ವಿಶೇಸ್ ಲೇಖನ್:
ಮಾನೆಸ್ತ್ ರಾಯ್ಮಂದ್ ಮಿರಾಂದ್, ಲೇಖಕ್, ಸಂಪಾದಕ್, ಪ್ರಗಟ್ಣಾರ್
ರಾಯ್ಮಂದ್ ಮಿರಾಂದ್ 1931-2009
ಏಕ್ ಶ್ರದ್ದಾಂಜಲಿ
[ 75 ವ್ಯಾ ಜಲ್ಮಾ ದಿಸಾಚಿ ಕೇಕ್ ಖಾತರ್ತಾನಾ ]
ಪನ್ನಾಸ್ ಆನಿ ಸಾಟಾವ್ಯಾ ದಶಕಾಂಚಾ ಆವ್ದೆಂತ್ ಕೊಂಕಣಿ ಸಾಹಿತ್ಯಾಖಾತಿರ್ ವಾವರ್ಲ್ಲೊ ಮಾನೆಸ್ತ್ ರಾಯ್ಮಂದ್ ಲುವಿಸ್ ಮಿರಾಂದ್ ಆಪ್ಲ್ಯಾ 77 ವರ್ಸಾಂ ಪ್ರಾಯೆರ್ ಫೆಬ್ರೆರಿಚಾ ಪಯ್ಲ್ಯಾ ತಾರಿಕೆರ್ ಆಯ್ತಾರಾ ದನ್ಪಾರಾಂ (ಥಂಯ್ಚಾ) ತೀನ್ ವರಾಂಚೆರ್ ಶಿಕಾಗೊ, ಇಲ್ಲಿನೊಯ್, ಯು.ಎಸ್.ಎ ಹಾಂಗಾಸರ್ ಕಾಳಿಜ್ ರಾವೊನ್ ದೆವಾಧಿನ್ ಜಾಲೊ.
1931ತ್ ಪಕ್ಷಿಕೆರೆಂತ್ ಜನ್ಮನ್ ಕಿನ್ನಿಗೋಳಿ ಬಾಪ್ತಿಜ್ಮ್ ಘೆತ್ಲ್ಲ್ಯಾ ರಾಯ್ಮಂದಾನ್ ಆಪ್ಲೆಂ ಎಲಿಮೆಂಟರಿ ಶಿಕಾಪ್ ಪೆಜಾರ್ ಇಗರ್ಜಿ ಇಸ್ಕೊಲಾಂತ್ ಕರ್ನ್, ಉಪ್ರಾಂತ್ ಸಾಂ ಲುವಿಸ್ ಕೊಲೆಜ್ ಹಾಯ್ಸ್ಕೊಲ್ ಆನಿ ಕೊಲೆಜ್ ಕರ್ನ್ ಬಿ.ಕೊಮ್ ಪದವಿ ಜೊಡ್ಲಿ, ಆನಿ ಪೊಸ್ಟ್ಸ್ ಎಂಡ್ ಟೆಲಿಗ್ರಾಫ್ ಡಿಪಾರ್ಟ್ಮೆಂಟಾಂತ್ ಕಾಮಾಕ್ ರಿಗೊನ್ ಥೊಡೇ ತೆಂಪ್ ಬಜ್ಪ್ಯಾಂ ಆನಿ ಉಪ್ರಾಂತ್ ಮಂಗ್ಳುರಾಂತ್ ವಾವ್ರ್ ಕೆಲೊ.
ತವಳ್ ತಾಣೆ ಹಿಂದಿ "ವಿಶಾರದ್" ಸನದ್ಯಿ ಆಪ್ಣಾಯಿಲ್ಲಿ. ತಾಚಿ ಸಾಹಿತಿಕ್ ಅಭಿರುಚಿ ವಾಡ್ಲ್ಲಿಯಿ ತ್ಯಾಚ್ ವೆಳಾರ್, ಆನಿ ತಾಣೆ ಮೊ|ಶಿಲಾ ಮಿನೆಜಾಚಾ ಸಂಪಾದಕ್ಪಣಾಚೆರ್ ಚಲ್ಚ್ಯಾ ’ರಾಕ್ಣೊ’ ಪತ್ರಾರ್ ಹರ್ ಹಪ್ತ್ಯಾಂತ್ ಲೇಖನಾ ಬರಂವ್ಕ್ ಪ್ರಾರಂಭ್ ಕೆಲೆಂ, ಆನಿ ಹಾಕಾ ಮೊ| ಶಿಲಾ ಮಿನೆಜಾಚೆ ಉತ್ತೇಜನ್ಯಿ ಆಸ್ಲ್ಲೆಂ. ಹ್ಯಾ ಮಧೆಂ ತಾಚಾ ವಳ್ಳಿಚಾ ಜೊರ್ಜ್ ಫೆರ್ನಾಂದಾನ್ (ಉಪ್ರಾಂತ್ ಕೇಂದ್ರ್ ಸರ್ಕಾರಾಂತ್ ಮಂತ್ರಿ) "ಕೊಂಕಣಿ ಯುವಕ್" ಮಳ್ಳೆಂ ಮಾಸಿಕ್ ಪ್ರಾರಂಭ್ ಕೆಲ್ಲೆಂ ಆನಿ ಪತ್ರಾ ವಿಶಿಂ ರಾಯ್ಮಂದ್ ಮಿರಾಂದಾಲಾಗಿಂ ವಿಚಾರ್-ವಿಮರ್ಸೊ ಕರುಂಕ್ ತೊ ಬಜ್ಪ್ಯಾಂ ತಾಚಾ ಘರಾಯಿ ಆಯಿಲ್ಲೊ. ಪುಣ್ ರಾಜ್ಕೀಯ್ ಕಾರಣಾಂನಿ ಫೆರ್ನಾಂದಾಕ್ ಬೊಂಬಯ್ಕ್ ಪಳಾಜಾಯ್ ಪಡ್ಲೆಂ ಆನಿ "ಯುವಕ್" ಬಂಧ್ ಜಾಲೊ.
ಪತ್ರಾಗಾರಿಕೆಂತ್ ಆಪ್ಣಾಕ್ ಆಸ್ಲ್ಲ್ಯಾ ವೊಡ್ಣೆನ್ ರಾಯ್ಮಂದ್ ಮಿರಾಂದಾನ್ ಹ್ಯಾ ವೆಳಾರ್ ಭಾರಿಚ್ ರಿಸ್ಕೆಚೆಂ, ಲಾಭ್ ನಾಸ್ಲೆಲೆಂ ಮೇಟ್ ಧಯ್ರಾನ್ ಕಾಡುಂಕ್ ನಿಶ್ಚಯ್ ಕೆಲ್ಲೊ. ಅಸೆಂ ತಾಣೆ ಆಪ್ಲೆಂ ಸ್ವಂತ್ "ಕೊಂಕಣಿ ಸಾಹಿತ್ಯಾ ಪ್ರಕಾಶನ್" ಉಗಡ್ಲೆಂ ಆನಿ "ಕಥಾಂಝೆಲೊ" (ಪಯ್ಲೆಂ ಮಾಸಿಕ್, ಉಪ್ರಾಂತ್ ಪಾಕ್ಷಿಕ್ ಆನಿ ಸುಮಾರ್ ವರ್ಸಾಂ ಉಪ್ರಾಂತ್ ಸಾಪ್ತಾಹಿಕ್) ಪತ್ರ್ ಪ್ರಾರಂಭ್ ಕೆಲೆಂ ತವಳ್ ಕೊಂಕಣಿ ವಾಜ್ಪಿ ಮ್ಹಳ್ಯಾರ್ ದುಬ್ಳೆ ಆನಿ ಮಧ್ಯಮ್ ವರ್ಗಾಚೆ ಕ್ರಿಸ್ತಾಂವ್ ಮಾತ್ರ್, ಆನಿ ತೆಯಿ ಮಾಗ್ಣ್ಯಾಚಿ ಆನಿ ಧಾರ್ಮಿಕ್ ಪುಸ್ತಕಾಂ ಮಾತ್ರ್ ಘೆತಾಲೆ, ದಿಯೆಸೆಜಿಚೆಂ ಕಥೊಲಿಕ್ ಪತ್ರ್ "ರಾಕ್ಣೊ" ಮಾತ್ರ್ ತಾಣಿ ವಾಚ್ಚೆಂ ಆಸ್ಲ್ಲೆಂ. ಉಂಚ್ಯಾ ವರ್ಗಾಚ್ಯಾಂಕ್ ಕೊಂಕಣಿ ಉಲಂವ್ಚೆಂ ಆನಿ ವಾಚ್ಚೆಂ ಮ್ಹಳ್ಯಾರ್ ಏಕಾ ಥರಾಚಿ ನಾಲಿಸಾಯ್! ಹ್ಯಾ ಸ್ಥಿತೆರ್ ರಾಯ್ಮಂದ್ ಮಿರಾಂದಾನ್ ಕಾಡ್ಲೆಲೆಂ ಮೆಟ್ ಭಾರಿಚ್ ಧಯ್ರಾಧಿಕ್ ಮ್ಹಣ್ಯೆತ್.
"ಕಥಾಂಝೆಲೊ" ಪತ್ರಾ ಸಾಂಗಾತಾ, ವಾಚ್ಪ್ಯಾಂಕ್ ಹರ್ ಮಹಿನ್ಯಾಕ್ ಏಕ್ ಕಾಣಿಯಾಂಚೆಂ ವ ಹೆರ್ ಪುಸ್ತಕ್ ತಾಂಚಾ ಘರಾ ಬಾಗ್ಲಾರ್ಚ್ ಪಾವಿತ್ ಕರುಂಕ್ ತಾಣೆ ಆನ್ಯೆಕ್ ಮೇಟ್ ಕಾಡ್ಲೆಂ, ಆನಿ "ಬುಕ್-ಎ-ಮಂತ್ ಕ್ಲಬ್" ಆಪ್ಲಿಚ್ ಏಕ್ ಹಳ್ತಾಚಿ ಕಥಾ ("ನೊರಾಚೆಂ ನೊವೆನ್") ಫಾಯ್ಸ್ ಕರ್ನ್ ಪ್ರಾರಂಭ್ ಕೆಲೆಂ. ಅಶೆಂ ವಾಡ್ಚಾ ಲೇಖಕಾಂಕ್ ಆನಿ ಭಾಸಾಂತರ್ ಕರ್ಚಾಂತ್ ಉಮೆದ್ ಆಸ್ಲ್ಯಾಂಕ್ ಉತ್ತೇಜನ್ ತಾಣೆ ದಿಲೆಂ. ಪುಣ್ ಕಷ್ಟಾಂ-ನಷ್ಟಾಂ ವರ್ವಿಂ ಹೆಂ ಯೋಜನ್ ಅರ್ಧ್ಯಾರ್ಚ್ ರಾವ್ಲೆಂ, ಪತ್ರಾಯಿ ಬಂಧ್ ಪಡ್ಲೆಂ ಆನಿ ತೊ ಪರ್ಗಾವಾಕ್ ಗೆಲೊ, ಪುಣ್ ತಾಚೊ ಸಾಹಿತಿಕ್ ವಾವ್ರ್ ರಾವ್ಲೊನಾ. ತವಳ್ ಅಮೆರಿಕಾಚೊ ನಾಂವಾಡ್ದಿಕ್ ಲೇಖಕ್ ಜೊನ್ ಕೊಸ್ಗ್ರೊವ್ ಹೊ ಆಪ್ಲ್ಯಾ "ಸೀಡಾರ್ ಒಫ್ ಲೆಬಾನೊನ್" ಕಾದಂಬರಿ ವರ್ವಿಂ ನಾಂವಾಡ್ದಿಕ್ ಜಾಲ್ಲೊ. ಹಾಚಿ ವ್ಹಳೊಕ್ ಜಾಲಿ ಆನಿ ತ್ಯಾ ಕಾದಂಬರಿಯೆಚೆಂ ಕೊಂಕಣಿ ಹಕ್ಕಾಂ ತಾಕಾ ಲಾಬ್ಲಿಂ. ಹ್ಯಾ ಮಧೆಂ ತಾಣೆ ಇಂಗ್ಲೆಂಡಾಚಿಂ "ಫೆಲೊ ಒಫ್ ದಿ ರೊಯಲ್ ಇಕೊನೊಮಿಕ್ ಸೊಸಾಯ್ಟಿ ಆನಿ "ಫೆಲೊ ಒಫ್ ದಿ ರೊಯಲ್ ಸೊಸಾಯ್ಟಿ ಒಫ್ ಆರ್ಟ್" ಜೊಡುನ್, ಮಾಯ್ ಗಾಂವಾಕ್ ತೊ ಪಾಟಿಂ ಆಯ್ಲೊ ಆನಿ ’ಚಾರ್ಟರ್ಡ್ ಎಕಂವ್ಟೆಟೆಂಟ್’ ಯಿ ಜಾಲೊ.
[ ನಾತ್ರಾಂ ಆನಿ ಸುನ್ ಸ್ಯಾಲಿಸವೆಂ ]
ಪರತ್ ತಾಣೆ ಆಪ್ಲೆಂ ಪ್ರಕಾಶನ್ ಜೀವಾಳ್ ಕೆಲೆಂ, ಆನಿ "ಕಥಾಂಝೆಲೊ" ಪರತ್ ಪ್ರಗಟ್ಲ್ಯೊ. ಹ್ಯಾಚ್ ವೆಳಾರ್ ತಾಣೆ "ಪಾತ್ಯೆಣೆಚೊ ಈಷ್ಟ್" ಕಾದಂಬರಿ ತೀನ್ ಭಾಗಾಂನಿ ಉಂಚ್ಲ್ಯಾ ಕಾಗ್ದಾರ್ ಮುದ್ರಣ್ ಕರ್ನ್ ಕೊಂಕಣಿ ಸಾಹಿತ್ಯ್ ಪ್ರಕಾಶನಾಂತ್ ಪ್ರಗಟ್ಲಿ. ಪುಣ್ ಕೊಂಕಣಿ ಪತ್ರ್ಗಾರಿಕೆರ್ ಆನಿ ಸಾಹಿತ್ಯಾಕ್ ಆನಿಕ್ ಬರೆ ದೀಸ್ ಯೆಂವ್ಕ್ ನಾಸ್ಲ್ಲೆ-ಕೊಂಕಣಿ ಸಾಹಿತ್ಯಾ ಪ್ರಚಾರ್ ತವಳ್ ಭಾರಿಚ್ ಕಷ್ಟಾಂಚೆಂ ಕಾಮ್; ಥೊಡ್ಯಾ ವಿಕ್ರಾಪ್ಯಾಂನಿ ತಾಚಾ ಪ್ರಾಕಾಶನಾಂಚಿ ಪತ್ರಾಂ ಆನಿ ಪುಸ್ತಕಾಂ ಬಾಡ್ಯಾಕ್ ದೀವ್ನ್ ಪಯ್ಶೆ ಕರ್ನ್ ಉಪ್ರಾಂತ್ ಹಿಂ ವಿಕುಂಕ್ ನಾಂತ್ ಮ್ಹಳ್ಳ್ಯಾ ನಿಬಾನ್ ಪಾಟಿ ಧಾಡ್ಲ್ಲೆ ಮಸ್ತ್ ದಾಕ್ಲೆ ಆಸಾತ್.
ಅಸೆಂ ಪತ್ರ್ಗಾರಿಕೆಂತ್ ತಾಕಾ ನಷ್ಟಾವಯ್ರ್ ನಷ್ಟ್ ಜಾತಾಲೊ ಜಾಲ್ಯಾನ್ ಪತ್ರ್ ಆನಿ ಪ್ರಕಾಶನ್ ಪರತ್ ಬಂಧ್ ಪಡ್ಲೆಂ ಆನಿ ತೊ ಆಪ್ಲ್ಯಾ ಕುಟ್ಮಾಕ್ ಘೆವ್ನ್ ಬೊಂಬಯ್ ಗೆಲೊ; ಜಾಲ್ಯಾರ್ಯಿ ಕೊಂಕಣಿ ಸಾಹಿತ್ಯ್ ಪ್ರಚಾರ್ ಕರ್ಚಿ ತಾಚಿ ಆಶಾ ಭಾಗ್ಲಿನಾ.
[ ರೊವನ್ ಆನಿ ಸ್ಯಾಲಿಸವೆಂ ]
ತವಳ್ ಕೊಂಕಣಿ ಸಾಹಿತ್ಯಾ ಪ್ರಕಾಶನ್ ಆನಿ "ಕಥಾಂಝೆಲೊ" ಬರವ್ಪಿ ಅಂದ್ರು ಮೆಂಡೊನ್ಸ್ ಬೊಂಬಯ್ ಆಸ್ಲ್ಲೊ ಆನಿ ತಾಣಿ ದೊಗಾಂನಿಯಿ ಮೆಳೊನ್ 1965 ಂತ್ "ಕಾಣಿಕ್" ಪತ್ರ್ ಪ್ರಾರಂಭ್ ಕೆಲೆಂ ಆನಿ ರಾಯ್ಮಂದ್ ಮಿರಾಂದ್ ತ್ಯಾ ಪತ್ರಾಚೊ ಪಯ್ಲೊ ಸಂಪಾದಕ್ ಜಾಲೊ. ಪುಣ್ ಬೊಂಬಯ್ ಜಾಲ್ಯಾರ್ಯಿ ಕೊಂಕಣಿ ಸಾಹಿತ್ಯ್ ಪ್ರಕಾಶನ್ ಆನಿ "ಕಾಣಿಕ್" ವಿಕ್ತಾವಾರ್ ಘಾಲುಂಕ್ ತಾಣೆ ಭಾರಿಚ್ ಕಷ್ಟ್ ಕಾಡಿಜಾಯ್ ಪಡ್ಲೆ, ಪತ್ರಾಂ ಆನಿ ಪುಸ್ತಕಾಂ ವಿಕುಂಕ್ ಬೊಂಬಂಯ್ತ್ ಶಿಂಪಡ್ಲೆಲ್ಯಾ ’ಟೊಬೆಕೊನಿಸ್ಸ್’ (ಧುಂಮ್ಟಿ, ಬೀಡಿ, ಸಿಗ್ರೆಟ್ ಇತ್ಯಾದಿ ವಿಕ್ಚಿಂ) ದುಕಾನಾಂಕ್ ವಚೊಂಕ್ ಪಡ್ತಾಲೆಂ ಆನಿ ಪುಸ್ತಕಾಂಚೊ ವಿಕ್ರೊ ವಾಡಂವ್ಚೆಂ ಕಾಮ್ಚ್ ಕಷ್ಟಾಂಚೆಂ ಜಾಲ್ಲೆಂ.
ಹ್ಯಾ ಮಧೆಂ "ಕೊಪಿರೈಟ್" (ಹಕ್ಕಾಂ) ಆಸ್ಲ್ಲಿಂ ಇಂಗ್ಲೆಜ್ ಪುಸ್ತಕಾಂ ಪ್ರಗಟ್ ಕರುಂಕ್ ತಾಣೆ "ಮಿರಾಂದಾ ಪಬ್ಲಿಕೇಶನ್ಸ್" ಪ್ರಾರಂಭ್ ಕೆಲೆಂ ಆನಿ ಹಿಂ ಪುಸ್ತಕಾಂ ಬೊಂಬಯ್ತ್ ಪ್ರಗಟ್ ಕರುಂಕ್ ಹಕ್ಕಾಂ ಘೆವ್ನ್ ತಾಣೆ ಸಬಾರ್ ಪುಸ್ತಕಾಂ ಪ್ರಗಟ್ಲಿಂ. ತಾಂತುಂ ’ಜೊನ್ ಕೊಸ್ಗ್ರೊವ್’ ಚಿ "ಸೀಡಾರ್ ಒಫ್ ಲೆಬನೊನ್"ಯಿ ಏಕ್.
ಕುಟ್ಮಾ ಸಮೇತ್ ಅಮೆರಿಕಾ ವೆಚ್ಯಾ ಇರಾದ್ಯಾ ವರ್ವಿಂ ತಾಚೊ ಸಾಹಿತ್ಯಿಕ್ ವಾವ್ರ್ ಬಂಧ್ ಪಡ್ಲೊ. 1953 ಂತ್ ಆಗ್ನೆಸ್ ಮಾರ್ತಿಸಾಲಾಗಿಂ (Agnes Martis) ತಾಚೆಂ ಲಗ್ನ್ ಜಾಲ್ಲೆಂ ಆನಿ ತಿ 1994 ಂತ್ ಶಿಕಾಗೊಂತ್ ಅಂತರ್ಲಿ. ತಾಕಾ ದೊಗ್ ಪುತ್, ಚೊವ್ಗಿ ಧುವೊ ಆನಿ ಸತ್ರಾ ನಾತ್ರಾಂ; ಚೊವ್ಗ್ ಭಾವ್ (ದೊಗ್ ಅಮೆರಿಕಾ ಆಸಾತ್) ಆನಿ ಚೊವ್ಗಿ ಭಯ್ಣ್ಯೊ (ಎಕ್ಲಿ ಅಮೆರಿಕಾ ಆಸಾ).
ಮಾನೆಸ್ತ್ ರಾಯ್ಮಂದ್ ಮಿರಾಂದ್ ಏಕ್ ಶ್ರಮ್-ಜೀವಿ, ಸದಾಂಚ್ ಆಪ್ಣಾಚಿ ಜಾಣ್ವಾಯ್ ಚಡಂವ್ಕ್ ವಾವುರ್ಲೊಲೊ ಆನಿ ಕುಟ್ಮಾಚಿಂ ಮೌಲ್ಯಾಂ ಉಕಲ್ನ್ ಧರ್ಲೊಲೊ ಏಕ್ ಮಹಾನ್ ವ್ಯಕ್ತಿ, ಸಾಹಿತಿಕ್ ವಾವ್ರಾಂತ್ ಹೆರಾಂನಿ ಸಲ್ವಾಲ್ಯಾ ವಾಟೆನ್ ಜಾಲ್ಯಾರ್ಯಿ ಚಮ್ಕೊಂಕ್ ಧಯ್ರಾನ್ ರಿಸ್ಕ್ ಘೆತ್ಲ್ಲೆಂ ತಾಚೆಂ ಆದರ್ಶ್, ತಾಚೆಂ ಸರ್ವಾಂ ಥಂಯ್ ಮೆಳೊನ್ ಚಲ್ಲೆಂ ಮನ್ ಆನಿ ತಾಚೆ ಶೆಗುಣ್ ಆಮ್ಚೆ ಥಂಯ್ಯಿ ಜೀವಂತ್ ಉರೊಂದಿತ್.
ತಾಚ್ಯಾ ಆತ್ಮ್ಯಾಕ್ ಶಾಂತಿ ಲಾಬೊಂದಿ.
ಗಿಲ್ಬೆರ್ಟ್ ಮಿರಾ೦ದ್
- ಪ್ರಿಮ್ರೊಜ಼್, ಬಜ್ಪೆ
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications