ವೆಗ್ಳಾಚಾರಾಚೆ ಅಕ್ಲಾಸ್!
ಅಕೆರಿಚೆ ಘಡಿಯೆ, "ಮಾಯ್ ಹಾಂವ್ ವಚೊನ್ ಯೆತಾಂ. ತುಜಿ ಭಲಾಯ್ಕಿ ಸಾಂಬಾಳ್" ಮ್ಹಣೊನ್ ತಿಕಾ ಮೊಗಾನ್ ಜಾಗ್ವಣ್ ದಿತಾನಾ, ತಿಣೆ ಆಪ್ಲಿಂ ದುಕಾಂ ಆನಿ ಪೂಡ್ ಭರ್ಲ್ಲಿಂ ನಾಕಾಚಿಂ ಬುಡಾಂ ಪಾಲ್ವಾನ್ ಪುಸುನ್....
"ಮ್ಹಜೆವಿಶಿಂ ಖಂತ್ ಕರಿನಾಕಾ ರಾಯಾ, ತುಜಿ ಭಲಾಯ್ಕಿ ಸಾಂಬಾಳ್. ಹೆಣೆ-ತೆಣೆ ಭೊಂವ್ತಾನಾ ಚತ್ರಾಯ್ ಕರ್" ಮ್ಹಣ್ತಾನಾ ಮ್ಹಜ್ಯಾ ಕಾಳ್ಜಾಂತ್ ಭೊಗ್ಚಿಂ ತಿಂ ದುಕಾಭರಿತ್ ಭೊಗ್ಣಾಂ.... "ಪಾವ್ಲ್ಲ್ಯಾ ಫರಾ ಕಾಗದ್ ಬರಯ್ ಬಾಳಾ..." ದುಕಾಂಚ್ಯೊ ಝರಿ ದೊಳ್ಯಾಂನಿ ವ್ಹಾಳ್ತಾನಾ ತಿಣೆ ಹಾತ್ ಹಾಲವ್ನ್ ಕರ್ಚಿ ತಿ ಆಕೆರಿಚಿ ವಿನತಿ.....
ನಾ.... ಮ್ಹಾಕಾ ತಿ ಮಾಯ್ ಜಾಯ್!
ತಿಚೆ ಖಾತಿರ್ ಹಾಂವ್ ಕಿತೆಂಯ್ ಸಾಕ್ರಿಫಿಸ್ ಕರುಂಕ್ ತಯಾರ್!
ಮ್ಹಜೆ ಜಿಣಿಯೆಚೊ ಸಂತೊಸ್ಚ್ ತಿಚೆಸಂಗಿಂ ಉಭೊನ್ ಗೆಲಾ.
ಮ್ಹಜ್ಯಾ ಜಿವಿತಾಕ್ ತಿಚೆವಿಣೆಂ ಅರ್ತ್ಚ್ ನಾ ಜಾಲಾ!
"ಜರ್ ಮ್ಹಾಕಾ ದೇವ್ ಮ್ಹಜೊ ದಿಶ್ಟಿಕ್ ಪಡೊನ್ ಮ್ಹಣಾತ್ ತರ್ ಮಾಗ್ ತುಕಾ ಕಿತೆಂ ಜಾಯ್! ಮಾಗ್ತಲೊಂ ಧಾಡ್ ದೆವಾ ಜಿವಂತ್ ಕರುನ್ ಎಕಾ ದಿಸಾಕ್ ತರ್ಯೀ ಯೇಂವ್ ಮ್ಹಜಿ ಮಾಂಯ್"
’ಕೊಂಕಣ್ ಕೊಗುಳ್’ ವಿಲ್ಫಿ ರೆಬಿಂಬಸಾಚೆಂ ಅರ್ತಾಭರಿತ್, ಸಿಂತಿಮೆಂತಾಳ್ ಪದ್ ಮ್ಹಜ್ಯಾ ಉಡಾಸಾಕ್ ಯೇವ್ನ್ ದೊಳ್ಯಾಂಖಾಂಚಿಂನಿ ದುಕಾಂಚಿ ಝರ್ಚ್ ಪುಟ್ಲಿ!
ಜಲ್ಮ್ ದಿಲ್ಲೆ ಆವಯ್ಚೆಂ ಖರೆಂ ಮೋಲ್ ಕಳಜೆ ತರ್ ತಿಕಾ ಹೊಗ್ಡಾಯಿಲ್ಲ್ಯಾ ನಿರಾದಾರಿ ಪುತಾಚೆಂ ಕಾಳಿಜ್ ಉಗ್ತೆಂ ಕರುನ್ ಪಳೆಜೆ! ಮಾಂಯ್ ಆನಿ ಮ್ಹಜೆ ಮದ್ಲ್ಯಾ ಮದುರ್ ಬಾಂದಾಚೆಂ ವರ್ಣನ್ ಕರುಂಕ್ ಜೊಕ್ತ್ಯಾ ಉತ್ರಾಂಚಿ ಸುಕಿದಾಡ್ ಪಡ್ಲ್ಯಾ ಮ್ಹಜೆಲಾಗಿಂ! ಸಾಮಾನ್ಯ್ ಉತ್ರಾಂನಿ ಸಾಂಗೊಂ ತರ್, ತಿ ಫಕತ್ ಏಕ್ ಆವಯ್ ನ್ಹಂಯ್, ಬಗಾರ್ ಮ್ಹಜೆ ಜಿಣಿಯೆಚಿ ದೇವಿ!
ದಿಸ್ಪಡ್ತ್ಯಾ ಗ್ರಾಸಾಖಾತಿರ್ ಸಾತ್ ದರ್ಯಾಂ ಪಲ್ತಡಿಚ್ಯಾ ಪರ್ಗಾಂವಾಂತ್ ಕಾಮಾರ್ ಆಸ್ಲ್ಲ್ಯಾ ಮ್ಹಾಕಾ ಫಾಂತ್ಯಾ ಫಾರಾರ್ಚ್ ಘಡ್ಗಡ್ಯಾಸಾರ್ಕಿ ವರ್ದಿ ಮೆಳ್ಲ್ಲಿ, ಮ್ಹಜ್ಯಾ ಮಾಂಯ್ಚ್ಯಾ ಅಕಾಲಿಕ್ ಮರ್ಣಾಚಿ! ಹಿ ಅಘಾತಾಚಿ ಖಬರ್ ಆಯ್ಕೊನ್ ಮೊಳಾಬ್ಚ್ ಕೊಸ್ಳೊನ್ ಪಡ್ಲ್ಲೊ ಅನ್ಬೊಗ್ ಜಾಲ್ಲೊ ಮ್ಹಾಕಾ!
ಹಾಂವ್ ಆನಿ ಸ್ಮಿತಾ ಉಟಾಉಟಿಂ ಗಾಂವಾಕ್ ಭಾಯ್ರ್ ಸರ್ಚೆ ತಯಾರಾಯೆರ್ ಪಡ್ಲ್ಲ್ಯಾಂವ್!
ತಿತ್ಲ್ಯಾರ್ ಪಾಂಚ್ ಜಣಾಂಚೊ ಪಂಗಡ್ ಘರಾಭಿತರ್ ಪ್ರವೇಶ್ ಜಾಲೊ.
ತಾಂಚ್ಯಾ ಮದ್ಲ್ಯಾ ಮ್ಹಜ್ಯಾ ಇಶ್ಟಾ ನವಿನಾಚಿ ಮಾತ್ರ್ ಒಳೊಕ್ ಹಾಂವೆಂ ಧರ್ಲಿ.
"ಪ್ರೇಯ್ಸ್ ದ ಲೋರ್ಡ್ ಬ್ರದರ್ ರೊನಿ"
ನವಿನಾನ್ ಆನಿ ತಾಚೆಸಂಗಿಂ ಆಯಿಲ್ಲ್ಯಾಂನಿ ಮ್ಹಾಕಾ ಪೊಟ್ಲುನ್ ಧರ್ಲೊ.
’ಭುಜಾವಣ್ ದಿಂವ್ಚಿ ಏಕ್ ನವಿ ರೀತ್ ಆಸ್ತೆಲಿ’ ಚಿಂತ್ಲೆಂ ಹಾಂವೆಂ.
’ಆಮ್ಚ್ಯಾ ಸುಖಾಂತ್ ಮಾತ್ರ್ ನ್ಹಂಯ್, ಬಗಾರ್ ದುಕಾಂತ್ಯೀ ಆಮಿ ದೆವಾಚಿ ಸ್ತುತಿ ಕರಿಜೆ’ ಮ್ಹಣೊನ್ ಮ್ಹಜೊ ಧರ್ಮ್ ಮ್ಹಾಕಾ ಶಿಕಯ್ತಾ ತರ್ಯೀ, ಮ್ಹಜೆ ಜಿಣಿಯೆಚೊ ಉಸ್ವಾಸ್ ಜಾವ್ನಾಸ್ಲ್ಲ್ಯಾ ಮ್ಹಜೆ ಮಾಂಯ್ಕ್ ಮ್ಹಜೆ ಥಾವ್ನ್ ವೆಗ್ಳಾಚಾರ್ ಕೆಲ್ಲ್ಯಾ ತ್ಯಾ ’ಲೋರ್ಡಾ’ ಕ್ ’ಪ್ರೇಯ್ಸ್’ ಕರುಂಕ್ ಮ್ಹಾಕಾ ಇಲ್ಲೆ ತ್ರಾಸ್ ಭೊಗ್ಲೆ!
"ಜೆಜು ಆಮ್ಚೊ ಸೊಡ್ವಣ್ದಾರ್! ತೊಚ್ ಆಮ್ಚಿ ಬಚಾವಿ; ತೊಚ್ ಆಮ್ಚೊ ಭರ್ವಸೊ! ತ್ಯಾ ಸೊಡ್ವಣ್ದಾರಾಚೆರ್ ಭರ್ವಸೊ ದವರ್, ತುಕಾ ಖಂಚ್ಯಾಂತ್ಯೀ ಉಣೆಂ ಆಸ್ಚೆಂನಾ!"
ನವಿನಾನ್ ಶೆರ್ಮಾಂವ್ ದಿತಾನಾ, ತ್ಯಾ ದುಕಾಚ್ಯಾ ವಗ್ತಾಯಿ ಹಾಂವ್ ಏಕ್ ಪಾವ್ಟಿಂಚ್ಯಾಕ್ ಥಟಾಕ್ಲೊಂ!
ಪಾಟ್ಲ್ಯಾ ಥೊಡ್ಯಾ ದಿಸಾಂ ಪರ್ಯಾಂತ್ ಆಪ್ಲ್ಯಾ ಇಶ್ಟಾಂಸಂಗಿಂ ಮಜಾ ಮಾರ್ತಾನಾ, ಇಗರ್ಜೆಂಚೆಂ ದಾರ್ಚ್ ವಿಸರ್ನ್ ಗೆಲ್ಲೊ ನವೀನ್ ಆಜ್ ಎಕಾಚ್ಛಾಣೆಂ ಪ್ರವಾದ್ಯಾಂಬರಿ ಉಲಂವ್ಕ್ ಲಾಗ್ಲ್ಲೊ!
’ಮ್ಹಜಿ ನಕ್ಲಾಂ ಪುಣಿ ಕರ್ತಾಗಾಯ್?’ ಹಾಂವೆಂ ಚಿಂತ್ಲೆಂ.
"ಕೋಣ್ ಮ್ಹಣ್ತಾ ಆಮ್ಕಾಂ ಖಂಚ್ಯಾಂತ್ಯೀ ಉಣೆಂ ನಾ ಮ್ಹಣೊನ್!? ತರ್ ಆಮ್ಚೆ ಮಾಂಯ್ಕ್ ಜಿವಂತ್ ಕರುನ್ ದೀಂವ್ಕ್ ಸಾಂಗ್ ತುಜ್ಯಾ ’ಲೋರ್ಡಾ’ ಲಾಗಿಂ", ಸ್ಮೀತಾನ್ ಪಿಸಾಂತುರ್ ಜಾಲ್ಲೆಬರಿ ಬೊಬಾಟ್ತಾನಾ, ಹಾಂವ್ ವಾಸ್ತವಿಕ್ ಸಂಸಾರಾಕ್ ಪಾಟಿಂ ಆಯ್ಲೊಂ!
ಸ್ಮಿತಾಕ್ ಹಾಂವೆಂ ಸಾಂಬಾಳ್ಳೆಂ...
ವ್ಹಯ್... ಜಲ್ಮ್ ಆನಿ ಮರಣ್ ಆನಿ ತಾಚೆಮದೆಂ ಘಡ್ಚೆಂ ಸಗ್ಳೆಂ ದೆವಾಚೆಚ್ ಖುಶೆನ್, ತಾಕಾ ಸವಾಲ್ ಕರುಂಕ್ ಆಮ್ಕಾಂ ಅದಿಕಾರ್ ನಾ!! ಪುಣ್ ಅಸಲ್ಯಾ ಕಠೀಣ್, ಕರಂದಾಯೆಚ್ಯಾ ವಗ್ತಾ ಆಮ್ಚೊ ಸ್ಪಿರಿತ್ ಇಲ್ಲೊ ಧಂಡಳ್ತಾ... ಮನ್ಶ್ಯಾ ಸಂಯ್ಬ್ ತೆಂ!!
"ಸೊಡ್ವಣ್ದಾರಾ ಸೊಮಿಯಾ.... ಸ್ಮಿತಾಚೆ ಮತಿಕ್ ಉಜ್ವಾಡ್ ದಿ, ರೊನಿಕ್ ಆನಿ ಸ್ಮಿತಾಕ್ ತುಜೊ ದೈವಿಕ್ ವಾಟೊ ಉಗ್ಡಾಪೊ ಕರ್.... ಪ್ರೇಯ್ಸ್ ದ ಲೋರ್ಡ್... ಪ್ರೇಯ್ಸ್ ದ ಲೋರ್ಡ್... ಆಲ್ಲೆಲ್ಲೂಯಾ... ಆಲ್ಲೆಲ್ಲೂಯಾ..." ನವೀನ್ ಆನಿ ತಾಚೊ ಪಂಗಡ್ ದಿಂಬಿಯಾಂನಿ ಪಡೊನ್ ವ್ಹಡ್ಲ್ಯಾನ್ ಬೊಬಾಟ್ತಾನಾ, ಹಾಂವ್, ಸ್ಮಿತಾ ಆನಿ ಮ್ಹಜೆ ಮಿತ್ರ್ ರಿಚ್ಚಿ ಆನಿ ಸ್ಟೇನಿ ಮೊನೆ ಜಾವ್ನ್ ಪಳೆಂವ್ಕ್ ಪಡ್ಲ್ಯಾಂವ್.
ಪಂದ್ರಾ ಮಿನುಟಾಂಚಿ ’ನೊನ್ ಸ್ಟೋಪ್’ ಬೊಬಾಟ್ ಆಯ್ಕಲ್ಲ್ಯಾ ತಾಂಚ್ಯಾ ’ಲೊರ್ಡಾ’ನ್ಯಿ ಸಮಾಧಾನೆಚೊ ಏಕ್ ಉಸ್ವಾಸ್ ಸೊಡ್ಲೊ ಕೊಣ್ಣಾ! ತಾಂಚ್ಯಾ ಮೌನ್ಪಣಾಚೊ ಫಾಯ್ದೊ ಉಟವ್ನ್ ರಿಚ್ಚಿನ್ ಆನಿ ಸ್ಟೇನಿನ್ ಸವ್ಕಾಸ್ ಮಾಗ್ಣೆಂ ಸುರು ಕೆಲೆಂ.
"ಸಾಸ್ಣಾಚೊ ವಿಶೆವ್ ದಿ ತಿಕಾ ಯೇ ಸೊಮಿಯಾ..."
"ನಮಾನ್ ಮರಿಯೆ, ಕುರ್ಪೆನ್ ಭರ್ಲೆಲೆ...."
ಹ್ಯಾ ಮಾಗ್ಣ್ಯಾಂತ್ ಮ್ಹಾಕಾ ತಾಳೊ ಆಯ್ಕಲೊ ಫಕತ್ ರಿಚ್ಚಿ ಆನಿ ಸ್ಟೇನಿಚೊ! ನವೀನ್ ಆನಿ ತಾಚೊ ಪಂಗಡ್ ಎಕ್ದಮ್ ಥಂಡ್ ಪಡ್ಲ್ಲೊ!!
ಮ್ಹಾಕಾ ಆತಾಂ ಹಳೂ ಮಿಸ್ತೆರ್ ಸುಸ್ತೊಂಕ್ ಲಾಗ್ಲ್ಲೊ!
ದಿಸಾಕ್ ಚಾಚಾರ್ ಲೆಕಾನ್ ಉದೆಂವ್ಚ್ಯಾ ಖಂಚ್ಯಾಗಿ ನವ್ಯಾ ಪಂಗ್ಡಾಕ್ ನವೀನ್ ಸೆರ್ವಲಾ ಆಸ್ತಲೊ ಮ್ಹಳ್ಳೆಂ ಖಾತ್ರಿ ಜಾತಾನಾ ಹಾಂವ್ ಚತುರ್ ಜಾಲೊಂ! ’ಜೆಜುಚೆ ಲಾಗ್ಶಿಲೆ ಈಶ್ಟ್’ ಮ್ಹಣೊನ್ ಆಪ್ಣಾಕ್ಚ್ ವೊಲಾಂವ್ಚ್ಯಾ ಹ್ಯಾ ನವ್ಯಾ ಪಂಗ್ಡಾಂಚ್ಯಾ ಸಾಂದ್ಯಾಂಚಿ ಸವಯ್ ತಿ! ಕೊಣೀ ಕಶ್ಟಾಂತ್ ಆಸ್ತಾನಾ, ಕೊಣಾಯ್ಚ್ಯಾ ಕುಟ್ಮಾಂತ್ ಅನ್ವಾರಾಂ ಆಯಿಲ್ಲ್ಯಾ ವೆಳಾರ್ ತಸಲ್ಯಾಂಚೆರ್ ಹುಸ್ಕೊ ದಾಕವ್ನ್ ತಾಂಕಾಂ ಮಾಗ್ಣ್ಯಾಚೆಂ ಬಳ್ ದಿಂವ್ಚೆಂ!
ವಾಂಜೆಲಾಂತ್ಲಿಂ ಸಾತ್ ಆಟ್ ವಾಕ್ಯಾಂ ತೋಂಡ್ ಪಾಟ್ ಕರುನ್, ’ರಪರಪ್’ ಕರುನ್ ಉಚಾರ್ತಾನಾ, ವಾಂಜೆಲಾವಿಶಿಂ ಭೋವ್ ಉಣಿ ಸಮ್ಜಣಿ ಆಸ್ಲ್ಲ್ಯಾ ಥೊಡ್ಯಾಂನಿ ಹಾಂಕಾಂ ಪ್ರವಾದಿ ಮ್ಹಣೊನ್ ಪಾತ್ಯೆಂವ್ಚೆಂ!
ಅಸಲ್ಯಾ ಸಂದರ್ಬಾಚೊ ಫಾಯ್ದೊ ಉಟವ್ನ್ ತಾಣಿಂ ಕಾತೊಲಿಕ್ ಧರ್ಮಾಚ್ಯಾ ಸಂಪ್ರದಾಯಾಕ್ ಬೋಟ್ ಜೊಕುನ್ ತಾಂತ್ಲ್ಯೊ ಚುಕಿ ಸೊಧುನ್ ಕಾಡ್ಚೆಂ ಪ್ರೇತನ್ ಕರ್ಚೆಂ....
ಪಯ್ಲೆಂಚ್ ಧರ್ಮಾಂತ್ ಶೆಳೆಲ್ಲ್ಯಾ ಥೊಡ್ಯಾಂನಿ ತಾಂಚೆ ಜಾಣ್ವಾಯೆವಿಶಿಂ ವಿಜ್ಮಿತ್ ಪಾಂವ್ಚೆಂ...
"ರೊನಿ, ಸ್ಮಿತಾ ಆನಿ ತುಮಿ ಭಾವಾಂನೊ...." ಥೊಡ್ಯಾ ವೆಳಾಚೆಮ್ ಮೌನ್ ಮೊಡುನ್, ಆಮ್ಕಾಂ ಸರ್ವಾಂಕ್ ಉದ್ದೇಸುನ್ ನವೀನ್ ಉಲಯ್ಲೊ.
"ಆಮ್ಚೊ ಸೊಡ್ವಣ್ದಾರ್ ಜೆಜುಕ್ರೀಸ್ತ್ ಆಮ್ಚೆಂ ಮಾಗ್ಣೆಂ ಆಯ್ಕೊಂಕ್ ಸದಾಂಚ್ ತಯಾರ್ ಆಸ್ತಾ, ಮರಿಯೆದ್ವಾರಿಂ ಮಾಗ್ಣೆಂ ಕರ್ಚ್ಯಾಂತ್ ತುಮ್ಕಾಂ ಕಸಲೊ ಅರ್ಥ್ ದಿಸ್ತಾ?" ನವಿನಾನ್ ತೀಕ್ಶ್ಣ್ ಸವಾಲ್ ಕರ್ತಾನಾ ಮ್ಹಾಕಾ ಕಿತ್ಯಾಕ್ಗಿ ಸೊಸುಂಕ್ ಜಾಲೆಂನಾ.
ಹಾಕಾ ಕಾರಣ್ಯಿ ಆಸ್ಲ್ಲೆಂ.
ಮ್ಹಜಿ ಸಂಸಾರಿ ಆವಯ್, ಮ್ಹಜಿ ಮೊಗಾಳ್ ಮಾಯ್ ಮ್ಹಜೆಥಾವ್ನ್ ಪಯ್ಸ್ ಗೆಲ್ಲಿ ದೂಕ್ ಕಾಳ್ಜಾಂತ್ ಜಿವಿ ಜಿವಿ ಆಸ್ತಾನಾಂಚ್, ಮ್ಹಜೆ ಸರ್ಗಿಂಚೆ ಆವಯ್ಕ್, ಮಾಯೆ ಮರಿಯೆಕ್ ಮ್ಹಜೆ ಥಾವ್ನ್ ಪಯ್ಸ್ ಕರುಂಕ್ ನವಿನಾನ್ ಕರ್ಚೆಂ ಪ್ರೇತನ್ ಹಾಂವ್ ಸೊಸಿನ್ ತರ್ಯಿ ಕಸೊಂ?
"ತುಮಿ ಕಾತೊಲಿಕಾಂ ಜೆಜುಲಾಗಿಂ ಶೀದಾ ಮಾಗ್ಚ್ಯಾ ಬದ್ಲಾಕ್, ಹೆರ್ ಮದ್ಯಸ್ತಾಂಚೆ ಕುಮ್ಕೆರ್ ಭರ್ವಸೊ ದವರ್ತಾತ್ ತೆಂ ಸಾರ್ಕೆಂ ನ್ಹಂಯ್" ನವಿನಾಸಂಗಿಂ ಆಯಿಲ್ಲ್ಯಾ ಎಕ್ಲ್ಯಾನ್ ವಾಕ್ಮೂಲ್ ದಿತಾನಾ, ಏಕ್ ಪಾವ್ಟಿಂಚ್ಯಾಕ್ ಮ್ಹಾಕಾ ಮ್ಹಜೆ ಮಾಯ್ಚ್ಯಾ ಮರ್ಣಾಚಿ ವಿಸರ್ ಪಡ್ಲಿ.
"ತುಕಾ ಖಂಚ್ಯಾಯ್ ವಸ್ತುಂಚಿ ಗರ್ಜ್ ಆಸತರ್ ಬಾಬಾಲಾಗಿಂ ವಾ ವ್ಹಡ್ಲ್ಯಾ ಭಾವಾಲಾಗಿಂ ವಿಚಾರ್ಚೆಪ್ರಾಸ್ ಚಡ್ ಸಳಾವಳಿನ್ ತುಜೆ ಆವಯ್ಲಾಗಿಂ ವಿಚಾರುಂಕ್ ಸಾದ್ಯ್ ಆಸಾ ತೆಂ ತುಂ ಮಾನ್ತಾಯ್?" ಹಾಂವ್ ತರ್ಕಾಕ್ ದೆಂವ್ಲೊಂಚ್!
"ಆಮಿಯಿ ದೆವಾ ಬಾಪಾ ಆನಿ ಪುತಾಲಾಗಿಂಚ್ ಮಾಗ್ಲ್ಲೆಂ! ತಾಚೆ ಬರಾಬರ್, ತ್ಯಾಚ್ ಸೊಡ್ವಣ್ದಾರಾಚೆ ಮಾಯೆಲಾಗಿಂ, ತುಜ್ಯಾ ಪುತಾಲಾಗ್ಚೆಂ ಮಾಗೊನ್ ದೀ ಮ್ಹಣೊನ್ ಪ್ರಾರ್ಥನ್ ಕೆಲ್ಲೆಂ ಹಾಂತುಂ ಕಿತೆಂ ಚೂಕ್ ಆಸಾ?"
ಮ್ಹಜ್ಯಾ ಇಷ್ಟಾ ರಿಚ್ಚಿನ್ಯಿ ಮ್ಹಜಿ ಪಾಡ್ತ್ ಕಾಣ್ಗೆಲಿ!
"ತಿ ತುಮ್ಚಿ ಕಾತೊಲಿಕಾಂಚಿ ಚೂಕ್! ಖರ್ಯಾ ಕ್ರಿಸ್ತಾಂವಾಂಚೊ ಭರ್ವಸೊ ಏಕ್ಚ್ ಏಕ್ ತೊ ಜಿವಂತ್ ಕ್ರಿಸ್ತ್!" ನವೀನ್ ಉಲಯ್ಲೊ.
"ತೆಂ ಆಮಿ ಖರೊಖರ್ ಪಾತ್ಯೆತಾಂವ್ ಆನಿ ತ್ಯಾ ಜಿವ್ಯಾ ದೆವಾಲಾಗಿಂ ಆಮಿಯಿ ಮಾಗ್ತಾಂವ್. ಸಾಂಗಾತಾ ಮರಿಯೆ ಮಾಯೆಲಾಗಿಂಯ್ ವಿನತಿ ಕರ್ತಾಂವ್, ಆಮ್ಚೆ ಪಾಸತ್ ಮಾಗೊಂಕ್!"
ಮ್ಹಜ್ಯಾ ಅನ್ಯೇಕಾ ಮಿತ್ರಾ ಸ್ಟೇನಿನ್ ತಾಳೊ ಮೆಳಯ್ಲೊ.
"ಪುಣ್ ಮರಿಯೆಚ್ಯಾ ಮದ್ಯಸ್ತಿಕೆಚಿ ಗರ್ಜ್ ಕಿತೆಂ?"
ನವೀನ್ ಆಪ್ಲೆಂ ಹಟ್ ಸೊಡುಂಕ್ ತಯಾರ್ ನಾತ್ಲ್ಲೊ.
"ಥೊಡ್ಯಾಚ್ ವೆಳಾ ಆದಿಂ ತುಮಿ, ಮ್ಹಜೆಖಾತಿರ್ ಜೆಜುಕ್ರಿಸ್ತಾಲಾಗಿಂ ಮಾಗ್ಣೆಂ ಕೆಲೆಂ! ಜರ್ ತುಮ್ಕಾಂ, ಸಾದ್ಯಾ ಮನ್ಶಾಂಕ್ ಮ್ಹಜೆಖಾತಿರ್ ಜೆಜುಲಾಗಿಂ ಮಾಗೊನ್ ಕಾಣ್ಗೆವ್ನ್ ದಿಂವ್ಚೊ ಅಧಿಕಾರ್ ಆಸಾತರ್, ಜೆಜುಚಿ ಖರಿ ಆವಯ್ ಜಾವ್ನಾಸ್ಚ್ಯಾ ಮರಿಯೆಕ್ ಆಮಾ ಪಾಪಿಯಾಂ ಪಾಸತ್ ಆಪ್ಲ್ಯಾ ಪುತಾಲಾಗಿಂ ಮಾಗೊನ್ ದಿಂವ್ಚೊ ಅಧಿಕಾರ್ ನಾ!?"
ಮ್ಹಜ್ಯಾ ಸವಾಕ್ ನವೀನ್ ಆನಿ ತಾಚೊ ಪಂಗಡ್ ಥಂಡ್ ಪಡ್ಲೊ!
"ತೆಂ ಸೊಡ್ಯಾಂ, ಅಂಕ್ವಾರ್ ಮಾಯ್ ಜೆಜುಚಿ ಆವಯ್ ಮ್ಹಣೊನ್ ತರ್ಯಿ ತುಮಿ ಒಪ್ತಾತ್ಗೀ ವಾ ತುಮ್ಚೆಂ ಕಾಂಯ್ ತರ್ಯಿ ನವೆಂ ಸಿದ್ಧಾಂತ್ ಆಸಾ?" ಹಾಂವೆಂ ತಾಂಕಾಂ ವ್ಯಂಗ್ಯ್ ಸವಾಲ್ ಕೆಲೆಂ.
"ತಿ ಜೆಜುಚಿ ಮಾಯ್ ಮ್ಹಣ್ ಆಮಿ ಒಪ್ತಾಂವ್, ಪುಣ್ ತಿಕಾ ಜೆಜು ಶಿವಾಯ್ ಹೆರ್ ಭುರ್ಗಿಂ ಆಸ್ಲ್ಲಿಂ!"
ನವಿನಾನ್ ಧಯ್ರಾನ್ ಮ್ಹಣ್ತಾನಾ ಹಾಂವ್ ಉಡೊನ್ ಪಡ್ಲೊಂ!
"ಜುಂವಾಂವ್ಚ್ಯಾ ವಾಂಜೆಲಾಂತ್ ಅಧ್ಯಾಯ್ ೭:೧-೫ ಪಳೆ! ತಾಂತುಂ ಜೆಜುಕ್ ಭಾವ್ ಆಸ್ಲ್ಲೆ ಮ್ಹಣ್ ಸುಡಾಳ್ ಲಿಕ್ಲಾಂ" ನವಿನಾನ್ ಮ್ಹಾಕಾ ಪವಿತ್ರ್ ಪುಸ್ತಕ್ ವೊಡ್ಡಾಯ್ಲೊ!
ಹಾಂವೆಂ ತೊ ಅಧ್ಯಾಯ್ ಚೀತ್ ದೀವ್ನ್ ವಾಚ್ಲೊ....
ಹ್ಯಾ ನವ್ಯಾ ಪಂಗ್ಡಾಚ್ಯಾ ಮನ್ಶಾಂನಿ ವಾಂಜೆಲಾಂತ್ಲಿಂ ಎಕೇಕ್ ವಾಕ್ಯೆಂ ಕಾಣ್ಗೆವ್ನ್ ತಾಂಕಾಂ ಖುಶಿ ಆಸ್ಲ್ಲೆಬರಿ ಅರ್ತ್ ದೀವ್ನ್, ಅರ್ತ್ ನಾತ್ಲ್ಲೊ ವಾದ್ ಮಾಂಡ್ಚೊ ಆಯ್ಕೊನ್ ಮ್ಹಾಕಾ ಸಂತಾಪ್ ಆಯ್ಲೊ.
ವ್ಹಯ್..... ತ್ಯ ಅದ್ಯಾಯಾಂತ್ ಜೆಜುಚ್ಯಾ ಭಾವಾಂನಿ ಜೆಜುಕ್ ಸಾಂಗ್ಲೆಂ... ಮ್ಹಣ್ ಆಸಾ! ತಿತ್ಲೆಂ ಮ್ಹಳ್ಳ್ಯಾಫರಾ, ಮರಿಯೆಕ್ ಹೆರ್ ಭುರ್ಗಿಂ ಆಸ್ಲ್ಲಿಂ ಮ್ಹಣ್ಚ್ಯಾ ವಾದಾಂತ್ ಕಿತ್ಲೊ ಅರ್ತ್ ಆಸಾ? ಮ್ಹಳ್ಳೊ ಸಬ್ದ್ ಜಾರಿಯೆರ್ ನಾತ್ಲ್ಲೊ ದೆಕುನ್ ಬಾಪ್ಲ್ಯಾ ಭಾವಾಕ್ ವಾ ಮಾವ್ಳ್ಯಾಚ್ಯಾ ಪುತಾಕ್ಯಿ ’ಭಾವ್’ ಮ್ಹಣೊನ್ಚ್ ಆಪಯ್ತಾಲೆ ಆಸ್ತಾಂ, ತ್ಯಾ ಎಕಾ ವಾಕ್ಯಾಕ್ ಲಾಗೊನ್ ಮರಿಯೆವಿಶಿಂ ಆದಾರ್ ನಾತ್ಲ್ಲೊ ಅಪಪ್ರಚಾರ್ ಕರುಂಕ್ ಹ್ಯಾ ನವ್ಯಾ ಪಂಗ್ಡಾಂಚ್ಯಾಂಕ್ ನಾಡ್ಲ್ಲೊ ಲುಸಿಫೆರ್ ಮತಿಂತ್ಚ್ ಹಾಸ್ತಾ ಕೊಣ್ಣಾ!
ನವಿನಾಕ್ ಆನಿ ತಾಚ್ಯಾ ಪಂಗ್ಡಾಕ್ ಹ್ಯಾ ವಿಶಿಂ ಸಮ್ಜೊಂಕ್ ಹಾಂವೆಂ ಕೆಲ್ಲೆಂ ಪ್ರೇತನ್ ನಿರ್ಪಳ್ ಜಾತಾನಾ ಹಾಂವ್ ಇಲ್ಲೊಂ ತಾಪ್ಲೊಂ..." ಥೊಡ್ಯಾ ವೆಳಾ ಆದಿಂ ತುಮಿ ಘರಾ ಭಿತರ್ ಸರ್ತಾನಾ ಮ್ಹಾಕಾ ’ಪ್ರೇಯ್ಸ್ ದ್ ಲೋರ್ಡ್ ಬ್ರದರ್ ರೊನಿ’ ಮ್ಹಳ್ಳೆಂ! ’ಬ್ರದರ್’ ಮ್ಹಳ್ಯಾರ್ ’ಭಾವ್’ ಮ್ಹಳ್ಳೊ ಅರ್ತ್ ಜಾತಾ. ತರ್ ಮ್ಹಜಿ ಆನಿ ತುಮ್ಚಿ ಆವಯ್ ಏಕ್ಚ್ ಮ್ಹಣ್ಚೆಂ ತುಮಿ?"
ಮ್ಹಜ್ಯಾ ಶೀದಾ ಸವಾಲಾಕ್ ತೆ ಎಕ್ದಂ ಮೊನೆ ಜಾಲೆ.
"ತ್ಯಾ ಆಯಿನ್ನ್ ವೆಳಾಚೊ ಫಾಯ್ದೊ ಉಟವ್ನ್ ಹಾಂವೆಂ ಜುವಾಂವ್ಚ್ಯಾ ವಾಂಜೆಲಾಚೊ ಅದ್ಯಾಯ್ ೧೯:೨೫-೨೭ ಉಗ್ತೊ ಕರ್ನ್ ನವಿನಾಕುಶಿನ್ ವೊಡ್ಡಾಯ್ಲೊ.
"ಜೆಜು ಖುರ್ಸಾರ್ ಮರ್ತಾನಾ, ತಾಚೊ ಮೊಗಾಚೆ ಆವಯ್ ಮರಿಯೆಕ್ ತಾಣೆ ಆಪ್ಲ್ಯಾ ಮೊಗಾಚ್ಯಾ ಶಿಸಾಂಚ್ಯಾ ಅದಿನ್ ದೀವ್ನ್ ಮ್ಹಳ್ಳೆಂ ’ಹಿ ತುಜಿ ಆವಯ್’ ಜರ್ ಮರಿಯೆಕ್ ಹೆರ್ ಪೂತ್ ಆಸ್ಲ್ಲೆ ತರ್, ಮರಿಯೆಕ್ ಹೆರಾಂಚಿ ಆವಯ್ ಜಾವ್ನ್ ಒಪ್ಸುನ್ ದಿಂವ್ಚಿ ಗರ್ಜ್ ಕಿತೆಂ ಆಸ್ಲ್ಲಿ?"
ಹಾಂವೆಂ ಸವಾಲ್ ಕರ್ತಾನಾ ನವೀನ್ ಆನಿ ತಾಚ್ಯಾ ಪಂಗ್ಡಾಚೆ ಸಂಪೂರ್ಣ್ ಸಲ್ವಲ್ಲೆಬರಿ ಮ್ಹಾಕಾ ಭೊಗ್ಲೆಂ.
"ಜೆಜುಕ್ ನಿಕೆಪಿತಾನಾ ಜಾಲ್ಯಾರೀ ಜುಜೆ ಆನಿ ನಿಕೊದೆಮ್ ಆಯಿಲ್ಲೆ ಶಿವಾಯ್, ಜೆಜುಚೆ ಭಾವ್ ಆಯಿಲ್ಲೊ ಉಲ್ಲೇಕ್ ವಾಂಜೆಲಾಂತ್ ನಾ!"
ಸ್ಟೇನಿನ್ ತಾಂಚೆರ್ ಆಕ್ರೇಚಿ ಭಾಲಿ ಮಾರ್ಲಿ.
"ತುಮ್ಕಾಂ ಸಾರ್ಕೊ ಉಜ್ವಾಡ್ ಮೆಳೊಂಕ್ನಾ ದೆಕುನ್ ತುಮಿ ತಶೆಂ ಉಲಯ್ತಾತ್! ತುಮ್ಕಾಂ ಉಜ್ವಾಡ್ ಮೆಳ್ಚ್ಯಾ ಪಾಸತ್ ಆಮಿ ಸದಾಂಚ್ ಮಾಗ್ತಾಂವ್! ಪ್ರೇಯ್ಸ್ ದ ಲೋರ್ಡ್"
ಸಮಾಧಾನೆನ್ ಉಲವ್ನ್ ನವೀನ್ ವೆಚ್ಯಾಕ್ ಆಯ್ತೊ ಜಾತಾನಾ ತಾಚೊ ಪಂಗಡ್ಯೀ ಉಟ್ಲೊ!
’ಆಮ್ಕಾಂ ಸಾರ್ಕೊ ಉಜ್ವಾಡ್ ಮೆಳೊಂಕ್ ನಾ ದೆಕುನ್, ಆಮಿ ಮರಿಯೆಚಿ ಸಸಾಯ್ ಮಾಗ್ತಾಂವ್ ದೆಕುನ್ ಆಮ್ಕಾಂ ಯೆಮ್ಕೊಂಡ್ ಫಾವೊ ಜಾತಾ ಮ್ಹಣ್ಚೆಂಗಿ ತುಮಿ?"
ಸ್ಟೇನಿನ್ ತಾಕಾ ವ್ಯಂಗ್ ಉತ್ರಾಂನಿ ತೊಪ್ಲೆಂ.
"ತುಮ್ಕಾಂಯ್ ಖಂಡಿತ್ ಉಜ್ವಾಡ್ ಮೆಳ್ತಲೊ ಆನಿ ತುಮಿ ಬಚಾವ್ ಜಾತೆಲ್ಯಾತ್" ಸರ್ಗಾಚಿ ಚಾವಿ ಆಪ್ಲ್ಯಾಚ್ ಹಾತಿಂ ಆಸ್ಲ್ಲ್ಯಾ ಜಿನ್ಸಾರ್ ನವೀನ್ ಉಲಯ್ಲೊ.
"ತುಮ್ಚಾ ಉತ್ರಾಂ ಫರ್ಮಾಣೆ ವೆಚೆಂ ತರ್, ಕಾತೊಲಿಕ್ ಜಾವ್ನ್ ಆಸ್ಲ್ಲಿಂ, ಭಾಗೆವಂತ್ ಜೀಣ್ ಜಿಯೆಲ್ಲಿ ಮದರ್ ತೆರೆಜಾಯಿ ಉಜ್ವಾಡ್ ಮೆಳ್ಚ್ಯಾ ಆದಿಂ ಸರ್ಲ್ಯಾ ದೆಕುನ್ ಯೆಮ್ಕೊಂಡಾಕ್ ಗೆಲ್ಯಾ! ಥೊಡ್ಯಾ ವರ್ಸಾ ಆದಿಂ ಸುರು ಜಾಲ್ಲೊ ’ಖರೊ ಉಜ್ವಾಡ್’ ಮೆಳ್ಚೊ ತುಮ್ಚೊ ಪಂಗಡ್ ಜಾಂವ್ಚೆ ಆದಿಂ ಸರ್ಲ್ಲೆ ಸರ್ವ್ ಯೆಮ್ಕೊಂಡಾಕ್ ಗೆಲ್ಯಾತ್... ತರ್ ಯೆಮ್ಕೊಂಡ್ ಹಾವ್ಜ್ ಪುಲ್ ಆಸ್ತೆಲೆಂ" ಸ್ಟೇನಿ ತಾಂಕಾ ಖೊಂಕುನ್ ಉಲಯ್ಲೊ. "ಮ್ಹಜೊ ಆಬ್, ವ್ಹಡ್ಲಿಮಾಂಯ್, ಮ್ಹಜೊ ಬಾಬ್ ಆನಿ ಮ್ಹಜಿ ಮಾಂಯ್ ಹಿ ಸರ್ವಾಂ ಕಾತೊಲಿಕ್ ಭಾವಾಡ್ತಾಂತ್ ಜಿಯೆವ್ನ್ ಮರಣ್ ಪಾವ್ಲಿಂ! ಜರ್ ತಿಂ ಯೆಮ್ಕೊಂಡಾಕ್ ಗೆಲ್ಯಾಂತ್ ತರ್ ಹಾಂವೆಂ ಎಕ್ಲ್ಯಾನ್ ಸರ್ಗಾರ್ ವಚೊನ್ ಕಿತೆಂ ಕರ್ಚೆಂ?" ಪಿಸಾಂತುರ್ ಜಾಲ್ಲ್ಯಾ ಹಾಂವೆಂ ತಾಂಕಾಂ ಸವಾಲ್ ಕೆಲೆಂ. ನವೀನ್ ಆನಿ ತಾಚೊ ಪಂಗಡ್ ಬಾವ್ಲ್ಲ್ಯಾ ತೊಂಡಾರ್ ಪಾಟಿಂ ಪರ್ತಾಲ್ಲೊ!
ಸ್ಟೇನಿ ಆನಿ ರಿಚ್ಚಿ ಜಿಕ್ಲ್ಲೆ ಉಮೆದಿನ್ ಹಾಸ್ಲ್ಲೆ!!!
ಹಾಂವ್ ಆನಿ ಸ್ಮಿತಾ ಮಾಂಯ್ಚ್ಯಾ ಮರ್ಣಾಕ್ ಹಾಜರ್ ಜಾಲ್ಲ್ಯಾಂವ್! ಮಾಯ್ಚಿ ನಿರ್ಜೀವ್ ಕೂಡ್ ಮಾತ್ಯೆಕ್ ಪಾಯ್ತಾನಾ, ಹಾಂವೆಂ ತ್ಯಾ ವಿಶೇಸ್ ಅಕ್ಲಾಸಾಚ್ಯಾ ವೆಳಾರ್ ಮನಾಂತ್ಚ್ ಮಾಗ್ಣೆಂ ಕೆಲ್ಲೆಂ....
"ಮಾಯ್... ತುಂ ಸರ್ಗಾರ್ ಪಾವ್ಲ್ಯಾಯ್ ವ್ಹಯ್ತರ್ ಆನಿ ತುವೆಂ ಜಿವಂತ್ ಆಸ್ತಾನಾ ಮ್ಹಾಕಾ ಜೆಜು ಆನಿ ಮರಿಯೆವಿಶಿಂ ಶಿಕಯಿಲ್ಲೆ ಶಿಕವ್ಣೆಂತ್ ಸತ್ ಆಸಾತರ್ ನವೀನ್ ಆನಿ ತಾಚ್ಯಾ ಸಾಂಗಾಚ್ಯಾಂಚೆ ಮತಿಕ್ ಉಜ್ವಾಡ್ ಮಾಗೊನ್ ಧಾಡ್...."
ನವೀನ್, ಕಾತೊಲಿಕ್ ಧರ್ಮ್ ಸಾಂಡುನ್ ಗೆಲಾ ತಿ ಖಬಾರ್ ತಾಚ್ಯಾ ಘರ್ಚ್ಯಾಂಕ್ ಬೋವ್ ಆಘಾತಾಚಿ ಜಾಂವ್ಕ್ ಪಾವ್ಲ್ಯಾ ತೆಂ ಮ್ಹಾಕಾ ಗಾಂವಾಂತ್ ಕಳಿತ್ ಜಾಲ್ಲೆಂ!
ತಾಕಾ ಕಶೆಂ ತರ್ಯಿ ಪರತ್ ಕಾತೊಲಿಕ್ ಧರ್ಮಾಕ್ ಪಾಟಿಂ ಹಾಡುಂಕ್ ತಾಚ್ಯಾ ಘರ್ಚಾಂನಿ ಮ್ಹಾಕಾ ವಿನತಿ ಕೆಲ್ಲಿ!
ಪುಣ್ ಅಸಲ್ಯಾ ಪಂಗ್ಡಾಕ್ ಸೆರ್ವಲ್ಲ್ಯಾಂಚೊ ಮೆಂದು ಸಗ್ಳೊ ಧುವ್ನ್ ವಚೊನ್ ತೆ, ತಾಂಚೆಂಚ್ ಸಾರ್ಕೆಂ ಮ್ಹಣ್ಚೆ ಸ್ಥಿತೆರ್ ಆಸ್ತಾತ್ ಆಸ್ತಾಂ, ತಸಲ್ಯಾಂಕ್ ಪರಿವರ್ತನ್ ಕರ್ಚೆಂ ಕಾಮ್ ತಿತ್ಲ್ಯಾ ಸಲಿಸಾಯೆಚೆಂ ನ್ಹಂಯ್ ಮ್ಹಣ್ ಮ್ಹಾಕಾ ಕಳಿತ್ ಆಸ್ಲ್ಲೆಂ.
ಪುಣ್ ಮ್ಹಜೆ ಮರಿಯೆ ಮಾಯೆನ್ ಮನ್ ಕೆಲ್ಯಾರ್ ಹೆಂ ಕಾಮ್ ಖಂಡಿತ್ ಅಸಾಧ್ಯ್ ನ್ಹಂಯ್ ಮ್ಹಳ್ಳಿ ಪಾತ್ಯೆಣಿ ಮ್ಹಾಕಾ ಆಸ್ಲ್ಲಿ.
ತಿತ್ಲೆಂಚ್ ನ್ಹಂಯ್ ಆಪ್ಲೆ ಜಿಣಿಯೆಂತ್ ಆಪ್ಲೆ ಸಂಸಾರಿ ಕಾಯ್ದೆ ಬರ್ಯಾನ್ ಪಾಳ್ನ್, ಏಕ್ ಭಾಗಿ ಮರಣ್ ಜೊಡ್ಲ್ಲಿ ಮ್ಹಜಿ ಮೊಗಾಳ್ ಮಾಯ್ ಮ್ಹಾಕಾ ಹೊ ಉಪ್ಕಾರ್ ಜೋಡ್ನ್ ದಿತಾ ಮ್ಹಳ್ಳೆಂ ಏಕ್ ವಿಶೇಸ್ ಧಯ್ರ್ ಆಸ್ಲ್ಲೆಂ.
ಮ್ಹಜೆ ಮಾಂಯ್ಚ್ಯಾ ಅಕಾಲಿಕ್ ಮರ್ಣಾನ್ ಕಂಗಾಲ್ ಜಾವ್ನ್ ’ ಅನಾತ್’ ಮ್ಹಳ್ಳ್ಯಾ ಭೊಗ್ಣಾಂನಿ ಹಾಂವ್ ಪರತ್ ಪಾಟಿಂ ಪಾವ್ಲ್ಲೊಂ ಮ್ಹಜೊ ’ದಿಸ್ಪಡ್ತೊ ಗ್ರಾಸ್’ ದಿಂವ್ಚ್ಯಾ ತ್ಯಾ ಪರ್ಗಾಂವಾಕ್!
ಹಾಂವೆಂ ಆನಿ ಸ್ಮಿತಾನ್ ಚಿಂತ್ಲ್ಲೆಬರಿಚ್, ಆಮಿ ಪಾಟಿಂ ಪಾವ್ಲ್ಲ್ಯಾ ದುಸ್ರ್ಯಾಚ್ ದಿಸಾ ಆಪ್ಲ್ಯಾ ಪಂಗ್ಡಾಚ್ಯಾ ದೊಗಾಂ ಭಾವಾಂ ಸಂಗಿಂ ನವಿನಾಚೆಂ ಯೆಣೆಂ ಆಮ್ಗೆರ್ ಜಾಲ್ಲೆಂ!
"ಆಮ್ಕಾಂ ಸರ್ಗಿಂಚೊ ಉಜ್ವಾಡ್ ಹಾಡ್ನ್ ಆಯ್ಲ್ಯಾತ್."
ಸ್ಮಿತಾನ್ ಮ್ಹಾಕಾ ಜಾಗ್ವಣ್ ದಿಲಿ.
ಅಸಲ್ಯಾ ನವ್ಯಾ ಪಂಗ್ಡಾಂಚ್ಯಾ ಮನ್ಶಾಂಲಾಗಿಂ ತರ್ಕಾಕ್ ದೆಂವೊನ್, ಉಪ್ರಾಂತ್ ತಾಂಚ್ಯಾಚ್ ಪಂಗ್ಡಾಕ್ ಭರ್ತಿ ಜಾಲ್ಲೆ ದಾಕ್ಲೆಯೀ ಆಸಾತ್, ದೆಕುನ್ ಹಾಂವೆಂ ಚತುರ್ ರಾಂವ್ಚಿ ಗರ್ಜ್ ಆಸ್ಲ್ಲಿ!
"ಆಮ್ಚ್ಯಾ ಘರ್ಚಿಂ ಕೊಣಿ ಮೆಳ್ಲ್ಲಿಂಗೀ?"
ಆಮ್ಚ್ಯಾ ಪಯ್ಣಾವಿಶಿಂ, ಮಾಂಯ್ಚ್ಯಾ ಮರ್ಣಾವಿಶಿಂ ಆನಿ ಸರ್ವ್ ವಿಚಾರ್ ಕೆಲ್ಯಾ ಉಪ್ರಾಂತ್ ನವಿನಾನ್ ಉಲವ್ಣೆಂ ಪರ್ತಿಲೆಂ!
"ತುಜೊ ಧಾಕ್ಟೊ ಭಾವ್ ಮೆಳ್ಲ್ಲೊ" ಹಾಂವೆಂ ಪಯ್ಲೊ ತೀರ್ ಸೊಡ್ಲೊ, ನವೀನ್ ಆಪ್ಲ್ಯಾ ಆವಯ್ ಬಾಪಾಯ್ಕ್ ಎಕ್ಲೊಚ್ ಪೂತ್, ಪಾಂಚ್ ಜಣಾಂ ಭಯ್ಣಿಂ ಪಾಟ್ಲೊ ಮ್ಹಳ್ಳೆಂ ಕಳಿತ್ ಆಸೊನ್ಯಿ! ನಿಜಾಯ್ಕಿ ಮ್ಹಾಕಾ ಮೆಳ್ಲ್ಲೊ ತಾಚ್ಯಾ ಮಾಮಾಚೊ ಪೂತ್!
"ಮ್ಹಾಕಾ ಖಂಯ್ ಭಾವ್ ಆಸಾತ್!? ತುಂ ಫೊಕಣಾಂ ಉಲಯ್ತಾಯ್?" ಹಾಸ್ಲೊ ನವೀನ್!
"ಆನಿ ತುಜಿ ಆವಯ್ ತುಮ್ಗೆಲ್ಯಾ ಡ್ಯಾರಲಾಕ್ ’ಪುತಾ’ ಮ್ಹಣ್ ಉಲೊ ಕರ್ತಾಲಿ! ಮ್ಹಳ್ಯಾರ್ ತೊ ತುಜೊ ಭಾವ್ ಜಾಲೊನೆಂ?" ಹಾಂವೆಂ ತರ್ಕ್ ಮಾಂಡ್ಲೆಂ.
"ಹೊ ಹೊ... ಡ್ಯಾರಲ್ಗಿ? ತೊ ಮ್ಹಜೊ ’ಕಸಿನ್’ ಮಾಮಾಚೊ ಪೂತ್" ನವಿನಾನ್ ಜಾಪ್ ದಿಲಿ ಮ್ಹಜ್ಯಾ ಮುಕ್ಲ್ಯಾ ತಿರಾವಿಶಿಂ ಕಳಿತ್ ನಾಸ್ತಾಂ.
"ಹೊ... ತೊ ತುಜೊ ಕಸಿನ್ಗಿ? ಪುಣ್ ತುಜೊ ಭಯ್ಣಿ ತಾಕಾ ’ಭಾವ್’ ಮ್ಹಣೊನ್ಚ್ ಒಳ್ಕತಾತ್! ತೆಂ ಸೊಡ್ಯಾಂ, ತುಜೆ ಆವಯ್ನ್ ತಾಕಾ ’ಪುತಾ’ ಮ್ಹಣ್ ಉಲೊ ಕೆಲ್ಲೆಂ ಪಳೆವ್ನ್ ತಿ ತಕ್ಲೆಂತ್ ಅಸ್ಕತ್ ಜಾಲ್ಯಾ ಕೊಣ್ಣಾ ಮ್ಹಣ್ ಹಾಂವೆಂ ಚಿಂತ್ಲೆಂ."
"ವಾಟ್!? ರೊನಿ; ತಕ್ಲೆಂತ್ ಅಸ್ಕತ್ ತುಂ ಜಾಲಾಂಯ್! ಮ್ಹಜೆ ಮಾಯ್ಕ್ ತಶೆಂ ಉಲಯ್ನಾಕಾ; ಜೀಬ್ ಸಾಂಬಾಳ್!!"
ಮ್ಹಜಿಂ ಉತ್ರಾಂ ತುಟವ್ನ್ ರಾಗಾನ್ ಖೆಂವ್ಜಾಲೊ ನವೀನ್.
"ನವೀನ್, ಕಿತ್ಯಾಕ್ ರಾಗಾರ್ ಜಾತಾಯ್? ಹಾಂವೆಂ ತುಕಾ ಕಿತೆಂಚ್ ಮ್ಹಣೊಂಕ್ ನಾ" ಮ್ಹಜ್ಯಾ ತಾಳ್ಯಾಂತ್ ಶಾಂತ್ತಾಯ್ ಆಸ್ಲ್ಲಿ.
"ಮ್ಹಾಕಾ ಮ್ಹಣೊಂಕ್ನಾಂಯ್, ಪುಣ್ ಮ್ಹಜೆ ಆವಯ್ಕ್ ಉಲಯ್ಲೊಯ್ ತೆಂ ಹಾಂವೆಂ ತಿಚ್ಯಾ ಪುತಾನ್ ಆಯ್ಕೊನ್ ವೊಗೊ ರಾವಾಜಾಯ್ ಮ್ಹಣ್ತಾಯ್!?" ನವಿನಾಚೊ ರಾಗ್ ನಿವೊಂಕ್ ನಾತ್ಲ್ಲೊ!
"ಮ್ಹಾಕಾ ಜಲ್ಮ್ ದಿಲ್ಲಿ ಆವಯ್ ತಿ! ಸೊಸುನ್ ವ್ಹರಿನಾ" ನವೀನ್ ಮುಂದರಿತಾನಾ ಹಾಂವ್ ಚುರುಕ್ ಜಾಲೊಂ!
ಓಹೊ... ತುಜೆ ಆವಯ್ಕ್, ಜಲ್ಮ್ ದಿಲ್ಲ್ಯಾ ಆವಯ್ಕ್ ಅಕ್ಮಾನ್ ಕೆಲ್ಲ್ಯಾರ್ ತುಂ ಸೊಸುನ್ ವ್ಹರಿನಾಂಯ್! ತರ್, ಜೆಜುಕ್ರಿಸ್ತಾಕ್ ಜಲ್ಮ್ ದಿಲ್ಲ್ಯಾ ತಾಚೆ ಆವಯ್ಕ್ ಮಾಯೆ ಮರಿಯೆಕ್ ತುಮಿ ಗರ್ಜ್ ನಾತ್ಲ್ಲೊ ಅಪಪ್ರಚಾರ್ ಕರುನ್ ಅಕ್ಮಾನ್ ಕರ್ತಾನಾ, ಜೆಜುಕ್ರಿಸ್ತಾನ್ ಸೊಸುನ್ ವ್ಹರಿಜೆ...?" ಹಾಂವೆಂ ಊಂಚ್ ತಾಳ್ಯಾನ್ ಸವಾಲ್ ಕೆಲೆಂ.
ನವೀನ್ ಆನಿ ತಾಚೆ ಈಶ್ಟ್ ಸಂಪೂರ್ಣ್ ಮೊನೆ ಜಾಲ್ಲೆ! ತಾಣಿಂ ಸಲ್ವಣಿ ಸ್ವೀಕಾರ್ ಕೆಲ್ಲ್ಯಾ ಜಿನ್ಸಾರ್ ತಕ್ಲಿ ಬಾಗಾಯ್ಲಿ!
"ನವೀನ್ ತುಜೆ ಆವಯ್ವಿಶಿಂ ತಶೆಂ ಮ್ಹಳ್ಳ್ಯಾಕ್ ಮ್ಹಾಕಾ ಮಾಫ್ ಕರ್, ತಿ ಬೋವ್ ಬರಿ! ಫಕತ್ ತುಮ್ಚೆ ದೊಳೆ ಉಗಡ್ಚ್ಯಾ ಖಾತಿರ್ ಹಾಂವೆಂ ತಶೆಂ ಮ್ಹಳೆಂ" ಹಾಂವೆಂ ಮ್ಹಣ್ತಾನಾ, ಸ್ಮಿತಾನ್ ತಾಳೊ ಮೆಳಯ್ಲೊ "ಜರ್ ತುಮಿ ಕ್ರಿಸ್ತಾಕ್ ಸೊಡ್ವಣ್ದಾರ್ ಮ್ಹಣ್ ಒಪ್ತಾತ್ ತರ್, ತಾಕಾ ಜಲ್ಮ್ ದಿಲ್ಲೆ ಆವಯ್ಕ್ ಮರಿಯೆಕ್ ಮಾನ್ ದಿಂವ್ಚೊ ಕಾಯ್ದೊ ತುಮ್ಚೊ!" ಸ್ಮಿತಾನ್ ಮ್ಹಣ್ತಾನಾ ನವಿನಾಚ್ಯಾ ದೊಳ್ಯಾಂನಿ ಪಶ್ಚಾತ್ತಾಪಾಚಿಂ ದುಕಾಂ ಗಳ್ತಾಲಿಂ. ಮ್ಹಜಿ ಮಾಯ್, ಮಾಯೆ ಮರಿಯೆಚ್ಯಾ ಬಗ್ಲೆಕ್ ರಾವೊನ್ ಸರ್ಗಾರ್ ಥಾವ್ನ್ ಮಧುರ್ ಹಾಸೊ ಫಾಂಕಯ್ತಾ ಮ್ಹಳ್ಳೆಬರಿ ಭೊಗ್ಲೆಂ ಮ್ಹಾಕಾ.
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
