[7. ಬದ್ಲಾವಣ್]

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ರುಸ್ತುರುಸಾಂವ್

ಹೆಂ ತತ್ವಾಂ-ತರ್ಕಾಂಚೆಂ ತೆಂತೆಸಾಂವ್

ಹೆಂ ಆಮ್ಶೆಂ-ತಿಕ್ಶೆಂ ಮಿಸಾಂವ್

ಹೆಂ ರಾಜಾಂವ್-ವಿಚಾರಾಂಚೆಂ ಲಿಸಾಂವ್

ರುಸ್ತುರುಸಾಂವ್ - 7. ಬದ್ಲಾವಣ್

ಲ್ಯಾನ್ಸಿ ಪಿಂಟೊ ನಾಯಕ್

ಸಂಸಾರಿ ಸರ್‍ವ್ ಮನ್ಶ್ಯಾಕುಳ್ ಆಶೆತಾ. ಆನಿ ಗರ್‍ಜೆಚೆಂ ಜಾವ್ನಾಸಾ - ಬದ್ಲಾವಣ್!

ಮನ್ಶ್ಯಾಕ್ ಅಪ್ಲೆಂ ’ಫಾಲೆಂ’ ಕಿತೆಂ ಮ್ಹಳ್ಳ್ಯಾ ಮಿಸ್ತೆರಾಭರಿತ್ ಸುಳಿ ಗೊಂದೊಳಾನಿ ಆಸ್ಲ್ಯಾರೀ ಆನಿ ಗುಸ್ಲ್ಯಾರೀ ಜಿಯೆಂವ್ಚಿ ಏಕ್ ಆತುರಾಯ್ -ಚತುರಾಯ್-ಕುತುಹಲ್‌ಭರಿತ್ ಜಿವಿತ್ ಮನ್ಶ್ಯಾಕ್ ದೆವಾನ್ ಏಕ್ ’ಇನಾಮ್’ ದಿಲ್ಲೆಂ ಆಸ್ತಾಂ,’ಪೊರ್‍ವಾಂ’ಚ್ಯೊ ಅಲೋಚನ್ಯೊಯೀ ನಾಕಾ ನಾಕಾ ಮ್ಹಳ್ಯಾರೀ ಖಳಾನಾಸ್ತಾಂ, ವಳಾನಾಸ್ತಾಂ ಮತಿಂತ್ ಲೊಳವ್ನ್, ಘೊಳವ್ನ್ ಪಳಂವ್ನ್ ಥಕ್ಚೆ ಜಾಯ್ತೆ ಅಸಾತ್.

ಬದ್ಲಾವಣ್ ಜಾವ್ನಾಸಾ ಅಭಿವೃದ್ದಿ ಮ್ಹಣಾ ವ ಯಶಸ್ವಿ.

ಬದ್ಲಾವಣ್ ಗರ್‍ಜೆಚಿ ತಶೆಂ ಮರ್‍ಜೆಚಿ ಜಾವ್ನಾಸಾ ಮನ್ಶ್ಯಾಕ್.

ಬದ್ಲಾವಣ್ ಅಮಿಂ ಕೆಲ್ಲ್ಯಾ ಸವಯೆವರ್ವಿಂ ಜಾತಾ, ಮ್ಹಿನತೆನ್ ಯೆತಾ, ಅಮ್ಚಿ ಬುಧ್ವಂತ್ಕಾಯ್, ಪರಿಣತಾ, ಗಿನ್ಯಾನ್, ಅನ್ಭೋಗ್, ಆಶೆಕ್ ಘೆತ್ಲ್ಯಾರ್ ದಿಸ್ತಾ.

ತ್ಯಾ ಖಾತಿರ್ ತೀನ್ ಸಂಗ್ತಿ ಗರ್ಜೆಚ್ಯೊ.

ಪಯ್ಲಿ - ಅಮಿಂ ಪಳೆಂವ್ಚಿ ದೃಷ್ಟಿಕೋನ್
ದುಸ್ರಿ - ಚಿಂತ್ಚ್ಯೊ ಅಲೋಚನೊ
ತಿಸ್ರೆಂ - ಚಲ್ಚಿ ಚಾಲ್

ದೃಷ್ಟಿಕೋನ್ ಬದ್ಲಾವಣ್ ಗರ್ಜ್ ಕಿತ್ಯಾಕ್ ಅಮಿಂ ಘಾಲ್ಲೆಂ ’ವೊಕ್ಲ್’ ಅಧ್ಲೆಂ ಮಾಲ್ಘಡ್ಯಾಂಚೆಂ.

ಚಿಂತ್ಚ್ಯೊ ಅಲೋಚನೊಂ ಸತಾಚ್ಯಾ ವಾಟೆಚ್ಯೊ, ಸರ್‍ವಾಂಕ್ ಗರ್ಜೆಚ್ಯೊ ಆನಿ ಮನ್ಶ್ಯಾ ಕುಳಾಕ್ ಫಾಯ್ದ್ಯಾಚ್ಯೊ ಬದ್ಲಾವಣ್ಯೊ ಜಾಯ್ಜಯ್.

ಚಿಂತ್ಚೆಂ ವಿಂಗಡ್ ಅನಿ ಚಲ್ಚೆಂ ವಿಂಗಡ್, ದುಸ್ರ್ಯಾಂನಿ ಕೆಲ್ಲ್ಯಾ ವ ಪರಿಸ್ಠಿತೆಕ್ ಆಮಿಂ ಸ್ಪಂದಿಸುಚಿ ರೀತ್ ’ಚಾಲ್’ ಮ್ಹಣ್ಯೆತ್.

ಬದ್ಲಾವಣ್ ಮನಿಸ್ ಜಿಣ್ಯೆಚ್ಯಾ ಸರ್ವ್ ಹಂತಾಂ ಹಂತಾನಿ ಆಶೆತಾ ಆನಿ ಗರ್‍ಜೆಚೆಂ ಮ್ಹಣ್ ಲೆಕ್ತಾ.

ಮೊಡ್ಕೆಂತ್ ರೇಂವ್ ಪಯ್ಲಿ ಘಾಲ್ನ್ ಥೊಡೆ ಫಾತೊರ್ ಘಾಲ್ಯೆತ್. ಪುಣ್ ಫಾತೊರ್ ಘಾಲ್ನ್ ಉಪ್ರಾಂತ್ ರೆಂವ್ ಘಾಲ್ನ್ ಹಾಲೆಯ್ಲ್ಯಾರ್ ಜಾಯ್ತೆಂ ಸೊಂಬ್ತಾ.

ಖಂಯ್ ಚುಡಿ, ದಂದ್ಯೊ? ಖಂಯ್ ನಿಯ್ಯೊನ್, ಹೆಲೊಜನ್ ದಿವೆ?
ಖಂಯ್ ಗಾಡ್ವಾಂ, ಬೊಯ್ಲಾ ಗಾಡಿ? ಖಂಯ್ ವಿಮಾನ್, ರೊಕೆಟ್?
ಖಂಯ್ ಶಿಗ್ಡಿ, ರಾಂದ್ಣಿ? ಖಂಯ್ ಕುಕ್ಕಿಂಗ್ ರೆಂಜ್, ಮೆಕ್ರೊವೆವ್?

ಹಾಂವೆ ಪಳೆಲ್ಲಿ ಬದ್ಲಾವಣ್ ಮ್ಹಜ್ಯಾ ಬಾಪಾಯ್ನ್ ಪಳೆಂವ್ಕ್ ನಾ.
ಮ್ಹಜ್ಯಾ ಬಾಪಾಯ್ನ್ ಪಳೆಯ್‌ಲ್ಲಿ ಬದ್ಲಾವಣ್ ಮ್ಹಜ್ಯಾ ಆಬಾನ್ ಪಳೆಂವ್ಕ್ ನಾ.

ಆನಿ... ಮ್ಹಜೊ ಪುತ್ ಕಿತೆಂ ಪಳೆಂವ್ಕ್ ಸಕ್ತಾ ತೆಂ ಹಾಂವ್ ಚಿಂತುಂಕ್ ಸಕಾನಾ.

ಮ್ಹನ್ಶ್ಯಾ ಜಿವಿ ಲಾಖೊಂ ವರ್ಸಾಂ ಥಾವ್ನ್ ಆಸ್ಲ್ಯಾರ್‌ಯೀ ಬದ್ಲಾವಣ್ ಸುರು ಜಾಲ್ಲಿ ಪಾಟ್ಲ್ಯಾ ಫಕತ್ತ್ ಧಾ-ಭಾರಾ ಹಜಾರ್ ವರ್ಸಾಂ ಥಾವ್ನ್. ತಾಂತುಯೀ ಅದ್ಭುತ್ ರಿತಿನ್ ಪ್ರಗತಿ ಜಾಲ್ಲಿ ಪಾಟ್ಲ್ಯಾ ದೊನ್ಶಿಂ ವರ್ಸಾಂನಿ.

ಚಡಾವತ್ ಶೋಧನಾ, ಸಂಶೋಧನಾಂ ಪಾಟ್ಲ್ಯಾ ಹ್ಯಾ ದೊನ್ಶಿಂ ವರ್ಸಾನಿಂಚ್ ಜಾಲ್ಲಿಂ.

ಸರ್ವ್ ಆಪ್ಲಿ ಬುಧ್ವಂತ್ಕಾಯ್ ಉಪಯೋಗ್ ಕರ್‍ತಾನಾ, ಆಪಾಪಿಂ ಬದ್ಲಾವಣ್ ಯೆತಾ. ಜಾಣ್ವಾಯ್ ಅನಿ ಆನ್ಭೋಗ್ ಚಡಿತ್ ಪ್ರೇರಣ್ ದಿತಾತ್.

ಶೆಂಬೊರ್ ವರ್ಸಾಂ ಆದಿಂ ಮನಿಸ್ ಆರಾಮಯೆನ್ ವಿಶ್ರಾಂತ್ ಘೆತಾನಾ ಸಂತೊಸಾನ್ ಆಸ್‌ಲ್ಲೊ. ಆತಾಂ ಹರ್‍ಯೆಕ್ ಘಡಿ ಬದ್ಲಾವಣ್ ಆಶೆತಾ. ಮಧ್ಯಾನೆ ರಾತಿ ಕುಡಿಚಿ ಗರ್‍ಜ್ ತಿರ್‍ಸುಂಕ್ ಉಟ್ಲ್ಯಾರೀ ತೆದ್ನಾಂಯ್ ಇಂಟರ್‌ನೆಟ್ ಪಳೆಂವ್ಕ್, ಇಮೇಯ್ಲ್ ವಾಚುಂಕ್ ಮನ್ ಯೆತಾ.

ಆತಾಂ ಸವಾಲ್.... ಹ್ಯಾ ಸರ್ವ್ ಬದ್ಲಾವಣೆಂತ್ ಆಮಿಂ ಸರ್ವ್ ಆಸಾಂವ್‌ಗೀ?

ಆಮಿಂ ಸಭಾರಾಂ ಮಾಜ್ರಾಪರಿಂ ದೊಳೆ ಧಾಂಪುನ್ ದೂದ್ ಪಿಂಯೊಂವ್ಚ್ಯಾ ಕೊನ್ಶ್ಯಾಂತ್ ನಾಂವ್‌ಗೀ?

ಧಾರ್ಮಿಕ್ ರಿತಿಚಿ ಬದ್ಲಾವಣ್ ಹಾಡುಂಕ್ ಆರ್ತಿಕ್ ರೀತಿನ್ ಮ್ಹಾರ್ ಬಸ್ತಾ ಮ್ಹಳ್ಳ್ಯಾ ಅಧಿಕಾರಿಕ್ ಭಿರಾಂತೆನ್ ಸ್ಠಗಿತ್ ಜಾಲ್ಯಾ.

ದೇವ್, ದೆಂವ್ಚಾರ್ ಅನಿ ಧರ್ಮ್ ಅಮ್ಚ್ಯಾ ಶಿಂತಿದಾಂತ್ ಇರ್ಜೊನ್ ಗೆಲಾಂ. ಬದ್ಲಾವಣ್ ಚಿಂತುಂಕ್ ಆಸಾಧ್ಯ್ ಜಾಲ್ಯಾ.

ಆಮ್ಚಿ ಬದ್ಲಾವಣ್ ಖಂಚ್ಯಾ ರೀತಿಚಿ? ಥೊಡೆಂ ಸಾಂಗೊಂ??

ಆಮ್ಚ್ಯಾ ಬಾಯ್ಲಾಂಕ್ ಘರಾ ಫಿಚಾರ್ ಕರ್‍ನ್ ದುಸ್ರ್ಯಾ ಬಾಯ್ಲಾಂಕ್ ಲೆಂಬೆಂವ್ಚೆಂ.

ಘರಾಂತ್ ಲಡಾಯ್ ಕರ್‍ನ್ ಪಾರ್ಟೆಂತ್ ’ಮೋಗಾನ್ ಆಸಾಂವ್’ ಮ್ಹಣ್ ನಾಸ್ಚೆಂ.

ಗರೀಬಾಂಕ್ ಬನಾಂವ್ನ್, ಆಪ್ಲ್ಯಾಂಕ್ ನಾಗಂವ್ನ್ ದೆವಾಚ್ಯಾ ನಾಂವಾನ್ ದಾನ್ ದಿಂವ್ಚೆಂ?

ನಾಗಾಯಿಲ್ಲೆ ಪಯ್ಶೆ ದಿಂವ್ನ್, ಮಾನ್ ಘೆಂವ್ಚೊ? ಬಿರುದಾಂ ಘೆಂವ್ಚಿಂ?

ಕೊಣಾಚ್ಯಾ ಮ್ಹಿನತೆಕ್ ಲುಟುನ್ ’ಆಪ್ಲೆಂ’ ನಾಂವ್ ಗಾಜಂವ್ಚೆಂ?

ಧಾರ್ಮಿಕ್ ಸಂಸ್ಥ್ಯಾಂಕ್ ದಾನ್ ಕರ್‍ನ್, ನಾಂವ್ ಜೊಡುಂಕ್ ಸಾದ್ಯಾ ಮ್ಹನ್ಶ್ಯಾಂಕ್ ಪಿಳ್ಚೆಂ? (ಭಿಸ್ಪಾಲಾಗಿಂ ಪಯ್ಶೆ ನಾಂತ್? ವ ವಿಚಾರ್‍ತೆಲ್ಯಾಂಕ್ ಬರ್ಗಾಲ್ ಪಡ್ಲಾ?)

ಆಚ್ಚಾ! ಪಾಟ್ಲ್ಯಾ ಥೊಡ್ಯಾ ದಿಸಾಂ ಆದಿಂ ಮ್ಹಾಕಾಯೀ ಏಕ್ ’ಮಧ್ಯಾನೆ ರಾತಿಚೊ ಸನ್ಮಾನ್’ ಮೆಳ್ಳೊ. ಜಿಣ್ಯೆಂತ್ ವಿಸ್ರೊಂಕ್ ಆಸಾಧ್ಯ್ ಜಾಲ್ಲೆಂ ಘಡಿತ್ ಮ್ಹಣ್ಯೆತ್.

ನಾಂವಾಡ್ದಿಕ್ ವಿದ್ಯಾ-ಸಂಸ್ಥ್ಯಾಚ್ಯಾ ನಾಂವಾನ್. ಶಿಕ್ಪಿ ಮನ್ಶ್ಯಾಚ್ಯಾ ಕಾರ್‍ಯಾಂಕ್ ಮ್ಹಾಕಾ ಜಾಯ್ತೆಂ ಶಿಕೊಂಕ್ ಮೆಳ್ತಾ.

ಕಾರ್‍ಯೆಂ ನೋವ್ ವೊರಾರ್ ರಾತಿಂ ಸುರು ಮ್ಹಣ್ ಠರಾಯಿಲ್ಲೆಂ ತರ್‌ಯೀ ಮ್ಹಾಕಾ ರಾತಿಂ ಧಾ ವೊರಾರ್ ಆಯ್ಲ್ಯಾರ್ ಪುರೊ ಮ್ಹಳ್ಳೆಂ.

ನಾಂವಾಡ್ದಿಕ್ ಹೊಟೆಲಾಂತ್ ಹಾಂವ್ ವೇಳಾರ್ ಪಾವ್ಲೊಂ. 

ಇಕ್ರಾ ವ್ಹಾಜುಂಕ್ ಧಾ ಮಿನುಟಾಂ ಆದಿಂ ನಾಚಾಕ್ ಆಪವ್ಣೆಂ ಆಯ್ಲೆಂ.

ಉಪ್ರಾಂತ್ ಸುರು.... ಕಾನ್ ಕೆಪ್ಪೆ ಜಾಂವ್ಚ್ಯಾ ಆವಾಜಾನ್ ಸಂಗೀತ್!(?)

ಅಮ್ಚ್ಯಾ ಮಂಗ್ಳೂರಿ ಸಂಸ್ಕೃತೆಚೆ ಮನಿಸ್ ಸಗ್ಳೆ ವಿಸಾರ್‍ಲ್ಯಾತ್...! ಜುನ್ಕಾಟ್ ಬಾಯ್ಲಾಂಯೀ ಮಧುರಿ, ಪ್ರೀತಿ ಝಿಂಟಾಪರಿಂ ಶೇಲೆ ಕರ್‍ತಾನಾ ತಾಂಚಿಂ ಭುರ್ಗಿಂ ಭುಕೆನ್ ಸಳ್ ಕರ್‍ಚೆಂ ಮ್ಹಾಕಾ ವೇಳ್ ಪಾಶಾರ್ ಕರುಂಕ್ ಪಳಂವ್ಕ್ ಏಕ್ ನಾಟಕ್ ಜಾಲೊ.

ದಾದ್ಲೆ ತೆ ಕಿತೆಂ ಸಾಂಗೊಂ? ಮ್ಹಜ್ಯಾ ಸಂಯ್ಬಾಚೆಂ ಹಣೆಬರಾಪ್ ವೊಂಕೊಂ?

"ಡಿಸ್ಕೊ" ಪಾರ್ಟಿಂತ್ ಆಸ್‌ಲ್ಲೊ ಆನ್ಭೊಗ್.

ಘೊಟ್‌ಲ್ಲೆ ಥೊಡೆ ಶೆಂಕಾರೆಂ ಫುಲಂವ್ನ್ ನಾಚ್ತಾನಾ ಥೊಡೆ ಬಾವ್ದೆ ಭುರ್‍ಗ್ಯಾಕ್ ಖಾಂದಿ ಘೆಂವ್ನ್ ಸಿರೆನಾಚ್ಯಾ ಸಿಮಾಂವ್‌ಪರಿ ಪ್ರಾಜಿತ್ ಕರ್ತಾಲೆ.

ಮಂಗ್ಳುರಿ ಬಾಯ್ಲ್ಯಾ ಸಮಾಜೆಂತ್ಲ್ಯಾಂಕ್ ಏಕ್ ’ಫೆಸ್ತ್’ಚ್ ಮ್ಹಣ್ಯೆತ್. ಚಡಾವಾತ್ ತೆಚ್ಚ್ ಸ್ಪೋನ್ಸರ್‍ಸ್.

ಪಯ್ಶ್ಯಾಂವಾಲ್ಯಾಂಕ್ ಕಿತೆಂ ಜಾಯ್? ನಾಂವ್, ಗವ್ರವ್ ಆನಿ ಗಮನ್.

ಆನಿ ಆಮಿಂ ಪಯ್ಶೆ ಮೆಳ್ತಾತ್ ತರ್ ಕಿತೆಂಯ್ ದೀಂವ್ಕ್ ತಯಾರ್. ಹಿ ಆಮ್ಚಿ ಬದ್ಲಾವಣ್?

ಮಧ್ಯಾನೆ ಏಕ್ ವಾಜ್ಚ್ಯಾ ಆದಿಂ ಕಶೆಂಯೀ ಸನ್ಮಾನಾಕ್ ಉಲೊ ಆಯ್ಲೊ.

ಪಯ್ಲೊ ಮಾನೇಸ್ತ್ ಉದ್ಯಮಿ ಹಾಜರ್ ನಾತ್‌ಲ್ಲ್ಯಾನ್ ವಾಂಚ್ಲೊ. 

ದುಸ್ರೊ ಹಾಂವ್ ... ಗಿಳುಂಕ್‌ಯೀ ನ್ಹಂಯ್ ಉಡಂವ್ಕ್‌ಯೀ ನ್ಹಂಯ್ ಮ್ಹಳ್ಳ್ಯಾ ಪರಿಸ್ಥಿತೆರ್ ಉಟ್ತಾನಾ ಎಮ್ಸಿ ತ್ಯಾ ಆವಾಜಾಂತ್ ಕಿತೆಂ ಅರ್‍ಧೆಂಕುರೆಂ ಉಲಯ್ತಾ ದೇವ್‌ಚ್ ಜಾಣಾಂ. 

ನಾಚೊನ್ ಥಕ್‌ಲ್ಲೆ ಖರಸ್ ಕಾಡ್ನ್ ಆಕ್ಲಾಸ್ ಉಲಯ್ತಾತ್... ಆನಿ ಹಾಂವ್ ಬಾವ್ಡೊ ಬರ್ಪಿ ’ಮಾನ್’ ಆಶೆಲ್ಲ್ಯಾಪರಿಂ ಸನ್ಮಾನಾಕ್ ಧಾಂವ್ತಾಂ.

ಕೊಣಾಚೆಂಯ್ ಗಮನ್ ಅನಿ ಶಿಂತಿದ್ ಥಾರ್‍ಯಾರ್ ಆಸ್ಚೆಂ ದಿಸಾನಾತ್‌ಲ್ಲೆಂ.

ಮ್ಹಾಕಾ ಮ್ಹಜೆರ್‌ಚ್ ಕಾಂಠಾಳೊ ಭಗ್ಲೊ.... "ಡಿಸ್ಕೊ ಕಾರ್‍ಯಾಂತ್ ಕೊಂಕ್ಣಿ ಬರವ್ಪ್ಯಾಕ್ ಸನ್ಮಾನ್?"

ಉಪ್ರಾಂತ್ ತಿಸ್ರೊ ಖುಶೆನ್ ಆಯ್ಲೊ.

ಹಾಂವೆಂ ಚಿಂತ್ಲೆಂ ..... ಮ್ಹಜ್ಯಾ ಬೆಜಾರಾಯೆಕ್ ಮ್ಹಜಿ ’ಬದ್ಲಾವಣ್’ ಆನಿ ಪಯ್ಲೆಂಚೆ ’ಬರೆ ಆನ್ಭೊಗ್’ ಕಾರಣ್ ಜಾವ್ಯೆತ್.

ವೊರಾಂ ಮಧ್ಯಾನೆಚಿಂ ದೋನ್ ವಾಜ್ತಾನಾ ಹಾಂವ್ ಜೆವಿನಾಸ್ತಾಂ ಘರಾ ಬಾಯ್ರ್ ಸರ್‍ಲೊ. ಜೆವ್ಣಾಕ್ ವೇಳ್ ಲಾಗ್ತಾ ತೆಂ ಹಾಂವ್ ಜಾಣಾಂ.

ವಾಟೆರ್ ಎಕ್‌ಚ್ ಚಿಂತುಂಕ್ ಪಡ್ಲೊಂ.......

ಎಕಾ ಶಿಕ್ಪಿ ಮನ್ಶ್ಯಾಚ್ಯಾ ಸಂಸ್ಥ್ಯಾಕ್ ದುಸ್ರ್ಯಾ ರಿತಿನ್ ಕಾರ್‍ಯೆಂ ಮಾಂಡುಂಕ್ ನೆಣಾಂಗೀ?

ದುಬ್ಳ್ಯಾ ಭುರ್‍ಗ್ಯಾಂಚ್ಯಾ ನಾಂವಾನ್ ಆಮ್ಚ್ಯಾ ಸಂಸ್ಕ್ರತೆಚೊ ಭೊಂಗೊಸ್ತಳ್ ಕರ್ಚೊ ಸಾರ್ಕೊಗೀ?

ಆಮ್ಚೆಂ ಕಾರ್‍ಯೆಂ ಕರ್‍ಚೆಂ ’ಮಟ್ಟ್’ ಅನಿ ಶ್ಯಾಥಿ ಫಕತ್ತ್ ’ನಾಚಾಕ್’ ಸಿಮೀತ್?

ಇತ್ಲ್ಯಾ ಗತಿಗಟ್ಟಾನ್ ಪಯ್ಶೆ ಜಮೊ ಕರ್‍ಚ್ಯಾಕ್‌ಯೀ ದಾನ್ ವಿಚಾರ್‍ಲ್ಯಾರ್ ಜಾತೆಂ ನಾಂಗೀ?

ಭಿಸ್ಪ್, ಕಿತ್ಯಾಕ್ ಕುಮೊಕ್ ಕರಿನಾ?

ಭಿಸ್ಪಾಲಾಗಿಂ ದುಕೊಳ್ ಪಡ್ಲಾ?

ಅಸಲಿಂ ಕಾರ್‍ಯಿಂ... ವೇಳ್-ಕಾಳ್ ನಾ, ವೆಳಾರ್ ಜೆವಾಣ್ ನಾ, ಭುರ್‍ಗ್ಯಾಂಕ್ ನೀದ್ ನಾ. ಭಲಾಯ್ಕೆಕ್ (ಕಠೀನ್ ಆವಾಜ್) ವಿರೋದ್, ಬರಿ ದೇಖ್ ನಾ, ಚಡ್ ಕರ್‍ನ್ ಆಪ್ಲೆಂ ಮ್ಹಳ್ಳೆಂ ’ಮಟ್ಟ್’ ನಾ.

ಹ್ಯಾ ರಿತಿನ್ ಪಯ್ಶೆ ದಿಂವ್ಚಿ ಗರ್ಜ್ ಆಸಾಗೀ? ವ "ದಾನ್ ದಿಲೆಂ" ಮ್ಹಳ್ಳೆಂ ಸಾಧನ್ ಕೆಲೆಂ ಮ್ಹಣ್ ದಾಖಂವ್ಕ್?

ಫಾಂತ್ಯಾರ್ ತೀನ್ ವ್ಹಾಜ್ತಾನಾ ಥೊಡೆಂ ಜೆಂವ್ನ್ ನಿದ್ಲೊಂ.

ಉಪ್ರಾಂತ್ ಆಂತರ್‌ಜಾಳಾಚೆರ್ ಖಭಾರ್ ವಾಜ್ತಾನಾ ಹಾಂವ್ ಶಿರಿಂ ಚುಕ್ಲೊಂ.

".... ಕಾರ್‍ಯೆಂ ಸಾಡೆ ನೋವಾಕ್ ಸುರು ಜಾವ್ನ್, ಪಾಂಚಾಂಕ್ ಆಕೇರ್ ಜಾಲೆಂ. ದೇಡ್ ವೊರಾರ್ ಜೆವಾಣ್ ದಿಲೆಂ....."

ಖಬರ್ ವಾಚ್‌ಲ್ಲೊ ಮ್ಹಜೊ ಖಾಸ್ ಮಿತ್ರ್ ರೊನಿ ಫೋನ್ ಕರ್‍ನ್ ವಿಚಾರ್‍ತಾ,

"ಲ್ಯಾನ್ಸಿಯಾಬ್ ತುಮ್ಕಾಂ ಸನ್ಮಾನ್ ಕೆಲ್ಲೊ ಫೊಟೊ ಇಂಟರ್‌ನೆಟ್ಟಾರ್ ಪಳೆಯ್ಲೊ.... ಹಾಂವ್‌ಯೀ ಆಯಿಲ್ಲೊಂ ಕಾರ್‍ಯಾಕ್... ಹಾಂವೆಂ ತುಮ್ಕಾಂ ಪಳೆಂವ್ಕ್‌ಚ್ ನಾ. ಛೆ ಛೆ ಸೊರ್ರಿ ಲ್ಯಾನ್ಸಿಯಾಬ್..."

"ವ್ಹಡ್ ನಾ ರೊನಿ, ತುಂ ನಾಚೊಂನ್ ಥಕ್‌ಲ್ಲೊಯ್ ಜಾಂವ್ಕ್ ಪುರೊ." 

"ವ್ಹಯ್ ತ್ಯಾ ಅವಾಜಾಂತ್ ಕಿತೆಂಚ್ ಆಯ್ಕಾನಾತ್‌ಲ್ಲೆಂ."

ಹಾಂವ್ ಥಂಡ್‌ಗಾರ್ ಜಾಲೊಂ.

ಆಮ್ಕಾಂ "ಬದ್ಲಾವಣ್" ಗರ್ಜ್ ಆಸಾ ನ್ಹಂಯ್‌ಗೀ?

ರುಸ್ತುರುಸಾಂವಾಚಾ ಆಧ್ಲ್ಯಾ ತೆಸಾಂವಾಂಕ್ ಭೆಟ್ ದಿಯಾ

1. ರೋದ್

2. ಗ್ರೇಸ್ತ್‌ಕಾಯ್

3. ಚೂಕ್

4. ದೂಕ್

5. ಸುರಾತ್

6. ಸೊಲ್ಲೊ

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications