ಸಂಸ್ಥಾಪಕ್:

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

’ಜೆದ್ನಾಂ ತುಂ ಹೆರಾಂಚಾ ಬರ್‍ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್

ಕೊಂಕ್ಣಿ ಕಾರ್ಭಾರಿ - 21.

ನಾಂವ್: ಜೋನ್ ಡಿ’ಸಿಲ್ವಾ.

ಜಲ್ಮಾಲ್ಲಿ ತಾರಿಕ್: 6 ಮಾಯ್ 1936.

ಫಿರ್ಗಜ್: ಕಾರ್ಕಳ್ (ದೂಪದಕಟ್ಟೆ ಲಾಗ್ಸಾರ್).

ಆವಯ್ ಬಾಪಾಯ್ಚೆ ನಾಂವ್: ದೆವಾದೀನ್ ರೆಮೆದಾ ಡಿ’ಸಿಲ್ವಾ ಆನಿ ದೆವಾದೀನ್ ಆಂಟನಿ ಡಿ’ಸಿಲ್ವಾ.

ಪತಿಣ್: ಗ್ಲ್ಯಾಡಿಸ್ ಡಿ’ಸಿಲ್ವಾ.

ಶಿಕಾಪ್: ಸಾಂ|ಜುಜೆ ಇಸ್ಕೊಲ್ (ಚೊವ್ತಿ ಪರ್‍ಯಾಂತ್), ಎಸ್.ವಿ.ಡಿ. ಇಸ್ಕೊಲ್ ಕಾರ್ಕಳ್ (ಪಾಂಚ್ವಿ ಥಾವ್ನ್ ಆಟ್ವಿ ಪರ್‍ಯಾಂತ್), ರಾತಿಚೆಂ ಇಸ್ಕೊಲ್ (ನವಿ ಆನಿ ಧಾವಿ ಕ್ಲಾಸ್).

ಬಿ.ಎ. (ಜೈ ಹಿಂದ್ ಕೊಲೆಜ್, ಮುಂಬಯ್), ಬಿ.ಕಾಮ್ (ಪೋದ್ದಾರ್ ಕಾಲೆಜ್, ಮುಂಬಯ್)

ಸಂಸ್ಥಾಪಕ್:

’ಅಭ್ಯುದಯ್ ಕೋ. ಒಪ್. ಬ್ಯಾಂಕ್’

’ನ್ಯೂ ಇಂಡಿಯಾ ಕೋ. ಒಪ್. ಬ್ಯಾಂಕ್’

’ಸಿಟಿಜನ್ ಕೋ. ಒಪ್. ಬ್ಯಾಂಕ್’

’ಮೋಡಲ್ ಕೋ. ಒಪ್. ಬ್ಯಾಂಕ್’

$Placeholder: the original page gave this picture no description, and none has been written yet. It came from daaiz\daaiz\column\kk\kk21.asp.$ $Placeholder: the original page gave this picture no description, and none has been written yet. It came from daaiz\daaiz\column\kk\kk21.asp.$

[ಭೋವ್ ಸಾದೆಂ ವೆಕ್ತಿತ್ವ್ ಪುಣ್ ಭೋವ್ ಉಂಚ್ಲೆಂ ಚಿಂತಾಪ್ ಚಿಂತ್ಚೊ ಮಾನೆಸ್ತ್ ಜೋನ್ ಡಿ’ಸಿಲ್ವಾ, ಕಾರ್ಕಳ್]

ಮ್ಹಜ್ಯಾ ತರ್ನಾಟ್‌ಪಣಾರ್‌ಚ್ ಹಾಚೆವಿಶಿಂ ಜಾಯ್ತೆಂ ಆಯ್ಕೊನ್ ಆಯಿಲ್ಲೊಂ ತರ್‌ಯೀ ಹಾಕಾ ಮುಖಾಮುಖಿ ಜಾಂವ್ಚೆಂ ಭಾಗ್ ಮ್ಹಾಕಾ ದೆವಾನ್ ಫಾವೊ ಕೆಲ್ಲೆಂ ಆಯ್ಲೆವಾರ್‌ಚ್ಚ್. ಕೊಂಕ್ಣಿ ಭಾಶಾ ಮಂಡಳ್ ಮಹಾರಾಷ್ಟ್ರಾನ್ ಆಸಾ ಕೆಲ್ಲ್ಯಾ ಎಕಾ ದಿಸಾಚ್ಯಾ ಕವಿತಾಚ್ಯಾ ಕಾರ್ಯಾಗಾರಾಚೆರ್. ಉಲವ್ಪಾಂತ್ ಇತ್ಲೊ ಸಾದೊ ಆನಿ ಖಾಲ್ತೊ ಮ್ಹಳ್ಯಾರ್ ಮ್ಹಾಕಾಚ್ಚ್ ಹಾಚಿ ವಳೊಕ್ ಕಳ್ತಾನಾ ಅಜ್ಯಾಪ್. ಖರೆಂಚ್ ಜಾಣಾರಿ ಸಾಂಗ್ತಾತ್ ’The greatest truth is simple’. ಕೊಂಕ್ಣಿ ಭಾಶಾ ಮಂಡಳ್ ಹಾಚೊ ಕಾರ್ಯಾಳ್ ಉಪಾಧ್ಯಕ್ಶ್, ಫುಡಾರ್ ಪ್ರತಿಷ್ಟಾನ್ ಹಾಚೊ ಅಧ್ಯಕ್ಶ್ ಜಾವ್ನ್ ಸೆವಾ ದಿಂವ್ಚೊ ಹೊ ನಿಜಾಯ್ಕೀ ಕೊಂಕ್ಣಿ ಸಮಾಜೆಂತ್ ಆಸ್ಚೆಂ ಸರ್ವ್ ಕೊಂಕ್ಣಿ ಸಮಾಜೆಕ್ ವರ್ತೆಂ ದೆಣೆಂ ಆನಿ ಆಭಿಮಾನ್ ಜಾವ್ನಾಸಾ.

ಚ್ಯಾರ್ ದಿಸಾಂ ಉಪ್ರಾಂತ್ ಜೆದ್ನಾಂ ಹಾಕಾ ಭೆಟೊಂಕ್ ಗೆಲ್ಲ್ಯಾ ವೆಳಾರ್, ಹಾಚೆಂ ಖಾಲ್ತೆಂಪಣ್, ಮಾಯಾಮೊಗ್ ಆನಿ ಕೊಂಕ್ಣಿ ಸಮಾಜೆಚೆರ್ ಹಾಕಾ ಆಸ್ಚೊ ಹುಸ್ಕೊ ಆನಿ ಗೌರವ್ ಪಳೆವ್ನ್ ಹಾಂವ್ ಖರೊಚ್ಚ್ ಮುಯೆತೆದೊ ಜಾಲೊಂ ಆನಿ ಮ್ಹಾಕಾ ಸುಸ್ತಾಲೆಂ ’Simplicity is the sign of greatness’. ತಾಚೆಸವೆಂ ಖರ್ಚಿಲ್ಲ್ಯಾ ಥೊಡ್ಯಾ ಅಮೊಲಿಕ್ ವೊರಾಂನಿ ಹಾವೆಂ ಚಲಯಿಲ್ಲೆಂ ಸಂವಾದ್ ಹೆಂ.

- ಸಂ

ಸಂವಾದ್ ಚಲವ್ಪಿ: ವಲ್ಲಿ ಕ್ವಾಡ್ರಸ್.

1. ಚಡ್ತಾವ್ ಜಾವ್ನ್ ಆಮ್ಚ್ಯಾ ಕ್ರಿಸ್ತಾಂವ್ ಕೊಂಕ್ಣ್ಯಾಂಕ್, ಚ್ಯಾರ್ ಕಾಸ್ ಜಾತೆಚ್ಚ್ ವಾ ದೋನ್ ಇಂಗ್ಲಿಶಾಚೆ ಸಬ್ಧ್ ಶಿಕ್ತಚ್ಚ್ ಕೊಂಕ್ಣಿ ನಾಕಾ, ಹ್ಯಾ ಸಂದರ್ಭಾರ್ ತುಮಿ ಕೊಂಕ್ಣೆಕ್ ಕಶೆಂ ವೆಂಗ್ಲ್ಯಾತ್?

ಜಾ: ಹಾಂವ್ ಲ್ಹಾನ್‌ಪಣಾರ್ ಭೋವ್ ಕಶ್ಟಾಂನಿ ಶಿಕ್‌ಲ್ಲೊಂ, ಸಕಾಳಿಂ ಉಟೊನ್ ಬಾಂಯ್ಚೆಂ ಉದಾಕ್ ವೋಡ್ನ್ ಗಾದ್ಯಾಂಕ್ ಸೊಡುನ್ ಉಪ್ರಾಂತ್ ಆಮಿ ಇಸ್ಕೊಲಾಕ್ ವೆಚೆಂ ಆಸ್‌ಲ್ಲೆಂ. ಹ್ಯಾ ಕಶ್ಟಿ ಸಂದರ್ಭಾರ್ ಸಯ್ತ್ ಮ್ಹಜ್ಯಾ ಘರಾಂತ್, ಮ್ಹಜ್ಯಾ ಆವಯ್ ಬಾಪಾಯ್ನ್ ಬರೆ ಸಂಸ್ಕಾರ್, ಮಾಯಾಮೊಗ್ ಆನಿ ರಿತಿ ರಿವಾಜ್ಯಾಂಚಿ ವಳೊಕ್ ಕರುನ್ ದಿಲ್ಲಿ. ಆನಿ ಉಪ್ರಾಂತ್ ಜಾಲ್ಯಾರ್‌ಯೀ, ಹಾಂವ್ ಫುಡಾರಾಕ್ ಸೊಧುನ್ ಬೊಂಬೊಯ್ ಪಾವ್ಲೊಂ, ಪುಣ್ ಮ್ಹಜೆಭಿತರ್ ಆಸ್‌ಲ್ಲಿ ಕೊಂಕ್ಣೆಚಿ ವೋಡ್ ನಿವ್ಲಿನಾ. ತೆಚ್ಚ್ ಸಂದರ್ಭಾರ್ ಮ್ಹಜಿ ಸಳಾವಳ್ ಚಾ.ಫ್ರಾ.ದೆ’ಕೋಸ್ತಾ, ಜೊ.ಸಾ.ಅಲ್ವಾರಿಸಾ ತಸಲ್ಯಾಂಸವೆಂ ಆಸ್ಲಿ ದೆಖುನ್ ಕೊಂಕ್ಣಿ ಭಾಸೆಚೆರ್ ಮ್ಹಾಕಾ ಕೆದಿಂಚ್ ಉಣೆಂ ಚಿಂತಾಪ್ ಭಗೊಂಕ್ ನಾ - ಆನಿ ಭಗ್ಚೆಂಯೀ ನಾ.

2. ಆಮ್ಚಿ ಸಮಾಜ್ ಆನಿ ಸಂಘಟನಾಂ - ಹಾಂಚೆ ಮಧ್ಲೊ ಅಂತರ್ ಕಿತ್ಲೊ ಆಸಾ ಆನಿ ಕಿತ್ಯಾಕ್?

ಜಾ: ಆಮ್ಚೊ ಪುರ್ವಜ್ ಕಶ್ಟಿ ಜಿಣಿ ಜಿಯೆಲ್ಲೊ, ತರ್‌ಯೀ ವಿಶೇಸ್ ರಿತಿಚೊ ಸಾಕ್ರಿಫಿಸ್ ಕರುನ್ ಆಮ್ಚ್ಯಾ ಮುಖ್ಲ್ಯಾ ಪಿಳ್ಗೆನ್ ಹೆ ಕಶ್ಟ್ ಸೊಸಿನಾಯೆ ಮ್ಹಳ್ಳ್ಯಾ ಇರಾದ್ಯಾನ್ ಶಿಕಾಪ್ ದಿಲೆಂ, ಫುಡಾರ್ ಸೊಧುನ್ ಗಾಂವ್ ಸೊಡ್ನ್ ವೆತಾನಾ, ತಾಂಕಾಂ ರಾವೊಂಕ್ ಕುಡಾಂ ಭಾಂದುನ್ ದಿಲಿಂ. ಅಶೆಂ ದಿಸಾನ್ ದೀಸ್ ಆಮ್ಚ್ಯಾ ಮುಖ್ಲ್ಯಾ ಪಿಳ್ಗೆಕ್ ಅಳ್ಸಾಯ್ ವಾಡ್ಲಿ ಆನಿ ಹ್ಯಾ ಆಳ್ಸಾಯೆಚೊ ಪರಿಣಾಮ್ ಹಳ್ತಾರ್ ತರ್‌ಯೀ ಆಮ್ಚ್ಯಾ ಸಮಾಜೆಂತ್ ದಿಸೊನ್ ಯೇಂವ್ಕ್ ಲಾಗ್ಲಾ. ಜಾಂವ್ಕ್ ಪುರೊ ಶಿಕ್ಪಾಂತ್, ಜಾಂವ್ಕ್ ಪುರೊ ಹೆರ್ ರಿತಿಚ್ಯಾ ವ್ಹಾಡಾವಳೆಂತ್, ಆಮ್ಚ್ಯಾ ಹೆರ್ ಲೊಕಾಂ ಸಮೊರ್ ಆಜ್ ಆಮಿಂ ಖಂಯ್ ಆಸಾಜಯ್ ಆಸ್‌ಲ್ಲೆಂ? ಪುಣ್ ಆಮಿ ಖಂಯ್ ಆಸಾಂವ್? ಹಾಚಿಂ ಕಾರಾಣಾಂ ಸೊಧುಂಕ್ ತ್ರಾಸ್ ನಾಂತ್. ಆಮ್ಕಾಂ ಆಮ್ಚೆಂ ಆಪ್ಲೆಂಪಣ್ ಮ್ಹಳ್ಳೆಂ ನಾ, ಆಮ್ಚ್ಯಾ ಭಾಸೆಚೆರ್, ಆಮ್ಚ್ಯಾ ಸಂಸ್ಕೃತೆಚೆರ್ ತಾತ್ಸಾರ್ ಆಸಾ ದೆಕುನ್ ಹೆಂ ಸರ್ವ್ ಘಡ್ತಾ.

ಎಕಾ ಕಾಳಾರ್ ಶಿಕ್ಪಿ ಕೇಂದ್ರಾಂ ಸರ್ವ್ ಆಮ್ಚಿಂ ಜಾವ್ನಾಸ್ಲಿಂ, ವ್ಹಡ್ ವ್ಹಡ್ ಫ್ಯಾಕ್ಟರಿ ಆಮ್ಚ್ಯೊ ಆಸ್ಲ್ಯೊ, ಘಾಟಾಂಗಾರ್, ತೊಟಾಂಗಾರ್ ಆಮ್ಚೆ ಕ್ರಿಸ್ತಾಂವ್ ಜಾವ್ನಾಸ್ಲೆ. ಆಮ್ಕಾಂ ಇತ್ಲೆಂ ಸರ್ವ್ ಆಸೊನ್‌ಯೀ ಹಾಂಚೊ ಫಾಯ್ದೊ ಆಮಿ ಜೊಕ್ತೆ ರಿತಿನ್ ಗಳ್ಸುಂಕ್ ನಾ. ದೆಕುನ್ ಆಜ್ ಹೆರಾಂ ಸಮೊರ್ ಆಮಿ ಖರಿಂಚ್ ಜಾವ್ನ್ ಕಾಂಯ್ ನ್ಹಯ್. ಆಜ್ ಆಮ್ಚ್ಯಾ ಸಮಾಜೆಂತ್ ಕಿತ್ಲೆ ಕ್ರಿಸ್ತಾಂವ್ ದೊತೊರ್ ಆಸಾತ್? ಕಿತ್ಲೆ ಕ್ರಿಸ್ತಾಂವ್ ಇಜ್ನೆರ್ ಆಸಾತ್? ಕಿತ್ಲೆ ಕ್ರಿಸ್ತಾಂವ್ ವಕೀಲ್ ಆಸಾತ್? ಕಿತ್ಲೆ ಕ್ರಿಸ್ತಾಂವ್ ರಾಜಕೀಯ್ ಮುಖೆಲಿ ಆಸಾತ್? ಆಮ್ಚಿಂ ಚಿಂತ್ಪಾಚಿ ಪರಿಧಿ ಅಜೂನ್ ವಿಸ್ತಾರ್ ಜಾಂವ್ಕ್ ನಾ.

ಆಮಿ ನಿಜಾಯ್ಕೀ ಆಜ್ ಧೊಬಿವಾಲ್ಯಾಚ್ಯಾ ಪೆಟ್ಯಾಪರಿಂ ಜಾವ್ನ್ ಜಿಯೆತಾಂವ್, ನ್ಹಯ್ ಗಾಂವ್ಚಿಂ, ನ್ಹಯ್ ಪರ್ಗಾಂವ್ಚಿಂ. ಆಮ್ಕಾಂ ಲ್ಹಾನ್‌ಪಣಾ ಥಾವ್ನ್ ಮೆಳ್ಚಿ ಶಿಕವ್ಣ್ ಖಂಚ್ಯಾಯ್ ಹೆರ್ ಭಾಸೆಚ್ಯಾ ಲೊಕಾಂಕ್ ಮೆಳ್ತಾ? ಆಮ್ಕಾಂ ಸಮಾಜ್, ಫಿರ್ಗಜ್, ವಾರಾಡೊ, ದಿಯೆಸಿಜ್ ಅಸೊನ್‌ಯೀ, ಆಮ್ಚೆಲಾಗಿಂ ಮುಖೆಲಿ ನಾಂತ್. ಆಮ್ಚಿ ಫಿರ್ಗಜ್, ಸಮಾಜ್ ಜಾಲ್ಯಾರೀ, ಧಾರ್ಮಿಕ್ ಲಾಭಾಚೆಂ ಕೇಂದ್ರ್ ಜಾಲಾಂ ಶಿವಾಯ್ ಲೊಕಾ ಉದ್ದಾರಾಚೆಂ ಕೇಂದ್ರಿ ಜಾವ್ನಾ.

ಎಕಾ ಕಾಳಾರ್ ಮಂಗ್ಳುರಾಂತ್ ಸಾಂ|ಲುವಿಸ್ ಕೊಲೆಜ್ ಆಮ್ಚಿ ಕ್ರಿಸ್ತಾಂವಾಂಚಿ ಆಸ್ಲಿ ಆನಿ ತಾಂತುಂ ಶಿಕೊಂಕ್ ಬೊಂಟಾಂಚೆ ಹೊಸ್ಟೆಲ್ ಭಾಂದುನ್ ರಾವೊನ್ ಶಿಕ್ಲೆ. ಆಜ್ ಬಂಟ್ಸ್ ಹೊಸ್ಟೆಲಾಂತ್ ಶಿಕ್‌ಲ್ಲೆ ತೆಚ್ಚ್ ಬೊಣ್ಕೆ ದೊತೊರ್, ಇಜ್ನೆರ್ ಜಾಲೆ ಆನಿ ಆಮ್ಚಾ ಕ್ರಿಸ್ತಾಂವ್ ಭುರ್ಗ್ಯಾಂಕ್ ಅಜೂನ್ ಬರೆಂ ಹೊಸ್ಟೆಲ್ ನಾ. ಹ್ಯಾ ಚಿಂತ್ಪಾಚೆರ್ ಆರ್ಸೊ ಧರ್ಚಿಂ ಸಂಘಟನಾಂ ಕಿತ್ಲಿಂ ಆಸಾತ್ ಆಮ್ಚಾ ಸಮಾಜೆಂತ್?

3. ಕೊಂಕ್ಣೆಂತ್ ಜಯ್ತೆವಂತ್ ಜಾಲ್ಲ್ಯಾ ಉಧ್ಯಮಿಂ ಪಯ್ಕಿಂತ್ಲೆ ತುಮಿ ಪ್ರಮುಖ್ - ತುಮ್ಚ್ಯಾ ಜಯ್ತಾಚೆಂ ಸೂತ್ರ್ ಕಸ್ಲೆಂ?

ಜಾ: ಸತ್ ಸಾಂಗ್ಚೆಂ ತರ್ - ಮಿನತ್ ಆನಿ ಕಿತೆಂ ತರ್‌ಯೀ ಕರಿಜಾಯ್ ಮ್ಹಳ್ಳೆಂ ಹಟ್. ಆಮಿಂ ಆಮ್ಚ್ಯಾ ಸಮಾಜೆಂತ್ ವ್ಹಡ್ ಜಾಂವ್ಕ್ ಸಭಾರ್ ವಾಟೊ ಆಸಾತ್, ಸಮಾಜ್ ಮ್ಹಳ್ಯಾರ್ ಕೊಣ್? ಆಮಿಂಚ್ ನ್ಹಯ್‌ಗಿ? ತಶೆಂ ಮ್ಹಣ್ತಾನಾ, ಜರ್ ಆಮ್ಚ್ಯಾ ಸಮಾಜೆಂತ್ ಆಮ್ಚೆಂ ಸ್ಥಾನ್ ಆಸಾ ಕರುಂಕ್ ಆಮಿ ಚ್ಯಾರ್ ಸಕ್ತೆಂನಿ ಆಮ್ಚೆಂ ಪ್ರಭುತ್ವ್ ನ್ಹಯ್ ತರ್‌ಯೀ ಪ್ರತಿನಿಧಿತ್ವ್ ಆಸಾ ಕರಿಜೆ;

1. ರಾಜಕೀಯ್ ಸಕತ್. (Economin power)

2. ಆರ್ಥಿಕ್ ಸಕತ್. (Economin power)

3. ಸಾಮಾಜಿಕ್ ಸಕತ್. (Social power)

4. ಸರ್ಕಾರಿ-ಸೆವಾ/ರಕ್ಷ್‌ಣ್ ಸಕತ್. (Civil Defence power)

ಬ್ರಿಟಿಶಾಂನಿ ಆಮ್ಚೊ ದೇಶ್ ಸೊಡ್ನ್ ವೆತಾನಾ ಜಾಯ್ತ್ಯಾ ಕ್ರಿಸ್ತಾಂವಾಂಕ್ ತೊಟಾಂ, ಭಾಟಾಂ, ಫ್ಯಾಕ್ಟರಿ ಸೊಡ್ನ್ ದಿಲ್ಯೊ. ಎಕಾ ಕಾಳಾರ್ ಆಮ್ಚ್ಯಾ ಕ್ರಿಸ್ತಾಂವಾಂ ಲಾಗಿಂ ಇತ್ಲಿಂ ಹ್ಯಾಂಡ್‌ಲೂಮ್ ಫ್ಯಾಕ್ಟರಿ ಆಸ್ಲ್ಯೊ, ನಳ್ಯಾಂಚೆ ಕಾರ್ಖಾನೆ ಆಸ್ಲೆ, ಕಾಜು ಬಿಯಾಂಚ್ಯೊ ಫ್ಯಾಕ್ಟರಿ ಆಸ್ಲ್ಯೊ, ಕಾಪ್ಯೆತೊಟಾಂ ಆಸ್ಲಿಂ. ಪುಣ್ ಇತ್ಲೆಂ ಸರ್ವ್ ಆಸ್‌ಲ್ಲ್ಯಾ ಆಮ್ಚೆಲಾಗಿಂ ಆಜ್ ಕಿತೆಂ ಆಸಾ? ಕಿತ್ಯಾಕ್ ನಾ? ಹ್ಯಾ ವಿಶಿಂ ಆಮಿ ಗಂಭೀರ್ ಜಾವ್ನ್ ಚಿಂತ್ಚಿ ಗರ್ಜ್ ಆಸಾ. ಪೊಳಾಪೊಳ್ ಏಕ್ ವಾಟ್ ನ್ಹಯ್, ದೆಕುನ್ ಆಮಿ ದೇಸ್ ಸೊಡ್ನ್ ಧಾಂವ್ಚಿ ವಾಟ್ ಧರ್ಚ್ಯಾ ಬದ್ಲಾಕ್, ಹ್ಯಾ ಚ್ಯಾರ್ ಸಕ್ತೆಂಕ್ ಕಿತ್ಯಾಕ್ ಆಪ್ಣಾಯ್ನಾಯೆ?. ಆಮ್ಚ್ಯಾ ಯುವಜಣಾಂನಿ ಹ್ಯಾ ದಿಶೆನ್ ಚಿಂತಾಪ್ ಆಟಂವ್ಚಿ ಗರ್ಜ್ ಆಸಾ. ಆಮ್ಚ್ಯಾ ವಡಿಲಾಂನಿ ತಾಂಕಾಂ ಜೊಕ್ತಿ ಕುಮೊಕ್ ಕರ್ಚಿ ಗರ್ಜ್ ಆಸಾ.

ಸಾಮಾಜಿಕ್ ರಿತಿನ್ ಆಮಿ ಮೊಸ್ತ್ ಕಾಮಾಂ ಕರುಂಖ್ ಸಾಧ್ಯ್ ಆಸಾ, ಫಿರ್ಗಜೆಂನಿ ಜಾಲ್ಯಾರೀ, ವಾಡ್ಯಾಚ್ಯಾ ಘುರ್ಕಾರಾಂ ಮುಖಾಂತ್ರ್, ಕೊಣ್ ಗರ್ಜೆವಂತ್, ಕೊಣ್ ಕಟೀಣ್ ದುಬ್ಳೊ ಆಸಾ, ತಸಲ್ಯಾಂಕ್ ಆಧಾರ್ ದಿಂವ್ಚೆ ದಿಶೆನ್ ಆಮಿ ವಾವ್ರ್ ಕರಿಜಾಯ್. ಆಮ್ಚೆ ಪಯ್ಕಿ ಹರ್ಯೆಕ್ಲ್ಯಾಕ್ ಬರೆಂ ಶಿಕಾಪ್ ಲಾಭೊಂಕ್ ಜಾಯ್. ಜೊಕ್ತ್ಯೊ ವಾಟೊ ಆಮಿ ಕರುನ್ ದೀಜಾಯ್. ಅಶೆಂ ಏಕ್ ಸಮಾಜ್ ಜಾವ್ನ್ ಆಮಿ ವಯ್ರ್ ಯೇಜಾಯ್. ತೆದ್ನಾಂ ಮಾತ್ರ್ ಆಮ್ಕಾಂ ಸಮಾಜೆಂತ್ ಸಾಮೂಹಿಕ್ ರಿತಿರ್ ಗೌರವ್, ಮಾನ್-ಸ್ಥಾನ್ ಲಾಭೊಂಕ್ ಸಾಧ್ಯ್. ಪುಣ್ ಆಮ್ಚ್ಯಾ ಫಿರ್ಗಜ್ಯಾಂನಿ, ಲೊಕಾಂ ಥಾವ್ನ್ ಪಯ್ಶೆ ಕಶೆ ಪಿಳ್ಚೆ ಮ್ಹಳ್ಳೆಂ ಮಾತ್ರ್ ಕಳಿತ್ ಶಿವಾಯ್, ಲೊಕಾಂನಿ ಪಯ್ಶೆ ಕಶೆ ಕರ್ಚೆ ಮ್ಹಳ್ಳ್ಯೊ ವಾಟೊ ಸೊಧುನ್ ದಿಂವ್ಚ್ಯಾಂಕ್ ಆಮ್ಚಿಂ ಧಾರ್ಮಿಕ್ ಕೇಂದ್ರಾಂ ಸಲ್ವಾಲ್ಯಾಂತ್. ಹೆಂ ಚಿಂತಾಪ್ ಎದೊಳ್ ಆಯಿಲ್ಲೆಂ ಖಂಯ್ಚರೀ ಹಾವೆಂ ಆಯ್ಕೊಂಕ್ ನಾ.

ಅನ್ಯೇಕ್ ಭೋವ್ ದುರಾದೃಶ್ಟೆಚಿ ಗಜಾಲ್ ಮ್ಹಳ್ಯಾರ್ ಆಮ್ಚೆಂ ರಾಜಕೀಯ್ ಮೆತೆರ್‌ಪಣ್; ಆಮ್ಚೊ ಲೋಕ್ ವೊಟಾಕ್‌ಯೀ ರಾವಾನಾ, ವೋಟ್‌ಯೀ ದೀನಾ. ಹಾಚೊ ಪರಿಣಾಮ್ ಲೊಕಾನ್ ಕೆದಾಳಾ ಸಮ್ಜೊಂಚೊ? ಕೊಣೆ ಸಮ್ಜಾಂವ್ಚೆಂ?

ಆಜ್ ಸರ್ಕಾರಾ ತರ್ಫೆನ್ ಆಮ್ಕಾಂ ಇತ್ಲ್ಯೊ ಸವ್ಲತಾಯೊ ಲಾಭ್ತಾತ್, ಶಿಕ್ಪಾಕ್ ಲೊನಾಂ ಇತ್ಲ್ಯಾ ಸಲೀಸಾಯೆನ್ ಲಾಭ್ತಾತ್, ಪುಣ್ ಶಿಕ್ಪಾಂತ್ ಆಸಕ್ತ್ ಆಸ್ಚಿಂ ಕಿತ್ಲಿಂ? ಆಮ್ಚ್ಯಾ ಭುರ್ಗ್ಯಾಂನಿ ಫಕತ್ತ್ ಎ.ಸಿ.ಮೆಕ್ಯಾನಿಕ್, ಪ್ಲಂಬರ್, ಎಲೆಕ್ಟ್ರಿಶಿಯನ್, ವಾಯರ್ ಮೇನ್, ವೇಯ್ಟರ್, ಡ್ರಾಯ್ವನ್, ಹೌಸ್‌ಮೇಡ್, ನರ್ಸ್ ಜಾವ್ನ್ ಉರ್ಲ್ಯಾರ್ ಪುರೊ? ಕಿತ್ಯಾಕ್ ಆಮ್ಚಿಂ ಭುರ್ಗಿಂ ಐ.ಎ.ಎಸ್ ಶಿಕೊಂಕ್ ನ್ಹಜೊ? ಕಿತ್ಯಾಕ್ ಆಮ್ಚ್ಯಾ ಭುರ್ಗ್ಯಾಂನಿ ವಕೀಲ್ ಜಾಂವ್ಕ್ ನ್ಹಜೊ? ಕಿತ್ಯಾಕ್ ಆಮ್ಚ್ಯಾ ಭುರ್ಗ್ಯಾಂನಿ ರಾಜಕೀಯ್ ಮುಖೆಲಿ ಜಾಂವ್ಕ್ ನ್ಹಜೊ? ಕಿತ್ಯಾಕ್ ಆಮ್ಚ್ಯಾ ಭುರ್ಗ್ಯಾಂನಿ ಪೊಲಿಸ್ ಇನ್ಸ್‌ಪೆಕ್ಟರ್ ಜಾಂವ್ಕ್ ನ್ಹಜೊ? ಕಿತ್ಯಾಕ್ ಆಮ್ಚ್ಯಾ ಭುರ್ಗ್ಯಾಂನಿ ಮಿಲಿಟ್ರಿಂತ್ ಭರ್ತಿ ಜಾಂವ್ಕ್ ನ್ಹಜೊ?

ಆಮ್ಚೊ ಚಡ್ತಾವ್ ಲೋಕ್ ಅಜೂನ್ ಕುರ್ಲ್ಯಾಂಚ್ಯಾ ಸ್ವಭಾವಾನ್ ಜಿಯೆತಾ, ಎಕ್ಲೊ ವಯ್ರ್ ಯೆತಾನಾ ಮೊಸ್ರಾನ್ ಭರ್ತಾ.

4. ಆಮ್ಚ್ಯಾ ಯುವಜಣಾಂಕ್ ತುಮ್ಚಿ ಸಲ್ಹಾ ಕಸಲಿ?

ಜಾ: ಮಿನತೆಚೆರ್ ಪಾತ್ಯೆಣಿ ದವರ್ನ್ - ಕಾಮ್ ಕರಾ. ಉಂಚ್ಲೆಂ ಚಿಂತಾ ಆನಿ ಪರಿಶ್ರಮ್ ಕರ್ನ್ ರಾವಾ. ಹರ್ಯೆಕ್ಲೊ ಅಪ್ಲೊ ಉಂಚ್ಲೊ ಫುಡಾರ್ ಭಾಂದ್ಚೆಂ ಸ್ವಪಾಣ್ ಘೆವ್ನ್ ಮಿನತ್ ಕರ್ನಾ. ಹೆಂ ಚಿಂತಾಪ್ ಇಸ್ಕೊಲಾಂತ್ ಆಸ್ಚ್ಯಾ ಭುರ್ಗ್ಯಾಂನಿ ಸಯ್ತ್ ಚಿಂತ್ಚಿ ಗರ್ಜ್ ಆಸಾ.

5. ಕೊಂಕ್ಣಿ ಭಾಸ್, ಸಾಹಿತ್ಯ್ ವಿಶಿಂ ತುಮ್ಚೆ ವಿಚಾರ್ ಕಸ್ಲೆ?

ಜಾ: ಖಂಚ್ಯಾಯ್ ಭಾಸೆಚ್ಯಾ ವ್ಹಾಡಾವಳೆಕ್ ಸಾಹಿತ್ಯ್ ಏಕ್ ಮುಳಾವೆಂ ತಶೆಂಚ್ ಪ್ರಮುಖ್ ಹಾತೆರ್ ಜಾವ್ನಾಸಾ. ಕೊಂಕ್ಣೆಕ್ ಮಾತ್ರ್ ವೆವೆಗ್ಳ್ಯಾ ಲಿಪಿ ಮ್ಹಳ್ಳ್ಯಾ ಮುಟಿಂನಿ ಧರ್ನ್ ತಿ ವ್ಹಾಡೊಂಕ್ ಸೊಡುಂಕ್ ನಾ, ಜಿತ್ಲಿ ವ್ಹಾಡೊಂಕ್ ಜಾಯ್ ಆಸ್ಲೆತಿತ್ಲಿ. ಹೆಂ ಕೊಂಕ್ಣೆಚೆಂ ದುರ್ಭಾಗ್‌ಪಣ್ ಮ್ಹಣ್ ಹಾಂವ್ ಮಾಂದ್ತಾಂ. ಮ್ಹಜೆಪ್ರಕಾರ್ ಹರ್ಯೆಕಾ ಲಿಪಿಯೆಚ್ಯಾ ಬಾಂಯ್ತ್ ಆಸ್ಚ್ಯಾಂನಿ ಭಾಯ್ರ್ ಯೇವ್ನ್ ಲಿಪಿಯೆಚ್ಯಾಕೀ ವಯ್ರ್ ಕೊಂಕ್ಣಿ ಆಸಾ ಮ್ಹಳ್ಳೆಂ ಸತ್ ಸಮ್ಜೊಂಕ್ ಜಾಯ್. ತೆದ್ನಾಂ ಮಾತ್ರ್ ಕೊಂಕ್ಣೆಕ್ ಬರೊ ಫುಡಾರ್ ಆಶೆವ್ಯೆತಾ.

6. ಕೊಂಕ್ಣಿ ಪತ್ರಿಕೋಧ್ಯಮಾವಿಶಿಂ (ಆರ್ಥಿಕ್ ರಿತಿನ್) ತುಮ್ಚೆ ವಿಚಾರ್ ಕಸ್ಲೆ?

ಜಾ: ಆಮ್ಚಿ ಚಡ್ತಾವ್ ಪತ್ರಾಂ ಅಜೂನ್ ಸಿಂತಿಮೆಂತಾಂತ್ ಚಲೊನ್ ಆಸಾತ್, ಕೊಣಾ ಕೊಣಾಚ್ಯಾ ದಯೆನ್, ಭಿರ್ಮತೆನ್ ಆನಿ ದಾಕ್ಶೆಣೆನ್. ಆನಿ ಹಾಚೆಂ ಕಾರಣ್‌ಯೀ ಆಮ್ಚಿಂ ಪತ್ರಾಂಚ್ - ಆಮ್ಚಿಂ ಪತ್ರಾಂ ಸರ್ಕಾರಿ ಏಜಂಟಾಲಾಗಿಂ ರೆಜಿಸ್ಟರ್ ಜಾಯ್ನಾಂತ್ ದೆಕುನ್ ಸರ್ಕಾರಿ ಜಾಹಿರಾತಾಂ ಆಮ್ಚ್ಯಾ ಪತ್ರಾಂಕ್ ಲಾಭಾನಾಂತ್. ನಾಂ ತರ್ ಸರ್ಕಾರಾ ಥಾವ್ನ್ ಜಾಹೀರಾತಾಂ ಮೆಳ್ತಿಂ, ಸರ್ಕಾರಿ ಏಜಂಟಾಂಚಿಂ ಜಾಹಿರಾತಾಂ ಮೆಳ್ತಿಂ ಆನಿ ಆರ್ಥಿಕ್ ಭೊರ್ ಇಲ್ಲೊ ತರ್‌ಯೀ ಹಾಳು ಜಾತೊ. ಹೆಂ ಎಕಾ ವಾಟೆರ್ ತರ್ ದುಸ್ರೆ ವಾಟೆರ್ ಆಮ್ಚೊ ವಾಚ್ಪಿ ದಿಸಾನ್ ದೀಸ್ ಉಣೊ ಜಾತೇ ಯೆತಾ. ನವ್ಯಾ ಪಿಳ್ಗೆಕ್ ಕೊಂಕ್ಣಿ ಮೂರ್ ನಾ. ಆನಿ ತಿ ಮೂರ್ ದಿಂವ್ಚ್ಯಾಂಕ್ ಆಯ್ಚಿ ವ್ಹಡಿಲಾಂ ಸಲ್ವಲ್ಯಾಂತ್. ಆಮ್ಚಿ ಪತ್ರಾಂ ಚಡ್ಲ್ಯಾಂತ್ ಜಾವ್ಯೆತಾ, ಪುಣ್ ವಾಚ್ಪಿ ಚಡೊಂಕ್ ನಾಂತ್. ಆನಿ ಹ್ಯಾ ದಿಶೆನ್ ಕೊಣೆಂಯ್ ವಾವ್ರ್ ಕರ್ಚೆಂಯ್ ದಿಸೊನ್ ಯೇನಾ.

7. ಕೊಂಕ್ಣಿ ಅಂತರ್‌ಜಾಳಿಂ ಮುಖಾಂತ್ರ್ ಕೊಂಕ್ಣಿ ವಾವ್ರ್ ಸಾಧ್ಯ್ ಮ್ಹಣ್ ತುಮ್ಕಾಂ ಭಗ್ತಾಗಿ?

ಜಾ: ಅಂತರ್‌ಜಾಳ್ ಆಯ್ಚ್ಯಾ ಪರಿಗತೆಂತ್, ಗಾಂವ್ಚಾ ಲೊಕಾಂಕ್ ಏಕ್ ವಿಂಚವ್ಣ್ (Option) ಮಾತ್ರ್ ಶಿವಾಯ್ ಗರ್ಜ್ (Need) ನ್ಹಯ್. ಪುಣ್ ಪರ್ಗಾಂವಾಂತ್ ಆಸ್ಚ್ಯಾಂಕ್ ಹಿಂ ಅಂತರ್‌ಜಾಳ್ ಭೋವ್ ಉಪ್ಕಾರಾಕ್ ಪಡ್ಚ್ಯಾಂಕ್ ನವಾಲ್ ನಾ. ತೆಚ್ಚ್‌ಪರಿಂ ಅಂತರ್‌ಜಾಳಿಚೊ ವಾಚ್ಪಿ ಖರೊಚ್ಚ್ ಜಾವ್ನ್ ಶಿಕ್ಪಿ ವರ್ಗ್ ದೆಕುನ್ ಕೊಂಕ್ಣೆಚಿ ಗರ್ಜ್ ತಿಂ ಸಮ್ಜೊನ್ ಪಾಟಿಂಬೊ ದಿತಿತ್ ತರ್ ನಿಜಾಯ್ಕೀ ಕೊಂಕ್ಣೆಚೆಂ ಬರೆಂಪಣ್ ಸಾಧ್ಯ್.

8. ತುಮಿಂ ಕೊಂಕ್ಣೀ ಪತ್ರಾಂ, ಬೂಕ್ ವಾಚ್ತಾತ್‌ಗಿ?

ಜಾ: ವ್ಹಯ್. ಹಾಂವ್ ಸರಾಗ್ ’ರಾಕ್ಣೊ’ ವಾಚ್ತಾಂ, ಪಯ್ಲೆಂ ’ಪಯ್ಣಾರಿ’ಯೀ ವಾಚ್ತಾಲೊಂ, ರಾಕ್ಣೊಸವೆಂ ’ದಿವೊ’ ಆನಿ ಹೆರ್ ಥೊಡಿಂ ಪತ್ರಾಂ ವಾಚ್ತಾಂ. ಬೂಕ್‌ಯೀ ವಾಚ್ತಾಂ, ತುಜೊ ಸಂಪಾದಕೀಯಾಂಚೊ ಬೂಕ್ ’ಮೊಳ್ಬಾವಯ್ಲಿಂ ಸ್ವಪ್ಣಾಂ’ ವಾಚ್ತಾನಾ ಮ್ಹಾಕಾ ತುಜಿ ಬರ್ಪಾ ರೀತ್ ಚಾ.ಪ್ರಾ.ದೆ’ಕೋಸ್ತಾಚ್ಯಾ ಬರ್ಪಾಚ್ಯಾ ರಿತಿಪರಿಂ ಭಗ್ಲೆಂ. ಕೊಂಕ್ಣಿ ಬೂಕ್‌ಯೀ ಹಾಂವ್ ಅಪ್ರೂಪಾಯೆನ್ ತರ್‌ಯೀ ವಾಚ್ತಾಂ.

9. ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸ್ಲೆ?

ಜಾ: ಕೊಂಕ್ಣಿ ಸಮಾಜ್, ಲೋಕ್, ಭಾಸ್, ಸಂಸ್ಕೃತಿ, ಉರಂವ್ಕ್ ಆನಿ ಊರ್ಜಿತ್ ಕರುಂಕ್ ತುಮಿ ಕರ್ನ್ ಆಸ್ಚಿಂ ಕಾಮಾಂ ಮುಖಾರುನ್ ವಚಾ. ಹೆರಾಂಕ್ ಹ್ಯೇ ವಿಶಿಂ ಸುಶಿಕ್ಷಿತ್ ಕರ್ಚಿಂ ಕಾಮಾಂ ಭೋವ್ ಗರ್ಜೆಚಿಂ. ಆಮ್ಚ್ಯಾ ಪೊಟಾಚ್ಯಾ ಭುಕೆಚ್ಯಾಕೀ ಉಪ್ರಾಂತ್ ಆಸೊಂಕ್ ಜಾಯ್ ಆಸ್ಚ್ಯಾ ಭುಕೆವಿಶಿಂ ನಿಯಾಳ್ ಗರ್ಜೆಚೊ.

10. ಜೊನಾಬಾ - ದೇವ್ ಬರೆಂ ಕರುಂ ತುಮಿ ಮ್ಹಜೆಸವೆಂ ಖರ್ಚಿಲ್ಲ್ಯಾ ಅಮೊಲಿಕ್ ವೆಳಾಕ್. ನಿಜಾಯ್ಕೀ ಹೆಂ ಮ್ಹಜೆಂ ಭಾಗ್, ತುಮ್ಕಾಂ ಮೆಳ್ಚೆಂ ಆನಿ ತುಮ್ಚೆಸವೆಂ ಇತ್ಲೊ ವೇಳ್ ಉಲಂವ್ಚೆಂ?

ಜಾ: ತುಕಾಯ್ ದೇವ್ ಬರೆಂ ಕರುಂ ವಲ್ಲಿ, ತುಂ ರಜೆರ್ ಆಯಿಲ್ಲೊ ಸಯ್ತ್, ಬೊಂಬೊಯ್ ಯೇವ್ನ್ ಮ್ಹಾಕಾ ಮೆಳೊಂಕ್ ಆಯಿಲ್ಲ್ಯಾಕ್. ತುಮ್ಚ್ಯಾ ಕೊಂಕ್ಣಿ ಮಿಸಾಂವಾಕ್ ಸರ್ವ್ ಬರೆಂ ಆನಿ ಜಯ್ತ್ ಮಾಗ್ತಾಂ.

ಹ್ಯಾ ಆಧ್ಲೆ ಕಾರ್ಭಾರಿ: 1, 2, , 3, , 4, , 5, 6, 7, 8, 9, 10, 11, 12, 13, 14, 15, 16, 17, 18, 19, 20

ದಾಯ್ಜ್ ಪಾನಾಕ್

[ಮಿಕ್‌ಮ್ಯಾಕ್ಸ್]

[8. ವಲ್ಲಿ]

[7. ಮಾನೆಸ್ತ್]