"ಸಂಸಾರಾಂತ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

"ಸಂಸಾರಾಂತ್ ತುಂ ಜಿತ್ಲೊ ಬರೊ ಜಾಂವ್ಕ್ ವೆತಾಯ್ ತಿತ್ಲೆಚ್ ಮಾಪಾನ್ ತುಕಾ ವಾಯ್ಟ್ ಘೆಂವ್ಕ್‌ಯ್ ಕಳಾಜಯ್."

ಸಾವ್ಕಾರ್‌ಶಾಹಿ ಆನಿ ನೌಕರ್‌ಶಾಹಿ

ವರಸ್ : 2006

ಅಂಕೊ : 20

ಮಯ್ನೊ : ಫೆಬ್ರೆರ್

ಸಂಪಾದಕೀಯ್ - 20.

ವಲ್ಲಿ ಕ್ವಾಡ್ರಸ್

ಸಂಸಾರಾಂತ್ ಜಿಯೆಂವ್ಚಾ ಹರ್‍ಯೆಕಾ ಮನ್ಶಾಕ್ ಚಿಂತ್ಪಾ ಸಕತ್ ಆಸಾ ತರ್ ತೊ ಕೊಣಾವಿಶಿಂ ಚಿಂತಿನಾ ತರ್‌ಯ್ ಅಪ್ಣಾವಿಶಿಂ ಚಿಂತಿನಾಸ್ತಾಂ ಬಿಲ್ಕುಲ್ ರಾವಾನಾ. ಅಪ್ಣಾನ್ ವ್ಹಡ್ ಜಾಯ್ಜಯ್, ಅಪ್ಣಾಕ್ ಮಾನ್-ಮರ್‍ಯಾದ್ ಮೆಳಾಜಯ್, ಅಪ್ಣಾಲಾಗಿಂ ಆಸ್ತ್-ಬದಿಕ್ ಆಸಾಜಯ್, ಅಪ್ಣಾಕ್ ಹೆರಾಂನಿ ಖಾಲ್ತಿಮಾನ್ ಘಾಲಿಜಾಯ್ ಮ್ಹಣ್. ಹ್ಯಾ ಖಾತಿರ್ ತೊ ಅಪ್ಲ್ಯಾ ಸಕ್ತೆನ್ ಜಾಂವ್ಚೆಂ ಕಿತೆಂಯ್ ಕರುಂಕ್ ಪಾಟಿಂ ಸರಾನಾ. ಕಸಲೆಯ್ ಸಾಕ್ರಿಫಿಸ್ ಕರುಂಕ್ ಯಾ ಕೊಣಾಚಿಯ್ ಬಲಿ ಭೆಟಂವ್ಕ್ ಯಾ ಹೆರ್ ಕಿತೆಂಯ್.

ಸಮಾಜ್ ಮ್ಹಳ್ಯಾರ್ ಕೊಣ್?
ಸಂಪ್ಯಾ ಉತ್ರಾಂನಿ ಸಾಂಗ್ಚೆಂ ತರ್ ಸಮಾಜ್ ಮ್ಹಳ್ಯಾರ್ ಎಕಾ ಪ್ರಾಂತ್ಯಾಂತ್ ಜಿಯೆಂವ್ಚೊ ಲೋಕ್.

ಆಮಿ ಸಮಾಜ್ ಕಿತ್ಯಾಕ್ ಭಾಂದ್ತಾಂವ್?
ಪ್ಲೇಟೊಚಾ ಸಮಾಜ್‌ವಾದಪ್ರಕಾರ್ ಸಮಾಜೆಕ್ ಎಕಾ ನಿರ್ದಿಶ್ಟ್ ಇರಾದ್ಯಾನ್ ರಚ್ಲ್ಯಾ. ಕೊಣ್‌ಯ್ ಎಕ್ಲೊ ಯಾ ಎಕ್ಲೆಂ ಜಾವ್ನ್ ಸಗ್ಳೆಂ ಸಾಧನ್ ಕರುಂಕ್ ಸಕಾನಾ ದೆಕುನ್ ವಿವಿಂಗಡ್ ಕಾಲೆತಿಚಾ, ವಿವಿಧ್ ಪ್ರಭೇಧಾಚಾ ಮನ್ಶಾಂಕ್ ಎಕ್ಟಾಂವ್ನ್ ತಾಂಕಾಂ ಸಾಮಾನ್ಯ್ (Common) ವೃತ್ತಿ ದಿಲಿ. ಹಾಂವ್ ಮೊಚಿ ಜಾತಾಂ, ತುಂ ಕೆಳ್ಶಿ ಜಾ, ತಿಂ ಶಿವೊಣ್ಗಾರಾಂ ಜಾತೆಲಿಂ ಆನಿ ಹಿಂ ಬೆಸಾಯ್‌ಗಾರಾಂ ಜಾತೆಲಿಂ. ಆನಿ ಹಾಚೊ ಪರಿಣಾಮ್ ಜಾವ್ನ್ ಸಮಾಜೆಂತ್ ವೃತ್ತೆ ತೆಕಿದ್ ಲ್ಹಾಲ್ಹಾನ್ ಸಮುದಾಯ್ ಜಾವ್ನ್ ರುತಾಂ ಜಾಲೆ.

ವೆಳಾಕಾಳಾ ಫರ್ಮಾಣೆ ಹ್ಯಾ ಪ್ರಕಾರಾಂನಿ ಹೊಚ್ ಮನೋಧರ್ಮ್ ಅಪಾಪೆಂ ಉದೆಲೊ, ಅಪುಣ್ ಯಾ ಅಪ್ಲಿ ವೃತ್ತಿ ಉಂಚ್ಲಿ ಆನಿ ಹೆರಾಂಚಿ ಕೀಳ್ ಮ್ಹಳ್ಳೊ ಮನೋಧರ್ಮ್, ಗ್ರೇಸ್ತ್-ದುಬ್ಳೊ ಮ್ಹಳ್ಳೊ ಪ್ರಕಾರ್ ಅಪಾಪಿಂಚ್ ಉದೆಲೊ, ಶಿಕ್ಪಿ-ಅಶಿಕ್ಪಿ ಮ್ಹಳ್ಳೊ, ಬುಧ್ವಂತ್-ದಾಡ್ಡೊ ಮ್ಹಳ್ಳೊ ಪ್ರಕಾರ್ ಉಭ್ಜಾತಾನಾ ಬುಧ್ವಂತ್ ಆಸ್ಚಾಂನಿ ಅಪ್ಲೆಂ ಬೊಳ್ಕೆಂ ಭರುಂಕ್ ಧರ್ಲೆಂ, ದುಬ್ಳ್ಯಾಂನಿ ಸತಾ-ನಿತಿಕ್ ವೆಂಗುನ್ ಧರ್ಲೆಂ ತರ್‌ಯ್ ದಿಸಾನ್ ದೀಸ್ ದುಬ್ಳಿಂಚ್ ಜಾವ್ನ್ ಗೆಲಿಂ. ದಿಸಾನ್‌ದೀಸ್ ಹ್ಯೆ ಪರಿಗತೆಂತ್ ದುಬ್ಳೆ ಗ್ರೇಸ್ತಾಂಚಾ ಹಾತಾಸಕ್ಲಾ ಕಾಮ್ ಕರಿಲಾಗ್ಲೆ, ಅಪ್ಲ್ಯಾ ಗರ್ಜಾಂಕ್ ಗ್ರೇಸ್ತಾಂಚೆರ್ ಲಬ್ದೊಂಕ್ ಲಾಗ್ಲೆ, ಆನಿ ಗ್ರೇಸ್ತ್ ದುಬ್ಳ್ಯಾಕ್ ಅಪ್ಲೆಂ ಆಯ್ದ್ ಕರುನ್ ಅಪ್ಲ್ಯಾ ಫಾಯ್ದ್ಯಾಖಾತಿರ್, ಆಪ್ಲ್ಯಾ ಸ್ವಾರ್ಥಾಖಾತಿರ್ ಗಳ್ಸಿಲಾಗ್ಲೊ, ಆನಿ ಅಶೆಂ ಉದೆಲಿ ಭಂಡ್ವಾಳ್‌ಶಾಹಿ ಪರಿಗತ್.

ಭಂಡ್ವಳ್‌ಶಾಹಿ ಪರಿಗತೆಂತ್ ’ಆಮಿ’ ಕೆದಿಂಕ್‌ಚ್ ವಿಂಗಡ್ ಕರುಂಕ್ ಜಾಯ್ನಾ ತಸಲ್ಯಾ ಪರಿಗತೆಚ್ಯೊ ಕಟ್‌ಪುತ್ಳ್ಯೊ ಜಾವ್ನಾಸಾಂವ್. ಕೊಣ್ ಹೆಂ ಒಪುನ್ ಘೆಂವ್ ವಾ ಘೆನಾಸ್ತಾಂ ರಾವೊಂ. ಹರ್ ಮನಿಸ್ ಹೆಂಚ್ ಆಶೆತಾ, ಅಪುಣ್ ಕಿತ್ಲೊ ವರ್ತೊ ಮ್ಹಳ್ಳೆಂ ಧಾಖಂವ್ಕ್ ಅಪ್ಲ್ಯಾ ಸಕ್ಲಾ ಕಿತ್ಲಿಂ ಆಸಾತ್ ಮ್ಹಳ್ಳೆಂ ಸಂಸಾರಾಕ್ ರುಜು ಕರ್ಚೆಂ. ಮ್ಹಳ್ಯಾರ್ ಕೊಣಾಯ್ಚಾಯ್ ಘರಾಂತ್ ದೊಗಾಂ ಕಾಮಾಚಿಂ ಆಸಾತ್ ತರ್ ತೊ ಗ್ರೇಸ್ತ್, ಪುಣ್ ಕೊಣಾಚಾ ಘರಾಂತ್ ಚಾರ್ ಕಾಮಾಚಿಂ ಆಸಾತ್ ತರ್ ತಿಂ ಅನಿಕ್‌ಯ್ ಗ್ರೇಸ್ತ್.

ಹ್ಯಾ ಭಂಡ್ವಾಳ್‌ಶಾಹಿ ಪರಿಗತೆಂತ್ ಮನಿಸ್ ಮನ್ಶಾಕ್‌ಚ್ ಅಪ್ಲೊ ಗುಲಾಮ್ ಕರುಂಕ್ ಪಾವ್ಲೊ, ಹಿ ಪರಿಗತಿ ಸುಧಾರುಂಕ್ ಕಿತ್ಲ್ಯಾ ಸಮಾಜ್‌ಸೆವೆಚಾ ಸಂಸ್ಥ್ಯಾಂನಿ ವಾವ್ರ್ ಕೆಲೊ ತರ್‌ಯ್ ಹಿ ಭಂಡ್ವಾಳ್‌ಶಾಹಿ ಪರಿಗತ್ ಕೆದಿಂಕ್‌ಚ್ ಬದಲ್ಚಿನಾ. ಬದ್ಲೊಂಕ್ ಮನಿಸ್ ಸೊಡ್ಚೊಯ್ ನಾ. ಕಿತ್ಯಾಕ್ ಅಶೆಂ ಮನಿಸ್ ಮನ್ಶಾಕ್ ಕಟ್‌ಪುತ್ಳಿ ಕರ್ಚೆಮುಖಾಂತ್ರ್ ಊಂಚ್ ಜಾತಾ ಮ್ಹಣ್ ಚಿಂತಾ, ಸಮಾಜೆಂತ್ ಮಾನ್-ಪ್ರತಿಶ್ಟಾ ಮೆಳ್ತಾ ಮ್ಹಣ್ ಲೆಕ್ತಾ. ಅಪ್ಣಾಕ್ ಅಪುಣ್ ಸಾವ್ಕಾರ್ ಮ್ಹಣ್ ಚಿಂತಾ. ಪುಣ್ ನೌಕರ್ ನಾತ್‌ಲ್ಲ್ಯಾ ಘರಾಂತ್ ಸಾವ್ಕಾರ್ ಜಾಂವ್ಚೊ ತರ್‌ಯ್ ಕಸೊ?

ಆಯ್ಲೆವಾರ್ ಕುವೆಯ್ಟಾಂತ್ ಆಸ್ಚಾ ಎಕಾ ಮಂಗ್ಳುರಿ ಕುಟ್ಮಾಲಾಗಿಂ ಉಲಯ್ತಾನಾ ತಾಂಚಾ ಘರಾಂತ್ ಪಾಟ್ಲ್ಯಾ ಇಕ್ರಾ ವರ್ಸಾಂ ಥಾವ್ನ್ ಕಾಮ್ ಕರುನ್ ಆಸ್ಚಾ ಬಾಯ್ಲೆಚೊ ಉಲ್ಲೇಕ್ ತಾಣಿಂ ಕೆಲೊ. ಆನಿಂ ತಾಚೊ ಮಿಸ್ತೆರ್ ಅಸೊ ಆಸಾ; ತ್ಯಾ ಬಾಯ್ಲೆಕ್ ಹಾಣಿಂ ಕೆದಿಂಕ್‌ಚ್ ಕಾಮಾಚಾಪರಿಂ ಪಳೆಂವ್ಕ್ ನಾ, ಘೊವ್ ಬಾಯ್ಲ್ ದೊಗಾಂಯ್ ಕಾಮ್ ಕರ್ತಾತ್ ಆನಿ ತಾಂಚಾ ದೊಗಾಂ ಬುರ್ಗ್ಯಾಂಚಿ ಜತನ್ ತಿ ಬಾಯ್ಲ್ ಕರ್ತಾ. ಜೆದ್ನಾಂ ಹಾಂಕಾ ಕಾಮ್ ಕರ್ಚಾ ಜಾಗ್ಯಾರ್ ಬೋನಸ್ ಮೆಳ್ತಾ, ತಶೆಂಚ್ ತಿಂ ತ್ಯಾ ಕಾಮಾಚಾಕ್‌ಯ್ ಬೋನಸ್ ದಿತಾತ್, "ಜಶೆಂ ಆಮಿ ಆಮ್ಚೊ ಸಾಂಭಾಳ್ ವಾಡಾಜಯ್ ಮ್ಹಣ್ ಆಶೆತಾಂವ್ ತಸಲಿಚ್ ಆಶಾ ತ್ಯಾ ಕಾಮಾಚಾ ಬಾಯ್ಲೆಕ್‌ಯ್ ಆಸ್ಚಿ ಸಹಜ್" - ಹೆ ಆದರ್ಶ್‌ವಾದಿ ವಿಚಾರ್ ಆಸ್ಚೆ ಭೋವ್ಶಾ ಭೋವ್ ಥೊಡ್ಯಾಂಕ್ ಮಾತ್ರ್.

ಮನಿಸ್ ಮತಿಂತ್ ಕಿತ್ಲೆಂಯ್ ಕುಸ್ಡೆಂ ದವ್ರುನ್ ತರ್‌ಯೀ, ದಿಸಾಕ್ ಕಿತ್ಲಿಂ ಕೊಂತಾಂ ತೇರ್ಸ್ ಕರ್ತಾ, ಹಾಫ್ತ್ಯಾಕ್ ಕಿತ್ಲೆ ಪಾವ್ಟಿಂ ಮಿಸಾಕ್ ವೆತಾ ಮ್ಹಳ್ಳ್ಯಾಚೆರ್ ಮನ್ಶಾಕ್ ಬರೊ ಮ್ಹಣೊಂಕ್ ಜಾಯ್ನಾ, ಬಗಾರ್ ತಾಚಾ ಕಾಳ್ಜಾಂತ್ ಕಿತ್ಲೆಂ ನಿತಳ್ ವಿಚಾರ್ ಆಸಾತ್ ತಾಂಚೆರ್ ಹೊಂದ್ವೊನ್ ಆಸಾ ಮ್ಹಳ್ಳೆಂ ಖಂಡಿತ್. ಜೆದ್ನಾಂ ಪರ್‍ಯಾಂತ್ ಮನಿಸ್ ಹೆರ್ ಮನ್ಶಾಕ್ ಅಪ್ಲೆ ಸಮಾನ್ ಜಾವ್ನ್ ಲೆಖುಂಕ್ ಸಕಾನಾ, ತೆದೊಳ್ ಪರ್‍ಯಾಂತ್ ಸಂಸಾರಾಂತ್ ಎಕಾ ನ್ಹಯ್ ಎಕಾ ರಿತಿನ್ ಅಸಲಿಂಚ್ ಘಡಿತಾಂ ಪಳೆಂವ್ಕ್ ಮೆಳ್ಚಾಂತ್ ಕಾಂಯ್ ನವಾಲ್ ಆಸ್ಚೆಂ ನಾ.
- ವಲ್ಲಿ ಕ್ವಾಡ್ರಸ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

मुक्त उलवप वा सवायेचें (चीप) उलवप?

बिजी आसाय‌गी?

ಕಸ್ಟ್