[6. ಸೊಲ್ಲೊ]

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ರುಸ್ತುರುಸಾಂವ್

ಹೆಂ ತತ್ವಾಂ-ತರ್ಕಾಂಚೆಂ ತೆಂತೆಸಾಂವ್

ಹೆಂ ಆಮ್ಶೆಂ-ತಿಕ್ಶೆಂ ಮಿಸಾಂವ್

ಹೆಂ ರಾಜಾಂವ್-ವಿಚಾರಾಂಚೆಂ ಲಿಸಾಂವ್

ರುಸ್ತುರುಸಾಂವ್ - 6. ಸೊಲ್ಲೊ

ಲ್ಯಾನ್ಸಿ ಪಿಂಟೊ ನಾಯಕ್

"ಅನ್ನ್ಯಾಯ್ ಅನೀತೆಕ್ ಸೊಲ್ಲೊ ಕರ್ನ್ ಮೌನ್ ರಾಂವ್ಚಾ ತಿತ್ಲೊ ವ್ಹಡ್ ಅಪ್ರಾದ್ ದುಸ್ರೊ ಖಂಚೊಯ್ ನಾ" ಸುಭಾಸ್‌ಚಂದ್ರ ಭೋಸ್ ಸಾಂಗ್ತಾ.

ಸೊಲ್ಲೊ ಮ್ಹಣ್ತಾನಾ ಕಸಲೆಂಗೀ ಮಾನಸಿಕ್ ಒಪ್ಪಂದ್ ಉಗ್ಡಾಸಾಕ್ ಹಾಡ್ತಾ ತರ್‌ಯೀ ಆಮ್ಚೊ ಪರ್ನೊ ಸೊಲ್ಲೊ ಆನಿ ನವೊ ಸೊಲ್ಲೊ ಆಮ್ಚಾನ್ ವಿಸ್ರೊಂಕ್ ಜಾಯ್ನಾಂ.

ಹಾಂವ್ ವಾಂಜೆಲಾವಿಶಿಂ ಉಲಯ್ನಾರೆ ಬಾಬಾ!!

ಹಾವೆಂ ಸಾಂಗ್ಚೊ ಮತ್ಲಬ್ ಆಮ್ಚೆ ಮಾಲ್ಗಡೆ ಮೊರ್ತಾಲೆ ಆತಾಂ ಸರ್ತಾತ್, ಆನಿ ದೆವಾದಿನ್ ಜಾತಾತ್.
ಆದ್ಲೆ ತಾಲ್ವಾರೆನ್ ಕಾಪ್ತಾಲೆ ಚುರಿಯೆನ್ ತೊಪ್ತಾಲೆ ಆತಾಂ ’ಡಿಶುಂ’ ಗುಳ್ಯಾನ್ ಕಾಬಾರ್ ಕರ್ತಾತ್ ’ಡಗ್ ಡಗ್’ ಎ.ಕೆ.೪೭ ನ್ ಕಾರ್ಭಾರಾಂ ಕರ್ತಾತ್.

ಆದಿಂ ಬೊಯ್ಲಾಚಾ ಗಾಡ್ಯಾಂನಿ ವ ಲಾರಿ ಬಸ್ಸಾಂನಿ ಪಯ್ಣಾಂತ್ ವೇಳ್ ವಿಭಾಡ್ತಾಲೆ. ಆತಾಂ ವಾರ್‍ಯಾವೆಗ್ಚಾ ಕಾರಾಂನಿ ವಿಮನಾಂನಿ ಪಯ್ಣಾಚೊ ವೇಳ್ ಸಾಂಬಾಳ್ತಾತ್.

ಆದ್ಲೆ ಚಿಮ್ಣೆ, ಲಾಂಪ್ಯಾಂವ್, ಚುಡಿ ಪೆಟವ್ನ್ ರಾತ್ ಪಾಶಾರ್ ಕರ್ತಾಲೆ.. ಆತಾಂ..? ಸೊಡ್ಯಾಂ ರಾತಿಕ್ ಕಾಳೊಕ್ ಖಂಯ್ ಆಸಾ ಸಾಯ್ಬಾ?! ಕಾಳೊಕ್ ಆಮ್ಕಾಂ ಗರ್ಜ್ ಮ್ಹಣ್ ಭೊಗ್ತಾನಾ ಮಾತ್ರ್ ನ್ಹಯ್‌ಗೀ ಆಮಿ ಕರ್ಚೊ?! (ದಿವೆ ಪಾಲ್ವೊನ್)
ವಿಚಿತ್ರ್ ಬದ್ಲಾವಣ್ ಮನ್ಶಾಕುಳಾನ್ ಮನ್ಶಾ ಸಮಾಜೆಂತ್ ಆಸಾ ಕೆಲ್ಯಾ ಆನಿ ಪ್ರಗತಿ ದಿಸಾನ್‌ದೀಸ್ ಹಟ್ ಧರುನ್ ಮ್ಹಳ್ಳೆಪರಿಂ ಉನ್ನತೆಚಿಂ ಪಾಂವ್ಡಾಂ ಚಡ್ತಾ. ಕಿತ್ಲೊ ವೇಳ್ ಲೇಕ್ ಪಾಕ್, ದಾಖ್ಲೆ ಬರೊಂಕ್ ’ಲೆಡ್ಜರ್’ ಬೂಕ್ ಉಪ್ಯೋಗ್ ಕರ್ನ್, ವ್ಹಡ್ ದಸ್ತಾವೆಜಾಚೊ ದಾಳೊ ಸಾಂಬಾಳುಂಕ್ ಜಾಗೊ, ವೇಳ್, ಕಬಾಟಾಂ ಬಿಭಾಡ್ ಜಾತಾಲೊ. ಆತಾಂಚ್ಯಾ ಕಂಪ್ಯೂಟರಾಕ್ ಕಿತ್ಲೇಂಯ್ ಗಿಳುಂಕ್, ತಿಳುಂಕ್, ಮೊಳುಂಕ್ ಆನಿ ಘಡ್ಯೆನ್ ಪಳೊಂಕ್ ಸಾದ್ಯ್ ಕೆಲಾ. ಮನ್ಶಾನ್ ಅಭಿವೃದ್ದೆಚೊ ಸೊಲ್ಲೊ ಪಾಟ್ಲ್ಯಾ ತೆಂಪಾನ್ ಜ್ಯೊರಾನ್ ಕೆಲಾ.

ಭೋವ್ ಖುಶೆಚಿ ಆನಿ ಸಂತೊಸಾಚಿ ಗಜಾಲ್. ಪುಣ್ ಮನ್ಶಾಪಣಾಚ್ಯಾ ಮುಳಾಕ್ ತೀಳ್ಣ್ ಪಳೆತಾನಾ ಸಗ್ಳೆಂ ಗಿಳುಂಕ್ ಪಡ್ತಾ. ಮನ್ಶ್ಯಾಪಣಾಂತ್ ಆಮ್ಚಿ ಪ್ರಗತಿ ಕಿತ್ಲಿ?! ಎಕ್ವಟ್ ಕಿತ್ಲೊ?! ಸೊಡ್‌ದೊಡ್, ಸೊಸ್ಣಿಕಾಯ್, ಶೆಗುಣ್ ಇತ್ಯಾದಿ ಇತ್ಯಾದಿ.
ಕಿತ್ಲಿ ಪ್ರಗತಿ ಜಾಯ್ಜಾಯ್ ಆಸ್‌ಲ್ಲಿಗೀ ತಾಚ್ಯಾಕೀ ಚಡ್ ವಾಂಟ್ಯಾನ್ ದುರ್ಗತಿ ಜಾಲ್ಯಾ ಮ್ಹಣ್ಯೆತ್.
ಹಾವೆಂ ಪಯ್ಲೆ ಥಾವ್ನ್ ಝರಂವ್ಚೆಂ ಆಸಾ ಆನಿ ವೊರೊಂವ್ಚೆಂ ಆಸಾ..

ಹರ್‍ಯೆಕ್ ಮನಿಸ್ ಆವಯ್ಚ್ಯಾ ಉದರಾ ಥಾವ್ನ್ ಭುಂಯ್ಕ್ ಪಡ್ತಾನಾ.. ಆಂಜಾಂಪರಿಂ ಯೆತಾ ಕಿತೆಂಚ್ ಚಿಂತಿನಾಸ್ತಾಂ ಸಮ್ಜನಾಸ್ತಾಂ, ನಿತಳ್, ನಿಸ್ಕಳ್ ರಿತೆಂ..!!

ಉಪ್ರಾಂತ್ ಖಂಚಾಕಡೆಂ ಕಠೋರ್, ಹಾರಾಮಿ, ಖೊಟೆ ಜಾತಾ ತೆಂ ಕೊಣೀ ತಜ್ವೀಜ್ ಕೆಲಾಂಗೀ? ಜಲ್ಮಾಥಾವ್ನ್ ಕೊಣೀಂ ಅಪ್ರಾಧಿ ಜಾಯ್ನಾ, ಖೊಟೊ ಜಾಯ್ನಾಂ.. ತರ್, ವೀರಪ್ಪನ್ ಆನಿ ಸದ್ದಾಮ್ ತಸಲೆ ಮನಿಸ್ ತಸೆಂ ಜಾಲೆಗೀ ವಾ ಅಮಿಂಚ್ ಕೆಲೆ? ಕೊಣ್ ಸಾಂಗ್ತಿತ್?!

ಅಹಂಬಾವ್ ಏಕ್ ಕಾರಾಣ್ ಸಭಾರ್ ಸಂಗ್ತಿಕ್, ಫಿಂರ್ಗಿ ಭಾಸೆನ್ ’ಇಗೋ’ ಮ್ಹಣ್ತಾಂವ್.

ಇಗೊ ಸರ್ವಾಂಕ್ ಆಸ್ತಾ.. ಥೊಡ್ಯಾ ವಾಂಟ್ಯಾಂನಿ ಗರ್ಜೆಚೊಯ್ ಆಸಾ..

ಇಗೊ ನಾಸ್ತಾನಾ ಖಾಲ್ತೊ ಜಾಶಿ ತರ್ ’ತುಜೆಂ ತುಜೆಂ ಖಾಲ್ತೆಂಪಣ್ಂಚ್ ತುಜಿ ಅಸ್ಕತ್ಕಾಯ್’ ಮ್ಹಣ್ ಲೆಕ್ತೆಲೆ ಶೆವಾಯ್ ತುಜೆಂ ಬರೆಂ ಮನ್ಶಾಪಣ್ ಮ್ಹಣ್ ಚಿಂತ್ಚೆಂನಾಂತ್. ಇಗೋ ಏಕ್ ವಸ್ತ್ ನ್ಹಯ್.. ಜಶೆಂ ಕಾಳೊಕಾಪರಿಂ! ಕಾಳೊಕ್ ಮ್ಹಳ್ಯಾರ್ ಕಿತೆಂ?! ಏಕ್ ಉಜ್ವಾಡ್ ನಾತ್‌ಲ್ಲೊ ಜಾಗೊ. ತಶೆಂ ಅಹಂಬಾವ್ ವ ಇಗೊ ಅಸೆಂಚ್ ಶಾಶ್ವತ್ ಸಂಗತ್ ವ ವಸ್ತ್ ಸಬ್‌ಸ್ಟೆನ್ಸ್ ನ್ಹಯ್.

ಅಹಂಬಾವಾವಿಶಿಂ ಸಾಂಗ್ಚೆಂ ತರ್ ಫಕತ್ತ್ ಮಾನಸಿಕ್ ಪರಿಪಿಕಾಯೆಚೆಂ ಉಣೆಂಪಣ್ ವ ಸಾರ್‍ಕ್ಯಾ ಜಾಣ್ವಾಯೆಚೆಂ ನೆಣಾರ್ಪಣ್ ಮ್ಹಣ್ಯೆತ್.

ಹ್ಯಾ ಸಮಸ್ಸ್ಯಾಂ ಥಾವ್ನ್ ಕಶೆಂ ಮುಕ್ತಿ ವ ಸೊಡ್ವೊಣ್ ಜೊಡ್ಚಿ ಮ್ಹಳ್ಯಾರ್ ಆಪ್ಣಾಕ್‌ಚ್ ಸೂಕ್ಷ್ಮ್ ರಿತಿನ್ ಪಳೆವ್ನ್, ಪರಿಕ್ಷಿಸುನ್ ಪಳೆಂವ್ಚೆಂ, ಅಪ್ಲ್ಯಾಕ್‌ಚ್ ಸಾರ್ಕ್ಯಾ ರಿತಿನ್ ಸಮ್ಜೊಂಕ್ ಸಕ್ಚೆಂ ಆನಿ ಆಪ್ಲೇಸ್ತಕಿಂ ಗುಂಡಾಯೆನ್ ಭಿತರ್ ಧ್ಯಾನಾಂತ್ ’ಅಪುಣ್’ ಮ್ಹಳ್ಯಾರ್ ಧೃಡ್ ಕರ್ಚೆಂ.

ಕಾಳೊಕಾಕ್ ಖಂಯ್ ಆಸ್ತಿತ್ವ್ ಆಸಾಗೊ ಬಾಯೆ?!

ಆವಾಯ್ಸ್ ಮ್ಹಜ್ಯಾ ಸಾಂಗ್ತಾಂ ತುಮ್ಕಾಂ, ಉಜ್ವಾಡಾಕ್ ಸವ್ಕಾಸ್ ಹಾಡ್ ಕಾಳೊಕ್.. ಪನಂದೆ ಪಾರ್..!! ಉಜ್ವಾಡಾಕ್ ಘೆವ್ನ್ ಕಾಳೊಕಾಚಿಂ ಸೊಧ್ನಾಂ ಕರುಂಕ್ ಜಾತಾ?!

ವ್ಹಯ್! ಜಿವಿತಾಂತ್ ಉಜ್ವಾಡಾಚೊ ಸೊಲ್ಲೊ ಆಮಿ ಕೆಲ್ಯಾರ್ ಕಾಳೊಕಾಕ್ ಭಿಂಯೆಂವ್ಚಿ ಗರ್ಜ್ ನಾ.
ಉಜ್ವಾಡ್ ಮತಿಂತ್ಲ್ಯಾ ಚಿಂತ್ನಾಂಚೊ, ಕಾಳ್ಜಾಂತ್ಲ್ಯಾ ಭಗ್ಣಾಂಚೊ, ಕರ್ಚ್ಯಾ ಕರ್ನ್ಯಾಂಚೊ, ಉಲಂವ್ಚ್ಯಾ ಉತ್ರಾಂಚೊ..!!
ಆಮಿ ಕೆದ್ನಾಂಯ್ ಸಮಧಾನೆಂತ್ ಜಿಯೆಂವ್ಚ್ಯಾವಿಶಿಂ ಚಿಂತ್ಲಾಂ, ಲೆಕ್ಲಾಂ ವ ಸೊಲ್ಲೊ ಕೆಲಾ (ಸಮಧಾನ್ ಪಾಡ್ ಕರ್ಚ್ಯಾವಿಶಿಂ ನ್ಹಯ್.. ಅಪ್ಲೆಂ ಆನಿ ಹೆರಾಂಚೆಂ?!)

ಹಿ ಗಜಾಲ್ ಜಾಣಾಂತ್‌ವೆ?!

ನೊಬೆಲ್ ಪೀಸ್ ಪ್ರೈಜ್ ದಿತಾನಾ ದಿಂವ್ಚ್ಯಾ ಮೆಡಲಾರ್ ಕಿತೆಂ ಆಸಾ ಜಾಣಾಂತ್‌ವೆ?!

ಹ ಹ ಹ ..

ಸಾಂಗ್ತಾಂ ಉಪ್ರಾಂತ್ ಹಾಸ್ತಾತ್

ತುಮಿಂ ಚಿಂತಾತ್ ಆಸ್ತೆಲೆಂ ಭಾರಿ ಉಂಚಾಯೆಚಿ ಪ್ರಶಸ್ಥಿ, ಮಾನ್.. ’ಮಸ್ತ್ ಮಸ್ತ್’ ಆಸ್ತಾಲೆಂ
ಕರ್‍ಮಾಂ!!

ತಸೆಂ ನಾ ಸಾಯ್ಭಾ ಸೊರ್ರಿ ಸಾಯ್ಭಿಣಿ!!
ತೇಗ್ ನಾಗ್ಡೆ (ವಿಣ್ಗೆ) ದಾದ್ಲೆ ಎಕಾಮೆಕಾ ಖಾಂದ್ಯಾರ್ ಹಾತ್ ಘಾಲ್ನ್ ಆಸ್ಚೆ ಆಸಾತ್.

ಪಾತ್ಯೆಂವ್ಕ್ ಕಷ್ಟ್ ಜಾತಾಮೂ?! ಹೆಂ ಜಿವೆಮ್ ಸತ್. ತಾಚೊ ಮತ್ಲಬ್.. ಪೀಸ್ ಪ್ರೈಜ್ ಮೆಳಾಜೆ ತರ್..?!
ಇಶ್ಶಪ್ಪಾ!!

ಆಮಿ ಜಲ್ಮಾತಾನಾ ವಿಣ್ಗೆ ಆಯಿಲ್ಲ್ಯಾಂವ್ ತೆದ್ನಾಂ ಲಜ್ ನಾತ್‌ಲ್ಲಿ.
ಕೆದ್ನಾಂ ವಸ್ತುಲಾಗಿಂ ಸೊಲ್ಲೊ ಕೆಲೊಗೀ ಖುದ್ದ್ ತೆದ್ನಾಂ ಥಾವ್ನ್ ಲಜ್ ಗುಸ್ಲಿ ಆಜ್‌ಕಾಲ್ ’ಲಜ್ ಭೊಗಂವ್ಚಿ’ ಅಂತರ್ವಣಾಂ ಸದಾಂನೀತ್ ಪಳೆಂವ್ಕ್ ಮೆಳ್ತಾನಾ ಮ್ಹಾಕಾ ಸಮ್ಜಾನಾ.. ಮನಿಸ್ ವಿಣ್ಗೆಂ ಜಾಂವ್ಚೆಂ ಪ್ರಯತ್ನ್ ಕರ್ತಾಗೀ ವ ವಿಣ್ಗೆಂಪಣ್ ಧಾಂಪ್ಚೆಂ ಸಾಧನ್ ಕರ್‍ತಾ?! ತುಮಿ ಚಿಂತಾ!!

ಆಮಿ ಡೊಲ್ಫಿನ್ ಮಾಸ್ಳೆಪರಿಂ ಎಕಾ ದೊಳ್ಯಾಂಕ್ ಧಾಂಪುನ್ ಏಕ್ ದೊಳೊ ಉಗ್ತೊ ಕರ್ನ್ ನಿದ್ತಾಂವ್.
ವಾಯೊಲಿನಾಚಾ ಸುಂದರ್ ರಚ್ಣೆಕ್ ಸತ್ತರ್ ವಿವಿಂಗಡ್ ರುಕಾಡಾಚ್ಯಿ ಗರ್ಜ್ ಆಸಾ. ಸುರ್‍ಯೊ ೩೩೦೩೩೦ ಚ್ಯಾಕೀ ಚಡ್ ವಾಂಟ್ಯಾನ್ ಭುಮಿಚ್ಯಾಕೀ ವ್ಹಡ್ ಆಸಾ ಮ್ಹಣ್ತಾನಾ ಆಮಿ ಚಿಂತ್ಚೊ ಮೆಂದು?!

ಸೊಡ್ಯಾಂ ಮೆಂದು ಮೊನಾಲಿಸಾಚ್ಯಾ ಪಿಂತುರಾಂತ್ ಸುಂದರ್ ಸ್ತ್ರೀಯೆಕ್ ಆಯ್‌ಬ್ರೋಸ್ ನಾಂತ್?!
ಆಮಿ ಥೊಡೆ ಸೊಲ್ಲೆ ಕೆಲ್ಯಾತ್ ಆನಿ ಕರ್ತಾಂವ್ ತರೀಪುಣ್ ಬೆಜಾರಾಯೆಚಿ ಗಜಾಲ್ ಆಮಿ ಆಮ್ಚ್ಯಾ ಸೊಲ್ಲ್ಯಾಂತ್‌ಯೀ ಥಿರಾಸಾಣೆರ್ ನಾಂವ್.. ಸಂತೊಸ್.. ಸಮಧಾನೆನ್ ನಾಂವ್, ಖುಶಿ ದಾಧೊಶಿ ನಾಂವ್..

ಖಂಡಿತ್ ಆಮ್ಚ್ಯಾ ಭಿತರ್ಲಿಂ ಸೊಧ್ನಾಂ ಗರ್ಜೆಚಿಂ ನ್ಹಯ್‌ಗಿ?!
ಸೊಧ್ನಾಂ ಜಿವಿತಾಂತ್ ಬರೊ ಸೊಲ್ಲೊ ಗರ್ಜೆಚೊ ನ್ಹಯ್‌ಗಿ?!
ಸೊಧ್ನಾಂ.. ಜಿವಿತಾಂತ್ ಬರೆ ಸೊಲ್ಲೆ ಕರ್ಚಾ ಖಾತಿರ್. ಮೊರ್ಚ್ಯಾಧಿಂ ಜಿಯೆಲ್ಲ್ಯಾ ಸಮಾಝೆಕ್ ಕಿತೆಂ ತರ್‌ಯ್ ಬರೆಂಪಣ್ ಕರ್ನ್ ಪಾಟಿಂ ದಿಂವ್ಚಾಖಾತಿರ್, ಮುಖ್ಲ್ಯಾ ಪಿಳ್ಗೆಕ್.. ಬರೆಂಪಣ್ ಲಾಭ್ಚಾಖಾತಿರ್.. ಮುಖ್ಯ ಮನ್ಶಾಚೆಂ ’ಮನ್ಶಾಪಣ್’ ಜಾಣಾಂ ಜಾಂವ್ಚಾಖಾತಿರ್

ವ್ಹಯ್.. ಮನ್ಶಾಕ್ ಶಿಕವ್ಯೆತ್.. ತರೀ ಶಿಕ್ಚೆಂ ಹರ್‍ಯೆಕ್ಲ್ಯಾಚೆರ್ ಹೊಂದ್ವೊನ್ ಆಸಾ.
ರೊನಿಕ್ ಪಾಂಚ್ ವರ್ಸಾಂ. ತಾಚ್ಯಾ ಬಾಪಾಯ್ಕ್ ಸಭಾರ್ ಪಾವ್ಟಿಂ ಸಾಂಗ್‌ಲ್ಲೆಂ. ಮೊಗಾನ್ ಆನಿ ಜೊರಾನ್. ಭಾಯ್ರ್ ಭಂವ್ಡೆಕ್, ಶೊಪಿಂಗಾಕ್ ಗೆಲ್ಲ್ಯಾ ವೆಳಾರ್ ಕಿತೆಂಯೀ ಪಳೆಯಿಲ್ಲೆಂ ಜಾಯ್ ಮ್ಹಣ್ ವಿಚಾರುಂಕ್ ನಜೊ ಮ್ಹಣ್. ಹಟ್ ಕರುಂಕ್ ನಜೊ ಮ್ಹಣ್. ತಾಂತುಂ ಉಣೆಂಪಣ್ ಭೊಗ್ತಾ/ಜಾತಾ ಇತ್ಯಾದಿ. ಅಪುಣ್ ದಿತಾಂ ರೊನಿ ಸಮ್ಜಾಲೊ. ಒಪ್ಲೊ ’ಶೊಪಿಂಗಾಕ್ ಗೆಲ್ಲೆವೆಳಾರ್ ವಿಚಾರಿನಾ.. ಅಪ್ಣಾಕ್ ಮೆಳ್ತಾ’ ಮ್ಹಣ್ ಫೆಸ್ತ್ ಪರಬ್ ಆಯ್ಲಿ.. ಬಾಪಾಯ್ನ್ ರೊನಿಚಿ ಗರ್ಜೆಚೆಂ ಶೊಪಿಂಗ್ ಜಾಲ್ಲೆಂಚ್..

ರೊನಿಚಿ ಆಶಾ ಕುಟ್ಟುಂಕ್ ಲಾಗ್ಲಿ.. ಜ್ಯೊರಾನ್ ಹಾತಾಕ್ ಧರ್ನ್ "ಡಾಡಾ.. ಡಾಡಾ ಮ್ಹಾಕಾ ’ಹೆಂ’ ಜಾಯ್.. ಪುಣ್ ಹಾಂವ್ ವಿಚಾರಿನಾ, ಡಾಡಾ ’ತೆಂವೀ’ ಜಾಯ್ ಪುಣ್ ಹಾಂವ್ ವಿಚಾರಿನಾ..!"
ಡಾಡಾಕ್ ೪೪೦ ವೊಲ್ಟಾಚೊ ಶೊಕ್ ಆನಿ ಥಂಡ್‌ಗಾರ್
ಹ ಹ ಹ!

ರುಸ್ತುರುಸಾಂವಾಚಾ ಆಧ್ಲ್ಯಾ ತೆಸಾಂವಾಂಕ್ ಭೆಟ್ ದಿಯಾ

1. ರೋದ್

2. ಗ್ರೇಸ್ತ್‌ಕಾಯ್

3. ಚೂಕ್

4. ದೂಕ್

5. ಸುರಾತ್

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications