ರಡೊನ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾಝರ್

ಆಜ್ ರಡೊನ್ ಕಿತೆಂ ಉಪ್ಕಾರ್

ಮ್ಹಜಾ ನಿರ್ಜೀವ್ ಕುಡಿರ್ ಪಡೊನ್
ತುಜಾ ದುಖಾಚಿ ಝರ್ ವ್ಹಾಳ್ತಾನಾ
ಮ್ಹಜಾ ಮೆಲ್ಲ್ಯಾ ಕುಡಿಕ್ ದೂಕ್ ಭೊಗ್ಲೆಂ
ಆಜ್ ತುಂ ರಡೊನ್ ಕಿತೆಂ ಉಪ್ಕಾರ್ ಪುತಾ

ತುಕಾ ಪಳೆಂವ್ಕ್ ಹಾಂವ್ ಜಾಯ್ತೆಂ ಆಶೆಲ್ಲೊಂ
ಹರ್‍ಯೇಕಾ ಚಿಟಿನ್ ಹಾಂವ್ ಫಾಲ್ಯಾಂ ಫಾಲ್ಯಾಂ ಯೆತಾಂ
ಮ್ಹಣೊನ್ ಮ್ಹಾಕಾ ಫಟಯ್ಲೆಂಯ್ ತರ್‌ಯೀ ಅಖ್ರೇಕ್
ತುಜೆಲಾಗಿಂ ಏಕ್ ಉತಾರ್ ಉಲಂವ್ಕ್ ಮ್ಹಾಕಾ ಜಾಲೆಂನಾ
ಆಜ್ ತುಂ ರಡೊನ್ ಕಿತೆಂ ಉಪ್ಕಾರ್ ಪುತಾ

ತುಂ ಮ್ಹಜೆಂ ಮೊರ್ನ್ ದಭಾಜಾಯೆನ್ ಕರಯ್ತಲೊಯ್
ವಾಡ್ಯಾಚೊ ಜಾಯ್ತೊ ಲೋಕ್ ತುಕಾ ಭುಜಯ್ತಲೊ
ಮ್ಹಜಿ ತಸ್ವೀರ್ ಪತ್ರಾಂನಿ ಛಾಪ್ತೆಲಿ
ನಿಮಾಣೆಂ ಪಾದ್ರಿ ಮ್ಹಜಿ ಪೇಟ್ ಬೆಂಜಾರ್ ಕರುನ್
ಮ್ಹಾಕಾ ಫೊಂಡಾಂತ್ ಘಾಲ್ತೆಲಿಂ ತುಂ ರಡ್ತಲೊಯ್
ಆಜ್ ತುಂ ರಡೊನ್ ಕಿತೆಂ ಉಪ್ಕಾರ್ ಪುತಾ

ಏಕ್‌ಚ್ ಪೂತ್ ಮ್ಹಣ್ ತುಕಾ ಕಸ್ಟಾಂನಿ ವಾಗಯ್ಲೊ
ಜಾಯ್ತೆಂ ತುಕಾ ಶಿಕಾಪ್ ದಿಲೆಂ
ತುಂ ಪರ್ಗಾಂವಾಕ್ ಪಾವ್ಲೊಯ್ ಆನಿ ಮ್ಹಾಕಾ
ಏಕ್ ಪಾವ್ಟಿಂ ಸಯ್ತ್ ಪಳೆಂವ್ಕ್ ವಿಸ್ರಲೊಯ್
ಆತಾಂ ತುಜಿಂ ದುಖಾಂ ಕಿತ್ಯಾಕ್ ಉಪ್ಕಾರ್ ಪುತಾ

ಮ್ಹಜಾ ಮೊರ್ನಾಚಾ ಮಿಸಾಕ್ ಜಾಯ್ತೊ ಲೋಕ್ ಯೆತಲೊ
ಥೊಡೆಂ ಮಿಸಾಖಾತಿರ್ ತರ್ ಥೊಡೆ ಫಳಾರಾಖಾತಿರ್
ಆಜ್ ಹಾಂವ್ ಅಂತರ್ಲಾಂ ತರೀ ಪುಣ್ ವಿಸ್ರನಾಕಾ
ರಜಾರಾಂತ್ ಹಾಂವ್ ತುಕಾ ಬರೆಂ ಮಾಗೊನ್ ಧಾಡ್ತಲೊಂ
ಭಲಾಯ್ಕಿ ಮ್ಹಜಾ ಭುರ್ಗ್ಯಾ

ಕವಿತಾಝರ್ - 57

- ಸಿರಿಲ್ ಪೆರಿಸ್, ಬೆಂದೂರ್

ಕವಿತಾ ಜೆದ್ನಾಂ ಕಾಳ್ಜಾಚಿ ಭಾಸ್ ಜಾವ್ನ್ ಉಲಯ್ತಾ, ತೆದ್ನಾಂ ತಿ ಸರ್ವಾಂಕ್ ಸಮ್ಜಾತಾ ಮ್ಹಣ್ಚಾಕ್ ಹಿ ಕವಿತಾ ಅಪುರ್ಭಾಯೆಚಿ ಗೊವಾಯ್ ದಿತಾ.

ಕವಿತಾಝರ್ ಪಾನಾಕ್

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications