ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪಾಂಚ್ ಲಿಪಿಯಾಂನಿ ಕೊಂಕ್ಣಿ ಬರಯ್ತಾತ್; ರೋಮಿ (ಗೊಯಾಂ), ದೇವ್ನಾಗರಿ (ರತ್ನಗಿರಿ), ಕಾನಡಿ (ಮಂಗ್ಳುರ್), ಉರ್ದು (ಭಟ್ಕಳ್) ಆನಿ ಮಲಯಾಳಂ (ಕೊಚ್ಚಿನ್)
ಕೊಂಕ್ಣಿ ಭಾಸ್ ಆನಿ ಲಿಪಿ
- ಸ್ಟೀವನ್ ಕ್ವಾಡ್ರಸ್, ಪೆರ್ಮುದೆ
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005 ಹಾಂತುಂ ತಿಸ್ರೆಂ ಇನಾಮ್ ಜೊಡ್ಲ್ಲೆಂ ಲೇಖನ್]
ಪುರವಣ್
1. ವಿಷಯಾಚಿ ವಳಕ್
2. ಕೊಂಕ್ಣಿ ಸಬ್ದ್ ನಿಷ್ಪಕ್ತಿ
3. ಕೊಂಕ್ಣಿ ಭಾಸ್
3.1 ಪೌರಾಣಿಕ್ ಪರಿಕಲ್ಪನ್
3.2 ವಿಲ್ಲಿಯಮ್ ಮಾಡ್ತಾ ಆನಿಂ ಖತ್ರೆ
3.3 ಆಧುನಿಕ್ ಸಂಸೊದ್
4. ಕೊಂಕ್ಣಿ ಲಿಪಿ
4.1 ಲಿಪಿ ಮ್ಹಣ್ತಾತ್ ತೆಂ ಕಿತೆಂ
4.2 ಕೊಂಕ್ಣಿ ಬರಂವ್ಕ್ ವಾಪಾರ್ಚ್ಯೊ ಲಿಪಿ
4.3 ಭಾರತೀಯ್ ಲಿಪಿಂಚಿ ವಾಡಾವಳ್
5 ಪರಿಸಮಾಪ್ತಿ
5.1 ಕೊಂಕ್ಣಿ ಭಾಸ್ ಸಂಯ್ಭಾನ್ ಬಹುಮುಖ್
5.2 ಕೊಂಕ್ಣೆಚ್ಯಾ ಆಧುನಿಕ್ ವಾಡಾವಳೆಕ್ ಥೊಡಿಂ ಸುಚನಾಂ
6 ವಾಪಾರ್ಲೆಲೆ ಪುಸ್ತಕ್
1. ವಿಷಯಾಚಿ ವಳೊಕ್:
ಭಾಸ್ ಆನಿ ತಿಚೆ ಲಿಪಿವಿಶಿಂ ಉಲಂವ್ಚೆಂ ಆಜ್ ಭಾವನಾತ್ಮಕ್ ಜಾವ್ನ್ ಗೆಲಾಂ. ಭಾಸ್; ಧರ್ಮ್, ದೇಸ್, ಕುಳಿ ಭಾವುಕ್ ಪ್ರತೀಕಾಂ ಮಧೆಂ ಏಕ್ ಜಾವ್ನ್ ಮಿಸ್ಳಾಲ್ಯಾ ಆಸ್ತಾಂ ಸಹಜ್ ಮ್ಹಣ್ಚೆಪರಿಂ ಭಾಸ್, ತಿಚೆ ವಾವ್ರಾಡಿ - ಸಾಹಿತಿ, ತಿಚ್ಯೊ ಕುರುಃ ಮ್ಹಣ್ಚೆ ಲಿಪಿ, ವ್ಯಾಕರಣ್ ಇತ್ಯಾದಿ ಆಪ್ಲೆಂ ತಟಸ್ಥ್ ವ್ಯಕ್ತಿತ್ವ್ ಸಾಂಡುನ್ ವಾಪಾರ್ಣೆಚೊ ವಸ್ತು ತಶೆಂ ಜಾತಾ ಅನಿ ಥಂಯ್ಸರ್ ’ಮ್ಹಜೆಂ ಆನಿ ತುಜೆಂ’ ಬೊಗಾಪ್ ವಾಡ್ತಾ. ಕೊಂಕ್ಣೆಂತ್ಯೀ ಆಜ್ ಸಹಜ್ಪಣಿ ಹಿ ಪ್ರಕ್ರಿಯಾ ಘಡ್ಲ್ಯಾ.
ಕೊಂಕ್ಣಿ ಭಾಸ್ ಸಭಾರ್ ಜಾತಿ ಆನಿ ಧರ್ಮಾಂಚ್ಯಾ ಪಾಟ್ಲಾವ್ದಾರಾಂನಿ ಆಪ್ಲಿ ಮ್ಹಣೊನ್ ಘೆತ್ಲ್ಯಾ ಆಸ್ತಾಂ ಹಾಂಗಾಸರ್ ಭಾವುಕ್ ತಿಕ್ಕಾಟ್ ಹೆರ್ ಭಾಸಾಂ ಪ್ರಾಸ್ ಚಡ್ ಆಸ್ಚೆಂಯ್ ಸಹಜ್ ಜಾವ್ನ್ ಆಸಾ. ವಿಶೇಶ್ ಕಿತೆಂಗೀ ಮ್ಹಳ್ಯಾರ್ ಆಸ್ಲ್ಯಾ ಸಂದರ್ಭಾಂನಿ ದೋನ್ ವಿವಿಂಗಡ್ ಭಾಸಾ ಮಧೆಂ ದಿಸೊನ್ ಯೆಂವ್ಚ್ಯಾ ತಿಕ್ಕಾಟಾಂ ಪ್ರಾಸ್ ಚಡ್ ಬಳ್ವಂತ್ ರಿತಿನ್ ಭಾಸ್ಪುಟಾಂ ಆನಿ ಭಾಸ್ಪುಟಾಂ ವಾಪಾರ್ಚ್ಯಾಂ ಲೊಕಾ/ಪಂಗ್ಡಾ ಮಧೆಂ ತಿಕ್ಕಾಟ್ ಯೇಂವ್ಕ್ ಸಾಧ್ಯ್ ಜಾತಾ.
ಸಭಾರ್ ಪಾವ್ಟಿಂ ಆಪ್ಲೆ ತಿಕ್ಕಾಟ್ ಎಕಾ ಭಾಶೆಚೆರ್ ಮ್ಹಾಲಕ್ಪಣ್ ಸ್ಥಾಪನ್ ಕರುಂಕ್ ಆಶೆಂವ್ಚಾ ವಿಭಿನ್ನ್ ಪಂಗ್ಡಾಂಚಾ ಗರ್ಜೆ ಆಧಾರಿತ್ (need
based) ಸಿಧ್ಧಾಂತಾಂ ಆನಿ ಸೀಮಿತ್ ಸಂಸೊದಾಚ್ಯಾ ವಾಡಾವಳೆಕ್ ಕಾರಣ್ ಜಾತಾತ್. ಭಾಶೆಚ್ಯಾ ಮುಳಾವಿಶೆಂ, ತಿಚ್ಯಾ ಲಿಪಿವಿಶಿಂ, ಬರ್ಪಾವಿಶಿಂ ಎಕೇಕ್ ಪಂಗಡ್ ಆಪ್ಣಾಕ್ ಫಾಯ್ದ್ಯಾಚೆಂ ವಾಕ್ಮೂಲ್ ದಿತಾ ಆಶೆಂ ಜಾತಾನಾ ಸಂಸೊದ್, ಅಧ್ಯಯನಾಂ ವಾಟ್ ಚುಕ್ತಾತ್, ಕೊಂಕ್ಣೆವಿಶಿಂ ಜಾಲ್ಯಾರೀ ಆಂವ್ದುಂಚಾ ದಿಸಾನಿ ಆಶೆಂಚ್ ಘಡ್ಲಾಂ. ಆಪ್ಲ್ಯೊ ಸ್ವಂತ್ ಹಿತಾಸ್ತಕಿ ಮುಖಾರ್ ಘಾಲ್ನ್ ವಿವಿದ್ ವಾದ್ ಮಾಂಡ್ಚೆಂ ದಿಸೊನ್ ಯೆತಾತ್.
ಹ್ಯಾ ಸಂದರ್ಭಿಂ ’ದಾಯ್ಜ್ ಸಾಹಿತಿಕ್ ಸ್ಪರ್ದ್ಯಾಂತ್’ ಹ್ಯಾ ಲೇಖನಾದ್ವಾರಿಂ ಕೊಂಕ್ಣಿ ಭಾಸ್ ಆನಿ ತಿಚ್ಯಾ ಲಿಪಿಕ್ ಸಂಬಂಧ್ ಜಾವ್ನ್ ಎದೊಳ್ ಪರ್ಯಾಂತ್ ಆಯಿಲ್ಲಿಂ ದೋನ್ ಪ್ರಮುಖ್ ಅಧ್ಯಯನಾ ಮಂಡನ್ ಕರುಂಕ್ ಹಾಂವ್ ಆಶೆತಾಂ. ಹ್ಯಾ ಲೇಖನಾಂತ್ ದೊನೀ ದಿಷ್ಟಿ ಮುಖಾರ್ ದವರ್ಲ್ಯಾತ್ ಶಿವಾಯ್ ಖಂಚಿಯ್ ಏಕ್ ದೀಷ್ಟ್ ಸಾರ್ಕಿ ಮ್ಹಣ್ಚೆಂ ಪ್ರೇತನ್ ನಾ. ಹರ್ಯೆಕಾ ದೀಷ್ಟಿ ಪಾಟ್ಲೆಂ ಚಿಂತಾಪ್, ಪಾಟ್ತಳ್ ಮಾಂಡ್ಚೆಂ ಕಾಮ್ ಮಾತ್ರ್ ಕೆಲಾಂ. ಹ್ಯಾ ಅಧ್ಯಯನಾಚಿ ಸುರ್ವಾತ್ ಸಾರ್ಕಿ ಜಾಂವ್ಚೆಂ ಖಾತಿರ್ ’ಕೊಂಕ್ಣಿ’ ಮ್ಹಳ್ಳೊ ಸಬ್ದ್ ಕಸೊ ವಾಡೊನ್ ಆಯ್ಲೊ ಮ್ಹಳ್ಳ್ಯಾ ವಿಶಿಂ ಸಂಸೊದಾಚೊ ವಿವರ್ ದಿಲಾ. ತಶೆಂಚ್ ನಿಮಾಣ್ಯಾ ವಾಂಟ್ಯಾಂತ್ (೫. ಪರಿಸಮಾಪ್ತಿ) ಲೇಖಕಾಚೊ ದಿಷ್ಠಾವೊ ಮಂಡನ್ ಕೆಲಾ.
2. ’ಕೊಂಕ್ಣಿ’ ಸಬ್ದ್ ನಿಷ್ಪಕ್ತಿ:
ಕೊಂಕ್ಣಿ ಭಾಷೆವಿಶಿಂ ಉಲಂವ್ಚ್ಯಾ ಸುರ್ವಾಯೆರ್ಚ್ಚ್ ಕೊಂಕ್ಣಿ ಮ್ಹಳ್ಳೊ ಸಬ್ದ್ ಖೈಂಸರ್ ಉಬ್ಜಾಲೊ, ಕಸೊ ಉಭ್ಜಾಲೊ ಮ್ಹಳ್ಳೆಂ ವಿಶಿಂ ಸ್ವಷ್ಟ್ ಕರ್ನ್ ಘೆಂವ್ಚಿ ಗರ್ಜ್ ಆಸಾ. ’ಹಜಾರೊಂ ಹಜಾರ್ ವರ್ಸಾಂ ಆದಿಂ ಆತಾಂಚ್ಯಾ ಕೊಂಕಣಾಚಿ ಭುಂಯ್ ಸಾಗೊರಾಚ್ಯಾ ಪೊಟಾಂತ್ ಲಿಪುನ್ ಆಸ್ಲ್ಲಿ ತಿ ಭುಮಿಚ್ಯಾ ಅವ್ಘಡಾವರ್ವಿಂ ವಯ್ರ್ ಪಡ್ಲಿ. ಪುರಾಣಾಂತ್ ಹ್ಯಾ ವಿಚಿತ್ರಾಕ್ ಪರಶುರಾಮಾಕ್ ಕಾರಣ್ ಕರ್ತ್ ಕೆಲಾ...ಆನಿಂ ಹ್ಯಾ ಪ್ರದೇಶಾಕ್ ಪರಶುರಾಮಾಚ್ಯಾ ಆವಯ್ ರೇಣೂಕಾಚೆಂ ಅನ್ಯೇಕ್ ನಾಂವ್ ’ಕೊಂಕಣಾ’ ಮ್ಹಣೊನ್ ದಿಲಾಂ, ದೆಕುನ್ ಹ್ಯಾ ಭುಂಯ್ಚೆಂ ನಾಂವ್ ಕೊಂಕಣಾ, ಹಾಂಗಾಚಾ ಲೊಕಾಚಿ ಭಾಸ್ ಕೊಂಕಣಿ (ಪಳೆ ಪಾನ್ ೨- ಕೊಂಕಣಿ ಭಾಸ್ ಆನಿಂ ಸಂಸ್ಕ್ರತಿ - ಆಂತೊನ್ ಆ. ಸಲ್ಡಾನ್ಹಾ ಕೊಪ್ರಮ ಕಿನ್ನಿಗೋಳಿ - ಜನೆರ್
(1958)
ಸ್ಕಂದ ಪುರಾಣಾಂತ್ಲ್ಯಾ ಸಹ್ಯಾದ್ರಿ ಖಂಡಾತ್ ಆಶೆಂ ಸಾಂಗ್ಲಾಂ
’ಕೇರಳಾಶ್ಚ, ತುಲಂಗಾಶ್ಚ, ತಥಾ ಸೌರಾಷ್ಟ್ರವಾಸಿನ:
ಕೊಂಕಣಃ, ಕರಹಾಟಾಶ್ಚ, ಕರಾನಾಟಾಶ್ಚ ಬರ್ಬರಾ:
ಹೇ ಸರ್ವ್ ಗಾಂವ್ ಭಾರತಾಚ್ಯಾ ಪಡ್ಲಾ ತಡಿರ್ ನರ್ಮದೆಂ ಥಾವ್ನ್ ಕನ್ಯಕುಮಾರಿ ಪರ್ಯಾಂತ್ ಆಸ್ಚೆಂ ಗಾಂವ್. ಸ್ಕಂದ ಪುರಣಾ ಥಾವ್ನ್ ಧರ್ನ್ ಉಪ್ರಾಂತ್ಲ್ಯಾ ಮಹಭಾರಾತಾಚ್ಯಾ ಅವೃತ್ತೆಂನಿ, ವರಾಹಮಿಹಿರಾಚಾ ಬ್ರಹತ್ ಸಂಹಿತೆಂತ್, ಕಲ್ಹಣಾಚಾ ರಾಜತರಂಗಿಣೆಂತ್, ಪೆರಿಪ್ಲಸ್, ಟಾಲೆಮಿ, ಅಲ್ಬೆರೂನಿ, ಹ್ಯೂಯಸ್ತ್ಸಾಂಗ್ ಆಸ್ಲ್ಯಾ ಪಯ್ಣಾರ್ಯಾಂಚಾ ಕೃತ್ಯಾಂನಿ ಕೊಂಕಣ್ ಆಯ್ಲಾಂ ತರೀ ಸಾಧಾರಣ್ ಜಾವ್ನ್ ಕೊಂಕಣ್ ಪರಶುರಾಮ್ ಸಂಪ್ರದಾಯಾಂಕ್ ಸಂಬಂಧಿತ್ ಜಾಲ್ಲೊ ಭುಂಯ್ ಪ್ರದೇಶ್ ಮ್ಹಣೊನ್ಂಚ್ ಚಿತ್ರಿತ್ ಜಾಲಾ. ’ಬಾಪಾಯ್ಚ್ಯಾ ಉತ್ರಾನುಸಾರ್ ಕ್ಷತ್ರಿಯಾಂನಿ (ರಾಜನ್ಯ) ಭಷ್ಠಾಯಿಲ್ಲ್ಯಾ ಆಪ್ಲ್ಯಾ ಆವಯ್ಕ್ ಮಾರ್ನ್ ಉಪ್ರಾಂತ್ ತಿಚಾ ಆಕ್ಮಾನಾಕ್ ಕಾರಣ್ ಜಾಲ್ಲ್ಯಾ ಸರ್ವ್ ರಾಜನ್ಯಾಂಕ್ ಪರಶುರಾಮಾನ್ ಕುಡಾರೆಂತ್ ಮಾರ್ನ್ ಕಾಡ್ಲೆಂ. ನಿಮಾಣೆಂ ಆಪ್ಲ್ಯಾ ಕುಡಾರೆಚಿ ನಿತಳಾಯ್ ಸಾಂಬಾಳ್ಚೆ ಖಾತಿರ್ ತಿ ದರ್ಯಾಕ್ ಉಡಯ್ಲಿ ಕಿತ್ಲ್ಯಾ ಪಯ್ಸ್ ಕುಡಾರ್ ಗೆಲ್ಲೆ ತಿತ್ಲೆಂ ಪಾಟಿಂ ದರ್ಯೊ ಪಾಟೆಂ ಸರ್ಲೊ ಆನಿ ತಿ ಖಾಲಿ ಜಾಲಿ ಭುಂಯ್ ಕೊಂಕಣ್ ಮ್ಹಣ್ಚೆಂ ಚಿಂತಾಪ್ ಗುಂಡಾಯೆನ್ ರೊಂಬ್ಲಾಂ.
ಮಹಾನ್ ಪಂಡಿತ್ ಸೇತಿಯಾಪು ಕ್ರಷ್ಣಭಟ್ಟ ಭಾಶಾ ಶಾಸ್ತಿರಾಚಾ ಆನಿ ಪ್ರಕ್ರತೆಚಾ ಸುರ್ಪಾಯೆರ್ ಹೊಂದುನ್ ಕೊಂಕಣ - ಕೊಂಕಣಿ ಮ್ಹಳ್ಳ್ಯಾ ಸಬ್ದಾಪಾಟ್ಲ್ಯಾನ್ ಆಸ್ಚೊ ಸಮಸ್ಸೊ ಪರಿಹಾರ್ ಕರುಂಕ್ ಪ್ರೇತನ್ ಕರ್ತಾ. ಹ್ರಸ್ವರೂಪಾಚೆ ದ್ರಾವಿಡ್ ಸಬ್ದ್ ಸಂಸ್ಕ್ರತಾಂತ್ ದೀರ್ಘ್ ಜಾತಾತ್ ತರ್ ಕೊಂಕಣ್-ಕೋಂಕಣ್ ಜಾಯ್ಜೆ. ಸಂಸ್ಕ್ರತಾಂತ್ಲೆ ಕೊಂಕಣ್ ಆನಿ ಕೋಂಕಣ ಸಬ್ದಾಂಕ್ ಗಾಂವ್ಚೆಂ ನಾಂವ್ ಸೊಡ್ಲ್ಯಾರ್ ಹೆರ್ ಮೂಳ್ ಅರ್ಥ್ ದಿಸನಾ ತರ್ ಹೋ ಸಬ್ದ್ ಸಂಸ್ಕ್ರತಾ ಭಾಯ್ರ್ ಥಾವ್ನ್ ಆಯ್ಲಾ ಆಶೆಂ ದಿಸ್ತಾ. ಸೇಡಿಯಾಪು ಕ್ರಷ್ಣ ಭಟ್ ತುಳು ಭಾಶೆಂತ್ಲ್ಯಾನ್ ಆಮ್ಚೊ ದುಬಾವ್ ಪರಿಹಾರ್ ಕರ್ತಾ. ’ಕೊಂಕು, ಗೋಂಟು, ಗೋಂಕು ಕೊಂಟು’ ಮ್ಹಣ್ಚೆ ಸಬ್ದ್ ಉಬಾರ್-ಥಪಟ್, ವಾಂಕ್ಡೆ-ತಿಂಕ್ಡೆಂ ಆಸ್ಲೆ ಅರ್ಥ್ ದಿತಾತ್ (ಆಮ್ಚೆಂ ಥೈಂ ಕೊಂಗೆಂ ಮ್ಹಣ್ಚೆ ಪರಿ) ಖಂಚೆಂ ಸಮಪಾತಳಿ ನಾಂ ತೇಂ. ಕೊಂಕಣಾಚಿ ಭುಂಯ್ ಪಳೆಲ್ಯಾರ್ ತೀ ಉಬಾರ್ ಥಪ್ಕಟ್, ಗುಡೆ-ಪಾಲ್ಕಿಂ, ಫೊಣ್ಕುಲ್-ದೊಂಗೊರ್. ದೆಖುನ್ಂಚ್ಚ್ ಸೇಡಿಯಾಪು ಕ್ರಷ್ಣಭಟ್ ಕೊಂಕಣ್ ಮ್ಹಣ್ಚೆಂ ನಾಂವ್ ಹಾಂಗಾಚ್ಯಾ ಭುಂಯ್ಚಾ ಸುರುಪಾಕ್ ದ್ರಾವಿಡ್ ಮುಳಾಥಾವ್ನ್ ಆಯಿಲ್ಲೆಂ ನಾಂವ್ ಮ್ಹಣೊನ್ ಸಾಂಗ್ತಾ. (ಪಳೆ ಪಾನ್
25 ಥಾವ್ನ್
33 ಕೊಂಕಣ ಶಬ್ದಾರ್ಥ(ಸೇಡಿಯಾಪು ಕ್ರಷ್ಣಭಟ್ಟ) ಕೊಂಕಣಿ ಭಾಶೆ-ಸಾಹಿತ್ಯ (ಸಂ. ಮುರಳೀಧರ ಉಪಾಧ್ಯ ಹಿರಿಯಡಕ) - ಕೊಂಕಣಿ ಅಧ್ಯಯನ್ ಪೀಠ ಉಡುಪಿ
(1995)
3 ಕೊಂಕ್ಣಿ ಭಾಸ್:
ಪೌರಾಣಿಕ್ ಪರಿಕಲ್ಪನ್ : ಮಂಜೇಶ್ವರ ಗೋವಿಂದ ಪೈನ್ ಭಾರತಾಚಾ ಸುಟ್ಕಾಯೆ ಝುಜಾ ಸಂದರ್ಭಿಂ ಮುಖಾರ್ ದವರ್ಲೆಲ್ಯಾ ರಾಷ್ಟ್ರೀಯವಾದಿ ಸಂಘಟನಾ ಸಂದರ್ಭಿಂ ಮುಖಾರ್ ದವರ್ಲೆಲ್ಯಾ ಅಧ್ಯಯನಾ ಪ್ರಕಾರ್ ಸರಸ್ವತಿ ನಂಯ್ ತಡಿರ್ ಉಬ್ಜಾಲ್ಲ್ಯಾ ಸಾರಸ್ವತ್ ಬ್ರಾಹ್ಮಣಾಂ ನಿಮ್ತಿಂ ಕೊಂಕ್ಣಿ ಭಾಸ್ ಸ್ರಷ್ಠಿ ಜಾಲಿ ಮುಣೊನ್ ಅಬಿಪ್ರಾಯ್ ಜಾತಾ. ಸಾರಸ್ವತ್ ನಂಯ್ ತಡಿ ಥಾವ್ನ್ ಹೇ ಬ್ರಾಹ್ಮಣ್ ಮುಖಾರ್ ಗೌಡ ದೇಸಾಕ್ (ಬಂಗಾಲ್) ವಚೊನ್ ಥಂಯ್ ಥಾವ್ನ್ ದಂಡಕಾರಣ್ಯ ವಾಟೆರ್ ಗೋಯಾಂತ್ ರಿಗ್ಲೆ ಆಶೆಂ ತಾಚೆಂ ಅಧ್ಯಯನ್ ಸಾಂಗ್ತಾ. ಮಂಜೇಶ್ವರ ಗೋವಿಂದ ಪೈ ಆಪ್ಲ್ಯಾ ಅಧ್ಯಯನಾಕ್ ಸ್ಕಂದಪುರಾಣ್, ಋಗ್ವೇದ್, ಬ್ರಹತ್ಸಾಂಹಿಕ, ಮಾರ್ಕಂಡೇಯ ಪುರಾಣ್, ಮಹಭಾರತ್ ಆಸ್ಲ್ಯೊ ಪೌರಾಣಿಕ್ ಕ್ರತಿಯೊ ಆಧಾರ್ ಜಾವ್ನ್ ಘೆತಾ.
ಸರಸ್ವತಿ ನಂಯ್ ತಡಿರ್ ಥಾವ್ನ್ ಸಾರಸ್ವತ್ ಮೂಡ್ತೆಣ್ಕಾ ವಾಟೆಂತ್ಲ್ಯಾನ್ ಮುಖಾರ್ ಸರೊನ್ ವಿದೇಹ, ತ್ರಿಹೋತ್ರ, ಗೌಡ ದೇಶಂತ್ಲ್ಯಾನ್ ವಸ್ತೆಕ್ ಲಾಗ್ಲೆ ಆಶೆಂ ಯುಜುರ್ವೇದ್ ತಶೆಂಚ್ ತಾಕಾ ಲಗ್ತಿ ಜಾಲ್ಲೊ ಶತಪಥಾ ಬ್ರಾಹ್ಮಣ್ ಗ್ರಂಥ್ ಸಾಂಗ್ತಾ. ಪರಶುರಾಮಾನ್ ಆಪ್ಲೆ ಸಂಸ್ಥಾಪಿತ್ ಕೆಲ್ಲ್ಯಾ ಗಾಂವಾಂತ್ ಬ್ರಾಹ್ಮಣಾಂಕ್ ಸಂಸ್ಥಾಪಿತ್ ಕರ್ಚಾ ಖಾತಿರ್ ತ್ರಿಹೋತ್ರ ದೇಶಾ ಥಾವ್ನ್ ಬ್ರಾಹ್ಮಣಾಂಕ್ ವೆಲೆಂ ಮ್ಹಣೊನ್ ಸ್ಕಂದ ಪುರಾಣ್ ಸಾಂಗ್ತಾ. ಹ್ಯಾ ಬ್ರಾಹ್ಮಣಾಂಚಿ ಭಾಸ್ ಕೊಂಕ್ಣಿ ದೆಖುನ್ಂಚ್ ತೀ ’Lingna Brahmanica’ ಆಶೆಂ ಗೋವಿಂದ ಪೈ ಆನಿಂ ತಾಚೆ ಸಾಂಗೊಡೆ ಸಂಶೋಧಕ್ ಸಾಂಗ್ತಾತ್.
3-2 ವಿಲ್ಲಿಯಮ್ ಮಾಡ್ತಾ ಆನಿಂ ಖತ್ರೆ : ಖ್ಯಾತ್ ಕೊಂಕ್ಣಿ ಭಾಷಾ ವಿಜ್~ಜಾನಿ ದೊ. ವಿಲ್ಲಿಯಮ್ ಮಾಡ್ತಾನ್ ಆಪ್ಲ್ಯಾ ವೈಜ್ನಾನಿಕ್ ಅಧ್ಯಯನಾನಿ ಸಾಂಗ್ಚೆ ಪರ್ಮಾಣೆಂ ’ಕೊಂಕ್ಣಿ ಮ್ಹಳ್ಯಾರ್ ಸಾರಸ್ವತ್ ಬ್ರಾಹ್ಮಣ್ ಜನಾಂಗ್, ಆನಿಂ ಕೊಂಕ್ಣಿ ಭಾಸ್ ಸಾರಸ್ವತಾನಿ ಸರಸ್ವತಿ ನಂಯ್ ತಡಿ ಥಾವ್ನ್ ಹೀ ಭಾಸ್ ಹಾಡ್ಲಿ ಮ್ಹಣ್ಚಿ ಜನಾಭಿಪ್ರಾಯಾಂತ್ ವಾಡೊನ್ ಆಯಿಲ್ಲಿ ಕಾಲ್ಪನಿಕ್ ಕಾಣಿ. ಹಿ ಕಾಣಿ ಕಾಲ್ಚಿ ಆನಿ ಕಾಲ್ಪನಿಕ್ (ಪಳೆ: ಮಾಡ್ತಾ ವಿಲ್ಲಿಯಮ್, ’ಕೊಂಕಣಿ ಭಾಷೆ ಮತ್ತು ಸಾಹಿತ್ಯ’, ಕನ್ನಡ ವಿಶ್ವಕೋಶ - ಸಂ. - 5
ಮೈಸೂರು ವಿಶ್ವವಿದ್ಯಾನಿಲಯ) ಮಾಡ್ತಾನ್
1961 ಚ್ಯಾ ಜಣ್ಗಣತೆ ವೆಳಿಂ ಉಲ್ಲೇಖಿತ್ ಜಾಲ್ಲ್ಯಾ ಕುಮ್ಕಿ, ಕುಡ್ಮಿ, ಖೊಕಿಲಿ, ಕೊಂಗಾಣಿ ಆಸ್ಲ್ಯಾ ಬ್ರಾಹ್ಮಣೇತರ್ ಕೊಂಕ್ಣಿ ಲೊಕಾಂಕ್ ಕೊಂಕ್ಣಿ ಮೂಳ್ ಭಾಷಿಕ್ ಮ್ಹಣೊನ್ ಸ್ವೀಕಾರ್ ಕೆಲಾಂ. ಕೊಂಕ್ಣೆವಿಶಿಂ ರಾಷ್ಟ್ರೀಯ್, ಅಂತರಾಷ್ಟ್ರೀಯ್ ಗುಮಾನ್ ಆಕರ್ಶಿತ್ ಜಾಂವ್ಕ್ ಕಾರಣ್ ಜಾಲ್ಲೊ ಖ್ಯಾತ್ ಭಾಷಾ ವಿಜ್~ಜಾನಿ ಡೊ. ಸುಮಿತ್ರಾ ಮಂಗೇಶ್ ಖತ್ರೆ ಆಶೆಂ ಬರಯ್ತಾ.
"The entry of Saraswaths into Goa is depending upon mythicak and semi-historcial facts contained in the Sahyadrikanda of skanda Purana, until this history is uninvoled we are not in a positon to say anything more about the manner in which they adopted the konkani language' ªÀÄÄAzÀgÀÄ£ï RvÉæ D¥Áè÷å UÀæAxÁAvï D±ÉA §gÀAiÀiÁÛ ' Viewing the conditions today, we may safely presume that konkani was not the language of a single homage group including Brahmins as well as non Brahmins instance by the language of the Somars of Goa on the Gavdis of two Canaras ¥À¼É- Katre S.M. -'The formation of Konkani' Deccan college Poona)
3-3
ಆಧುನಿಕ್ ಸಂಸೊದ್: ಡಾ. ಒಲಿವಿನ್ಹೊ ಗೊಮೆಝನ್ ಆಪ್ಲ್ಯಾ ಸಂಶೋಧನಾ ದ್ವಾರಿಂ ಕೊಂಕ್ಣಿ ಭಾಸ್ ಕೊಂಕಣಾಂತ್ಲ್ಯಾ ಮೂಳ್ನಿವಾಸಿ ವರ್ಗಾಂಚಿ ಮೂಳ್ ಭಾಸ್ ಮ್ಹಣೊನ್ ಸಂಸ್ಥಾಪಿತ್ ಕೆಲಾಂ. ತಾಚೆ ಪ್ರಕಾರ್ ’ಪಡ್ಲಾ ಕರಾವಳೆಂತ್ ಮಹಾರಾಷ್ಟ್ರಾಚಾ ಥಾಣೆ ಥಾವ್ನ್ ಕರ್ನಾಟಕಾಚ್ಯಾ ಕಾರ್ವಾರ್ ಪರ್ಯಾಂತ್ ವಿಸ್ತಾರ್ಲೆಲ್ಯಾ ತಡಿಕ್ ಕೊಂಕಣ್ ಮ್ಹಣ್ತಾತ್ ಆನಿ ಹ್ಯಾ ಕೊಂಕಣ್ ಭುಂಯ್ ಥಾವ್ನ್ ಆಮ್ಚಾ ಭಾಷೆಚೆಂ ನಾಂವ್ ಕೊಂಕಣಿ ಮ್ಹಣೊನ್ ಉಭ್ಜಾಲಾಂ. ’ಕೊಂಕ’ ಲೋಕಾಂಚೊ ಮೂಳ್ ನಿವಾಸ್ ಕೊಂಕ್ವಣ್, ಕೊಂದ್ಕವನ್ ಮ್ಹಣೊನ್ ಆಯಿಲ್ಲೆಂ, ಕ್ರಮೇಣ್ ತೇಂ ಕೊಂಕಣ್ ಜಾಲೆಂ’ ಆಸೊ ತಾಚೊ ವಾದ್. ಹೊ ಕೊಂಕ ಲೋಕ್ ಆಯ್ಚ್ಯಾ ಕುಡ್ಮಿ, ಕುಣ್ಬಿ, ಗೌಡಿ ಮೂಳ್ ಲೊಕಾಂಚೊ ಮಾಲ್ಘಡೊ ’ಹ್ಯಾ ಕೊಂಕ ಲೋಕಾಚಿ ಭಾಸ್ ಪ್ರಾಕೃತ್ ಕೇಂದ್ರಿತ್ ಮುಂಡಾಂ ಸ್ವರೂಪಾಚಿ ಕೊಂಕ್ಣಿ’ ಆಶೆಂ ತಾಚೆಂ ಅಧ್ಯಯನ್ ಸಾಂಗ್ತಾ. (ಪಳೆ
Gomes, Dr. Olivinho J.F. Old Konkani language and litrature) .
’ಹ್ಯಾ ಸಂದರ್ಭಿಂ ಮೊನ್ಸಿಞೊರ್ ಹೋಘಮನಾನ್ ಸಂಕಲನ್ ಕೆಲ್ಲಿಂ
Encyclopaedia Mundarica ಕ್ರತಿ ತಜ್ವೀಜ್ ಕರ್ನ್ ಪಳೆಲ್ಯಾರ್ ತಾಂತ್ಲ್ಯಾ ಸಬಾರ್ ಂusಣಡಿo-ಂsiಚಿಣiಛಿ ಮುಂಡಾರಿ ಭಾಸಾಂಚ್ಯಾ ಸಬ್ದಾಂಕ್ ಆನಿ ಕೊಂಕ್ಣಿ ಸಬ್ದಾಂಕ್ ತಾಳ್ ಪಡ್ಚೆಂ ದಿಸೊನ್ ಯೆತಾ. ತಶೆಂಚ್ ಉರಾಂವ್ ಭಾಶೆಂತ್ಲ್ಯಾ ಸಬಾರ್ ಸಬ್ದಾಂಕ್ ಆನಿಂ ಕೊಂಕ್ಣಿ ಸಬ್ದಾಂಕ್ ಸಯ್ತ್ ಜಾತಿ ಸಂಬಂಧ್
Cognate relationship ಪಳೆಂವ್ಕ್ ಮೆಳ್ತಾ.
ಹ್ಯಾ ಸಕಯ್ಲ್ಯಾ ಪಟ್ಟೆಂತ್ ದಿಲ್ಲೆ ಸಬ್ದ್ ಪ್ರಾಕೃತ್, ಸಂಸ್ಕ್ರತ್ ಆನಿಂ ಕೊಂಕ್ಣಿ ರುಪಾನಿ ತುಲನ್ ಕರ್ನ್ ಪಳೆಲ್ಯಾರ್ ಕೊಂಕ್ಣಿ ಸಂಸ್ಕ್ರತಾ ಪ್ರಾಸ್ ಚಡ್ ಪ್ರಾಕೃತೆಕ್ ಲಾಗಿಂ ಆಸಾ ತೆಂ ಪಳೆಂವ್ಕ್ ಮೆಳ್ತಾ.
ಸಂಸ್ಕ್ರತ ಪ್ರಾಕ್ರತ
ಕೊಂಕ್ಣಿ
ಮಧು ಮ್ಹಂವ್
ಮ್ಹೊಂವ್
ಹರಿದ್ರ ಹಳಿದುಂವ
ಹಳ್ದುಂವೆ
ಉಷ್ಣ ಹುಣ್ಣ
ಹುನ್
ದೀಪಕ ದಿವ್ಹ
ದಿವೊ
ಕವಾಟಮ್ ಕವಡ್
ಕವಡ್
ಅಮಲಕ ಅಮ್ಮಡೊ
ಅಂಬಡೊ
(ಪಳೆ 26 - 27 chavan V.P. The konkani and the konkani language - Asian educational services 1924 )
ಆಧುನಿಕ್ ವೈಜ್ನಾನಿಕ್ ಸಂಸೊದಾಂ ಪ್ರಕಾರ್
Indo Indian ಭಾಷೆ ಥಾವ್ನ್ Indic, Mittani
ಆನಿಂ ಇರೇನಿಯನ್ ಭಾಸೊ ಉಬ್ಜಾಲ್ಯೊ. ಇಂಡಿಕಾ ಥಾವ್ನ್ ಸಂಸ್ಕ್ರತ್, ದಾರ್ದಿಕ್, ಪಾಲಿ, ಪ್ರಾಕೃತ್, ಮಾಗಧಿ ಅನಿ ಶೂರಸೇನಿ ಭಾಸೊ ಉಬ್ಜಾಲ್ಯೊ ಪ್ರಾಕೃತಾ ಥಾವ್ನ್ ಹಿಂದಿ, ಉರ್ದು, ಗುಜರಾಥಿ, ಮರಾಥಿ, ಕೊಂಕಣಿ ಭಾಸೊ ಉಬ್ಜಾಲ್ಯೊ. ಸಂಸ್ಕ್ರತಾ ಥಾವ್ನ್ ಖಂಚಿಚ್ ಭಾಸ್ ಜಲ್ಮೊಂಕ್ ನಾ. (ಪಳೆ
- Nair K. Maheshwaran An Evolutionary Time line of the Indo - European language - University of Kerala).
4. ಕೊಂಕ್ಣಿ ಲಿಪಿ:
4.1 ಲಿಪಿ ಮ್ಹಣ್ತಾತ್ ತೆಂ ಕಿತೆಂ? : ಲಿಪಿ ಸಬ್ದ್ ಇಂಗ್ಲಿಷಾಚ್ಯಾ
Script ಸಬ್ದಾಚೊ ಸಮಸ್ಪಂದಿ,
Script ಗ್ರೀಕಾಂಚ್ಯಾ
Screbere ತಶೆಂಚ್
Screpte ಸಬ್ದಾಂ ಥಾವ್ನ್ ಆಯ್ಲಾ.
Screbere ಮ್ಹಳ್ಯಾರ್ ಘುಸ್ಟುನ್ ಕುರುಃ ಕರ್ಚೆಂ ಮ್ಹಣೊನ್ ಜಾತಾ. ಮನ್ಶಾಚಿ ಭಾಸ್ ಸಬಾರ್ ತೇಂಪ್ ಫಕತ್ತ್ ಉತ್ರಾಂ ರುಪಿಂ (ಮೌಲಿಕ್) ಆಸ್ಲೆಲಿ ತಿ ಬರಂವ್ಚ್ಯಾ ಹಂತಾಕ್ ಪಾವ್ತನಾ ಉತ್ರಾ ಸೂಚಿತ್ ಕರುಂಕ್ ಥೊಡ್ಯಾ ಸಂಕೇತಾಚಿ ಗರ್ಜ್ ಪಡ್ಲಿ. ತ್ಯಾ ವೆಳಿಂ ಮನ್ಶಾಕ್ ವಳಕ್ ಆಸ್ಲೆಲ್ಯಾ ಸಂಗ್ತಿಂಚೆಂ ಪಿಂತುರ್ ರೂಪ್ (Pictograph) ಮೂಳ್ ಬರ್ಪಾ ಕುರುಃ ಜಾಲೆಂ. ಮನ್ಶಾಕುಳಾನ್ ಆಜ್ ವಾಪಾರ್ಚ್ಯಾ ಸರ್ವ್ ಲಿಪಿಂಚೆಂ ಮೂಳ್ ಚಿತ್ರಲಿಪಿ ಮ್ಹಣ್ಚಾಂತ್ ದುಬಾವ್ ನಾ. (ಪಳೆ
Sam, Dr. N. Some Important Aspects of manuscriptology - Oriental Research Institute - Kerala). ಲಿಪಿ ಮನ್ಶಾಕ್ ಆಪ್ಲೆಂ ಸಂವಹನಾಕ್ ವಾಪಾರ್ಚಾ ಉತ್ರಾಂ ಭಾಶೆಕ್ ಬರ್ಪಾ ರುಪಾಕ್ ದೆಂವಯ್ತಾನಾ ವಾಪಾರ್ಚೆ ಕುರ್ಹು. ಎಕಾ ರಿತಿನ್ ಲಿಪಿ ಭಾಷೆಚೆಂ ವಾಹಕ್. ಸುಚಿತ್ ಕರಿಜಾಯ್ ಜಾಲ್ಲ್ಯಾಚೆಂ ಸೂಚಕ್
(signifier) ಮತ್ರ್. ಸೂಚಕಾ ಪ್ರಾಸ್ ಸೂಚಿತ್ ಕರಿಜಾಯ್ ಜಾಲ್ಲೆಂ
(Signified) ಮಹತ್ವಾಚೆಂ, ದೆಖುನ್ ಲಿಪಿ ಪ್ರಾಸ್ ಭಾಸ್ ಮಹತ್ವಾಚಿ.
ಹರ್ಯೇಕಾ ಭಾಶೆಕ್ ತಿಚಿಚ್ಚ್ ಲಿಪಿ ಆಸ್ತಾ ಮ್ಹಣೊಂಕ್ ಜಾಯ್ನಾ. ಹರ್ಯೇಕಾ ಭಾಶೆಕ್ ಆಪ್ಲಿಚ್ಚ್ ಖಾಸ್ ಲಿಪಿ ಆಸೊಂಕ್ ಜಾಯ್ ಮ್ಹಣೊನ್ ಕಾಂಯ್ ನಾಂ. ಲಿಪಿ ನಾಸ್ತಾಂ ಖಂಚಿಯ್ ಭಾಸ್ ದುಬ್ಳಿ ಜಾತಾ ಆಶೆಂ ಮ್ಹಣೊಂಕ್ ಜಾಯ್ನಾಂ. ಇಂಗ್ಲಿಶ್ ಭಾಸ್ ಆಜ್ ಸಂಸಾರ್ಭರ್ ವಿಸ್ತಾರ್ಲ್ಯಾ ತಿಕಾ ಸ್ವಂತ್ ಲಿಪಿ ನಾಂ ತರೀ ರೋಮಿ ಲಿಪಿ ವಾಪರ್ತಾ. ಲಿಪಿ ಆನಿಂ ಭಾಶೆ ಮಧೆಂ ಕಾಂಯ್ ಖಾಸ್ ಸಂಬಂಧ್ ನಾ. ಖಂಚಿಯ್ ಭಾಸ್ ಖಂಚ್ಯಾಯ್ ಲಿಪಿಂತ್ ವಾಪಾರಿಯೆತಾ.
4.2 ಕೊಂಕ್ಣಿ ಭಾಸ್ ಬರಂವ್ಕ್ ವಾಪಾರ್ಚ್ಯೊ ಲಿಪಿ: ಕೊಂಕ್ಣಿ ಭಾಸ್ ಕೊಂಕಣ್ ಗಾಂವ್ಚಿ. ಭಾರತಾಚ್ಯಾ ರಾಜಕೀ ಇತಿಹಾಸಾಚ್ಯಾ ವಾಡಾವಳೆಕ್ ಕೊಂಕಣ್ ಏಕ್ ನಿರ್ದಿಷ್ಟ್ ವೊರೆವಿಂಗಡ್ ರಾಜಕೀ ಘಟಕ್ ಜಾವ್ನ್ ವಾಡೊಂಕ್ ನಾಂ ಬದ್ಲಾಕ್ ಮರಾಠೀ, ಕಾನಡಿ, ಮಲೆಯಾಳಿ, ರಾಜಕೀ ನಿಯಂತ್ರಣಾಂಕ್ ವಳಗ್ ಜಾವ್ನ್ ಆಯ್ಲೆಂ. ಕೊಂಕ್ಣಿ ಮಾಂಯ್ ಭಾಸ್ ಜಾವ್ನ್ ಆಸ್ಲೆಲೊ ಲೋಕ್ ಆಶೆಂ ವಿವಿಂಗಡ್ ರಾಜಕೀ ನಿಯಂತ್ರಣಾಕ್ ವಳಗ್ ಜಾಲ್ಲೆ ಪರಿಂ ತ್ಯಾ ತ್ಯಾ ಜಾಗ್ಯಾಚಾ ಲೊಕಾಂಚಿ ಲಿಪಿ ಆಪ್ಲಿ ಭಾಸ್ ಬರಂವ್ಕ್ ವಾಪಾರಿಲಾಗ್ಲೊ. ಆಷೆಂ ಆಜ್ ಕೊಂಕ್ಣಿ ಕಾನಡೀ, ನಾಗರೀ, ಮಲೆಯಾಳಿ, ಪರ್ಸೊ ಅರಬಿಕ್ ಆನಿ ರೋಮಿ ಲಿಪಿನಿಂ ಬರಯ್ತಾತ್. ಪುಡ್ತುಗೇಜಾಂಚ್ಯಾ ಆಡಳ್ತ್ಯಾ ನಿಮ್ತಿಂ ರೋಮಿ ವಾಡ್ಲ್ಯಾರ್ ಭಟ್ಕಳೀ ನವಾಯ್ತಿ - ಅರ್ಬಿ ವ್ಯಾಪರಾ ನಿಮ್ತಿಂ ಪರ್ಸೊ ಅರಬಿಕ್ ವಾಡ್ಲಿ, ಹ್ಯಾ ಪಾಂಚ್ ಲಿಪಿಂ ಪಯ್ಕಿಂ ಖಂಚಿಯ್ ಕೊಂಕ್ಣಿ ಭಾಷೆಚ್ಯಾ ಉಚ್ಛಾರ್ ವ್ಯವಸ್ಥಾಕ್ (phonetics) ಲಾಗ್ಸಿಲ್ಯಾನ್ ಪ್ರಸ್ತುತ್ ಕರುಂಕ್ ಸಕ್ತಾತ್ ಮ್ಹಣೊಂಕ್ ಜಾಯ್ನಾ. ನಾಗರೀ ಸಂಸ್ಕ್ರತ್ ಭಾಷೆಚ್ಯಾ ಧ್ವನಿಂ ವ್ಯವಸ್ಥ್ಯಾಚೆರ್ ಬಾಂಧುನ್ ಹಾಡ್ಲ್ಯಾ. ಪುಣ್ ಕೊಂಕ್ಣೆಚೆಂ ಅಂತಸ್ತರ್ ಪ್ರಾಕೃತ್ ಕಾನಡೀ ಆನಿ ಮಲಯಾಳಿ ದ್ರಾವಿಡ್ ಭಾಷಾ ಪಂಗ್ಡಾಂತ್ಲ್ಯಾ ಭಾಷೆಂಚೊ ಖಾಸ್ ಲಿಪಿ. ರೋಮಿ ಯುರೋಪಿ ಆರ್ಯನ್ ಪಂಗ್ಡಾಚಿ ಲಿಪಿ, ಪರ್ಸೊ ಅರಬ್ಬಿಕ್ ಇರೇನಿಯಂ ಪಂಗ್ಡಾಂತ್ಲಿ. ಆಶೆಂ ಕೊಂಕ್ಣಿ ಭಾಷೆಕ್ ಆನಿ ತಿ ಬರಂವ್ಚಾ ಲಿಪಿಂಕ್ ಕಿತೆಂಚ್ಚ್ ಸಂಬಂಧ್ ವಾಡೊನ್ ಯೇಂವ್ಕ್ ಸಾಧ್ಯ್ ನಾಂ ಜಾಲಾಂ.
4.3 ಭಾರತೀಯ್ ಲಿಪಿಂಚಿ ವಾಡಾವಳ್: ಭಾರತಾಂತ್ಲಿ ಪ್ರಾರಂಬಿಕ್ ಲಿಪಿ ಸಿಂಧೂ ಸಂಸ್ಕ್ರತೆಚಾ ಕಾಳಾಚಿ (ಸುಮಾರ್ ಕ್ರಿ. ಪೂ. 500
ಥಾವ್ನ್ 1500) ತರೀ ತಿ ಅಜೂನ್ ಸರ್ವಾಂಕ್ ಸೂಧಾನ್ ಜಾಂವ್ಚೆ ಪರಿಂ ವಾಚುಂಕ್ ಜಾವ್ನಾ. ಮೌರ್ಯ ಕುಳ್ಯೆಚೊ ಅಶೋಕ ಭಾರತಾಂತ್ ಶಾಸನಾಂ ಬರಂವ್ಕ್ ಸುರು ಕೆಲ್ಲೊ ಪ್ರಥಮ್ ಚಕ್ರವರ್ತಿ. ತಾಣೆಂ ಆಪ್ಲಿಂ ಶಾಸನಾಂ ಬ್ರಾಹ್ಮೀ ಲಿಪಿಂತ್ ಬರಯ್ಲ್ಯಾಂತ್, ಭೋವ್ ಥೊಡಿಂ ಕರೋಶ್ತಿ ಲಿಪಿಂತ್ ಆಸಾತ್. ಜೇಮ್ಸ್ ಪ್ರಿನ್ಸೆಪ್, ಬ್ಯುಹ್ಲರ್, ಮ್ಯಾಸನ್, ಜೋನ್ಸ್ ಆಸ್ಲ್ಯಾ ಪಂಡಿತಾನಿಂ ಆಪ್ಲ್ಯಾ ಸಂಸೊದಾಂ ದ್ವಾರಿಂ ಬ್ರಾಹ್ಮಿ ಲಿಪಿಚ್ಚ್ ಭಾರತಾಂತ್ಲ್ಯಾ ಚಡಾವತ್ ಸರ್ವ್ ಲಿಪಿಂಚಿ ಆವಯ್ ಆಶೆಂ ತಿರ್ಮಾನ್ ದಿಲಾಂ. ಪಡ್ಬಡ್ಗಾ
(North West) ಭಾಗಾಂತ್ ಥೊಡೆ ಕಡೆ ಕರೋಶ್ತಿ ಆನಿ ತಿಚೆಂ ಥಾವ್ನ್ ಹೆರ್ ಲಿಪಿ ವಾಡ್ಲ್ಯೊ ಆಶ್ಂ ಸಂಸೊದ್ ಸಾಂಗ್ತಾ.
ತೆಣ್ಕಾ ( South)
ಭಾರತಾಂತ್ ಬ್ರಾಹ್ಮಿ ಥಾವ್ನ್ ತಮಿಳ್ ಬ್ರಾಹ್ಮಿ ಲಿಪಿ ಪಯಿಲ್ಲೆಂ ದಿಸೊನ್ ಆಯ್ಲಿ. ಹಿಕಾ ಗ್ರಂಥಾ, ದಾಕ್ಶಿಣಾತ್ಯ ಮ್ಹಣೊನ್ಯಿ ವಳ್ಕತಾತ್. ಸುಮಾರ್ ಕ್ರಿಸ್ತ ಶಕಿಂ ೪೦೦ ಪರ್ಯಾಂತ್ ತೆಣ್ಕಾಂತ್ ಪ್ರಾಕ್ರತ್ ಭಾಸ್ ಆನಿ ತೆಣ್ಕಾ ಬ್ರಾಹ್ಮಿ ಲಿಪಿ ಜೆರಾಲ್ ಥರಾನ್ ವಾಪಾರ್ತೆಲೆ ಮ್ಹಳ್ಯಾಕ್ ದಾಕ್ಲೆ ಆಸಾತ್. ತೆಣ್ಕಾ ಬ್ರಾಹ್ಮಿ ಥಾವ್ನ್ ತಮಿಳ್ ಲಿಪಿ ವ್ಯವಸ್ಥಿತ್ ಜಾತನಾ ಕ್ರಿಸ್ತ ಶಕಿಂ ಪಾಂಚ್ವ್ಯಾ ಶೆಕ್ಡ್ಯಾ ವೆಳಾರ್ಚ್ಚ್ (cira AD. 5th
cent). ಕಾನಡೀ ಲಿಪಿ ಬಳ್ ಜಾಲಿ. ಕ್ರಿಸ್ತ. ಶಕ 423
ಚ್ಯಾ ಹಾಲ್ಮೀಡಿ ಶಿಲಾಶಾಸನಾಂತ್ ಕನ್ನಡ ಲಿಪಿ ವಾಪರ್ಲ್ಯಾ. ಹೆಂ ಶಾಸನ್ ಕೊಂಕಣಾಚೆರ್ ರಾಯ್ಪಾಟ್ ಚಲಯಿಲ್ಲ್ಯಾ ಕಾಕುಸ್ಥವರ್ಮ ಕಡ್ಮಿ ರಾಯಾಚೆಂ.
ಉತ್ತರ್ ಇಂಡಿಯಾಂತ್ (ಬಡ್ಲಾ) ಸುಮಾರ್ ಕ್ರಿ.ಶ. 9 ಥಾವ್ನ್
10 ವ್ಯಾ ಶೆಕ್ಡ್ಯಾ ಉಪ್ರಾಂತ್ ಬ್ರಾಹ್ಮಿ ಥಾವ್ನ್ ’ಸಿದ್ದ ಮಾತ್ರಿಕಾ’ ವಾ ’ಕುಟಿಲ’ ಮ್ಹಣ್ಚಿ ಲಿಪಿ ವಾಡ್ಲಿ. ಹಿಚ್ಚ್ ಸಿದ್ದಮಾತ್ರಿಕಾ ಬಂಗಾಲಾಂತ್ ಗೌಡಿ ಲಿಪಿ ಜಾವ್ನ್ ಕಾಶ್ಮೀರಾಂತ್ ಶಾರದಾ ಲಿಪಿ ಜಾವ್ನ್ ವಾಡ್ಲಿ. ಸಿದ್ದಮಾತ್ರಿಕಾಚ್ಚ್ ಕ್ರಮೇಣ್ ಉತ್ತರ್ ಇಂಡಿಯಾಂತ್ ನಾಗರಿ, ದೇವನಾಗರಿ ಮ್ಹಳ್ಳ್ಯಾ ನಾಂವಾನ್ ಖ್ಯಾತ್ ಜಾಲಿ ಮ್ಹಣ್ಚೆ ಕಾನಡಿ ಲಿಪಿ ವಾಡೊನ್ ಸುಮಾರ್ ಸಯ್ಶಿಂ (600)
ವರ್ಸಾಂ ಉಪ್ರಾಂತ್ ದೇವನಾಗರಿ ಲಿಪಿ ವಾಪಾರ್ಣೆಕ್ ಆಯ್ಲಿ.
1498 ಮೇ 27 ವಾಸ್ಕೋಡಿಗಾಮ ಕಲ್ಲಿಕೋಟ್ ಪಾವ್ಲೊ ತ್ಯಾ ಉಪ್ರಾಂತ್ ಎವ್ರೋಪಿ ನಿಯಂತ್ರಣ್ ಭಾರತಾಂತ್ ವಾಡ್ಲೆಂ. ಎವ್ರೋಪ್ಯಾನಿಂ ರೋಮಿ ಲಿಪಿ ಭಾರತಾಕ್ ಹಾಡ್ಲಿ. ಗೋಂಯಾಕ್ ಛಾಪ್ಖಾನೊ ಹಾಡ್ಲೊ. ಕೊಂಕ್ಣೆಚೆ ಪುಸ್ತಕ್ ಛಾಪುನ್ ವಿಕುಂಕ್ ಸುರು ಜಾಲೆಂ. ಎದೊಳ್ ಮೂಳ್ ಸ್ವಷ್ಟ್ ಜಾಯ್ನಾತ್ಲೆಲ್ಯಾ ಕ್ರತಿಯಾಂಕ್ ಸೊಡ್ಳ್ಯಾರ್ ಕೊಂಕ್ಣೆಂತ್ಲೊ ಸುರ್ವಾಯೆಚೊ ಕ್ರತಿಯೊ ರೋಮಿ ಲಿಪಿಂತ್ ಪಳೆಂವ್ಕ್ ಮೆಳ್ತಾತ್.
5.
ಪರಿಸಮಾಪ್ತಿ:
ಕೊಂಕ್ಣಿ ಭಾಸ್ ಸಂಯ್ಬಾನ್ ಬಹುಮುಖೀ: - ಭಾರತಾಂತ್ಲ್ಯಾ ಗುಜರಾಥ್,
ಮಹರಾಷ್ಟ್ರ್, ಗೋವಾ, ಕರ್ನಾಟಕ್, ಕೇರಳ್ ಆಶೆಂ ಪಾಂಚ್ ರಾಜಾನಿ
ಪ್ರಮುಖ್ ಜಾವ್ನ್, ಮುಸಲ್ಮಾನ್, ಕ್ರಿಸ್ತಾಂವ್, ಹಿಂದು ಆಶೆಂ ತೀನ್
ಪ್ರಮುಖ್ ಧರ್ಮಾಂಚೆ ಲೋಕ್ ತಿ ಆಪ್ಲಿ ಮ್ಹಣೊನ್
ವಾಪಾರ್ತಾತ್. ಸಾರಸ್ವತ್, ಗೌಡಸಾರಸ್ವತ್ ಕುಡ್ಮಿ, ಸಿದ್ಧಿ,
ನವಾಯ್ತಿ, ಚಾರೊಡಿ, ಬಾಮೊಣ್ ಆಶೆಂ ವಿವಿದ್ ವರ್ಗಾಂಚೆ ಹ್ಯಾ ಭಾಷೆಚೆ ಉಲವ್ಪಿ ಆಸಾತ್.
ಷಷ್ಠಿ, ಕಾರ್ವಾರೀ, ಬಾರದೇಶೀ, ಮಂಗ್ಳೂರಿ, ಕೊಡಿಯಾಳಿ, ಅಂತ್ರೂಝೀ, ಕೇರಳಿ ಆಶೆಂ
ಸಾತ್ ಪ್ರಬೇದ್ ತಿಕಾ ಆಸಾತ್. ಭಟ್ಕಳಿ, ಚೆಟ್ಟಿ, ದಾಲ್ದಿ ಪಿರಂಗಿ, ಗೋವಾನೀಸ್, ಗೌಡಪ್ರಾಕ್ರತ, ಕಾಂಗೊಣಿ, ಗೌಡಸಾರಸ್ವತ್, ಕಾರ್ವಾರಿ, ಖೊಕಿಲಿ, ಕೊಂಕಣಿ, ಕೊರ್ಲಾಣಿ, ಕುಂಡ್ಮಿ,
ಮೋಪಣ್, ನವಾಯ್ತಿ ಆನಿಂ ಜಿಂಗ್ರಿ ಮ್ಹಣ್ಚೊ ಸೊಳಾ (೧೬
ಬೊಲಿ ತಿಕಾ ಆಸಾತ್ ಆಷೆಂ ಬಹುತ್ವ್ (plurality) ಜೀವ್ ಜಾವ್ನ್ ಶ್ಚಿ ಏಕ್ ಗ್ರೇಸ್ತ್ ಭಾಸ್ ಕೊಂಕಣಿ
ಮ್ಹಣ್ಚಾಂತ್ ದುಬಾವ್ ನಾಂ.
ಆಜ್ ಲೋಕ್ ಆನಿ ಸರ್ಕಾರ್ ಕೊಂಕ್ಣಿ ವಿಶಿಂ ಅಭಿಮಾನ್ ದೆಖ್ತಾ. ಕೇಂದ್ರ್
ಸರ್ಕಾರಾನ್ ತಿಕಾ ಸಂವಿದಾನಾಚ್ಯೆ ಆಟ್ವೆ ವೊಳೆರಿಂತ್ ಸ್ಥಾನ್
ದಿಲಾಂ, ಗೊಂಯಾಂತ್ ತಿ ರಾಜ್ಭಾಸ್, ಕೇರಳಾ ಕರ್ನಾಟಕಾನಿ ಕೊಂಕ್ಣಿ
ಸಾಹಿತ್ಯ್ ಅಕಾಡೆಮಿ ಆಸಾತ್, ಕೇಂದ್ರ್ ಸಾಹಿತ್ಯ್ ಆಕಾಡೆಮಿನ್ ತಿ
ಮರಾಠಿಚಿ ಉಷಾಭಾಷಾ ನ್ಹಂಯ್ ಸ್ವತಂತ್ರ್ ಭಾಸ್ ಆಶೆಂ
ಮಾಂದುನ್ ಘೆವ್ನ್ ವಾರ್ಷಿಕ್ ಕೃತಿ ಸನ್ಮಾನ್ ಕೊಂಕ್ಣೆಕ್
ಲಾಭ್ಚೆಪರಿಂ ಕೆಲಾಂ.
ಹ್ಯಾ ಸಂದರ್ಭಿಂ ಆಮಿಂ ಕೊಂಕ್ಣಿ ಭಾಷಿಕಾನಿ ಕೊಂಕ್ಣೆಕ್ ಕಿತೆಂ ಕೆಲಾಂ? ಆಮ್ಚ್ಯಾ ಸೀಮಿತ್ ಉದ್ದೇಶಾ ಖಾತಿರ್ ಲಿಪಿ,
ಬೊಲಿ ಆನಿಂ ಪ್ರಬೇದಾಂಚೊ ಪಕ್ಷ್ ಘೆವ್ನ್ ಆಮ್ಚೆಂಚ್ಚ್ ಸಮ
ಮ್ಹಣೊನ್ ಎಕಾ ವಿರೋಧ್ ಏಕ್ ಪಂಗಡ್ ಜಾವ್ನ್ ಝುಜೊಂಕ್ ದೆಂವ್ಲ್ಯಾಂವ್ ತರ್ ಜಾಗತೀಕರಣಾಚ್ಯಾ ದಬಾವಾಕ್ ಆಡ್ಚೊನ್ ಆಸ್ಚಿ ಆಮ್ಚಿ ಭಾಸ್
ಮಾರ್ ಖಾತೆಲಿ ತೆಂ ಖಂಡಿತ್. ಹ್ಯಾ ವೆಳಾರ್ ಭಾಶೆಚಾ ಆನಿ ತಿಚಾ ಲಿಪಿಚಾ
ವಿಷಯಾಂಚೆರ್ ಭಾವುಕ್ ಜಾವ್ನ್ ಆಟಾವ್ನ್ ಬಸ್ಲ್ಯಾರ್ ಅಪಾಯ್ ಖಂಡಿತ್. ಆತಾಂ ಗರ್ಜ್ ಆಸಾ
ವೈಜ್ನಾನಿಕ್ ಸಂಸೊದಾಚಿ. ಅಧ್ಯಯನಾತ್ಮಕ್ ತಳಾರ್ ’ದೀ ಘೆ’ ಚಲೊಂಕ್ ಜಾಯ್, ಖಾಸ್ಗಿ ಫಾಯ್ದ್ಯಾಚೆಂ ’ದೀ ಘೆ’
ನ್ಹಂಯ್.
5.2 ಕೊಂಕ್ಣೆಚ್ಯಾ ಆಧುನಿಕ್ ವಾಡಾವಳೆಕ್ ಥೊಡಿಂ
ಸುಚನಾಂ:
(C.) ಕೊಂಕ್ಣೆಂತ್ ಎದೊಳ್ ಗ್ರೇಸ್ತ್
ಸ್ರಜನ್ಶೀಲ್ ಸಾಹಿತ್ಯ್ ವಾಡ್ಲಾಂ ಆತಾಂ ಭಾಷೆಕ್ ಫಾಯ್ದ್ಯಾಕ್
ಪಡ್ಚೆಂ ವಿಮರ್ಸೊ, ಸಬ್ಡ್ಕೋಶ್, ಅರ್ಥ್ಕೋಶ್, ಪಯ್ಣ್,
ವೈಚಾರಿಕ್ ಅಧ್ಯಯನಾ, ಚರಿತ್ರಾ ಆಸ್ಲೆಂ ಸ್ರಜನೇತರ್
ಸಾಹಿತ್ಯ್ ವಾಡಯ್ಜೆ.
(D). ಕೊಂಕ್ಣಿ ಜಾನಪದ್, ಥೊಡಿ ಸಾಹಿತ್ಯಾಚೆಂ ಅಧ್ಯಯನ್ ಚಲಯ್ಚೆ.
(E). ಇಸ್ಕೊಲ್ ವ್ಯವಸ್ಥ್ಯಾಂಕ್ ಕೊಂಕ್ಣಿ ಭಾಸ್ ಅಧ್ಯಯನಾಚೊ ಏಕ್
ವಿಷಯ್ ಜಾಂವ್ಕ್ ಪ್ರೇತನ್ ಕರಿಜಾಯ್. ಗೋಯಾಂತ್ ಆನಿಂ
ಮಹಾರಾಷ್ಟ್ರಾಂತ್ ಹ್ಯಾ ಖಾತಿರ್ ನಾಗರೀ ವಾಪರ್ಲ್ಯಾರ್ ಕರ್ನಾಟಕಾಂತ್ ಕಾನಡಿ ಆನಿ ಕೇರಳಾಂತ್ ಮಲಯಾಳೀ ಲಿಪಿ
ವಾಪುರುಯೆತಾ. ಹಾಂಗಾಸರ್ ಗರ್ಜೆಭಾಯ್ಲೆಂ ವದ್ದುವಾರಾಂಟ್
ಸೊಡ್ನ್ ಸೊಡಿಜಾಯ್.
(F). ಕೊಂಕ್ಣಿ ಸಮೂಹ್ ಮಾಧ್ಯಮಾಂಚಿ,
ಪತ್ರಿಕಾಂಚಿ ಭಾಸ್ ಜಾವ್ನ್ ಪ್ರಬುದ್ಧ್ ಜಾಯ್ಜಾಯ್ ತರ್ ’ವಿಕ್ರೊ ಕೇಂದ್ರಿತ್’ ಚಿಂತ್ಪಾರ್ ಆಮ್ಚಿ
ಪತ್ರ್ಗಾರಿಕಾ ವಾಡೊಂವ್ಕ್ ಜಾಯ್. ಸ್ಫರ್ದ್ಯಾಂತ್ ಜಿಕೊಂಕ್ ನಿರಂತರ್
ಪ್ರೇತನ್ ಕರ್ತಾನಾ ದಿಂವ್ಚಾ ಸಂಗ್ತಿಂಚೆಂ (ಲೇಖನಾ - ಖಬ್ರೊ, ಇತ್ಯಾದಿ)
ಮಟ್ಟ್ ಉಂಚ್ಲ್ಯಾ ಕಾಲೆತಿಚೆಂ ಆಸೊಂಕ್ ಜಾಯ್.
(G). ಕೊಂಕ್ಣಿ ಟೆಲಿವಿಶನ್ ಚಿಂತಾಪ್, ಕೊಂಕ್ಣಿ
ಫಿಲ್ಮಾಂಚಿ ತಯಾರಾಯ್ ನಿರಂತರ್ ಪ್ರಕ್ರಿಯಾ ಜಾಂವ್ಕ್ ಜಾಯ್.
(H). ಕೊಂಕ್ಣಿ ಪುಸ್ತಕಾಂ, ಕೊವ್ಳ್ಯೊ, ಸಿ. ಡಿ. ವಿಕ್ರ್ಯಾಕ್ ಏಕ್ ನಿರಂತರ್
ವ್ಯವಸ್ಠಾ ಕರುಂಕ್ ಜಾಯ್. ಹೆ ಸಕ್ಕಡ್ ಜಾಂವ್ಕ್ ಆಮ್ಚೆಂ ಥಂಯ್ ಕೊಂಕ್ಣೆ ತೆವ್ಶಿಂ ಖರೊ ಅಭಿಮಾನ್ ಆಸೊಂಕ್ ಜಾಯ್. ಆಮಿಂಚ್ಚ್ ಆಮ್ಚ್ಯಾ ಘರಾಂನಿ, ಕುಟ್ಮಾಂನಿ ಕೊಂಕ್ಣಿ ಉಲವ್ನ್ ಕೊಂಕ್ಣೆಚೊ
ಮೋಗ್ ದಾಕಂವ್ಕ್ ಜಾಯ್.
6. ವಾಪಾರ್ಲೆಲೆ
ಪುಸ್ತಕ್ (Bibliography)
1. Chavan, V. P. - The Konkan and the konkani language.
2. Katre, S.M. - The formation of konkani
3. Madtha, William - Some comments on teh language situation of Goa in the 16th and 17th centuries - CIIL
4. ಮಾಡ್ತ, ವಿಲ್ಲಿಯಮ್ - ಕೊಂಕಣಿ ಭಾಷೆ
ಮತ್ತು ಸಾಹಿತ್ಯ
5. Crawford, Arthur - Legends of the konkan
6. ಮುರಳೀಧರ ಉಪಾಧ್ಯ ಹಿರಿಯಡ್ಕ(ಸಂ.) - ಕೊಂಕಣಿ ಭಾಷೆ
ಮಾತ್ತು ಸಾಹಿತ್ಯ
7. ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ (ಸಂ.) -
ಸಾಹಿತ್ಯ್ ಆನಿಂ ವಿಮರ್ಸೊ
8. ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ -
ಸಾಹಿತ್ಯ್ ಆನಿಂ ವಿಮರ್ಸೊ
9. ಶಾಸನ್
ನಿರ್ದೇಶನಾಲಯ ಭಾರತೀಯ ಪುರಾತತ್ವ ಸರ್ವೇಕ್ಷಣ
ಮೈಸೂರು - ಶಾಸನಾಸ್ತ್ರದ ಪರಿಚಯ
10. ಪಾವ್ಲು
ಮೊರಾಸ್ - ಕೊಂಕಣಿ ಚಳ್ವಳ್
11. Gomes, Dr. Olivinho J.F. - Old konkani language and litrature a brief history of konkani
literature
12. Nair, K. Mahadevan - An evolutionary time line of the Indo European language.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications