ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 12
ಮಂಥನ್
ಬೂಕ್: ಮಂಥನ್
ಕವಿ: ಫ್ರಾನ್ಸಿಸ್ ಸಲ್ಡಾಞ್ ಕಾಮತ್
ಪ್ರಸ್ತಾವನ್: ಗ್ಲೇಡಿಸ್ ರೇಗೊ
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 96
ಮೋಲ್: ರು. 30
ಪ್ರಕಾಶಕ್: ಸ್ವ-ಪ್ರಕಾಶನ್
ಪರ್ಗಟ್ ಜಾಲ್ಲಿ ಇಸ್ವಿ: 2004
ಸಮೀಕ್ಶಕಿ: ಪ್ರಿಯಾ ಸಿಕ್ವೇರಾ, ಫೆರಾರ್
ತಾರಿಕ್: 24 ಮಾರ್ಚ್ 2006
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಪ್ರಿಯಾ ಸಿಕ್ವೇರಾ, ಫೆರಾರ್
ಫ್ರಾನ್ಸಿಸ್ ಸಲ್ಡಾಞ್ ಕಾಮತ್
ಕವಿಂಚಿ ವ್ಹಳೊಕ್:
ಫ್ರಾನ್ಸಿಸ್ ಸಲ್ಡಾಞ್ ಕಾಮತ್, ಕೊಂಕ್ಣೆಂತ್ ಅಪ್ಲ್ಯಾಚ್ಚ್ ಶೈಲೆರ್ ಕವಿತಾ ಬರವ್ನ್ ವಳ್ಕಿಚೊ ಜಾಲಾ. ಹಾಚಿಂ ಚಡ್ತಾವ್ ಕವಿತಾ ಆಧ್ಯಾತ್ಮಿಕ್ ಸಂಗ್ತೆಂನಿ ಭರೊನ್ ಆಸ್ತಾತ್ ತರ್ಯ್ ತಾಂತುಂ ಸಾಮಾಜಿಕ್ ಲಿಸಾಂವ್, ನೀತ್ ಭರೊನ್ ವೊಮ್ತೊಂವ್ಚಿಯ್ ಪಳೆಂವ್ಕ್ ಮೆಳ್ತಾ. ಹೊ ತಾಚೊ ಫುಡ್ಲದ್ ಕವಿತಾಜಮೊ ತರ್ಯ್ ಹಾಣೆಂ ಕವಿತಾಶಿವಾಯ್ ಥೊಡಿಂ ಪದಾಂಯ್ ಘಡ್ಲ್ಯಾಂತ್.
ಸಮೀಕ್ಶಾ ಲೇಖನ್
ಸಾಮಾಜಿಕ್ ನಿತಿಖಾತಿರ್ ಆಧ್ಯಾತ್ಮಿಕ್ ಚಿಂತಾಪ್ ವ್ಹಾಳಂವ್ಚಿಂ ಕವಿತಾ [- ಪ್ರಿಯಾ ಸಿಕ್ವೇರಾ, ಫೆರಾರ್]
ಎಕಾ ಗುಲೊಬಾನ್ ಆಪ್ಲೊ ಸುವಾದ್ ಪಾಚಾರಿಜಾಯ್ ತರ್ ಸಗ್ಳೊ ಗುಲೊಬ್ ಫುಲ್ಚಿ ಗರ್ಜ್ ಆಸಾ. ಪುಣ್ ಎಕಾ ಕವಿಕ್ ಗುಲೊಬಾಚ್ಯಾ ಎಕಾ ಪಾಕ್ಳ್ಯಾ ಮಾರಿಫಾತ್ ಸಗ್ಳ್ಯಾಂನಿ ಸುವಾದ್ ಪಾಚಾರ್ಚಿ ಶ್ಯಾಥಿ ಅಸಾ. ಕವಿ ಆಪ್ಲ್ಯಾ ಚಿಂತ್ಪಾಕ್, ಭಗ್ಣಾಂಕ್ ಲಿಕ್ಣಿ ಹಾತಾಂತ್ ಧರುನ್ ಕಾಗ್ದಾಚೆರ್ ವ್ಹಾಳಯ್ತಾ. ದರ್ಯಾಚಾ ಲ್ಹಾರಾಂಕ್ ಕಶೆಂ ಕೊಣ್ಂಯಿ ಆಡಾಂವ್ಕ್ ಸಕಾನಾಂತ್ಗಿ ತಶೆಂಚ್ ಕವಿ ಥಾವ್ನ್ ವ್ಹಾಳೊನ್ ಯೆಂವ್ಚಾ ತ್ಯಾ ತೀಕ್ಷ್ಣ್ ಧಾರಿಚಾ ವ್ಹಾಳಾಕ್ ಮ್ಹಣ್ಚೆಂ ಕವನಾಂಕ್ ಆಡಾಂವ್ಕ್ ಕೊಣ್ಂಚ್ಚ್ ಸಕಾನಾಂತ್. ಹೊ ವ್ಹಾಳೊ ಕೊಣಾಚಾಗಿ ಹಿತ್ಲಾಂತ್ ರಿಗೊನ್ ಉದಾಕ್ ನಾತ್ಲ್ಲ್ಯಾ ಬೆಳ್ಯಾಕ್ ಉದಾಕ್ ಮೆಳಾಶೆಂ ಕರಿತ್, ಯಾ ಬೆಳೆಂ ಕೆಲ್ಲ್ಯಾ ರೈತಾಚಿ ನೀದ್ ಧಾಂವ್ಡಾಂವ್ಕ್ಯೀ ಸಕಾತ್. ತಿತ್ಲಿ ಸಕತ್ ಲಿಕ್ಣೆಕ್ ಆಸಾ ಮ್ಹಣ್ ಸರ್ವಾಂಕ್ ಕಳಿತ್ ಆಸಾ. ಕವಿತಾಂತ್, ವಿವಿಧ್ ಇಮಾಜ್ಯೊ ಉಭಾರುನ್ ಆಪ್ಲಿ ಭಗ್ಣಾಂ ಉಚಾರ್ಚಿಂ ಏಕ್ ಕಲಾ. ತ್ಯಾ ಇಮಾಜೆ ಭಿತರ್ ತೀಳ್ನ್ ಪಳೆಲ್ಯಾರ್ ವಿವಿಧ್ ಆಕಾರ್, ರುಪಾಂ, ಆರ್ಥ್ ಪಳೆಂವ್ಕ್ ಮೆಳ್ತಾತ್. ಹ್ಯೊ ಇಮಾಜ್ಯೊ ಕಶೆಂ ಇಗರ್ಜಾಂನಿ, ಜೀವ್, ಸೊಬಾಯ್ ದಿತಾತ್ಗೀ ತಶೆಂಚ್ ಕವಿತಾಂಕ್ ಸೊಭಾಯ್ ದೀಂವ್ಕ್ ಪಾವ್ತಾತ್.
ಹಾಂವೆ ಮ್ಹಜ್ಯಾ ಎಕಾ ವರ್ಸಾಚ್ಯಾ ಸಾಹಿತಿಕ್ ಅನ್ಭೊಗಾ ಫರ್ಮಾಣೆಂ
’ಕವಿತಾ’ ವಿವಿಧ್ ಥರಾಂಚಿಂ ಆಸಾತ್ ಮ್ಹಣ್ ಜಾಣಾಂ ಜಾಲ್ಯಾಂ. ಮ್ಹಾಕಾ ಚಡ್ ರುಚ್ಚಿ ಕವಿತಾ ಜಾವ್ನಾಸಾತ್ ಇಮಾಜ್ಯಾಂನಿ ಭರ್ಲ್ಲಿಂ. ಕವಿತಾ
ಏಕ್ಚ್ಚ್ ಪಾವ್ಟಿಂ ವಾಚ್ತಾನಾ ಕವಿ ಕಿತೆಂ ಸಾಂಗೊಂಕ್ ಸೊಧ್ತಾಂ ಮ್ಹಣ್ ಸಮ್ಜಾಲ್ಯಾರ್ ತಾಂತುಂ ವಿಶೇಷತಾ ನಾ ಮ್ಹಳ್ಳಿ ಮ್ಹಜಿ ಅಬಿಪ್ರಾಯ್.
’ಮಂಥನ್’ ಆದ್ಯಾತ್ಮಿಕ್ ಆನಿಂ ಸಾಮಾಜಿಕ್ ಕವಿತಾಂಚೊ ಬೂಕ್.
ಹರ್ಯೆಕಾ ಉತ್ರಾಂನಿ, ವೊಳಿಂನಿ ಆಧ್ಯಾತ್ಮಿಕತಾ (spirituality)
ಭರೊನ್ ವೊಮ್ತಾತಾ. ಹ್ಯಾ ಬುಕಾಂತ್ ಚಾಳಿಸ್ ಆನಿಂ ಸಾತ್ ಕವಿತಾಂ
ಆಸಾತ್. ನೊವೊದ್ ಆನಿ ಸ ಪಾನಾಂಚೊ ಹೊ ಬೂಕ್ ದೋನ್
ಹಜಾರ್ ಚಾರ್ ಇಸ್ವೆಂತ್ ಫಾಯ್ಸ್ ಜಾಲಾ. ಕವಿನ್ ವಾಪಾರ್ಲ್ಲ್ಯಾ ಉತ್ರಾಂಚಿ ಶೈಲಿ, ಸಮಾಜೆಚ್ಯಾ ನಿಯಮಾಂಕ್ ಹಾತ್ ಜೊಕ್ಚಿ ರೀತ್, ದೆವಾ ಕಡೆ ಕವಿಚೊ ಸಂಬಾಷಣ್, ಕೊಂಕ್ಣಿ ಮಾಯೆಕ್ ವರ್ಣುನ್ ಬರಯಿಲ್ಲಿ ರೀತ್ ನಿಜಾಯ್ಕಿ ಶಾಭಾಸ್ಕೆಕ್ ಫಾವೊ.
ಆಜ್ಕಾಲ್ ನಾಂವ್, ಪದ್ವಿ ಪೆಪರಾಂನಿ ತಸ್ವೀರ್ ಯೆಂವ್ಚಾ ಖಾತಿರ್ ವಾವುರ್ಚೆ ಸಭಾರ್ ಜಣ್. ಆನಿಂ ಹ್ಯಾ ಖಾತಿರ್ ಖಂಚಾಯಿ ಗುಂಡಾಯೆಕ್ ದೆವೊಂಕ್ ತೆ ತಯಾರ್. ಕೊಂಕ್ಣಿ ಮಾಯೆಚಿ ಸೆವಾ ಮ್ಹಣ್ ತಿಚ್ಯಾ ತೊಂಡಾಕ್ಚ್ಚ್ ಕರಿ
ಪುಸ್ತಾತ್. ಆಶೆಂ ಆಸ್ತಾ ಕವಿ ಫ್ರಾನ್ಸಿಸ್ ಸಲ್ಡಾಞ್ ಕೊಂಕ್ಣಿ ಮಾಯೆಚಿ ಸೆವಾ ಕರ್ಚೆಂ ಆಪ್ಲೆಂ ಭಾಗ್ ಮ್ಹಣ್ ಚಿಂತಾ ಆನಿಂ ಆಪ್ಣಾಕ್ ಆಸ್ಚೆಂ ಕವಿತಾ ಬರಂವ್ಚೆಂ ದೆಣೆಂ ಆಪುಣ್ ಧಯ್ರಾನ್ ವ್ಹಾಳೊಂಕ್ ಸೊಡ್ತಾ ಮ್ಹಣ್ ಮಂಥನ್ ಕವಿತಾತ್ ಸಾಂಗ್ತಾ. ಹ್ಯಾ ಕವಿತಾಂತ್ಲಿ ವೋಳ್ ಆಶಿ ಆಸಾ;
ಚಿಂತ್ಪಾನ್ ಲಿಖ್ಣೆನ್ ಸಾಂಗಾತ್ ದಿಲೊ
ಕವನಾ ವ್ಹಾಳೊ ಜಾಯ್ತೊ ವ್ಹಾಳ್ಳೊ
ಕೊಂಕಣ್ ಮಾಂಯ್ ಗ್ರೇಸ್ತ್ ಜಾಂವ್
ಧ್ಯೇಯ್ ಹೊಚ್ ಹಾತಿಂ ಘೆತ್ಲೊ
ಆಮ್ಕಾಂ ಆಮ್ಚೆ ವಯ್ರ್ ಅಭಿಮಾನ್ ಆಸ್ಚೆಂ ಭಾರಿ ಗರ್ಜೆಚೆಂ. ಅಭಿಮಾನ್ ಎಕ್ಲ್ಯಾಕ್ ದರ್ಯಾನ್ ಭರ್ತಾ ಆನಿಂ ಕಸಲೆಂಯ್ ಕಾಮ್ ತಾಣೆಂ ಹಾತಿಂ ಘೆತ್ಲೆಂ ತರ್ ಪೊಂತಾಕ್ ಪಾಂವವ್ಚಿ ಶ್ಯಾಥಿ ತಾಕಾ ಆಸ್ತಾ. ಆನಿಂ ಆಸಲೆಂಚ್ ಧಯ್ರ್, ಆಪುಣ್ ಕವಿ ಮ್ಹಳ್ಳೊ ಅಭಿಮಾನ್ ’ಮಂಥನ್’ ಕವಿತಾಂತ್ ದಾಕಯ್ತಾ. ಕವಿತಾಚಾ ಸುರ್ವಿಲ್ಯಾ ಪಂಗ್ತಿನಿಂ ಧಯ್ರ್ ಉಚಾರಲ್ಲೊ ಕವಿ ಆಖ್ರೇಕ್ ಎಕಾ ಥರಾಚ್ಯಾ ಭಿಂಯಾನ್ಗಿ ಯಾ ನಿರಾಸೆನ್ಗಿ ’ಕೊಂಕಣ್ ಮಾಯೆಚ್ಯಾ ಕುರೊವಾಚೆರ್ ಚಡಿತ್ ಥಿಕಾಂ ಪರ್ಜೆಳೊಂ- ಆಶೆಂ ಮಾಗೊನ್ ಆಸಾಂ’ ಆಶೆಂ ಸಾಂಗೊನ್ ದೆವಾಲಾಗಿಂಚ್ ಆಡ್ದೊಸ್ ಮಾಗ್ತಾ.
ದೆವಾಕ್ ದುಬ್ಳೊ ಆನಿ ಗ್ರೇಸ್ತ್ ಮ್ಹಳ್ಳೊ ತಫಾವತ್ ನಾ. ತಾಕಾ ಜಾಯ್ ಏಕ್ ಖಾಲ್ತೆಂ ಕಾಳಿಜ್. ಹಾಂವ್ ಎಕ್ಲೊಂ ದುಬ್ಳೊಂ, ಮ್ಹಜೆ ಕಡೆ ನಾ ಧನ್ ದಿರ್ವೆಂ, ಪುಣ್ ಆಸಾ ಕೇವಲ್ ಏಕ್
ಕಾಳಿಜ್ ಮ್ಹಣ್ ಖಾಲ್ತೆಪಣಾನ್ ದೆವಾ ಮುಖಾರ್ ಸ್ತುತಿ ಕರ್ಚೆಂ ’ಬೆಟವ್ಣಿಂ’ ಮ್ಹಳ್ಯಾ ಕವಿತಾಂತ್ ಪಳೆವ್ಯೆತ್.
ಮನಿಸ್ ಬಾಳ್ಶೆಂ ಜಾವ್ನ್ ಜಲ್ಮಾತಾ, ಕೇವಲ್ ಮನಿಸ್ ಮ್ಹಳ್ಳಿ ತಾಚೆ ವಳಕ್. ಪುಣ್ ವ್ಹಾಡೊನ್ ಯೆತಾನಾ ಸುರು ನಾಂವಾಂಚಿ ಶಿಂಕಳ್, ಗ್ರೇಸ್ತ್, ದುಬ್ಳೊ, ಘಾತ್ಕಿ. ಪುಣ್ ಮಾತ್ಯೆಕ್ ಪಾಟಿಂ ಯೆತಾನಾ ತಾಕಾ
ವೊಲಾಯ್ತಾತ್ ಮೊಡೆಂ ಮ್ಹಣ್ ಭೋವ್ ಅಪುರ್ಬಾಯೆನ್
ಕವಿನ್ ಪಿಂತ್ರಾಯ್ಲೆಂ ’ನಾಂವ್’ ಕವಿತಾಂತ್ಲ್ಯಾ ಸಕಯ್ಲ್ಯಾ ಪಂಕ್ತಿಂತ್ ಪಳೆವ್ಯೆತ್.
"ಜಿಣಿ ಸಂಪ್ಚ್ಯಾ ತ್ಯಾ ಕರಾಳ್ ಘಡ್ಯೆ
ಚಾಲ್ತಿಂ ನಾಂವಾಂ ಹಾಯ್! ನಾಂತ್ ಫುಡೆಂ!!
ಮನಿಸ್ ಮಾತ್ಯೆಕ್ ಪಾಟಿಂ ವೆತಾಂ
ವೊಲಾಯ್ತಾತ್ ತಾಕಾ ಸಾಂಗೊನ್ ಮೊಡೆಂ"
ನಾಂವ್ ಮ್ಹಳ್ಳೆಂ ಕವಿತಾ ವಾಚ್ತಾನಾ ಮ್ಹಾಕಾ ಹಾಂತು ಕವಿಚೆಂ ಎಕಾ ಥರಾಚೆಂ ವ್ಯಂಗ್ಯ್ ಝುಜ್ ದಿಸೊನ್ ಯೆತಾ. ಜಯ್ತ್ ಮೆಳ್ತಾನಾ ನಾಂವಾಕ್ ಆಶೆತಾತ್, ನಾಂವ್ ಮೆಳ್ತಾನಾ ಪದ್ವೆಕ್ ವೆಂಗ್ತಾತ್ ಆನಿಂ ಹ್ಯಾ ಬರಾಬರ್ ಆಪುಣ್ ವಡ್ಲೊ ಮಳ್ಳೊ ಗರ್ವ್ ಚಡ್ತಾ. ಪುಣ್ ಹೆಂ ಸರ್ವ್ ಹ್ಯಾ ಸಂಸಾರಾಂತ್ ಮಾತ್ರ್. ಮನ್ಶಾ ಜಿಣಿ ತಾತ್ಕಾಲಿಕ್ ಹೆಂ ಸತ್ ಸರ್ವಾಂನಿ ಮಾಂದುನ್ ಘೆತಲ್ಲೆಂ ತರ್? ಮನಿಸ್ ಪದ್ವೆಕ್ ಆಶೆತಾನಾತ್ಲೊ ಕೊಣ್ಣಾ? ಹೆಂ ಸತ್ ಕವಿ ಫ್ರಾನ್ಸಿಸಾನ್ ವ್ಯಂಗ್ಯ್ ರೀತಿನ್ ಬರಯಿಲ್ಲೆಂ ಕವಿತಾಕ್ ಸೊಭಾಯ್ ದೀಂವ್ಕ್ ಪಾವ್ಲ್ಯಾ.
ಹಾಚಿ ಕವಿತಾಂ ಪರ್ತ್ಯಾನ್ ಪರ್ತ್ಯಾನ್ ವಾಚ್ತಾನಾ ಮ್ಹಾಕಾ ಬೊಗ್ಲೆಂಕಿ ಹಾಚಿ ಕವಿತಾ ದೆವಾ ಆನಿಂ ಕವಿ ಮಧ್ಲೆಂ ಸಂಭಾಷಣ್. ಆನಿಂ ಸಂಬಾಷಣ್ ಮ್ಹಣ್ತಾನಾ ತೆಂ ಮಾಗ್ಣೆಂ ಜಾತಾ. ಆಪ್ಲಿಂ ಬೊಗ್ಣಾಂ, ದೂಕ್, ಸವಾಲಾಂ, ನಿವೇದನ್, ವಿರೋದ್ಪಣ್ ಕವಿ ಅಪ್ಲ್ಯಾ ಕವಿತಾಂನಿ ದೆವಾ ಮುಖಾರ್ ದವರ್ತಾ.
ಸಮಾಜೆಂತ್ ಜಾಂವ್ಚಾ ಅನ್ನ್ಯಾಯ್, ಮೆಳ್ಚೆ ಕಷ್ಟ್ ಸೊಸ್ಚೆಂ ಮನ್ಶಾಗೂಣ್ ಜಾವ್ನಾಸಾ. ಪುಣ್ ಮಸ್ತ್ ಪಾವ್ಟಿಂ ಮನಿಸ್ ಕಷ್ಟ್ ಅನ್ವಾರ್ ಆಯಿಲ್ಲ್ಯಾ ವೆಳಾರ್ ನಿರಾಸ್ ಜಾತಾ. ಆಶೆಂಚ್ ಕವಿ ಸಂಸಾರಾಚೊ ಗುಸ್ಫಡ್ ಗೊಂದೊಳ್ ಪಳೆವ್ನ್, ಅನ್ನ್ಯಾಯ್ ಸೊಸುನ್ ಕಂಗಾಲ್ ಜಾವ್ನ್ ಜೆಜು ಮುಖಾರ್ ಸರ್ಪಡ್ಚೆಂ ದೃಷ್ಟಾಂತ್ ತುಕಾಚ್ ಹಾಂಚ್ ಶರಣ್ ಜಾಲಾಂ ಕವಿತಾಂತ್ ಪಳೆವ್ಯೆತ್.
"ನಾಕಾ ಸೊಮ್ಯಾ ತುಂ ಯೇನಾಕಾ
ಖುರ್ಸಾರ್ ಪರತ್ ಮರಾನಾಕಾ
ಫಾರಾ-ಗುಳ್ಯಾಂನಿ ತುಕಾ ಕರ್ತಿತ್ ಪಿಟೊ
ಹಾಡಾಂ ಸಯ್ತ್ಯಿ ಮೆಳ್ಚಿನಾಂತ್ ಆಮ್ಕಾಂ"
ಹಿಂ ವಯ್ಲಿಂ ಉತ್ರಾಂ ’ತುಕಾಚ್ ಹಾಂವ್ ಶರಣ್ ಜಾಲಾ’ ಮ್ಹಳ್ಳ್ಯಾ ಕವಿತಾಂತ್ಲಿ. ಜೆಜು ಪರ್ತ್ಯಾನ್ ಯೆತಲೊ ಮ್ಹಳ್ಳಿ ಸರ್ವಾಂಚಿ ಪಾತ್ಯೆಣಿಂ. ಆಶೆಂ ಆಸ್ತಾಂ ಕವಿ ಜೆಜುಕ್ ಯೇನಾಕಾ ಮ್ಹಣ್ತಾ? ಹೆಂ ಕಿತೆಂ ಹೊ ಉಲಯ್ತಾ? ಜೆಜುಕ್ ನೀಜ್ ಸತಾ ಥಾವ್ನ್ ಪಲಾಯನ್ ಕರುಂಕ್ ಸಾಂಗ್ತಾಗಿ? ಹ್ಯಾ ಕವಿತಾಂತ್ಲೊ ಕವಿಚ್ ನಿರಾಶಿ ಜಾಲಾ? ಹಾಂಗಾಸರ್ ಕವಿ ನಿರಾಶಿ ಜಾವ್ನ್, ಸಲ್ವಣ್ ಘಸ್ಪಡ್ಲೊ ಮ್ಹಾಕಾ ಭೊಗ್ತಾ. ಹರ್ಯೇಕಾ ಕವಿತಾಂತ್ ವಾಸ್ತವಿಕತಾ ಉಚಾರ್ಚೊ ಕವಿ ಹಾಂಗಾಸರ್ ನೀಜ್ ಸತಾ ಥಾವ್ನ್ ಪೊಳಾಪಳ್ ಆಶೆತಾ. ಪುಣ್ ನೀಜ್ ಸತ್ ಕಿತೆಂ? ಆಮಿಂ ಏಕ್ ಪಾವ್ಟಿಂ ನ್ಹಯ್ ಜೆಜುಕ್ ಹರ್ಯೇಕಾ ದಿಸಾ ಆಮ್ಚಾ ಜಿಣ್ಯೆ ವರ್ವಿಂ ಖುರ್ಸಾರ್ ಮಾರ್ತಾಂವ್. ಜಿಬೆನ್ ಉಸಾಳ್ಚಾ ಫಾರಾಂನಿ, ಗುಳ್ಯಾಂನಿ ತಾಕಾ ಪಿಟೊ ಕರ್ತಾಂವ್. ತಾಚ್ಯಾ ಹಾಡಾಂ ಪಿಟೊ ಜಾಂವ್ಕ್ ತಾಣೆಂ ಪರ್ತ್ಯಾನ್ ಯೇಜಾಯ್ ಮ್ಹಣ್ ನಾ. ಸಲ್ವಣೆಂತ್ ಸುರು ಜಾಲ್ಲಿ ಹಿ ಕವಿತಾ ಸಲ್ವಣೆಂತ್ ಆಖೇರ್ ಜಾಲ್ಯಾ. ಸಲ್ವಣಿ ಜಯ್ತಾಕ್ ಧರ್ಣಿಕ್ ಶೆವ್ಟಾಯ್ತಾ ಆನಿಂ ಶರಾಣಾಗತ್ ಆಶೆತಾ. ಕ್ರಮೇಣ್
ಫಳಾಪೊಳ್.
ಎಕಾ ಕುಶಿನ್ ಜೆಜುಚೆರ್ ಭಿರ್ಮತ್ ಪಾಂವ್ಚೊ ಕವಿ ಜೆಜು ಮುಖಾರ್ಚ್ ಶರಾಣಾಗತ್ ಜಾತಾ. ಪುಣ್ ಹ್ಯಾ ಕವಿತಾಂತ್ ಜೆಜು ತುಂ ಯೇನಾಕಾ ಮ್ಹಣ್ಚೊ ಕವಿ ’ಹಾಕ್ ಮಾರ್ತಾಂ ಸೊಮ್ಯಾ ದೆವಾ.....!! ಆನಿಂ ತುರ್ತಾನ್ ಯೆ, ತಡವ್ ಕಿತ್ಯಾಕ್! ಕವಿತಾಂತ್ ಜೆಜುಕ್ ವೆಗ್ಗಿ ಯೇ ಮ್ಹಣ್ ಆಪಯ್ತಾ. ತುಕಾಚ್ ಶರಾಣಾಗತ್ ಜಾಲಾ ಮ್ಹಳ್ಯಾ ಕವಿತಾಂತ್ ಸಲ್ವಣ್ ನಿರಾಶಿ ಜಾಲ್ಲೊ ಕವಿ ಹ್ಯಾ ದೋನ್ ಕವಿತಾಂನಿ ಧಯ್ರಾನ್ ಕ್ರಾಂತಿ ಉಟಯಿಲ್ಲಿಂ ಪಳೆವ್ಯೆತ್. ನವ್ಯಾ ಹಾತೆರಾಚೆ ಜೆಜುಕ್ ಗರ್ಜ್ ಆಸಾ ಮ್ಹಣ್ ಕವಿ ಸಾಂಗ್ತಾ. ಕ್ರಾಂತಿ ಮಾರಿಫಾತ್ ಝುಜ್. ಆಮ್ಚ್ಯಾ ನಡ್ತ್ಯಾಂತ್ ಕ್ರಾಂತಿ ಹಾಡವ್ನ್ ದೆವಾಚೆ ಖರೆ ಝುಜಾರಿ ಜಾಂವ್ಕ್ ಕವಿ ದೆವಾಲಾಗಿ ಶರಣಾಗತ್ ಜಾಲ್ಯಾರಿ ಹಾಂಗಾಸರ್ ಎಕಾ ಥರಾಚೆಂ ಧಯ್ರ್ ಆಸಾ.
ದಿಸಾ ಉಜ್ವಾಡಾಕ್ಚ್ಚ್ ಆಮ್ಚೆಂ ಭಂವ್ತಿ ಖುನಿ, ಅತ್ತ್ಯಾಚಾರ್, ಲಡಾಯ್, ಸದಾಂಚೆ ಜಾಲಾಂ. ಹ್ಯಾ ಪಾಡ್ ಕೃತ್ತ್ಯಾಂಕ್ ವಿರೋಧ್ ಕರುಂಕ್ ಆಮಿಂ ತಯಾರ್ ನಾಂವ್. ಆಮ್ಚಾಂ ಲೇಖನಾಂನಿ, ಕವಿತಾಂನಿ ಹೆಂ ಸತ್ ಉಚಾರುಂಕ್ ಕಿತ್ಲೆ ಕಷ್ಟ್ ನ್ಹಯ್ಗಿ? ಜರ್ತರ್ ಧಯ್ರಾನ್ ಕೊಂಣೆಂಯಿ ಜಾಂವ್ಚಾ ಅನ್ನ್ಯಾಯಾಕ್ ವಿರೋಧ್ಸುನ್ ಬರಯ್ಲೆಂ ತರ್ ತಾಕಾ ನಿಂದಾ, ಇಜಾ, ಬಾಂಧುನ್ ದವರಲ್ಲಿ ಬುತಿ....ಆನಿಂ ಹಾಕಾ ನಿದರ್ಶನ್ ’ತಯಾರ್ ಆಸಾಂ’ ಮ್ಹಳ್ಳೆಂ ಕವಿತಾ.
ಸತ್ ತೆಂ ಕೆದಾಳಾಯಿ ಕೊಡುಚ್ಚ್. ಹೆಂ ಸತ್ ಉಚಾರ್ಲ್ಲ್ಯಾ ಕವಿಕ್ ದುಸ್ಮಾನಾಕಾಯ್ ಫಾವೊ ಜಾಲಿ ಆನಿಂ ಶಿಂತ್ರ್ಯಾಳೊ ಮ್ಹಣ್ ವೊಲಾಂವ್ಕ್ ಲಾಗ್ಲೆ. ಪುಣ್ ಹ್ಯಾ ಸರ್ವಾಂಚಿ ಫಿಕಿರ್ ನಾಸ್ತಾಂ ಆಪುಣ್ ಧಯ್ರಾನ್ ಜಿಯೆತಲೊಂ ಮ್ಹಣ್ ಕವಿ ಸಾಂಗ್ತಾ. ತುಕಾಚ್ ಶರಣಾಗತ್ ಜಾಲಾ ಮ್ಹಳ್ಯಾ ಕವಿತಾಂತ್ ಕವಿ ಪೊಳಾಪಳ್ ಆಶೆಲ್ಲೊ ತರಿ ತಯಾರ್ ಆಸಾಂ ಕವಿತಾಂತ್ ನವ್ಯಾ ಹುಮೆದಿನ್ ಭರುನ್ ಧಯ್ರಾನ್ ಸಮಾಜೆಕ್ ಮ್ಹಜ್ಯಾ ವಾಟ್ ದಾಕಂವ್ಕ್ ಮುಖಾರ್ ಸರ್ತಾಂ. ಹಾಂಗಾಸಾರ್ ಕವಿ ಧಯ್ರಾಧಿಕ್ ತಶೆಂಚ್ ಆಶಾವಾದಿ ಜಾಲ್ಲೊ ಝಳ್ಕತಾ. ಮನಿಸ್ ಆಶಾವಾದಿ ಜಾಲ್ಯಾರ್ ಜಿಣ್ಯೆಂತ್ಲೆ ಕಿತೆಂಯಿ ಕಷ್ಟ್, ಅನ್ವಾರ್, ಹ್ಯಾ ಸಮಾಜೆಂತ್ ಜಾಂವ್ಚೊ ಅನ್ನ್ಯಾಯ್ ನಿರಾಸ್ ಜಾಂವ್ಕ್ ಸೊಡಿನಾ.
"ಕಾಡ್ಲಾಂ ಮೇಟ್ ಮುಖಾರ್ ಹಾಂವೆ
ಸಾಮಾಜೆಕ್ ಮ್ಹಜ್ಯಾ ದಾಕಂವ್ಕ್ ವಾಟ್
ಕಿತ್ಲಿಂಯ್ ಅನ್ವಾರಾಂ ಯೆಂವ್ದಿತ್ ಮ್ಹಜೆರ್
ದಾಕಂವ್ಚೊನಾ ಹಾಂವ್ ಕೆದ್ನಾಂಚ್ ಪಾಟ್ (’ತಯಾರ್ ಆಸಾಂ’)
ಕೊಂಕ್ಣೆ ಮಾಯೆಚಿ ಭುರ್ಗಿಂ ಮ್ಹಣೊಂಕ್ ಆಮಿಂ ಅಭಿಮಾನ್ ಬೊಗಾಜಾಯ್. ಕೊಂಕ್ಣೆಕ್ ಏಕ್ ಸ್ಥಾನ್ ಮೆಳಾಜಾಯ್ ತರ್ ಸಭಾರಾಂನಿ ಹ್ಯಾ ಖಾತಿರ್ ಮಿನತ್ ಕೆಲ್ಯಾ. ತ್ಯಾ ಮಿನತೆಚೊ ಫಳ್ ಜಾವ್ನ್ ಕೊಂಕ್ಣಿ ಲೊಕಾಚೆ ಮಿಸಾಂವ್ ಸುಫಳ್ ಜಾಲೆಂ. ಕೊಂಕ್ಣಿ ಮಾಯೆಚೆ ಖರೆಂ ಸುಪುತ್ರ್ ಜಾವ್ನ್ ತಿಚ್ಯಾ ಸೆವೆಂತ್ ಸರ್ಗ್ ದೆಖುಂಕ್ ಕವಿ ’ಅಮರ್ ಕೊಂಕ್ಣಿ’ ಮ್ಹಳ್ಯಾ ಕವಿತಾಂತ್ ಉಲೊ ದಿತಾ. ಹ್ಯಾ ಕವಿತಾಂತ್ ಕವಿಚಿ ಹುಮೆದ್, ಧಯ್ರ್, ಜಾಗವ್ಣಿಂ ಭರ್ಪೂರ್ ವಾಳ್ಳ್ಯಾ.
ದೆವಾಚ್ಯಾ ನಾಂವಾನ್ ಮಂದಿರಾಂ, ದಿವ್ಳಾಂ, ಇಗರ್ಜ್ಯೊ ಸಭಾರ್. ಪುಣ್ ಹಾಂಗಾಸರ್ ಆಮಿಂ ದೆವಾಕ್ ಪಳೆಂವ್ಕ್ ಸಕ್ತಾಂವ್ಗಿ ಮ್ಹಳ್ಳೆಂ ವ್ಯಂಗ್ಯ್ ಸವಾಲ್ ಕವಿ ಉಚಾರ್ತಾ. ದೆವಾಚ್ಯಾ ಪುತಾಕ್ ಜೆಜುಕ್ ಮನ್ಶಾಜಾತಿನ್ ಲಗಾಡ್ ಕಾಡ್ಲೊ ಆನಿಂ ಆತಾಂ ಮಾತ್ಯೆ ಪುತ್ಳಿ ರಚುನ್ ತಾಚಿ ಪುಜಾ ಕರ್ಚಾರ್ ಪಡ್ಲಾ ಮ್ಹಣ್ ಕವಿ ’ದೆವಾಚೆಂ ಬಿಡಾರ್’ ಮ್ಹಳ್ಳ್ಯಾ ಕವಿತಾಂತ್ ಸಾಂಗ್ತಾ. ಕಿತ್ಲೆಂ ಸತ್ ಆನಿಂ ಅರ್ಥ್ ಹ್ಯಾ ಕವಿತೆಂತ್. ಹೆಂ ಕವಿತಾ ಕೊಶೆಡ್ದಾಕ್ ರಿಗೊನ್ ಸತ್ ನಾಚ್ ಕರ್ತಾ ತಶೆಂ ಭೊಗ್ಲೆಂ. ಆಮ್ಚಾ ಭಂವಾರಿಂ, ಆಮ್ಚ್ಯಾ ಭಾವಾಂ ಭಯ್ಣಿಂಥಂಯ್ ಆಮಿಂ ಪಳೆಂವ್ಕ್ ದೆವಾಕ್ ಪಳೆಂವ್ಕ್ ಸಕ್ತಾಂವ್. ಪುಣ್ ಕರ್ಚೊ ಅನ್ನ್ಯಾಯ್ ಸರ್ವ್ ಕರ್ನ್ ದೆವಾಕ್ ಸೊಧುನ್ ಮನಿಸ್ ಇಗರ್ಜಾಂಕ್, ದಿವ್ಳಾಂಕ್ ವೆತಾ ಆನಿಂ ಆಪುಣ್ ಸಾಂತ್ ಮಣ್ ಪಾಚಾರ್ತಾ. ಹೆಂ ಮನ್ಶಾಚೆಂ ಪೊಕೊಳ್ಪಣ್. ಹ್ಯಾ ಕವಿತೆಂತ್ಲಿ ಏಕ್ ವೋಳ್ ಅಶಿ ಆಸಾ:
"ರಗ್ತಾ ಮಾಸಾಚ್ಯಾ ಜಿವ್ಯಾ ಮನ್ಶಾಕ್
ಮನ್ಶ್ಯಾ ಜಾತಿನ್ ಲಗಾಡ್ ಕಾಡ್ಲೊ
ಮಾತ್ಯೆ ಮೂರ್ತಿ ರಚುನ್ ಪರ್ತ್ಯಾನ್
ಪುಜಾ ತಾಚಿಚ್ ಕರ್ಚ್ಯಾರ್ ಪಡ್ಲೊ"
ದೇವ್ಚ್ ಆಪ್ಲ್ಯಾ ರಚ್ನೆ ಥಂಯ್ ಜಾಗ್ವಣ್ ದಿಂವ್ಚೆ ಕವಿತಾ ’ದೇವ್ ಉಲಯ್ತಾ’. ಆಪ್ಣೆಂ ತುಕಾ ರಚ್ಲೆಂ ಪುಣ್ ಮ್ಹಾಕಾ ಸತ್ಮಾನುಂಕ್ ತುಕಾ ನಾಕಾ. ಎಕಾ ನಿಜಾ ದೆವಾಕ್ ಮಾನ್ ದೀ ಮ್ಹಳ್ಳೆಂ ಫರ್ಮಾಣ್ ತುಂವೆ ಪಾಳುಂಕ್ ನಾಂಯ್. ಜಿಣಿ ಬದ್ಲುಂಕ್ ತುಕಾ ಏಕ್ ಅವ್ಕಾಸ್ ದಿತಾ ಮ್ಹಣ್ಚೆಂ ದೆವಾಚೆಂ ಉಲವ್ಣೆಂ ಕವಿನ್ ಭಾರಿಚ್ ಅಪುರ್ಬಾಯೆನ್ ’ದೇವ್ ಉಲಯ್ತಾ’ ಮ್ಹಳ್ಳ್ಯಾ ಕವಿತಾಂತ್ ಆಟಯ್ಲಾ.
ವಿವಿಧ್ ಧರ್ಮಾಂನಿ ಭರಲ್ಲೊ ಹೊ ಸಂಸಾರ್ ದೆವಾಚ್ಯಾ ನಾಂವಾನ್ ಬರೆಂ ಕರ್ತಾ ಮ್ಹಣ್ ಸಾಂಗೊನ್ ಅನ್ನ್ಯಾಯ್ ಕರ್ಚೊ ಸದಾಂಚೆಂ ಜಾಲಾಂ. ಮ್ಹಜೊ ದೇವ್...ತುಜೊ ದೇವ್ ಮ್ಹಣ್ ಸಾಂಗೊನ್ ಧರ್ಮಾಚೊ ವ್ಯಾಪಾರ್ ಚಲ್ತಾ. ದೆಶಾ ಖಾತಿರ್ ಖುನಿ, ಝಗ್ಡಿಂ ಸಹಜ್ ಜಾವ್ನ್ ಗೆಲ್ಯಾಂತ್. ಆಶೆಂ ಮನ್ಶಾ ಜಿವಿತಾಕ್ ಮೋಲ್ಚ್ಚ್ ನಾ ಮ್ಹಣ್ ಕವಿ ತಾಚ್ಯಾ ಚಡಾವತ್ ಕವಿತಾಂನಿ ಸಾಂಗ್ತಾ. ಸಂಸಾರಾರ್ ಘಡ್ಚಿ ಘಡಿತಾಂ, ಹಕೀಗತ್ ಹಾಚಿ ಕವಿತಾಚೆಂ ವಿಶೇಶತಾ. ಪುಣ್ ಎಕಾಚ್ಚ್ ವಿಶಯಾಚೆರ್ ಹಾಣೆಂ ಚಡ್ ಕವಿತಾ ಬರಯಿಲ್ಲ್ಯಾನ್ ಘುಸ್ಪಡೆಕ್ ಅಸ್ಪದ್ ಜಾಲಾ. ದಾಕ್ಲ್ಯಾಕ್ ’ಮನ್ಶಾ ಧರ್ಮ್’ ಕವಿತಾಂತ್ ಕವಿ ಆಶೆಂ ಸಾಂಗ್ತಾ;
"ಮನ್ಶಾಕ್ ಜರ್ ರಚುಂಕ್ಚ್ ಪಡಾತ್
ತುಜ್ಯಾ ಸಾರ್ಕ್ಯಾಚೊ ರಚಿನಾಕಾ
ಮನ್ಶ್ಯಾಕ್ ಮಾನ್ಶ್ಯಾಚೆ ದುಸ್ಮಾನ್ ಕರ್ಚ್ಯಾ
ಪ್ರವಾದ್ಯಾಂಕ್ ಸಂಸಾರಾರ್ ಧಾಡಿನಾಕಾ"
ಹಾಂಗಾಸರ್ ಕವಿ ಪ್ರವಾದ್ಯಾಂಕ್ ಸಂಸಾರಾರ್ ಧಾಡಿನಾಕಾ ಮ್ಹಣ್ತಾ. ಪ್ರವಾದ್ಯಾಂಕ್ ಮನ್ಶಾಂನಿ ಮಾನ್ ದಿಲ್ಲೊ ನಾ. ತಾಂಚೆರ್ಚ್ಚ್ ತೆ ಉಪ್ರಾಟ್ಲೆಂ. ಹ್ಯಾಚ್ ಖಾತಿರ್ ಪ್ರವಾದ್ಯಾಂನಿ ಯೆಂವ್ಚೆಂ ನಾಕಾ ಮ್ಹಣ್ಚೊ ಕವಿ ’ಸಂಸಾರ್ರೇ ಬಾಬಾ ಕಸ್ಲೊ ವಿಚಿತ್ರ್!’ ಕವಿತಾಂತ್ ಪ್ರವಾದಿ ಪ್ರರ್ತ್ಯಾನ್ ಯೇಂವ್ದಿ ಮ್ಹಣ್ ಆಶೆತಾ. ಹ್ಯಾ ಕವಿತೆಂತ್ಲಿ ಉತ್ರಾಂ:
’ಜಿಯೆಯಾ’ನಿ ಜಿಯೆಂವ್ಕ್ ದಿಯಾ
ಮಂತ್ರ್ ಹೆಂ ಕಶೆಂ ವಿಸ್ರಾಲ್ಯಾಂವ್
ಪ್ರವಾದಿ ಆಮ್ಚೆ ಯೆಂವ್ದಿತ್ ಪರ್ತ್ಯಾನ್
ಕಿತ್ಯಾಕ್ ಆಮಿಂ ಆಶೆನಾಂ’
ದೆವಾಕಡೆ ಪ್ರವಾದ್ಯಾಂಕ್ ಧಾಡಿನಾಕಾ ಮ್ಹಣ್ಚೊ ಕವಿ ಲೊಕಾಂನಿ
ಪ್ರವಾದ್ಯಾಂಕ್ ಆಶೆಜಾಯ್ ಮ್ಹಣ್ ಸಾಂಗ್ತಾ. ಆಶೆಂ ಥೊಡ್ಯಾಂ ಕವಿತಾಂನಿ ವಿಷಯ್ ಏಕಚ್ಚ್ ಪುಣ್ ಚಿಂತಾಪ್ ದುಸ್ರೆಂ ಜಾಲ್ಲೆಂ ವರ್ವಿಂ ಗುಸ್ಫಡೆಕ್ ಅಸ್ಪದ್ ಜಾಲಾ ಮ್ಹಣ್ ಬೊಗ್ತಾ. ಜಾಂವ್ಕ್ ಪುರೊ ವಿವಿಧ್ ಸನ್ನಿವೇಶಾಂನಿ ಹಿಂ ಕವಿತಾ ಉದೆಲ್ಲಿ.
ಆಮ್ಚಾ ದೇಶಾ ವಿಶ್ಯಾಂತ್, ಬಾಂಗ್ಲಾದೇಶಾಚ್ಯಾ ಪರಿಸ್ಥಿತೆಂ ವಿಶ್ಯಾಂತ್, ಝುಜಾ ವಿಶ್ಯಾಂತ್ ಕವಿನ್ ಬರೆಂ ಕರ್ನ್ ಅಪ್ಲ್ಯಾ ಕವಿತಾಧ್ವಾರಿಂ ತಾಚಿಂ ಬೊಗ್ಣಾಂ ಉಚಾರ್ಲ್ಯಾಂತ್. ಎಕಾ ಬುಕಾಂತ್ ಹರ್ಯೇಕ್ ಸಂಗ್ತಿ, ನೀಜ್ ಹಕೀಗತ್ ಹಾಣೆಂ ಗುಂತ್ಲ್ಯಾತ್. ನಿಜಾಯ್ಕಿ ಶಾಭಾಸ್ಕಿ ಫಾವೊ.
ಆಮ್ಚ್ಯಾ ಚಾಲ್ತಿ ಜಿಣ್ಯೆಂತ್ ಆಮಿಂ ಮಾಗ್ಣೆಂ ಕರ್ತಾಂವ್ ರಜಾರ್ ಕರ್ತಾಂವ್ ಪುಣ್ ಆಮ್ಚಾ ಕಾಮಾನಿಂ, ರಾಟಾವಳಿಂನಿ ದೆವಾಂಕ್ ವಿಚಾರ್ತಾಂವ್ ಮ್ಹಣ್ ’ಖರೊ ಭಕ್ತ್’ ಮ್ಹಳ್ಳ್ಯಾ ಕವಿತಾಂತ್ ದುಬ್ಳ್ಯಾ ಭಕ್ತಾಚೆ ಆನಿಂ ನಾಯ್ಕಾಚೆ ಉದಾಹರಣ್
ದೀವ್ನ್ ಕವನಾಂತ್ ವ್ಹಾಳಯಿಲ್ಲಿ ರೀತ್ ಮೆಚ್ವೊಂಚಿ ತಸಲಿ. ಲಾಟರಿಚಾ ನಾಂವಾನ್ ಕಸಲೊ ಭ್ರಷ್ಟಾಚಾರ್ ಘಡ್ತಾ ಮ್ಹಣ್ ’ಲಾಟರಿ’ ಮ್ಹಳ್ಯಾ ಕವಿತಾಂ ಕವಿ ಕಾಣಿಯೆರುಪಾರ್ ಬರಯ್ಲಾಂ. ಲಾಟರಿಚಾ ನಾಂವಾನ್ ಮನಿಸ್ ಕಸೊ ಪಾಪಾರಿ ಆನಿಂ ಮಾಂಕೊಡ್ ಜಾತಾ ಮ್ಹಳ್ಳೆಂ ಸತ್ ಹಾಂಗಾಸರ್ ಪಳೆವ್ಯೆತ್.
ಮನ್ಜಾತಿಕಡೆ ಆಮ್ಚೊ ವ್ಯವಹಾರ್ ಅಶೀರ್ ಮನಾಚೊ. ಪುಣ್ ತಾಂಚೆ ಥಾವ್ನ್ ಆಮಿಂ ಶಿಕೊಂಕ್ ಜಾಯ್ತೆ ಆಸಾ ಮ್ಹಣ್ಚೆ ಸತ್. ಮನ್ಜಾತೆಂಕ್ ಮನಿಸ್ ಸಮಧಾನೆನ್ ಜಿಯೆಂವ್ಕ್ ಸೊಡಿನಾ. ತಾಚ್ಯಾ ಫಾಯ್ದ್ಯಾಖಾತಿರ್ ತಾಂಚೆ ನಾಸ್ ಕರ್ತಾ ಮ್ಹಣ್ ಕವಿ ಮನ್ಶಾಂಕ್ಚ್ಚ್
ಮನ್ಜಾತ್ ಮ್ಹಣ್ ವೊಲಾಯ್ತಾ ’ಮನಿಸ್ ಮನ್ಜಾತ್’ ಮ್ಹಳ್ಳ್ಯಾ ಕವಿತಾಂತ್.
ಜುದಾಸಾಚೆ ನಾಂವ್ ಆಯ್ಕಾತಾನಾ ಆಮ್ಕಾಂ ದಿಸ್ಚೊ ಏಕ್ ಘಾತ್ಕಿ ಮನಿಸ್. ಜೆಜುಕ್ ವಿಕ್ರೀತ್ ಕೆಲ್ಲೊ ಅನುಪ್ಕಾರಿ. ಪುಣ್ ಕವಿ ಮ್ಹಣ್ತಾ ಜುದಾಸ್ ಜೆಜುಚೊ ಮೊಗಾಚೊ ಶಿಸ್. ಸಗ್ಳ್ಯಾಂನಿ ದ್ವೇಶುಂಚ್ಯಾ ಜುದಾಸಾಕ್ ಕವಿ ಮಹಾನ್ ಮ್ಹಣ್ತಾ. ಕವಿ ಜುದಾಸಾಕ್ ’ಜುದಾಸ್ ಇಸ್ಕಾರಿಯತ್’ ಮ್ಹಳ್ಳ್ಯಾ ಕವಿತಾಂತ್ ವಿಶಿಷ್ಟ್ ಸ್ಥಾನಾರ್ ದವರಲ್ಲೆಂ ಆಮಿಂ ಪಳೆವ್ಯೆತ್.
’ವೆಗ್ಳೆಂಚ್ ಜಾವ್ನಾಸಾ ಚಿಂತಾಪ್ ಮ್ಹಜೆಂ
ತುಕಾ ಹಾಂವ್ ಮಹಾನ್ ಮ್ಹಣ್ತಾಂ
ತುಜೆವಿಣೆ ಸೊಮಿಯಾಚಿ ಕಥಾ
ಆಧುರಿ ಉರ್ತಿ! ಕೋಣ್ ಹೆಂ ಮಾಂಧ್ತಾ!!’
ಅಸಲೆಂ ಏಕ್ ಮಹಾನ್ ಆನಿಂ ವಿಶಾಲ್ ಚಿಂತಾಪ್ ಎಕಾ ಕವಿಕ್ ಮಾತ್ರ್ ಯೆಂವ್ಕ್ ಸಾಧ್ಯ್.
ಹಾಚ್ಯಾ ಚಡಾವತ್ ಕವಿತಾಂನಿ ದೇಶ್ ಪ್ರೇಮ್ ಆನಿಂ ದೆವಾಚೊ ಮೋಗ್ ಹಾಂವೆ ಪಳೆಯ್ಲಾ. ಕವಿ ಹರ್ಯೇಕಾ ಕವಿತಾಂ ದೆವಾಕಡೆ ಅಡ್ದೊಸ್ ಮಾಗೊನ್ ಅಖೇರ್ ಜಾತಾತ್. ಹೆಂ ತಾಕಾ ಆಸ್ಚೊ ದೆವಾಚೊ ಮೋಗ್ ಆನಿಂ ಭಕ್ತಿಪಣಾಕ್ ರುಜ್ವಾತ್ ತರೀ ಚಡಾವತ್ ಕವಿತಾಚೆಂ ಆಖೇರ್ ಆಶೆಂ ಜಾಲ್ಲೆಂ ವರ್ವಿಂ ಕವಿತಾಚಿ ಸೊಬಾಯ್ ಉಣೆಂ ಜಾಲಾಂ ತಶೆಂ ಬೊಗ್ತಾ. ಚಡಾವತ್ ಕವಿತಾಂನಿ ವಿಶಯ್ ಏಕಚ್ಚ್ ಆಸೊನ್ ವಿವಿಧ್ ವಿಚಾರ್
ವ್ಹಾಳೊನ್ ಆಯ್ಲ್ಯಾತ್. ಸಭಾರ್ ಕವಿತಾಂನಿ ಕವಿ ಸಂಸಾರಾಂತ್ ಘಡ್ಚಾ ಘಡಿತಾಂಚೆರ್, ಮನ್ಶಾಚ್ಯಾ ಜಿಣ್ಯೆ ವಿಶ್ಯಾಂತ್ ಉಲಯ್ತಾ. ಹೆಚ್ಚ್ ವಿಶಯ್ ಸಭಾರ್ ಕವಿತಾಂನಿ ಪರ್ತ್ಯಾನ್ ಪರ್ತ್ಯಾನ್ ಉದೆವ್ನ್ ಏಕಾ ಕವಿತಾಂತ್ ಏಕ್ ವಿಶ್ಯಾಚೆರ್ ಆಪ್ಲಿಂ ಬೊಗ್ಣಾಂ ಉಚಾರ್ಲ್ಲೊ ಕವಿ ತ್ಯಾಚ್ಚ್ ವಿಶಯಾಚೆರ್ ಅನ್ಯೇಕಾ ಕವಿತಾಂತ್ ಕವಿ ಅಪ್ಲಿಂ ಅಥ್ವಿಂಚ್ ಬೊಗ್ಣಾಂ ಉಚಾರ್ತಾ. ಹ್ಯಾ ವಿಶಯಾಚೆರ್ ಕವಿನ್ ಚಡಿತ್ ಗಮನ್ ದಿಂವ್ಚೆಂ ಗರ್ಜ್ ಮ್ಹಣ್ ಬೊಗ್ತಾ. ಚಡಿತ್ ಇಮಾಜ್ಯೊ ಕವಿತಾಂತ್ ವಾಪಾರ್ಲ್ಯಾರ್ ಹಾಚಿಂ ಕವಿತಾ ಚಡಿತ್ ಸೊಬ್ತಿತ್. ಹೊ ಮ್ಹಜೊ ಖಾಸ್ಗಿ ಅಬಿಪ್ರಾಯ್. ಎಕಾದಾವೆಳಾ ಮ್ಹಜೊ ಅಬಿಪ್ರಾಯ್ ತುಮ್ಕಾಂ ಚೂಕ್ ಮ್ಹಣ್ ಭೊಗ್ಲ್ಯಾರ್ ಸುದಾರ್ಸುನ್ ವರಿಜಾಯ್ ಮ್ಹಳ್ಳಿ ಮ್ಹಜಿ ಖಾಲ್ತಿ ವಿನಂತಿ.
ಪುಣ್ ಹಾಚ್ಯಾ ಸರ್ವ್ ಕವಿತಾಂನಿ ಸತ್, ವಾಸ್ತವಿಕತಾ ಝಳ್ಕತಾ. ಕಾಲ್ಪನಿಕ್ ಸಂಸರಾಂತ್ ಭಂವಾನಾಸ್ತಾನಾ, ಆಪ್ಲ್ಯಾ ಭಂವ್ತಿಂ ಘಡೊನ್ ಗೆಲ್ಲಿಂ ಆನಿಂ ಆತಾಂಚಾ ಘಡಿತಾಚೆರ್ ಕವಿತಾ ಬರಂವ್ಚಿ ಹಾಚೆಂ ತಾಲೆಂತ್ ನಿಜಾಯ್ಕಿ ಶಾಬಾಸ್ಕೆಕ್ ಫಾವೊ. ಆಪ್ಲಿಂ ಬೊಗ್ಣಾಂ, ಸುಡಾಳ್ ಭಾಶೆನ್, ವಿಶಿಷ್ಟ್ ಶೈಲಿನ್ ಕವಿತಾಂನಿ ವ್ಹಾಳಾಯ್ಲ್ಯಾ. ಹಾಚ್ಯಾ ಕವಿತಾಂನಿ ಸರ್ವಾಂಕ್ ಏಕ್ ಜಾಗ್ವಣಿಂ ದಿತಾ. ದೆವಾಚೆಂ ಭಕ್ತಿಪಣ್, ಮೋಗ್ ಆಮ್ಕಾಂ ಗರ್ಜೆಚೊ ಮ್ಹಣ್ ಉಲೊ ದಿತಾ. ಮನ್ಶಾಕುಳಾಕ್ ಆಪ್ಲಿ ಜಿಣ್ ಬದ್ಲುನ್ ದೆವಾ ಥಂಯ್ ಪರ್ತುಂಕ್ ಹಾಚಿ ಕವಿತಾ ಜರೂರ್ ಉಪ್ಕಾರ್ತೆಲಿಂ ಮ್ಹಳ್ಳೊ ಮ್ಹಜೊ ಭರ್ವಸೊ.
ದೇವ್ ಬರೆಂ ಕರುಂ!
[2006 ಇಸ್ವೆಚಾ ಮಾರ್ಚ್ 24 ತಾರಿಕೆರ್ ಕುವೆಯ್ಟಾಂತ್
ಚಲ್ಲ್ಲ್ಯಾ ತೆರಾವ್ಯಾ ಕವಿತಾಪಾಠಾಂತ್ ಹೆಂ ಲೇಖನ್ ವಾಚುನ್
ಸಾಂಗ್ಲಾಂ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
