ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸವಾಲಾಂಕ್ ಜಾಪಿ
ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ
ದಿವೊ ಹಾಫ್ತ್ಯಾಳೆಂ
ಮಿತ್ರ್ ಹಾಫ್ತಾಳೆಂ
ಸೆವಕ್ ಮಯ್ನ್ಯಾಳೆಂ
ಅಂಕಣ್ಕಾರಾ ವಿಶ್ಯಾಂತ್
’ಮಿತ್ರ್’, ’ಝೆಲೊ’ ತಶೆಂಚ್ ’ಕಾಣಿಕ್’ ಪತ್ರಾಂಚೆಂ ಸಂಪಾದಕ್ಪಣ್ ಚಲಂವ್ಚೆ ಮಾರಿಫಾತ್, ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಭರ್ಪೂರ್ ಅನ್ಭೋಗ್ ಆಸ್ಚೊ ದೊ|ಆಸ್ಟಿನ್ ಡಿ’ಸೋಜ್ ಪ್ರಭು ಪ್ರಸ್ತುತ್, ಅಮೆರಿಕಾಂತ್ ಅಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರುನ್ ಆಸಾ. ಕೊಂಕ್ಣಿ ಭಾಸ್/ಸಾಹಿತ್ಯಾಚಾ ವ್ಹಾಡಾವಳೆಕ್ ಖಾಂದ್ ದಿಲ್ಲೊ ಹೊ ಏಕ್ ಸಂಘಟಕ್/ಮುಖೆಲಿ ತಶೆಂಚ್ ಕೊಂಕ್ಣಿ ಕಾರ್ಭಾರಿ ಜಾವ್ನಾಸಾ.
ಹಾಚಾ ವೆಕ್ತಿತ್ವಾ/ವಿಚಾರಾಂವಿಶಿಂ ಚಡ್ ಜಾಣಾಂ ಜಾಂವ್ಕ್ ಕೊಂಕ್ಣಿ ಕಾರ್ಭಾರಿ ಅಂಕಣಾಕ್ ಭೆಟ್ ದೀ.
[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]
ಸದ್ದಾಮ್ ಜಿವಂತ್ ಆಸ್ತಾನಾ ತಾಕಾ ಗಾಳಿ ಶಿರಾಪ್ ದಿಂವ್ಚೆ ಥೊಡೆ ಆತಾಂ ತಾಕಾ ಫಾಶಿ ದಿತೆಚ್ಚ್ ತಾಚೆರ್ ಭಿರ್ಮತ್ ಪಾವ್ತಾತ್ಮೂ? [ರೊಜಿಟಾ ನಜ್ರೆತ್, ಮಿರಾರೋಡ್]
ತುಂ ಮೆಲೊಯ್ ಜಾಲ್ಯಾರ್ ತುಕಾಯ್ ತುಜ್ಯಾ ಆತಾಂಚ್ಯಾ ದುಸ್ಮಾಂನಾಂನಿ ಕರ್ಚೆಂ ತಿತ್ಲೆಂಚ್! ಮೆಲ್ಯಾ ಉಪ್ರಾಂತ್ಚ್ಚ್ ಲೋಕಾಕ್ ಮನ್ಶಾಚಿ ಖರಿ ಸ್ಥಿತಿಗತ್ ಕಳಿತ್ ಜಾತಾ.
ಆಯ್ಚಾ ಕಾಳಾರ್ ಜೆಜು ಖರೊಚ್ ಜುಂವಾಂವ್ ಬಾವ್ತಿಸ್ ಜಾಲ್ಯಾರ್ ಕಿತೆಂ ಜಾಯ್ತ್ ಕುಂಪಾರೆ? [ಕುಮಾದ್ರ್, ಕುಂದಾಪುರ್].
ಕಿತೆಂ ಸಾಂಗೊಂ ಕುಮಾದ್ರೆ? ತೆಂ ಸರ್ವ್ ಹೊಂದ್ವೊನ್ ಆಸಾ ಆತಾಂಚ್ಯಾ ಕಾಳಾಚ್ಯಾ ಲೇಖಕಾಂಚೆರ್. ತಾಂಚ್ಯೆ ಮತಿಂತ್ ಕಿತೆಂ ಗುಸ್ತಾ ತ್ಯಾಪರಿಂ ತೆ ಜೆಜುಚಿ ಚರಿತ್ರಾ ಬರಯ್ತೆಲೆ; ಆದ್ಲ್ಯಾಂನಿ ಕೆಲ್ಲೆಂಯ್ ತಿತ್ಲೆಂಚ್.
ಥೊಡಿಂ ಚೆಡ್ವಾಂ ಕಾಜಾರಾ ಆಧಿಂ ಫೆಶನಾಂ ಕರಿನಾತ್ಲ್ಲಿಂ ಆತಾಂ ವಿಪ್ರೀತ್ ಫೆಶನಾಂ ಕರ್ತಾತ್ ಗಜಾಲ್ ಕಸಲಿಗಾ? [ಅಸ್ಕತ್ ಪಿಲೊ, ಮಸ್ಕತ್].
ಘೊವಾ ಥಾವ್ನ್ ಮೆಳಾನಾಸ್ಲ್ಲೆಂ ಸೆಜಾರ್ಯಾಂ ಥಾವ್ನ್ ಮೆಳಾತ್ಗಿ ಮ್ಹಣ್ ತಾಂಚಿ ಆಶಾ! ತುಂ ಕೊಣಾಕ್ಯ್ ಭುಲ್ಲಾಯ್ ತರ್ ಮಾರ್ ಝೊಂಪೊಯ್, ತುಜೆಂ ಸ್ವಪಾಣ್ ಜ್ಯಾರಿ ಜಾಲ್ಯಾರ್ಯ್ ಜಾಲೆಂ!
ಆಮ್ಚೆ ಕ್ರಿಸ್ತಾಂವ್ ತರ್ನಾಟೆ ಶಿಕ್ಪಾಂತ್ ಕಿತ್ಯಾಕ್ ಬಡ್ಡ್ ಆಸ್ಟಿನಾ? [ಬೋರಿ ಬಸವ, ಅಬ್ಬಾಸಿಯಾ].
ಹೆಂ ಸವಾಲ್ ಸರ್ವಯ್ ತರ್ಣಾಟ್ಯಾಂಕ್ ಲಾಗು ಕರುಂಕ್ ಜಾಯ್ನಾ; ಸಭಾರ್ ಬಡ್ಡ್ ಕಿತ್ಯಾಕ್ಗೀ ಮ್ಹಳ್ಯಾರ್ - ತಾಂಚಿ ಮತ್ ಶಿಕ್ಪಾ ಬದ್ಲಾಕ್ ಹೆರ್ ಸಂಗ್ತಿಂಚೆರ್ ಬುಡೊನ್ ಆಸ್ತಾ ಜಾಲ್ಲ್ಯಾನ್ ಶಿಕಾಪ್ ಮತಿಕ್ ರಿಗಾನಾ. ಹ್ಯಾಚ್ ಲಾಗೊನ್ ಮಂಗ್ಳುರಾಂತ್ಲಿಂ ಕ್ರೀಸ್ತಾಂವ್ ಚೆಡ್ವಾಂ ಥೊಡಿಂ ತಾಂಕಾಂ ಶಿಕ್ಪಿ ಕಥೊಲಿಕ್ ಚಲೆ ಮೆಳಾನಾಂತ್ ಮ್ಹಣೊನ್ ಪರ್ಕಿಂ ಜಾತಿಂಲಾಗಿಂ ಲಗಿನ್ ಜಾತಾತ್; ಭಿರ್ಮತ್ ಆಮ್ಚ್ಯಾ ಸಮಾಜೆಚಿ!
ಇತ್ಲಿಂ ಸಾಯ್ಟಾಂ ಕೊಂಕ್ಣಿ ಸಾಹಿತ್ಯ್ ಪರ್ಗಟ್ತಾತ್, ಖರೆಂಪಣಿಂ ತಾಂಕಾಂ ಕೊಂಕ್ಣಿ ಸಾಹಿತ್ಯಾಚೊ ಹುಸ್ಕೊ ಆಸಾ ಮ್ಹಣ್ತಾಯ್ಗಿ ತುಂ? [ಪಾ.ಪಿ, ದುಭಾಯ್] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಹುಸ್ಕೊ ಆಸೊಂ ವ ನಾಸೊಂ, ತುಕಾ ಕಿತ್ಯಾಕ್ ಪೊಟ್ಕಾಣಿ? ತಸೆಂ ಕೆಲ್ಲ್ಯಾನ್ ಕೊಂಕ್ಣೆಚಿ ಪ್ರಗತಿ ಜಾತೆಲಿ ಮ್ಹಳ್ಳೆಂ ಖಂಡಿತ್; ಆಡ್ ಪಾಂಯ್ ದೀಂವ್ಕ್ ವಚಾನಾಕಾ!
’ಚರಿತ್ರಾ ಪರತ್ ಘಡೊನ್ ಯೆತಾ’ ಮ್ಹಣ್ತಾತ್ - ತರ್ ಪರತ್ ಜೆಜು ಜಲ್ಮೊನ್ ಆಯ್ಲ್ಯಾರ್ ತಾಕಾ ಖುರ್ಸಾರ್ ಮಾರುಂಕ್ ಕೊಣ್ ಆಸಾತ್ ಆಸ್ಟಿನಾ? [ಸೆವ್ರಿನ್, ಶಿರ್ವಾಂ].
ಹಾಂವ್ ಚಿಂತಿನಾ ಜೆಜು ಪರತ್ ಜಲ್ಮೊನ್ ಯೆತೊಲೊ ಮ್ಹಣ್! ತುಕಾ ಕೊಣೆಂ ಸಾಂಗ್ಲೆಂ ಜೆಜುಕ್ ದುಸ್ರೆಂ ಕಾಂಯ್ ಕಾಮ್ ನಾ ಮ್ಹಣ್ ಸರ್ಗಾರ್?
ಆಜ್ಕಾಲ್ ರೆತಿರ್ಯೊ ಚಡ್ಲ್ಯಾತ್ ತರ್ಯೀ ಕ್ರೀಸ್ತಾಂವಾಂಚಾ ಜಿಣ್ಯೆಂತ್ ಕಾಂಯ್ ಬದ್ಲಾವಣ್ ತುಕಾ ದಿಸ್ತಾಗೀ? [ಜೊಂಬ್ಲೊ, ಜಾರ್ಕೊಳ್]. (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಥೊಡ್ಯಾಂಕ್ ದೇವ್ ಸರ್ಗಾರ್ ಆನಿ ಬಗ್ಲೆಕ್ ದೆಂವ್ಚಾರ್ ಜಾಲಾ ಹ್ಯಾ ಕಾಳಾರ್! ಕಿತೆಂ ತರೀ ಆಮ್ಚೊ ಚಡ್ತಾವ್ ಲೋಕ್ ಆತಾಂ ಕಠೀಣ್ ಭಕ್ತಿಪಣಾಚೊ ಜಾಲಾ ತೆಂ ಹಾಂವೆ ಖುದ್ಧ್ ಮ್ಹಜ್ಯಾ ದೊಳ್ಯಾಂನಿ ಮಂಗ್ಳುರಾಂತ್ ಆನಿ ಮುಂಬೈಂತ್ ಪಳೆಲೆಂ ಭೋವ್ಶಾ ರೆತಿರ್ಯಾಂಚೊಚ್ ಪ್ರಭಾವ್ ಹೊ!
ನವ್ಯಾ ವರ್ಸಾಕ್ ತುಜೆ ನವೆ ಸೊಲ್ಲೆ ಕಸಲೆ ಮಾಮಾ? [ಜಿ.ಎಲ್.ಸಲ್ದಾಞ್].
ಸೆಜಾರ್ಚ್ಯೆ ಚಲಿಯೆಕ್ ಗುರ್ವಾರ್ ಕರಿಜಾಯ್ ಮ್ಹಣ್ ಚಿಂತ್ಲ್ಲೆಂ ಹಾಂವೆ ಸ್ವಪ್ಣಾಂತ್! ಆತಾಂ ಮ್ಹಜೊ ಸೊಲ್ಲೊ ಏಕ್ಚ್ಚ್ - ಕೊಣಾಕ್ಚ್ಚ್ ದುಖಯ್ನಾಸ್ತಾಂ ಸದಾಂ ಮಾಯಾಮೊಗಾನ್ ಜಿಯೆಂವ್ಕ್ ಆನಿ ಆಸ್ಲ್ಲೆಂ ಥೊಡೆಂ ಹೆರಾಂಕ್ ಗರ್ಜೆವಂತಾಂಕ್ ವಾಂಟುಂಕ್.
’ಡಾ ವಿಂಚಿ ಕೋಡ್’ ಫಿಲ್ಮ್ ಇಗರ್ಜೆನ್ ಬ್ಯಾನ್ ಕೆಲ್ಯಾರೀ ಕ್ರೀಸ್ತಾಂವಾನಿ ಚಡ್ ಪಳೆಲಾಂ ಮ್ಹಣ್ತಾತ್ - ತುಂ ಕಿತೆಂ ಮ್ಹಣ್ತಾಯ್ ಇರ್ಮಾಂವ್? [ಬಾಲ್ಚಾಟ್ ಬಾತ್ತು, ಬಾರ್ಕುರ್].
ಸಾರ್ಕೆಂ ತೆಂ, ಹಾಂವೆಂಯ್ ಪಳೆಲೆಂ ಆನಿ ಪಯ್ಶೆ ಆನಿ ವೇಳ್ ಕಿತ್ಯಾಕ್ ವಿಭಾಡ್ಲೊ ಮ್ಹಣ್ ಬೆಜಾರ್ ಜಾಲೆಂ! ಶೆಣ್ಕುಟಿ ಕರ್ಯಾಂ ಮ್ಹಳ್ಯಾರ್ ಕಾಂಯ್ ಶೆಣ್ಯ್ ನಾ ಹ್ಯಾ ಪಿಂತುರಾಂತ್; ಇಗರ್ಜ್ ಮಾತಾ ಕಿತ್ಯಾ ಭೆಶ್ಟಿಚ್ ಬೊಬಾಟ್ತಾ ತೆಂ ಹಾಂವ್ಂಚ್ ನೆಣಾಂ ಪುತಾ!
ಹ್ಯಾ ಸಂಸಾರಾಂತ್ ಖಂಚೆಂ ಕಾಮ್ ಕೆಲ್ಯಾರೀ ಸಹಕಾರ್ ಮೆಳಾತ್, ಪುಣ್ ಕೊಂಕ್ಣಿ ಕಾಮಾಂಕ್ ಸಹಕಾರ್ ಭಿಲ್ಕುಲ್ ಮೆಳಾನಾ - ಅಶೆಂ ಕಿತ್ಯಾಕ್ ಅಂಕಲ್? [ಬಿಂಡಿಸೊಲ್, ಅಬುಧಾಬಿ]
ಕೊಂಕ್ಣಿ ಕಾಮಾಂ ಬರ್ಯಾ ಥರಾನ್ ಹೆರಾಂಕ್ ಉಪೋಗಾಕ್ ಪಡ್ಚೆಪರಿಂ ಕೆಲ್ಯಾರ್ ಖಂಡಿತ್ ಜಾವ್ನ್ ಸಹಕಾರ್ ಮೆಳ್ತಾ; ಸ್ವಾರ್ಥಾ ಖಾತಿರ್ ಕೆಲಾರ್ ಮಾತ್ರ್ ಸಹಕಾರ್ ಮೆಳಾನಾ - ತುಜಿ ದಿಶಾ ಬದ್ಲಿ!
ಆದಿಂ ಕ್ರಿಸ್ತಾಂವಾಂಕ್ ಸಾಂತಾಂ-ಭಕ್ತಾಂಚಿಂ ನಾಂವಾಂ ದವರ್ತಾಲೆ, ಪುಣ್ ಆತಾಂ ಹಾಲಿವುಡ್ ಫಿಲ್ಮಾಚಾ ಹಿರೊಂಚಿ ವಾ ಕ್ರಿಕೆಟ್ ಖೆಳ್ಗಾಡ್ಯಾಂಚಿಂ ನಾಂವಾ ದವರ್ತಾತ್ಮೂ? [ಸಹನಾ, ಕುವೇಯ್ಟ್]
ಸಭಾರ್ ಆಮ್ಚೆ ಸರ್ಗಾವಯ್ಲೆ ಸಾಂತ್ ಬೋರ್ ಜಾವ್ನ್ ಯಮ್ಕೊಡಾಂತ್ಲಿ ಸಾಂತ್ಮಾರಿ ಪಳೆಂವ್ಕ್ ಗೆಲ್ಯಾತ್ ಖಂಯ್! ದೆಖುನ್ ಜಾಂವ್ಕ್ ಪುರೊ ನಾಂವಾಂ ದವರ್ಚ್ಯಾಂತ್ ತುರ್ಥ್ ಬದ್ಲಾವಣ್ ಜಾಲ್ಯಾ.
ಮೌಶೆಚೊ ಘೊವ್ಯ್ ಬಾಪ್ಪು ಆನಿ ಪಪ್ಪಾಚೊ ಭಾವ್ಯ್ ಬಾಪ್ಪು - ಹೆಂ ಕಶೆಂಗಾ? [ಸಾಡೆ ಸಾತ್ ದುಮ್ಗಾ, ಸಕಲೇಶ್ಪುರ]
ಕಾಲೆಂ ಉಲಯ್ತಾಯ್ ಸಾಯ್ಬಾ ಸಾತ್ ಪಾವ್ಟಿಂ ಘೊಟುನ್ ಉಲಯಿಲ್ಲ್ಯಾಪರಿಂ? ಮೌಶೆಚ್ಯಾ ಘೊವಾಕ್ ಮಾವ್ಳೊ ಮ್ಹಣ್ ಆಪಯ್ ಕೋಣ್ ತುಕಾ ಆಡಾಯ್ತ್ ವ ಹೆಡಾಯ್ತಾ ತೆಂ ಮಾಗಿರ್ ಪಳೆವ್ಯಾಂ.
ಆಪ್ಲ್ಯಾ ಮತ್ಲಬಾ ಖಾತಿರ್ ಗಾಂಯ್ದೊಳಾಕ್ಯ್ ಇರ್ವೊಳ್ ಮ್ಹಣ್ಚಾಂಕ್ ತುಂ ಕಿತೆಂ ಮ್ಹಣ್ತಾಯ್ಗಾ? [ಗುಮ್ಟೊ, ಕಾರ್ಕಳ್] (ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)
ಗಾಂಯ್ದೊಳ್ ಬಾರಿಕ್ ಜಾವ್ನ್ ಲಾಂಬ್ ಆನಿ ಇರ್ವೊಳ್ ಉರುಟ್ ಜಾವ್ನ್ ಚಪ್ಪಾಟೆ - ಹೆಂಯ್ ಹಾಂಕಾಂ ಕಳಿತ್ ನಾ ಜಾಲ್ಯಾರ್ ತಾಂಚ್ಯಾ ತಕ್ಲೆಂತ್ಲ್ಯಾ ಶಿರಾಂನಿ ರಗಾತ್ ಭಿಲ್ಕುಲ್ ವ್ಹಾಳಾನಾ ಮ್ಹಳ್ಳ್ಯಾಕ್ ಕಾಂಯ್ಚ್ ದುಬಾವ್ ನಾ!
ಅಮೆರಿಕಾಂತ್ ಕೊಂಕ್ಣಿ ಚಳ್ವಳೆಚೆಂ ಸುಂಕಾಣ್ ತುಂ ಘೆತಾಯ್ ಮ್ಹಣ್ ಆಯ್ಕಾಲೆಂ ಹಾಂವೆಂ ವ್ಹಯ್ವೆ ಆಸ್ಟಿನಾ? [ಬೊಕುಲ್, ಭದ್ರಾವತಿ].
ಮ್ಹಾಕಾ ಕೊಂಕ್ಣೆಚೆಂ ಸುಂಕಾಣ್ಯ್ ನಾಕಾ ಸುಂಕಾಟ್ಯ್ ನಾಕಾ. ಕೊಂಕ್ಣಿ ಉಲಂವ್ಕ್ಚ್ ಪುಟ್ವಾನಾಸ್ಲ್ಲ್ಯಾ ಹ್ಯಾ ಗಾಂವ್ಕಾರಾಂ ಸಂಗಿಂ ಹಾಂವ್ ಎಕ್ಲೊಂ ಕರುಂ ತರೀ ಕಿತೆಂ? ಆಡೆಕ್ ಭಾಗ್ ಆಯಿಲ್ಲೊ ಲೋಕ್ ಹೊ, ’ಥುಕ್ಕ್’ ಹಾಂಚ್ಯಾ ಹಣೆಬರಪಾ!
ಪಾಟ್ಲ್ಯಾ ಎಕಾ ವರ್ಸಾಂತ್ ವಾಚ್ಪ್ಯಾಂಚಾ ಸವಾಲಾಂಕ್ ಅಪುರ್ಭಾಯೆಚ್ಯೊ ಜಾಪಿ ದೀವ್ನ್, ಆಪ್ಲಿ ಜಾಣ್ವಾಯ್, ಸಮ್ಜಣಿ ವಾಂಟುನ್ ಘೆತ್ಲ್ಲ್ಯಾ ಮಾನೆಸ್ತ್ ಆಸ್ಟಿನ್ ಡಿ’ಸೋಜ್ ಪ್ರಭುಕ್ ದೇವ್ ಬರೆಂ ಕರುಂ ಮ್ಹಣ್ತಾಂ. ಫುಡ್ಲ್ಯಾ ಎಕಾ ವರ್ಸಾಂತ್ ವಾಚ್ಪ್ಯಾಂಚಾ ಕುರ್ಕುರಿತ್ ಸವಾಲಾಂಕ್ ಜಾಪಿ ದೀಂವ್ಕ್ ಎಕ್ಲೊ ಉರ್ಭೆವಂತ್, ತಾಲೆಂತ್ವಂತ್ ಕೊಂಕ್ಣಿ ಸಾಹಿತಿ ಮುಖಾರ್ ಆಯ್ಲಾ. ವೆಗಿಂಚ್ ತಾಚೆವಿಶ್ಯಾಂತ್ಲೊ ವಿವರ್ ಫುಡ್ಲ್ಯಾ ಅಂಕ್ಯಾಂತ್ ದಿತೆಲ್ಯಾಂವ್. - ಸಂ.
ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ
’ಮಿತ್ ಹಾಪ್ತ್ಯಾಳೆಂ’
ಜೊಂಬ್ಲೊ, ಜಾರ್ಕೊಳ್
’ದಿವೊ ಹಾಪ್ತ್ಯಾಳೆಂ’
ಪಾ.ಪಿ, ದುಭಾಯ್
’ಸೆವಕ್ ಮಯ್ನ್ಯಾಳೆಂ’
ಗುಮ್ಟೊ, ಕಾರ್ಕಳ್
(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.
ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: austinporob@gmail.com ವಾ editor@daaiz.com
ಹ್ಯಾ ಅಧ್ಲಿಂ ಸವಾಲಾಂ-ಜಾಪಿ: 1, 2, 3, 4, 5, 6, 7, 8, 9, 10, 11
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
