ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಚಾರ್ ಉಚಾರ್
[ಶರೊ: ವಾಚ್ಪ್ಯಾಂಚಾ ಪ್ರಾಮಾಣಿಕ್ ವಿಚಾರಾಂಕ್ ಆವ್ಕಾಸ್ ಆಸಾ ದೆಖುನ್ ದಯಕರುನ್ ಫಕತ್ತ್ ಧುಂಪವ್ಣಿ ಕರಿನಾಕಾತ್. ಹಾಂತುಂ ಪರ್ಗಟ್ ಜಾಂವ್ಚೆ ಸರ್ವ್ ವಿಚಾರ್ ತ್ಯಾ ತ್ಯಾ ಬರವ್ಪ್ಯಾಚೆ ಶಿವಾಯ್ ದಾಯ್ಜ್.ಕೊಮ್ಚೆ ನ್ಹಂಯ್]
ವ್ಯಂಗ್ಯ್ ಚಿತ್ರಾಂಚೊ ಪ್ರಕಾರ್ ಖಂಡಿತ್ ಜಾವ್ನ್ ಸಾಹಿತ್ಯಾಚೊ ಏಕ್ ಉಂಚ್ಲೊ ಪ್ರಕಾರ್. ವೆಕ್ತಿಗತ್ ಭೆಟಾನಾಸ್ತಾಂ ತಾಚೆರ್ ವ್ಯಂಗ್ಯ್ ಚಿತ್ರ್ ಸೊಡಂವ್ಚಿ ಕಲಾ ಎಕಾ ಖರ್ಯಾ ಆರ್ಟಿಸ್ಟಾಕ್ ಮಾತ್ರ್ ಆಸ್ಯೆತ್. ವಿಲ್ಸನಾಕ್ ಉಲ್ಲಾಸ್.
- ರೊಜಿಟಾ ನಜ್ರೆತ್, ಮಿರಾರೋಡ್.
ವಿಲ್ಸನ್ ಜೆಸುಪ್ರಿಯಾಚೆಂ ವ್ಯಂಗ್ಯ್ಚಿತ್ರ್ ಪಳೆವ್ನ್ ಭಾರಿಚ್ ಖುಶಿ ಜಾಲಿ. ಹಾಂತುಂ ವಿಲ್ಸನಾ ಥಂಯ್ ಆಸ್ಚೆಂ ಚಿತ್ರಣಾಚೆಂ ಬರೆಂಚ್ ದೆಣೆಂ ಝಳ್ಕಾತಾ. ಸೊಡಯ್ ವಿಲ್ಸನ್, ಸೊಡಯ್; ಹೊ ಸಗ್ಳೊ ಸಂಸಾರ್ಚ್ ತುಜೊ. ತುಜ್ಯಾ ಮುಖ್ಲ್ಯಾ ಚಿತ್ರಾಂಕ್ ಪಳೆಂವ್ಕ್ ಆತುರಾಯೆನ್ ರಾಕೊನ್ ಆಸಾಂ ಆನಿ ತುಕಾ ಹರ್ ತುಜ್ಯಾ ಕಾಮಾಂನಿ ಜಯ್ತ್ ಆಶೆತಾಂ.
- ಆಸ್ಟಿನ್ ಪ್ರಭು, ಚಿಕಾಗೊ.
ಸಜ್ಜಿಗೆ ಬಜಿಲ್?
ಖಾಕಿಯೆಂತ್ಲಿ ಕೆಸೊಳಿ ಅಂಕಣ್ ಹಾಂವ್ ಜಶೆಂ ದಾಯ್ಜಾಂತ್ಲಿಂ ಹೆರ್ ಅಂಕಣಾಂ ವಾಚುನ್ ಖಾಯ್ಸ್ ಕರ್ಚೆಪರಿಂ ಖಾಯ್ಸ್ ಕರ್ತಾಂ. ಗೂಂಡ್ ಚಿಂತ್ಪಾಚೆಂ ಚಿಂತಾಪ್ ಹ್ಯಾ ಅಂಕಣಾಂತ್ ಆಸಾ. ಸಂಪಾದಕಾನ್ ಹಿಶಾರೊ ದಿಲ್ಲೆಪರಿಂ ’ದೊರಿ, ಲಾಟೊ ಆನಿ ಶಿದಿ’ ಆಂಕ್ಡೊ ವಾಚುನ್ ತಾಂತ್ಲೊ ಸಾಂಕೇತಿಕ್ ಅರ್ಥ್ ಸಮ್ಜೊಂಕ್ ಪ್ರೇತನ್ ಕರ್ತಾನಾ ಕಿತ್ಯಾಕ್ಗೀ ಮ್ಹಾಕಾ ಪ್ರೀತಮಾನ್ ಅಪ್ಲ್ಯಾ ವಿಚಾರಾಂಚೆರ್ ಸಜ್ಜಿಗೆ ಬಜಿಲ್ ಕೆಲ್ಲೆಪರಿಂ ಭಗ್ಲೆಂ; ’ದೊರಿ, ಲಾಟೊ ಆನಿ ಶಿದಿ’ ಏಕ್ ಕಾಣಿ ತರ್, ತಾಕಾ ಗಾಯ್ಚೆಂ ದೂದ್ ಆನಿ ಮಾಂಯ್ಚೆ ದೂದ್ ಮಧೆಂ ಘಾಲ್ಚೆಂ ಕಿತ್ಯಾಕ್ ಮ್ಹಳ್ಳೆಂ ಸಮ್ಜಾಲೆಂ ನಾ. ಎಕಾ ವಿಶ್ಯಾಚೆರ್ ಬರಯ್ತಾನಾ ತೆಚ್ಚ್ ವಿಶ್ಯಾಚಾ ಭಂವ್ತೊಣಿಂ ಬರಂವ್ಚೆಂ ಬರೆಂ ಶಿವಾಯ್ ಗರ್ಜೆಭಾಯ್ಲೆಂ ಮಧೆಂ ಹಾಡ್ಲ್ಯಾರ್ ವಾಚ್ಪ್ಯಾಕ್ ಘುಸ್ಪೊಡಾಯಿಲ್ಲೆಪರಿಂ ನ್ಹಂಯ್ಗಿ?
- ಸಿ.ಎಲ್.ಕರಾಮಾ, ದುಭಾಯ್.
ಹಾಂವ್ ಅಶೆಂ ಚಿಂತಾಂ..
ಪಾಟ್ಲ್ಯಾ ಥೊಡ್ಯಾ ದಿಸಾಂ ಥಾವ್ನ್ ’ದಾಯ್ಜ್’ ಜಾಳಿಜಾಗ್ಯಾರ್ ಕವಿತೆವಿಶ್ಯಾಂತ್ ಬಲಾಯ್ಕೆಭರಿತ್ ಭಾಸಾಭಾಸ್ ಜಾವ್ನ್ ಆಸ್ಚಿ ಪಳೆಲ್ಯಾ ಆನಿ ವಾಚ್ಲ್ಯಾ. ’ದಾಯ್ಜ್’ ಜಾಳಿಜಾಗ್ಯಾಚ್ಯಾ ಜಲ್ಮಾಥಾವ್ನ್ ಆಜ್ ಪರ್ಯಾಂತ್ ಹಾಚೆರ್ ಪರ್ಗಟ್ಲ್ಲೆಂ ಸರ್ವ್ ಕೊಂಕ್ಣಿ ಸಾಹಿತ್ ಹಾಂವೆಂ ವಾಚ್ಲಾಂ ತರಿ, ದೋನ್ ಸಬ್ದ್ ಬರಂವ್ಕ್ ಧಯ್ರ್ ಘೆಂವ್ಚೆಂ ಹೆಂಚ್ ಪಯ್ಲೆಂ ಪಾವ್ಟಿಂ.
ಸುರ್ವೆರ್ಚ್ ಹಾತ್ ಉದಾರೆ ಕರ್ತಾಂ: ಹಾಂವ್ ಸರ್ವ್ ಕವಿತಾ ವಾಚ್ತಾಂ, ಏಕ್ ದೋನ್ ಕವಿತಾ ಲಿಕ್ಲ್ಯಾತ್ ತರಿ, ಹಾಂವ್ ಏಕ್ ಕವಿ ನ್ಹಂಯ್. ಜಶೆಂ ತುಮಿ ಸಾಂಗ್ತಾತ್, ತೊ ಮ್ಹಾಕಾ ವೊಂಬೊಂಚೊ ಪ್ರಕಾರ್ ನ್ಹಂಯ್.
ಕವಿತೆಂತ್ ಧಮ್, ಆವಾಜ್, ಜೀವ್, ಶ್ವಾಸ್ ಆಸುಂಕ್ ಜಾಯ್, ತೆಂ ಖರೆಂಚ್ ಖರೆಂ. ಪುಣ್ ’ಜಲ್ಮಾನ್ ಕವಿ’(??) ನ್ಹಂಯ್ ಆಸ್ಲ್ಲ್ಯಾನ್ ದೋನ್ ಪಂಗ್ತಿ ಲಿಕ್ಲ್ಯೊ, ಅಸಕ್ತೆನ್ ಕೋಣ್ಯಿ ಸಂಪಾದಕಾಕ್ ದಾಡ್ಲ್ಯೊ, ತ್ಯಾ ಸಂಪಾದಕಾನ್ ‘ಕವಿ’ಕ್ ಉತ್ತೇಜನ್ ದಿಂವ್ಚೆಖಾತಿರ್ ತ್ಯೊ ಛಾಪ್ಲ್ಯೊ-ತರ್ ಕಿತೆಂ ಜಾಲೆಂ? ಹ್ಯಾ ಮುಳಾವ್ಯಾ ಪ್ರೇರಣಾನ್ ಕವಿತಾ ಶೆತಾಂತ್ ದೆಂವುನ್ ಆಜ್ ಕೊಂಕ್ಣೆಂತ್ ಉಂಚ್ಲ್ಯಾ ವರ್ಗಾಚೆ ಕವಿ ಜಾಲ್ಲ್ಯಾ ಎಕ್ಲ್ಯಾ ದೊಗಾಂಚಿ ಪುಣ್ಯಿ ಮ್ಹಾಕಾ ಬರೀ ವಳಕ್ ಆಸಾ. ಎಕಾ ಕವಿತೆಥಾವ್ನ್ ದುಸ್ರ್ಯಾ ಕವಿತೆಕ್ ಕವಿಚಿ ವಾಡಾವಳ್ ಜಾಯ್ಜೆ. ಜರ್ತರ್, ಹಿ ವಾಡಾವಳ್ ಜಾಯ್ನಾ, ನಿಮಾಣ್ಯಾ ಉಸ್ವಾಸಾವರೇಗ್, ’ಹಾತಾಂತ್ ಲಿಕ್ಣಿ, ಪಿರಿಂತ್ ಚೆಟ್ನಿ’ ಪ್ರಾಸ್ ಮಾತ್ರ್ ಮುಕಾರುನ್ ವರ್ತೆಲೆ.
ಹರೆಕ್ಲ್ಯಾನ್ ’ಬಂಡಾಯ್ ಕವಿ’ ವ ’ರೊಮ್ಯಾಂಟಿಕ್ ಕವಿ’ ಜಾಂವ್ಕ್ ಸಾಧ್ ನಾ, ಗರ್ಜ್ಯಿ ನಾ. ಹಿ ಗರ್ಜ್ ಚರಿತ್ರೆಂತ್ ವೆಳಾಕಾಳಾತೆಕಿದ್ ಉದೆತಾ ಆನಿ ಸಂಪ್ತಾ. ತರ್ನೆ ಆಸ್ತಾನಾ ’ಬಂಡಾಯ್’ ಉಟಂವ್ಚೆ (ಸಗ್ಳೊ ಸಂಸಾರ್ ಬದ್ಲುಂಚೆಂ ಸಪಣ್ ಘೆವ್ನ್) ಕವಿ, ಜಿಣ್ಯೆಂತ್ ಪರಿಪಿಕಾಯೆಕ್ ಪಾವ್ತಾನಾ, ’ರೊಮ್ಯಾಂಟಿಕ್’ ಜಾಂವ್ಕ್ಯಿ ಪುರೊ. ಕೆ.ಎಸ್.ಎನ್. ಚಿಂ ಕವಿತಾ ಅಟ್ರಾ ವರ್ಸಾಂಚ್ಯಾ ತರ್ನಾಟ್ಯಾಂಕ್ ಲಜೆಕ್ ಘಾಲ್ತಿತ್.
ಎಕಾ ಲೆಕಕಾನ್ ವಾ ಕವಿನ್ ವಾಚ್ಪ್ಯಾಂಚ್ಯಾ ಮಟ್ಟಾಕ್ ದೆಂವುನ್, ’ಲೊಕಾಮೊಗಾಳ್ ಸಾಹಿತ್’ ರಚ್ಚೆಂ ವ ವಾಚ್ಪ್ಯಾಕ್ ಆಪ್ಲ್ಯಾ ಮಟ್ಟಾಕ್ ವಯ್ರ್ ಹಾಡಿಜೆ?’- ಹೆಂ ಸವಾಲ್ ಲಗ್ಬಗ್ 15 ವರ್ಸಾಂ ಆದಿಂ ’ರಾಕ್ಣೊ’ ಪತ್ರಾನ್ ಯೆವ್ಜಿಲ್ಲ್ಯಾ ಸಹಮಿಲನಾಂತ್ ಉದೆವ್ನ್ ತರ್ಕಾಕ್ ಕಾರಣ್ ಜಾಲ್ಲೆಂ. ತ್ಯಾ ವೆಳಾರ್, ’ಮ್ಹಜ್ಯಾ ವಾಚ್ಪ್ಯಾಂಕ್ ಹೊಗ್ಡಾವ್ನ್ ಘೆಂವ್ಕ್ ಹಾಂವ್ ತಯಾರ್ ನಾ’’ಮ್ಹಣ್ ಎಕಾ ನಾಮ್ಣೆಚ್ಯಾ ಲೇಕಕ್-ಕವಿನ್ ಜಾಪ್ ದಿಲ್ಲಿ ಮ್ಹಾಕಾ ಉಡಾಸ್ ಆಸಾ.
ಫಿರ್ಗಜೆಕ್ ಏಕ್ ಪತ್ರ್ ಆಸ್ಚ್ಯಾ ಹ್ಯಾ ಕಾಳಾರ್, ತ್ಯಾ ಪತ್ರಾಂತ್ಲ್ಯಾ 70 ಪಾನಾಂ ಜಾಯ್ರಾತಾಂಕ್ 30 ಪಾನಾಂ ಸಾಹಿತ್ ಪುಣ್ಯಿ ಎಕ್ಟಾಂವ್ಚೆಂ ಸಾಹಸ್ ತ್ಯಾ ಪತ್ರಾಚ್ಯಾ ಸಂಪಾದಕಾಚೆಂ. ಹಾಂತುಂ ದೋನ್ ತೀನ್ ಪಾನಾಂ ’ಕವಿತೆ’ಕ್ ಸಮರ್ಪಿನಾ ತರ್, ಸಂಪಾದಕ್ ಕಿತೆಂ ಆಪ್ಲಿ ಜಿಣಿಯೆ-ಕತಾ ಲಿಕ್ತಲೊ ತಿಂ ಪಾನಾಂ ಭರ್ತಿ ಕರುಂಕ್?
’ಮ್ಹಜ್ಯಾ ಘರಾಕ್ ಯೆನಾತ್ಲ್ಯಾಂನಿ, ಮ್ಹಜ್ಯಾ ಘರಾಕುಶಿನ್ ಯೆಂವ್ಚ್ಯಾ ವಾಟೆನ್ ಚಲುಂಕ್ಯಿ ನ್ಹಜೊ’ ಮಳ್ಳೆಂ ಧೋರಣ್ ಕೊಂಕ್ಣಿ ಭಾಶೆಚ್ಯಾ ಸಾಹಿತಾಚ್ಯಾ ವಾಡಾವಳಿಕ್ ಬಲಾಯ್ಕೆಭರಿತ್ ದಿಸಾನಾ.
- ಚೇತನ್, ಮಂಗ್ಳುರ್ (ಆಧ್ಲೊ ಸೆವಕ್ ಸಂಪಾದಕ್).
ಪುನ್ವೆಕ್ ದಿಸಾನಾಸ್ಚಿಂ ನೆಕೆತ್ರಾಂ!
ಮೆಲ್ವಿನ್ ಜೆ. ವಾಸಾನ್ ಘೆತ್ಲ್ಲೆಂ ಮಾನೇಸ್ತ್ ಲುವಿಸ್ ರೊಡ್ರಿಗಸಾಚೆಂ ಸಂದರ್ಶನ್ ವಾಚ್ತಚ್ ಮ್ಹಾಕಾ ವಯ್ಲ್ಯಾ ಶಿರೋನಾಂವಾಚೊ ಉಗ್ಡಾಸ್ ಆಯ್ಲೊ. ಆಮ್ಚೆ ಭೊಂವಾರಿಂ ಸಭಾರ್ ತಾರಾಂ ಆಸಾತ್ ಆನಿ ತಿಂ ಗುಪಿತ್ತ್ ಆಪ್ಲೊ ಪ್ರಕಾಶ್ ಸಮಾಜೆಕ್ - ತಾಂಚ್ಯಾ ಖಳ್ಮಿತ್ ನಾಸ್ಚ್ಯಾ ವಾಂವ್ಟಿನ್ ಆನಿ ಶೃದ್ಧೆನ್ ದೀಂವ್ನ್ಂಚ್ ಆಸಾತ್. ತರೀ ಆಮ್ಚಿ ಸಮಾಜ್ ತಸಲ್ಯಾಂ ವಿಶಿಂ ಕಿತೆಂಚ್ ನೆಣಾಂ ಕಿತ್ಯಾ ತಾಂಚೆ ವಿಶಿಂ ಕೊಣ್ಂಚ್ ನಾ ಗಾಯ್ತಾತ್ ಗಾಣಾಂ. ಜಸೆಂ ಪುನ್ವೆ ದಿಸಾ ತ್ಯಾ ಚಂದ್ರೆಮಾಚ್ಯಾ ಉಜ್ವಾಡಾಕ್ ಹೆರ್ ಆಕಾಸಾವಯ್ಲಿಂ ತಾರಾಂ ದಿಸಾನಾಂತ್ಗಿ ತಸೆಂಚ್ ಹೆ ವ್ಯಕ್ತಿ ಗುಪಿತ್ತ್ ಆಪ್ಲೊ ವಾವ್ರ್ ಕರುನ್ಂಚ್ ಆಸಾತ್. ಅಸಲ್ಯಾಂಚಿ ವಳೊಕ್ ಸಮಾಜೆಕ್ ಕರುನ್ ದಿಂವ್ಚ್ಯಾ ದಾಯ್ಜ್ ಪಂಗ್ಡಾಕ್ ಹಾಂವ್ ಮ್ಹಜೆಂ ಚೆಪೆಂ ಉಕಲ್ತಾಂ. ಸುರ್ಯೊ, ಚಂದ್ರೆಮಾಚೊ ಪ್ರಕಾಸ್ ಆಮ್ಕಾಂ ಹರ್ಯೆಕ್ಲ್ಯಾಕ್ ಕಳಿತ್ ಆಸಾ; ಆತಾಂ ಹ್ಯಾ ತಾರಾಂಚಿ ವಳೊಕ್ಯೀ ಜಾಂವ್ ಆನಿ ತಾಣಿಂ ಕರ್ಚ್ಯಾ ಬರ್ಯಾ ಕಾಮಾಂಕ್ಯೀ ಫಾವೊತಿ ಮಾನ್ಯತಾ ಮೆಳೊಂ. ತೆ ಅಂತರ್ಲ್ಯಾ ಉಪ್ರಾಂತ್ ತಾಂಚೆವಿಶಿಂ ಜಾಣಾ ಜಾವ್ನ್ ಕಿತೆಂ ಪ್ರಯೋಜನ್? ತೆ ಜಿವಂತ್ ಆಸ್ತಾಂಚ್ ಆಮಿ ತಾಂಕಾಂ ಮಾನ್ ದಿವ್ಯಾಂ.
ಲುವಿಸ್ ರೊಡ್ರಿಗಸಾಚೆಂ ಸಂಗೀತ್ ಕುಟಾಮ್ವಿಶಿಂ ವಾಚುನ್ ಖುಶಿ ಜಾಲಿ. ದೇವ್ ಬರೆಂ ಕರುಂ ಲುವಿಸ್, ತುವೆಂ ಕೊಂಕ್ಣಿ ತುಜ್ಯಾ ಕುಟ್ಮಾಂತ್ ಜಿವಾಳ್ ದವರ್ಲ್ಲ್ಯಾಕ್. ತುಜ್ಯಾ ಪತಿಣ್ ರೀಟಾ ಆನಿ ಧುವ್ ಲೊಲಿಟಾ ಗಾವ್ಪಿಣ್ಯೊ ತಸೆಂ ಪುತ್ ರಸಲ್ ಸಂಗೀತ್ಗಾರ್! ಹಾಚೆ ವ್ಹರ್ತೆಂ ತುಂವೆ ಕೊಂಕ್ಣಿಕ್ ಕಿತೆಂ ದಿವ್ಯೆತ್? ಕೊಂಕಣಿ ಟ್ಯಾಲೆಂಟ್ಸ್ ಸಂಸ್ಥೊ ಜಿವೊ ದವರ್ನ್ ಕೊಂಕ್ಣೆಚೊ ಪ್ರಸಾರ್ ಕರ್ಚ್ಯಾ ತುಕಾ ಹಾಂವ್ ಧೀನ್ವಾಸ್ತಾಂ. ಕೊಂಕ್ಣೆಚೊ ತುಜೊ ವಾವ್ರ್ ನಿರಂತರಿಂ ವ್ಹಾಳೊನ್ ವಚೊಂ ಆನಿ ತೊ ವ್ಹಾಳೊ ಹರ್ ಕೊಂಕ್ಣಿ ಕುಟ್ಮಾಕ್ ಪಾವೊಂ. ತುಜಿ ಸವಿಸ್ತಾರ್ ವಳೊಕ್ ಕರುನ್ ದಿಲ್ಲ್ಯಾ ಮೆಲ್ವಿನಾಕ್ಯ್ ಧನ್ಯವಾದ್!
- ಆಸ್ಟಿನ್ ಪ್ರಭು, ಚಿಕಾಗೊ.
ಆಧ್ಲ್ಯಾ ಕಾಳಾರ್ ಜಾಯ್ತ್ಯಾ ಲೊಕಾಂಕ್ ದಿಸಾಚೆಂ ಏಕ್ ಜೆವಾಣ್ ಮೆಳೊಂಕ್ ಭೋವ್ ತ್ರಾಸ್ ಆಸ್ಲ್ಲೆ. ಭುರ್ಗಿಂ ಬಾಳಾಂ ಸಯ್ತ್ ಸಾರ್ಕೆಂ ಖಾಂವ್ಕ್ ಜೇಂವ್ಕ್ ನಾಸ್ತಾಂ ಸುಕ್ಯಾ ತಾಟ್ಯಾಪರಿಂ ಆಸ್ತಾಲಿಂ ದೆಕುನ್, ಆಪ್ಲ್ಯಾ ಭುರ್ಗ್ಯಾನ್ ಸಾರ್ಕೆಂ ಖಾವ್ನ್, ಜೇವ್ನ್ ಪುಡ್ಪುಡಿತ್ ದಿಸಾಜಯ್. ಅಶೆಂ ಪುಡ್ಪುಡಿತ್ ಆಸ್ಚಿಂ ಭುರ್ಗಿಂ ಚಡ್ತಾವ್ ಭಲಾಯ್ಕೆಂತ್ ಆಸ್ತಾತ್ ಮ್ಹಳ್ಳೆಂ ಚಿಂತಾಪ್ ಆಸ್ಲೆಂ. ಪುಣ್ ಆಜ್ಕಾಲ್ ಆಮ್ಚಿ ಪರಿಗತ್, ಆಮ್ಚಿಂ ಖಾಣಾಂ ಪಳೆನಾತಾ ಹೆಂ ಚಿಂತಾಪ್ ಭೋವ್ ಮಾರೆಕಾರ್ ಜಾವ್ನಾಸಾ. ಮೊಟಾಯ್ ಸೊಭಾಯ್ ನ್ಹಂಯ್, ಬಗಾರ್ ಪಿಡಾ ಮ್ಹಳ್ಳೆಂ ಆಮಿಂ ಸಮ್ಜೊನ್ ಘೆಂವ್ಚಿ ಗರ್ಜ್ ಆಸಾ. ಹ್ಯಾ ವಿಶ್ಯಾಚೆರ್ ಅಪುರ್ಭಾಯೆಚೊ ಆಟವ್ ಕರ್ನ್ ಸೊಭಿತ್ ಲೇಖನ್ ದಿಲ್ಲ್ಯಾ ಆಸ್ಟಿನ್ ಪ್ರಭುಕ್ ಅರ್ಗಾಂ.
- ಆಲ್ಫ್, ಬಾಹ್ರೇಯ್ನ್.
ದೊಳೆ ಉಗ್ತಾಂವ್ಚೆಂ ಲೇಖನ್
ವಿಲ್ಸನ್ ಕಟೀಲಾಚ್ಯಾ ಲಿಖ್ಣೆಂತ್ ಉದೆಲ್ಲೆಂ ವಿಮರ್ಶ್ಯಾ ಲೇಖನ್ ಆಯ್ಚಾ ಕೊಂಕ್ಣಿ ಪರಿಗತೆಚೆರ್ ಆರ್ಸೊ ಧರ್ತಾ. ಖರೆಂಚ್ ಜಾವ್ನ್ ಹ್ಯಾವಿಶಿಂ ಆಟೊವ್ ಕೆಲ್ಲ್ಯಾ ದಾಯ್ಜ್ ಡಾಟ್ ಕೊಮಾಕ್ ಉಲ್ಲಾಸ್. ಕೊಂಕ್ಣೆಚ್ಯಾ ಹರ್ಯೆಕಾ ಶೆತಾಂತ್ ಎಕೊಡಿ ವಯ್ಲ್ಯಾಭಾರ್ ನದರ್ ಘಾಲ್ಚಿ ತರ್;
ಪತ್ರಿಕೋಧ್ಯಮ್:
ಪತ್ರಾಂ: ಕನ್ನಡ ಲಿಪಿಯೆಚ್ಯಾ ಕೊಂಕ್ಣಿ ಸಾಹಿತ್ಯಾಕ್ 90 ವರ್ಸಾಂಚಿ ಚರಿತ್ರಾ ಆಸಾ, ಹ್ಯಾ 90 ವರ್ಸಾಂನಿ ಎದೊಳ್ ಪರ್ಯಾಂತ್ ಲಾಗಿಂ ಲಾಗಿಂ ಪನ್ನಾಸಾಂ ಲಾಗಿಂ ಪತ್ರಾಂ ಉದೆಲಿಂ ತಶೆಂಚ್ ಜಾಯ್ತಿಂ ಆಳ್ವೊನ್ ಗೆಲಿಂ. ಹಾಚಿಂ ಕಾರಾಣಾಂ ಉಸ್ತುಂಚೆಂ ಕಾಮ್ ಸಂಪೆಂ ನ್ಹಂಯ್ ತರ್ಯೀ ಮಟ್ವ್ಯಾನ್ ಉಲ್ಲೇಕ್ ಕರ್ಚೊ ತರ್. 1. ಜೊಕ್ತೊ ಸಂಪಾದಕ್ ನಾಸ್ತಾಂ, 2. ಜೊಕ್ತೆಂ ಸಾಹಿತ್ಯ್ ನಾಸ್ತಾಂ, 3. ಜೊಕ್ತೆ ವಾಚ್ಪಿ ನಾಸ್ತಾಂ. ಸಂಪಾದಕಾಚ್ಯಾ ಅರ್ಹತೆವಿಶಿಂ ಬರಂವ್ಕ್ ಗೆಲ್ಯಾರ್ ಪಾನಾಂನಿ ಬರವ್ಯೆತಾ, ಸಂಪಾದಕಾಚೆಂ ಕಾಮ್ ಫಕತ್ತ್ ಕೊಣಾಯ್ಚೆಂಯೀ ಬರಾಪ್ ಖಾತರ್ಚೆಂ ಮಾತ್ರ್ ನ್ಹಂಯ್ (ಅಶೆಂ ಚಿಂತ್ಚೆ ಥೊಡೆ ಅಜೂನ್ ಆಸಾತ್ ಆನಿ ತೆಂಚ್ ಕರ್ನ್ ಆಸಾತ್).
ಸರ್ವ್ ಪತ್ರಾಂಕ್ ಏಕ್ ಸಾರ್ಕೆಂ ಧೋರಣ್ ಮ್ಹಳ್ಳೆಂಚ್ ನಾ. ಪತ್ರಾಂ ಚಲಂವ್ಕ್ ವಾಚ್ಪಿ ಜಾಯ್, ಆನಿ ವಾಚ್ಪಿ ಚಡ್ಲೆ ತರ್ ಖರೆಂಚ್ ಪ್ರಚಾರ್ ಚಡ್ತಾ ಆನಿ ಪ್ರಚಾರಾ ಖಾತಿರ್ ಜೊಕ್ತಿಂ ಮನ್ಶಾಂ, ಕಂಪ್ಣ್ಯೊ ಇಸ್ತಿಹಾರಾಂ ದಿತಾತ್ - ಅಶೆಂ ಪತ್ರ್ ಬರ್ಯಾನ್ ಚಲ್ತಾ - ಪುಣ್ ಹಕೀಗತೆಂತ್ ಅಶೆಂ ಜಾಯ್ನಾ, ಸತ್ ಸಾಂಗ್ಚೆಂ ತರ್ ಪತ್ರ್ ಚಲಂವ್ಕ್ ಕೊಣಾ ಕೊಣಾಕ್ ದೊಗ್ಗು ಸಲಾಮ್ ಕರಿಜಾಯ್ ಪಡ್ತಾ, ಕೊಣಾ ಕೊಣಾಕ್ ಧುಂಪಯ್ಜಾಯ್ ಪಡ್ತಾ, ಹಿ ಧುಂಪವ್ಣಿ ಸಾಹಿತಿಂಕ್ ಆಸ್ಯೆತಾ, ಇಸ್ತಿಹಾರ್ ದಿತೆಲ್ಯಾಂಕ್ ಆಸ್ಯೆತಾ ವಾ ಹೆರಾಂಕ್. ಸಾಂಗಾ ಮ್ಹಾಕಾ ಕೊಂಕ್ಣೆಂತ್ ಆಸ್ಚಾ ಪತ್ರಾಂ ಪಯ್ಕಿ ಸಾರ್ಕೆಂ ಧೋರಣ್ ಆಸೊನ್ ತ್ಯೇ ಪ್ರಕಾರ್ ಚಲ್ಚಿಂ ಪತ್ರಾಂ ಕಿತ್ಲಿಂ?. ದೆಕುನ್ ಆಮ್ಚಿಂ ಚಡ್ತಾವ್ ಪತ್ರಾಂ ಕೊಣಾ ಕೊಣಾಚ್ಯಾ ದಯೆನ್ ಚಲೊನ್ ಆಸಾತ್. ಆನಿ ಚಡ್ತಾವ್ ಪತ್ರಾಂಕ್ ಎಕಾಮೆಕಾಮಧೆಂ ಕಿತ್ಲಿ ಸೊಡ್-ದೊಡ್ ಆಸಾ? ಸರ್ವ್ ಪತ್ರಾಂನಿ ಕೊಂಕ್ಣಿ ಸೆವಾ ಕೊಂಕ್ಣಿ ವಾವ್ರ್ ಮ್ಹಣ್ ಗಾಜಯ್ಲ್ಯಾರೀ, ಖರೆಂಪಣಿಂ ಪತ್ರಾಂನಿ ಕೊಂಕ್ಣೆಚ್ಯಾಕೀ ’ವೆಕ್ತಿ’ ವ್ಹಡ್ ಜಾಯ್ನಾಂತ್?.
ಆಮ್ಚೆ ಥೊಡೆ ಮಹಾನ್ ಸಾಹಿತಿ ಕಾಂಯ್ ತಾಂಕಾಂ ಆನಿ ರಬೀಂದ್ರನಾಥ್ ಠಾಗೊರಾಕ್ ತಫಾವತ್ ಆಸಾ ಮ್ಹಣ್ ಚಿಂತ್ಚೆ ತಸ್ಲೆ ನ್ಹಂಯ್, ಭೋವ್ಶಾ ಠಾಗೋರಾಚ್ಯಾಕೀ ಊಂಚ್ ಮ್ಹಣ್ ಚಿಂತ್ಚಾಂತ್ಲೆ. ಹಾಂಚ್ಯಾ ಸಾಹಿತ್ಯಾಚೆರ್ ಕೊಣೆಂಯ್ ಪ್ರತಿಕ್ರಿಯಾ ದಿಲ್ಲೆಪರಿಂ ನಾ. ಕಿತ್ಯಾಕ್ ಹಾಣಿಂ ಉಂಚ್ಲ್ಯೊ ಪ್ರಶಸ್ಥ್ಯೊ ಜೊಡ್ಲ್ಯಾತ್, ಹಾಂಚೆ ಜಾಯ್ತೆ ಬೂಕ್ ಛಾಪ್ಲ್ಯಾತ್, ಹಾಂಚೆ ಕೇಸ್ ಪಿಕ್ಲ್ಯಾತ್, ಕಾಂಯ್ ಎಕ್ಲೆ ದೋಗ್ ಬಾವ್ಡೆ ದಾಕ್ಶೆಣ್ ಸಾಂಡುನ್ ಬರಯ್ತ್ ತರ್ ಜಾಲೆಂ ತಾಚೆಂ ಸತ್ತ್ಯಾನಾಸ್. ಥೊಡೆಪಾವ್ಟಿಂ ಹೆಂ ಪರ್ಗಟ್ ಕೆಲ್ಲ್ಯಾ ಸಂಪಾದಕಾಕ್ ಸಯ್ತ್ ದುಸ್ಮಾನ್ಕಾಯ್.
ಆಮ್ಚಾ ಪತ್ರಾಂನಿ ಛಾಪೊನ್ ಯೆಂವ್ಚಾ ಕೊಂಕ್ಣೆಂತ್ ಆಸ್ಚ್ಯೊ ಚುಕಿ ತರೀ ಪಳೆಯಾ, ’ಲುಸಿ’ ಆಸ್ಚೆಂ ’ಸಿಲು’ ಕರ್ತಾತ್, ’ಪೂತ್’ ಆಸ್ಚಾಕ್ ’ಭುತ್’ ಕರ್ತಾತ್. ದುಸ್ರೆಂ; ಸಾಹಿತ್ಯಾಚೆಂ ತಾಳ್ಮೂಳ್ ಕಳಿತ್ ನಾತ್ಲ್ಲೆ ಸಯ್ತ್ ಸಂಪಾದಕ್, ಕೊಣ್ ಎಕ್ಲೊ ತೊಟಾಚೆಂ ಕಾಮ್ ಕರ್ಚೊ ಸಂಪಾದಕ್ (ತಾಚ್ಯಾ ಮತಿಂತ್ ಸಾಹಿತ್ಯ್ ಮ್ಹಳ್ಯಾರ್ ಕೊಸ್ಚೆಂ, ಖೊಂಡ್ಚೆ ಆನಿ ಪುರ್ಚೆಂ ಮಾತ್ರ್ - ದೆಕುನ್ ಕೊಣಾ ಕೊಣಾಕ್ ಪುರ್ಚೆಂ, ಕೊಣಾ ಕೊಣಾಕ್ ಖೊಂಡ್ಚೆಶಿವಾಯ್ ದುಸ್ರೆಂ ಕಾಂಯ್ ತಾಕಾ ಕಳಿತ್ ಆಸಾನಾ). ಅನಿ ಕೊಣಾಕ್ ಸಾರ್ಕೆಂ ಕೊಂಕ್ಣೆಂತ್ ಏಕ್ ವೋಳ್ ಬರಂವ್ಕ್ ಯೇನಾಂ ತರ್ಯೀ ತೊ ಸಂಪಾದಕ್. ಆನಿ ಕೊಣ್ ತಾಂತ್ಯಾಚ್ಯಾ ಕರ್ಲಾಂತ್ಲೆ ಭಾಯ್ರ್ ಪಡ್ಲ್ಯಾತ್ ಮಾತ್ರ್ ತರ್ ಖರಿ ಪ್ರತಿಭಾ ಆಸ್ಚಾಂಕ್ ಹೆರ್ ವಿಧ್ಯಾ ಕಳಿತ್ ನಾಂತ್. ಆತಾಂ ಎಕಾ ಪತ್ರಾಚಾ ಸಂಪಾದಕಾಚೆಂ ಹೆಂ ಹಣೆಬರಾಪ್ ತರ್ ಬಾಕಿಚೆಂ ಕಿತೆಂ ಮ್ಹಣ್ಚೆಂ ಮ್ಹಳ್ಳೆಂ ತುಮಿಂಚ್ ಸಾಂಗಾ.
ಸಾಯ್ಟಾಂ: ಆಯ್ಲೆವಾರ್ ಸಾಯ್ಟಾಂ, ಕೊಂಕ್ಣಿ ಸಾಯ್ಟಾಂ/ಅಂತರ್ಜಾಳಿ ಜ್ಯೊರಾನ್ ಪರ್ಜಳ್ತಾತ್, ಎದೊಳ್ ಮ್ಹಣಾಸರ್ ಆಫಿಸಾಂತ್ ವೇಳ್ ಆಸ್ತಾನಾ ಕೊಣಾ ಕೊಣಾಲಾಗಿಂ ಕೊಣಾ ಕೊಣಾಚ್ಯೊ ಖಬ್ರೊ ಉಲವ್ನ್ ವೇಳ್ ಪಾಶಾರ್ ಕರ್ಚ್ಯಾಂಕ್ ಆತಾಂ ಹಿ ಏಕ್ ಪರ್ಯಾಯ್ ವಾಟ್. ಕೊಣಾಕ್ ಕೊಣಾಚ್ಯೊ ತಸ್ವೀರ್ಯೊ ಆಯ್ಲ್ಯಾತ್, ಆಜ್ ಕೊಣ್ ಮೆಲಾ, ಕೊಣಾಚೆಂ ಕಾಜಾರ್, ಕೊಣಾಚೊ ಜಲ್ಮಾದೀಸ್, ಕೊಣಾಚೆ ಕೇಸ್ ಕಿತ್ಲೆ ಜಡ್ಲ್ಯಾತ್, ಕೊಣಾಚೆಂ ಪೋಟ್ ಕಿತ್ಲೆಂ ಉಭಾರ್ ಜಾಲಾಂ ಮ್ಹಳ್ಳೆಂ ಪಳೆಂವ್ಚಿ ಆತುರಾಯ್. ಆನಿ ಕೊಣಾಕ್ ಆಮ್ಚಿ ತಸ್ವೀರ್ ಖಂಚ್ಯಾ ಖಂಚ್ಯಾ ಸಾಯ್ಟಾಂನಿ ಆಯ್ಲ್ಯಾ ಮ್ಹಳ್ಳೆಂ ತಿಳ್ಚಿ ಸವಯ್. ಆನಿ ಸಾಹಿತ್ಯಾಚೆಂ ತಾಳ್ ಮೂಳ್ ಕೊಣಾಕ್ ಪಡೊನ್ ಗೆಲಾಂ? ಹೆರ್ ಸಾಯ್ಟಾಂಕ್ ಸೊಡ್ಯಾಂ - ಕೊಂಕ್ಣಿ ಸಾಹಿತ್ಯ್ ಪರ್ಗಟ್ಚಾ ಸಾಯ್ಟಾಂಕ್ ಧರ್ಯಾಂ, ಹಾಂಚಿ ಸಾಹಿತಿಕ್ ಅರ್ಹತಾ ಕಿತ್ಲಿ? ಹಾಂಚೆಲಾಗಿಂ ಕೊಂಕ್ಣಿ ಭಾಸೆಚಿ ಕಿತ್ಲಿ ಜಾಣ್ವಾಯ್ ಆಸಾ? ಹೆಂ ಹಾಂವ್ ಸಾಂಗ್ಚೆಪ್ರಾಸ್ ತುಮಿಂಚ್ ಮನ್ ಕರ್ನ್ ವೆವೆಗ್ಳ್ಯಾ ಸಾಯ್ಟಾಂನಿ ಪರ್ಗಟ್ ಜಾಂವ್ಚೆಂ ಸಾಹಿತ್ಯ್, ತಾಂತುಂ ವ್ಹಾಪಾರ್ ಜಾಂವ್ಚಿ ಭಾಸ್ ಪಳೆಯಾ, ಆಮ್ಚಾ ಚಡ್ತಾವ್ ಸಾಹಿತಿಂಕ್ (ಮಹಾನ್ ಮ್ಹಣ್ ಚಿಂತ್ಚಾ ಬರಯ್ಣಾರಾಂಕ್ ಸಯ್ತ್) ಸಾರ್ಕಿ ಕೊಂಕ್ಣಿ ಬರ್ಪಾ ರೀತ್ ಕಳಿತ್ ನಾ. ಸಾಹಿತ್ಯ್ ಮ್ಹಳ್ಯಾರ್ ಥೊಡೆಂ ಥಂಯ್ಚೆಂ, ಥೊಡೆ ಅನಿ ಖಂಚೆಂಗೀ ಚೋರ್ನ್, ಫಾರ್ನ್ ಅಪ್ಲ್ಯಾ ನಾಂವಾರ್ ಪರ್ಗಟ್ ಕರ್ನ್ ಶೆಂಕಾರೆಂ ಫುಲಂವ್ಚೆಂ ನ್ಹಂಯ್.
ಮ್ಹಜೊ ಬಾಬ್ ಜಿವಂತ್ ಆಸ್ತಾನಾ ಸಾಂಗ್ತಾಲೊ, ಆಧ್ಲ್ಯಾ ಕಾಳಾರ್, ಎಕಾ ಪತ್ರಾಚ್ಯಾ ಛಾಪ್ಕಾನ್ಯಾಂತ್ ಕಾಮ್ ಕರ್ನ್ ಆಸ್ಚಾಂಕ್ ಸಯ್ತ್ ಸುಡಾಳ್ ಕೊಂಕ್ಣಿ ಬರ್ಪಾರೀತ್ ಕಳಿತ್ ಆಸ್ತಾಲಿ. ಪುಣ್ ಆಜ್ ಸಾಂಪಾದಕಾಂಕ್ಚ್ ಸಾರ್ಕಿ ಕೊಂಕ್ಣಿ ಕಳಾನಾ ತರ್ ಹೆರಾಂಚಿ ಗತ್ ವಿಸರ್ನ್ ಸೊಡ್ಯಾಂ. ಆನಿ ಅಸಲ್ಯಾ ಖಾಸ್ತಾಚ್ಯಾ ಪತ್ರಾಂಕ್ ಕೊಂಕ್ಣಿ ಲೊಕಾಂನಿ ಖಂಚ್ಯಾ ಕರ್ಮಾಕ್ ಪಾಟಿಂಬೊ ದಿಂವ್ಚೊ ಮ್ಹಳ್ಳೆಂ ತುಮಿಂಚ್ ಸಾಂಗಾ.
ಕವಿತಾಂ: ಸತ್ ಸಾಂಗ್ಚೆಂ ತರ್ ಆಜ್ಕಾಲ್ ಚಡ್ತಾವ್ ಕವಿತಾ ವಾಚ್ತಾಂ ರಾಗ್, ನಿರಾಶಾ ಯೆಂವ್ಚ್ಯಾಕೀ ಭಿರ್ಮತ್ ದಿಸ್ತಾ, ಭಿರ್ಮತ್ ತ್ಯಾ ಕವಿಂಚಿ ಆನಿ ತಾಂಚ್ಯಾ ತಕ್ಲೆರ್ ಭರ್ಲ್ಲ್ಯಾ ಶೆಣಾಚಿ, ಭಿರ್ಮತ್ ತೆಂ ಛಾಪ್ಚ್ಯಾ/ಛಾಪ್ಲ್ಲ್ಯಾ ಸಂಪಾದಕಾಚೆರ್. ಪುಣ್ ಏಕ್ ಸತ್ ಗಜಾಲ್ ಹಿಕೀ - ಜರೀ ತರೀ ಕೊಣ್ಯೀ ಎಕ್ಲೊ ಸಂಪಾದಕ್ ಪರ್ಗಟ್ ಕರಿನಾ ತರ್ ತಿಚ್ಚ್ ಕವಿತಾ ಪರ್ಗಟ್ ಕರ್ಚೆ ಹೆರ್ ಸಂಪಾದಕ್ ಆಸಾತ್. ಹೆಂ ರುಜು ಕರುಂಕ್ ಕಾಂಯ್ ತ್ರಾಸ್ ನಾಂತ್, ತುಮಿಂಚ್ ಚಾರ್ ವೊಳಿ ಬರಯಾ (ಕಿತೆಂಯ್ ಬರಯಾ) ಆನಿ ತೀನ್-ಚ್ಯಾರ್ ಸಾಯ್ಟಾಂಕ್ ಧಾಡಾ, ಹಾಂವ್ ರಗ್ತಾನ್ ಬರಯ್ತಾಂ, ಉಣ್ಯಾರ್ ಉಣೆಂ ದೋನ್ ಸಾಯ್ಟಾಂನಿ ತರ್ಯೀ ತಿಂ ಪರ್ಗಟೊನ್ ಯೆತೆಲಿಂ.
ಜಾನಪದ್/ನಾಟಕ್/ಕಲಾ: ಆಮ್ಚೆಂ ಜಾನ್ಪದ್ ಆಜ್ ಖಂಚ್ಯಾ ಪಾಂವ್ಡಾರ್ ಆಸಾ? ಕೊಣಾಕ್ಯೀ ಪಡೊನ್ ಗೆಲಾಂ? ಕಾಂಯ್ ವರ್ಸಾಕ್ ಏಕ್ ಪಾವ್ಟಿಂ ಗುಮ್ಟಾಂ ಗುಮ್ಟಾಂ ಮ್ಹಣ್ ಬೊಬಾಟ್ಲ್ಯಾರ್ ಆಮ್ಚೆಂ ಜಾನ್ಪದ್ ವ್ಹಾಡ್ತಾ? ಆಯ್ಚಾ ಕೊಂಕ್ಣಿ ಪಿಳ್ಗೆಕ್ ಕೊಂಕ್ಣಿ ಜಾನ್ಪದಾವಿಶಿಂ ಜಾಣ್ವಾಯ್ ದಿಂವ್ಚಿಂ ಪತ್ರಾಂ ಏಕ್ ತರೀ ಆಸಾತ್? ಆಮ್ಚಾ ಸರ್ವ್ ಪತ್ರಾಂನಿ ದೇವ್ ಧರ್ಮಾವಿಶಿಂ, ಸಾಂತಾಂ ಭಕ್ತಾಂವಿಶಿಂ ಕಿತ್ಲೇಂಯ್ ಆಸಾ, ಸತ್ ಸಾಂಗ್ಚೆಂ ತರ್ ಶೆರ್ಮಾಂವಾಚಿಂ ದೊದೋನ್ ಅಂಕಣಾಂ ಸಯ್ತ್ ಪತ್ರಾಂನಿ ಯೆತಾತ್, ಪುಣ್ ಜಾನ್ಪದಾವಿಶಿಂ ಆಮ್ಚಾ ಪತ್ರಾಂಕ್/ಸಾಯ್ಟಾಂಕ್ ಕಿತ್ಲಿ ಮಾಹೆತ್ ಆಸಾ? ಸೊಧುಂಕ್ ಗೆಲ್ಯಾರ್ ಚಾ.ಫ್ರಾ ದೆ’ಕೋಸ್ತಾ ಎಕ್ಲೊ ಪ್ರಭುದ್ದ್ ನಾಟಕಿಸ್ತ್ ಮ್ಹಾಕಾ ದಿಸ್ತಾ, ತಾಚ್ಯಾ ಮಟ್ಟಾಚೆ ನಾಟಕಿಸ್ತ್ ಆಜ್ ಕಿತ್ಯಾಕ್ ನಾಂತ್?. ಕಿತ್ಯಾಕ್ ನಾಟಕ್ ಪ್ರತಿಭಾ ಆಮ್ಚಿ ಕುರ್ವೊನ್ ವೆತಾ? ಹಾಂಗಾಸರ್ಯೀ ಉತಳ್ ಚಿಂತ್ಪಾಚೆ, ಅಶ್ಲೀಲ್ ಸಂಭಾಶಣಾಚೆ, ಪೊಜ್ಡ್ಯಾ ಉತ್ರಾಂಚೆ ನಾಟಕ್ ಫಕತ್ತ್ ಪೊಯ್ಶ್ಯಾಂಚ್ಯಾ ಭಳಾನ್ ಪ್ರಚಾರ್ ಚಲ್ತಾ, ಆಮ್ಚೊ ನಾಟಕ್ ಧಾ ವರ್ಸಾಂ ಥಾವ್ನ್ ಖೆಳಯ್ಲಾ, ವೀಸ್ ವರ್ಸಾಂ ಥಾವ್ನ್ ಖೆಳಯ್ಲಾ, ತೀಸ್ ವರ್ಸಾಂ ಥಾವ್ನ್ ಖೆಳಯ್ಲಾ ಮ್ಹಣ್ ದಾಂಗ್ರೊ ಮಾರ್ತಾತ್. ಪುಣ್ ಖರಿ ಪ್ರತಿಭಾ ಆಸ್ಚೆ ಅಜೂನ್ ಕೊನ್ಶ್ಯಾರ್ ಆಸಾತ್.
ಸಂಗೀತ್: ಆಮ್ಚೆಂ ಸಂಗೀತ್ ಆಜ್ ಕಾಂಯ್ ಸಾಹಿತ್ಯಾ ಥಾವ್ನ್ ವೆಗ್ಳೆಂ ನ್ಹಂಯ್, ಕೊಂಕ್ಣಿ ಕೊವ್ಳ್ಯೊ ಗಾಂವ್ಕ್ ಆಮ್ಕಾಂ ’ಬಾಲಿ ಸಾಗು’ ಜಾಯ್ ವಾ ’ಬ್ರಾಯನ್ ಆಡಮ್ಸ್’ ಜಾಯ್, ಆಮ್ಚೆ ಕೊಂಕ್ಣಿ ಗಾವ್ಪಿ ಮೆಲ್ಯಾತ್ ವಾ ಆವ್ರಾಂತ್ ವ್ಹಾಳೊನ್ ಗೆಲ್ಯಾತ್? ಪುಣ್ ತಾಂಚ್ಯೊ ಕೆಸೆಟ್ಯಾಂಕ್ ಲಾಖಾಂನಿ ಸ್ಪೋನ್ಸರ್ ಲಾಭ್ಲೆ ತರ್ ತಿ ಕೊವ್ಳಿ ಹಿಟ್/ಸುಪರ್ಹಿಟ್, ಕೊಂಕ್ಣೆಂತ್ ಏಕ್ ಅಪೂರ್ವ್ ಧಾಖ್ಲೊ. ಹಾಂಚೆವಿರೋದ್ ಸರ್ವಾಂನಿ ಪಾಟ್ಲ್ಯಾನ್ ಉಲಯ್ಜಾಯ್ ಶಿವಾಯ್ ಸತ್ ಸಾಂಗೊಂಕ್ ಗೆಲ್ಯಾರ್ ಮಾರಗ್ ಪಡಾತ್. ಹಾಂಚೆ ಮಧೆಂ ಥೊಡ್ಯಾಂಕ್ ಪದಾಂನಿ ತಾಳೊ, ಆವಾಜ್, ಉತ್ರಾಂ, ಸಾಹಿತ್ಯ್, ಗೀತ್, ಸಂಗೀತ್ ಮ್ಹಳ್ಳೆಂ ಕಳಿತ್ ನಾ. ಇಗರ್ಜೆಂತ್ ಕೊಯರಾನಿ ಗಾಯ್ಲೆಲಿಂ ವೆದಿಚೆರ್ ಚಡ್ಲಿಂ ಆನಿ ಜಾಲಿಂ ಕೊಂಕ್ಣೆಂತ್ಲಿಂ ರಫಿ, ಕಿಶೋರ್, ಲತಾ, ಆಶಾ. ಆನಿ ಥೊಡ್ಯಾಚ್ ವರ್ಸಾಂನಿ ವಾ ಮಯ್ನ್ಯಾಂನಿ ಹಿಂಚ್ ಕೊಂಕ್ಣಿ ಕೊಗುಳ್ಯೊ, ಕೊಂಕ್ಣಿ ಮೈನಾ, ಕೊಂಕ್ಣೆಚೆ ದಾಕ್ಡ್ಯಾಚಿ ಗಾವ್ಪಿ/ಗಾವ್ಪಿಣ್.
ಲೋಕ್: ಆಮ್ಚೊ ಲೋಕ್ ಖರೆಂಚ್ ಜಾವ್ನ್ ಅಪ್ಲೆಂ ಅಸ್ತಿತ್ವ್ ಹೊಗ್ಡಾವ್ನ್ ಜಿಯೆತಾ, ಅಮಿ ಕೊಂಕ್ಣೆ ಮ್ಹಣೊಂಕ್ ಕಸಲಿಗೀ ಲಜ್ ತಾಂಕಾಂ. ಕಾಂಯ್ ಏಕ್ ದೋನ್ ಸಬ್ಧ್ ಇಂಗ್ಲಿಶ್ ಶಿಕ್ಲಿಂ ತರ್ ಜಾಲೆ ಫಿಂರ್ಗಿ ಗುಲಾಮ್, ಉಪ್ರಾಂತ್ ’ಈಟ್ ಕೊಕೊ ಪುತಾ’, ’ವೇರ್ ಪೋಪ್?’, ’ವೇರ್ ಮೋಮ್’ ಶಿವಾಯ್ ಹೆರ್ ಕಿತೆಂಚ್ ಆಮ್ಚಾ ಲೊಕಾಕ್ ನಾಕಾ. ಅಶೆಂ ಮ್ಹಣ್ ಸಕ್ಕಡ್ ತಸೊ ನ್ಹಂಯ್. ಹಿ ಪರಿಗತ್ ಆಯ್ಚಾ ದಿಸಾಂನಿ ಮೊಸ್ತ್ ಉಣಿ ಜಾವ್ನ್ ಆಯ್ಲ್ಯಾ ತರ್ಯೀ, ಆರ್ಧೊ ಕೊಳ್ಸೊ ಆಸ್ಚಾಂಕ್ ಮಾತ್ರ್ ಅಜೂನ್ ತಿಚ್ಚ್ ಬೊಟ್ಲೆರ್ ಇಂಗ್ಲಿಶ್ ರಾಜ್ವಟ್ಕಿ ಚಲಯ್ತಾ.
ಸತ್ ಉಲಯ್ಲ್ಯಾರ್ ಕೊಣಾಕ್ ದುಖೊಂಕ್ ಆಸಾ ಮ್ಹಳ್ಳ್ಯಾ ಭಿಂಯಾನ್ ಆಮಿ ಉಲಯ್ನಾಸ್ತಾಂ ರಾವ್ಯೆತಾ, ಪುಣ್ ತಾಂತುಂ ಲುಕ್ಸಾಣ್ ಜಾಂವ್ಚಿ ಕೊಂಕ್ಣೆಚಿ ಮ್ಹಳ್ಳೆಂ ನಖ್ಖೆಂ.
ಹ್ಯಾ ಸರ್ವ್ ಪರಿಗತೆಂತ್ ಖರೆಂಚ್ ಜಾವ್ನ್ ವಿಚಾರ್ ಮಂಥನ್ ಗರ್ಜೆಚೆಂ, ಸಾಹಿತ್ಯಾಕ್ ಲಗ್ತಿ ಜಾಲ್ಲ್ಯಾ ಸಂಸ್ಥ್ಯಾಂನಿ ಸಾಹಿತ್ಯಾಚೆರ್, ಕಲಾಕ್ ಲಗ್ತಿ ಜಾಲ್ಲ್ಯಾ ಸಂಸ್ಥ್ಯಾಂನಿ ಕಲೆಚೆರ್ ತಶೆಂಚ್ ಸಂಗೀತಾಕ್ ಲಗ್ತಿ ಜಾಲ್ಲ್ಯಾ ಸಂಸ್ಥ್ಯಾಂನಿ ಸಂಗೀತಾಚೆರ್ ಜರ್ ಸರಾಗ್ ರಿತಿರ್ ವಿಚಾರ್ ಮಂಥನ್ ಕೆಲೆಂ ತರ್ ಕೊಣಾಯ್ಕ್ಯೀ ಬದ್ಲುಂಕ್ ಸಾಧ್ಯ್ ನಾ ತರ್ಯೀ, ಬರೆಂ ಆನಿ ವಾಯ್ಟ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆವಿಶಿಂ ಸಮ್ಜಾಯಿಲ್ಲೆಪರಿಂ ಜಾಯ್ತ್.
- ಎಮ್ಮೆಚ್.
ಕುಂಡೊ ವಿಕ್ತೆಲ್ಯಾಂಚ್ಯಾ ಆಂಗ್ಡಿ ಬಾಗ್ಲಾರ್....
ಸಾಹಿತ್ಯಾಚೆಂ ಮಾವ್ಲ್ಯಾ ಮಾಪನ್ ಲೊಕಾಮೊಗಾಳಾಯೆಂತ್ ಕರಾತ್ ಮ್ಹಣ್ ಕೊಣ್ ಬೆಕೂಫ್ ಮ್ಹಣ್ತಾ? ಆವಯ್ಚೊ ಗರ್ಭ್ ಸಯ್ತ್ ಬಾಡ್ಯಾಕ್ ಮೆಳ್ಚಾ ಆಯ್ಚಾ ಕಾಳಾರ್ ಲೊಕಾಮೊಗಾಳಾಯ್ ಸುಲಾಭಾಯೆನ್ ಮೊಲಾಕ್ ಘೆವ್ಯೆತ್. ಆಪ್ಲಿ ತಸ್ವೀರ್ ಘಾಲ್ನ್, ಕೆಲೆಂಡರಾಂ ಛಾಪುನ್ ಸಮ್ಮೆಳಾನಾನಿಂ ವಾಂಟುನ್, ಪ್ರಶಸ್ತಿ ಪುರಸ್ಕಾರಾಖಾತಿರ್ ಲಾಬಿಯೊ ಕರುನ್- ಲೊಕಾಮೊಗಾಳ್ ಜಾಂವ್ಚೆಂ ಕಾಂಯ್ ಕಶ್ಟಾಂಚೆಂ? ತಶೆಂ ಪಳಂವ್ಕ್ ಗೆಲ್ಯಾರ್ ಕವಿ ಮೆಲ್ವಿನ್ ಲುದ್ರಿಗಾ ಪ್ರಾಸ್ ಜೆ.ಬಿ.ಸಿಕ್ವೇರಾ ಚಡ್ ಲೊಕಾಮೊಗಾಳ್. ತೊ ಸಾಹಿತ್ ಸಮ್ಮೆಳಾನಾಚೊ ಅಧ್ಯಕ್ಶ್ ಸಯ್ತ್ ಜಾಲಾ. ತಾಕಾ ಕೇಂದ್ರ ಸಾಹಿತ್ ಅಕಾಡೆಮಿಚಿ ಪ್ರಶಸ್ತಿಯ್ ಮೆಳ್ಳ್ಯಾ. "ಕವಿರಾಯ್" ಬಿರುದ್ ಸಯ್ತ್ ಲಾಬ್ಲಾಂ. ಹ್ಯಾ ಶಿವಾಯ್ ಮೆಳ್ಲ್ಲ್ಯಾ ಲ್ಹಾನ್ ವ್ಹಡ್ ಬಿರುದಾಂಕ್ ಪುರಾಸ್ಕಾರಾಂಕ್ ಲೇಕ್ ನಾ. ತಶೆಂ ಮ್ಹಣ್ ತಾಚೆಂ ಕಾವ್ಯೆಂ ಕಿತೆಂ ಮೆಲ್ವಿನ್ ಲುದ್ರಿಗಾಚ್ಯಾ ಕವಿತೆಂಕ್ ಸಮಾಸಮ್? ದುಡುಯೀ ಲಾಬಿಯೀ ದೊನ್ಯ್ ನಾತ್ಲ್ಲ್ಯಾಂಕ್ ಆಜ್ ಕೊಣ್ಯ್ ಪ್ರಶಸ್ತಿ ಪುರಾಸ್ಕಾರ್ ದೀನಾ. ತಾಕಾ ಲೊಕಾಮೊಗಾಳಾಯ್ಯಿ ಆಸಾನಾ. ದುಡು, ಪೆನ್ನ್, ಕಾಗಾತ್ ಆನಿ ವೇಳ್ ಆಸಾ ಮ್ಹಣ್ ಲೊಕಾಮೊಗಾಳ್ ಜಾಲ್ಲ್ಯಾನಿಂ ಬರಯಿಲ್ಲೆಂ "ಶೆಣ್" ಕಿತ್ಲೆ ದೀಸ್ ಸೊಸುನ್ ವರ್ಚೆಂ? ಹೊ "ಕುಂಡೊ" ಮ್ಹಣ್ಚೆಂ ಧಯ್ರ್ ಕೊಣೆ ತರೀ ಘೆಜೆ.
ಕನ್ನಡಾಚ್ಯಾಚ್ ಸಂದರ್ಬಾರ್ ಪಳಯ್ಲ್ಯಾರ್, ಆಯ್ಲೆವಾರ್ ದೆವಾಧಿನ್ ಜಾಲ್ಲೊ ಕನ್ನಡಾಚೊ ಶ್ರೇಶ್ಟ್ ಮಟ್ವ್ಯಾ ಕಾಣಿಯಾಂಗಾರ್ ಶ್ರೀ ರಾಘವೇಂದ್ರ ಕಾಸನೀಸ. ತಾಣೆಂ ಆಪ್ಲ್ಯಾ ಅಖ್ಖ್ಯಾ ಜಿಣಿಯೆಂತ್ ಮೆಜೂನ್ ಬರಯಿಲ್ಲೊ ಕಾಂಯ್ ಪಂಚ್ವೀಸ್ ಕಾಣಿಯೊ. ಮ್ಹಳ್ಯಾರ್ ಲಗ್ಬಗ್ ವರ್ಸಾಕ್ ಏಕ್ ಕಾಣಿ. ತರ್ಯಿ ಹ್ಯಾ ಶತಮಾನಾಚ್ಯೊ ಬರ್ಯಾಂತ್ಲ್ಯೊ ಬರ್ಯೊ ಶೆಂಭೊರ್ ಕಾಣಿಯೊ ವಿಂಚುಂಕ್ ಗೆಲ್ಯಾರ್ ತಾಚ್ಯೊ ಉಣ್ಯಾರ್ ಉಣೆ ಧಾ ಕಾಣಿಯೊ ದಾಕಲ್ ಜಾತಾತ್. ತಶೆಂ ಮ್ಹಣ್ ತೊ ಕೆನ್ನಾಂಯ್ ಸಮ್ಮೆಳಾನಾಚೊ ಅಧ್ಯಕ್ಶ್ ಜಾಂವ್ಕ್ ನಾ. ತಾಕಾ ಖಂಚಿಯ್ ಉಂಚ್ಲಿ ಪ್ರಶಸ್ತಿ ಮೆಳೊಂಕ್ ನಾ. ಸಬಾರಾಂಕ್ ಹೊ ಕಾಣಿಯಾಗಾರ್ ಆಸಾ ತೇಂಚ್ ಕಳಿತ್ ನಾ. ತರೀ ವಿಶ್ವ್ ವಿಧ್ಯಾಲಯಾಂತ್ ತಾಚಿ ಏಕ್ ಕಾಣಿ ಶಿಕಾನಾ ತರ್ ತೆಂ ಶಿಕಾಪ್ ಅಧುರೆಂ. ಅಶೆಂ ಕಿತ್ಯಾಕ್?
ಚಾ.ಫ್ರಾ ಜಿವಂತ್ ಆಸ್ತಾನಾ ತಾಚ್ಯಾ ಸಾಹಿತ್ಯಾಚೆಂ ಮೊಲ್ ಗೊಂಯ್ಕಾರಾಂಕ್ ಕಳಿತ್ ಅಸ್ಲ್ಲೆಂ. "ಕುಂಡೊ" ಖಾವ್ನ್ ಸವಯೆರ್ ಪಡ್ಲ್ಲ್ಯಾ ಮಂಗ್ಳುರ್ಗಾರಾಂಕ್ ತೆಂ ಕಳೊಂಕ್ ಚಾಫ್ರಾನ್ ಮೊರಾಜೆ ಪಡ್ಲೆಂ. ಹೊ ವಿಪರ್ಯಾಸ್.
ಮಂಗ್ಳುರಾಂತ್ ಇಸ್ಕೊಲಾನಿಂ ಕೊಂಕ್ಣಿ ರಿಗ್ಲ್ಯಾ ಮ್ಹಣ್ ಹಾಂಕಾರಾನ್ ಫುಗ್ಲ್ಯಾಂವ್. ಪುಣ್ ಖರೆಂ ಸಾಂಗ್ತಾಂ ಆಜ್ ಕೊಂಕ್ಣಿ ಶಿಕ್ಲ್ಲಿಂ ಭುರ್ಗಿಂ ಜೆನ್ನಾ ಡಿಗ್ರಿಕ್ ಪಾವ್ತಲಿಂ ತೆನ್ನಾಂ ತಾಂಕಾಂ ಶಿಕಂವ್ಕ್ ಪಾಠ್ಕ್ರಮಾ ಭಿತರ್ ವಾ ಭಾಯ್ರ್, ಆಮ್ಚ್ಯಾ ಬರವ್ಪ್ಯಾಂಚಿ ಏಕ್ ಲಾಯೆಕ್ ಕವಿತಾ ಮೆಳ್ಚಿನಾ. ಮಾಪ್ಳ್ಯಾಕ್ ಶಿರಾಪ್, ರೊಸಾಚಿ ವರ್ದಿ, ಕ್ರಿಕೆಟ್ ಕಮೆಂಟ್ರಿ, ಆನಿ ಮಾಲಾಡಿ ವಯಾಗ್ರಾ- ಶಿಕಂವ್ಕ್ ಗೆಲ್ಯಾರ್ ಆಮ್ಚಿಂಚ್ ಭುರ್ಗಿಂ ಆಮ್ಚ್ಯಾ ಮುಸ್ಕಾರಾಕ್ ಥುಕ್ಚಿಂ ನಾಂತ್ಗಿ? ಹೊ ಭೊಂಗೊಸ್ತಳ್ ನ್ಹಂಯ್ ತರ್ ಆನಿ ಕಿತೆಂ? ಕುಂಡೊಚ್ ಉಂಡೊ ಮ್ಹಣ್ ವಾಡ್ಲ್ಯಾರ್ ನೀಜ್ ಉಂಡ್ಯಾಚಿ ರೂಚ್ ಚಾಕಂವ್ಚಿ ಕೊಣೆಂ?
ಸಾಹಿತ್ಯಾಂತ್ ಕುಂಡೊ ಆಯ್ಚೊ ವಿಶಯ್ ನ್ಹಂಯ್. ಕಾನಡಿ ಸಾಹಿತ್ಯಾಚಾ ಸಂಧರ್ಬಾರ್ "ಬೂಸಾ" ಗಾಜ್ಲಲೆಂ ಪ್ರಕರಣ್. ಕಾಂಯ್ ವರ್ಸಾ ಆದಿಂ ಕೊಂಕ್ಣೆತ್ಯೀ ಪ್ರಗತಿಪರ್ ಚಿಂತ್ಪ್ಯಾಂನಿ ಮೆಳೊನ್ ಉತಳ್ ಸಾಹಿತ್ಯಾಕ್ "ಸಾರೆಂ" ಮ್ಹಳ್ಳೆಂ. ತೆನ್ನಾಂಯ್ ಲೊಕಾಮೊಗಾಳಾಂಕ್ ದುಕ್ಲ್ಲೆಂ, ಪೊಡ್ಕಾಣಿ ಸುರು ಜಾಲ್ಲಿ. ಮಾಗಿರ್ ಭಾಯ್ರಿ ಘೆತ್ಲ್ಲಿ.
ಪುಣ್ ಹೆಂ ಸಂವಾದ್ ಕೊಂಕ್ಣೆಂತ್ಲ್ಯಾ "ಕುಂಡೊ" ಆನಿ "ಉಂಡೊ" ಹಾಂಚೆ ಮಧ್ಲೊ ತಫಾವತ್ ಲೊಕಾಂಕ್ ಕರುಂಕ್ ಶಿಕಂವ್ಚೆ ತಸಲೊ ಜಾಯ್ಜಯ್ ಮ್ಹಳ್ಳೆಂ ಮ್ಹಜೆಂ ಸುಚನ್, ಹ್ಯಾ ಖಾತಿರ್ ಸರ್ವ್ ಕವಿಂನಿ ಫುಡ್ಕಾಯ್ ಘೆಂವ್ಚಿ.
- ಎಚ್ಚೆಮ್.
ದಾಯ್ಜ್ ಕೊಂಕ್ಣಿ ಕಾರ್ಭಾರಿ - ಮಾರ್ಕ್ ಡೆನಿಸಾಬ್.
ಸಾಮಾಜಿಕ್ ಮುಖೆಲಿ ಆನಿ ಉದ್ಯಮಿ ಮಾನೆಸ್ತ್ ಮಾರ್ಕ್ ಡೆನಿಸ್ ಡಿ’ಸೊಜಾಚಿ ದಾಯ್ಜ್ ಕೊಂಕ್ಣಿ ಕಾರ್ಭಾರಿ ಮ್ಹಣ್ ಮಾನ್ ಕರ್ನ್ ತಾಂಚಿಂ ಚಿಂತ್ನಾಂ ಆನಿ ಭೊಗ್ಣಾಂ ಪ್ರಕಟ್ ಕರ್ನ್ ದಾಯ್ಜಾನ್ ವರ್ತೆಂ ಕಾಮ್ ಕೆಲಾಂ. ಡೆನಿಸಾಮಾಚಿಂ ಉತ್ರಾಂನಿ ಹರ್ಯೆಕಾ ಕೊಂಕ್ಣಿ ಲೊಕಾಕ್ ಸೂತ್ರಾಂ ಆಸಾತ್. ವೆಕ್ತಿಚಾ ಸಮಾಜಿಕ್ ಜಾವಾಬ್ದಾರೆವಿಶಿಂ ತಾಚೆ ವಿಚಾರ್ ಸಮಾಜಿಕ್ ಜಾಗ್ ಉಟಯ್ತಾತ್. ಡೆನಿಸಾಮಾನ್ ಜೆಂ ಕಿತೆಂ ಸಾಂಗ್ಲಾಂ ತೆಂ ಕಾರ್ಯಾಂನಿ ದಾಕವ್ನ್ ದಿಲಾಂ. ಕಸಲೊಚ್ ಪ್ರಚಾರ್ ಆಶೆನಾಸ್ತಾಂ ಹೆರಾಂಕ್ ಆಪ್ಲಿ ಕುಮೊಕ್ ಆನಿ ಮಾರ್ಗದರ್ಶನ್ ತೆ ವೆವೆಗ್ಳ್ಯಾ ಸಂಘ್-ಸಂಸ್ಥ್ಯಾಂಕ್ ಆನಿ ಗರ್ಜೆವಂತಾಂಕ್ ದೀವ್ನ್ಂಚ್ ಆಸಾತ್. ತಾಚಿ ಪತಿಣ್ ಮಾನೆಸ್ತಿಣ್ ಲೆನ್ನಿ ಡಿ’ಸೋಜಾ ಆಪ್ಲ್ಯಾ ಪತಿಚಾ ಸಾಮಾಜಿಕ್ ವಾವ್ರಾಕ್ ಸಂಪೂರ್ಣ್ ಸಹಕಾರ್ ದೀವ್ನ್ ಆಸಾ. ತಾಚ್ಯಾ ಸಾಧ್ಯಾ, ಮೊಗಾಳ್ ಪುಣ್ ಪರ್ಜಳಿಕ್ ವಕ್ತಿತ್ವಾಚೊ ಪ್ರಭಾವ್ ಸಭಾರಾಂಚೆರ್ ಪಡ್ಲಾ. ಮ್ಹಜೆರ್ಯೀ ಬರೊಚ್ಚ್ ಪಡ್ಲಾ. ಡೆನಿಸಾಮಾಕ್ ಸರ್ವ್ ಬರ್ಯಾಂತ್ಲೆಂ ಬರೆಂ ಮಾಗ್ತಾಂ ಆನಿ ತಶೆಂಚ್ ಅಸಲ್ಯಾ ಮೊತಿಯಾಕ್ ದಾಯ್ಜಾಚೆರ್ ಸಜಯಿಲ್ಲ್ಯಾ ದಾಯ್ಜಾಕ್ ಪ್ರತ್ಯೇಕ್ಪಣಿಂ ವಾಯ್ಲೆಟ್ ಬಾಯೆಕ್ ಮ್ಹಜೆ ಅಭಿನಂದನ್.
"ದಾಯ್ಜ್" ಕೊಂಕ್ಣಿ ಸಾಹಿತ್ಯಾಚೆಂ ತುಪೆಂ ಜಾವ್ನ್ ಭರೊನ್ ಯೆಂವ್ಚೆಂ ಪಳೆತಾನಾ ಸಂತೊಸ್ ಆನಿ ಅಭಿಮಾನ್ ಭಗ್ತಾ. ಬರ್ಪಾಂಚೆಂ ಮಟ್ಟ್ ಉಂಚಾಯೆಕ್ ಚಡೊನ್ ಯೆಂವ್ಚೆಂ ಸ್ವಶ್ಟ್ ಕಳ್ತಾ. ಸಂಪಾದಕಾಕ್ ಆನಿ ದಾಯ್ಜಾಚಾ ವಾವ್ರಾಂತ್ ಹಾತ್ ಮೆಳಂವ್ಚಾ ಸರ್ವ್ ಕಾರ್ಭ್ಯಾರಾಂಕ್ ಹಾಂವ್ ಉಲ್ಲಾಸ್ ಪಾಟಯ್ತಾಂ ಆನಿ ತುಮ್ಚಿ ಉಮೆದ್ ಹುನ್ ಹುನ್ ಉರೊಂದಿ ಮ್ಹಣ್ ಆಶೆತಾಂ.
ಕೊಂಕ್ಣಿ ಕಾವ್ಯಾವಿಶಿಂ ಜಾಂವ್ಚಿ ಚರ್ಚಾ ಕೊಂಕ್ಣಿ ಕವಿತೆಕ್ ಫಾಯ್ದ್ಯಾಚಿ ಜಾತಲಿ ಮ್ಹಣ್ ಹಾಂವ್ ಭರ್ವಸ್ತಾಂ. ಜಾಗಂವ್ಚೆಂ ಲೇಖನ್ ಬರಯಿಲ್ಲ್ಯಾ ಕವಿ ವಿಲ್ಸನಾಕ್ ಉಲ್ಲಾಸ್. ಉತಳ್ ಸಾಹಿತ್ಯಾಕ್ ಬೋಟ್ ಜೊಕೊನ್ ಖೊಡ್ ಕಾಡ್ಚ್ಯಾಕ್ ಕೊಣೆಂಯ್ ದಾಕ್ಶೆಂವ್ಚೆಂ ನ್ಹಂಯ್. ಪುಣ್ ಬೋಟ್ ಜೊಗ್ತೆಲ್ಯಾನ್ ಖಂಚೆಂಯ್ ಪ್ರಕಟ್ ಜಾಲ್ಲೆಂ ಬರಾಪ್ ಉತಳ್ ಕಿತ್ಯಾಕ್ ಮ್ಹಳ್ಳೆಂ ಸಾಂಗ್ಚೆಂ ಗರ್ಜೆಚೆಂ. ನವ್ಯಾ ಬರವ್ಪ್ಯಾಂಚಾ ಬರ್ಪಾಂಕ್ ಹ್ಯಾ ಸಂವಾದಾ ಥಾವ್ನ್ ಭಾಯ್ರ್ ದವರ್ಲ್ಯಾರ್ ಬರೆಂ.
ಅಜೀಕ್ ಚಡುಣೆಂ ವೀಸ್-ಭಾವೀಸ್ ವರ್ಸಾಧಿಂ, ಮ್ಹಜೆಂ ಪಯ್ಲೆಂ ಚುಟುಕ್ ಮ್ಹಾಕಾ ಆಜ್ ಉತಳ್ ದಿಸ್ತಾ. ತೆಂ ಕವನ್ ಪುನವ್ ಪ್ರಕಾಶನಾಚಾ ಶ್ರೀ ಡೊಲ್ಫಿ ಲೋಬೊನ್ ಮಿತ್ರಾರ್ ಪ್ರಕಟ್ ಕರ್ತಾನಾ ಮ್ಹಜ್ಯಾ ಉಮೆದಿಕ್ ಪಾಕಾಟೆ ಫುಟ್ಲ್ಲೆ. ತಶೆಂಚ್ ಹೆರ್ ನವ್ಯಾ ಕವಿಂಕ್ ಅಪ್ಲ್ಯಾ ಕವಿತಾಂಚಿ ಸುರ್ವಾರ್ ಕರ್ತಾನಾ ಭಗ್ಲ್ಲ್ಯಾಂತ್ ನವಾಲ್ ನಾ. ತರ್ಯೀ ಕವಿತೆಂವಿಶಿಂ ಶಿಕೊಂಕ್ ಜಾಯ್ತೆಂ ಆಸಾ ಜಾಲ್ಲ್ಯಾನ್ ತಿ ಶಿಕ್ಚಿ ಪ್ರಕ್ರಿಯಾ ಸೊಡಿನಾಸ್ತಾಂ ಅಪ್ಲಿ ಮಿನತ್ ಕೆಲ್ಯಾರ್ ಮಾತ್ರ್ ಉತಳ್ ರಿತಿಚ್ಯಾ ಚುಟುಕಾಂ ಥಾವ್ನ್ ಬರಿಂ ಉಂಚ್ಲಿಂ ಕವಿತಾ ಬರಂವ್ಕ್ ಸಾಧ್ಯ್.
- ಆಂಡ್ರ್ಯೂ ಎಲ್.ಡಿ’ಕುನ್ಹಾ, ಶಾರ್ಜಾ.
ಆಮ್ಚೆ ಕವಿ ಕಿತ್ಯಾಕ್ ನಿರಾಸ್?
ಆಯ್ಚಿಂ ಚಡ್ತಾವ್ ಕವಿತಾ ಎಕಾ ನ್ಹಂಯ್ ಎಕಾ ರಿತಿಚೆಂ ನಿರಾಸ್ವಾದ್ ಪಾಚಾರ್ತಾತ್, ಕವಿ ವಿಲ್ಸನ್ ಕಟೀಲಾಚೆ ವಿಚಾರ್ ಅರ್ಥಾಭರಿತ್ ಆಸಾತ್. ಪುಣ್ ತಕ್ಲೆನಾಂವ್ ’ಕವಿಂಕ್ ಖಂಯ್ ಪುರ್ಲಾ?’ ಮ್ಹಳ್ಯಾರ್ ಕವಿ ಸಗ್ಳೆ ಮೊರೊನ್ ಗೆಲ್ಯಾತ್ ಮ್ಹಳ್ಳೊ ಅರ್ಥ್ಗೀ? ವಾ ಕವಿತ್ವ್ ಸಂಪ್ಲಾಂ ಮ್ಹಳ್ಳೊ ನಿರಾಸ್? ಖರೆಂಚ್ ಜಾವ್ನ್ ಹೊ ಏಕ್ ಭೋವ್ ಗರ್ಜೆಚೊ ವಿಶಯ್ ಆನಿ ಹ್ಯೇವಿಶಿಂ ತರ್ಕ್ ಗರ್ಜೆಚೆಂ. ಕೊಂಕ್ಣಿ ಕವಿತಾ ಶೆತಾಂತ್ ಬರಿಂ ಕವಿತಾ ಉದೆವ್ನ್ ಯೆಂವ್ಚ್ಯಾಕ್ ಖರೆಂಚ್ ಜಾವ್ನ್ ಹೆಂ ಸುರ್ವಿಲೆಂ ಮೇಟ್ ಜಾಂವ್ ತಶೆಂಚ್ ನವೆ ನವೆ ಕವಿ ಅಪ್ಲಿ ಕಾವ್ಯ ಪ್ರತಿಭಾ ಧಾಖಂವ್ಕ್ ಸಕೊಂದಿ ಮ್ಹಳ್ಳೊ ಉಲೊ ದಿತಾಂ.
- ಆಲ್ಫ್, ಬಾಹ್ರೇಯ್ನ್.
ಕವಿ ವಿಲ್ಸನ್ ಕಟೀಲಾಚೆ "ಖಂಯ್ ಪುರ್ಲಾಂ ಕವಿಂಕ್?" ವಿಮರ್ಶ್ಯಾ ಲೇಖನ್ ವಾಚ್ಲೆಂ. ಹೆಂ ವಾಚ್ತಾನಾ ಮ್ಹಾಕಾ ಹ್ಯಾ ಲೇಖನಾಂತ್ "ಆಪ್ಣಾಚ್ಯಾ ದೊಳ್ಯಾಂತ್ ಮುಸೊಳ್ ದವರ್ನ್ ಹೆರಾಂಚ್ಯಾ ದೊಳ್ಯಾಂತ್ಲೆ ಕಿಸಾಳ್ ಕಾಡ್ಚೆಂ ಪ್ರಯತನ್ ಲೇಖಕಾನ್ ಕೆಲ್ಲೆ ದಿಸೊನ್ ಯೆತಾ. ಕಿತ್ಯಾಕ್ ಮ್ಹಳ್ಯಾರ್ ಥೊಡ್ಯಾಚ್ಚ್ ತೆಂಪಾಧಿಂ ಆಸಾ ಕೆಲ್ಲ್ಯಾ ಎಕಾ ಕವಿತಾ ಕಾರ್ಯಗಾರಾಂತ್ ಹಾಂವೆಯೀ ವಾಂಟೊ ಘೆತ್ಲ್ಲೊ. ಆನಿಂ ಸಾಂಜೆರ್ ಪಂದ್ರಾ ಜಣಾಂಕ್ ವಿಂಚುನ್ ತಾಂಚಿಂ ಕವಿತಾ ವಾಚನ್ ಕರಯಿಲ್ಲೆಂ. ತಾಂತ್ಲೊ ಎಕ್ಲೊ ಕವಿ ವಿಲ್ಸನ್ ಜಾವ್ನಾಸ್ಲ್ಲೊ ಆನಿ ತಾಚಿ ಕವಿತಾ ಹಿ.
"ಬಾಜ್ವೆ ಭಿತರ್ ಕಿತೆಂ ಕಿತೆಂ ಆಸಾ?".
ತ್ಯಾ ಸಾಂಜೆರ್ ಸುಮಾರ್ ದೆಡ್ಶ್ಯಾಂ ವಯ್ರ್ ಲೋಕ್ ಕಲಾಂಗಣಾಂತ್ ಹಾಜರ್ ಆಸ್ಲ್ಲೊ, ಆನಿ ತ್ಯಾ ಪೈಕಿ ಪ್ರಾಯ್ವಂತ್ ಲೇಖಕಿ ತಶೆಂಚ್ಚ್ ಸಬಾರ್ ಮಾಲ್ಘಡಿಂ ಆನಿ ಲ್ಹಾನ್ ವ್ಹಡ್ ಚಲಿಯೊ ಹಾಜರ್ ಆಸ್ಲ್ಲ್ಯೊ. ಆಜ್ ವಿಲ್ಸನಾನ್ ಹೆರಾಂಚಿ ಕವಿತಾ ಪತ್ರಾಂನಿ ವಾ ಹೆರ್ ಜಾಳಿಜಾಗ್ಯಾಂನಿ ಫಾಯ್ಸ್ ಜಾಲ್ಲೆಂ ವಾಚುನ್ ತಾಚಿ ಪ್ರತಿಕ್ರಿಯಾ ಹಾಂಗಾಸರ್ ಧಾಖಯ್ಲ್ಯಾ. ಪುಣ್ ತ್ಯಾ ದೀಸ್ ಇತ್ಲ್ಯಾ ವ್ಹಡಿಲಾಂಚ್ಯಾ ಸಮ್ಕಾರ್ ಬಾಜ್ವೆ ಭಿತರ್ ಕಿತೆಂ ಕಿತೆಂ ಆಸಾ ಮ್ಹಣ್ ಕವಿತಾ ವಾಚ್ತಾನಾ ತೆಂ ಆಯ್ಕಾಲ್ಲ್ಯಾ ಮ್ಹಾಕಾಚ್ಚ್ ನ್ಹಂಯ್ ಥಂಯ್ ಹಾಜರ್ ಆಸ್ಲ್ಲ್ಯಾ ತಾಚ್ಯಾ ಆವಯ್ ಸಾರ್ಕ್ಯಾ ತಶೆಂಚ್ಚ್ ಭಯ್ಣಿಂ ಸಮಾನ್ ಚಲಿಯಾಂಚೆ ಮಾನಾಕ್ ಕಶೆಂ ಭಗ್ಲೆ ಮ್ಹಣ್ ತಾಣೆ ಕಾಂಯ್ ಆಟೊವ್ ಕೆಲಾಗೀ? ಚಲಿಯೊ ವಾ ಸ್ರೀಯೊ ತಿತ್ಲೊ ಸಸಾರ್ಗೀ? ವಾ ಉಗ್ತ್ಯಾ ಮಾಂಚಿಯೆರ್ ಸ್ರೀಯಾಂ ಮುಕಾರ್ ತಸಲಿಂ ಕವಿತಾ ವಾಚ್ಚಿ ಗರ್ಜೆಚಿಂಗೀ? ದುಸ್ರ್ಯಾಂಚೆರ್ ಬೋಟ್ ಜೊಕ್ತಾನಾ ಅಪುಣ್ ಖಂಯ್ ತರೀ ಚುಕ್ಲಾಂಗೀ ಮ್ಹಣ್ ವರೊವ್ನ್ ಪಳೆಂವ್ಚಿ ಗರ್ಜ್ ಆಸಾ. ಕಿತ್ಯಾಕ್ ಏಕ್ ಬೋಟ್ ಅಪ್ಣೆ ಹೆರಾಂಕ್ ದಾಕೈಲೆ ತರ್ ಉರುಲ್ಲಿ ಚಾರ್ ಬೊಟಾ ಆಪ್ಣಾಕ್ಚ್ಚ್ ಜೊಕ್ತೆಲಿಂ ಮ್ಹಳ್ಳೆಂ ಉಡಾಸ್ ಆಮಿ ಸರ್ವಾಂನಿ ದವರ್ಚೊ ಗರ್ಜೆಚೊ. ಆತಾಂ ವಿಲ್ಸನಾನ್ಂಚ್ ಹೆಂ ಕವಿತಾ ಖಂಚ್ಯಾ ಮಟ್ಟಾರ್ ಆಸಾ ಮ್ಹಳ್ಳೆಂ ಸಾಂಗ್ಲ್ಯಾರ್ ಜಾತೆಂ (’ಉಂಚ್ಲೆಂ?’, ’ಸಾದೆಂ’ ವಾ ’ಕ್ಲಿಷ್ಟ್’?).
- ವಾಯ್ಲೆಟ್ ಜೆ. ಪಿರೇರಾ.
ಎಲಿಯಟಾಚ್ಯೊ ಕವಿತಾ?
ಮ್ಹಜ್ಯಾ ವಿಚಾರಾಂಚೊ ಇರಾದೊ ಮ್ಹಜ್ಯಾ ಮತಿಂತ್ ಉದೆಲ್ಲೆ ಥೊಡೆ ವಿಚಾರ್ ವೆಕ್ತ್ ಕರ್ಚೊ ಮಾತ್ರ್ ಶಿವಾಯ್ ಕೊಣ್ ಕವಿ ಕೊಣ್ ನ್ಹಂಯ್ ಮ್ಹಳ್ಳೆಂ ಸಾಂಗ್ಚೊ ಭಿಲ್ಕುಲ್ ನ್ಹಂಯ್, ಪಯ್ಲಿ; ತಿ ಅರ್ಹತಾ ಮ್ಹಾಕಾ ನಾ ದುಸ್ರಿ - ಹಾಂವ್ ಕವಿ/ಸಾಹಿತಿ ಭಿಲ್ಕುಲ್ ನ್ಹಂಯ್. ದೆಕುನ್ ಕವಿತಾ ಮ್ಹಳ್ಯಾರ್ ಕಿತೆಂ ಮ್ಹಣ್ ಕಳಿತ್ ನಾಸ್ತಾಂ ವಿಮರ್ಸೊ ಕರ್ಚೆಂ ಪಿಶೆಂಪಣ್ ಹಾಂವ್ ತರ್ಯೀ ಘೆಂವ್ಕ್ ವಚಾನಾ.
ಮ್ಹಜ್ಯಾ ವಿಚಾರಾಂತ್ ಹಾವೆಂ ಉಲ್ಲೇಕ್ ಕೆಲ್ಲೆಪರಿಂ ಜರ್ ಎಲಿಯಟ್ ಆನಿ ಠಾಗೊರ್ ತಸಲೆ ಕವಿ ಸಯ್ತ್ ಸಾದಿಂ ಕವಿತಾ (ವಿಲ್ಸನಾಚ್ಯಾ ಉತ್ರಾಂನಿ ಸಾಂಗ್ಚೆಂ ತರ್ ಕ್ಲಿಷ್ಟ್) ಕವಿತಾ ಬರವ್ನ್ ಸುರ್ವಾತ್ ಕೆಲ್ಲಿ ತರ್ ಹೆರ್ ಭಾಸಾಂನಿ ಕಿತ್ಯಾಕ್ ಆಸಾನಾಯೆ? ಜರೀ ತರೀ ಎಲಿಯಟ್ ವಾ ಠಾಗೊರ್ ಇತ್ಲ್ಯಾ ಉಂಚಾಯೆಕ್ ಪಾವ್ಲ್ಯಾತ್ ತರ್ ತಾಂಕಾ ವಾಚ್ಪ್ಯಾಂ ಥಾವ್ನ್ ಮೆಳ್ಲ್ಲೊ ಸಹಕಾರ್ ಕಾರಣ್ ಮ್ಹಣ್ಯೆತಾ. ಆಮ್ಚಾ ಕೊಂಕ್ಣೆಂತ್ ಕಿತ್ಲೊ ಸಹಕಾರ್ ಮೆಳ್ಳಾ ವಾ ಮೆಳ್ತಾ? ವಾಚ್ಪಿ ಸೊಡ್ಯಾಂ, ಕವಿ ಸಯ್ತ್ ಎಕಾಮೆಕಾಕ್ ಕಿತ್ಲೆಂ ವಾಚ್ತಾತ್? ಸಮ್ಜತಾತ್ ವಾ ಎಕಾಮೆಕಾಚ್ಯಾ ತಿದ್ವಣೆಕ್ ಆವ್ಕಾಸ್ ಕರುನ್ ದಿತಾತ್? ಹಾಂ! ಪಾಟ್ಲ್ಯಾನ್ ಕಾಂಯ್ ಗುಪ್ತ್ಪಣಿಂ ಖೊಡಿ ಕಾಡ್ತಿತ್ ಪುಣ್ ತೆಂಚ್ ಧಯ್ರಾನ್ ಅಪ್ಲ್ಯಾ ಉತ್ರಾಂನಿ ಸಾಂಗ್ಚೆಂ ಧಯ್ರ್ ಕೊಣಾಕ್ ಆಸಾ? ಸಾಂಗ್ಲ್ಯಾರ್ ಕಾಂಯ್ ನಿಶ್ಟುರ್ ಜಾಯ್ನ್ ಕೊಣ್ಣಾ ಮ್ಹಳ್ಳೆಂ ಚಿಂತಾಪ್ ಆಸ್ಯೆತ್.
ಮ್ಯಾಕ್ಸಿಮಾನ್ ಸಾಂಗ್ಚೆಪರಿಂ ಥೊಡ್ಯಾಂಕ್ ಧಯ್ರ್ ಆಸಾ ಜಾಣ್ವಾಯ್ ನಾ, ಥೊಡ್ಯಾಂಕ್ ಜಾಣ್ವಾಯ್ ಆಸಾ ಧಯ್ರ್ ನಾ, ಆನಿ ಕೊಣಾಕ್ ದೊನೀ ಆಸಾ ಪುಣ್ ಮನ್ ನಾ. ಖಂಡಿತ್ ಸಾರ್ಕೆಂ ಚಿಂತಾಪ್. ಪುಣ್ ಮ್ಹಜ್ಯಾ ಮತಿಂತ್ ಉದೆಂವ್ಚೆಂ ಗಂಭೀರ್ ಸವಾಲ್ ಹೆಂ;
ಕೊಣಾಯ್ಚಿ ಕವಿತಾ ಕ್ಲಿಷ್ಟ್ ಆನಿ ಕೊಣಾಚಿ ಉಂಚ್ಲಿ? ಹೆಂ ಮಾಪ್ಚೆಂ ಮಾಪ್ ಕಸಲೆಂ? ಕೊಣೆಂ ಮಾಪ್ಚೆಂ? ಕಶೆಂ ಮಾಪ್ಚೆಂ? ಹೆಂ ಕೊಣೆಂಯ್ ಸಾಂಗ್ಲ್ಯಾರ್ ಜಾತೆಂ.
ಹೆಂ ಹಾಂವ್ ಕಿತ್ಯಾಕ್ ವಿಚಾರ್ತಾಂ ಮ್ಹಳ್ಯಾರ್, ಎಕ್ಲ್ಯಾಚೆಂ ಕವಿತಾ ಥೊಡ್ಯಾಂಕ್ ಬರೆಂ ಲಾಗತ್ ಆನಿ ಕೊಣಾಕ್ ಕ್ಲಿಷ್ಟ್ ಕವಿತಾಪರಿಂ ದಿಸೊಂಕ್ ಪುರೊ. ಎಕ್ಲ್ಯಾಚೆಂ ಕ್ಲಿಷ್ಟ್ ಕವಿತಾ ಥೊಡ್ಯಾಂಕ್ ಉಂಚ್ಲೆಂ ಮ್ಹಣ್ ಭಗೊಂಕ್ ಪುರೊ. ಹಾಂತುಂ ಕೊಣೆಂಯ್ ಏಕ್ ಸಮಾನ್ ವಾದ್ ಹಾಡಂವ್ಕ್ ಸಾಧ್ಯ್ ಆಸಾ? ದೆಕುನ್ ಕೊಂಕ್ಣೆಂತ್ ಫಕತ್ತ್ ಚಾ.ಫಾ.ಂಕ್ ಹಾಡ್ಚೆಂ ವಾ ಫಕತ್ತ್ ಎಕಾ ವರ್ಗಾಚೆ ಕವಿಂಕ್ ಭರ್ಚೆಂ ಸಾಧನ್ ವ್ಯರ್ಥ್ ಆನಿ ಪಿಶೆಂಪಣ್.
ತಶೆಂ ಎಕಾ ಕವಿತೆಚ್ಯೊ ಚ್ಯಾರ್ ವೊಳಿ ವಾಚುನ್ ಕವಿತಾ ಉಂಚ್ಲೆಂ ವಾ ಕ್ಲಿಷ್ಟ್ ಮ್ಹಣ್ಚೆಂ ತರ್, ಕೊಂಕ್ಣೆಂತ್ ಧಾರಾಳ್ ಮಾಪಾಚೆ ಅಸ್ಲೆ ದಾಖ್ಲೆ ದಿವ್ಯೆತಾ, ಜ್ಯೆ ಉಂಚ್ಲ್ಯಾ ಕವಿಂಚ್ಯಾ ಕವಿತೆಂನಿ ವಾಚುಂಕ್ ಮೆಳ್ಚೆ.
- ಸಿ.ಎಲ್.ಕರಾಮಾ, ದುಭಾಯ್.
ಕವಿತಾಂಚೆರ್ ಖೊಡ್, ಅವಲೋಕನ್ ಆನಿಂ ವಿಮರ್ಸೊ ಕರ್ಚೆಂ ಧಯ್ರ್ ಕೊಂಕ್ಣೆಂತ್ ಜಾಯ್ತ್ಯಾಂಕ್ ಆಸಾ ಮ್ಹಣ್ ಸಾಗೊಂಕ್ ಜಾಯ್ನಾಂ. ಕೊಣಾಕ್ ಧಯ್ರ್ ಆಸಾ, ತಾಲೆಂತ್ ನಾಂ, ಕೊಣಾಕ್ ತಾಲೆಂತ್ ಆಸಾ, ಧಯ್ರ್ ನಾಂ. ಆನಿಂ ಕೊಣಾಕ್ ಧಯ್ರ್ಯೀ ಆಸಾ, ತಾಲೆಂತ್ಯೀ ಆಸಾ, ಕವಿತೆಂಚೆ ಪಡೊಂಕ್ ನಾಂ. ಆಸ್ಲ್ಲಿ ಉರ್ಬಾ ಕಾಂಯ್ ಕೊಂಕ್ಣ್ಯಾಂಚಾ ಶೆಳೆಪಣಾನ್ ವ ಇತರ್ ಕಾರಾಣಾನಿಂ ನಿವೊನ್ ಗೆಲ್ಯಾ. ಮಾಗಿರ್ ಕವಿತಾ ವಾಚುನ್, ತಾಂತ್ಲೊ ರಸ್ ಚಾಕ್ಚೆಂ ಬರೆಂ ಮನ್ ಆನಿ ಸಯ್ರಾಣ್ ಕಿತ್ಲ್ಯಾ ಆಮ್ಚಾ ಕೊಂಕ್ಣಿ ಮೊಗಿಂಕ್ ಆಸಾ?
ವಿಲ್ಸನ್ ಕಟೀಲಾಚಾ ಸಾಹಿತ್ಯಾಕ್ ಹಾಂವ್ ವಾಚುನ್ ಜಾಣಾ ಜಾಲ್ಲ್ಯಾ ಪ್ರಕಾರ್ ತೊ ಏಕ್ ತರ್ನೊ ಪುಣ್ ವಿಶೇಷ್ ತಾಕ್ತೆಚೊ ಕವಿ. ತಾಚೆಲಾಗಿಂ ಕಾವ್ಯಾಚೆಂ ದೆಣೆಂ ಆಸಾ, ಕಾವ್ಯೆಂ ಕೊಸುಂಕ್ ಜಾಯ್ ಆಸ್ಚಿ ಸಾಹೆತ್ (ಜಾಣ್ವಾಯ್) ಅಪ್ಣಾವ್ಚೆಂ ಬರೆಂ ಮನ್ ಆನಿಂ ಪ್ರೇತನ್ ಆಸಾ ಆನಿಂ ಕೊಂಕ್ಣಿ ಕಾವ್ಯಾಚಾ ಪಾಯ್ದ್ಯಾಕ್ ಹುನೊನಿ ಶಿರಾಂಚೊ ಖತ್ಕತೊ ಹುಸ್ಕೊ ಆಸಾ, ಖಂತ್ ಆಸಾ. ಹಿ ಚ್ಯಾರ್-ಚವ್ಗಾಂಕ್ ಸಾಂಗ್ಚೆಂ ಧಯ್ರ್ ಆನಿಂ ಬರೆಂ ಮನ್ಯೀ ಆಸಾ. ಭೇಶ್ ವಿಲ್ಸನ್. ಮುಖಾರ್ಸಿ ತುಜೆಂ ಮಿಸಾಂವ್. ಜಶೆಂ ವಿಲ್ಸನಾನ್ ವಸ್ತುನಿಶ್ಟ್ ವಿಮರ್ಸೊ ಕೆಲಾ, ತಶೆಂಚ್ ಹ್ಯಾ ವಿಷಯಾರ್ ವಸ್ತುನಿಶ್ಟ್ ವಿಚಾರ್ ಗರ್ಜೆಚೊ. ಸಿ.ಎಲ್ ಆನಿಂ ಅಸ್ಟಿನ್ ಹಾಂಚಾ ವಿಚಾರಾಂಚೆರ್ ಹಾಚಿ ಥೊಡಿ ರುಜ್ವಾತ್ ಆಸಾ (ಕಾಂಯ್ ಮ್ಹಜಾ ವಿಚಾರಾರ್ ಥೊಡಿತ್ ಆಸೊಂಕ್ ಪುರೊ). ಅಭಿನಂದನ್. ಕವಿಂಚೆ ಘಾಮಾ ಥೆಂಬೆ ಜಾಯ್ತೆ ವಾವೊಂದಿ, ತಾಂಚೆಂ ತಾಲೆಂತ್ ವಾಡೊಂದಿ ಆನಿಂ ಕವಿತೆಚೊ ಆಮ್ಚೊ ಹುಸ್ಕೊ ಬರ್ಯಾ ಕವಿತೆಚಾ ರಚ್ಣೆಂಕ್ ಆನಿಂ ಬರ್ಯಾ ಕವಿಂಚಾ ಪೊಸ್ಣ್ಯಾಕ್ ವಾಟ್ ಜಾಂವ್ದಿ.
ಬರೆಂ ಆಶೆವ್ನ್,
- ಮ್ಯಾಕ್ಸಿಮ್ ಲೋಬೊ, ಇಟಲಿ.
ಪ್ರತಿಕ್ರಿಯೆ ವಿಶಿಂ ಥೊಡೆಂ.....
ಹಾಂವೆ ವಿಂಚ್ಲ್ಲ್ಯಾ ವಿಶಾಯಾಚೆರ್ ಕಾಂಯ್ ಎಕಾ ದೊಗಾನಿಂ ಲಿಕ್ಲ್ಯಾರ್ ಫರಕ್ ಪಡಾನಾ; ಬಗಾರ್ ಹೊ ವಿಶಯ್ ವಿಸ್ತಾರಾಯೆನ್ ಚರ್ಚಾ ಜಾಯ್ಜೆ. ತೆದಾಳಾ ಮಾತ್ರ್ ಕಾಂಯ್ ತರಿ ಪ್ರಭಾವ್ ಪಡಾತ್. ಪಯ್ಲ್ಯಾನ್ ಪಯ್ಲೆಂ ಅಸೊ ಏಕ್ ಚರ್ಚೆಕ್ ಅವ್ಕಾಸ್ ಕರುನ್ ದಿಲ್ಲ್ಯಾ ಸಿ. ಎಲ್. ಹಾಕಾ ಹಾಂವ್ ಅಭಾರಿ. ಆತಾಂ ವಿಶಯಾಕ್ ಯೆತಾಂ.
ಸಿ. ಎಲ್. ಚ್ಯಾ ಪ್ರತಿಕ್ರಿಯೆಂತ್ ಥೊಡೆ ಗೊಂದೊಳ್ ಅಸ್ಲ್ಲ್ಯಾಬರಿ ದಿಸ್ತಾ. ಹ್ಯಾ ವಿಶಿಂ ಥೊಡೆಂ ಬರಂವ್ಕ್ ಅಶೆತಾಂ.
ತುಮ್ಚೊ ಪಯ್ಲೊ ವಿಚಾರ್ ಘೆಂವ್ಚೊ ತರ್, ಟಿ. ಎಸ್. ಎಲಿಯಟ್ ವಾ ರವೀಂದ್ರನಾಥ್ ಠಾಗೊರ್ ಹಾಣಿ ಆಪ್ಲ್ಯೊ ಪಯ್ಲ್ಯೊ ಕವಿತಾ ಉದ್ಕಾಂತ್ ಸೊಡ್ಲ್ಯೊ ಅನಿ ಪಿಂಜುನ್ ಉಡಯ್ಲ್ಯೊ ಮ್ಹಣ್ತಾನಾ ತಾಂಚೆ ಭಿತರ್ಚ್ಚ್ ಏಕ್ ವಿಮರ್ಶಕ್ ಆಸ್ಲೊ ಮ್ಹಣ್ ಸಮ್ಜತಾ. (ತೆಂಯ್ ಏಕ್ ತಾಲೆಂತ್ಚ್. ಆಮ್ಚೆಲಾಗಿಂ ನಾ) ಪುಣ್ ಉಪ್ರಾಂತ್ ತಾಂಚ್ಯಾ ಕಾವ್ಯಾನ್ ಜಾಗತಿಕ್ ಮಟ್ಟಾರ್ ಘಾಲ್ಲೊ ಪ್ರಭಾವ್ ಕಸಲೊ ತೆಂ ಸರ್ವ್ ಜಾಣಾಂತ್. ಹಾಂವೆಂ ಲೇಖನಾಂತ್ ಪಯ್ಲೆಂಚ್ ಸಾಂಗ್ಲಾಂಕಿ ಹಾಂವೆಂ ವಿಂಚ್ಲ್ಲ್ಯೊ ವೊಳಿ ಪಯ್ಲೆಂ ಬರಯ್ತೆಲ್ಯಾಂಚೊ ವ ನವ್ಯಾಂಚ್ಯೊ ನ್ಹಂಯ್ ಬಗಾರ್ ವೀಸ್ ತೀಸ್ ವರ್ಸಾಂಥಾವ್ನ್ ಬರವ್ನ್ಂಚ್ ಅಸ್ಲ್ಲ್ಯಾಂಚೊ ಮ್ಹಣ್. ತರ್ ಹಾಚೊ ಆರ್ಥ್ ಆಮ್ಚೆ ತೆದಾಳಾ ಥಾವ್ನ್ ಆತಾಂ ಪರ್ಯಾಂತ್ ಸುರ್ವಾತ್ಚ್ ಕರುನ್ ಆಸಾತ್ಗಿ?
ದುಸ್ರ್ಯಾಂತ್ ಸಾಹಿತ್ ಆನಿ ಜಾಹಿರಾತಾ ಮಧೆಂ ಅನಯ್ತಿಕ್ ಸಂಬಂಧ್ ಘಡ್ಲಾ. ತುಮ್ಚ್ಯಾ ಪತ್ರಾಕ್ ಹಾಂವ್ ಜಾಹಿರಾತ್ ದಿತಾಂ; ಆಮ್ಚ್ಯೊ ವರ್ದ್ಯೊ ಘಾಲ್ ಮ್ಹಣ್ಚೆಬರಿ ಸಾಹಿತ್ ಘಾಲುಂಕ್ ಜಾತಾಗಿ?
ಉಪ್ರಾಂತ್ ಮ್ಹಣ್ತಾತ್: ಸಾಹಿತ್ ರಚ್ಚೆಂ ವಾಚ್ಪ್ಯಾಂಖಾತಿರ್ ಶಿವಾಯ್ ಆಪ್ಣಾಖಾತಿರ್ ನ್ಹಂಯ್. ಹಿ ಚೂಕ್. ಸಾಹಿತ್ ರಚ್ಚೆಂ ಆಪ್ಣಾಕಿ ಆನಿ ವಾಚ್ಪ್ಯಾಂಕ್ಯಿ. ಆಪ್ಣಾಕ್ ನ್ಹಂಯ್ ಜಾವ್ನ್ ಆಸೊನ್ ಫಕತ್ತ್ ವಾಚ್ಪ್ಯಾಂಕ್ ಲಿಕ್ಲ್ಲೆಂ ಸಾಹಿತ್ ಕಪಟ್ ಸಾಹಿತ್ಯ್. ಸಾಹಿತ್ಯಾನ್ ಸಾಹಿತಿಚೊ ಉಜೊ ನಿವಯ್ಜೆ ತಶೆಂಚ್ ರಸಿಕಾಂಚಿ ತಾನ್ ಭುಜಯ್ಜೆ. ಆಪ್ಣಾಚೊ ಉಜೊ ನಿವಂವ್ಕ್ ಸಕನಾತ್ಲೆಂ ಸಾಹಿತ್ ವಾಚ್ಪ್ಯಾಚಿ ತಾನ್ ಕಶೆಂ ಭುಜಯ್ತಲೆಂ?
"ಲೊಕಾಮೊಗಾಳ್ ಸಾಹಿತ್ ಕೆನ್ನಾಂಯೀ ಉಂಚ್ಲೆಂ ಜಾವ್ನ್ ಆಸಾನಾ ಆನಿ ಉಂಚ್ಲೆಂ ಸಾಹಿತ್ ಲೊಕಾಮೊಗಾಳ್ ಕೆನ್ನಾಂಯ್ ಜಾಯ್ನಾ..." ಅಶೆಂ ಲಿಕ್ಲಾಂ ತುಮಿ.
ಹಾಂಗಾಸರ್ ತುಮಿ ಕೆಲ್ಲೆಂ ತುಲನ್ ಸಾದೆಂ ಆನಿ ಕ್ಲಿಶ್ಟ್ ಸಾಹಿತ್ಯಾಚೆಂ. ಸಾದೆಂ ಸಾಹಿತ್ ಲೊಕಾಮೊಗಾಳ್ ಜಾತಾ. ಲೊಕಾಮೊಗಾಳ್ ಸಾದೆಂ ಸಾಹಿತ್ ಉಂಚ್ಲೆಂ ಜಾವ್ನ್ ಆಸ್ತಾ. ಕನ್ನಡಾಂತ್ ಕೆ. ಎಸ್. ನರಸಿಂಹ ಸ್ವಾಮಿಚ್ಯೊ ಕವಿತಾ ಸಾದ್ಯೊ ಆನಿ ಉಂಚ್ಲ್ಯೊ; ದೆಕುನ್ ಲೊಕಾಮೊಗಾಳ್. ಗೋಪಾಲ ಕೃಷ್ಣ ಅಡಿಗಾಚ್ಯೊ ಉಂಚ್ಲ್ಯೊ ಅನಿ ಕ್ಲಿಶ್ಟ್. ಕೆ. ಎಸ್. ನ. ಲೊಕಾಮೊಗಾಳ್ ಜಾಲ್ಲ್ಯಾ ತಿತ್ಲೊ ಅಡಿಗ ಜಾಂವ್ಕ್ ನಾ. ಚಾಫ್ರಾಚ್ಯೊ ಕವಿತಾಯೀ ಸಾದ್ಯೊ ಪುಣ್ ಉಂಚ್ಲ್ಯೊ. ಎಕಾ ಭಾಶೆಚ್ಯಾ ಪ್ರಬುದ್ದ್ಪಣಾಕ್ ಸಾದೆಂ ಆನಿ ಕ್ಲಿಶ್ಟ್ ಸಾಹಿತ್ ದೊನ್ಯ್ ಗರ್ಜೆಚೆಂ.
ಪೂಣ್ ಹಾಂವೆ ವಿಂಚ್ಲ್ಲೊ ವಿಚಾರ್ ಉತಳ್ ಆನಿ ಉಂಚ್ಲ್ಯಾ ಮಧ್ಲೊ. ಖಂಚ್ಯಾಯೀ ಭಾಶೆಂತ್ ಉತಳ್ ಸಾಹಿತ್ ಲೊಕಾಮೊಗಾಳ್ ಜಾಂವ್ಕ್ ನಾ.
ಚಾ.ಫ್ರಾ ಸರ್ಲ್ಯಾ ಉಪ್ರಾಂತ್ ತಾಚ್ಯೊ ಕವಿತಾ ಲೊಕಾಕ್ ಆಂವಡ್ಲ್ಯೊ ಮ್ಹಣ್ತಾನಾ ತೊ ಮಂಗ್ಳುರಿ ಕಿರಿಸ್ತಾಂವ್ ಸಮಾಜೆ ಪ್ರಾಸ್ ಮ್ಹಸ್ತ್ ಮುಕಾರ್ ಅಸುಲ್ಲೊ ಮ್ಹಣ್ ಜಾಲೆಂ.
ಎಲಿಯಟಾಚ್ಯೊ ಪಯ್ಲ್ಯೊ ಕವಿತಾ ಸೊಡ್ಯಾಂ... ತಾಚಿ ಸಂಸಾರ್ಭರ್ ಪ್ರಭಾವ್ ಘಾಲ್ಲಿ "ದಿ ವೇಸ್ಟ್ ಲ್ಯಾಂಡ್" ಕವಿತೆಕ್ ಸಯ್ತ್ ಅಯೋಗ್ಯ್ ನಾಲಾಯಕ್ ಮ್ಹಣ್ ಬಿಲ್ಲೊ ದಿಲ್ಲೊ ಸಂಪಾದಕಾನ್. ತಶೆಂ ಮ್ಹಣ್ ನಾಲಾಯಕ್ ಮ್ಹಣ್ ಬಿಲ್ಲೊ ದಿಲ್ಲ್ಯೊ ಕವಿತಾ ಪೂರಾ ವೇಸ್ಟ್ ಲ್ಯಾಂಡಾ ಬರಿ ಆಸೊಂಕ್ ಸಾಧ್ಯ್ಗಿ?
ತ್ಯಾ ದೆಕುನ್, ದಯ ಕರುನ್ ಹಾಂವೆಂ ಕಾಣ್ಶಿಲ್ಲ್ಯೊ ವೊಳಿ ಲಿಕ್ಲ್ಲ್ಯಾಂಕ್ ಎಲಿಯಟ್ ಅನಿ ರವೀಂದ್ರನಾಥ್ ಠಾಗೋರಾಕ್ ಸರ್ ಕರಿನಾಕಾತ್.. ಮ್ಹಾಕಾಚ್ಚ್ ಲಜ್ ದಿಸ್ತಾ.
- ವಿಲ್ಸನ್ ಕಟೀಲ್.
ಮೊಗಾಳ್ ವಿಲ್ಸನ್ ಕಟೀಲ್, ತುಜ್ಯಾ ಲೇಖನಾಂತ್ ಧಾಖ್ಲ್ಯಾಕ್ ಘೆತ್ಲ್ಲ್ಯಾ ಕವಿತೆಂನಿ, ಕವಿನ್ ಬರಯಿಲ್ಲ್ಯಾ ತ್ಯಾ ಉತ್ರಾಂ ಮಧೆಂ ತಸೆಂಚ್ ಹ್ಯಾ ವಿಮರ್ಶ್ಯಾ ವಿಶ್ಯಾಂತ್ ಸಂಪಾದಕಾನ್ ಬರಯಿಲ್ಲ್ಯಾ - "ಆಯ್ಚ್ಯಾ ಕೊಂಕ್ಣಿ ಪರಿಗತೆಂತ್ ಕವಿತಾಶೆತಾಂತ್ ಜಾಂವ್ಚಿ ವೀದ್ವಾವ್ಳಿ ಆನಿ ಕವಿತೆರ್ ಜಾಂವ್ಚ್ಯಾ ’ಸಂಭೋಗಾಚೆರ್’ ವಿಮರ್ಶ್ಯಾತ್ಮಕ್ ನದರ್..." - ಕಿತೆಂ ಫರಕ್ ಆಸಾ? ದೊನಾಂಯ್ತ್ಲಿ ಭಾಸ್ ಏಕಾಚ್ಚ್ ಮಟ್ಟಾರ್ ಆಸಾ!
ಕವಿತೆಂನಿ ಫಕತ್ತ್ ಪ್ರಾಸ್ ಘಾಲ್ಚ್ಯಾಂಚಿಚ್ ಕವಿತಾ ಮ್ಹಣ್ ಸಭಾರ್ ಬುಧ್ವಂತ್ ವಾದ್ ಮಾಂಡ್ತಾತ್. ಕವಿತಾ ಮ್ಹಳ್ಯಾರ್ ಪ್ರಾಸಾಂಚಿ ರಾಸ್ ಮಾತ್ರ್ ನ್ಹಂಯ್, ತಿ ಸದಾಂ ವ್ಹಾಪಾರ್ಚಿ ಭಾಸ್ಯೀ ಆಸ್ಯೆತ್; ಎಕ್ಲ್ಯಾಚ್ಯಾ ವ್ಯಕ್ತಿತ್ವಾವಿಶಿಂ ಉಲಯ್ತಾನಾ, ತಾಚ್ಯಾ ಎಕಾ ಪಾಂಯಾ ವಿಶ್ಯಾಂತ್ ಮಾತ್ರ್ ವ ಬೊಟಾಂ ವಿಶ್ಯಾಂತ್ ಮಾತ್ರ್ ವಿಮರ್ಸೊ ಕೆಲ್ಯಾರ್ ಪಾವಾನಾ; ತಸೆಂಚ್ ಕವಿತೆಚ್ಯಾ ಭಾಸೆ ವಿಶ್ಯಾಂತ್ ಉಲಯ್ತಾನಾ ತಿ ಸಗ್ಳಿ ಕವಿತಾ - ವ ಕಿತೇಂಯೀ ತೆಂ, ಮತಿಂತ್ ಘೆಜಾಯ್ ಶಿವಾಯ್, ಥೊಡ್ಯಾಚ್ ವೊಳಿಂಚೊ ವಿಮರ್ಸೊ ಕರ್ಚೊ ನ್ಹಂಯ್.
ಆನಿ ಆತಾಂ ಪಾರ್ಥೇನಿಯಮ್ ಮ್ಹಳ್ಯಾರ್ ತಿಂ ಏಕಾ ಥರಾಚಿಂ ವಕ್ತಾಚಿಂ ಬೊಲ್ಯಾಂ-ಝಾಡಾಂ, ಜಿಂ ತೆನ್ಕಾ ಅಮೇರಿಕಾಂತ್ ವಾಡಾತ್ತ್ ವೆತಾತ್. ಜಾಂಚೆರ್ ಜಂದ್ಳ್ಯಾಚ್ಯಾ ಫುಲಾಂಪರಿಂ ಮಿಶ್ಯಾಳಿಂ ಫುಲಾಂ ಆಸ್ತಾತ್. ಹಾಕಾ ಆನಿ ಹ್ಯಾ ಲೇಖಕಾನ್ ’ಕೀಳ್’ ಮ್ಹಣ್ಚ್ಯಾ ಹ್ಯಾ ವೊಳಿಂಕ್ ಸಂಬಂಧ್ ಕಿತೆಂ? "ತೀನ್ ಕಾಸಾಂಚೊ ಮಾಪ್ಳಿ..." ಮ್ಹಜೆಂ ಬರಾಪ್ ಜಾಲ್ಲ್ಯಾನ್ ಹಾಂವೆ ಹೆಂ ಸವಾಲ್ ವಿಚಾರುಂಕ್ ಕಾರಣ್, ತಿತ್ಲೆಂಚ್!
- ಆಸ್ಟಿನ್ ಪ್ರಭು, ಚಿಕಾಗೊ.
ಮಟ್ಟ್ ಮ್ಹಳ್ಯಾರ್ ಕಸ್ಲೆಂ?
ತರ್ನೊ ಕವಿ ವಿಲ್ಸನ್ ಕಟೀಲಾಚೊ ವಿಮರ್ಸೊ ಖರೊಚ್ಚ್ ಜಾವ್ನ್ ಪ್ರಸ್ತುತ್ ಕೊಂಕ್ಣಿ ಸಾಹಿತಿಕ್ ಪರಿಗತೆಚೆರ್ ಆರ್ಸೊ ಧರ್ತಾ ತರ್ಯೀ ಹಾಚೆರ್ ಮ್ಹಜೆ ಥೊಡೆ ವಿಚಾರ್;
1. ಕೊಂಕ್ಣೆಂತ್ ವಾ ಖಂಚ್ಯಾಯ್ ಭಾಸೆಂತ್ ಜೆದ್ನಾಂ ಸಾಹಿತಿ/ಗಾವ್ಪಿ/ಕಲಾಕಾರಾಂಚೊ ಸಂಖೊ ವಾಡ್ತಾ, ತಾಂತುಂ ಜಿತ್ಲೆಂ ಬರೆಂ ಆಸ್ತಾಗೀ ತಿತ್ಲೆಂಚ್ ವಾಯ್ಟ್ಯೀ (ಉತಳ್) ಆಸ್ಚೊ ಸಂಭವ್ ಆಸ್ತಾ. ತಶೆಂ ಆಸ್ತಾಂ ಕೊಣೆಂಯೀ ಉಂಚ್ಲ್ಯಾ ಕವಿತೆಂತ್ಚ್ಚ್ ಕವಿತಾ ಬರಂವ್ಚಿ ಸುರ್ವಾತ್ ಕರುಂಕ್ ಸಾಧ್ಯ್ ನಾ. ಎದೊಳ್ ಕೊಣೆಂಯ್ ಅಶೆಂ ಕೆಲ್ಲೆಂ ನಾ, ಟಿ.ಎಸ್.ಎಲಿಯಟಾನ್ ಕವಿತಾ ಬರಂವ್ಕ್ ಸುರು ಕರ್ಚ್ಯಾಧಿಂ ಶೆಂಭೊರಾಂನಿ ಕವಿತಾ ಬರವ್ನ್ ಉದ್ಕಾಚಿ ಧೊಣ್ ಕರ್ನ್ ಖೆಳ್ತಾಲೊ ಕಂಯ್. ರಬೀಂದ್ರನಾಥ್ ಠಾಗೋರಾಚಿಂ ಸುರ್ವಿಲಿಂ ಕವಿತಾ ತಾಣೆಂ ಖುದ್ದ್ ಪಿಂಜುನ್ ಉಡಯಿಲ್ಲಿಂ ಕಂಯ್.
2. ಸಭಾರ್ ಪಾವ್ಟಿಂ ಕವಿತಾ ಪರ್ಗಟ್ ಕರ್ತಾನಾ ಥೊಡಿ ದಾಕ್ಶೆಣೆಕ್ ಪಡಾಜಯ್ ಪಡ್ತಾ, ಆತಾಂ ಚಿಂತ್ಯಾಂ ಹಾಂವ್ ಎಕ್ಲೊ ಸಂಪಾದಕ್ ಆನಿ ಕೊಣ್ಕೀ ಎಕ್ಲೊ ಪುನೆಗೆಲ್ಲೊ ಅಪ್ಲ್ಯಾ ಸರ್ಲ್ಲ್ಯಾ ಬಾಯ್ಲೆಕ್ ಶ್ರದ್ದಾಂಜಲಿ ದೀಂವ್ಕ್ ಆಯ್ಲೊ ಆನಿ ತಿ ಶ್ರದ್ದಾಂಜಲಿ ಥೊಡ್ಯಾ ಉತ್ರಾಂನಿ ಬರವ್ನ್ ದಿಲಿ. ಆನಿ ಹಾಂವ್ ಜರ್ ಹ್ಯಾ ಕವಿತೆಚೆಂ ಮಟ್ಟ್ ಬರೆಂ ನಾ ಮ್ಹಣೊನ್ ತಾಚೆಂ ಜಾಹಿರಾತ್ ಘಾಲಿನಾಯೆ ರಾವ್ಲೊಂ ತರ್ ಪಯ್ಲೆಂ - ಪತ್ರಾಕ್ ಲುಕ್ಸಾಣ್, ದುಸ್ರೆಂ - ಜಾಹಿರಾತ್ದಾರಾಕ್ ನಿರಾಸ್. ದುಸ್ರೆಂ ಎಕಾಧಾ ವೆಳಾ ಎಕ್ಲ್ಯಾನ್ ಬರಯಿಲ್ಲೆಂ ಕವಿತಾ (ವಾ ಕಿತೆಂಯ್) ಎಕ್ಲೊ ಪರ್ಗಟ್ ಕರಿನಾ ಜಾಯ್ತ್, ತರ್ ದುಸ್ರೆ ಸಂಪಾದಕ್ ಸಯ್ತ್ ಪರ್ಗಟ್ ಕರಿನಾಂತ್ ಮ್ಹಳ್ಳಿ ಖಾತ್ರಿ ಆಸಾ? ತಿಸ್ರೆಂ ಆಮಿಂ ಬರಯಿಲ್ಲೆಂ ಕವಿತಾ ಬರೆಂ ನಾ ಮ್ಹಣೊನ್ ಕೊಣೆಂಯ್ ಸಾಂಗ್ಲೆಂ ತರ್ ತೆಂ ಸ್ವೀಕಾರ್ ಕರುಂಕ್ ಕಿತ್ಲ್ಯಾಂಕ್ ಜಾತಾ?
3. ಕವಿತಾ/ಸಾಹಿತ್ಯ್ ಏಕ್ ಶಿಕ್ಚಿ ಪ್ರಕ್ರಿಯಾ ಆನಿ ನಿರಂತರ್ ಶಿಕೊನ್ ಆಸಾಜಯ್ ಆಸ್ತಾಂ, ಕೊಣ್ಯೀ ವ್ಹಡ್ಲೊ ಜಾಂವ್ಚೊ ತಾಣೆಂ ಬರಯಿಲ್ಲ್ಯಾ ಸಾಹಿತ್ಯಾಚೊ ಸಂಕೊ ಪಳೆವ್ನ್ ವಾ ತಾಚೆ ಕಿತ್ಲೆ ಕೇಸ್ ಪಿಕ್ಲ್ಯಾತ್/ಝಡ್ಲ್ಯಾತ್ ಮ್ಹಳ್ಳ್ಯಾಚೆರ್ ನ್ಹಂಯ್, ಬಗಾರ್ ತಾಚ್ಯಾ ಸಾಹಿತ್ಯಾಚ್ಯಾ ಗುಣ್ಮೌಲ್ಯಾಂಕ್. ಹೆಂ ಸಾಹಿತ್ಯಾಕ್ ಮಾತ್ರ್ ನ್ಹಂಯ್ ಸಂಗೀತಾಕ್ ವಾ ಖಂಚ್ಯಾಯ್ ಹೆರ್ ಪ್ರಕಾರಾಕ್ ಲಾಗು ಜಾತಾ.
4. ಸಾಹಿತ್ಯ್ ರಸ್ಚೆಂ ವಾಚ್ಪ್ಯಾಂ ಖಾತಿರ್ ಶಿವಾಯ್ ಆಪ್ಣಾಖಾತಿರ್ ನ್ಹಂಯ್, ಅಶೆಂ ಆಸ್ತಾಂ ವಾಚ್ಪಿ ಸಾಹಿತಿ ನ್ಹಂಯ್, ದೆಕುನ್ ಲೊಕಾಮೊಗಾಳ್ ಸಾಹಿತ್ಯ್ ಕೆದ್ನಾಂಯ್ ಉಂಚ್ಲೆಂ ಜಾವ್ನ್ ಆಸಾನಾ. ಆನಿ ಉಂಚ್ಲೆಂ ಸಾಹಿತ್ಯ್ ಲೊಕಾಮೊಗಾಳ್ ಜಾವ್ನ್ ಆಸಾನಾ ಮ್ಹಳ್ಳೆಂ ಉಡಾಸ್ ದವರ್ಚೆಂ ಗರ್ಜೆಚೆಂ. ಚಾ.ಫ್ರಾ.ದೆ’ಕೋಸ್ತಾಚ್ಯಾ ಸಾಹಿತ್ಯಾಕ್ ಆತಾಂ ವಾಚ್ಪಿ ಜಿತ್ಲೆಂ ಖಾಯ್ಸ್ ಕರ್ತಾ, ತಿತ್ಲೆಂ ತೊ ಜೀವ್ ಆಸ್ತಾಂ ಖಾಯ್ಸ್ ಕರಿನಾತ್ಲ್ಲೆ, ಕಾರಣ್ - ಆತಾಂ ಖರೆಂಪಣಿಂ ಕೊಂಕ್ಣಿ ಸಾಹಿತ್ಯಾಕ್ ಬರೆ ದೀಸ್ ಆಯ್ಲ್ಯಾತ್, ಕಸಲಿಚ್ ಮುಲಾಜ್ ನಾಸ್ತಾಂ ವಿಮರ್ಸೊ ಕರ್ಚೆ ಧಯ್ರಾಧಿಕ್ ವಿಮರ್ಶಕ್ ಆಸಾತ್. ಪುಣ್ ಚಾ.ಫ್ರಾಚ್ಯಾ ಸಮಕಾಳೀನ್ ಸಾಹಿತಿಂಚ್ಯಾ ಪಟ್ಟೆಂತ್ ಚಾ.ಫ್ರಾಚ್ಯಾಕೀ ಫಾಮಾದ್ ಜಾಲ್ಲೆ ಕವಿ ಆಸಾತ್. ಆತಾಂಚಾ ಪರಿಗತೆಚೆರ್ ಪಳೆವ್ಯಾಂ, ಜಿತ್ಲೊ ಕವಿ ಮೆಲ್ವಿನ್ ಲುದ್ರಿಕ್ ಲೊಕಾಮೊಗಾಳ್ಗಿ ತಿತ್ಲೊ ಹೆನ್ರಿ ಎಮ್ ಪೆರ್ನಾಲ್ ನ್ಹಂಯ್. ದೆಕುನ್ ಖಂಚ್ಯಾಯ್ ಎಕಾ ಭಾಸೆಚೆಂ ಸಾಹಿತ್ಯ್ ವೃದ್ದಿ ಜಾಯ್ಜಯ್ ತರ್, ಹರ್ಯೆಕಾ ಪ್ರಕಾರಾಚೆಂ ಸಾಹಿತ್ಯ್ ತಿಕಾ ಗರ್ಜೆಚೆಂ. ಅಶೆಂ ಸಾಂಗೊಂಕ್ ಜಾಯ್ನಾಂಕೀ ಆಮ್ಚಾ ಭಾಸೆಂತ್ ಫಕತ್ತ್ ಕವಿತಾ ಮಾತ್ರ್ ಬರಯ್ಜಾಯ್, ವಾ ಕಾಣ್ಯೊ ಮಾತ್ರ್ ಬರಯ್ಜಾಯ್ ಮ್ಹಣೊಂಕ್ ಜಾಯ್ನಾ.
5. ಕವಿತಾ ಬರವ್ನ್ ಜರ್ ಎಕ್ಲೊ ಮಾನ್ ಜೊಡ್ತಾ, ತರ್ ತಾಂತುಂ ಪೊಡ್ಕಾಣಿ ಕರ್ನ್ ಕಿತೆಂ ಫಾಯ್ದೊ? ಜರ್ ತಾಚಿಂ ಕವಿತಾ ಮಾನಾಕ್ ಯೋಗ್ಯ್ ವಾ ನ್ಹಂಯ್ ಮ್ಹಳ್ಳೊ ನಿರ್ಧಾರ್ ಕರ್ಚೊ ಲೊಕಾಂನಿ ತರ್, ಹೆರ್ ಕವಿಂಕ್ ಕಿತ್ಯಾಕ್ ಪೊಡ್ಕಾಣಿ? ಅಶೆಂ ಮಾನ್ ಜೊಡ್ಚಾಕ್ ವೆವೆಗ್ಳೆ ಸರ್ಕಸ್ ಕರ್ಚೆ ಕವಿ ಕಿತೆಂ ನಾಂತ್ಗೀ? ಜರ್ ಆಮ್ಕಾಂ ಕೊಣಾಯ್ಚೇಂಯ್ ಕವಿತಾ/ಪದ್ ಪಸಂದ್ ನಾ ತರ್ ತೆಂ ವಾಚಿನಾಯೆ/ಆಯ್ಕನಾಯೆ ರಾಂವ್ಚೆಂ ಶಿವಾಯ್ ಹೆರಾಂಕ್ ಬರಂವ್ಚೆಂ/ಗಾಂವ್ಚೆಂ ರಾವಂವ್ಕ್ ಸಾಧ್ಯ್?. ಹ್ಯಾ ಆಧಿಂಯ್ ಅಶೆಂ ದುರ್ಸಲ್ಲೆ ಜಾಯ್ತೆ ಆತಾಂ ಖಂಯ್ ಗೆಲ್ಯಾತ್ ಮ್ಹಳ್ಳೆಂ ತೆ ನೆಣಾಂತ್, ತಶೆಂ ಆಸ್ತಾಂ ಇಲ್ಲೆಂ ಸಯ್ರಣ್ ಘೆ ಆನಿ ಬಾಕಿಚೆಂ ವೆಳಾಚ್ಯಾ ಅಧೀನ್ ದೀ. ಕಿತ್ಯಾಕ್ ಇಂಗ್ಲಿಶಾಂತ್ ಏಕ್ ಸಾಂಗ್ಣಿ ಆಸ್ಚೆಪರಿಂ ’Some can be fooled all times, all can be fooled sometimes, all cannot be fooled all times ’.
6. ಕೊಣ್ಯೀ ಕವಿತಾ ಬರಯ್ತಾ ವಾ ಬುಕಾರುಪಾರ್ ಪರ್ಗಟ್ತಾ ತರ್ ತಾಂತುಂ ಭೊಂಗೊಸ್ತೊಳ್ ಜಾಲೊ ಮ್ಹಣ್ ವಿಳಾಪ್ ಕರ್ಚೆಂ ಸಾರ್ಕೆಂ ನ್ಹಂಯ್, ತಾಚೆ ಬದ್ಲಾಕ್ ಅಪುಣ್ ಉಂಚ್ಲಿಂ ಕವಿತಾ ಬರಯ್ತಾಂ ಆನಿ ಅಪುಣ್ ಜಾವ್ನ್ ಕವಿತೆಚೆಂ ಮಟ್ಟ್ ಊಂಚ್ ಕರ್ತಾಂ ಮ್ಹಣ್ ಚಿಂತ್ಚೆಂ ಬರೆಂ ನ್ಹಂಯ್ವೆ ವಿಲ್ಸನ್? ಸಂಸಾರಾಂತ್ ಬರೆಂ ಜಾಯ್ಜಯ್ ತರ್ ಫಕತ್ತ್ ವಾಯ್ಟ್ ಕರ್ತೆಲ್ಯಾಂಕ್ ಆಡಾಯ್ಲ್ಯಾರ್ ಪುರೊಗೀ ವಾ ಬರೆಂ ಕರ್ತೆಲೇಯ್ ಗರ್ಜೆಚೆ? ದೆಕುನ್ ಉತ್ರಾಂಚಿ ರಾಸ್ ಘಾಲ್ತೆಲೆ ಘಾಲುಂದಿ, ಪುಣ್ ತುಂ ಬರಿಂ, ಉಂಚ್ಲಿಂ ಕವಿತಾ ಬರಯ್ತೇ ರಾವ್ - ತೆದ್ನಾಂ ತುಂಯೀ ಖುಶ್, ಹಾಂವ್ಯೀ ಖುಶ್, ಕೊಂಕ್ಣಿ ಧಾದೊಸ್ - ಕಿತೆಂ ಮ್ಹಣ್ತಾಯ್?
- ಸಿ.ಎಲ್.ಕರಾಮಾ, ದುಭಾಯ್.
ಮಾರ್ಕ್ ಡೆನಿಸ್ ಡಿ’ಸೋಜಾ -ಆನ್ಯೇಕ್ ಸಾದೊ-ಸುಧೊ, ಖಾಲ್ತೊ -ಭೊಳೊ ಕೊಂಕಣ್ ಮುಖೆಲಿ. ಹಾಂವ್ ತಾಕಾ ಎಕ್ಚ್ಚ್ ಪಾವ್ಟಿಂ ಮೆಳ್ಳಾಂ ತರ್ಯೀ ತಾಚೆಂ ಸಾದೆಂಪಣ್ ಪಳೆವ್ನ್ ಹಾಂವ್ ಶೆರ್ಮೆಲ್ಲೊಂ. ಆಮ್ಕಾಂ ಥೊಡ್ಯಾಂಕ್ ಹಾತಿಂ ಇಲ್ಲೆ ಪಯ್ಶೆ ಜಾತಚ್ಚ್ ಇಲ್ಲೊಸೊ ಹಾಂಕಾರ್ ಆಸ್ತಾ; ಆಮಿಂ ಹೆರಾಂಕ್ ಪಳೆವ್ನ್ ಗರಮಾಯೇನ್ ರಾವ್ತಾಂವ್ ಆನಿ ಹೆರಾಂನಿ ಆಮ್ಚ್ಯೆಲಾಗಿಂ ಯೇವ್ನ್ ಹಾತ್ ಮೆಳಂವ್ಕ್ ರಾಕೊನ್ ರಾವ್ತಾಂವ್. ಪುಣ್ ಮಾರ್ಕ್ ಅಸೊ ನ್ಹಂಯ್; ತಾಚ್ಯೊ ಹಾಸೊ ತಾಚ್ಯಾ ಮುಖಮಳಾರ್ ತಾಂಬ್ಸಾಣ್ ಹಾಡ್ತಾತ್, ದೊಳ್ಯಾಂನಿ ತಿಂ ಮೊಗಾ ದುಖಾಂ-ಸಾಯ್ ತೆ ದೊಳೆ ವಜ್ರಾಪರಿಂ ಪರ್ಜಳಾಯ್ತಾತ್ ಆನಿ ತಾಚೆ ಹಾತ್ ಆಪ್ಶೆಚ್ ಮುಖಾರ್ ಯೇವ್ನ್ ಸಂಬಂಧ್ ರಚುಂಕ್ ಲಾಲೆತಾತ್. ಅಸಲೆಚ್ಚ್ ಸಭಾರ್ ಮುಖೆಲಿ ಆಜ್ ದುಬಾಯ್/ಗಲ್ಫಾಂತ್ ಆಸ್ಲ್ಲ್ಯಾನ್ ಕೊಂಕ್ಣೆಚೆಂ ಬೆಳೆಂ ಪಿಕ್ಲಾಂ, ಲೋಕಾಕ್ ಹಾಣಿಂ ಆಪ್ಲೆಂ ಕುಟಾಮ್ ಕಸೆಂ ಲೆಖ್ಲಾಂ ಆನಿ ಹಾಂಚೆ ನಾಂವ್ ಭಾಂಗಾರಾಚ್ಯಾ ಆಕ್ಷರಾಂನಿ ಲಿಖ್ಲಾಂ. ಅಸಲೆ ಸಭಾರ್ ವ್ಯಕ್ತಿ ಆಮ್ಚ್ಯಾ ಸಮಾಜೆಂತ್ ಉದೆಂವ್ ಆನಿ ತಾಂಕಾಂ ಆಧಾರ್ ದೀಂವ್ ತೊ ದೇವ್ ಸದೆಂವ್.
ದೇವ್ ಬರೆಂ ಕರುಂ ವಾಯ್ಲೆಟ್, ತುಜ್ಯಾ ಆನ್ಯೇಕ್ ಖರ್ಯಾ ವಳ್ಕೆಕ್!
- ಆಸ್ಟಿನ್ ಪ್ರಭು, ಚಿಕಾಗೊ.
ಗಂಭೀರ್ ಸಂಪಾದಕೀಯ್!?
ಇಲ್ಲೆಂ ತಿಕ್ಶೆಂ ಆಸ್ಲ್ಯಾರ್ಯೀ, ಸಂಪಾದಕೀಯ್ ಅರ್ಥಾಭರಿತ್ ಜಾವ್ನಾಸಾ ತರ್ಯೀ ಮ್ಹಜೆಂ ಏಕ್ ಸುಚನ್; ಸಂಪಾದಕೀಯಾಂತ್ ಥೊಡ್ಯೊ ವೊಳಿ ದಾಟ್ ಅಕ್ಶರಾಂನಿ (Bold / Underline) ಘಾಲ್ಚೆಂ ವಾಚ್ಪ್ಯಾಕ್ ಗುಸ್ಪೊಡಾಯ್ತಾ. ಕಿತ್ಯಾಕ್ ಮ್ಹಳ್ಯಾರ್ ಎಕಾ ಸಂಪಾದಕೀಯಾಂತ್ ಆಸ್ಚ್ಯೊ ಹರ್ಯೆಕ್ ವೊಳಿ ಪ್ರಮುಖ್ ಜಾವ್ನಾಸ್ತಾತ್ ದೆಕುನ್ ಫಕತ್ತ್ ಥೊಡ್ಯೊ ವೊಳಿ ದಾಟ್ ಅಕ್ಶರಾಂನಿ ಘಾಲ್ತಚ್ಚ್ ವಾಚ್ಪ್ಯಾಚೆಂ ಗಮನ್ ಹೆರ್ ವೊಳಿಂಚೆರ್ ಚಡ್ ಜಾವ್ನ್ ವಚಾನಾ.
- ಆಂಡ್ರು ಎಲ್. ಡಿ’ಕುನ್ಹಾ, ಶಾರ್ಜಾ.
ಮಾನೆಸ್ತ್ ಮಾರ್ಕ್ ಡೆನಿಸ್ ಡಿ’ಸೋಜಾಚೆಂ ಸಂದರ್ಶನ್ ಭೋವ್ ಬರೆಂ ಲಾಗ್ಲೆಂ. ಜಶೆಂ ಹಾಂವ್ ತಾಕಾ ವಳ್ಕತಾಂ, ತೊ ಶೀದಾ ತಶೆಂಚ್ ಪ್ರಾಮಾಣಿಕ್ ರಿತಿನ್ ಅಪ್ಲೆ ವಿಚಾರ್ ವೆಕ್ತ್ ಕರ್ಚ್ಯಾಂತ್ಲೊ, ಖರೆಂಚ್ ಜಾವ್ನ್ ತಾಚ್ಯಾ ಕಾಳ್ಜಾಂತ್ಲೊ ಕೊಂಕ್ಣಿ ಮೋಗ್ ವಿಶಾಲ್. ವಾಯ್ಲೆಟಾನ್ ಘೆತ್ಲ್ಲೆಂ ಸಂದರ್ಶನ್ ಭೋವ್ ಬರೆ ರಿತಿನ್ ಆಸಾ, ಉಲ್ಲಾಸ್ ತುಮ್ಕಾಂ.
- ಲ್ಯಾನ್ಸಿ ಮಾಡ್ತಾ, ದುಭಾಯ್.
ದೋನ್ ಆನಿ ದೋನ್ ಕಿತ್ಲೆಂ?
ಎಡ್ವಿನ್ ಜೆ.ಎಫ್.ಡಿ’ಸೋಜಾಚ್ಯಾ ಜಾಪಿಂಚೆರ್ ಏಕ್ ವಿಚಾರ್ ಮ್ಹಜೊ: ರಶ್ಯಾಂತ್ ಎಕ್ಲ್ಯಾಕ್ ಪೊಲಿಸಾಂನಿ ವಿಚಾರ್ಲ್ಲೆವಿಶಿಂ. ಪೊಲಿಸಾಂನಿ ವಿಚಾರ್ಲ್ಲೆಂ ತೆಂ ಸವಾಲ್ ಖಂಚ್ಯಾ ಭಾಸೆಂತ್? ರಶ್ಯನ್ ಭಾಸೆಂತ್ ವಾ ಕೊಂಕ್ಣೆಂತ್?
- ಸಿ.ಎಲ್.ಕರಾಮಾ, ದುಭಾಯ್.
ಚಕ್ರವರ್ತಿಕ್ ರಾಗ್?
ಸಾಹಿತಿಲಾಗಿಂ ಸಂವಾದಾಚೆರ್ ದಾಯ್ಜ್ ಸಂಪಾದಕಾನ್ ವೊಲಾಯಿಲ್ಲೆಪರಿಂ ಚಕ್ರವರ್ತಿಚೆಂ ಸಂವಾದ್ ವಾಚ್ತಾಂ ವಾಚ್ತಾಂ ಸುಸ್ತಾಲೆಂಕೀ, ಚಕ್ರವರ್ತಿ ಕೊಣಾಚೆರ್ಗೀ ರಾಗಾರ್ ಆಸಾ ದೆಕುನ್ ಸಂವಾದಾಂತ್ ತಾಚ್ಯೊ ಜಾಪೀಯ್ ರಾಗಾನ್ ದಿಲ್ಲೆಪರಿಂ ದಿಸ್ತಾ. ಥೊಡ್ಯಾ ಸವಾಲಾಂ ಥಾವ್ನ್ ಚುಕವ್ನ್ ಘೆಂವ್ಚೆಂ ಪ್ರೇತನ್ ಕೆಲ್ಲೆಂಯೀ ದಿಸೊನ್ ಯೆತಾ. ಎಕಾ ಜಾಪಿಂತ್ ಸಂಪಾದಕ್ ಬೋಸ್ ಮ್ಹಣ್ಚೊ ಅಖ್ರೇಕ್ ವಾಚ್ಪಿಚ್ ಬೋಸ್ ಮ್ಹಣೊನ್ ಜಾಪಿ ದಿಲ್ಲೊಚ್ ಖರೊ ಬೋಸ್ ಜಾಂವ್ಚೆಂ ಪ್ರೇತನ್ ಪುಣೀಂ ನ್ಹಂಯ್ಮೂ ಹೆಂ?
- ರೊಜಿಟಾ ನಜ್ರೆತ್, ಮಿರಾರೋಡ್.
ಕುರ್ಲ್ಯೊ ಆನಿ ಆಮ್ಚೆ ಲೇಖಕ್!
ಆಸ್ಟಿನ್ ಪ್ರಭುಚೆಂ ಆಯ್ಲೆವಾರ್ಚೆಂ ಪರ್ಗಟ್ ವಿಚಾರ್ ಏಕ್ಧಂ ಸಕಾಳಿಕ್ ತಶೆಂಚ್ ವಾಜ್ಭಿ. ಖರಿಚ್ಚ್ ಆಮ್ಚಿ ಕೊಂಕ್ಣಿ ಸಮಾಜ್ ಕುರ್ಲ್ಯಾಂಚ್ಯಾ ಖಾಸ್ತಾಚಿಚ್, ಕೆದಿಂಚ್ ಸುಧ್ರೊಂಚೆಪರಿಂ ದಿಸೊನ್ ಯೇನಾ. ಪುಣ್ ಏಕ್ ಲ್ಹಾನ್ ವಿಚಾರ್ ಮ್ಹಜೆ: ಜೆದ್ನಾಂ ಅಪ್ಣಾನ್ ವಯ್ರ್ ಯೇಂವ್ಕ್ (ಅಪ್ಲೊಚ್ ಸ್ವಾರ್ಥ್) ಕೊಣಾ ಕೊಣಾಚ್ಯಾ ಹರ್ಧ್ಯಾರ್ ಪಾಂಯ್ ದವರ್ತಾನಾ, ಹೆರ್ ಕುರ್ಲ್ಯಾಂನಿ ವೊಗೆಚ್ಚ್ ಬೊಸ್ಚೆಂ ತರ್ಯೀ ಕಶೆಂ? ಹ್ಯಾವಿಶಿಂ ಇಲ್ಲೊ ಆಟೊವ್ ಕರ್ಯಾಂಗೀ?
- ಸಿ.ಎಲ್. ಕರಾಮಾ, ದುಭಾಯ್.
ವೆಕ್ತಿ ಆನಿ ವಿಚಾರ್ - ಹಾಂಚೆಮಧೆಂ ಅಂತರ್ ಆಸೊಂದಿ,
ಆಯ್ಲೆವಾಯ್ ದಾಯ್ಜ್ ವಿಚಾರ್-ಉಚಾರ್ಚೆರ್ ವೆವೆಗ್ಳ್ಯಾಂನಿ ದಿಲ್ಲೆ ವಿಚಾರ್ ವಾಚ್ತಾಂ, ಕಿತ್ಯಾಕ್ಗೀ ಮ್ಹಾಕಾ ಭಗ್ಲೆಂ, ಹಾಂತ್ಲೆ ಚಡ್ತಾವ್, ವಿಚಾರಾಂಚೆರ್ ಆರ್ಸೊ ಧರ್ಚ್ಯಾಕೀ ಚಡ್ ಮಾಪಾನ್ ವೆಕ್ತಿಚೆರ್ ಆರ್ಸೊ ಧರ್ತಾತ್. ಜೆದ್ನಾಂ ವಿಚಾರಾಂಚ್ಯಾಕೀ ವೆಕ್ತಿ ಪ್ರಮುಖ್ ಜಾತಾ, ತೆದ್ನಾಂ ಸಾಹಿತ್ಯ್/ಅಭಿವ್ಯಕ್ತ್ ಅಪ್ಲಿ ದಿಶಾ ಚುಕ್ತಾ. ಹೆಂ ಮ್ಹಜೆಂ ಖಾಸ್ಗಿ ಚಿಂತಾಪ್. ದೆಕುನ್ ವಿಚಾರಾಂಚೆರ್ ಎಕಾಮೆಕಾ ಆರ್ಸೊ ಧರ್ಚಿ ಪ್ರಕ್ರಿಯಾ ಚಡೊಂದಿ, ತೆಚ್ಚ್ಪರಿಂ ವಿಚಾರ್ ವಿಂಚ್ತಾನಾ, ವೆಕ್ತಿಚೆಂ ನಾಂವ್ ಉಲ್ಲೇಕ್ ನಾಂ ತರ್ ಬರೆಂಚ್ - ಕಿತ್ಯಾಕ್ ಮ್ಹಳ್ಯಾರ್ ಸಂಸಾರಾಂತ್ ಬುದಿ ಸಾಂಗ್ತೆಲೆ ಧಾರಾಳ್ ಆಸಾತ್, ಪುಣ್ ಪಾಳ್ತೆಲೆ ಭೋವ್ ಉಣೆಂ ವಾ ನಾಂಚ್!. ಹೆಂ ಪರತ್ ರುಜು ಕರ್ಚಿ ಗರ್ಜ್ ಮ್ಹಣ್ ಮ್ಹಾಕಾ ಭಗಾನಾ.
- ಸಹನಾ, ಕುವೇಯ್ಟ್.
ಜೆಮ್ಮಾ ಪಡೀಲ್
ಕೊಂಕ್ಣಿ ಸಾಹಿತಿಕ್ ಶೆತಾಂತ್ ಹಾಚೆ ತಸಲೊ ಸಾದೊ, ಬೊಳೊ ಆನಿ ಖಾಲ್ತ್ಯಾ ಕಾಳ್ಜಾಚೊ ದುಸ್ರೊ ವ್ಯಕ್ತಿ ಹಾಂವೆಂ ಯೆದೊಳ್ ಪಳೆಂವ್ಕ್ ನಾ. ಹಾಂವೆಂ ಜೆಮ್ಮಾವಿಶಿಂ ಸಭಾರ್ ವರ್ಸಾಂ ಥಾವ್ನ್ ಆಯ್ಕಾಲ್ಲೆಂ ತರ್ಯೀ ವ್ಯಕ್ತಿಗತ್ ಮೆಳ್ಚೊ ಅವ್ಕಾಸ್ ಲಾಬ್ಲ್ಲೊ ಅಜೀಕ್ ಜ್ಯಾರ್ ವರ್ಸಾ’ದಿಂ ತಾಚ್ಯಾ ಅಬುದಾಭಿ ಘರಾಂತ್. ಮ್ಹಜೊ ಮಿತ್ರ್ ಓಝಿ, ಹಾಂವ್ ಆನಿ ಮ್ಹಜಿ ಪತಿಣ್ ಟೆರ್ರಿ ತಾಂಗೆರ್ ಗೆಲ್ಲ್ಯಾಂವ್, ಆನಿ ತಾಚೆಲಾಗಿಂ ಜಾಯ್ತೆಂ ಉಲಯ್ಲ್ಯಾಂವ್ - ಹಾಂವ್ ಥಟಾಕ್ಕ್ ಜಾಲೊಂ ಹ್ಯಾ ಭಾರಿಚ್ ಸಾದ್ಯಾ ಕೊಂಕ್ಣಿ ಸಾಹಿತಿಕ್ ಮೆಳೊನ್. ರಾಜ್ಧಾನಿ ಎಕ್ಸ್ಪ್ರೆಸ್ ರೈಲಾಪರಿಂ ಉಸ್ವಾಸ್ ಸೊಡಿನಾಸ್ತಾಂ ಉಲಂವ್ಚೊ ಜೆಮ್ಮಾ ಮತಿಂತ್ ಆಸ್ಲ್ಲೆಂ ವ ಕಾಳ್ಜಾಂತ್ ಆಸ್ಲ್ಲೆಂ ಆಸ್ಲ್ಲ್ಯಾಪರಿಂಚ್ ಶೀದಾ ಸಾಂಗ್ತಾ - ಹೊ ಜಾವ್ನಾಸಾ ಜೆಮ್ಮಾಚೊ ಭಾಂಗ್ರಾಳೊ ಗೂಣ್!
ಆಯ್ಲೆವಾರ್ ಮಂಗ್ಳುರ್ ಗೆಲ್ಲ್ಯಾವೆಳಾರ್ ಜೆಮ್ಮಾಯೀ ರಜೆರ್ ಗಾಂವಾಕ್ ಆಯಿಲ್ಲೊ ದೆಕುನ್ ತಾಕಾ ಪರತ್ ಭೆಟ್ಚೊ ಸಂದರ್ಭ್ ಲಾಭ್ಲೊ. ಜಸೆಂ ಜೆಮ್ಮಾ ಆಪ್ಲಿಂ ಬರ್ಪಾಂ ವಿಭಿನ್ನ್ ಚಿಂತ್ನಾಂನಿ ಗುಂತ್ತಾಗೀ ತ್ಯಾಚ್ಪರಿಂ ಜೆಮ್ಮಾಚೆಂ ಉಲವ್ಣೆಂಯೀ ವಿಶೇಷ್ ಚಿಂತ್ಪಾಚಾ ವಿಷಯಾಂಚೆಂ. ತಾಚ್ಯೆಲಾಗಿಂ ಉಲಯ್ತಾನಾ ಮತಿಕ್ ಸಮಾಧಾನ್ ಭಗ್ತಾ ಏಕ್ ಗೆಂದಾಳಿ ಬೊಂಡೊ ಪಿಯೆಲ್ಲ್ಯಾಪರಿಂ; ಮತ್ ಚುರುಕ್ ಜಾತಾ ತಿಂ ಜಿಗ್ರಿ ಗೊಬ್ರಾಳಿಂ ಕೆಳಿಂ ಖೆಲ್ಲ್ಯಾಪರಿಂ; ಮತಿಕ್ ಹುರುಪ್ ಯೆತಾ ತ್ಯಾ ವಾರ್ಯಾ ಪಾಂಕ್ಯಾ ಪಂದಾ ಬಸ್ಲ್ಲ್ಯಾಪರಿಂ.
ದೇವ್ ಬರೆಂ ಕರುಂ ವಾಯ್ಲೆಟ್, ಕೊಂಕ್ಣೆಂತ್ಲ್ಯಾ ಏಕಾ ವಿಂಚ್ಣಾರ್ ಸಾಹಿತಿಕ್ ತುವೆಂ ಆಜ್ ಆಮ್ಚೆ ಸಮೊರ್ ಹಾಡ್ನ್, ತಾಚಾ ಕಾಳ್ಜಾಂತ್ಲಿಂ ಭಗ್ಣಾಂ ಆಮ್ಚೆ ಮುಖಾರ್ ಉಗ್ಡಾಪಿಂ ಕೆಲ್ಲ್ಯಾಕ್. ಕಿತೆಂಚ್ ಆವಾಜ್ ಉಟಯ್ನಾಸ್ತಾಂ, ಕಿತೆಂಚ್ ಪಾಟಿಂ ಆಶೆನಾಸ್ತಾಂ ಯಶಸ್ವೀ ಕಾಮಾಂ ಕರ್ಚ್ಯಾ ಭೋವ್ ಥೊಡ್ಯಾ ವ್ಯಕ್ತಿಂ ಪಯ್ಕಿ ಜೆಮ್ಮಾ ಪಡೀಲ್ ಜಾವ್ನಾಸಾ ಏಕ್ ಮ್ಹಳ್ಯಾರ್ ಕಿತೆಂಚ್ ಅತಿಶಯ್ ಜಾಂವ್ಚೊ ನಾ.
ಲ್ಯಾನ್ಸಿ ಮಾಡ್ತಾ
ದೇವ್ ಬರೆಂ ಕರುಂ ತುಕಾ, ತ್ಯಾ ತುಜ್ಯಾ ವಿಂಚ್ಣಾರ್ ದೋನ್ ಉತ್ರಾಂಕ್. ಮ್ಹಾಕಾ ತುಜೆಂ ಬರಾಪ್ ವಾಚುನ್ ಸಂತೊಸ್ ಜಾಲೊ ಶಿವಾಯ್ ರಾಗ್ ಯೇಂವ್ಕ್ ನಾ. ಆಮ್ಚೆ ತರ್ನಾಟೆ ಆತಾಂ ಜಾಲ್ಯಾರ್ಯೀ ಶಿಸ್ತ್ ಸಾಂಬಾಳ್ಚ್ಯಾಂತ್ ಮಾತ್ಸೆ ಪಾಟಿಂಚ್ ಮ್ಹಣ್ಯೆತ್. ತಾಂಕಾಂ ಥೊಡೆ ಪಾವ್ಟಿ ಕಿತೆಂ ಜಾತಾ ಮ್ಹಳ್ಳೆಂಚ್ ಸಮ್ಜೊಂಕ್ ಅಸಾಧ್ಯ್ ಕಸೆಂ ದಿಸ್ತಾ. ಹಾಂವ್ ತೆನ್ನಾಂ ಮಾತ್ಸೊ ಕುಡಿಂತ್ ಮೊಟೊಂ ಆಸ್ಲ್ಲೊಂ ತರ್ ತ್ಯಾ ತರ್ನಾಟ್ಯಾಂಕ್ ಹೊಲಾ ಥಾವ್ನ್ಂಚ್ ಭಾಯ್ರ್ ಧಾಂವ್ಡಾಯ್ತೊಂ ಕೊಣ್ಣಾಂ; ಪುಣ್ ಜಿವಾನ್ ಭಾರೀಕ್ ಆಸ್ಲ್ಲ್ಯಾನ್ ಹಾಂವೆ ಧ್ವನಿವರ್ಧಕಾಚ್ಯಾ ಆವಾಜಾ ಮುಖಾಂತ್ರ್ ತಸಲಿಂ ಹೀನ್ ಆತರ್ವಣಾಂ ಬಂಧ್ ಕರುಂಕ್ ಉಲೊ ದಿಲ್ಲೊ. ಮ್ಹಜೊ ಉಗ್ಡಾಸ್ ತೀಸ್ ವರ್ಸಾಂ ಪಾಟಿಂ ವ್ಹೆಲ್ಲ್ಯಾ ತುಕಾ ಧನ್ಯವಾದ್. ಬರೆಂ ತರ್ ಮೋಗ್ ಆಸೊಂ, ಸದಾಂಚ್ ಖಾಲ್ತೊ ಮಿತ್ರ್, ಆಸ್ಟಿನ್.
- ಆಸ್ಟಿನ್ ಪ್ರಭು, ಚಿಕಾಗೊ.
ಮೊಗಾಳ್ ಗ್ರೆಗ್,
ದೇವ್ ಬರೆಂ ಕರುಂ ತುಕಾ, ಕೊಂಕ್ಣಿ ಭಾಸೆಚಾ ವಾವ್ರಾಕ್ ಲಾಗ್ಲ್ಲ್ಯಾ ಭಾವಾ ಭಯ್ಣಿಂ ಥಂಯ್ ಬರಿ ಅಭಿಪ್ರಾಯ್ ಮ್ಹಾಕಾ ಭೋವ್ ರುಚಿಕ್ ಲಾಗ್ತಾ, ಕಿತ್ಯಾಕ್ಗೀ ಮ್ಹಳ್ಯಾರ್, ಆಮಿ ಸಕ್ಡಾಂನಿ ಮೆಳೊನ್ ಕೊಂಕ್ಣೆಚೊ ಬರೊ ಉಪ್ಯೋಗ್ ಕರುಂಕ್ ಜಾಯ್, ಕೊಂಕ್ಣಿ ಭಾಸೆಚಾ ಪ್ರಚಾರಾಂತ್ ಕರುಜಾಯ್ ತೆದ್ನಾಂ ಮಾತ್ರ್ ಕೊಂಕ್ಣೆಚೆರ್ ಬರೊ ಪ್ರಭಾವ್ ಪಡ್ಚೊ ಚಡ್ ಆನಿ ಪ್ರತ್ಯೇಕ್ ಜಾವ್ನ್ ಕೊಂಕ್ಣಿ ಲೇಕಕಾಂಕ್ ಪಾಟಿಂಬೊ ದೀಜಾಯ್. ಪರತ್ ದೇವ್ ಬರೆಂ ಕರುಂ.
ಆಸ್ಟಿನ್ ಬಾಬ್,
ಕೊಂಕ್ಣಿ ಭಾಶೆಚಿ ಉದರ್ಗತಿ ಆಶೆಂವ್ಚೊ ಮಹಾನ್ ವೆಕ್ತಿ ಮಾನೆಸ್ತ್ ಆಸ್ಟಿನ್ ಬಾಬ್ ತುಕಾ ದೇವ್ ಬರೆಂ ಕರುಂ ಮ್ಹಣ್ತಾಂ. ತುಜಿಂ ಥೊಡಿಂ ಉತ್ರಾಂ ಥೊಡ್ಯಾಂಕ್ ಬರಿಂ ಲಾಗ್ಚಿಂನಾಂತ್. ತುಂ ಏಕ್ ಅಪುಟ್ ಕೊಂಕ್ಣಿ ಭಾಸೆಚೊ ಮೋಗಿ ಮ್ಹಣ್ ಸಾಂಗೊಂಕ್ ಮ್ಹಾಕಾ ಕಾಂಯ್ಚ್ ದುಭಾವ್ ನಾ. ಲಗ್ಬಗ್ 1976/1977 ಇಸ್ವೆಂತ್, ಡೋನ್ ಬೊಸ್ಕೊ ಹೊಲಾಂತ್ ತುಂ ಕೊಂಕಣಿ ನಾಟಕ್ ಸಭೆಚಾ ಮಾಂಚಾರ್ ರಾಗಾನ್ ಉಲಯಿಲ್ಲೊಯ್.
ಹಾಂವ್ ಕೊಂಕಣಿ ಸಭೆಚಾ ಗಾಯನ್ ಸ್ಪರ್ಧ್ಯಾಂತ್ ಭಾಗ್ ಘೆಂವ್ಚಾ ಆಶೆನ್ ಆಯಿಲ್ಲೊಂ, ಸ್ಪರ್ಧೊ ಅಖೇರ್ ಜಾತಾನಾ.. ಉಪ್ಕಾರ್ ಆಟವ್ಣಿ ಜಾತಾನಾ ಥೊಡೆ ತರ್ನಾಟೆ (ಖಂಚ್ಯಾ ಫಿರ್ಗಜೆಚೆ ತೆಂ ನಾಕಾ) ಎಕ್ಟಾಂಯ್ ಜಾವ್ನ್, ಕಾಂಡೊಮಾಂನಿ ವ್ಹಾರೆಂ ಭರ್ನ್ ಫುಗ್ಗೆ ಕರ್ನ್ ಸ್ಟೇಜಿಚಾ ದೆಗೆರ್ ಉಭಯ್ತಾಲೆ ಆನಿ ಮೊಸ್ತ್ ಆವಾಜ್ ಕರ್ತಾಲೆ. ತುವೆಂ ಸೊಸ್ತಾ ಪರ್ಯಾಂತ್ ಸೊಸ್ಲೆಂಯ್, ಅಖೇರಿಕ್ ಭೋವ್ಶಾ ಸೊಸುಂಕ್ ಜಾಯ್ನಾಸ್ತಾಂ ಅಶೆಂ ಮ್ಹಳೆಂಯ್; "ಆಮಿ ಕ್ರಿಸ್ತಾಂವಾಂ ಕೊಂಕ್ಣಿ ಪ್ರೇಮಿ ಜಾಯ್ಜಯ್ ಶಿವಾಯ್, ದುಕ್ರಾಮಾಸ್ ಖಾತಾಂವ್ ಮ್ಹಣ್, ದುಕ್ರಾಚೆಂ ವರ್ತನ್ ಹಾಂಗಾಸರ್ ದಾಖಂವ್ಚೆಂ.. ಮೊಸ್ತ್ ಲಜೆಚೆಂ ಆನಿ ನಾಲಿಸಾಯೆಚೆಂ" ಮ್ಹಳ್ಳೆಂಯ್.
ಆಜ್ಕಾಲ್ಚಿಂ ಕೊಂಕ್ಣಿ ಕಾರ್ಯಕ್ರಮಾಂ ಥಂಯ್ ಹಾಂಗಾ ತುಜ್ಯಾ ಉತ್ರಾಂಚೊ ಪ್ರಭಾವ್ ಭರ್ಪೂರ್ ರೀತಿನ್ ವ್ಹಾಳ್ಳಾ, ದೆಕುನ್ ತುಜೆ ತಸಲ್ಯಾ ಕೊಂಕ್ಣಿ ಪ್ರೇಮಿಕ್, ಮ್ಹಾಕಾಯ್ ಉಲ್ಲಾಸುಯಾಂ ಮ್ಹಣ್ ಭಗೊನ್. ತುಜಿಂ ಕಡಕ್ಕ್ ಉತ್ರಾಂ ಹಾವೆಂ ಹಾಂಗಾಸರ್ ಉಚಾರ್ಲಿಂ. ಮ್ಹಜಿ ಚೂಕ್ ಆಸ್ಲ್ಯಾರ್ ವ್ಹಡ್ ಭಾವಾನ್ ಧಾಕ್ಟ್ಯಾಕ್ ಮಾಫ್ ಕರ್ಚೆಂ. ಮೋಗ್ ಅಸೊಂದಿ. ಪರತ್ ಆಮಿ ಸಾಂಗಾತಾ ಮೆಳ್ತಾಸರ್ ದೇವ್ ಬರೆಂ ಕರುಂ ತುಜ್ಯಾ ಕೊಂಕಣಿ ಕುಟ್ಮಾಕ್ಯೀ.
- ಲ್ಯಾನ್ಸಿ ಮಾಡ್ತಾ, ದುಭಾಯ್.
ಉಲ್ಲಾಸ್ ತುಕಾ ಲ್ಯಾನ್ಸಿಯಾಬ್,
ಮಾನೆಸ್ತ್ ಲ್ಯಾನ್ಸಿ ಮಾಡ್ತಾ ಮ್ಹಾಕಾ ವೆಕ್ತಿಗತ್ ಜಾವ್ನ್ ವಳ್ಕಿಚೊ. ಆಜ್ ಕಾಲ್ ಥಾವ್ನ್ ಆಮ್ಚಿ ಸಳಾವಳ್ ನ್ಹಂಯ್, ಸಭಾರ್ ವರ್ಸಾಂ ಥಾವ್ನ್ ಹಾಂವ್ ಹಾಚೆವಿಶಿಂ ಪಳೆವ್ನ್, ಆಯ್ಕೊನ್ ಆಯ್ಲಾಂ ದೆಕುನ್ ಹಾಚೆ ಎಕೇಕ್ ವಿಚಾರ್ ಸಮ್ಜತಾಂ. ಹೊ ಫಕತ್ತ್ ಸಾಂಗ್ಚೆ ತಸಲೊ ನ್ಹಂಯ್, ಕಾರ್ಯರುಪಾರ್ ಕರ್ಚೊ. ಮೊವಾಳ್ ಉತ್ರಾಂಚೊ, ಖಾಲ್ತ್ಯಾ ಸ್ವಭಾವಾಚೊ ಆನಿ ಖುಶಾಲಿ ಮನೋಭವಾಚೊ ಮನಿಸ್. ಖರೆಂಚ್ ಜಾವ್ನ್ ವಾಯ್ಲೆಟಾನ್ ಹಾಕಾ ಕೊಂಕ್ಣಿ ಕಾರ್ಭಾರಿ ಮ್ಹಣ್ ವಿಂಚುನ್ ಬರೆಂ ಕಾಮ್ ಕೆಲಾಂ - ಉಲ್ಲಾಸ್ ತುಕಾ ಬುಲ್ಲಾ.
- ಗ್ರೆಗ್, ಶಾರ್ಜಾ.
ಪುತ್ತುರ್ಚೊ ಲ್ಯಾನ್ಸಿ ಮಾಡ್ತಾ - ಖರೊ ಕೊಂಕ್ಣಿ ಮೋಗಿ
ಹಾಂವ್ ಸ ವರ್ಸಾಂಭರ್ ಮಂಗ್ಳುರ್ ಕೊಂಕ್ಣಿ ನಾಟಕ್ ಸಭೆಚೊ ಕಾರ್ಯದರ್ಶಿ ಜಾವ್ನ್ ಆಸ್ಲ್ಲ್ಯಾವೆಳಾರ್ ನಾಟಕ್ ಸಭೆಚ್ಯಾ ಗಾಯನ್ ಸ್ಪರ್ದ್ಯಾಂಚೊ ಸಂಚಾಲಕ್ ಜಾವ್ನ್ ಆಸ್ಲ್ಲೊಂ. ತೆನ್ನಾಂ ಸ್ಪರ್ದ್ಯಾಂಕ್ ಪುತ್ತುರ್ ಥಾವ್ನ್ ಸಭಾರ್ ತರ್ನಾಟಿಂ ಡೆನ್ನಿಸ್ ಮೆಸ್ತ್ರಿಚ್ಯಾ ಮುಖೇಲ್ಪಣಾಖಾಲ್ ಹಾಜರ್ ಜಾತಾಲಿಂ ಆನಿ ಪಾತ್ರ್ ಘೆವ್ನ್ ಸಭಾರ್ ಇನಾಮಾಂ ಆಪ್ಲಿಂ ಕರ್ತಾಲಿಂ. ಕೊಂಕ್ಣಿ ಕಾರ್ಭಾರಿ ಅಂಕಣಾಂತ್ ವಾಯ್ಲೆಟಾನ್ ಘೆತ್ಲ್ಲೆಂ ತಾಚೆಂ ಸಂದರ್ಶನ್ ಲೇಖನ್ ವಾಚ್ತಾನಾ ಹ್ಯಾಂ ಪಯ್ಕಿ ಲ್ಯಾನ್ಸಿಚೆಂ ನಾಂವ್ ಮ್ಹಜ್ಯಾ ಮತಿ ಪಡ್ದ್ಯಾಚೆರ್ ಪಾಶಾರ್ ಜಾಲೆಂ. ಲ್ಯಾನ್ಸಿಕ್ ಕೊಂಕ್ಣೆಚೊ ಮೋಗ್ ಲ್ಹಾನ್ಪಣಾರ್ಚ್ ಆಸ್ಲ್ಲೊ ತಾಣೆಂ ತೊ ವೃದ್ಧಿ ಕೆಲೊ ಆನಿ ಆಜ್ ತಾಚೊ ಕೊಂಕ್ಣೆಕ್ ಸಹಕಾರ್ ನಿಜಾಕ್ಯ್ ವ್ಹರ್ತೊ. ದೇವ್ ತಾಕಾ ಹಜಾರಾಂನಿ ಪಾಟಿಂ ದೀಂವ್ ಆನಿ ತಾಚೆಂ ತೆಂ ತೀನ್ ನೆಕೆತ್ರಾಂಚೆಂ ಕುಟಾಮ್ ಪತಿಣೆಬರಾಬರ್ ಸದಾಂಚ್ ಸಂತೊಸಾನ್ ಜಿಯೆಂವ್. ಲ್ಯಾನ್ಸಿ ತಸಲೆ ಮಾನೆಸ್ತ್ ಆಮ್ಚಿ ದುರ್ಬಳ್ ಕೊಂಕ್ಣಿ ಮಾತ್ಸಿ ಗ್ರೇಸ್ತ್ ಕರುಂಕ್ ಸಕ್ತಾತ್, ತಾಂಚೊ ಸಹಕಾರ್, ಆಧಾರ್ ಆನಿ ಪ್ರೋತ್ಸಾಹ್ ದೀವ್ನ್. ಅಸಲೆ ಮಿಶಿಯೊನರಿ ಆಮ್ಕಾಂ ಚಡೀತ್ ಥರಾನ್ ಮೆಳ್ಲ್ಲೆ ತರ್ ಕೊಂಕ್ಣೆಚೆಂ ಭಾಗ್ ಸುಮಧುರ್ ಜಾತೆಂ ಆಸ್ಲೆಂ. ಲ್ಯಾನ್ಸಿಚಿ ವಳೊಕ್ ಜಾಗತಿಕ್ ಕೊಂಕ್ಣಿ ಪ್ರಜೆಕ್ ಕರುನ್ ದಿಲ್ಲ್ಯಾ ವಾಯ್ಲೆಟಾಕ್ ಧನ್ಯವಾದ್!
- ಆಸ್ಟಿನ್ ಪ್ರಭು, ಚಿಕಾಗೊ
ರೊಜಿಟಾ ನಜ್ರೆತಾಚೆ ವಿಚಾರ್ ಮಾಂದ್ಚೆತಸ್ಲೆ - ಆಮಿಂ ಪ್ರಜಾಪ್ರಭುತ್ವ್ ಚಿಂತ್ಪಾಚೆ ದೆಕುನ್ ಹರ್ಯೆಕ್ಲ್ಯಾಕ್ ಸ್ವತಂತ್ರ್ಪಣಿಂ ಉಲಂವ್ಕ್, ಬರಂವ್ಕ್ ಹಕ್ಕ್ ಆಸಾ, ತಾಚೊ ಮತ್ಲಬ್ ಹೊ ನ್ಹಂಯ್ಕೀ, ಆಮಿಂ ಕಿತೇಂಯ್ ಉಲವ್ಯತ್ ವಾ ಕಿತೇಂಯ್ ಬರವ್ಯೆತ್ ಮ್ಹಣ್. ಹ್ಯಾ ದಿಶೆನ್ ಪಳೆಲ್ಯಾರ್ ವಿಮರ್ಸೊ ಬರಯ್ತೆಲ್ಯಾಂಕ್ ಬರೆಂ ಚಿಂತಾಪ್, ಬರೆಂ ಶಿಕಾಪ್, ಬರಿ ಸಮ್ಜಣಿ ಆಸ್ಚಿ ಭೋವ್ ಗರ್ಜೆಚಿ. ಕಿತ್ಯಾಕ್ ಮ್ಹಳ್ಯಾರ್ ಪಿಡೆಕ್ ದಿಂವ್ಚೆಂ ವಕಾತ್ ಥೊಡೆಪಾವ್ಟಿಂ ಕೊಡು ಆಸ್ತಾ, ತಶೆಂ ಮ್ಹಣೊನ್ ಕೊಡು ಆಸ್ಚೆಂ ಪುರಾ ವ್ಹಕಾತ್ ಮ್ಹಣೊನ್ ಸಂಕ್ಪಾಶಾಣ್ ಖೆಲ್ಯಾರ್ ಜೀವ್ ವಚಾತ್. ವಿಮರ್ಸೊಯೀ ಹೆಚ್ಚ್ ಪ್ರಕಾರಾಚೊ ದೆಕುನ್ ವಿಮರ್ಸೊ ಕರ್ಚೆ ಬುಧ್ವಂತ್ ಮ್ಹಳ್ಳೆಂ ಚಿಂತಾಪ್ ಚಿಂತ್ಚೆಂ ಮೂರ್ಖ್ಪಣ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್ - ಹೆಂ ಮ್ಹಜೆಂ ಖಾಸ್ಗಿ ಚಿಂತಾಪ್.
- ಸಿ.ಎಲ್. ಕರಾಮಾ, ದುಭಾಯ್.
ಕೆಸೊಳಿ ಪಿಕ್ಲ್ಯಾಗಾಯ್?
’ಪ್ರೀತಮ್ ಕಿರೆಂ’ಚ್ಯಾ ಅಂಕಣಾಂತ್ಲೆ ಥೊಡೆ ವಿಚಾರ್ ಸಕಾಳಿಕ್ ಆನಿ ಚಿಂತ್ಪಾಕ್ ಇಡೆಂ ಕರ್ನ್ ದಿತಾತ್ ತರ್ಯೀ, ಮ್ಹಾಕಾ ವೆಕ್ತಿಗತ್ ಜಾವ್ನ್ ಹಾಚ್ಯಾ ಪರಿಪಕ್ವತೆಚೆರ್ (Maturity) ಸವಾಲ್ ಉದೆತಾ. ಎಕಾ ಲೇಖಕಾಚೆ ವಿಚಾರ್ ತೀಕ್ಶ್ಣ್ ಆಸ್ಯೆತಾ ಪುಣ್ ದಾವ್ಯಾಪಂತೀಯಾಕ್ (Leftist) ಸೀಮಿತ್ ಜಾವ್ನ್ ಆಸಾನಾಯೆ. ಧಾಖ್ಲೊ ತಾಚೆಂ ವಿಮರ್ಸೊ ಲೇಖನ್ ಖರೆಂಚ್ ವಿಮರ್ಶಕಾಚಿ ಅಸ್ಕತ್ಕಾಯ್ ವಾಚ್ಪ್ಯಾಕ್ ಧಾಖಯ್ತಾ. ಹಾಂಗಾಸರ್ ಲೇಖಕಾನ್ ವಿಮರ್ಶ್ಯಾಕ್ ವಾಪಾರ್ಲ್ಲೆ ಥೊಡೆ ಸಬ್ಧ್ ಉಣ್ಯಾ ಚಿಂತ್ಪಾಚೆ/ಉತಳಾಯೆಚೆ. ರೇಗಾಮಾನ್ ಅಪ್ಲ್ಯಾ ವಿಮರ್ಶ್ಯಾಂತ್ ಸಾಂಗ್ಚೆಪರಿಂ ವಿಮರ್ಸೊ ಬಾಜಾರಿ ಭಾಸೆಂತ್ ಆಸಾನಾಯೆ, ಆಪ್ಲ್ಯಾ ಬಾಯ್ಲೆಚಿಂ ದುರಾಂ ರಸ್ತ್ಯಾ ದೆಗೆಂತ್ ಸಾಂಗ್ಚಾ ಮಟ್ಟಾಚೊ ಆಸಾನಾಯೆ. ತಸಲೊ ವಿಮರ್ಸೊ ಜಾಯ್ನಾ. ವಿಮರ್ಸೊ ನಿತಳ್ ಆನಿ ಪ್ರಭುದ್ದ್ ಆಸಾಜಯ್. ಆನಿ ವಿಮರ್ಶಕಾನ್ ಹಿ ಜವಾಭ್ದಾರಿ ಸಾಂಬಾಳ್ಚಿ ಅವಶ್ಯ್. ಆನಿ ಅಸಲ್ಯಾ ವಿಮರ್ಶ್ಯಾಂಕ್ ಪರ್ಗಟ್ ಕರ್ಚಿ ದಾಕ್ಶೆಣ್ ಸಂಪಾದಕ್ ಸಾಯ್ಬಾನ್ ಸಾಂಡಿಜಾಯ್ ಮ್ಹಳ್ಳೆಂ ಸುಚನ್ ಮ್ಹಜೆಂ.
- ರೊಜಿಟಾ ನಜ್ರೆತ್, ಮಿರಾರೋಡ್.
ಉಲ್ಲಾಸ್ ಆನಿ ಅಭಿನಂದನ್ ತುಮ್ಕಾಂ ತುಮ್ಚ್ಯಾ ಖಳ್ಮಿತ್ ಆನಿ ಸುಶೆಗ್ ನಾಸ್ತಾಂ ಕರುನ್ ಆಸ್ಚ್ಯಾ ಕೊಂಕ್ಣಿ ವಾವ್ರಾಕ್. ತುಮ್ಚೊ ವಾವ್ರ್ ಅಸೊಚ್ಚ್ ಮುಖಾರ್ ಸರೊಂ ಆನಿ ಕೊಂಕ್ಣಿ ಭಾಸೆಕ್ ಹಾಚೆಂ ಬರೆಂಪಣ್ ಧಾರಾಳ್ ಮಾಪಾನ್ ಮೆಳೊಂದಿ ಮ್ಹಣ್ ಆಶೆತಾಂ.
- ಆಂಬ್ರೊಸ್ ಡಿಮೆಲ್ಲೊ
ದಾಯ್ಜ್ ಸಾಹಿತಿಕ್ ಸ್ಪರ್ಧೊ - ಕೊಂಕ್ಣೆಂತ್ ನವೆಸಾಂವ್!
ದೇವ್ ಬರೆಂ ಕರುಂ ದಾಯ್ಜ್ ಪಂಗ್ಡಾಕ್, ತುಮಿಂ ಕೊಂಕ್ಣಿ ಸಾಹಿತ್ಯಾಚ್ಯಾ ವಾಡಾವಳೆಕ್ ಖರೆಂಚ್ ಜಾವ್ನ್ ಪ್ರಾಮಾಣಿಕ್ ರಿತಿಚೊ ವಾವ್ರ್ ಕರ್ನ್ ಆಸ್ಚಿ ಗಜಾಲ್ ಭೋವ್ ಸಂತೊಸಾಚಿ. ಪ್ರತ್ಯೇಕ್ ಜಾವ್ನ್ ಪಾಟ್ಲ್ಯಾ ತೀನ್ ವರ್ಸಾಂನಿ ತುಮಿ ಮಾಂಡುನ್ ಹಾಡ್ಲ್ಲೆ ದಾಯ್ಜ್ ಸಾಹಿತಿಕ್ ಸ್ಪರ್ಧೆ ಖರೆಂಚ್ ಜಾವ್ನ್ ಸಾಹಿತಿಂಕ್ ಉತ್ತೇಜನ್ ದಿತಾ. ಹೆಂ ನಿಜಾಯ್ಕೀ ಕೊಂಕ್ಣೆಂತ್ ನವೆಸಾಂವ್. ಮ್ಹಾಕಾ ಭೋವ್ ಸಮಧಾನ್ ಭಗ್ಲೆಂ ಹ್ಯಾ ಸ್ಪರ್ಧ್ಯಾಚಾ ವೊರಯ್ಣಾರಾಂಕ್ ಪಳೆವ್ನ್ - ಸರ್ವ್ ಕೊಂಕ್ಣೆಂತ್ಲೆ ನಾಮ್ಣೆಚೆ ಕಾಣ್ಯೆಗಾರ್ ಆನಿ ನಿಸ್ಪಕ್ಶ್ ರಿತಿಚೆ ವೊರಯ್ಣಾರ್. ತುಮ್ಕಾಂ ದೇವ್ ಬರೆಂ ಕರುಂ ಆನಿ ತುಮ್ಚೊ ವಾವ್ರ್ ಹೆರಾಂಕ್ ಪ್ರೇರಣ್ ದೀಂವ್ಕ್ ಪಾವೊಂದಿ ಮ್ಹಣ್ ಆಶೆತಾಂ.
- ಕೆವಿನ್ ಡಿ’ಮೆಲ್ಲೊ, ಕಾರ್ಕಳ್.
ಆನ್ಯೇಕ್ ಕೊಂಕ್ಣಿ ವಾವ್ರಾಡಿ!
ಲಿಯೊ ರೊಡ್ರಿಗಸ್ ಅಬುದಾಬಿ - ಆನ್ಯೇಕ್ ಕೊಂಕ್ಣಿ ಶೆತಾಂತ್ಲೊ ವಾವ್ರಾಡಿ. ತಾಚೊ ವಾವ್ರ್ ಗುಪಿತ್. ಖಂಯ್ಸರ್ ಕಸಲೆಂಯ್ ಕೊಂಕ್ಣಿ ಕಾರ್ಯಕ್ರಮ್ ಜಾಂವ್ - ಅಬುದಾಬಿಂತ್, ದುಬಾಯಾಂತ್, ಕುವೇಯ್ಟಾಂತ್, ಮಂಗ್ಳುರಾಂತ್ ತಾಚಿ ಹಾಜ್ರಿ ಸದಾಂಚ್. ಲಿಯೊ ಆನಿ ಲವೀನಾ ಭಾರಿಚ್ ಸರಳ್ ಸ್ವಭಾವಾಚಿಂ ಮಂಗ್ಳುರ್ಗಾರಾಂ. ಆಮ್ಚಿ ಪಯ್ಲಿ ಭೆಟ್ ಜಾಲ್ಲಿ 2000 ಇಸ್ವೆಂತ್ ಸಾಂತ್ ಆಗ್ನೆಸ್ ಇಸ್ಕೊಲ್ ವಠಾರಾಂತ್ 200 ವ್ಯಾ ವಿಲ್ಫಿ ನಾಯ್ಟಾವೆಳಾರ್.
ಹರ್ ಕಾಮಾಂಕ್ ಆಧಾರ್ ದಿತೆಲೆ ಭಾರಿಚ್ ವಿರಳ್ ತರೀ ಸರಳ್ ಸ್ವಭಾವಾಚೊ ಲಿಯೊ ಸದಾಂಚ್ ತಯಾರ್ ಆಪ್ಲೊ ಹಾತ್ ದೀವ್ನ್ ಕೊಣಾಕ್ಯ್ ಆಪ್ಲಿ ತಾಂಕ್ ಪುರ್ತಿ ಕುಮಕ್ ದೀಂವ್ಕ್. ಥೊಡ್ಯಾ ವರ್ಸಾಂ ಆದಿಂ ಮರಣ್ ಪಾವ್ಲ್ಲ್ಯಾ ’ಜನವಾಹಿನಿ’ ಕಾನಡಿ ಪತ್ರಾ ಖಾತಿರ್ ಲಿಯೊನ್ ಕಾಡ್ಲ್ಲಿ ವಾಂವ್ಟ್ ಶ್ಲಾಘನೀಯ್. ಆಕಸ್ಮತ್ ಹೆಂ ಪತ್ರ್ ಬಂಧ್ ಪಡ್ಲ್ಲ್ಯಾನ್ ಲಿಯೊಕ್ ಜಾಲ್ಲೊ ದುಡ್ವಾ ಮಾರ್ಯ್ ಬೃಹತ್ ಆನಿ ಅಚಾನಕ್. ತರೀ ಲಿಯೊಚಿ ಹೆರಾಂಕ್ ಕುಮಕ್ ಕರ್ಚಿ ಸವಯ್ ಭಿಲ್ಕುಲ್ ಉಣಿ ಜಾಂವ್ಕ್ ನಾ; ತಿ ವಾಡತ್ತ್ ವೆತಾ ತ್ಯಾ ವೊಡಾ ರೂಕಾಪರಿಂ. ತಾಚಿಂ ಪಾಳಾಂ ರೊಂಬೊನ್ಂಚ್ ವೆತಾತ್ ಹರ್ ಸಂಘ್ ಸಂಸ್ಥ್ಯಾಂನಿ ಆಪ್ಲ್ಯಾ ಆಧಾರ್ ಸಹಕಾರಾ ಮುಖಾಂತ್ರ್. ಹಾಕಾಚ್ ಹಾಂವ್ ಲಿಯೊಕ್ ಮ್ಹಜೆಂ ಚೆಪೆಂ ಉಕಲ್ತಾಂ! ಹಾಚೆಂ ಸಂದರ್ಶನ್ ಕರುನ್ ದಿಲ್ಲ್ಯಾ ವಾಯ್ಲೆಟಾಕ್ ಮ್ಹಜೆಂ ವಂದನ್ ಆನಿ ಜಾಂವ್ ತಾಚೆಂ ಫುಡಾರಿಂ ನಂದನ್.
ಆನಿ ಆತಾಂ ನಾನುಚೆ ವಿಚಾರ್ ಉಚಾರಾಂತ್ಲೆ ಉಮಾಳೆ ವಾಚ್ತಾನಾ ಹೆಂ ಬರಯಾಂಚ್ ಮ್ಹಣ್ ಭೊಗ್ತಾ. ವಾಯ್ಲೆಟಾನ್ ಸಾಂಗ್ಲ್ಲ್ಯಾ ಪರ್ಮಾಣೆ ಆನಿ ದಿಲ್ಲ್ಯಾ ತ್ಯಾ ದಾಖ್ಲ್ಯಾ ಪರ್ಮಾಣೆ ದಾಯ್ಜ್ ಅಂತರ್ಜಾಳ್ ಜಾವ್ನಾಸಾ ಏಕ್ ಕೊಂಕ್ಣೆಂತ್ಲೆಂ ಖಜಾನ್! ಹಾಂತ್ಲೆಂ ಸರ್ವ್ ಸಾಹಿತ್ಯ್ ಏಕಾಚ್ಚ್ ದಿಸಾನ್ ವಾಚುನ್ ಕಾಡಿಜಾಯ್ ಮ್ಹಣ್ ನಾ. ಆಸ್ಲ್ಲೆಂ ಸಕ್ಕಡ್ ವಾಚಿಜಾಯ್ ಮ್ಹಣ್ಯೀ ನಾ. ಜಾಯ್ ಜಾಲ್ಲೆಂ ವಿಂಚುನ್ ತಾಚಿ ರುಚ್ ಜಾಕೊನ್ ಆಪ್ಲಿ ಅಭಿಪ್ರಾಯ್ ದಿಲ್ಯಾರ್ ಮೊಸ್ತು ಪುರೊ. ತಾಂತುಂ ಕಿತೆಂ ನಷ್ಟ್ ವ ಹೆರಾಂಕ್ ಕಸಲೆಯ್ ಕಷ್ಟ್? ಹೆಂ ಸರ್ವಾಂನಿ ವಾಚುನ್ ಕರುಂಕ್ ಜಾಯ್ ಸ್ಪಷ್ಟ್.
ಭಾರಿಚ್ ಶ್ರಮಾನ್ ಹೆಂ ಜಾಳ್ ಜಿವೆಂ ದವರ್ತಾನಾ ’ಚಡ್ ಜಾಲೆಂ’ ಮ್ಹಣ್ ಅಭಿಪ್ರಾಯ್ ಅಭಿವ್ಯಕ್ತ್ ಕರ್ಚ್ಯಾಂತ್ ಬೊಂಡು ನಾ. ದಾಯ್ಜ್ ಜಾವ್ನಾಸಾ ಸಾಹಿತಿಕ್ ದಿರ್ವ್ಯಾಚೆಂ ಎಕ್ ವರ್ತೆಂ ಖಜಾನ್. ಹ್ಯಾ ಖಜಾನಾಂತ್ ಸದಾಂಚ್ ದರಬಸ್ತ್ ಸಾಹಿತ್ಯ್ ವ್ಹಾಳೊನ್ಂಚ್ ಆಸ್ತೆಲೆಂ ತ್ಯಾ ಪವಿತ್ರ್ ಗಂಗಾ ನಂಯ್ಪರಿಂ. ಹ್ಯಾ ಸಾಹಿತಾಚೊ ಉಪಯೋಗ್ ಬರ್ಯಾನ್ ಕರ್ಚೊ ವಾವ್ರ್ ವಾಚಕ್ ವೃಂದಾಚೊ. ಕೋಣ್ಯ್ ಫುಕಟಾಕ್ ದಿತಾನಾ ’ಚಡ್ ಜಾಲೆಂ’ ಮ್ಹಣ್ಚೆಂ ಆಮಿಂ ಬಂಧ್ ಕರ್ಯಾಂ ಆನಿ ಹ್ಯಾ ದಾಯ್ಚ್ ಅಂತರ್ಜಾಳಾಚೊ ಬರೊ ಉಪಯೋಗ್ ಕರ್ಯಾಂ, ತಥಾಸ್ತು!
- ಆಸ್ಟಿನ್ ಪ್ರಭು, ಚಿಕಾಗೊ
ಧಂಯಾಂತ್ ಫಾತೊರ್ ಸೊಧ್ಚೆಂ ನಾಕಾ
ಅಂತರ್ಜಾಳಿಚೆರ್ ಪರ್ಗಟ್ ಕೆಲ್ಲ್ಯಾ ಕೊಂಕ್ಣಿ ಸಾಹಿತ್ಯಾ ಖಾತಿರ್ ದಾಯ್ಜ್ ಪಂಗ್ಡಾಕ್ ಹಾಂವ್ ಪಯ್ಲ್ಯಾ ಸುವಾತೆರ್ ದೇವ್ ಬರೆಂ ಕರುಂ ಮ್ಹಣ್ತಾ, ಕಿತ್ಯಾಕ್ ಮ್ಹಳ್ಯಾರ್ ತುಮ್ಚ್ಯಾ ದಿಸ್ಪೊಡ್ತ್ಯಾ ವಾವ್ರಾಮಧೆಂ ಸಯ್ತ್ ಕೊಂಕ್ಣೆಚೆರ್ ಅಭಿಮಾನ್ ದವರ್ನ್ ತುಮ್ಚೊ ಮೊಲಾದಿಕ್ ವೇಳ್ ಕೊಂಕ್ಣೆಖಾತಿರ್ ಖರ್ಚಿತಾತ್ ಆನಿ ಸರ್ವಾಂಕ್ ತುಮ್ಚಾ ತಾಂಕಿ ಪುರ್ತೊ ಸಹಕಾರ್ ಆನಿ ಪ್ರೋತ್ಸಾಹ್ ದೀವ್ನ್ಂಚ್ಚ್ ಆಸಾತ್. ದಾಯ್ಜಾ ವಿಶ್ಯಾಂತ್ ಸಭಾರಾಂನಿ ಮ್ಹಜೆಲಾಗಿಂ ಹೊಗ್ಳಿಕ್ ಉಚಾರ್ಲ್ಯಾ ಆನಿ ಹಿ ವಾಜ್ಬಿ ಜಾವ್ನಾಸಾ. ಜರ್ತರ್ ಇತ್ಲಿಚ್ ಮಿನತ್ ಆನಿ ವಾಂವ್ಟ್ ಸಂಸಾರಾಚ್ಯಾ ಖಂಚ್ಯಾಯ್ ಹೆರ್ ಭಾಸೆಚೆರ್ (ಜಾಂವ್ ಇಂಗ್ಲಿಶ್, ಕಾನಡಿ ವಾ ಹೆರ್) ಘಾಲ್ಲಿ ತರ್ ವೆಗಿಂ ನಾಂವ್, ಪೊಯ್ಶೆ, ಮಾನ್ ಪುರಸ್ಕಾರ್ ಸಕ್ಕಡ್ ಮೆಳ್ತೆಂ. ತರ್ಯೀ, ಅಪ್ಲ್ಯಾ ಆವಯ್ಭಾಸೆಕ್ ಮಾನ್ ದೀವ್ನ್ ’ಕೊಂಕ್ಣೆಂತ್ ನಾಂ’ ಮ್ಹಣೊನ್ ದುರ್ಸೊನ್ ಬಸಾನಾಸ್ತಾಂ ’ಆಮ್ಚಾ ತಾಂಕಿಚೆಂ ಕಿತೆಂ ಆಸಾ ತೆಂ ಕರ್ಯಾಂ’ ಮ್ಹಣ್ ವಾವ್ರಾಕ್ ದೆಂವ್ಚೆಂ ಚಿಂತಾಪ್ ಖಂಡಿತ್ ಉಂಚ್ಲೆಂ. ಆನಿ ಉಂಚ್ಲೆಂ ಚಿಂತಾಪ್ ಆಸ್ತೆಲ್ಯಾಂಕ್ ಹೆಂ ಸೊಡವ್ನ್ ಸಾಂಗ್ಚಿ ಗರ್ಜ್ ಮ್ಹಣ್ ಮ್ಹಾಕಾ ಭಗಾನಾ.
ವಿಚಾರ್ ಉಚಾರ್ ವಾಚ್ಲೆ. ಥೊಡೆ ಬರೆ ಆಸ್ಲೆ ತರ್ಯೀ ’ಆಯ್ಚಾ ಕಾಳಾರ್ ಲೊಕಾಂಲಾಗಿಂ ವೇಳ್ ನಾತ್ಲ್ಯಾ ದಿಸಾಂನಿ ದಾಯ್ಜಾನ್ ಇತ್ಲೆಂ ಸರ್ವ್ ಪರ್ಗಟ್ ಕರ್ಚ್ಯಾ ಸಾಹಿತ್ಯಾವಿಶಿಂ ಜರೂರ್ ಚಿಂತ್ಚಿ ಗರ್ಜ್ ಆಸಾ’ ಮ್ಹಳ್ಳೆಂ ವಾಚ್ತಾನಾ ಮ್ಹಾಕಾ ಕಿತ್ಯಾಗೀ ಭಗ್ಲೆ ಹೊ ಧಂಯಾಂತ್ ಫಾತೊರ್ ಸೊಧ್ತಾ ಮ್ಹಣ್. ಹಾಂಗಾಸರ್ ಬರವ್ಪಿ ಕೊಣ್? ಸಂಪಾದನ್ ಕರ್ತಲೊ ಕೊಣ್, ಸಂಪಾದನ್ ಕರ್ನ್ ಅಂತರ್ಜಾಳಿಚೆರ್ ಪರ್ಗಟ್ ಕರ್ತಲೊ ಕೊಣ್? ವಾಚ್ಪಿ ಕೊಣ್ ಆನಿ ಪೊಡ್ಕಾಣಿ ಕೊಣಾಕ್!?
ಆಧುನಿಕ್ ಕಾಳಾರ್ ಜಿಯೆಂವ್ಚ್ಯಾ ಆಮ್ಕಾಂ ಖರೊಚ್ ವೇಳ್ ನಾ - ಹೆಂ ಉತಾರ್ ಹಾಂವ್ ಮಾಂಧ್ತಾಂ; ಗಲ್ಫಾಚಿ ಮೆಟಾಂ ಚಡ್ತಾನಾಂಚ್ಚ್, ಕೊಂಕ್ಣಿ ಆಪ್ಲಿ ಮಾಂಯ್ಭಾಸ್ ತಿಕಾ ಹಾಂವೆ ಮಾನಾನ್ ಲೆಕಿಜೆ ಮ್ಹಳ್ಳೆ ವಿಸ್ರೊನ್ ಫಿಂರ್ಗಿ ಭಾಸ್ ಅಪ್ಣಾಂವ್ಚಾ ಹ್ಯಾ ಕಾಳಾರ್, ಕೊಂಕ್ಣೆಂತ್ ಬರಯ್ತೆಲೆ ಸಭಾರ್ ಜಣ್ ಆಸಾತ್ ಆನಿ ಕೊಂಕ್ಣಿ ಉರಯ್ಜೆ ಮ್ಹಳ್ಳೊ ಹುಸ್ಕೊ ಘೆವ್ನ್ ಹ್ಯಾ ಪರ್ಕ್ಯಾ ಗಾಂವಾಂತ್ ಥಾವ್ನ್ ವಾವ್ರ್ ಕರ್ಚೆ ಆಸಾತ್ ಮ್ಹಣ್ ಸಮ್ಜೊವ್ನ್ ಸಂತೊಸ್ ಪಾವಾಜಯ್. ಆಮ್ಕಾಂ ತಾಂಕ್ತಾ ತರ್ ಆಮಿಂ ಇಲ್ಲಿ ಮಿನತ್ ಕರಿಜಾಯ್ - ಹೆಂ ಮ್ಹಜೆಂ ಚಿಂತಾಪ್.
ಆಮಿಂ ಲೈಬ್ರೆರಿಕ್ ವೆತಾಂವ್ ಆನಿ ಸಗ್ಳಿ ಲೈಬ್ರೆರಿಂತ್ ಬೂಕ್ ದಾಸ್ತಾನ್ ಆಸ್ಚೆ ಪಳೆತಾಂವ್, ಹಾಚೊ ಮತ್ಲಬ್ ಲೈಬ್ರೆರಿಂತ್ ದಿಸಾಕ್ ಏಕ್ ಬೂಕ್ ಮಾತ್ರ್ ದವರಿಜೆ ಮ್ಹಣ್ ಮ್ಹಣ್ಚೆಂಗಿ? ತುಕಾ ಏಕ್ ದಾಟೊ ಮೊಟೊ ಬೂಕ್ ವಾಚುಂಕ್ ಮೆಳ್ಳೊ ತರ್ ತುವೆಂ ತೆದ್ನಾಂಚ್ ಬೊಸೊನ್ ತೊ ವಾಚುನ್ ಕಾಡಿಜಯ್ ಮ್ಹಣ್ ನಾಂ ನ್ಹಂಯ್ಗಿ? ತುಜಾ ಸಂದರ್ಭಾ ತೆಕಿದ್, ತುಜ್ಯಾ ವೆಳಾ ತೆಕಿದ್ ತೊ ವಾಚ್ಯೆತ್ ನ್ಹಂಯ್ವೆ? ತೆಚ್ಚ್ಪರಿಂ ’ದಾಯ್ಜ್ ಅಂತರ್ಜಾಳ್’ ಮ್ಹಜ್ಯಾ ಚಿಂತ್ಪಾಪ್ರಕಾರ್ ಏಕ್ ಸಾಹಿತಿಕ್ ಓನ್ಲಾಯ್ನ್ ಲೈಬ್ರೆರಿ - ದೆಕುನ್ ವಾಚ್ಪ್ಯಾಕ್ ವೆಳಾ ಕಾಳಾಫರ್ಮಾಣೆ ವಾಸ್ಚೆಂ ತ್ಯಾ ತ್ಯಾ ವಾಚ್ಪ್ಯಾಚೆರ್ ಹೊಂದ್ವೊನ್ ಆಸ್ತಾಂ, ಇತ್ಲೆಂಚ್ ಪರ್ಗಟ್ ಕರ್ ಮ್ಹಣ್ಚೆಂ ಚಿಂತಾಪ್ ಮ್ಹಜೆಪ್ರಕಾರ್ ’ಲ್ಹಾನ್ ಚಿಂತಾಪ್’.
ಆಮಿ ಕೊಣಾಯ್ಚಾಯ್ ಕಾಜಾರಾಂಕ್ ಗೆಲ್ಯಾರ್ ಥಂಯ್ ವೆವೆಗ್ಳ್ಯಾ ಪ್ರಕಾರಾಚಿಂ ಧಾರಾಳ್ ಖಾಣಾಂ ಆಸಾತ್ ಮ್ಹಣ್ ಸಕ್ಕಡ್ ಎಕ್ಚ್ಚ್ ಪಾವ್ಟಿಂ ಭೊಕಾಂವ್ಕ್ ಗೆಲ್ಯಾರ್ ಪೋಟ್ ಪಾಡ್ ಜಾಂವ್ಕ್ ಆಸಾ ವಾ ಉದ್ಕಾಡೆ ಜಾಂವ್ಕ್ ಆಸಾ. ವಿಶಾಲ್ ನದ್ರೆಂತ್ ಆಮಿ ಸಂಸಾರ್ ಪಳೆಲ್ಯಾರ್ ಬರೆಂ ನೆ? ಕಿತ್ಯಾಕ್ ಹೆಂ ಆಣ್ವೆಂ ಚಿಂತಾಪ್? ಸಂಸಾರ್ ’ಬಾಂಯ್’ ನ್ಹಂಯ್ - ದೆಕುನ್ ಹೆಂ ಬಾಂಯ್ತ್ಲೆಂ ಚಿಂತಾಪ್ ಸೊಡ್ಲೆಂ ತರ್ ತುಕಾ ಮಾತ್ರ್ ನ್ಹಂಯ್, ಕೊಂಕ್ಣೆಕ್ಯೀ ಬರೆಂ ನ್ಹಂಯ್ಗೀ?
- ವಾಯ್ಲೆಟ್ ಜೆ. ಪಿರೇರಾ, ದುಭಾಯ್.
ಆಪ್ಲ್ಯಾ ಆಸ್ಥಿತ್ವಾಚಿಂ ಜಯ್ತೆವಂತ್ ಚ್ಯಾರ್
ವರ್ಸಾಂ ಸಂಪಯ್ಲೆಲ್ಯಾ ದಾಯ್ಜ್ ಪಂಗ್ಡಾಕ್ ಉಲ್ಲಾಸ್ ಆನಿ ಆಭಿನಂದನ್.
ಸಂಪ್ಲ್ಲ್ಯಾ ವರ್ಸಾಂನಿ ತುಮಿಂ ಕೊಂಕ್ಣೆಖಾತಿರ್ ಕೆಲ್ಲೊ
ವಾವ್ರ್ ನಿಜಾಯ್ಕೀ ವರ್ತೊ ಸರ್ವ್ ಕೊಂಕ್ಣಿ ವಾಚ್ಪ್ಯಾಂಕ್ ಭರ್ಮಾಚೊ.
ಪೊಟಾಚೆ ಭುಕೆಖಾತಿರ್ ಆಮಿಂ ಪರ್ಗಾಂವಾಂಕ್ ಪಾವ್ಲ್ಲ್ಯಾಂವ್
ವ್ಹಯ್ ತರೀ ಮಾಂಯ್ ಭಾಸೆಚಿ ಭುಕ್ ಸಯ್ತ್ ತುಮಿಂ ಥಾಂಬೊಂಕ್
ದೀನಾಸ್ತಾನಾ ತಾಚೆ ಪಾಟ್ಲ್ಯಾನ್ ತುಮಿಂ ಕಾಡ್ಚಿ ಸತತ್
ಮಿನತ್ ಆನಿ ವಿಭಿನ್ನ್ ಪ್ರಯೋಗ್ ಕೊಂಕ್ಣೆಕ್ ಖೆಂಡ್ತೆಲ್ಯಾಂಕ್
ಸಯ್ತ್ ಲಜೆರ್ ಘಾಲ್ತಾತ್.
ಸದಾಂನಿತ್ ನವ್ಯಾ ನವ್ಯಾ ಬರ್ಪಾಂ ಆನಿ ಆಂಕಣಾಂನಿ ದಾಯ್ಜ್ ಆಂತರ್ಜಾಳ್
ಸೊಭ್ತಾ ವ್ಹಯ್ ತರೀ ಹರ್ಯೇಕಾ ದಿಸಾ ಇತ್ಲಿಂ ಬರ್ಪಾಂ
ಹ್ಯಾ ವೇಳ್ ಮೆಳಾನಾತ್ಲ್ಲ್ಯಾ ಯುಗಾಂತ್ ವಾಚ್ಪ್ಯಾಚ್ಯಾ
ಸೈರಣಾಚಿ ಪರೀಕ್ಷಾ ಕರ್ತಾತ್ ತಶೆಂ ಭಗ್ತಾ. ಹ್ಯಾ
ದಿಶೆನ್ ಥೊಡ್ಯಾ ಚಿಂತ್ನಾಂಚಿ ಜರೂರ್ ಗರ್ಜ್ ಆಸಾ.
- ನಾನು ಮರೋಳ್, ದುಭಾಯ್
ಪರ್ಬಿಂ ತುಮ್ಕಾಂ... ದಾಯ್ಜ್ ಪಂಗ್ಡಾಕ್...
ನವ್ಯಾಚ್ ಆಕರ್ಶಿಕ್ ಮುಖ್ಪಾನಾ ಸವೆಂ ಸಜಯ್ಲಲೊ ಅಪುಟ್ ಕೊಂಕ್ಣಿ ಜಾಳಿಜಾಗೊ ’ದಾಯ್ಜ್ ಡೊಟ್ ಕೊಮ್’... ಹಾಚ್ಯಾ ಚವ್ತ್ಯಾ ವಾರ್ಸುಗೆಚ್ಯಾ ಭಾಗಿ ಸಂಧರ್ಬಾರ್... ಸಂಪಾದಕ್ ಆನಿಂ ದಾಯ್ಜ್ ಪಂಗ್ಡಾಕ್ ಕಾಳ್ಜಾಗುಂಡಾಯೆ ಥಾವ್ನ್ ಪರ್ಬಿಂ. ಫಕತ್ತ್ ಚ್ಯಾರ್ ವರ್ಸಾ ಆದಿಂ ಜಲ್ಮ್ ಘೆವ್ನ್ ಆಜ್ ಅಂತರ್ಜಾಳಾಚೆರ್ ಪ್ರಕಟ್ ಜಾಂವ್ಚ್ಯಾ ಕೊಂಕ್ಣಿ ಸಾಹಿತ್ಯಾಂತ್ ವೊಡಾ ರುಕಾಚಿ ವಾಡಾವಳ್ ದೆಕೊಂಕ್ ಪಾವ್ಲ್ಲ್ಯಾ ಹ್ಯಾ ಜಾಳಿ ಜಾಗ್ಯಾಕ್ ಕಿತ್ಲಿ ಶಾಭಾಸ್ಕಿ ದಿಲ್ಯಾರ್ಯೀ ತಿ ಉಣಿ೦ಚ್. ಹೆಂ ಜಯ್ತ್... ಆಪ್ಲ್ಯಾ ಮಾಯ್ಭಾಶೆಚೆರ್ ಮೋಗ್ ದವರ್ನ್ ಆಪ್ಲ್ಯಾ ಖಳ್ಮಿತ್ನಾತ್ಲ್ಯಾ ವಾವ್ರಾಸವೆಂ ಆಪ್ಣಾಂವ್ಕ್ ಸಕ್ಲ್ಲ್ಯಾ ದಾಯ್ಜ್ ಪಂಗ್ಡಾಕ್ ಹಾಂವ್ ಚೆಪೆಂ ಉಕಲ್ನ್ ಮಾನ್ ಭಾಗಯ್ತಾಂ.
ಕಾನಡಿ ಲಿಪಿಂತ್ ಅಸಲೊ ಜಾಳಿಜಾಗೊ ಚಲವ್ನ್ ವ್ಹರ್ಚೆಂ ಕಾಮ್ ಸುಲಭಾಯೆಚೆಂ ನ್ಹಂಯ್. ಆಪ್ಲ್ಯಾ ದಿಸ್ಪಡ್ತ್ಯಾ ವಾವ್ರಾ ಮಧೆಂ ತರೀ ತುಮಿಂ ಹ್ಯಾ ಜಾಳಿ ಜಾಳಿಜಾಗ್ಯಾಚ್ಯಾ ವಾಡಾವಳಿಕ್ ದಿಲ್ಲೊ ಆನಿ ದೀವ್ನ್ ಆಸ್ಚೊ ವಾವ್ರ್ ಖಂಡಿತ್ ಜಾವ್ನ್ ಅಪರಿಮಿತ್. ತುಮಿಂ ಕೊಂಕ್ಣಿ ಮಾಯೆಚೆಂ ೠಣ್ ಫಾರಿಕ್ ಕರ್ಚ್ಯಾಂತ್ ಕಸಲ್ಯಾಚ್ ಥರಾಚೊ ಸುರಾತ್ ತುಂವೆಂ ಕರುಂಕ್ನಾಂ. ಖರೊಖರ್ ತುಮಿಂ ಕೊಂಕ್ಣಿಂತ್ಲ್ಯಾ ಮಹಾನ್ ಕೊಂಕ್ಣಿ ಸುಪುತ್ರಾಂಂ ಪಯ್ಕಿಂತ್ಲಿಂ... ತುಮ್ಕಾಂ ಉಲ್ಲಾಸ್!
ದಾಯ್ಜ್ ಜಾಳಿ ಜಾಗ್ಯಾಚೆಂ ಕೊಂಕ್ಣಿ ಮಿಸಾಂವ್ ಸಂಪೊಂವ್ಕ್ನಾಂ... ಬಗಾರ್ ಫಕತ್ತ್ ಹಿ ಏಕ್ ಸುರ್ವಾತ್. ತುಮ್ಚ್ಯಾ ಕೊಂಕ್ಣಿ ವಾವ್ರಾಚೆರ್ ದೆವಾಚಿಂ ಉಧಂಡ್ ಬೆಸಾಂವಾಂ ಆಸೊಂ ಆನಿಂ ತುಮ್ಚೆಂ ಕೊಂಕ್ಣಿ ಮಿಸಾಂವ್ ಫಳಾದಿಕ್ ಜಾಂವ್... ಹೆಂಚ್ ಮ್ಹಜೆಂ ಮಾಗ್ಣೆಂ!
- ಜೆರಿ ಡಿಮೆಲ್ಲೊ, ಬೆಂದುರ್
ವಲ್ಲಿ,
ತುಜೆಂ 35 ವೆಂ ಸಂಪಾದಕೀಯ್ ಬರೆಂ ಲಾಗ್ಲೆಂ. ಸಕಾಳಿಕ್ ವಿಶಯ್ ಆನಿ ಹ್ಯಾ ವಿಶ್ಯಾಚೆರ್ ಚಿಂತ್ಪಾಮಂಥನ್ ಗರ್ಜೆಚೆಂ.
- ಎಡ್ವಿನ್. ಜೆ. ಎಫ್. ಡಿ’ಸೋಜ್
ವಲ್ಲಿ ಆನಿ ಸರ್ವ್ ದಾಯ್ಜ್ ಪಂಗ್ಡಾಕ್,
ಹಾರ್ದಿಕ್ ಅಭಿನಂದನ್ ನವ್ಯಾ ರುಪಾರ್ ಪರ್ಗಟ್ ಜಾಲ್ಲ್ಯಾ ದಾಯ್ಜ್ ಪಾನಾಕ್,
ತುಜೆಂ ಸಂಪಾದಕೀಯ್ ಪಸಂದ್ ಜಾಲೆಂ, ಖರೆಂಚ್ ಜಾವ್ನ್ ಕೊಂಕ್ಣೆಂತ್ ಜೊ.ಸಾ.ಅಲ್ವಾರಿಸ್, ಎ.ಟಿ.ಲೊಬೊ, ವಿ.ಜೆ.ಪಿ.ಸಲ್ಡಾಞ್, ಗಬ್ಬು ಉರ್ವಾ, ಚಾ.ಫ್ರಾ.ದೆ’ಕೋಸ್ತಾ ಹಾಂಚಾ ಕಾಳಾರ್ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ನಾತ್ಲ್ಲೆಂ ದುರ್ಭಾಗ್ಪಣ್. ಚಾ.ಫ್ರಾ.ಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ಥಿ ಲಾಭ್ಲ್ಲಿ ತಶೆಂಚ್ ಪಯ್ಲ್ಯಾ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ಜಾವ್ನ್ ವಿ.ಜೆ.ಪಿ.ಸಲ್ಡಾಞ್ (ಖಡಾಪ್) ವಿಂಚೊನ್ ಆಯಿಲ್ಲಿ ಮಾತ್ರ್ ಸಮಧಾನೆಚಿ ಗೋಷ್ಟಿ. ಮಂಗ್ಳುರ್ಚಿ ಕೊಂಕ್ಣಿ ಕಾನಡಿ ಲಿಪಿಂತ್ ಆಸಾ ಆನಿ ಕೊಂಕ್ಣೆಂತ್ ಚಡ್ ಸಕ್ರಿಯ್ ಜಾವ್ನಾಸ್ಚಾ ಹ್ಯಾ ವಗ್ತಾಂ, ಕಾನಡಿ ಲಿಪಿಯೆಂತ್ಲ್ಯಾ ಕೊಂಕ್ಣಿ ಸಾಹಿತ್ಯಾಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮೆಚಿ ಬರಾಬರ್ ಮಾನ್ಯತಾ ಲಾಭ್ಚೆಖಾತಿರ್ ಆಮಿಂ ಸರ್ವಾಂನಿ ಎಕ್ವಟಿತ್ ಜಾವ್ನ್ ವಾವ್ರ್ ಕರ್ಚಿ ಗರ್ಜ್ ಆಸಾ. ಫುಡ್ಲ್ಯಾ ಪಿಳ್ಗೆಕ್ ತರ್ಯೀ ಹಾಚೊ ಫಾಯ್ದೊ ಲಾಭ್ತಲೊ ಮ್ಹಳ್ಳೊ ಮ್ಹಜೊ ಆಶಾವಾದ್.
- ಆನ್ಸಿ ಪಾಲಡ್ಕಾ, ಮುಂಬಯ್
ಭಾಗಿ ಜನನ್ ದಿವಸ್ ತುಕಾ!
ಫಕತ್ ಚ್ಯಾರ್ ವರ್ಸಾಂಚೆಂ ಬಾಳ್
ದಾಯ್ಜ್ ಡಾಟ್ ಕೊಮ್ ಅಂತರ್ಜಾಳ್
ಎದೊಳ್ಚ್ಚ್ ಪ್ರಖ್ಯಾತ್ ಕೊಂಕಣಾಂತ್
ಹಾಚ್ಯೆ ತಸ್ಲಿ ಕೊಂಕ್ಣೆಂತ್ ನಾ ಸುವಾತ್
ಲೇಖನಾಂ, ಕವನಾಂ, ಮಟ್ವ್ಯೊ ಕಾಣ್ಯೊಂ
ಪಯ್ಲ್ಯೆ ಪಾವ್ಟಿಂ ಇ-ಕಾದಂಬರಿ
ಸವಾಲಾಂ ಜಾಪಿ, ಭಲಾಯ್ಕೆ ವಿಭಾಗ್
ಕೊಂಕ್ಣಿ ವಾಚ್ಪ್ಯಾಂಕ್ ಖಬಾರ್ ಬರಿ
ಕವಿತಾಝರ್, ಕವಿತಾಪಾಠ್
ವಿಚಾರ್ಸಾತೆಂ, ಕಥಾಂಕರ್
ಹಾಸ್ ಹಾಸಯ್, ಸಾಹಿತಿಲಾಗಿಂ ಸಂವಾದ್
ಸತಾಂತ್ಲಿಂ ವಿಚಿತ್ರಾಂ, ರಾಂದ್ಪಾವೋಳ್
ಕೊಂಕ್ಣಿ ಅಭಿಯಾನ್, ವಿಚಾರ್ ಉಚಾರ್
ಕೊಂಕ್ಣಿ ಕಾರ್ಭಾರಿ, ಕವಿತಾಕ್ವಿಜ್
ಚಿಂತ್ನೆನ್ ಸಬ್ದಾನ್ ಆನಿ ಬರ್ಪಾನ್
ರುಸ್ತುರುಸಾಂವ್, ಪರ್ಗಟ್ ಉಚಾರ್
ಹರ್ಯೆಕ್ ಸಂಗ್ತಿಂಕ್ ಭಾರಿಚ್ ಪ್ರಚಾರ್
ಮಹಿನ್ಯಾ ಮಹಿನ್ಯಾಕ್ ಉಭಿಂ ಜಾತಾತ್
ಸಂಪಾದಕೀಯ್ ಲೇಖನಾಂ ತಿಂ
ಆಸ್ಲ್ಲೆಂ ತೆಂ ಆಸಾ ತಶೆಂಚ್
ಅಂತರ್ಜಾಳಾರ್ ಸಾಂಗೊನ್ ಸೊಡ್ಚಿಂ
ತವಳ್ ತವಳ್, ಉತ್ರಾಂತ್ ಸೂತ್ರಾಂ
ಕವಿ ಗಾಜಯ್ತಾತ್ ತಾಂಚಿಂ ಮಂತ್ರಾಂ
ವಿಶೇಷ್ ಸಂದರ್ಭಾರ್ ವಿಶೇಷ್ ಅಂಖೆ
ವಿಶೆವ್ ದಿಂವ್ಚೆಂ ತೆ ವಾರ್ಯಾ ಪಾಂಕೆ
ಬರಂವ್ಕ್ ಗೆಲ್ಯಾರ್ ಉತ್ರಾಂಚ್ ಮೆಳ್ನಾಂತ್
ಕಾರ್ಭಾರ್ ಹೆಂ ದಾಯ್ಜ್ ಪಂಗ್ಡಾಚೆಂ
ಭಾಗಿ ಚೊವ್ತೊ ಜನನ್ ದಿವಸ್ ತುಕಾ
ಜಾಂವ್ದಿ ಮಾಗ್ಣೆಂ ಹೆಂ ಸರ್ವಾಂಚೆಂ
-ಓಸ್ಟಿನ್ ಪ್ರಭು, ಚಿಕಾಗೊ
ಭಾರಿ ಬರೆಂ ಆಸಾ ಮುಖ್ಪಾನ್ - ದಾಯ್ಜ್ ಕಾರ್ಭಾರ್ಯಾಂಕ್ ಉಲ್ಲಾಸ್.
- ವಾಲ್ಟರ್ ಡಿ’ಸೋಜ್, ನಂದಳಿಕೆ
ಮೊಗಾಳ್ ದಾಯ್ಜ್,
ಜಲ್ಮಾ ದಿಸಾಚೆ ರಾಸ್ ರಾಸ್ ಉಲ್ಲಾಸ್.
- ಡಾ|ಎಡ್ವರ್ಡ್ ನಜ್ರೆತ್
ಉಲ್ಲಾಸ್ ಆನಿ ಅಭಿನಂದನ್ ತುಮ್ಕಾಂ, ದಾಯ್ಜ್ ಕಾರ್ಭಾರ್ಯಾಂಕ್, ತೀನ್ ವರ್ಸಾಂ ಸಂಪವ್ನ್ ಚೊವ್ತ್ಯಾ ವರ್ಸಾಕ್ ಪಾಂಯ್ ತೆಂಕ್ಚ್ಯಾ ವಗ್ತಾ.
ಮಾಗ್ತಾಂವ್ ತುಮ್ಕಾಂ ಫುಡ್ಲ್ಯಾ ವರ್ಸಾಂನಿ ಅನಿಕ್ಯೀ ತ್ರಾಣ್ ಆನಿ ಸಕತ್ ಲಾಭೊಂದಿ, ಅಶೆಂ ತುಮ್ಚೆಥಾವ್ನ್ ಕೊಂಕ್ಣಿ ವಾವ್ರ್ ಅನಿಕ್ಯೀ ಚಡೊಂದಿ ತಶೆಂಚ್ ಕೊಂಕ್ಣಿ ಭಾಸೆಚೆಂ/ಸಾಹಿತ್ಯಾಚೆಂ ವಿಕಾಸ್ ಸಂಸಾರ್ಭರ್ ಜಾಂವ್.
ಮೊಗಾಸವೆಂ,
- ಆಂಬ್ರೊಸ್ ಡಿಮೆಲ್ಲೊ
ಶುಭಾಶಯ್ ಪಾಟಯ್ತಾಂವ್ ಆನಿ ಉಲ್ಲಾಸಿತಾಂವ್ ಹ್ಯಾ ವಾವ್ರಾಂತ್ ವಾಂಟೆಲಿ ಜಾಲ್ಲ್ಯಾ ಸಮೇಸ್ತಾಂಕ್,
- ವಿನ್ಸೆಂಟ್ ಡಿ’ಸೋಜ್ ದರ್ಗದಕಟ್ಟೆ (ರಿಯಾದ್)
ಉಲ್ಲಾಸ್ ಆನಿ ಶಾಭಾಸ್ಕಿ ತುಮ್ಕಾಂ ದಾಯ್ಜ್ ಪಂಗ್ಡಾಕ್, ಕೊಂಕ್ಣಿ ಸಾಹಿತ್ಯ್ ಪರ್ಗಟ್ಚಾ ಮಿಸಾಂವಾಂತ್ ತೀನ್ ವರ್ಸಾಂ ಸಂಪವ್ನ್ ಚೊವ್ತ್ಯಾ ವರ್ಸಾಕ್ ಪಾಂಯ್ ತೆಂಕ್ಚ್ಯಾ ವೆಳಾರ್, ತುಮ್ಕಾಂ ಸರ್ವ್ ಬರೆಂ ಮಾಗ್ತಾಂ.
- ಸುನಿಲ್ ಫೆರ್ನಾಂಡಿಸ್ ಕೋಟ (ದುಭಾಯ್)
ದಾಯ್ಜ್ ಸಾಂದ್ಯಾಂನೊ,
ಉಲ್ಲಾಸ್ ತುಮ್ಕಾಂ ಕೊಂಕ್ಣಿ ಸಾಹಿತ್ಯ್ ಪರ್ಗಟ್ ಕರುನ್ ತೀನ್ ವರ್ಸಾಂ ಸಂಪಯಿಲ್ಲ್ಯಾಕ್, ತುಮ್ಕಾಂ ತಶೆಂಚ್ ತುಮ್ಚ್ಯಾ ಫುಡ್ಲ್ಯಾ ಸರ್ವ್ ಕೊಂಕ್ಣಿ ಮಿಸಾಂವಾಂಕ್ ಯಶ್ ಆಶೆತಾಂವ್.
- ಆರ್. ಫೆರ್ನಾಂಡಿಸ್
ದಾಯ್ಜ್ ಪಂಗ್ಡಾಕ್ ಶಾಭಾಸ್ಕಿ ಫಾವೊ - ವರ್ಸಾನ್ ವರಸ್ ನವೆ ಸಾಂದೆ ತುಮಿಂ ಘೆಂವ್ಚಿ ರಿವಾಜ್ ಭೋವ್ ಸಂತೊಸಾಚಿ, ಆನ್ಸಿ ಪಾಲಡ್ಕಾ ಜಶೆಂ ಮುಂಬಯಾಂತ್ ಜಾಯ್ತೊ ಕೊಂಕ್ಣಿ ವಾವ್ರ್ ಕರುನ್ ಆಸಾ, ತೆಚ್ಚ್ಪರಿಂ ಡಾ|ಎಡ್ವರ್ಡ್ ನಜ್ರೆತ್ ಮಂಗ್ಳುರಾಂತ್ ಜಾಯ್ತೊ ಕೊಂಕ್ಣಿ ವಾವ್ರ್ ಕರುನ್ ಆಸಾ ದೆಕುನ್ ಹಾಂಚೆಥಾವ್ನ್ ದಾಯ್ಜ್ ವಾವ್ರಾಕ್ ಥೆಂಕೊ ಮೆಳ್ತಲೊ ಖಂಡಿತ್.
- ರೊಜಿಟಾ ನಜ್ರೆತ್ ಆನಿ ಕುಟಾಮ್ ಕ್ಲೆಮೆಂಟ್, ಕ್ಲಿಂಟನ್ ಆನಿ ಕ್ಲೆವಿನ್ ನಜ್ರೆತ್ ಮಿರಾ ರೋಡ್
ಮೊಗಾಳ್ ದಾಯ್ಜ್ ಮಿತ್ರಾಂನೊ,
ಕೊಂಕ್ಣಿ ಭಾಸ್, ಕೊಂಕ್ಣಿ ಸಾಹಿತ್ಯ್, ಕೊಂಕ್ಣಿ ಸಂಸ್ಕೃತೆಚ್ಯಾ ವಾಡಾವಳೆಚ್ಯಾ ಇರಾದ್ಯಾನ್ ತುಮಿ ಕರುನ್ ಆಸ್ಚಾ ವಾವ್ರಾಕ್ ಹಾಂವ್ ಶಾಭಾಸ್ಕಿ ಪಾಟಯ್ತಾಂ. ಸಭಾರಾಂ ಮೌನ್ಪಣಿಂ ಕೊಂಕ್ಣೆಖಾತಿರ್ ವಾವ್ರ್ ಕರುನ್ ಆಸಾತ್, ’ರಾಕ್ಣೊ’ ಪ್ರಿಂಟ್ ಮಾಧ್ಯಮಾಂತ್ ವಾವ್ರ್ ಕರುನ್ ಆಸಾ, ತುಮಿ ಅಂತರ್ಜಾಳಿಚೆರ್ ಕೊಂಕ್ಣಿ ಸಾಹಿತ್ಯಾಚಾ ಉದರ್ಗತೆಚೊ ವಾವ್ರ್ ಕರುನ್ ಆಸಾತ್. ತುಮ್ಕಾಂ ಮ್ಹಜೊ ಭರ್ಪೂರ್ ಸಹಕಾರ್ ಆಸ್ತಲೊ - ಹಾಂವ್ಯೀ ತುಮ್ಚೆಸವೆಂ ಹ್ಯಾ ಕೊಂಕ್ಣಿ ಮಿಸಾಂವಾಂತ್ ಆಸ್ತಲೊಂ. ತುಮ್ಚೆಂ-ಆಮ್ಚೆಂ ಎಕ್ವಟಿಕ್ ಮಿಸಾಂವ್, ಕೊಂಕ್ಣೆಕ್, ಆಮ್ಚಾ ಮಾಯ್ಭಾಸೆಕ್ ನವೊ ಜೀವ್ ಭರುಂಕ್ ಸಕೊಂದಿ ಮ್ಹಳ್ಳೆಂಚ್ ಆಮ್ಚೆಂ ಮಾಗ್ಣೆಂ ಜಾವ್ನಾಸಾ.
- ಮಾ|ಬಾ|ಎಲಿಯಾಸ್ ಡಿ’ಸೋಜ್ [ನಿರ್ದೇಶಕ್ - ಐ.ಸಿ.ವಾಯ್.ಎಮ್ (ಮಂಗ್ಳುರ್)]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications