ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಕವಿತಾ ಸಂಸಾರಾಂತ್ಲ್ಯೊ ರಂಗಾಳ್ ಝರಿ - ವಲ್ಲಿ ಕ್ವಾಡ್ರಸ್, ಅಜೆಕಾರ್
ಕವಿತಾ ಮ್ಹಳ್ಯಾರ್ ಕಿತೆಂ?
ಕವಿತಾಸಾಗೊರಾಂತ್ ಉಪೆಂವ್ಚಾ, ವಾಳ್ಚಾ, ಜಿಯೆಂವ್ಚಾಂಕ್ ಕಾಂಯ್ ಹೆಂ ಸವಾಲ್ ಪಿಶೆಂ ಮ್ಹಣ್ ಭೊಗೊಂಕ್ ಪುರೊ. ಅಪಾಪ್ಲೆ ಮತಿಚೆ ವಿಚಾರ್ ಅಪಾಪ್ಲೆ ಮತಿನ್ ಚಿಂತ್ಚೆಪರಿಂ, ಅಪಾಪ್ಲೆ ಶೈಲೆರ್ ಬರಂವ್ಚೆಂ ಜಾತಾ ಸಾಹಿತ್ಯ್. ಪುಣ್ ಹ್ಯಾ ಸಾಹಿತಿಂ ಪಯ್ಕಿಂತ್ಲೆ ಥೊಡೆ ಕಠೀಣ್ ಸ್ವಪ್ಣಾಂಗಾರ್, ಅಪ್ಲ್ಯಾ ಮತಿಂತ್ ತವಳ್ತವಳ್ ಉದೆವ್ನ್ ಯೆಂವ್ಚಿಂ ಕಲ್ಪನಾಂ, ಪಿಂತುರಾಂ ಧರುನ್, ತ್ಯಾ ಪಿಂತುರಾಂಕ್ ಇಮಾಜ್ಯೊ ಜಾವ್ನ್ ಬದ್ಲುನ್, ಅಪ್ಲ್ಯಾ ಬರ್ಪಾಂನಿ ಉಭ್ಯೊ ಕರ್ತಾನಾಂ ’ಕವಿತಾ’ ಮ್ಹಳ್ಯಾರ್ ತಾಂತಾಂಚೊಚ್ ಮ್ಹಳ್ಳೊ ಅರ್ಥ್ ದಿತಾತ್.
ಆನಿಂ ಹ್ಯಾ ಅರ್ಥಾಕ್ ಎಕಾ ಥಳಾರ್ ಹಾಡ್ಲೆಂ ತರ್ ಹಾಂಗಾಸರ್ ಉಭ್ಯೊ ಜಾತಾತ್ ವೆವೆಗ್ಳಿಂ ಪಿಂತುರಾಂ.
ಕಾಂಯ್ ತೆಂ ಪಿಂತುರ್ ಚಲಿ, ಪಿಸೊಳೆಂ, ಫುಲಾಂ.
ಜಾವ್ಯೆತ್ ತೆಂ ಪಿಂತುರ್ ಮನ್ಶಾಪಣ್ ಆನಿಂ ಮನ್ಶಾಪಣಾಚಿಂ ಮೊಲಾಂ.
ಜಾವ್ಯೆತ್ ತೆಂ ಪಿಂತುರ್ ತತ್ವಾಂ, ತರ್ಕಾಂ ಯಾ ವಾರ್ಜಿಕ್.
ಜಾವ್ಯೆತ್ ತೆಂ ಪಿಂತುರ್ ಭಗ್ಣಾಂಚಿ ಅಭಿವೆಕ್ತಿ - ಜಾಂವ್ ರಾಗ್, ಮೋಗ್, ವೆಂಗ್ಯ್, ಆಶಾ, ನಿರಾಶಾ
ಜಾವ್ಯೆತ್ ತೆಂ ಪಿಂತುರ್ ಸತ್, ಕಾಣಿ, ಗಿನ್ಯಾನ್ ಯಾ ಅವ್ಯಕ್ತ್ ಇಮಾಜ್ ಯಾ ಹೆರ್ ಕಿತೇಂಯ್ ಜಾಂವ್,
ಹಾಂಗಾಸರ್ ಸಮಸಮ್ ಅರ್ಥಾರ್ ಹಿಂ ಎಕಾಚ್ ಉತ್ರಾನ್ ಸಂಪ್ಣಿ ದಿಂವ್ಚಿ ತರ್ ಕವಿತಾ ಮ್ಹಳ್ಯಾರ್ ’ಕಲ್ಪನಾಂಚಿ ಅಭಿವ್ಯಕ್ತಿ ’ ಹೆಂಚ್ ಚಿಂತಾಪ್ ಆನಿ ಹೊಚ್ ಅರ್ಥ್ ಘೆವುನ್ ಹಾಂವ್, ಕೊಂಕ್ಣಿ ಕವಿತಾ ಸಂಸಾರಾಚೊ ಭಂವಾಡೊ ಕಾಡ್ತಾನಾ ಮ್ಹಾಕಾ ಪಳೆಂವ್ಕ್, ಪಾರ್ಕುಂಕ್, ಭೊಗುಂಕ್ ಮೆಳ್ಲ್ಲ್ಯಾ ಕವಿಂಕ್, ಉತ್ರಾಂನಿ ವೆಕ್ತ್ ಕರುಂಕ್ ಸಕಾಸೊನಾ ತರ್ಯ್ ಹ್ಯಾ ಸುಃಖಾಚಾ ಆಮಾಲಾರ್ ಕಾಂಯ್ ಮ್ಹಜಿ ದೀಶ್ಟ್ ಗಯ್ರಿ ಜಾವ್ನ್ ಮ್ಹಜಾ ದೊಳ್ಯಾಂಕ್ ದಿಸಾನಾಸ್ತಾಂಯ್ ಜಾಯ್ತೆಂ ಆಸಾ ಜಾವ್ಯೆತ್.
ಪಯ್ಲಿ ಕೊಂಕ್ಣಿ ಕವಿತಾ ಕೊಣೆ ಕಶಿ ಬರಯ್ಲಿ?
ಹ್ಯಾ ಸವಾಲಾಕ್ ಜಾಪ್, ಕೊಂಕ್ಣಿ ಸಾಹಿತ್ಯಾಚಾ ಖಂಚಾ ಬುಕಾಂತ್ ಆಸಾ ಮ್ಹಳ್ಳೆಂ ಹಾಂವ್ ನೆಣಾಂ. ತರ್ಯ್ ಮ್ಹಾಕಾ ಮಾತ್ರ್ ಎದೊಳ್ ಪರ್ಯಾಂಯ್ ಹ್ಯಾ ವಿಶಿಂ ವಾಚುಂಕ್ ಮೆಳೊಂಕ್ನಾ. ಪುಣ್ ಕೊಂಕ್ಣಿ ಸಾಹಿತ್ಯಾಚಿ ಸುರ್ವಾತ್, ಕೊಂಕ್ಣಿ ಪತ್ರಿಕೋಧ್ಯಮಾಚಿ ಸುರ್ವಾತ್ ಜಾಲ್ಲೆ ತವಳ್ ಥಾವ್ನ್ ಕೊಂಕ್ಣಿ ಕವಿತಾಚಿ ಸುರ್ವಾತ್ ಜಾಲಿ ಮ್ಹಳೆಂ ತರ್ ಕಾಂಯ್ ಚೂಕ್ ಜಾಂವ್ಚಿನಾ ಮ್ಹಳ್ಳಿ ಮ್ಹಜಿ ಪಾತ್ಯೆಣಿ ಜಾವ್ನಾಸಾ. ಹಾಂವ್ ಎದೊಳ್ ಪರ್ಯಾಂತ್ ಮ್ಹಜಾ ಮತಿನ್ ಸಮ್ಜೊನ್ ಘೆತ್ಲ್ಲ್ಯಾ ಕವಿ/ಕವಿತಾಂಕ್ ತೀನ್ - ಚಾರ್ ಪ್ರಮುಕ್ ವಿಭಾಗಾಂನಿ ದವರ್ತಾಂ; ಹೆಂ ಅಧ್ಯಯನ್ ಸಂಪ್ತಾಪರ್ಯಾಂತ್.
ಪಯ್ಲೊ- ಕೊಂಕ್ಣಿ ಕವಿತಾಂಚೊ ಸುರ್ವಿಲ್ಲೊ ಕಾಳ್ :
ಮ್ಹಳ್ಯಾರ್ ಕೊಂಕ್ಣಿ ಪತ್ರಿಕೋಧ್ಯಮಾಚಿ ಸುರ್ವಾತ್ ಜಾಲ್ಲೊ ಕಾಳ್ (ಮ್ಹಳ್ಯಾರ್ 1912 ಇಸ್ವೆ ಥಾವ್ನ್.) ವೇಳ್ಘಡಿ ಮ್ಹಳ್ಯಾರ್ ಪೋರ್, ಕಾಲ್, ಆಜ್ ಮಾತ್ರ್ - ಕಿತ್ಯಾಕ್ ಮ್ಹಳ್ಯಾರ್ ಫಾಲೆಂ ಮ್ಹಳ್ಯಾರ್ ಏಕ್ ಕಲ್ಪನ್, ಆನಿಂ ಕಲ್ಪನ್ ಏಕ್ ಮಿಸ್ತೆರ್ ಆನಿಂ ಮಿಸ್ತೆರ್ ಏಕ್ ಕವಿತಾ. ಕೊಂಕ್ಣಿ ಚರಿತೆಚಿಂ ಪಾನಾಂ ಉಸ್ತಿಲ್ಯಾರ್ ಥಂಯ್ಸರ್ ಉಟೊನ್ ದಿಸ್ಚಾ ಸಭಾರ್ ನಾಂವಾಂ ಪಯ್ಕಿ ದಾಟ್ ಅಕ್ಶರಾಂನಿ ದಿಸ್ತಾತ್ ನಾಂವಾ ಜಿಂ ಪ್ರಸ್ತುತ್ ಕಾಳಾರ್ ’ಅಮರ್’ ಜಾಲ್ಲಿಂ;
ದೆ|ಲುವಿಸ್ ಮಸ್ಕರೇನ್ಹಸ್ [ಅಬ್ರಹಾಂವ್ಚೆಂ ಯಜ್ನ್ದಾನ್ - ತೀನ್ ಛಾಪೆ]
ದೆ|ವಿ.ಜೆ.ಪಿ. ಸಲ್ಡಾನ್ಹ್
ದೆ|ಎ.ಟಿ.ಲೊಬೊ
ಚಿಂತಾಪ್ : ಹ್ಯಾ ಕಾಳಾಚಿಂ ಚಡ್ತಾವ್ ಕವಿತಾ ಭಕ್ತಿಪಣಾಚೆರ್, ಗುಂತ್ಲ್ಲಿಂ. ದೇವ್ ಧರ್ಮ್, ದೆವಾಚಿ ಮಹಿಮಾ, ಭಜನಾಂ, ಕೀರ್ತನಾಂ-ಶ್ಲೋಕಾಂ. ತಶೆಂ ಮ್ಹಣ್ ಹೆ ಸರ್ವ್ ಕವಿ ಫಕತ್ ದೆವಾಸ್ಪಣಾಚಿಂ ಕವಿತಾಂ ಲಿಖ್ತಾಲೆ ಮ್ಹಣ್ ನ್ಹಯ್. ಎ.ಟಿ.ಲೊಬೊಚೊ ಸಾಂಗ್ಣ್ಯೊ ಆನಿಂ ಶಾಯರಿ, ಗಜಲಾಂ ಹಾಕಾ ಸಾಕ್ಸ್. ವಿಜೆಪಿಚಾ ಬರ್ಪಾಂನಿ ಸಯ್ತ್ ಸಮಾಜಿಕ್ ಜವಾಬ್ದಾರೆಕ್ ಜಾಗಂವ್ಚಿ ಬೂದ್ಬಾಳ್ ಆಸ್ತಾಲಿ.
ಪುಣ್ ದೆ|ಲುವಿಸ್ ಮಸ್ಕರೇನ್ಹಸಾಚಿಂ ಕವಿತಾ ಕೊಂಕ್ಣಿ ಕವಿತಾ ಸಂಸಾರಾಕ್ ನವಿ ದಿಶಾ ದಿಂವ್ಚಾಕ್ ಕಾರಣ್ ಜಾಲಿ. ತಾಣೆಂ ಅಜಿಕ್ ಚಡುಣೆಂ ಸಾತಾಟ್ ದಾಕ್ಡ್ಯಾಧಿಂ ಬರಯಿಲ್ಲೊ ಧಾರ್ಮಿಕ್ ಕವಿತಾ ನಾಟಕ್ ’ಅಬ್ರಹಾಂವ್ಚೆಂ ಯಜ್ನ್ದಾನ್’ ಕೊಂಕ್ಣೆಂತ್ಲ್ಯಾ ಗ್ರೇಸ್ತ್ ಕವಿತಾಂ ಪಯ್ಕಿ ಏಕ್ ಮ್ಹಣ್ ಅಜೂನ್ ಮಾಂದ್ತಾತ್.
ದೆ|ಚಾ.ಫ್ರಾ.ದೆ’ಕೋಸ್ತಾ [ಸೊಂಶ್ಯಾಚೆ ಕಾನ್ - ದೋನ್ ಛಾಪೆ]
ಚಿಂತಾಪ್ : ಹ್ಯಾ ಕಾಳಾರ್ ಕೊಂಕ್ಣಿ ಕವಿತಾ ರುಕಾರ್ ನವ್ಯಾ ಚಿಂತ್ಪಾಚೆ ಫಾಂಟೆ ಉದೆಲೆ, ದೆವಾಚಿ ಭಕ್ತೆಶಿವಾಯ್ ಸಮಾಜಿಕ್ ಜವಾಬ್ದಾರೆಕ್, ಮಾತ್ರ್ ನ್ಹಯ್, ಕೊಂಕ್ಣಿ ಕವಿತಾಶೆತಾಂತ್ ಗೂಂಡ್ ಚಿಂತ್ಪಾಚೆಂ ಭಿಂ ವೊಂಪ್ಲೆಂ. ವ್ಯಂಗ್ಯ್ ಕವಿತಾಂನಿ ಸಮಾಜೆಚೆಂ ಕಸ್ತಳ್ ಉಸ್ತಿಲೆಂ, ಕೊಂಕ್ಣಿ ಸಾಹಿತಿಕ್ ಶೆತಾಕ್ ಹ್ಯಾ ಕವಿತಾಂನಿ ನವೆಂ ರೂಪ್ ದಿಲೆಂ. ಅಶೆಂ ಪಳೆಲ್ಯಾರ್ ಕೊಂಕ್ಣಿ ಕವಿತಾ ಶೆತಾಂಕ್ ನವೆಂ ರೂಪ್ ದಿಲ್ಲೊ ಪಯ್ಲೊ ಕವಿ ಚಾ.ಫ್ರಾ.ದೆ’ಕೋಸ್ತಾನ್. ಜಾವ್ಯೆತ್ ದೆ|ಲುವಿಸ್ ಮಸ್ಕರೇನ್ಹಸಾನ್ ಕೊಂಕ್ಣಿ ಕವಿತಾಂಕ್ ಗ್ರೇಸ್ತ್ ಕೆಲೆಂ.
ಪುಣ್ ಅಪ್ಲ್ಯಾ ಕವಿತೆಂನಿ ಬಂಡಾಯ್, ತಿಕ್ಸಾಣ್, ಖಾರ್ಸಾಣ್, ಮೊವ್ಸಾಣ್ ಭರ್ಲ್ಲೊ ಕವಿ ಚಾ.ಫ್ರಾ. "ಹಾಡ್ಕುಲೊಗೋ ಬುಡ್ಕುಲೊ ತೆಲಾ ತುಪಾಚೊ ಬಾಯೆಕ್ ಏಕ್ ಬಾಬು ಜಾಲಾ ಫಿಂರ್ಗಿ ರುಪಾಚೊ"
ಹೆಂ ಕವಿತಾ ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಏಕ್ ತುಫಾನ್ ಉಟಯಿಲ್ಲೆಂ ಕವಿತಾ ಮ್ಹಣ್ ಹಾವೆಂ ಆಯ್ಕಲಾಂ. ಜಾಯ್ತ್ಯಾಂನಿ ಕ್ಯಾ ಕವಿತೆಚೊ ಅರ್ಥ್ ಅಪಾರ್ಥ್ ಕೆಲ್ಲೊಯ್ ದಾಕ್ಲೊ ಆಸಾ. ತರ್ಯ್ ಹೆಂ ಕವಿತಾ ಅಪ್ಲ್ಯಾಚ್ ಸ್ಥಾನಾರ್ ಆಸೊನ್ ಅಜೂನ್ ಪರ್ಯಾಂತ್ ಕೊಂಕ್ಣಿ ಕವಿತಾ ಅಧ್ಯಯನ್ ಕರ್ಚಾಂಕ್ ಜಾಯ್ತಿ ಶಿಕವ್ಣ್ ದಿತೇ ಆಸಾ. ಹ್ಯಾ ಕವಿತಾಚೆರ್ ಪ್ರೇರಿತ್ ಜಾವ್ನ್ ಜಾಯ್ತ್ಯಾ ತರ್ನ್ಯಾ-ಪರ್ನ್ಯಾ ಕವಿಂನಿ ಕವಿತಾ ಘಡ್ಲ್ಯಾಂತ್. ಹೆಂ ಕವಿತಾಕ್ ಮಾಂಡ್ ಸೊಭಾಣ್ ಪಂಗ್ಡಾನ್ ತಾಳೆ ಬೊಸವ್ನ್ ಲೊಕಾಂ ಲೊಕಾಂಕ್ ಆಯ್ಕಾಶೆಂ ಕೆಲಾಂ.
"ಹಾಡ್ ಚೆಡ್ವಾ ಬುಡ್ಕುಲೊ ಲಕಯ್ ತಳ್ಯಾಂತ್ ಮ್ಹಜೆಂ ತುಜೆಂ ಉತಾರ್ ಜಾಲಾಂ ಕಾಚ್ಚಾ ಮುಳಾಂತ್"
ಹೆಂ ಕವಿತಾ ಕೊಂಕ್ಣೆಂತ್ಲೆಂ ಪಯ್ಲೆಂ ’ಬಂಡಾಯ್’ ಕವಿತಾ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್.
ಹೆಂ ಕವಿತಾ ಚಾ.ಫ್ರಾನ್ ಗೊಯಾಂತ್ ಜಾಲ್ಲ್ಯಾ ಎಕಾ ಕೊಂಕ್ಣಿ ಸಾಹಿತಿಕ್ ಪರಿಷದೆವೆಳಾರ್ ವಾಚುನ್ ಸಾಂಗ್ತಾನಾ ಲೋಕ್ ಪಿಸೊ ಜಾವ್ನ್ ನಾಚ್ತಾಲೊ, ಆನಿಂ ತಾಳಿಯೊ ಪೇಟುನ್ ಕುಕಾರ್ಯೊ ಘಾಲ್ತಾಲೊ ಮ್ಹಳ್ಳೆಂ ಹಾವೆಂ, ಥಂಯ್ಸರ್ ಹಾಜಯ್ ಆಸ್ಲ್ಲ್ಯಾಂ ಥಾವ್ನ್ ಆಯ್ಕಾಲಾಂ. ಚಾ.ಫ್ರಾ.ದೆ’ಕೋಸ್ತಾ ಏಕ್ ಪ್ರಭುದ್ದ್ ಸಾಹಿತಿ, ಏಕ್ ನಾಟಕಿಸ್ತ್ ಜಾವ್ನ್ ಫಾಮಾದ್ ಜಾಲೊ ತರ್ಯ್ ತೊ ಏಕ್ ಬರೊ ಕವಿ.
ಕೊಂಕ್ಣಿ ಕವಿತಾಂತ್ ತಾಣೆಂ ನವಾಲ್ ಘಡ್ಚಾಧಿಂ ಜಾಯ್ತೆಂ ಮರಾಟಿ, ಹಿಂದಿ ನಾಟಕ್, ಕವಿತಾ, ಸಾಹಿತ್ಯಾಕ್ ತೊ ಸಮ್ಜಾಲ್ಲೊ. ಆಪ್ಲ್ಯಾ ಶೀದಾ ಉತ್ರಾಂನಿ ತೊ ಜಾಯ್ತೆ ಪರ್ದೆ ಉಗ್ತೆ ಕರ್ತಾಲೊ ಆನಿಂ ಖರೆಂಚ್ ಜಾವ್ನ್ ತಾಕಾ ಜಾಯ್ತೆಂ ಸೊಸುಂಕ್-ಭೊಗುಂಕ್ ಮೆಳ್ಳೆಂ. ಜಿತ್ಲಿ ಪ್ರತಿಭಾ ತಾಕಾ ಆಸ್ಲ್ಲಿಗೀ ತಿತ್ಲೊ ಮಾನ್-ಸಮ್ಮಾನ್ ತಾಕಾ ಮೆಳ್ಲ್ಲೊಚ್ ನಾ.
ಉಪ್ರಾಂತ್ ಆಯಿಲ್ಲೊ ಕಾಳ್ ಸಾಹಿತಿ-ಕವಿಂಚೊ :
ಜಿ.ಎಮ್.ಬಿ ರೊಡ್ರಿಗಸ್,
ಜೆ.ಬಿ.ಮೊರಾಯಸ್ [ನವಿ ವೊಕಾಲ್, ಭಿತರ್ಲೆಂ ತುಫಾನ್, ಏಕ್ ದೇಂಟ್ ಆನಿ ಏಕ್ ಪಾನ್],
ಜೆ.ಬಿ.ಸಿಕ್ವೇರಾ [ಕಾಳ್ಜಾಚೆ ಉಮಾಳೆ, ಅಶಿಂ ಆಯ್ಲಿಂ ಲ್ಹಾರಾಂ],
ಸ್ವಾಮಿ ಸುಪ್ರಿಯಾ,
ಡಾ|ಎಡ್ವರ್ಡ್ ನೊರೊನ್ಹಾ,
ಸಿಜ್ಯೆಸ್ ತಾಕೊಡೆ [ಇಜ್ಮೊಲಾಚಿ ವಾಟ್ಲಿ],
ಕೊಂಕ್ಣಿ ಸಾಹಿತ್ಯಾಂತ್ ಜಾಲ್ಲಿ ಯಾ ಜಾವ್ನ್ ಆಸ್ಚಿ ಅನ್ಯೇಕ್ ದುರ್ಭಾಗ್ಪಣಾಚಿ ಗಜಾಲ್ ಖಂಯ್ಚಿಗೀ ಮ್ಹಳ್ಯಾರ್, ಚಡ್ತಾವ್ ಕವಿ-ಸಾಹಿತಿ ಆಪ್ಲ್ಯಾ ಬರ್ಪಾಂಕ್ ಬುಕಾರುಪಾರ್ ಛಾಪಿನಾಂತ್. ಪತ್ರಾಂಕ್ ಯಾ ಹೆರಾಂಕ್ಯ್ ಹ್ಯಾ ವಿಶ್ಯಾಂತ್ ಕಾಂಯ್ ಪಡೊನ್ ಗೆಲ್ಲೆಂನಾ. ತಾಚೊ ಪರಿಣಾಮ್ ಜಾವ್ನ್ ಸಭಾರ್ ಕವಿ-ಸಾಹಿತಿಂಚಾ ವಾವ್ರಾಚೊ ಉಲ್ಲೇಕ್ ಚಡ್ತಾವ್ ಜಣಾಂಕ್ ಕಳಿತ್ ಆಸಾನಾ. ದಾಕ್ಲೊ;
ಸ್ವಾಮಿ ಸುಪ್ರಿಯಾ ಹಾಂವ್ ಏಕ್ ವಿಧ್ಯಾರ್ಥಿ, ತಾಚಾ ಸಾಹಿತ್ಯಾಚೆಂ ಅಧ್ಯಯನ್ ಕರುಂಕ್ ಆಶೆತಾಂ ಮ್ಹಳ್ಯಾರ್, ತಾಚಾ ಸಾಹಿತ್ಯಾವಿಶ್ಯಾಂತ್ ಜಾಂವ್, ತಾಚಾ ವಾವ್ರಾವಿಶ್ಯಾಂತ್ ಜಾಂವ್ ಮ್ಹಾಕಾ ವಾಚುಂಕ್ ಎಕ್ಚ್ ಬೂಕ್ ಮೆಳ್ಲ್ಲೆ ನಾಂತ್. ಯಾ ಆಸ್ಚಾ ಬುಕಾಂಚೊ ಉಲ್ಲೇಕ್ ಮ್ಹಜಾ ಗುಮಾನಾಕ್ ಗೆಲ್ಲೆಂಚ್ ನಾ. ತಶೆಂಚ್ ಹೆರ್ ಥೊಡೆ ಕೊಂಕ್ಣೆಂತ್ಲೆ ಪ್ರತಿಭಾನ್ವಿತ್ ಕವಿ - ದಾಕ್ಲೊ ದೊ|ಎಡ್ವರ್ಡ್ ನೊರೊನ್ಹಾ ತಸಲೆ. ಹಾಂಚಾ ವಾವ್ರಾವಿಶ್ಯಾಂತ್, ಕವಿತಾವಿಶ್ಯಾಂತ್ ವಾಚುಂಕ್ ಮೆಳ್ಚೆಂ ಭಾರಿ ಅಪ್ರೂಪ್. ಸರ್ವಾಂನಿ ಸಾಹಿತ್ಯಾಂತ್ ಜಾಯ್ತೊ ವಾವ್ರ್ ಕೆಲಾ, ಆನಿಂ ಥೊಡೆ ಅಜೂನ್ ತೊ ವಾವ್ರ್ ಕರುನ್ಂಚ್ ಆಸಾತ್.
ಕೊಂಕ್ಣಿ ಕವಿತಾ ಶೆತಾಂತ್ ಜಾಲ್ಲಿ ಬರಿ ಸುರ್ವಾತ್ ಹಾಣಿಂ ಆನಿ ಥೊಡ್ಯಾಂನಿ ಮೆಳೊನ್ ಮುಖಾರುನ್ ವೆಲಿ. ಹಾಸ್ಯ್ ಕವಿತಾ, ವೆಂಗ್ಯ್ ಕವಿತಾ ವಿಡಂಬನಾತ್ಮಕ್ ರೂಪ್ ಘೆತ್ಲೆಂ ಆನಿಂ ಕೊಂಕ್ಣೆಂತ್ ಹಾಸ್ಯ್ ಕವಿತಾಂಕ್ ಸಯ್ತ್ ಏಕ್ ಸ್ಥಾನ್ ದಿಂವ್ಚಾಂತ್ ಪಿಡ್ವಾಜ್ ಆಪ್ಲ್ಯಾ ವಿಡಂಬನಾಂನಿ ತರ್ ಸಿಜ್ಯೆಸ್ ಅಪ್ಲ್ಯಾ ಕವಿತಾಂನಿ ಲೊಕಾಂಚೆ ಚಿಮ್ಟೆ ಕಾಡ್ತಾಲೊ.
ಹಾಂಚಾ ಕಾಳಾರ್ ತರ್ಯ್ ಥೊಡ್ಯಾಚ್ ವರ್ಸಾಂನಿ ಉದೆಲೆ ಹೆರ್ ಫಾಮಾದ್ ಸಾಹಿತಿ. ವಲ್ಲಿ ವಗ್ಗ, ವಿಲ್ಫಿ ರೆಬಿಂಬಸ್, ಡೊಲ್ಫಿ ಕಾಸ್ಸಿಯಾ, ಎಡ್ವಿನ್ ಜೆ.ಎಫ್.ಡಿ’ಸೋಜ್, ಎಡಿ ನೆಟ್ಟೊ, ಗ್ಲಾಡಿಸ್ ರೇಗೊ, ಲ್ಯಾನ್ಸಿ ಪಿಂಟೊ ನಾಯ್ಕ್, ಪ್ರತಾಪ್ ನಾಯಕ್ ಗೋಯಾಂ,
ಹಾಂತುಂ ಮಾ|ಪ್ರತಾಪ್ ನಾಯ್ಕ್ ಸೊಡ್ಲ್ಯಾರ್ ಹೆರ್ ಸಾಹಿತಿ ಫಾಮಾದ್ ಜಾಲ್ಲೆ ಅಪ್ಲ್ಯಾ ಕಾಣ್ಯಾಂಕ್, ಕಾದಂಬರಿಯಾಂಕ್, ನಾಟಕಾಂಕ್, ಯಾ ಪದಾಂಕ್. ವಲ್ಲಿ ವಗ್ಗ ಕೊಂಕ್ಣೆಂತ್ಲ್ಯಾ ಮಟ್ವ್ಯಾ ಕಾಣ್ಯಾಂಕ್ ಗ್ರೇಸ್ತ್ ಕರುಂಕ್ ಪಾವ್ಲ್ಲ್ಯಾಂತ್ಲೊ ಎಕ್ಲೊ, ವಿಲ್ಫಿ ರೆಬಿಂಬಸ್ ಕಾಣ್ಯೆಗಾರ್ ತರ್ಯ್ ಗಾವ್ಪಿ ಜಾವ್ನ್, ಪದಾಂ ಘಡ್ಪಿ ಜಾವ್ನ್ ಫಾಮಾದ್ ಜಾಲೊ ಆನಿಂ ಕೊಂಕ್ಣಿ ಕೊಗುಳ್ ಮ್ಹಣ್ ನ್ಹಾಂವಾಡ್ಲೊ. ಡೊಲ್ಫಿ ಕಾಸ್ಸಿಯಾ ನಾಟಕಿಸ್ತ್, ಕಾಣ್ಯೆಗಾರ್ ಜಾವ್ನ್, ಎಡ್ವಿನ್ ಜೆ.ಎಫ್.ಡಿ’ಸೋಜ್ ಕಾದಂಬರಿಕಾರ್ ಜಾವ್ನ್, ಗ್ಲ್ಯಾಡಿಸ್ ರೇಗೊ, ಲ್ಯಾನ್ಸಿ ಪಿಂಟೊ ನಾಯಕ್ ಕಾಣ್ಯೆಗಾರ್ ಜಾವ್ನ್ ಫಾಮಾದ್ ಜಾಲಿಂ.
ಪುಣ್ ಹ್ಯಾ ಸರ್ವಾಂನಿ ಕವಿತಾ/ಪದಾಂ ಲಿಖ್ಲ್ಯಾಂತ್ ಆನಿಂ ಕವಿತಾಂಚೊ ಪೋಸ್ ಕೆಲಾ. ಪುಣ್ ಹ್ಯಾ ಕಾಳಾರ್ ಅನ್ಯೇಕ್ ಅಪ್ವಾದ್ ಆಸ್ಲ್ಲೊ ಮ್ಹಳ್ಯಾರ್ ಸಾರ್ಕ್ಯಾ ಮಾಧ್ಯಮಾಚೊ. ಪತ್ರಾಂನಿ ಯೆಂವ್ಚಿ ಕವಿತಾ ಸಗ್ಳೊ ಲೋಕ್ ವಾಚ್ತಾ ಆನಿಂ ಸಮ್ಜತಾ ಮ್ಹಳ್ಳಿ ಖಾತ್ರಿ ನಾತ್ಲ್ಲ್ಯಾನ್ ’ಆಕಾಶ್ವಾಣಿ’ ರ್ ಕವಿತಾಂಚೆಂ ವಾಚಾಪ್ ಸುರು ಜಾಲೆಂ. ಲೊಕಾಂನಿ ಆತಾಂ ಕವಿತಾ ವಾಸ್ಚಾಕೀ ಕವಿತಾ ಆಯ್ಕೊಂಕ್ ಸುರು ಕೆಲೆಂ. ತರ್ಯ್ ಕವಿತಾಂಕ್ ಉಂಚ್ಲ್ಯಾ ಪಾಂವ್ಡ್ಯಾರ್ ಪಾವಂವ್ಚಿ ಮಿನತ್ ಕರ್ಪಿ ಕವಿ ದಿಸಾನ್ದೀಸ್ ಉಣೆಂಚ್ ಜಾಲೆ.
ಉಪ್ರಾಂತ್ ಕೊಂಕ್ಣಿ ಕವಿತಾಂಚಿ ಝರ್ ಕಾಂಯ್ ಸುಕೊನ್ ಯೆತಾಶೆಂ ಭೊಗ್ಲ್ಲ್ಯಾವೆಳಾರ್ ಎಕ್ಚ್ ಪಾವ್ಟಿಂ ಉದೆಲ್ಲೆ ತರ್ನಾಟೆ ಕೊಂಕ್ಣಿ ಕವಿತಾಂಚಾ ಗುಂಡಾಯೆಕ್ ಧರುನ್ ರುಂದಾಯೆಕ್ ಪಾವಂವ್ಕ್ ಪಾವ್ಲೆ ಮ್ಹಣ್ಯೆತ್.
ಮೆಲ್ವಿನ್ ರೊಡ್ರಿಗಸ್ [ಮೊಗಾಪೆಳೊ, ಫಿಂತಾಂ, ವಾಟ್],
"ಕಾಳ್ಜಾಂತ್ ಮೋಗ್ ರಡ್ಟಾ ರಡೊಂದಿ, ರಡೊಂದಿ ಪಾಟಿಂ ಘರಾ ಯೇ ಸಗ್ಳೀ ಜಿಣಿ ಹಾಸಯ್ತಾಂ"
ಹೆನ್ರಿ ಎಮ್ ಪೆರ್ನಾಲ್ [ಚಲಿಯಾಂಕ್ ಚತ್ರಾಯ್, ಕಯ್ದ್ಯಾಚೊ ಕವಿತಾ (ಛಾಪ್ಯಾರ್ ಆಸಾ)],
"ಕಸೊ ಕಾಡ್ಟಾಯ್ ಸೊಧುನ್ ಮ್ಹಜೊ ಪತ್ತೊ? ಗಡ್ದೆಚ್ಯಾ ಗಾಂವಾಂತ್ ಭಾಯ್ರ್ ಪಡ್ಲಾಂ, ಮೆಳೊಂಕ್ ನಾ ಮ್ಹಾಕಾಚ್ ಹಾಂವ್."
ಆಂಡ್ರು ಎಲ್’ಡಿ’ಕುನ್ಹಾ [ವಳೂ ವಳೂ ವಾಳ್ ವಾಳ್ಯಾ (ಛಾಪ್ಯಾರ್ ಆಸಾ)],
"ಗೊರೊ ಹಾಂವ್ ಕಾಳಿ ಕಿತ್ಯಾಕ್ ಸಾವ್ಳಿ?? ’ಆಕಾರ್ ತುಜಾ ಕುಡಿಚೊ ರಂಗ್ ತುಜಾ ಕಾಳ್ಜಾಚೊ’ ಸಾವ್ಳಿ ಉಲಯ್ಲಿ!"
ಮೌರಿಸ್ ಶಾಂತಿಪುರ [ಕಿರಾ ಬೋಂಚ್, ಭಿಂಗಾರಿ],
ಜೊಸ್ಸಿ ಪಿಂಟೊ ಕಿನ್ನಿಗೋಳಿ [ಮ್ಹಜೊ ಗಾಂವ್],
"ಗಾಂವ್ಗೊ ಚೆಡ್ವಾ ಮ್ಹಜೊ ಗಾಂವ್ಗೊ ಭಾರಾ ಗಾಂವಾಭರ್ ತಾಚೆಂ ನಾಂವ್ಗೊ ದುದಾ ಮೊಂವಾಂಚೊ ಮ್ಹಜೊ ಗಾಂವ್ಗೊ"
ಫ್ರೆಡ್ ಕುಮಾರ್ ಕುಚ್ಚಿಕಾಡ್ [ವೊವ್ಳಾಂ],
ರೇಮಂಡ್ ಡಿ’ಕುನ್ಹಾ, ತಾಕೊಡೆ,
ಪುಣ್ ಹಾಂಚೆಂ ಪ್ರೇರಣ್ ಘೆವುನ್ ಹೆರ್ ಥೊಡೆ ಸಾಹಿತಿ ಉದೆಲೆ. ಆನಿಂ ಪದಾಂ/ಕವಿತಾ ಘಡ್ಚಾಂಕ್ ದೇಣ್ಗಿ ದಿಂವ್ಚಾಂತ್ ಜಿಕ್ಲೆ. ಆನಿ ತಾಂತ್ಲೆ ಪ್ರಮುಕ್ ಜಾವ್ನಾಸಾತ್;
ದೆ|ಜೊರ್ಜಿ ಪೀಂತ್ ಆಯ್ಕೊಳ್ [ಜಿವಿತಾ ಸೊಭಾಣ್(ತರ್ಜಣ್), ಪರತ್ ಪರತ್],
"ಪರತ್ ಪರತ್ ಕೊಂಕ್ಣಿ ಧರ್ತೆರ್ ಜಲ್ಮಾತಲೊಂ ಹಾಸತ್ ಹಾಸತ್ ಕೊಂಕ್ಣಿ ಮಾಯೆಕ್ ಜೀವ್ ದಿತಲೊಂ"
ಪಂಚು ಬಂಟ್ವಾಳ್ [ಕಾಳ್ಜಾ ಗಾಜ್],
"ಟಿಕ್ ಟಿಕ್ ಘುಂವ್ತಾ ಘಡ್ಯಾಳಾಚೊ ಕಾಂಟೊ ತಾಚೆಸಂಗಿಂ ವರುನ್ ವೆತಾ ಜಿವಿತಾಚೊ ವಾಂಟೊ"
ಕಿಶೂ ಬಾರ್ಕುರ್ [ದಾಕ್ಟ್ಯಾ ದೆವಾಚಿಂ ಭುರ್ಗಿಂ],
ಆನ್ಸಿ ಪಾಲಡ್ಕ [ಯೇಗೊ ಬಾಯೆ],
ಟೈಟಸ್ ತಾಕೊಡೆ.
ಆಯ್ಲೆಲಾರ್ ಉದೆಲ್ಲೆ ನವೆಕವಿ ಕೊಂಕ್ಣಿ ಶೆತಾಂತ್ ಭರ್ವಸ್ಯಾಚಿಂ ಲ್ಹಾರಾಂ ಘೆವುನ್ ಆಯ್ಲ್ಯಾತ್; ಹುಮೆದಿಚೆ ಫುಗ್ಗೆ ಫುಲ್ಲ್ಯಾತ್.
ಎಲ್ಯೆರ್ ತಾಕೊಡೆ [ಫಾಲ್ಗುಣಿಚೊ ವಾಳೊ],
ಜಿಯೊ ಅಗ್ರಾರ್ [ಪಯ್ಲಿಂ ಮೆಟಾಂ],
ನೆಲ್ಲು ಪೆರ್ಮನ್ನೂರ್ [ಮೊಳ್ಬಾಕ್ ದೆಳಿಂ],
ಫ್ರಾನ್ಸಿಸ್ ಕಾಮತ್ ಪೆದಮಲೆ,
ವಿಲ್ಫ್ರೆಡ್ ಪಡೀಲ್,
ಅನಿಲ್ ಪೆರ್ನಾಲ್.
ಪ್ರಸ್ತುತ್ ಕಾಳ್ :
ಭರ್ವಸ್ಯಾಚಿಂ ಕಿರ್ಣಾಂ ಫಾಂಕಂವ್ಚಾರ್ ಆಸಾ, ಕೊಂಕ್ಣಿ ಸಾಹಿತಿಕ್ ಶೆತಾಂತ್,ಪ್ರಕ್ತ್ಯೇಕ್ ಜಾವ್ನ್ ಅಂತರ್ಜಾಳಾಂತ್ ಜಾಲ್ಲಿ ಪ್ರಗತಿ ಹಾಕಾ ಕಾರಾಣ್ ಮ್ಹಣ್ ಸಾಂಗ್ಲ್ಯಾರ್ ಚೂಕ್ ಜಾಂವ್ಚಿನಾ ಮ್ಹಳ್ಳಿ ಮ್ಹಜಿ ಪಾತ್ಯೆಣಿ.
ಮೆಲ್ವಿನ್ ರೊಡ್ರಿಗಸಾಚಾ ಕವಿತಾ ಕುಳಾರ್, ಕುಪಾಂ ಪೊಂದ್ಲಿಂ ಮುಖಾಂ ಯಾ ಕವಿತಾ ಕುಡೆಂ ಆನಿಂ ಆಂಡ್ರು ಎಲ್.ಡಿ’ಕುನ್ಹಾಚೊ ಕವಿತಾ ವಾಳೊ ಹಾಂಚಿ ದೇಕ್ ಘೆವ್ನ್ ಆಯ್ಲೆವಾರ್ ಉದೆಲ್ಲೆ ಕವಿ ಕೊಂಕ್ಣಿ ಕವಿತಾಚಾ ನವೆಂಸಾಂವಾಚಾ ವಾಟೆರ್ ಕಾಂಯ್ ಭಾಂಗ್ರಾಳಿಂ ಕಣ್ಶಿಂ ಫುಟಯ್ತಿತ್ಗಾಯ್ ಮ್ಹಳ್ಳೊ ಆಶಾವಾದ್ ಮ್ಹಜೊ; ಮಾನೆಸ್ತ್ ದಿನೇಶ್ ಕೊರೆಯಾ ಪೆರ್ನಾಲ್, ಮಾನೆಸ್ತ್ ರೋಬರ್ಟ್ ಫೆರ್ನಾಂಡಿಸ್ ಉದ್ಯಾವರ್, ಮಾನೆಸ್ತ್ ಆರ್ಥರ್ ಪಿರೇರ್ ಒಮ್ಜೂರ್, ಮಾನೆಸ್ತ್ ಜೇಮ್ಸ್ ಕರುಗಳ್ನಡೆ ಕಾಂಯ್ ಹಾಂತ್ಲೆ ಥೊಡೆ ಕವಿ.
ಕೊಂಕ್ಣಿ ಕವಿತಾ ಫುಲೊನ್ ಆಯಿಲ್ಲೆ ಹಂತ್ ;
ಕೊಂಕ್ಣಿ ಭಾಸ್ ಪಾಂಚ್ ಲಿಪಿಯೆಂನಿ ಬರಯ್ತಾತ್ ತರ್ಯ್ ಹಾವೆಂ ಹ್ಯಾ ಲೇಕನಾಂತ್ ಫಕತ್ ಕಾನಡಿ ಲಿಪಿಯೆಚಾ ಕೊಂಕ್ಣೆಕ್ ಮಾತ್ ಲೆಕಾಕ್ ಧರ್ಲಾಂ. ಕಾನಡಿ ಲಿಪಿಯೆಂತ್ ಜಾಲ್ಯಾರ್ಯ್ ಪ್ರಮುಖ್ ಜಾವ್ನ್ ದೋನ್ ಪ್ರಕಾರ್ ಆಸಾತ್, ಏಕ್ ’ಆಮ್ಗೆಲಿ ಕೊಂಕಣಿ (GSB)’ ಆನಿಂ ದುಸ್ರಿ ’ಆಮ್ಚಿ ಕೊಂಕಣಿ’. ಮ್ಹಜಾ ಹ್ಯಾ ಲೇಕನಾಂತ್ ’ಆಮ್ಚಾ’ ಕೊಂಕ್ಣೆಕ್ ಮಾತ್ರ್ ಲೆಕಾಕ್ ಧರ್ಲಾಂ.
ಪಯ್ಲೆಂ - ಪತ್ರಿಕೋಧ್ಯಮ್ :
ಹೆಂ ಕೊಂಕ್ಣಿ ಪತ್ರಿಕೋಧ್ಯಮಾಚಿ ಸುರ್ವಾತ್ ಜಾಲ್ಲ್ಯಾ ಕಾಳಾಚೆಂ ಹಂತ್. ಜಶೆಂ ಹೆರ್ ಭಾಸಾಂನಿ ಕಶಿ ಪತ್ರಿಕೋಧ್ಯಮಾಧ್ವಾರಿಂ ಸಾಹಿತಿಕ್ ಕ್ರಶಿ ಜಾತಾಗೀ ತಶಿಚ್ ಕೊಂಕ್ಣೆಂತ್ಯ್ ಜಾಲಿ. ಪುಣ್ ಆಮ್ಚಿ ಕೊಂಕ್ಣಿ ಚಡ್ತಾವ್ ದೇವ್-ದೆಂವ್ಚಾರ್, ಅತ್ಮೊ-ಸಾಲ್ವಾಸಾಂವ್ ಮ್ಹಳ್ಳ್ಯಾ ಸಂಗ್ತ್ಯಾಂಚೆರ್ ಇಲ್ಲೊ ಚಡ್ ಮಾಲ್ವಾಲ್ಲ್ಯಾನ್ ಸುರ್ವಿಲ್ಲಿಂ ಚಡ್ತಾವ್ ಕವಿತಾ ಹೆಚ್ ಚಿಂತ್ಪಾಚಿಂ. ದೈವಿಕ್ ಚಿಂತ್ಪಾಚಿಂ, ನೀತ್ ಪಾಚಾರ್ಚಿಂಚ್. ಹ್ಯಾ ವರ್ಗಾಂತ್ ಫಕತ್ ಕವಿತಾ ನ್ಹಯ್, ಪದಾಂ, ಚುಟುಕಾಂ, ಗಿತಾಂ, ಶ್ಲೋಕಾಂ ಆಸಾತ್. ಜಾಯ್ತಿಂ ಧಾರ್ಮಿಕ್ ಪದಾಂ ಅಜೂನ್ ತವಳ್ತವಳ್ ವೆವೆಗ್ಳ್ಯಾ ಸಂಧರ್ಭಾಂನಿ ಗಾಯ್ತಾತ್. ಹೆಚ್ ವೆಳಾರ್ ಇಂಗ್ಲಿಶಾಂತ್ಲ್ಯಾ, ಲಾತ್ಯಾಂತ್ಲ್ಯಾ ಜಾಯ್ತ್ಯಾ ಪದಾಂಕ್ ಕೊಂಕ್ಣೆಕ್ ತರ್ಜಣ್ ಕೆಲೆಂ ಆನಿಂ ತಾಂತ್ಲಿಂ ಸಭಾರ್ ಪದಾಂ ಅಜ್ ಪರ್ಯಾಂತ್ ಗಾಯ್ತಾತ್.
ದಾಕ್ಲೊ: ಸ್ವಾದಿಕ್ ರಾತ್.. ಭಾಗಿ ರಾತ್.. [ಇಂಗ್ಲಿಶಾಂತ್ಲೆಂ Silent Night, Holy night ಕಂತಾರಾಚೆಂ ತರ್ಜಣ್] ಪುಣ್ ಲೊಕಾಂಕ್ ಕವಿತಾಂಚೆರ್ ಆಸ್ಚಾಕೀ ಚಡ್ ಜಾವ್ನ್ ಕಾಣ್ಯೊ, ಕಾದಂಬರಿಂಚೆರ್ ವೋಡ್ ಚಡ್ ಆಸ್ಲ್ಲಿ. ಲೊಕಾಂಕ್ ಮನರಂಜನ್ ಜಾಯ್ ಆನಿಂ ಕವಿತಾಂನಿ ತಾಂಕಾಂ ಮನೊರಂಜನ್ ಮೆಳ್ಚೆಂ ಭೊವ್ ಥೊಡ್ಯಾ ಕವಿಂ ಥಾವ್ನ್ ಮಾತ್ರ್. ಅಜೂನ್ ಜಾಲ್ಯಾರ್ಯ್ ಪತ್ರಾಂನಿ ಕವಿತಾಂಕ್ ಆಸ್ಚೆಂ ಸ್ಥಾನ್ ಪಳೆಲ್ಯಾರ್ ಅಜ್ಯಾಪ್ ಜಾತಾ. ಧಾಂತ್ಲ್ಯಾ ನೋವ್ ಪತ್ರಾಂನಿ ಕವಿತಾ ಛಾಪ್ಚಿಂ ಗತಿಗಟ್ಟಾಕ್ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ ಮ್ಹಣ್ಯೆತಾ.
ಕವಿತಾ ಮ್ಹಳ್ಯಾರ್ ಕಿತೆಂ ಆನಿಂ ಕವಿತಾ ಕಶೆಂ ಆಸ್ಯೆತ್ ಮ್ಹಳ್ಳೆಂ ತಾಂಕಾಂಚ್ ಕಳಿತ್ ನಾಸ್ತಾನಾ ಆಯಿಲ್ಲ್ಯಾ ಕರ್ಮಾಕ್ ತೆ ಪತ್ರಾರ್ ಛಾಪ್ತಾತ್. ತೆಂ ಆಯಿಲ್ಲೆಂ ಕವಿತಾ ಪುರ್ತೆಂಗೀ ಯಾ ಅರ್ಧೆಂಗೀ ಮ್ಹಳ್ಳೆಂ ಗಿನ್ಯಾನ್ ಸಯ್ತ್ ನಾಸ್ತಾನಾ. ತಾಂಚಿಯ್ ಚೂಕ್ ಮ್ಹಣ್ ಹಾಂವ್ ಸಾಂಗಾನಾ, ಕಿತ್ಯಾಕ್ ಮ್ಹಳ್ಯಾರ್ ತಾಂಚಾ ಮತಿಂತ್ ಕವಿತಾ ಮ್ಹಳ್ಯಾರ್ ಇತ್ಲೆಂಚ್ ಲಾಂಬ್, ಇತ್ಲೆಂಚ್ ರೂಂದ್ ಮ್ಹಳ್ಳೆಂ ಏಕ್ ಪಿಂತುರ್ ಆಸ್ತಾ. ತಾಚೆಭಾಯ್ರ್ ಚಿಂತ್ಚೆಂ ಮ್ಹಳ್ಯಾರ್ ತಾಂಕಾ ರೊಕೆಟ್ ಸಾಯನ್ಸ್.
ಆನಿಂ ಥೊಡ್ಯಾಂಕ್ ಆಯಿಲ್ಲೆಂ ಕವಿತಾ ಪುರ್ತೆಂ ವಾಚುನ್ ಸಮ್ಜೊಂವ್ಚಿ ಶ್ಯಾಥಿ ನಾ, ಆಯಿಲ್ಲ್ಯಾ ಕವಿತಾಚೆ ಪಾಕ್ಳೆ ಮೊಡುನ್ ವಯ್ಲೆ ವಾಕ್ಯ್ ಸಕ್ಲಾ ಘಾಲುನ್ ಸಕಯ್ಲೆ ವಾಕ್ಯ್ ಕವಿತಾಚಾ ವಯ್ರ್ ಚೆಪುನ್ ವಾದ್ ವಿವ್ಳಿ ಕರ್ತಾತ್. ಕಿತ್ಯಾಕ್ ಮ್ಹಳ್ಯಾರ್ ಸಂಪಾದಕಾಚೆಂ ಕಾಮ್ ತೆಂಚ್ ನ್ಹಯ್ಗೀ? ಆಸಾ ತಶೆಂ ಘಾಲ್ಯಾರ್ ಸಂಪಾದನ್ ಕೆಲಾಂ ಮ್ಹಣ್ ಕಶೆಂ ಸಾಂಗ್ಚೆಂ? ಚಿಂತ್ಯಾಂ ಎಕಾ ಕವಿನ್ ಮನಿಸ್ ಮ್ಹಳ್ಳೆಂ ಪಿಂತುರ್ ರಚ್ಲೆಂ; ತಾಕಾ ಏಕ್ ಕಪಾಲ್, ದೋನ್ ದೊಳೆ, ದೋನ್ ಕಾನ್, ದೋನ್ ಗಾಲ್, ಏಕ್ ಖಾಡ್ಕಿ, ಏಕ್ ನಾಕ್ ಪಿಂತ್ರಾವ್ನ್ ಧಾಡ್ಲೆಂ ತರ್, ಮನಿಸ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳಿ ಗಿನ್ಯಾನ್ ನಾತ್ಲ್ಲೆ ತ್ಯಾ ಮನ್ಶಾಕ್ ಅಶೆಂ ಪಿಂತ್ರಾಯ್ತಾತ್; - ಪಯ್ಲೆಂ ಏಕ್ ದೊಳೊ ವಯ್ರ್ ಏಕ್ ದೊಳೊ ಸಕಯ್ಲ್, ಏಕ್ ಕಾನ್ ಉಜ್ವ್ಯಾಕ್ ಅನ್ಯೇಕ್ ತೆನ್ಕಾಕ್, ಏಕ್ ಗಾಲ್ ಕಾನಾಚೆರ್ ಅನ್ಯೇಕ್ ಗಾಲ್ ಖಾಡ್ಕೆಚಾ ಸಕಯ್ಲ್. ಆನಿ ಸಕಯ್ಲ್ ಏಕ್ ಕಪಾಲ್, ಏನ್ ನಾಕ್, ಏಕ್ ಖಾಡ್ಕಿ. - ಏಕ್ ಘಡಿ ಚಿಂತಾ ಹೆಂ ಪಿಂತುರ್ ಮನ್ಶಾಪರಿಂ ದಿಸ್ತಾಗೀ ಯಾ ರಾಕ್ಕೊಸಾಪರಿಂ ಯಾ ವಿಚಿತ್ರ್ ಮನ್ಜಾತೆಪರಿಂ? ಹೆ ಆಮ್ಚೆ ಥೊಡೆ ಸಂಪಾದ್ಪಿ. ತೀರ್ ಆಸ್ಚೆಂ ತಿರ್ಕುಟ್ ಕರ್ಚೆ. ತಾಂಕಾಂ ಸವಾಲ್ ಕೆಲ್ಲೆಪರಿಂ ನಾ. ಕಿತ್ಯಾಕ್ ಮ್ಹಳ್ಯಾರ್ ತಾಣಿಂ ಕೊಂಕ್ಣಿ ಸೆವಾ ಕರ್ಚಿ. ಅರೇ ಬಾಬಾಂನೊ ಕೊಂಕ್ಣೆಚಿ ಸೆವಾ ಕರ್ತಾತ್ ತರ್ ಸಾರ್ಕೆ ರಿತಿನ್ ತಿ ಕರಾ - ಗತಿಗಟ್ಟಾಕ್ ನ್ಹಯ್. ಕೊಂಕ್ಣಿ ತುಮಿ ನಾಸ್ತಾನಾಂಯ್ ಜಿಯೆಲ್ಯಾ ತುಮಿ ನಾಸ್ತಾನಾಂಯ್ ಜಿಯೆತೆಲಿ.
ದುಸ್ರೆಂ - ಜಾಗೆ ಕವಿಂಚೊ ಪಂಗಡ್ :
ಕೊಂಕ್ಣಿ ಕವಿತಾಂಕ್ ಹರ್ಯೆಕಾ ಲೊಕಾಂಲಾಗಿಂ ಪಾವಂವ್ಚಾಕ್ ಸಾಹಿತಿಂನಿ, ಪ್ರತ್ಯೇಕ್ ಜಾವ್ನ್ ಕವಿಂನಿ ಕವಿತಾಂಕ್ ಲೊಕಾಂಕ್ ಸಮ್ಜಾಂವ್ಕ್ ಎಕಾಮೆಕಾ ಎಕ್ಟಾಂಯ್ ಜಾವುನ್ ಗಾಂವಾರ್ ಗಾಂವ್ ವರುನ್ ಲೊಕಾಂಲಾಗಿಂ ಪಾವಂವ್ಕ್ ಸಾಧನ್ ಕೆಲೆಂ. ದೆ|ಚಾ.ಫ್ರಾ.ದೆ’ಕೋಸ್ತಾ ಸಯ್ತ್ ಅಸಲ್ಯಾ ಜಮ್ಯಾಂತ್ ಹಾಜರ್ ಆಸ್ತಾಲೊ ಮ್ಹಣ್ತಾನಾ ಹ್ಯಾ ಗಾಂವಾರ್ ಗಾಂವ್ ಭಂವೊನ್ ಕವಿತಾಂಕ್ ವಿಸ್ತಾರಾಂವ್ಚಾ ಮಿಸಾಂವಾಚಾ ಶೆವೊಟಾಚಿ ಅಂದಜ್ ಕರ್ಯೆತ್.
ಮಾನೆಸ್ತ್ ಮೆಲ್ವಿನ್ ರೊಡ್ರಿಗಸ್ ಹಾಚಾ ಮುಖೇಲ್ಪಣಾಖಾಲ್ ಅಜಿಕ್ ದೇಡ್ ದಾಕ್ಟ್ಯಾಧಿಂ ಚಲೊನ್ ಆಸ್ಲ್ಲ್ಯಾ ಅಸಲ್ಯಾ ಪಂಗಡಾಚೆಂ ಪಲಿತಾಂಶ್ - ಎಕಾಚ್ಫರಾಂ ನವ್ಯಾ ಚಿಂತ್ಪಾಚೆ ಕೊಂಬ್ಲೆ ಉದೆಲೆ, ಫುಲ್ಲೆ. ಆನಿಂ ಅಶೆಂ ಉದೆಲ್ಲೆ ಕೊಂಬ್ಲೆ ಕೊಂಕ್ಣಿ ಕವಿತಾಂಕ್ ನವೊ ಭರ್ವಸೊ ಉದೆಶೆಂ ಕರಿಲಾಗ್ಲೆ. ಕವಿತಾಂಚೆ ನವೆ ನವೆ ಬೂಕ್ ಛಾಪ್ಲೆ, ಪರ್ನ್ಯಾ ಕವಿತಾಂಕ್ ಪರತ್ ಲೊಕಾಂಲಾಗಿಂ ಪಾವಂವ್ಕ್ ಜಾಯ್ತ್ಯಾಂನಿ ಮಿನತ್ ಕೆಲಿ.
ಪುಣ್ ಬರ್ಯಾನ್ ಸುರ್ವಾತ್ ಜಾಲ್ಲ್ಯಾ ಹ್ಯಾ ಪಂಗ್ಡಾಕ್ ಮುಖಾರುನ್ ವರ್ಚೆ ನಾತ್ಲ್ಲ್ಯಾನ್ ಹೆ ಪಂಗಡ್ ಥಂಯ್ಂಚ್ ಶೆಳೆ ಪಡ್ಲೆ ಆನಿಂ ಹಳ್ತಾರ್ ಕುರ್ವೊನ್ ಬೊಸ್ಲೆ. ತಿಸ್ರೆಂ: ಅಂತರ್ಜಾಳ್ ಹೊ ಕಾಳ್ ಪ್ರಸ್ತುತ್ ಮ್ಹಣ್ಯೆತ್. ಪತ್ರಿಕೋಧ್ಯಮಾಚಾ ಶೆಳೆಂಪಣಾನ್, ಲೊಕಾಂಚಾ ತಾತ್ಸಾರಾಂತ್ ಸಾಹಿತ್ ದಿಸಾನ್ದೀಸ್ ಕುರ್ವೊನ್ ವೆಚಾ ಕಾಳಾರ್ ಅಂತರ್ಜಾಳ್ ಹ್ಯಾ ದಿಶೆನ್ ಭರ್ವಸ್ಯಾಚೆಂ ಕೀರ್ಣ್ ಜಾವ್ನ್ ಉದೆಲೆಂ.
ಅಂತರ್ಜಾಳಾಂನಿ ವಾಚುಂಕ್ ಮೆಳ್ಚಾ ಸಾಹಿತ್ಯಾಕ್ ಖಾಯ್ಸ್ ಕರ್ಚೆ ವಾಚ್ಪಿ ಚಡ್ಲೆ. ಅಂತರ್ಜಾಳಾಂಚೊ ಸಂಕೊಯ್ ಚಡ್ಲೊ. ಭಾಯ್ಲ್ಯಾ ಗಾಂವಾಂನಿ ಸಯ್ತ್ ಕವಿತಾಂಚಿಂ ಕಾಮಾಸಾಳಾಂ ಜಾಂವ್ಕ್ ಲಾಗ್ಲಿಂ. ಗಾಂವಾ ಭಾಯ್ಲೆ ಸಯ್ತ್ ಎಕಾಮೆಕಾ ಕವಿತಾ ಸಮ್ಜೊಂಕ್, ಕವಿತಾ ಶಿಂದುಂಕ್, ಕವಿತಾ ಘಡುಂಕ್ ಲಾಗ್ಲೆ. ಆನಿಂ ಹಿ ಸುರ್ವಾತ್ ಪರೋಕ್ಶ್ ರಿತಿನ್ ಪತ್ರಿಕೋಧ್ಯಮಾಚೆರ್ ಆಪ್ಲೊ ಪ್ರಭಾವ್ ಘಾಲ್ತಾನಾ, ಪತ್ರಾಂಕ್ ಸಯ್ತ್ ಆಪ್ಲ್ಯಾ ವಾವ್ಪ್ಯಾಂಕ್ ಬರೆಂ ವಾಚಾಪ್ ದಿಂವ್ಚಾಕ್ ಮಜ್ಬೂರ್ ಜಾಲೆ. ನವೆ ಬೂಕ್ ಛಾಪೊಂಕ್ ಲಾಗ್ಲೆ.
ದೋನ್ ವರ್ಸಾಧಿಂ ವರ್ಸಾ ಪನ್ನಾಸ್ ಕವಿಂಕ್ ಎಕ್ಟಾಂಯ್ ಕರುನ್ ತಾಂಚಾ ಕವಿತಾಂಕ್ ’ಕುಪಾಂ ಪೊಂದ್ಲಿಂ ಮುಖಾಂ’ ಮ್ಹಳ್ಳ್ಯಾ ನಾಂವಾರ್ ಏಕ್ ಬೂಕ್ ಛಾಪೊನ್ ಆಯ್ಲೊ. ಆಧ್ಲ್ಯಾ ವರ್ಸಾಯ್ ಸಭಾರ್ ಕವಿತಾಜಮೆ ಆಯ್ಲೆ. ಹ್ಯಾ ವರ್ಸಾಯ್ ಅಸಲೆಚ್ ಬರೆ ಕವಿತಾಜಮೆ ಯೆಂವ್ಚಾರ್ ಆಸಾತ್. ಹಿ ಕೊಂಕ್ಣೆಚಾ ಮಟ್ಟಾಕ್ ವ್ಹಡಾ ಧಾಧೊಸ್ಕಾಯೆಚಿ ಗಜಾಲ್ ನಾಸ್ತಾಂ ಆನಿಂ ಕಿತೆಂ?
ಪುರಸ್ಕಾರ್/ಸನ್ಮಾನ್ :
ಮಾನ್-ಸನ್ಮಾನ್ ಫಕತ್ತ್ ಏಕ್ ನೀಬ್ ಶಿವಾಯ್ ಕುರುಃ ಬಿಲ್ಕುಲ್ ನ್ಹಯ್. ಕೊಂಕ್ಣೆಂತ್ಲ್ಯಾ ಸಾಹಿತ್ಯಾಕ್ ಮೆಜುಂಕ್ ಹೆ ಮಾನ್-ಸನ್ಮಾನ್ ಉಪ್ಕಾರ್ಚೆ ನಾಂತ್ ಪುಣ್ ಉಲ್ಲೇಕ್ ಗರ್ಜೆಚೊ. ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣೆಂತ್ ಜಾಲ್ಲ್ಯಾ ಚಡ್ತಾವ್ ವಾವ್ರಾಕ್ ಲೊಕಾಂನಿ ಒಪುನ್ ಘೆತ್ಲ್ಲಿ ರುಜ್ವಾತ್ ದಿತಾತ್ ಹೆ ಮಾನ್-ಪ್ರಶಸ್ಥ್ಯೊ. ತಶೆಂಚ್ ಕೊಂಕ್ಣಿ ಕವಿತಾಶೆತಾಂತ್ ಕವಿಂಕ್ ಮೆಳ್ಲ್ಲ್ಯಾ ಪುರಸ್ಕಾರಾಂಚೊ ಮಟ್ವ್ಯಾನ್ ವಿವರ್ ದಿಂವ್ಚೊ ತರ್;
ದೆ|ಲುವಿಸ್ ಮಸ್ಕರೇನ್ಹಸ್ ಜಲ್ಮಾ ಶತಾಬ್ಧಿ ಪ್ರಶಸ್ಥಿ :
1. ಮಾನೆಸ್ತ್ ಫ್ರೆಡ್ ಕುಮಾರ್ ಕುಚ್ಚಿಕಾಡ್, ತಶೆಂಚ್ ಮಾನೆಸ್ತ್ ಜೊಸ್ಸಿ ಪಿಂಟೊ ಕಿನ್ನಿಗೋಳಿ ಹಾಂಚಾ ಕವಿತಾಂಕ್ ದೆ|ಲುವಿಸ್ ಮಸ್ಕರೇನ್ಹಸ್ ಜಲ್ಮಾ ಶತಾಬ್ದಿ ತರ್ಫೆನ್ ಮಾನ್.
ಟಿ.ಎಮ್.ಎ.ಪೈ ಫೌಂಡೇಶನಾಚಿ ಪ್ರಶಸ್ತಿ :
1. ಮಾನೆಸ್ತ್ ಜೆ.ಬಿ ಸಿಕ್ವೇರಾಚಾ ’ಕಾಳ್ಜಾಚೆ ಉಮಾಳೆ’ ಬುಕಾಕ್ ಪ್ರಶಸ್ತಿ.
2. ಮಾನೆಸ್ತ್ ಆನ್ಸಿ ಪಾಲಡ್ಕಾಚಾ ’ಚಿರ್ಪುಟಾಂ’ [ಬುರ್ಗ್ಯಾಂಚಿಂ ಪದಾಂ] ಬುಕಾಕ್ ಮಾನ್.
ರಾಜ್ಯ್ ಮಟ್ಟಾಚಿ ಪ್ರಶಸ್ತಿ :
1. ಮಾನೆಸ್ತ್ ಮೆಲ್ವಿನ್ ರೊಡ್ರಿಗಸಾಚಾ ’ಮೊಗಾಪೆಳೊ’ ಬುಕಾಕ್ [ಕೊಂಕ್ಣಿ ಬಾಷಾ ಮಂಡಳ್ ಗೊಯಾಂ ಪ್ರಶಸ್ಥಿ]
2. ಮಾನೆಸ್ತ್ ಮೌರಿಸ್ ಶಾಂತಿಪುರಾಚಾ ’ಕಿರಾ ಬೋಂಚ್’ ಬುಕಾಕ್ [ಕೊಂಕ್ಣಿ ಬಾಷಾ ಮಂಡಳ್ ಗೊಯಾಂ ಪ್ರಶಸ್ಥಿ]
3. ಮಾನೆಸ್ತ್ ಆನ್ಸಿ ಪಾಲಡ್ಕಾಚಾ ’ಯೇಗೊ ಬಾಯೆ’ ಬುಕಾಕ್ [ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ]
4. ಮಾನೆಸ್ತ್ ಎಲ್ಯೆರ್ ತಾಕೊಡೆಚಾ ’ಫಾಲ್ಗುಣಿಚೊ ವ್ಹಾಳೊ’ ಬುಕಾಕ್ [ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ]
ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ :
1. ಮಾನೆಸ್ತ್ ಜೆ.ಬಿ.ಮೊರಾಯಸಾಚಾ ’ಭಿತರ್ಲೆಂ ತುಫಾನ್’ ಬುಕಾಕ್,
2. ದೆ|ಚಾ.ಫ್ರಾ. ದೆ’ಕೋಸ್ತಾಚಾ ’ಸೊಂಶ್ಯಾಚೆ ಕಾನ್’ ಬುಕಾಕ್,
3. ಮಾನೆಸ್ತ್ ಜೆ.ಬಿ.ಸಿಕ್ವೇರಾಚಾ ’ಅಶಿಂ ಆಯ್ಲಿಂ ಲ್ಹಾರಾಂ’ ಬುಕಾಕ್.
ಕೊಂಕ್ಣಿ ಕವಿತಾಶೆತಾಕ್ಯ್ ಹೆರ್ ಪ್ರಾಂತೀಯ್ ಭಾಸಾಂಚೊ ಪ್ರಭಾವ್ ಜ್ಯೊರಾನ್ ಆಸಾ. ಕಾನಡಿ, ತುಳು ತಶೆಂಚ್ ಹೆರ್ ಭಾಸಾಂಚೊ ಪ್ರಭಾವ್ ತವಳ್ತವಳ್ ಪಡ್ತಾ. ತರ್ಯ್ ಎದೊಳ್ ಪರ್ಯಾಂತ್ ಕೊಂಕ್ಣಿ ಕವಿತಾ ಜಿವಾಳೊನ್ ಆಸಾ ಆನಿಂ ಆಯ್ಲೆವಾರ್ಚಿ ಪರಿಗತ್ ಪಳೆತಾನಾ, ಕಾನಡಿ ಲಿಪಿಯೆಂತ್ಲ್ಯಾ ಕೊಂಕ್ಣಿ ಕವಿತಾವಾಲಿಂಚೆರ್ ಫುಟ್ಲ್ಲ್ಯೊ ನವ್ಯೊ ಆಂಕ್ರ್ಯೊ ಪಳೆತಾನಾ ನವೊ ಹುರುಪ್ ಕಾಳ್ಜಾಂತ್ ಭರೊನ್ ಯೆತಾ. ಹ್ಯೊ ಆಂಕ್ರ್ಯೊ ಬರ್ಯೊ ಕರ್ನ್ ಪಾಲೆಂವ್ದಿ, ಫುಲೊಂದಿ ಆನಿಂ ಕೊಂಕ್ಣಿ ಕವಿತೆಂಚೊ ಸೊಂರ್ಗೊ ಕುಪಾಂಚೆರ್ ಚಡೊಂದಿ ಮ್ಹಳ್ಳೆಂಚ್ ಮ್ಹಜೆಂ ಮಾಗ್ಣೆಂ ಜಾವ್ನಾಸಾ.
[ಹೆಂ ಲೇಕನ್ ಹಾವೆಂಚ್ ಬರಯಿಲ್ಲೆಂ ದೆಕುನ್ ಮ್ಹಜಾ ಕವಿತಾಪುಂಜ್ಯಾಂಚೊ ಉಲ್ಲೇಕ್ ಹಾಂತುಂ ಗರ್ಜ್ ಮ್ಹಣ್ ಮ್ಹಾಕಾ ಭೊಗಾನಾ. ಪುಣ್ ಉಲ್ಲೇಕ್ ಕರ್ಚೊ ತರ್; ಚ್ಯಾರ್ ಮುಖಾಂ, ಕಟ್ಪುತ್ಳಿ (ಛಾಪ್ಯಾರ್ ಆಸಾ)]
[ಹೆಂ ಲೇಖನ್ 2004 ಅಗೋಸ್ತಾಚಾ 27 ತಾರಿಕೆರ್ ಕುವೆಯ್ಟಾಂತ್ ಜಮ್ಲ್ಲ್ಯಾ ಅಖಿಲ್ ಭಾರತೀಯ್ ಬರವ್ಪ್ಯಾಂಚಾ ಎಕ್ತಾರಾಚಾ ಜಮಾತೆರ್ ವಾಚುನ್ ಸಾಂಗ್ಲಾಂ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications