ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಡೊಲ್ಫಿ ಕಾಸ್ಸಿಯಾ - ಕೊಂಕ್ಣೆಂತ್ ಎದೊಳ್ ಪರ್ಯಾಂತ್ 25 ವರ್ಸಾಂಚಿ ಪತ್ರಿಕೋಧ್ಯಮಾಚೊ ವಾವ್ರ್ ಕೆಲ್ಲೊ ಪಯ್ಲೊ
ಕಥಾದಾಯ್ಜ್ - 9
ಡೊಲ್ಫಿ ಕಾಸ್ಸಿಯಾ
ಮಾಯ್ ಕಿತ್ಯಾಕ್ ರಡ್ತಾ?
ನಾಂವ್ : ಡೊಲ್ಫಿ ಫೆಡ್ರಿಕ್ ಲೋಬೊ
ಲಿಖ್ಣೆ ನಾಂವಾಂ : ’ಡೊಲ್ಫಿ ಕಾಸ್ಸಿಯಾ’, ’ಎಲ್ಡಿ’, ’ಸಂಚಾರಿ’
ಜನನ್ : 22 ಜುಲಾಯ್ 1951.
ಜಲ್ಮಾಲ್ಲೊ ಗಾಂವ್ : ಕಾಸ್ಸಿಯಾ.
ಪತಿಣ್ : ಕ್ಲಾರಾ ಲೋಬೊ.
ಇಮೇಯ್ಲ್ ವಿಳಾಸ್ : jhelo@rediffmail.com
ಡೊಲ್ಫಿ ಕಾಸ್ಸಿಯಾ
ವಳೊಕ್:
ಸಾಹಿತಿಕ್ ವಾವ್ರ್ :
ಮಟ್ವ್ಯೊ ಕಾಣ್ಯೊ : 300 ವಯ್ರ್
ಕಾದಂಬರಿ : 44 ನಾಟಕ್ : 35 (9 ತುಳು, 1 ಕನ್ನಡ ಆನಿಂ 25 ಕೊಂಕಣಿ)
ಕವಿತಾ : 100
ಕವಿತಾನಾಟಕ್ : 1
ಲಾಭ್ಲ್ಲ್ಯೊ ಪ್ರಶಸ್ಥ್ಯೊ :
2000 ಇಸ್ವೆಚಿ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ಥಿ
ಗೊಂಯ್ಚಾ ಕೊಂಕ್ಣಿ ಭಾಷಾ ಮಂಡಳಿ ಥಾವ್ನ್ ಪ್ರಶಸ್ಥಿ
ಬೊಂಬೊಯ್ ಕೊಂಕ್ಣಿ ಭಾಷಾ ಮಂಡಳಿ ಥಾವ್ನ್ ನಾಟಕಾಂಕ್ ಪ್ರಶಸ್ಥಿ
ಅಖಿಲ್ ಭಾರತೀಯ್ ನಾಟಕ್ ಪ್ರಶಸ್ಥಿ
ಪ್ರಕಾಶನ್: ’ಪುನವ್ ಪ್ರಕಾಶನ್’
ಸಂಪಾದನ್ ಕೆಲ್ಲಿಂ/ಕರ್ಚಿಂ ಪತ್ರಾಂ :
ಝೆಲೊ ಮಯ್ನ್ಯಾಳೆಂ
ಕುರೊವ್ ಮಯ್ನ್ಯಾಳೆಂ (sಸ್ಥಾಪಕ್ ಸಂಪಾದಕ್)
ಮಿತ್ರ್ ಹಾಪ್ತ್ಯಾಳೆಂ
ಕಾದಂಬರಿಂಚೊ ವಿವರ್ :
ಮ್ಹಾಕಾ ಮಾಫ್ ಕರ್
ಗೊಪಾಂತ್ ತುಜಾ ಲಿಪಯ್
ವಾಟೆ ವಯ್ಲೊ ಕಾಂಟೊ (ಬಹುಮಾನಿತ್)
ರಳ್ನೆಂತ್ ಲಿಪ್ಲ್ಲೊ ಸರೊಪ್
ತುಜೆ ಸರ್ಶಿನ್ ಆಪಯ್ (ಬಹುಮಾನಿತ್)
ಹಾಂವ್ ಜಿವಂತ್ ಆಸಾಂ
ಮೊಳ್ಬಾ ವಯ್ಲಿ ದಿವ್ಟಿ (ಬಹುಮಾನಿತ್)
ಘಾತಾ ಪಟ್ಲೆಂ ಸತ್
ಸಾವ್ಳೆ ಪಾಟ್ಲಿ ದಾವ್ಲಿ
ತುಜಾ ರಗ್ತಾಕ್ ತಾನೆಲಾಂ
ಮೊಜಾ ಕಾಳ್ಜಾಂತ್ಲೆಂ ಫುಲ್
ಹೆಂ ಕಾಳಿಜ್ ತುಜೆಂ (ಬಹುಮಾನಿತ್)
ಮೊಗಾ ಮ್ಹಾಕಾ ದುಖಯ್ನಾಕಾ
ಫಕತ್ ತುಜೆ ಖಾತಿರ್
ತುಂ ಮ್ಹಾಕಾ ವಿಸರ್
ಏಕ್ ಥೆಂಬೊ ರಗತ್
ಖಂಯ್ ಆಸಾಯ್ ಮೊಗಾ?
ಸಾಂಡುನ್ ಗೆಲ್ಲಿ ಶೆಳಿ
ಪಾಲ್ಯಾ ಪಾಟ್ಲೊ ಭಾಲೊ
ಮನ್ ಮ್ಹಜೆಂ ಆಯ್ಕಾನಾ
ಹಾಂವ್ ತುಕಾ ಆಶೆತಾಂ
ದಿಶಾ ನಾತ್ಲ್ಲೆಂ ಜಿವಿತ್
ಕುಪಾಂ ಪಟ್ಲೊ ಚಂದ್ರ್
ತೆ ದೋನ್ ಹಾತ್
ಕಿತೆಂ ದೀಂವ್ ತುಕಾ?
ಖತ್ ನಾತ್ಲ್ಲಿ ಶೆಳಿ
ಫಳ್ ನಾತ್ಲ್ಲೆಂ ಫುಲ್
ಕಾತರ್ಲಲೊ ಹಾತ್
ಕಾಳೊಕಾ ಪಾಟ್ಲಿ ಸಾವ್ಳಿ
ಅಸಹಾಯಕ್
ಬಹಿಷ್ಕಾರ್
ಅಮಾನುಷ್
ಬಲತ್ಕಾರ್
ತಿರಸ್ಕಾರ್
ಸ್ವೀಕಾರ್
ಸುಟ್ಕಾ
ಪ್ರತೀಕಾರ್
ಪ್ರತಿಫಳ್
ಚುಕಿದಾರ್
ಮೊಗಾಚೊ ಸೊಲ್ಲೊ
ಪರಿಹಾರ್
ಪತಿರಾಯ್
ಶೆಳ್ಯಾ ರಗ್ತಾಚೊ ವಾಸ್
ನಾಟಕ್ :
ಖಂಯ್ಸರ್ ಆಸಾ ಬಚಾವಿ? (1970)
ದೀ ಮ್ಹಾಕಾ ಭೊಗ್ಸಾಣೆ (1972)
ಮೊಳ್ಬಾ ವಯ್ಲಿ ದಿವ್ಟಿ (1974)
ವಾಟೆ ವಯ್ಲೊ ಕಾಂಟೊ (1975)
ದುಭಾವಾಚೊ ಧುಂವರ್ (1976)
ತುಂಚ್ ಮೊಜೆಂ ಜಿವಿತ್ (1978)
ರಾತಿಚಿಂ ವೊರಾಂ ಆಟ್ (1992)
ಮರಿಯೆಚೆಂ ಭುರ್ಗೆಂ (2004)
ತೆಂ ಪಾಟಿಂ ಆಯ್ಲಾಂ (2004)
ನಾಟ್ಕುಳೆ :
ಗುಪಿತ್ ಖುನಿಗಾರ್ (1972)
ಚೂಡ್ ಕೊತ್ರು (1972)
ನಿರಾಧಾರಿ (1973)
ತುಂಚ್ ಮೊಜೊ ದೇವ್ (1973)
ಸಾವ್ಳಿ (1973)
ಜವಾಬ್ಧಾರಿ (1974) (ಬಹುಮಾನಿತ್)
ಸಿಪಾಯ್ಗಿರಿ (1974)
ರೂಮ್ ನಂಬರ್ 12 (1974)
ಅನುಪ್ಕಾರಿ (1975)
ಹಾಂವ್ ಪಾತ್ಕಿ (1975)
ಮರಣ್ ಸ್ಪೆಶಾಲಿಸ್ಟ್ (1975)
ಧೈರಾಧಿಕ್ ಸ್ತ್ರೀ (1976) (ಬಹುಮಾನಿತ್)
ಮೊಗಾಚೊ ಅಪ್ರಾದ್ (1976) (ಬಹುಮಾನಿತ್)
ಪಾತ್ಕಿ ಸ್ತ್ರೀ (ಸಂಗೀತ್ ನಾಟಕ್) (1977)
ಖಾಂದಿ ಖುರಿಸ್ (ರೇಡಿಯೊ ನಾಟಕ್) (1997)
ಬಾಂಯ್ತ್ ಮೊಡೆಂ (ರೇಡಿಯೊ ನಾಟಕ್) (2003)
ತುಳು ನಾಟಕ್/ನಾಟ್ಕುಳೆ :
ದ್ರೋಹಿ (1968)
ಬರವುದಾಂತಿನ ಗಿರವು (1968)
ಹಕ್ಕ್ದ ಪೊಣ್ಣು (1969)
ಬೆರಿ ಪತ್ತಿನ ಭೂತ (1970)
ಏರ್ ಪಗೆಮಾನಿ? (1971)
ಏರೆನ ನೆತ್ತೆರ್? (1972)
ಲತ್ತ್ ನೆತ್ತೆರ್ (1972)
ವಿಧಿನ್ ದಾಯೆ ದೂರುವಾ? (1973)
ಕರುಣೆದಾಂತಿ ಕಣ್ಣ್ (1974)
ಕನ್ನಡ ನಾಟಕ್ ನಾಟ್ಕುಳೆ : ಜೀವನ ಜ್ಯೋತಿ (1972)
ವೆಕ್ತಿತ್ವ್ :
ಡೊಲ್ಫಿ ಕಾಸ್ಸಿಯಾ ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಅಜೂನ್ ಕಾರ್ಯಾಳ್ ಆಸ್ಚೊ ಎಕ್ಲೊಚ್ ಮ್ಹಾಲ್ಘಡೊ. ಹಾಚೆಸವೆಂ ಪತ್ರಿಕೋಧ್ಯಮಾಂತ್ ಪಾಂಯ್ ತೆಂಕ್ಲ್ಲೆ ಜಾಯ್ತೆ ನಿರ್ಭಾಗಿ ಎದೊಳ್ಚ್ ಜಾಯ್ತೆಂ ಹೊಗ್ಡಾವ್ನ್ ಗೆಲ್ಯಾತ್. ಥೊಡ್ಯಾಂನಿ ಆಸ್ತ್-ಬದಿಕ್ ಹೊಗ್ಡಾಯ್ಲಾಂ ತರ್ ಥೊಡ್ಯಾಂನಿ ಶಾಂತಿ ಸಮಧಾನ್. ಆನಿಂ ಥೊಡ್ಯಾಂನಿ ಇಸ್ಟಾಂ ಮಂತ್ರಾಂಕ್ ತರ್ ಥೊಡ್ಯಾಂನಿ ಸಂಸಾರ್ಯೀ ಹೊಗ್ಡಾಯ್ಲಾ. ತರ್ಯೀ ಎದೊಳ್ ಪರ್ಯಾಂತ್ ಡೊಲ್ಫಿ ಕಾಸ್ಸಿಯಾ ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಝುಜೊನ್ ಆಸ್ಚೊ ಝುಜಾರಿ ಮ್ಹಣ್ಯೆತ್. ನವೆಸಾಂವಾಕ್ ಡೊಲ್ಫಿ ಕಾಸ್ಸಿಯಾ ಬಿಲ್ಕುಲ್ ಆಶೆನಾ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್ ಜೆಂ ತಾಕಾ ಪಾಟ್ಲ್ಯಾ ಚಡುಣೆಂ ಸತ್ರಾ ವರ್ಸಾಂ ಥಾವ್ನ್ ಹಾಂವೆ ಸಮ್ಜೊನ್ ಘೆತ್ಲ್ಲೆಂ ಜಾವ್ನಾಸಾ. ದೊಲ್ಫಿ ಕಾಸ್ಸಿಯಾ ಏಕ್ ಚುರುಕ್ ವ್ಹೆಪಾರಿಸ್ತ್ ತೆಂ ಖರೆಂ ತರ್ಯೀ ಹೆಂ ವೆವ್ಹಾರಿಕ್ ಗಿನ್ಯಾನ್ ತಾಣೆಂ ಕೊಂಕ್ಣೆಖಾತಿರ್ ಕೆಲ್ಲ್ಯಾ ಯಾ ಕರ್ಚಾ ವಾವ್ರಾಕ್ ಕಿತ್ಲೊ ಉಪ್ಕಾರಾಕ್ ಪಡ್ಲಾ ತೆಂ ತೊ ಸರ್ವೆಸ್ಪರ್ ದೇವ್ ಆನಿಂ ಖುದ್ದ್ ತೊಚ್ ಜಾಣಾ.
ಮಟ್ವ್ಯೊ ಕಾಣ್ಯೊ :
ಡೊಲ್ಫಿ ಕಾಸ್ಸಿಯಾಚೊ ಮಟ್ವ್ಯೊ ಕಾಣ್ಯೊ ವಾಚುಂಕ್ ಭೋವ್ ಸಾದ್ಯೊ ತರ್ಯೀ ಎಕಾ ಮಿಸ್ತೆರಾಪರಿಂ ಆಸೊನ್ ಕಾಣ್ಯೆಚಾ ಅಖ್ರೇಕ್ ತೊ ಮಿಸ್ತೆರ್ ಉಗ್ಡಾಪೊ ಕರ್ತಾನಾ ಎಕಾ ಮಟ್ವ್ಯಾ ಕಾಣ್ಯೆಚೆಂ ರೂಪ್ ವಾಚ್ಪ್ಯಾಕ್ ಸೊಭ್ತಾ. ಡೊಲ್ಫಿ ಕಾಸ್ಸಿಯಾ ಏಕ್ ನಾಟಕಿಸ್ತ್, ಕಾದಂಬರಿಕಾರ್ ತರ್ಯೀ ತಾಣೆಂ ಅಪ್ಲ್ಯಾ ಕಾಣ್ಯಾಂಕ್ ವಿಂಚವ್ಣ್ ಕರ್ಚಿ ವಿಶಯ್ (ಕಥಾವಸ್ತ್) ಮಾತ್ರ್ ’ಸಾಮಾಜಿಕ್’ - ಜಿ ಆಮ್ಚಾಚ್ ಸಮಾಜೆಂತ್ ಘಡ್ಲ್ಲಿ ಯಾ ಘಡೊನ್ ಆಸ್ಚಿ. ಡೊಲ್ಫಿ ಕಾಸ್ಸಿಯಾ ಕೊಂಕ್ಣೆಂತ್ಲೊ ಮ್ಹಾಲ್ಘಡೊ ಸಾಹಿತಿ ತರ್ಯೀ ತಾಚಾ ಬರ್ಪಾಂನಿ ವಾಚುಂಕ್ ಮೆಳ್ಚಿ ಕೊಂಕ್ಣಿ ಭಾಸ್ ಮಾತ್ರ್ ಗ್ರೇಸ್ತ್ ನಾ ಜಿತ್ಲಿ ಗ್ರೇಸ್ತ್ ಆಸೊಂಕ್ ಜಾಯ್ ಆಸ್ಲ್ಲೆ ತಿತ್ಲಿ. ಪುಣ್ ಹ್ಯಾ ಉಣಾಂಕ್ ತಾಚ್ಯೊ ಕಾಣ್ಯೊ ಭರ್ತಿ ಕರ್ತಾತ್. ’ಭಿರ್ಮತ್’, ’ಮನ್ಶಾಪಣಾಚಿಂ ಮೊಲಾಂ’, ’ದಯಾ-ದಾಕ್ಶೆಣ್’ ಆನಿಂ ’ಲಿಸಾಂವ್’ - ಹ್ಯೊ ಸಂಗ್ತ್ಯೊ ಡೊಲ್ಫಿ ಕಾಸ್ಸಿಯಾಚಾ ಕಾಣ್ಯಾಂನಿ ಭರೊನ್ ವೊಮ್ತೊತಾತ್ ಮ್ಹಳ್ಯಾಂತ್ ಚೂಕ್ ಜಾಂವ್ಚಿನಾ. ಆನಿಂ ’ಮಾಯ್ ರಡ್ತಾ’ ಏಕ್ ಅಸಲಿಚ್ ಕಾಣಿ.
ಕಥಾದಾಯ್ಜ್ - 9 . ಮಾಯ್ ಕಿತ್ಯಾಕ್ ರಡ್ತಾ?
ಮಾಂಯ್ಚೊ ವಿಳಾಪ್ ಪಳೆವ್ನ್ ಆನಿ ಆಯ್ಕೊನ್ ಮ್ಹಾಕಾ ಇತ್ಲೆ ಕರ್ಕರೆ ಜಾಲೆಕೀ, ಥಂಯ್ ಥಾವ್ನ್ ಖಂಯ್ ತರೀ ಪಯ್ಸ್ ಚಲ್ಯಾಂ ಮ್ಹಣ್ ಜಾಲೆಂ. ಕಾಲ್ ರಾತಿ ಪರ್ಯಾಂತ್,
"ತುಂ ಏಕ್ ಪಾವ್ಟಿಂ ಕಿತ್ಯಾಕ್ ಮೊರಾನಾಯ್? ಅಸೊ ಸ್ರೊ ಘೊಟುನ್ ವಾಟೆರ್ ಲೇಲೆ ಘಾಲ್ನ್ ಯೆತಾನಾ ಖಂಚಿ ತರೀ ಏಕ್ ಲೊರಿ ತುಕಾ ಆಪ್ಟೊನ್ ತುಂ ತಾಚೆ ಪಂದಾಕ್ ಪಡೊನ್ ಮೊರಾನಾಯ್ ಕಿತ್ಯಾ? ಇತ್ಲ್ಯಾ ಬರ್ಯಾ ಮನ್ಶಾಂಚೊ ಸಯ್ತ್ ದೇವ್ ಉಡಾಸ್ ಕಾದ್ತಾ, ಪುಣ್ ತುಜಿ ಕಿತ್ಯಾ ವಿಸರ್ ಪಡ್ಲ್ಯಾ ಹಾಬಾ.."
ಅಶೆಂ ಗಾಳಿ-ಸೊವೆ ದೀವ್ನ್ ಮಾಗೊನ್, ಧರ್ಣಿಕ್ ಹಾತ್ ಮಾರುನ್ ತಾಚೆರ್ ಶಿರಾಪ್ ಆನಿ ಮರಣ್ ತಿಣೆ ಮಾಗ್ಲಾಂ. ಪುಣ್ ಆತಾಂ ಬಾಬಾಚಾ ಮೊಡ್ಯಾಚೆರ್ ಪಡೊನ್ ದೆವಾಕ್ಚ್ಚ್ ತಿ ಶಿರಾಪ್ ದಿತಾಮೂ!? ಕಳ್ವಳ್ಯಾಂ ರಡೊನ್ ದುಃಖಾಂಚೊ ವ್ಹಾಳೊ ವ್ಹಾಳಯ್ತಾಮೂ...
ಮ್ಹಾಕಾ ಹೆಂ ಏಕ್ಯೀ ಸಮ್ಜಾನಾ. ಮಾಯ್ ಕಿತ್ಯಾ ಅಶೆಂ ಕರ್ತಾ?
"ಊಟ್ ಸಾಯ್ಬಾ... ಊಟ್.. ಮ್ಹಾಕಾ ಸೊಡ್ನ್ ತುಂ ಎಕ್ಲೊಚ್ಚ್ ವ್ಹೆತಾಯ್? ಹ್ಯಾ ಚವ್ಗಾಂ ಜಣಾಂ ಭುರ್ಗ್ಯಾಂಕ್ ಹಾಂವ್ ಆನಿ ಕಶೆಂ ಪಳೆಂವ್? ಕೋಣ್ ಆಸಾ ಆನಿ ಮ್ಹಾಕಾ ಆಧಾರ್? ತುಜೆವಿಣೆ ಹಾಂವ್ ಕಶೆಂ ಜಿಯೆಂವ್?
ಏ ದೆವಾ... ತುವೆಂ ಮ್ಹಜೆಥಂಯ್ ಅಶೆಂ ಕಿತ್ಯಾ ಕೆಲೆಂಯ್? ಹಾವೆಂ ತುಕಾ ಕಸಲೊ ಅನ್ಯಾಯ್ ಕೆಲೊ ಮ್ಹಣ್ ತುವೆಂ ಮ್ಹಾಕಾ ಅಸಲಿ ಶಿಕ್ಶಾ ದಿಲಿಯ್?..." ಅರೆ.. ಹೆಂ ಕಿತೆಂ ಮಾಯ್ ಉಲಯ್ತಾ? "ತುಂ ಮೆಲೊಯ್ ತರ್ ಹಾಂವ್ ಸೊಡ್, ಮ್ಹಜೆಂ ಸುಣೆಂ ಸಯ್ತ್ ತುಜಾ ಮೊಡ್ಯಾಚೆರ್ ಏಕ್ ದೂಃಕ್ ಗಳಂವ್ಚೆಂನಾ. ಖಂಚಾ ಕರ್ಮಾಕ್ ತುಜೆತಸಲ್ಯಾ ಹರಾಮ್ಯಾನ್ ಜಿಯೆಜಾಯ್? ದೀಸ್ಭರ್ ಘೊಳ್ತಾಯ್ ಆನಿ ಎಕ್ಲೊಚ್ ನಾಕ್ಭರ್ ಘೊಟ್ತಾಯ್. ತ್ಯಾ ನೆಣ್ತ್ಯಾ ಭುರ್ಗ್ಯಾಂ ಖಾತಿರ್ ರಾಂದ್ಲ್ಲೆಂ ಮೊಟಾಚಾ ಪಾಡ್ಯಾಪರಿಂಯೇವ್ನ್ ಉಸ್ಪುನ್ ಘೆವ್ನ್ ಗಿಳ್ತಾಯ್. ಛಿಕ್ಕ್.. ತುಜೊಯ್ ಏಕ್ ದಾದ್ಲ್ಯಾಚೊ ಜಲ್ಮ್ಗೀ...?
ಕಂಯ್ ತರೀ ವೊಡಾ ರುಕಾಕ್ ಉಮ್ಕೊಳ್ ಘೆವ್ನ್ ತುಕಾ ಮೊರೊಂಕ್ ಜಾಯ್ನಾಂಗೀ? ಹಾಂವ್ ತುಕಾ ಸಂಕ್ಪಾಷಣ್ ಹಾಡ್ನ್ ದಿತಾಂ, ತೆಂ ತರೀ ಪಿಯೆವ್ನ್ ವಚ್ ಅಡ್ಗಂತ್. ಬುರ್ನಾಸ್ ಕಸಾಪ್ಪಿ ಕಂಚೊ. ತುಂವೀ ಏಕ್ ಮನಿಸ್ಗೀ? ತ್ಯಾ ಕೊಲ್ಗ್ಯಾಕ್ ತರೀ ಇಲ್ಲಿಶಿ ಲಜ್ ಮ್ಹಳ್ಳಿ ಆಸಾ, ತುಕಾ ತಿವೀ ನಾ. ಲಜ್ಮಾಂಡೊ ಕಂಚೊ..."
ಬಾಬ್ ಘರಾಭಿತರ್ ರಿಗ್ತಚ್ಚ್ ಮಾಂಯ್ಚಿ ಹಿ ಲದಿನ್ ವೊಡ್ಕೊ ನಾಸ್ತಾಂ ಫುಟೊನ್ ಆಸ್ತಾ. ಪುಣ್ ಬಾಬ್ ಮಾತ್ರ್ ಕೆಪ್ಪೊ ಕಸೊ ಜಾವ್ನ್ ತಕ್ಲಿ ಬಾಗಾವ್ನ್ ಬಸ್ವಾಪರಿಂ ಥೊಡೊ ವೇಳ್ ಬಾಂಕಾರ್ ಬಸ್ತಾ. ಆಂಗಾ ವಯ್ಲೆಂ ಘಾಮಾನ್ ಭಿಜೊನ್ ಕುಸ್ಲ್ಲೆಂ ಘಾಣೆಡ್ಡೆಂ ವಸ್ತುರ್ ಕಾಡ್ನ್ ಸೊಪ್ಯಾಚಾ ಕೊನ್ಶಾಕ್ ಉಡವ್ನ್ ವಯ್ಲ್ಯೆ ಸರಿಯೆರ್ ಆಸ್ಲ್ಲಿ ಮೆಳ್ಕುಟಿ ಪಿಂಜ್ಕರ್ ಲುಂಗಿ ಪೆಂಕ್ಟಾಕ್ ಅರ್ನುನ್ ಭಾಂಧುಂಕ್ ತಾಕಾ ಥೊಡೊ ವೇಳ್ ಲಾಗ್ತಾ. ಏಕ್ ಪೋಂತ್ ದೊನ್ಯೀ ಹಾತಾಂನಿ ತೊ ಧರಿತ್ ತರ್ ಅನ್ಯೇಕ್ ಪೋಂತ್ ಸಕಯ್ಲ್ ಗಳಾನಾಸ್ತಾಂ ರಾವ್ತಾ?
ಹೊ ನಾಟಕ್ ಆಮ್ಕಾಂ ಭುರ್ಗ್ಯಾಂಕ್ ಸದಾಂಚೊ ಜಾಲಾ. ತ್ಯಾ ವೆಳಾರ್ ಶಿರೊ ಆನಿಂ ಹಾಡಾಂ ವಯ್ರ್ ಪಡ್ಲೆಲೆಂ ತಾಚೆಂ ತೆಂ ಬಾರೀಕ್ ಅಸ್ಕತ್ ಜಿವಂತ್ ಶರೀರ್ ಎಕೇಕ್ ಪಾವ್ಟಿಂ ಸಂಪೂರ್ಣ್ ವಿಣ್ಗೆಂ ಪಡ್ಲ್ಲೆಂಯ್ ಆಸಾ. ಆನಿ ಅಪ್ರೂಪ್ ರಂಗ್ ಹೊಗ್ಡಾಯಿಲ್ಲೊ ಕಾಶ್ಟೆ ಲೇಸ್ ತಾಚಾ ಪೆಂಕ್ಟಾದೊರಾಚೆರ್ ಉಮ್ಕಾಳೊನ್ ಆಸ್ತಾ ಆನಿ ತಾಚೊ ಮಾನ್ ರಾಕ್ಚೆಂ ಕಾಮ್ ಕರ್ತಾ.
ಹಾತಾಕ್ ಲುಂಗಿ ಮೆಳ್ತಚ್ಚ್ ತೊ ಬಾಂಕಾಚೆರ್ ಪರ್ತಾತಚ್ಚ್. ತಿ ಲುಂಗಿ ತಾಚಾ ಆಂಗಾರ್ ಖಂಯ್ ಆಸ್ತಾ ಆನಿ ಕಿತೆಂ ಲಿಪಯ್ತಾ ಮ್ಹಳ್ಳೆಂ ತಾಕಾ ಪಡೊನ್ ಗೆಲ್ಲೆಂಚ್ನಾ. ಲುಂಗೆಕ್ ಜಾಲ್ಲ್ಯಾ ಬುರಾಕಾಂತ್ಲ್ಯಾನ್ ಚಡಾವತ್ ಜಾವ್ನ್ ತಾಚೊ ಪಾಂಯ್ ಭಾಯ್ರ್ ಪಡ್ತಾ ಯಾ ಅಂಗಡ್ಯೀ ಉಗ್ತಿ ಪಡ್ಲ್ಲಿ ಪಡ್ಲ್ಲಿ ದಿಸ್ತಾ. ಹಾಚಿ ತಾಕಾ ಕಸಲಿಚ್ಚ್ ಪರ್ವಾ ನಾ. ತಾಚೆತ್ಲ್ಯಾಕ್ ಕಾಂಯ್ ತರೀ ಇಲ್ಲೊ ವೇಳ್ ಗುಣ್ಗುಣೊನ್ ಆಸ್ತಾ.
ಹ್ಯಾಚ್ಚ್ ವೆಳಾರ್ ಮಾಯ್ ಸಣ್ಸಣೊನ್ ತಾಚೆರ್ ಗಾಳಿ ಸೊವ್ಯಾಂಚೊ ಪಾವ್ಸ್ ವೊತ್ತಾ, ಕಾಳಿಜ್ ಶಿಂದ್ಚೆ ತಸಲಿಂ ದಾದ್ಲ್ಯಾಪಣಾಕ್ ಕೊಸೊರ್ ಕರ್ಚಿಂ ಉತ್ರಾಂ ಉಲವ್ನ್ ಉದ್ಕಾಕ್ ಉಜೊ ಲಾಂವ್ಚೆಂ ಪ್ರಯತನ್ ಕರುನ್ ಬಾಬಾಚಾ ಜಿಬ್ಬ್ಯಾಚಾ ಬೊಲ್ಸಾಂತ್ ಆಸ್ಲ್ಲೆ ಪುರಾ ಪಯ್ಶೆ ಕಾಡ್ನ್ ಶೀದಾ ಭಿತರ್ ವ್ಹೆತಾ.
ಇತ್ಲೆಂ ಜಾಲ್ಯಾರೀ ಬಾಬ್ ಏಕ್ ಉತಾರ್ ಕಾಡಿನಾ.. ಸುಂಕ್ಟಾಪರಿಂ ಕೊವ್ಳಿ ಜಾವ್ನ್ ನಿದ್ತಾ ಅಪ್ಲ್ಯಾಚ್ ಆಮಾಲಿ ಸಂಸಾರಾಂತ್ ಲೀನ್ ಜಾವ್ನ್. ಏಕೇಕ್ ಪಾವ್ಟಿಂ ತಾಳೊ ಬಳಾನ್ ಭಾಯ್ರ್ ಕಾಡುನ್ ತೊ ಮ್ಹಣ್ತಾ.
"ತೋಂಡ್ ಧಾಂಪ್ಗೊ ಸುಣ್ಯಾ.. ಆತಾಂ ಹಾಂವ್ ತುಕಾ ನಾಕಾಗೊ.. ಭಾಣ್ಸಿರ್ಯಾ.." ಉಪ್ರಾಂತ್ಲೆ ತೆ ಸಬ್ದ್ ತಾಕಾ ಮಾತ್ರ್ ಆಯ್ಕತಾತ್. ಆಮ್ಕಾಂ ಭಿಲ್ಕುಲ್ ಆಯ್ಕನಾಂತ್. ಆನಿ ಕಾಂಯ್ ಬಾಬಾಚಿ ಹಿ ದುರ್ದಿಶಾ ಪಳೆವ್ನ್ ಆಮಿ ಭಿರ್ಮತ್ ಪಾವ್ಲ್ಯಾರ್ ಮಾಯ್ ಆಮ್ಕಾಂ ಭೆಷ್ಟಾವ್ನ್ ಭಿತರ್ ಆಪಯ್ತಾ ಆನಿ ಆಲ್ತಾರಿ ಮುಖಾರ್ ದಿಂಬಿ ಘಾಲವ್ನ್ ಆಮೊರಿ, ತೇರ್ಸ್ ಯಾ ಹೆರ್ ಮಾಗ್ಣಿಂ ಮ್ಹಣಯ್ತಾ. ರಾತಿಂ ಬಾಬ್ ಜೆವ್ಲ್ಲೊಚ್ಚ್ನಾ, ನ್ಹಾಲ್ಲೊಚ್ಚ್ನಾ.
ಪುಣ್ ಆಮಿಂ ಸಕಾಳಿಂ ಉಟ್ತಾನಾ ಬಾಬ್ ಬಾಂಕಾರ್ ಆಸಾನಾ. ಲುಂಗಿ ತಾಚಿ ಹರ್ಶೆಂಚೆಪರಿಂ ತ್ಯೇ ಸರಿಯೆರ್ ಉಮ್ಕಾಳೊನ್ ಆಸ್ತಾ. ತಾಚ್ಯೊ ತ್ಯೊ ತುಟ್ಕರ್ ವಾಣೊ ಜಾಲಾಚಾ ಪೊಂತಾರ್ ಆಸ್ಲ್ಲ್ಯೊ ದಿಸಾನಾಂತ್. ಮಾಯ್ಚೆ ಪುರ್ಪುರೆ ಮಾತ್ರ್ ತಾಕಾ ಸಕಾಳಿಂ - ಸಾಂಜೆರ್ ಸಾಣ್ಸುನ್ ಆಸ್ತಾತ್, ಬಾಬ್ ಘರಾಂತ್ ಆಸ್ಲ್ಯಾರೀ, ನಾತ್ಲ್ಯಾರೀ.
ಬಾಬ್ ಕೂಲಿಚೆಂ ಕಾಮ್ ಕರ್ತಾ. ಮಾತ್ಯೆಕಾಮಾಚೊ ಮೇಸ್ತ್ ತೊ. ಸಕ್ಕಡ್ ತಾಕಾ ಬರೋ ಮ್ಹಣ್ತಾತ್. ಗಾಂವ್ಚಾ ಲೊಕಾಕ್ ತೊ ಪಾವ್ಲ್ ಮೇಸ್ತ್. ಮಾಂಯ್ಕ್ ಆನಿ ಬಾಬಾಕ್ ಸಮಾಚ್ಚ್ ಪಡಾನಾತ್ಲ್ಲೆಂ. ಗಿರು ಬಾಪ್ಪು ಮ್ಹಜೆಲಾಗಿಂ ಏಕ್ ದೀಸ್ ಸಾಂಗ್ತಾಲೊ.
"ತುಮ್ಚೆಂ ನಿಮಾಣೆಂ ಭಯ್ಣ್ ಲಿಝಿ ಜಾಲ್ಯಾ ಉಪ್ರಾಂತ್ ತುಮ್ಚಿ ಆವಯ್, ಮ್ಹಜಿ ವೊನಿ, ಜ್ಯೋರ್ ಜಾಲಿರೇ ಜೊನಿ. ಆನಿ ತುಮ್ಚೊ ಬಾಬ್ ಸೊರೊ ಚಡ್ ಪಿಯೆಂವ್ಕ್ಲಾಗ್ಲೊ. ಪಾಯ್ಲೆಂ ತಶೆಂ ತೊ ಸೊರೊ ಪಿಯೆನಾತ್ಲ್ಲೊ. ಘರ್ ಮ್ಹಳ್ಯಾರ್ ಜೀವ್ ದಿತಾಲೊ. ತುಮ್ಚ್ಯೆ ಆವಯ್ನ್ ತುಮ್ಚ್ಯಾ ಬಾಬಾಕ್ ಪಯ್ಸ್ ಕರುಂಕ್ ನಾತ್ಲ್ಲೆಂ ತರ್..."
"ನಾ ಬಾಪ್ಪು... ತಶೆಂ ಕಾಂಯ್ ನಾ. ಬಾಬ್ ಸದಾಂಯ್ ಗರಾ ಯೆತಾ. ಪುಣ್ ಪಿಯೆವ್ನ್ ಯೆತಾ. ಟಾಯ್ಟ್ ಜಾತಾ. ದೆಕುನ್ ಮಾಂಯ್ಕ್ ರಾಗ್ ಯೆತಾ. ತಿ ತಾಕಾ ಏಕ್ ಸಾರ್ಕೆಂ ಯೆಟ್ತಾ. ಪುಣ್ ಸಕಾಳಿಂ ಮಾಯ್ನ್ ಬಾಬಾಕ್ ವಾಡ್ಚೆಂ ಹಾವೆಂ ಮಸ್ತ್ ಪಾವ್ಟಿಂ ನಿದ್ಲ್ಲ್ಯಾಕಡೆಂ ಥಾವ್ನ್ ಪಳೆಲಾಂ. ಉಪ್ರಾಂತ್ ಬಾಬ್ ಕಾಮಾಕ್ ವ್ಹೆರಾ. ತೆದಾಳಾ ಮಾಯ್ ಬಾಬಾಕ್ ಕಾಂಯ್ ಪುರ್ಪುರ್ನಾ. ಸಕಾಳಿಂ ಬಾಬಾನ್ ಕಾಮಾಕ್ವ್ಹೆತಾನಾ ಮಾಯ್ಚ್ಚ್ ತಾಕಾ ಪಯ್ಶೆ ದಿತಾ. ತೊ ಕಾಮಾಕ್ ಗೆಲ್ಲ್ಯಾ ಉಪ್ರಾಂತ್ ಪರ್ತ್ಯಾನ್ ಮಾಯ್ ತಾಕಾ ಆಮ್ಚೆ ಮುಖಾರ್ ಗಾಳಿ ಯೆಟ್ತಾ. ಸಾಂಜೆರ್ ಯೆತಾನಾ ತುಮ್ಚೊ ಬಾಬ್ ಗಾಂವ್ಚಾ ಲೊಕಾಕ್ ವಾಟೆರ್ ಡೊಂಬರಾಟ ಧಾಖವ್ನ್ ಯೆತಾ ಪಳೆಯಾ, ಮ್ಹಣ್ ಮಾಯ್ ಆಮ್ಚೆಲಾಗಿಂ ಸಾಂಗ್ತಾ".
ಹೆಂ ಆಯ್ಕೊನ್ ಬಾಪ್ಪು ಹಾಸ್ಲ್ಲೊ.
"ತಿ ಘೊವ್-ಬಾಯ್ಲೆಚಿ ಲಡಾಯ್ರೆ ಜೊನಿ. ತುಮ್ಕಾಂ ಬುರ್ಗ್ಯಾಂಕ್ ತಿ ಸಮ್ಜಾನಾ." "ಬಾಪ್ಪು, ಮಾಯ್ ಆನಿ ಬಾಬ್ ಕಿತ್ಯಾ ತಶಿ ಲಡಾಯ್ ಕರ್ತಾತ್? ತುಮ್ಗೆರ್ಯೀ ಮಾವ್ಶಿ.." "ಘರಾಂತ್ಲಿ ಬಾಯ್ಲ್ ಭುಧ್ವಂತ್ ಆಸಾ ತರ್ ತಿಚೆಂ ಗರ್ ಪಾಡ್-ಪಿಡ್ಡ್ಯಾರ್ ಜಾಯ್ನಾರೇ ಪುತಾ. ಕಾಜಾರಾ ದಿಸಾ ನೊವ್ರೊ ಆಸ್ಲ್ಲೊ ತಿಕಾ ದೀಸ್ ವೆತಾಮ್ ವೆತಾಮ್ ಪತಿ ಜಾತಾ, ಉಪ್ರಾಂತ್ ತೊ ಭುರ್ಗ್ಯಾಮ್ಚೊ ಬಾಪುಯ್ ಜಾತಾ, ಭುರ್ಗಿಂ ಪ್ರಾಯೆಕ್ ಪಾವ್ತಾ ಪರ್ಯಾಂತ್ ತೊ ಘರ್ಕಾರ್ ಜಾತಾ ಆನಿ ನಿಮಾಣೆಂ ’ಆಮ್ಚೊ’ ಜಾತಾ.
ಪುಣ್ ದಾದ್ಲ್ಯಾಕ್ ಅಪ್ಣಾಚಿ ಪತಿಣ್ ಸದಾಂ ಸರ್ವದಾಂ ಹೊಕಾಲ್ ಜಾವ್ನ್ಂಚ್ ಆಸ್ತಾ ಆನಿ ತಶಿಚ್ಚ್ ದಿಸ್ತಾ. ತಿಚೊ ಸಾಂಗಾತ್ ತಾಕಾ ಹರ್ಯೆಕ್ ಘಡ್ಯೆ ಜಾಯ್ ಮ್ಹಣ್ ತೊ ಆಶೆತಾ. ಹ್ಯಾ ಸಾಂಗಾತಾಚಿ ಮೀತ್, ಮೇರ್ ಬಾಯ್ಲೆನ್ ಸಾಂಬಾಳಿಜಾಯ್ ಆನಿ ನಮಿಯಾರಿಜಾಯ್ ಪಡ್ತಾ. ತೆಂವೀ ಭುರ್ಗಿಂ ವ್ಹಡ್ ಜಾವ್ನ್ ಯೆತಾನಾ ತಿಣೆ ಅನಿಕೀ ದಾದ್ಲ್ಯಾಕ್ ಲಾಗಿಂ ಆಸ್ಚೆಪರಿಂ ಪಳೆಜಾಯ್.
ಪತಿಕ್ ತ್ಯಾ ಘರಾಂತ್ ಅಸುರಕ್ಶಿತಾಯ್ ಯಾ ಅಪುಣ್ ಎಕ್ಸುರೊಂ ಜಾಲಾಂ ಮ್ಹಣ್ ಭೊಗುಂಕ್ ಸೊಡುಂಕ್ ನಜೊ. ಪತಿರಾಯಾಕ್ ತಿಚಾವಾಂಟ್ಯಾಕ್ ಮೋಗ್ ಆನಿ ಸಾಂಗಾತ್ಚ್ ದಿಂವ್ಚಾಕ್ ಪತಿಣೆನ್ ಇನ್ಕಾರ್ ಕರುಂಕ್ ನಜೊ. ದಾದ್ಲ್ಯಾಚಿ ಜತನ್ ತಿಣೆಂ ಆದಿಂ ಘೆತ್ಲ್ಲ್ಯಾ ಪ್ರಾಸ್ ಚಿಕ್ಕೆ ಚಡ್ ಘೆಜಾಯ್ ಪಡ್ತಾ. ಹೈಹಿಕ್ ಆನಿ ಲೈಂಗಿಕ್ ಸುಕ್ ಜರ್ ಎಕಾ ದಾದ್ಲ್ಯಾಕ್ ತಾಚ್ಯೆ ಪತಿಣೆಥಾವ್ನ್ ಬರಾಬರ್ ಮೆಳ್ತಾ ತರ್ ಖಂಡಿತ್ ಜಾವ್ನ್ ತೆಂ ಕುಟಾಮ್ ಬರೆಂಚ್ ಉರ್ತಾ. ತ್ಯಾ ಘರಾಂತ್ ರೇಗ್ರ್, ಶಿಸ್ತ್ ಆನಿ ಮೋಗ್ ದರಬಸ್ತ್ ಆಸ್ತಾ. ಸ್ತ್ರೀಯೆನ್ ಹಟ್ಟ್ ಕರುನ್ ದಾದ್ಲ್ಯಾಚಿ ಬೆಪರ್ವಾ ಕೆಲಿ ತರ್ ದಾದ್ಲ್ಯಾಚೆಂ ಮೇಟ್ ಚುಕ್ತಾ. ದೆಕುನ್ಂಚ್ ಮಾಲ್ಘಡ್ಯಾಂನಿ ಸಾಂಗ್ಲಾಂ, ಸ್ತ್ರೀ ಘರ್ ಘಡುಂಕ್ಯೀ ಸಕ್ತಾ, ಕಾಡುಂಕ್ಯೀ ಸಕ್ತಾ ಮ್ಹಣೊನ್.
ದಾದ್ಲ್ಯಾಕ್ ಪರಿವರ್ತಿತ್ ಕರುಂಕ್ ಸ್ತ್ರೀ ಘಡ್ಯೆನ್ ಸಕ್ತಾ. ಪುಣ್ ಸ್ತ್ರೀಯೆನ್ ಸಮ್ಜೊನ್ ಘೆಂವ್ಕ್ ದಾದ್ಲೊ ಜಿಣಿಭರ್ ಸಕಾನಾ. ಹೊಚ್ಚ್ ಘುಟ್ ಆನಿ ಸಂಬಂಧ್ ಕಾಜಾರಿ ಜಿವಿತಾಚೊ." ಬಾಪ್ಪುನ್ ಇತ್ಲೆಂ ಪುರಾ ಸಾಂಗ್ಲ್ಲೆಂ, ಹಾವೆಂ ಆಯ್ಕಾಲೆಂ. ಪುಣ್ ಏಕ್ಯೀ ಮ್ಹಾಕಾ ಸಮ್ಜೊಂಕ್ನಾತ್ಲ್ಲೆಂ. ಬಾಬಾಕ್ ಆನಿ ಮಾಯ್ಕ್ ರಾಜಿ ಕರುಂಕ್ ಜಾಯ್ ಮ್ಹಣ್ ಆಮಿ ಭುರ್ಗ್ಯಾಂನಿ ಕಿತ್ಲೆಂ ಪ್ರಯತನ್ ಕೆಲ್ಯಾರೀ ಸಲ್ವಾಲ್ಲ್ಯಾಂವ್. ಮಾಂಯ್ ಆಯ್ಕಾನಾಂಗೀ ಯಾ ಬಾಬ್ ಸೊರೊ ಸೊಡುಂಕ್ ತಯಾರ್ ನಾಂಗೀ ಮ್ಹಳ್ಳೆಂ ಆಮ್ಕಾಂ ಸಮ್ಜಾಲ್ಲೆಂನಾ. ಹಾಂವ್ ಮ್ಹಾಲ್ಘಡೊ,
ಮ್ಹಾಕಾ ಆತಾಂ ಚವ್ದಾ ವರ್ಸಾಂಚಿ ಪ್ರಾಯ್. ಹಾಂವ್ ಆಟ್ವೆಂತ್ ಶಿಕ್ತಾಂ. ಮ್ಹಜೆ ಪಾಟ್ಲ್ಯಾನ್ ಲಿಲ್ಲಿ, ಸೆಲ್ಲಿ ಆನಿ ಲಿಝಿ. ಬಾಬಾ ಪ್ರಾಸ್ ಮಾಯ್ ಆಮ್ಚೊ ಚಡ್ ಮೋಗ್ ಕರ್ತಾ. ಆಮ್ಕಾಂ ಚೊವ್ಗಾಂಕ್ಯೀ ಸಕಾಳಿಂಚೆಂ ವಾಡ್ನ್, ಇಸ್ಕೊಲಾಕ್ ವ್ಹರುಂಕ್ ಭುತಿ ದೀವ್ನ್ ಉಪ್ರಾಂತ್ ಘರಾಕ್ ಬೀಗ್ ಘಾಲ್ನ್ ತಿ ಸರ್ಶಿಲ್ಯಾ ಬೊಣ್ಕ್ಯಾಂಗೆರ್ ಕಾಮಾಕ್ ವ್ಹೆತಾ. ಸಾಂಜೆರ್ ಆಮಿ ಇಸ್ಕೊಲಾ ಥಾವ್ನ್ ಪಾಟಿಂ ಯೆತಾನಾ ಮಾಯ್ ಕಾಫಿ ಕರ್ನ್ ದವರ್ತಾ. ಆನಿ ತಿಣೆ ಕಾಮ್ ಕರ್ಚಾ ಧನ್ಯಾಗೆಲ್ಯಾಂನಿ ತಿಕಾ ಖಾಂವ್ಕ್ ದಿಲ್ಲೆಂ ತಿ ಘರಾ ಹಾಡ್ನ್ ಆಮ್ಕಾಂ ಪಾಪ್ಯೆ ಸಾಂಗಾತಾ ದಿತಾ. ಥೊಡ್ಯಾ ತೆಂಪಾ ಥಾವ್ನ್ ಬಾಬ್ ಮಾಂಯ್ಕ್ ಸಮಾ ಮಾರ್ತಾಲೊ.
ತ್ಯಾ ಎಕಾ ದಿಸಾ ಮಾಂಯ್ನ್ ಹಾತಾಕ್ ಮೆಳ್ಲ್ಲೊ ಮುನ್ಕುಟೋ ಕಾಡ್ನ್ ಬಾಬಾ ಕುಶಿನ್ ಉಡಯಿಲ್ಲೊ. ತೊ ಬಾಬಾಚಾ ಜಾಂಗಾ ಮಧೆಂ ಲಾಗ್ಲ್ಲೊ. ಬಾಬ್ ಥಂಯ್ಚ್ ದಡ್ಡ್ ಕರ್ನ್ ಪರ್ತಾಲ್ಲೊ. ಮಾಂಯ್ನ್ ಧಾಂವೊನ್ ಯೇವ್ನ್ ಬಾಬಾಕ್, "ಕಿತೆಂ ಜಾಲೆಂ ತುಕಾ? ಆನಿ ಕಿತ್ಯಾ ತುಂ ಮ್ಹಾಕಾ ಅಶೆಂ ಮಾರ್ತಾಯ್? ಮ್ಹಜೆ ಹಾತ್-ಪಾಂಯ್ ತುಂ ಮೊಡ್ನ್ ಘಾಲ್ಶಿ ತರ್ ಹ್ಯಾ ಭುರ್ಗ್ಯಾಂಕ್ ಕೊಣೆಂ ಪೊಸ್ಚೆಂ?" ಅಶೆಂ ಮ್ಹಣೊನ್ ಬಾಬಾಚಿ ಸೆವಾ ತಿ ಕರ್ತಾನಾ ಆಮ್ಕಾಂ ಭುರ್ಗ್ಯಾಂಕ್ ಮಾತ್ರ್ ತಿಣೆ ಭಾಯ್ರ್ ಧಾಂವ್ಡಾಯಿಲ್ಲೆಂ.
ಸುಮಾರ್ ವೆಳಾ ಉಪ್ರಾಂತ್ ಬಾಬ್ ದುಖಿನ್ ದೊಳೆ ಧಾಂಪುನ್ ಹಾತ್ ಜಾಂಗಾಂ ಮಧೆಂ ರಿಗವ್ನ್ ಭಯ್ರ್ ಆಯಿಲ್ಲೊ ನಿಧಾನ್. ತ್ಯಾ ಉಪ್ರಾಂತ್ ತೊ ಭಾಯ್ಲೊ ಬಾಂಕ್ ಸೊಡ್ನ್ ಭಿತರ್ ಆಯಿಲ್ಲೊಚ್ನಾ. ಜೆಂವ್ಚೆಂ, ನಿದ್ಚೆಂ ಸಕ್ಕಡ್ ತ್ಯಾ ಬಾಂಕಾರ್ಚ್ಚ್. ಸೊಪೊಚ್ಚ್ ತಾಚೆಂ ಘರ್.
ಹೆಂ ಕಾಂಯ್ ಸ, ಸಾತ್ ಮಹಿನೆ ಜಾತಿತ್. ಹಾಚೆ ಉಪ್ರಾಂತ್ ಮಾಯ್ ಅನಿಕೀ ಜ್ಯೋರ್ ಜಾಲಿ. ಬಾಬ್ ಥಂಡ್ ಪಡ್ಲೊ. ತಾಚೊ ಸೊರೊ ಮಾತ್ರ್ ದಿಸಾನ್ದೀಸ್ ಚಡಾತ್ತ್ ಆಯ್ಲೊ. ಆನಿ ಆಜ್ ಸಕಾಳಿಂ ಪಳೆತಾನಾ ಬಾಬ್ ಜಾಲಾಂತ್ ತ್ಯಾ ಕೊನ್ಶಾಕ್ ಮೊರೊನ್ ಪಡ್ಲ್ಲೊ. ಮಾಯ್ಚ್ಯೆ ಬೊಬೆಕ್ ಆಮ್ಕಾಂ ಜಾಗ್ ಜಾಲ್ಲಿ. ಆಮ್ಕಾಂ ಆರಾವ್ನ್ ಧರ್ನ್,
"ತುಮ್ಚೊ ಬಾಬ್ ಆಮ್ಕಾಂ ಸಕ್ಡಾಂಕ್ ಸೊಡ್ನ್ ಗೆಲೊರೇ ಪುತಾ" ಮ್ಹಣ್ ತಿಣೆ ಆರಾಬಾಯೊ ದಿತಾನಾ ಆಯ್ಕಾಲ್ಲಿಂ ಸೆಜಾರ್ಚಿಂ ಆಮ್ಗೆರ್ ಧಾಂವೊನ್ ಆಯಿಲ್ಲಿಂ. ಬಾಬ್ ಪಡೊನ್ ಆಸ್ಲ್ಲ್ಯಾ ಕಡೆನ್ ಸರ್ಶಿನ್ ತಾಣೆಂ ಅಪ್ರೂಪ್ ಹಾಡ್ಚೆಂ ಸೊರ್ಯಾಚೆಂ ಪಾಂಯ್ಟ್ ಖಾಲಿ ಜಾವ್ನ್ ಪಡೊನ್ ಆಸ್ಲ್ಲೆಂ. ಬುಧ್ವಾರಾ ಆನಿ ಸನ್ವಾರಾ ರೊ ಕಾಯಾಮ್ ಎಕೇಕ್ ಪಾಂಯ್ಟ್ ಹಾಡ್ನ್ ತ್ಯಾಚ್ ಜಾಗ್ಯಾರ್ ದವರ್ತಾ. ಮಾಯ್ ಕಾಂಯ್ ತ್ಯಾ ವಿಶ್ಯಾಂತ್ ಉಲಂವ್ಕ್ ವಚಾನಾ.
ಪುಣ್ ಬಾಬಾಚಾ ಜಿಬ್ಬ್ಯಾಚಾ ಬೊಲ್ಸಾಂತ್ ತಿಕಾ ಮೆಳ್ಚೆ ಪಯ್ಶೆ ಉಣೆ ದಿಸ್ಲ್ಯಾರ್ ಮಾತ್ರ್ ರಾತಿಂ ನಿದ್ತಾ ಮ್ಹಣಾಸರ್ ಮಾಯ್ ಗಾಳಿ ದೀವ್ನ್ಂಚ್ ಆಸ್ತಾ. ರಾತಿಂ ಉಟೊನ್ ಬಾಬ್ ತ್ಯಾ ಪಾಂಯ್ಟಾಂತ್ಲೆಂ ಪಿಯೆವ್ನ್ ಯೇವ್ನ್ ನಿದ್ತಾಲೊ. ಕಾಲ್ ಬುಧ್ವಾರ್ ಜಾಲ್ಲ್ಯಾನ್ ತಾಣೆ ಪಾಂಯ್ಟ್ ಹಾಡ್ಲ್ಲೆಂ ತೆಂ ಹಾವೆಂ ಪಳೆಲ್ಲೆಂ.
"ಆನಿ ಕಿತ್ಲೆಂ ಸೊಸ್ತಲೊ ಆನಿ ಬಾಯ್ಲೆ ಭುರ್ಗ್ಯಾಂಕ್ ಧೊಸ್ತಲೊ? ಉಂದ್ರಾಕ್ ಮ್ಹಣ್ ಹಾಡ್ಲ್ಲೆಂ ವಕಾತ್ ಸೊರ್ಯಾಂಕ್ ಭರ್ಸುನ್ ಪಿಯೆಲೊ ಆಸ್ತಲೊ. ಪಯ್ಲೆಂಚ್ ಪಿಯೆವ್ನ್ ಪಿಯೆವ್ನ್ ಭಿತರ್ಲ್ಯಾನ್ ಪುರ್ತೊ ಪೊಕೊಳ್ ಜಾಲ್ಲೊ. ತಾಕಾ ಮೊರೊಂಕ್ ಕಿತ್ಲೆಂ ಜಾಯ್?" ಎಕ್ಲೊ ಸೆಜಾರಿ ಸಾಂಗ್ತಾನಾ ಮ್ಹಜೆ ಕಾನ್ ನೀಟ್ ಜಾಲೆ. "ತಾಣೆಂ ಸೊರ್ಯಾಂತ್ ವೀಕ್ ಭರ್ಸಿಲ್ಲೆಂಗೀ ಯಾ ಆಂಜೆಲ್ಬಾಯೆನ್ ಕಾಂಯ್ ಭರ್ಸುನ್ ಪಿಯೆಂವ್ಕ್ ದಿಲೆಂಗೀ?"
ಅಶೆಂ ಸಾಂಗ್ಲ್ಲ್ಯೆ ಜಾನಕಿಯಮ್ಮಾಕ್ ಹಾವೆಂ ರಾಗಾನ್ ಪಳೆಲೆಂ.. ತಿಂ ಕಿತೇಂಯ್ ಉಲಂವ್ದಿತ್, ಮಾಂಯ್ಚೆರ್ ಕಿತ್ಯಾ ತಾಣಿಂ ದೂರ್ ಘಾಲಿಜಾಯ್? ಮ್ಹಾಕಾ ಹೆಂ ಸೊಸ್ಲೆಂನಾ. ಕಿತ್ಯಾ ಮ್ಹಳ್ಯಾರ್ ಮಾಯ್ನ್ ತಶೆಂ ಕರುಂಕ್ ಸಾಧ್ಯ್ ನಾ. ತಶೆಂ ಕರ್ಚೆಂ ತರ್ ತೆಂ ವಕಾತ್ ಹಾಡ್ಲ್ಲ್ಯಾ ದಿಸಾಚ್ ತಿ ಬಾಬಾಕ್ ಸೊರ್ಯಾಂತ್ ಭರ್ಸುನ್ ದಿತಿ ಆಸ್ಲ್ಲಿ. ಕಾಲ್ ರಾತಿಂಯ್ ತಿಣೆಂ ತೆಂಚ್ ಸಾಂಗ್ಲ್ಲೆಂ -
"ಉಂದ್ರಾಚೆಂ ವಕಾತ್ ತುಜಾ ಸೊರ್ಯಾಂತ್ ಭರ್ಸುನ್ ದೀವ್ನ್ ತುಕಾ ಲಗಾಡ್ ಕಾಡ್ತಾಂಗೀ ನಾ ಪಳೆ. ಜೈಲಾಕ್ ಗೆಲ್ಯಾರೀ ವ್ಹಡ್ ನಾ. ತುಂ ಅಶ್ಯೊಚ್ ಧೊಶಿ ಕರ್ಶಿ ತರ್ ತುಕಾ ಹಾಂವ್ ಸೊರ್ಯಾಂತ್ ವೀಕ್ ಘಾಲ್ನ್ ಲಗಾಡ್ ಕಾಡ್ತೆಲಿಂಚ್. ಮೆಲ್ಯಾರ್ ಬೊಲಾಕ್ ಗೆಲೊಯ್. ಕೊಣಾಮಾಯೆಚೆ ಹಾತ್ಪಾಂಯ್ ಧರ್ನ್ ತರೀ ಮ್ಹಜಾ ಭುರ್ಗ್ಯಾಂಕ್ ವ್ಹಡ್ ಕರ್ತೆಲಿಂ. ತುಜಿ ಇಝಾ ಸೊಸುನ್ ಮ್ಹಾಕಾ ಸಂಸಾರ್ ನಾಕಾ ಜಾಲಾ"
ಬಾಬ್ ಸದಾಂಚೆಪರಿಂ ಕಾಲ್ಯೀ ತಶೆಂಚ್ ಪುರ್ಪುರೊನ್ ಬಾಂಕಾರ್ ಪಡ್ಲ್ಲೊ. ತೊ ಮೊರಾತ್ ತರ್ ಮಾಂಯ್ಕ್ಯೀ ಬರೆಂಚ್. ಆಮ್ಕಾಂಯ್ ಸಂತೊಸ್. ಘರಾಂತ್ ಲಡಾಯ್-ಝಗ್ಡೆಂ ಆಸ್ಚೆಂನಾ, ಸಮಧಾನ್ ಆಸ್ತೆಲೆಂ. ಅಸಲ್ಯಾ ಬಾಬಾನ್ ಕಿತ್ಯಾ ವಾಂಚಾಜಯ್? ಆನಿ ಆಜ್ ಬಾಬ್ ಮೆಲಾ.. ಪುಣ್ ಮಾಯ್ ಅಶಿ ರಡ್ತಾಕೀ, ಮ್ಹಾಕಾಚ್ ಹಾಂಗಾಸರ್ ಭ್ಯೆಂ ದಿಸೊಂಕ್ ಲಾಗ್ಲಾಂ. ತಿಣೆಂಚ್ ಸಾಂಗ್ಲ್ಲೆಂ ನ್ಹಯ್ಗೀ ಬಾಬಾಕ್ ಮೊರೊಂಕ್. ಜಾಯ್ನಾ ತರ್ ತಾಕಾ ತೆಂ ಉಂದ್ರಾಚೆಂ ವೀಕ್ ತಿಣೆ ದಿತಾಂ ಮಳ್ಳೆಂ ನ್ಹಯ್ಗೀ? ತರ್ ಆತಾಂ ತೆಂಚ್ ವೀಕ್ ಪಿಯೆವ್ನ್ ತೊ ಮೆಲಾ ತರ್ ಹಿ ಕಿತ್ಯಾ ಅಶೇಂಯ್ ಕಾಳಿಜ್ ಕಡಂವ್ಚೆಪರಿಂ ಹಾಕ್-ಬೊಬ್ ಮಾರ್ನ್ ರಡ್ತಾ?
ಮ್ಹಾಕಾ ಏಕ್ಯೀ ಸಮ್ಜಾನಾ.. ನ್ಹಯ್,
ಮಾಯ್ ಕಿತ್ಯಾ ರಡ್ತಾ..?
ಹ್ಯಾ ವಿಶ್ಯಾಂತ್ ಬಾಪ್ಪುಲಾಗಿಂ ವಿಚಾರ್ಯಾಂ ಮ್ಹಳ್ಯಾರೀ ತೊ ಎಕಾ ಕೊನ್ಶಾಕ್ ಬಾಂಕಾರ್ ಬಸೊನ್ ದುಃಖಾಂ ಗಳಯ್ತಾ ಆನಿ ಹಾಂವ್ ಸರ್ಶಿನ್ ವ್ಹೆತೆಚ್ ಮ್ಹಜೆಂ ಮಾತೆಂ ಮೊಗಾನ್ ತೊ ಪೊಶೆತಾ. ತರ್ ಹಾಂವ್ ಆತಾಂ ಕೊಣಾಲಾಗಿಂ ವಿಚಾರುಂ? ಜಾಲಾಚಾ ಪೊಂತಾರ್ ಬಾಬಾನ್ ವೊಂಕುನ್ ಘಾಲ್ಲೆಂ ಅನಿಕೀ ಘಾಣ್ತಾ... ಪೊಲಿಸ್ಗಾರ್ ಯೆತೆಲೆ ಮ್ಹಣ್ ಗುರ್ಕಾರ್ ಸಾಂಗ್ತಾಲೊ. ಸಕಾಳಿಂಚಿಂ ವೊರಾಂ ಸಾಡೆ ಧಾ ಜಾತಾನಾ ಪೊಲಿಸ್ಗಾರ್ ಆಯ್ಲೆಚ್ಚ್. ಬಾಬಾಕ್ ಎಕೆ ವೊಲಿಂತ್ ಗುಟ್ಲಾವ್ನ್ ಸಾಂಗಾತಾ ಆಯಿಲ್ಲ್ಯಾ ಆಸ್ಪತ್ರೆಚಾ ವೆನಾಂತ್ ಘಾಲ್ನ್ ತಾಣಿಂ ತಾಕಾ ವ್ಹೆಲೊ. ತಾಂಚೆ ಸಾಂಗಾತಾ ಬಾಪ್ಪುಯೀ ಗೆಲೊ. ಹಾಂವ್ ಮಾತ್ರ್ ಆವಾಕ್ಕ್ ಜಾವ್ನ್ ಮಾಂಯ್ಕ್ಚ್ ಪಳೆಂವ್ಕ್ ಪಡ್ಲಿಂ..
ತಿ ಆತಾಂಯ್ ಆರಾಬಾಯೊ ದಿತಾ. ಮ್ಹಜೆ ಕಾನ್ ಕೆಪ್ಪೆ ಜಾವ್ನ್ ಯೆತಾತ್. ಹಾತ್ ಕಾಂಪ್ತಾತ್. ತರ್ ಬಾಬಾ ವಿಷ್ಯಾಂತ್ ಮಾಯ್ನ್ ಸಾಂಗ್ಲ್ಲೆಂ ಆನಿ ತಾಕಾ ಮೊರೊಂಕ್ ಮಾಗ್ಲ್ಲೆಂ, ವೀಕ್ ದಿತಾಂ ಮ್ಹಳ್ಳೆಂ ಸಕ್ಕಡ್ ಫಟ್? ಮ್ಹಾಕಾ ಕಿತೆಂ ಕಳಿತ್ ತಾಂಚ್ಯೆ ಕಾಜಾರಿ ಜಿಣ್ಯೆಚೊ ಹೊವೀ ಏಕ್ ಘುಟ್ ಮ್ಹಣ್?
ಬಾಪ್ಪುನ್ ಮ್ಹಾಕಾ ತಶೆಂ ಸಾಂಗೊಂಕ್ ನಾತ್ಲ್ಲೆಂ. ನ್ಹಯ್ ತರ್ ಮ್ಹಾಕಾ ಕಿತೆಂ ಗರ್ಜ್ ಆಸ್ಲ್ಲಿ ಬಾಬಾಚಾ ಪಾಂಯ್ಟಾಂತ್ ತೆಂ ವೀಕ್ ರಾತಿಂ ಭರ್ಸುನ್ ದವರ್ಚಿ?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
