ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಶೇಸ್ ಲೇಖನ್:
ಸಂವಾದಾ ಥಾವ್ನ್ ಶೆಣಾಂತ್ಲ್ಯಾನ್ ಜರ್ನಲಾ ಪರ್ಯಾಂತ್
ವಿತೊರಿ ಕಾರ್ಕಳ್
[ಕೊಂಕ್ಣಿಂತ್ ಅಭಾವ್ ಆಸ್ಚ್ಯಾ ವಿಮರ್ಶಾ ಶೆತಾವಿಶಿಂ ಪಾಟ್ಲ್ಯಾ ಥೊಡ್ಯಾ ವರ್ಸಾಂ ಥಾವ್ನ್ ಜಿ ಏಕ್ ಪಾಟ್ ಭುಂಯ್ ತಯಾರ್ ಜಾಲ್ಯಾ ತಾಚೆರ್ ಆನಿ ಬರವ್ಪಿ ಕಶೆಂ ವಿಮರಾಕ್ ಉಗ್ತೆಂ ಜಾವ್ನ್ ಆಸಾತ್, ಕುದ್ರೊ ಜಾವ್ನ್ ಆಸ್ಲ್ಲೆ ಸುದ್ರೊಂಕ್ ಪ್ರಯತ್ನ್ ಕರ್ನ್ ಆಸಾತ್ ಮ್ಹಳ್ಳೆವಿಶಿಂ ಏಕ್ ನದರ್.]
ಸಾಹಿತ್ಯ್ ಜಿವಿತಾಚಿ ಅಭಿವ್ಯಕ್ತಿ ತರ್, ಜಶೆಂ ಜಿವಿತಾಂತ್ ಆಸಾ ತಶೆಂ ಸಾಹಿತ್ಯಾಂತ್ಯೀ ವ್ದ್, ವಿವಾದ್, ಸಂವಾದ್ ಮನಾಭೇದ್ ಆಸ್ತಾತ್. ತತ್ವಾಂ, ಸಿದ್ಧಾಂತಾಂ ಮೊಡ್ಚಿಂ ಆನಿ ನವಿಂ ಗಡ್ಚಿಂ ಏಕ್ ಸಹಜ್ ಪ್ರಕ್ರಿಯಾ. ಸಾಹಿತ್ಯಾಚ್ಯಾ ಪ್ರಕಾರಾಕ್ ಲಾಗುನ್, ಬರವ್ಪ್ಯಾಚ್ಯಾ ಸಾಹಿತಿಕ್ ಗಿರೇಸ್ತ್ಕಾಯೆನ್ ಲಾಗುನ್ ಸಾಹಿತಿಂ ಮಧೆಂ ಪಂಗಡ್ ಆಸ್ತಾತ್. ಲೊಕಾ ಮೊಗಾಳಾಯ್ ಆನಿ ಸಾಹಿತಿಕ್ ಮಟ್ಟ್ ವೆವೆಗ್ಳಿ ಗಜಾಲ್.
ಸಾಹಿತ್ಯ್ ವಾಚ್ಪ್ಯಾಚೆ ಹಾತಿಂ ಪಾವ್ಲ್ಯಾ ಉಪ್ರಾಂತ್ ತೆಂ ಬರವ್ಪ್ಯಾಂಚೆಂ ನ್ಹಯ್. ವಾಚ್ಪಿ ವಾಚ್ತಾ. ಗರ್ಜ್ ಆಸ್ಲ್ಲೆಂ ಘೆತಾ, ಗರ್ಜ್ ನಾತ್ಲ್ಲೆಂ ಸೊಡ್ತಾ. ಖೊಡಿ ಕಾಡ್ತಾ. ವಿಮರ್ಸೊ ಕರ್ತಾ ಆನಿ ಸಾಹಿತ್ಯಾಕ್ ತುಕ್ತಾ. ತಾಕಾ ಕಾಲ್ ರುಚ್ಲ್ಲೆಂ ಆಜ್ ನಾಕಾ. ಆಯ್ಚೆಂ ಫಾಲ್ಯಾಂಕ್ ನಾಕಾ.
ಕೊಂಕ್ಣಿ ಎದೊಳ್ ಸಾಹಿತಿಕ್ ಪಂಗಡ್ ಮ್ಹಣ್ ನಾತ್ಲ್ಲೆ. ಆಸ್ಲ್ಲೆ ಸರ್ವ್ ಸಮಾನ್. ಸರ್ವಾಂನಿ ಎಕಾಮೆಕಾಚಿ ಪಾಟ್ ಥಾಪುಡ್ಚಿ. ತಶೆಂ ಮ್ಹಣ್ ಪ್ರಯೋಗ್ ಜಾಂವ್ಕ್ ನಾಂತ್ ಮ್ಹಣ್ ನ್ಹಯ್. ಏಕ್ ಚಾ.ಫ್ರಾ. ಏಕ್ ಗಬ್ಬು. ಚವ್ಕಟಾ ಭಾಯ್ರ್ ಗೆಲೆ. ಪುಣ್ ತೆ ಎಕ್ಲೆ ಎಕ್ಸುರೆ ಜಾಲೆ. ಆಯ್ಲೆವಾರ್ ಪರ್ಯಾಂತ್ ಹಾಂಗಾ ಧರ್ಮಾಚೊ ಪ್ರಭಾವ್ ಬಳ್ ಆಸ್ಲ್ಲ್ಯಾನ್ ಸಾಹಿತ್ಯಾಂತ್ಯೀ ’... ಆನಿ ನಿಮಾಣೆ ತೆ ಸುಖಾನ್ ಜಿಯೆಲೆ..’ ತತ್ವ್ ಆಸ್ತಾಲೆಂ. ಕೊಂಕ್ಣಿ ಬರವ್ಪಿ ಮ್ಹಳ್ಳೊ ಬಿಲ್ಲೊ ಲಾಗ್ಲ್ಲೆಂಚ್ ಬರಯ್ಣಾರಾಂನಿ ವಾಚ್ಚೆಂಚ್ ಸೊಡ್ಲೆಂ. ಅಪುಣ್ ಪೆಲ್ಯಾಚೆಂ ವಾ ಹೆರ್ ಭಾಸಾಂಚೆಂ ವಾಚಿನಾ ಮ್ಹಣ್ ಸಾಂಗ್ಚಿ ಹೆಮ್ಮ್ಯಾಚಿ ಗಜಾಲ್ ಜಾಲ್ಲಿ.
ಪುಣ್ ಕೊಂಕ್ಣೆಂತ್ಲೆ ಸಚಾವತ್ ನಾಮ್ಣೆಚೆ ಬರೊವ್ಪಿ ದಾಯ್ಜಿ ದುಬಾಯ್ ಸಾಂದೆ ಆಸ್ಲ್ಲ್ಯಾನ್ ಥಂಯ್ಚರ್ ಸಾಹಿತ್ಯಾ ವಯ್ರ್ ಅಪುರ್ಭಾಯೆಚೆ ಸಂವಾದ್ ಚಲ್ತಾಲೆ.
ಕೊಂಕ್ಣಿ ವಾಚ್ಪಿಯ್ ’ವಿಶಾಲ್ ಮನಾಚೆ’ ಆಸ್ಲ್ಲೆ. ಸಾಹಿತಿಕ್ ಸಂವಾದಾವರ್ನಿ ಚಡ್ ತಾಂಕಾಂ ಇಗರ್ಜೆಂತ್ ವ್ಹಾಣೊ ಘಾಲ್ಯೆತ್ ವಾ ನ್ಹಜೊ? ಸಿಂಜಿಚ್ಯಾ ಬುದ್ವಾರಾ ಮಾಸ್ಳಿ ಖಾವ್ಯೆತ್ಗಿ? ಖಾವ್ಯೆತ್ ತರ್ ಕಿತ್ಲಿ? ಕಾಜಿತೊರಾನ್ ಯುವಜಣಾಂ ಸವೆಂ ಪಿಕ್ನಿಕಾಕ್ ವಚ್ಯೆತ್ಗಿ? ಗೆಲ್ಯಾರ್ಯೀ ಶೋರ್ಟ್ಸ್ ಘಾಲ್ನ್ ಉಪ್ಯೆವೆತ್ಗಿ? ಸಾಂತಾಂಕ್ ವಾತಿ ಕಿತ್ಯಾಕ್ ಪೆಟಂವ್ಚ್ಯೊ? ಬಾಳೊಕ್ ಜೆಜು ಕಿತ್ಯಾಕ್ ವ್ಹಡ್ ಜಾಯ್ನಾ? ಅಸಲಿಂ ಸವಾಲಾಂ ತಾಂಕಾಂ ಧೊಸ್ತಾಲಿಂ ಆನಿ ಜಾಪ್ ಪ್ರತಿಜಾಪ್ ಮ್ಹಣೊನ್ ಸ ಮಯ್ನೆ ಪತ್ರಾಂಚಿಂ ಪಾನಾಂ ಖಾತಾಲಿಂ.
ಶಿಸ್ತೆಚ್ಯಾ ವಾಚ್ಪಾಚಿ ತುರ್ಪಣ್ಕಾಯ್ ಕೊಂಕ್ಣಿಂತ್ ಬರವ್ಪ್ಯಾಕ್ ತಶೆಂ ವಾಚ್ಪ್ಯಾಂಕ್ ಧೊಸ್ತಾಲಿ. ಆಯ್ಲೆವಾರ್ ಜಾಲ್ಲ್ಯಾ ’ಶೆಣ್ ಚಳ್ವಳೆನ್’ ಅಸಲ್ಯಾ ತುರ್ಪಣ್ಕಾಯೆಕ್ ಬೋಟ್ ಜೊಡುನ್ ವಾದಾಳ್ ಉಟಯಿಲ್ಲೆಂ. ಹಾಚೆ ಆದಿಂ ಸಂವಾದ್, ಕವಿತಾಪಾಠ್, ಉಪ್ರಾಂತ್ ಸೃಜನಾ ಅಸಲೆ ಚರ್ಚಾ ಪಂಗಡ್ ಶಿಸ್ತೆಚ್ಯಾ ವಾಚ್ಪ್ಯಾಖಾತಿರ್ ಸಾಂಗಾತಾ ಜಮ್ಲ್ಯಾತ್.
ಸಂವಾದ್: ಸ್ಟೀವನ್ ಕ್ವಾಡ್ರಸ್, ವಿತೊರಿ ಕಾರ್ಕಳ್ ಆನಿ ಮೆಲ್ಕಾ ಮಿಯಾರ್ ಹಾಣಿ ಮೆಳುನ್ ಏಕ್ ಅಧ್ಯಯನ್ ಪಂಗಡ್ ಬಾಂದ್ಚೆವಿಶಿಂ ಚಿಂತಪ್ ಆಟಯ್ಲೆಂ. ಹೆಚ್ಚ್ ವೆಳಾರ್ ರೆಗಾಮ್ ತಾಕೊಡೆನ್, ಸ್ಟೀಫನಾಚ್ಯಾ ’ಸಾಹಿತ್ಯ್ ಆನಿ ವಿಮರ್ಸೊ’ ಬುಕಾವಿಶಿಂ ರಾಕ್ಣೊಚೆರ್ ಏಕ್ ಉಗ್ತೊ ವಿಮರ್ಸೊ ಬರಯ್ಲೊ. ರಾಕ್ಣೊರ್ ಚರ್ಚಾ ಚಲ್ಲಿ. ಪೂಣ್ ಅಶೋಕ್ ಪಂಡಿತ್ಹೌಜಾಚ್ಯಾ ವಿಮರ್ಶ್ಯಾತ್ಮಕ್ ಚಿಂತ್ಪಾಕ್ ಥೊಡ್ಯಾ ಮಾಲ್ಘಡ್ಯಾಂನಿ ತೆಂಕೊ ದಿಲೊನಾ. ದೆಕುನ್ ತೊ ವಾದ್ ಚಡ್ ಫುಡೆಂ ಪಾವ್ಲೊ ನಾ.
ಲೇಖಕಾಂಚ್ಯಾ ಎಕ್ವಟಾ ಥಾವ್ನ್ ಅಜೆಕಾರ್ ಚಲ್ಲ್ಲ್ಯಾ ಸಾಹಿತಿಕ್ ಶಿಭಿರಾಂತ್ ವಾಂಟೊ ಘೆತ್ಲ್ಲೆ ಥೊಡೆ ಲೇಖಕ್ ತೆ ರಾತಿಂ ಮ್ಹಜ್ಯಾ ಘರಾ ರಾವ್ಲ್ಲೆ. ತವಳ್ ಪರತ್ ಶಿಸ್ತೆಭರಿತ್ ವಾಚ್ಪಾಚೊ ಉಲ್ಲೇಖ್ ಜಾಲೊ. ಎಚ್ಚೆಮ್, ವಲ್ಲಿ ಕ್ವಾಡ್ರಸ್, ಸ್ಟೀಫನ್ ಕ್ವಾಡ್ರಸ್, ಟೊನಿ ಫೆರೊಸ್, ವಿತೊರಿ, ಮೆಲ್ಕಾ ಹಾಣಿ ಏಕ್ ಅಪುರ್ಭಾಯೆಚಿ ಚರ್ಚಾ ಚಲಯ್ಲಿ. ಅಶೆಂ ಸಭಾರ್ ಮೆಳೊಚಾಚೊ ಫಳ್ ಜಾವ್ನ್ ’ಸಂವಾದ್’ ಸಾಹಿತ್ಯ್ ಶಿಕ್ಚ್ಯಾ ವಿಧ್ಯಾರ್ಥಿಂಚೊ ಏಕ್ ಜಮೊ ಉದೆಲೊ. ಸಾತ್ ಮ್ಹಯ್ನ್ಯಾ ಭಿತರ್ ಪಾಂಚ್ ಸಂವಾದ್ ಚಲ್ಲೆ. ಅಪುರ್ಭಾಯೆಚಿಂ ಅಧ್ಯಯನಾಂ ಚಲ್ಲಿಂ. ಪುಣ್ ಖಂಯ್ಚೆಂಯ್ ನವೆಂ ಯೆತಾನಾ ಪರ್ನ್ಯಾಂಕ್ ಕಾವ್ಜೆಣಿ ಆಸ್ತಾ. ತಶೆಂ ನವ್ಯಾಂಕ್ ಆಮ್ಸೊರ್ ಧೊಸ್ತಾ. ತಶೆಂಚ್ ಜಾಲೆಂ ಹ್ಯಾ ಸಂವಾದಾಕ್. ಪರ್ನ್ಯಾ ಲೇಖಕಾಂವಿಶಿಂ, ಸಾಹಿತ್ಯಾವಿಶಿಂ ತಾಂಚ್ಯಾ ವಾವ್ರಾವಿಶಿಂ ದುರ್ಸೊನ್ ಬರಯಿಲ್ಲ್ಯಾ ಎಕಾ ವಾಕ್ಯಾವರ್ವಿಂ ಸಗ್ಳೊ ಸಂವಾದ್ ಆಪಾಯಾಕ್ ಸಾಂಪಡ್ಲೊ. ’...ಹಳ್ಳೆಚ್ಯಾ ಮಾರ್ಗಾಂನಿ, ಮೊಟಾರ್ ಗಾಡಿಯಾಂನಿ ಭುರ್ರ್ ಕರ್ನ್ ಧುಳ್ ಉಭವ್ನ್ ಆಮಿ ಲೇಖಕಾಂಕ್ ತಯಾರ್ ಕರ್ತಾಂವ್ ಮ್ಹಣ್ ಸಾಂಗ್ತಾತ್ ಹೆ...’ ಹ್ಯಾ ವಾಕ್ಯಾಚೆರ್ ಶಿಣ್ಲೆಲ್ಯಾ ಹೆರೊಲ್ಪಿಯುಸಾನ್ ಹೆರ್ ಮಾಲ್ಘಡ್ಯಾ ಬರಯ್ಣಾರಾಂ ತರ್ಫೆನ್ ಎಕಾ ’ಸಂವಾದ್’ ಕಾರ್ಯಾಂತ್ ಆಪ್ಲೊ ವಾದ್ ಮಾಂಡ್ಲೊ ಆನಿ ತರ್ನ್ಯಾಂಕ್ ’ಬೂದ್ ಬಾಳ್’ ಸಾಂಗ್ಲಿ. ಹೆರಾಂಚಿ ಥೊಡಿಂ ಲೇಖನಾಂಯಿ ಪತ್ರಾಂನಿ ಫಾಯ್ಸ್ ಜಾಳಿಂ. ವೆಚ್ಯಾ ವಾಟೆಚಿ ಸಾರ್ಕಿ ವಿಂಚವ್ಣ್ ಕರಿನಾತ್ಲ್ಲ್ಯಾನ್ ಸಂವಾದ್ ಬಂಧ್ ಜಾಲೊ.
ಪೂಣ್ ಸಾಂಗಾತಾ ಮೆಳ್ಲ್ಲ್ಯಾ ತವಳ್ ತರ್ನೆ ವೊರಾಂಚಿ ವೊರಾಂ ಸಾಹಿತ್ಯಾವಿಶಿಂ ಉಲಯ್ತಾಲೆ. ಸಂವಾದ್ ಚಲಯ್ತಾಲೆ. ಸಂವಾದಾ ಥಾವ್ನ್ ಪ್ರೇರಣ್ ಜೊಡ್ಲ್ಲ್ಯಾ ವಲ್ಲಿ ಕ್ವಾಡ್ರಸಾನ್ ಕುವೆಯ್ಟಾಂತ್ ’ಕವಿತಾಪಾಠ್’ ಪಂಗಡ್ ಉಭೊ ಕೆಲೊ. ಮ್ಹಯ್ನ್ಯಾ ಮ್ಹಯ್ನ್ಯಾಕ್ ಕವಿತೆಚೆರ್ ಉಲೊವ್ಪಾಂ ಚಲೊವ್ನ್ ಕವಿತಾಪಾಠ್ ಮ್ಹಳ್ಳೆ ದೋನ್ ಬೂಕ್ಯೀ ತಾಣೆ ಪರ್ಗಟ್ಲೆ. ಎಕಾಕ್ ಅಕಾಡೆಮಿಚಿ ವಿಶೇಸ್ ಪ್ರಶಸ್ಥಿ ಸಯ್ತ್ ಲಾಭ್ಲ್ಯಾ. ತಾಂಚೆಂ ಕಾಮ್ ಅಜೂನ್ ಚಾಲು ಆಸಾ.
ಸಂವಾದ್ ರಾವ್ಲೊ ತರ್ಯೀ, ಆಪ್ಲೆಂ ಕಿತೆಂ ಬರಯ್ಲ್ಯಾರ್ಯೀ ಜಾತಾ. ಅಪುಣ್ ಮಾಲ್ಘಡೊ ದೆಕುನ್ ಲ್ಹಾನಾಂನಿ ಆಪ್ಣಾಕ್ ಸಾಂಗಾನಾಯೆ ಮ್ಹಳ್ಳ್ಯಾ ಮಾಲ್ಘಡ್ಯಾ ಬರವ್ಪ್ಯಾಂಚ್ಯಾ ಚಿಂತ್ಪಾಕ್ ಖಾಡುಂ ಪಡ್ಲೆಂ. ಸಾಹಿತ್ಯಾಕ್ ಕಿತೆಂಯ್ ದಿಲ್ಯಾರ್ ಜಾಯ್ನಾ ವಾಚ್ಪಿ ಬುಧ್ವಂತ್ ಆಸಾತ್ ಮ್ಹಳ್ಳೆಂ ಚಿಂತಪ್ ಉದೆಂವ್ಕ್ ಲಾಗ್ಲೆಂ. ಥೊಡ್ಯಾಂನಿ ಉಗ್ತ್ಯಾನ್ ನ್ಹಯ್ ತರ್ಯೀ ಖಾಸ್ಗೆನ್ ಸಂವಾದಾಚ್ಯಾ ಚಿಂತ್ಪಾಕ್ ಪಾಟಿಂಬೊ ದಿಲೊ. ಅಸಲ್ಯಾ ವೆಳಾರ್ ಆಯಿನ್ನ್ ಘುಂವ್ಡೆರ್ ಉದೆಲಿ ’ಶೆಣ್ ಚಳ್ವಳ್’.
ಯಾಯಾ ಮಯಾಯಾ ಮ್ಹಳ್ಳ್ಯಾ ಟಿ.ವಿ. ಕಾರ್ಯಾಂತ್ ನೆಲ್ಲು ಪೆರ್ಮನ್ನೂರ್ ಹಾಚ್ಯಾ ’ಕೊಂಕ್ಣಿ ಭಾಶೆಂತ್ ಖಂಚ್ಯಾ ಲಿಪಿಂತ್ ಚಡ್ ಸಾಹಿತ್ಯ್ ಆಸಾ’ ಮ್ಹಳ್ಳ್ಯಾ ಸವಾಲಾಕ್ ಶಿಣ್ ಉಚಾರ್ನ್ ಎಚ್ಚೆಮ್ ಪೆರ್ನಾಲಾನ್ ಕಾನಡಿ ಲಿಪಿಚ್ಯಾ ಸಾಹಿತ್ಯಾಂತ್ ಶೆಣ್ ಚಡ್ ಆಸಾ ಮ್ಹಣ್ ರಾಕ್ಣೊರ್ ಏಕ್ ವಾಚ್ಪ್ಯಾಂಚೆಂ ಪತ್ರ್ ಬರಯ್ಲೆಂ. ಹಾಂಗಾ ವ್ಹಡ್ಲೆಂ ವಾದಾಳ್ ಆಯ್ಲೆಂ. ತರ್ನೆ ಆನಿ ಪರ್ನೆ ಮ್ಹಣ್ ವಿಂಗಡ್ ಜಾಂವ್ಚಿಂ, ದೋನ್ ಪಂಗಡ್ ಉದೆಂವ್ಚಿಂ ಸ್ಪಷ್ಟ್ ಲಕ್ಷಣಾಂ ದಿಸಾಲಾಗ್ಲಿಂ. ರಾಕ್ಣೊ, ಮಿತ್ರ್, ದಿರ್ವೆಂ, ಕುಟಮ್, ದಿವೊ, ಅಶೆಂ ಪಾಂಚ್ಯೀ ಹಫ್ತ್ಯಾಳ್ಯಾಂನಿ ವಾದ್ ವಿವಾದ್ ಚಲಾಲಾಗ್ಲೆ.
ಆಯಿನ್ನ್ ವೆಳಾರ್ ಅಲಂಗಾರಾಂತ್ ದಾಯ್ಜ್-ಮಿತ್ರ್ ಸಾಹಿತಿಕ್ ಶಿಭಿರ್ ಚಲ್ಲೆಂ. ಹ್ಯಾ ಶಿಭಿರಾಂತ್ ಎಡ್ವಿನ್ ಹೆ.ಎಫ್.ಡಿ’ಸೋಜಾ ಆನಿ ಸ್ಟೀವನ್ ಕ್ವಾಡ್ರಸಾನ್ ಹ್ಯಾ ’ಶೆಣ್ ಚಳ್ವಳೆಕ್’ ವಾರೆಂ ಘಾಲ್ನ್ ಆಗ್ಟೆಂ ಕೆಲೆಂ. ಸಯ್ರ್ಯಾಂಕ್ ಆಪವ್ನ್ ಅಕ್ಮಾನ್ ಕೆಲಾ ಮ್ಹಣ್ ಥೊಡೆ ಮಾಲ್ಘಡೆ ತಾಪ್ಲೆ. ಪರತ್ ಉತ್ರಾಂ-ಪತ್ರಾಂ ಪಾಶಾರ್ ಜಾಲಿಂ.
ಹೆಣೆ ನೆಲ್ಲುಚ್ಯಾ ’ಬೊಂಗೊ’ ನಾಟಕಾ ವಿಶ್ಯಾಂತ್ ಲ್ಯಾನ್ಸಿ ಪಿಂಟೊ ನಾಯಕಾನ್ ಬರಯಿಲ್ಲೊ ವಿಮರ್ಸೊ ದಾಯ್ಜ್.ಕೊಮ್ ಅಂತರ್ಜಾಳಿಚೆರ್ ವೆಗ್ಳೆಂಚ್ ವಾದಾಳ್ ಉಟಂವ್ಕ್ ಸಕ್ಲೊ. ಉಪ್ರಾಂತ್ ಹೊ ವಿಮರ್ಸೊ ರಂಗ್ ಮಾಂಚಿಯೆ ಥಾವ್ನ್ ಖಾಸ್ಗಿ ಥಳಾಕ್ ದೆಂವ್ಲೊ.
ಪೂಣ್ ಕೊಂಕ್ಣಿ ಸಾಹಿತಿಕ್ ಶೆತಾಂತ್ ಬದ್ಲಾಪಾಚೆಂ ವಾರೆಂ ವ್ಹಾಳೊಂಕ್ ಲಾಗ್ಲ್ಲೆಂ. ಹಾಕಾ ಬರೊ ದಾಕ್ಲೊ ದಿಂವ್ಚೊ ಡೊಲ್ಫಿ ಕಾಸ್ಸಿಯಾನ್ ದಿಲ್ಲೆ ವರಯ್ಣಾರಾಂಚೆ ಷರೆ. ಪಯ್ಲೊ ರಾಕ್ಣೊ ನತಲಾಂಚ್ಯಾ ಅಂಕ್ಯಾರ್. (ಹ್ಯಾಚ್ ಅಂಕ್ಯಾರ್ ಎಚ್ಚೆಮ್ ಪೆರ್ನಾಲಾಚಿ ತಾಚ್ಯಾ ಅಭಿಪ್ರಾಯೆಕ್ ಸಮಾ ವಿರೋಧ್ ಅಭಿಪ್ರಾಯ್ ಪರ್ಗಟ್ಜಾಲ್ಲಿ.) ದುಸ್ರೊ ಆಯ್ಲೆವಾರ್ ದಿರ್ವೆಂ ಪತ್ರಾರ್. ಆನಿ ಆಪ್ಣೆಂ ದಾಕ್ಷೆಣ್ ಕೆಲಿ ತರ್ ಕೊಂಕ್ಣಿ ಸಾಹಿತ್ಯಾಕ್ಚ್ ಮಾರ್ ಮ್ಹಣ್ ಹ್ಯಾ ವರವ್ಣೆಂತ್ ಡೊಲ್ಫಿ ಕಾಸ್ಸಿಯಾನ್ ಲೆಕ್ಲ್ಲ್ಯಾನ್ ಸ್ಪರ್ಧಿಕಾಂಕ್ ’ಬರೆ ದಾಗ್’ ದಿಲ್ಯಾತ್.
ವಿಮರ್ಶಾಕ್ ಉಗ್ತೆಂ ಆಸಾಜೆ ಮ್ಹಳ್ಳೆಂ ಹಳ್ತಾರ್ ತರ್ಯೀ ಬರವ್ಪ್ಯಾಂನಿ ಮಾಂದುನ್ ಘೆತ್ಲ್ಲೆಂ ದಿಸೊನ್ ಯೆತಾ.
ಹ್ಯಾ ಶೆಣ್ ವಾದಾಳಾ ನಿಮ್ತಿಂ ಘುಸ್ಪಡ್ಲ್ಲ್ಯಾ ನವ್ಯಾಂ ಬರವ್ಪ್ಯಾಂಕ್ ಏಕ್ ದಿಶಾ ದೀಂವ್ಕ್ ಕೊಂಕ್ಣಿ ಲೇಖಕಾಂಚ್ಯಾ ಎಕ್ವಟಾಖಾಲ್ ಸೃಜನಾ ಮ್ಹಳ್ಳೆಂ ವಸ್ತೆ ಶಿಬಿರ್ ಮಾಂಡುನ್ ಹಾಡ್ಲ್ಲೆಂ. ಡೊ|ಎಡ್ವರ್ಡ್, ಎಚ್ಚೆಮ್, ವಿತೊರಿ ಆನಿ ಟೊನಿ ಫೆರೊಸಾಚ್ಯಾ ಮ್ಹಿನತೆನ್ ವೀಸ್ ಜಣ್ ನವ್ಯಾ ಚಿಂತ್ಪಾಕ್ ಉಗ್ತಿಂ ಜಾಂವ್ಚ್ಯಾ ಬರವ್ಪ್ಯಾಂನಿ ಹ್ಯಾ ಶಿಭಿರಾಚೊ ಫಾಯ್ದೊ ಜೊಡ್ಲೊ. ತೀನ್ ಮ್ಹಯ್ನ್ಯಾ ಉಪ್ರಾಂತ್ ಪರತ್ ಏಕ್ ಶಿಭಿರ್ ಚಲ್ಲೆಂ. ಎದೊಳ್ ಸೃಜನಾಚೊ ಚಿಂತ್ಪಾಂತ್ ಪ್ರಭಾವ್ ಪಡ್ಲಾ. ಪೂಣ್ ಲಿಖ್ಣೆಂತ್ ತೊ ವ್ಹಾಳೊಂಕ್ ನಾ. ಸಾಹಿತ್ಯಾವಿಶಿಂ ನವೆಂ ಚಿಂತಪ್ ನವೆ ಆಟವ್ ಚಲ್ತೇ ಆಸಾತ್. ಹೆಂ ಮಿಸಾಂವ್ ಜಯ್ತೆವಂತ್ ಜಾಯ್ಜೆ ತರ್ ಫಳಾಭರಿತ್ ಸಾಹಿತ್ ರುತಾ ಜಾಯ್ಜೆ.
ಸಂವಾದ್, ಶೆಣ್ ಚಳ್ವಳ್, ಸೃಜನಾ ಹ್ಯಾ ಪ್ರಯೋಗಾ ಉಪ್ರಾಂತ್ ಕೊಂಕ್ಣೆಂತ್ ವೆಗಿಂಚ್ ಏಕ್ ಸಾಹಿತಿಕ್ ಜರ್ನಲ್ ಯೆಂವ್ಚ್ಯಾರ್ ಆಸಾ. ಕೊಂಕ್ಣಿ ಬಾಇಬಲ್ ಆನಿ ತಾಚೊ ಸ್ಕೂಲ್ ಆಫ್ ಕೊಂಕಣೀ ಸ್ಟಡೀಸ್ ಪಂಗಡ್ ಹ್ಯಾ ಜರ್ನಲಾಚಿ ತಯಾರಿ ಕರುನ್ ಆಸಾ. ಶೆಣ್ ಚಳ್ವಳೆಚೊ ರೂವಾರಿ ಎಚ್ಚೆಮ್ ಆನಿ ತಾಕಾ ಬಳಾನ್ ಪಾಟಿಂಬೊ ದಿಲ್ಲ್ಯಾ ವಿಲ್ಸನ್ ಕಟೀಲಾಸವೆಂ ವಿತ್ತಿ ಬೆಂಗ್ಳುರ್ ಆನಿ ಹೆರ್ ಹುಮೆದ್ವಂತ್ ವಾವುರ್ನ್ ಆಸಾತ್. ಸದ್ದ್ಯಾಕ್ ಸ ಮಯ್ನ್ಯಾಕ್ ಏಕ್ ಪಾವ್ಟಿಂ ಪರ್ಗಟ್ಚ್ಯಾ ಹ್ಯಾ ’ಕೊಂಕ್ಣಿ ಸಂವಾದ್’ ನಾಂವಾಚ್ಯಾ ಜರ್ನಲಾಂತ್ ವಿಮರ್ಶ್ಯಾಕ್ ಚಡ್ ಮಹತ್ವ್ ಆಸ್ತಲೊ ಆನಿ ಅಕ್ತೋಬರಾಂತ್ ಪಯ್ಲೊ ಅಂಕೊ ಪರ್ಗಟ್ತಲೊ ಅಶೆಂ ಕಳೊನ್ ಯೆತಾ.
ಆತಾಂ ವರ್ತಿ ಜವಾಭ್ದಾರಿ ಆನಿ ಸರ್ವಾಂಚಿ ದೀಷ್ಟ್ ಆಸ್ಚಿ ಎಚ್ಚೆಮಾಚೆರ್. ಸಂವಾದ್, ಶೆಣ್ ಸೃಜನಾ ಹರ್ಯೆಕಾಂತ್ಯೀ ಪ್ರಮುಖ್ ಚಿಂತ್ಪಿ ತೊ ಆಸ್ಲ್ಲೊ. ಕೊಂಕ್ಣಿ ಸಾಹಿತ್ಯಾಚೊ ಮಟ್ಟ್ ಚಡಜೆ ಮ್ಹಣ್ ಆಶೆಂವ್ಚ್ಯಾ ಪಯ್ಕಿಂತ್ಲೊ ತೊ. ಸಾಹಿತ್ಯಾವಿಶಿಂ ಖೊಲಾಯೆಚಿ ಜಾಣ್ವಾಯ್ಯಿ ತಾಕಾ ಆಸಾ. ಪತ್ರ್ಗಾರಿಕೆವಿಶಿಂ ತಾಕಾ ಜಾಯ್ತಿ ಮಾಹೆತ್ ಆಸಾ ಜಲ್ಲ್ಯಾನ್ ಜರ್ನಲಾಚೊ ಸಂಪಾದಕ್ ತೊ ಜಾಲ್ಯಾರ್ ವಿಮರ್ಶ್ಯಾವಿಶಿಂ ನವೊ ದಿಶ್ಟಾವೊ, ಅಪುರ್ಭಾಯೆಚಿಂ ಲೇಖನಾಂ ತಾಚೆಥಾವ್ನ್ ಹೆರಾಂಕ್ ತೊ ಸಾಂಗ್ತಾ ಜಾಲ್ಲ್ಯಾನ್ ತೆಂಚ್ ಮಟ್ಟ್ ತಾಚೆಥಾವ್ನ್ ಹೆರ್ ಆಶೆತಾತ್. ಎಚ್ಚೆಮ್ ನಿರಾಶಿ ಕರಿನಾ ಜಾಂವ್.
[ಕುರ್ಪಾ: ಮಿತ್ರ್ ಹಫ್ತ್ಯಾಳೆಂ]
ಇಸ್ಕೊಲಾಕ್ ಏಕ್ ಕೊಂಕ್ಣಿ ಲೈಬ್ರೆರಿ
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications