ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 37. ವೆಚಿಕ್ ಧುವ್
ರುಡೋ ದ ಆಲ್ಫ್: ಅಜೀಕ್ ಎಕುಣೀಸ್ ವರ್ಸಾಧಿಂ ಹೆಂ ನಾಂವ್ ವಳ್ಕಿಚೆಂ, ಮಟ್ವ್ಯೊ ಕಾಣ್ಯೊ, ಕವಿತಾಂ ತಶೆಂಚ್ ಕಾಣಿಕ್ ಪತ್ರಾಚೆರ್ ’ವಿಚಿತ್ರ್ ಸಂಸಾರ್’ ಮ್ಹಳ್ಳೆಂ ವೈಗ್ಯಾನಿಕ್ ಅಂಕಣ್ ಭೋವ್ ಫಾಮಾದ್ ಕೆಲ್ಲೊ ಕಾರ್ಕಳ್ಚೊ ಅನ್ಯೇಕ್ಲೊ ಕಾಣ್ಯೆಗಾರ್ ಆಜ್ಕಾಲ್ ಬರಯ್ನಾಂ ತರ್ಯ್ ಹಾಣೆಂ ಥೊಡ್ಯೊ ಅಪುರ್ಭಾಯೆಚ್ಯೊ ಕಾಣ್ಯೊ ಬರಯ್ಲ್ಯಾತ್ ಆನಿ ಮನ್ ಕೆಲ್ಯಾರ್ ಫುಡೆಂಯೀ ಬರ್ಯೊ ಕಾಣ್ಯೊ ಬರಂವ್ಕ್ ಜರೂರ್ ಸಕ್ತಲೊ.
ರುಡೋ ದ ಆಲ್ಫ್
ವರ್ಸಾಂ ಉಪ್ರಾಂತ್ ರಜೆರ್ ಗಾಂವಾಕ್
ವಾವ್ಲೊಂ ಹಾಂವ್, ಬಾಯ್ಲೆ ಘುರ್ಗ್ಯಾಂಕ್ ಕಾಣ್ಘೆವ್ನ್. ತೊ
ದೀಸ್ ಆಯ್ತಾರಾಚೊ ಜಾಲ್ಲ್ಯಾನ್, ಆನಿಂ ಇಲ್ಲೆಶ್ಯಾ
ವೆಳಾನ್ ಪಾವ್ಲ್ಲ್ಯಾನ್ ಬಸ್ಸ್ ರಾವ್ಲ್ಲ್ಯಾಕಡೆ ರಿಕ್ಶಾ
ನಾತ್ಲ್ಲಿ. ರಿಕ್ಶಾ ಯೆತಾ ಮ್ಹಣಾಸರ್ ಥಂಯ್ಸರ್ ಆಸ್ಲ್ಲ್ಯಾ ಏಕಾ ರುಕಾ ಮುಳಾಂತ್,
ಸಾವ್ಳೆಂತ್ ರಾವ್ಲ್ಯಾಂವ್. ಥಂಯ್ಸರ್ ಚಡ್ ಲೋಕ್ ನಾತ್ಲ್ಲೊ. ಭೋವ್ಶಾ ದನ್ಫಾರ್ ಜಾವ್ನ್ ಆಯಿಲ್ಲ್ಯಾನ್ ಜಾವ್ಯೆತ್. ತಿತ್ಲ್ಯಾರ್, ಏಕ್ ದಾದ್ಲೊ ಆಮ್ಚಾ
ಪಾಟ್ಲ್ಯಾನ್ ಥಾವ್ನ್ ಆಯ್ಲೊ ಆನಿಂ ಮ್ಹಜ್ಯಾ ಬಾಯ್ಲೆಚಾ
ಹಾತಾಕ್ ಧರ್ನ್ ’ಪ್ರೀತಿ’ ಮ್ಹಣಾಲೊ. ಹಾಂವೆ ತಾಕಾ ದೆಕೊಂಕ್
ನಾಂ ಕಿತ್ಯಾಕ್ ಹಾಂವ್ ಯೆಂವ್ಚ್ಯಾ ವೆಚ್ಯಾ ರಿಕ್ಶಾಂಕ್ ಪಳೆಂವ್ಚ್ಯಾರ್
ಪಡ್ಲ್ಲೊಂ, ಖಾಲಿ ರಿಕ್ಶಾ ಆಸಾತ್ಗಿ ಮ್ಹಣ್. ಮ್ಹಜ್ಯಾ ಪತಿಣೆಣ್ ಕಿಂಕ್ರಾಟ್
ಮಾರ್ಲಿ ಪಳೆವ್ನ್ ಹಾಂವ್ ಪಾಟಿಂ ಘುಂವ್ಲೊಂ; ಆನಿಂ ಬಾಯ್ಲೆಲಾಗಿಂ
ಪಾವ್ಲೊಂ. ತೊ ದಾದ್ಲೊ ಮ್ಹಾಕಾ ಪಳೆಂವ್ನ್ ದೋನ್
ಮೆಟಾ ಪಾಟಿಂ ಸರ್ಲೊ. ತೊ ಮಾನೆಸ್ತ್ ದಿಸ್ತಾಲೊ ಆನಿಂ ನಿತಳ್
ವಸ್ತುರ್ ಘಾಲ್ಲೆಂ. ತಾಚೆ ಖಾಡ್ ವಾಡ್ಲ್ಲೆಂ ಆನಿಂ ಕೇಸ್, ತೇಲ್ ಪಳೆಯ್ನಾಸ್ತಾನಾ
ಸುಮಾರ್ ಮಹಿನೆ ಜಾಲ್ಲೆ. ಹಾಂವ್ ಗಾಂವ್ಚ್ಯಾಕ್ ಸರ್ವಾಂಕ್ ವಳ್ಕಾತಾಲೊ,
ಪುಣ್ ವರ್ಸಾಂನಿ ಗಾಂವಾಕ್ ಆಯಿಲ್ಲ್ಯಾ ಮ್ಹಾಕಾ ತ್ಯಾ ದಾದ್ಲ್ಯಾಚಿ ವಳಕ್ ಕಳೊಂಕ್
ನಾಂ.
’ಸೊರ್ರಿ ಸರ್’ ತೊ ಮ್ಹಣಾಲೊ ಇಂಗ್ಲಿಶಾನ್; ತಾಳೊ ಪರ್ಕಿ
ಹಾಂವ್ ಚಿಂತುಂಕ್ ಲಾಗ್ಲೊಂ.
’ಸೊರ್ರಿ ಸರ್, ಹಾಂವೆ ಚಿಂತ್ಲೆಂ ಮ್ಹಜಿ ಬಾಯ್ಲ್...... ಮಾಫ್ ಕರ್.
"ಸರ್ ತುಮಿ.. ಆಮ್ಚಾ ಕಾಲೇಜಿಚೊ ಪ್ರೊಫೆಸರ್, ಲೇಖಕ್, ಕವಿ ಆನಿಂ
ಮ್ಹಜೊ ಗುರು". ಆತಾಂ ಮ್ಹಾಕಾ ವಳೊಕ್ ಮೆಳ್ಳಿ.
ತಿತ್ಲ್ಯಾರ್ ರಿಕ್ಶಾ ಆಯ್ಲಿ; ಹಾಂವೆಂ ತಾಚೊ ಹಾತ್ ಮೆಳಯ್ಲೊ ಆನಿಂ
ಮ್ಹಜ್ಯಾ ಘರ್ಚಿ ವಾಟ್ ಧರ್ಲಿ.
ರವಿಶಂಕರ್ ಆಮ್ಚ್ಯಾ ಮಹಾವಿದ್ಯಾಲಯಾಚೊ ವಿದ್ವಾನ್,
ಸಬಾರ್ ಬೂಕ್, ಕವನಾಂ, ಲೇಖನಾಂ ತಾಚ್ಯಾ ಲಿಖ್ಣೆ ಥಾವ್ನ್ ಆಯಿಲ್ಲಿಂ.
ಸಾದೊ ಮನಿಸ್ ಸರ್ವ್ ವಿದ್ಯಾರ್ಥಿಂಚೊ ಮೊಗಾಚೊ. ಕಿತ್ಯಾಕ್, ಶಿಕ್ಚೆಂ
ಮನ್ ಆಸ್ಲ್ಲ್ಯಾ ಸರ್ವಾಂಕ್ ತೊ ಸರ್ವ್ ರಿತಿನ್ ಕುಮಕ್ ಕರ್ತಾಲೊ. ಆನಿಂ
ಮ್ಹಜ್ಯಾ ಮೊಗಾಚೊ ಗುರು ಮ್ಹಣ್ ಪರ್ತುನ್ ಸಾಂಗಾಜಾಯ್
ಮ್ಹಣ್ ಗರ್ಜ್ ನಾಂ. ತಾಚೆಂ ಮನ್ ಆನಿಂ ಧ್ಯೇಯ್ ಕಿತ್ಲೆ
ಸುಂದರ್ ಆಸ್ಲ್ಲೆಂಗಿ ತಿತ್ಲೆಚ್ಚ್ ಸೊಭಿತ್ ಮತಿಣ್ ತಾಕಾ ಮೆಳ್ಲ್ಲಿ. ’ಪ್ರೀತಿ’ ತಾಚೆಂ
ನಾಂವ್. ಪ್ರೊಫೆಸರಾಕ್ ಸಾಂಗ್ಲ್ಲಿ ಬಾಯ್ಲ್. ತಾಚ್ಯಾ ಹರ್ಯೇಕಾ ಕಾಮಾಂನಿ ತಾಕಾ ಕುಮೊಕ್ ಕರ್ತಾಲಿ.
ಪ್ರೊಫೆಸರಾಕ್ ಆಮಿಂ ರಜೆಚ್ಯಾ ದಿಸಾಂನಿ ಆಮ್ಚ್ಯಾ ಕಾಲೇಜಿಚ್ಯಾ ಕಾಮಾನ್ ಘರಾ ಗೆಲ್ಯಾರ್ ಆಮ್ಕಾಂ
ಮೊಗಾನ್ ಬಿತರ್ ಘೆತಾಲಿ ಆನಿಂ ಆಮಿಂ ಮಸ್ತ್ ಪಾವ್ಟಿಂ ತಾಂಕಾಂ ದನ್ಪರಾಂ
ವಿಶೆವ್ ಘೆತಾನಾಂಯಿ ವಚೊನ್ ಮೆಳ್ಲ್ಲೆಂ ಆಸಾ. ತಾಂಕಾ ಭುರ್ಗಿಂ
ನಾತ್ಲ್ಲೆಂ ಏಕ್ ಸೊಡ್ನ್ ತಾಂಚೆಂ ಸುಖಿ ಪರಿವಾರ್; ಪ್ರೊಫೆಸರಾಕ್
ಸುಮಾರ್ ಆಟ್ ಹಜಾರ್ ಸಾಂಬಾಳ್ ಮೆಳ್ತಾಲೊ. ಮ್ಹಜಿ
ಮಾಂಯ್ ಹರ್ಯೇಕಾ ಹಪ್ತ್ಯಾಕ್ ಏಕ್ ಪಾವ್ಟಿಂ ಆಮ್ಚಾ ಘರಾ ಜಾಲ್ಲಿ ಕಿತೆಂಯಿ ತರ್ಕಾರಿ,
ಬಾಜಿ ಪ್ರೊಫೆಸರಾಕ್ ದೀವ್ನ್ ದಾಡ್ತಾಲಿ. ತಶೆಂಚ್ ಸಗ್ಳ್ಯಾ ಗಾಂವಾಂಚಿ ಕರ್ತಾಲಿಂ. ತಿತ್ಲ್ಯಾರ್ ಆಮ್ಚಿ ರಿಕ್ಶಾ ಘರಾ
ಪಾವ್ಲಿ. ಹಾಂವ್ ಚಿಂತ್ನಾಂ ಸಂಸಾರಾಂತ್ ಥಾವ್ನ್ ಭಾಯ್ರ್ ಆಯ್ಲೊಂ. ಕಿತ್ಲೊ ಆಕರ್ಷಕ್ ಆಸ್ಲ್ಲೊ
ಪ್ರೊಫೆಸರ್ ಭಾಗೊನ್ ಕಾಂಟೊ ಜಾಲ್ಲೊ. ಕಿತೆಂ ಜಾಲೆಂ......
ಹಾಂವ್ ಚಿಂತುನ್ ಘರಾ ಭಿತರ್ ಪಾವ್ಲೊಂ. ಪಯ್ಣಾನ್ ಥಕಲ್ಲ್ಯಾನ್
ನ್ಹಾಂವ್ನ್ ಜೇವ್ನ್ ವಿಶೆವ್ ಘೆತಾನಾಂಯಿ ಹಾಂವ್ ಪ್ರೊಫೆಸರಾಕ್ಚ್ ಚಿಂತುನ್ ಆಸ್ಲ್ಲೊಂ. ಉಪ್ರಾಂತ್ ಕೆದಾಳಾ ದೊಳೊ ಆಡ್ ಜಾಲೊ
ಮ್ಹಾಕಾ ಕಳೊಂಕ್ನಾಂ.
ಸಾಂಜೆರ್ ಮ್ಹಜ್ಯಾ ಕುಶಿಚಿ ಬೋರ್ ಯೇವ್ನ್ ಮ್ಹಜ್ಯಾ ಕುಶಿಕ್ ಕುಟ್ಟುನ್ ’ಬಾ, ಚಾಯ್’
ಮ್ಹಣ್ತಾನಾ ಮ್ಹಾಕಾ ಜಾಗ್ ಜಾಲಿ.
ಮಾಂಯ್ ರಾತಿಚ್ಯಾ ಜೆವ್ಣಾಕ್ ತಯಾರಾಯ್ ಕರ್ತಾಲಿ. ತಿ ತಾಂದುಳ್ ವಿಂಚ್ತಾನಾ
ಹಾಂವೆಂ ಮ್ಹಳೆಂ; ದನ್ಪರಾಂ ಪ್ರೊಫೆಸರ್ ಮೆಳ್ಲ್ಲೊ.....ಆನಿಂ
ಹಾಂವೆಂ ಘಡ್ಲ್ಲೆಂ ಸಗ್ಳೆ ಸಾಂಗ್ಲೆಂ. ಮಾಂಯ್ನ್ ದೀರ್ಘ್
ಶ್ವಾಸ್ ಘೆತ್ಲೊ ಆನಿಂ ಮ್ಹಣಾಲಿ ’ಕಿತೆಂ ಉಣೆಂ ಆಸ್ಲ್ಲೆಂ ತಾಕಾ,
ಸರ್ವ್ ಘರಾ ಬಾಗ್ಲಾರ್ ಯೆತಾಲೆ. ಸಮಾಜೆಂತ್ ಘನ್ಮಾನ್ ಆಸ್ಲ್ಲೆಂ.
ಲೋಕ್ ಪ್ರೊಫೆಸರಾಚೆ ಬಾಯ್ಲೆಕ್ ಕಿತ್ಲೊ ಮಾಂದ್ತಾಲೊ, ತರ್ಯೀ
ಸೊಡ್ನ್ ದಾಂವ್ಲೆಂ ನ್ಹಂಯ್ವೆ?
ಮಾಂಯ್ ಜಡಾಯೆಚಿಂ ಉತ್ರಾಂ ಸಾಂಗ್ತಾಲಿ ಕಿತೆಂ ಘಡ್ಲಾಂ ಆಸೊಂಕ್
ಪುರೊ ಮ್ಹಣ್. ಮ್ಹಜಿ ಬಾಯ್ಲ್ ಕುಶಿನ್ ಆಸ್ಲ್ಲ್ಯಾನ್
ಮಾಂಯ್ನ್ ಚಡ್ ಸಾಂಗೊಂಕ್ ನಾಂ. ತಿ ತಾಚ್ಯಾ ಕಾಮಾಕ್ ಲಾಗ್ಲಿ.
ಹಾಂವ್ ಉಟ್ಲೊಂ ಆನಿಂ ಸಾಂಜೆರ್ ಧುಂಪಾಕಾಟ್ಯಾರ್ ಜಮೊ ಜಾಂವ್ಚೆಂ ಕೊಣಿ ಈಷ್ಟ್ ಮೆಳ್ತಾತ್ಗಿ
ಮ್ಹಣ್ ಭಾಯ್ರ್ ಸರ್ಲೊ.
ಆಪ್ರೂಪ್ಶೆಂ ಮ್ಹಾಕಾ ಪಳೆಂವ್ಚೆ ಸಭಾರ್ ಜಣ್ ಈಷ್ಟ್ ಧುಂಪಾಕಾಟ್ಯಾರ್ ಜಮೊ ಜಾಲೆ, ಭೊಟಾಚಾ
ಹೊಟ್ಲಾಂತ್ ಚಾ ಕಾಫಿ ಜಾಲ್ಯಾ ಉಪ್ರಾಂತ್ ಆಮಿಂ ಪರ್ತುನ್ ಧುಂಪಾಕಾಟಾರ್ ಆಯ್ಲ್ಯಾಂವ್. ಕೋಣ್ ಕೊಣಾಕಡೆ ಕಾಜಾರ್ ಜಾಲೊ, ಕೋಣ್ ಕೊಣಾ
ಪಾಟ್ಲ್ಯಾನ್ ಧಾಂವ್ಲೊ ಮ್ಹಳ್ಳೆಂ ಉಲವ್ಣೆಂ ಜಾತಾನಾ ಹಾಂವೆ
ಪ್ರೊಫೆಸರಾಚೆಂ ನಾಂವ್ ಕಾಡ್ಲೆಂ. ಎಕ್ಲೊ ಮ್ಹಣಾಲೊ , ’ಹಾಂವ್
ಪುಣಿ ಪ್ರೊಫೆಸರ್ ಜಾಲ್ಲೊಂ ತರ್ ತಾಕಾ ಘರ್ ಸೊಡ್ನ್ ಧಾಂವ್ಚ್ಯಾ
ಪಯ್ಲೆಂ ದೋನ್ ಕುಡ್ಕೆ ಕರ್ತೊಂ’. ತೊ ದಾಂತ್ ಚಾಬಾಲಾಗ್ಲೊ,
ಪ್ರೊಫೆಸರಾಕ್ ತಶೆಂ ಜಾವ್ನಾಜೊ ಆಸ್ಲ್ಲೆಂ, ಬರೊ ಮನಿಸ್ ತೊ,
ಮಸ್ತ್ ಮೋಗ್ ಕರ್ತಾಲೊ ಆಪ್ಲ್ಯಾ ಬಾಯ್ಲೆಚೊ, ದೆದೆಸ್ಪಾರ್ ಜಾಲಾ ಆತಾಂ.
ಬಿರ್ಮತ್ ಆನಿಂ ಥೊಡೆ ಮ್ಹಣಾಲೆ.
ಅನ್ವರ್ ಶ್ಹೆರಾಚೊ ನಾಂವಾಡ್ದಿಕ್ ಬಿಲ್ಡರ್, ವ್ಹಡ್ಲಿ ಸುಂದರ್ ಘರಾಂ,
ಬಿಲ್ಡಿಂಗಾ ತಾಣೆಂ ಬಾಂಧ್ಲ್ಲಿಂ. ಆಮ್ಚಾ ಗಾಂವಾತ್ಯಿ ತಾಣೆಂ ಘರಾಂ ಆನಿಂ ಕಟ್ವಣಾಂ ತಾಣೆಂ
ಬಾಂದ್ಲ್ಲಿಂ. ತಾಂತುಂ ಏಕ್ ಆಮ್ಚಾಂ ಪ್ರೊಫೆಸರಾನ್ ಘೆತ್ಲ್ಲೆಂ. ತೆದಾಳಾ, ಆನ್ವಾರಾನ್
ಪ್ರೀತಿಕ್ ಪಳೆಯ್ಲೆ ಆನಿಂ ಕಶೆಂ ತಾಕಾ ಆಪ್ಲ್ಯಾ ಮೊಗಾಚಾ
ಪಾಸಾಂತ್ ಫಸಯ್ಲೆಂ ಕಳೊಂಕ್ನಾ. ಅನ್ವರ್ ಯೇವ್ನ್
ಪ್ರೀತಿಕ್ ಮೆಳ್ತಾಲೊ. ಪ್ರಿತಿ ಶ್ಹೆರಾಂತ್ ವಾಡ್ಲ್ಲೆಂ ಜಾಲ್ಲ್ಯಾನ್ ತಾಕಾ ಕಾರಾಂನಿ ಭಂವ್ಚೆಂ,
ಹೋಟೆಲಾಂನಿ ಖಾಂವ್ಚೆಂ ಪಸಂದ್ ಆಸ್ಲ್ಲೆಂ. ತಾಕಾ ಪ್ರೊಫೆಸರಾಚಾ
ಶಾಂತ್ ಜೀವನಾಂತ್ ಉಬ್ಗೊಣ್ ಆಯಿಲ್ಲಿ.
ಏಕ್ ದೀಸ್ ಪ್ರೊಫೆಸರ್ ಮಹಾವಿದ್ಯಾಲಾಯಾ ಥಾವ್ನ್
ಪಾಟಿಂ ಯೆತಾನಾ ಘರ್ಚೆಂ ಉಗ್ತೆಂ ಬಾಗಿಲ್ ತಾಕಾ ಸ್ವಾಗತ್ ಕರ್ತಾಲೆಂ ಆನಿಂ
ಮೆಜಾರ್ ಆಸ್ಲ್ಲಿ ಏಕ್ ಚೀಟ್. ಪ್ರೀತಿ ಪ್ರೊಫೆಸರಾಕ್ ಸೊಡ್ನ್ ಅನ್ವರಾ
ಸಾಂಗಾಂತಾ ಶ್ಹೆರಾಕ್ ಗೆಲ್ಲೆಂ.
ದುಸ್ರ್ಯಾ ದೀಸ್ ಹಾಂವೆಂ ಪ್ರೊಫೆಸರಾಕ್ ಭೆಟೊಂಕ್ ಚಿಂತ್ಲೆಂ. ತೊ ವಿದ್ಯಾಲಾಯಾಕ್
ನೋವ್ ವೊರಾರ್ ಯೆತಾಲೊ. ಹಾಂವ್ ತಾಚ್ಯಾ ಪಯ್ಲೆಂಚ್ ತಾಚ್ಯಾ ಘರಾ
ಪಾವ್ಲೊಂ. ಘರಾ ಮುಖ್ಲ್ಯಾ ತೊಟಾಂತ್ ಸೊಭಿತ್ ಫುಲಾಂ ಫುಲ್ಲ್ಲಿಂ, ಅಂಗಣ್ ಝಾಡ್ನ್ ನಿತಳ್ ಆಸ್ಲ್ಲೆಂ.
ಹೆಂ ಸರ್ವ್ ಪ್ರೊಫೆಸರ್ಚ್ ಕರ್ತಾಲೊ. ಘರ್ಚ್ಯಾ ಕಾಮಾಂತ್ಯಿ ತೊ ಚುರುಕ್
ಪ್ರೊಫೆಸರ್ ಮ್ಹಣ್ ತಾಕಾ ಘಮಂಡ್ ನಾತ್ಲ್ಲೆಂ. ಪ್ರೀತಿ
ಸೊಡ್ನ್ ವಚೊನ್ ಸುಮಾರ್ ಸ ಮಹಿನೆ ಉತ್ರಾಲ್ಲೆ ಜಾಲ್ಯಾರ್ಯಿ
ಪ್ರೊಫೆಸರಾಚೆಂ ಘರ್ ಏಕ್ ಸ್ತ್ರೀಯೆನ್ ಸಾಂಬಾಳ್ಚೆಪರಿಂ ಆಸ್ಲ್ಲೆಂ.
ಹಾಂವ್ ಘರಾ ಬಾಗ್ಲಾರ್ ಪಾವ್ಲೊ ಆನಿಂ ಕಾಂಪ್ಣಿ ವ್ಹಾಜಯ್ಲಿ. ಕಿತೆಂ
ಸಾಂಗ್ಚೆಂ ಮ್ಹಣ್ ಚಿಂತುನ್ ಆಸ್ತಾನಾ ದಾರ್ ಉಘಡ್ಲೆಂ........ ’ಸರ್’
ಮ್ಹಜೆಂ ಸಬ್ಧ್ ಮ್ಹಾಕಾಚ್ ಆಯ್ಕೊಂಕ್ ನಾಂತ್, ಆನಿಂ ದೊಳ್ಯಾಂನಿ ಪಳೈಲೆಂ.
ಮ್ಹಜ್ಯಾನ್ ಪಾತ್ಯೆಂವ್ಕ್ ಜಾಂವ್ಕ್ ನಾಂ. ಬಾಗ್ಲಾರ್ ಪ್ರಿತಿ ಉಭಿ ಆಸ್ಲ್ಲಿ.
ಹಾಂವೆಂ ಚಿಂತ್ಲೆಂ ಹಾಂವ್ ಚುಕೊನ್ ಅನ್ವರಾಚಾ ಘರಾ ಪಾವ್ಲೊಂಗಿ ಯಾ
ಹಾಂವೆಂ ಆಯ್ಕಾಲ್ಲೆಂ ಸರ್ವ್ ಫಟಿಂ? ತಿತ್ಲ್ಯಾರ್ ಭಿತರ್ ಥಾವ್ನ್ ಆವಾಜ್ ಆಯ್ಕಾಲೊ.
’ಕೋಣ್ ಡಿಯರ್’ ಪ್ರೊಫೆಸರಾಚೊ ತಾಳೊ. ಪ್ರೀತಿನ್
ಮ್ಹಾಕಾ ಭಿತರ್ ಆಪಯ್ಲೆಂ. ಹಾಂವ್ ಥಂಯ್ಚ್ ಸ್ತಬ್ಧ್ ಜಾಲ್ಲೊಂ.
ಕಾಲ್ ಹಾಂವ್ ಬಸ್ಸ್ಟಾಂಡಾರ್ ಪ್ರೀತಿಕ್ ರಾಕ್ತಾಲೊಂ ತುಂಮಿಂ ಆಯಿಲ್ಲ್ಯಾ ವೆಳಾರ್, ತುಜಿ
ಬಾಯ್ಲ್ ಮ್ಹಾಕಾ ಪ್ರೀತಿ ಬರಿಚ್ ದಿಸ್ಲಿ. ಪ್ರೊಫೆಸರ್ ಹಾಸಾಲಾಗ್ಲೊ. ಆದ್ಲ್ಯಾ
ದಿಸಾ ಪಳೈಲ್ಲೆ ಖಾಡ್ ನಾತ್ಲ್ಲೆ. ಪ್ರೊಫೆಸರ್ ಏಕ್ದಮ್
ಸಂತೊಸ್ಭರಿತ್ ದಿಸ್ತಾಲೊ. ತೊ ವಿದ್ಯಾಲಾಯಾಕ್ ವಚೊಂಕ್ ತಯಾರ್ ಜಾತಾಲೊ. ’ಸರ್ ತುಮ್ಕಾಂ, ವಿದ್ಯಾಲಾಯಾಕ್
ವೆಚ್ಯಾ ಪಯ್ಲೆಂ ಭೆಟ್ಯಾಂ ಮ್ಹಣ್ ಆಯ್ಲೊಂ, ವೆತಾಂ ಸರ್ ಮೆಳ್ಯಾಂ.
ಹಾಂವ್ ಉಟ್ಲೊಂ. ಖಂಯ್ ವೆತಾಯ್ ಚಾ ಪಿಯೆವ್ನ್ ವಚ್,
ಪ್ರೀತಿ, ಚಾ ಘೆವ್ನ್ ಭಾಯ್ರ್ ಆಯ್ಲಿ. ಆಮಿಂ ಚಾ ಪಿಯೆಲ್ಯಾಂವ್ ಆನಿಂ
ಪ್ರೊಫೆಸರ್ ಸಾಂಗಾಂತಾ ಹಾಂವ್ ಘರಾ ಥಾವ್ನ್ ಭಾಯ್ರ್
ಪಡ್ಲೊ.
ಹಾಂವ್ ಚಿಂತಾಲೊ, ದುಡ್ವಾಕ್ ಆನಿಂ ಸುಖಾಕ್ ಲಾಬ್ದೊನ್ ಗೆಲ್ಲೆಂ
ಪ್ರೀತಿ ಕಿತ್ಯಾಕ್ ಪಾಟಿಂ ಆಯ್ಲೆಂ. ಆಯ್ಲ್ಯಾರೀ ತಾಕಾ ಪರ್ತುನ್
ಪಾಟಿಂ ಕಾಣ್ಘೆಲ್ಲ್ಯಾ ಪ್ರೊಫೆಸರಾಕ್ ಕಿತೆಂ ಸಾಂಗ್ಚೆಂ ಮ್ಹಳ್ಳೆಂ
ಮ್ಹಾಕಾ ಸಮ್ಜೊಂಕ್ ನಾಂ. ತಾಕಾ ಮಹಾನ್ ಮ್ಹಣ್ಯೆತ್.
’ಚೂಕ್ ಕೋಣಿ ಕರ್ತಾತ್, ತಾಂಕಾಂ ಭಗ್ಸಿಜಾಯ್, ತಿ ಚೂಕ್ ವಳ್ಕಾತಿತ್ ಜಾಲ್ಯಾರ್, ಉಪ್ರಾಂತ್ ತಿಂ ತಸಲಿ ಚೂಕ್ ಕೆದಾಳಾಚ್ ಕರ್ಚಿ
ನಾಂತ್’ ಪ್ರೊಫೆಸರ್ ಹಾಸ್ಲೊ. ಮ್ಹಜ್ಯಾ ಕಡೆ ಉತ್ರಾಂ
ನಾತ್ಲ್ಲಿಂ. ಹಾಂವ್ ಹಾಸ್ಲೊಂ ಯಾ ಹಾಸೊಂಕ್ ಪ್ರಯತ್ನ್ ಕೆಲೆಂ. ತಿತ್ಲ್ಯಾರ್
ಮಹಾವಿದ್ಯಾಲಾಯಾ ಲಾಗಿ ಆಯಿಲ್ಲ್ಯಾನ್ ಹಾಂವೆ ಆದೇವ್ಸ್
ಮಾಗ್ಲೊ ಆನಿಂ ಮ್ಹಜಿ ವಾಟ್ ಧರ್ಲಿ.
ಪ್ರೀತಿಕ್ ಆನ್ವರಾನ್ ಮಾಗ್ಲ್ಲೆಂ ಸರ್ವ್ ತಾಚ್ಯಾ ಪಾಯಾಂಥಳಾಂ
ಹಾಡ್ನ್ ಘಾಲ್ಲೆಂ. ತಾಕಾ ಪಯ್ಶ್ಯಾಂಕ್ ಕಿತೆಂಚ್ ಉಣೆಂ ನಾತ್ಲ್ಲೆಂ. ತಾಕಾ ಚಾರ್ ಕಾರಾಂ ಆಸ್ಲ್ಲಿಂ. ತಾಚ್ಯಾ ಬಂಗ್ಲ್ಯಾಂತ್
ಹರ್ಯೇಕಾ ಕಾಮಾಕ್ ಚಾಕೊರ್ ಆಸ್ಲ್ಲೆ. ತೆ ಕಿತೆಂ ಆಶೆತಾಲೆ ತೆಂ
ಸರ್ವ್ ತಾಕಾ ಮೆಳ್ತಾಲೆ. ಆಶೆಂ ಸ ಮಹಿನೆ ಪ್ರೀತಿನ್ ಅನ್ವರಾ
ಸಾಂಗಾಂತಾ ಪಾಶಾರ್ ಕೆಲ್ಲೆ. ತಾಕಾ ಕಿತೆಂಚ್ ಉಣೆಂ ನಾತ್ಲ್ಲೆಂ.
ತ್ಯಾ ಸನ್ವಾರಾ ರಾತಿಂ ಪ್ರೀತಿನ್ ಪ್ರೊಫೆಸರಾಕ್ ಫೋನ್ ಕೆಲ್ಲೊ
’ದಯಾ ಕರ್ನ್ ಮ್ಹಾಕಾ ಮಾಫ್ ಕರ್, ಮ್ಹಾಕಾ ಪಾಟಿಂ ಯೇಜಾಯ್.
ಹಾಂವ್ ತುಜೆಂ ಕಾಮಾಚೆಂ ಮ್ಹಣ್ ಲೇಕ್. ಪುಣ್ ಮ್ಹಾಕಾ
ನೆಗಾರ್ ಕರಿನಾಕಾ’. ತೆಂ ಪ್ರೊಫೆಸರಾಕಡೆ ಭಿಕ್ ಮಾಗಾಲಾಗ್ಲೆಂ. ಕಿತ್ಯಾಕ್ ಥೊಡ್ಯಾಚ್ ವೆಳಾ
ಪಯ್ಲೆಂ ಆನ್ವರ್ ಘರಾ ಆಯಿಲ್ಲೊ ಆನಿಂ ಮ್ಹಣಾಲೊ ’ಡಿಯರ್ ಫಾಲ್ಯಾಂ
ಹಾಂವೆಂ ಏಕ್ ಪಾರ್ಟಿ ತಯಾರ್ ಕೆಲ್ಯಾ. ವ್ಹಡ್ಲೆ ಬಿಸ್ನೆಸ್ಮೆನ್ ಆನಿಂ
ಮಂತ್ರಿ ಯೆತಾತ್. ಮ್ಹಾಕಾ ಏಕ್ ವ್ಹಡ್ಲೆಂ ಕಾಂಟ್ರಾಕ್ಟ್ ಮೆಳ್ಚಾರ್ ಆಸಾ. ಉಣ್ಯಾರ್ ಉಣೆಂ ದೋನ್ ಕೊರೊಡಾಚೆಂ ದೆಕುನ್....... ತುಂವೆಂ ಏಕ್ ರಾತ್
ಮಂತ್ರಿ ಸಾಂಗಾಂತಾ ಪಾಶಾರ್ ಕರಿಜಾಯ್’.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
