ಕವಿತಾकविताPoem
ಸಾಲ್ವಾದೊರ್
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಮೃತ್:
ಬಿಸ್ತೇರ್ನೊ ವರೋರೆಯ್, ಅಫಂಕ್ಯಾ ಜಾನೊರೇಯ್, ಹಹಾಕಾರ್ ಸುನ್ಯೊ ನಿಸಬ್ಧ್ ನಿರೋವೆಯ್,ಭುರಾಲ್
ಹುಯ್ ತುಮ್ಹಿ, ಭುರಾಲ್ ಹುಯೀ ಬುರಾ ಕಿಯೂಂಯ್...
ಬೆಂಗಾಲಿಚಾ ಎಕಾ ಫಾಮಾದ್ ಕವಿತೆಚಿಂ ಥೊಡಿಂ ಉತ್ರಾಂ ಹಿಂ;
(ವಿಸ್ತಾರ್ ಆಸಾ ಅಪಾರ್, ಲೋಕ್ ದೊನ್ಯೀ ವಾಂಟಾಂನಿ ಕರುನ್ ಆಸಾ ಹಾಹಾಕಾರ್, ನಿಶ್ಶಬ್ಧತೆನ್ ಓ ಗಂಗಾ ತುಂ, ಓ ಗಂಗಾ ವ್ಹಾಳ್ತಾಯ್ ಕಿತ್ಯಾಕ್?)
ಹಿಂ ಉತ್ರಾಂ ಖಂಚ್ಯಾಯ್ ಧರ್ಮಾಕ್, ಜಾತಿಕ್, ವರ್ಗಾಕ್ ಬೊಟಾಂ ಜೊಕಿನಾಂತ್. ಆಮ್ಚಾ ಭಾರತ್ ದೆಶಾಂತ್ ಗಂಗಾ ನಂಯ್ಕ್ ಏಕ್ ಪವಿತ್ರ್ ಸ್ಥಾನ್ ಆಸಾ. ಜೊ ಕೊಣ್ ಪಾತ್ಕಾಂ ವಾ ವಾಯ್ಟ್ ಕರ್ನ್ಯೊ ಆಧಾರ್ಲಲೊ, ಜರ್ ಹ್ಯಾ ನಂಯ್ತ್ ನ್ಹಾಲೊ ತರ್ ತಾಚಿಂ ಪಾತ್ಕಾಂ ಭಗ್ಸುಂಚಿ ಶ್ಯಾಥಿ ಹ್ಯಾ ನಂಯ್ಕ್ ಆಸಾ ಮ್ಹಳ್ಳಿ ಚಾರಿತ್ರಿಕ್/ಪಾರಂಪರಿಕ್ ಪಾತ್ಯೆಣಿ ಆಮ್ಚಾ ದೆಸಾಂತ್ ಅಜೂನ್ ಆಸಾ. ಹ್ಯಾ ಪಾತ್ಯೆಣೆಚ್ಯಾ ಸಾವ್ಳೆರ್ ಉಭೊ ರಾವ್ಲ್ಲೊ ಕವಿ ಹ್ಯಾ ಸಂಸಾರಾಚಿ ಪರಿಗತ್ ಪಳೆವ್ನ್, ಹ್ಯಾ ಸಂಸಾರಾಂತ್ ಮನ್ಶ್ಯಾಪಣಾಚೊ ಇತ್ಲೊ ಭೊಂಗೊಸ್ತೊಳ್ ಜಾತಾನಾ, ತುಂ ಗಂಗಾ, ಕಿತ್ಯಾಕ್ ನಿರ್ಲಿಪ್ತ್ ಜಾವ್ನ್, ನಿಶ್ಶಬ್ಧತೆನ್ ವ್ಹಾಳ್ತಾಯ್ ಮ್ಹಳ್ಳೆಂ ಸವಾಲ್ ಕರ್ತಾ.
ಎಕಾ ಕವಿಚಿ ಮುಳಾವಿ ಅರ್ಹತಾ ದೆಖ್ಚಿ ತರ್ ಮುಳಾವೊ ಗೂಣ್ ಸವಾಲ್ ವಿಚಾರ್ಚೆಂಚ್. ಹ್ಯಾ ಸಂಸಾರಾಂತ್ ಎದೊಳ್ ಕೊಣೆಂಚ್, ಕಿತ್ಯಾಕ್ಚ್, ಖಂಯ್ಚರ್ಯೀ ವಿಚಾರುಂಕ್ ನಾತ್ಲ್ಲಿಂ ಸವಾಲಾಂ ಕವಿ ಮಾತ್ರ್ ವಿಚಾರುಂಕ್ ಸಕ್ತಾ ಆನಿ ಪಾವ್ತಾ. ಅಶೆಂ ಹರ್ಯೆಕಾಕ್ ಕಶೆಂ? ಕಿತ್ಯಾಕ್? ಕೊಣ್? ಕಿತೆಂ? ವಾ ಹೆರ್ ಸವಾಲಾಂ ಕೆಲ್ಲ್ಯಾಂಕ್ ವಾ ಕರ್ಚ್ಯಾಂಕ್ ಸಮಾಜ್ ಚಡ್ತಾವ್ ಜಾವ್ನ್ ಖಾಯ್ಸ್ ಕರಿನಾ, ಚರಿತ್ರೆಚಿಂ ಪಾನಾಂ ಉಸ್ತಿಲ್ಯಾರ್ ಥಂಯ್ಚರ್ಯೀ ಪಳೆಂವ್ಕ್ ಮೆಳ್ಚಿಂ ಸತಾಂ ಹಿಂಚ್, ಸವಾಲಾಂ ವಿಚಾರುಂಕ್ ಗೆಲ್ಲ್ಯಾ ಜಾಯ್ತ್ಯಾ ಕವಿಂನಿ ಅಪ್ಲಿ ಗೊಮ್ಟಿ, ಅಪ್ಲೊ ಜೀವ್, ಅಪ್ಲೆಂ ಅಸ್ತಿತ್ವ್, ಅಪ್ಲೆಂ ಸರ್ವಸ್ವ್ ಹೊಗ್ಡಾಯ್ಲಾಂ. ತರ್ಯೀ ಕವಿಚೊ ಮುಳಾವೊ ಗೂಣ್ ಅಜೂನ್ ತೊಚ್ಚ್. ದೆಖುನ್ಂಚ್ ಜಾಯ್ಜಯ್ ಕವಿಚೊ ಸಂಸಾರ್ ವೆಗ್ಳೊ. ಕವಿಚಿಂ ಚಿಂತ್ನಾಂ ವೆಗ್ಳಿಂ, ಕವಿನ್ ವಳ್ಕೊಂಚಿಂ ಸತಾಂ ವೆಗ್ಳಿಂ.
ಕವಿ ಆನ್ಸಿ ಸಾಲ್ವಾದೊರ್ ಡಿ’ಸೊಜ್ ಕಾಣ್ಯೆಗಾರ್ ಜಾವ್ನ್ ಲೊಕಾಕ್ ಕಿತ್ಲೊ ವಳ್ಕೆಚೊಗೀ, ಕವಿ ಜಾವ್ನ್ಯೀ ತಿತ್ಲೊಚ್ ವಳ್ಕೆಚೊ. ಹಾಚಿಂ ಕವಿತಾ ವೆಗ್ಳ್ಯಾಚ್ ಪ್ರಕಾರಾಚಿಂ. ಹಾಚ್ಯಾ ಕವಿತೆಂನಿ ವೆವೆಗ್ಳೆ ರಂಗ್ ಆಸಾತ್, ವೆವೆಗ್ಳೆ ಆವಾಜ್ ಆಸಾತ್, ವೆವೆಗ್ಳಿಂ ಸತಾಂ ಆಸಾತ್. ಸಾದ್ಯಾ ಮನ್ಶ್ಯಾಚಾ ಜಿಣ್ಯೆಂತ್ಲಿಂ ಕೊಡು ಸತಾಂ, ಅಡ್ಹೂಕ್ ಖತಾಂ ಆಸಾತ್, ಅಸಹಾಯಕ್ಪಣ್ ಆಸಾ, ಕೊಣಾ ಕೊಣಾ ಗರಿಬಾಂಚೆಂ ವ್ಹಾಳ್ಲ್ಲೆಂ ಅಮಾಯಕ್ ರಗ್ತಾಚೆ ರಂಗ್ ದಿಸ್ತಾತ್. ದೆಖುನ್ ಆನ್ಸಿ ವೆಗ್ಳ್ಯಾಚ್ ರಿತಿಚೊ ಕವಿ.
ಅಂತರ್ ಕಿತ್ಯಾಕ್?
ದುಕಾನ್ ಮಾರ್ಗಾರ್ ಲೊಳ್ತಾ ಅಪಂಗ್
ಸುಕಾನ್ ಸರ್ಗಾರ್ ಖೆಳ್ತಾ ಪತಂಗ್
ಎಕ್ಲೊ ಕುಸ್ತಾ ಕಾಂಟ್ಯಾಂನಿ ಖುಂಟ್ಯಾಂನಿ
ತೊಕ್ಲೊ ನಾಚ್ತಾ ದೆಣ್ಯಾಂನಿ ನಾಣ್ಯಾಂನಿ
ದೆವಾ ಕಿತ್ಯಾಕ್ ಹೊ ಅಂತರ್?
ಮಾಸ್ಳ್ಯೊ ಮಾಣ್ಕೆ ಭೊಂವ್ತಾತ್ ತಳ್ಯಾಂತ್
ಪಾಡೆ ರೆಡೆ ಘುಂವ್ತಾತ್ ಮೊಳ್ಯಾಂತ್
ಎಕ್ಲೊ ಭಾಂದ್ತಾ ಸುಖಾ ರಾವ್ಳೆರ್
ತೊಕ್ಲೊ ನಿದ್ತಾ ರುಕಾ ಸಾವ್ಳೆರ್
ದೆವಾ ಕಿತ್ಯಾಕ್ ಹೊ ಅಂತರ್?
ವಿಭಿನ್ನ್ ವೈಭವ್ ವಿಶಾಲ್ ದರ್ಯಾಕ್
ಕಠೀಣ್ ಕಾಂಟೆ ಕೀರ್ಣಾಂ ಸುರ್ಯಾಕ್
ಎಕ್ಲೊ ಮಾಗ್ತಾ ಮೈಪಾಸ್ ಮೋಗ್
ತೊಕ್ಲೊ ವೆಂಗ್ತಾ ನಾಪಾಸ್ ರಾಗ್
ದೆವಾ ಕಿತ್ಯಾಕ್ ಹೊ ಅಂತರ್?
ಕವಿತಾಮೃತ್ - 6
ಆನ್ಸಿ ಪಾಲಡ್ಕಾ
ಜನನ್: 07
ಫೆಬ್ರೆರ್ 1967
ಇಮೇಯ್ಲ್: ancyds@gmail.com
ಪರ್ಗಟ್ ಜಾಲ್ಲೆ ಸ್ವತಾಚೆ
ಕವಿತಾಜಮೆ:
’ಯೇಗೊ ಬಾಯೆ’ (ರಾಕ್ಣೊ ಪ್ರಕಾಶನ್).
’ಚಿರ್ಪುಟಾಂ’ (ಪ್ರತಿಭಾ ಪ್ರಕಾಶನ್).
ಹೆರಾಂನಿ
ಸಂಪಾದನ್ ಕರುನ್ ಪರ್ಗಟ್ ಕೆಲ್ಲೆ ಕೊಂಕ್ಣಿ
ಕವಿತಾಜಮೆ:
’ಕವಿತಾಮೃತ್’ (1999,
ಸಂ: ಮೌರಿಸ್ ಶಾಂತಿಪುರ್).
’ಕುಪಾಂ ಪೊಂದ್ಲಿಂ ಮುಖಾಂ’ (2003, ಸಂ: ಮೆಲ್ವಿನ್ ರೊಡ್ರಿಗಸ್).
’ಶೆಕ್ಡ್ಯಾಚೊ ಕೊಂಕ್ಣಿ ಕವಿತಾ’ (2007, ಸಂ: ಮೆಲ್ವಿನ್ ರೊಡ್ರಿಗಸ್).
’ಕಾಳೊಕ್ ನಾತ್ಲ್ಲೊ ಗಾಂವ್’ (2007, ಸಂ: ವಲ್ಲಿ ಕ್ವಾಡ್ರಸ್).
ಸಾಹಿತಿಕ್ ವಾವ್ರ್:
’ಪಾಲಡ್ಕಾಚೊ ತಾಳೊ’ ಫಿರ್ಗಜ್-ಪತ್ರಾಚೊ ಸಂಪಾದಕ್ ಜಾವ್ನ್ ವಾವ್ರ್.
’ಆಮ್ಚೊ ಯುವಕ್’ ಪತ್ರಾಚೊ ಸಂಪಾದಕ್ ಜಾವ್ನ್ ವಾವ್ರ್.
’ಆಮ್ಚೊ ಸಂದೇಶ್’ ಪತ್ರಾಚೊ ಸಹ-ಸಂಪಾದಕ್ ಜಾವ್ನ್ ವಾವ್ರ್.
’ಕುಟಾಮ್’ ಪತ್ರಾಚೊ ಸಹ-ಸಂಪಾದಕ್ ಜಾವ್ನ್ ವಾವ್ರ್.
’ರಾಕ್ಣೊ’ ಪತ್ರಾಚ್ಯಾ ಸಂಪಾದಕೀಯ್ ಮಂಡಳೆಚೊ ಸಾಂದೊ ಜಾವ್ನ್ ವಾವ್ರ್.
’ಸಾದ್’ ಕೊಂಕ್ಣಿ ಭಾಶಾ ಮಂಡಳ್ (ಮಹಾರಾಷ್ಟ್ರ) ಹಾಂಚ್ಯಾ ಪತ್ರಾಚೊ ಸಂಪಾದಕ್ ಜಾವ್ನ್ ವಾವ್ರ್ (2007 ಥಾವ್ನ್).
ಲಾಭ್ಲ್ಲಿಂ
ಇನಾಮಾಂ/ಪುರಸ್ಕಾರ್:
’ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್’
(1995).
’ಟಿ.ಎಮ್.ಎ.ಪೈ ಫೌಂಡೇಶನಾಚೊ ಪುರಸ್ಕಾರ್’ (1999).
’ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್’ (2003).
ಆನ್ಸಿ ಪಾಲಡ್ಕಾಚಿಂ ಕವಿತಾ/ಕಾಣಿ/ಲೇಖನಾಂ:
ಕವಿತಾಝರ್ಚೆರ್ ಪರ್ಗಟ್ ಜಾಲ್ಲೆಂ ಕಿಡೊ ಕವಿತಾ.
2007 ಇಸ್ವೆಚ್ಯಾ ವ್ಯಾಲೆಂಟೈನ್ಸ್ ದಿಸಾಚ್ಯಾ ವಿಶೇಸ್ ಅಂಖ್ಯಾಂತ್ ಪರ್ಗಟ್ ಜಾಲ್ಲೆಂ ವಿರಹ್ ಗೀತ್ ಕವಿತಾ.
2007 ಇಸ್ವೆಚ್ಯಾ ಪಾಸ್ಕಾಂಚಾ ವಿಶೇಸ್ ಅಂಖ್ಯಾಂತ್ ಪರ್ಗಟ್ ಜಾಲ್ಲೆಂ ಲೆಂವ್ಟೊ ಕವಿತಾ.
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಚೆರ್ ಬರಯಿಲ್ಲೆ ವೊರಾಯ್ಣಾರಾಚೆ ವಿಚಾರ್.
ಕವಿತಾಪಾಠಾಚೆರ್ ಅಧ್ಯಯನ್ ಚಲಯಿಲ್ಲೆಂ ಕವಿತಾ ’ವಾಸ್ತವ್’.
ಕಥಾಮೃತಾಚೆ ಆಧ್ಲೆ ಥೆಂಬೆ: 1, 2, 3, 4, 5
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.