ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಕೊಂಕ್ಣಿ ಕಾರ್ಭಾರಿ - 1
ಸಂದರ್ಶಕಾಂ:
ಮೆಲ್ವಿನ್ ಜೆ. ವಾಸ್, ಹೆನ್ರಿ ಲುವಿಸ್, ಕ್ಲಾರಾ ಫೆರ್ನಾಂಡಿಸ್, ಜೊಮೆಲ್
ವಾಲ್ಟರ್ ನಂದಳಿಕೆ
ಜನನ್ : 1973 ಇಸ್ವೆಚಾ ಜನೆರಾ 23 ತಾರಿಕೆರ್ ಬೆಳ್ಮಣ್ ಫಿರ್ಗಜೆಚಾ ನಂದಳಿಕೆ ಮ್ಹಳ್ಳೆಕಡೆ ಜಲ್ಮಾಲೊ.
ಇಮೇಯ್ಲ್ : walty@emirates.net.ae
ಸಂಪಾದಕ್ - ದಾಯ್ಜಿದುಭಾಯ್.ಕೊಮ್ / ದಾಯ್ಜಿವರ್ಲ್ಡ್.ಕೊಮ್
ಕೊಂಕ್ಣಿ ಸಾಹಿತಿಕ್ ವಾವ್ರ್ :
ದೋನ್ ಕಾದಂಬರಿ, ಚಡುಣೆಂ 97 ಮಟ್ವ್ಯೊ ಕಾಣ್ಯೊ, ಆನಿಂ ಥೊಡಿಂ ಲೇಖನಾಂ ತಶೆಂಚ್ ದೋನ್ ಸಾಹಿತಿಕ್ ವ್ಹೊಳಿ (ಅಂಕಣಾಂ) ಬರಯ್ಲ್ಯಾಂತ್. ಬೆಳ್ಮಣ್ ಫಿರ್ಗಜೆಚೆಂಪತ್ರ್ ’ಮುಖೆಲಿ ’ ಹಾಚೊ ಸಂಪಾದಕ್ ಜಾವ್ನ್, ’ಆಮ್ಚೊ ಯುವಕ್ ’ ಪತ್ರಾಚೊ ಸಹ-ಸಂಪಾದಕ್ ಜಾವ್ನ್ ವಾವ್ರ್ ಕೆಲಾ.
ಮಾನ್-ಸನ್ಮಾನ್ : ಎಸ್ಸೆಮ್ಕೆಸಿ (SMKC) ಥಾವ್ನ್ ಮಾನ್ - (2003 ಇಸ್ವೆಂತ್).
ಶಿರ್ವಾಂ ವೆಲ್ಫೇರ್ ಅಸೋಸಿಯೇಶನ್ ಕುವೇಯ್ಟ್ ಥಾವ್ನ್ ಮಾನ್ - (2002 ಇಸ್ವೆಂತ್),
ಕೆ.ಸಿ.ಒ ಅಭುಧಾಬಿ - ಹಾಂಚೆಥಾವ್ನ್ ಮಾನ್ (2002 ಇಸ್ವೆಂತ್),
ಕೊಂಕಣ್ ತಾರಾಂ - ಜೆರಿಮೆರಿ ಥಾವ್ನ್ ಮಾನ್ (2002 ಇಸ್ವೆಂತ್),
ಮ್ಯಾಂಗಲೋರ್ ಕೊಂಕಣ್ಸ್ ಥಾವ್ನ್ ಮಾನ್ - (2001 ಇಸ್ವೆಂತ್)
ಪುರಸ್ಕಾರ್ : ಬರ್ಪಿ ಮಿತ್ರ್ ಪುರಸ್ಕಾರ್ (2001 ಇಸ್ವೆಂತ್)
1 . ತುಂ ಏಕ್ ಕೊಂಕ್ಣಿ ಬರವ್ಪಿ ಆನಿಂ ಆತಾಂ ದಾಯ್ಜಿದುಭಾಯ್ ಸಾಯ್ಟಾಚೊ ಶಿಲ್ಪಿ ಜಾವ್ನ್ ಸಂಸಾರಾರ್ ಫಾಮಾದ್ ಜಾಲಾಯ್. ತುಜಿಂ ಭಗ್ಣಾಂ ಕಸಲಿಂ?
ಹಾವೆಂ ಆನಿಂ ವಲ್ಲಿ ಕ್ವಾಡ್ರಸಾನ್ ಸಾಹಿತ್ಯಾಚಿ ಸುರ್ವಾತ್ ಚಡುಣೆಂ ಎಕಾಚ್ ವರ್ಸಾ ಕೆಲ್ಲಿ. ತ್ಯಾ ವೆಳಾರ್ ಆಮಿಂ ಫುಲೊನ್ ಯೆಂವ್ಚೆ ತರ್ನಾಟೆ ದೆಕುನ್ ಆಮ್ಚೆ ಮಧೆಂ ಎಕಾ ಥರಾಚೊ ಸ್ಪರ್ಧೊ ಆಸ್ತಾಲೊ. ಆಜ್ ಹಾಂವ್ ಬರಂವ್ಕ್ ಚಿಂತಾಂ ತರ್ಯ್ ಮ್ಹಾಕಾ ಬರಂವ್ಕ್ ಸಂಧರ್ಬ್ ಮೆಳಾನಾ. ಸಂತೊಸ್ ಭೊಗ್ತಾ ವಲ್ಲಿ ಅಜೂನ್ ಬರವ್ನ್ಂಚ್ ಆಸಾ.
ಮ್ಹಜಿ ಚಡ್ ಮಿನತ್ ಆನಿಂ ವೇಳ್ ದಾಯ್ಜಿವರ್ಲ್ಡ್ ಸಾಯ್ಟಾಕ್ ವೆತಾ. ಸುರ್ವಾತ್ ಕೆಲ್ಲೆವೆಳಾರ್ ಲೊಕಾಂಕ್ ಮ್ಹಜೆಂ ಚಿಂತಾಪ್ ಪಾವೊಂಕ್ ನಾತ್ಲ್ಲೆಂ ದೆಕುನ್ ಹಾವೆಂ ಆಶೆಲ್ಲೊ ಸಹಕಾರ್ ಸುರ್ವೆರ್ ಲಾಭ್ಲ್ಲೊ ನಾ ತರ್ಯೀ ಆತಾಂ ತೊ ಲಾಭ್ಲಾ ಮ್ಹಣ್ತಾನಾ ಹಾವೆಂ ಮಿನತ್ ಕೆಲ್ಲೆಂ ಸಮಧಾನ್ ಹಾಡುಂಕ್ ಪಾವ್ಲಾಂ.
2 . ದೇವ್ ಬರೆಂ ಕರುಂ ತುಕಾ, ವೇಳ್ ಕಾಡುನ್ ಆಮ್ಕಾಂ ಮೆಳೊಂಕ್ ಆಯಿಲ್ಲ್ಯಾಕ್ - ಸಾಂಗ್ ತುಕಾ ಆಯ್ಚೆಂ ಕವಿತಾಪಾಠ್ ಕಶೆಂ ಲಾಗ್ಲೆಂ?
ಕೊಂಕ್ಣಿ ಕವಿತಾಚಿಂ ಕಾಮಾಸಾಳಾಂ ನಿಜಾಯ್ಕೀ ಭಾರಿಚ್ ಬರೆಂ ಚಿಂತಾಪ್ - ಜಶೆಂ ದುಭಯಾಂತ್ ಮೆಲ್ವಿನ್ ರೊಡ್ರಿಗಸ್ ಚಲವ್ನ್ ವರ್ತಾ, ತಶೆಂಚ್ ಕುವೆಯ್ಟಾಂತ್ ವಲ್ಲಿನ್ ಹೆಂ ಮಿಸಾಂವ್ ಚಾಲು ದವರ್ಲೆಲಿ ಆನಿಂ ಹಾಂತುಂ ನವ್ಯಾ ನವ್ಯಾಂಕ್ ಆವ್ಕಾಸ್ ಕರುನ್ ದಿಂವ್ಚೆಂ ನಿಜಾಯ್ಕೀ ಭೋವ್ ಸಂತೊಸಾಚಿ ಗಜಾಲ್. ಕವಿತಾಚೆಂ ಗೂಂಡ್ ಅಧ್ಯಯನ್ ಕರ್ಚೆಂ ತುಮ್ಚೆಂ ಸಾಧನ್ ನಿಜಾಯ್ಕೀ ಹೊಗ್ಳಿಕೆಕ್ ಫಾವೊ ಜಾಲ್ಲೆಂಚ್. ಬುಕಾಚಿ ಸಮೀಕ್ಶಾ ಲೇಖನ್ ಭಾರಿಚ್ ಬರೆ ರೆತಿನ್ ವಾಂವ್ಟ್ ಕಾಡ್ನ್ ತಯಾರ್ ಕೆಲಾಂ. ಪುಣ್ ಹೆಂಚ್ ಲೇಖನ್ ಜರ್ ಶೊಂಬೊರ್ ದೊನ್ಶಿಂ ಲೊಕಾಂಕ್ ಪ್ರಸ್ತುತ್ ಕೆಲ್ಲೆಂ ತರ್ ಅನಿಕ್ಯ್ ಉಪ್ಕಾರಾಕ್ ಪಡ್ತೆಂ.
ಹಾಂವೆಂ ಅಜಿಕ್ ಚಡುಣೆಂ ಪಂದ್ರಾ ವರ್ಸಾಧಿಂ ಏಕ್ ಕವಿತಾ ಬರಯಿಲ್ಲೆಂ ಆನಿಂ ದೆ|ಚಾ.ಫ್ರಾ.ದೆ’ಕೊಸ್ತಾಸವೆಂ ಬಸೊನ್ ತೆಂ ವಾಚುನ್ಯ್ ಸಾಂಗ್ಲ್ಲೆಂ. ತ್ಯೇ ವೆಳಾರ್ ಚಾ.ಫ್ರಾ.ದೆ’ಕೋಸ್ತಾ ಮ್ಹಳ್ಯಾರ್ ಕೊಣ್ ಮ್ಹಳ್ಳಿ ಸಮ್ಜಣಿ ನಾತ್ಲ್ಲಿ, ಆತಾಂ ಉಡಾಸ್ ಕಾಡ್ತಾನಾ - ತೆಂ ಏಕ್ ಮ್ಹಜಾ ಜಿವಿತಾಚೆಂ ಉಡಾಸಾಚೆಂ ಲ್ಹಾರ್ ಮ್ಹಣ್ ಭೊಗ್ತಾ. ಪುಣ್ ಹಾವೆಂ ಕವಿತಾಂಕ್ ಚಡ್ ಧ್ಯಾನ್ ದಿಲ್ಲೆಂನಾ. ಪುಣ್ ಆಯ್ಲೆವಾರ್ ಕೊಂಕ್ಣಿ ಕವಿತಾಶೆತಾಂತ್ ಉದೆವ್ನ್ ಆಯಿಲ್ಲಿ ಕ್ರಾಂತಿ ಪಳೆತಾನಾ ನಿಜಾಯ್ಕೀ ಸಂತೊಸ್ ಜಾತಾ.
3 . ದಾಯ್ಜಿವರ್ಲ್ಡ್ ಡಾಟ್ ಕಾಮ್ ಸಂಸಾರ್ಭರ್ ಫಾಮಾದ್ ಜಾಲ್ಯಾ ಆನಿಂ ತುಕಾ ಕೊಂಕ್ಣೆ ಥಾವ್ನ್ ಪಯ್ಸ್ ಗೆಲ್ಲೆ ಕಾಂಯ್ ಚುರ್ಚುರೆ ಭೊಗ್ತಾತ್?
ಹಾಂವ್ ಏಕ್ ಕೊಂಕ್ಣಿ ಬರವ್ಪಿ ಜಾವ್ನ್ ಇಂಗ್ಲಿಶಾಂತ್ ಹೆಂ ಸಾಯ್ಟ್ ಚಲಯ್ತಾಂ ದೆಕುನ್ ಹಾವೆಂ ಕೊಂಕ್ಣೆಕ್ ವ್ಹಡ್ ಅನ್ನ್ಯಾಯ್ ಕೆಲಾ ಮ್ಹಣ್ ಮ್ಹಜೆ ಖಾಸ್ ಈಶ್ಟ್ ಸಾಂಗ್ತಾತ್ ಆನಿಂ ಎಕಾ ರಿತಿನ್ ತೆಂ ಹಾಂವ್ ವೊಪ್ತಾಂ ಸಯ್ತ್. ಪುಣ್ ಮ್ಹಜೆ ಇರಾದೆ ಫಕತ್ ಕೊಂಕ್ಣೆ ಖಾತಿರ್ ಮಾತ್ರ್ ನ್ಹಯ್, ಹೆರಾಂಕ್ಯ್ ಉಪ್ಕಾರಾಕ್ ಪಡಾಜಯ್ ಮ್ಹಳ್ಳೆ. ಹಾಂವ್ ಕ್ರಿಸ್ತಾಂವ್ ತರ್ಯೀ ಫಕತ್ತ್ ಕ್ರೀಸ್ತಿ ಧರ್ಮಾಚಿಂ ಬರ್ಪಾಂ ಮಾತ್ರ್ ಪರ್ಗಟ್ತಾಂ ಮ್ಹಳ್ಳೆಂ ಚಿಂತಾಪ್ ಮ್ಹಜೆಂ ನ್ಹಯ್.
4 . ದಾಯ್ಜಿವರ್ಲ್ಡ್ ಸುರ್ವಾತ್ ಜಾಲ್ಲೆಪರಿಂಚ್ ಸಭಾರ್ ಸಾಯ್ಟಾಂ ಉದೆಲ್ಯಾಂತ್ ಆನಿಂ ತಾಂತಾಂಚಾ ಮಿನತೆಪ್ರಕಾರ್, ತಾಂತಾಂಚಾ ತಾಂಕಿಪ್ರಕಾರ್ ತಾಂತಾಂಚಿಂ ಮಿಸಾಂವಾಂ ಘೆವ್ನ್ ವಾವ್ರ್ ಕರುನ್ ಆಸಾತ್ ತೆಂ ಪಳೆತಾನಾ ಕಶೆಂ ಭೊಗ್ತಾ?
ಭಾರಿ ಬರೆಂ - ಹಾಂವೆಂ ಸುರ್ವಾತ್ ಕೆಲ್ಲೆಂ ಮ್ಹಣ್ ಹೆರಾಂನಿ ವೊಪುನ್ ಘೆಂವ್ಚೆಂ ಭಾರಿಚ್ ಸಮಧಾನೆಚೆಂ. ಪುಣ್ ಏಕ್ ಸಲ್ಹಾ - ಹೆರಾಂನಿ ಎಕಾಮೆಕಾ ಕೆಲ್ಲೆಂಚ್ ಕಾಮ್ ಕರ್ಚೆಂ ತರ್ ತಾಂತುಂ ಕಾಂಯ್ ಅರ್ಥ್ ನಾ. ಕಾಂಯ್ ವೆಗ್ಳೆಂಚ್ ಕರಿಜಾಯ್.
5 . ದಾಯ್ಜಿವರ್ಲ್ಡ್ ಸಾಯ್ಟಾರ್ ಯೆಂವ್ಚೊ ಖಬ್ರೊ ಏಕ್ ಪಕ್ಶೀಯ್ (Biased) ಮ್ಹಳ್ಳೊ ಅಪ್ವಾದ್ ಆಸಾ - ಹಾಂತುಂ ತುಜಿ ಜಾಪ್?
ಜಾಂವ್ಕ್ ಪುರೊ, ಹರ್ಯೆಕಾ ಕಾಣ್ಯೆಕ್/ಖಬ್ರೆಕ್/ಸತಾಕ್ ದೋನ್ ಅರ್ಥ್ ಆಸ್ತಾತ್. ಆಮ್ಕಾಂ ಕೊಣಾಯ್ಕೀ ಸಂಸಾರಾಕ್ ಸಂತೊಸ್ ಕರುಂಕ್ ಜಾಯ್ನಾಂ. ಆಜ್ ದಾಯ್ಜಿವರ್ಲ್ಡಾಕ್ ದಿಸಾಕ್ ತೀಸ್ ಹಜಾರಾಂ ವಯ್ರ್ ವಾಚ್ಪಿ ಆಸಾತ್ ಮ್ಹಣ್ತಚ್ ಸಗ್ಳ್ಯಾ ತೀಸ್ ಹಜಾರ್ ಲೊಕಾಂನಿ ಎಕಾಚ್ ರಿತಿನ್ ಚಿಂತಿಶೆಂ ಕರುಂಕ್ ಭಾರಿಚ್ ಕಸ್ಟಾಂಚೆಂ.
6 . ದಾಯ್ಜ್.ಕೊಮ್ ವಿಶಿಂ ತುಜಿಂ ಭಗ್ಣಾಂ ಕಸಲಿಂ?
ದಾಯ್ಜ್.ಕೊಮ್ ಕೊಂಕ್ಣೆಚೆಂ ಏಕ್ ವೆಗ್ಳೆಂ ಸಾಯ್ಟ್ ಆನಿಂ ಹಾಂತುಂ ನವೆಸಾಂವ್ ದಿಸೊನ್ ಯೆತಾ. ಆನಿಂ ಹೆಂಚ್ ನವೆಸಾಂವ್ ಲೊಕಾಂಕ್ ಪಾವಾಜಯ್. ಆನಿಂ ತೆದ್ನಾಂ ಮಾತ್ರ್ ತುಮಿಂ ಕಾಡ್ಲ್ಲ್ಯಾ/ಕಾಡ್ಚಾ ಮಿನತೆಕ್ ಫಳ್ ಮೆಳ್ತಲೊ. ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣಿ ವಾಚ್ಪಿ ದಿಸಾನ್ದೀಸ್ ಉಣೆಂ ಜಾವ್ನ್ಂಚ್ ಯೆತಾತ್.
7 . ದಾಯ್ಜಿವರ್ಲ್ಡ್.ಕೊಮ್ ಧ್ವಾರಿಂ ತುಜೆಂ ಸ್ವಪಾಣ್ ಕಸಲೆಂ?
ದಾಯ್ಜಿವರ್ಲ್ಡ್.ಕೊಮ್ ಅಖ್ಖ್ಯಾ ಸಂಸಾರಾರ್ ಜಿಯೆಂವ್ಚಾ ಕೊಂಕಣ್ಗಾರಾಂಕ್ ಎಕಾ ಬೊಂದೆರಾಖಾಲ್ ಹಾಡ್ಚಿ ಮ್ಹಜಿ ವಾಂವ್ಟ್ ಎಕಾ ದಿಸಾ ಜಯ್ತೆವಂತ್ ಜಾಯ್ಜಯ್ ಆನಿಂ ಹೆಂಚ್ ಮ್ಹಜೆಂ ಸ್ವಪಾಣ್ ಜಾವ್ನಾಸಾ.
8 . ದಾಯ್ಜ್.ಕೊಮ್ ವಾಚ್ಪ್ಯಾಂಕ್ ತುಜೆ ಸಂದೇಶ್?
ಕುವೆಯ್ಟಾಂತ್ ಜಾಯ್ತೆಂ ಸಾಹಿತಿಕ್ ತಾಲೆಂತ್ ಆಸಾ, ಆನಿಂ ತಾಂಕಾಂ ತಾಂಚಿಂ ತಾಲೆಂತಾಂ ಪರ್ಜಳಿತ್ ಕರುಂಕ್ ದಾಯ್ಜ್ ಪಂಗ್ಡಾನ್ ಮಜತ್ ಕರಿಜಾಯ್. ಕೊಂಕ್ಣಿ ವಾವ್ರ್ ಅಸೊಚ್ ಚಲಾಜಯ್ ಆನಿಂ ಚಡಿತ್ ಮಾಪಾನ್ ಜಾಯ್ಜಾಯ್, ಚಡಿತ್ ಲೊಕಾನ್ ಕರಿಜಾಯ್. ಮ್ಹಾಕಾ ಹೊ ಮಾನ್ ದಿಲ್ಲ್ಯಾ ತುಮ್ಕಾಂ ಸರ್ವಾಂಚೊ ಹಾಂವ್ ಉಪ್ಕಾರ್ ಆಟಯ್ತಾಂ ಆನಿಂ ದೇವ್ ಬರೆಂ ಕರುಂ ಮ್ಹಣ್ತಾಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
