ಸಂಘ್-ಸಂಸ್ಥೆ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

"ಜಿಣ್ಯೆಕ್ ಸುಫಳ್ ಕರ್ಚೆಂ ಸೂತ್ರ್ - ಹೆರಾಂಕ್ ಆಮಿ ಕಿತ್ಲೆಂ ಸಮ್ಜಲ್ಯಾಂವ್ ಮ್ಹಳ್ಳ್ಯಾಚೆರ್ ನ್ಹಂಯ್, ಬಗಾರ್ ಆಮ್ಕಾಂ ಆಮಿ ಕಿತ್ಲೆಂ ಸಮ್ಜಲ್ಯಾಂವ್"

ಆಮ್ಚೆ ಸಂಘ್-ಸಂಸ್ಥೆ ಆನಿ ಆಮಿ!

ವರಸ್ : 2006

ಅಂಕೊ : 30

ಮಯ್ನೊ : ದಸೆಂಬರ್

ಸಂಪಾದಕೀಯ್ - 30.

ವಲ್ಲಿ ಕ್ವಾಡ್ರಸ್

ಆಯ್ಲೆವಾರ್ ಕುವೆಯ್ಟಾಕ್ ಭೆಟ್ ದೀಂವ್ಕ್ ಆಯಿಲ್ಲ್ಯಾ ಮೆಲ್ಕಿ ಹೊಸ್ಪೇಟಾಕ್ (ಮಾ|ವಿ.ಜೆ.ಮಿನೇಜಾಂಕ್) ಆಮಿ ಆಮ್ಚಾ ಕವಿತಾಗೋಶ್ಟಿಕ್ ಆಮಂತ್ರಿತ್ ಕರುನ್ ಸನ್ಮಾನ್ ಕೆಲ್ಲ್ಯಾವೆಳಾರ್ ತಾಣೆಂ ಉಚಾರ್‌ಲ್ಲಿಂ ಥೊಡಿಂ ಉತ್ರಾಂ ಖರಿಂಚ್ ಜಾವ್ನ್ ಕಾಳ್ಜಾಂತ್ಲಿಂ ಮ್ಹಣ್ಚಾಂತ್ ಕಾಂಯ್ ದುಭಾವ್ ನಾ. ಅಜೀಕ್ ತೀಸ್ ಆನಿ ಸ ವರ್ಸಾಂಧಿಂ ಬೊಂಬೊಂಯ್ತ್ ಹಾಚ್ಯಾ ಮುಖೇಲ್ಪಣಾಖಾಲ್ ಘಡ್‌ಲ್ಲ್ಯಾ ’ಸಮಾಜ್ ಸುಧಾರಣ್’ ಸಂಘಾಚಿ ಸುರ್ವಾತ್ ಕರ್ತಾನಾ ಹಾಚ್ಯಾ ಮತಿಂತ್ ಆಸ್‌ಲ್ಲೆಂ ಚಿಂತಾಪ್ ನಿಜಾಯ್ಕ್‌ಯೀ ಮಾಂಧ್ಚೆ ತಸಲೆಂ. ಹೊ ಏಕ್ ಕೊಂಕ್ಣಿ ಬರವ್ಪಿ, ಯಾಜಕೀ ದೀಕ್ಶಾ ಘೆತ್‌ಲ್ಲೊ ಏಕ್ ದೆವಾಚೊ ಸೆವಕ್ ಪುಣ್ ಮನ್ಶ್ಯಾಚಾ ಮೊಗಾನ್ ತೊವ್ಲಲೊ ಏಕ್ ಜವಾಬ್ಧಾರೆಚೊ ಸಾಹಿತಿ ಮ್ಹಣ್ಚಾಂತ್ ಕಸಲೊಚ್ ದುಭಾವ್ ನಾ.

ಸಂಘ್ ಸಂಸ್ಥೆ ಆಮ್ಕಾಂ ನವೆ ನ್ಹಂಯ್, ಪ್ರತ್ಯೇಕ್ ಜಾವ್ನ್ ಪರ್ಗಾಂವ್ಚಾಂಕ್ - ಕೊಣಾಕ್ ಗರ್ಜೆಕ್ ಆನಿ ಕೊಣಾಕ್ ಮರ್ಜೆಕ್ ತರ್ ಥೊಡ್ಯಾಂಕ್ ಖೊರ್ಜೆಕ್. ಕೊಣಾಕ್ ಅಪ್ಲೆಂ ಬೊಳ್ಕೆಂ ಭರುಂಕ್ ಏಕ್ ವೆವಸ್ತಿತ್ ವೆದಿ ತರ್ ಆನಿ ಕೊಣಾಕ್ ಹೆರಾಂ ಮುಖಾರ್ ಅಪ್ಲೆಂ ಶೆಂಕಾರೆಂ ಫುಲಂವ್ಕ್ ಏಕ್ ಮಾಧ್ಯಮ್. ಹಾಂಗಾ ಸಭಾರ್ ತುರುಪಾಚೆ ಎಕ್ಕೆ - ಕೊಣಾಕ್ ’ಕೊಂಕ್ಣಿ’ ತುರುಪಾಚೊ ಎಕ್ಕೊ ತರ್ ಕೊಣಾಕ್ ಫಿರ್ಗಜೆಚೊ ಮೋಗ್ ಆನಿ ಕೊಣಾಕ್ ದುಬ್ಳ್ಯಾಂಚೊ ಮೋಗ್. ಆನಿ ವೆವಸ್ತಿತ್ ರಿತಿನ್ ಚಲ್ಚೊ ಹೊ ಸರ್ಕಸ್ ಆಮಿ ಸದಾಂಯ್ ಪಳೆತಾಂವ್. ಪುಣ್ ಖಂಚೊಯ್ ಸಂಸ್ಥೊ ಹ್ಯಾ ’ಸಮಾಜ್ ಸುಧಾರಣ್’ ಸಂಘಾಚೆಂ ಪ್ರೇರಣ್ ಘೆವ್ನ್ ಕಾಂಯ್ ಕೆಲ್ಲೆಂ ಆಸಾ? ಆಮ್ಕಾಂ ಏಕ್ ರುಪಯ್ ದಾನ್ ದೀಂವ್ಕ್ ಚಾರ್ ಮಿಟಿಂಗಾಂ ಆಪಂವ್ಕ್ ಆಸಾತ್, ಪತ್ರಾಂನಿ/ಸಾಯ್ಟಾಂನಿ ವರ್ದಿ ಧಾಡುಂಕ್ ಆಸಾತ್ ಆನಿ ಗಾಂವ್ಚಾಂಕ್ ಆಮ್ಚೆಂ ವ್ಹಡ್‌ಪಣ್ (??) ಗಾಜಂವ್ಕ್ ಆಸಾ - ಆನಿ ಮನ್ ಜಾತಾನಾ ಆಮಿ ಕೆಲ್ಲ್ಯಾ ನಿಸ್ವಾರ್ಥಿ ಸೆವೆಖಾತಿರ್ ಮಾನ್ ಘೆಂವ್ಕ್ ಆಸಾ... ವ್ಹಾ! ಕಿತ್ಲೆ ಭಾಗಿ ಆಮಿ ನ್ಹಂಯ್‌ಗಿ?

ಹಾಂವ್ ಸಂಘ್ ಸಂಸ್ಥ್ಯಾಂಕ್ ವಿರೋಧ್ ಭಿಲ್ಕುಲ್ ನ್ಹಂಯ್. ಪುಣ್ ಮ್ಹಜೆಂ ಸವಾಲ್ ಫಕತ್ ಏಕ್ - ಭೋವ್ ಲ್ಹಾನ್ಶೆಂ - ’ಆಮ್ಕಾಂ ನಿಜಾಯ್ಕ್‌ಯೀ ಹೆರಾಂಚೆಂ ಬರೆಂಪಣ್ ಕರುಂಕ್ ಮನ್ ಆಸಾ?’ - ಆಸಾ ತರ್ ಆಸ್ಚೆ ಆವ್ಕಾಸ್ ಧಾರಾಳ್. ಆಮ್ಚಾ ಸಮಾಜೆಂತ್ ಥರಾವಳ್ ಗರ್ಜಾಂನಿ ಆಸ್ಚಿಂ ಸಭಾರ್ ಆಸಾತ್, ಕೊಣಾಚೆಂ ಘರ್ ಹುಲ್ಪಾಲಾಂ, ಕೊಣಾಚೆಂ ಘರ್ ಪರ್ತಾಲಾಂ. ಕೊಣಾಚಾ ಘರಾಂತ್ ಪ್ರಾಯ್‌ವಂತ್ ಪಿಡೆಸ್ತಾಂ, ಆನಿ ಕೊಣಾಚಾ ಬುರ್ಗ್ಯಾಂಕ್ ಶಿಕಾಪ್ ನಾ, ಆನಿ ಕೊಣಾಕ್ ನೆಸೊಂಕ್ ಬರೆಂ ವಸ್ತುರ್ ನಾಂ. ಇತ್ಲೆಂಚ್ ಕಿತ್ಯಾಕ್ ಕೊಣಾಚಾ ಘರಾಂತ್ ಬರಿಂ ಆಯ್ದಾನಾಂ ಸೊಡ್ - ಶಿಜಂವ್ಕ್ ಏಕ್ ಮೂಟ್ ತಾಂದುಳ್ ಸಯ್ತ್ ಹಾಡುಂಕ್ ದೀಸ್‌ಭರ್ ಥಂಯ್ ಹಾಂಗಾ ಕತ್ತೆ ಚಾಕ್ರಿ ಕರಿಜಾಯ್ ಪಡ್ತಾ. ಸಾಂಗಾ - ಹಿಂ ಕೊಣಾಚಿಂ ಸಯ್ರಿಂ? ಹಾಂಚಿ ಮಜತ್ ಕರ್ಚಿ ಕೊಣೆಂ? ಬರೆಂ! ಆಮ್ಕಾಂ ಅಸಲ್ಯಾಂಕ್ ಸೊಧುನ್ ವಚೊಂಕ್ ಸಾಧ್ಯ್ ನಾ - ಭೋವ್ ಬರೆಂ.

ಸಿಯೋನ್ ಆಶ್ರಮಾಂತ್ ಕಿತ್ಲೆಶಿಂ ಪಿಡೆಸ್ತಾಂ ಜಿಯೆವ್ನ್ ಆಸಾತ್? ತಾಂಕಾ ಅಧಾರ್ ದಿವ್ಯಾಂ. ಚಡ್ ಕಿತ್ಯಾಕ್? ಚಡಾವತ್ ಫಿರ್ಗಜೆಂನಿ ಅಸಲಿಂ ಕಾಮಾಂ ಸಾಂ|ವಿಶೆಂತ್ ಪಾವ್ಲ್ ಸಭೆಚಿಂ ಕರ್ತಾತ್, ದೆಖುನ್ ತಾಂಕಾಂ ಕುಮೊಕ್ ಕರ್‍ಯಾಂ. ಪುಣ್ ಆಮ್ಕಾಂ ಲಾಯಿಕಾಂಚೆರ್ ಭರ್ವಸೊ ನಾ? ಬರೆಂ! ಆಮ್ಚಾ ಸಮಾಜೆಂತ್ ಅಸಲ್ಯಾಂಕ್ ಆಧಾರ್ ದಿತೆಲಿಂ ಜಾಯ್ತಿಂ ಧರ್ಮ್ ಭಾವ್-ಭಯ್ಣಿಂ ಆಸಾತ್ ನ್ಹಂಯ್‌ಗಿ? ಮದರ್ ತೆರೆಜಾಚೆಂ ಆಶ್ರಮಾಂತ್ ಗತ್ ಆಧಾರ್ ನಾತ್‌ಲ್ಲಿಂ ಜಾಯ್ತಿಂ ಭುರ್ಗಿಂ ಆಸಾತ್, ಮಾನಸಿಕ್ ವಿಕಾಸನಾಕ್ ಪಾವೊಂಕ್ ನಾತ್‌ಲ್ಲ್ಯಾಂಕ್ ಶಿಕಾಪ್ ದಿಂವ್ಚಾ ಅರುಣೋದಯ ತಸಲ್ಯಾ ಇಸ್ಕೊಲಾಂಕ್ ಆಮಿ ಕುಮೊಕ್ ಕರ್‍ಯೆತ್ ನ್ಹಂಯ್‌ಗಿ? ಕೊಣ್ ಸಾಂಗ್ತಾ ’ಆಮ್ಕಾಂ ಖಂಚ್ಯಾಯ್ ಸಂಸ್ಥ್ಯಾಚಾ � ವಾ ಹುದ್ದೇದಾರಾಂನಿ ಮಾತ್ರ್ ಕುಮೊಕ್ ಕರಿಜಾಯ್ ಶಿವಾಯ್ ಸಾದ್ಯಾಂನಿ ನ್ಹಂಯ್’?

’ತರ್ ಹೆರಾಂಚೆಂ ಬರೆಂಪಣ್ ಕರುಂಕ್ ಕಸಲ್ಯಾಚ್ ಸಂಘ್ ಸಂಸ್ಥ್ಯಾಚಿ ಅನಿವಾರ್‍ಯತಾ ನಾ ಮ್ಹಳ್ಳೆಂ ನಿಘಂಟ್ ನ್ಹಂಯ್‌ಗಿ?’ - ಹೋ! ವಿಸ್ರಾಲೊಂ! ಅಶೆಂ ಕೆಲ್ಯಾರ್ ಕೊಣೆ ತಸ್ವೀರ್ ಕಾಡ್ಚಿ? ಕೊಣೆ ವರ್ದಿ ಬರಂವ್ಚಿ? ಕೊಣೆ ಛಾಪ್ಚಿ? ಅಸಲಿ ವರ್ದಿ ಛಾಪ್ತಾ ಕೊಣ್? ನ್ಹಂಯ್‌ಗಿ? ವರ್ದಿ ಛಾಪುಂಕ್‌ಯೀ ಲೊಕಾಂಚೊ ಜಮೊ ಗರ್ಜೆಚೊ ಶಿವಾಯ್ ಜಮಾತೆಚೊ ಮೂಳ್ ಇರಾದೊ ಕಸಲೊಯ್ ಆಸೊಂ ತೆಂ ಪಡೊಂಕ್ ನಾ. ಪೊಟ್ಟು ಬಾಂಯ್ತ್ ಪಡ್ಲೆಲ್ಯಾ ಎಕ್ಲ್ಯಾ ನಿರ್ಗತಿಕಾಕ್ ವಯ್ರ್ ಕಾಡ್ಲ್ಯಾರ್ ತಿ ವರ್ದಿ ಜಾಯ್ನಾ - ಬಗಾರ್ ವೀಸ್-ಪಂಚ್ವೀಸ್ ಎಕ್ಟಾಂಯ್ ಜಾವ್ನ್ ಕಾಂಯ್ ಪಾರ್ಟಿ-ಪಿಕ್ನಿಕ್ ಕೆಲ್ಯಾರ್ ತಿ ಭೋವ್ ವ್ಹಡ್ (Exclusive report) ವರ್ದಿ.

ಆಮಿಂ ಪ್ರಗತೆಚಾ ದಾವ್ಲೆಂತ್ ಚಮ್ಕೊನ್ ಆಸಾಂವ್, ಉಡ್ಕಾಣಾಂ ಘಾಲುನ್ ಆಸಾಂವ್ - ಪುಣ್ ಆಮ್ಚೆಂ ಚಿಂತಾಪ್ ದಿಸಾನ್ ದೀಸ್ ಕಿತ್ಲೆಂ ಅಶೀರ್ ಆನಿ ಕೀಳ್ ಜಾವ್ನ್ ಯೆತಾ ನ್ಹಂಯ್‌ಗಿ? ಆಮ್ಕಾಂ ಪಿಕ್ನಿಕಾಂ ಜಾಯ್ - ವಾಟೆರ್ ವೆತೆಲ್ಯಾಂಕ್, ಗತ್-ಮತ್ ನಾತ್ಲೆಲ್ಯಾಂಕ್ ವೋಡ್ನ್ ವರುನ್ ಆಮಿಂಚ್ ವ್ಹಡ್ಲೆ ಮ್ಹಣ್ ಶೆಂಕಾರೆಂ ಫುಲಂವ್ಕ್ ಜಾಯ್. ಆಮ್ಕಾಂ ಹೆರಾಂನಿ ಫುಲಾಂ ಘಾಲುಂಕ್ ಜಾಯ್, ಆಮ್ಕಾಂ ವಿಜಿಟಿಂಗ್ ಕಾರ್ಡಾಂ ಛಾಪುಂಕ್ ಜಾಯ್ ಆನಿ ತಾಂತುಂ ಆಮ್ಚಾ ಮಹಾನ್ ಕರ್ನ್ಯಾಂಚಿ ಪಟ್ಟಿ ಆಸೊಂಕ್ ಜಾಯ್. ಆಮ್ಕಾಂ ಹೆರಾಂನಿ ವಾಖಣ್ಣುಂಕ್ ಜಾಯ್. ಆನಿ ಹ್ಯಾ ಖಾತಿರ್ ಕಸಲೊ ಡೋಂಗ್ ಕರುಂಕ್‌ಯೀ ಆಮಿ ತಯಾರ್. ಆಮ್ಚೆಲಾಗಿಂ ಸರ್ವ್ ಹಿಕ್ಮತ್ಯೊ ಆಸಾತ್, ಕೊಣಾಕ್ ಕೆದಾಳಾ ಆನಿ ಕಶೆಂ ವಾಪಾರ್ಚೆಂ? ಸಗ್ಳೆಂ ಆಮ್ಕಾಂ ಕಳಿತ್ ಆಸಾ - ಕಿತ್ಯಾಕ್ ಆಮಿ ಹ್ಯಾ ’ದಂಧ್ಯಾಂತ್’ ಮಾಹೀರ್. ಆಮ್ಚಾ ವಾಟೆರ್ ಖಾಂಟೆ ಘಾಲ್ತೆಲ್ಯಾಂಕ್ ಕಶೆಂ ತಾಂಚೆಂ ನಾಂವ್ ಪಾಡ್ ಕರ್ಚೆಂ? ಪೊಕೊಳ್ ನಾಂವಾಂನಿ ಕಶೆಂ ತಾಂಚೆರ್ ಕೇದ್ ಉಡಂವ್ಚೊ? ಕಶೆಂ ತಾಂಕಾಂ ಥಂಡ್ ಕರ್ಚೆಂ - ಸಗ್ಳ್ಯೊ ವಿಧ್ಯಾ ಆಮ್ಕಾಂ ಯೆತಾತ್, ಆಮಿಂ ಕೊಯರಾಂನಿ ಗಾಂವ್ಚಿಂ ಭಾಗೆವಂತಾಂ ದೆಖುನ್ ಮಾಜಾರ್ ದೊಳೆ ಧಾಂಪುನ್ ದೂದ್ ಪಿಯೆತಾನಾ ಸಂಸಾರ್ ಆಪ್ಣಾಕ್ ಪಳೆನಾ ಮ್ಹಣ್ ಚಿಂತ್ಚೆಪರಿಂ ಆಮಿಂ ಭಾಗೆವಂತಾಂಚೊ ವೇಸ್ ಘಾಲುನ್ ಜಿಯೆತಾಂವ್! ವ್ಹಾ! ಕಿತ್ಲಿಂ ಭಾಗೆವಂತಾಂ - ಲುಸಿಫೆರಾಕ್ ಸಯ್ತ್ ಲಜೆಕ್ ಘಾಲ್ಚಿಂ!!

ಇತ್ಲೊಚ್ ನ್ಹಂಯ್ - ಆಮ್ಕಾಂ ಆಚರಣ್ ಕರುಂಕ್‌ಯ್ ಆಸಾ, ಆಮ್ಚೊ ಸಂಸ್ಥೊ ಕಾಂಯ್ ತೀನ್ ಕಾಸಾಂಕ್ ಉಪ್ಕಾರ್ಚಿಂ ಕಾಮಾಂ ಕರಿನಾತ್ಲ್ಯಾರ್‌ಯೀ ವ್ಹಡ್ ನಾ - ಪುಣ್ ಆಮ್ಕಾಂ ಪಾಂಚ್ ವರ್ಸಾಂಚೆಂ, ಧಾ ವರ್ಸಾಂಚೆಂ ಆಚರಣ್ ಭೋವ್ ಗರ್ಜೆಚೆಂ. ಪರತ್ ವರ್ದ್ಯೊ ಯೇಂವ್ಕ್ ಅಸಾತ್ - ಗಾಂವಾಂತ್ ಗಾಜಂವ್ಕ್ ಆಸಾ, ಆಪ್ಲಿ ಪದ್ವಿ ಪಾಚಾರುಂಕ್ ಆಸಾ - ಕಿತ್ಯಾಕ್ ಆಮಿ ಮಹಾನ್. ಪುಣ್ ಹ್ಯಾ ಪಾಂಚ್-ಧಾ ವರ್ಸಾಂನಿ ಕೆಲ್ಲ್ಯಾ ನಾಲಿಸಾಯೆಂತ್ ಹೆರಾಂಕ್ ಜಾಲ್ಲ್ಯಾ ಭೊಂಗೊಸ್ತೊಳಾಕ್ ಕೊಣ್ ಸಮ್ಜೊಂಕ್ ಸಕಾತ್?

ಜರೀ ತರೀ ಬರೆಂ ಕಾಮ್ ಕರ್ಚೊ ಖರೊ ಇರಾದೊ ಆಸ್ಲ್ಯಾರ್ ಇತ್ಲಿಂ ಸಂಘಟನಾಂ-ಸಂಸ್ಥೆ ನಿಜಾಯ್ಕ್‌ಯೀ ಗರ್ಜ್? ಆನಿ ಇತ್ಲ್ಯಾ ಸಂಘಟನಾಂಕ್ ಎಕಾಮೆಕಾ ಕಿತ್ಲೊ ಬರೊ ಎಕ್ವಟ್ ಆಸಾ? ಹಾಕಾ ಪಳೆತಾನಾ ತಾಕಾ ಜಾಯ್ನಾಂ, ತಾಕಾ ಪಳೆತಾನಾ ಹಾಕಾ ಜಾಯ್ನಾಂ, ಹಾಂಚೆಮಧೆಂ ಕುಸಾಟ್ ಸ್ಪರ್ಧೊ ಆನಿ ನಾಲಿಸಾಯ್. ಫಕತ್ತ್ ವಯ್ರ್ ಯೇಂವ್ಕ್ ಜಾಯ್ - ದೆಖುನ್ ಕುರ್ಲ್ಯಾಂಪರಿಂ ಕೊಣಾ ಕೊಣಾಚಾ ಹರ್ಧ್ಯಾರ್ ಪಾಂಯ್ ದವ್ರುನ್ ತರ್‌ಯೀ ವಯ್ರ್ ಆಯ್ಲ್ಯಾರ್ ಜಾಲೆಂ. ಹಾಂಚೆ ಮಧೆಂ ಥೊಡೆ, ಆಸ್ಚಾ ಕದ್ವಳಾಂತ್ ನ್ಹಾಂವ್ನ್ ಧುವ್ನ್ ಆಸ್ಚೆಂ ಅನಿಕ್‌ಯೀ ಘಾಣ್ ಕರ್ನ್ ಅಪ್ಲಿಂ ಕಾಮಾಂ ಕರಂವ್ಚೆ ಕುತಂತ್ರಿ - ವ್ಹಾ! ಹಾಚ್ಯಾಕ್‌ಯೀ ದುಸ್ರೆಂ ಯೆಮ್ಕೊಂಡ್ ಆಸತ್?

ಸಂಘ್ ಸಂಸ್ಥ್ಯಾಂತ್ ಆಸ್ತೆಲ್ಯಾಂನಿ ಜೆದ್ನಾಂ ಪಿಯೆಂವ್ಕ್ ಏಕ್ ಥೆಂಬೊ ನೀಸ್ ವಿಚಾರ್ತೆಲ್ಯಾಕ್ ತೊ ಥೆಂಬೊ ನೀಸ್ ದಿಂವ್ಚಾಧಿಂ ಧಾ ಜಮಾತ್ಯೊ ಗರ್ಜೆಚ್ಯೊ ತರ್ ಅಸಲೆ ಸಂಘ್-ಸಂಸ್ಥ್ಯಾಂಕ್ ಫಾವೊ ಜಾಲ್ಲೆಗಿ ಮ್ಹಳ್ಳೆಂ ವ್ಹಡ್ಲೆಂ ಸವಾಲ್. ಆಮ್ಚಾ ಸಂಘಾನ್ ಹೆಂ ಕೆಲಾಂ ತೆಂ ಕೆಲಾಂ ಮ್ಹಳ್ಳಿ ಬಡಾಯ್ ಉಚಾರ್ಚ್ಯಾಧಿಂ ಪಯ್ಲೆಂ ಅಪ್ಣಾನ್ ಅಪ್ಲ್ಯಾ ತಾಂಕಿಚೆಂ ಕಿತೆಂ ಕೆಲಾಂ ಮ್ಹಳ್ಳೆಂ ಅಪ್ಣಾಕ್ ವಿಚಾರ್‌ಲ್ಲೆಂ ತರ್?

ಕ್ರಿಸ್ಮಾಸಾಚೊ ಕಾಳ್ ಆಯ್ಲಾ - ಕ್ರಿಸ್ತಾಚೊ ಉಡಾಸ್ ಕಾಡ್ಚೊ ಏಕ್ ಸಂದರ್ಭ್. ಕ್ರೀಸ್ತ್ ಸಂಸಾರಾಕ್ ರಚ್‌ಲ್ಲ್ಯಾ ದೆವಾಚೊ ಪೂತ್ ತರ್‌ಯೀ ಹ್ಯಾ ಸಂಸಾರಾಂತ್ ತಾಕಾ ಜಲ್ಮೊಂಕ್ ಜೊಕ್ತಿ ಸುವಾತ್ ನಾಸ್ತಾಂ ಗೊರ್‍ವಾಂಚಾ ಗೊಟ್ಯಾಂತ್ ಗತ್ ಆಧಾರ್ ನಾತ್ಲೆಲ್ಯಾಂಪರಿಂ ಜಲ್ಮೊನ್ ಆಯಿಲ್ಲ್ಯಾಚೊ ಮಹತ್ವ್ ಕಸಲೊ? ಕ್ರಿಸ್ಮಸ್ ಫಕತ್ತ್ ಏಕ್ ದಬಾಜೊ ಕರ್ನ್ ಘೆತ್‌ಲ್ಲ್ಯಾಂನಿ ಹೆಂ ಸವಾಲ್ ಕರ್ಚೆಂ ಭೋವ್ ಗರ್ಜೆಚೆಂ - ಆಮ್ಚ್ಯಾನ್ ಹೆರಾಂಚೆಂ ಬರೆಂಪಣ್ ಸಾಧ್ಯ್‌ಗಿ?.

ಹೆರಾಂಚೆಂ ಬರೆಂಪಣ್ ಮ್ಹಳ್ಯಾರ್ ಕಿತೆಂ? ಹೆರಾಂಕ್ ರಾವೊಂಕ್ ರಾವ್ಳೆರ್ ಭಾಂಧುನ್ ದಿಂವ್ಚೆಂ, ಹೆರಾಂಕ್ ಭಂವೊಂಕ್ ಘೊಡ್ಯಾ ಗಾಡಿ ದಿಂವ್ಚಿ ವಾ ಹೆರಾಂಕ್ ನೆಸೊಂಕ್ ಸೂಟ್-ಬೂಟ್ ದಿಂವ್ಚೆಂಚ್ ನ್ಹಂಯ್. ಪಯ್ಲೆಂ ಅಪುಣ್ ಹೆರಾಂಚಾ ಗರ್ಜಾಂಕ್ ಕಿತ್ಲೆಂ ಆಯ್ಕತಾಂ ಮ್ಹಳ್ಳೆಂ.

ಪುಣ್ ತಾಚ್ಯಾಧಿಂ ಉಟ್ತಾ ವ್ಹಡ್ಲೆಂ ಸವಾಲ್ - ಹೆರಾಂಚಿ ಗರ್ಜ್ ಆಯ್ಕೊಂಕ್ ಪಾಂವ್ಚೆ ಆಮ್ಚೆ ಕಾನ್ ಉಗ್ತೆ ಆಸ್ಲ್ಯಾರ್ ನ್ಹಂಯ್‌ವೆ?

ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್

ಆಧ್ಲಿಂ ಸಂಪಾದಕೀಯಾಂ

ಸಂಪಾದಕೀಯ್ ಮಂಡಳಿಕ್

ಪಾಟಿಂ ದಾಯ್ಜ್ ಪಾನಾಕ್

बिजी आसाय‌गी?

ಕಸ್ಟ್

[ಆಮಿಂ ಜಯ್ತೆವಂತ್ ಜಾಂವ್ಕ್ ಕಿತೆಂ ಕರಿಜಾಯ್?]