"ಸಂಸಾರಾಂತ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

"ಸಂಸಾರಾಂತ್ ದೊಳ್ಯಾಂಕ್ ಬರೆಂ ದಿಸ್ಚೆಂ ವಿಂಚಿನಾಕಾ, ಕಾಳ್ಜಾಕ್ ಬರೆಂ ದಿಸ್ಚೆಂ ವೀಂಚ್"

ವಿಂಚವ್ಣೆಂತ್ ಚುಕಾನಾಕಾ

ವರಸ್ : 2005

ಅಂಕೊ : 18

ಮಯ್ನೊ : ದಸೆಂಬರ್

ಸಂಪಾದಕೀಯ್ - 18.

ವಲ್ಲಿ ಕ್ವಾಡ್ರಸ್

"ಸಂಸಾರಾಂತ್ ದೊಳ್ಯಾಂಕ್ ಬರೆಂ ದಿಸ್ಚೆಂ ವಿಂಚಿನಾಕಾ, ಕಾಳ್ಜಾಕ್ ಬರೆಂ ದಿಸ್ಚೆಂ ವೀಂಚ್"

ದೆವಾನ್ ಎಕಾ ಸಬ್ಧಾನ್ ಸಗ್ಳೆಂ ರಚ್ಲೆಂ ತರ್ ಸಬ್ಧಾಕ್ ಕಿತ್ಲೆಂ ತ್ರಾಣ್ ಆನಿ ಮಾನ್ ನ್ಹಯ್‌ಗಿ?

ಆಮ್ಚಾ ಘರಾಕ್ ಕೊಣ್‌ಯ್ ಯೆತಾತ್ ತರ್ ತಾಂಕಾಂ ಖಾಂವ್ಕ್ ಕಿತೆಂ ದಿಲಾಂ, ಪಿಯೆಂವ್ಕ್ ಕಿತೆಂ ದಿಲಾಂ, ಬೊಸಂವ್ಕ್ ಕಿತೆಂ ದಿಲಾಂ ಮ್ಹಳ್ಳೆಂ ಜಿತ್ಲೆಂ ಪ್ರಮುಕ್ ನ್ಹಯ್ ಜಿತ್ಲೆಂ ಉಲಂವ್ಕ್ ಕಿತೆಂ ದಿಲಾಂ ಮ್ಹಳ್ಳೆಂ, ಕಿತ್ಯಾಕ್ ಖೆಲ್ಲೆಂ, ಪಿಯೆಲ್ಲೆಂ ಸಗ್ಳೆಂ ನಾಸ್ ಜಾವ್ನ್ ವೆಚೆತಸಲೆಂ, ಪುಣ್ ಏಕ್ ಬರೆಂ ಉತಾರ್ ಸದಾಂಚ್ ಉಡಾಸಾಕ್ ದವರ್ಚೆಂ.

ಜೆಜುಚಾ ಎಕಾಚ್ ಉತ್ರಾನ್ ತಾಚಿ ಆವಯ್ ಮರಿ ಮನ್ಶಾಕುಳಾಚಿ ಆವಯ್ ಜಾಂವ್ಕ್ ಪಾವ್ಲಿ, ಮ್ಹಳ್ಯಾರ್ ಮನ್ಶಾಚೊ ಸಂಬಂಧ್ ದೈವಿಕ್ ಜಾವ್ನ್ ಬದಲ್ಲೊ. ಮನಿಸ್ ಮಾತ್ರ್ ಅಪ್ಲೊ ನಿರಂತರ್ ಸಂಬಂದ್ ಲುಸಿಫೆರಾಸವೆಂ ದವರ್ನ್ ಆಸಾ ತರ್‌ಯ್ ಎಕಾ ಉತ್ರಾಪಾಟ್ಲ್ಯಾನ್ ಆಸ್ಚೆಂ ತ್ರಾಣ್ ಕೊಣೆಂಯ್ ನೆಗಾರ್ ಕರ್ಚೆಪರಿಂಚ್ ನಾ ಯಾ ಕೆಲ್ಲೆಪರಿಂಚ್ ನಾ.

ಜಾಣ್ತೆ ಸಾಂಗ್ತಾತ್ "ಉತಾರ್" ಎಕಾ ಕಿಠಾಳಾಪರಿಂ ಮ್ಹಣ್, ಜಶೆಂ ಏಕ್ ಬರೆಂ ಕಿಠಾಳ್ ರಾಂದ್ಣಿರ್ ಜಿತ್ ಶಿಜಂವ್ಕ್ ಉಪ್ಕಾರಾಕ್ ಪಡ್ತಾ ತೆಂಚ್ ಖೊಟೆಂ ಕಿಠಾಳ್ ಎಕ್ಲ್ಯಾಚೆಂ ಘರ್ ಭಸ್ಮುಂಕ್ ಸಕ್ತಾ. ತಶೆಂ ಮ್ಹಣೊನ್ ದೆವಾನ್ ರಚ್ತಾನಾ ಕಿತೆಂಯ್ ಬರೆಂ ಯಾ ವಾಯ್ಟ್ ಮ್ಹಳ್ಳೆಂ ರಚುಂಕ್ ನಾ, ಹೆಂ ಬರೆಂ ಯಾ ವಾಯ್ಟ್ ಮನ್ಶಾನ್ ಅಪಾಪ್ಲ್ಯಾ ಸ್ವಾರ್ಥಾಖಾತಿರ್, ಆಪಾಪ್ಲ್ಯಾ ಮತ್ಲಭಾಖಾತಿರ್ ಕೆಲ್ಲೊ ಯಾ ಕರ್ಚೊ ಪ್ರಕಾರ್ ಜಾವ್ನಾಸಾ.

ಸಬ್ದ್/ಉತಾರ್ ಆನಿ ಕರ್ನಿ ಏಕ್‌ಗಿ? ಆಮ್ಚಾ ಜಿಣ್ಯೆಂತ್ ಜಾಯ್ತೆಪಾವ್ಟಿಂ ಆಮಿಂ ಸಾಂಗ್ತಾಂವ್ ’ತುಕಾ ದೇವ್ ಬರೆಂ ಕರುಂ’. ಎಕಾಧಾವೆಳಾ ತಶೆಂ ಸಾಂಗ್‌ಲ್ಲ್ಯಾನ್ ಕೊಣಾಯ್ಚೇಂಯ್ ಬರೆಂ ಜಾಲ್ಲೆಂ ತರ್ ಭೋವ್ಶಾ ಮನಿಸ್ ಚಿಂತುನ್ ಹೆಂ ಉತಾರ್ ಸಾಂಗ್ತೊ ಕೊಣ್ಣಾ ನ್ಹಯ್‌ಗಿ? ’ತುಕಾ ದೇವ್ ಬರೆಂ ಕರುಂ’ ಮ್ಹಣ್ಚಾಕೀ ’ಮ್ಹಾಕಾ ದೇವ್ ಬರೆಂ ಕರುಂ’ ಮ್ಹಣ್ತೊ ಜಾವ್ಯೆತ್ ನ್ಹಯ್‌ಗಿ?

ಕಿತೆಂಯ್ ಆಸೊಂ! ಉಲವ್ಣೆಂ ಆನಿ ಕರ್ನಿ ವಿವಿಂಗಡ್ ಮ್ಹಳ್ಳೆಂ ಆಮಿಂ ಪಾತ್ಯೆತಾಂವ್ ದೆಕುನ್ಂಚ್ ಪಳೆತೆಲಿಂ ಸರ್ವಾಂ ಚಿಂತುಂಕ್ ವಚಾನಾಂತ್, ವಾಚ್‌ಲ್ಲಿಂ ಸರ್ವಾಂ ಸಮ್ಜೊಂಕ್ ವಚಾನಾಂತ್, ಉಲಯಿಲ್ಲಿಂ ಸರ್ವಾಂ ಕರುಂಕ್ ವಚಾನಾಂತ್. ನ್ಹಯ್ ತರ್ ಹ್ಯಾ ಸಂಸಾರಾಂತ್ ಗ್ರೇಸ್ತ್-ದುಬ್ಳೊ, ಭುಕೊ-ದಾಧೊಸ್, ಊಂಚ್-ಕೀಳ್, ವ್ಹಡ್ಲೊ-ಲ್ಹಾನ್ ಮ್ಹಳ್ಳೊ ಪ್ರಕಾರ್ ಉದೆತೊಚ್‌ನಾ ನ್ಹಯ್‌ಗಿ?

ಮನಿಸ್ ಜಲ್ಮಾಥಾವ್ನ್ಂಚ್ ಸುರಾತಿ, ಆನಿ ಎಕಾ ಹಂತಾರ್ ಹೊ ಸುರಾತ್‌ಯ್ ವಾಜ್ಬಿಚ್ ಸಯ್! ಕಿತ್ಯಾಕ್ ಸುರಾತ್ ನಾತ್‌ಲ್ಲೊ ತರ್ ಮನಿಸ್ ಮಿನತ್ ಕರ್ತೊನಾ, ಫಾಲ್ಯಾಂಚೆಂ ಚಿಂತೊನಾ, ಫಾಲ್ಯಾಂಕ್ ಉರಂವ್ಕ್ ನಿಯಾಳ್ತೊನಾ. ತರ್‌ಯ್ ಏಕ್ ಘಡಿಭರ್ ಮನ್ಶಾಚಾ ಸುರಾತ್‌ಪಣಾಚೆರ್ ನಿಹಾಳ್ ಕರ್ಚೊ ತರ್ - ಮನಿಸ್ ಕಿತ್ಯಾಕ್ ಸುರಾತ್ ಕರ್ತಾ?

ಏಕ್ ಆವಯ್ ಅಪ್ಲ್ಯಾ ಭುರ್ಗ್ಯಾಂನಿ ಉಪಾಶಿಂ ಪಡಾನಾಯೆ ಮ್ಹಣೊನ್ ಚಡ್ ವಾಂವ್ಟ್ ಕಿತ್ಯಾಕ್ ಕಾಡ್ತಾ? ಏಕ್ ಬಾಪುಯ್ ಆಪ್ಲ್ಯಾ ಬಾಯ್ಲ್ ಭುರ್ಗ್ಯಾಂನಿ ಫಾಲ್ಯಾಂ ಕಸ್ಟಾಂ-ಸಂಕಸ್ಟಾರ್ ಪಡಾನಾಯೆ ಮ್ಹಣೊನ್ ಕಿತ್ಯಾಕ್ ವಾಂವ್ಟ್ ಕಾಡ್ತಾ? ಏಕ್ ಭಾವ್ ಅಪ್ಲ್ಯಾ ಭಯ್ಣಿಚೊ ಫುಡಾರ್ ಬರೊ ಜಾಯ್ಜಯ್ ಮ್ಹಣ್ ಕಿತ್ಯಾಕ್ ಆಂವ್ಡೆತಾ?

ಸರ್ವ್ ವಾಜ್ಬಿ ಸುರಾತ್. ಕಿತ್ಯಾಕ್ ಮ್ಹಳ್ಯಾರ್ ತಾಮ್ಚಾ ಹ್ಯಾ ಸುರಾತಾನಿಮ್ತಿಂ ಮಾತ್ರ್ ತಾಂಚಾನ್ ಪುಂಜಾವ್ನ್ ದವ್ರುಂಕ್ ಸಾಧ್ಯ್ ಜಾತಾ. ಉತರ್ ಪ್ರಾಯೆರ್ ಭೋವ್ಶಾ ಹೆಂ ಪುಂಜಾಂವ್ಚೆಂ ಕಾಮ್ ತಿತ್ಲೆಂ ಸಲೀಸ್ ನ್ಹಯ್. ದೆಕುನ್ ಹರ್‍ಯೆಕ್ ಮನಿಸ್ ಅಪಾಪ್ಲ್ಯಾ ಜಿಣ್ಯೆಂತ್ ಪುಂಜಾಂವ್ಚಾ ಸಂದರ್ಭಾರ್ ಜಿತ್ಲೆಂ ಪುಂಜಾಂವ್ಕ್ ಸಕ್ತಾ ತಿತ್ಲೊಚ್ ತೊ ಉತರ್ ಪ್ರಾಯೆರ್ ತೃಪ್ತ್ ಜಾಂವ್ಕ್ ಪಾವ್ತಾ. ಮ್ಹಳ್ಯಾರ್ ಮನಿಸ್ ಅಪ್ಲ್ಯಾ ಜಿಣ್ಯೆಚಾ ಶೆವೊಟಾಕ್ ಪಾವ್ತಚ್ ಜರ್‌ತರ್ ನಿಹಾಳ್ ಕರಿತ್ ಅಪ್ಲ್ಯಾ ಜಿಣ್ಯೆಂತ್ ಅಪ್ಣಾನ್ ಕಿತೆಂ ಸಾಧನ್ ಕೆಲೆಂ?

ತರ್ ತಾಕಾ ತಾಣೆಂ ಪುಂಜಾಯಿಲ್ಲ್ಯಾಚೊ ಉಡಾಸ್ ಕಾಡ್ತಾನಾ ತಾಚಾ ದೊಳ್ಯಾ-ಕಾಳ್ಜಾ-ಮನಾಕ್ ಭೊಗ್ತಾ. ಜೊ ಕೊಣ್ ಲೌಕಿಕ್ ಸಂಗ್ತಿಂಕ್ ಮ್ಹಣ್ಜೆ ಆಸ್ತ್-ಬದಿಕ್, ಭಾಂಗಾರ್-ಸಿಂಗಾರ್ ಪುಂಜಾಯ್ತಾ ತೊ ಆಪ್ಲ್ಯಾ ದೊಳ್ಯಾಂಕ್-ಮತಿಕ್ ಸಮಧಾನ್ ಭೊಗ್ತಾ, ಪುಣ್ ಜೊ ಕೊಣ್ ಹೆರಾಂಚೆಂ ಬರೆಂಪಣ್ಂಚ್ ಅಪ್ಲೆಂ ಬರೆಂಪಣ್ ಮ್ಹಣ್ ಚಿಂತುನ್ ಪುಂಜಾಯ್ತಾ ತೊ ಕಾಳ್ಜಾಂತ್ ಸಮಧಾನ್ ಭೊಗ್ತಾ.

ಕಿತ್ಯಾಕ್ ಮ್ಹಳ್ಯಾರ್ ಆಮ್ಕಾಂ ಸರ್ವಾಂಕ್ ಎಕಾ ದಿಸಾ ತ್ಯಾ ಎಕಾ ದಿಸಾಕ್ ಫುಡ್ ಕರುಂಕ್ ಆಸ್ತೆಲೆಂ ಜ್ಯಾ ದಿಸಾ ಆಮಿಂ ಕೆಲ್ಲ್ಯಾ ಸಾಧಾನಾಂಚೆರ್ ತೃಪ್ತಿ ಭೊಗಿಜಾಯ್ ಶಿವಾಯ್ ಚುರ್ಚುರೆ ನ್ಹಯ್. ತ್ಯಾ ದೆಕುನ್ ಆಮಿಂ ಕಿತ್ಲೆಂ ಜೊಡ್ಲಾಂ, ಯಾ ಕಿತ್ಲೆಂ ಹೊಗ್ಡಾಯ್ಲಾಂ ಮ್ಹಳ್ಳೆಂ ಪ್ರಮುಕ್ ನ್ಹಯ್, ಬಗಾರ್ ಅಪ್ಲ್ಯಾ ಕೊಶೆಡ್ದಾಕ್ ಅಪುಣ್ ಕಿತ್ಲೊಂ ಖಾಲ್ ಜಾವ್ನ್ ತೆಂ ಕೆಲಾಂ ತೆಂ ಪ್ರಮುಖ್ ಜಾವ್ನಾಸಾ.

ದೆಕುನ್ ಸಂಸಾರಾಂತ್ ದೊಳ್ಯಾಂಕ್ ಬರೆಂ ದಿಸ್ಚೆಂ ವಿಂಚಿನಾಕಾ, ಕಾಳ್ಜಾಕ್ ಬರೆಂ ದಿಸ್ಚೆಂ ವೀಂಚ್ ತುಂ ಕಾಳ್ಜಾಂತ್ ಕೆದಿಂಕ್‌ಚ್ ನಿರಾಶಿ ಜಾಂವ್ಚೊನಾಂಯ್.

- ವಲ್ಲಿ ಕ್ವಾಡ್ರಸ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

ಮುಕ್ತ್ ಉಲವ್ಪ್ ವಾ ಸವಾಯೆಚೆಂ (ಚೀಪ್) ಉಲವ್ಪ್?

ಬಿಜಿ ಆಸಾಯ್‌ಗೀ?

ಕಸ್ಟ್