ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸವಾಲಾಂಕ್ ಜಾಪಿ
ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ
ದಿವೊ ಹಾಫ್ತ್ಯಾಳೆಂ
ಮಿತ್ರ್ ಹಾಫ್ತಾಳೆಂ
ಸೆವಕ್ ಮಯ್ನ್ಯಾಳೆಂ
ಯಾತ್ರಿ ವಿಶ್ಯಾಂತ್
ಕೊಂಕ್ಣೆಂತ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಉದೆವ್ನ್ ಆಯಿಲ್ಲ್ಯಾ ಥೊಡ್ಯಾ ಭರ್ವಶ್ಯಾಚ್ಯಾ ಬರವ್ಪ್ಯಾಂ ಪಯ್ಕಿಂತ್ಲೊ ಎಕ್ಲೊ ’ಮೆಲ್ವಿನ್ ಪೆರ್ನಾಲ್’ ಕವಿ, ನಾಟಕಿಸ್ತ್, ಕಾಣ್ಯೆಗಾರ್, ವಿಡಂಬನ್ಕಾರ್ ತಶೆಂಚ್ ವಾವ್ರಾಡಿ. ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಸಯ್ತ್ ಹಾಣೆಂ ಅಪ್ಲೊ ಹಾತ್ ಭಂವ್ಡಾಯ್ಲಾ ದೆಖುನ್ ಕೊಂಕ್ಣಿ ಲೊಕಾಂಚಾ ಕಾಳ್ಜಾಚೊ ಉಲೊ ಲಾಗ್ಶಿಲ್ಯಾನ್ ಆಯ್ಕೊಂಕ್ ಸಕ್ತಾ. ಹ್ಯಾ ವರ್ಸಾಂತ್ ವಾಚ್ಪ್ಯಾಂಚ್ಯಾ ಸವಾಲಾಂಕ್ ಅಪುರ್ಭಾಯೆಚ್ಯೊ ಜಾಪಿ ದೀಂವ್ಕ್ ಹೊ ಸಕ್ತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ.
[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]
ಜಾಪಿ ದಿತಾ: ಯಾತ್ರಿ
1. ಸಂಸಾರಾಚಿಂ ಸಾತ್ ಅಚರ್ಯಿಂ ಪರ್ಗಟ್ ಜಾಲ್ಲೆಪರಿಂ ಆಮ್ಚಾ ಕೊಂಕ್ಣೆಂತ್ಲಿಂ ಸಾತ್ ಅಚರ್ಯಿಂ ಪರ್ಗಟ್ ಕೆಲ್ಯಾರ್ ಕಶೆಂ? [ವಾನ್, ವಾಮಂಜೂರ್]
ಜಾಪ್: ಗಾಂವಾಂತ್ ಎಸ್.ಎಮ್.ಎಸ್.ರ್ ಎದೊಳ್ಚ್ ಹಿಶಿನ್ ತಿಶಿನ್ ಪಾಶಾರ್ ಜಾಲ್ಯಾಂತ್. ಪರ್ಗಟ್ ಕರುಂಕ್ ಖಂಚ್ಯಾ ಸಂಪಾದಕಾಚ್ಯಾ ಕಾಳ್ಜಾಂತ್ ಊಬ್ ಆಸಾ ಪಳಯ್ಜೆ.
2. ಕೊಂಕ್ಣೆಂತ್ ’ಮಿಸ್ಸ್ ಕೊಂಕಣಿ’, ’ಮಿಸ್ಟರ್ ಕೊಂಕಣಿ’ ಸ್ಪರ್ಧೆ ಆಸಾ ಕೆಲ್ಯಾರ್ ಕಿತೆಂ ಜಾಯ್ತ್ ಮಾಮಾ? [ಸೆವ್ರಿನ್, ಶಿರ್ವಾಂ]
ಜಾಪ್: ಜಾಂವ್ಚೆ ಕಿತೆಂ..? ಜೊಕ್ತೆ ಪ್ರಾಯೋಜಕ್ ಮೆಳಾನಾಸ್ತಾಂ ಸ್ಪರ್ಧೊ ಚಲಯ್ತೆಲ್ಯಾನ್ ವಾಟೆರ್ ಪಡಾಜಾಯ್ ಪಡಾತ್.
3. ಕೊಂಕ್ಣೆಂತ್ ವಿಮರ್ಸೊಚ್ ನಾ ಮ್ಹಣ್ತೆಲ್ಯಾಂಚ್ಯಾ ಬರ್ಪಾಂಚೆರ್ ವಿಮರ್ಸೊ ಕೆಲ್ಯಾರ್ ತಾಂಕಾಂ ತಾಪ್ತಾ - ಅಶೆಂ ಕಿತ್ಯಾಕ್ ಯಾತ್ರಿ? [ಸಿ.ಎಲ್.ಕರಾಮಾ]
ಜಾಪ್: ಕಿತ್ಲಿ ವ್ಹಡ್ಲಿ ಚೂಕ್ ಕೆಲ್ಯಾರೀ ಫಾಶಿ ಘೆಂವ್ಕ್ ತಯಾರ್ ಆಸಾಯ್ಗೀ, ಸಾಂಗ್ ಮ್ಹಾಕಾ..?
4. ಪಾದ್ರಿಂಕ್ ಪರ್ಗಾಂವಾಂತ್ ವಚೊನ್ ದುಡು ಎಕ್ಟಾಂಯ್ ಕರುಂಕ್ ಬಿಸ್ಪಾಚಿ ಪರ್ವಣ್ಗಿ ಮೆಳ್ಚೆ ತಿತ್ಲೆ ಸಲೀಸಾಯೆನ್, ಜೆದ್ನಾಂ ಗರೀಬಾಂಕ್ ಕುಮೊಕ್ ಜಾಯ್ ಪಡ್ಲಿ ತರ್ ಭಿಸ್ಪಾಥಾವ್ನ್ ಕುಮೊಕ್ ಮೆಳಾತ್ವೆ ಯಾತ್ರಿ? [ಸಹನಾ, ಕುವೇಯ್ಟ್] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾಪ್: ಗರೀಬಾಂಕ್ ದೇವ್ ಆಸಾ, ಸಹನಾ. ಪುಣ್ ಗ್ರೇಸ್ತಾಂಕ್ ಕೊಣೆಂ ತರೀ ಸರ್ಗ್ ಮೆಳಾಶೆಂ ಕರಿಜೆನೇ...???
5. ಥೊಡೆ ಆಡ್ ನಾಂವಾಂನಿ ಸವಾಲಾಂ ವಿಚಾರ್ತಾತ್ ಕಿತ್ಯಾಕ್ ಕುಂಪಾರೆ? [ಕುಮಾದ್ರ್, ಕುಂದಾಪುರ್]
ಜಾಪ್: ತುಜೆಬರಿಚ್ ಥೊಡ್ಯಾಂಕ್ ’ಗಾಗ್ರೊ - ಭಾಜು’ ಆಸೊನೀ ಲಜ್..!
6. ಸ ಇಂಚ್ ರೂಂದ್ ವೀಸ್ ಇಂಚ್ ಲಾಂಬ್ ಬರಯಿಲ್ಲೆಂ ಕವಿತಾ ಜಾತಾಗಿ ಇರ್ಮಾಂವ್? [ಬೆಪ್ಪು ತಕ್ಕಡಿ, ಬಪ್ಪನಾಡು]
ಜಾಪ್: ಹೆಂ ’ವಿಲ್ಸನ್ ಕಟೀಲ್’ ಚ್ಯಾ ಮುಕಾರ್ ಸಾಂಗ್ಶಿ ತರ್, ತುಜಿ ’ತಕ್ಕಡಿ’ ಗಿರ್ಪಿತ್ ಸಾಯ್ಬಾ.
7. ಗಡಂಗಾಂ ಬಂಧ್ ಜಾಲ್ಯಾರ್ ಆಮ್ಚಿ ಗತ್ ಕಹಲಿ ಸಾಡ್ವಾನೊ? [ಪರ್ಪೆಲ್ ಗುಡ್ಡ]
ಜಾಪ್; ’ಆಮ್ಚಿ’ ಮ್ಹಳ್ಯಾರ್ ಕೊಣಾಚಿ..? ಮ್ಹಾಕಾ ’ತೊಟ್ಟೆ’ ಪಿಯೆವ್ನ್ ಸವಯ್ ನಾಂ ಸಾಯ್ಬಾ, ಆಮ್ಚೊ ಪಯ್ಲೆಂ ಥಾವ್ನ್ಯೀ ಅಪುಟ್ ಕಾಜುಚೊ.
8. ಫಿರ್ಗಜೆಂನಿ ನವಿ ಇಗರ್ಜ್, ಇಸ್ಕೊಲ್, ಹೋಲ್, ಪಾದ್ರಿಚೆಂ ಘರ್ ಆನಿ ಘಾಂಟಿಚಿ ತೋರ್ ಭಾಂದ್ಲ್ಲ್ಯಾಂಕ್ ಭಾಂದ್ತೆಲ್ಯಾಂಕ್ ಅನಿ ಕಾಂಯ್ ಭಾಂದುಂಕ್ ಸುಚನ್ ದಿಶಿಗೀ ಯಾತ್ರಿ? [ಅರ್ಧೊ ಪಾದ್ರಿ] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾಪ್: ಜರೂರ್! ಸಿಮಿತ್ರೆಂತ್ ಫೋಂಡ್ ಭಾಂದುಂಕ್!!
9. ಥೊಡೆ ಬರವ್ಪಿ ಆಪ್ಲ್ಯಾ ಅಂಕಣಾಂನಿ ಕೊಣಾ ಕೊಣಾಚೆರ್ ಜಾಳ್ ವೊಂಕೊನ್ ಬರಯ್ತಾತ್ ಮುಂಗಾ - ಹಿ ಕಸಲಿ ಪಿಡಾ? [ವಿನ್ಸಿ, ಬೆಂಗ್ಳುರ್]
ಜಾಪ್: ಭೋವ್ಶಾ ಘರಾಂತ್ ಜಾಳ್ ವೊಂಕುಂಕ್ ಗೆಲ್ಯಾರ್ ಮಾಜರ್ ಚಾಬೊಂಕ್ ಆಸಾ, ಪೆಟೊ ಘಾಸ್ ಘಾಲುಂಕ್ ಆಸಾ ವಾ ಬಾಯ್ಲ್ ಕಾಯ್ಲತ್ಯಾರ್ ದಾಗುನ್ ದವ್ರುಂಕ್ ಆಸಾ - ದೆಕುನ್ ಬಾವ್ಡ್ಯಾ ವಾಚ್ಪ್ಯಾಂಚ್ಯಾ ಮಾತ್ಯಾರ್ ತರೀ ಥಾಪ್ಯಾಂ ಮ್ಹಣ್ ಅಶೆಂ ಕರ್ತಾತ್ ಜಾವ್ಯೆತ್. ಆಮ್ಚೆ ವಾಚ್ಪಿ ಕಶೇಯ್ ಘೊರೆಂವ್ಚೆ ಪಳೆ. ತಾಂಕಾಂ ಕಸೋಯ್ ಫರಕ್ ಪಡಾನಾ.
10. ಹಾಂಗಾ ಥೊಡೆ ಅಪ್ಲಿಚ್ಚ್ ಪಾಟ್ ಥಾಪುಡ್ನ್ ವ್ಹಡ್ಲೆ ಮ್ಹಣ್ತಾತ್ಮೂ? [ಗ್ರೆಗ್ ಶಾರ್ಜಾ]
ಜಾಪ್: ಪೊಕೊಳ್ ಮನ್ಶಾಸಂಯ್ಬಾಚಿ ಸವಯ್ ತಿ. ಜೆದ್ನಾಂ ವಾಟೆವಯ್ಲೆಂ ಸುಣೆಂಯ್ ಹುಂಗಾನಾಸ್ಚಾ ವೆಳಾರ್ ಅಸಲಿಂ ಕಾಮಾಂ ಕರ್ನ್ ಸಂಸಾರಾಕ್ ಅಪುಣ್ ಕಿತ್ಲೆ ಸುಭಾಗಿ ಮ್ಹಣ್ ಧಾಖಂವ್ಚಿಂ ಶೀಂತ್ರಿ ಬೂದ್ ಹಿ.
11. ಅಪ್ಣಾಚೆಂ ’ಬರೆಂ’ ಸಾಹಿತ್ಯ್, ಹೆರಾಂಚೆಂ ’ಸಾರೆಂ’ ಸಾಹಿತ್ಯ್ ಮ್ಹಣ್ಚಾಂಕ್ ತುಂ ಕಿತೆಂ ಸಲ್ಹಾ ದಿತಾಯ್? [ವಿಲ್ಸನ್ ರೊಡ್ರಿಗಸ್, ಪಂಡಿತ್ಹೌಜ್]
ಜಾಪ್: ಆಪ್ಲೆಂ ಸಾರೆಂ ಹೆರಾಂನಿ ಪಾರ್ಕಿಲ್ಯಾರೀ ಸಾಂಗ್ಚೆಂ ನಾಕಾ ಮ್ಹಳ್ಳ್ಯಾ ಭಿಂಯಾನ್ ಕರ್ಚಿಂ ಕಾರ್ಭಾರಾಂ ಹಿಂ. ಬರೆಂ ಸಾಹಿತ್ಯ್ ರಸ್ಚಾಂಕ್ ಹೊಗ್ಳಾಪ್ ಗರ್ಜ್ ನಾ.
12. ಆಜ್ಕಾಲ್ ಕೊಂಕ್ಣಿ ಪತ್ರಾಂ ಚಡ್ಲ್ಯಾಂತ್ ಪುಣ್ ಕೊಂಕ್ಣಿ ವಾಚ್ಪಿ ಕಿತ್ಯಾಕ್ ಚಡಾನಾಂತ್? [ಸಿರಿಲ್ ಬಾರ್ಕುರ್] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಜಾಪ್: ಕೊಂಕ್ಣಿ ಪತ್ರಾಂನಿ ’ವಾಚ್ಚೆಂ’ ಆನಿ ’ದೆಕ್ಚೆಂ’ ತಸಲೆಂ ಕಾಂಯ್ ನಾಂ ಮ್ಹಣ್ತಾ,, ಹಾಂಗಾ ಎಕ್ಲೊ..!
13. ’ಅನಾಮಿಕ್ ಅಮಾಲಿ’ ಆಸ್ಚೆಪರಿಂ ’ಅನಾಮಿಕ್ ಪ್ರೇಮಿ’ ಪಂಗಡ್ ಘಡುಂಕ್ ಹಾಂವ್ ಚಿಂತುನ್ ಆಸಾಂ - ತುಂ ಹುದ್ದೊ ಘೆಂವ್ಕ್ ಯೆಶಿವೇ ಯಾತ್ರಿ? [ಸ್ಟೀಫನ್ ಲೋಬೊ]
ಜಾಪ್: ’ಅನಾಮಿಕ್ ಪ್ರೇಮಿ’ ಂಕ್ ಆಸ್ಲ್ಲೆಂ ಅಮಾಲ್ ಪುರೊ ಸಾಯ್ಬಾ, ಪಾಪ್ ತಾಂಕಾಂ ಆನಿಕೀ ತೊಂದ್ರೆ ದೀನಾಕಾ.
14. ಕೊಂಕ್ಣೆಕ್ ಲಾಗ್ಲ್ಲಿ ಪನ್ವಾತಿ ಗೆಲ್ಲೆಪರಿಂ ನಾ ಮ್ಹಣ್ತಾ ಹಾಂಗಾ ಎಕ್ಲೊ ಜಾಣ್ತೊ. ಆತಾಂ ಕಿತೆಂ ಕರಿಜೆ ಹಾಕಾ ಮ್ಹಣ್ಚೆಂ ತುವೆಂ? [ಸಿಸಿಲಿಯಾ, ಮಸ್ಕತ್]
ಜಾಪ್: ’ತುವೆಂ ಸಾಂಗ್ಚೆಂ ಸಾರ್ಕೆಂ’ ಮ್ಹಣ್ ಆನಿ ತಾಕಾ ಧರ್ನ್ ಗುಂಡಿಯೆಕ್ ಲೊಟುನ್ ಘಾಲ್ ಆನಿ ವಯ್ರ್ ಯೇನಾಶೆಂ ತಾಚ್ಯಾ ಗೊಮ್ಟ್ಯಾಚೆರ್ ಏಕ್ ಫಾತೊರ್ ಉಮ್ಕಾಳಾಯ್.
15. ಚಡಿತ್ ಕರ್ನ್ ಆಯ್ಚಾ ಕಾಳಾಚಿಂ ಚೆಡ್ವಾಂ ಕೊಂಕ್ಣಿ ಉಲಂವ್ಕ್ ನರ್ಗಾತಾತ್ ಕಿತ್ಯಾಕ್? [ಬಡ್ಡ, ಬಾರ್ಕುರ್]
ಜಾಪ್: ತುಂ ನಿಜಾಯ್ಕಿ ಬಡ್ಡಾಚ್ಚ್. ಆದಾಂವ್ಕ್ ತಾಳುಂಕ್ ಆಯಿಲ್ಲಿ ಕೋಣ್ ಮ್ಹಳ್ಳೆಂ ಇತ್ಲೆವೆಗಿಂ ವಿಸ್ರಲೊಯ್ವೆ ತುಂ?
16. ಘರ್ಚೆ ಪೆಟೆ ಸೆಜಾರ್ಚಿಂ ಲೆಂವ್ಟಿಂ ಹಾಡಾಂ ಚಿಂವೊಂಕ್ ಕಿತ್ಯಾಕ್ ಲಾಗ್ಲ್ಯಾತ್ ಯಾತ್ರಿ? [ವಾಯ್ಲೆಟ್ ಪಿರೇರಾ]
ಜಾಪ್: ಜೆದ್ನಾಂ ಘರಾಂತ್ ಲೆಂವೊಂಕ್ ವಾ ಚಿಂವೊಂಕ್ ಕಿತೆಂಚ್ ನಾಂ ಆಸ್ತೆಲೆಂ. ದೆಕುನ್ ಸೆಜಾರ್ಚಾಂನಿ ಲೆಂವ್ಲ್ಲಿಂ ಹಾಡಾಂ ವಾ ತಾಂಚೆ ಬುಕಾಂಡೆ ಲೆಂವ್ತಾತ್ ಆಸ್ತೆಲೆ ಲೆಂವೊಂದಿ - ಆಮಿಂ ವಗೆಚ್ಚ್ ರಾವೊನ್ ಸರ್ಕಸ್ ಪಳವ್ಯಾಂ.
17. ಥೊಡ್ಯಾಂನಿ ಕೊಣಾ ಕೊಣಾಚ್ಯಾ ಖಾಂದಾರ್ ಬಂದೂಕ್ ದವರ್ನ್ ಬಾದೂರ್ ಮ್ಹಣ್ ಹರ್ದೆಂ ಪೆಟ್ಚೆಂ ತುಕಾ ಕಶೆಂ ದಿಸ್ತಾ? [ಬಿಂದು, ಬೆಂದುರ್]
ಜಾಪ್: ತೊ ತಾಂಚೊ ಸಂಯ್ಬಾಚೊ ಗೂಣ್ ಬಾಯೆ, ಹಿಜ್ಡ್ಯಾ ಕಾಲೆತಿಚೆ ತೆ. ತಾಂಕಾಂ ಪೆಂಕ್ಟಾರ್ ಬಳ್ ನಾತ್ಲ್ಲ್ಯಾಂನಿ ಅಶೆಂ ಕೊಣಾ ಕೊಣಾಚಾ ಖಾಂದ್ಯಾರ್ ಬಂದೂಕ್ ದವರ್ನ್ ಕೊಣಾ ಕೊಣಾಕ್ ಜೊಕ್ಚೆಂ.
ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ
’ಮಿತ್ರ್ ಹಾಪ್ತ್ಯಾಳೆಂ’
ಅರ್ಧೊ ಪಾದ್ರಿ
’ದಿವೊ ಹಾಪ್ತ್ಯಾಳೆಂ’
ಸಹನಾ, ಕುವೇಯ್ಟ್
’ಸೆವಕ್ ಮಯ್ನ್ಯಾಳೆಂ’
ಸಿರಿಲ್ ಬಾರ್ಕುರ್
(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.
ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: info@daaiz.com
ಅಧ್ಲಿಂ ಸವಾಲಾಂ-ಜಾಪಿ: 1, 2, 3, 4, 5, 6, 7, 8, 9, 10, 11, 12, 13, 14, 15, 16
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
