ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಮರುಭುಂಯ್ಂತ್ಲೆಂ ವಾದಾಳ್
ಕ್ಲೆರೆನ್ಸ್ ಪಿಂಟೊ, ಕೈಕಂಬ: ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚಾ ಸಂಸಾರಾಂತ್ ಹೆಂ ನಾಂವ್ ಥಿರ್ ಆನಿ ಅಥ್ವೆಂಚ್. ಅಪುರ್ಭಾಯೆಚಿ ಕಥಾ, ವಿಭಿನ್ನ್ ರಿತಿನ್ ನಿರೂಪಣ್ ಕರ್ಚಾಂತ್ ಮಾತ್ರ್ ನ್ಹಂಯ್, ವಾಚ್ಪ್ಯಾಕ್ ತಿ ಕಾಣಿ ಸಂಪ್ತಾಪರ್ಯಾಂತ್ ಭಾಂದುನ್ ದವರ್ಚಿ ಕಲಾ ಆಸ್ಚಾ ಭೋವ್ ಥೊಡ್ಯಾಂ ಪಯ್ಕಿ ಉಟೊನ್ ದಿಸ್ಚೊ ಕಾಣ್ಯೆಗಾರ್ ಹೊ ಜಾವ್ನಾಸಾ. ಅಪುಟ್ ಕೊಂಕ್ಣಿ ಭಾಸ್ ಆನಿ ವಾಚ್ಪ್ಯಾಕ್ ವೆಗ್ಳ್ಯಾಚ್ ಸಂಸಾರಾಕ್ ವರುನ್ ವೆಚಿ ಹಾಚಾ ಕಾಣ್ಯಾಂಚಿ ವಿಶೇಷತಾ. ಹಾಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಸುಟ್ಕಾ’ ಪರ್ಗಟ್ ಜಾಲಾ ತರ್ಯ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಹಾಣೆಂ ಎದೊಳ್ಚ್ ಬರಯ್ಲ್ಯಾತ್. ವೆಬ್ಸಾಯ್ಟಾಂಚೆರ್ ಸುರ್ವಾತ್ ಕೆಲ್ಲೆಂ ಪಯ್ಲೆಂ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಕಥಾಮೃತ್’ ಹಾಣೆಂಚ್ ಸುರ್ವಾತ್ ಕೆಲ್ಲೆಂ ಜಾವ್ನಾಸಾ. [’ಸುಟ್ಕಾ’ ಬುಕಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಕಾಣ್ಯೊ: ದೆವಾನ್ ವಿಸರ್ಲೆಲಿಂ ಭುರ್ಗಿಂ, ಧುಳ್ ತಿ ಧುಳ್ಚ್ಚ್, ಯಜ್ನ್, ಏಕ್ ಕುಡ್ಕೊ ಪಿಜ಼್ಜಾ, ಖೊವ್ಳಾಂ
ಕ್ಲೆರೆನ್ಸ್, ಕೈಕಂಬ
ಆನಿಂ ತೊ ದೀಸ್ ಉದೆಲೊಚ್ಚ್.
ಕಿತ್ಲ್ಯಾ ದಿಸಾಂ ಥಾವ್ನ್ ತಸೆಂ ಜಾತಾ ಕೊಣ್ಣಾ ಮ್ಹಣ್ ಚಿಂತುನ್ ಆಸ್ಲ್ಲ್ಯಾ ಆಮ್ಕಾಂ ಹ್ಯಾ ದಿಸಾ ತಸೆಂ ಘಡ್ಲ್ಲೆಂಚ್ಚ್.
ಗಲ್ಫಾಂತ್ ಕಾಮ್ ಕರುನ್ ಆಸ್ಚ್ಯಾ ಥೊಡ್ಯಾಂಕ್ ಆಶೆಂಚ್ಚ್ ಘಡ್ತಾ ಆನಿಂ ಆಸೆಂ ಘಡ್ಚೆಂ ಸಾಮಾನ್ಯ್ ತರೀ ಆಮ್ಕಾಂ ಆಸೆಂ ಘಡ್ಲ್ಲೆಂ ತೆಂ ಸೊಸುಂಕ್ ಕಷ್ಟ್ ಜಾಲ್ಲೆ.
ರೊಬರ್ಟಾಚೆಂ ಕಾಮ್ ಗೆಲ್ಲೆಂ. ತಸೆಂ ನ್ಹಂಯ್ ತರ್ ತಾಕಾ ಕಾಮಾಂತ್ಲೊ ಕಾಡ್ಲ್ಲೊ. ಕಂಪೆನಿಂತ್ ಜಾಯ್ ಪುರ್ತೆಂ ಬಿಸ್ನೆಸ್ ನಾ ಆನಿಂ ಥೊಡ್ಯಾ ಕಾಮೆಲ್ಯಾಂಕ್ ಕಾಮಾಂತ್ಲೆ ಕಾಡ್ತಾತ್ ಮ್ಹಳ್ಳಿ ಖಬಾರ್ ಥೊಡ್ಯಾ ತೆಂಪಾ ಥಾವ್ನ್ ಆಸ್ಲ್ಲಿ.
ತ್ಯಾ ಸಾಂಜೆರ್ ರೊಬರ್ಟ್ ರಡೊನ್ಂಚ್ ಮ್ಹಳ್ಳ್ಯಾಬರಿ ಘರಾ ಆಯಿಲ್ಲೊ.
ಗಾವಾಂತ್ ಮರಣ್ ಜಾಂವ್ಚೆಂಯ್ ಸಮಾ ಆನಿಂ ಗಲ್ಪಾಂತ್ ಕಾಮ್ ವೆಚೆಂಯ್ ಸಮಾ. ಯೆದೊಳ್ ಮ್ಹಾಕಾ ನಾತ್ಲ್ಲೊ ಆನ್ಭೊಗ್ ಆಜ್ ಮೆಳ್ಲ್ಲೊ. ಕಂಪೆನಿನ್ ರೊಬರ್ಟಾಕ್ ಎಕಾ ಮಹಿನ್ಯಾಚೊ ವೇಳ್ ದಿಲ್ಲೊ ಆನಿಂ ತ್ಯಾ ಎಕಾ ಮ್ಹಹಿನ್ಯಾಚ್ಯಾ ಆವ್ದೆಂತ್ ಆಮಿಂ ಸರ್ವಾನಿ ಪಾಟಿಂ ಗಾಂವಾಕ್ ವಚಾಜಯ್ ಆಸ್ಲ್ಲೆಂ. ಹಾಂವ್ ರಡ್ಲಿಂ ಮಾತ್ರ್. ತ್ಯಾ ಘಡಿಯೆ ರೊಬರ್ಟಾಕ್ ಕಸೆಂ ಭುಜಂವ್ಚೆಂ ತೆಂ ಕಳಾನಾಸ್ತಾನಾ ಹಾಂವ್ ರಡ್ಲ್ಲಿಂ.
ಮಸ್ಕತಾಂತ್ ರೊಬರ್ಟ್ ಆನಿಂ ಹಾಂವ್ ದೊಗಾಂಯ್ ಕಾಮ್ ಕರ್ತೆಲ್ಯಾಂವ್. ರೊಬರ್ಟಾಕ್ ಕಾಂಯ್ ಬರೆಂ ಕಾಮ್ ನಾತ್ಲ್ಲೆಂ. ಕುರುಮ್ ಎಕಾ ಶೊಪಿಂಗ್ ಸೆಂಟರಾಂತ್ಲ್ಯಾ ಎಕಾ ಎಲೆಕ್ತ್ರೋನಿಕ್ ಶೋರುಮಾಂತ್ ಸೆಲ್ಸ್ಮ್ಯಾನ್ ಜಾವ್ನ್ ಕಾಮ್ ಕರ್ತಾಲೊ. ಹಾಂವ್ ಮಸ್ಕತ್ ಆಯ್ಲ್ಯಾ ಉಪ್ರಾಂತ್ ತಾಚ್ಯಾ ಜೊಡಿನ್ ಕುಟ್ಮಾಚೊ ಖರ್ಚ್ ವಚಾನಾ ಮ್ಹಣ್ ಹಾಂವೆಂಯೀ ಕಾಮ್ ಸೊಧ್ಲ್ಲೆಂ. ಹಾಂವೆ ಡಿಗ್ರಿ ಕರುನ್ ಶೊರ್ಟ್ ಹ್ಯಾಂಡ್ ಆನಿಂ ಟಾಯ್ಪಿಂಗಾಂತ್ ಕೊರ್ಸ್ ಕೆಲ್ಲೆ ತರೀ ಕಾಮಾಚಿ ಮಾಹೆತ್ ನಾತ್ಲ್ಲ್ಯಾನ್ ಸುರ್ವೆರ್ ಬರೆಂ ಕಾಮ್ ಮೆಳೊಂಕ್ ಸಾದ್ಯ್ ಜಾಲೆಂ ನಾ. ಪುಣ್, ಉಣೊ ಸಾಂಬಾಳ್ ತರೀ ದೊಗಾಂಯ್ ಕಾಮ್ ಕೆಲ್ಲ್ಯಾ ವರ್ವಿಂ ದೀಸ್ ಕಾಡುಂಕ್ ಕಾಂಯ್ ಚಡ್ ಕಷ್ಟಾಂಚೆಂ ಜಾಲ್ಲೆಂ ನಾ.
ಕಾಜಾರ್ ಜಾವ್ನ್ ಹಾಂವ್ ಮಸ್ಕತ್ ಆಯ್ಲ್ಯಾ ಉಪ್ರಾಂತ್ ದೆವಾನ್ ಆಮ್ಕಾಂ ಸಂತತ್ ಪಾಟಾಪಾಟ್ ದಿಲ್ಲಿ ಮ್ಹಣ್ಯೆತ್. ಎಕಾ ಪಾಟ್ಲ್ಯಾನ್ ಎಕ್ ಮ್ಹಳ್ಳ್ಯಾಬರಿ ಆಮ್ಕಾಂ ತೆಗಾಂ ಜಣಾಂ ಭುರ್ಗಿಂ ಜಾಲಿಂ. ಪಯ್ಲೆ ದೋಗ್ ಚೆರ್ಕೆ, ನಿಶಾನ್ ಆನಿ ನಿಕಿಲ್ ತರ್ ನಿಮಾಣೆಂ ನಿಶಿತಾ. ಭುರ್ಗ್ಯಾಂಕ್ ಬೆಬಿ ಸಿಟ್ಟರಾ ಸರ್ಸಿನ್ ದವರ್ನ್ ಆಮಿಂ ಕಾಮಾಕ್ ವೆತೆಲ್ಯಾಂವ್. ಭುರ್ಗ್ಯಾಂಕ್ ಪಳಂವ್ಚಿ ಗಾಂವ್ಚಿಚ್ಚ್ ಜಾಲ್ಯಾನ್ ಆಮ್ಕಾಂ ಕೆದ್ನಾಂಯ್ ತ್ರಾಸ್ ಮ್ಹಳ್ಳೆ ಜಾಂವ್ಕ್ ನಾತ್ಲ್ಲೆ. ಎಕ್ ಪಾವ್ಟಿಂ ತಿಂ ಇಸ್ಕಾಲಾಕ್ ವಚೊಂಕ್ ಸುರು ಜಾಲ್ಯಾ ಉಪ್ರಾಂತ್ ದೊನ್ಪಾರಾಂಚ್ಯಾ ಅಡೇಸಾಕ್ ತಾಮ್ಕಾಂ ಬೇಬಿ ಸಿಟ್ಟರಾ ಸರ್ಸಿನ್ ದವರ್ಚೆಂ ಆಸ್ಲ್ಲೆಂ.
ವಾಡಿ ಕಬೀರ್ ಭಾರತೀಯ್ ಇಸ್ಕೊಲಾಚ್ಯಾ ಲಾಗಿಂಚ್ಚ್ ಆಮಿಂ ಆನಿ ಎಕಾ ಕುಟ್ಮಾಸವೆಂ ಸಾಂಗಾತಾ ರಾವ್ತೆಲ್ಯಾಂವ್. ರೊಬರ್ಟ್ ಕಾಮ್ ಕರ್ಚಿ ಕಂಪೆನಿ ತಾಕಾ ರಾವೊಂಕ್ ಘರ್ ದಿನಾತ್ಲ್ಲ್ಯಾ ವರ್ವಿಂ ಆಮ್ಚೆಂಚ್ಚ್ ಮ್ಹಳ್ಳೆಂ ವಿಂಗಡ್ ಘರ್ ಕರ್ಚಿ ತಾಂಕ್ ಆಮ್ಕಾಂ ನಾತ್ಲ್ಲಿ. ಕಾಜಾರ್ ಜಾವ್ನ್ ಆಯಿಲ್ಲ್ಯಾ ಸುರ್ವೆರ್ ವಿಂಗಡ್ ಘರಾ ರಾಂವ್ಚಿ ಆಶಾ ಹಾಂವೆಂ ದಾಕಯಿಲ್ಲಿ ತರೀ ರೊಬರ್ಟಾಚೆ ಕಷ್ಟ್ ದೆಕೊನ್ ಹಾಂವೆಂ ಮೌನ್ಪಣ್ ಸಾಂಬಾಳ್ಲ್ಲೆಂ. ಪುಣ್ ದೀಸ್ ವೆತಾಂ ವೆತಾಂ ದುಸ್ರ್ಯಾಂಚ್ಯಾ ಸಂಗಿಂ ರಾವೊನ್ ಸವಯ್ ಜಾಲಿ ಆನಿಂ ಆತಾಂ ಬರೆಂಚ್ಚ್ ಜಾತಾಲೆಂ.
"ಎಕಾ ಮಹಿನ್ಯಾಚಿ ಆವ್ದಿ ದಿಲ್ಯಾ ..." ಥೊದ್ಯಾ ವೆಳಾಚೆಂ ಮೌನ್ಪಣ್ ಮೊಡ್ನ್ ರೊಬರ್ಟ್ ಹಾಳ್ವಾಯೆನ್ ಉಲಯ್ಲೊ. "ಆನಿಂ ತಾಣಿಂ ಮ್ಹಾಕಾ ’ರಿಲೀಜ್’ (ಸುಟ್ಕೆ ಪತ್ರ್)* ದಿಂವ್ಕ್ಯೀ ತೆ ಆಯ್ಕಾನಾಂತ್. ಆಮ್ಚ್ಯಾ ಕಂಪ್ಣೆಂತ್ ಹೆ ತೀನ್ ಕಾಸಾಂಚೆ ಮದ್ರಾಸಿ ಆಯ್ಲ್ಯಾ ಉಪ್ರಾಂತ್ ಕಿತೆಂ ಜಾಲಾಂ ತೆಂ ಹಾಂವ್ ನೆಣಾಂ... ತ್ಯಾ ಮದ್ರಾಸ್ಯಾಂಚ್ಯಾ ದೊಳ್ಯಾಂನಿ ರಗಾತ್ ನಾ.. ಕಾಸಾಪ್ಪಿ ಮನಿಸ್ ತೆ....."
ಆಪ್ಲ್ಯಾ ಕಾಳ್ಜಾಂತ್ಲೆ ಉಮಾಳೆ ಎಕಾ ಪಾಟ್ಲ್ಯಾನ್ ಎಕ್ ರೊಬರ್ಟ್ ಉಲವ್ನ್ಂಚ್ಚ್ ಆಸ್ಲ್ಲೊ. ಪುಣ್ ತಾಕಾ ಸಮಧಾನ್ ನಾತ್ಲ್ಲೆಂ. ಗೆಲ್ಲೆಂ ಕಾಮ್ ಪಾಟಿಂ ಯೆನಾ ತೆಂ ಖಂಡಿತ್. ಸುಟ್ಕೆಪತ್ರ್ ದಿಲ್ಲೆಂ ತರ್ ಖಂಯ್ಸರ್ಯೀ ಎಕ್ ಕಾಮ್ ಸೊಧ್ಯೆತೆಂ ಮ್ಹಳ್ಳಿ ಆಮ್ಚಿ ಆಶಾ. ತೆಂಯ್ ಹೆ ಮದ್ರಾಶಿ ದಿಂವ್ಕ್ ಆಯ್ಕಾನಾಂತ್ ಆಮ್ಕಾಂ ಹ್ಯಾ ಮಸ್ಕತಾಂತ್ಲೆಂ ವಸ್ಚಾಜಾಯ್ಚ್ಚ್ ಪಡ್ತೆಲೆಂ.
ಮ್ಹಾಕಾಯೀ ಎಕಾ ರಿತಿಚೆ ಕಳ್ವಳೆ ಭಗ್ತಾಲೆ. ಚಾರ್ ಮ್ಹಹಿನ್ಯಾಂ ಪಯ್ಲೆಂಚ್ಚ್ ಮ್ಹಾಕಾ ಎಕ್ ಬರೆಂ ಕಾಮ್ ಮೆಳ್ಲ್ಲೆಂ. ಪೆಟ್ರೊಲಿಯಂ ಕಂಪೆನಿಂತ್ ಎಕ್ಸೆಕ್ಯುಟಿವ್ ಸೆಕ್ರೆಟರಿಚೆಂ ಕಾಮ್. ಮ್ಹಜಿ ವಿಸಾ ತಾಂಚ್ಯಾ ನಾಂವಾರ್ ಕೆಲ್ಲಿ. ಸಾಂಬಾಳ್ ಬರೊ. ಆನಿಂ ಮುಕಾರ್ ಬರೆಂ ಸವ್ಲತ್ಯೊ ಮೆಳ್ಚಿ ಆಶಾ ಆಸ್ಲ್ಲಿ,
ಹ್ಯಾಚ್ಚ್ ವೇಳಾರ್ ರೊಬರ್ಟಾಚೆಂ ಕಾಮ್ ವಸಾಜಯ್ಗೀ? ತೆಂಯೀ ತಾಚಿ ಕಂಪೆನಿ ಸುಟ್ಕೆ ಪತ್ರ್ ದಿಂವ್ಕ್ ಆಯ್ಕಾನಾ ತರ್? ತಾಚೆಂ ಕಾಮ್ ಕಶೆಂಯ್ ಗೆಲೆಂ ಆನಿಂ ಮ್ಹಜೆಂಯೀ ಕಾಮ್ ಗೆಲ್ಲ್ಯಾ ಬರಿಂಚ್ಚ್.
ಮ್ಹಾಕಾ ಪರತ್ ರಡೊಂಕ್ ಆಯ್ಲೆಂ. ಬರ್ಯಾಂತ್ಲೆ ಬರೆಂ ಕಾಮ್ ಮ್ಹಜೆಂ ಸಾಂಡುಂಕ್ ಹಾಂವ್ ತಯಾರ್ ನಾತ್ಲ್ಲಿಂ.
"ತುಜ್ಯಾ ಮೆನೆಜರಾಲಾಗಿಂ ಚಿಕ್ಕೆ ಪರಾತ್ತುನ್ ವಿಚಾರ್... ರೊಬರ್ಟ್ ..." ಹಾಂವೆ ಥೊಡ್ಯಾ ವೆಳಾಚ್ಯಾ ಗಳಾಯೆ ಉಪ್ರಾಂತ್ ಮ್ಹಳೆಂ." ಬಾಯ್ಲ್ ಆನಿಂ ಭುರ್ಗಿಂ ಆಸಾತ್.... ಭುರ್ಗ್ಯಾಂಚೆಂ ಶಿಕಾಪ್ ಪಾಡ್ ಜಾತಾ... ಮ್ಹಣ್ ಚಿಕ್ಕೆ ಕಳ್ವಳೊನ್ ಸಾಂಗ್ಲ್ಯಾರ್ ತೆ ಆಯ್ಕೊಂಕ್ ಯ್ ಆಸಾತ್.... ತುಂ ವಿಚಾರ್ ತಾಂಚ್ಯಾ ಲಾಗಿಂ..."
"ತ್ಯಾ ಮದ್ರಾಸ್ಯಾಂಲಾಗಿಂ ಪರಾತ್ತುನ್ ಪುರೊ ಜಾಲೆಂ..." ರೊಬರ್ಟ್ ಆಮ್ಸೊರಾನ್ ಮ್ಹಜಿಂ ಉತ್ರಾಂ ಮೊಡುನ್ ಚಿಕ್ಕೆ ವ್ಹಡಾ ತಾಳ್ಯಾನ್ ಉಲಯ್ಲೊ. "ಆಜ್ ಸಗ್ಳೊ ದೀಸ್ ಹಾಂವೆ ಪರಾತ್ಲೆಂ... ತಾಂಚೆ ಪಾಂಯ್ ಧರ್ಚೆ ಮಾತ್ರ್ ಬಾಕಿ.... ತಾಂಚ್ಯಾ ದೊಳ್ಯಾನಿಂ ಪುಣೀ ರಗಾತ್ ನಾ ತಸೆಂ ಭಗ್ತಾ... ಕಸಾಪ್ಪಿ ಮನಿಸ್ ತೆ.. ಮ್ಹಜ್ಯಾ ಜಾಗ್ಯಾರ್ ಮ್ಹಜ್ಯಾಕಿ ಅರ್ಧ್ಯಾ ಸಾಂಭಾಳಾಕ್ ದುಸ್ರ್ಯಾಕ್ ಹಾಡುನ್ ದವರ್ಲಾಂ... ಮದ್ರಾಸ್ಯಾಕ್.... ಹಾಂವ್ ಪರತ್ ವಚೊನ್ ತಾಂಚೆ ಪಾಂಯ್ ಧರಿನಾ... ಜಾಲ್ಲೆ ಬರಿ ಜಾತಾ.. ಗಾವಾಂತ್ ಆಮ್ಕಾಂ ಕಾಂಯ್ ಉಣೆಂ ಪಡ್ಚೆಂ ನಾ......"
ಹಾಂವ್ ಪರತ್ ರೊಬರ್ಟಾಲಾಗಿಂ ಉಲಯ್ಲಿಂನಾ. ಪುಣ್ ಮ್ಹಜಿ ಮತ್ ಆಸ್ಥಿರ್ ಜಾವ್ನ್ ಯೆತಾಲಿ. ಚಿಂತ್ನಾನಿ ಜಡಾಯ್ ಭರೊನ್ ಯೆಂವ್ಕ್ ಲಾಗ್ಲಿ.
ಗಾವಾಕ್ ಗೆಲ್ಯಾ ಉಪ್ರಾಂತ್ ಜಾಂವ್ಚೆಂ ಕಷ್ಟ್ ಕೊಣಾಕ್ ಕಳಿತ್ ಆಸಾತ್? ಹಾಂಗಾಸರ್ ಕಾಮ್ ಕರ್ನ್ ಆಸ್ತಾನಾ ಆಮಿಂ ಕಾಂಯ್ ಜೊಡುನ್ ದವರ್ಲ್ಲೆಂ ಕಾಂಯ್ ನಾ... ಆಸ್ತ್ ಬದಿಕ್ ಆಮ್ಚೆ ಕಡೆ ಕಾಂಯ್ ನಾ... ಬೆಂಕಾಂತ್ ಪುಂಜವ್ನ್ ದವರ್ಲ್ಲೆ ದರಬಸ್ತ್ ದುಡುಯೀ ನಾ.. ತರ್ ಗಾವಾಕ್ ಗೆಲ್ಯಾ ನಂತರ್ ಆಮ್ಚಿ ಗತ್ ಕಿತೆಂ?
ಥೊಡ್ಯಾ ತೆಂಪಾ ಪಯ್ಲೆಂ, ಆಮಿಂ ಉರ್ವಾ ಇಗರ್ಜೆ ಮುಖಾರ್ ಆಸ್ಲ್ಲ್ಯಾ ಎಕಾ ಬಾಂದ್ಪಾಂತ್ ಎಕ್ ಫ್ಲ್ಯಾಟ್ ಘೆತ್ಲ್ಲೆಂ. ತಾಂತು ಸಾಮಾನ್ ಕಾಂಯ್ ಕರುಂಕ್ ನಾತ್ಲ್ಲೊ ತರೀ ಮಸ್ಕತಾಂತ್ ಕಾಂಯ್ ಚಡುಣೆಂ ಜಾಯ್ತ್ ತರ್ ವಚೊನ್ ರಾವೊಂಕ್ ತೊಂದ್ರೆ ನಾಂತ್ ಮ್ಹಣ್ ಆಮ್ಚೆಂ ಚಿಂತಾಪ್.
ಗಾವಾಂತ್ ಕುಪ್ಪೆಪದವ್ ಬಯ್ಲಾಂತ್ ರೊಬರ್ಟಾಚೆ ಘರ್. ತಾಚ್ಯಾ ಆವಯ್ ಬಾಪಾಯ್ಕ್ ತರೀ ವಿಶೇಸ್ ಜಾಗೊ ನಾತ್ಲ್ಲೊ. ದೋನ್ ತೀನ್ ಎಕ್ರೆ ಗಾದೆ ಆನಿಂ ಇಲ್ಲೆಶೆಂ ಹಿತಾಲ್. ತಾಚೆ ದೋಗ್ ಭಾವ್ ತ್ಯಾ ಜಾಗ್ಯಾರ್ ಘೊಳ್ತಾಲೆ ಆನಿಂ ಭುರ್ಗ್ಯಾಂ ಬಾಳಾಚೆಂ ಪೊಟಾಂ ಭರ್ತಾಲೆ. ವರ್ಸಾಕ್ ಎಕ್ ದೋನ್ ಪಾವ್ಟಿಂ ರೊಬರ್ಟಾಕ್ ತಾಂಚಿಂ ಕಾಗ್ದಾಂ ಯೆತಾಲಿಂ. ರೆಡೆ ಕಾಣ್ಘೆಂವ್ಕ್, ಗಾದ್ಯಾಂಕ್ ಈಟ್ ಜಾಯ್, ಭುರ್ಗ್ಯಾಂಕ್ ಇಸ್ಕೊಲಾಕ್ ಬಾಂಧುಂಕ್... ಆಸೆಂ ರೊಬರ್ಟ್ ತಾಂಕಾ ಕುಮೊಕ್ ಕರ್ನ್ ಆಸ್ಲ್ಲೊ. ಆನಿಂ ಆತಾಂ ತಾಂಚ್ಯಾ ಮಧೆಂ ರಾವೊನ್ ರೊಬರ್ಟಾಕ್ ಗಾದ್ಯಾ ಭಾಟಾಂಚೆಂ ಕಾಮ್ ಕರುಂಕ್ ಜಾಂವ್ಚೆಂ ನಾ. ಕೊಡ್ಯಾಳ್ ರಾವೊನ್ ಬಿಸ್ನೆಸ್ ಕರ್ಯೆತ್ ಮ್ಹಳ್ಯಾರ್ ಆಮ್ಚೆಲಾಗಿ ದುಡು ತಿತ್ಲೊ ನಾ... ಆನಿಂ ಕಾಮ್... ಕೊಡ್ಯಾಳಾಂತ್ ಕಾಮ್ ತಿತ್ಲ್ಯಾ ಸುಲಭಾಯೆರ್ ಖಂಯ್ ಮೆಳ್ತಾ? ಮೆಳ್ಳೆಂ ತರೀ ಆಮ್ಚೆಂ ಚೊವ್ಗಾಚೆಂ ಪೊಟ್ ಭರುಂಕ್ ತಿತ್ಲೊ ಸಾಂಬಾಳ್ ಮೆಳಾತ್?....
ಮ್ಹಜಿ ಮತ್ ಪಿಸಾಂತುರ್ ಜಾತಾಲಿ. ಕೊಡ್ಯಾಳ್ ವಚೊನ್ ರಾವೊನ್, ಪರತ್ ಕಷ್ಟಾಂಚಿ ಜೀಣ್ ಜಿಯೆಂವ್ಕ್ ಮ್ಹಾಕಾ ನಾಕಾ ಆಸ್ಲ್ಲೆಂ.
ದೀಸ್ ಸವ್ಕಾಸ್ ಉಬೊಂಕ್ ಲಾಗ್ಲೆ. ಆಮಿಂ ಮಸ್ಕತ್ ಸೊಡ್ನ್ ಗಾಂವಾಕ್ ವೆಚ್ಯಾ ತಯಾರಾಯೆರ್ ಆಸ್ಲ್ಲ್ಯಾಂವ್.
ಮ್ಹಜ್ಯಾ ಕಂಪ್ಣೆಕ್ ಹಾಂವೆ ಕಾಮ್ ಸೊಧ್ಚ್ಯಾ ವಿಶ್ಯಾಂತ್ ತಿಳ್ಸಿಲ್ಲೆಂ. ತ್ಯಾಚ್ಚ್ ವೇಳಾರ್ ಕಂಪ್ಣೆಂತ್ಲ್ಯಾ ಮನ್ಶಾನಿಂ ಮ್ಹಾಕಾ ನವಿ ಆಲೊಚನ್ ದಿಲಿ. ರೊಬರ್ಟ್ ಗಾಂವಾಕ್ ಗೆಲೊ ತರಿ ಹಾಂವೆ ಮಸ್ಕತಾಂತ್ ಪಾಟಿಂ ರಾಂವ್ಚೆಂ.
ಮ್ಹಜೆಂ ಕಾಳಿಜ್ ದಡ್ಧಡೊಂಕ್ ಲಾಗ್ಲೆಂ. ಘೊವ್ ಆನಿಂ ಭುರ್ಗಿಂ ಗಾವಾಕ್ ಗೆಲ್ಯಾರ್ ಹಾಂವೆ ಎಕ್ಲ್ಯಾನ್ ರಾವೊಂಕ್ ಜಾಯ್ತ್? ಲೋಕ್, ತೆಂಯ್ ಗಾಂವಾಂತ್ ಕಿತೆಂ ಮ್ಹಣಾತ್? ರೊಬರ್ಟ್ ಆಯ್ಕೊಂಕ್ ಅಸಾಗಿ? ಇತ್ಲೊ ತೇಂಪ್ ಹಾಂಗಾಸರ್ ರೊಬರ್ಟಾಚ್ಯಾ ಆಸ್ರ್ಯಾಖಾಲ್ ರಾವ್ಲ್ಲ್ಯಾ ಮ್ಹಾಕಾ ಎಕ್ಸುರ್ಯಾಕ್ ರಾವೊಂಕ್ ಸಾದ್ಯ್ ...?
ಪುಣ್ ಹಾಂವ್ ಪಾಟಿಂ ರಾವ್ಲ್ಲ್ಯಾ ವರ್ವಿಂ ಖಂಡಿತ್ ಜಾವ್ನ್ ಆಮ್ಚೆಂ, ಆಮ್ಚ್ಯಾ ಕುಟ್ಮಾಂಚೆಂ ಬರೆಂಪಣ್ ಜಾತೆಂಲೆಂ ತೆಂ ಹಾಂವ್ ಜಾಣಾಸ್ಲ್ಲಿಂ. ಹ್ಯಾ ಕಂಪ್ಣೆಂತ್ ಸಾಂಬಾಳ್ ಬರೊ ಆಸಾ. ಕಾಮಾಚ್ಯಾ ವಿಶ್ಯಾಂತ್ ಭಿಯೆಂವ್ಚಿ ಕಾಂಯ್ ಗರ್ಜ್ ನಾ. ಆಫಿಸಾಂತ್ ಸರ್ವ್ ಬರೆ ಮನಿಸ್... ಕಾಂಯ್ ತೊಂದ್ರೆ ದಿಂವ್ಚೆ ಮನಿಸ್ ಕೊಣಿ ನಾಂತ್.... ಎಕ್ಸುರಿಂ ಆಸ್ಲಿಂ ತರ್ ಪಯ್ಶೆ ಉರಂವ್ಕ್ ಸಾದ್ಯ್ ಆಸಾ.... ಗಾಂವಾಕ್ ಗೆಲ್ಲ್ಯಾ ರೊಬರ್ಟಾನ್ ಭುರ್ಗ್ಯಾಂಕ್ ಸಾಂಬಾಳ್ಳೆಂ ತರ್ ಆಪುಣ್ ಪಯ್ಶೆ ದಾಡ್ಲ್ಯಾರ್ ತಾಕಾ ಥೈಂ ಕಾಂಯ್ ಲ್ಹಾನ್ ಬಿಸ್ನೆಸ್ ಆಸಾ ಕರುಂಕ್ ಸುಲಭ್. ತಸೆಂ ನ್ಹಂಯ್ ಆಸ್ತಾಂ ಎಕ್ಲ್ಯಾನ್ ತರೀ ರಾವ್ಲ್ಯಾರ್ ಗಲ್ಪಾಚೊ ಸಂಬಂಧ್ ಉರ್ತಾ..... ಆನಿಂ ದೋನ್ ವರ್ಸಾಂನಿ, ರೊಬರ್ಟಾಚಿ ’ಸುಟ್ಕೆ ಪತ್ರಾಚಿ ಆವ್ದಿ’ ಸಂಪ್ಲ್ಯಾ ನಂತರ್ ಪರತ್ ಕಾಮಾಕ್ ಲಾಗ್ಚಿ ಗರ್ಜ್ ಪಡ್ಲಿ ತರ್ ಪರತ್ ಮಸ್ಕತಾಕ್ ಯೆವ್ಯೆತ್ ...
ಚಿಂತ್ನಾಂ ಬರಿಂಚ್ಚ್ ಜಾವ್ನಾಸ್ಲ್ಲಿಂ. ಆಮ್ಚ್ಯಾಚ್ಚ್ ಕುಟ್ಮಾಚ್ಯಾ ಬರ್ಯಾಪಣಾಕ್.... ಪುಣ್ ರೊಬರ್ಟ್ ಆಯ್ಕೊಂಕ್ ಆಸಾಗೀ?
ಜೀವನಾಂತ್ ಥೊಡ್ಯಾ ಪಾವ್ಟಿಂ ಜೀಕ್ ಮೆಳಾಜಯ್ ತರ್ ಉರ್ಡೊಣಿ ಗರ್ಜೆಚಿ..... ಪ್ರತ್ಯೇಕ್ ಜಾವ್ನ್ ಕಾಜಾರಿ ಜೀವಿತಾಂತ್ ಝುಗ್ಡೆಂ ಕರುನ್ ತರೀ ಜಿವನ್ ಸುಫಲ್ ಕರಿಜಾಯ್ ಪಡ್ತಾ....
ಹಾಂವೆ ಮಸ್ಕತಾಂತ್ ಪಾಟಿಂ ರಾವೊಂಕ್ ನಿರ್ಧಾರ್ ಕೆಲ್ಲೊ.
***************************
ರೊಬರ್ಟ್ ಆನಿಂ ಭುರ್ಗಿಂ ಮಸ್ಕತ್ ಸೊಧುನ್ ಪಾಟಿಂ ಗೆಲಿಂ.
ಹಾಂವೆ ಪಾಟಿಂ ರಾವೊನ್ ಕಾಮ್ ಕರ್ಚ್ಯಾ ವಿಶ್ಯಾಂತ್ ತಾಚಿ ಪರ್ವಣ್ಗಿ ಘೆಂವ್ಕ್ ಕಷ್ಟ್ ಜಾಲೆ ತರೀ ಆಖ್ರೇಕ್ ತೊ ಒಪ್ಪಾಲ್ಲೊ ಆನಿಂಂ ಹಾಂವ್ ಮಸ್ಕತಾಂತ್ ಪಾಟಿಂ ರಾವ್ಲ್ಲಿಂ.
ಮ್ಹಾಕಾ ಸಾಂಬಾಳ್ ಬರೊ ಆಸ್ಲ್ಲೊ. ತ್ಯಾ ಶಿವಾಯ್ ಮ್ಹಜಿ ಕಂಪೆನಿ ಮ್ಹಾಕಾ ವಿಸಾ ದೀವ್ನ್ ಕಾಮಾಂತ್ ದವರುಂಕ್ ಕಬೂಲ್ ಜಾಲ್ಲಿ.
ಘರಾಂತ್ಲೊ ಚದಾವತ್ ಸಾಮಾನ್ ರೊಬರ್ಟಾನ್ ವೆಲೊ. ಉರ್ವಾ ಘೆತ್ಲ್ಲ್ಯಾ ಫ್ಲ್ಯಾತಾಂತ್ಚ್ಚ್ ರಾಂವ್ಚಿ ತಾಚಿ ಆಲೊಚನ್ ತಾಣೆಂ ಕೆಲಿ. ತಿ ಮ್ಹಾಕಾಯೀ ಬರಿ ಲಾಗ್ಲಿ. ಕೊಡ್ಯಾಳ್ ಭುರ್ಗ್ಯಾಂಕ್ ಇಸ್ಕೊಲಾಕ್ ವಚೊಂಕ್ ಸುಲಬ್ ಜಾತೆಲೆಂ ತೆಂ ಖಂಡಿತ್. ಹಾಂಗಾ ಜಲ್ಮೊನ್ ವ್ಹಡ್ ಜಾಲ್ಲ್ಯಾ ಭುರ್ಗ್ಯಾಂಕ್ ಕುಪ್ಪೆಪದವ್ ಬಯ್ಲಾಂತ್ ರಾವೊಂಕ್ಯೀ ಕಷ್ಟ್ ತೆಂ ಆಮ್ಕಾಂ ಭಗ್ತಾಲೆಂ.
ಹಾಂವ್ ಆತಾಂ ದಾರ್ ಸೈತ್ ಎಕಾ ಕೊಡ್ಯಾಳ್ ಗಾರಾಂಚ್ಯಾ ಕುತ್ಮಾಚ್ಯಾ ಘರಾಂತ್ ಎಕ್ ಕೂಡ್ ಭಾಡ್ಯಾಕ್ ಘೆವ್ನ್ ರಾವ್ಲಿಂ. ಗರ್ಜೆಚೊ ಥೊಡೊ ಸಾಮಾನ್ ಮಾತ್ರ್ ಹಾಂವೆಂ ದವರ್ಲ್ಲೊ. ಮ್ಹಜ್ಯಾಚ್ಚ್ ಖಾತಿರ್ ಥೊದೊ ಸಾಮಾನ್ ಹಾಂವೆಂ ಘೆತ್ಲೊ.
ಪಯ್ಲೊ ಮಹಿನೊ ಬೋವ್ ಕಷ್ಟಾಂನಿ ಪಾಶಾರ್ ಜಾಲೊ.
ಪುಣ್ ಹ್ಯಾ ಮಹಿನ್ಯಾಂತ್ ವಿಶೇಸ್ ಬದ್ಲಾವಣ್ ಆಸ್ಲ್ಲಿ.... ಮ್ಹಜ್ಯಾ ಥೈಂ ಆನಿಂ ಮ್ಹಜ್ಯಾ ಚಾಲ್ತ್ಯಾ ಜೀವನಾ ಥೈಂ...
ಕಾಜಾರ್ ಜಾಲ್ಯಾ ಉಪ್ರಾಂತ್ ಯೆದೊಳ್ ವರೆಗ್ ರೊಬರ್ಟಾಚ್ಯಾಚ್ಚ್ ಸಾವ್ಳೆಂತ್ ರಾವ್ಲ್ಲ್ಯಾ ಮ್ಹಾಕಾ ಆತಾಂ ಹೆಂ ಜೀವನ್ ಸುಟ್ಕೆಚೆಂ ತಸೆಂ ಜಾಂವ್ಕ್ ಪಾವ್ಲೆಂ. ಭುರ್ಗಿಂ ಆನಿಂ ರೊಬರ್ಟ್ ಮ್ಹಜ್ಯಾಸವೆಂ ನಾಂತ್ ಮ್ಹಳ್ಳಿ ಬೆಜಾರಾಯ್ ಸೊಡ್ಲಿ ತರ್ ಹೆರ್ ಕಿತೆಂಚ್ಚ್ ಉಣೆಂಪಣ್ ಮ್ಹಾಕಾ ಆತಾಂ ಭಗ್ಲೆಂ ನಾ.
ಎಕಾ ರಿತಿನ್ ಮ್ಹಣ್ಚೆಂ ತರ್ ಹಾಂವೆ ನೀಜ್ ಜೀವನ್ ಪಳಂವ್ಕ್ ಸುರು ಕೆಲೆಂ ತಸೆಂ ಮ್ಹಾಕಾ ಭಗೊಂಕ್ ಲಾಗ್ಲೆಂ....
ರೊಬರ್ಟಾಚೆಂ ಆನಿಂ ಮ್ಹಜೆಂ ಲಗ್ನ್ ಸುಮಾರ್ ಭಾರಾ ವರ್ಸಾಂ ಪಯ್ಲೆಂ ಜಾಲ್ಲೆಂ.
ಹಾಂವ್ ಕೊಲೆಜ್ ಸಂಪವ್ನ್ ಮುಖಾರ್ ಕಿತೆಂ ಕರ್ಚೆಂ ಮ್ಹಣ್ ಚಿಂತುನ್ ಆಸ್ತಾನಾಂಚ್ಚ್ ರೊಬರ್ಟಾಚಿ ಸೈರಿಕ್ ಆಯಿಲ್ಲಿ..
ಗಲ್ಪಾಂತ್ಲೊ ಚೆಡೊ... ಸುಮಾರ್ ವರ್ಸಾಂ ಥಾವ್ನ್ ಮಸ್ಕತ್ ಆಸಾ... ಗುಣಾಂನಿ ಆಪುರ್ಬಾಯೆಚೊ ಆನಿಂ ಕಾಂಯ್ಂಚ್ಚ್ ಪಾಡ್ ಸವಯೊ ನಾತ್ಲ್ಲೊ. ತಸಲೊ ಚೆಡೊ ಮೆಳೊಂಕ್ಚ್ಚ್ ಕಷ್ಟ್ ಮ್ಹಣ್ ಥೊಡ್ಯಾಂನಿ ತೀರ್ಪ್ ದಿತಾನಾ ಡ್ಯಾಡಿ ಮಮ್ಮಿನ್ ಮ್ಹಾಕಾ ತಾಚೆಲಾಗಿಂ ಕಾಜಾರ್ ಕರುನ್ ದಿಂವ್ಕ್ ನಿಶ್ಚಯ್ಸಿಲೆಂಚ್ಚ್ ಆನಿಂ ಹಾಂವೆಂಯೀ ಕಿತ್ಯಾಕ್ಗಿ ಕಳಾನಾ ನಾ ಮ್ಹಣ್ ಮ್ಹಳ್ಳೆಂನಾ. ಯಾ ತ್ಯಾ ವೆಳಿಂ ನಾ ಮ್ಹಣ್ಚ್ಯಾ ತಿತ್ಲೆಂ ಧಯ್ರ್ ಮ್ಹಜ್ಯಾಲಾಗಿಂ ನಾತ್ಲ್ಲೆಂ ಜಾಯ್ಜಯ್.....
ರೊಬರ್ಟಾಚ್ ಆನಿಂ ಮ್ಹಾಕಾ ಪ್ರಾಯೆಕ್ ಪಂದ್ರಾಂ ವರ್ಸಾಂಚಿ ತಫಾವತ್... ತ್ಯಾ ವಿಶ್ಯಾಂತ್ ಮ್ಹಾಕಾ ಕಳ್ಳೆಂ ಆಮ್ಚೆಂ ಕಾಜಾರ್ ಜಾಲ್ಯಾ ಉಪ್ರಾಂತ್ಚ್ಚ್.
ರೊಬರ್ಟಾನ್ ಮ್ಹಾಕಾ ಬರೆಂ ಕರುನ್ ಪಳಯಿಲ್ಲೆಂ. ಆಮ್ಚ್ಯಾ ಮದೆಂ ಆಸ್ಲ್ಲ್ಯಾ ಪ್ರಾಯೆಚ್ಯಾ ತಫಾವತಾ ವರ್ವಿಂಗೀ ಕೋಣ್ ಜಾಣಾ ತಾಚೆ ಥಾವ್ನ್ ಕೆದ್ನಾಂಯ್ ಮ್ಹಾಕಾ ಎಕಾ ಭುರ್ಗ್ಯಾಚೊಚ್ ಮೋಗ್ ಮೆಳ್ಲ್ಲೊ ಶಿವಾಯ್ ಎಕಾ ಸ್ತ್ರಿಯೆ ಬರಿ ತಾಣೆಂ ಮ್ಹಾಕಾ ದೆಖೊಂಕ್ ನಾತ್ಲ್ಲೆಂ. ತೊ ಮ್ಹಜೆರ್ ಕೆದ್ನಾಂಯ್ ರಾಗಾರ್ ಜಾಂವ್ಕ್ ನಾತ್ಲ್ಲೊ. ಮ್ಹಾಕಾ ತಾಣೆಂ ಜೊಗಾಸಣೆನ್ ಪೊಸ್ಲ್ಲೆಂ. ಎಕಾ ಉತ್ರಾನ್ ಸಾಂಗ್ಚೆಂ ತರ್ ಎಕಾ ಪ್ರೆಮಿಕಾಚೊ ಮೋಗ್ ಕೆಲ್ಲೊ ಮ್ಹಣ್ಚ್ಯಾಕೀ ಎಕಾ ನೆಣ್ತ್ಯಾ ಭುರ್ಗ್ಯಾಚೊ ಮೋಗ್ ತಾಣೆಂ ಕೆಲ್ಲೊ ಮ್ಹಳ್ಯಾರ್ ಕಾಂಯ್ ಚೂಕ್ ಜಾಂವ್ಚಿ ನಾ. ಕೆದ್ನಾಂಯೀ ಹಾಂವ್ ತಾಚೆರ್ ರಾಗಾರ್ ಜಾಲಿಂ ತರೀ ಖುಶಾಲಾಯೆನ್ಂಚ್ಚ್ ತಾಣೆಂ ಮ್ಹಾಕಾ ಭುಜಂವ್ಚೆಂ ಆಸ್ಲ್ಲೆಂ.
ತಸೆಂ ಮ್ಹಳ್ಯಾರ್ ಮ್ಹಜ್ಯಾ ಖುಶೆ ಪ್ರಮಾಣೆಂ ಜಿಯೆಂವ್ಕ್ಯಿ ತಾಣೆಂ ಸೊಡ್ಲ್ಲೆಂ ನಾ. ಹರ್ಯೆಕ್ ವಿಶಯ್ ಹಾಂವೆ ತಾಚೆಲಾಗಿಂ ವಿಚಾರಿಜಯ್ ಆಸ್ಲ್ಲೊ. ಹಾಂವೆ ಜೊಡ್ಲ್ಲೆ ಪಯ್ಶೆ ತಾಚೆಲಾಗಿಂ ಹಾಡುನ್ ದೀಜಯ್ ಆಸ್ಲ್ಲೆ. ಮ್ಹಾಕಾ ಕಿತೆಂಯ್ ಜಾಯ್ ತರೀ ತಾಚೆಲಾಗಿಂ ವಿಚಾರಿಜಯ್ ಆಸ್ಲ್ಲೆಂ. ಹಾಂವೆ ವಿಚಾರ್ಲ್ಲ್ಯಾಕ್ ತೊ ನಾ ಮ್ಹಣ್ ಮ್ಹಣಾ ನಾತ್ಲ್ಲೊ ತರೀ ಮ್ಹಾಕಾ ಮ್ಹಜ್ಯಾಚ್ಚ್ ಖುಶೆ ಪ್ರಮಾಣೆಂ ಕಾಂಯ್ಚ್ ಘೆಂವ್ಕ್ ನಾತ್ಲ್ಲೆಂ....
ಕಿತೆಂ ಮ್ಹಳ್ಯಾರ್ಯ್ ತಾಚ್ಯಾ ಆನಿಂ ಮ್ಹಜ್ಯಾ ಚಿಂತ್ಪಾಂತ್ ಫರಕ್ ಆಸ್ಲ್ಲೆಂ. ನೆಸ್ಣಾ - ಖಾಣಾಂತ್ ಮ್ಹಾಕಾ ಆನಿಂ ತಾಕಾ ಚಡುಣೆಂ ಪಡ್ತಾಲೆಂಚ್ಚ್. ಫ್ಯಾಶನಾಚೆಂ ವಸ್ತುರ್ ಮ್ಹಾಕಾ ಯಾ ಭುರ್ಗ್ಯಾಂಕ್ ಹಾಡುಂಕ್ ತಾಣೆಂ ಸೊಡ್ಲ್ಲೆಂ ನಾ. ಪಯ್ಶಾಂಚೊ ವಿಭಾಡ್ ಕರ್ಚಿ ಗರ್ಜ್ ನಾ ಮ್ಹಣ್ ತೊ ಮ್ಹಣ್ತಾಲೊ. ಘರಾಂತ್ ಜೆವ್ಣಾಂ, ಸಯ್ರ್ಯಾ ಧಯ್ರ್ಯಾಂಕ್ ಆಪಂವ್ಕ್ ತಾಕಾ ಖುಶಿ ಆಸಾನಾತ್ಲ್ಲಿ. ಎಕಾ ಉತ್ರಾನ್ ಆಮ್ಚ್ಯಾ ಜೀವನಾಂತ್ ಎಕಾ ರೀತಿಚಿ ಬಂಧಡ್ ಖಂಡಿತ್ ಜಾವ್ನ್ ಆಸ್ಲ್ಲಿ.....
ಪುಣ್ ಪಾಟ್ಲ್ಯಾ ಎಕಾ ಮ್ಹಹಿನ್ಯಾಂತ್ ಹ್ಯಾ ಸರ್ವಾಂ ಥಾವ್ನ್ ಸುಟೊನ್ ಹಾಂವ್ ಮೆಕ್ಳಿಂ ಜಾಲ್ಲ್ಯಾ ಬರಿ ಮ್ಹಾಕಾ ಭಗ್ಲೆಂ. ರೊಬರ್ಟ್ ಗಾಂವಾಕ್ ಗೆಲ್ಯಾ ಉಪ್ರಾಂತ್ ಪಯ್ಲ್ಯಾ ಮ್ಹಹಿನ್ಯಾಚೊ ಸಾಂಬಾಳ್ ಮ್ಹಜ್ಯಾ ಹಾತಿಂ ಮೆಳ್ಳೊ ಆನಿ ತೊ ಮ್ಹಜ್ಯಾಚ್ಚ್ ಎಕೌಂಟಾಂತ್ ಬೆಂಕಾಂತ್ ಘಾಲೊ... ಹಾಂವೆಂ ಜೊಡ್ಲ್ಲೆ ಪಯ್ಶೆ ಮ್ಹಜ್ಯಾಚ್ಚ್ ಲಾಗಿಂ ದವರುನ್ ಹಾಂವೆಂಚ್ಚ್ ಖರ್ಚುಂಚಿ ತಿ ಖುಶಿ ಮ್ಹಾಕಾ ಪಯ್ಲ್ಯಾ ಪಾವ್ಟಿಂ ಮೆಳ್ಳಿ... ಮ್ಹಾಕಾ ಜಾಯ್ ಜಾಲ್ಲ್ಯೊ ವಸ್ತು ಹಾಂವೆ ಹಾಡ್ಯ್ಲೊ.... ಮ್ಹಜ್ಯಾಚ್ ಖುಶೆ ಫರ್ಮಾಣೆಂ...
ಆಸಲ್ಯಾ ಎಕ್ಸುರ್ಪಣಾಂತೀ ಸಂತೊಸ್ ಆಸ್ಲ್ಲೊ. ಘೊವಾಚ್ಯಾ ಸಾವ್ಳೆ ಬಾಯ್ರ್ ಜಿಯೆಂವ್ಚ್ಯಾತೀ ಮಝಾ ಆಸ್ಲ್ಲಿ ಹಾಂವ್ ಚಾಕೊಂಕ್ ಲಾಗ್ಲಿಂ......
ಹ್ಯಾ ಮ್ಹಹಿನ್ಯಾಂತ್, ಮ್ಹಜ್ಯಾ ಜೀವನಾಚಿ ಚರಿತ್ರಾಚ್ಚ್ ಬದ್ಲೊಂಕ್ ಲಾಗ್ಲಿ.... ಸಕಾಳಿಂ ಪಾಂಚ್ ವೊರಾರ್ ಉಟೊನ್ ಘರ್ಚ್ಯಾಂಕ್ ಸರ್ವಾಂಕ್ ನಾಸ್ಟೊ, ಭುರ್ಗ್ಯಾಂಕ್ ಟಿಫಿನ್ ಆನಿಂ ತಾಂಚೆ ನೆಸಾಪ್ ಹೆಂ ಸರ್ವ್ ಪಳಂವ್ಕ್ ಮ್ಹಾಕಾ ನಾತ್ಲ್ಲೆಂ. ಆರಾಮಾಯೆನ್ ಸಾತ್ ವೊರಾರ್ ಉಟೊನ್ ಭಾಯ್ರ್ ಸರ್ಲ್ಯಾರೀ ಪುರೊ ಆಸ್ಲ್ಲೆಂ.
ಹ್ಯಾ ಜೀವನಾಂತ್ ಆರಾಮ್ ಆಸ್ಲ್ಲೊ....
ಸಾಂಜೆರ್ ವೇಳ್ ಕರ್ನ್ ಘರಾ ಆಯ್ಲ್ಯಾರಿ ಆಮ್ಸೊರಾನ್ ರಾಂದಾಪ್ ಕರುಂಕ್ ನಾತ್ಲ್ಲೆಂ.... ಭುರ್ಗ್ಯಾಚೆಂ ಶಿಕಾಪ್ ಪಳವ್ನ್ ತಾಂಚ್ಯಾ ಪಾಟ್ಲ್ಯಾನ್ ರಾವೊನ್ ತಾಂಚ್ಯಾಲಾಗಿಂ ಬೋಬ್ ಮಾರುಂಕ್ ನಾತ್ಲ್ಲಿ. ಜೀವನ್ಂಚ್ಚ್ ಸವ್ಕಸಾಯೆಚೆಂ ಜಾಲ್ಲೆಂ.
***********************
ಹೆಂ ಜೀವನ್ ಬರೆಂ ಜಾಲ್ಲೆಂ.... ಹೆಂ ಜೀವನ್ ಎಕ್ಸುರ್ಪಣಾಚೆಂ..... ಪುಣ್ ಸುಟ್ಕೆಚೆಂ ಆನಿಂ ಸ್ವಾತಂತ್ರ್ಯಾಚೆಂ..
ದೀಸ್ ವೆತಾಂ ವೆತಾಂ ಹ್ಯಾ ಜೀವನಾಂತ್ ಆಸ್ಲ್ಲ್ಯಾ ಸಂತೊಸಾಕ್ ಹಾಂವ್ ಆನಿಕೀ ಚಡ್ ರಿತಿನ್ ಆರಾಂವ್ಕ್ ಲಾಗ್ಲಿಂ.
ರೊಬರ್ಟಾಚೆಂ ಕಾಗಾತ್ ಯೆತಾಲೆಂ. ಮ್ಹಹಿನ್ಯಾಕ್ ಎಕ್ ಪಾವ್ಟಿಂ ಹಾಂವ್ ಫೊನ್ ಕರ್ತಾಲಿಂ. ಭುರ್ಗ್ಯಾಂಚೊ ಉಡಾಸ್ ಯೆತಾಲೊ... ಮ್ಹಹಿನ್ಯಾಚ್ಯಾ ಆಖ್ರೇಕ್ ಹಾಂವ್ ರೊಬರ್ಟಾಚ್ಯಾ ನಾಂವಾರ್ ಪಯ್ಶೆ ಧಾಡ್ತಾಲಿಂ.... ಮ್ಹಜ್ಯಾಚ್ಚ್ ಪಯ್ಶಾನಿಂ ತೊ ಘರ್ ಸಾಂಬಾಳ್ತಾಲೊ. ಭುರ್ಗ್ಯಾಂಚೆಂ ಇಸ್ಕಾಲ್ ಚಲ್ತಾಲೆಂ. ಯೆದೊಳ್ ವರೆಗ್ ತಾಚ್ಯಾ ಬೆಂಕಾಂತ್ಲೆ ಪಯ್ಶೆ ಕಾಡ್ಚಿ ಗರ್ಜ್ ತಾಕಾ ಪಡೊಂಕ್ ನಾತ್ಲ್ಲಿ.
ರೊಬರ್ಟ್ ಗಾವಾಕ್ ಗೆಲ್ಯಾ ಉಪ್ರಾಂತ್ ಮ್ಹಜ್ಯಾ ನಾಂವಾರೀ ಗಾಂವ್ಚ್ಯಾ ಬೆಂಕಾಂತ್ ಎಕೌಂಟ್ ಹಾಂವೆಂ ಉಗ್ತೆಂ ಕೆಲ್ಲೆಂ. ತಾಂತು ಪಯ್ಶೆ ಜಮಂವ್ಕ್ ಸುರು ಜಾಲ್ಲೆ.
ರೊಬರ್ಟ್ ಗಾಂವಾಕ್ ವಚೊನ್ ಸ ಮ್ಹಹಿನೆ ಜಾವ್ನ್ ಯೆತಾಲೆ....
ಹ್ಯಾ ದಿಸಾಂನಿ ಮ್ಹಜ್ಯಾ ಜೀವನಾಂತ್ ಎಕ್ ವಿಶೇಸ್ ಗಜಾಲ್ ಘಡೊನ್ ಗೆಲಿ...
ತಿ ಗಜಾಲ್ ಕಸಿ ಘಡ್ಲಿ.... ಮ್ಹಜ್ಯಾ ಸ್ತಿಮಿತಾ ಬಾಯ್ರ್ ತರೀ ತಿ ಘಡೊನ್ ಗೆಲಿ ಮ್ಹಣ್ಯೆತ್...
ತ್ಯಾ ಹಪ್ತ್ಯಾಚ್ಯಾ ಸುಕ್ರಾರಾ ದೀಸ್ ಆಮ್ಚ್ಯಾ ಕಂಪೆನಿಚ್ಯಾ ಕಾಮೆಲ್ಯಾಂ ಖಾತಿರ್ ಪಿಕ್ನಿಕ್ ಆಸಾ ಕೆಲೆಂ, ನಕ್ಕಲ್ ಆನಿಂ ರುಸ್ತಾಕ್ ವೆಚ್ಯಾಕ್. ನಕ್ಕಲ್ - ಕಾಜ್ರಾಚ್ಯಾ ರೂಕಾಂ ಮಧೆಂ ವಾಳ್ಚ್ಯಾ ಉದ್ಕಾ ತಳ್ಯಾಂ ಮಧೆಂ ಭಂವೊನ್ ರುಸ್ತಾಕ್ ಹುನ್ ಉದ್ಕಾಚ್ಯಾ ಬಾಂಯಾಂಕ್ ಪಳವ್ನ್ ಪಾಟಿಂ ಯೆಂವ್ಚೆಂ ಕಾರ್ಯಕ್ರಮ್. ಹಾಂವೆ ಯೆನಾ ಮ್ಹಣ್ ಸಾಂಗ್ಲೆಂ ತರೀ ಕಂಪೆನಿಂತ್ ಆಸ್ಚ್ಯಾ ಇಂಜಿನಿಯರ್ ಉತ್ತಮ್ ಕುಮಾರಾನ್ ಮ್ಹಾಕಾ ವತ್ತಾಯ್ ಕೆಲಿಚ್ಚ್.
ರೊಬರ್ಟ್ ಹಾಂಗಾಸರ್ ಆಸ್ತಾನಾ ಆಮ್ಕಾಂ ಖಂಯ್ಸರೀ ವಚೊಂಕ್ ಮೆಳಾನಾತ್ಲ್ಲೆಂ. ತಾಚೆಂ ಕಾಮ್ಂಚ್ಚ್ ತಶೆಂ ಜಾವ್ನಾಸ್ಲ್ಲೆಂ. ಎಲೆಕ್ಟ್ರೊನಿಕ್ ಶೊಪಾಂತ್ ಕಾಮ್ ಕರ್ತಾಲೊ ಜಾಲ್ಲ್ಯಾನ್ ತಾಕಾ ಹಪ್ತ್ಯಾಂತ್ ಸುಟಿ ಮೆಳ್ಚಿಚ್ಚ್ ಉಣಿಂ ಜಾವ್ನಾಸ್ಲ್ಲಿ. ದಿಸಾಚೆಂ ಕಾಮ್ ಆಖೇರ್ ಜಾಂವ್ಚೆಂಚ್ಚ್ ರಾತಿಕ್ ಇಕ್ರಾ ವೊರಾರ್. ಸುಕ್ರಾರಾ ದೀಸ್ ಸಕಾಳಿಂಚ್ಯಾ ಆದೇಸಾಕ್ ಮಾತ್ರ್ ರಜಾ. ದೊನ್ಪಾರಾಂ ಉಪ್ರಾಂತ್ ಪರತ್ ಕಾಮ್. ಸುಕ್ರಾರಾ ಎಕ್ ದೀಸ್ ರಜಾ ಕಾಡ್ ಮ್ಹಣ್ ಪರಾತ್ತಿಲ್ಯಾರೀ ತೊ ಆಯ್ಕಾನಾತ್ಲ್ಲೊ. ತಾಂಕಾ ಸುಕ್ರಾರಾ ದೀಸ್ಚ್ಚ್ ಚಡ್ ಬಿಸ್ನೆಸ್ ಜಾಂವ್ಚೆ. ತಸೆಂ ಕಾಜಾರ್ ಜಾವ್ನ್ ಪಾಟ್ಲ್ಯಾ ಬಾರಾ ವರ್ಸಾಂನಿ ಆಮಿಂ ಬಾಯ್ರ್ ಭವೊಂಕ್ ಗೆಲ್ಲ್ಯಾಂವ್ ಮ್ಹಳ್ಯಾರ್ ಎಕ್ ಯಾ ದೋನ್ ಪಾವ್ಟಿಂ ಜಾವ್ಯೆತ್.
ಆತಾಂ ಆಫಿಸಾಚ್ಯಾ ಮನ್ಶಾಂ ಸಾಂಗಾತಾ ವೆಚೆಂ ತೆಂ ಬೋವ್ಚ್ಚ್ ಮ್ಹಝೆಚೆಂ ಮ್ಹಣ್ ಮ್ಹಾಕಾ ಕಳಿತ್ ಆಸ್ಲ್ಲೆಂ ತೆಂಯ್ ಉತ್ತಂ ಕುಮಾರಾ ಸವೆಂ ವೆಚೆಂ ಮ್ಹಳ್ಯಾರ್...
ಹಾಂವೆ ಭರಾನ್ ಉಸ್ವಾಸ್ ಸೊಡ್ಲೊ. ಕಿತ್ಯಾಕ್ಗಿ ಕಳಾನಾ ಉತ್ತಮ್ ಕುಮಾರಾ ವಿಶ್ಯಾಂತ್ ಚಿಂತ್ತಾನಾ ಮತಿಂತ್ ಉಮಾಳೆ ಭರೊನ್ ಯೆತಾಲೆ. ತಾಚ್ಯಾ ಥೈಂ ಜಾಂವ್ಚೆಂ ಆಕರ್ಶಣ್ ಮ್ಹಾಕಾ ತಾಚ್ಯಾ ಪಿಶ್ಯಾರ್ ಘಾಲ್ಲೆಂ. ಕಾಜಾರ್ ಜಾಲ್ಲ್ಯಾ ಮ್ಹಜ್ಯಾ ಥೈಂ ಅಶೆಂ ಜಾಂವ್ಕ್ ನ್ಹಜೊ ಆಸ್ಲ್ಲೆಂ ಮ್ಹಣ್ ಹಾಂವ್ ಜಾಣಾ ಆಸ್ಲ್ಲಿಂ ತರೀ ತಸೆಂ ಜಾತಾಲೆಂ. ಹ್ಯಾ ಕುಡಿಚೆರ್... ಹ್ಯಾ ಚಿಂತ್ನಾಂಚೆರ್ ಸ್ತಿಮಿತ್ ನಾತ್ಲ್ಲ್ಯಾ ಬರಿ..
ಉತ್ತಮ್ ಕುಮಾರ್ ಆಮ್ಚ್ಯಾಚ್ಚ್ ಕಂಪೆನಿಂತ್ ಇಂಜಿನಿಯರ್ ಜಾವ್ ಕಾಮ್ ಕರ್ತಾಲೊ. ಗಾವಾಂತ್ ಕಾರ್ಕೊಳ್ಚೊ. ಜಾತಿನ್ ಹಿಂದ್ವಾಚೊ. ಸುರತ್ಕಲ್ ಇಂಜಿನಿಯರಿಂಗ್ ಕೊಲೆಜಿಂತ್ ಸನದ್ ಜೊಡ್ಲ್ಯಾ ನಂತರ್ ಆಮ್ಚ್ಯಾ ಕಂಪೆನಿಂತ್ ಕಾಮಾಕ್ ರಿಗ್ಲ್ಲೊ. ಪಳಂವ್ಕ್ ಬಾರಿಚ್ಚ್ ಆಕರ್ಷಿತ್. ಪ್ರಾಯೆನ್ ಕಾಂಯ್ ಮ್ಹಜ್ಯಾ ತಿತ್ಲೊಚ್ಚ್ ಜಾಂವ್ಕ್ ಆಸಾ ಕೊಣ್ಣಾ... ಆಪ್ಲ್ಯಾ ಕಾಳ್ಯಾ ಕೇಸಾಂಕ್ ಕ್ರೀಂ ಘಾಲ್ನ್ ಬರೆಂ ವಸ್ತುರ್ ನೆಸಾತ್ ತರ್ ಇತ್ಲೊ ಬರೊ ದಿಸ್ತಾಲೊ ಕೀ ಖಂಚಿ ಚಲಿ ತರೀ ಎಕ್ ಪಾವ್ಟಿಂಚ್ಯಾಕ್ ತಾಚೆರ್ ಭುಲ್ಚಿಂ ತೆಂ ಖಂಡಿತ್. ತೊ ಕಾಮಾಂತ್ ಭಾರಿಚ್ಚ್ ಹುಶಾರ್. ಉಲವ್ಣ್ಯಾಂತ್ ಭಾರಿಚ್ಚ್ ನಾಜೂಕ್.... ಕಂಪೆನಿಂತ್ ಹರ್ಯೆಕ್ಲೆ ತಾಕಾ ಮಾಂದ್ತಾಲೆ. ವೆಗಿಂಚ್ಚ್ ತೊ ಮೆನೆಜರ್ ಜಾಂವ್ಚ್ಯಾರ್ ಆಸ್ಲ್ಲೊ.
ಆರ್ವಿಲ್ಲ್ಯಾ ದಿಸಾಂನಿ ತಾಣೆಂ ಮ್ಹಜ್ಯಾ ಥೈಂ ಚಡ್ ಆಕರ್ಶಣ್ ದಾಖಯಿಲ್ಲೆಂ. ಗರ್ಜೆನ್ ಯಾ ಗರ್ಜೆ ಬಾಯ್ರ್ ತೊ ಮ್ಹಜ್ಯಾ ಸರ್ಶಿನ್ ಯೆತಾನಾ ಮ್ಹಾಕಾಯ್ ಎಕಾ ರಿತಿಚೊ ಸಂತೊಸ್ ಜಾತಾಲೊ. ಜಾಯ್ ಜಾಯ್ ಮ್ಹಣ್ ಮ್ಹಜ್ಯಾ ಜೀವಾಕ್ ಲಾಗೊನ್ ಉಭೊ ರಾವ್ತಾನಾ ಜೀವಾಂತ್ ಉಮಾಳ್ಯಾಂಚಿ ಜ್ವಾಲಾಮುಖಿ ಫುಟ್ತಾಲಿ. ಭಗ್ಣಾಂಕ್ ಉಂಚಾಂಬಳಾಯ್ ಯೆತಾಲಿ.
ಹಾಂವ್ಂಯ್ ಚಿಂತ್ತಾಲಿಂ - ಮೊಗಾಚೆಂ ಆಕರ್ಶಣ್ ಮ್ಹಳ್ಯಾರ್ ಹೆಂಚ್ಚ್ಗೀ?. ಮತಿಂತ್ ಭಗ್ಚ್ಯಾ ಉಚಾಂಬಳಿ ಆಕರ್ಶಣಾಕ್ ಮೋಗ್ ಮ್ಹಣ್ಚೆಂಗಿ? ಮ್ಹಳ್ಯಾರ್ ಹಾಂವ್ ಉತ್ತಮ್ ಕುಮಾರಾಚ್ಯಾ ಮೊಗಾರ್ ಪಡ್ಲ್ಯಾಂಗೀ?
ಸುಕ್ರಾರಾ ದೀಸ್ ಸಕಾಳಿಂ ಆಮಿಂ ನಕ್ಕಲ್ ಆನಿಂ ರುಸ್ತಾಕ್ ಬಾಯ್ರ್ ಸರ್ಲ್ಯಾಂವ್. ಬಸ್ಸ್ ಕೆಲ್ಲೆಂ ಜಾಲ್ಲ್ಯಾನ್ ಸರ್ವ್ ಸಾಂಗಾತಾಚ್ಚ್ ಬಸ್ಲ್ಲೆ. ಬರ್ಕಾ ಉತ್ರೊನ್ ಮುಕಾರ್ ವೆತಾನಾ ನಕ್ಕಲ್ ವೆಚ್ಯಾ ವಾಟೆರ್ ಗುಡ್ಯಾ ವಾಟೆರ್ ಬಸ್ಸ್ ವೆತಾನಾ ತೆಂ ಎಕ್ ನವೊಚ್ಚ್ ಆನುಭವ್ ಜಾವ್ನಾಸ್ಲ್ಲೊ. ನಕ್ಕಲ್ ಕಾಜ್ರಾ ರುಕಾ ಮುಳಾಂಚ್ಯಾ ಥಂಡ್ ಸಾವ್ಳೆಂತ್ ಬಸೊನ್ ಜೆವಾಣ್ ತಿರ್ಸಿತಾನಾ ಗಾಂವ್ಚ್ಯಾ ಥಂಡ್ ವಾರ್ಯಾಚೊ ಉಡಾಸ್ ಆಯ್ಲೊ. ನಕ್ಕಲ್ ಉದ್ಕಾ ಝರಿಚ್ಯಾ ವ್ಹಾಳ್ಯಾಂತ್ ಹಾತ್ ಪಾಂಯ್ ಧುತಾನಾ ಗಾಂವಾಂತ್ ತಳ್ಯಾಂತ್ ಹಾತ್ ಪಾಂಯ್ ಧುಲ್ಲ್ಯಾಬರಿ ಜಾಲೆಂ. ಉಪ್ರಾಂತ್ ರುಸ್ತಾಕ್ ಪಾವ್ತಾನಾ ದೊನ್ಪಾರ್ ಉತ್ರಾಲ್ಲೊ. ರುಸ್ತಾಕ್ ಹುನ್ ಉದ್ಕಾಚ್ಯಾ ಬುಳ್ಬುಳ್ಯಾಂಚ್ಯಾ ಬಾಂಯಾಂ ಥಾವ್ನ್ ವ್ಹಾಳ್ಚ್ಯಾ ಉದ್ಕಾಂತ್ ಹಾತ್ ಪಾಂಯ್ ಮಾರ್ನ್ ಸಾಂಜ್ ಜಾತಾನಾ ಆಮಿಂ ಪಾತಿಂ ಬಾಯ್ರ್ ಸರ್ಲ್ಯಾಂವ್.
ಉತ್ತಮ್ ಕುಮಾರ್ ಆಖ್ಖೊ ದೀಸ್ ಮ್ಹಜ್ಯಾ ಸರ್ಸಿನ್ಂಚ್ಚ್ ಬಸೊನ್ ಆಸ್ಲ್ಲೊ. ಮ್ಹಾಕಾ ಕಿತ್ಯಾಂತೀ ಉಣೆಂಪಣ್ ಯಾ ಉಬ್ಘೊಣ್ ಜಾಯ್ನಾತ್ಲ್ಲ್ಯಾ ಬರಿ ತಾಣೆಂ ಬರಿಚ್ಚ್ ಜಾಗ್ರುತ್ಕಾಯ್ ಘೆತ್ಲಿ. ಕಿತೆಂ ತರೀ ತೊ ಉಲಯ್ತಾಲೊ ಆನಿ ಮ್ಹಾಕಾ ಹಾಸಯ್ತಾಲೊ....
ತೊ ದಿಸಾಚೆಂ ಪಯ್ಣ್ ಮ್ಹಾಕಾ ಏಕ್ ವಿಶೇಸ್ ಆನುಭವ್ ದಿಂವ್ಕ್ ಲಾಗ್ಲೆಂ. ಯೆದೊಳ್ ಕೆದ್ನಾಂಯ್ ಮ್ಹಜ್ಯಾ ಜೀವನಾಂತ್ ಹಾಂವೆ ಭಗುಂಕ್ ನಾತ್ಲ್ಲೊ ವಿಶೇಸ್ ಆನುಭವ್... ಕಸಲ್ಯಾಗೀ ವಿಚಿತ್ರ್ ಪುಣ್ ನೀಜ್ ಭಗ್ಣಾಂಚ್ಯಾ ಉದ್ರೇಕ್ಪಣಾಚೊ...
ರೊಬರ್ಟ್ ಮ್ಹಜ್ಯಾಲಾಗಿಂ ಆಸ್ತಾನಾ ಮ್ಹಾಕಾ ಕೆದ್ನಾಂಯೀ ಭಗಾನಾತ್ಲ್ಲ್ಯಾ ತ್ಯಾ ಉಂಚಾಂಬಳೀ ಚಿಂತ್ನಾಚೊ...
ಉತ್ತಮ್ ಕುಮಾರ್ ಮ್ಹಜ್ಯಾಲಾಗಿಂ ಆಸೊನ್ ಹರ್ಯೆಕ್ ಪಾವ್ಟಿಂ ತೊ ಮ್ಹಜ್ಯಾ ಆಂಗಾಕ್ ಲಾಗ್ತಾನಾ ಮ್ಹಜ್ಯಾ ಜೀವಾಂತ್ ಭಗ್ಲ್ಲ್ಯಾ ನಾನಾಂತ್ಯಾ ಉನ್ಮಾದಾಕ್ ಖಾಡುಂ ಘಾಲುಂಕ್ ಮ್ಹಾಕಾ ಸಾದ್ಯ್ ಜಾಲ್ಲೆಂ ನಾ.
ರೊಬರ್ಟ್ ಮ್ಹಜ್ಯಾ ಲಾಗಿಂ ಆಸ್ಚ್ಯಾಕ್ ಆನಿಂ ಹ್ಯಾ ವಗ್ತಾಂ ಉತ್ತಮ್ ಕುಮಾರ್ ಮ್ಹಜ್ಯಾಲಾಗಿಂ ಆಸ್ಚ್ಯಾಕ್ ಮೊಸ್ತು ಫರಕ್ ಆಸ್ಲ್ಲೆಂ. ರೊಬರ್ಟಾಕ್ ಆನಿಂ ಮ್ಹಾಕಾ ಅಸ್ಲ್ಲ್ಯಾ ಪ್ರಾಯೆಚ್ಯಾ ಆಂತರಾ ವರ್ವಿಂ ತಸೆಂ ಜಾಲ್ಲೆಂಗಿ ಹಾಂವ್ ನೆಣಾಂ.... ಪುಣ್ ಉತ್ತಮ್ ಕುಮಾರಾಕ್ ಆನಿ ಮ್ಹಾಕಾ ಪ್ರಾಯೆನ್ ಚಡ್ ಫರಕ್ ನಾತ್ಲ್ಲೆಂ.
ತ್ಯಾ ರಾತಿಂ ತಡವ್ ಕರ್ನ್ ಆಮಿಂ ಘರಾ ಆಯ್ಲ್ಯಾಂವ್.
ಘರಾ ಆಯ್ಲಿಂ ತರೀ ಉತ್ತಮ್ ಕುಮಾರಾ ವಿಶ್ಯಾಂತ್ ಚಿಂತ್ಚೆಂ ಹಾಂವೆ ರಾವಯ್ಲೆಂ ನಾ. ಕಾಳ್ಜಾಂತ್ ಭಗುನ್ ಆಸ್ಲ್ಲ್ಯಾ ಉಮಾಳ್ಯಾಂಕ್ ಧಾಂಬುನ್ ಧರುಂಕ್ ಮ್ಹಾಕಾ ಸಾದ್ಯ್ ಜಾಲೆಂ ನಾ.
ದೀಸ್ ಉಭೊಂಕ್ ಲಾಗ್ಲೆ....
ಹರ್ಯೆಕ್ ದೀಸ್ ಪಾಶಾರ್ ಜಾತಾಂ ಮ್ಹಜ್ಯಾ ಹೆಳ್ಕೆ ಬಾಯ್ರ್ ಹಾಂವ್ ಉತ್ತಮ್ ಕುಮಾರಾಚ್ಯಾ ಕುಶಿನ್ ವೊಂದ್ವೊನ್ ವೆತಾಲಿಂ. ದೀಸಾಚೆಂ ತಾಕಾ ಪಳಯ್ನಾ ತರ್ ಮತ್ ಪಿಶಿ ಜಾತಾಲಿ. ರಾತಿಂಚೆಂ ತಾಕಾ ಚಿಂತಿನಾ ತರ್ ಮನ್ ದೆದೆಸ್ಪಾರ್ ಜಾತಾಲೆಂ....
ತೊಯ್ ಮ್ಹಜ್ಯಾ ಚಿಂತ್ನಾಕ್ ವಳ್ಕಾಲ್ಲೊ ಜಾಯ್ಜಯ್ ಆನಿಂ ತೊಯೀ ಮ್ಹಜ್ಯಾಲಾಗಿಂ ಯೆತಾಲೊ. ಮ್ಹಜ್ಯಾ ಭಗ್ಣಾಂಕ್ ತೊ ಊಬ್ ದಿತಾಲೊ. ಹಾಂವ್ ಕಾಜಾರಿ ಮ್ಹಣ್ ತಾಕಾ ಕಳಿತ್ ಆಸ್ಲ್ಲೆಂ ತರಿ ತಾಕಾ ತಾಚಿ ಗುಮಾನ್ ನಾತ್ಲ್ಲೆಂ.
ರೊಬರ್ಟ್ ಆನಿಂ ಭುರ್ಗಿಂ ಗಾಂವಾಕ್ ವಚೊನ್ ಎಕ್ ವರ್ಸ್ ಜಾತಾಲೆಂ. ಹಾಂವೆ ಗಾಂವಾಕ್ ಯೇಜಯ್ ಮ್ಹಣ್ ಪರತ್ ಪರತ್ ಆಪಯ್ತಾಲೊಂ ತರೀ ಹಾಂವೆ ಯೆಂವ್ಕ್ ಜಾಯ್ನಾ ಮ್ಹಣ್ ತಿಳ್ಸಿಲ್ಲೆಂ. ಭುರ್ಗಿಂ ಮ್ಹಾಕಾ ಪಳಂವ್ಕ್ ಆಶೆತಾಲಿಂ ತರೀ ಹಾಂವೆ ಗಾವಾಕ್ ವೆಚೆಂ ಮನ್ ಕೆಲೆಂ ನಾ. ತಾಂಕಾ ಪಯ್ಶೆ ಧಾಡ್ಚೆ ಮಾತ್ರ್ ಹಾಂವೆ ರಾವಯ್ಲೆಂನಾ..
ಹಾಕಾ ಪುರಾ ಎಕ್ಚ್ಚ್ ಕಾರಣ್ ... ಉತ್ತಮ್ ಕುಮಾರ್ ಮ್ಹಜ್ಯಾ ಜೀವನಾಂತ್ ಆಯಿಲ್ಲೊ. ಹಾಂವ್ ತಾಚ್ಯಾ ಜೀವನಾಂತ್ ಜಿಯೆತಾಲಿಂ. ಹಾಂವ್ ಆತಾಂ ತಾಚ್ಯಾ ಖಾತಿರ್ಚ್ಚ್ ಜಿಯೆತಾಲಿಂ...
ಈದಿಚಿ ರಜಾ ಆಯಿಲ್ಲಿ. ಕಂಪೆನಿಕ್ ತೀನ್ ದೀಸಾಂಚಿ ರಜಾ ಆಸ್ಲ್ಲಿ. ಉತ್ತಮ್ ಕುಮಾರ್ ಮ್ಹಜ್ಯಾಲಾಗಿಂ ಯೇವ್ನ್ ಮ್ಹಣಾಲೊ - "ತೀನ್ ದೀಸಾಂಚ್ಯಾ ರಜೆಂತ್ ಆಮಿಂ ವಹಿಬಾ ಸಾಂಡ್ಸಾಕ್ ಯಾ.... ಥೈಂಸರ್, ರೆಂವೆಂಚ್ಯಾ ಎಕ್ಸುರ್ಯಾ ಜಾಗ್ಯಾರ್ ಹಾಂವ್ ಆನಿಂ ತುಂಚ್ಚ್ ಆಸ್ತೆಲ್ಯಾಂವ್...."
ತಾಣೆಂ ಉಚಾರ್ಲ್ಲಿ ಆಲೋಚನ್ ಬರಿಚ್ಚ್ ದಿಸ್ಲಿ..... ತಾಚ್ಯಾ ಸಾಂಗಾತಾ ಎಕ್ಸುರ್ಪಣಾಂತ್ ಜಿಯೆಂವ್ಕ್ ಜಾಯ್ ತರ್ ಹಾಚ್ಯಾಕೀ ಬರೊ ಆವ್ಕಾಸ್ ದುಸ್ರೊ ಮೆಳ್ಚೊನಾ.... ಆನಿಂ ತಾಚ್ಯಾ ಸಾಂಗಾತಾ ವೆಚ್ಯಾಕ್ ಹಾಂವ್ ಒಪ್ವಾಲಿಂ.
ವಹಿಬಾ ಸಾಂಡ್ಸ್ ವೆಚ್ಯಾ ಖಾತಿರ್ ವ್ಹಡ್ ಜೀಪ್ ತಾಣೆಂ ಭಾಡ್ಯಾಕ್ ಘೆತ್ಲ್ಲೆಂ. ಪ್ರವಾಸಿ ಸಂಸ್ಥ್ಯಾಚಿಂ ಹೆರ್ ಜೀಪಾಂ ಆಸ್ಲ್ಲಿಂ.
ದೊನ್ಪಾರ್ ಉತ್ರೊನ್ ವೆತಾನಾ ಆಮಿಂ ವಹಿಬಾ ಸಾಂಡ್ಸ್ ಪಾವ್ಲ್ಯಾಂವ್. ವಿಶಾಲ್ ಏಕಾಂತ್ ಜಾಗೊ. ಮಯ್ಲಾಂ ಮಯ್ಲಾಂ ರೆಂವ್ಂಚ್ಚ್ ರೇಂವ್. ರೆಂವೆಂಚ್ಯಾ ಉಭಾರ್ ತಗ್ವಟ್ ದೊಂಗ್ರಾಂಚೆರ್ ಸುರ್ಯಾಚಿಂ ಕಿರ್ಣಾಂ ಪಡ್ತಾನಾ, ಬಾಂಗಾರಾಚಿ ರಾಸ್ ಪಾಚಾರೊನ್ ಆಸ್ಲ್ಲ್ಯಾ ಬರಿ ದಿಸ್ತಾಲೆಂ. ಹೆಣೆಂ ತೆಣೆಂ ಝಾಡಾಂ ಮೊಲಿಂ ಆಸ್ಲ್ಲಿಂ. ತ್ಯಾ ಝಾಡಾಂಚೊ ಪಾಲೊ ಖಾಂವ್ಚ್ಯಾ ಆಶೆನ್ಂಗೀ ಕೋಣ್ ಜಾಣಾ ಥೊಡಿ ಕರಿಂ ಹೆಣೆ ತೆಣೆ ಚಲೊನ್ ಆಸ್ಲ್ಲಿಂ.
ಎಕಾಚ್ಚ್ ವಿಸ್ತಾರ್ ಜಾಗ್ಯಾರ್ ಸಬಾರ್ ಟೆಂಟಾಂ ಘಾಲ್ಲಿಂ.
ಮಧೆಂ ಎಕಾ ಜಾಗ್ಯಾರ್ ಆಯಿಲ್ಲ್ಯಾ ಸರ್ವಾಂಕ್ ಜೆವ್ಣಾಕ್ ಸವ್ಲತಾ ಕೆಲ್ಲಿ.
ರಾತಿಚೆಂ ಜೆವಾಣ್ ಮ್ಹಝೆಚೆಂ ಜಾವ್ನಾಸ್ಲ್ಲೆಂ. ಆಯಿಲ್ಲೊ ಲೋಕ್ ಹಾಸೊನ್ ಖೆಳೊನ್ ರಾತ್ ಪಾಶಾರ್ ಕರುಂಕ್ ಲಾಗ್ಲೊ. ಮದ್ಯಾನ್ ಉತ್ರೊನ್ ಯೆತಾನಾ ಸರ್ವಾಂಕ್ ಪುರಾಸಣ್ ಜಾವ್ನ್ ಆಯ್ಲಿ ಜಾಯ್ಜಯ್ ಆನಿ ಸರ್ವಾಂನಿ ನಿದ್ಚಿ ತಯಾರಾಯ್ ಕೆಲಿ.
ಹಾಂವ್ ಆನಿಂ ಉತ್ತಮ್ ಕುಮಾರ್ ಆಮ್ಚ್ಯಾ ಟೆಂಟಾಂ ಸರ್ಶಿನ್ ಚಲೊನ್ ಆಯ್ಲ್ಯಾಂವ್..
ಟೆಂಟಾಚ್ಯಾ ಲಾಗಿಂ ಪಾವ್ತಾನಾ ಎಕಾಚ್ಚ್ಫರಾ ತಾಣೆಂ ಮ್ಹಾಕಾ ಆರಾವ್ನ್ ಧರ್ಲೆಂ ಆನಿಂ ತಾಚ್ಯಾ ವೆಂಗೆಂತ್ ದಾಂಭುನ್ ಧರ್ಲೆಂ.
ಹಾಂವ್ ಉರ್ಡಾಲಿಂನಾ... ಕಾಳಿಜ್ ದಡ್ದಡ್ತಾಲೆಂ ತರೀ ಹಾಂವ್ ವೊಗೆಚ್ಚ್ ರಾವ್ಲಿಂ...
ತಾಚ್ಯಾ ಬಳಾಚ್ಯಾ ವೆಂಗೆಂತ್ ಹಾಂವ್ ಚಿರ್ಡಾಲಿಂ ತರೀ ಮ್ಹಾಕಾ ಉಬ್ದೆಸ್ ಭಗ್ಲೆನಾಂತ್...
ಹ್ಯಾಚ್ಚ್ ಘಡಿಯೆಕ್ ಹಾಂವ್ ಕೆದಾಳಾ ಥಾವ್ನ್ ರಾಕೊನ್ ರಾವ್ಲ್ಲಿಂ. ಹ್ಯಾಚ್ಚ್ ವೆಂಗೆಖಾತಿರ್ ಹಾಂವ್ ಇತ್ಲ್ಯಾ ಪಯ್ಸ್ ಆಯಿಲ್ಲಿಂ...
ತಾಣೆಂ ಮ್ಹಾಕಾ ಭಳಾನ್ ಧರ್ನ್ ಉಕಲ್ಲೆಂ ಆನಿಂ ಟೆಂಟಾ ಭಿತರ್ ವ್ಹೆಲೆಂ.
ಟೆಂಟಾ ಭಿತರ್ ಕಾಳೊಕ್ ಭರೊನ್ ಗೆಲ್ಲೊ ಮ್ಹಣ್ಯೆತ್. ಪೊಂತಾರ್ ಜಳ್ಚೊ ತೆಲಾಚೊ ದಿವೊ ಮಂದ್ ಉಜ್ವಾಡ್ ಪಾಚಾರ್ತಾಲೊ ತರೀ ಆಮ್ಚ್ಯಾ ಕುಸಿನ್ ಉಜ್ವಾಡಾಚಿ ಝಳಕ್ ಸಯ್ತ್ ನಾತ್ಲ್ಲಿ.
ತಾಣೆಂ ಮ್ಹಜ್ಯಾ ತೊಂಡಾಕ್ ತಾಚ್ಯಾ ದೋನಿ ಹಾತಿಂ ಧರ್ಲೆಂ ಆನಿಂ ಮೊಗಾನ್ ತಾಚ್ಯಾ ತೊಂಡಾ ಕುಸಿನ್ ವೆಲೆಂ....
ಆನಿಂ ತ್ಯಾ ರಾತಿಂ....
ಹಾಂವೆ ಕಿತೆಂಚ್ಚ್ ಪಾಟಿಂ ಫುಡೆಂ ಪಳಯ್ಲೆಂ ನಾ. ಮ್ಹಜ್ಯಾ ಹುನ್ ಜೀವಾಕ್ ಉತ್ತಮ್ ಕುಮಾರಾಚ್ಯಾ ತರ್ನ್ಯಾ ಜೀವಾಚಿ ಥಂಡಾಯ್ ಜಾಯ್ ಆಸ್ಲ್ಲಿ...
ಹಾಂ..... ಹಾಂವೆ ಮ್ಹಜೆಂ ಸರ್ವಸ್ವ್ ಉತ್ತಮ್ ಕುಮಾರಾಕ್ ಒಪ್ಸಿಲೆಂ. ಆನಿಂ ಹಾಂವ್ ತಾಚಿಂ ಜಾಲಿಂ.....
***************
ಜೀವನ್ ಮುಂದರ್ಸುನ್ ಯೆತಾಲೆಂ......
ಉತ್ತಮ್ ಕುಮಾರಾಕ್ ಹಾಂವೆ ಸರ್ವಸ್ವ್ ದಿಲ್ಲೆಂ ತರ್ ತಾಣೆ ಮ್ಹಾಕಾ ಸುಖಾಚೆಂ ಭಂಡಾರ್ ದಿಲ್ಲೆಂ...
ರೊಬರ್ಟಾನ್ ಬಾರಾ ವರ್ಸಾಂನಿ ದಿಲ್ಲ್ಯಾ ಸುಖಾವರ್ನಿಂ ಹಜಾರ್ ವಾಂಟ್ಯಾನಿಂ ಚಡ್ ಮಾಪಾನ್ ಉತ್ತಮ್ ಕುಮಾರಾನ್ ಮ್ಹಾಕಾ ಸುಖ್ ದಿಲ್ಲೆಂ. ಮ್ಹಾತಾರೊ ಜಾಲ್ಲ್ಯಾ ರೊಬರ್ಟ್ ಆಪ್ಲ್ಯಾ ಪತಿಣೆಕ್ ಸುಖ್ ದಿಂವ್ಚೆಂ ಕಸೆಂ ಮ್ಹಣ್ ಕಿತೆಂ ಜಾಣಾ?
ಎಕ್ ದೀಸ್ ಸಕಾಳಿಂ ಉತ್ತಮ್ ಕುಮಾರ್ ಮ್ಹಜ್ಯಾ ಸರ್ಸಿನ್ ಆಯ್ಲೊ.....
ಹರ್ಶೆಂಚ್ಯಾ ಬರಿ ತೊ ಆಜ್ ಖುಶಾಲಿ.....
ಹಾಂವೆ ಕಿತೆಂಚ್ಚ್
ತಾಣೆಂ ಉಲಂವ್ಚ್ಯಾ ಉತ್ರಾಂಚೊ ಆರ್ಥ್ ಮ್ಹಾಕಾ ಸಮ್ಜಲೊನಾ... ಹಾಂವೆ ತಾಚ್ಯಾಚ್ಚ್ ತೊಂಡಾಕ್ ಪಳಯ್ಲೆಂ ಆನಿಂ ವಿಚಾರ್ಲೆಂ - "ಕೋಣ್ ಆನಿತಾ?"
ಉತ್ತಮ್ ಕುಮಾರ್ ಎಕ್ ಪಾವ್ಟಿಂ ಲಾಂಬ್ ಸ್ವಾಸ್ ಸೊಡಿಲಾಗ್ಲೊ. "ಆನಿತಾ ಮ್ಹಜಿ ಹೊಕಾಲ್... ಆಜ್ ತೆಂ ಗಾಂವಾ ಥಾವ್ನ್ ಮಸ್ಕತ್ ಯೆತಾ..."
ತಿಂ ಉತ್ರಾಂ ಘಡ್ಗಡ್ಯಾಚ್ಯಾ ಭಿರಾಂಕುಳ್ ಆವಾಜಾಬರಿ ಮ್ಹಜ್ಯಾ ಕಾನಾಂನಿ ಪಡ್ಲಿಂ.....
ಮ್ಹಜ್ಯಾ ಮತಿ ಗೊಪಾಂತ್ ಹಜಾರ್ ಜ್ವಾಲಾಮುಖಿ ಪುಟ್ಲ್ಲ್ಯಾಬರಿ ಜಾಲ್ಯೊ........
ಕಿತೆಂ ಉಲಂವ್ಚೆಂ ಮ್ಹಣ್ ಕಳೊಂಕ್ ನಾ ತರಿ ಗಾಗೆವ್ನ್ ಹಾಂವೆ ವಿಚಾರ್ಲೆಂ - "ತುಕಾ ಕಾಜಾರ್ ಜಾಲಾಂ ಉತ್ತಮ್?"
ತೊ ಆಮೃಕೊ ಹಾಸೊ ಹಾಸ್ಲೊ... ತಾಚ್ಯಾ ತೊಂಡಾರ್ ಕಾಂಯ್ ಬದ್ಲಾವಣ್ ಜಾಲಿ ನಾ....ತಾಚ್ಯಾ ಭಗ್ಣಾಂನಿ ಮಿರ್ಮಿರೊ ನಾತ್ಲ್ಲೊ....
"ಹಾಂ... ಮ್ಹಜೆಂ ಕಾಜಾರ್ ಆನಿತಾಲಾಗಿಂ ದೋನ್ ವರ್ಸಾಂ ಪಯ್ಲೆಂ ಜಾಲ್ಲೆಂ... ತೆಂಯ್ ತುಜ್ಯಾ ಬರಿಚ್ಚ್ ಸೊಬಿತ್ ಚಲಿ...... ಆನಿ... ಕ್ರಿಸ್ತಾಂವ್.. ಆಮಿಂ ಮೊಗಾರ್ ಪಡೊನ್ ಕಾಜಾರ್ ಜಾಲ್ಲ್ಯಾಂವ್.... ಆತಾಂ ತಾಕಾ ಹಾಂಗಾಸರ್ ಹಾಡಯ್ಜಾಯ್ ಮ್ಹಣ್ ಚಿಂತುನ್ ...."
ತಾಚಿಂ ಮುಖ್ಲಿಂ ಉತ್ರಾಂ ಹಾಂವೆ ಆಯ್ಕಾಲಿಂ ನಾಂತ್..... ಆಯ್ಕೊಂಚೆಂ ಮನ್ಂಯೀ ಮ್ಹಾಕಾ ನಾತ್ಲ್ಲೆಂ....
ಮ್ಹಜೆಂ ಎಕ್ ಸ್ವಪಾಣ್ ಪುಟ್ಲ್ಲೆಂ....
ಖಂಚಾಗೀ ಆನಿಶ್ಚಿತ್ ಘಡಿಯೆ ಹಾಂವೆ ಕೆಲ್ಲೊ ಮೋಗ್ ಪುಟೊನ್ ಗೆಲ್ಲೊ.... ಹಾಂವೆ ಕರುಂಕ್ ನ್ಹಜೊ ಆಸ್ಲ್ಲೊ ಮೋಗ್.... ಮಾಕಾ ಫಾವೊ ನ್ಹಂಯ್ ಆಸ್ಲ್ಲ್ಯಾ ಚಲ್ಯಾಲಾಗಿಂ....
ಚಿಂತ್ನಾ ಭೆಸಾಂ ಜಾಲ್ಲಿಂ...
ಮ್ಹಜೆಂ ಕಾಳಿಜ್ ಶಿಂದುನ್ ವೆತಾಲೆಂ....
ಜಿಯೆಂವ್ಕ್ ನ್ಹಜೊ ಜಾಲ್ಲ್ಯಾ ಜೀವನಾಂತ್ ಹಾಂವ್ ಜಿಯೆಲ್ಲಿಂ ಆನಿಂ ತೆಂ ಜೀವನ್ ಆಖೇರ್ ಜಾಲ್ಲೆಂ ತೆಂಯೀ ಮ್ಹಾಕಾ ಕಳ್ಳೆಂ...
ಮ್ಹಜ್ಯಾ ಬಸ್ಕೆ ವಯ್ಲೆಂ ಉಟೊನ್ ಹಾಂವ್ ಆಫಿಸಾ ಥಾವ್ನ್ ಭಾಯ್ರ್ ಧಾವೊಂಕ್ ಲಾಗ್ಲಿಂ....
ತ್ಯಾ ವೆಳಾರ್ ರೊಬರ್ಟಾಚೊ ಆನಿಂ ಭುರ್ಗ್ಯಾಂಚೊ ಉಡಾಸ್ ಮಾತ್ರ್ ಮ್ಹಜ್ಯಾ ಮತಿ ಗೊಪಾಂತ್ ಜೀವ್ ಜಾಯ್ನಾಸ್ತಾನಾ ರಾವ್ಲೊ ನಾ.......
***************
* ರಿಲೀಜ್ ಪತ್ರ್ - ಗಲ್ಫಾಂತ್ (ಚಡ್ ಜಾವ್ನ್ ಮಸ್ಕತಾಂತ್) ಎಕ್ ಕಂಪ್ಣೆ ಥಾವ್ನ್ ದುಸ್ರ್ಯಾ ಕಂಪ್ಣೆಂತ್ ಕಾಮ್ ಕರಿಜಯ್ ತರ್ ಆಧ್ಲ್ಯಾ ಕಂಪ್ಣೆನ್ ದುಸ್ರ್ಯಾ ಕಂಪ್ಣೆಕ್ ದಿಂವ್ಚೆಂ ಸುಟ್ಕೆ ಪತ್ರ್. ಹೆಂ ಪತ್ರ್ ಮೆಳಾನಾ ತರ್ ದೋನ್ ವರ್ಸಾಂಚ್ಯಾ ಆವ್ದೆಕ್ ದುಸ್ರ್ಯಾ ಕಂಪ್ಣೆಂತ್ ಕಾಮ್ ಕರುಂಕ್ ಸಾಧ್ಯ್ ನಾ. ಗಾಂವಾಕ್ ಗೆಲ್ಯಾರೀ ದೋನ್ ವರ್ಸಾಂ (ಥೊಡೆಕಡೆ ಸ ಮಯ್ನೆ) ನಂತರ್ಚ್ಚ್ ಯೆಂವ್ಕ್ ಜಾತಾ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
