ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 54. ಪಿಂಜ್ರ್ಯಾಂತ್ಲೆಂ ಜಿವಿತ್
ಪ್ಯಾಟ್ರಿಕ್ ಮೋರಾಸ್: ಕೊಂಕ್ಣೆಂತ್ ಮಾಲ್ಘಡೊ ಕಾಣ್ಯೆಗಾರ್, ವಾವ್ರಾಡಿ. ಮಂಗ್ಳುರಾಂತ್ ಕೊಂಕ್ಣಿ ಪತ್ರಾಂಚ್ಯಾ ಪ್ರಚಾರಾ ಖಾತಿರ್ ಹಾಣೆಂ ಸಕ್ರಿಯ್ ರಿತಿರ್ ಹಾಣೆಂ ವಾವ್ರ್ ಕೆಲಾ, ಆನಿ ಕರುನ್ ಆಸಾ. ಆಜ್ಕಾಲ್ ಹಾಣೆಂ ಸಾಹಿತ್ಯ್ ರಸ್ಚೆಂ ಉಣೆಂ ಕೆಲಾಂ ತರ್ಯೀ, ಹಾಣೆಂ ಸಭಾರ್ ಮಟ್ವ್ಯೊ ಕಾಣ್ಯೊ, ಥೊಡ್ಯೊ ಸಾಂಕಳ್ ಕಾಣ್ಯೊ, ಕಾದಂಬರಿ ತಶೆಂಚ್ ಪದಾಂ ಬರಯ್ಲ್ಯಾಂತ್. ಹಾಚೆ ಥೊಡೆ ಕೊಂಕ್ಣಿ ಬೂಕ್ ಪರ್ಗಟ್ಲ್ಯಾತ್.
ಎಮ್. ಪ್ಯಾಟ್ರಿಕ್
"ಪೆಟ್ಟಿ, ತುಕಾ ಫ್ಲೊರಾಬಾಯ್ ಕಾಲ್ ಸಾಂಜೆರ್ ವಿಚಾರ್ನ್ ಆಯಿಲ್ಲೆಂ" ಮಮ್ಮಾ ಸಾಂಗಾಲಾಗ್ಲಿ. ಆಯ್ತಾರ್ ಜಾಲ್ಲ್ಯಾನ್ ದನ್ಫರಾಂ ಜೇವ್ನ್ ಇಲ್ಲೊ ವಿಶೆವ್ ಘೆಂವ್ನ್ ಸಾಂಜೆಚಾ ಮಿಸಾಕ್ ಭಾಯ್ರ್ ಸರ್ತಾನಾ....
"ಕೆದಾಳಾ ಗಾಂವಾಕ್ ಆಯಿಲ್ಲಿ?"
ತಾಚಿ ಆವಯ್ ಕಠೀಣ್ ಹುಶಾರ್ ನಾ ಮ್ಹಣ್ ಭಾವಾನ್ ತಾರ್ ಮಾರ್ಲ್ಲ್ಯಾಕ್ ಪೋಯ್ರ್ ಆಯಿಲ್ಲೆಂ ಖಂಯ್. ತುಂ ಆಯ್ತಾರಾಚೆಂ ಮಾತ್ರ್ ಘರಾ ಆಸಾಯ್, ಹೆರಾ ವೆಳಾರ್ ಶೊಪಾಂತ್ ಆಸ್ತಾಯ್ ಮ್ಹಣ್ ಸಾಂಗ್ಲೆಂ..... ತರ್ "ಫಾಲ್ಯಾಂ ಮೆಳೊಂಕ್ ಯೆತಾಂ" ಮ್ಹಣ್ ಗೆಲೆಂ.
ಫ್ಲೋರಾ.... ಮ್ಹಜ್ಯಾ ಮೆಂದ್ವಾಂತ್ ಉಡಾಸಾಚಿಂ ಪಾಳಾಂ ರೊಂಬಯ್ಲಿಂ, ಮ್ಹಜ್ಯಾ ವೊಡ್ತಾಂತ್ಲೆಂ ಗುಲೊಬಾ ಝಡ್....
ಮ್ಹಜ್ಯಾ ಭುರ್ಗ್ಯಾಪಣಾಲೆಂ ಸಾಂಗಾತಿ, ಖರ್ಯಾ ಆವಯ್ ಬಾಪಯ್..... ಉಪ್ರಾಂತ್ ತಿಸ್ರೆಂ ಜಣ್ ಪ್ಲೊರಾ.
ಕೊಂಕಣ್ ಕರಾವಳೆಚೊ ಹರ್ಯೆಕ್ ಪಾವ್ಸಾಳ್..... ಪ್ಲೊರಾ ಬಾಯೆಚೊ ಉಡಾಸ್ ಹಾಡ್ತಾಲೊ. ಶಿರಾಂಧಾರಿಚಾ ಪಾವ್ಸಾಂತ್ ಬಿಜೊನ್ ಶೆಳ್ ಜಾಲ್ಲ್ಯಾ ವೆಳಾರ್ ಮ್ಹಜೆಂ ನಾಕ್ ಪೀಳ್ನ್.... ಆಪ್ಲ್ಯಾ ಗಾಗ್ರ್ಯಾನ್ ತೋಂಡ್ ಪುಸುನ್ ಕೇಸ್ ಉಗಯ್ತಾಲೆಂ. ಘರಾ ಪಾಟ್ಲ್ಯಾ ವ್ಹಾಳಾಂತ್ ಪಾವ್ಸಾಚೆಂ ಉದಾಕ್ ಭರೊನ್ ವ್ಹಾಳ್ತಾನಾ.... ಕಾಗ್ದಾಚ್ಯೊ ದೋಣಿ ಕರುನ್ ಉದ್ಕಾಂತ್ ಸೊಡ್ತಾನಾ..... ಗಾಂವ್ಚ್ಯಾ ಫಿರ್ಗಜ್ ಫೆಸ್ತಾಂ ವೆಳಾರ್.... ದಾರು ಲಾಸ್ತಾನಾ ಮ್ಹಾಕಾ ದಾಖಂವ್ಕ್ ಆಪ್ಲ್ಯಾ ಖಾಂದಾರ್ ವಾವೊವ್ನ್ ವರ್ತಾಲೆಂ. ಮ್ಹಜ್ಯಾ ಲ್ಹಾನ್ಪಣಾಚೊ ಉಡಾಸ್ ದೊಳ್ಯಾಂ ಮುಕಾರ್ ಯೆತಾನಾ....
ಪ್ಲೊರಾ.... ಸೆಜಾರ್ಚ್ಯಾ ಎಕಾ ಭಾಡ್ಯಾಚಾ ಘರಾಂತ್ ಜಿಯೆಂವ್ಚೆಂ ದುಬ್ಳ್ಯಾ ಕುಟ್ಮಾಂತ್ಲೆಂ ಚೆಡುಂ.
ಮ್ಹಜಿ ಮಾಮ್ಮಾ ಕೆದ್ನಾಂಯ್ ಸಾಂಗ್ತಾಲಿ.... ತಿತ್ಲೆಂ ಸೊಭಾಯೆಚೆಂ ಭಾಂಗಾರಾ ಕನಸ್, ಗಂಧಚೆಂ ಸುಂದರ್ ಮುಖಮಳ್, ಸೊಭಿತ್ ಗುಲೊಬಾಕ್ ಸರ್ ಜಾಂವ್ಚೆಂ.... ಗ್ರೇಸ್ತ್ ಘರಾಣ್ಯಾಂತ್ ಜಲ್ಮಾಲ್ಲೆಂ ಜಾಲ್ಯಾರ್ ಖಂಡಿತ್ ರಾಯ್ ಕುವರ್ಣೆಬರಿ ಆಸ್ತೆಂ ಆಸ್ಲ್ಲೆಂ.
ಪಂಚ್ವೀಸ್ ವರ್ಸಾಂ ಆದ್ಲಿ ಪ್ಲೊರಾಬಾಯೆಚಿ ಸೊಭಾಯ್ ಮ್ಹಜ್ಯಾ ಮನಾಂತ್ ಉದೆವ್ನ್ ಆಪಾಲಿಪಾ ಖೆಳ್ತಾ ಆತಾಂಯ್.
ಎಪ್ಪಾಲಾ ಬರಿ ಸುಂದರ್ ತೊಂಡಾಚೆಂ.... ತಾಚ್ಯೊ ದಾಂತಾ ಪಂಕ್ತಿ ದಾಳಿಂಬಾ ಬಿಯೆಬರಿ.... ಧವೆಚ್... ತೆಂ ಹಾಸ್ತಾನಾ... ಪೊಲ್ಯಾರ್ ಸೊಭಾಯೆಚೆ ಪೊಂಡ್ ಪಡ್ತಾಲೆ... ಆಕರ್ಶಿತ್ ರುಪಾಚಿ ತರ್ನಿ ಚಲಿ..... ಚುರುಕ್ ಸ್ವಭಾವಾಚೆಂ.... ಜಾಣ್ವಾಯೆಚಿ ಚಾಲ್.... ಸೊಭಿತ್ ಚಲಿ ತರೀ ದುಬ್ಳ್ಯಾ.... ಮಾರ್ಕೆಟಿಂತ್ ಬಿಪಾಮಾಸ್ ವಿಕ್ಚ್ಯಾ ಧನ್ಯಾಲಾಗಿಂ ಕಾಮ್ ಕರ್ಚ್ಯಾ... ಕ್ರಿಸ್ತಾಂವ್ ತರೀ ಮುಸ್ಲಿಮಾಕ್ ಮತಾಂತರ್ ಜಾಲ್ಲೆ ಶರತ್ ಸಾಹೆಬಾಚಿ ಮಾಲ್ಗಡಿ ಧುವ್ ಆವಯ್ ಕ್ರಿಸ್ತಾಂವ್ ಕುಟ್ಮಾಂತ್ಲಿ ಅಂತರ್ ಜಾತ್, ಮೊಗಾರ್ ಪಡೊನ್ ರಿಜಿಸ್ತ್ರಿ ಕೊರ್ಟಾಂತ್ ಕಾಜಾರ್ ಜಾಲ್ಲಿಂ.
ಬಾಪಯ್ ಸೊರ್ಯಾಚೊ ಗುಲಾಮ್.... ಘರಾಂತ್ ಬೊಕೊರ್ನ್ ಖಾಂವ್ಚಿ ದುಬ್ಳಿಕಾಯ್, ಜಾಲ್ಯಾರ್ಯ್ ಭಲಾಯ್ಕೆಂತ್ ಬರಿಂ ಆಸ್ಲ್ಲಿಂ. ಶರತ್ ತೆಗಾಂ ಭುರ್ಗ್ಯಾಂಚೊ ಬಾಪಯ್. ಪ್ಲೊರಾ ಉಪ್ರಾಂತ್ ಜೊರಾ. ನಿಮಾಣೊ ಲೊರಿ, ನಿಮಾಣ್ಯಾ ಚೆರ್ಕ್ಯಾಕ್ ಬಾಳಾಂತ್ ಜಾತಾಚ್ಚ್, ಬಾಂಳ್ಟಿಚಿ ಪಾವೊತೆ ಪರಿಂ ಪೋಸ್ ಕರಿನಾತ್ಲ್ಯಾನ್, ಆವಯ್ಕ್ ಹಿಸ್ಟಿರಿಯಾ ಜಾವ್ನ್ ಪಿಶ್ಯಾಂಬರಿ ಜಾಲ್ಲಿ. ತಶೆಂ ಜಾಲ್ಲ್ಯಾನ್ ಘರ್ಚಿ ಸರ್ವ್ ಜವಾಬ್ದಾರಿ ಪ್ಲೊರಾಚೆರ್ ಪಡ್ಲಿ. ಎಕಾಡ್ಚ್ಯಾನ್ ಬೆಬ್ದೊ ಬಾಪಯ್ ತಾಚಿಂ ಮಾಸಾಂ ಖಾತಾನಾ ಅನ್ಯೇಕಡ್ಚ್ಯಾನ್ ಪಿಸಾಂತುರ್ ಆವಯ್ ಸಂಗಿಂ ಲ್ಹಾನ್ ಭಾಂವ್ಡಾಂಚಿ ಚಾಕ್ರಿ.
ಪ್ಲೊರಾ ಶಿಕ್ಪಾಂತ್ ಚುರುಕ್, ಬುದ್ವಂತ್ ಆಸ್ಲ್ಯಾರೀ ದುಬ್ಳಿಕಾಯೆಚ್ಯಾ ಆಡ್ಚಾನೆನ್ ಆಟ್ವೆ ಕ್ಲಾಸಿಂತ್ ತಾಣೆಂ ಇಸ್ಕೊಲ್ ಸೊಡಿಜಾಯ್ ಪಡ್ಲೆಂ.
ಸಾಕಾಳಿಂಚೆಂ ಸೆಜಾರ್ಚ್ಯಾ ಘರ್ಚೆಂ, ಘರ್ ಕಾಮ್ ಕರುಂಕ್ ವೆತಾಲೆಂ. ತ್ಯಾ ಘರಾಂ ಪಯ್ಕಿ ಆಮ್ಚೆಂ ಘರ್ ಏಕ್.
ಹಾಂವ್ ಲ್ಹಾನ್ ಭುರ್ಗೊ ಆಸ್ತಾನಾ.... ಮ್ಹಾಕಾ ಉಕ್ಲುನ್, ಮುಡ್ಡುನ್ ಮ್ಹಜೆ ಗಾಲ್ ತಾಂಬ್ಶೆ ಕರ್ತಾಲೆಂ.
ಮ್ಹಜಿ ಮಾಮ್ಮಿ ತಾಕಾ ತಾಮಾಶೆ ಕರ್ತಾಲಿ.
"ತುಜ್ಯಾ ಸೊಭಾಯೆಕ್ ಕೋಣ್ ತರೀ ರಾಯ್ ಕುವರ್ ತುಕಾ ಆಪರ್ಸುನ್ ವ್ಹರುಂಕ್ ಆಸಾ" ತವಳ್ ಪ್ಲೊರಾ ಲಜೆನ್ ದೊಡ್ತಾಲೆಂ. ಸಭಾರ್ ಪಾವ್ಸಾಳ್ ಆಶೆಂಚ್ ಪಾಶಾರ್ ಜಾಲೆ.
ಆತಾಂ ಆತಾಂ... ಪ್ಲೊರಾಚಾ ಬಾಪಾಯ್ಚೆಂ ಬೆಬ್ದೆಪಣ್ ಚಡ್ಲ್ಲೆಂ. ಆವಯ್ಚಿ ಹಿಸ್ಟಿರಿಯಾ ಚಡೊನ್ ಬಂಧ್ ಕುಡಾಂತ್ ಫಿಚಾರ್ ಕೆಲ್ಲೆಂ. ಪ್ಲೊರಾ ಆಪ್ಣಾಚಾ ಫುಡಾರಾಕ್ ಸಪ್ಣೆತಾಲೆಂ.
**************
ನಿದೆಚ್ಯಾ ಆಮಾಲಾರ್ ಹಾಂವ್ ಕೂಸ್ ಪರ್ತಿತಾನಾ, ಭಾಯ್ರ್ ಹಾಸ್ಲ್ಲೊ ಆವಾಜ್ ಆಯ್ಕಾಲೊ. ಮಾಮ್ಮಾ ಕೊಣಾಲಾಗಿಂ ತರೀ ಉಲಂವ್ಚೆಂ ಆಯ್ಕಾತಾಲೆಂ. ಸಪಾಣ್ ಆಸ್ತೆಲೆಂ ಮ್ಹಣ್ ವೊಗೊಚ್ ರಾವ್ಲೊಂ. ತಿತ್ಲ್ಯಾರ್...
"ಹಾಂವ್ಚ್ ಪೆಟ್ಟಿಕ್ ಉಟಯ್ತಾಂ....." ಮ್ಹಣ್ ದಾರ್ ಲೊಟುನ್ ತೆಂ ಸೀದಾ ಭಿತರ್ ಮ್ಹಜ್ಯಾ ಕುಡಾಕ್ ಆಯ್ಲೆಂ
"ಪ್ಲೊರಾಬಾಯ್ ತುಂ?"
ಹಾಂವ್ ಮಾಂಚ್ಯಾರ್ ಉಟೊನ್ ಬಸ್ಲೊಂ. ದೊಳೆ ವಾಟಾರ್ನ್ ಪಳೆಲೆಂ ಹಾವೆಂ ತಾಕಾ.
"ಪೆಟ್ಟಿ ತುಕಾ ಮ್ಹಜಿ ವಳಕ್ ಮೆಳ್ಳಿ?" ಮಾಂಚ್ಯಾರ್ ತೆಂಯ್ ಬಸ್ಲೆಂ.
ಹಾಂವ್ ಲ್ಹಾನ್ ಆಸ್ತಾನಾ ಪೆಟ್ಟಿ ಮ್ಹಣ್ ಮ್ಹಾಕಾ ಮೊಗಾನ್ ಪೊಟ್ಲುನ್ ಧರ್ನ್ ಉಮೊ ದಿತಾಲೆಂ ತೆಂಚ್ ಪ್ಲೊರಾ ಬಾಯ್.....!
"ಕಸೊ ಆಸಾಯ್ ಪೆಟ್ಟಿ?" ಲಾಗಿಂ ಸರೊನ್ ಮ್ಹಜೆಂ ಮಾತೆಂ ಪೊಶೆಲೆಂ ತಾಣೆಂ....
ತುಂ ಕೆದೊ ವ್ಹಡ್ ಜಾಲಾಯ್ರೆ.... ಮಸ್ತ್ ಶಿಕ್ಲಾಯ್, ವಯ್ಲ್ಯಾನ್ ಸ್ವಂತ್ ಶೋಪ್ ದವರ್ನ್ ವ್ಯಾಪಾರಿಸ್ತ್ ಜಾಲಾಯ್ ಖಂಯ್..... ಮ್ಹಾಕಾ ಕಿತ್ಲೊ ಸಂತೊಸ್ ಜಾಲೊ ಜಾಣಾಂಯ್?
"ತುಕಾ ಕಶೆಂ ವಿಸ್ರೊಂವ್ಚೆ ಪ್ಲೊರಾ ಬಾಯೆ....? ಕೆದಾಳಾ ಆಯಿಲ್ಲೆಂಯ್?"
"ಹಾಂವ್ ಪೋರ್ ಆಯಿಲ್ಲಿಂ... ತುಂ ಶೊಪಾಂತ್ ಆಸಾಯ್ ಮ್ಹಳ್ಳೆಂ ತುಜ್ಯಾ ಮಾಮ್ಮಾನ್. ತ್ಯಾ ಖಾತಿರ್ ಆಜ್ ಆಯ್ಲಿಂ. ತುಜಿ ನೀದ್ ಪಾಡ್ ಕೆಲಿ. ರಾಗ್ ಆಯ್ಲೊಗೀ?"
"ಹಾವೆಂ ತುಜೆರ್ ರಾಗಾರ್ ಜಾಂವ್ಚೆಂ? ತಶೆಂ ಜಾಂವ್ಕ್ ಆಸಾಗೀ? ತುಂ ಆಯಿಲ್ಲಿ ಖಬಾರ್ ಮಾಮ್ಮಾನ್ ಸಾಂಗ್ಲ್ಲಿ" ಪ್ಲೊರಾ ಬಾಯೆಕ್ಚ್ ಪಳೆಲಾಗ್ಲೊಂ ಹಾಂವ್. ತೆಂ ಬದ್ಲೊಂಕ್ ನಾ. ತಿಚ್ಚ್ ಸುಂದರತಾ, ತಿಚ್ಚ್ ಆದ್ಲಿ ಮೊವಾಳಾಯ್ ಉಜ್ವಳ್ಚೆ ದೊಳೆ!
ಮ್ಹಜೆಂ ಲಾಗಿಂಚ್ ಮಂಚ್ಯಾರ್ ಬಸ್ಲೆಲ್ಯಾ ಪ್ಲೊರಾಬಾಯೆಕ್ ಪಳಯ್ತಾನಾಂಚ್ ಪರತ್ ಭುರ್ಗ್ಯಾಪಣಾಚೊ ಉಡಾಸ್ ಆಯ್ಲೊ.
ಹಾಂವ್ ತವಳ್ ತಿಸ್ರೆ ಕ್ಲಾಸಿಂತ್ ಶಿಕ್ತಾಲೊಂ.... ತ್ಯಾ ದಿಸಾ ಸೆಜಾರಾ ಗುಸು ಗುಸು ಖಬ್ರೊ... ಘರಾಂತ್ ಪಪ್ಪಾ ಆನಿ ಮಮ್ಮಾ ಪ್ಲೊರಾ ವಿಶಿಂ ಖಬಾರ್ ಉಲಯ್ತಾಲಿಂ. ಕಿತೆಂಚ್ ಮ್ಹಾಕಾ ಕಳಾನಾಸ್ಲೆಂ. ಹಾವೆಂ ಮಮ್ಮಾಲಾಗಿಂ ಕಿತೆಂ ಗಜಾಲ್ ಮ್ಹಣೊನ್ ವಿಚಾರ್ಲೆಂ.
"ಲ್ಹಾನ್ ಭುರ್ಗ್ಯಾಂಕ್ ವ್ಹಡಾಂಚಿ ಗಜಾಲ್ ಕಿತ್ಯಾಕ್?" ಮ್ಹಜ್ಯಾ ಮಾಮ್ಮಾನ್ ಮ್ಹಜೆಂ ತೋಂಡ್ ಬಂಧ್ ಕೆಲೆಂ. ತ್ಯಾ ಉಪ್ರಾಂತ್ ಎಕಾ ಹಪ್ತ್ಯಾನ್ ಪ್ಲೊರಾಬಾಯ್ ಆಮ್ಗೆರ್ ಆಯಿಲ್ಲೆಂ. ರಡ್ಕುರೆಂ ತೋಂಡ್, ನಿಸ್ತೇಜ್ ದೊಳೆ. ಕಿತೆಂಗೀ ಪಪ್ಪಾ ಮಮ್ಮಿಲಾಗಿಂ ಘುಟಾನ್ ಸಾಂಗೊನ್ ರಡಾಲಾಗ್ಲೆಂ ಪ್ಲೊರಾಬಾಯ್. ತಾಚೆಂ ದೂಖ್ ಪಳಂವ್ಚೆಂ ಪಯ್ಲೆಂ ಪಾವ್ಟಿಂ ಹಾವೆಂ!
ಹಾಂವ್ ಗೊಂದೊಳಾಂತ್ ಸಾಂಪಡ್ಲೊಂ... ಪ್ಲೊರಾಬಾಯೆನ್ ಮ್ಹಾಕಾ ಪಳೆಲ್ಲೆಂಚ್, ಪೊಟ್ಲುನ್ ಧರುನ್ ರಡ್ಲೆಂ. ಹಾಂವೀ ರಡ್ಲೊಂ. ಮ್ಹಜ್ಯಾ ದಾಕ್ಟುಲ್ಯಾ ಹಾತಾಂನಿ ತಾಚ್ಯಾ ಪೊಲ್ಯಾಂ ವಯ್ಲೆಂ ದೂಖ್ ಹಾವೆಂ ಪುಸ್ಲೆಂ.
"ತುಜೆಂ ಪ್ಲೊರಾಬಾಯ್ ಆನಿ ಹ್ಯಾ ಗಾಂವಾಂತ್ ಆಸ್ಚೆಂ ನಾ ಪೆಟ್ಟಿ.. ತುಕಾ ಆನಿ ಸದಾಂ ಪಳವ್ಚಿಂ ನಾ...." ಮ್ಹಜ್ಯಾ ಪೊಲ್ಯಾಂಕ್ ಉಮೆ ದೀಲಾಗ್ಲೆಂ ತೆಂ.
"ತುಂ ಖಂಯ್ ವೆತಾಯ್ ಪ್ಲೊರಾಬಾಯೆ...?" ತಾಣೆಂ ಜವಾಬ್ ದಿಲಿ ನಾ, ಬಗಾರ್ ಭರ್ಲೆಲ್ಯಾ ದುಖಾಂ ಸಂಗಿಂ, ಮ್ಹಜ್ಯಾ ಪಪ್ಪಾ ಮಾಮ್ಮಿಲಾಗಿಂ ಬೆಸಾಂವ್ ಮಾಗಾಲಾಗ್ಲೆಂ. ತಶೆಂ ಆಮ್ಚೆಂ ಘರ್ ಭಾಯ್ರ್ ಸರ್ನ್ ಗೆಲ್ಲೆಂ ತೆಂ ಉಪ್ರಾಂತ್ ಹಾಂವೆ ತಾಕಾ ಪಳೆಲ್ಲೆಂ ನಾ.
ವೀಸ್ ವರ್ಸಾಂ ಉಪ್ರಾಂತ್ ಆಜ್ಚ್ ಪಳಂವ್ಚೆಂ! ತ್ಯಾ ದೀಸ್ ತಾಚೊ ವಿಶಯ್ ಕಳಾನಾತ್ಲ್ಯಾರೀ ಉಪ್ರಾಂತ್ ಸವ್ಕಾಸ್ ಕಳೊಂಕ್ ಲಾಗ್ಲೊ. ಪ್ಲೊರಾ... ತ್ಯಾ ದಿಸಾ ರಡ್ಲ್ಲೆಂ ಕಾರಾಣ್ ತಾಚ್ಯಾ ಕಾಜಾರಾ ಸಮ್ಮಂದ್ ನಿರ್ಣಾಯ್ ಜಾಲ್ಲ್ಯಾಕ್, ತ್ಯಾ ಕುವರ್ಣಿಕ್ ಖಂಚಾಯ್ ರಾಯ್ ಕುವಾರಾನ್ ಅಪರ್ಸುಂಕ್ ನಾತ್ಲ್ಲೆಂ. ಬದ್ಲೆಕ್, ತರುಣ್ಪಣ್ ಉತ್ರಾಲ್ಲೊ. ಕೇಸ್ ಪಿಕ್ಲ್ಲೊ, ತೊಂಡಾಕ್ ಮಿರ್ಯೊ ಪಡ್ಲ್ಲ್ಯಾ ಮಾತಾರ್ಯಾಲಾಗಿಂ ತಾಚೆಂ ಲಗ್ನ್ ಜಾವ್ನ್ ಗೆಲ್ಲೆಂ. ಕಾಜಾರ್ ಮ್ಹಣ್ಚ್ಯಾಕ್ಯ್ ತೆಂ ಏಕ್ ವಂಚನ್ ಪ್ರಕರಣ್... ತಾಚ್ಯಾ ಕುಡ್ಚೆಲಾ ಬಾಪಾಯ್ನ್ ಪಯ್ಶ್ಯಾಂಚಾ ಆಶೆಕ್ ಮಾತಾರ್ಯಾಕ್ ವಿಕ್ಲ್ಲೆಂ.
ಪ್ಲೊರಾಕ್... ತ್ಯಾ ಲಪಂಗ್ ಮಾತಾರ್ಯಾನ್ ಮುಂಬಯಿಚ್ಯಾ ವೆಶ್ಯಾಂಚಾ ಫಿಂದ್ರ್ಯಾಕ್ ವಿಕ್ಲ್ಲೆಂ. ಹ್ಯಾ ಕಾಜಾರಾಕ್ ತಾಣೆಂ ಒಪ್ಪಾನಾತ್ಲೆಲ್ಯಾಕ್ ತಾಕಾ ಮಾರ್ನ್ ಖೊಟಾವ್ನ್ ವಾಟೆಕ್ ಹಾಡ್ಲ್ಲೆಂ ತ್ಯಾ ಹರಾಮಿ ಕುಡ್ಚೆಲಾ ಬಾಪಾಯ್ನ್.
ಪ್ಲೊರಾಚೆಂ ಮುಖ್ಲೆಂ ಭವಿಶ್ಯ್ ದರಿದ್ರ್ಯ್ಪಣಾಂತ್ ಫಿಂದ್ರ್ಯಾ ಭಿತರ್ ಮುಕಾರ್ಸುನ್ ಗೆಲೆಂ.
ಸೆಜಾರ್ಚ್ಯಾಂಚಿ ಜಾಂವ್ ಸಮಾಜೆಂತ್ಲ್ಯಾ ಸುಧಾರಾಕಾಂನಿ ಸೈತ್ ಹೆಂ ಕಾಜಾರ್ ಆಡಾವ್ನಾಂ. ಆಪ್ಲ್ಯಾ ದೊಳ್ಯಾಂ ಮುಖಾರ್ ಜಲ್ಮೊನ್ ತಾಂಚಾ ಘರಾಂನಿ ಚಾಕ್ರಿ ಕೆಲ್ಯಾರಿ... ಮುಗ್ದ್ ಚಲಿಯೆಚೆಂ ಜಿವನ್ ಪಿಡ್ಡ್ಯಾರ್ ಜಾತಾನಾ ಸೊಭಾಯ್ ಪಳೆಲಿ ಶಿವಾಯ್ ತಾಕಾ ರಾಕ್ಲೆಂ ನಾ.
ಪ್ಲೊರಾಕ್ ತ್ಯಾ ಮಾತಾರ್ಯಾನ್ ಮುಂಬಯಿಚ್ಯಾ ಫಿಂದ್ರ್ಯಾಕ್ ವಿಕುನ್ ಮಾಯಾಗ್ ಜಾಲ್ಲೊ... ದುಸ್ರ್ಯಾ ಹಳ್ಳೆಂತ್ಲ್ಯಾ ತರ್ನ್ಯಾ ಚಲಿಯಾಂಚೆಂ ಜೀವನ್ ಬಲಿ ದೀಂವ್ಕ್!
ಪ್ಲೊರಾಚೆಂ ಜಿವಿತ್ ಉಪ್ರಾಂತ್ ಫುಲ್ಲ್ಲೆಂ ನಾ! ಫುಲ್ಚೊ ಬೊಂಗೊ ಕರ್ಪಾಲ್ಲೊ... ತ್ಯಾ ಯೆಮ್ಕೊಂಡಾಕ್ ಲೊಟುಂಕ್ ಬರಿಂ ಮನ್ಶ್ಯಾಂ ಮ್ಹಳ್ಳೆಂ ನಾಂವ್ ಘೆತ್ಲ್ಲ್ಯಾ, ಮ್ಹಜ್ಯಾ ಪಪ್ಪಾ ಮಾಮ್ಮಿಚೊ ವಾಂಟೊ ಆಸಾ ಮ್ಹಣ್ಯೆತ್. ಪಿಯೊಣ್ಯಾಕ್ ಲಬ್ದೊನ್ ಲೀವರ್ ಕುಸೊನ್ ಪ್ಲೊರಾಚೊ ಬಾಪಯ್ ಅಂತರ್ಲ್ಯಾ ಉಪ್ರಾಂತ್ ಪಯ್ಶಿಲ್ಯಾ ಗಾಂವಾಂ ಥಾವ್ನ್ ತಾಣೆಂ ಆಪ್ಲ್ಯಾ ಕುಟ್ಮಾಕ್ ಪಳೆಲೆಂ. ಆಪ್ಣಾಚಾ ಭಯ್ಣಿಕ್ ಆಪ್ಣಾಬರಿ ಜಾಯ್ನಾಯೆ ಮ್ಹಣ್ ದೃಡ್ ನಿಚೆವ್ ಕರಿಲಾಗ್ಲೆಂ. ಭಯ್ಣಿಕ್ ಬರ್ಯಾ ಘರಾಣ್ಯಾಕ್ ಕಾಜಾರ್ ಕರುನ್ ತಾಚೆಂ ಜೀವನ್ ನಂದನ್ ಕೆಲೆಂ ತಾಣೆಂ. ಗಾಂವಾಂತ್ಲೆಂ ಪರ್ನೆಂ ಭಾಡ್ಯಾಚೆಂ ಘರ್ ಮೋಡ್ನ್ ನವೆಂಚ್ ಕಾಣ್ಗೆಲೆಂ. ಆನಿ ನಿಮಾಣ್ಯಾ ಭಾವಾಕ್ ಬರೆಂ ಶಿಕಾಪ್ ದಿಲೆಂ.
"ಪ್ಲೊರಬಾಯ್ ತುಂ ಕಶೆ ಆಸಾಯ್?" ಹಾವೆಂ ಪರತ್ ವಿಚಾರ್ಲೆಂ
"ಮ್ಹಾಕಾ ಪಳೆಲ್ಯಾರ್ ಕಳಾನಾಂಗೀ?" ಸುಕ್ಯೊ ಹಾಸೊ ಹಾಸಾಲಾಗ್ಲೆಂ.
"ಮ್ಹಜೆಂ ಹೆಂ ಜೀವನ್ಗೀ ಸಾಯ್ಬಾ.... ಆಸೊಂದಿ ತುಂ ಆತಾಂ ವ್ಹಡ್ಲೊ ಬರಯ್ಣಾರ್.... ಲೇಖನಾ, ಕಥಾ, ಕಾದಂಬರಿ ಬರಯ್ತಾಯ್ ಖಂಯ್. ತುಜಿ ಮಮ್ಮಿ ಸಾಂಗ್ತಾಲಿ. ಪೆಟ್ಟಿ ಮ್ಹಜ್ಯಾಯಿ ಜಿಣಿಯೆ ಭಂವ್ತಿ ಎಕ್ ಕಥಾ ಬರಯ್"
"ತುಜೆ ವಿಶ್ಯಾಂತ್ಗೀ? ಜಾಂವ್ದಿ ಬರವ್ಯಾಂ, ಮ್ಹಾಕಾಯ್ ಎಕ್ ಬರಿ ಕಥಾ ವಿಶಯ್ ಮೆಳ್ಲ್ಲೆ ಬರಿ ಜಾಲೆಂ. ತಮಾಶ್ಯಾನಿಂ ಸಾಂಗೊನ್ ಹಾಂವ್ ಹಾಸ್ಲೊಂ.
"ಕಾಣ್ಯೆಕ್ ಕಿತೆಂ ನಾಂವ್ ದಿತಾಯ್?" ತಾಣೆಂ ವಿಚಾರ್ಲೆಂ.
"ಮ್ಹಜ್ಯಾ ವ್ಹಡ್ತಾಂತ್ಲೊ ಬಾವಾನಾತ್ಲ್ಲೊ ಗುಲೊಬ್! ಜಾಯ್ನಾವೇ?"
"ತೆಂ ಸಮಾ ಜಾಯ್ನಾ ಪೆಟ್ಟಿ. ಪಿಂದ್ರ್ಯಾಂತ್ ಕರ್ಪಾಲ್ಲೊ ಬೊಂಗೊ! ಮ್ಹಣ್ ನಾಂವ್ ದೀ"
"ಗುಲೊಬ್ ಸೊಭಿತ್ ಪ್ಲೊರಾಬಾಯೆ, ಸ್ತ್ರೀಯಾಂಚಾ ಮಾತ್ಯಾರ್ ಆನಿ ದೆವಾಚ್ಯಾ ಪಾಯಾಂ ಮುಳಾಂತ್ ಸೊಭ್ತಾತ್ ನೈಂವೇ?
"ಪೆಟ್ಟಿ... ಹೊ ಗುಲೊಬ್ ಸಭಾರಾಂನಿ ಪಿಸುಡ್ಲಾ, ಗುಡ್ಡಾಯ್ಲಾ, ಸುಗಂಧ್ ಆಸಾಜೆ ಜಾಲ್ಲ್ಯಾ ಜಾಗ್ಯಾರ್... ತೆಂ ಭಾರಿಕಾಯೆನ್ ರಡ್ಲೆಂ.
"ಪ್ಲೊರಾಬಾಯೆ... ಸಂಸಾರಿ ಸರ್ವ್ ದುಖಿ ಮಧೆಂಯ್ ತುಜೆಂ ಅಂತಸ್ಕರ್ನ್ ನಿತಳ್ ಆಸಾ"
"ಸಾರ್ಕೆಂ ಸಾಂಗ್ಲೆಂಯ್ ಪೆಟ್ಟಿ.... ತುಮಿ ಬರಯ್ಣಾರ್... ಚಲಿಯಾಂಚಿ ಭಾಯ್ಲಿ ಸೊಭಾಯ್ ಪಳವ್ನ್ ನಾನಾಂತ್ಯಾ ರಿತಿಂ ವರ್ಣಿತಾತ್. ಪುಣ್ ತಾಂಚೆಂ ಅಂತಸ್ಕರ್ನ್ ಪಳವ್ನ್ ಗೌರವ್ ದಿಂವ್ಚೆ ನಾಂತ್!"
"ಹಾಂವ್ ಹೆರ್ ಚಲಿಯಾಂ ವಿಶಿಂ ಉಲಯ್ನಾಂ ಪ್ಲೊರಾಬಾಯೆ"
"ಹೆಂ ತುಜೆಂ ಪ್ಲೊರಾಬಾಯ್ ಆದ್ಲೆಂ ನ್ಹಯ್. ಕೆದ್ನಾಂ, ಕಾಜಾರ್ ಮ್ಹಳ್ಳ್ಯಾ ನಾಟಕಾಂತ್ ರಿಗ್ಲಿಂಗೀ ತ್ಯಾ ದಿಸಾ ಥಾವ್ನ್ ಹಾಂವ್ ಅಪವಿತ್ರ್ ಜಾಲ್ಯಾಂ!"
ಫುಡಾರಾಚಿಂ ಸಪ್ಣಾಂ, ಗ್ಲಾಸ್ ಫುಟ್ಲೆಲ್ಯಾಪರಿಂ ಫುಟೊನ್ ಖೊಂವ್ಚ್ಯೊ ಜಾಲ್ಯಾಂತ್. ತುಜ್ಯಾ ಮಮ್ಮಿನ್ ಸಾಂಗ್ಲ್ಲೆಬರಿ... ರಾಯ್ ಕುವರಾನ್, ಪ್ಲೊರಾಕ್ ಆಪರ್ಸುಂಕ್ ನಾ. ಬಗಾರ್ ತಾಚೊ ಮಾನ್, ಗೌರವ್, ಮರ್ಯಾದ್ ಸಮಾಜೆಂತ್ಲ್ಯಾ ದೆಂವ್ಚಾರಾಚಾ ಕುವಾರಾಂನಿ ಅಪರ್ಸಿಲಾ. ತಾಂಚಾ ದಾವ್ಲೆಂತ್ಲೆ ಧಾವೆಕ್. ಹಾಂವ್ ಚಲಿ.... ಎಕ್ಸುರಿಂ... ಖಂಯ್ ರಕ್ಶಣ್ ಮೆಳ್ತಾ? ತ್ಯೊ ಪಿಂದ್ರ್ಯಾಂಚೊ ಜಾಳಿ ಮ್ಹಾಕಾ ಹರ್ಯೆಕಾ ವಾಟಾನಿಂ ಬಂಧ್ ಕರುನ್ ಆಸಾತ್. ಮ್ಹಾಕಾ ಎಕ್ ವಾಟ್ ಮಾತ್ರ್ ಉರ್ಲ್ಲಿ ಸುಸ್ತಾಡ್ ಕರ್ಚಿ!" ದೊಳ್ಯಾಂನಿ ಪಾಜಾರ್ಚಿಂ ದುಖಾಂ ದಾಂಬುನ್ ಧರುಂಕ್ ಸಲ್ವಾಲೆಂ ತೆಂ. ಆಪ್ಲ್ಯಾ ಪಾಲ್ವಾಂತ್ ಮುಖಮಳ್ ಲಿಪವ್ನ್ ಕಸ್ಕೊಸೊನ್ ರಡ್ಲೆಂ.
"ಪೆಟ್ಟಿ ಮ್ಹಾಕಾ ಮ್ಹಜೆಂಚ್ ಮ್ಹಳ್ಳೆಂ ಜೀವನ್ ಜಿಯೆಂವ್ಚಿ ಆಶಾ ಆಸ್ಲ್ಲಿ. ಸೊಭಿತ್ ಫುಡಾರಾಚಿಂ ಸಪ್ಣಾಂ ಸಪ್ಣೆಲ್ಲಿಂ. ಭುರ್ಗಿಂ ಬಾಳಾಂ ಆಶೆಲ್ಲಿಂ. ಆವಯ್ ಜಾಂವ್ಚೆಂ ಭಾಗ್ ಮ್ಹಾಕಾ ನಿರ್ಮೊಂಕ್ ನಾ. ಹಾಂವ್ ಪಾತ್ಕಿ. ಮರಿ ಮಾಗ್ದೆಲಿನಾಕ್ ತರೀ ಸೊಮ್ಯಾನ್ ಭೊಗ್ಸಿಲೆಂ. ತರೀ ಹ್ಯಾ ಸಮಾಜೆನ್ ಮ್ಹಜೆಂ ಸ್ವಾತಂತ್ರ್ಯ್ ಜೀವನ್ ವೋಡ್ನ್ ಕಾಣ್ಗೆಲ್ಲೆಂ ಆನಿ ಪಿಂದ್ರ್ಯಾಂತ್ ಪಿಚಾರ್ ಕೆಲ್ಲೆಂ. ಕಿತ್ಯಾಕ್ ಹಿ ಶಿಕ್ಶಾ ಮ್ಹಾಕಾ? ಹಾವೆಂ ಕಿತೆಂ ಚೂಕ್ ಕೆಲ್ಲಿ?" ಚಿಂತುನ್ ಚಿಂತುನ್ ತೆಂ ರಡಾಲಾಗ್ಲೆಂ. ಹಾವೆಂ ಭುಜಂವ್ಚೆಂ ಪ್ರಯತ್ನ್ ಕೆಲೆಂ ತರೀ ವ್ಯರ್ಥ್.
"ಪೆಟ್ಟಿ ಪ್ರತಿ ದಾದ್ಲ್ಯಾಚಾ ಯಶಸ್ವೆ ಪಾಟ್ಲ್ಯಾನ್ ಎಕಾ ಸ್ತ್ರೀಯೆಚೊ ಹಾತ್ ಆಸ್ತಾ ಖಂಯ್! ತಶೆಂಚ್ ಸ್ತ್ರೀಯೆಚಾ ನಾಸಾ ಪಾಟ್ಲ್ಯಾನ್ ಎಕಾ ನ್ಹಯ್ ತರ್ ಎಕಾ ದಾದ್ಲ್ಯಾಚೊ ಹಾತ್ ಆಸಾಚ್ಚ್!"
"ಪ್ಲೊರಾಬಾಯೆ..... ತುವೆಂ ಸಗ್ಳ್ಯಾ ದಾದ್ಲ್ಯಾಂಕ್ ಎಕಾಚ್ ದೃಶ್ಟೆನ್ ಪಳಂವ್ಚೆಂ ಸಾರ್ಕೆಂ ನ್ಹಯ್!
"ಪೆಟ್ಟಿ... ಮ್ಹಜ್ಯಾ ಬೆಸಾಂ ಜಾಲ್ಲ್ಯಾ ಜಿಣ್ಯೆಚಾ ಅನುಭವಾನ್ ಸಾಂಗ್ತಾಂ, ಜಲ್ಮ್ ದಿಲ್ಲ್ಲ್ಯಾ ಬಾಪಾಯ್ನ್ಚ್ ಪಯ್ಶ್ಯಾಂಚಾ ಆಶೆಕ್ ಧುವೆಕ್ ವಿಕ್ಲೆಂ... ಉಪ್ರಾಂತ್ ಕಾಜಾರ್ ಮ್ಹಳ್ಳೊ ನಾಟಕ್ ಖೆಳೊನ್ ತಾಣೆಂ ಮಜಾ ಮಾರ್ಚಿ ಮಾರುನ್ ಉಪ್ರಾಂತ್ ತ್ಯಾಚ್ ಪಯ್ಶ್ಯಾಂಚಾ ಆಶೆಕ್ ವೆಶ್ಯಾಚ್ಯಾ ಪಿಂದ್ರ್ಯಾಕ್ ವಿಕ್ಲೆಂ. ಫಟ್ಟಿಂಗ್ ಘೊವಾನ್! ತ್ಯಾ ಪಿಂದ್ರ್ಯಾ ಭಿತರ್.... ಕಿತ್ಲೆಶ್ಯಾ ದಾದ್ಲ್ಯಾಂಕ್ ಪಿಂವ್ಡೆ, ನಾನಾಂತ್ಲ್ಯಾ ಸವಯೆಚೆ, ಮ್ಹಜ್ಯಾ ಕುಡಿರ್ ಲೊಳೊನ್ ಮ್ಹಜ್ಯಾ ಜಿವಿತಾಚಿ ವೀದ್ ವಾವ್ಳಿ ಕೆಲ್ಯಾ. ಖಂಚಿ ಚಲಿ ಆಸಲೆಂ ಜಿವಿತ್ ಆಪ್ಣಾಯ್ತ್? ಮ್ಹಜ್ಯಾ ಉತ್ರಾಂಚೊ ಅರ್ಥ್ ದಾದ್ಲೆ ಪೂರಾ ಖೊಟೆ ಆನಿ ಚಲಿಯೊ ಪೂರಾ ಬರ್ಯೊ ಮ್ಹಣ್ಚೆಂ ನ್ಹಯ್.... ತರೀ ಚಲಿಯಾಂಕ್ ತಾಂಚಿಂಚ್ ಭಗ್ಣಾಂ ಆಸಾತ್. ಸ್ತ್ರೀಯಾಂಕ್ ದಾದ್ಲ್ಯಾಂನಿ ಗೌರವ್ ದೀಂವ್ಕ್ ಜಾಯ್ ತಶೆಂ ಚಲಿಯಾಂನಿ ಬರ್ಯಾ ದಾದ್ಲ್ಯಾಂಕ್ ಮಾನ್ ದೀವ್ನ್ ಖಾಲ್ ಜಾವ್ನ್ ಚಲಾಜಾಯ್" ಉಪ್ರಾಂತ್ ಭರೊನ್ ಆಯಿಲ್ಲ್ಯಾ ದುಖಾಂ ಸಂಗಿಂ ಮೌನ್ ರಾವ್ಲೆಂ.
ಎಕಾ ವಾ ಸಭಾರ್ ಸುಂದರ್ ಚಲಿಯಾಂಚೆಂ ಜೀವನ್ ಪಿಡ್ಡ್ಯಾರ್ ಜಾಂವ್ಚೆಂ ಪಳೆತಾನಾ ಬೆಜಾರ್ ಜಾತಾ.... ಹಾಕಾ ಕಾರಾಣ್ ಕೋಣ್ ವಿಧಿಗೀ? ಆಮಿ ಜಿಯೆಂವ್ಚಿ ಹಿ ಸಮಾಜ್? ಸಮಾಜೆಂತ್ ಲಿಪೊನ್ ಆಸ್ಲೆಲೆ ಬೊಲ್ಪೆ? ಹಾವೆಂ ದೀರ್ಘ್ ಸ್ವಾಸ್ ಸೊಡ್ಲೊ.
"ಮ್ಹಜಿ ಕಥಾ ಆಯ್ಕೊನ್ ತುಕಾ ಬೆಜಾರ್ ಜಾಲೆಂ ಮ್ಹಣ್ ದಿಸ್ತಾ.... ಹೆಂ ತುಜೆ ಖಾತಿರ್ ಹಾಡ್ಲೆಲೆಂ" ಮ್ಹಾಕಾ ಪ್ಲೊರಾಬಾಯ್ ಮೊಲಾಧೀಕ್ ವಸ್ತುರಾಂ ದೀವ್ನ್ ಮ್ಹಾಕಾಚ್ ಪಳೆಲಾಗ್ಲೆಂ. ಮ್ಹಜೆ ದೊಳೆ ಭಿಜ್ಲೆ.
"ಪೆಟ್ಟಿ ತುಕಾ.... ಘರ್ಚ್ಯಾಂಕ್ ನಿಮಾಣೆಂ ಪಾವ್ಟಿಂ ಪಳಂವ್ಕ್ ಆಯಿಲ್ಲಿಂ"
ಮ್ಹಜೆಂ ಪಾಸೊನ್ ಮಾಗ್ ತ್ಯಾ ಪಿಂದ್ರ್ಯಾ ಥಾವ್ನ್ ವೆಗ್ಗಿಂಚ್ ಸುಟ್ಕಾ ಲಾಬ್ಚ್ಯಾಕ್. ಆನಿ ಮ್ಹಜಿ ಕಥಾ ಬರಯ್"
"ಜಾಯ್ತ್ ಪ್ಲೊರಾಬಾಯೆ.... ತುಜೊ ಎಡ್ರೆಸ್ ಮ್ಹಾಕಾ ದಿ.
"ಮ್ಹಜೊ ವಿಳಾಸ್ ...? ತುಕಾ ನಾಕಾ... ತುಜೆ ತಸಲ್ಯಾಂಚೆಂ ಕಾಗಾತ್ ಯೆಂವ್ಚೊ ಜಾಗೊ ತೊ ನ್ಹಯ್! ತುವೆಂ ಬರಯಿಲ್ಲಿ ಕಥಾ ಕೊಂಕ್ಣಿ ಪತ್ರಾಂಕ್ ದಾಡ್.... ತುಜೆಂ ಪ್ಲೊರಾಬಾಯ್ ಆದ್ಲೆಂಚ್, ಆತಾಂಯ್ ಕೊಂಕ್ಣಿ ಪತ್ರಾಂ ಪುಸ್ತಕಾಂ ಹಾಡವ್ನ್ ವಾಚ್ತಾ."
**************
ಪ್ಲೊರಾಬಾಯೆಚಾ ಉಡಾಸಾನ್ ಮತ್ ವಿರಾರ್ ಜಾಲ್ಲಿ. ಶೊಪಾಂತ್ ವ್ಯಾಪಾರ್ ಕರುಂಕ್ಯ್ ಉರ್ಬಾ ನಾತ್ಲ್ಲಿ.... ಆಶೆಂಚ್ ದೋನ್ ತೀನ್ ಮಹಿನೆ ಪಾಶಾರ್ ಜಾತಾನಾ.... ಮ್ಹಜ್ಯಾ ನಾಂವಾರ್ ಅನಾಮಿಕ್ ಕಾಗಾತ್ ಆಯಿಲ್ಲೆಂ. ಕಾಗಾತ್ ಉಗ್ತೆಂ ಪಳೆಲೆಂ.
ಮೊಗಾಚ್ಯಾ ಪೆಟ್ಟಿಕ್,
ಪ್ಲೊರಾಬಾಯೆಚೆ ಮೊಗಾ ರೆಕಾದ್. ಹಾಂವ್ ಗಾಂವಾಕ್ ಆಯಿಲ್ಲ್ಯಾ ವೆಳಾರ್ ಮ್ಹಜಿ ಕಥಾ ಬರಯ್ ಮ್ಹಳ್ಳೆಂ ವಿಸ್ರಾಲೊಯ್ ದಿಸ್ತಾ. ಮ್ಹಜ್ಯಾ ವೊಡ್ತಾಂತ್ಲೊ ಬಾವಾನಾತ್ಲ್ಲೊ ಗುಲೊಬ್ ಬರಯ್ತಾಂ ಮಳ್ಳೆಂಯ್ ಆತಾಂ ಹಾವೆಂ ಸಾಂಗ್ಲ್ಲೆಂಚ್ ಸತ್ ಜಾಲಾಂ. ’ವೊಡ್ತಾಂತ್ಲೊ ಕರ್ಪಾಲ್ಲೊ ಬೊಂಗೊ’ ಆತಾಂ ತುಜೆಂ ಪ್ಲೊರಾಬಾಯ್ ನಿಜಾಯ್ಕ್ಯ್ ಝಡಾ ವಯ್ಲೊ ಕರ್ಪಾಲ್ಲೊ ಬೊಂಗೊ ಜಾಲಾಂ. ಆತಾಂ ದೋನ್ ಮಹಿನ್ಯಾಂ ಥಾವ್ನ್ ಸುಟಾನಾಸ್ತಾಂ ತಾಪ್ ಯೆತಾ. ಜಿವಾಂತ್ ಕಠಿಣ್ ಪುರಾಸಣ್.... ಶಿರಾಂಚಿ ಅಸ್ಕತ್ಕಾಯ್.... ರಗಾತ್ ತಪಾಸುನ್ ದಾಕ್ತೆರಾನ್ ಮ್ಹಳಾಂ... ಆನಿ ಥೊಡೆ ದೀಸ್ ಮಾತ್ರ್! ಸದಾಂ ದೀಸ್ ಮೆಜ್ತಾಂ ಆನಿ ದೆವಾಕಡೆನ್ ಕಾಕ್ಳುತ್ ಮಾಗ್ತಾಂ... ಆತಾಂ ಹಾಂವ್ ಪಿಂದ್ರ್ಯಾಂತ್ಲೊ ವಿಕಾಳ್ ನಾಗಿಣ್ ಹಾಚೊ ಆರ್ಥ್.... ಮ್ಹಾಕಾ ಹಿ ಪಿಡಾ ಆಯ್ಲ್ಯಾ ನಂತರ್ ಮ್ಹಜ್ಯಾ ಕೂಡಿಚೆರ್ ಲೈಂಗಿಕ್ ಸುಖ್ ಭೊಗುಂಕ್ ಆಯ್ಲೆಲ್ಯಾಂಕ್ ಮರಣ್ ಖಂಡಿತ್.
ಸಮ್ಜಾಲೆಂ ನ್ಹಯ್ವೇ ಮ್ಹಜ್ಯಾ ಪಿಡೆ ವಿಶ್ಯಾಂತ್.
ಮ್ಹಾಕಾ ಹ್ಯಾ ಪಿಂದ್ರ್ಯಾಂತ್ ಲೊಟ್ಲೆಲ್ಯಾ.... ದಾದ್ಲ್ಯಾಂಕ್ ಬಹುಮಾನ್ ಜಾವ್ನ್ ’ಮರಣ್’ ಮ್ಹಳ್ಳಿ ಪಿಡಾ ದಿತಾಂ. ಹ್ಯಾ ಪಿಂದ್ರ್ಯಾ ಥಾವ್ನ್ ವೆಗ್ಗಿಂಚ್ ಸುಟ್ಕಾ ಮ್ಹಾಕಾ ಲಾಬ್ತಾ.
ತುಜ್ಯಾ ವೊಡ್ತಾಂತ್ಲೆಂ ಗುಲೊಬಾ ಫುಲ್ ಪ್ಲೊರಾಬಾಯ್ ಪರತ್ ಸಂಸಾರಾಕ್ ಪಾಟಿಂ ಯೇನಾ. ಆದೇವ್ಸ್ ಭಾವಾ....
ತುಜೆಂ ಪ್ಲೊರಾಬಾಯ್.
ಕಾಗಾತ್ ವಾಚುನ್ ಹಾಂವ್ ದೊಳ್ಯಾಂಕ್ ಕಾಳೊಕ್ ಯೇವ್ನ್ ಲಾಗ್ಶಿಲ್ಯಾ ಕದೆಲಾರ್ ಗಳ್ಳೊಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
