ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ರುಸ್ತುರುಸಾಂವ್
ಹೆಂ ತತ್ವಾಂ-ತರ್ಕಾಂಚೆಂ ತೆಂತೆಸಾಂವ್
ಹೆಂ ಆಮ್ಶೆಂ-ತಿಕ್ಶೆಂ ಮಿಸಾಂವ್
ಹೆಂ ರಾಜಾಂವ್-ವಿಚಾರಾಂಚೆಂ ಲಿಸಾಂವ್
ರುಸ್ತುರುಸಾಂವ್ - 4 . ದೂಕ್
ಲ್ಯಾನ್ಸಿ ಪಿಂಟೊ ನಾಯಕ್
"ಮನಿಸ್ ಜಲ್ಮಾತಾನಾ ಮೋವ್ ಆನಿ ಮೊವಾಳ್
ಮರ್ಣಾಂತ್ ಜಾತಾ ಘಟ್ ಆನಿ ಕಡಕ್ಕ್
ಝಡಾಂ ಕಿರ್ಲಾತಾನಾ ಮೋವ್ ಆನಿ ಮೊವಾಳ್
ಮೆಲ್ಲಿಂಚ್ ಜಾತಾತ್ ಘಟ್ ಆನಿ ಕಡಕ್ಕ್
ಅಶೆಂ ಘಟ್ ಆನಿ ಬಾವ್ ಯೇನಾತ್ಲ್ಲೆಂ
ಮರ್ಣಾಂಚ್ಯಾ ಸಾವ್ಳೆಂತ್ ಆಸ್ತಾ
ಕೋಣ್ ಮೊವಾಳ್ ಆನಿ ದೊಡ್ನ್ ದಿತಾ
ಜಿವಿತಾಚ್ಯಾ ಸಾವ್ಳೆಂತ್ ಆಸ್ತಾ
ಘಟ್ ಆನಿ ಕಡಕ್ಕ್ ಆಸ್ಲ್ಲೆಂ ಮೊಡ್ತಾ
ಮೋವ್ ಆನಿ ಭಾವ್ ಯೆಂವ್ಚೆಂ ಬಾಳ್ತಾ?"
ವಿಶ್ವ್ವಿಖ್ಯಾತ್ ತತ್ವ್ಜ್ನಾನಿ ಲಾವೊತ್ಸೂಚಿಂ ಉತ್ರಾಂ ಹಿಂ. ವಾಚುಂಕ್ ಬರಿಂ ಲಾಗ್ತಾತ್.. ಸಾಂಗ್ಲ್ಯಾರ್ ಸಮ್ಜೊಂಕ್ಯ್ ಬರಿಂ ಲಾಗ್ತಾತ್.. ತರೀ..
ಪಾಳುಂಕ್?!
ಮತಿಂತ್ ವೊಳುಂಕ್?!
ಕಾಳ್ಜಾಂತ್ ತಿಳೂಂಕ್?!
ಆಸೊಂ!! ಚಡಾವತ್ ಮನ್ಶ್ಯಾಕ್ ಏಕ್ ನಾ ಅನ್ಯೇಕ್ ದೂಕ್ ಆಸ್ತಾತ್, ಆವಯ್ಚ್ಯಾ ಪೊಟಾಥಾವ್ನ್ ಪ್ರಥ್ವೆಂತ್ ಪ್ರದೇಶ್ ಜಾತಾನಾ ದೊಗಾಂಯ್ನೀ ದುಕಿನ್ ಪಿಂರ್ಗಾಲ್ಲೆಂ, ರಡ್ಲ್ಲೆಂ ಆಸಾ.. ತಾಚಾ ಉಪ್ರಾಂತ್ ತಿ ದೂಕ್ ಉರೊಂಕ್ ನಾ. ಮಾಜ್ವಲ್ಲಿಂ.. ಸಭಾರಾಂಕ್ ಮೆಚ್ವಾಲ್ಲಿಂ.. ಆನಿ ನಿಮಾಣೆಂ ವಿಸ್ರಾಲ್ಲಿ..
ದೂಕ್ ಎಕ್ ರಾಂವ್ಚೆಂ ರೋದ್ ನ್ಹಯ್ ಘುಂವ್ಚೆಂ ರೋದ್. ಕೊಣಾಕ್ ಸತಾಯ್ತಾನಾ ಉಭ್ಜಾತಾ, ಕೊಣಾಕ್ ಫಸಯ್ತಾನಾ ಉಭ್ಜಾತಾ.. ಸಭಾರಾಂಕ್ ಆಪ್ಲ್ಯಾ ಅಪ್ಲ್ಯಾಚ್ ಬೆಕೂಫ್ಪಣಾಂತ್ ಫಸೊನ್, ಗುಸೊನ್ ಆನಿ ವೊಸೊನ್ ಸಭಾರ್ ಪಾವ್ಟಿಂ ಅನ್ಭೋಗ್ ದಿತಾ. ದೂಕ್ ಜಾವ್ನಾಸಾ ಸುಖಾಚಿ ಅನ್ಯೇಕ್ ಕೂಸ್. ತಿ ಜಾಯ್ ಆನಿ ಮೆಳ್ತಾ. ನಾಂ ತರ್ ಕಿತೆಂ ಮಝಾ ಜಿವಿತಾಚಿ??
ಮನಿಸ್ ದಿತಾ ಮ್ಹಣಾ ವ ಪ್ರಕ್ರತೆಚಾ ನಿಯಮಾಂತ್ ಲಾಭ್ತಾ ಮ್ಹಣ್ತಾತ್ ತರ್ ಮ್ಹಣಾ.. ಪುಣ್ ತಿ ಸ್ವೀಕರ್ಸುಂಚೆಂ ಧಯ್ರ್ ಭಳ್ ಆನಿ ಮಾನಸಿಕ್ ಸಕತ್ ಗರ್ಜೆಚಿ. ತೆಂ ಆಸೊಂ ವ ಪೆಲ್ಯಾನ್ ವೊಚೊಂ. ಹಾವೆಂ ಬರಯಿಲ್ಲಿ ಗಜಾಲ್ ವಾಚ್ಲ್ಲ್ಯಾ ಉಪ್ರಾಂತ್ ವ ಪಯ್ಲೆಂ ತುವೆಂ ಜಾಣಾಂ ಆಸ್ಯೆತ್.. ತೆಂ ಮ್ಹಾಕಾ ಪಡೊನ್ ವಚೊಂಕ್ ನಾ.. ಮ್ಹಜೆಂ ರುಸ್ತುರುಸಾಂವ್ ವೆಗ್ಳೆಂಚ್.
ಮನ್ಶಾಕ್ ದುಖಿ ಕಿತ್ಲ್ಯೊ?
ಅಶೆಂ ವಿಚಾರ್ಲೆಂ ತರ್ ಎಕ್ಲೊ ಪೊಕ್ರಿ ಮ್ಹಣ್ತಾ "ಮುಗ್ದಾನಾತ್ಲ್ಲ್ಯಾ ತಿತ್ಲ್ಯೊ"
ಅನಿ ಕೊಣ್ ಮ್ಹಣ್ತಾ "ದುಖಿಚ್ಯಾ ಮಿಸ್ತೆರಾವಿಶಿಂ ಉಲಯ್ತಾಗಿ?"
"ದುಖಿಚ್ಯಾ ವಿಧಾನಾವಿಶಿಂ ತುಂ ಸಾಂಗ್ತಾಯ್ಗೀ?" "ದಖ್ಯಾಚ್ಯಾ ದುಖಿವಿಶ್ಯಾಂತ್ ಹಾಂವ್ ಜಾಣಾಂ"
"ವಿಶ್ವಾಸ್ಘಾತ್ ಕೆಲ್ಲ್ಯಾ ಇಸ್ಟಾ/ಇಸ್ಟಿಣೆಚ್ಯಾ ದುಖಿವಿಶ್ಯಾಂತ್ ಹಾಂವ್ ಜಾಣಾಂ.." ಇತ್ಯಾದಿ ಇತ್ಯಾದಿ ಇತ್ಯಾದಿ
ದುಖಿ ಕಿತ್ಲ್ಯೊಯ್ ಆಸ್ಲ್ಯಾರ್ಯೀ ಆಮ್ಕಾಂ ಜಾಯ್ಗೀ ನಾಕಾ? ಹರ್ಯೇಕ್ ಸಮಸ್ಸೊ ಏಕ್ ದೂಕ್ ಆನಿ ಹರ್ಯೆಕಾ ದಿಸಾ ಏಕ್ ತರೀ ಉಣ್ಯಾರ್ ಉಣೆಂ ಸಮಸ್ಯೊ ಆಸ್ತಾ ವ ಗುಸ್ತಾ. ತಶೆಂ ಮ್ಹಣ್ತಾನಾ ಏಕ್ ಜಿವಿತಾಚೊ ವಾಂಟೊ ಮ್ಹಣ್ ಘೆವ್ಯೆತ್ ನ್ಹಯ್ಗೀ?
ಆಮ್ಚಿ ಜೀಬ್ ಫಕತ್ತ್ ರುಚಿಚಿ ಜಾಲ್ಲಿ ತರ್ ಆವಸ್ತಾ ಕಿತೆಂ ಜಾತಿ ಆಸ್ಲ್ಲಿ?
ಗೊಡ್ಶಿಚ್ಚ್ ಜಾಲ್ಲಿ ತರ್?
ಆಮ್ಶಿಚ್ಚ್ ಜಾಲ್ಲಿ ತರ್? ಖಾರ್ಶಿಚ್ಚ್ ಜಾಲ್ಲಿ ತರ್? ತಿಕ್ಶಿಚ್ಚ್ ಜಾಲ್ಲಿ ತರ್? ಫಕತ್ ಜಿಬೆಚ್ಯಾ ರುಚಿಖಾತಿರ್ ಕಿತೆಂ ಕಿತೆಂ ಕರ್ತಾಂವ್? ತೆಂ ಆಮಿಂ ಚಿಂತ್ಲಾಂಗೀ?
ಜಿವಾಕ್ ಉಪ್ಕಾರ್ಚ್ಯಾಕೀ ಚಡ್ ಜಿಬೆಕ್ ಉಪ್ಕಾರ್ಚೆ (ರುಸ್ಚೆ) ಆನಿ ಚಿಂತ್ಚೆಂ ಚಡ್ ತಿಕ್ಶೆಂ (ಮಿರ್ಸಾಂಗ್) ಪಾಶ್ಚಾತ್ಯ್ ಮನಿಸ್ ಖಾಯ್ನಾಂತ್ ಆನಿಂ ತಾಂತುಂ ’ಫುಡ್ ವ್ಯಾಲ್ಯೂ(ಕ್ಯಾಲರಿಸ್) ನಾಂ’ ಮ್ಹಣ್ತಾತ್, ಪುಣ್ ಆಮ್ಶಿ ತಾಮ್ಬ್ಡಿ ಕಡಿ ವ ತಿಕ್ಶೆ ಮಿರ್ಸಾಂಗ್ ನಾತ್ಲ್ಲಿಂ ರುಚಾನಾಂ.., ಗಳ್ಯಾಂತ್ ಘುಸಾನಾ.. ದೊಳ್ಯಾಂಕ್ ದಿಸಾಣಾ..
ಹಿ ಮ್ಹಾಕಾ ದುಖ್ ದಿಸ್ತಾ.
’ದುಕ್ರಾಮಾಸ್ ತಾಂಬ್ಡೆಂ ಜಾಯ್ನಾಂ ತರ್ ತಾಕಾ ದುಕ್ರಾಮಾಸ್ ಮ್ಹಣ್ತಾತ್ವೆರೆ ಪುತಾ? ವ್ಹಡ್ಲಿಮಾಂಯ್ನ್ ರಾಂದ್ಪಾವೆಳಾರ್ ಸಾಂಗ್ಲ್ಲೆಂ. ಪಳೆಯಾ.. ಸಗ್ಳ್ಯಾ ವಸ್ತುಂಚ್ಯಾ ಚಾಕ್ಣ್ಯಾಂತ್ ರೂಚ್ ದಿಂವ್ಚ್ಯಾ ಜಿಬೆಕ್ಚ್ ರೂಚ್ ನಾ ನ್ಹಯ್ಗೀ?
(ದುಸ್ರ್ಯಾಂಚಿ ಜೀಬ್ ಚಾಕ್ಣ್ಯಾಂವಿಶಿಂ ಹಾಂವ್ ಉಲಯ್ನಾಂ, ತೆಂ ತಾಂಚೆಂ ತಾಂಚೆಂ ಹಣೆಬರಾಪ್) ತರೀ ಪುಣ್ ಸಗ್ಳಿ ರೂಚ್ ಅನುಭವ್ ದಿಂವ್ಚೊ ಮೆಂದು (ಬೊಂಡು ಆಸ್ಲ್ಲೆಂ, ಕುಸ್ಲ್ಲೊ, ಇಜ್ರಾಲ್ಲೊ, ಪುಂರ್ಗೆಲೊ) ಸಕ್ಡಾಂಕ್ ದೆವಾನ್ ದಿಲಾ. ತಾಚೊ ಉಪಯೋಗ್ ಬರ್ಯಾನ್ ಕೆಲ್ಯಾರ್ ಆಮ್ಕಾಂ ಸ್ವತಾಕ್ ಮಾತ್ ನ್ಹಯ್ ದುಸ್ರ್ಯಾಂಕ್ಯೀ ಕಿತ್ಲೆಂ ಸುಖ್ ದಿವ್ಯೆತ್ ಆನಿ ದೂಕ್ ಧಾಂವ್ಡಾವ್ಯೆತ್ ತೆಂ ಆಮಿಂ ಚಿಂತಾಂವ್ಗೀ?
ಜಾಣ್ವಾಯ್ ಏಕ್ ಹಾತೆರ್ ಸಕತ್ ಆನಿ ಭಳ್ ತಾಚೆರ್ ಪ್ರಯೋಗ್ ಜಾಲ್ಲ್ಯಾನ್ ಆಜ್ ಮನಿಸ್ ಚಂದ್ರಾಕ್ ಗುಡ್ಡಾವ್ನ್, ದರ್ಯಾ ಸಾಗೊರಾಂತ್ ಉಡ್ಡೊನ್, ಆಕಾಶಾರ್ ಭಂವ್ಡೆಕ್ ಲಾಗ್ಲಾ, ಮನ್ಶಾ ಚಿಂತ್ನಾಂ ಪಯ್ಲೆಂ ಉಪ್ರಾಂತ್ ಕೃತ್ಯ್.
ಪಯ್ಲೆಂ ಚಿಂತ್ನಾಂನಿ ಸಾಧ್ಯ್ ಕರ್ನ್ ಬುಧ್ವಂತ್ಕಾಯೆನ್ ರಾಕೆಟ್ ವಿಮಾನಾಂ ಸಬ್ಮೆರಿನಾಂ ಕೆಲಿಂ. ಪುಣ್ ದೂಕ್.. ಆಮಿಂ ಮನಿಸ್ ಸಗ್ಳಿ ಸುವಿಧಾ ಉಪ್ಯೋಗ್ ಕರ್ನ್ ವಿಸ್ರಾತಾಂವ್.. ಆನ್ವೇಶಣ್ ಕೆಲ್ಲ್ಯಾಚೆ ತ್ಯಾಗ್.. ಮಾತ್ರ್ ನ್ಹಯ್ ನಾಂವ್ಯೀ!!
ವ್ಹಡ್ಲಿ ದೂಖ್ ನ್ಹಯ್ಗೀ?
ಆಮಿಂ ಹರ್ಯೆಕ್ಲ್ಯಾಂನಿ ಜಲ್ಮಾಲ್ಲ್ಯಾ ಹ್ಯಾ ಧರ್ಣಿಕ್, ಸಮಾಜೆಕ್ ಮನ್ಶಾಕುಳಾಕ್ ಕಿತೆಂ ತರೀ ದೀಜಾಯ್ ನ್ಹಯ್ಗೀ?
ಫಕತ್ತ್ ಮ್ಹಜಿ ಬಾಯ್ಲ್, ಮ್ಹಜಿಂ ಭುರ್ಗಿಂ, ಮ್ಹಜೆಂ ಘರ್, ಮ್ಹಜೊ ಜಾಗೊ, ಮ್ಹಜೆಂ ಬ್ಯಾಂಕ್ ಬ್ಯಾಲೆನ್ಸ್ ಚಿಂತ್ಚೆಂ ಚೂಕ್ಗೀ?
ವ ದೂಕ್? ಮ್ಹಾಕಾ ಕಳಾನಾ. ಆನಿಂ ಆಮ್ಚ್ಕಾಂಚ್ ಸಮಧಾಣ್ ಕರುಂಕ್ ಮಾಗ್ಣೆಂ,ರಜಾರ್, ಮೀಸ್, ಪಾದ್ರ್ಯಾಬಾಚ್ಯಾ ಜಲ್ಮಾದಿಸಾಕ್ ಉಲ್ಲಾಸ್!!!
ಹ ಹ ಹ
ಬರ್ಯಾ ಮನ್ಶ್ಯಾಚೆಂ, ಮನ್ಶ್ಯಾಪಣಾಚೆಂ ಆದರ್ಶ್ ಜಿವಿತ್ಚ್ ಏಕ್ ಮಾಗ್ಣೆಂ, ರಜಾರ್, ಮೀಸ್ ನ್ಹಯ್ಗೀ?
ದೇವ್ ಎಕ್ಚ್ ಮ್ಹಣ್ ಮಾಂದ್ಚೆಂ ಹಜಾರೊಂ ವರ್ಸಾಚೆಂ ಮನ್ಶಾಕುಳ್ ಆಪಾಪ್ಲ್ಯಾ ಜಾತಿನ್ಂಚ್ ಸರ್ಗ್ ಆಸಾ.. ಆನಿ ಸರ್ಗಾಕ್ ವಚ್ಯೆತ್ ಮ್ಹಣ್ಚೆಂ ನಿಜಾಯ್ಕೀ ದೂಕ್ ನ್ಹಯ್ಗೀ?
ಸರ್ಗಾಕ್ ವಚೊಂಕ್ ಶಿಕಂವ್ಚ್ಯಾ ಆಧಿಂ ’ಬರೊ ಮನಿಸ್ ಜಾವ್ನ್ ಮನ್ಶಾಪಣಾಕ್ ಶಿಕಂವ್ಚೆಂ’ ಧರ್ಮ್ ಆಮ್ಕಾಂ ಗರ್ಜ್ ನ್ಹಯ್ಗೀ?
ಹ ಹ ಹ ಹ
ಚಿಂತ್ಲ್ಯಾರ್ ದೂಕ್ಯೀ ಭೊಗ್ತಾ. ಆಮ್ಕಾಂ ಜಾಯ್ಗೀ ಇತ್ಲ್ಯೊ ಜಾತಿ ಆನಿ ಧರ್ಮ್?
ಜಾಯ್ಗಿ ಹ್ಯೊ ದುಖಿ?
ಮೊರೊಂ.. ಬೂದ್ ಬಾಳ್ ದಿಂವ್ಚೆಂ ಕಸ್ಟಾಂಚೆಂ ಆನಿಂ ದುಕಿಚೆಂ ಜಾತಾ.. ಏಕ್ ಪಾವ್ಟಿಂ ಆಪ್ಲ್ಯಾ ಪುತಾಕ್ "ತೊಂಡಾಂತ್ ಬೋಟ್ ಘಾಲ್ಚಿ ಸವಯ್ ಸೊಡಿಜಾಯ್.. ನಾ ತರ್ ವ್ಹಡ್ ಜಾತಾ, ಜಾತಾನಾಂ.. ಬೊಟಾಂಚ್ಯಾ ನಾಕ್ಶೆಚೊ ಚಿಕೊಲ್ ಪೊಟಾಂತ್ ವಚೊನ್ ಗುಸೊನ್ ಪೊಟ್ ಉಭಾರ್ ಜಾವ್ನ್ ಫುಟೊನ್ ಮೊರ್ತಾತ್.. ದೆಕುನ್ ಜಾಗ್ರುತ್.."
ಪೂತ್ ಭಿಂಯೆಲೊ, ಬೂದ್ ಸುಟ್ಲಿ
ಸ ವರ್ಸಾಂಚೊ ಜಲ್ಮಾದೀಸ್ ಆಚರಣಾಕ್ ಘರ್ಚಾಂನಿ ಶೆಂಬೊರ್ ಜಣಾಂಕ್ ಆಪಯಿಲ್ಲೆಂ ಕೇಕ್ ಖಾತರ್ಚಾವೆಳಾ ಭಿರ್ಮತ್ ತಾಚಿ ಆಂಟಿ ’ಲೇಟ್’ ಕರ್ನ್ ವ್ಹಳೂ ಪ್ರವೇಶ್ ಜಾಲಿ ಹೊಲಾಂತ್.. ಅಂಕಲಾಸವೆಂ’
’ಆಂಟಿ ಆಯ್ಲಿ.. ಆಂಟಿ ಆಯ್ಲಿ..’
ಕೊಣ್ಗೀ ಬೊಬಾಟ್ಲಿಂ. ಪುತಾನ್ ಖಾತರ್ಚಿ ಕೇಕ್ ರಾವವ್ನ್ ಆಂಟಿಕ್ಚ್ ಚೊಯ್ಲೆಂ..
ಎಕ್ಚ್ಫರಾಂ ತೊ ಗುಸ್ಪಡ್ಲೊ. ಗುರ್ವಾರ್.. ಆಟ್ ಮಯ್ನ್ಯಾಚಾ ಆಪ್ಲ್ಯಾ ಆಂಟಿಕ್ ಪಳೆವ್ನ್ ಬೊಬಾಟ್ಲೊ;
"ಆಂಟಿ, ಆಂಟಿ ಹಾಂವ್ ಜಾಣಾಂ ತುಜೆಂ ಪೋಟ್ ಕಿತ್ಯಾಕ್ ಫುಗ್ಲಾಂ ತೆಂ..’ ತುವೆಂ ಬೋಟ್ ತೊಂಡಾಂತ್ ಘಾಲ್ಲೆಂಯ್ಮೂ? ಆಂಟಿ ಲಜೆನ್ ಥಂಡ್ಗಾರ್..
ಹಹಹಹ
ರುಸ್ತುರುಸಾಂವಾಚಾ ಆಧ್ಲ್ಯಾ ತೆಸಾಂವಾಂಕ್ ಭೆಟ್ ದಿಯಾ
1. ರೋದ್
3. ಚೂಕ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
