ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ರುಸ್ತುರುಸಾಂವ್
ಹೆಂ ತತ್ವಾಂ-ತರ್ಕಾಂಚೆಂ ತೆಂತೆಸಾಂವ್
ಹೆಂ ಆಮ್ಶೆಂ-ತಿಕ್ಶೆಂ ಮಿಸಾಂವ್
ಹೆಂ ರಾಜಾಂವ್-ವಿಚಾರಾಂಚೆಂ ಲಿಸಾಂವ್
ರುಸ್ತುರುಸಾಂವ್ - 1 . ರೋದ್
ಲ್ಯಾನ್ಸಿ ಪಿಂಟೊ ನಾಯಕ್
ಕೊಂಕ್ಣಿ ಮಾಯ್ ಭಾಸೆಚೊ ಪಿಲ್ಕಟೊ ಜಾವ್ನ್ ಜಲ್ಮಾಲ್ಲೊಂ ತರೀ ಆಮ್ಚೆಆ ದರ್ಕಾಲ್ ಉಡೊಂಕ್ಯೀ ನ್ಹಯ್ ಗಿಳೊಂಕ್ಯೀ ನ್ಹಯ್ ಮ್ಹಳ್ಳ್ಯಾ ಪರಿಸ್ಥಿತೆಂತ್ ಇಂಗ್ಲಿಶ್ ಭಾಸೆಚಾ ತೋಟಾಂತ್ ಆಮ್ಚ್ಯಾ ಭಾಸೆಚೆ ಕಳೆ, ಶಿಂವ್ತಿಂ, ಅಬೊಲಿಂ, ಬುತಾಂವ್ ಗೊಂಡೆ ಇತ್ಯಾದಿ ಫುಲಾಂ ಸೊಧುಂಕ್ ಪಡ್ಲಾಂ.
ತರೀ ಪೂಣ್ ಜಿವಿತಾಚಾ ಸುಳಿ ಗೊಂದೊಳಾಂತ್ ಕಿತೆಂಯ್ ಸೊದ್ಲ್ಯಾರೀ.... ಖಂಚೆಂ ಗಿಳ್ಚೆಂ, ಖಂಚೆ ಪಿಳ್ಚೆಂ, ಖಂಚೆಂ ತಿಳ್ಚೆಂ ಆನಿ ಖಂಚೆಂ ದೊಳ್ಚೆಂ ತೆಂ ಸಮ್ಜಾನಾಸ್ತಾಂ ಹಣ್ಯಾಬರ್ಪಾಚ್ಯಾ ದಖ್ಯಾಕ್ ಜಿಣಿಯೆಚಿಂ ಕಾಮಾಂ ಆನಿ ಕರ್ಮಾಂ ನಶಿಬಾಚಾ ಫೆಸ್ತಾಕ್ ಬಡೊಂವ್ಚೆಂ ಪ್ರಾಚಿತ್ ಮೆಳ್ತಾ...
ಮ್ಹಜ್ಯಾ ರುಸ್ತುರುಸಾಂವಾಚೆಂ ಉಸಾಣೆಂ ಆಮ್ಶೆ ತಿಕ್ಶೆ ಜಾತಾ ಆನಿ ಮಸ್ಕ್ ಹಾಸೊಂಕ್, ಮತಿಂತ್ ಘುಸೊಂಕ್, ಫಾಸ್ಟ್ ಜಿಕೊಂಕ್ ಆನಿ ಮ್ಹನ್ಶ್ಯಾಪಣಾ ಖುಶಿನ್ ವೊಸೊಂಕ್ ಏಕ್ ರೋದ್ ಕರುಂಕ್ ಆಶೆತಾಂ. ಜಿವಿತ್ ಮ್ಹಳ್ಯಾರ್ ವ್ಹಡ್ ವ್ಹಡ್ ತ್ಯಾಗ್ ಆನಿ ಜವಾಬ್ದಾರೆಚಿ ಬಾಂದಾವಣ್ ವ ವಡಾವಳ್ ನ್ಹಯ್ ಬಗಾರ್ ದಾಕ್ಟ್ಯಾ ದಾಕ್ಟ್ಯಾ ಖುಶಿ-ದಾದೊಸ್ಕಾಯೆಚಿ ಮಯಾ, ಸೊಡ್ದೊಡಿಚಿ ದಯಾ ಆನಿ ನಿರಂತರ್ ಪೊಕ್ರಿ ನಕ್ರೆ ಸಂತೊಸಾಚ್ಯಾ ಹಾಸ್ಯಾಚಿ ಲಯಾ ಮ್ಹಣೊನ್ ಬುದ್ವಂತ್ ಮ್ಹಣ್ತಾತ್.
ವ್ಹಯ್! ಆಜ್-ಕಾಲ್ಚೆಂ ಜಿವಿತ್ ಆಮಿ ಚಿಂತ್ಲ್ಲ್ಯಾ ತಿತ್ಲೆಂ ಆನಿ ಕಿತ್ಲೆಂ ಸಲಿಸಾಯೆಚೆಂಗೀ ವ ನಾಲಿಸಾಯೆಚೆಂಗೀ ತೆಂ ಸಾಂಗೊಂಕ್ ಕಷ್ಟ್. ತಿಕ್ಸಾಣ್ ಜಿವಿತಾಚಿ ಚಡ್ಲ್ಯಾ ವ ಗೊಡ್ಸಾಣ್ ಹುಮ್ಟುನ್ ಕಾಡ್ಲ್ಯಾ ಮ್ಹಣ್ ಭೊಗ್ಚ್ಯಾ ಭೊಗಾಪಾಚೆ ಸಂಕಷ್ಟ್ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ವ್ಹಯ್!! ರುಸ್ತುರುಸಾಂವ್!! ರುಸ್ತುರುಸಾಂವ್ ಪಾತ್ಕಾಚೆಂ, ಕಷ್ಟಾಂಚೆಂ ವ ಮ್ಹನ್ಶ್ಯಾ ಹಣೆಬರ್ಪಾಚೆಂ ತೆಂ ತುಮಿಂಚ್ ಸಾಂಗಾ. ಹಾಂತುಂ ವ್ಯಕ್ತಿ ನಾಂವಾಂಚ್ಯಾಕೀ ಚಡ್ ವಿಷಯ್ ಆನಿ ವಿಚಾರಾಂಕ್ ಪ್ರಧ್ಯಾನಾತಾ... ಜಾಲ್ಲ್ಯಾನ್ ಧುಂಪವ್ಣಿ ಮ್ಹಜೆ ಥಾವ್ನ್ ವಿಶೇಸ್ ಆಸಕ್ತ್ ದವರಿನಾಕಾತ್... ತರೀ ಬರ್ಯಾ ವಿಚಾರಾಂಕ್ ಶಾಭಾಸ್ಕಿ ಬಿಲ್ಕುಲ್ ಆಸ್ತೆಲಿ.
ಮ್ಹನ್ಶ್ಯಾ ಜಾತಿಕ್ ಎಕ್ಚ್ ಸಂಗತ್ ನಾಕಾ..... ಕಷ್ಟ್!; ಚೆಕ್ಕ್, ತೆಂ ನ್ಹಯ್ ಫಕತ್ ಏಕ್ ಸಂಗತ್ ನಾಕಾ ಪಿಡಾ; ತೆಂವೀ ನ್ಹಯ್ ಬಾಂದ್ಪಾಸ್; ತೆಂವೀ ನ್ಹಯ್ ದುರ್ಸೊಣೆ; ತೆಂವೀ ನ್ಹಯ್..... ತೆಂವೀ ನ್ಹಯ್.... ಹಿ ಶಿಂಕಾಳ್ ವ್ಹಡ್ ಆಸಾ... ರೋದ್ ದಾಂವ್ತಾಂ....!!! ಥೊಡೆ ಕಷ್ಟ್ ಮ್ಹನ್ಶ್ಯಾಚಿ ಆಶಾ ಜಾರಿ ಜಾಯ್ನಾಸ್ತಾನಾಂ ಉಬ್ಜಾತಾತ್ ತರ್ ಚಡಿತ್ ಸಂಕಷ್ಟ್ ಆಶಾ ಜ್ಯಾರಿ ಜಾಲ್ಯಾ ಉಪ್ರಾಂತ್ ಚಡ್ತಾತ್ ಆನಿ ವಾಡ್ತಾತ್. ಕೋಣ್ ಎಕ್ಲೊ ಬಾವ್ಡೊ ಹಾತಾಂತ್ಲೆಂ ಫಳ್ ಉಡವ್ನ್ ರುಕಾರ್ ಆಸ್ಚ್ಯಾ ಫಳಾಚಾ ಆಶೆನ್ ರಾವ್ತಾ ತರ್ ಕೋಣ್ ಎಕ್ಲೊ ಲ್ಹಾರಾಂ ರಾವ್ಲ್ಲ್ಯಾ ಉಪ್ರಾಂತ್ ಉದ್ಕಾಂತ್ ದೆಂವ್ತಾಂ ಮ್ಹಣ್ ದರ್ಯಾ ತಡಿರ್ ರಾಕೊನ್ ಥಕೊನ್ ಆಸ್ತಾ! ನ್ಹಯ್ಗೀ ಎಕ್ ಜಿವಿತಾಚಿ ಕೊಡ್ಸಾಣ್ ವ ವಿಪರ್ಯಾಸ್?! ನೀಜ್ ಜಾವ್ನ್ ತಿಕ್ಸಾಣೆಚೊ ಹುಲೊಪ್ ದಾಕ್ಟ್ಯಾ ಜಿರ್ಗಿ ಮಿರ್ಸಾಂಗೆಚೊ ಆನಿ ಕಾಂಟಾಳೊ ಆಪ್ಲ್ಯಾಚ್ ತಾಳ್ಯಾಂತ್ಲ್ಯಾ / ಗಳ್ಯಾಂತ್ಲ್ಯಾ ದರ್ಕಾಲಾಚೊ ವಿಶೇಸ್ ತರೀ ಅಡಾಂವ್ಕ್ ಅನಿವಾರ್ಯ್! ಪಾಳ್ಣ್ಯಾ ಥಾವ್ನ್ ಪೆಟೆ ಪರ್ಯಾಂತ್ ಧಾಂವ್ಚೆಂ - ಘುಂವ್ಚೆಂ ರೋದ್ ನಿರಂತರ್ ಎಕಾಚ್ ಮಾಫಾನ್ ವ ನಿರ್ದೀಷ್ಟ್ ಎಕಾಚ್ಚ್ ವೇಗಾನ್ ಆಸಾನಾಂ ತೆಂ ಪಖ್ಖೆಂ. ಕಾರಣ್?! ಕಾರಣ್.... ಜಾಂವ್ಕ್ ಪುರೊ ರೋದ್ಚ್ಚ್ ವ ಜಾಂವ್ಕ್ ಪುರೊ ರೋದಾಚಾ ಹಣೆಬರ್ಪಾಕ್ ತಾಕಾ ಮೆಳ್ಲ್ಲೆಂ ಪಥ್ ವ ರಸ್ತೊ!! ಖಂಚಾಯೀ ಕಾರಣಾ ಲಾಗೊನ್ ಜರ್ ರೋದ್ ಧಾಂವ್ತಾನಾ, ಘುಂವ್ತಾನಾ.... ಘಾಸ್ತಾ, ಝರ್ತಾ, ಅಪ್ಟಾತಾ ಆನಿ ಪಂಕ್ಚಾರ್ ಜಾತಾ ತರ್....ಮಾಟ್ ಪಡ್ಲ್ಲ್ಯಾ ವಾಟೆಕ್ ದುರ್ಸೊಂ?! ಅಡ್ಕಾಳ್ ಕಾಳೊಕಾಕ್ ದುರ್ಸೊಂ?! ರುಸ್ತುರುಸಾಂವ್ ವಿವಿಂಗಡ್ಚ್!! ತರಿ ಪೂಣ್ ರೋದ್ ಥಾಂಬ್ತಾ ವರೆಗ್, ರೊಂಭ್ತಾ ವರೆಗ್, ಸಂಪ್ತಾವರೆಗ್ ಪಂಚರ್ ಜಾತಾವರೆಗ್ ಧಾಂವೊಂಕ್ ಆನಿ ಘುವೊಂಕ್ ಆಸ್ತಾಚ್.
ಪಾಟ್ಲ್ಯಾ ತೆತ್ತೀಸ್ ವರ್ಸಾಂನಿ ಕೊಂಕ್ಣಿ ಸಮಾಜೆಂತ್ ಆನಿ ತಾಚಾ ಭಾಯ್ಲ್ಯಾ ಸಂಸಾರಾಕ್ ಆಪ್ಲ್ಯಾ ದೇಶಾಂನಿ ಆನಿ ವಿದೇಶಾಂತ್ ಹಾಂವೆಂ ಜಾಯ್ತೆಂ ಪಳೆಲಾಂ! ಅನ್ಬೊಗಾಂನಿ ಪಿಕ್ತಾನಾಂ ಕೇಸ್ ಝಡೊನ್ ’ಹಯ್ಪ್ರಸ್’ ಗುಳಿಯೊ ಪ್ರೆಶರಾ ಖಾತಿರ್ ’ಒಮೆಜ್’ ಗುಳಿಯೊ ಎಸಿಡಿಟಿ ಖಾತಿರ್ ಸದಾಂ ಉಟೊನ್ ಚಾಲ್ತಿ ಮಾಗ್ಣಿ ಮ್ಹಣ್ಚ್ಯಾಪರಿಂ ಘೆವ್ನ್ ಆಸಾಂ ಸಾತ್ ವರ್ಸಾಂ ಥಾವ್ನ್! ಗುಳಿಯೊ ಬಂದ್ ಕರ್ಚ್ಯಾ ಆದಿಂ ಆನಿ ಹಾಂವೆಂ ’ಗುಡ್’ ಘಾಲ್ಚ್ಯಾ ಪಯ್ಲೆಂ ಕಾಂಯ್ ತರೀ ಅನ್ಭೊಗಾಂತ್ಲೆ ರುಸ್ತುರುಸಾಂವ್ ವಾಂಟುನ್ ಉಪ್ಕಾರಾಕ್ ಪಡ್ಚೆಂ ಘೆಂವ್ಕ್ ಆನಿ ಗರ್ಜೆ ಬಾಯ್ಲೆಂ ಥುಕೊಂಕ್ ಏಕ್ ಅವ್ಕಾಸ್ ಕರ್ನ್ ದೀಂವ್ಕ್ ಆಶೆತಾಂ. ಸಭಾರ್ ಪ್ರಕಾರಾಂಚೆಂ ಸಾಹಿತ್ಯ್ ಹಾಂವೆಂ ಬರಯ್ಲಾಂ, ಖಿರಯ್ಲಾಂ ಆನಿ ವೊರೆಯ್ಲಾಂ... ಆನಿ ರುಸ್ತುರುಸಾಂವ್ ಕಿತ್ಲಿ ತಿಕ್ಸಾಣ್, ಜಿವ್ಸಾಣ್, ವೊವ್ಸಾಣ್ ಆನಿ ಅಮ್ಸಾಣ್ ಖಾಂವಯ್ತಾ ತೆಂ ಮುಖ್ಲ್ಯಾ ಮುಲಾಗತೆಂತ್ ಗೊಮ್ತಾಲೆಂ.
ಮ್ಹಜೆಂ ರುಸ್ತುರುಸಾಂವಾಂತ್ಲೆಂ ರಾಜಾಂವ್ ತುಮ್ಕಾಂ ಫುಗಾಸಾಂವ್ ದಿಂವ್ಚ್ಯಾಕೀ ಕಾಂಯ್ ತರೀ ಚಿಂತುಂಕ್ ಕರ್ತಾ ತರ್ ಹಾಂವ್ ಖುಶಿ ಪುಣ್ ಏಕ್ ಅಪುಟ್ಟ್ ಸತ್ ಸಾಂಗ್ತಾಂ... ಮ್ಹನ್ಶ್ಯಾ ಹಣೆಬರಪ್ ಸಾಂಗ್ತಾನಾ... ಖಂಡಿತ್ ಆಮ್ಚೆಂಚ್ ಹಣೆಬರಪ್ ದಿಸ್ಲ್ಯಾರ್ ಚಿಡ್ಚೆ ನ್ಹಯ್ ವ ಭಿಗಡ್ಚೆಂ ನ್ಹಯ್...! ಊಣ್ ತಿದ್ವಿಲ್ಯಾರ್ ಗೂಣ್ ವಾಡ್ತಾತ್.
ಕಿತ್ಯಾಕ್ ಜಿಣಿಯೆಂತ್ ಹರೆಕ್ಲ್ಯಾನಿ ಚೂಕಿ ಕರುಂಕ್ ಆಸಾತ್... ತಿದ್ವುಂಕ್ ಆಸಾತ್... ಭೊಗ್ಸುಂಕ್ ಆಸಾ... ಚುಕಾರಿ ಮಾರ್ಚೆಂ ನ್ಹಯ್!! ಆನಿ ಜರ್ ದೆವಾನ್ಯೀ... ದೆವಾನ್ಯೀ ಮ್ಹನ್ಶ್ಯಾ ಚೂಕಿ ಭೊಗ್ಸಿನಾಂ ತರ್ ಸರ್ಗಾರಾಜ್ ಖಾಲಿಚ್ ಪಣ್ಗಿಲ್ ಪಡ್ಲ್ಲ್ಯಾಪರಿಂ ದವರ್ನ್ ಆಪ್ಲ್ಯಾ ಇರಾದ್ಯಾಚೆ ರುಸ್ತುರುಸಾಂವ್ ಕರುಂಕ್ ಆಸ್ತೆಲೆಂ. ನ್ಹಯ್ಗೀ?
ಜಿಣ್ಯೆಂತ್ ಮ್ಹನ್ಶ್ಯಾಕ್ ಕಿತೆಂ ಜಾಯ್? ಕುಟ್ಮಾಂತ್ ಮ್ಹನ್ಶ್ಯಾಕ್ ಕಿತೆಂ ಜಾಯ್? ಸವಲಾಂ ಜಾಯ್ತಿಂ!!? ’ಇಲ್ಲೊ ರಾಗ್, ಇಲ್ಲೊ ಮೋಗ್, ಇಲ್ಲಿ ಲಡಾಯ್... ಹಿಚ್ಚ್ ಕುಟ್ಮಾಂತ್ಲಿ...’ ನಾಂ ನಾಂ ಚೆಕ್ಕ್ ’ಇಲ್ಲೆಂ ಸೆಕ್ಸ್...’ ಆಸ್ಲ್ಯಾರ್ ಸಗ್ಳಿ ದಾದೊಸ್ಕಾಯ್ ನ್ಹಯ್ಗೀ? ಹ್ಹ ಹ್ಹ ಹ್ಹ
ಮುಖ್ಲೆಂ ರುಸ್ತುರುಸಾಂವ್...... ’ಗ್ರೇಸ್ತ್ಕಾಯ್’
ಹರ್ಯೇಕಾ ಭಾರತಾಚಾ ಪರ್ಜೆಕ್ ಸರ್ಕಾರಾನ್ ಧಾ ಧಾ ಲಾಖ್ ರುಪಯ್ ಛಾಪುನ್ ದಿಲ್ಯಾರ್ ’ಭಾರತ್’ ಆಮ್ಚೆಂ ದುಬ್ಳೆಂ ಆಸ್ಲ್ಲೆಂ ’ಮಹಾನ್’ ಗ್ರೇಸ್ತ್ ಜಾಯ್ತ್ಗೀ?! ಹ್ಹ..ಹ್ಹ..ಹ್ಹ...!!
ರಾಕೊನ್ ರಾವಾತ್...!!!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
