ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಆಮ್ಚಿ ಸಂಸ್ಕೃತಿ- ಆಸ್ಟಿನ್ ಡಿ’ಸೋಜ್ ಪ್ರಭು
ಖಂಯ್ ಗೆಲ್ಯಾ "ಆಮ್ಚಿ" ಸಂಸ್ಕೃತಿ
ಆಮಿಂ ಫಿಂರ್ಗಿ ಜಾಲ್ಯಾಂವ್? ವ್ಹಯ್, ಖರೆಂಚ್ ವ್ಹಯ್, ಆಮಿಂ ಫಿಂರ್ಗಿ ಜಾಲ್ಯಾಂವ್!
ಜೆನ್ನಾಂ ಆಮಿಂ ಆಮ್ಚಿ ಕಾಶ್ಟಿ, ಲುಂಗಿ, ಕಾಚ್ಚಾ, ಉರ್ಮಾಲ್, ಕುತಾಂವ್ ಇತ್ಯಾದಿ ಬಗ್ಲೆಕ್ ಉಡವ್ನ್ ಕಲ್ಸಾಂವಾಂನಿ ಆಮ್ಚೆ ಪಾಂಯ್ ರಿಗಂವ್ಕ್ ಸುರು ಕೆಲೆಂಗಿ ತೆನ್ನಾಂ ಥಾವ್ನ್ಂಚ್ ಆಮಿಂ ಫಿಂರ್ಗಿ ಜಾವ್ನ್ ಬದ್ಲಿ ಜಾಲ್ಯಾಂವ್. ಆಮ್ಚ್ಯಾ ಮ್ಹಾಲ್ಘಡ್ಯಾಂನಿ ಫಿಂರ್ಗಿ ಧರ್ಮ್ ಆಮ್ಚೊ ಕೆಲೊ, ದೆವಾಳಾಂ ಸೊಡ್ನ್ ಇಗರ್ಜಾಂಕ್ ಆಮಿಂ ವಚೊಂಕ್ ಸುರು ಕೆಲೆಂ, ಶೆಂಡಿ ಕಾಪುನ್ ತೆನ್ಕಾ ಥಾವ್ನ್ ಬಡ್ಗಾಕ್ ಆಮಿ ವಾಟ್ ಧರ್ಲಿ ಆನಿ ಸವ್ಕಾಸ್ ಆಮಿಂ ಆಮ್ಚಿ ಕೊಂಕ್ಣಿ ಭಾಸ್ ವಿಸ್ರೊನ್ ಥೊಡ್ಯಾಂನಿ ಸಂಪೂರ್ಣ್ ಫಿಂರ್ಗಿಪಣ್ ಆಪ್ಲೆಂ ಕೆಲೆಂ. ಭಾರತಾಂತ್ ಬಲಾತ್ಕಾರಾನ್ ಸರ್ಕಾರ್ ಚಲಂವ್ಚ್ಯಾ ತ್ಯಾ ಲಂಡನಾಂತ್ಲ್ಯಾ ಫಿಂರ್ಗ್ಯಾಂಕ್ ಆಮಿಂ ಉಗ್ತ್ಯಾನ್ ಆಧಾರ್ ಸಹಕಾರ್ ದಿಲೊ, ಭಾರತೀಯ್ ರಾಯ್ ಜಾವ್ನಾಸ್ಲ್ಲ್ಯಾ ಟಿಪ್ಪುಕ್ ಪಾಟ್ಲ್ಯಾನ್ ಸುರಿ ದೀಂವ್ಕ್ ಸುರು ಕೆಲೆಂ ಆನಿ ನಿಮಾಣೆ ಆಮಿಂ ಆಮ್ಚಿ ಭಾರತೀಯ್ ಸಂಸ್ಕೃತಿ ಕೊನ್ಶಾಂತ್ ಉಡವ್ನ್ ಫಿಂರ್ಗಿ ಸಂಸ್ಕೃತಿಚ್ ಆಮ್ಚಿ ಕೆಲಿ. ಆಂತೊನ್ ಶೆಟಿ ತಸಲ್ಯಾಂನಿ ಟಿಪ್ಪು ವಿರೋಧ್ ಭಿತರ್ಲ್ಯಾ ಭಿತರ್ಚ್ ಮತ್ಲಾಬಿ ಖೆಳ್ ಖೆಳ್ತಾನಾ ಜಾಗೊ ಜಾಲ್ಲ್ಯಾ ಟಿಪ್ಪುನ್ ಆಮ್ಚ್ಯಾ ಹಜಾರೊಂ ಮ್ಹಾಲ್ಘಡ್ಯಾಂಚೊ ಶ್ರೀರಂಗ ಪಟ್ನಾಂತ್ ಸಂಹಾರ್ಚ್ ಕೆಲೊ ಆನಿ ಆಮ್ಚ್ಯಾ ಸಮಾಜೆಕ್ ನಿರ್ನಾಮ್ ಕೆಲೊ! ಆಮಿಂ ಸಭಾರ್ ಇಗರ್ಜೊ ಹೊಗ್ಡಾಯ್ಲ್ಯೊ, ಆಸ್ತ್ ನಾಂವ್ ನಾಸ್ತಾಂಚ್ ಹೆರಾಂಕ್ ಗೆಲಿ ಆನಿಂ ಆಮಿಂ ನಿರ್ಗತಿಕ್ ಜಾಲ್ಯಾಂವ್.
ಹ್ಯಾ ಸರ್ವ್ ಆತರ್ವಣಾಂಕ್ ಕಾರಣ್ ಕೋಣ್? ಆಮ್ಚೆ ಪುರ್ವಿತ್? ಛೆ! ತಾಂಕಾಂ ಕಿತ್ಯಾಕ್ ಹರ್ ಸಮಸ್ಯಾಂಕ್ ಧುರ್ಸೊಂಚೆಂ?
ತರಿಪುಣ್, ಆಮ್ಚಿಂ ವ್ಹಡಿಲಾಂ ತೆನ್ನಾಂ ಹ್ಯಾ ಪುರ್ವಿತಾಂಚಿಂ ಗುಲಾಮಾಂ ಜಾವ್ನ್, ಹಫ್ತ್ಯಾ ಹಫ್ತ್ಯಾಕ್ ತಾಂಚಿಂ ಪಾತ್ಕಾಂ ತಾಂಕಾಂ ಸಾಂಗೊನ್ ತಾಣಿ ಸೊಡ್ಲ್ಲ್ಯಾ ವಾರ್ಯಾ ಕುಸಿನ್ಂಚ್ ಧಾಂವೊಂಕ್ ಸುರು ಜಾಲಿಂ. ಆಮ್ಚೆ ಪುರ್ವಿತ್ಯ್ ತ್ಯಾ ಲೋಬಾ ಭಿತರ್ ಪ್ಯಾಂಟಾಂ ಘಾಲುಂಕ್ ಲಾಗ್ಲೆ (ಫಿಂರ್ಗಿ ಅನುಕರಣ್ ಆಮ್ಚೆಂ ಮಾಧ್ಯಮ್ ಜಾಲೆಂ), ಹೆಣೆಂ ತೆಣೆಂ ಇಸ್ಕೊಲಾಂ ಬಾಂಧುನ್ ಫಿಂರ್ಗಿ ಭಾಸ್ಚ್ ಮುಖೆಲ್ ಭಾಸ್ ಕರುಂಕ್ ಲಾಗ್ಲೆ, ಭಾರತೀಯ್ ಸಂಸ್ಕೃತೆಕ್ ವೆಂಗೊಂಕ್ ಸಾಂಗ್ಚ್ಯಾ ಬದ್ಲಾಕ್ ಫಿಂರ್ಗಿ ಸಂಸ್ಕೃತೆಚೆಂ ವಾರೆಂ ಇಗರ್ಜಾಂನಿ ವೆಂಗೊಂಕ್ ಲಾಗ್ಲೆ ಆನಿ ಶೆವ್ಟಿಂ ಆಮ್ಚ್ಯೊ ಇಗರ್ಜೊ ಫ್ಯಾಶನ್ ಕೇಂದ್ರಾಂ ಜಾವ್ನ್ ಪರಿವರ್ತಿತ್ ಜಾಲ್ಯೊ!
ಉಣ್ಯಾಂತ್ಲೆಂ ಉಣೆಂ ನ್ಹೆಸಾಣ್, ಥೊಡೊಸೊ ಶೃಂಗಾರಿತ್ ಪೇಂಯ್ಟ್ (ಮೇಕಪ್, ಲಿಪ್ಸ್ಟಿಕ್, ಪಾವ್ಡರ್) ಥಾಪುನ್ ಆಮ್ಚ್ಯೊ ಚಲಿಯೊ/ಸ್ತ್ರೀಯೊ ಕೊಲ್ವೊಂತಾಂ ಭಾಷೆನ್ ಇಗರ್ಜಾಂನಿ ಸೊಭ್ಲ್ಯೊ, ಹಾಂಕಾಂಚ್ ಪಳೆಂವ್ಕ್ ಮ್ಹಣ್ ಸಭಾರ್ ಆಮ್ಚೆ ತರ್ನಾಟೆ/ಮ್ಹಾತಾರೆ ಇಗರ್ಜಾಂಕ್ ವೆಚೆಂ ಭಿಲ್ಕುಲ್ ಚುಕಾನಾ ಜಾಲೆ, ಇಗರ್ಜೆ ಭಿತರ್ ಜುಗಾರ್ ಖೆಳ್ ಮಹಾ ಪಾತಕ್ ಮ್ಹಣೊನ್ ಇಗರ್ಜೆ ಭಾಯ್ರ್ ಫಿರ್ಗಜ್ ಸಾಲಾಂನಿ ಜುಗಾರ್ (ಫ್ಯಾನ್ಸಿ ಫೆಟ್) ಸುರು ಜಾಲಿ, ಪಯ್ಶೆ ಕರ್ಚ್ಯಾ ನಿಬಾನ್ ಗಾಂವಾಂತ್ ತಸೆಂ ಮುಂಬಂಯ್ತ್ ಆಮ್ಚ್ಯಾ ಸಮಾಜೆಂತ್ಲ್ಯಾಂನಿ ಸೊರೊ ಉಕ್ಡುಂಕ್ ಸುರು ಕೆಲೊ, ತೊ ವಾಂಟುಂಕ್ ಆಮಿಂ ಆಮ್ಚ್ಯಾ ತರ್ನ್ಯಾಂ ಭುರ್ಗ್ಯಾಂಕ್ ಮುಖಾರ್ ಧಾಡ್ಲೆಂ, ಹಿಂದು ಗಿರಾಯ್ಕ್ ಆಮ್ಚ್ಯಾ ಮುಂಬಂಯ್ತ್ಲ್ಯಾ ಘರಾಂನಿ ’ಆಂಟಿಚೊ ಸೊರೊ’ ಪಿಯೆಂವ್ಕ್ ಹಾರಿಂನಿ ಯೇಂವ್ಕ್ ಸುರು ಜಾಲೆ, ಥೊಡೆ ಆಂಟಿಚ್ಯಾ ತಸೆಂ ಆನಿ ಥೊಡೆ ಆಂಟಿಚ್ಯಾ ಧುವಾಂಚ್ಯಾ ಆಂಗಾರ್ಯ್ ಉಡ್ಲೆ ಆನಿ ಸೊರೊ ಪಿಯೆವ್ನ್ ಮತಿರ್ ನಾಸ್ತಾಂ ಸರ್ಪೊಡೊನ್ ಪಡ್ಲೆ!
ಗಜಾಲ್ ಇತ್ಲ್ಯಾರ್ ರಾವ್ಲಿ ನಾ. ಕಾಮಾಚ್ಯಾ ಬೊಂಟೆಕ್ ಲಾಗೊನ್ ಆಮ್ಚೆ ದಾದ್ಲೆ ಗಲ್ಫ್ ದೇಶಾಂನಿ ಪಾವ್ಲೆ, ಥಂಯ್ ದಾಧೋಶಿ ಪಯ್ಶೆ ಕಮಾವ್ನ್ ಆದ್ಲ್ಯಾ ಘರ್ಚೊ ಕೊಲು ಉಸ್ಳಾವ್ನ್ ಫಾತ್ರಾಚಿಂ ಘರಾಂ ಬಾಂದುಂಕ್ ಲಾಗ್ಲೆ, ನಳೆ ಉಸ್ಳಾವ್ನ್ ಕೊಂಕ್ರಿಟಾಚಿಂ ಪಾಲೆಸಾಂ ಬಾಂಧುಂಕ್ ಲಾಗ್ಲೆ, ಆಪ್ಲಿ ಗ್ರೇಸ್ತ್ಕಾಯ್ ದಾಖಂವ್ಕ್ ವಿಲಾಸಿ ಜೀವನ್ ಜಿಯೆಲಾಗ್ಲೆ, ಆಮ್ಚೆ ಮಾಟೊವ್ ಪರ್ತುನ್ ಪಡ್ಲೆ, ಈಂದಾಚೆ ತಾಳೆ ರುಕಾರ್ಚ್ ಉರ್ಲೆ, ಕೆಂಳ್ಬ್ಯಾಂಚೆ ಖೊಲೆ ಕೊಂಕ್ಣ್ಯಾಂಕ್ ವಿಕ್ಲೆ, ಅಮ್ಚಿಂ ಲಗ್ನಾ ಕಾರ್ಯಿಂ ಫಿರ್ಗಜ್ ಸಾಲಾಂನಿ ಜಾಲಿಂ, ಆಮ್ಚೆ ಬೆಂಡ್ಕಾರ್ ಇತ್ಲ್ಯಾ ಭಿತರ್ ಫುಂಕುನ್, ಫುಂಕುನ್ ಆನಿ ಘೊಟುನ್ ಹೊ ಸಂಸಾರ್ ಸಾಂಡುನ್ ಪೆದ್ರುಚ್ಯಾ ರಾಜ್ಯಾಂತ್ ಫುಂಕುಂಕ್ ಧಾಂವ್ಲೆ, ನವೆ ನವೆ ಫಿಂರ್ಗಿ ಸಂಗೀತ್ ಪಂಗಡ್ ಉದೆಲೆ, ಕೊಂಕ್ಣಿ ಬದ್ಲಾಕ್ ಫಿಂರ್ಗಿ ಕಂತಾರಾಂ ತಾಳೊ ಪಿಂಜುನ್, ಕಾನ್ ಕೆಪ್ಪೆ ಜಾತಾ ಪರ್ಯಾಂತ್ ಲಗ್ನಾ ಸಮಾರಂಭಾವೆಳಿಂ ಖೆಳೊಂಕ್ ಲಾಗ್ಲೆ, ಸಾಲಾಂನಿ ಮಾರ್ಚ್ ಸುರು ಕೆಲೊ, ಸಗ್ಳ್ಯಾ ಸಾಲಾಂತ್ ಭಂವ್ಡಿ ಮಾರ್ನ್ ಕೇಕ್ ಕಾತ್ರುಂಕ್ ಸುರು ಕೆಲಿ, ವಾಯ್ನ್ ಆನಿ ಕೆಕಿ ಕುಡ್ಕೆ ವಾಂಟುಂಕ್ ಸುರು ಕೆಲೆ, ಭಲಾಯ್ಕಿ ಮಾಗ್ತೆಲೆ ಉದೆಲೆ, ಕಾರ್ಯೆಂ ನಿರ್ವಾಹಕ್ ಆಳ್ಮ್ಯಾಪರಿಂ ಫುಲ್ಲೆ ಆನಿ ಹೆಂ ಕಾಮ್ ಆಪ್ಲೊ ದಂದೊ ಮ್ಹಳ್ಳ್ಯಾಪರಿಂಚ್ ತಾಂಚ್ಯಾ ಕಾಮಾಂಕ್ ಪಯ್ಶೆ ವಿಚಾರಿಲಾಗ್ಲೆ. ರೊಸಾವೆಳಿಂ ಮಾತ್ಯಾರ್ ತಾಂತಿಯಾಂ, ಟೊಮೆಟೆ, ಬಿಯರ್ ವೊತುನ್ ಆಮ್ಚೆಂ ಹಣೆಬರಾಪ್ ಆಮಿ ಉಗ್ತ್ಯಾನ್ ಪರ್ಕಿ ಸಮಾಜೆಂತ್ಲ್ಯಾಂಕ್ ತೀನ್ ಕಾಸಾಂಕ್ ವಿಕ್ಲೆಂ, ಸಂಸ್ಕೃತೆಕ್ ಮಾನ್ ದಿಂವ್ಚ್ಯಾಂತ್ ಆಮಿ ರಾನಾಂತ್ಲೆ ಕೊಲೆ ಮ್ಹಣ್ ಸರ್ವಾಂಕ್ ದಾಖಯ್ಲೆಂ!
ಆಮ್ಚ್ಯಾ ಕ್ರೀಸ್ತಾಂವ್ ಚಲಿಯಾಂಕ್ ಮುಸಲ್ಮಾನ್, ಬೊಣ್ಕೆ, ಇತ್ಯಾದಿ ಭುಲ್ಲೆ, ತಾಂಕಾಂ ಹೊಟೆಲಾಂ ದಾಖವ್ನ್, ಪಯ್ಶೆ ಯೆಟುನ್ ತಾಂಕಾಂ ಗುರ್ವಾರ್ ಕರುನ್ ಗಾಂವ್ ಸೊಡ್ನ್ ಧಾಂವ್ಲೆ, ಸ್ತ್ರೀಯಾಂಚ್ಯೊ ಆವಯೊ ತ್ಯಾ ದುರ್ಬಳ್ ಧುವಾಂಕ್ ಶೆರಾಂತ್ಲ್ಯಾ ಉಂಚ್ಲ್ಯಾ ದಾಖ್ತೆರಾ ಸರ್ಶಿನ್ ವ್ಹರಾಲಾಗ್ಲ್ಯೊ, ತಾಂಚೊ ಗರ್ಭ್ ಕಾಡಿಲಾಗ್ಲ್ಯೊ ಆನಿ ತುರ್ಥಾನ್ ವರ್ಸಾ ಭಿತರ್ ಖಂಚ್ಯಾಯ್ ಗಲ್ಫಾಂತ್ಲ್ಯಾ ಬೊಕ್ರ್ಯಾಲಾಗಿಂ ತಿಚೆಂ ಲಗನ್ ಕರುನ್ ಶಾಂತಿ ಸಮಾಧಾನಾನ್ ಜಿಯೆಲಾಗ್ಲ್ಯೊ! ಆಮ್ಚ್ಯಾ ಸಮಾಜೆಂತ್ಲೆಂ ಹೆಂ ಚಾಲು ಜೀವನ್ ಇತ್ಲೆಂ ಫಾಮಾದ್ ಜಾಲೆಂಕೀ ಸರ್ವಯ್ ಹಿಂದಿ ಪಿಂತುರಾಂನಿ ರಾಂಡಾಂಚ್ಯಾ, ವೇಶ್ಯಾಂಚ್ಯಾ ಗಳ್ಯಾಂನಿ ತೆ ಭಾಂಗಾರಾಚೆ ಖುರಿಸ್ ಪರ್ಜಳಾಲಾಗ್ಲೆ; ಅನ್ನಾಡಿ ಸ್ತ್ರೀಯಾಂಕ್ ಕ್ರೀಸ್ತಾಂವ್ ನಾಂವಾಂನಿ ಆಪಯ್ಲಾಗ್ಲೆ ಆನಿ ಹ್ಯಾ ಸಾರ್ಯಾಕ್ ಈಟ್ ದೀಂವ್ಕ್ ಹೆಲೆನ್ (ಹಿಂದಿ ಪಿಂತುರಾಂತ್ಲೆಂ ಖ್ಯಾತ್ ನಾಚ್ಪಿಣ್) ತಸಲಿಂ ಕೊಲ್ವೊಂತಾಂ ಕ್ರೀಸ್ತಾಂವ್ ಸಮಾಜೆ ಥಾವ್ನ್ಂಚ್ ಮುಖಾರ್ ಆಯ್ಲಿಂ; ಆಂಗಾರ್ ಜಿಳ್ಮಿಳ್ಚಿಂ ಚಿಂದಿ ಉಮ್ಕಾಳಾವ್ನ್ ಆಪ್ಲೆ ಕುಲೆ, ಸ್ಥನಾಂ, ಪಾಟ್, ಪೋಟ್ ಆನಿ ಆಸ್ಲ್ಲೆಂ ಸರ್ವ್ ಪರ್ಗಟ್ ದಾಖಯ್ಲಾಗ್ಲಿಂ.
ಆಮ್ಚ್ಯಾ ಕ್ರೀಸ್ತಾಂವ್ ಸಮಾಜೆಕ್ ಫಿಂರ್ಗಿ ಕೀಡ್ ಲಾಗ್ಲಿ, ಪಿಡೆಚೆಂ ವೀಕ್ (ವೈರಸ್) ಕುಡಿಂತ್ ಭರ್ಲೆಂ ಆನಿ ತೆಂ ವಿಸ್ತಾರಿತ್ತ್ ಗೆಲೆಂ. ದಾದ್ಲೊ ಪರಿಶ್ರಮಾನ್ ಗಲ್ಫಾಂತ್ ಘೊಳ್ತಾನಾ ಮಹಿನ್ಯಾಕ್ ಏಕ್ ಪಾವ್ಟಿಂ ಹಾಂಬೆಂವ್ಚ್ಯೊ ಥೊಡ್ಯೊ ಸ್ತ್ರೀಯೊ ಆಪ್ಲಿ ಆಶಾ ಕಾರ್ಯಾರೂಪಾಕ್ ಹಾಡುಂಕ್ ಕೊಣಾಕ್ಯ್ ಮೆಳ್ಲ್ಲ್ಯಾಂಕ್ ಹಾಂಡೊಂಕ್ ಲಾಗ್ಲ್ಯೊ, ನೊವ್ರ್ಯಾ ಥಾವ್ನ್ ಮೆಳಾನಾಸ್ಲ್ಲೆಂ ಹ್ಯಾಂ ಪರ್ಕ್ಯಾಂ ಥಾವ್ನ್ ಮೆಳ್ತಾನಾ ತಾಂಚೊ ಸಂತೊಸ್ ಸರ್ಗಾಕ್ ಚಡ್ಲೊ, ಥೊಡೆ ಆವ್ಚಿತ್ ಗಾಂವಾಕ್ ದೆಂವ್ಲ್ಲೆ ಹಿಂ ಆತರ್ವಣಾಂ ಪಳೆವ್ನ್ ಬಾಯ್ಲೆ ಭುರ್ಗ್ಯಾಂಕ್ ಗಾಂವಾಂತ್ ಸೊಡುನ್ ಪಾಟಿಂ ಪರ್ತಾಲೆ, ಪಿಯೆಂವ್ಕ್ ಲಾಗ್ಲೆ ಆನಿ ಪೊಪ್ಸಾಕ್ ಬುರಾಕ್ ಪಡೊನ್ ಹೊ ಸಂಸಾರ್ ಸಾಂಡಿಲಾಗ್ಲೆ. ಲಗ್ನಾ ವಿಂಗಡ್ಪಣ್ ಚಡಾತ್ತ್ ಆಯ್ಲೆಂ, ಸಭಾರಾಂ ವಕೀಲಾಂಚಿಂ ಬಾಗ್ಲಾಂ ಥಾಪ್ಡುನ್ ವಿವಾಹ್ ವಿಚ್ಛೇದನ್ ಘೆಲಾಗ್ಲಿಂ. ಆಮ್ಚಿಂ ಲಗ್ನಾಂ ಕುಂಡ್ಲ್ಯಾಂತ್ಲಿಂ ಕಾಯ್ಲಿರ್ ಪಡ್ಲಿಂ, ಆನಿ ಕಾಯ್ಲಿರ್ ಥಾವ್ನ್ ಸಕ್ಲಾ ಪಡೊನ್ ತ್ಯಾ ಉಜ್ಯಾಂತ್ ಸಂಪೂರ್ಣ್ ಲಾಸ್ಲಿಂ. ಪುಣ್ ಹ್ಯಾ ಕರ್ತುಬಾಂನಿ ಸಭಾರ್ ಪುರ್ವಿತ್ಯೀ ವಾಂಟೆಲಿ ಜಾಲೆ ಪುಣ್ ತಾಂಚೊ ಘುಟ್, ಸ್ತ್ರೀಯಾಂಚೊ ಸಾಂಗಾತ್, ಚಲಿಯಾಂಚೊ ಪ್ರಿಯತಮ್ ಮೇಳ್ ಗುಪಿತ್ತ್ ದವರ್ಚ್ಯಾಂತ್ ಭಾರಿಚ್ ಯಶಸ್ವೀ ಜಾಲೆ! (ಜಾಯ್ ಜಾಲ್ಯಾರ್ ಹಾಂವ್ ಜಾಯ್ತ್ಯಾಂಚಿಂ ನಾಂವಾಂ ದೀಂವ್ಕ್ಯೀ ತಯಾರ್!)
ಕೋಣ್ ಫಟವ್ನ್, ಫಸವ್ನ್, ಫಟಿಂಚಿ ಸಾಂಖಳ್ ರೆವ್ಡಾವ್ನ್ ಮಾಂಕೊಡ್ ಕರುನ್ ಲಗ್ನಾ ಭೆಸಾಂತ್ ರಿಗ್ಲಿಂ, ಆಪ್ಲಿಂ ಪಾತ್ಕಾಂ ಪರ್ಗಟ್ ಜಾತಾನಾ ಸಂಪೂರ್ಣ್ ಶಿರಿಂ ಚುಕ್ಲಿಂ, ಎಕಾಮೆಕಾ ಥಾವ್ನ್ ವಿಂಗಡ್ ಸರ್ಲಿಂ ವಿವಾಹ್ ವಿಚ್ಛೇದನಾಂತ್ ಬುಡೊನ್ ಮೆಲಿಂ. ಆಜ್ ಮಂಗ್ಳುರ್ ಹ್ಯಾ ಪಿಡೆಚೆಂ ಮಹಾನ್ಧ್ವಾರ್ ಕಸೆಂ ಜಾಲಾಂ. ಹಾಕಾ ಕಾರಣ್ ಕೋಣ್? ಹಾಂವೆ ಹ್ಯಾ ಲೇಖನಾಂತ್ ದಿಲ್ಲಿಂ ದೃಷ್ಟಾಂತಾಂ ಕಾಂಯ್ ಉಣಿಂ ಜಾಲಿಂ? ಆಮ್ಚ್ಯಾ ಜೀವನಾಂತ್ಲೆ ಆಲೆ-ಪಾಲೆ ಮಾಯಾಗ್ ಜಾವ್ನ್ ಆಮಿಂ ಬೊಂತ್ಲಿಂತ್ಲ್ಯೊ ವ ಎಲ್ಯುಮಿನಿಯಂ ಆವರಣಾಂತ್ಲ್ಯೊ ಗುಳ್ಯೊ ಸೇಂವ್ಕ್ ಸುರು ಕೆಲ್ಯೊ, ತಕ್ಲೆ ಫಡಾಫಡೆಕ್, ಗರ್ಭಾಪಾತಾಕ್ ಆಮಿಂ ದಾಖ್ತೆರಾಂಚೆ ಪಾಂಯ್ ಧರ್ಲೆ.
ಹ್ಯಾ ಸರ್ವಾಂಕ್ ಮುಖೆಲ್ ಕಾರಣ್ ಕೋಣ್? ಆಮ್ಕಾಂ ರೆಂವ್ಡಾಲ್ಲಿ ತಿ ಫಿಂರ್ಗಿ ಆವೃತ್ತಿ? ವ ಆಮ್ಚಿ ಜಾತ್ ಜೀವನಾಂತ್ ಅನುಶಾಸನ್ ವ ಶಿಸ್ತ್ (ಡಿಸಿಪ್ಲಿನ್) ಪಾಳುಂಕ್ ಸಕಾನಾಸ್ಚಿ ನಿರ್ಗತಿಕ್ ಜೀವಿ? ಹೊ ಸರ್ವ್ ಆವ್ತಾರ್ ಆಮ್ಕಾಂ ಸರ್ವಾಂಕ್ ಖಂಯ್ಸರ್ ವ್ಹರುನ್ ಪಾಯ್ತ್? ಆಮಿ ಆಮ್ಚ್ಯಾ ಜೀವನಾಂತ್ ಶಿಸ್ತ್ ಕೆನ್ನಾಂ ಹಾಡುಂಕ್ ಸಕ್ತಾಂವ್? ಆಮಿಂ ಆಮ್ಚಿ ಸಮಾಜ್ ಹೆರಾಂಕ್ ದಾಖಂವ್ಕ್ ಖಂಚ್ಯಾ ನಮೂನ್ಯಾಚೊ ಫುಟ್ಕರ್ ಆರ್ಸೊ ದಾಖವ್ನ್ ಆಸಾಂವ್? ಆಮ್ಚೆಂ ಪ್ರತಿಫಲನ್ ವಿಚಿತ್ರ್, ವಿಭಿನ್ನ್ ಕರುಂಕ್ ಲಾಗೊನ್ ಆಮ್ಚೆ ಥಂಯ್ ಆಸ್ಚೊ ತೊ ಮಾನ್, ಭರ್ಮ್ ಸಂಪೂರ್ಣ್ ಸತ್ತ್ಯಾನಾಶ್ ಕರುಂಕ್ ಪಾವ್ಲ್ಯಾಂವ್; ಆಮಿಂ ಆಮ್ಚೆ ವಿಶ್ಯಾಂತ್ಚ್, ’ಪೊರ್ಬುನಕ್ಲೆನಾ ಜೋಕುಲು, ಪರ್ಪಿನಕುಲು’ ಮ್ಹಣ್ ಗಾನಾಂ ಘಡುನ್ ಆಮ್ಚೆಂ ಹಣೆಬರಾಪ್ಚ್ ಸೆಜಾರ್ಚ್ಯಾ ತ್ಯಾ ಮಾಡಾಮುಳಾಂತ್ ವೊತುಂಕ್ ಸಕ್ಲ್ಯಾಂವ್!
ಪರ್ದೇಶಾಂನಿ ಭಾರತೀಯ್ ಸಂಸ್ಕೃತಿ ಮಾನಾನ್ ಆಪ್ಲಿ ಕರುನ್ ಆಸ್ತಾನಾ ಆಮಿಂ ತಿ ಫಿಂರ್ಗಿ ಸಂಸ್ಕೃತಿ ಆಮ್ಚಿ ಕರುನ್, ದೇವಾಕ್ ಧರ್ಲ್ಲೆ ಘೊವಾಕ್ ಪರ್ಯಾಂತ್ ತ್ಯಾಚ್ ಫಿಂರ್ಗಿ ಕಂತಾರಾಂನಿ ಗುಟ್ಲಾವ್ನ್ ಆಮ್ಚಿ ತಿ ಗ್ರೆಸ್ತ್ ಸಂಸ್ಕೃತಿ ಲ್ಹಾನ್ ಲ್ಹಾನ್ ಮುಟ್ಲಿಂ ಕರುನ್ ಹೆರಾಂಕ್ ವಿಕುಂಕ್ ಪಾವ್ಲ್ಯಾಂವ್. ಥುಕ್ಕ್ ಆಮ್ಚ್ಯಾ ಹಣೆಬರ್ಪಾಕ್, ಲಜ್ ಆಮ್ಚ್ಯಾ ಕರ್ತುಬಾಂಕ್!
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
