ಕವಿತಾकविताPoem
ರಸಿಕಾಚಿಂ
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಮೃತ್:
’ಇಶ್ಕ್ ನೆ ’ಘಾಲೀಬ್’ ನಿಕಮ್ಮಾ ಕರ್ ದಿಯಾ
ವರ್ನ ಹಮ್ ಭೀ ತೆ; ಕಾಮ್ ಕೆ’
[ಮೊಗಾನ್ ’ಗಾಲಿಬ್’ ಉಪ್ಕಾರಾಕ್ ಪಡಾನಾತ್ಲೊ ಕೆಲೊ ನಾಂತರ್ ಹಾಂವ್ಯೀ ಉಪ್ಕಾರಾಕ್ ಪಡ್ತೊಂ]
ಮಿರ್ಜಾ ಘಾಲಿಬಾನ್ ಬರಯಿಲ್ಲ್ಯಾ ಎಕಾ ಗಝಲಾಂತ್ಲ್ಯೊ ವೊಳಿ ಹ್ಯೊ.
ಮ್ಹಳ್ಯಾರ್ ಮೊಗ್ ಬರ್ಯಾಕ್ ಭೆರೊ ಕರ್ತಾ ಆನಿ ಭೆರ್ಯಾಕ್ ಭೆಂಕ್ರೊ ಕರ್ತಾ ಆನಿ ಯೆಮ್ಕುಳ್ಯಾಕ್ ಬರೊ ಸಯ್ತ್ ಕರ್ತಾ. ಹಿ ಸಕತ್ ಆಸಾ ಮೊಗಾಕ್ ಮಾತ್ರ್! ಫಕತ್ತ್ ಮೊಗಾಕ್!!
ಜಿಣ್ಯೆಂತ್ ಮೊಗ್ ಏಕ್ ಹುಮಿಣ್, ಜಶೆಂ ಸಾಹಿತ್ಯಾಂತ್ ಕವಿತಾ ಏಕ್ ಹುಮಿಣ್. ಹ್ಯಾ ಹುಮಿಣೆಕ್ ದೆಖ್ಚಿ, ಸಮ್ಜೊಂಚಿ, ಪಾರ್ಕುಂಚಿ ಸಕತ್ ಫಕತ್ತ್ ಎಕಾ ಕವಿಕ್ ಮಾತ್ರ್ ಆಸ್ತಾ ಶಿವಾಯ್ ಹೆರ್ ಕೊಣಾಕ್ಯಿ ಆಸೊಂಕ್ ಸಾಧ್ಯ್ ನಾ. ಜಲ್ಮಾನ್ ಕವಿ ಜಾಲ್ಲೆ ಹ್ಯಾ ಹುಮಿಣೆಕ್ ಸಮ್ಜೊಂಕ್ ಸಕ್ತಾತ್, ಪುಣ್ ಭೋವ್ ಥೊಡೆ ಮಾತ್ರ್ ತಿ ಅಪ್ಲ್ಯಾ ಉತ್ರಾಂನಿ ಅಭಿವ್ಯಕ್ತ್ ಕರುಂಕ್ ಸಕ್ತಾತ್ ಆನಿ ತೆ ಮಾತ್ರ್ ಕವಿ ಜಾವ್ನ್ ರುತಾಂ ಜಾತಾತ್.
ಪುಣ್ ಕವಿಚ್ಯಾ ನದ್ರೆಚಿ ಸುರ್ವಾತ್ ಜಾಂವ್ಚಿ ಕಶಿ? ಸವಾಲಾಂನಿ. ಜೆದ್ನಾಂ ಕವಿಕ್ ಹೆಂ ವಾರೆಂ, ಹೆಂ ಉದಾಕ್, ಹೊ ಉಜ್ವಾಡ್ ಸವಾಲ್ ಕರುಂಕ್ ಲಾಗ್ತಾನಾ, ತಾಚಿ ಮತ್ ರವಿನ್ ದೆಖೊಂಕ್ ಜಾಯ್ನಾಸ್ಚೆಂ ದೆಖೊಂಕ್ ಸಕ್ತಾ. ಹಕೀಗತೆಂತ್ ಹಿಂ ಸವಾಲಾಂ ಜೆದ್ನಾಂ ಜಾಪಿ ಮೆಳಾನಾಸ್ತಾಂ ಕವಿಚ್ಯಾ ಮತಿಂತ್ ಉಮ್ಕಾಳೊಂಕ್ ಲಾಗ್ತಾತ್ ಜಶೆಂ ವಿಕ್ರಮಾಚ್ಯಾ ಖಾಂದ್ಯಾರ್ ಬೇತಾಳಾನ್ ಉಮ್ಕಾಳ್ಚೆಪರಿಂ. ಹಿಂಚ್ ಸವಾಲಾಂ ಅಧುರಿಂ ಜಾವ್ನ್ ಸಭಾರ್ ಪಾವ್ಟಿಂ ಕವಿಚ್ಯಾ ದೀಸ್ಪಡ್ತ್ಯಾ ಜಿಣ್ಯೆಚೆರ್ ಕಠೀಣ್ ಕರ್ಕರೆ, ಉಭ್ದೇಸ್, ವಿರಾರಾಯ್ ಹಾಡಂವ್ಕ್ ಕಾರಣ್ ಜಾತಾರ್. ತರ್ಯೀ ಕವಿ ಸವಾಲಾಂ ಕರ್ಚಿಂ ರಾವಾನಾ, ಕವಿ ದೊಳೆ ಧಾಂಪಿನಾ, ಕವಿ ಕವಿತಾ ಬರಂವ್ಚಿ ರಾವಯ್ನಾ.
’ಎಲ್ಯೆರ್’ ಸಭ್ದಾಚೊ ತುಳು ಭಾಸೆಂತ್ಲೊ ಅರ್ಥ್ ’ಲ್ಹಾನ್ ಆಸ್ಚೊ’ ಮ್ಹಳ್ಳೊ. ತೆಚ್ಚ್ಪರಿಂ ’ಎಲ್ಯೆರ್’ ಲಿಖ್ಣೆಂ ನಾಂವಾಚೊ ಕವಿ ಲೋಯ್ಡ್ ರೇಗೊ, ಪ್ರಾಯೆನ್ ಲ್ಹಾನ್, ಲಾಂಬಾಯೆನ್ ಲ್ಹಾನ್, ಝಡಾಯೆಂತ್ ಲ್ಹಾನ್, ಸೊಸ್ಣಿಕಾಯೆಂತ್ ಲ್ಹಾನ್ ಆಸೊಂಕ್ ಪುರೊ. ಪುಣ್ ಚಿಂತ್ಪಾ ಸಕ್ತೆಂತ್ ಜಾಂವ್, ಕಾವ್ಯೆಂ ಘಡ್ಚ್ಯಾಂತ್ ಜಾಂವ್, ಶೀದಾ ಅಭಿವ್ಯಕ್ತಿ ಕರ್ಚ್ಯಾಂತ್ ಜಾಂವ್ ಲ್ಹಾನ್ ನ್ಹಂಯ್ ಮ್ಹಳ್ಳೆಂ ಎದೊಳ್ಚ್ ರುಜು ಕೆಲಾಂ. ಹಾಚ್ಯಾ ಲಿಖ್ಣೆಂತ್ ದಿರ್ಸಾಳ್ ಮಿರ್ಸಾಂಗೆಚಿ ದಾವ್ ಕಿತ್ಲಿ ಆಸಾಗೀ, ಮ್ಹೊಂವಾಚಿ ರೂಚ್ ದಿಂವ್ಚಿ ಸಕತ್ಯೀ ತಿತ್ಲಿಚ್ಚ್ ಆಸಾ, ಕೊಗುಳೆಚಿಂ ಗಾಣಾಂ ಆಯ್ಕಾಲ್ಲೊ ಸಂಗೀತ್ ಆಸಾ. ಸತ್ ಸಾಂಗ್ಚೆಂ ತರ್ ಕೊಂಕ್ಣಿ ಕವಿತಾಂಕ್ ನವ್ಯಾ ಪಾಂವ್ಡಾರ್ ವರುಂಕ್ ಎಲ್ಯೆರಾ ಥಾವ್ನ್ ಜಾಯ್ತಿ ಹುಮೆದ್ ದವರ್ಯೆತಾ. ಮಾತ್ಶಿ ಆಳ್ಸಾಯ್ ಸೊಡಿತ್ ತರ್.
ರಸಿಕಾಚಿಂ ಲೆಕಾಂ
ಎಕೆ ದಾಲಿಂತ್ ಫುಲಾಂ ಕಿತ್ಲಿಂ
ಎಕೆ ಚಾಲಿಂತ್ ಪಾವ್ಲಾಂ ಕಿತ್ಲಿಂ
ಎಕೆ ಮೆಳಿಂತ್ ಖೊವ್ಳಾಂ ಕಿತ್ಲಿಂ?
ಎಕೆ ವಾತಿಂತ್ ಮೆಣಾಂ ಕಿತ್ಲಿಂ
ಎಕೆ ಕಾತಿಂತ್ ಬಣಾಂ ಕಿತ್ಲಿಂ
ಎಕೆ ಮತಿಂತ್ ಮನಾಂ ಕಿತ್ಲಿಂ?
ಎಕೆ ದುಕಿಂತ್ ದುಖಾಂ ಕಿತ್ಲಿಂ
ಎಕೆ ಧಾಂಕಿಂತ್ ದಿಕಾಂ ಕಿತ್ಲಿಂ
ಎಕೆ ತಾಂಕಿಂತ್ ಸುಖಾಂ ಕಿತ್ಲಿಂ?
ಎಕೆ ಬೊಬೆಂತ್ ಗಾಣಾಂ ಕಿತ್ಲಿಂ
ಎಕೆ ವೊಡ್ಣೆಂತ್ ತ್ರಾಣಾಂ ಕಿತ್ಲಿಂ
ಎಕೆ ಪಡ್ಣೆಂತ್ ಪ್ರಾಣಾಂ ಕಿತ್ಲಿಂ?
ಬಾಬಿಲೊನಿಯಾಚ್ಯಾ ಭುರ್ಜಾಬರಿಂ
ಮೆಜಾಪ್ ಮ್ಹಜೆಂ ಉಂಚಾಯೆಚೆಂ
ಮೆಜುನ್ ಮೆಜುನ್ಚ್ ಖರಸ್ ಯೆತಾ
ರಸಿಕಾಚೊ ರಸ್ ಮ್ಹಜೊ
ಗಾಣ್ಯಾಂತುಲ್ಯಾ ಕೊಬಾಬರಿಂ
ಚಿಂವೊಡ್ ಜಾತಾ.
ಕವಿತಾಮೃತ್ - 8
ಎಲ್ಯೆರ್ ತಾಕೊಡೆ
ಪುರ್ತೆಂ ನಾಂವ್: ಲೋಯ್ಡ್ ಆಸ್ಟಿನ್ ರೇಗೊ.
ಆವಯ್ ಬಾಪಾಯ್ಚೆಂ ನಾಂವ್: ಲೂಸಿ ರೇಗೊ ಆನಿ ದೆ|ಜೆರಾಲ್ಡ್ ರೇಗೊ.
ಜನನ್:
21 ಒಕ್ತೋಬರ್
1979
ಇಮೇಯ್ಲ್: regolloyd@gmail.com
ಪರ್ಗಟ್ ಜಾಲ್ಲೆ ಸ್ವತಾಚೊ
ಕವಿತಾಜಮೊ:
’ಫಾಲ್ಗುಣಿಚೊ ವ್ಹಾಳೊ’ (2000,
ರಂಗ್ಮಂಚ್ ಪ್ರಕಾಶನ್).
’ಪೆಟ್ಣೊಳಿ’ (2005, ಸಾಂಗಾತಿ ಮೀಡಿಯಾ ಪ್ರಕಾಶನ್).
ಹೆರಾಂನಿ
ಸಂಪಾದನ್ ಕರುನ್ ಪರ್ಗಟ್ ಕೆಲ್ಲೆ ಕೊಂಕ್ಣಿ
ಕವಿತಾಜಮೆ:
’ಕವಿತಾಮೃತ್’ (1999,
ಸಂ: ಮೌರಿಸ್ ಶಾಂತಿಪುರ್).
’ಕುಪಾಂ ಪೊಂದ್ಲಿಂ ಮುಖಾಂ’ (2003, ಸಂ: ಮೆಲ್ವಿನ್ ರೊಡ್ರಿಗಸ್).
’ಕಾಳೊಕಾಂತ್ಲಿಂ ಕಾಂತಾರಾಂ’ (2005, ಸಂ: ಮೆಲ್ವಿನ್ ರೊಡ್ರಿಗಸ್).
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ (2006, ಸಂ: ವಲ್ಲಿ ಕ್ವಾಡ್ರಸ್).
’ಶೆಕ್ಡ್ಯಾಚ್ಯೊ ಕೊಂಕ್ಣಿ ಕವಿತಾ’ (2007, ಸಂ: ಮೆಲ್ವಿನ್ ರೊಡ್ರಿಗಸ್).
ವಿಶೇಸ್ ವಾವ್ರ್:
ಮಂಗ್ಳುರ್ ಆಕಾಶ್ವಾಣಿಚೆರ್ 12 ತಶೆಂಚ್ ಹೆರ್ ಕವಿತಾಗೋಷ್ಟಿಂನಿ ಕವಿತಾ ವಾಚನ್ ಕೆಲಾಂ.
’ತಿಂತೆರಾಂಕ್ ಪಿಂತುರಾಂ’ ಕವಿತಾಜಮ್ಯಾಚೆಂ ಪ್ರಸ್ತಾವನ್ ಬರಯ್ಲಾಂ.
ಸ್ವತಾಚ್ಯೊ ಸಂಗೀತ್ ಕೊವ್ಳ್ಯೊ:
’ಚಾಂದ್ನೆಂ’.
’ಸ್ವಪ್ಣಾಂ’.
’ರಾವ್ಳೆರ್’.
ದೂರ್ದರ್ಶನಾಚೆರ್ ವಾಚ್ಲ್ಲಿಂ ಕವಿತಾ:
1
ಲಾಭ್ಲ್ಲ್ಯೊ
ಪ್ರಶಸ್ಥ್ಯೊ/ಇನಾಮಾಂ:
’ಮಾಂಡ್ ಸೊಭಾಣ್ ವರ್ಸಾಚೊ ಕವಿ’ (1999).
’ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ಪ್ರಶಸ್ಥಿ’ (2001, ’ಫಾಲ್ಗುಣಿಚೊ ವ್ಹಾಳೊ’ ಬುಕಾಕ್).
’ದಾಯ್ಜ್ ಸಾಹಿತಿಕ್ ಸ್ಪರ್ಧೊ’ (2006, ’ಪಯ್ಲೆಂ ಇನಾಮ್’).
ಎಲ್ಯೆರಾಚಿಂ ಕವಿತಾ/ಸಂದರ್ಶನ್:
’ದಾಯ್ಜ್ ಸಾಹಿತಿಕ್ ಸ್ಪರ್ಧೊ’ 2006 ಚೆರ್ ಪಯ್ಲೆಂ ಇನಾಮ್ ಜೊಡ್ಲೆಲಿ ಕವಿತಾ ’ದೇಶಾಚೆ ಖಂತಿಂತ್’ ಕವಿತಾ.
ಕವಿತಾಝರ್ಚೆರ್ ಪರ್ಗಟ್ ಜಾಲ್ಲೆಂ ’ಬರೊ ದೇವ್’ ಕವಿತಾ.
’ಸಾಹಿತಿಲಾಗಿಂ ಸಂವಾದ್’ಚೆರ್ ಹಾಚೆಸವೆಂ ಕೆಲ್ಲೆಂ ಏಕ್ ಸಂವಾದ್.
ಕವಿತಾಪಾಠಾಚೆರ್ ಅಧ್ಯಯನ್ ಚಲಯಿಲ್ಲೆಂ ಕವಿತಾ ’ಸ್ವಾದಿಕ್ ಸಾಕ್ರಾಮೆಂತ್’.
ಕಥಾಮೃತಾಚೆ ಆಧ್ಲೆ ಥೆಂಬೆ: 1, 2, 3, 4, 5, 6, 7
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.