ರಾತ್!

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕಥಾಝರ್ - 31. ವಿಶೆವಾಚಿ ರಾತ್!

ಮೆಲ್ವಿನ್ ಜೆ. ವಾಸ್: ಪಾಟ್ಲ್ಯಾ ವರ್ಸಾಂನಿ ಕೊಂಕ್ಣೆಂತ್ ಉದೆಲ್ಲ್ಯಾ ಥೊಡ್ಯಾ ಭರ್ವಶ್ಯಾಚ್ಯಾ ಕವಿ/ವಿಮರ್ಶಕಾಂ ಪಯ್ಕಿಂತ್ ಮ್ಹಾಕಾ ಹೊ ಉಟೊನ್ ದಿಸ್ತಾ, ಪುಣ್ ಪಂದ್ರಾ ವರ್ಸಾಧಿಂ ಹಾಣೆಂ ಥೊಡ್ಯೊ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಮನರಂಜನ್ ಹಾಚೆಂ ಪ್ರಮುಕ್ ಹಾತೆರ್ ತರ್‌ಯ್ ಸಮಾಜಿಕ್ ಹುಸ್ಕೊ ಹಾಚ್ಯಾ ಬರ್ಪಾಂನಿ ದಿಸ್ಚಿ ಹಾಚ್ಯಾ ಕಾಣ್ಯಾಂಚಿ ಸೊಭಾಯ್. ಮಿನತ್ ಮುಖಾರಿತ್ ತರ್ ಬರೊ ಕಾಣ್ಯೆಗಾರ್ ಜಾವ್ನ್ ಕೊಂಕ್ಣೆಂತ್ ಖಂಡಿತ್ ಫುಲ್ತಲೊ ಮ್ಹಳ್ಳಿ ಮ್ಹಜಿ ಪಾತ್ಯೆಣಿ.

ಮೆಲ್ವಿನ್ ವಾಸ್

ದಿಸೆಂಬರ್ 4, 1986
N.H. 48
ವೊರಾಂ ರಾತಿಚಿಂ ಇಕ್ರಾ ಜಾವ್ನ್ ಆಟ್ರಾ ಮಿನುಟಾಂ!

ಉಜ್ವ್ಯಾ ಕುಶಿಂತ್ಲ್ಯಾನ್, ಉಗ್ತೊ ಆಸ್ಲೆಲ್ಯಾ ಕಾರಚಾ ಆರ್ಶಾಂತ್ಲ್ಯಾನ್, ಥಂಡ್ ವಾರೆಂ ಕಾರಾ ಬಿತರ್ ವ್ಹಾಳೊನ್, ತೆಂ ವಾರೆಂ, ಆಪ್ಲ್ಯಾ ಉಜ್ವ್ಯಾ ಪೊಲ್ಯಾ ಬಿತರ್ ಮುರ್ಗಟೊನ್ ಬಸ್ಲೆಲ್ಯಾ ಉಬೆಕ್ ಶಿರ್ಶಿರಾಂವ್ಕ್ ಲಾಗ್ತನಾ, ದಾವ್ಯಾ ಹಾತಾನ್ ಸ್ಟೇರಿಂಗಾಕ್ ದರ್ಲೆಲ್ಯಾ ಹಾಂವೆಂ, ಉಜ್ವ್ಯಾ ಹಾತಾನ್ ಸವ್ಕಾಸ್ ಕಾರಾಚೊ, ದಾರಾ ಆರ್ಸೊ ಬಂದ್ ಕೆಲೊ.

ತಿತ್ಲೆಂಚ್!

ಏಕ್ ಪಾವ್ಟಿಂಚಾಕ್ ಸಗ್ಳೆಂಚ್ ಶಾಂತ್ ಜಾಲ್ಲ್ಯಾ ಪರಿ ಜಾಲೆಂ. ಯೆದೊಳ್ ಆಯ್ಕೊನ್ ಯೆಂವ್ಚೊ ವಾರ್‍ಯಾಚೊ ’ಗಜ್ ಗಜ್’ ಆವಾಜ್‌ಯಿ ಬಂದ್ ಜಾವ್ನ್, ಕಾರಾ ಬಿತರ್ಲೆಂ ವಾತಾವರಣ್‌ಚ್ ಬದ್ಲಾಲೆ. ಆತಾ ಹಾಂವೆಂ ಸವ್ಕಾಸ್ ಹೆಂವ್ಶಿ ತಕ್ಲಿ ಘುಂವ್ಡಾಯ್ಲಿ.

ಮ್ಹಜ್ಯಾ ಬಗ್ಲೆಚಾ ಬಸ್ಕೆಚೆರ್ ಮ್ಹಜಿ ಬಾಯ್ಲ್ ಆಪ್ಲ್ಯಾ ಜೀವಾಕ್‌ಯಿ ಆರಾಮ್ ದಿಂವ್ಚೆಂ ಪರಿ ಪಾಯ್ ಲಾಂಬವ್ನ್ ಬಸ್ಲೆಲೆಂ ತೆಂ, ಆಪ್ಲ್ಯಾ ತಕ್ಲೆಕ್ ಬಸ್ಕೆಚೆರ್ ವೊಣ್ಕಾವ್ನ್ ವಯ್ಲ್ಯಾ ಕಾರಾಚಾ ಸೀಲಿಂಗಾಕ್ ಪಳೆತಾಲೆಂ. ಆತಾಂ ಹಾಂವ್ ತಾಕಾಚ್ಚ್ ಪಳೆಂವ್ಕ್ ಲಾಗ್ಲೊ.

ತಿತ್ಲ್ಯಾರ್!

ಎಕಾಚ್ಚ್ ಫರಾ ಮುಖ್ಲ್ಯಾನ್ ಥಾವ್ನ್ ಹಾಂಡ್ಕೊರ್ ರೆಡ್ಯಾಬರಿ ಪ್ರತ್ಯಕ್ಷ್ ಜಾಲ್ಲ್ಯಾ, ತ್ಯಾ, ತೇಲಾಚಾ ಟ್ಯಾಂಕರಾನ್ ಮಾರ್ಲೆಲ್ಯಾ ಹೊರ್ನಾಕ್, ಹಾಂವೆಂ ಹೆವ್ಶಿನ್ ಪಳೆವ್ನ್, ಹಾಂವೆಂ ಡ್ರೈವ್ ಕರ್ಚ್ಯಾ ಕಾರಾಕ್, ಥೊಡೆಂ ರಸ್ತ್ಯಾ ಥಾವ್ನ್ ಸಕಯ್ಲ್ ದೆಂವೊನ್, ತ್ಯಾ ಹಾಂಡ್ಕೊರ್ ರೆಡ್ಯಾಚಾ ಶಿಂಗಾ ಥಾವ್ನ್ ಕಶೆಂಯಿ ಬಚಾವ್ ಜಾಲೊಂ.

ಚೂಕ್ ಮ್ಹಜಿಚ್!

ಬಗ್ಲೆನ್ ಬಸೊನ್, ಕಾರಾಚಾ ಬಿತರ್ಲ್ಯಾ ಮೊಳ್ಬಾ ವಯ್ರ್ ತಾರಾಂ ಸೊದ್ಚಾಂ ಮ್ಹಜ್ಯಾ ಬಾಯ್ಲೆಕ್ ಪಳೆಲ್ಲಿ ಚೂಕ್ ಖಂಡಿತ್ ಮ್ಹಜಿಚ್! ತೆಂಯ್ ಹ್ಯಾ ಅಂದ್ಕಾರಾ ರಾತಿಕ್!

ರಸ್ತ್ಯಾರ್ ಜಾಲ್ಲ್ಯಾ ಗಡ್ಬಡೆಕ್ ಮ್ಹಜ್ಯಾ ಬಾಯ್ಲೆನ್ ಫಕತ್ತ್ ತಕ್ಲಿ ಉಜ್ವ್ಯಾಕ್ ಕರುನ್ ಮ್ಹಾಕಾ ಪಳೆಯ್ಲೆಂ ಮಾತ್ರ್ ಶಿವಾಯ್ ತೆಂ ಕಾಂಯ್ಚ್ ಉಲಯ್ಲೆಂ ನಾಂ.

ಬಗ್ಲೆಚ್ಯಾ ಬಸ್ಕೆರ್ ಬಸ್ಲೆಲಿ ಚಲಿ ಜರ್ ಉಲಂವ್ಕ್ ಆರಂಭ್ ಕರಿತ್ ಜಾಲ್ಲ್ಯಾರ್, ಖಂಯ್ಚ್ಯಾ ಚಲ್ಯಾಕ್, ತ್ಯಾ ಭುಮಿ ವೈಕುಂಟಾಚೆಂ ಪಯ್ಣ್ ಕೆಲ್ಲ್ಯಾ ಬರಿ ಜಾಯ್ನಾಂ? ಹಾಂವ್ ಜರೀ ಮ್ಹಜ್ಯಾ ಬಗ್ಲೆಚ್ಯಾ ಕಿತ್ಯಾಕ್, ಮ್ಹಜ್ಯಾ ಆನಿಂ ಪಾಟ್ಲ್ಯಾ ಬಸ್ಕೆರ್ ಬಸ್ಲೆಲ್ಯಾ ಚಲಿಯಾಂನಿ ಸಯ್ತ್ ಪಾಟಿಂ ಘುಂವೊನ್, ಮುಖಾರ್ ಬಾಗೊನ್, ಮ್ಹಜೆಲಾಗಿಂ ಉಲಂವ್ಕ್ ಜಾಯ್ ಮ್ಹಳ್ಳಿ ಆಶಾ ಆಸ್‌ಲ್ಲೊ. ಬಹುಶಃ ಹ್ಯಾಚ್ಚ್ ಖಾತಿರ್ ಆಜ್ ಆಶಾನ್ ಮ್ಹಜ್ಯಾ ಭಂವಾರಿಂ ಆಪ್ಲ್ಯಾ ತೀಕ್ಷ್ಣ್ ನದ್ರೆಚೊ ಪಾರೊ ದವರ್‌ಲ್ಲೊ.

"ಆಶಾ.....!"

ಹ್ಯಾ ಮೌನ್ ವಾತಾವರಣಾಂತ್‌ಯಿ, ಮ್ಹಜ್ಯಾ ಜಿಬೆರ್ ಉತಾರ್ ಕಶೆಂ ಉಮಾಳ್ಳೆಂ ತೆಂ ಮ್ಹಾಕಾಚ್ಚ್ ಕಳೊನ್ ಆಯಿಲ್ನಾ. ಮ್ಹಜ್ಯಾ ಆನಿಂ ಮ್ಹಜ್ಯಾ ಬಾಯ್ಲೆಚಾ ಶರ್ತಾ ಮುಖಾರ್ ಹಾಂವ್‌ಚ್ ಸಲ್ವಾಲ್ಲೊಂ!

ಭೋವ್ಶಾ, ಹಾಂವ್ ಸಲ್ವಾಲ್ಲ್ಯಾಚಿ ರುಜ್ವಾತ್ ಜಾವ್ನ್ ಮ್ಹಜ್ಯಾ ಬಾಯ್ಲೆನ್ ಏಕ್ ಪಾವ್ಟಿಂ ಆಪ್ಲಿ ತಕ್ಲಿ ನೀಟ್ ಕರುನ್, ಸಗ್ಳ್ಯಾ ಆಪ್ಲ್ಯಾ ಜಿವಾಕ್ ಬಸ್ಕೆರ್ ವೊಡುನ್ ಬಂದ್ ಆಸ್ಲೆಲ್ಯಾ ತಾಚ್ಯಾ ದಾವ್ಯಾ ಕುಶಿಚಾ ಆರ್ಶ್ಯಾ ಮುಖಾಂತ್ರ್ ಭಾಯ್ರ್ ಪಳೆಲೆಂ ತಾಣೆಂ.

"ಕಿತೆಂ......ಕಾಜುಲ್ಯಾಂಕ್ ಸೊದ್ತಾಯ್?" ತೊಂಡಾರ್ ರಸಿಕ್ ಪಣಾಚೊ ಹಾಸೊ ಹಾಡವ್ನ್ ಉಲಯ್ಲೊಂ ಹಾಂವ್. ಮ್ಹಾಕಾ ಕಶೆಂ ತರ್‌ಯ್ ಬಾಯ್ಲೆಕ್ ಸಮಾಧಾನ್ ಕರುಂಕ್ ಜಾಯ್ ಆಸ್‌ಲ್ಲೆಂ.

"ರಸ್ತೊ ಹಾಂಗಾಂ ಮ್ಹಜ್ಯಾ ತೋಂಡಾರ್ ನಾಂ! ಮುಖಾರ್ ಪಳೆ! ಹ್ಯಾ ಹೈವೇಚೆರ್...ಹ್ಯಾ ರಾತಿಕ್...., ತಕ್ಲಿ ಸಮಾ ಆಸ್‌ಲ್ಲೊ ಕೋಣ್‌ಯ್ ಡ್ರೈವ್ ಕರ್ತಾ?" ಘಡ್ಗಡ್ಯಾ ಪರಿ ಬಡ್ಬಡ್‌ಲ್ಲೆಂ ಮ್ಹಜೆಂ ಬಾಯ್ಲ್ ಪರ್ತ್ಯಾಕ್ ಬಸ್ಕೆಕ್ ವೊಣ್ಕಾಲೆಂ. ಪುಣ್ ಹ್ಯಾ ಫರಾಂ ಪಯ್ಲೆಂಚಾ ಪರಿ ನ್ಹಂಯ್. ಸಾರ್ಕೆಂ ನೀಟ್ ಬಸ್ಲೆಂ ತೆಂ.

"ಬಾಯ್ಲ್ ಉಲಯ್ತಾ ಜಾಲ್ಯಾರ್ ಏಕ್ ಪಾವ್ಟಿಂ ಹಾಚೆಂ ತೋಡ್ ಬಂದ್ ಜಾಲ್ಯಾರ್ ಪುರೊ ಮ್ಹಳ್ಳೆಂ ಕರ್ಕರೆಂ. ಬಾಯ್ಲ್ ಉಲಯ್ನಾ ಜಾಲ್ಯಾರ್ ತಾಣೆಂ ಉಲಯ್‌ಶೆಂ ಕರ್ಚೆಂ ನಕ್ರೆ" ಹಾಂವ್ ಮನಾಂತ್‌ಚ್ ಉಲಯ್ಲೊಂ.

"ಮತಿಂತ್ ಪುರ್ಪುರ್ನಾಕಾ...! ಉಲಂವ್ಚೆಂ ಶೀದಾ ಉಲಯ್!" ಭೋವ್ಶಾ ಮ್ಹಜ್ಯಾ ಬಾಯ್ಲೆನ್ ಮ್ಹಜ್ಯಾ ಮತಿಕ್ ವಾಚ್ಲೆಂ ಜಾಯ್ಜಾಯ್. ಹ್ಯಾ ಕಾಮಾಂನಿಂ ತಿ ಭಾರಿ ಹುಶಾರ್. ಮತಿಕ್‌ಚ್ ಕಿತೆಂ ಸಗ್ಳ್ಯಾ ಮ್ಹಾಕಾ ಉಬೆಂಚ್ ವಾಚುಂಕ್ ಜಾಣಾಂ ಮ್ಹಜಿ ಬಾಯ್ಲ್.

"ಆಶಾ ಡಾರ್ಲಿಂಗ್!" ತ್ಯೊಚ್ಚ್ ರಸಿಕ್‌ಪಣಾಚ್ಯೊ ಹಾಸೊ ವೋಂಟಾನಿಂ ಹಾಡುನ್ ಉಲಯ್ಲೊಂ ಹಾಂವ್. "ಹಾಂಗಾಂ, ಹಾಂವ್ ಆನಿಂ ತುಂ ಸೊಡ್ಲ್ಯಾರ್ ಕೋಣ್‌ಯಿ ನಾ, ಜಾಲ್ಯಾರ್‌ಯಿ ತೊಂಡಾರ್ ಇತ್ಲೊ ರಾಗ್?" ಹಾಂವ್ ಜಾಣಾಂ ಆಸ್‌ಲ್ಲೊಂ ಮ್ಹಜ್ಯಾ ಬಾಯ್ಲೆಕ್ ಶಾಂತ್ ಕರುಂಕ್ ಜಾಯ್ ಜಾಲ್ಯಾರ್ ಪಯ್ಲೆಂ ಹಾಂವೆಂಚ್ ಉದ್ಕಾಕ್ ಬಿಜ್‌ಲ್ಲೊ ಇಂಗ್ಳೊ ಜಾಂವ್ಕ್ ಜಾಯ್ ಆಸ್‌ಲ್ಲೆಂ.

"ಹಾಂವ್ ಆನಿಂ ತುಂ ಮಾತ್ರ್ ನ್ಹಂಯ್!" ಮ್ಹಜ್ಯೆ ತೆಂವ್ಶಿ ಘುಂವ್ಲೆಂ ಆಶಾ. "ಹೆಂ ಯೆದೆಂ ವ್ಹಡ್ಲೆಂ ಕಾರ್ ಆಸಾ. ಮುಖಾರ್ ಇತ್ಲೊ ಲಾಂಬ್ ರಸ್ತೊ ಆಸಾ. ಭಾಯ್ಲ್ಯಾನ್ ಹೊ ದಳಿದ್ರ್ ಕಾಳೊಕ್....."

"ತಾಂಕಾಂ ಉಲಂವ್ಕ್ ಖಂಯ್ ಜಾತಾ ಡಾರ್ಲಿಂಗ್?" ಮಧೆಂಚ್ ಉಲಯ್ಲೊ ಹಾಂವ್.

"ಪುಣ್ ತ್ಯಾ ಘೊಡ್ಯಾಕ್ ಉಲಂವ್ಕ್ ಜಾತಾ ನೆಂ!" ರಾಗಾನ್ ಆಶಾನ್ ಉಲಯ್ತಾನಾ, ಹಾಂವೆಂ ಕಾಂಯ್ ಉಲಂವ್ಚೆಂ ಮನ್ ಕೆಲೆಂ ನಾಂ. ಎದೊಳ್ ಪಾಸೊನ್ ಆಪ್ಲಿ ಜೀಬ್ ದಾಂಬುನ್ ಧರುನ್ ರಾವ್ಲೆಲ್ಯಾ ಆಶಾಚಾ ಜಿಬೆಚೆಂ ಖಾಡುಂ ಹಾಂವೆಂಚ್ ಕಾತ್ರುನ್ ಹಾಂವೆಂ ಚೂಕ್ ಕೆಲ್ಲಿ. ತೆದಳಾ ತೆಂ ಉಲಯ್ನಾಸ್ತಾನಾ ಮೊನೆಂ ಬಸ್‌ಲ್ಲೆಂ ಆಸ್ತಾಂ ಮ್ಹಜ್ಯಾನ್ ತಡ್ವೊಂಕ್ ಜಾಂವ್ಕ್ ನಾಂ. ಆತಾಂ.....!? ಭಾಯ್ಲ್ಯಾ, ದೊಳ್ಯಾಂಕ್ ಖೊಂಕ್ಚಾ ಕಾಳೊಕಾಂತ್ ಮ್ಹಜ್ಯಾ ಕಾರಾಚಾ ಹೆಡ್ ಲೈಟಾಚಾ ಉಜ್ವಾಡಾಂತ್ ಸವ್ಕಾಸ್ ಉದೆವ್ನ್ ಯೆಂವ್ಚಾ ವಾಹನಾಂಕ್ ಸಾಂಬಾಳುನ್ ಕಾರ್ ಚಲಂವ್ಕ್ ಕಾಗ್ಲೊಂ. ಕಾರಣ್, ಆಶಾನ್ ಪರ್ತ್ಯಾಕ್ ದನ್ಪರಾಂಚೊ ವಿಷಯ್ ಉಸ್ತಿಲ್ಲೊ.

"ಆತಾಂ ಕಿತೆಂ ಜಾಲೆಂ? ತಾಕಾ ಘೊಡೊ ಮ್ಹಳ್ಳೆಂ ತೆಂ ತುಕಾ ಜಾಂವ್ಕ್ ನಾಂ ಆಸ್ತೆಲೆಂ! ಹಾಂವ್ ಮೊನೊಂ ಜಾಲ್ಲೊಂ ಪಳೆವ್ನ್ ಉಲಯ್ಲೆಂ ಆಶಾ.

"ಪಳೆ ಆಶಾ.... ತುಂ ತಾಕಾ, ಘೊಡೊ, ಸುಣೆಂ, ಕಾತ್ತೆಂ, ಮಾಜಾರ್....ತುಂ ಕಿತೆಂಯ್ ಸಾಂಗ್. ತುಂವೆಂ ಆಶೆಂ ಸಾಂಗ್‌ಲ್ಲ್ಯಾ ಫರಾ, ತೆಂ ಘೊಡೊ ಯಾ ಕಾತ್ತೆಂ ಜಾಯ್ನಾಂ!"

"ವ್ಹಯ್! ತುಕಾ ಜಾಯ್ ಜಾಲ್ಲೆಂ ತೆಂ ನೆಂ! ನಾಂ ಜಾಲ್ಯಾರ್....ತುಂ, ಇತ್ಲೊ ವೇಳ್ ತಾಚೆ ಖಾತಿರ್ ಮ್ಹಾಕಾ ಸೊಡುನ್ ಬಸ್ತಾಯ್? ತೆಂಯ್ ಆಮ್ಚೆಂ ಕಾಜಾರ್ ಜಾವ್ನ್ ಪಾಂಚ್ ಮಹಿನ್ಯಾಂ ಉಪ್ರಾಂತ್, ಆಜ್, ಪಯ್ಲೆಂ ಪಾವ್ಟಿಂ ಆಮಿಂ ಹನಿಮೂನಾಕ್ ವಚೊಂಕ್ ಚಿಂತ್‌ಲ್ಲೆಂ ಆಸ್ತಾಂ....!? ಮುಖಾರ್ ಉಲಯ್ಲೆಂ ನಾಂ ಆಶಾ.

"ಮ್ಹಾಕಾ, ತೆಂ ಜಾಯ್ ಜಾಲ್ಲೆಂ ಜಾಲ್ಯಾರ್ ಆಮಿಂ ಎದೊಳ್ ಬೆಂಗ್ಳುರ್ ಪಾವ್ತ್ಯಾಂವ್!"

"ಆತಾಂ ಕಿತೆ ಜಾಲೆಂ..? ರಾತ್ ಕಾಬಾರ್ ಜಾಂವ್ಚಾ ಪಯ್ಲೆಂ ತುಕಾ ಬೆಂಗ್ಳುರ್ ಪಾವಯ್ಲ್ಯಾರ್ ಜಾಲೆಂ ನೆಂ..."

"ಕಿತೆಂ ಫಾಯ್ದೊ....? ಛೆ...ಹಾಂವ್ ಇತ್ಲ್ಯಾ...ಹಾಚೆರ್ ಆಸ್‌ಲ್ಲಿಂ! ಸಗ್ಳೆಂ ಮೂಡ್‌ಚ್ ಪಾಡ್ ಕರುನ್ ಸೊಡ್ಲೆಂ. ತುಕಾ ಸಾಂಗ್ಲೆಂ ಹಾಂವೆಂ ......ಆಮಿಂ ಆನ್ಯೇಕ್ ಪಾವ್ಟಿಂ ಯಾ. ಆಜ್ ನಾಕಾ ಮ್ಹಣೊನ್. ಘರಾ ಮಾಂಯ್ನ್ ವತ್ತಾಯ್ ಕೆಲಿ ಮ್ಹಣೊನ್ ಮಾತ್ರ್ ಕಾರಾರ್ ಬಸ್‌ಲ್ಲಿಂ ಹಾಂವ್!...."

"ಒ. ಕೆ.....ಐ ಎಮ್ ಸಾರ್ರಿ!" ಹಾಂವ್ ಚುಕಿದಾರ್ ನ್ಹಂಯ್ ಆಸ್ತಾನಾಂಯ್ ಚೂಕ್ ವಳ್ಕಾಲೊಂ. ಕಾಜರಾಚ್ಯಾ ನವ್ಯಾ ಹೊಕ್ಲೆಕ್, ಹಾಂವೆಂ ಖಂಯ್ಚರಿಯ್ ಮ್ಹಜ್ಯಾ ಕುಟ್ಮಾ ಥಾವ್ನ್ ಪಯ್ಸ್ ವೆಲ್ಲೆಂ ನಾಂ. ಘರ್ಚೆಂ ಆನಿಂ ಆವಯ್ಚೆಂ ಮ್ಹಣೊನ್ ಹಾಂವ್ ಬಾಯ್ಲೆಕ್ ವಿಸ್ರಾಲ್ಲೊಂ. ಆಶಾ ಮ್ಹಜೆಂ ಬಾಯ್ಲ್ ಜಾಲ್ಯಾರ್ ಕಿತೆಂ ಜಾಲೆಂ? ತಾಚ್ಯಾ ಮತಿಂತ್‌ಯ್ ನವ್ಯಾ ಹೊಕ್ಲೆಚ್ಯಾ ಮತಿಂತ್ಲಿಂ ಸ್ವಪ್ಣಾಂ, ಭಗ್ಣಾಂ, ಆಶಾ, ಆಸಾತ್ ಮ್ಹಳ್ಳೆಂ ಹಾಂವ್ ವಿಸ್ರಾಲ್ಲೊಂ. ಹ್ಯಾ ಚುಕಿಕ್ ಹಾಂವೆಂಚ್ ಸಮ್ಜಾತಾನಾ ಪಾಂಚ್ ಮಹಿನೆಂ ಉತಾರ್‌ಲ್ಲೆಂ.

ಆಶಾ, ಹಾಂವೆಂ ಕಾಳ್ಜಾಂ ಥಾವ್ನ್ ಮೋಗ್ ಕೆಲ್ಲಿ ಚಲಿ. ಕಾಲೇಜಿಚ್ಯಾ ದಿಸಾಂ ಥಾವ್ನ್ ತಾಣೆಂ ಮ್ಹಾಕಾ ಸಾಂಗಾಂತ್ ದಿಲ್ಲೊ. ಆನಿಂ ಆಮ್ಚೊ ಸಾಂಗಾಂತ್ ಸಬಾರ್ ಪಾವ್ಟಿಂ ತುಟೊನ್ ಮೊಡುನ್ ಪರ್ತ್ಯಾಕ್ ಗಾಂಟಾಲ್ಲೊ. ತಶೆಂ ಆಮ್ಚೆಂ ಮಧೆಂ ದುಸ್ರೊ ನಿರ್ವೊಗ್ ನಾತ್‌ಲ್ಲೊ ಮ್ಹಣೊನ್ ನ್ಹಂಯ್. ಆಶಾಕ್‌ಯಿ ಮ್ಹಜೆ ಪ್ರಾಸ್ ದುಡ್ವಾನ್ ಆನಿಂ ಸಾಮಾಜಿಕ್ ಅಂತಸ್ಥೆನ್ ಬಳ್ ಆಸ್‌ಲ್ಯಾಂಚೊ ಸಯ್ರಿಕೊ ಆಯಿಲ್ಲ್ಯೊ. ಜಾಲ್ಯಾರಿಯ್ ತಾಣೆಂ ಫಕತ್ತ್ ಮ್ಹಜ್ಯಾ ಮೊಗಾ ಖಾತಿರ್ ಸಗ್ಳೆಂ ನಿರಾಕರ್ಸಿಲ್ಲೆಂ.

"ತೆ ಕಾಲೇಜಿಚೆ ದೀಸ್......ತಿಂ ಪಾರ್ಕಾಂ......ತಿಂ ಸಿನೆಮಾ ಥಿಯೇಟರಾಂ.....ತಿಂ ಐಸ್ ಕ್ರೀಮ್ ಪಾರ್ಲರಾಂ..." ಎಕೇಕ್‌ಚ್, ಮ್ಹಜ್ಯಾ ಮತಿಚ್ಯಾ ಪಡ್ದ್ಯಾರ್ ಆಮ್ಚಾ ಮೊಗಾಚ್ಯಾ ಸಾರ್‌ಲ್ಲ್ಯಾ ಘಡಿಯಾಂಕ್ ಘೆವ್ನ್ ಉದೆವ್ನ್ ಆಯ್ಲೆ ತಶೆಂಚ್ ಮಾಯಗ್ ಜಾಲೆಂ. ಪೂಣ್...?

"ಶೈಲಾ!?"

ಶೈಲಾ ಮ್ಹಜ್ಯಾ ಜಿವಿತಾಂತ್ ಆಯಿಲ್ಲೆಂ ಚಲಿ ವ್ಹಯ್ ಜಾಲ್ಯಾರ್‌ಯಿ ಮ್ಹಜ್ಯಾ ಆಶಾಚೊ ಜಾಗೊ ಘೆವ್ನ್ ಆಯಿಲ್ಲೆಂ ಚೆಡುಂ ನ್ಹಂಯ್. ಕಾಲೇಜಿಚ್ಯಾ ದಿಸಾಂಚಿ ಸಳಾವಳ್ ತಿತ್ಲೆಂಚ್. ಪೂಣ್ ಎಕೇಕ್ ಪಾವ್ಟಿಂ ಆಶಾ ಆನಿಂ ಮ್ಹಜೆಂ ಮಧೆಂ ತಕ್ರಾರ್ ಜಾತನಾ ಹಾಂವ್ ಶೈಲಾ ತೆವ್ಶಿಂ ಮಾಲ್ವಲ್ಲೊಂಯ್ ಆಸಾ. ಹಿ ಸೈಂಬಾಚಿ ಸವಯ್ ವಾ ಜಾತಿಚಿ ವೊಡ್ಣಿಂ ತೆಂ ಆಜೂನ್ ಪಾಸೊನ್ ಮ್ಹಾಕಾ ಸಮ್ಜಾಲ್ಲೆಂ ನಾಂ. ಪುಣ್ ಕಾಜಾರ್ ಜಾಲ್ಲ್ಯಾ ಉಪ್ರಾಂತ್ ಆಶಾ ಆನಿಂ ಮ್ಹಜೆಂ ಮಧೆಂ ಕೋಣ್‌ಯಿ ಆಯಿಲ್ಲೆಂ ನಾಂ.

ಆಯ್ಚ್ಯಾ ಧನ್ಪರಾಂ ಪಾಸೊನ್!

"ಆಶಾ! ಐ ಎಮ್ ಸೊರ್ರಿ!" ಸುಮಾರ್ ವೆಳಾಚೆ ಮೌನ್ ತುಟವ್ನ್ ಪರ್ತ್ಯಾಕ್ ಉಲಯ್ಲೊ ಹಾಂವ್. "ಸತ್ತ್ ಜಾವ್ನ್ ಹಾಂವ್ ನೆಣಾಂ ಆಸ್‌ಲ್ಲೊಂ! ಆತಾಂ ತೆಂಚ್ ಘರಾ ಬಾಗ್ಲಾರ್ ಆಯ್ಲೆಂ ಮ್ಹಣ್ತಾನಾ ತಾಕಾ ಆಚಾನಕ್ ವಚೊಂಕ್ ಜಾತಾಯೆ? ಟ್ರೈ ಟು ಅಂಡರ್‌ಸ್ಟ್ಯಾಂಡ್!" ಆಶಾಕ್ ಸಮ್ಜಾಂವ್ಚೆಂ ಪ್ರಯತ್ನ್ ಮ್ಹಜೆಂ.

"ಭೋವ್ಶಾ ಮಜಿಚ್ಚ್ ಚೂಕ್ ರಾಯನ್" ತೆಂ ಬಾವುಕ್ ಜಾಲೆಂ. "ತುಜ್ಯಾ ಕಾಜಾರಾ ದಿಸಾಚೊ ತಾಚೊ ಅವತರ್....., ತಾಣೆಂ ತುಕಾ ಕರ್ಚಿಂ ಫೋನಾಂ...., ತುಂವೆಂ ತಾಕಾ ಮೆಳ್ಚೆಂ..., ಆನಿಂ ಆಜ್..., ತಾಚ್ಯೆ ಮುಖಾರ್ ತುಕಾ ಮ್ಹಜಿ ಗರ್ಜ್‌ಯಿ ಉಣೆಂ ಮ್ಹಣೊನ್ ಭಗ್ಲಿ. !"

"ತುಂ ಬೆಷ್ಟೆಂಚ್ ಕಿತೆಂ ಕಿತೆಂ ಚಿಂತಾಯ್ ಆಶಾ! ಹಾಂವೆಂ ತುಕಾ ಸಾರ್ರಿ ಮ್ಹಣೊನ್ ಸಾಂಗ್ಲೆಂ ನೆಂ.... ತಾಚ್ಯೆ ಆನಿಂ ಮ್ಹಜ್ಯಾ ಮಧೆಂ ಹ್ಯಾ ಉಪ್ರಾಂತ್ ಸಂಬಂಧ್ ಉದೆಂವ್ಚೊ ನಾಂ. ಐ ಪ್ರಾಮಿಸ್ ಯು.."

"ಹಾಚ್ಯೆ ಪಯ್ಲೆಂಯ್ ತುಂವೆಂ ಆಶೆಂ ಮಸ್ತ್ ಪ್ರಾಮಿಸ್ ಕೆಲ್ಯಾಯ್....ಪುಣ್ ಖಂಯ್ಚೆಯ್ ಸಾಕಾರ್ ಕರುಂಕ್ ನಾಂಯ್!"

"ಆಶಾ...! ತುಂ ಜಾಣಾಂಯ್ ! ಆಮ್ಚಾ ಘರ್ಚಾ ವಿಶಿಂ...ಮಾಂಯ್ ವಿಶಿಂ......!"

"ಮ್ಹಜ್ಯಾ ವಿಶಿಂ ಮಾತ್ರ್ ತುಂ ಆನಿಂ ತುಜ್ಯಾ ಘರ್ಚ್ಯಾಂಕ್ ಕಾಂಯ್ಚ್ ಪಡೊನ್ ವಚೊಂಕ್ ನಾಂ. ಕಿತ್ಲೆಂ ಮ್ಹಳ್ಯಾರ್‌ಯಿ ಹಾಂಯ್ ಭಾಯ್ರ್ ಥಾವ್ನ್ ಆಯಿಲ್ಲೆಂ ಚೆಡುಂ ನೆಂ!"

ಆಶಾಚೆಂ ಹೆಂ ಸತ್ ಮ್ಹಜ್ಯಾ ಕಾಳ್ಜಾಕ್ ಧರುನ್ ಹಾಲಯ್ ಲಾಗ್ಲೆಂ. ತಾಚ್ಯಾ ಭಗ್ಣಾಂಕ್ ಹಾಂವ್ ಸವ್ಕಾಸ್ ಸಮ್ಜಾಲೊಂ. ಜಾಣಾಂ ಜಾವ್ನ್ ಯಾ ನೆಣಾಂ ಜಾವ್ನ್ ಹಾಂವೆಂ ಆದಾರ್‌ಲ್ಲ್ಯಾ ಎಕೇಕ್‌ಚ್ ಚುಕಿ ಮ್ಹಾಕಾ ಉಡಾಸ್ ಯೇಂವ್ಕ್ ಲಾಗ್ಲ್ಯೊ. ಜಿವಿತಾಂತ್ಲೆಂ ಸಗ್ಳೆಂ ವಿಸ್ರೊನ್ ಥೊಡೆ ದೀಸ್ ಫಕತ್ತ್ ಹಾಂವೆಂ ಆನಿಂ ಆಶಾನ್ ಸಾಂಗಾಂತಾ ಸಾರ್ಚೆ ಸ್ವಪಾಣ್‌ಯೀ ಬಾವೊನ್ ಯೆತಾ ತಶೆಂ ದಿಸ್ಲೆಂ. ಆಶಾಕ್ ಖಂಯ್ಚಾಯ್ ರಿತಿನ್ ಸಮ್ಜಾಂವ್ಕ್ ಮ್ಹಾಕಾ ಸಾಧ್ಯ್ ನಾತ್‌ಲ್ಲೆಂ. ಹರ್ಯೇಕ್ ವಾಟಾಂನಿಂ ಹಾಂವ್‌ಚ್ ಚುಕಿದಾರ್ ಮ್ಹಣೊನ್ ಮ್ಹಾಕಾಚ್ ದಿಸ್ಲೆಂ.

"ಛೆ...! ಶೈಲಾನ್, ಆಜ್ ದನ್ಪರಾಂ ಘರಾ ಯೆತಾಂ ಮ್ಹಣ್ತಾನಾಂಚ್ ಹಾಂವೆಂ ತಾಕಾ ನಿರಾಕರ್‌ಸಿಲ್ಲೆಂ ಜಾಲ್ಯಾರ್...!? ಕಾಂಯ್ಚ್ ಪ್ರಾಬ್ಲೆಮ್ ಜಾತೆನಾಂತ್. ಬರ್‍ಯಾ ಬಾಶೆನ್ ಹಾಂವ್ ಆನಿಂ ಆಶಾ..." ಚಿಂತ್ಚಾ ಮ್ಹಜ್ಯಾ ಚಿಂತ್ನಾಂಕ್ ಎಕಾಚ್ಚ್ ಫರಾ ಖಾಡುಂ ಪಡ್ಲೆಂ.

ಮುಖ್ಲ್ಯಾನ್ ಥಾವ್ನ್ ಆಪ್ಲೆ ಜಯ್ತ್ ಹೆಡ್‌ಲೈಟ್ ಜಳವ್ನ್ ಯೆಂವ್ಚಾ ಟ್ರಕ್ಕಾಕ್ ಭಿಂಯೆವ್ನ್ ತಾಕಾ ವಾಟ್ ದೀಂವ್ಕ್ ಮ್ಹಜೆಂ ಕಾರ್ ಹಾಂವೆಂ ರಸ್ತ್ಯಾ ಥಾವ್ನ್ ಸಕಯ್ಲ್ ದೆಂವಯ್ಲಾಂ ಮಾತ್ರ್!

ತಿತ್ಲ್ಯಾರ್!

ಆಚಾನಕ್ ಮ್ಹಜ್ಯಾ ವಾಟೆಚಾ ದಾವ್ಯಾ ಕುಶಿನ್ ಥಾವ್ನ್ ಕೋಣ್‌ಗಿ ದಾಂವೊನ್ ರಸ್ತ್ಯಾಕ್ ಯೆಂವ್ಚೆಂ ದಿಸ್ತಾನಾ.....’ಗಕ್ಕ್’ ಕರುನ್ ಆಸ್‌ಲ್ಲ್ಯಾ ಸರ್ವ್ ಭಳಾನ್ ಹಾಂವೆಂ ಕಾರಾಚಿ ಬ್ರೇಕ್ ದಾಂಬ್ಲಿ.

ಉಜ್ವ್ಯಾ ಕುಶಿನ್ ಟ್ರಕ್ಕ್! ದಾವ್ಯಾ ಕುಶಿನ್ ಬಾರಿಕ್ ಚರಂಡಿ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ ದೊಳ್ಯಾಂಕ್ ದಿಸ್ಲೆಂ ನಾಂ. ತ್ಯಾ ಶಿವಾಯ್ ಆವ್ಜಿತ್ತ್ ಕೊಣಾಚೆಂಗಿ ರಸ್ತ್ಯಾಕ್ ಯೆಣೆಂ! ಮ್ಹಾಕಾ ಕಾರ್ ಹೆಂವ್ಶಿ ತೆಂವ್ಶಿ ಘುಂವ್ಡಾವ್ಕ್‌ಯ್ ಆವ್ಕಾಸ್ ನಾತ್‌ಲ್ಲೊ. ಮತಿನ್ ದುಸ್ರೆಂ ಕಿತೆಂಯ್ ಚಿಂತ್ಚಾ ಪಯ್ಲೆಂ ಪಾಯಾಂನಿಂ ಬ್ರೇಕ್ ದಾಂಬುನ್ ಜಾಲ್ಲಿ.

"ರಾ.....ಯನ್’ ಆಶಾನ್ ಮಾರ್‌ಲ್ಲಿ ಕಿಂಕ್ರಾಟ್ ’ಬರ್ರ್...’ ಕರುನ್ ಜಾಲ್ಲ್ಯಾ ಬ್ರೇಕಿಚಾ ಆವಾಜಾ ಸವೆಂ ವಿಲೀನ್ ಜಾವ್ನ್ ವೆತಾನಾ ಏಕ್ ಪಾವ್ಟಿಂ ಡ್ಯಾಷ್ ಬೋರ್ಡಾಕ್ ಆದ್ಳಾಲ್ಲೆಂ ಆಶಾ ಪರ್ತ್ಯಾಕ್ ಆಪ್ಲ್ಯಾ ಬಸ್ಕೆಕ್ ಪಾಟಿಂ ದಾಡಾಲೆಂ.

ಕಾರಾಚಾ ಸ್ಟೇರಿಂಗಾಕ್ ಘಟ್ ಹಾತ್ ಧರ್‌ಲ್ಲ್ಯಾ ಮ್ಹಜೆಂ ಧ್ಯಾನ್ ಆಶಾ ವಯ್ರ್ ವಚಾನಾಸ್ತಾನಾ ಮುಖ್ಲ್ಯಾ ರಸ್ತ್ಯಾರ್ ಕಾರಾಕ್ ಆಡ್ ಜಾವ್ನ್ ಆಚಾನಕ್ ದಾಂವೊನ್ ಆಯಿಲ್ಲ್ಯಾ ವ್ಯಕ್ತಿಚೆರ್‌ಚ್ ಖಂಚ್‌ಲ್ಲೆಂ.

"ಮೈ ಗಾಡ್!" ಮುಖಾರ್ ಪಳೆವ್ನ್ ಉದ್ಗಾರ್ಲೊ ಹಾಂವ್.

ಮ್ಹಜ್ಯಾ ದೊಳ್ಯಾಂ ಮುಖಾರ್ ಏಕ್ ಚಲಿ ಉಭಿ ಆಸ್‌ಲ್ಲಿ. ತಿಯೀ ಸಾರ್ಕೆಂ ಮ್ಹಜ್ಯಾ ಕಾರಾಚಾ ಬಂಪರಾಕ್ ಲಾಗೊನ್! ಏಕ್‌ಚ್ ಏಕ್ ಇಂಚ್ ಕಾರ್ ಮುಖಾರ್ ಗೆಲ್ಲೆಂ ಜಾಲ್ಯಾರ್‌ಯ್ ಮ್ಹಜೆಂ ಕಾರ್ ತ್ಯಾ ಚಲಿಯೆಕ್ ದರ್ಣಿಕ್ ಶೆವ್ಟಾವ್ನ್ ಉಡವ್ಚಾಂತ್ ಕಾಂಯ್ಚ್ ದುಭಾವ್ ನಾತ್‌ಲ್ಲೊ.

ದೆವಾನ್‌ಚ್ ರಾಕ್ಲೆಂ ಜಾಯ್ಜಾಯ್. ’ಉಫ್...’ ಏಕ್ ಭಳಾಧೀಕ್ ಶ್ವಾಸ್ ಸೊಡ್ಲೊ ಹಾಂವೆಂ. ತಿತ್ಲ್ಯಾರ್....!

ಮ್ಹಜ್ಯಾ ಕಾರಾಕ್ ಆಡ್ ಆಯಿಲ್ಲಿ ಚಲಿ, ತಿಚ್ಯಾ ಹಾತಾಂತ್ ಕಿತೆಂಗಿ ಆಸ್‌ಲ್ಲ್ಯಾ ಪರಿಂ ದಿಸ್ತಾಲೆಂ ತಿ, ಹೆಂವ್ಶಿ ದಾಂವೊನ್ ಯೇವ್ನ್ ಬಂದ್ ಆಸ್ಲೆಲ್ಯಾ ಆಶಾಚಾ ಕುಶಿಚಾ ಆರ್ಶ್ಯಾಕ್ ಮಾರುಂಕ್ ಲಾಗ್ತಾನಾ, ಕಾಂಯ್ಚ್ ಕಳಿತ್ ನಾತ್‌ಲ್ಲ್ಯಾ ಆಶಾನ್ ಆರ್‌ಸೊ ಸಕಯ್ಲ್ ಕರುಂಕ್ ತಾಚ್ಯಾ ರಿವೊಲ್ವಿಂಗ್ ಹ್ಯಾಂಡಲಾರ್ ಹಾತ್ ಘಾಲಾ ಮಾತ್ರ್! ತಿತ್ಲೆಂಚ್!

’ಸಕ್ಕ್’ ಕರುನ್ ಆಶಾಕ್ ಹಾಂವೆಂ ಹೆಂವ್ಶಿ ವೊಡ್ಲೆಂ. ಮದ್ಯಾನೆಚ್ಯಾ ರಾತಿರ್ ಹ್ಯಾ ಹೈವೇ ವಯ್ರ್ ಕಿತೆಂ ಚಲ್ತಾಂ ತೆಂ ಹಾಂವ್ ಆಯ್ಕೊನ್ ಜಾಣಾಂ ಆಸ್‌ಲ್ಲೊ. ಕೆದ್ನಾಂಯ್ ಲೂಟ್ ಮಾರ್ ಚಲ್ತಾ ಜಾಲ್ಯಾರ್ ಕೆದ್ನಾಂಯ್ ಕುಡಿಚೊ ಧಂದೊ ಕರ್ಚಿಂ ಬಾಯ್ಲಾಂಯೀ ಆಶೆಂ ರಾತಿಕ್ ರಸ್ತ್ಯಾಂನಿ ದಿಷ್ಟಿಕ್ ಪಡ್ತಾತ್. ತರ್ ಹೆಂ....!?

ಆರ್ಶ್ಯಾ ಬಾಯ್ಲ್ಯಾನ್ ತೆಂ ಚಲಿ ಆರ್‌ಶ್ಯಾಕ್ ಮಾರ್ತಾಲೆಂ. ತ್ಯಾ ಕಾಳೊಕಾಂತ್ ತಾಚಾ ಹಾತಿಂತ್ ಕಿತೆಂ ಆಸಾ ತೆಂ ಮ್ಹಾಕಾ ದಿಸೊನ್ ಆಯಿಲ್ನಾ. ಜಾತಾ ತಿತ್ಲ್ಯಾ ವೆಗ್ಗಿಂ ಹಾಂಗಾಂ ಥಾವ್ನ್ ನಿಕಳ್ಳ್ಯಾರ್ ಬರೆಂ. ತ್ಯಾ ಶಿವಾಯ್ ಹ್ಯಾ ಮದ್ಯಾನೆರ್..., ಹ್ಯಾ ಕಾಳೊಕಾಂತ್..., ಹಾಂವ್ ಎಕ್ಸುರೊಂ ಜಾಲ್ಯಾರ್ ವ್ಹಡ್ ನಾತ್‌ಲ್ಲೆಂ ಪುಣ್, ಆಜ್ ಮ್ಹಜೆಂ ಸಾಂಗಾಂತಾ ಮ್ಹಜೆಂ ಆಶಾ ಆಸ್‌ಲ್ಲೆಂ. ತಾಕಾ ಕಾಂಯ್ ಚಡ್ ಉಣೆಂ ಜಾಲ್ಯಾರ್! ಮ್ಹಜ್ಯಾನ್ ಮುಖಾರ್ ಚಿಂತುಂಕ್ ಜಾಲ್ನಾಂ. ಆಶಾ, ಭಾಯ್ರ್ ತ್ಯಾ ಚಲಿಯೆಕ್‌ಚ್ ಪಳೆತಾಲೆಂ. "ನೆಣಾಂ ಆಸ್‌ಲ್ಲ್ಯಾ ಗಾಂವಾಂತ್ ಕಷ್ಟಾಂತ್ ಸಾಂಪಡ್ಚಾಕ್‌ಯಿ ಹಾಂಗಾಂ ಥಾವ್ನ್ ಪಲಾಯನ್ ಕೆಲ್ಲೆಂಚ್ ಬರೆಂ" ಮ್ಹಜಿ ಮತ್ ಮ್ಹಾಕಾ ಜಾಗಯ್ತಾಲಿ. ತಾಚ್ಯಾ ಸವೆಂ ’ದಡ್ ದಡ್’ ಕರುನ್ ತೆಂ ಚಲಿ ಆರ್ಶ್ಯಾಕ್ ಮಾರುನ್ಂಚ್ ಆಸ್‌ಲ್ಲೆಂ.

"ತ್ಯಾ ಚಲಿಯೆಕ್ ಕಾಂಯ್ ಜಾಂವ್ಕ್ ನಾಂ ರಾಯನ್. ಆತಾಂ ತುಂ ಹಾಂಗಾಂ ರಾವನಾಕಾ ಧಾಂವ್..........ಧಾಂವ್..!" ಮತಿನ್ ಧಾಂವ್ಣೆಕ್ ಉಲೊ ದಿತಾನಾ ಹಾಂವೆಂ ಮುಖಾರ್ ಚಿಂತ್ಚೆಂ ಪ್ರಯತ್ನ್ ಕೆಲೆಂ ನಾಂ. ಕಾರಾಚೆಂ ಕ್ಲಚ್ ದಾಂಬುನ್ ಗೇರ್ ವೊಡುನ್ ಎಕ್ಸಿಲೇಟರ್ ಧಾಂಬ್ತಾನಾ...

"ಭೋವ್ಶಾ ಭಾಯ್ರ್ ಥಾವ್ನ್ ತ್ಯಾ ಚಲಿಯೆನ್ ಪಳೆಯಿಲ್ಲೆಂ ಜಾಯ್ಜಾಯ್. ತೆಂ ಎಕಾಚ್ಚ್ ಫರಾ ಮುಖಾರ್ ದಾಂವೊಂಕ್ ಆನಿಂ ಹಾಂವೆಂ ಎಕ್ಸಿಲೇಟರ್ ದಾಂಬುಂಕ್ ಸಮಾ ಜಾಲೆಂ.

ಮುಖಾರ್ ಕಾರಾಕ್ ಆಡ್ ಆಯಿಲ್ಲ್ಯಾ ತಾಕಾ ಮ್ಹಜೆಂ ಕಾರ್ ಆಧಾಳ್ತಾನಾ ತೆಂ ಚಲಿ ರಸ್ತ್ಯಾಕ್ ಶೆವ್ಟಾಲೆಂ. ಆತಾಂ ಮ್ಹಾಕಾ ಹಾಂಗಾಂ ಥಾವ್ನ್ ದಾಂವೊಂಕ್‌ಯಿ ಸಾಧ್ಯ್ ನಾತ್‌ಲ್ಲೆಂ.

ತಿತ್ಲೆಂಚ್!

ಕಾರಾಚೆಂ ದಾರ್ ಉಗ್ತೆಂ ಕರುನ್, ಭಾಯ್ರ್ ಆಯಿಲ್ಲ್ಯಾ ಹಾಂವೆಂ, ಮುಖಾರ್ ಧಾಂವ್ ಮಾರುನ್ ತ್ಯಾ ಚಲಿಯೆಕ್ ಪಳೆಯ್ತಾನಾ, ತ್ಯಾ ಕುಶಿನ್ ಥಾವ್ನ್ ಆಶಾ ಕಾರಾ ಥಾವ್ನ್ ಸಕಯ್ಲ್ ದೆಂವ್‌ಲ್ಲೆಂ ಮ್ಹಜ್ಯಾ ಗುಮಾನಾಕ್ ಗೆಲೆಂಚ್ ನಾಂ.

ಕಾರಾಕ್ ಆದ್ಳೊನ್ ಪಡ್ಲೆಲೆಂ ಚಲಿ ಉಟೊಂಕ್ ಪ್ರಯನ್ ಕರ್ತಾಲೆಂ. ಕಾರಾಚಾ ಹೆಡ್ ಲೈಟಾಚಾ ಉಜ್ವಾಡಾಂತ್ ತ್ಯಾ ಚಲಿಯೆಕ್, ಉಟೊಂಕ್ ಪ್ರಯತ್ನ್ ಕರ್ಚಾ ತಾಕಾ ಪಳೆತಾನಾ ಹಾಂವ್ ಶಿರಿಂ ಚುಕ್ಲೊಂ. ಕಾಳೊಕಾಂತ್ ಮ್ಹಾಕಾ ಸಾರ್ಕೆಂ ಕಾಂಯ್‌ಚ್ ದಿಸ್ಲೆಂ ನಾಂ ತರೀ,

ತ್ಯಾ ಚಲಿಯೆಚ್ಯಾ ಹಾತಾಂತ್ ಏಕ್ ನೆಣ್ತೆಂ ಬಾಳ್ಶೆಂ ಆಸ್‌ಲ್ಲೆಂ! ಪಾಲ್ವಾಂತ್ ಗುಟ್ಲಾಯಿಲ್ಲೆಂ! ಸಮ್ಜಾಲೆಂ ನಾಂ. ಮ್ಹಜ್ಯಾ ಮತಿಕ್ ಬಿಂಯಾನ್ ವೆಡೊ ಮಾರ್‌ಲ್ಲೊ. ಭಂವ್ತಣಿಚ್ಯಾ ಥಂಡ್ ಹವ್ಯಾಂತ್‌ಯಿ ಕಾಳ್ಜಾಂತ್ ಇಂಗ್ಳೆ ಪುಲ್ತಾತ್ ತಶೆಂ ಜಾಲೆಂ.

ತಿತ್ಲ್ಯಾರ್!

ಉಟೊಂಕ್ ಪ್ರಯತ್ನ್ ಕರ್ಚಿ ತಿ ಚಲಿ ಆಪ್ಲ್ಯಾ ಹಾತಂತ್ಲ್ಯಾ ಬಾಳ್ಶಾಕ್ ಆಪ್ಲ್ಯಾ ಫಾಸ್ಳೆಂತ್ ದಾಂಬುನ್ ಧರುನ್ ಮ್ಹಾಕಾ ಪಳೆವ್ನ್,

"ಬುದ್ಧಿ........ಬುದ್ಧಿ...!"

ಮ್ಹಳ್ಳೆಂ ತೆಂ ಆವ್ಚಿತ್ತ್ ತೆವ್ಶಿಂ ಮ್ಹಜ್ಯಾ ಬಾಯ್ಲೆಚ್ಯಾ ಕುಶಿನ್ ಘುಂವೊನ್ 

"ಅಕ್ಕಾ..... ನನ್ ಮಗೂ ಮೈ ಕೈ ಆಡಿಸ್ತಿಲ್ಲಾ.... ಇಲ್ಲೇ ಮುಂದೆ ಆಸ್ಪತ್ರೆ ಗಂಟ....!"

ತೆಂ ಚಲಿ ಆಶಾಕ್ ಪಳೆವ್ನ್ ಉಲಯ್ತಾನಾ ತೆಂ ಕನ್ನಡ ಉಲಂವ್ಚೆಂ ಗಾಂವ್ಟಿ ಚೆಡುಂ ಮ್ಹಣೊನ್ ಸಮ್ಜಾಲ್ಲೊಂ ಹಾಂವ್, ಆತಾಂ ಇಲ್ಲೆಂ ಧಯ್ರ್ ಆರಾವ್ನ್,

"ಹೇಯ್! ಯಾರ್ರೀ ನೀವು? ಹೀಗೆ ಸಡನ್ನ್ ಆಗಿ ರಸ್ತೆಗೆ ಅಡ್ಡ ಬಂದು.....ಏನಾದರೂ ಹೆಚ್ಚು ಕಡಿಮೆ...."

"ಮಂಗ್ಳೂರ್‌ನವ್ರಾ ಬುದ್ಧಿ?" ಮ್ಹಜಿ ಉತ್ರಾಂ ಆಖೇರ್ ಜಾಂವ್ಚಾ ಪಯ್ಲೆಂಚ್ ಮ್ಹಜಿ ಉತ್ರಾಂ ತುಟಯ್ಲಿಂ ತಾಣೆಂ. ಭೋವ್ಶಾ ಮ್ಹಜ್ಯಾ ಹಾಂವೆಂ ಉಲಂವ್ಚಾ ಭಾಶೆನ್ಂಚ್ ತಾಕಾ ಮ್ಹಜ್ಯಾ ಗಾಂವಾಚಿ ಪರಿಚಯ್ ಜಾಲ್ಲಿ ಆಶ್ತೆಲಿ. "ದ್ಯಾವ್ರು ಹಾಂಗೆ ಬಂದ್ಬಿಟ್ರಿ....ನನ್ಮಗೂನಾ ಉಳಿಸ್ ಕೊಡಿ ಬುದ್ಧಿ!" ಕಾರಾಚಾ ಜಯ್ತ್ ಹೆಡ್ ಲೈಟಾಚಾ ಉಜ್ವಾಡಾಂತ್ ತೆಂ ಚಲಿ ವಿನಂತಿ ಕರುಂಕ್ ಲಾಗ್ಲೆಂ. "ಏನಾಗೈತೆ ಅಂತಾನೆ ಗೊತ್ತಾಗ್ತಿಲ್ಲಾ ಬುದ್ಧಿ....ನನ್ ಮಗೂ...!" ಆತಾಂ ತ್ಯಾ ಚಲಿಯೆಚ್ಯಾ ದೊಳ್ಯಾಂನಿ ದುಃಖಾಂ ಉದೆಲಿ.

"ಈ ರಾತ್ರಿಯಲ್ಲಿ ಡಾಕ್ಟರ್ ಎಲ್ಲಿ ಸಿಗ್ತಾರೆ? ಇಲ್ಲಿ ನಾವು ಹೊಸಬರು. ಆಸ್ಪತ್ರೆ ಎಲ್ಲಿ ಇದೆ ಅಂತಾನೆ ನನಗೆ ಗೊತ್ತಿಲ್ಲ." ಹಾಂವ್ ಸತ್ ಉಲಯ್ಲೊಂ. ಮ್ಹಾಕಾ ಭುರ್ಗ್ಯಾಚೆ ಪಾಯ್ ಮಾತ್ರ್ ದಿಸ್ತಾಲೆ. ತಾಕಾ ಪಳೆಂವ್ಚೆ ಹಾಂವ್ ಪ್ರಯತ್ನ್ ಕರ್ತಾಲೊ. ಹೆಂ ಚಲಿ ಜಾಲ್ಯಾರಿಯ್ ಬಿಲ್ಕುಲ್ ಹಳ್ಳೆಚೆಂ ಆಶಿಕ್ಪಿ ಚೆಡುಂ ನ್ಹಂಯ್ ಮ್ಹಣೊನ್ ತಾಚಾ ಉಲೊಣ್ಯಾಂತ್ ಹಾಂವೆಂ ಪಾರ್ಕಿಲ್ಲೆಂ.

"ಹಳ್ಳಿ ಡಾಕ್ಟರು ಬ್ಯಾಡ ಬುದ್ಧಿ....ನನ್ಮಗೂನ ಕೊಲ್ಲೋರೆ ಇವ್ರು. ಹಾಸನ್ ಕಡೆ ಆಸ್ಪತ್ರೆ ಐತೆ!" ಭುರ್ಗ್ಯಾಕ್ ಆಪ್ಲ್ಯಾ ಪಾಲ್ವಾಂತ್ ಮ್ಹಜ್ಯಾ ನದ್ರೆ ಥಾವ್ನ್ ಲಿಪವ್ನ್ ಉಲಯ್ಲೆಂ ತೆಂ.

"ಹಾಸನ..!" ಉದ್ಗಾರ್ಲೊಂ ಹಾಂವ್. ಎದೊಳ್‌ಚ್ ಸಕಲೇಶ್‌ಪುರ ಉತ್ರೊನ್ ಸಭಾರ್ ಪಯ್ಸ್ ಆಯಿಲ್ಲ್ಯಾಂವ್ ಆಮಿಂ. ಮ್ಹಾಕಾಯ್ ಬೆಂಗ್ಳೂರಾಕ್ ವಚೊಂಕ್ ಹಾಸನ್ ಉತ್ರೊನ್ಂಚ್ ವಚೊಂಕ್ ಜಾಯ್. ಪುಣ್, ಹಾಸನಾಂತ್ ಖಂಯ್ಸರ್ ಕಿತೆಂ ಆಸಾ ತೆಂ ಕೋಣ್ ಜಾಣಾಂ? ತ್ಯಾ ವಯ್ರ್, ಹ್ಯಾ ರಾತಿಕ್, ಆಸ್ಪತ್ರ್ ಖಂಯ್ ಸೊಧುಂ? ಮ್ಹಜ್ಯಾ ಹನಿಮೂನಾಕ್ ಹಿ ಕಸಲಿ ಶನಿ ಆಡ್ ಆಯ್ಲಿಗಾಯ್? ಚಿಂತಾಲೊಂ ಹಾಂವ್.

"ಹಾಕಾ ಆಸ್ಪತ್ರೆ ವರೇಗ್ ಸೊಡ್ಯಾಂ ರಾಯನ್!" ಆತಾಂ ಉಲಯ್ಲೆಂ ಆಶಾ. ಪುಣ್ ಮತ್ ಮಾತ್ರ್ ಕಿತ್ಯಾಕ್‌ಗಿ ಫುಡಾರಾಚಾ ಆಪಯಾಚೆಂ ಸೈರನ್ ಗುಪಿತ್ ಮಾರುನ್ ಆಸ್‌ಲ್ಲಿ.

"ಹಾಸನದಲ್ಲಿ ಬಿಟ್ಟು ಬಿಡುತ್ತೇನೆ. ಯಾಕೆಂದರೆ ನಮಗೆ ಬೆಂಗ್ಳೂರಿಗೆ ಹೊಗ್ಲಿಕ್ಕೆ!"

"ಪರ್ವಾಗಿಲ್ಲ ಬುದ್ಧಿ! ಆಲ್ಲಿಗಂಟ ಬುಟ್ಬುಟ್ರೆ ಸರಿ!" ತ್ಯಾ ಚಲಿಯೆಚ್ಯಾ ತೊಂಡಾರ್ ಸಮಾಧಾನ್ ವ್ಹಾಳೊನ್ ಆಯಿಲ್ಲೆಂ ತೆಂ ಪಳೆಲೆಂ ಹಾಂವೆಂ.

"ಸರಿ... ಕೂತ್ಕೊ!" ಮ್ಹಳ್ಳ್ಯಾ ಹಾಂವೆಂ ಕಾರಚ್ಯಾ ದಾರಾ ತೆಂವ್ಶಿ ಮೆಟಾಂ ಕಾಡ್ತಾನಾ ಮ್ಹಜ್ಯಾ ಕುಶಿನ್ಂಚ್ ಆಯ್ಲೆಲ್ಯಾ ತಾಕಾ ಕಾರಾಚೊ ಪಾಟ್ಲೆಂ ದಾರ್ ಉಗ್ತೆಂ ಕರುನ್ ದಿಲೆಂ. ಹಾತಾಂತ್ಲ್ಯಾ ಬಾಳ್ಶಾಕ್ ತಶೆಂಶ್ ಪಾಲ್ವಾ ಬಿತರ್ ಲಿಪವ್ನ್, ತೆಂ ಕಾರಾ ಬಿತರ್ ಬಸೊನ್, ಹಾಂವೆಂ ಕಾರಾಚೊ ಡೋರ್ ಬಂಧ್ ಕರ್ತಾನಾ, ಆಶಾ, ತ್ಯಾ ಕುಶಿನ್ ಕಾರಾರ್ ಬಸ್ಲೆಂ. ಹ್ಯಾ ಕುಶಿನ್, ಹಾಂವ್‌ಯ್ ಕಾರಾರ್ ಬಸ್‌ಲ್ಲೊಂ, ಕಾರ್ ಮುಖಾರ್ ಧಾಂವ್ಡಾಯ್ತಾನಾ, ಆಚಾನಕ್ ಮ್ಹಜಿ ನದರ್ ಕಾರಾಚಾ ಸೈಡ್ ಮಿರರಾಚೆರ್ ಗೆಲಿ. 

ತಿತ್ಲೆಂಚ್!

ಮ್ಹಜ್ಯಾ ಹರ್ದ್ಯಾಂತ್ಲೆಂ ಕಾಳಿಜ್ ತೊಂಡಾಕ್ ಆಯಿಲ್ಲ್ಯಾ ಪರಿಂ ಭಗ್ಲೆಂ ಮ್ಹಾಕಾ ಪಾಟ್ಲೆಂ ಮಿರರಾಂತ್ಲೆಂ ದ್ರಶ್ಯ್ ಪಳೆವ್ನ್!

ಮ್ಹಜ್ಯಾ ಕಾರಾರ್ ಬಸ್ಲೆಲೆಂ ಚಲಿ ರಸ್ತ್ಯಾಕ್ ದಾಂವೊನ್ ಆಯಿಲ್ಲ್ಯಾ ಕುಶಿನ್ ಥಾವ್ನ್ಂಚ್ ಧಾ ವೀಸ್ ಉಜ್ಯಾನ್ ಜಳ್ಚ್ಯೊ ಚೂಡಿ ಖಂಯ್ ಥಾವ್ನ್ ಉದೆಲ್ಯೊ ಕೋಣ್ ಜಾಣಾಂ ಆತಾಂ ತ್ಯೊ ರಸ್ತ್ಯಾಕ್ ಪಾವ್‌ಲ್ಲ್ಯೊ! ಉಜ್ಯಾಚೊ ಜಳ್ಚ್ಯೊ ಚೂಡಿ...! ಮ್ಹಜ್ಯಾ ಕಾರಾ ಪಾಟ್ಲ್ಯಾನ್..!

ಮತಿಂತ್ ವ್ಹಾಜೊನ್ ಆಸ್‌ಲ್ಲೆಂ ಆಪಯಾಚೆಂ ಸೈರನ್, ಆತಾಂ, ಝುಜಾಚಿ ತಂಬೂರಿ ವ್ಹಾಜ್‌ಲ್ಲ್ಯಾ ಪರಿಂ ವ್ಹಾಜೊಂಕ್ ಲಾಗ್ತಾನಾ, ಸವ್ಕಾಸ್ ಪಾಟಿಂ ಘುಂವ್‌ಲ್ಲ್ಯಾ ಹಾಂವೆಂ, ಪಾಟ್ಲ್ಯಾ ಆರ್ಶ್ಯಾ ಮುಖಾಂತ್ರ್ ಪಾಟಿಂ ತಿಳುನ್ ಪಳೆಯ್ತಾನಾ ಮ್ಹಜ್ಯೆ ಸವೆಂ ಆಶಾ ಆನಿಂ ತಿ ಚಲಿಯ್ ಪಾಟಿಂ ಘುಂವ್‌ಲ್ಲಿ. ತಿತ್ಲ್ಯಾರ್ ಹಾಂವೆಂ ಮ್ಹಾಕಾ ಕಳಿತ್ ನಾತ್‌ಲ್ಲ್ಯಾ ಪರಿಂಚ್ ಕಾರಾಚಿ ಬ್ರೇಕ್ ದಾಂಬ್ಲಿಂ.

"ಊರ್‌ನಾಗೆ ಮಾರಿ ಪೂಜೆ ಐತೆ ಬುದ್ಧೀ! ಎಲ್ಲಾರು ಸೇಕೊಂಡು ಬಿಟ್ಟವ್ರೆ! ಇವ್ರೂ ಮಾರಿ ಬಲಿ ನೋಡೋಕೆ ಒಂಟವ್ರೆ..!" ತ್ಯಾ ಚಲಿಯೆಚಿಂ ಉತ್ರಾಂ ಮ್ಹಜ್ಯಾ ಕಾನಾಕ್ ಪಡ್ತಾಲಿಂ ಜಾಲ್ಯಾರಿಯ್ "ಖಂಯ್ ತರ್‌ಯ್ ಖಂಡಿತ್ ಕಳಿತ್ ನಾತ್ಲೆಲೆಂ ಘಡೊನ್ ಆಸಾ. ಚತ್ರಾಯ್! ರಾಯನ್ ಚತ್ರಾಯ್!" ಮ್ಹಜಿ ಮತ್ ಮ್ಹಾಕಾ ಜಾಗಯ್ತಾಲಿ.

ಹನಿಮೂನಾಚಾ ವಾಟೆರ್ ಹಾಂವ್ ಆನಿಂ ಆಶಾ ಜಗ್ಡೊನ್ ತರೀ ಆಮ್ಚಾಚ್ಚ್ ಸಂಸರಾಂತ್ ಆಸ್‌ಲ್ಲ್ಯಾಂವ್. ಪೂಣ್ ಆತಾಂ....!"?

ಹಾಂಗಾಚೆಂ ಸಂಪೂರ್ಣ್ ವಾತವರಣ್ಂಚ್ ಬದ್ಲಾಲೆಂ. ಆನಿಂ ಕಿತೆಂ ಕಾರ್ ಥಾಂಬ್ಲೆಂ ಮ್ಹಣ್ತಾನಾ....!

"ಸಮಯ ಆಗೈತೆ ಬುದ್ಧಿ.... ಊರ್‌ನಾಗೆ ಮಾರಿನಾ ಓಡ್ಸೋರು ಆಗಿರ್ಬೋದು!" ತ್ಯಾ ಚಲಿಯೆನ್ ಸಾಂಗ್ತಾನಾ ಮ್ಹಜ್ಯಾ ತಾಳ್ಯಾಚಿ ಶೆಳ್ ಸುಕ್ಲಿ. ಕಾರಾಚೆಂ ಆಕ್ಸಿಲೇಟರ್ ಭಳಾನ್ ದಾಂಬ್ಲೆಂ ಹಾಂವೆಂ.

"ಮಾರಿ ಬಲಿ !?" ಮಿರರಾಕ್ ಘುಂವ್‌ಲ್ಲ್ಯಾ ದಿಷ್ಟೆಕ್ ಆತಾಂ ಹಾಂವೆಂ ಮುಖಾರ್ ರಸ್ತ್ಯಾಕ್ ಕೇಂದ್ರಿಕತ್ ಕೆಲಿ. ತಾಚೆ ಸವೆಂ ಆಪಾಪಿಂಚ್ ಉತ್ರಾಂ ತುಟ್ಲಿಂ ಮ್ಹಜ್ಯಾ ಜಿಬೆರ್.

"ಹಾಂ ಬುದ್ಧಿ! ಮಾರಿ ಬಲಿ! ಮಂಗ್ಳೂರ್‌ನಾಗೆ ನಡೆಯೋಲ್ವಾ?" ಉಲಯ್ಲೆಂ ತೆಂ.

"ಯಾವೂರು ರಿ ಇದು?" ಹಾಂವ್‌ಯಿ ಥೊಡೆಂ ಥೊಡೆಂ ತಾಚ್ಯಾ ಗಾಂವ್ಚಿ ಬಾಶೆನ್ ಉಲಂವ್ಕ್ ಲಾಗ್ಲೊಂ. ಆಶಾ ಕಾಂಯ್ಚ್ ಉಲಂವ್ಕ್ ಜಾಯ್ನಸ್ತಾನಾ ಕಾಲುಬುಲು ಜಾವ್ನ್ ಮ್ಹಾಕಾಚ್ ಪಳೆತಾಲೆಂ.

"ನಮ್ಮೂರಾ.....?"

"ಹೌದ್ರಿ, ನಿಮ್ಮೂರೇ!"

"ಕೋಡಗನ ಹಳ್ಳಿ!"

ಸರ್ರೀ ಹೆಸರು ಕಣ್ರೀ ನಿಮ್ಮೂರಿಂದು" ".....ಕೋಡಗನ ಹಳ್ಳಿ!"

"ಯಾಕ್ರೀ ಚೆನ್ನಾಗಿಲ್ವ?"

"ಚೆನ್ನಾಗಿದೆ! ತುಂಬಾ ಚೆನ್ನಾಗಿದೆ!"

"ಮಂಗ್ಳೂರು ಹೆಂಗೈತೆ?" ಮ್ಹಜ್ಯಾ ಗಾಂವಾಕ್ ಪಾವ್ಲೆಂ ತೆಂ.

"ಮಾರಿ ಬಲಿ ಆಂದ್ರೆ ಏನ್ರೀ ಇದು?" ಹಾಂವೆಂ ತಾಕಾಚ್ ಸವಾಲ್ ಕೆಲೆಂ.

"ಓ...........ಬಿಡ್ರಿ ನಿಮ್ಗೆ ತಿಳ್ಯಾಕಿಲ್ಲಾ?"

"ಪೂಜೆ ನಡೆಯುತ್ತೆ...! ವರ್ಷಕೊಂದ್ಸಾರಿ ಕೋಳಿ, ಕುರಿ, ಕೋಣ, ಅಂತ ಬಲಿನೂ ನಡೆಯುತ್ತೆ" ತಿ ಚಲಿ ಸಾಂಗೊನ್ ವೆತಾನಾ ಮ್ಹಜ್ಯಾ ದೊಳ್ಯಾಂ ಮುಖಾರ್ ಮಾರಿಚಿ ಪೂಜಾ ಚಲ್ತಾ ತಶೆಂ ಭೊಗ್ಲೆಂ. ತಾಂಬ್ಡ್ಯಾ ತಾಂಬ್ಡ್ಯಾ ಲಾಂಬ್ ರಗ್ತಾಳ್ಯಾ ಜಿಬೆಚ್ಯಾ ಮಾರಿಚಿ ಪೂಜಾ!

"ಒಂದ್ ಒಂದ್ಸಾರಿ...!" ಉಲಂವ್ಚೆಂ ತೆಂ ಆತಾಂ ಮೌನ್ ಜಾಲೆಂ. ತಾಚ್ಯಾ ಮೌನತಾಂತ್ ಹಾಂವೆಂ ಪಾಟಿಂ ಆರ್ಶ್ಯಾಂತ್ ಪಳೆಲೆಂ. ಆತಾಂ ಮ್ಹಾಕಾ ಸಗ್ಳೆಂಚ್ ನಿತಳ್ ದಿಸೊಂಕ್ ಲಾಗ್ಲೆಂ. ತ್ಯೊ ಚೂಡಿ ಕೆದಾಳಾಗಿ ಮಾಯಾಗ್ ಜಾಲ್ಲ್ಯೊ. ಮ್ಹಜ್ಯಾ ಕಾರಾನ್ ಆರಾಯಿಲ್ಲ್ಯಾ ವೇಗಾಂತ್ ಆಮಿಂ ಸುಮಾರ್ ಪಯ್ಸ್ ಪಾವ್‌ಲ್ಲ್ಯಾಂವ್. ಜಾಲ್ಯಾರ್‌ಯ್ ಹ್ಯಾ ಆಗಂತುಕ್ ಚಲಿಯೆ ವಯ್ರ್ ಮಾತ್ರ್ ಮ್ಹಜ್ಯಾ ಮತಿನ್ ಪಾತ್ಯೆಂವ್ಚೆಂ ಧಯ್ರ್ ಕೆಲೆಂಚ್ ನಾಂ. ಹಾಂಗಾಸರ್ ಸಗ್ಳೆಂಚ್ ಪರ್ಕಿ ಮ್ಹಣ್ತಾನಾ ಹಾಂವೆಂ ಜಾಗ್ರುತ್ ರಾಂವ್ಚೆಂ ಚಡ್ ಗರ್ಜೆಚೆಂ ಜಾವ್ನಾಸ್‌ಲ್ಲೆಂ. ಆಶಾ ಜಾಲ್ಯಾರ್‌ಯಿ ಮ್ಹಜ್ಯಾ ಆನಿಂ ತ್ಯಾ ಚಲಿಯೆಚಾ ಸಂಭಾಷಣಾಕ್ ಕಾನ್ ದೀವ್ನ್ ಆಯ್ಕಾತಾಲೆಂ.

"ಒಂದೊದ್ಸಾರಿ...!" ಪರ್ತ್ಯಾಕ್ ಉಲಯಿಲ್ಲೆಂ ತಿ ಚಲಿ ಸವ್ಕಾಸ್ ಆಪ್ಲ್ಯಾ ಪಾಲ್ವಾ ಬಿತರ್ಲ್ಯಾ ಭುರ್ಗ್ಯಾಕ್ ಪಳೆವ್ನ್,

"ನರ ಬಲಿನೊ ಕೊಡ್ತಾವ್ರೆ!" ತ್ಯಾ ಚಲಿಯೆಚಿಂ ಉತ್ರಾಂ ಮ್ಹಜ್ಯಾ ಕಾನಿಂ ಪಡ್ತಾನಾ ಎಕಾಚ್ಚ್ ಫರಾ ಮ್ಹಜಿಂ ಅಂತರ್ಮಳಾಂ ಉಡೊನ್ ಹಾಂವೆಂ ಕಾರಾಚಿ ಬ್ರೇಕ್ ದಾಂಬ್ಲಿ.

"ಬರ್ರ್!" ಆವಾಜಾನ್ ಕಾರ್ ’ಗಕ್ಕ್’ ಕರುನ್ ರಸ್ತ್ಯಾಕ್ ಚಾಬೊನ್ ದರುನ್ ಉಭೆಂ ಜಾಲೆಂ. ತಾಚೆ ಪಾಟ್ಲ್ಯಾನ್...!

ಎಕಾಚ್ಚ್ ಫರಾ ಪಾಟ್ಲ್ಯಾ ಬಸ್ಕೆ ಥಾವ್ನ್ ಭುರ್ಗ್ಯಾಚೆಂ ರಡ್ಣೆಂ ಆಯ್ಕೊನ್ ಆಯ್ಲೆಂ.

"ದ್ಯಾವ್ರು ಕಣ್ರೀ...ನೀವು ದ್ಯಾವ್ರು....ನನ್ಮಗೂ ಆತ್ತೈತೆ, ನನ್ ಕಂದಾ ಅತ್ತೈತೆ!" ತಿ ಚಲಿ ಸಂತೊಸಾನ್ ಭರ್ಲೆಂ. ಮ್ಹಜೆಂ ಕಾರ್ ಎದೊಳ್‌ಚ್ಚ್ ರಸ್ತ್ಯಾರ್ ಥಾಂಬಲ್ಲೆಂ. ಪಾಟ್ಲ್ಯಾ ಚಲಿಯೆಚ್ಯಾ ಸಂತೊಸಾಚಾ ಆಕ್ಲಾಸಾಂಕ್ ಪಳೆವ್ನ್ ಹಾಂವ್ ಆನಿಂ ಆಶಾ ಆಮ್ಕಾಂ ಕಳಿತ್ ನಾತ್‌ಲ್ಲ್ಯಾ ಪರಿಂಚ್ ಪಾಟಿಂ ಘುಂವ್ಲ್ಯಾವ್. ಕಾರಾ ಬಿತರ್ಲ್ಯಾ ಕಾಳೊಕಾಂತ್ ಆಮ್ಕಾಂ ಭುರ್ಗೆಂ ಸಾರ್ಕೆಂ ದಿಸ್ಲೆಂ ನಾಂ.

ತಿತ್ಲ್ಯಾರ್!

ರಸ್ತ್ಯಾರ್ ಪಾಶಾರ್ ಜಾಲ್ಲೆಂ ಏಕ್ ಬಸ್ಸ್, ರಸ್ತ್ಯಾ ಮಧೆಂ ಉಭೆಂ ಆಸ್‌ಲ್ಲ್ಯಾ ಆಮ್ಚಾ ಕಾರಾಕ್ ಪಳೆವ್ನ್, ಜೊರಾನ್ ಹಾರನ್ ಮಾರುನ್, ಆಮ್ಚಾ ಕಾರಾಕ್ ಗಶ್ಟುನ್ ಗೆಲೆಂ ಮ್ಹಳ್ಳ್ಯಾ ಪರಿಂ ಪಾಶಾರ್ ಜಾಲ್ಲೆಂ. ಏಕ್ ಪಾವ್ಟಿಂಚಾಕ್ ಮ್ಹಾಕಾ ಮ್ಹಜೆಂ ಕಾರ್ ಹಾಲ್‌ಲ್ಲೊ ಅನ್ಭೋಗ್ ಜಾಲೊ. "ಹೆಂ ಖಂಯ್ಚಾ ನಮುನ್ಯಾಚೆಂ ಡ್ರೈವಿಂಗ್?" ಮತಿಂತ್‌ಚ್ ಉದ್ಗಾರ್‌ಲ್ಲ್ಯಾ ಹಾಂವೆಂ "ಆತಾಂ ದುಸ್ರ್ಯಾನ್ ಆಮ್ಕಾಂ ಲೊಟುನ್ ತೆಂವ್ಶಿ ಉಡವ್ನ್ ವೆಚೆಂ ನಾಕಾ" ಮ್ಹಣೊನ್ ಕಾರಾಕ್ ಮುಖಾರ್ ದಾಂವ್ಡಾಯ್ಲೆಂ.

"ನಿಮ್ಮ ಹೆಸರ್ ಏನು?" ಪರ್ತ್ಯಾಕ್ ಸವಾಲ್ ಕೆಲೆಂ ಹಾಂವೆಂ.

"ಪಾರ್ವತಿ !"

"ಮಗು ಹೆಸ್ರು?"

"ರತ್ನ"

"ಚೆನ್ನಾಗಿದೆ"

"ಮಗೂಗ ಒಸಿ ಮೊಲೆ ಕೊಡ್ತೀನಿ ಬುದ್ಧೀ.....ತಿರಗಾ ನೋಡಬ್ಯಾಡಿ!"

"ಕೊಡಿಸು...!" ಹಾಂವೆಂ ಪರ್ವಣ್ಗಿ ದಿಲಿ.

ಪಾರ್ವತಿ ಆತಾಂ ಉಲಯ್ಲೆಂ ನಾಂ. ತೆಂ ಭುರ್ಗ್ಯಾಕ್ ದೂದ್ ಖಾವಯ್ತಾ ಮ್ಹಣೊನ್ ಹಾಂವ್‌ಯ್ ಥಂಡ್ ಜಾಲೊಂ. ಕಾರ್ ಮಾತ್ರ್ ಮುಖಾರ್ ದಾಂವ್ತಾಲೆಂ. ಹಾಸನಾಕ್ ಆನಿಂ ಫಕತ್ತ್ ಥೊಡಿ ವಾಟ್ ಉರ್‌ಲ್ಲಿ. ಆತಾಂ ಮ್ಹಜ್ಯಾ ಕಾರಾರ್ ಸಗ್ಳೆಂಚ್ ಮೌನ್ ಜಾಲ್ಲೆಂ. ಆಶಾಕ್, ಕುಶಿನ್ ಘುಂವೊನ್ ಪಳೆತಾ ತರ್, ತೆಂ ಜೆಮೆಂವ್ಕ್ ಲಾಗ್‌ಲ್ಲೆಂ. ಭುರ್ಗ್ಯಾಕ್ ದೂದ್ ದಿತಾಂ ದಿತಾಂ ಬಹುಶಃ ಪಾರ್ವತಿಯ್ ನಿದೆಕ್ ವೆಂಗ್‌ಲ್ಲೆಂ ಜಾಯ್ಜಾಯ್. ತಾಚ್ಯಾ ಭುರ್ಗ್ಯಾಚೊಯ್ ಕಾಂಯ್ ಆವಾಜ್ ಆಯ್ಕಾಲೊನಾ. ಆತಾಂ ಏಕ್ ಲಾಂಬ್ ಶ್ವಾಸ್ ಸೊಡ್‌ಲ್ಲ್ಯಾ ಹಾಂವೆಂ ಕಾರಾಚೊ ವೇಗ್ ಚಡ್ ಕೆಲೊ.

ಹಾಸನ್ ಮುನ್ಸಿಪಾಲಿಟಿ ಕಛೇರಿ ಲಾಗಿಂ ಕಾರ್ ಪಾವ್ತನಾ, ಸವ್ಕಾಸ್ ಕಾರ್ ರಸ್ತ್ಯಾರ್ ಥಾವ್ನ್ ದೆಗೆನ್ ರಾವೊನ್, ಕಾರಾಚೆಂ ಇಂಜಿನ್ ಬಂಧ್ ಕರುನ್, ಕಾರಾ ಬಿತರ್ಲ್ಯಾ ಲೈಟಾಚಿ ಸ್ವಿಚ್ ಆನ್ ಕೆಲಿ ಹಾಂವೆಂ. ತಿತ್ಲೆಂಚ್! ಏಕ್‌ಚ್ ಪಾವ್ಟಿಂ ದೊಳೆ ಸೊಡ್ಲೆ ಆಶಾನ್. ಭಾಯ್ರ್ ಅಜೂನ್ ದಾಟ್ ಕಾಳೊಕ್ ರಾಜ್ ಕರ್ತಾಲೊ. ಪಾಟ್ಲ್ಯಾ ಬಸ್ಕೆರ್ ಕಾಂಯ್ಚ್ ಆವಾಜ್ ನಾತ್‌ಲ್ಲೊ.

"ಬೆಂಗ್ಳುರ್ ಪಾವ್ಲ್ಯಾಂವ್?" ಸವಾಲ್ ಕೆಲೆಂ ಆಶಾನ್

"ಬೆಂಗ್ಳುರ್ ಖಂಯ್? ಆಜೂನ್ ಹಾಸನ್ ಪಾವ್ಲ್ಯಾಂವ್. ಹಾಕಾ ದೆಂವೊಂವ್ಚೆಂ ನಾಕಾ?"

"ಓಹ್.....ಮ್ಹಾಕಾ ಕಶಿ ನೀದ್ ಆಯ್ಲಿ ತಿ ಕಳೊಂಕ್‌ಚ್ ನಾಂ" ಮ್ಹಳ್ಳ್ಯಾ ಆಶಾನ್ ಆಪ್ಲ್ಯಾ ತೊಂಡಾ ವಯ್ರ್ ಹಾತ್ ಚರಯ್ಲೊ.

"ಕುಂಭಕರ್ಣಚೆಂ ಭಯ್ಣ್ ಸಾಯ್ಬಿಣಿ ತುಂ!" ಮ್ಹಳ್ಳೊ ಹಾಂವ್ ಆತಾಂ ಪಾಟಿಂ ಘುಂವ್ಲೊ. ಮ್ಹಾಕಾ ಪಾರ್ವತಿ ಆನಿಂ ತಾಚ್ಯಾ ಭುರ್ಗ್ಯಾಕ್ ಹಾಸನಾಂತ್ ಆಸ್ಪತ್ರೆಚ್ಯಾ ವಾಟೆರ್ ದೆವಂವ್ಕ್ ಆಸ್‌ಲ್ಲೆಂ.

ತಿತ್ಲೆಂಚ್!

ಪಾಟಿಂ ಪಾರ್ವತಿಕ್ ಆನಿಂ ತಾಚಾ ಭುರ್ಗ್ಯಾಕ್ ಪಳೆಲ್ಲ್ಯಾ ಮ್ಹಜ್ಯಾ ದೊಳ್ಯಾಂಕ್ ಹಾಂವ್‌ಚ್ ಪಾತ್ಯೆಲೊಂ ನಾಂ. ಮ್ಹಜ್ಯಾ ದೊಳ್ಯಾಂ ಮುಖಾರ್ ಝುಗ್ಲಣ್ಯಾಚೊ ಶಿಂವೊರ್‌ಚ್ ಫುಟಲ್ಲ್ಯಾ ಪರಿಂ ಜಾಲೆಂ!

"ಮೈ ಗಾಡ್!" ಉದ್ಗಾರ್‌ಲ್ಲ್ಯಾ ಮ್ಹಾಕಾ ಪಳೆವ್ನ್ ಆಶಾನ್‌ಯ್ ಪಾಟಿಂ ಪಳೆಲೆಂ.

"ರಾ...ಯನ್!" ಆಶಾನ್ ಮ್ಹಜ್ಯಾ ಹಾತಾಕ್ ಭಳಾನ್ ಘಟ್ ದರ್ಲೆಂ. 

ಕಾರಾ ಬಿತರ್ಲ್ಯಾ ಲೈಟಾ ಉಜ್ವಾಡಾಂತ್ ಪಾಟ್ಲ್ಯಾ ಬಸ್ಕೆರ್ ಪಾರ್ವತಿ ಆನಿಂ ತಾಚ್ಯಾ ಭುರ್ಗ್ಯಾ ವಯ್ರ್ ದೀಷ್ಟ್ ವೆಲ್ಲ್ಯಾ ಮ್ಹಜ್ಯಾ ಆನಿಂ ಆಶಾಚಿ ಝಿಂಟ್ ಉಡ್ಲಿ.

ಹಾಂವೆಂ ಚಿಂತುಂಕ್ ಸಯ್ತ್ ನಾತ್ಲೆಲೆಂ ಭಯಾನಕ್ ದ್ರಶ್ಯ್........! ಮ್ಹಜ್ಯಾ ದೊಳ್ಯಾಂ ಮುಖಾರ್......! 

ತಿತ್ಲೆಂಚ್!

ಆಯ್ಚಾ ದನ್ಪರಾಂ ಥಾವ್ನ್ ಮ್ಹಜ್ಯೆ ಸಾಂಗಂತಾ ಘಡ್ಲೆಲೆಂ ಸಗ್ಳೆಂ ಮ್ಹಾಕಾ ಉಡಾಸ್ ಯೇಂವ್ಕ್ ಲಾಗ್ಲೆಂ. ಹಾಂವ್ ಆನಿಂ ಆಶಾ ಹನಿಮೂನಾಕ್ ಭಾಯ್ರ್ ಸರ್ತಾನಾ ಆಚಾನಕ್ ಶೈಲಾಚೆಂ ಯೆಣೆಂ, ಆಶಾಚೊ ರಾಗ್, ದನ್ಪರಾಂ ಬೆಂಗ್ಳುರಾಕ್ ಭಾಯ್ರ್ ಸರ್ಚಾ ಬದ್ಲಾಕ್ ಆಮ್ಚೆಂ ರಾತಿಚೆಂ ಪಯ್ಣ್, ಪಯ್ಣಾರ್ ಆಮ್ಚೆಂ ಜಗ್ಡೆಂ, ಆಚಾನಕ್ ರಸ್ತ್ಯಾಕ್ ದಾಂವೊನ್ ಆಯಿಲ್ಲೆಂ ಪಾರ್ವತಿ. ರತ್ನಚೆಂ ಅಸ್ವಾಸ್ಥ್ಯ್, ರಸ್ತ್ಯಾಕ್ ದಾಂವೊನ್ ಆಯಿಲ್ಲ್ಯೊ ಚೂಡಿ, ಮಾರಿ ಬಲಿ.............!

ಮತಿ ಪಡ್ದ್ಯಾರ್, ಎಕಾ ಪಾಟ್ಲ್ಯಾನ್ ಏಕ್, ಪಿಂತುರಾಂ ಭಾಶೆನ್ ಉದೆವ್ನ್ ಯೆತಾನಾ, ಹಾಂವ್, ಬಾರೀಕ್ ಕಾಂಪೊಂಕ್ ಲಾಗ್ಲೊಂ. ಆಶಾಚಾ ತೊಂಡಾ ಥಾವ್ನ್ ಉತ್ರಾಂಚ್ ಸುಟ್ಲಿಂ ನಾಂತ್.

"ಮೈ ಗಾಡ್!" ಉದ್ಗಾರ್‌ಲ್ಲ್ಯಾ ಹಾಂವೆಂ ಪಾರ್ವತಿ ವಯ್ಲಿ ದೀಷ್ಟ್ ಕಾಡುನ್ ತಕ್ಲೆಕ್ ಹಾತ್ ವೆಲೊ. ಏಕ್ ಪಾವ್ಟಿಂ ಭಾಯ್ಲ್ಯಾ ಕಾಳೊಕಾಂತ್ ದೀಷ್ಟ್ ದಾಂವ್ಡಾವ್ನ್ ಪರ್ತ್ಯಾಕ್ ಸವ್ಕಾಸ್ ಪಾಟಿಂ ಪಳೆಲೆಂ ಹಾಂವೆಂ.

ಪಾರ್ವತಿ ಆಪ್ಲ್ಯಾ ಉಸ್ಕ್ಯಾರ್ ರತ್ನಾಕ್ ಪಾನೊ ಖಾವಯ್ತಾಂ ಖಾವಯ್ತಾಂ ನಿದೆಕ್ ವೆಂಗ್‌ಲ್ಲೆಂ. ಕಠೀಣ್ ವಿಶೆವಾಚಿ ನೀದ್! 

ಭುರ್ಗ್ಯಾಕ್ ಪಾನೊ ದಿಂವ್ಚಾ ಖಾತಿರ್ ಪಾರ್ವತಿನ್ ಆಂಗಾ ವಯ್ಲೊ ಪಾಲಂವ್ ಗಳಯಿಲ್ಲೊ. ತಾಚ್ಯಾ ಬಾಜ್ವೆಚೆ ಹುಕು ಸುಟ್‌ಲ್ಲೆ. ತಾಚಿಂ ಸ್ಥನಾಂ ಉಗ್ತಿಂ ಪಡ್‌ಲ್ಲಿಂ. ತಾಚ್ಯಾ ಹರ್ದ್ಯಾರ್ ಕುಂಕುಮಾಚೊ ತಾಂಬ್ಡೊ ಲೇಪ್ ವೊಡ್‌ಲ್ಲೊ. ಪೊಟಾ ವಯ್ರ್ ಹಳದಿ ಲೇಪಾಚೆ ಲಾಂಬ್ ಗೀಟ್. ತಾಚೆ ಕೇಸ್ ಸುಟ್‌ಲ್ಲೆ. ಮಾತ್ಯಾಕ್ ತೇಲಾನ್ ಬಿಜಯಿಲ್ಲೆಂ. ಕಪಲಾರ್ ಕುಂಕುಮಾಚೊ ಬೊಟ್ಟು. ತಾಂಬ್ಡಿ ಬಾಜು. ಹಾತ್‌ಭರ್ ಕಾಂಕ್ಣಾಂ, ಬಾವ್ಳ್ಯಾಕ್ ತೀನ್ ಚ್ಯಾರ್ ತಾವೀಸಾಂ. ಪಾಚ್ವ್ಯಾ ರಂಗಾಚೊ ಗಾಗ್ರೊ. ಪೆಂಕ್ಟಾಕ್ ಕಸಲ್ಯಾಗಿ ಲ್ಹಾನ್ ಲ್ಹಾನ್ ಪಾನಾಂಚೊ ಹಾರ್!

ಆತಾಂ ಹಾಂವೆಂ ಪಾರ್ವತಿಚ್ಯಾ ಭುರ್ಗ್ಯಾಕ್ ಪಳೆಲೆಂ.

ಆವಯ್ಚೊ ಪಾನೊ ಖೆಲ್ಲೆಂ ರತ್ನ ತಶೆಂಚ್ ಸ್ವಪ್ಣಾಂ ಸಂಸರಾಕ್ ಪಾವ್‌ಲ್ಲೆಂ. ಶಾಂತ್....., ಸಮಧಾನೆಚೊ....., ಸುಖಾಳ್...., ಆವಯ್ಚಾ ಪಾಸ್ಳೆಂತ್ಲೊ ವಿಶೆವ್!

ರತ್ನಚಾ ಆಂಗಾರ್ ಕಾಂಯ್ಸ್ ವಸ್ತುರು ನಾತ್‌ಲ್ಲೆಂ. ತಾಚಿ ಪ್ರಾಯ್ ಕಾಂಯ್ ವರಸ್ ದೇಡ್ ವರಸ್ ಜಾವ್ಯೆತ್. ಚೆಡುಂ ಭುರ್ಗೆಂ. ಪುಡ್ಪುಡಿತ್ ಕುಡಿಚೆಂ. ಜಲ್ಮಾಲ್ಲ್ಯಾಕ್ ತಾಚೆ ಕೇಸ್ ಕಾತ್ರುಂಕ್ ನಾತ್‌ಲ್ಲೆ ಆಸ್ತೆಲೆಂ, ತೆ ಲಾಂಬ್ ಆಸ್‌ಲ್ಲೆ. ತ್ಯಾ ಕೆಸಾಂ ಮಧೆಂ ಕಸೊಲೊಗಿ ಭಸ್ಮ್. ಥೊಡ್ಯಾ ಸುವಾತೆರ್ ತೊ ಭಸ್ಮ್ ತೇಲಾಂತ್ ಬಿಜ್‌ಲ್ಲೊ. ಗಳ್ಯಾಕ್ ಕಾಳೊ ನಾಡೊ. ತ್ಯಾ ನಾಡ್ಯಾಕ್ ಕಿತೆಂಗಿ ವಸ್ತುರಾಚಾ ತೀರಾಂತ್ ಗುಟ್ಲಾವ್ನ್ ಬಾಂಧ್‌ಲ್ಲೆಂ. ಹರ್ದ್ಯಾರ್ ಥಂಯ್ ಥಂಯ್ ರೂಂದ್ ಕುಂಕುಮಾಚೆಂ ಲೇಪ್. ತಾಚೆ ಸಕಯ್ಲ್ ಏಕ್ ಲಾಂಬ್ ಧವ್ಸೊ, ರೂಂದ್ ಲೇಪ್. ಬೊಂಬ್ಲಿ ಭಂವ್ತಿಂ ಉರುಟಾಯೆಚೊ ಹಳದಿಚೊ ಲೇಪ್. ತಾಚ್ಯಾ ಭಂವಾರಿಂ ಕಸಲೆಂಗಿ ತೇಲ್ ಪುಸ್ಲೆಲಿ ನಿಶಾನಿ!

"ಮಾರಿ! ನರ ಬಲಿ!" ಮ್ಹಾಕಾ ಕಳಿತ್ ನಾಸ್ತನಾಂಚ್ ಮ್ಹಜ್ಯಾ ಜಿಬೆರ್ ಥಾವ್ನ್ ಉತ್ರಾಂ ಸುಟ್ಲಿಂ ಥೊಡ್ಯಾ ಘಡಿಯಾಂಕ್ ಕಿತೆಂ ಕಿತೆಂ ದೃಶ್ಯ್ ಮ್ಹಜ್ಯಾ ದೊಳ್ಯಾಂ ಮುಖಾರ್ ಉಬೊನ್ ಗೆಲ್ಲ್ಯಾ ಪರಿಂ ಜಾವ್ನ್ ಉಪ್ರಾಂತ್ ಮತಿಕ್ ಸಮಾಧಾನ್ ಜಾಲ್ಲೆ ಪರಿಂ ಜಾತನಾ ವ್ಹಳೂ ಕಾರಚಾ ಪಾಟ್ಲ್ಯಾ ದೋನ್‌ಯ್ ದಾರಾಂಕ್ ಬಿತರ್ಲ್ಯಾನ್ ಲಾಕ್ ದಾಂಬುನ್ ಕಾರಾಚೊ ಲೈಟ್ ಆಫ್ ಕೆಲೊ ಹಾಂವೆಂ.

ಆತಾಂ ಕಾರಚಾ ಬಾಯ್ಲ್ಯಾನ್ ತಶೆಂ ಬಿತರ್ಲ್ಯಾನ್ ಕಾಳೊಕ್‌ಚ್ ಕಾಳೊಕ್. ಹ್ಯಾ ಕಾಳೊಕಾಂತ್‌ಯ್ ಸವ್ಕಾಸ್ ಮ್ಹಜ್ಯಾ ಜೀವಾಕ್ ತೆಂಕ್‌ಲ್ಲ್ಯಾ ಆಶಾನ್ ಮ್ಹಜ್ಯಾ ಬಾವ್ಳ್ಯಾ ವಯ್ರ್ ತಕ್ಲಿ ಆಡ್ ಘಾಲಿ.

"ರಾಯನ್...!" ಉಲಯ್ಲೆಂ ತೆಂ

"ಹುಂ......!" ಹಾಂವೆಂ ಹೂಂ ಗುಟ್ಟಿಲೆಂ ಮಾತ್ರ್.

"ಶೈಲಾನ್ ಆಮ್ಚಾ ದನ್ಪರಾಂಚಾ ಪಯ್ಣಾಂಕ್ ಆಡ್ಕಳ್ ಕರುಂಕ್ ನಾತ್‌ಲ್ಲಿ ಜಾಲ್ಯಾರ್........!?"

ತ್ಯಾ ಕಾಳೊಕಾಂತ್‌ಯ್ ಮ್ಹಜ್ಯಾ ವೊಂಟಾರ್ ಹಾಸೊ ಉದೆವ್ನ್ ಮಾಯಾಗ್ ಜಾಲ್ಯೊ. ಆಶಾಚಾ ಸವಲಾಕ್ ಕಾಂಯ್ಚ್ ಜವಾಬ್ ದೀನಾಸ್ತಾನಾಂ ಹಾಂವೆಂ ತಶೆಂಚ್ ಆಶಾಕ್ ಆಪ್ಲ್ಯಾ ಖಾಂದಾರ್ ದಾಂಬುನ್ ಧರ್ಲೆಂ. ಬಹುಶಃ ತಾಚ್ಯಾ ಮತಿಕ್‌ಯಿ ಸಮಧಾನ್ ಲಾಬ್‌ಲ್ಲೆಂ. ಆತಾಂ ಹಾಂವೆಂಯ್ ಸವ್ಕಾಸ್ ದೊಳೆ ದಾಂಪ್ಲೆಂ.

ಕಥಾ ಪಾನಾಕ್

ಕಥಾಂಕರ್ ಪಾನಾಕ್

ಕಥಾದಾಯ್ಜ್ ಪಾನಾಕ್

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications