ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತವಳ್ತವಳ್
ಹೆಂ ವಾರ್ಜಿಕ್ ಹರ್ಶೆಂಚೆಂ, ಕಾಲ್ಚೆಂ, ಆಯ್ಚೆಂ, ಫಾಲ್ಯಾಂಚೆಂ, ತವಳ್ತವಳ್ ಮತಿಚಾ ಪಡ್ದ್ಯಾಚೆರ್
ಖಂಚೊನ್ ಯೆಂವ್ಚೆಂ ಲಿಸಾಂವ್, ಬೆಸಾಂವ್ ಯಾ ತೆಸಾಂವ್...
ತವಳ್ತವಳ್ - 7 . ಸೈಂಟ್ ವೆಲೆಂಟೈನ್ ಡೇ....!
ಮೆಲ್ವಿನ್ ಜೆ. ವಾಸ್
ವೇಳ್ ಕೆದ್ನಾಂಚ್ ಮನ್ಶಾಕ್ ರಾಕೊನ್ ರಾವಾನಾ ಯಾ
ಮನ್ಶ್ಯಾಕ್ ಸೊಧುನ್ ಯೇನಾ. ಖಂಡಿತ್ ನಾಂ. ಬಗಾರ್ ವೆಳಾಕ್
ಹೊಂದ್ವೊನ್ ವೆಳಾ ಸಾಂಗಾತಾ ಮನ್ಶಾನ್ ಚಲೊಂಕ್ ಪಡ್ತಾ. ಭೋವ್ಶಾ ಎಕೇಕ್
ಪಾವ್ಟಿಂ ಆಮಿಂ ಹೊಂದ್ವೊಂಚೊ ವೇಳ್ ಆಮ್ಚಾ ಜಿವಿತಾಕ್ ಬರ್ಯಾಕ್
ಪಡ್ತಾ ಜಾಲ್ಯಾರ್ ಯಾ ಬರೆಂ ಹಾಡ್ತಾ ಜಾಲ್ಯಾರ್ ಮನ್ಶಾಚಾ ತಾತ್ಕಾಲಿಕ್
ಸಮ್ಜಣೆ ಪ್ರಕಾರ್ ತಾಕಾ ತೊ ಬರೊ ವೇಳ್ ಯಾ ವಾಯ್ಟ್ ಜಾಲ್ಯಾರ್
ವಾಯ್ಟ್ ಘಡಿ ಮ್ಹಣೊನ್ ಮನಿಸ್ ವೊಲಾಂವ್ಕ್ ಖಂಡಿತ್
ಸಕ್ತಾ. ತೆಂ ತಾಂತಾಂಚಾ ಸಮ್ಜಣೆರ್ ಹೊಂದೊನ್ ಆಸಾ. ತಶೆಂಚ್ ವೆಳಾ
ಸಾಂಗಾತಾ ಹೊಂದೊನ್ ವೆಚೆಂಯ್ ಮನ್ಶಾಚಾಚ್ ಸಮ್ಜಣೆರ್
ಹೊಂದೊನ್ ಆಸಾ. ಪೂಣ್ ಫಕತ್ತ್ ಮನಿಸ್ ಮಾತ್ರ್ ಚಂದ್ರಾಕ್
ಸಮ್ಜೊಂಕ್ ಪಾವ್ಲಾ ಪೂಣ್ ಆಪ್ಲ್ಯಾಚ್ ಭಂವ್ತಿಚಾ ವೆಳಾಕ್
ಮಾತ್ರ್ ಸಮ್ಜೊಂಕ್ ಪಾವೊಂಕ್ ನಾಂ.
ಶೆಕ್ಡೆ, ದಾಕ್ಡೆ, ವರ್ಸಾಂ, ಮಹಿನೆ, ಹಾಪ್ತೆ, ದೀಸ್, ವೊರಾಂ,
ಮಿನುಟಾಂ, ಸೆಕುಂಡಾ, ಹಿಂಚ್ ಹ್ಯಾ ಮಹಾನ್ ವೆಳಾಚಿಂ ಎಕೇಕ್
ಮೆಟಾಂ. ಕಾಡ್ಲ್ಲೆಂ ಮೇಟ್ ಕಾಡುನ್ ಜಾತಾ, ದಾಂಟಾಲ್ಲೆಂ
ಮೇಟ್ ದಾಂಟೊನ್ ಉರ್ತಾ, ಲಕೊನ್ ಪಡ್ಲ್ಲೆಂ ಮೇಟ್ ದೆಗೆನ್
ಪಡೊನ್ ಆಸ್ತಾ ಜಾಲ್ಯಾರ್ಯ್ ವೇಳ್ ಮಾತ್ರ್ ಖಂಯ್ಚಾಯ್
ಮೆಟಾಂಕ್ ರಾಕೊನ್ ರಾವಾನಾ ಯಾ ಆಧಾರ್ ಭಾಸಾವ್ನ್ ವೆಂಗೆಂತ್ ಘೆನಾ.
ಹ್ಯಾ ಮೆಟಾಂ ಕಾಡ್ಚಾ ಆನಿಂ ದವರ್ಚಾ ಖೆಳಾಂತ್ ವೇಳ್ ಫಕತ್ತ್ ಏಕ್
ವೀಕ್ಷಕ್ (Audience)
ಮಾತ್ರ್.
ಫಕತ್ತ್ ಏಕ್ ವೀಕ್ಷಕ್.......!
ವೀಕ್ಷಣ್ ಕೆಲೆಂ ಆನಿಂ ಚಲ್ಲೊ...!!
ಹಾಸ್ಚೆಂ ಆನಿಂ ರಡ್ಚೆಂ ಫಕತ್ತ್ ತ್ಯಾ ವೆಳಾನ್ ವೀಕ್ಷಣ್ ಕೆಲ್ಲ್ಯಾ ರಂಗ್ಮಂಚಾರ್ ಆಪ್ಲೊ ಖೆಳ್ ದಾಖಯಿಲ್ಲ್ಯಾ
ತ್ಯಾ ಪಾತ್ರ್ಧಾರಿನ್ ಮಾತ್ರ್.....!!!
ಭೋವ್ಶಾ ಇತ್ಲೆಂ ಲಾಂಬ್ ಕೊಣಾಯ್ಕ್ಯ್ ಚಿಂತುಂಕ್ ವೇಳ್
ನಾಂ.
ವೇಳ್ ನಾಂ....?
ಕಿತ್ಯಾಕ್ ನಾಂ...?
ವೇಳ್ ಮ್ಹಜ್ಯಾ ತುಜ್ಯಾ ಪುಡ್ಯಾಂನ್ಚ್ ಆಸ್ತಾನಾ ವೇಳ್ ಕಿತ್ಯಾಕ್
ನಾಂ? ಆಸ್ಲ್ಲೊ ವೇಳ್ ಮನ್ಶಾ ದೊಳ್ಯಾಂಕ್ ದಿಸಾನಾ ತರ್ ಕಿತೆಂ
ಹಾಂವ್ ಸಾಂಗೊಂಕೀ ಮನ್ಶಾ ದೊಳೆ ವೆಳಾಕ್ ಪಳಂವ್ಕ್
ಸಕಾನಾಂತ್ ತೆ ಕುರ್ಡೆ ಜಾಲ್ಯಾತ್....?
ಹ್ಯಾಚ್ ಖಾತಿರ್ ಜಾಂವ್ಕ್ ಪುರೊ ಹ್ಯಾ ವೆಳಾನ್ ಪರ್ತ್ಯಾಕ್
ಪರ್ತ್ಯಾಕ್ ಮನ್ಶ್ಯಾಚಿ ದೀಷ್ಟ್ ಸಾರ್ಕಿ ಕರುಂಕ್ ತ್ಯಾ
ವರ್ಸಾಚೆ ದೀಸ್ ಪರತ್ ಪರತ್, ತವಳ್ ತವಳ್ ಮನ್ಶಾ ಜಿವಿತಾಕ್
ಪಾಟಿಂ ಹಾಡ್ಚೆ. ಹಾಂತುಂ ವೆಳಾಚೊ ಕಿತೆಂ ಸ್ವಾರ್ಥ್ ಆಸಾ ಹಾಂವ್
ನೆಣಾಂ. ಪೂಣ್ ಇತ್ಲೆಂ ಖಂಡಿತ್ ಜಾಣಾಂ ಕೀ ಮನ್ಶಾಚಾ ಸ್ವಾರ್ಥಾ
ಪುಡೆಂ ವೆಳಾಚೊ ಸ್ವಾರ್ಥ್ ಕಾಂಯ್ಂಚ್ ನ್ಹಯ್.
ಹಾಕಾ ಸಾರ್ಕಿ ರುಜ್ವಾತ್ ದಿಂವ್ಚಿ ತರ್, ವರ್ಸಾಚೆ ಸಗ್ಳೆ ದೀಸ್ಯ್
ಮಹತ್ವಾಚೆ ಜಾಲ್ಯಾರ್ಯ್ ಥೊಡ್ಯಾ ದಿಸಾಂಕ್ ಮನಿಸ್
ಪೊಸ್ಕ್ಯಾ ನಾಂವಾನ್ ಆಪಯ್ತಾ. ಜಶೆಂ ವೆಲೆಂಟೈನ್ ಡೇ
ವಾ ಲವ್ವರ್ ಡೇ, ವಾ ಮೋಗ್ ಕರ್ನಾರಾಂಚೊ ದೀಸ್.....!
ಭೋವ್ಶಾ ದೀಸ್ ಧಾಂವ್ತಾಂ ಧಾಂವ್ತಾಂ ಹ್ಯಾ ದಿಸಾಚೊ ಮಹತ್ವ್ ತಾಚ್ಯಾ ತ್ಯಾ
ಪೊಸ್ಕ್ಯಾ ನಾಂವಾಚೊ ಮಹತ್ವ್ಚ್ ಮಾಜ್ವೊನ್ ವೆತಾ. ಆನಿ
ವೆಲೆಂಟೈನ್ ಡೇ ಚ್ಯಾ ಪಯ್ಲೊ ಸಬ್ದ್ ಸೈಂಟ್ (ಸಾಂತ್) ಮ್ಹಳ್ಳೊ
ಸಬ್ದ್ ಸವ್ಕಾಸ್ ಪುಶೆವ್ನ್ ವೆತಾ.
ಕೋಣ್ ಪುಸ್ತಾ ಯಾ ಘುಸ್ತಾ ಯಾ ಕೊರ್ಪುನ್ ಕಾಡ್ತಾ ತೆಂ ಆತಾಂ ಆಮಿಂ ಚರ್ಚೆ ಕರ್ಚೆ
ನಾಕಾ. ಹಾಚ್ಯಾ ಪಯ್ಲೆಂ ಕಟ್ಟೆ ಕುಡ್ಕೊ ಘೆವ್ನ್ ತೆಂ ಕೊರ್ಪುನ್ ಕಾಡುಂಕ್ ಪಳೆಲ್ಲೆ
ಸಗ್ಳೆಂ ನಿಮಾಣೆ ತೆಚ್ಚ್ ತ್ಯಾಚ್ ಕಟ್ಟೆ ಕುಡ್ಕ್ಯಾ ಸವೆಂ ರಸ್ತ್ಯಾರ್
ಭಿಕ್ ಮಾಗೊಂಕ್ ಬಸ್ಲೆಲೆ ದಾಖ್ಲೆ ಆಸಾತ್. ತೆಂ ಆಸೊಂ ಸೊಡ್ಯಾಂ.
ಆತಾಂ ಸವಾಲ್ ಸೈಂಟ್ ವೆಲೆಂಟೈನ್ ಡೇ ದಿಸಾ ಸೊಭಿತ್ ರಂಗಾಳ್ ತಾಂಬ್ಶಾ ಪಿಂತಾಕ್ ಗುಲೊಬಾ ದೆಂಟಾಂಕ್
ಪಾಂಗ್ರಾವ್ನ್ ಹ್ಯಾ ದಿಸಾಕ್ ಸುಂರ್ಗರಾಂವ್ಚಾ ಮೋಗ್ ಕರ್ಣಾರಾಂಚೆಂ. ಭೋವ್ಶಾ
ಸಭಾರಾಂಕ್ ಹಿ ಖಬಾರ್ಚ್ ಆಸ್ಚಿ ನಾಂ ಹ್ಯಾ ಮೋಗ್ ಕರ್ಣಾರಾಂಚಾ
ದಿಸಾಕ್ ಸೈಂಟ್ ವೆಲೆಂಟೈನ್ಸ್ ಡೇ ಮ್ಹಣೊನ್ ನಾಂವ್ ಕಶೆಂ
ಪಡ್ಲೆಂ?
ತ್ಯಾ ಸಾಂತಾಚಿ ಕಾಣಿ ಮಾಫ್ ಕರ್ಯಾ ತಿ ಕಾಣಿ ನಹಿಂ ತಾಚೆಂ
ಮಾಡ್ತಿರ್ಪಣ್ ಖಾಸ್ಗೆನ್ ಕೊಣ್ಯ್ ವಿಚಾರ್ತಿತ್ ಜಾಲ್ಯಾರ್ ಖಂಡಿತ್ ತಾಂಕಾ
ಹಾಂವ್ ಸಾಂಗ್ತಾ ಕಿತ್ಯಾಕ್ ಮ್ಹಳ್ಯಾರ್ ಹಾಂವ್ ಫಕತ್ತ್
ಹ್ಯಾ ದಿಸಾಚಾ ವೆಳಾಕ್ ಆನಿಂ ಮನ್ಶ್ಯಾ ಸಂಭಂಧಾಕ್ ಮಾತ್ರ್ ಉಲಯ್ತಾಂ.
ಮೋಗ್ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ಹಾಂವ್ ಅಜೂನ್
ಸಮ್ಜೊಂಕ್ ನಾಂ. ಕಾರಾಣ್ ಹಾಂವೆ ಮೊಗಾ ಖಾತಿರ್ ಮಾಫ್ ಕರ್ಯಾ
ಪೆಲ್ಯಾಚಾ ಮೊಗಾ ಖಾತಿರ್ ಮ್ಹಜೊ ಜೀವ್ ದಿಂವ್ಚೊ ಅವ್ಕಾಸ್
ಮಾಕಾ ಲಾಬೊಂಕ್ ನಾಂ ಜಾಲ್ಲ್ಯಾನ್ ಎದೊಳ್ ಹಾಂವ್ ಮೋಗ್ ಮ್ಹಳ್ಯಾರ್ ಕಿತೆಂ
ಮ್ಹಣೊನ್ ಖಾಸ್ಗೆನ್ ಸಮ್ಜೊಂಕ್ ನಾಂ.
ಪುಣ್ ವೆಳಾನ್ ಮ್ಹಾಕಾ ಶಿಕಯಿಲ್ಲ್ಯಾ ಸಮ್ಜೊಣೆಪ್ರಕಾರ್
ಮೋಗ್ ಮ್ಹಳ್ಯಾರ್ ಜೊ ಕೋಣ್ ಆಪ್ಲ್ಯಾ ಪೆಲ್ಯಾಚೊ ಜೀವ್
ವಾಂಚಂವ್ಕ್ ಆಪ್ಲೊ ಜೀವ್ ರಿಸ್ಕೆರ್ ಘಾಲ್ತಾ ತೊಚ್ಚ್ ಮೊಗಾಚಿ ಅತೀ ಉಂಚಾಯ್
ದಾಖಯ್ತಾ;.
ತರ್ ಮ್ಹಜ್ಯಾ ಭಂವಾರಿಂ ಹಾವೆಂ ಪಳಂವ್ಚೊ ಮೋಗ್ ಕಸಲೊ? ಯಾ
ಹಾಂವೆಂ ಕರ್ಚೊ ಮೋಗ್ ಕಸಲೊ? ಯಾ ಹಾಂವೆ ಕರ್ಚೊ
ಮೋಗ್ ಕಸಲೊ? ಪಾವ್ಸಾಕಾಳ್ ಆಖೇರ್ ಜಾವ್ನ್ ಯೆತಾನಾ
ಸುಣ್ಯಾ ಮಾಜ್ರಾನ್ ಖೆಳ್ಚಾ ಖೆಳಾ ತಸಲೊ....?
ಮೋಗ್ ಮ್ಹಳ್ಳ್ಯಾ ಪವಿತ್ರ್ ಸಬ್ದಾಚಿ ಪವಿತ್ರ್ತಾಯ್ ಅತೀ ಊಂಚ್. ಹಿ ಊಂಚಾಯ್ ಪಳಂವ್ಕ್ ಮನ್ಶಾ ಕುಳಿಯೆಕ್ ಭಿಲ್ಕುಲ್ ನಾಕಾ. ದೆಕುನ್ಂಚ್ ಮೋಗ್ ಕುರ್ಡೊ ಮ್ಹಣೊನ್ ಮೊಗಾಕ್ ಬಿಲ್ಲೊ ಲಾಯ್ಲಾ ಆನಿ ಮನಿಸ್ ಆಪುಣ್ ಕುರ್ಡೊ ಜಾವ್ನ್ ಭಂವ್ತಾ....!
ಹೆಂ ಕುರ್ಡೆಂಪಣ್ ಕಿತ್ಲ್ಯಾ ವರೇಗ್ ಮ್ಹಳ್ಯಾರ್ ಗುಲೊಬಾ ದೆಂಟಾಕ್ ತುಟಯ್ತಾನಾ ಜಾಂವ್ ಯಾ
ತ್ಯಾ ದೆಂಟಾಕ್ ರೆವ್ಡಾಯಿಲ್ಲೆಂ ನಿಸ್ಕಳ್ ಫಿಂತ್ ಸೊಡಯ್ತಾನಾ ಜಾಂವ್ ಯಾ ಉಲವ್ಣ್ಯಾ ಉಲವ್ಣ್ಯಾಂತ್
ತ್ಯಾ ಗುಲೊಬಾಚಿ ಎಕೇಕ್ಚ್ ಪಾಕ್ಳಿ ಸೊಡಯ್ತಾನಾ ಜಾಂವ್
ನಿಮಾಣೆಂ ತುಟ್ಲ್ಲ್ಯೊ ತ್ಯೊ ಪಾಕ್ಳ್ಯೊ ವಾರ್ಯಾರ್ ಉಬ್ತಾನಾ ಜಾಂವ್ ಯಾ ತ್ಯಾ ಗಲ್ಲ್ಯಾನಿಂ
ವ್ಹಾಳ್ತಾನಾ ಜಾಂವ್ ಹ್ಯಾ ಕುರ್ಡ್ಯಾ ಮನ್ಶ್ಯಾಕ್ ದಿಸೊನ್
ಯೇನಾ.
ಕುರ್ಡೆಂಪಣ್....!
ಸಾಸ್ಣಾಚೆಂ ಕುರ್ಡೆಂಪಣ್....!!
ಮಾಗೊನ್ ಘೆತ್ಲೆಲೆಂ ಕುರ್ಡೆಂಪಣ್.....!!!
ಹ್ಯಾ ಕುರ್ಡ್ಯಾಪಣಾಚಿ ಸಾಕ್ಸ್ ಜಾವ್ನ್ ವಾರ್ಯಾಕ್ ಉಬ್ಚಿಂ ಕಾಳ್ಜಾಂ,
ಸೊಭಿತ್ ಸೊಭಿತ್ ಉತ್ರಾಂಚಿ ಕಾರ್ಡಾಂ, ದೊಳ್ಯಾಂಕ್ ಥಂಡ್ಸಾಣ್ ದಿಂವ್ಚಿ
ನ್ಹೆಸ್ಣಾಂ, ವೊಂಟಾಂಕ್ ವೆಂಗುಂಕ್ ಯೆಂವ್ಚಿ ವಾಯ್ನಾಂ,
ಹಾತ್ ಪಾಂಯ್ ದಾಡಾಂವ್ಚಿ ಡ್ಯಾನ್ಸಾಂ, ಉಭೆಂತ್ ಆಡ್ಚೊಂಕ್ ಆಯ್ತಿಂ
ಪುಲಾಂ, ಉಪ್ರಾಂತ್....?
ಉಪ್ರಾಂತ್ ಕೋಣ್ ಹಾಸ್ತಾ ಕೋಣ್ ರಡ್ತಾ ಕೋಣ್ ವ್ಹಾಳ್ತಾ ಕೋಣ್ ಉಮ್ಕಾಳ್ತಾ
ಮೊಗಾಕ್ ಮಾತ್ರ್ ಭಿಲ್ಕುಲ್ ದಿಸಾನಾ....!
ಭಿಲ್ಕುಲ್ ದಿಸಾನಾ....!!
ಕಿತ್ಯಾಕ್ ಮ್ಹಳ್ಯಾರ್ ಮೋಗ್ ಕುರ್ಡೊ...!!!
ಮೋಗ್ ಕಸೊಯ್ ಕುರ್ಡ್ಡೊ. ಸೊಡ್ಯಾಂ..... ಪೂಣ್
ಹ್ಯಾ ಮನ್ಶ್ಯಾ ಜಾತಿಕ್ ಕಿತ್ಯಾಕ್ ದೀಷ್ಟ್ ನಾಂ? ಮೋಗ್ ಕುರ್ಡ್ಡೊ
ಮ್ಹಣೊನ್ ಕೊಣ್ಯ್ ಸಾಂಗ್ತಾ ಜಾಲ್ಯಾರ್ ತೊ ಖಂಡಿತ್ ಸ್ವಾರ್ಥಿ.
ಸ್ವಾರ್ಥಾಕ್ ಮಾತ್ರ್ ಆಪ್ಲೆಂ ಸೊಡ್ನ್ ಪೆಲೆಂ ದಿಸಾನಾ ಆನಿಂ
ಪೆಲೆಂ ದಿಸಾನಾತ್ಲ್ಲೊ ಖಂಡಿತ್ ಕೊಣಾಯ್ಚೊ ಮೋಗ್ ಕರುಂಕ್
ಸಕಾನಾ ಹೊ ಮ್ಹಜೊ ವಾದ್. ಹ್ಯಾಚ್ಚ್ ಖಾತಿರ್ ಹಾಂವ್ ಆದಿಂ ಥಾವ್ನ್
ಸಾಂಗೊನ್ ಆಯ್ಲಾಂ ಮೋಗ್ ಕುರ್ಡ್ಡೊ ನಹಿಂ ಮೋಗ್ ಕರ್ನಾರಾಂ
ಮೊಗಾಕ್ ಖಂಡಿತ್ ಪಳಂವ್ಕ್ ಸಕ್ತಾತ್ ತಾಂಚಾ ಮೊಗಾ ಖಾತಿರ್ ಕರ್ಚಾ ತ್ಯಾಗಾಂತ್...!
ಆಯ್ಚೊ ಹೊ ವೇಳ್ಯ್ ತುಕಾ ಮನ್ಶಾ ಖಂಡಿತ್ ರಾಕೊನ್ ರಾಂವ್ಚೊನಾಂ. ವೆಳಾ ಸವೆಂ ತುವೆಂ ಮೆಟಾಂ ಕಾಡುಂಕ್ ಪಡ್ತೆಲೆಂ. ತುಜೆಂ ಮೇಟ್ ಕಸಲೆಂ? ಲಕೊನ್ ಪಡ್ಚಾ ತಸಲೆಂ? ಉಗ್ಡಾಸ್ ದವರ್ ವೇಳ್ ಫಕತ್ತ್ ವೀಕ್ಷಕ್ ಮಾತ್ರ್......!
ಭೋವ್ಶಾ ಆಯ್ಚಾ ಹ್ಯಾ ಸೈಂಟ್ ವೆಲೆಂಟೈನ್ ದಿಸಾ ತುವೆಂ ಕಾಡ್ಚೆಂ ಮೇಟ್ ತುಜ್ಯಾ ಮೊಗಾಕ್ ಚಡ್ ಆನಿ ಚಡ್ ಘಟ್ ಕರುಂ ಆನಿ ಮ್ಹಜ್ಯಾ ಕಾನಿಂ ರಾತ್ ಆನಿ ದೀಸ್ ಆಯ್ಕೊಂವ್ಚಿ ತ್ಯಾ ಝಡೊನ್ ಗೆಲ್ಲ್ಯಾ ಪಾಕ್ಳ್ಯಾಂಚಿ ಬೋಬ್ ಸಾಸ್ಣಾಕ್ ಥಾಂಬೊಂ.....
ತವಳ್ ತವಳ್ ಹಾಚಾಧ್ಲೆ ಅಂಕ್ಡೆ: 1, 2, 3, 4, 5, 6
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
