’ರೊಮಾಚೆಂ ಶ್ಹೆರ್ ಎಕಾ ದಿಸಾನ್ ಉಭೆಂ ಜಾಂವ್ಕ್ ನಾ’
ಪಾಂಚ್ ವರ್ಸಾಂ ಸಂಪ್ಲಿಂ - ಫುಡೆಂ ಕಿತೆಂ?
ವರಸ್ : 2009
ಮಯ್ನೊ : ಮಾಯ್
ವಲ್ಲಿ ಕ್ವಾಡ್ರಸ್
ಮೊಗಾಳ್ ವಾಚ್ಪ್ಯಾ,
2004 ಇಸ್ವೆಂತ್ ಸುರು ಜಾವ್ನ್, 2009 ಮಾಯ್ ಮಯ್ನ್ಯಾಂತ್ ದಾಯ್ಜ್.ಕೊಮ್ ಪಾಂಚ್ ವರ್ಸಾಂ ಸಂಪಂವ್ಚ್ಯಾ ಘಡ್ಯೆ ಕಸಲೊಚ್ ಸಂಭ್ರಮ್ ನಾತ್ಲ್ಲೆಂ ಸಭಾರಾಂಕ್ ಅಜ್ಯಾಪ್ ಮ್ಹಳ್ಳೆಪರಿಂ ದಿಸೊಂಕ್ ಪುರೊ ತರ್ಯೀ, ಮ್ಹಾಕಾ ಖಾಸ್ಗೆನ್ ವ್ಹಳ್ಕತೆಲ್ಯಾಂಕ್ ಕಳಿತ್ ಆಸ್ಚೆಪರಿಂ ಕಿತ್ಯಾಕ್ಗೀ ಸಂಭ್ರಮ್/ದಭಾಜೊ ಮ್ಹಳ್ಯಾರ್ ಮ್ಹಾಕಾ ಎಕಾ ಥರಾಚಿ ಅಲರ್ಜಿ. ಆಮಿ ಜಿಯೆಂವ್ಚಿ ಆಮ್ಚಿ ಜಿಣಿ ತರ್, ಕೊಣ್ ಪಳೆತಾ, ಕೊಣ್ ಕಿತೆಂಯ್ ಉಲಯ್ತಾ ಮ್ಹಳ್ಳ್ಯಾ ಭಿಂಯಾನ್ ವಾ ದಾಕ್ಶೆಣೆನ್ ಜಿಯೆಂವ್ಚಿ ಜಿಣಿ ಅಪ್ಣಾಚಿ ಮ್ಹಳ್ಳೆಂ ಭಗಾಪ್ ಮ್ಹಜ್ಯಾ ಮತಿಕ್ ಭಿಲ್ಕುಲ್ ಯೇನಾ. ಇತ್ಲೆಂಚ್ ನ್ಹಯ್, ಕೊಣಾಕ್ಗೀ ಧಾಖಂವ್ಚ್ಯಾಕ್ ಭಾಡ್ಯಾಚೆಂ/ರಿಣಾಚೆಂ ಹಾಡುನ್ ಧಾಂಗ್ರೊ ಮಾರುಂಕ್ ಮ್ಹಜೆಂ ಮನ್ ತರ್ಯೀ ಆಯ್ತೆಂ ನಾ.
ಅಶೆಂ ಮ್ಹಣೊನ್ ಸಂಭ್ರಮ್/ದಭಾಜೊ ಮ್ಹಾಕಾ ನವೊ ನ್ಹಯ್, ಜಾಯ್ತೆ ಸಂಭ್ರಮ್/ದಭಾಜೆ ಹಾಂವೆಂ ಪಳೆಲ್ಯಾತ್, ಹರ್ಯೆಕಾಂತ್ ಉಟೊನ್ ದಿಸ್ಚೆಂ ಪೊಕೊಳ್ಪಣ್, ಕೃತಕ್ ನಟನ್, ಸಂಸರಾಕ್ ಧಾಖಂವ್ಚಾಕ್ ತೊಂಡಾರ್ ಘಾಲ್ಲೆಂ ಮುಖ್ವಾಡ್, ಕೊಣಾಕ್ ಫಟಂವ್ಕ್ಗೀ ಭಿತರ್ ಏಕ್ ಭಾಯ್ರ್ ಏಕ್ ವೆಕ್ತಿತ್ವ್ ದವ್ರುನ್ ತೊಂಡಾಪುರ್ತೊ ಸುಕೊ ಸಯ್ಲಾಪ್ ಕರ್ಚೆಂ ಕಿತ್ಯಾಕ್ಗೀ ಮ್ಹಾಕಾ ಅವಡ್ನಾ. ಆಸೊಂ! ಹಾಂಗಾಸರ್ ಹಾಂವೆಂ ಉಲ್ಲೇಕ್ ಕರುಂಕ್ ಆಸ್ಚೆಂ ಪಾಂಚ್ ವರ್ಸಾಂ ಸಂಪ್ಲ್ಲೆವಿಶಿಂ ಶಿವಾಯ್ ಮ್ಹಜ್ಯಾ ಖಾಸ್ಗಿ ಅವಡಾವಿಶಿಂ ನ್ಹಯ್.
ಏಕ್ ಸ್ವಪಾಣ್ ಆಸ್ಲೆಂ, ಹಾಕಾ ಸ್ವಪಾಣ್ ಮ್ಹಣೊಂ ವಾ ಖೊರೊಜ್ ತೆಂ ಹಾಂವ್ ನೊಕೊ - ತುಮಿಂಚ್ ನಿಘಂಟ್ ಕರಾ. ಕೊಂಕ್ಣೆಪಾಸತ್ ಕಾಂಯ್ ಇಲ್ಲೆಂ ಕಾಮ್ ಕರಿಜಯ್ ಮ್ಹಳ್ಳೆಂ. ಹಾಂವ್ ಕೊಂಕ್ಣೆಂತ್ಲ್ಯಾ ನೊವೊದ್ ಆನಿ ನೋವ್ ಠಕ್ಕೆ ಬರಯ್ಣಾರಾಂಪರಿಂ ಹವ್ಯಾಸಿ ಬರಯ್ಣಾರ್ ಮಾತ್ರ್ ಜಾವ್ನ್ ಉದೆಲ್ಲೊಂ. ವೇಳ್ ಗೆಲ್ಲೆಪರಿಂಚ್ ನವೆ ನವೆ ಸಾಹಿತಿಕ್ ಮಿತ್ರ್ ಮೆಳ್ಳೆ. ’ಸಾಹಿತಿಕ್’ ಮ್ಹಳ್ಳೊ ಸಬ್ಧ್ ಕೊಂಕ್ಣೆಚ್ಯಾ ಮಟ್ಟಾಕ್ ವ್ಹಡ್ಲೊ ಜಾಲೊ ತರ್, ’ಬರಯ್ಣಾರ್’ ಮ್ಹಳ್ಳೊ ಸಬ್ಧ್ ವ್ಹಾಪಾರ್ತಾಂ. ಹರ್ಯೆಕ್ ಬರಯ್ಣಾರ್ ವೆವೆಗ್ಳೆ, ಜಶೆಂ ಹರ್ಯೆಕ್ ಮನಿಸ್ ವೆಗ್ಳೊ. ತಾಂಚ್ಂ ಚಿಂತಾಪ್ ವೆಗ್ಳೆಂ. ತಾಂಚಿ ಜಿಣ್ಯೆರೀತ್ ವೆಗ್ಳಿ. ತಾಂಚೊ ಜಿಣ್ಯೆ ಅನ್ಭೋಗ್ ವೆಗ್ಳೊ. ಎಕಾ ಕೋಪ್ ಹುನ್ ಚಾಯೆಕ್ ದೋನ್ ಕರುನ್ ದೊಗಾಂನಿ ಪಿಯೆಲ್ಯಾರೀ ತ್ಯಾ ದೊಗಾಂಯ್ಕೀ ಏಕ್ ರಿತಿಚೊ ಅನ್ಭೋಗ್ ಜಾತಾ ಮ್ಹಣೊನ್ ನಾ ನ್ಹಯ್? ಅಶೆಂ ಆಸ್ತಾಂ, ಜಾಯ್ತೆಂ ಶಿಕೊಂಕ್ ಮೆಳ್ಳೆಂ. ಜಾಯ್ತೆಂ ಸಮ್ಜೊಂಕ್ ಮೆಳ್ಳೆಂ. ಇತ್ಲೆಂ ಸಮ್ಜತಾನಾ ಅಪ್ಶೆಂಚ್ ಅಪ್ಣಾಹುಜಿರ್ ಏಕ್ ಆರ್ಸೊ ಉಭೊ ಜಾಲ್ಲೆಪರಿಂ ದಿಸ್ಲೊ, ತ್ಯಾ ಅರ್ಶ್ಯಾಂತ್ ಆಮಿ, ಬರಯ್ಣಾರಾಂನಿ ಪಳೆಜಾಯ್ ಆಸ್ಲೆಂ. ಪಯ್ಲೆಂ ಮ್ಹಾಕಾಚ್ ಪಳೆಲೆಂ, ಹಕೀಗತ್ ಆನಿ ಕಾಲ್ಪನಿಕ್ ಸಂಸಾರಾ ಮಧೆಂ ಆಸ್ಚೊ ಅಂತರ್ ದಿಸ್ಲೊ. ಮಾಫುಂಕ್ ಸಕ್ಲೊನಾ ತರ್ಯೀ, ಸಂಪೂರ್ಣ್ ರಿತಿರ್ ನ್ಹಯ್ ತರೀ, ಥೊಡ್ಯಾ ಮಟ್ಟಾಕ್ ತರ್ಯೀ ಸಮ್ಜೊಂಕ್ ಸಕ್ಲೊಂ.
ಅಶೆಂ ಆರ್ಸೊ ಪಳೆತಾನಾ ಮ್ಹಜ್ಯಾ ಮತಿಂತ್ ಉದೆವ್ನ್ ಆಯಿಲ್ಲೆಂ ಅನ್ಯೇಕ್ ಚಿಂತಾಪ್ - ಹೊ ಆರ್ಸೊ ಮ್ಹಾಕಾ ಮಾತ್ರ್ ನ್ಹಯ್, ಹ್ಯಾ ಸಂಸಾರಾಂತ್ಲ್ಯಾ ಸರ್ವ್ ಬೌತಿಕ್ ಸಂಗ್ತೆಕ್ ಧಾಖಂವ್ಕ್ ಸಕ್ತಾ, ಮನ್ ಕೆಲ್ಯಾರ್. ಅಶೆಂ ಪಳೆತಾನಾ ದೋನ್ ರುಪ್ಣಿಂ ಉದೆವ್ನ್ ಯೆತಾತ್; ಪಯ್ಲೆಂ - ರಿತೆಂ ಆಸ್ಚೆಂ (ನಾ ಆಸ್ಚೆಂ), ದುಸ್ರೆಂ - ಆಸ್ಚೆಂ. ತೆಚ್ಚ್ ಪರಿಂ ದೋನ್ ಸವಾಲಾಂ ಮತಿಂತ್ ಖಂಚೊನ್ ಯೆತಾತ್. ಏಕ್ ನಾತ್ಲ್ಲೆಂ (ನಾ ಆಸ್ಚೆಂ) ಆನಿ ದುಸ್ರೆಂ ಆಸ್ಚೆಂ. ಥೊಡೆ ತರೀ ಉಲ್ಲೇಕ್ ಕರ್ಚೆ ತರ್;
’ಹ್ಯಾ ಸಂಸಾರಾಂತ್ ಸರ್ವ್ ಥರಾಚೆ ಕಶ್ಟ್ ಆಸಾತ್’ ಮ್ಹಳ್ಳೆಂ ನಾ ಆಸ್ಚೆಂ ಸುಖ್ ಉಲ್ಲೇಕ್ ಕರ್ತಾ ತರ್, ’ಹ್ಯಾ ಸಂಸಾರಾಂತ್ ಕಿತ್ಲೆ ಕಶ್ಟ್ ಆಸ್ಲ್ಯಾರೀ ಸುಖ್ ಆಸಾ’ ಮ್ಹಣ್ಚೆಂ ಆಸ್ಚ್ಯಾ ಸಂಗ್ತೆಚೊ ಉಲ್ಲೇಕ್ ಕರ್ತಾ. ತಾತ್ವಿಕ್ ಚಿಂತಾಪ್ ಸೊಡ್ಯಾಂ, ಆಮಿ ಸಂಪಿಂ ಭಾಸ್ ಉಲವ್ಯಾಂ;
’ಮ್ಹಜೆಲಾಗಿಂ ಕಾರ್ ನಾ, ಬಂಗ್ಲೊ ನಾ ಜಶೆಂ ಹೆರಾಂ ಲಾಗಿಂ ಆಸಾ’ - ಹೆಂ ನಾ ಆಸ್ಚ್ಯಾ ಚಿಂತ್ಪಾಚೊ ಉಲ್ಲೇಕ್ ಕರ್ತಾ ತರ್, ’ಮ್ಹಜೆಲಾಗಿಂ ಕಿತೆಂ ತರೀ ಆಸಾ, ಪುಣ್ ಹ್ಯಾ ಸಂಸಾರಾಂತ್ ತಾಕಾಯ್ ಗತ್ ನಾತ್ಲ್ಲಿಂ ಆಸಾತ್’ ಮ್ಹಳ್ಳೆಂ ಆಸ್ಚ್ಯಾ ಸಂಗ್ತೆಚೊ ಉಲ್ಲೇಕ್ ಕರ್ತಾ.
ಹೆಂಚ್ ವಾರ್ಜಿಕ್ ಹಾಂವ್ ಸಾಹಿತಾಕ್ ಲಗು ಕರುಂಕ್ ಪ್ರೇತನ್ ಕೆಲೆಂ ತರ್ - ಕೊಂಕ್ಣೆಂತ್ ಹೆರ್ ಪ್ರಾಂತೀಯ್ ಭಾಸಾಂಪರಿಂ ಉಂಚ್ಲೆಂ ಸಾಹಿತ್ಯ್ ನಾ. ವ್ಹಯ್! ಹೆಂ ಸತ್ಚ್ಚ್. ಕೊಣ್ಯೀ ನೆಗಾರ್ ಕರಿನಾ. ಪುಣ್ ಕೊಂಕ್ಣೆಂತ್ ಆಸ್ಚೆಂ ಸರ್ವ್ ವ್ಹಾಪಾರ್ನಾಸ್ಚೆಂ? (Useless)?. ಹ್ಯಾ ಚಿಂತ್ಪಾಕ್ ವೊಪುನ್ ಘೆಂವ್ಕ್ ಕಿತ್ಯಾಕ್ಗೀ ಮ್ಹಾಕಾ ನಾಕಾ. ಹೆರ್ ಭಾಸಾಂತ್ಲೆಂ ಸಾಹಿತ್ಯ್ ಹಾಂವೆಯ್ ವಾಚ್ಲಾಂ, ಅಧ್ಯಯನ್ ಕೆಲಾಂ, ಕರುನ್ಂಚ್ ಆಸಾಂ. ಜಾವ್ಯೆತ್ ನ್ಹಯ್, ವ್ಹಯ್ - ಕೊಂಕ್ಣೆಂತ್ ಹರ್ಯೆಕಾ ಶೆತಾಂತ್ ವ್ಹಾಡಾವಳ್ ಗರ್ಜ್ ಆಸಾ, ಜಾಂವ್ ಸಂಗೀತ್ ಶೆತ್, ಜಾಂವ್ ಸಾಹಿತಿಕ್ ಶೆತ್, ಜಾಂವ್ ಜನಪದ್ ಶೆತ್, ಜಾಂವ್ ನಾಟಕ್ ಶೆತ್, ಜಾಂವ್ ಹೆರ್ ಶೆತ್. ಪುಣ್ ವ್ಹಾಡಾವಳ್ ಏಕ್ ಹಂತ್. ಎಕಾ ದಿಸಾನ್ ಜಾಂವ್ಚೆ ತಸಲಿ ನ್ಹಯ್. ’Rome was not built in a day’ ಮ್ಹಳ್ಳೆಪರಿಂ ಹಿ ಏಕ್ ಪ್ರಕ್ರಿಯಾ. ಪುಣ್ ಅಂತರ್ಜಾಳಿಂತ್ ಸಾಹಿತ್ಯ್ ಪರ್ಗಟೊನ್ ಯೆತಾನಾ ಸಂಸಾರಾಚ್ಯಾ ಖಂಚ್ಯಾಯ್ ಕೊನ್ಶ್ಯಾಂತ್ ಆಸ್ಚ್ಯಾ ವಾಚ್ಪ್ಯಾಂಕ್ ಉಪಲಬ್ಧ್ ಆಸೊನ್ ವಾಚುಂಕ್ ಸಲೀಸ್ ಜಾತಾ. ಅಶೆಂ ವಾಚ್ತಾಂ, ಹೆರಾಂ ಸಮೊರ್ ತುಲನ್ ಜಾತಾ, ಆಮ್ಚ್ಯೊ ಅಸ್ಕತ್ಕಾಯೊ, ಊಣ್, ಅವ್ಗುಣ್ ದಿಸೊನ್ ಯೆತಾತ್. ಆನಿ ಹಾಂಗಾಸರ್ ಪ್ರಾಮಾಣಿಕ್ ರಿತಿನ್ ತ್ಯೊ ಸ್ವೀಕಾರ್ ಕರ್ಚೆಂ ವ್ಹಡ್ ಮನ್ ಸರ್ವಾಂಕ್ ಆಸಾ ತರ್ ವಾದ್-ವಿವಾದ್ ಮ್ಹಳ್ಳೆಚ್ ನಾಂತ್ ನ್ಹಯ್?
ಕೊಂಕ್ಣಿ ಸಾಹಿತ್ಯಾಕ್ ಪರ್ಗಟ್ ಕರ್ಚ್ಯಾಕ್ ಅಂತರ್ಜಾಳ್ ಮಾಧ್ಯಮ್ ವಿಂಚುಂಕ್ ಪ್ರಮುಖ್ ಕಾರಣ್, ಅಂತರ್ಜಾಳಿಚಿ ಉಪಲಭ್ದಿ. ಹ್ಯೇ ಖಾತಿರ್ ಸಭಾರಾಂನಿ ಜಾಯ್ತೊ ವೇಳ್ ಖರ್ಚಿಲಾ, ಜಾಂವ್ ತಿಂ ಚಡ್ತಾವಾಂ ಪರ್ದ್ಯಾ ಪಾಟ್ಲ್ಯಾನ್ ಆಸಾತ್. ಸಭಾರಾಂನಿ ಏಕ್ ನ್ಹಯ್ ಏಕ್ ರಿತಿರ್ ಆಧಾರ್ ದಿಲಾ, ಆನಿ ತಾಂಚ್ಯಾ ಮಿನತೆನ್ ಮ್ಹಜ್ಯಾನ್ ದಾಯ್ಜ್ ಮಿಸಾಂವ್ ಎದೊಳ್ ಮ್ಹಣಾಸರ್ ಮುಖಾರುಂಕ್ ಸಾಧ್ಯ್ ಜಾಲಾಂ. ಆನಿ ಆತಾಂ ದಾಯ್ಜಾನ್ ಪಾಟ್ಲ್ಯಾ ಪಾಂಚ್ ವರ್ಸಾಂನಿ ಕೊಂಕ್ಣೆಕ್ ಕಾಂಯ್ ತರೀ ದಿಲಾಂ ಮ್ಹಳ್ಳೊ ಸಂತೊಸ್ ಆಮ್ಕಾಂ ಆಸಾ. ದಾಯ್ಜ್ ಸಾಹಿತಿಕ್ ಸ್ಪರ್ಧೆ ಆಮಿ ಭೋವ್ ಬರೆ ರಿತಿರ್ ಮಾಂಡುನ್ ಹಾಡ್ಲ್ಯಾತ್. ಜೊಕ್ತ್ಯಾ ಸಾಹಿತ್ಕಾರಾಂಕ್ (ಕಾಣ್ಯೆಗಾರ್ ತಶೆಂ ಕವಿ) ಪರ್ಗಟ್ ಮಾನ್-ಸಮ್ಮಾನ್ ದಿಲಾ. ಆಶಾವಾದಿ ಪ್ರಕಾಶನಾಧ್ವಾರಿಂ ವೆವೆಗ್ಳೆ ಬೂಕ್ ಪರ್ಗಟ್ಲ್ಯಾತ್. ಕೊಂಕ್ಣಿ ಪತ್ರಾಂಕ್ ಆಮ್ಚ್ಯಾ ತಾಂಕಿಚೊ ಸಹಕಾರ್/ಪಾಟಿಂಬೊ ದಿಲಾ. ಜಾಂವ್ಕ್ ಪುರೊ ಆಜ್ ಆರ್ಥಿಕ್ ರಿತಿನ್ ಕಿತ್ಲೆಂ ಜೊಡ್ಲಾಂ ಮ್ಹಣೊನ್ ಸಾಂಗೊಂಕ್ ಸಕ್ಚೆನಾಂವ್; ಕಿತ್ಯಾಕ್ - ಕೊಂಕ್ಣೆಂತ್ ಆರ್ಥಿಕ್ ರಿತಿನ್ ಪುಂಜಾಂವ್ಚೊ ಕಸಲೊಚ್ ಇರಾದೊ ಆಮ್ಚೊ ನಾತ್ಲ್ಲೊ, ಫುಡೆಂಯ್ ಆಸ್ಚೊನಾ. ದಾಯ್ಜ್.ಕೊಮ್ ನ್ ಸಾಹಿತಿಕ್ ಸಂಗ್ತೆ ಭಾಯ್ರ್ ಚಿಂತುಂಕ್ ವಚೊಂಕ್ ನಾ. ಫಕತ್ತ್ ಕೊಂಕ್ಣಿ ಭಾಸ್, ಕೊಂಕ್ಣಿ ಸಾಹಿತ್, ಕೊಂಕ್ಣಿ ಬರಯ್ಣಾರ್ ಹಾಂಕಾಂ ಮಾತ್ರ್ ಮಹತ್ವ್ ದಿಲಾ ಶಿವಾಯ್ ಹೆರ್ ಖಂಚ್ಯಾಯ್ ಸಂಗ್ತೆಂಕ್ ನ್ಹಯ್.
ವರ್ಸಾಳ್ಯಾ ಸಾಹಿತಿಕ್ ಸ್ಪರ್ಧ್ಯಾಸವೆಂ ಮಯ್ನ್ಯಾಳೆ ಸಾಹಿತಿಕ್ ಸ್ಪರ್ಧೆ ಆಮಿ ಮಾಂಡುನ್ ಹಾಡ್ಲ್ಯಾತ್, ಕಾಮಾಸಾಳಾಂ ಚಲವ್ನ್ ವೆಲ್ಯಾಂತ್ - ಆಮ್ಚೊ ಇರಾದೊ ಕೆದಿಂಚ್ ಪಿಕ್ನಿಕಾಂ ಕರ್ಚೊ ಜಾಂವ್, ವೆದಿ ಕಾರ್ಯಿಂ ಮಾಂಡುನ್ ಲೊಕಾಂಚ್ಯೊ ತಾಳಿಯೊ ಆಯ್ಕೊಂವ್ಚೊ ನಾಸ್ಲ್ಲೊ. ಆಮ್ಕಾಂ ಆಮಿ ಕೊಣ್ ಮ್ಹಳ್ಳೆಂ ಕಳಿತ್ ಆಸಾ. ಆಮಿ ಸಾಹಿತಿಕ್ ಮೊಗಿ, ಸಾಹಿತಾಕ್ ಅವಾಜ್ ಗರ್ಜ್ ನ್ಹಯ್, ದಭಾಜೊ ಗರ್ಜ್ ನ್ಹಯ್, ಸಂಭ್ರಮ್ ಗರ್ಜ್ ನ್ಹಯ್. ಆಮಿ ಕೆದಿಂಚ್ ಏಕ್ ಸಂಘ್ ಮ್ಹಣೊಂಕ್ ನಾ ವಾ ಚಿಂತುಂಕ್ ನಾ. ಆಮಿ ಫಕತ್ತ್ ಕೊಂಕ್ಣಿ ಸಾಹಿತ್ಯಾಚೊ ಅಭಿಮಾನ್ ಆಸ್ಚೆ ಹವ್ಯಾಸಿ.
ಪಾಂಚ್ ವರ್ಸಾಂ ಸಂಪಂವ್ಚಾ ವೆಳಾರ್, ಆಮ್ಚೆಂ ಮಿಸಾಂವ್ ಅಜೂನ್ ಸಂಪೊಂಕ್ ನಾ. ಸುರು ಜಾಲಾಂ ಮಾತ್ರ್, ಫುಡೆಂ ಜಾಯ್ತೆಂ ಕರುಂಕ್ ಆಸಾ, ತೆಂ ವೆಳಾಕಾಳಾಚ್ಯಾ ಅಧೀನ್ ಸಮರ್ಪಿತಾಂ. ಪುಣ್ ಹ್ಯಾ ಪಾಂಚ್ ವರ್ಸಾಂನಿ ದಾಯ್ಜ್ ಮಿಸಾಂವಾಂತ್ ವಾಂಟೆಲಿ ಜಾಲ್ಲ್ಯಾ ಸರ್ವ್ ಬರಯ್ಣಾರಾಂಚೊ, ವಾಚ್ಪ್ಯಾಂಚೊ, ಪೋಶಕಾಂಚೊ, ಸಂಪಾದಕೀಯ್ ಮಂಡಳಿಚೊ, ಸಲ್ಹಾ-ಮಂಡಳೆಚೊ ತಶೆಂಚ್ ಮ್ಹಾಕಾ ಖಾಂದಾಕ್ ಖಾಂದ್ ದೀವ್ನ್ ಕುಮೊಕ್ ಕೆಲ್ಲ್ಯಾ ಬಾಯ್ ಪ್ರಿಯಾ ಸಿಕ್ವೇರಿಚೊ, ಆನಿ ಬಾಬ್ ಮೆಲ್ವಿನ್ ಜೆ. ವಾಸ್ ಕೆಲರಾಯ್ ಹಾಂಚೊ ಹಾಂವ್ ಉಪ್ಕಾರ್ ಬಾವುಡ್ತಾಂ.
ದೇವ್ ಬರೆಂ ಕರುಂ,
ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
