ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 4
ಪರತ್ ಪರತ್
ಬೂಕ್: ಪರತ್ ಪರತ್
ಕವಿ: ದೆ|ಜೊರ್ಜಿ ಪೀಂತ್, ಆಯ್ಕೊಳ್
ಪ್ರಸ್ತಾವನ್: ಜೆರಿ ರಸ್ಕಿನ್ಹಾ
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 156
ಮೋಲ್: ರು. 20
ಪ್ರಕಾಶಕ್: ಮಾಂಡ್ ಸೊಭಾಣ್
ಪರ್ಗಟ್ ಜಾಲ್ಲಿ ಇಸ್ವಿ: 2003
ಸಮೀಕ್ಶಾ ಚಲಯ್ಣಾರ್: ಜೊಮೆಲ್, ಬೊಂದೆಲ್
ತಾರಿಕ್: 13 ಮಾಯ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಜೊಮೆಲ್,ಬೊಂದೆಲ್
ದೆ|ಜೊರ್ಜಿ ಪೀಂತ್
ಕವಿಚಿ ವ್ಹಳೊಕ್:
ದೆ|ಜೊರ್ಜಿ ಪೀಂತ್ ಆಯ್ಕೊಳ್ ಕೊಂಕ್ಣಿ ಸಾಹಿತಿತ್ ಶೆತಾಂತ್ ಉದೆಲ್ಲ್ಯಾ ಭೋವ್ ಥೊಡ್ಯಾ ಚಿಂತ್ಪ್ಯಾಂಪಯ್ಕಿಂತ್ಲೊ ಎಕ್ಲೊ. ಫಾಮಾದ್ ಪದಾಂ ಘಡ್ಪಿ ಜಾವ್ನ್ ಲೊಕಾಂಕ್ ವಳ್ಕಿಚೊ ತರ್ಯ್ ತಾಕಾ ಕವಿತಾಯ್ ಬರಂವ್ಚಿ ಜಬ್ಬೊರ್ ವ್ಹೋಡ್ ಆಸ್ಲ್ಲಿ. ಕುವೆಯ್ಟಾಂತ್ ಕೊಂಕ್ಣಿ ಕವಿತಾಚೆಂ ಮಯ್ನ್ಯಾಳೆಂ ಕಾಮಾಸಾಳ್ ಆಸಾ ಕರ್ಚಾಕ್ ಕಾರಾಣ್ ಜಾಲ್ಯಾಂತ್ಲೊ ಅನ್ಯೇಕ್ ಮುಖೇಸ್ತ್. 2003 ಇಸ್ವೆಚಾ ಮಾಯ್ ಮಯ್ನ್ಯಾಂತ್ ಹ್ಯಾ ಸಂಸಾರಾಕ್ ಆಧೇವ್ಸ್ ಮಾಗ್ಲ್ಲ್ಯಾ ದೆ|ಜೊರ್ಜಿ ಪಿಂತಾಚೊ ಉಡಾಸ್ ಸದಾಂಚ್ ಆಮ್ಚಾ ಮತಿಂತ್ ಆಸ್ತಲೊ ಮ್ಹಳ್ಳೊ ಭರ್ವಸೊ. ’ಪರತ್ ಪರತ್’ ತಾಚೊ ಪಯ್ಲೊ ಕವಿತಾಜಮೊ ತರ್ಯ್ ತೊ ಜೀವ್ ಆಸ್ತಾನಾ ಪರ್ಗಟ್ ಜಾಲ್ಲೊ ತಾಚೊ ಎಕ್ಚ್ ಬೂಕ್ ಜಾವ್ನಾಸಾ ’ಜಿವಿತಾ ಸೊಭಾಣ್’ - ಜೊ ಆಶಾವಾದಿ ಪ್ರಕಾಶನಾನ್ 2002 ಇಸ್ವೆಂತ್ ಪರ್ಗಟ್ ಕೆಲ್ಲೊ.
ದೆ|ಜೊರ್ಜಿ ಪೀಂತ್ ಆಯ್ಕೊಳ್ ಹಾಕಾ ಸಭಾರ್ ಕವಿತಾಸ್ಪರ್ಧ್ಯಾಂನಿ ಇನಾಮಾಂ ಲಾಭ್ಲ್ಯಾಂತ್.
ಸಮೀಕ್ಶಾ ಲೇಖನ್
2003 ಮಾಯ್ ಮಹಿನ್ಯಾಚ್ಯಾ ಇಕ್ರಾ ತಾರಿಕೆಚ್ಯಾ ಪಯ್ಲೆಂ ಹಾಂವ್, ಕವಿ ಜೊರ್ಜಿ ಪೀಂತ್ ಅಯ್ಕೊಳ್ ಕೋಣ್ ಮ್ಹಣ್ ನೆಣಾಸ್ಲೊ. ಪುಣ್ ತಾಚಿ ಏಕ್ ಕವಿತಾ ಹಾಂವ್ ಸುಮಾರ್ 2003 ಇಸ್ವೆಂತ್ ರಾಕ್ಣೊ ಪತ್ರಾರ್ ವಾಚ್ಲ್ಲಿ. ಆನಿ ತಿ ಕವಿತಾ ಆಜೂನ್ ಮ್ಹಜ್ಯಾ ಕಾಳ್ಜಾಂತ್ ರೊಂಬೊನ್ ಗೆಲ್ಯಾ. ತಿ ಕವಿತಾ ಮ್ಹಕಾ ಇತ್ಲಿ ಬರಿ ಲಾಗ್ಲಿಗೀ, ಕವಿತಾಧ್ವಾರೀಂಯ್ ಧಾರುಣ್ ಜಾಲ್ಲಿಂ ಮನ್ಶ್ಯಾಚಿಂ ಕಾಳ್ಜಾಂ ಜಿವಾಳ್ ಕರ್ಯೆತ್ ಮ್ಹಣ್ ಮ್ಹಾಕಾ ತ್ಯಾ ದೀಸ್ ಖಚಿತ್ ಜಾಲೆಂ. ಸುಮಾರ್ ಸಾತಾಟ್ ಮಹಿನ್ಯಾಂ ಉಪ್ರಾಂತ್ ಕುವೈಟಾಂತ್ ಜಾಲ್ಲ್ಯಾ ಏಕಾ ರೆತಿರೆಂತ್ ಭಾಗ್ ಘೆತಾನಾ, ರೆತಿರೆಚ್ಯಾ ಪಾದ್ರಿನ್ ಹಿಚ್ ಕವಿತಾ ಪರತ್ ವಾಚ್ತಾನಾ ಮ್ಹಜೆ ಕಾಳಿಜ್ ನಿಜಾಯ್ಕೀ ಸಂತೊಸಾಚ್ಯಾ ಉಮಾಳ್ಯಾನಿಂ ಭರೊನ್, ಮ್ಹನಾ ಬಿತರ್ಚ್ ಕವಿ ಜೊರ್ಜಿಕ್ ಶಾಬಾಸ್ಕಿ ದಿಲ್ಲಿ.
ಜೊರ್ಜಿ ಪೀಂತ್ ಆಯ್ಕೋಳ್ ಹಾಚೊ ಹೊ ’ಪರತ್ ಪರತ್’ ಕವಿತಾದಾಳೊ ಮ್ಹಜ್ಯಾ ಹಾತಾಂತ್ ಮೆಳ್ತಾನಾ ಹಾಂವೆ ತಾಚಿಂ ಕಂಚೀಂಯ್ ಕವಿತಾ ವಾಚಿನಾಸ್ತಾಂ, ವಯ್ಲ್ಯಾ ಕವಿತಾಕ್ ಸೊಧುಂಕ್ ಲಾಗ್ಲೊ. ಆನಿಂ ತಿ ಕವಿತಾ ಆಶಿ ಆಸಾ, ಕವಿತಾಚೆಂ ನಾಂವ್ ’ವಿಪಾರ್ಯಾಸ್’ ತಿ ಅಶಿ ವ್ಹಾಳ್ತಾ:
ಮ್ಹಾತಾರಿ ನಿತ್ರಾಣ್ ಜಾಲ್ಯಾ
ಅಸ್ಕತ್ಕಾಯೆನ್ ಕಾಂಪೊಂಕ್ ಲಾಗ್ಲ್ಯಾ
ಶಿರೊ ತಿಚ್ಯೊ ಕಾತಿ ವಯ್ರ್ ದಿಸ್ತಾತ್
ಧಾಳಿ ಪುಟ್ಲ್ಲ್ಯಾ ಗಾದ್ಯಾಪರಿಂ
ತೊಂಡಾರ್ ತಿಚ್ಯಾ ಮಿರಿಯೊ ಪಡ್ಲ್ಯಾತ್
ಸಾಳಿಯೆಚ್ಯಾ ಜಾಳಾಪರಿಂ
ತಿಚ್ಯಾ ಜಿವಾಂತ್ ತ್ರಾಣ್ ನಾ
ಕುಡಿಂತ್ ತಿಚ್ಯಾ ಬಳ್ ನಾ
ಮತಿಂತ್ ತಿಚ್ಯಾ ಉಲ್ಲಾಸ್ ನಾ
ಘಾಣ್ಯಾಂತ್ ಥಾವ್ನ್ ಆಯಿಲ್ಲ್ಯಾ ಚಿಂವ್ಡಾಪರಿಂ
ತಿ ಜಾಲ್ಯಾ ತಿಚೆಂ ರಗತ್ ದಾಟ್ಶೆಲಾಂ
ಪೊಟಾಂತ್ ಜೀರ್ವಣ್ ನಾ
ದೊಳ್ಯಾಂತ್ ದೀಶ್ಟ್ ನಾ
ಶಿರಾನಿ ಸಕತ್ ನಾ
ತಾಂತಿಯಾಚ್ಯಾ ಕರ್ಲಾ ಪರಿಂ
ಬಿತರ್ಲ್ಯಾನ್ ಪೊಕೊಳ್ ಜಾಲ್ಯಾ
ಹಿ ಕವಿತಾ ಸುರ್ವೆರ್ ವಾಚ್ತಾನಾ, ತ್ಯಾ ವೆಳಾರ್ ಮ್ಹಾಕಾ ಕೊಂಕ್ಣಿ ಸಾಹಿತ್ಯಾ ಥಂಯ್ ಚಡ್ ಉರ್ಬಾ ನಾತ್ಲ್ಲ್ಯಾನ್ ಹಾಂವೆ ಹ್ಯಾ ಕವಿಕ್ ಜಾಣಾ ಜಾಂವ್ಕ್ ಪ್ರಯತನ್ಂಚ್ ಕರುಂಕ್ ನಾ. ಪುಣ್ ೨೦೦೩ ಮಾಯ್ ಇಕ್ರಾ ತಾರಿಕೆರ್ ಜೊರ್ಜ್ಯಾಬ್ ಹೊ ಸಂಸಾರಿ ಕಾವ್ಯಾ ಮಂಟಪ್ ಸೊಡ್ನ್ ಸಾಸ್ಣಾಚ್ಯಾ ಕವಿಕ್ ಮೆಳುಂಕ್ ವೆತಾನಾ, ಮ್ಹಕಾ ತಾಚೆ ಥಂಯ್ ಚಡ್ ಮೋಗ್, ಖಂತ್ ಆನಿಂ ಹುಸ್ಕೊ ಉದೆಲ್ಲೊ. ತಾಚೆ ವಿಶೆಂತ್ ಹಾಂವೆ ರಾಕ್ಣೊ ಪತ್ರಾರ್ ಆನಿಂ ಹೆರ್ ಪತ್ರಾರ್ ಪಾಯ್ಸ್ ಜಾಲ್ಯಾ ಲೇಖಾನಾಂಚೆರ್ ಚಡಿತ್ ದೊಳೊ ದವರ್ಲೊ. ಮ್ಯಾಂಗ್ಲೊರಿಯನ್ ಡೊಟ್ ಕೊಮಾಚೆರ್ ಪಾಯ್ಸ್ ಜಾಲ್ಲ್ಯಾ ತಾರಾಂ ಆನಿಂ ಲ್ಹಾರಾಂ ವಿಭಾಗಾಂತ್ ತಾಚೆ ವಿಶ್ಯಾಂತ್, ತಾಕಾ ಚಡ್ ಲಾಗ್ಶಿಲ್ಯಾನ್ ವಳ್ಕಲ್ಲೊ ಆನಿಂ ಜಾಣಾ ಆಸ್ಲ್ಲೊ ವ್ಯಕ್ತಿ ವಲ್ಲಿ ಕ್ವಾಡ್ರಸಾಚೆಂ ಲೇಕನ್ ವಾಚುನ್ ಮ್ಹಕಾ ಜೊರ್ಜಿ ಪೀಂತ್ ಆಯ್ಕೊಳಾಥಂಯ್ ವರ್ತೊ ಅಬಿಮಾನ್ ಭಗ್ಲೊ. ತಾಣೆ ಕೊಂಕ್ಣಿ ಖಾತಿರ್ ಕೆಲ್ಲಿ ತಿ ನಿಸ್ವಾರ್ಥ್ ವಾವ್ರ್ ಪಳೆವ್ನ್ ಮ್ಹಜೊ ಜೀವ್ ಫುಮಾರ್ ಜಾತಾ. ಅಶೆಂ ಆಜ್ ಹೊ ತಾಚೊ ಕವಿತಾ ಪುಂಜೊ ಪರತ್ ಪರತ್ ವಯ್ರ್ ಚಡಿತ್ ಅಧ್ಯಯನ್ ಕರುನ್ ತುಮ್ಚೆ ಮುಕಾರ್ ದವರ್ಚೆಂ ಮ್ಹಜೆ ವರ್ತೆಂ ಭಾಗ್ ಮ್ಹಣ್ ಹಾಂವ್ ಲೆಕ್ತಾಂ. ಸಾಸ್ಣಾಚ್ಯಾ ಕವಿ ಸಂಗಿ, ತಾಚ್ಯಾ ಕಾವ್ಯಾಳ್ ವೈಕುಂಟಾಂತ್ ಜಿಯೆಂವ್ಚ್ಯಾ ಕವಿ ಜೊರ್ಜ್ಯಾಬಾ, ತುಕಾ ಆಮ್ಚಿ ಹಿ ಶ್ರದ್ದಾಂಜಲಿ.
’ಪರತ್ ಪರತ್’ ಹೊ ಕವಿತಾ ಪುಂಜೊ ’ಮಾಂಡ್ ಸೊಭಾಣ್ ಪ್ರಕಾಶನ್’ ಧ್ವಾರಿಂ ಜೊರ್ಜಿ ಪೀಂತ್ ಆಯ್ಕೊಳ್ ಹಾಚ್ಯಾ ಮರ್ಣಾಚ್ಯಾ ಚ್ಯಾರ್ ಮಹಿನ್ಯಾ ನಂತರ್ ಸಪ್ತೆಂಬರ್ ೨೦೦೩ ಂತ್ ಛಾಪ್ಲ್ಲೊ ಜಾವ್ನಾಸಾ. ಹ್ಯಾ ಕವಿತಾ ಸಂಗ್ರಹಾಕ್ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾದೆಮಿಚೆಂ ಅನುದಾನ್ ಮೆಳ್ಳಾಂ. ಜೊರ್ಜ್ಯಾಬಾಚೊ ಆಪ್ತ್ ಮಿತ್ರ್ ಮಾನೆಸ್ತ್ ಜೆರಿ ರಸ್ಕಿಂ~ಜ್, ಆಂಜೆಲೊರ್ ಹಾಣಿ ಸೊಭಿತ್ ಉತ್ರಾಂನಿ ಪ್ರಸ್ತಾವನ್ ಲಿಖ್ಲಾಂ. ಎಕ್ಶೆಂ ಪನ್ನಸ್ ಆನಿ ಸ ಪನಾಂಚ್ಯಾ ಹ್ಯಾ ಕವಿತಾಜಮ್ಯಾಂತ್ ವಿವಿದ್ ಥರಾಚಿಂ ಕವಿತಾ ಆಸಾತ್. ಹಾಂತ್ಲ್ಯಾ ಥೊಡ್ಯಾ ಕವಿತಾಂಕ್ ’ಮಾಂಡ್ ಸೊಬಾಣ್’ ಪಂಗ್ಡಾನ್ ತಾಳೆ ಸಜವ್ನ್ ಲೊಕಾಮೊಗಾಳ್ ಕೆಲ್ಯಾಂತ್ ತಶೆಂಚ್ ಕೆಸೆಟಿ/ಸಿಡಿ ರುಪಾರ್ ಪ್ರಸಾರ್ ಕೆಲ್ಯಾಂತ್. ಹೊ ಕವಿತಾದಾಳೊ ಹಾಂವೆ ತೀನ್ ಹಂತಾನಿ ತುಮ್ಚ್ಯಾ ಮುಕಾರ್ ದವರ್ತಾಂ.
ಪರತ್ ಪರತ್ - ಕೊಂಕ್ಣಿ ಭಾಸ್, ಸಂಸ್ಕ್ರತಿ, ಆನಿಂ ಸಾಹಿತ್ಯ್
ಹೊ ಕವಿತಾ ಪುಂಜೊ ಕೊಂಕ್ಣಿ ಭಾಸ್, ಸಂಸ್ಕ್ರತಿ ಆನಿ ಸಾಹಿತ್ಯಾಂತ್ ಏಕ್ ವಜ್ರಾಥಿಕ್ ಮ್ಹಣ್ ಸಾಂಗ್ಯೆತ್. ಅನಿಂ ತಾಕಾ ಕಸೊಲೊಚ್ ದುಭಾವ್ಚ್ ನಾ. ತಾಚ್ಯಾ ಪರತ್ ಪರತ್ ಕವಿತಾಂತ್ ಕವಿ ಜೊರ್ಜ್ ಪೀಂತ್ ಆಯ್ಕೊಳ್ ಆಶೆಂ ಸಾಂಗ್ತಾ:
ಪರತ್ ಪರತ್ ಕೊಂಕಣ್ ಧರ್ತೆರ್ ಜಲ್ಮಾತಾಲೊಂ
ಹಾಸಾತ್ ಹಾಸಾತ್ ಕೊಂಕಣ್ ಮಾತೆಕ್ ಜೀವ್ ದಿತಲೊಂ
ಕೊಂಕಣ್ ಮಾತೆಖಾತಿರ್ ಕೊಣಿ ಕಾಂಯ್ ಕರ್ಚೆಂ ನಾಂತ್ ಜಾಲ್ಯಾರಿ ಕೊಂಕಣ್ ಮಾತೆಕ್ ವಾವ್ರ್ ಕರ್ಚಾ ಸುಪುತ್ರಾಂಕ್ ಜೀವ್ ಕಾಡ್ಚೆ ಜಾಯ್ತೆ ಆಸಾತ್. ಕೊಣಿ ತರಿ ಕೊಂಕ್ಣಿ ಕಾತಿರ್ ವಾವ್ರ್ ಭೆಟಯ್ತಾನಾ, "ತಾಕಾ ಕಾಂಯ್ ಕಾಮ್ ನಾಯಾ, ತಾಚೆ ಕಡೆಂ ಪಯ್ಶೆ ಚಡ್ ಜಾಲ್ಯಾತ್ಯಾ, ತೊ ಕೊಂಕ್ಣಿಚ್ಯಾ ನಿಬಾರ್ ನಾಂವ್ ಕರುಂಕ್ ಪಳೆತಾಯಾ" ಮ್ಹಣೊನ್ ಸಾಂಗ್ಚೆ, ಕಾಪ್ಚೆ, ಕಾತ್ರುಂಚೆ ಯಾ ಪುರ್ಚೆ ಜಾಯ್ತೆ ಆಸಾತ್. ಹೆಂ ಪುರಾ ಕವಿ ಜೊರ್ಜಿ ಅನ್ಬೋಗ್ ಕರುನ್ ತೊ ಹಾಸತ್ ಹಾಸತ್ ಕೊಂಕಣ್ ಮಾತೆಕ್ ಜೀವ್ ದಿತಾಂ ಮ್ಹಣ್ ಬೊಬ್ ಮಾರ್ತಾ. ಆನಿಂ ಹ್ಯಾ ವಾವ್ರಾಕ್ ಆಪುಣ್ ಪರತ್ ಪರತ್ ಕೊಂಕಣ್ ಧರ್ತೆರ್ ಜಲ್ಮಾತಾಲೊಂ ಮ್ಹಳ್ಳೊ ತಾಚೊ ಆಶಾವಾದ್. ಆಶೆಂ ಸಾಂಗಾಜೆ ತರ್ ಕೊಂಕ್ಣಿ ಭಾಸ್, ಸಂಸ್ಕ್ರತಿ ಆನಿಂ ಸಾಹಿತ್ಯಾಚೊ ಖರೊ ಆನಿಂ ನಿಸ್ವಾರ್ಥ್ ಮೋಗ್ ಕರ್ಚ್ಯಾ ಜೊರ್ಜಿ ತಸಲ್ಯಾ ರೂಂದ್ ಆನಿ ವಿಶಾಲ್ ಕಾಳ್ಜಾಚಾ ಮ್ಹನ್ಶಾಂಕ್ ಸಾಂಗೊಂಕ್ ಫುಟ್ವಾತ್.
ಮಲ್ಘಾಡ್ಯಾಂಚೆ ಆಮ್ಚೆಂ ದಾಯ್ಜ್ ಕೊಂಕ್ಣಿ ಭಾಸ್, ಸಂಸ್ಕ್ರತಿ, ಆನಿಂ ಸಾಹಿತ್ಯ್ ಜೀವಾಳ್ ದವ್ರುಂಕ್ ಜಾಯ್ತ್ಯಾಂಕ್ ಮನ್ ಆಸಾ, ಉರ್ಭಾಯ್ ಆಸಾ. ತರಿ, ಪೊಟಾಚೊ ದಿಸ್ಪಡ್ತೊ ಗ್ರಾಸ್ ಆನಿಂ ಕುಟ್ಮಾಚೊ ತ್ರಾಸ್ ನಿಯಾಳ್ತಾನಾ ಆಮ್ಚೆಂ ಕಾಮ್ ಆನಿ ಆಶಾ ಮಧೆಂಗಾತ್ ಸದಾನೀತ್ ಗಲಾಟೊ ಜಾತಾ. ತಶೆಂಚ್ ಘಡ್ತಾ, ಜೊರ್ಜಿ ಪೀಂತ್ ಆಯ್ಕೋಳಾ ಥಂಯ್. ಕೊಂಕ್ಣೆಚಿ ಗ್ರೇಸ್ತ್ಕಾಯ್ ಜಾಣಾ ಆಸ್ಲ್ಲೊ ತರೀ ಕುಟ್ಮಾ ಖಾತಿರ್, ತೊ ಗಾಂವಾನ್ ಗಾಂವ್, ಪರ್ದೆಶಾಂತ್ ವಾವುರ್ತಾನಾ, ಕಂಯ್ ತರೀಯ್ ಪುಣಿ ಆಪ್ಣಾನ್ ಕೊಂಕ್ಣಿ ಖಾತಿರ್ ಉಣೆಂಪಣ್ ಕೆಲಾಂ ಮ್ಹಣೊನ್ ತೊ ತಾಚ್ಯಾ ’ವಾಟ್’ ಕವಿತಾಂತ್ ಚುರ್ಚುರ್ತಾ.
ಮೊಗಾಧಾರ್ ತುಜಿ ಹಾಂವೆಂ ಚಾಕ್ಲಿನಾ
ಅಮೃತಾಪಾನ್ ಕರ್ಚ್ಯಾಕ್ ಹಾಂವ್ ಶಿಕ್ಲೊಂ ನಾ
ಹಿಂ ’ವಾಟ್’ ಕವಿತೆಂತ್ಲಿ ಉತ್ರಾಂ. ಮುಖ್ಲಿ ವ್ಹೋಳ್ ಪಳೆಯಾ
ಪೋಟಾಗ್ರಾಸ್ ಜಿಣ್ಯೆತ್ರಾಸ್ ಚಡೊನ್ ವೆತಾನಾ
ಸಂಸ್ಕರಾಚಿ ಮೆಟಾಂ ತುಜಿ ಮನಿಂ ಉರ್ಲಿಂನಾಂತ್
ಘಳಾಯೆನ್ ತರಿ ಒಳ್ಕಾತಾಂಗೆ ಲಜ್ ನಾಸ್ತಾನಾ
ಪಾಂಯಾಮುಳಿಂ ಮಾತೆಂ ಥಾಂಬ್ತಾ ಉಸ್ವಾಸ್ ಆಸ್ತಾನಾ.
ಥೊಡ್ಯಾಂಕ್ ಮಾತ್ರ್ ಕೊಂಕ್ಣೆ ಖಾತಿರ್ ಸಗ್ಳೊ ವೇಳ್ ವಾವ್ರ್ ಕರ್ಯೆತ್, ಪೂಣ್ ಇಲ್ಲೊಸೊ ವೇಳ್ ಮೆಳ್ತಾನಾ ಪುಣಿ ಕೊಂಕ್ಣಿ ಮಾತೆ ಥಂಯ್, ತಿಚ್ಯಾ ಪಾಂಯಾ ಮುಳಿ ಮಾತೆಂ ಥಾಂಬ್ಚೆ, ಉಸ್ವಾಸ್ ಸೊಡ್ಚೆ ಕೋಣ್ ಆಸಾತ್? ಹಾಂಗಾಸರ್ ಘರಾಂನಿ ಕೊಂಕ್ಣಿ ಉಲೊಂವ್ಕ್ ವೇಳ್ ನಾತ್ಲ್ಲ್ಯಾ ಮ್ಹನ್ಶ್ಯಾಂಕ್ ಕೊಂಕ್ಣಿ ಮಾತೆಚೊ ಗಳೊ ಚಿರ್ಡುಂಚೆ ಧಾರಾಳ್ ವೇಳ್ ಮೆಳ್ತಾ ಆನಿಂ ಜಾಯ್ತೊ ಲೋಕ್ಯ್ ಮೆಳ್ತಾ.
ಜೊರ್ಜಿ ಪೀಂತ್ ಆಯ್ಕೊಳ್, ಕೊಂಕ್ಣಿ ಭಾಸ್ ಆನಿ ಸಾಹಿತ್ಯ್ ಹಾಂಚೊ ಮೋಗ್ ಕಾಳ್ಜಾಂತ್ ಭರೊನ್ ಹ್ಯಾ ದೊನೀ ಸಂಗ್ತೆಚ್ಯಾ ಉದರ್ಗತೆ ಖಾತಿರ್, ವಾವ್ರ್ ಕೆಲ್ಲೆಲೊ ಗೂಂಡ್ ಚಿಂತ್ಪಾಚೊ ವ್ಯಕ್ತಿ. ತೊ ಕೊಂಕ್ಣೆಖಾತಿರ್ ಮೆಳ್ಳೆಲೆಂ ಏಕ್ ದೆಣೆಂಚ್ ಸಯ್. ಹ್ಯಾ ಕವಿತಾ ಪುಂಜೊಂತ್ ’ನಮಾನ್’ ಕವಿತಾ ವಾಚ್ತಾನಾ ಕೊಂಕ್ಣಿ ಭಾಸ್, ಸಂಸ್ಕೃತಿ ಕಶಿ ಉಬ್ಜಾಲಿ, ಕಶಿ ವಾಡ್ಲಿ, ಖಂಚ್ಯಾ ಥರಾಂಚ್ಯಾ ಆನ್ವಾರಾಂ ಮಧೆಂ ಶಿರ್ಕಾಲಿ ಆನಿಂ ಆತಾಂ ತಿಚಿ ಪರಿಗತ್ ಕಸಲಿಗಿ ಮ್ಹಣ್ ತೊ ಭೋವ್ ಸೊಭಿತ್ ಉತ್ರಾನಿಂ ವರ್ಣಿತಾ. ಕೊಂಕ್ಣಿ ಬಾಶೆಚಿಂ ವಿವಿಧ್ ಭುರ್ಗಿಂ ಮ್ಹಣ್ಜೆ, ಗೊಂಯ್ಚಿ, ಮಂಗ್ಳುರಿ, ನವಾಯಿತ್, ಸಾರಾಸ್ವಾತ್, ಸಿದ್ದಿ, ಕುಡ್ಮಿಂ ಹಿಂ ಸರ್ವ್ ಕಶಿಂ ಆಸಾತ್, ಆನಿಂ ತಾಂಚೆ ಮದೆ ಆಸ್ಚೆ ವ್ಯತ್ಯಾಸ್, ಭಾಸ್ ವಿವಾದ್, ಲಿಪಿ/ಬೊಲಿಚೊ ವಿವಾದ್, ಧರ್ಮಾಚೊ ಬಾಂದ್ಪಾಸ್ ತೊ ಸುಡಾಳ್ ಆನಿ ಖಡಕ್ಕ್ ಉತ್ರಾನಿಂ ದಾಕಯ್ತಾ. ಕುಡ್ಮಿಂ ಆನಿಂ ಸಿದ್ದಿ ಲೋಕ್ ವೊರೆ ವಿಂಗಡ್ ಜಿಯೆತಾತ್, ತಾಂಚೆ ಮಧೆಗಾತ್ ಕೊಂಕ್ಣಿ ಸಂಸ್ಕೃತಿ, ಬಾಸ್ ಜಿವಾಳ್ ಆಸ್ಲ್ಯಾರಿ, ತಾಂಕಾ ಅಪ್ಣಾಂವ್ಕ್ ಕೊಣೀಂ ಮುಕಾರ್ ಮೆಳೊಂಕ್ ಗೆಲ್ಯಾತ್ಗೀ ಸವಾಲ್ ಕರ್ತಾ. ಹ್ಯಾ ಕವಿತೆಂತ್ಲಿ ಉತ್ರಾಂ ಪಳೆಯಾ.
ರಾಯಾಳ್ ಆಸ್ರೊ ನಾತ್ಲೊ ತುಕಾ
ಆದಿಂ ಮಧೆಂ ಆತಾಂ
ಭಾಶೆ ಭಾಂದ್ ಸದಾಂಚ್ ಆಸಾ
ಕೊಣಾಕ್ ಕಿತ್ಯಾಕ್ ದಿಸಾನಾ?
ತುಟಾ ಫುಟಿನ್ ಅಸ್ಕತ್ ಜಾಲ್ಯಾಯ್
ಎಕ್ವಟ್ ಮಯ್ಪಾಸ್ ದಿಸಾನಾ
ವಾಂಟ್ಯಾ ಮಧೆಂಯ್ ಫಾಂಟೆ ಜಾತಾತ್
ಮನ್ಶಾ ದುಸ್ವಾಸ್ ಸುಟಾನಾ
ಏಕಾ ಥರಾಚೆ ದುಃಖಾಚೆಂ ಗೀತ್ ಗಾಯ್ತಾ.
’ಮುಳಾಂ’ ಕವಿತಾ ವಾಚ್ತಾನಾ ಕೊಂಕ್ಣಿ ಪಿಳ್ಗೆಚಿ ಆಪುಟ್ಟ್ ಗ್ರೇಸ್ತ್ಕಾಯ್ ಮೆಳ್ತಾ. ಸಾತ್ ಹಾಜಾರ್ ವರ್ಸಾಚಿಂ ಚರಿತ್ರಾ ಆಸ್ಚಿ ಕೊಂಕ್ಣಿ ಭುರ್ಗಿಂ ಆಪ್ಲಿ ಮುಳಾಂ ವಿಸ್ರಾಲ್ಯಾ ಮ್ಹಣ್ ರಡ್ತಾ. ಹಾಚ್ಯಾಕೀ ವರ್ತೆಂ ಕೊಂಕ್ಣೆಕ್ ದುರ್ಬಾಗ್ಪಣ್ ಆಸಾಗಿ? ಹಾಂತ್ಲಿ ಥೊಡಿ ಉತ್ರಾಂ ಆಶಿಂ:
ಕಾಳಾರೋದ್ ಘುಂವೊಂಕ್ ಲಾಗ್ಲೆಂ
ಪರ್ಜೆ ಮದ್ಲೆ ಶಿಕ್ಪಿ ಜಾಲೆ
ಜೊಡಿ ಖಾತಿರ್ ಗಾಂವ್ ಭಂವ್ಲೆ
ಮುಳಾಕ್ ಆಪ್ಲ್ಯಾ ವಿಸ್ರೊಂಕ್ ಲಾಗ್ಲೆ
ವಿದೆಶಾಚೆಂ ವಾರೆಂ ವ್ಹಾಳ್ಳೆಂ
ಕೊಂಕ್ಣಿ ದಾಯ್ಜ್ ವಿಸ್ರೊಂಕ್ ಲಾಗ್ಲೆ
ಜೊಡಿ ದುಡ್ವಾ ಆಶಾ ಚಡ್ಲಿ
ರೀತ್ ರಿವಾಜ್ ಕೊನ್ಶಾಕ್ ಪಡ್ಲಿ
ಸಾತ್ ಹಜಾರ್ ವರ್ಸಾಂ ಆದ್ಲೆಂ
ಮೂಳ್ ಆಪ್ಲ್ಯೆ ಚರಿತ್ರೆಚೆಂ
ಪರ್ಜೆನ್ ಆಯ್ಚ್ಯಾ ವಿಸ್ರೊನ್ ವೆಚೆಂ
ಕೆದೆಂ ದುರ್ಬಾಗ್ ಕೊಂಕಣೆಚೆಂ
ಕೊಂಕ್ಣಿ ಭಾಶೆಕ್ ಬಾರಾತಾಚಾ ಸಂವಿಧಾನಾಚಾ ಆಟ್ವ್ಯಾ ವೊಳಿಂತ್ ಜಾಗೊ ಮೆಳೊನ್ ಭಾರಾ ತೆರಾ ವರ್ಸಾಂ ಜಾಲ್ಯಾರೀ ಕೊಂಕ್ಣೆಚ್ಯಾ ಅಭಿವೃದ್ದೆಖಾತಿರ್ ವಿಶೆಷ್ ಮೆಟಾಂ ಕಾಡ್ಲ್ಲಿಂ ಝಳ್ಕಾನಾಂತ್. ತೆಂಚ್ ಆದ್ಲೆಂ ಲಿಪಿ/ಬೊಲಿಚೆಂ ತೆಂತೆಸಾಂವ್ ಆಜೂನ್ ಜೀವ್ ಆಸಾ. ಕೊಂಕ್ಣಿ ಭಾಸ್ ಆಶಿ ಆಸಾಜೆ, ತಶಿ ಆಸಾಜೆ ಮ್ಹಣೊನ್ ಪುಲ್ಪೊತ್ರಿರ್ ರಾವುನ್ ಶೆರ್ಮಾಂವ್ ಗಾಜೊಂವ್ಚೆ ಜಾಯ್ತೆ ಆಸಾತ್.
ಆಶೆಂ ಜಾಲ್ಯಾನ್ ಕೊಂಕ್ಣಿ ಭಾಸ್, ಸಂಸ್ಕೃತಿ ಆಸ್ಕತ್ ಜಾವ್ನ್ ಆನಿ ಆಲ್ಪೊನ್ ಯೆತಾ ತಶೆಂ ಕವಿ ಜೊರ್ಜ್ಯಾಬಾಕ್ ಭಗ್ತಾಲೆಂ ಆನಿಂ ಹೆಂ ಆಪುಟ್ಟ್ ಸತ್. ತೊ ತಾಚ್ಯಾ ’ತಫಾವತ್’ ಕವಿತಾಂತ್ ಭಾಶೆಚ್ಯಾ ಅಬಿವೃದ್ದಿಚ್ಯಾ ನಾಂವಾನ್ ನಾಂವ್ ಜೊಡುಂಕ್ ಪ್ರಯತ್ನ್ ಕರ್ಚ್ಯಾ ಲೊಕಾಂಕ್ ತೊ ವ್ಯಂಗ್ ಥರಾನ್ ಬೆಂಡ್ತಾ. ಕೊಂಕ್ಣಿ ಮಾತೆಕ್ ಏಕಾ ವ್ಹಡ್ಲಿಮಾಂಯ್ಕ್ ಸರಿ ಕರುನ್ ತಿಕಾ ಅಸ್ಕತ್ಕಾಯೆಚಿ ಪಿಡಾ ಲಾಗ್ಲ್ಯಾ ಮ್ಹಣ್ ಸಾಂಗ್ತಾ. ಹ್ಯಾ ತಿಚ್ಯಾ ಪಿಡೆ ವೆಳಾರ್, ಥೊಡ್ಯಾ ಭುರ್ಗ್ಯಾಂಕ್ ತಿಚ್ಯಾ ಸುರುಪಾಯೆಚೆ ಖಂತ್ ಜಾಲ್ಯಾರ್, ಪುತಾಂಕ್ ತಿಚ್ಯಾ ನೆಸ್ಪಾಚಿ ಖಂತ್, ಧುವಾಂಕ್ ತಿಚ್ಯಾ ಸುಕ್ಯಾ ಕಾತಿಚಿ ಖಂತ್. ಸುನೊ ಪ್ಲ್ಯಾಸ್ಟಿಕ್ ಸರ್ಜನಾಕ್ ತುರ್ತಾನ್ ಅಪಯ್ತಾತ್. ಏಕಾ ಪುತಾನ್ ರಸ್ಮಾಚೆಂ ಕಾಪಾಡ್ ಹಾಡ್ತಾನಾ, ಆನ್ಯೆಕ್ಲೊ ಫೆಶಾನಾಚಿ ಬಾಜು ಶಿಂವೊಂಕ್ ದರ್ಜಿಕ್ ಆಪಯ್ಲಾಂ. ಭುರ್ಗಿಂಚ್ ಅಶೆಂ ಕರ್ತಾನಾ, ನಾತ್ರಾಂ ಆನಿಂ ಮುಕ್ಲಿ ಪಿಳ್ಗಿ ಕಿತೆಂ ಕರಿನಾಕಾ? ದೆದೆಸ್ಪೊರ್ ಜಾಲ್ಲೊ ಕವಿ ಅಶೆಂ ಬೊಬಾಟ್ತಾ.
ಕೊಂಕ್ಣಿ ಮಾಂಯ್ಚಿ ಪಿಡಾ ಸಾಯ್ಬಾ ಅಸ್ಕತ್ಕಾಯೆಚಿ
ನಿತ್ರಾಣೆನ್ ಪ್ರಾಣ್ ಉಭೊನ್ ಮೊರೊನ್ ವೆಚಿ
ಗರ್ಜ್ ಆಮಿ ಪಯ್ಲೆಂ ತಿಕಾ ಜಿವಿ ಉರೊಂವ್ಚಿ
ವಾಂಚೊನ್ ಉರೊಂ ಅವಯ್ ಆಮ್ಚಿ ಸುಕ್ಯೆ ಕಾತಿಚಿ
ಪರತ್ ಪರತ್ ಆನಿಂ ಕೊಂಕ್ಣಿ ಮಾಂಯ್ಗಾವ್
ಪರತ್ ಪರತ್ ಕವಿತಾ ಪುಂಜೊಂತ್ ಕವಿ ಜೊರ್ಜಿ ಪೀಂತ್ ಆಯ್ಕೊಳ್ ಆಪ್ಲ್ಯಾ ಮಾಂಯ್ ಗಾಂವ್ಚಿ ವಿವರಣ್ ಭೋವ್ ಸಂಪ್ಯಾ ಉತ್ರಾನಿಂ ವರ್ಣುಂಕ್ ಪ್ರಯತ್ನ್ ಕೆಲಾಂ. ಸಾದ್ಯಾ ಲೊಕಾಚಿಂ ರೂಚ್, ಮ್ಹಣ್ಜೆ, ಲೊಣ್ಚೆಂ, ಅಂಬಿಲ್, ಪೇಜ್, ತಾಕ್ ತಶೆಂಚ್ ಮಾಂಯ್ಗಾವಾಂತ್ ಮೆಳ್ಚಿಂ ಫಳ್ ವಸ್ತು ಪಣಸ್, ಅಣಸ್, ಬೆಣಸ್, ಜಾಂಬ್ಳಾ, ಕಾಜು, ಬಿಂಡಾ ಆನಿಂ ಸಾಂಪೆರಾಂ ತಶೆಂಚ್, ಸಾಳ್ಕಾಂ, ದಸ್ಮಿ ಫುಲ್, ಇತ್ಯಾದಿ ಸಬ್ದಾಂನಿ ಲಿಖುನ್ ಮಾಂಯ್ಗಾಂವ್ಚಿ ಖರಿ ವಳೊಕ್ ಸ್ಪಷ್ಟ್ ರಿತಿನ್ ಪಿಂತ್ರಾಯ್ತಾ. ಅಶೆಂ ತೊ ತಾಚಾಚ್ ಗಾಂವಾಕ್ ಸರ್ಗಾಕ್ ಸರಿ ಕರ್ತಾ ಆನಿಂ ಗಾವಾಂತ್ಲೆಂ ಸುಖ್ ಸರ್ಗಾಸುಖ್ ಮ್ಹಣ್ ’ಸರ್ಗಾಸುಖ್’ ಕವಿತಾಂತ್ ಸಾಂಗ್ತಾ.
ಸೊಬಿತ್ ಮ್ಹಜೊ ಗಾಂವ್
ಕಷ್ಟಾ ದುಃಖಾಂತ್ ಹಾಂಗಾ
ಸರ್ಗ್ ದೆಕ್ತಾಲೊಂ ಹಾಂವ್
ಆಪ್ಲ್ಯಾ ಗಾಂವಾಂಕ್ ಸರ್ಗಾಕ್ ಸರಿ ಕರುನ್ ಕುಪಾಂ ವಯ್ರ್ಚ್ ಲಿಪೊನ್ ದವರಿನಾ ಯಾ ಚಣ್ಯಾ ರುಕಾರ್ ಬೊಸಯ್ನಾ. ಮ್ಹಣ್ಜೆ ಮಾಂಯ್ ಗಾಂವ್ಚಿ ಪಟ್ಕಿರಿ ಹೊಗ್ಳಿಕಾಯ್ ಸಾಂಗಿನಾ. ಗಾಂವ್ಚೊ ಲೋಕ್ ಕೊಂಕ್ಣಿ ಬಾಸ್, ಸಂಸ್ಕೃತಿ ಸೊಡುನ್, ಪಿಂರ್ಗಿ ಬಾಸ್, ಪಿಂರ್ಗಿ ಸಂಸ್ಕೃತಿ ಆಪ್ಣಾಯ್ತಾನಾ ತಶೆಂಚ್ ದುಡ್ವಾಚ್ಯಾ ಪಾಟ್ಲ್ಯಾನ್ ವಚೊನ್ ಗಾಂವ್ಚಿ ನೈತಿಕ್ ಮೊಲಾಂ ನಪೈಂಚ್ ಜಾತಾನಾ, ಗಾಂವಾಂತ್ ಜಾಲ್ಲಿ ಬದ್ಲಾವಣ್ ಪೊಳೆವ್ನ್ ತೊ ’ಹೊ ಮ್ಹಜೊ ಗಾಂವ್ ನಂಯ್’ ಮ್ಹಣ್ ಸಾಂಗ್ತಾ. ಪಯ್ಲೆ ಸಾಂಗ್ಲ್ಲೆ ಬರಿಂ, ಕವಿ ಪೊಟಾ ಗ್ರಾಸಾ ಖಾತಿರ್ ಗಾಂವ್ ಬೊಂವೊನ್, ಪಾಟಿ ಗಾವಾಂಕ್ ಯೆತಾನಾ, ಗಾಂವಾಂತ್ ಜಾಲ್ಲಿ ಬದ್ಲಾವಣ್ ಪಳೆವ್ನ್ ಕವಿ ವಿಜ್ಮಿತ್ ಪಾವ್ತಾ. ಹೆಂ ತಾಚ್ಯಾ ಹೊ ಮ್ಹಜೊ ಗಾಂವ್ ನಂಯ್ ಆನಿಂ ಗಾಂವ್ ಮ್ಹಜೊ ನಂಯ್ ಕವಿತಾನಿ ವಾಚುಂಕ್ ಮೆಳ್ತಾ.
ಮಾನಾ ಪಾಲಂವ್ ನಿಸ್ರೊನ್ ಗೆಲಾ
ದಾದ್ಲೊ ಸೊರ್ಯಾ ಘಾಣೆನ್ ಭರ್ಲಾ
ಸುತಾ ನೀಟ್ ಲೋಕ್ ಮ್ಹಜೊ
ಆಜ್ ಖಂಯ್ ಪಾವ್ಲಾ
ಹಿಂ ’ಹೊ ಮ್ಹಜೊ ಗಾಂವ್ ನಂಯ್ ಕವಿತೆಂತ್ಲಿ ಉತ್ರಾಂ’.
ಕಾಪ್ಡಾಚೊ ಪಾಲಂವ್ ಕಶೆಂ ಏಕಾ ಸ್ತ್ರಿಯಚೊ ಮಾನ್ ರಾಕ್ತಾಗಿ, ತಶೆಂಚ್ ತಸೊಲೊಚ್ ಗಾಂವ್ಚೊ ಮಾನಾಚೊ ಪಾಲಂವ್ ನಿಸ್ರೊನ್ ಗೆಲಾ, ಮ್ಹಣ್ಜೆ ಲೊಕಾಚೆಂ ಖರ್ಯಾಮಸ್ತೆನ್ ಗಾಂವ್ಚಿ ವ್ಹಡ್ವಿಕಾಯ್ ಹೊಗ್ಡಾವ್ನ್ ಗೆಲ್ಯಾ.
ಹಾಚೆಲಾಗಿಂ ವಿಶ್ವಾಸ್ ನಾ
ತಾಚೆಲಾಗಿಂ ಮಯ್ಪಾಸ್ ನಾ
ಎಕಾಮೆಕಾಕ್ ಧರ್ನ್ ಖಾತಾತ್
ಸೊಡ್ ದೊಡಿಚಿ ಸಾಯ್ ನಾ
ಹುಸ್ಕೊ ಮ್ಹಳ್ಳೊ ದಿಸಾಚ್ ನಾ
ಹೊ ನಂಯ್ ಮ್ಹಜೊ ಗಾಂವ್.
ಹಿಂ ’ಮ್ಹಜೊ ಗಾಂವ್ ನಂಯ್’ ಕವಿತೆಂತ್ಲಿ ಉತ್ರಾಂ
ಬದ್ಲೊನ್ ವೆಚಿ ಸಂಸ್ಕೃತೆಕ್ ನಾಗ್ಡಿ ಕರ್ಚೆಂ ಚಿಂತಾಪ್ ತಾಚ್ಯಾ ಜಾಯ್ತ್ಯಾ ಕವಿತಾನಿ ವಾಳೊನ್ ಯೆತಾ. ’ಸೆಜಾರ್ನಿಚೆಂ ಸುಣೆಂ’ ಕವಿತೆಂತ್ ದುಡು ಇತ್ಲ್ಯಾ ಜೊರಾನ್ ಬೊಬೊ ಘಾಲ್ತಾಕೀ ದುಡು ಆಸ್ಚ್ಯಾಂಚೆ ಸುಣೆಂ ಸಯ್ತ್ ಮನ್ಶಾ ಮುಕಾರ್ ಊಂಚ್ ಕಶೆ ಜಾತಾ ಮ್ಹಳ್ಳೆಂ ಭೊವ್ ಅಪುರ್ಬಾಯೆನ್ ತೊ ಸಾಂಗ್ತಾ. ಆಖ್ರೇಕ್ ದೆವಾಲಾಗಿಂ ’ಯೆಂವ್ಚ್ಯಾ ಜಿಣ್ಯೆಂತ್ ಮ್ಹಕಾ ಎಕ್ಚ್ ಪೊಯ್ಶೆವಂತ್ ಮನಿಸ್ ಕರ್ ಯಾ ತಾಂಚೆ ಸುಣೆಂ ಕರ್ ಮ್ಹಣೊನ್’ ಮಾಗ್ತಾ.
’ನತಾಲ್’ ಕವಿತಾಂತ್ ಹಾಚಿ ಪಿರ್ಗೊಂವ್ಣ್ ಕಠೀನ್ ಬೇಜಾರಾಯ್ ಹಾಡ್ತಾ- ಕಶೆಂ ನತಾಲ್ ಆಸ್ಲ್ಲೆಂ, ವೆಳಾಚಿ ರೊದಾಂ ಘುಂವ್ಲ್ಲೆಬರಿ ಬದ್ಲೊನ್ ಕಶೆಂ ವೆತಾ, ಕಶಿ ಸಂಸ್ಕ್ರತಿ ಕುರ್ವೊನ್, ಕರ್ಪೊನ್, ಬಾಜೊನ್, ಕರ್ಗೊನ್ ವೆತಾ ಮ್ಹಳ್ಳೆಂ ತೊ ಸೊಬಿತ್ ರಿತಿನ್ ಸಾಂಗ್ತಾ.
ತಾಚಿ ’ಮಿಸ್ತೆರ್’ ಕವಿತಾ ವಾಚ್ತಾನಾ ಪ್ರಾಯ್ವಂತ್ ಮಲ್ಘಾಡ್ಯಾ ಆನಿಂ ತಾಂಚ್ಯಾ ಇಂಗ್ಲೀಶ್ ಬುರ್ಗಿಂ ಆನಿಂ ನಾತ್ರಾಂ ಮಧೆಂ ಆಸ್ಚೊ ಸಂಬಂಧ್ ಬೋವ್ ವ್ಯಂಗ್ ಥರಾನ್ ತರೀ ಅಪುಟ್ಟ್ ಸತ್ ಜಾವ್ನ್ ವರ್ಣಿತಾ. ಮೊರ್ಚ್ಯಾ ವಡ್ಲಿಮಾಂಯ್ಕ್ ಅಂಬಿಲ್ ಖಾಂವ್ಚಿ ಆಶಾ ಜಾತಾನಾ, ಘರಾಂತ್ ಆಸ್ಲ್ಲ್ಯಾ ಸಕ್ಡಾಂಕಿ ’ಅಂಬಿಲ್’ ಹಾಚೊ ಮಿಸ್ತೆರ್ಚ್ ಜಾತಾ. ಕೊಣಾಕೀ ಇಲ್ಲೊ ನಾತ್ನೊ ವಾಟುನ್ ಉಕ್ಡೊನ್ ತಿಚಿ ಆಶಾ ಜಾರಿ ಕರಿಜೆ ಮ್ಹಳ್ಳೆಂ ಜಳ್ಕಾನಾ. ಬದ್ಲಾಕ್ ಏಕ್ ನಾತು ಡಿಕ್ಶೆನರಿಂತ್ ಅಂಬಿಲ್ ಉಸ್ತಿತಾ ಜಾಲ್ಯಾರ್, ನಾತ್ ಇಂಟೆರ್ನೆಟಾರ್ ಸಸ್ಪಾತಾ. ಸುನ್ ಸುಪರ್ ಮಾರ್ಕೆಟಿಂತ್ ಭಂವ್ತಾಂ ಜಾಲ್ಯಾರ್ ಪೂತ್ ಫೊನಾ ವಯ್ರ್ ಫೊನಾಂ ಕರ್ತಾನಾ, ಹೆವ್ಶಿನ್ ಮಾತಾರಿಚೊ ಜೀವ್ ಆಶಾ ಜಾರಿ ಜಾಯ್ನಾಸ್ತಾನಾಂಚ್ ಪ್ರಾಣ್ ತುಟ್ತಾ.
ಪರತ್ ಪರತ್ ಆನಿಂ ಮೋಗಾಚಿ ಕವಿತಾ ಮ್ಹಜ್ಯಾ ಪ್ರಕಾರ್ ಹೊ ಕವಿತಾ ಪುಂಜೊ ಹರ್ಯೆಕಾ ಮೊಗಿನಿಂ ಎಕಾಮೆಕಾಚ್ಯಾ ಉಸ್ಕ್ಯಾರ್, ವೆಂಗೆಂತ್ ಖೆಳ್ಚ್ಯಾ ವೆಳಾರ್ ಹ್ಯಾ ಕವಿತಾ ಝೆಲ್ಯಾಂತ್ಲಿ ಥೊಡಿಂ ಕವಿತಾ ಪರ್ಮಳ್ ಚಾಕಿಜಯಿಚ್ಚ್.
ಮೊಗಾ ಕವಿತಾಂತ್ಲೊ ಕವಿ ದುಬ್ಳೊ. ಕೆದಾಳಾಯ್ ಕವಿಚ್ಯಾ ಬೊಲ್ಸಾಂತ್ ಪಯ್ಶೆನಾಂತ್. ತೊ ತೆಂಕ್ಡಿ ಘೆವುನ್ ಚೆಡ್ವಾಕ್ ಬಿಂಡಾ ಕಾಡುಂಕ್ ಆಪಯ್ತಾ, ವ್ಹಾಳಾ ದೆಗೆರ್, ಗಾದ್ಯಾ ಮೆರೆರ್ ತೊ ತಾಚ್ಯಾ ಪ್ರೆಮಿಕಾಕ್ ಅಪಯ್ತೆಚ್ ಆಸ್ತಾ. ಹಾತಾಂತ್ ಕಾಂಯ್ ’ರುವಿ ಯಾ ಕಾಸ್’ ಮೆಳ್ಳ್ಯಾರ್ ಪೆಸ್ತಾಸಾಂತೆಕ್ ಯಾ ಮ್ಹಣ್ ಚೆಡ್ವಾಕ್ ಸಾಂಗ್ತಾ. ಫೆಸ್ತಾ ಸಾಂತೆಕ್ ಯಾಗೊ ಚೆಡ್ವಾ ಹಿ ಕವಿತಾ ಪದಾ ರುಪಾರ್ ಮಾಂಡ್ ಸೊಭಣಾಚಾ ’ಕಾಳ್ಜಾ ಗಾಜ್’ ಕೊವ್ಳೆಂತ್ ಆಯ್ಕವ್ಯೆತ್.
ಮೊಗಾ ಕವಿತೆಂತ್ಲೊ ಕವಿ ಪಯ್ಶ್ಯಾನಿ ದುಬ್ಳೊ ತರಿ ತಾಚೆಂ ಮೊಗಾಚೆಂ ಚಿಂತಾಪ್ ನೀತಳ್ ಆನಿ ನಿಸ್ಕಳ್. ದೆಖ್ಲೆಂ ತುಕಾ ಕವಿತಾಂತ್ ಕವಿ ತಾಚೊ ಬೋವ್ ಗೂಂಡ್ ಮೊಗ್ ದಾಖಯ್ತಾ. ಪುನ್ವೆರಾತಿಂಯ್ ಪ್ರೇಮಿಕಾಕ್ ಪಳೆವ್ನ್ ಚಂದ್ರ್ಚ್ ದಿಸಾನಾ, ತಾರಾಂಯ್ ದಿಸಾನಾ. ಹಿ ಜಾವ್ನಾಸಾ ತಾಚಾ ಮೊಗಾಚಿ ಗ್ರೇಸ್ತ್ಕಾಯ್.
ಪುನ್ವೆರಾತಿ ದೆಖ್ಲೆಂ ತುಕಾ
ಚಂದ್ರ್ ಕಿತ್ಯಾಕ್ ದಿಸಾನಾ
ತಾರಾಂ ಸಗ್ಳಿಂ ಗಯ್ರಿಂ ಜಾಲ್ಯಾಂತ್
ಸುಕುರ್ ಲೆಗುನ್ ಉದೆನಾ
ಜಿಣಿಯೆಂತ್ ಕೊಡ್ಸಾಣ್ಚ್ ಚಾಕ್ಲ್ಲೊ ಕವಿ ಜೊರ್ಜ್ಯಾಬ್, ಕಾಂಯ್ ಇಲ್ಲೆಂ ಬರೆಂ ಮೆಳ್ತಾನಾ ತೆಂ ಗೊಡ್ಸಾಣ್ಚ್ ಲಾಗ್ತಾ. ತೆಂ ಗೊಡ್ಸಾಣ್ಯ್ ಮೆಳುಂಕ್ ನಾ ಮ್ಹಣ್ ತಾಚ್ಯಾ ಚಡವತ್ ಮೊಗಾ ಕವಿತಾಂ ದಿಸೊನ್ ಯೆತಾ. ’ವಿಸರ್’ ಕವಿತಾಂತ್ ಕಾಜಾರಾ ಮಾಟ್ವಾಂತ್ ಚೊರ್ಯಾಂ ದಿಶ್ಟೆನ್, ಪಳೆಲ್ಲ್ಯಾ ಏಕಾ ಚೆಡ್ವಾಚೆರ್, ಕವಿ ಶೆರ್ಮೆಲಾ, ಚೆಡ್ವಾಕ್ ಬಿಂಡಾ ಕಾಡ್ನ್ ದೀಂವ್ಕ್ ಆಶೆಲಾ. ಪೂಣ್ ತೆಂ ಯೆನಾತ್ಲ್ಲೆಂ ಪಳೆವ್ನ್ ತೊ ರಡ್ಲಾ ಕಡ್ಲಾ.
ತಾಚ್ಯಾ ಮೊಗಾ ಕವಿತಾಂತ್ ಕವಿ ಥಾವ್ನ್ ಮಾತ್ರ್ ಮೋಗ್ ದಿಸೊನ್ ಯೆತಾ, ಪುಣ್ ತಾಚ್ಯಾ ಪ್ರೆಮಿಕಾ ಥಾವ್ನ್ ಜವಾಬ್ ಮೆಳ್ಚಿ ದಿಸಾನಾ, ತೊ ಕೆದ್ನಾಯ್ ತಾಚಿ ವಾಟ್ ರಾಕ್ತೆಚ್ ಆಸ್ತಾ. ’ಗೊಬೊರ್ ಕವಿತಾಂತ್ಲಿ ನಿರಾಶಿ ಉತ್ರಾಂ ಪಳೆಯಾಂ:
ಚಾಂಪಿ ಬಾವೊನ್ ಪರ್ಮಳ್ ಸುಕ್ಲಾ
ಬಿಂಡಾ ಪಿಕೊನ್ ಮಡ್ಡಿ ಜಾಲ್ಯಾಂತ್
ಹಾಂವ್ಗೊ ತುಕಾ ರಾಕುನ್ ರಾವ್ಲಾಂ
ಭಗ್ಣಾ ಮಾತ್ರ್ ಗೊಬೊರ್ ಜಾಲ್ಯಾಂತ್
ತೆಂಕ್ಡಿ ಘೆವ್ನ್ ರಾಕ್ತಾಂ ಚೆಡ್ವಾ
ಬಿಂಡಾ ಝಡೊನ್ ಗೆಲ್ಯಾಂತ್
ತುಜ್ಯೆ ವಾಟೆನ್ ತಿಳ್ತಾಂ ಚೆಡ್ವಾ
ಭರ್ತಾ ಅಂದ್ಕಾರ್ ದೊಳ್ಯಾಂಕ್
ಹಿಂ ’ವಿಸರ್’ ಕವಿತಾಂತ್ಲಿ ಉತ್ರಾಂ
ಮೋಗ್, ಮೋಗ್ ಮ್ಹಣೊನ್ ಮೊಗಾಚ್ಯಾ ಕುಡ್ಡ್ಯಾ ದೊಳ್ಯಾಂನಿ ಮಾತ್ರ್ ಪಳೆವ್ನ್, ತ್ಯಾಚ್ಚ್ ಮೊಗಾಚಾ ಪೊಟ್ಟು ಬಾಂಯ್ತ್ ಪಡೊನ್ ರಡ್ತೆಲ್ಯಾಂಕ್ ದಾಗ್ ಜಾವ್ನ್ ಜೊರ್ಜ್ಯಾಬಾಚಿ ’ಅಕ್ಕಲ್’ ಕವಿತಾ ಸತ್ ದಾಕಯ್ತಾ.
ದೋನ್ ಪಿಸೊಳಿಂ ಚಿಮ್ಣೆಕ್ ಆಶೆಲಿಂ
ಉಜ್ಯಾ ಜಿಬೆಕ್ ಝುಜ್
ಪಾಕಾಟೆ ಹೆವ್ಶಿಂ ತೆವ್ಶಿಂ
ಕರ್ಪತಾನಾ ಚಿಮ್ಣಿ ಪಾಲ್ವಾಲಿ
ಆತಾಂ ಕಾಳೊಕ್ ಮಧ್ಯಾನ್ಯಾಚೊ
ಹ್ಯಾ ಕವಿತಾ ಸಂಗ್ರಹಾಂತ್ ಶಿಕ್ಚೆಂ ತಸಲೆಂ ಲಿಸಾಂವ್ ಜಾಯ್ತೆಂ ಆಸಾ. ಮ್ಹಜ್ಯಾ ಪ್ರಕಾರ್ ಕೊಂಕ್ಣೆಚ್ಯಾ ಹರ್ಯೆಕಾ ಮೊಗಿನಿ ಹೊ ಕವಿತಾ ದಾಳೊ ವಾಚುನ್ ತಾಚಿ ಗೊಡ್ಸಾಣ್ ಚಾಕಿಜೆಚ್. ಹ್ಯಾ ಬುಕಾಂತ್ಲಿ ಕವಿತಾಚಿ ಗೂಂಡಾಯ್, ಗಂಬೀರ್ ಚಿಂತಾಪ್ ಪಳೆತಾನಾ ಕವಿ ಜೊರ್ಜ್ಯಾಬಾಕ್ ಜಿವಿತಾಂತ್ ಮೆಳ್ಳೆಲೊ ಅನ್ಬೊಗ್ ಜಾಯ್ತೊ ಮ್ಹಣ್ ಸ್ಪಶ್ಟ್ ಜಾತಾ.
ಜೋಮೆಲ್, ಬೊಂದೆಲ್
13 ಮಾಯ್ 2005
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
