ಪುರಸ್ಕಾರ್,

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕಥಾದಾಯ್ಜ್ - 10

ವಿಲ್ಫಿ ರೆಬಿಂಬಸ್

ಮೂಗುತಿ

ನಾಂವ್ : ವಿಲ್ಫಿ ರೆಬಿಂಬಸ್

ಲಿಖ್ಣೆ ನಾಂವಾಂ : ವಿಲ್ಫಿ ರೆಬಿಂಬಸ್

ಜನನ್ : 02 ಎಪ್ರಿಲ್ 1942.

ಜಲ್ಮಾಲ್ಲೊ ಗಾಂವ್ : ಕನ್ನಂಗಾಡ್ (ಕೇರಳ).

ಆವಯ್-ಬಾಪಾಯ್ಚೆಂ ನಾಂವ್ : ದೆ|ಮಾಗ್ದಲಿನ್ ಮೆಂಡೊನ್ಸಾ ಆನಿಂ ದೆ|ಲ್ಯಾಂಡೆಲಿನ್ ರೆಬಿಂಬಸ್

ಪತಿಣ್ : 25 ಜನೆರ್ 1970 ಚೆರ್ ಮ್ಯೂರಲ್ ಪಿಂಟೊ ಲಾಗಿಂ ಲಗ್ನ್ ಜಾಲೊ (ಉಪ್ರಾಂತ್ ಹಿಚೆಂ ನಾಂವ್ ಮೀನಾ ರೆಬಿಂಬಸ್ ಮ್ಹಣ್ ಕೊಂಕ್ಣಿ ಸಂಸಾರಾಂತ್ ಫಾಮಾದ್ ಜಾಲೆಂ).

ವಳೊಕ್:

ಶಿಕಾಪ್ :

ಮಿಲಾಗ್ರಿಸ್ ಹೈಸ್ಕೂಲಾಂತ್ ಶಿಕ್ತಚ್ ಐ.ಟಿ.ಐ ಥಾವ್ನ್ ಮೆಕ್ಯಾನಿಕ್ ಕೋರ್ಸ್ ಕೆಲೊ

ಅಪ್ಣಾಯಿಲ್ಲ್ಯೊ ಪ್ರಶಸ್ತ್ಯೊ, ಪುರಸ್ಕಾರ್, ಆನಿ ಮಾನ್-ಸನ್ಮಾನ್ :

’ಕೊಂಕಣ್ ಕೊಗುಳ್’ 1971 ಇಸ್ವೆಂತ್ ಮಂಗ್ಳುರ್ಚೊ ಬಿಸ್ಪ್ ಅ|ಮಾ|ಬಾಜಿಲ್ ಸಾಲ್ವಾದೊರ್ ಡಿ’ಸೊಜಾ ಥಾವ್ನ್

1991 ಇಸ್ವೆಚಿ ’ರಾಜ್ಯೋತ್ಸವ್ ಪ್ರಶಸ್ಥಿ’ - ಕರ್ನಾಟಕ್ ರಾಜ್ಯಾಚಿ ಪ್ರಶಸ್ಥಿ

1991 ಇಸ್ವೆಂತ್ ’ಅಂತರ್‌ರಾಷ್ಟ್ರೀಯ್ ಓರಿಯೆಂಟೇಶನ್ ಸೆಂಟರ್, ಅಮೆರಿಕಾ’ ಥಾವ್ನ್ ಪ್ರಶಸ್ಥಿ.

1992 ಇಸ್ವೆಂತ್ ಕೊಂಕಣಿ ತ್ಯಾಲೆಂಟ್ಸ್ ಗ್ರೂಪ್ ಅಭುಧಾಬಿ ಥಾವ್ನ್ ’ಸಂಗೀತ್ ಚಕ್ರಾವರ್ತಿ’

1996 ಇಸ್ವೆಚಿ ’ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ’ ಪ್ರಶಸ್ಥಿ

1998 ಇಸ್ವೆಂತ್ ದುಭಾಯಾಂತ್ ’ತುಳುನಾಡ ಕೋಗಿಲೆ’

1996 ಇಸ್ವೆಂತ್ ಕಲಾಸಂಪತ್ ಅಮೆರಿಕಾ ಥಾವ್ನ್ ’ಕೊಂಕಣಿ ಪೊದಾಂಚೊ ರಾಯ್’ ಪ್ರಶಸ್ಥಿ

1996 ಇಸ್ವೆಂತ್ ಲಯನ್ಸ್ ಕ್ಲಬ್ ಥಾವ್ನ್ ’ಜಿಣ್ಯೆ ಸಾಂದೆಪಣ್’

1999 ಇಸ್ವೆಂತ್ ಕೆ.ಸಿ.ಡಬ್ಲ್ಯೂ.ಎ ಥಾವ್ನ್ ’ಕೊಂಕಣಿ ಕಲಾರತ್ನ್’ ಪ್ರಶಸ್ಥಿ.

1999 ಇಸ್ವೆಚಾ ಒಕ್ಟೋಬರಾಂತ್ ಚಿಂತ್ಪ್ಯಾಂಚಾಂ ಮಾಂಚಿ ಪಂಗ್ಡಾಥಾವ್ನ್ ’ಶತಮಾನಾಚೊ ವ್ಯಕ್ತಿ’ ಪ್ರಶಸ್ಥಿ.

1999 ಇಸ್ವೆಂತ್ ಎಮ್.ಸಿ.ಸಿ ಖತಾರ್ ಥಾವ್ನ್ ’ಲಾಯ್ಫ್ ಟಾಯ್ಮ್ ಅಚೀವ್‌ಮೆಂಟ್ ಪ್ರಶಸ್ಥಿ’

1999 ಇಸ್ವೆಂತ್ 200ವಿ ವಿಲ್ಫಿ ನಾಯ್ಟ್ ವೆಳಾರ್ ’ಶತಮಾನಾಚೊ ಕೊಂಕ್ಣಿ ಕಲಾಕಾರ್ ಪ್ರಶಸ್ಥಿ’ ಮಂಗ್ಳುರಾಂತ್, ಬೆಂಗ್ಳುರಾಂತ್, ಬೊಂಬೊಯಾಂತ್,

ತಶೆಂಚ್ ವಿದೆಶಾಂನಿ ಸಭಾರ್ ಮಾನ್ ಸನ್ಮಾಣ್ ಮೆಳ್ಳ್ಯಾತ್.

ಹೆರ್ ಸಾಮಾಜಿಕ್ ವಾವ್ರ್ :

ಸ್ಥಾಪಕ್ - ’ಯುನಾಇಟೆಡ್ ಯಂಗ್‌ಸ್ಟರ್ಸ್ ಕೊಂಕಣಿ ಕಲ್ಚರಲ್ ಅಸೋಸಿಯೇಶನ್’ 1959 ಇಸ್ವಿ.

ಸಾಂದೊ - ’ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಎಕಾಡೆಮಿ’

ಸಾಂದೊ - ಗೊವ್ಳಿಕ್ ಪರಿಶದ್. (ಮಂಗ್ಳುರ್ ದಿಯೆಸಿಜ್)

ಸಾಂದೊ - ಜೆಪ್ಪು ಫಿರ್ಗಜ್ ಮಂಡಳಿ.

ಸಾಂದೊ - ’ಕೊಂಕಣಿ ನಾಟಕ್ ಸಭಾ, ಮಂಗ್ಳುರ್’

ಸಾಂದೊ - ಸೇಂಟ್ ಜೊಜೆಫ್ಸ್ ನಾಟಕ್ ಸಂಘ್, ಜೆಪ್ಪು

ಸ್ಥಾಪಕ್ ಅಧ್ಯಕ್ಶ್ - ಕಥೊಲಿಕ್ ಸಭಾ, ಜೆಪ್ಪು.

ಸಾಹಿತಿಕ್ ಸುರ್‍ವಾತ್ :

ವಿಲ್ಫಿ ಚೊವ್ದಾ ವರ್ಸಾಂಚೊ ಆಸ್ತಾನಾ (1956 ಇಸ್ವೆಂತ್), ಪದಾಂ ಘಡ್ನ್ ಗಾಂವ್ಕ್ ಧರ್ಲೆಂ.

ನೀಳ್ಗತಾ/ಮಿನಿ ಕಾದಂಬರಿ :

ಪಿಂತ್ರಾಂ

ಮೂಗುತಿ

ಫಾತಿಮಾಚೆಂ ಕಾಜಾರ್

ಬುಕಾರುಪಾರ್ :

ಪಿಂತ್ರಾಂ ಆನಿಂ ಮೂಗುತಿ (ಅಮರ್ ಪಬ್ಲಿಕೇಶನ್ಸ್)

ಮೊತಿಯಾಂ ಆನಿ ತಾರಾಂ (5 ಕವಿತಾಂ) (ಆಶಾವಾದಿ ಪ್ರಕಾಶನ್)

ನಾಟಕ್ :

’ಪಯ್ಶ್ಯಾಂಚೊ ಸಂಸಾರ್’ 1957 ಇಸ್ವಿ.

’ಮೋಡರ್ನ್ ನೊವ್ರೊ’

’ಬೆಷ್ಟೊ ದುಭಾವ್’

’ಧೋತ್ ಮ್ಹಾಕಾ ನಾಕಾ’

’ಮಾಯ್ ಮ್ಹಾಕಾ ಆಡಾಯ್ನಾಕಾ’

’ಬೆಬ್ದ್ಯಾಚಿ ಧುವ್’

’ತಿಸ್ರಿ ಚೀಟ್’

’ಕೆಡಿ ಬೊನಾ ಬಿ.ಎ’

ಪದಾಂ ಲಿಖ್ಲೆಲ್ಯಾ ನಾಟಕಾಂಚೊ ಸಂಖೊ: ಚಡುಣೆಂ 500.

ಪದಾಂ: 1500 ವಯ್ರ್ ಕೊಂಕ್ಣಿ ಆನಿಂ ತುಳು ಪದಾಂ ಸಯ್ತ್.

ಪಯ್ಲಿ ವಿಲ್ಫಿ ನಾಯ್ಟ್ ಜಾಲ್ಲಿ :

1970 ಇಸ್ವೆಂತ್ ಪಯ್ಲಿ ನಾಯ್ಟ್ ಜಾಲಿ ತರ್ ತಾಚಾ ಉಪ್ರಾಂತ್ ದೊನ್ಶಾಂ ವಯ್ರ್ ನಾಯ್ಟ್ಯೊ ಜಾಲ್ಯಾತ್-ಜಾವ್ನ್ ಆಸಾತ್.

ವೆಕ್ತಿತ್ವ್ :

ವಿಲ್ಫಿ ಏಕ್ ವೆಕ್ತಿ ಮಾತ್ರ್ ನ್ಹಯ್, ಏಕ್ ಸಂಸ್ಥೊ - ಏಕ್ ಖೆಳ್ಘಾಡಿ, ಗಾವ್ಪಿ, ಪದಾಂ ಲಿಖ್ಪಿ-ಕವಿ, ಬರವ್ಪಿ, ನಾಟಕಿಸ್ತ್, ನಟ್, ಸಮಾಜ್ ಸೆವಕ್, ಉಲವ್ಪಿ ಆನಿಂ ಹ್ಯಾ ಸರ್ವಾಂಕೀ ಮಿಕ್ವೊನ್ ಏಕ್ ಸಂಪೂರ್ಣ್ ಕಲಾಕಾರ್. ತಾಚೆಲಾಗಿಂ ತಾಲೆಂತಾಚೊ ಪುಂಜೊಚ್ ಆಸಾ. ಪುಣ್ ಹ್ಯಾ ಸರ್ವಾಂಸವೆಂ ತಾಚೆಂ ಸಾದೆಂಪಣ್ ಕೊಂಕ್ಣಿ ಲೊಕಾಂಕ್ ಹರ್‍ಯೆಕಾ ಕಾಳಾರ್ ವಿಲ್ಫಿಕ್ ಮಾಂದ್ಚೆಪರಿಂ ಕರ್ತಾ. ದೆಕುನ್ ಸಗ್ಳೊ ಕೊಂಕ್ಣಿ ಲೋಕ್ ಅಜೂನ್ ತಾಚೊ ಮೋಗ್ ಕರ್ತಾ ಆನಿಂ ತಾಚೆರ್ ಅಭಿಮಾನ್ ಪಾವ್ತಾ.

ಮಟ್ವ್ಯೊ ಕಾಣ್ಯೊ :

ವಿಲ್ಫಿ ಜಿತ್ಲೊ ಉಂಚ್ಲೊ ಪದಾಂ ಲಿಖ್ಪಿಗೀ ತಿತ್ಲೊಚ್ ಉಂಚ್ಲೊ ಬರವ್ಪಿ ಸಯ್ತ್. ಹಾಣೆಂ ಬರಯಿಲ್ಲ್ಯೊ ಕಾಣ್ಯೊ ಉಣ್ಯೊ ಜಾವ್ಯೆತ್ ಪುಣ್ ಭೋವ್ ಫಾಮಾದ್. ತಾಂತುಂಯ್ ’ಪಿಂತ್ರಾಂ’ ಆನಿಂ ’ಮೂಗುತಿ’ ಭೋವ್ ಫಾಮಾದ್ ಮಾಣ್ಯೊ ಜಾವ್ನಾಸಾತ್. ಜಶೆಂ ವಿಲ್ಫಿಚಾ ಪದಾಂನಿ ಮನ್ಶಾಪಣಾಚಿಂ ಮೊಲಾಂ ತಶೆಂಚ್ ಮನ್ಶಾಪಣಾಚೆಂ ಚಿಂತಾಪ್ ಆಸಾಗೀ ತಶೆಂಚ್ ತಾಚಾ ಕಾಣ್ಯಾಂನಿ ಸಯ್ತ್ ಹಿಚ್ ಸೊಭಾಯ್ ಉಟೊನ್ ದಿಸ್ತಾ. ಹಾವೆಂ ತಾಚೊ ಹ್ಯೊ ಕಾಣ್ಯೊ ವಾಚುನ್ ದೋನ್ ದಾಕ್ಡೆ ಉತ್ರಾಲೆ ತರ್‌ಯ್ ಅಜೂನ್ ಮ್ಹಜಾ ಮತಿಂತ್ ಜೆರುಚಾ ದೊಳ್ಯಾಂಚಿಂ ಪಿಂತ್ರಾಂ (’ಪಿಂತ್ರಾಂ’) ತಶೆಂಚ್ ಪ್ರಭಾಕರ್-ಸುಂದರಿ (’ಮೂಗುತಿ’) ರೂಪ್ ರೂಪ್ ದಿಸ್ತಾತ್. ಹಿಚ್ ವಿಲ್ಫಿಚಾ ಕಾಣ್ಯಾಂಚಿ ಶ್ಯಾಥಿ. ವಿಶೇಶತಾ: ವಿಲ್ಫಿಚಿ ವಿಶೇಷತಾ ಸಾಂಗೊಂಕ್ ಗೆಲೊಂ ತರ್ ಏಕ್ ನ್ಹಯ್, ದೋನ್ ನ್ಹಯ್, ಎಕಾ ಪಾಟ್ಲ್ಯಾನ್ ಏಕ್ - ಸಭಾರ್.

ಕಸೊ ಕೊಂಕ್ಣಿ ಲೋಕ್ ತಾಚೊ ಮೊಗ್ ಕರ್ತಾಗೀ ತಿತ್ಲೊಚ್ ತೊ ಕೊಂಕ್ಣಿ ಲೊಕಾಂಚೊ ಮೊಗ್ ಕರ್ತಾ. ಹ್ಯಾ ಲೊಕಾಂಚೆರ್ ತಾಕಾ ಹುಸ್ಕೊ ಆಸಾ, ದೆಕುನ್ ವಾಟ್ ಚುಕ್ಲೆಲ್ಯಾ ಆವಾಕ್ - ಭಯ್ಣಿಕ್ - ಪುತಾತ್ - ಬಾಪಾಯ್ಕ್ - ಆವಯ್ಕ್ ತೊ ಮಾಯಾಮೊಗಾನ್ ಬೂದ್ ಸಾಮ್ಗ್ತಾ. ತಾಚಿಂ ’ಆವಯ್’ ವಿಶ್ಯಾಂತ್ಲಿಂ ಪದಾಂ ಆಯ್ಕೊನ್ ಧಾರುಣ್ ಕಾಳ್ಜಾನ್ ಘರಾಥಾವ್ನ್ ಭಾಯ್ರ್ ಧಾಡ್ಲೆಲ್ಯಾ ಕಿತ್ಲೆಶ್ಯಾ ಲೊಕಾಂನಿ ಆಪ್ಲಿ ಚೂಕ್ ವಳ್ಕೊನ್ ಅಪ್ಲ್ಯಾ ಆವಯ್ಕ್ ಪಾಟಿಂ ಘರಾ ಆಪವ್ನ್ ಹಾಡ್ಲಾಂ - ಹಾಚಾಕೀ ವರ್ತೆಂ ಕಸಲೆಂ ಘಡಿತ್ ಸಾಂಗೊಂ ಹಾಂವ್? ಭಾಂಗ್ರಾಳೊ ತಾಳೊ, ಮಾಯ್ಪಾಸಿ ಜಿನೊಸ್, ಭರೊನ್ ವೊಮ್ತೊಂವ್ಚಿ ದಯಾಳಾಯ್, ಆಮ್ಕಾಂ ಲಜೆಶೆಂ ಕರ್ಚೆಂ ಖಾಲ್ತೆಂಪಣ್/ಸಾದೆಂಪಣ್. ಮ್ಹಕಾ ಏಕ್ ಬರವ್ಪಿ ಜಾವ್ನ್‌ಯ್ ತಿಂ ಬರಂವ್ಕ್ ಉತ್ರಾಂ ಮೆಳಾನಾಂತ್.

ಶರೊ: ಮಂಗ್ಳುರಾಂತ್ ಹಾಂವ್ ಕಾಮ್ ಕರುನ್ ಆಸ್ಚಾ ವೆಳಾರ್ ರಾವೊಂಕ್ ಘರ್ ನಾಸ್ತಾಂ ಆಸ್ಲೆಲ್ಯಾ ವೆಳಾರ್ ತಾಣೆಂ ಮ್ಹಾಕಾ ಚಡುಣೆಂ ಏಕ್ ಮಯ್ನೊಭರ್ ತಾಚಾ ಘರಾಂತ್ ರಾವೊಂಕ್ ಆವ್ಕಾಸ್ ದಿಲ್ಲೊ ತಾಚೊ ಉಪ್ಕಾರ್ ಹಾಂವ್ ಭೋವ್ ಖಾಲ್ತೆಪಣಿಂ ಮಾಂಧ್ತಾಂ ಆನಿಂ ಹೆಂ ಋಣ್ಕಾರಿಂ ಚಿಂತಾಪ್ ಸದಾಂಚ್ ಮ್ಹಜಾ ಕಾಳ್ಜಾ-ಮನಾಂತ್ ಹಾಂವ್ ಜೀವ್ ಆಸ್ತಾಪರ್‍ಯಾಂತ್ ಆಸ್ತೆಲೆಂ.

ಕಥಾದಾಯ್ಜ್ - 10 . ಮೂಗುತಿ

ಮೊಗಾಳ್ ವಾಚ್ಪ್ಯಾ,

ಹಿ ಧಾಕ್ಟಿಶಿ ಕಾಣಿ ಆತಾಂ ತುವೆಂ ವಾಚುಂಕ್ ಧರ್‍ತಾನಾ ಕಸಲೊ ಸಂಬಂಧ್ ಮ್ಹಜೆ ಆನಿ ತುಜೆ ಮಧೆಂ ಉಬ್ಜಾಲಾಗಿ ತಸಲೊಚ್ಚ್ ಸಂಬಂಧ್ ಹ್ಯಾ ಕಾಣಿಯೆಚಾ ನಾಯಕಾಕ್ ಆನಿ ಮ್ಹಾಕಾ ಆಸ್‌ಲ್ಲೊ. ತಾಣೆಂ ತಾಚಿ ಜಿಣ್ಯೆ ಕಥಾ ಖುದ್ದ್ ಆಪ್ಲ್ಯಾಚ್ ತೊಂಡಾನ್ ಮ್ಹಾಕಾ ಸಾಂಗ್‌ಲ್ಲಿ, ಹಾಂವೆಂ ತಿ ತುಕಾ ವಾಚುಂಕ್ ದಿಲ್ಯಾ.

ತಾಚೆಂ ನಾಂವ್ ಪ್ರಭಾಕರ್..... ತಾಚ್ಯಾ ಜಿವಿತಾಂತ್ಲೆಂ ಪೂರ್ಣ್ ಜಾಯ್ನಾಸ್ತಾಂ ಬಾಕಿ ಉರ್‌ಲ್ಲೆಂ ಏಕ್ ಮಹತ್ವಾಚೆಂ ಕಾಮ್ ತಾಣೆಂ ಮ್ಹಜ್ಯಾ ವಾಂಟ್ಯಾಕ್ ಒಪ್ಸಿಲ್ಲೆಂ. ಆಪ್ಲ್ಯಾ ಅತಿ ಮೊಗಾಚ್ಯಾ ಎಕಾ ವೆಕ್ತಿಕ್ ಆಪ್ಣೆಂ ದಿಂವ್ಚಿ ಏಕ್ ವಸ್ತ್ ತಿ ಹಾಂವೆಂ ಪಾವಿತ್ ಕರಿಜಾಯ್ ಮ್ಹಣ್ ಮ್ಹಜೆಲಾಗಿಂ ತಾಣೆಂ ಉಪ್ಕಾರ್ ಮಾಗ್‌ಲ್ಲೊ.

ತಿ ವಸ್ತ್ ಜಾವ್ನಾಸ್‌ಲ್ಲಿ ಧಾಕ್ಟಿಶಿ ಏಕ್ ಭಾಂಗಾರಾಚಿ ’ಮೂಗುತಿ’. ಪರೀಕ್ಶೆಚ್ಯಾ ಪೇಪರಾಂಚೆಂ ಮೌಲ್ಯ್‌ಮಾಪನ್ ಕರ್ಚೆಂ ಖಾತಿರ್ ಹಾಂವ್ ಆನಿ ಹೆರ್ ದೋಗ್ ಮ್ಹಜೆ ಹೈಸ್ಕೂಲಾಂತ್ಲೆಂ ಸಾಂಗಾತಿ ಮೆಸ್ತ್ರಿ -ಚಾರ್ ದಿಸಾಂ ಖಾತಿರ್ ಬೆಂಗ್ಳುರ್ ಪಾವ್‌ಲ್ಲ್ಯಾಂವ್, ಆನಿ ಬೆಂಗ್ಳುರ್‌ಚ್ ಮ್ಹಜಿ ಆನಿ ಪ್ರಬಾಕರಾಚಿ ಪಯ್ಲಿ ಭೆಟ್ ಜಾಲ್ಲಿ. ತ್ಯೆ ಭೆಟೆ ವೆಳಿಂ ತೊ ದೆದೆಸ್ಪ್ರಾರ್ ಆಸ್‌ಲ್ಲೊ.

ತಾಚ್ಯಾ ಗಾಂವ್ಚ್ಯಾ ಕೊಣೀ ಎಕಾ ಮನ್ಶಾಕ್ ತೊ ಸೊದ್ತಾಲೊ. ಬೆಂಗ್ಳುರ್‌ಚ್ಯಾ ಬಸ್ಸ್ ನಿಲ್ದಾಣಾಂತ್, ಮ್ಹಜೆ ಸಂಗಿಂ ಆಯ್ಲೆಲ್ಯಾ ಮೆಸ್ತ್ರಿಂಕ್ ಪಾಟಿಂ ಪಾಂವ್ಕ್ ಹಾಂವ್ ಗೆಲ್ಲ್ಯಾ ತವಳ್ - ಆಮಿ ತುಳು ಭಾಶೆನ್ ಉಲಯ್ತೆಲ್ಯಾಂವ್ ತೆಂ ಆಯ್ಕೊನ್ - ಹಾಂವ್ ತಾಂಕಾಂ ಪಾವ್ನ್ ಯೆತಾನಾ ಮ್ಹಜಿ ಪಾಟ್ ಧರ್ನ್ ತೊ ಆಯಿಲ್ಲೊ. ಹಾಂವ್ ಎಕಾ ಲ್ಹಾನ್ ಮಟ್ಟಾಚ್ಯಾ ಹೊಟೆಲಾಂತ್ ರಾವ್ತಾಲೊಂ. ಕರೆಕ್ಶನ್ ಕರ್ಚೆಂ ಥೊಡೆಂ ಚಡ್ತಿಕ್ ಕಾಮ್ ಮ್ಹಜ್ಯಾ ವಾಂಟ್ಯಾಕ್ ಆನಿಕೀ ಉರ್‌ಲ್ಲೆಂ ಜಾಲ್ಲ್ಯಾನ್ ಹೆರ್ ಮೆಸ್ತ್ರಿ ಪಾಟಿಂ ಗೆಲ್ಯಾರೀ ಹಾಂವೆಂ ಮಾತ್ರ್ ದುಸ್ರ್ಯಾ ದಿಸಾ ಪರ್ಯಾಂತ್ ರಾವಾಜಾಯ್ ಪಡ್‌ಲ್ಲೆಂ. ಹೊಟೆಲಾಚಾ ಪ್ರಮುಕ್ ದಾರಾಲಾಗಿಂ ಪಾವ್ತಾನಾಂಚ್ ಪಾಟ್ಲ್ಯಾನ್ ಕೊಣೆಂಗೀ ಆವಾಜ್ ಕರ್ನ್ ಆಪಯ್ಲೆಪರಿಂ ಭಗ್‌ಲ್ಲ್ಯಾನ್ ಹಾಂವ್ ಪಾಟಿಂ ಘುಂವ್ಲೊಂ. ಏಕ್ ವೆಕ್ತಿ ಮ್ಹಜೆ ಸರ್ಶಿಂ ಯೆತಾಲಿ. ಹಾತಾಂತ್ ತಾಚ್ಯಾ ಏಕ್ ಬೆತ್ ಆಸ್‌ಲ್ಲೆಂ.

ತ್ಯಾ ಬೆತಾಚ್ಯಾ ಆದಾರಾರ್ ಚಲ್ತಾಲೊ. ತ್ಯಾ ವೆಕ್ತಿಚ್ಯಾ ಹಾತಾ-ಪಾಂಯಾಂಕ್ ಬಳ್ ನಾ ವ ಆರ್ ಮಾರ್ಲ್ಯಾ ಮ್ಹಳ್ಳೆಂ ತೊ ಚಲ್ತಾನಾಂಚ್ ಕಳಿತ್ ಜಾತಾಲೆಂ. ತೊಂಡಾರ್ ದಾಟಾಯೆನ್ ವಾಡ್‌ಲ್ಲಿ ಖಾಡ್-ಮಿಶಿ... ಪಿಂಜ್ಕರ್ ವಸ್ತುರಾಂ....... ನಿಜಾಯ್ಕಿ ತೊ ಏಕ್ ವಾಟೆವಯ್ಲೊ ಭಿಕಾರಿ ತಶೆಂ ಮ್ಹಾಕಾ ಸುಸ್ತಾಲೆಂ. ತಾಕಾ ಪಳೆವ್ನ್ ಹಾಂವ್ ಪರತ್ ಘುಂವೊನ್ ಮ್ಹಜೆ ವಾಟೆಕ್ ಲಾಗ್ತಾನಾಂಚ್ ತಾಣೆಂ ಆನ್‌ಎಕ್ ಪಾವ್ಟಿಂ ಕಸಲೊಗಿ ಆವಾಜ್ ಕೆಲೊ ಆನಿ ಸರಾರಾಂ ಮ್ಹಜೆ ಸರ್ಶಿಂ ಆಯ್ಲೊ.

ಮ್ಹಾಕಾ ಕಾಂಯ್ ತಾಚಿ ವಳಕ್ ನಾಸ್ಲಿ. ಹೊ ಭಿಕೆಕ್‌ಚ್ ಮ್ಹಾಕಾ ಧೊಸುಂಕ್ ಆಯ್ಲಾ ಮ್ಹಣ್ ಲೆಕುನ್ ಆಸ್ತಾನಾ- "ಊರ್‌ದಾರ್...... ಈರೆಡಾ ಒಂಜಿ ನಿಮಿಷಾ ಪಾತೆರೆರೆ ಇತ್ತ್ಂಡ್," ಮ್ಹಣ್ ತುಳ್ವೆನ್ ಸಾಂಗ್ತಾನಾ ಹಾಂವ್ ಘುಸ್ಪಡ್ಲೊಂ.

"ಕಿತೆಂ?" ಹಾಂವೆಂ ಮ್ಹಳ್ಳೆಂ ತುಳ್ವೆನ್ಂಚ್ ಪುಣ್ ಗಂಭೀರಾಯೆನ್. ಹೊಟೆಲಾಂತ್ಲೆ ಜಣ್ ಭಾಯ್ರ್-ಭಿತರ್ ವೆತಾಲೆ ಜಾಲ್ಲ್ಯಾನ್ ಮದೆಂ ಬಾಗ್ಲಾರ್ ರಾವೊನ್ ತಾಚೆಲಾಗಿಂ ಉಲಂವ್ಚಿ ಖುಶಿ ಮ್ಹಾಕಾ ನಾತ್ಲಿ.

"....ಹಾಂವ್ ತುಕಾ ಪಯ್ಶ್ಯಾಂಕ್ ಧೊಸುಂಕ್ ಆಯ್ಲಾಂ ಮ್ಹಣ್ ಚಿಂತಿನಾಕಾ...... ಬಸ್ಸ್‌ಸ್ಟೆಂಡಾಂತ್ ತುಮಿ ಉಲಯ್ತಾನಾ ತುಂ ಗಾಂವ್ಚೊ ಆನಿ ವಾಲೆನ್ಸಿಯಾಂತ್ ರಾಂವ್ಚೊ ಮ್ಹಣ್ ಮ್ಹಾಕಾ ಕಳ್ಳೆಂ. ತ್ಯಾ ದೆಕುನ್ ಹಾಂವ್ ತುಜ್ಯಾ ಪಾಟ್ಲ್ಯಾನ್ಂಚ್ ಆಯ್ಲೊಂ......... ಮ್ಹಣಾಲೊ ತೊ ತುಳ್ವೆನ್. ಮ್ಹಾಕಾ ತಾಚಿ ಲಾಂಬಾಂಯ್-ರುಂದಾಂಯ್ ನಾಕಾ ಆಸ್‌ಲ್ಲಿ..............

"ತುಕಾ ಕಿತೆಂ ಉಲಂವ್ಕ್ ಆಸಾ ತೆಂ ಸಾಂಗ್ ವೆಗ್ಗಿಂ. ಮ್ಹಾಕಾ ವೇಳ್ ಜಾಲೊ............."

ಹಾಂವೆಂ ಮ್ಹಳೆಂ ಮ್ಹಜಿ ಗಂಭೀರಾಯ್ ಸಾಂಬಾಳುನ್. ತಾಚೆಂ ತೊಂಡ್ ಭಾವ್ಲೆಂ. ಥೊಡೊ ವೇಳ್ ಮೌನ್ ರಾವೊನ್ ಉಪ್ರಾಂತ್ ತೊ ಮ್ಹಣಾಲೊ-

"ಸಬಾರ್ ದಿಸಾಂ ಥಾವ್ನ್ ಹಾಂವ್ ಎಕಾ ಗಾಂವ್‌ವಾಲ್ಯಾಕ್ ಸೊದ್ತಾಂ. ಬೋವ್ ಗರ್ಜೆಚೆಂ ಮ್ಹಾಕಾ ಉಲಂವ್ಕ್ ಆಸ್‌ಲ್ಲೆಂ. ಹಾಂವ್ ಆನಿ ಥೊಡ್ಯಾಚ್ ದಿಸಾಂನಿ ಮೊರ್‌ಚೊ ಮನಿಸ್......."

ತಾಣೆಂ ತಕ್ಲಿ ಪಂದಾ ಘಾಲಿ. ತಾಚೆಂ ಖಾಲ್ತೆಂಪಣ್ ಪಳೆಯ್ತಾನಾ ಮ್ಹಾಕಾ ಮ್ಹಜಿಚ್ ಲಜ್ ಭಗ್ಲಿ. ತಿತ್ಲ್ಯಾ ಕಠೀಣಾಯೆನ್ ಉಲಂವ್ಕ್ ನ್ಹಜೊ ಆಸ್‌ಲ್ಲೆಂ ಮ್ಹಣ್ ಭಗ್ಲೆಂ. ಪುಣ್ ತಾಕಾ ಪಳಯ್ತಾನಾ ತಾಚೆಲಾಗಿಂ ಉಲಂವ್ಕ್ ಮನ್ ಯೆನಾತ್ಲೆಂ. ಅಡ್ಡಾದಿಡ್ದಿ ವಾಡ್‌ಲ್ಲ್ಯಾ ಖಾಡ್-ಮಿಶ್ಶಾಂನಿ ತಶೆಂ ಚಿಕ್ಲಾನ್ ದಾಟ್ಲೆಲ್ಯಾ ಕಾತಿ ವರ್ವಿಂ ತಾಚೆಂ ತೊಂಡ್ ವಿದ್ರೂಪ್ ದಿಸ್ತಾಲೆಂ. ತೊ ಕಸಲ್ಯಾ ತರೀ ಕಳ್ವಳ್ಯಾಂನಿ ವಳ್ವಳ್ತಾ ತೆಂ ತಾಚ್ಯಾ ನಿರಾಶೆಚ್ಯಾ ತೊಂಡಾಕ್ ಪಳಯ್ತಾನಾ ಕಳ್ತಾಲೆಂ. ತಾಚೆಂ ಗಾಲ್ ಫೊಂಡಾಂತ್ ಆಸ್ಲ್ಯಾರೀ ತೊಂಡಾ ವಯ್ಲಿಂ ದಾಡಾಮಾಂ ಬಳಾದಿಕ್ ಆಸ್‌ಲ್ಲಿಂ. ಜೀವ್ ಸಗ್ಳೊ ಗಳ್‌ಲ್ಲೊ ಪುಣ್ ತಾಚಿ ಲಾಂಬಾಯ್ ಆನಿ ದೊನೀ ಭುಜಾಂಚ್ಯಾ ಹಾಡಾಂ ಮದ್ಲಿ ರುಂದಾಯ್ ಪಳಯ್ತಾನಾ ಎಕಾ ಪ್ರಾಯೆರ್ ತೊ ದಡಂಗ್ ಜಿವಾಚೊ ಜಾವ್ನಾಸ್‌ಲ್ಲೊ ಮ್ಹಳ್ಳೆಂ ಸುಸ್ತಾತಾಲೆಂ.

ತಾಚೆ ಹಾತ್ ಭುಜಾಂ ಸಕಯ್ಲ್ ಉಮ್ಕಾಳ್ತಾಲೆಂ ಮಾತ್ರ್ ಶಿವಾಯ್, ತ್ಯಾ ಹಾತಾಂನಿ ಸಕತ್ ನಾತ್‌ಲ್ಲಿ. ತಾಚ್ಯಾ ಪಾಂಯಾಂಕೀ ತ್ಯಾ ಜಿವಾಕ್ ವ್ಹಾವಂವ್ಚ್ಯೆ ತಿತ್ಲೆಂ ಬಳ್ ನಾತ್ಲೆಂ. ಆಪ್ಲೆಂ ಸಗ್ಳೆಂ ತ್ರಾಣ್ ತ್ಯಾ ಬೆತಾಂಚೆರ್ ತೆಂಕುನ್ ತೊ ಉಬೊ ಆಸ್ಲೊ. ಮ್ಹಾಕಾ ಕಠಿಣ್ ಪುರಾಸಣ್ ಜಾಲ್ಲಿ. ಸುಟ್ಕಾನಾತ್‌ಲ್ಲ್ಯಾ ಆಟ್ ವೊರಾಂಚ್ಯಾ ಕರೆಕ್ಶನಾ ವರ್ವಿಂ ಮ್ಹಜೆ ದೊಳೆ ವೊಳೊನ್ ಗೈರೆ ಜಾಲ್ಲೆ.....ಪಾಟ್ ವೊಳ್ತಾಲಿ.....ಏಕ್ ಪಾವ್ಟಿಂ ಮಾತ್ಯಾಕ್ ಥಂಡ್ ಉದಾಕ್ ವೊತುನ್ ಕೂಡ್ ಖಟ್ಲ್ಯಾರ್ ನೀಟ್ ಸೊಡುಂಕ್ ಅತ್ರೆಗ್ತಾಲೊಂ. ಹ್ಯಾ ಮ್ಹನ್ಶಾಕ್ ಆತಾಂ ಕಿತೆಂ ಕರ್ಚೆಂ? ತರೀ ಹಾಂವೆಂ ಸಮಾದಾನೆನ್ ಮ್ಹಳೆಂ......

"ಕಿತೆಂಯಿ ಉಲಂವ್ಕ್ ಆಸಾ ತರ್ ಫಾಲ್ಯಾಂ ಉಲವ್ಯಾಂ.......ಹಾಂವೆಂ ಗಾಂವಾಂಕ್ ವೆಚೆಂ ಫಾಲ್ಯಾಂ ರಾತಿಂ. ಸಕಾಳಿಂಚೆಂ ಥೊಡೆಂ ಕಾಮ್ ಜಾತಾಚ್ ಉಪ್ರಾಂತ್ ರಾತಿಂ ಬಸ್ಸ್ ಸುಟ್ತಾ ಪರ್‌ಯಾಂತ್ ಮ್ಹಾಕಾ ಪುರ್‌ಸೊತ್ ಆಸಾ....." "ಜಾಯ್ತ್ ಧನ್ಯಾ...." ಮ್ಹಣಾಲೊ ತೊ ವ್ಹಡಾ ಖುಶೆನ್ ಆನಿ ಸಂತೊಸಾನ್...

"ಹಾಂವ್ ಫಾಲ್ಯಾಂ ಮ್ಹಣಾಸರ್ ಖಂಡಿತ್ ವಾಂಚ್ತಾಂ... ಮ್ಹಜ್ಯಾ ಖುಶೆ ಶಿವಾಯ್ ಹಾಂವ್ ಖಂಡಿತ್ ಮೊರಾನಾ" ತಾಣೆಂ ಹಾಸೊನ್ಂಚ್ ಮ್ಹಳೆಂ. ಹಾಸ್ತಾನಾ ತಾಚ್ಯಾ ಸುಕ್‌ಲ್ಲ್ಯಾ ಗಾಲಾಂಚೆರ್ ಮಿರಿಯೊ ಪಡ್ಲ್ಯೊ. ದಾಟ್ ಜಾಲ್ಲೆಂ ನಾಕ್ ಪುಲ್ಲೆಂ. ದಾಡಾಮಾಂ ವಿಸ್ತಾರ್‌ಲಿಂ.... ಹಾಸ್ತಾನಾಂಯಿ ತೊ ವಿದ್ರೂಪ್ ದಿಸ್ತಾಲೊ.

ತಾಚೆ ಮುಕಾರ್ ಪುಡ್ ಕರ್‌ನ್ ಉಲಂವ್ಕ್ ಏಕ್ ಥರ್‌ಶೆಂ ಜಾಲೆಂ ಮ್ಹಾಕಾ. ತರೀ ಉತ್ರಾ-ಉತ್ರಾಕ್ ’ಮೊರ್ನಾಚೆಂ’ ನಾಂವ್ ಕಾಡ್ಚ್ಯಾ ತಾಚ್ಯಾ ಉಲವ್ಣ್ಯಾಂತ್ ಮ್ಹಾಕಾ ಆತುರಾಯ್ ಭಗ್ತಾಲಿ. ತೊ ಮ್ಹಜೆಲಾಗಿಂ ಕಿತೆಂ ಸಾಂಗೊಂಕ್ ಆಶೆತಾಗಾಯ್?

"ತುಂ ಘಡ್ಯೆನ್ ಘಡಿ ಮೊರ್ನಾಚಿ ಖಬಾರ್ ಕಿತ್ಯಾಕ್ ಕಾಡ್ತಾಯ್? ತುಜಿ ಪ್ರಾಯ್ ಕಿತ್ಲಿ?" ಚಿಕ್ಕೆ ಜೊರಾನ್ಂಚ್ ಹಾಂವೆಂ ವಿಚಾರ್ಲೆಂ.

"ಸತ್ತಾವೀಸ್ ವರ್ಸಾಂ......"

"ಸತ್ತಾವೀಸ್ ವರ್ಸಾಂ?" ಹಾಂವ್ ಶೆರ್ಮೆಲೊಂ. ತಾಕಾ ಪಳಯ್ತಾನಾ ತೊ ಪನ್ನಾಸಾಂಕ್ ಲಾಗಿಂ ಪಾವ್ಲಾ’ಸೊ ದಿಸ್ತಾಲೊ.

"ವ್ಹಯ್ ಧನ್ಯಾ....ಪ್ರಾಯೆನ್ ತುಜೆ ವರ್‌ನಿ ಧಾಕ್ಟೊ ಹಾಂವ್. ಪುಣ್ ಮ್ಹಜ್ಯಾ ಪಾತ್ಕಾಂಚ್ಯಾ ಪ್ರಾಯಶ್ಚಿತಾ ಖಾತಿರ್ ಹಾಂವ್ ಆಸೊ ಜಾಲಾಂ."

"ಕಸಲಿ ಪಿಡಾ ತುಕಾ?" ಮ್ಹಜ್ಯಾ ಸವಾಲಾಕ್ ಥೊಡೊ ವೇಳ್ ಜಾಪ್ ಆಯ್ಲಿನಾ.

"ಪಿಡಾ? ಕಸಲಿ ಮ್ಹಣ್ ಸಾಂಗುಂ? ತಾಚೆ ಬದ್ಲಾಕ್ ಹಾಂವೆಂ ಕೆಲ್ಲ್ಯಾ ಕರ್ಮಾಂಚೊ ಫಳ್ ಹಾಂವ್ ಭಗ್ತಾಂ ಮ್ಹಳ್ಯಾರ್ ಸಾರ್ಕೆಂ ಜಾಯ್ತ್...." ಮ್ಹಣಾಲೊ ತೊ. "....ತುಂ ಪಾತ್ಯೆಶಿಗೀ? ಮ್ಹಜೆಂ ಗ್ರಾಜ್ಯುವೇಶನ್ ಜಾಲಾಂ..."

"ಗ್ರಾಜ್ಯುವೇಶನ್ ಜಾಲಾಂ.... ತರೀ......" ಅಜಾಪೊನ್ ಹಾಂವ್ ಹಾಂಕ್ರೆತಾನಾ, ತೊ ಪರ್‌ತ್ಯಾನ್ ಹಾಸ್ಲೊ.... "ವ್ಹಯ್ ಮ್ಹಾಕಾ ಪಳೆಂವ್ಚೆ ಕೊಣೀ ಹೆಂ ಪಾತ್ಯೆನಾಂತ್, ಪುಣ್ ಹಾಂವೆಂ ಸಾಂಗ್ಚೆಂ ಸತ್, ತರೀ ಹ್ಯಾ ಸತಾಚೊ ಆತಾಂ ಕಾಂಯ್ಚ್ ಉಪ್ಯೋಗ್ ನಾ, ಸಂಸಾರಾಂತ್ ಆವ್ಕ್ ಮುಗ್ದೊನ್ ಯೆತಾ’ಶೆಂ ಭಗ್ತಾ ಮ್ಹಾಕಾ. ತ್ಯಾ ಆದಿಂ ಮ್ಹಜ್ಯಾ ಅತೀ ಮೊಗಾಚ್ಯಾ ಮನ್ಶಾಕ್ ಭಾಸಾಯ್ಲಿ ವಸ್ತ್ ಹಾಂವ್ ಋಣ್ ಆಸಾಂ. ತಿ ಪಾವಿತ್ ಕರ್‌ಚ್ಯಾ ಖಾತಿರ್ ಹಾಂವ್ ಮ್ಹಜ್ಯಾ ಗಾಂವ್ಚ್ಯಾ ಮನ್ಶಾಕ್ ಸೊದ್ತಾಂ. ಮಂಗ್ಳುರ್ ಸೂಟರ್-ಪೇಟೆಂತ್ ಮ್ಹಜೆಂ ಬಿಡಾರ್ ಆಸಾ...."

"ಸೂಟರ್-ಪೇಟೆಂತ್? ಸೂಟರ್-ಪೇಟೆಂತ್ ಖಂಯ್ಸ್‌ರ್?"

"ಮುನ್ಸಿಪಲ್ ಇಸ್ಕೊಲಾ ಪಾಟ್ಲ್ಯಾನ್. ಲಾಗಿಂ ಲಾಗಿಂ ತೀನ್ ವರ್ಸಾಂ ಜಾತಾತ್ ಹಾಂವೆಂ ತೆಂ ಘರ್ ಸೊಡ್ನ್ ಆಮಿ ಥಂಯ್ ಭಾಡ್ಯಾಕ್ ರಾವ್ತಾಲ್ಯಾಂವ್..."

"ಆತಾಂ ಥಂಯ್ ಕೋಣ್ ಆಸಾತ್?" ವಿಚಾರ್ಲೆಂ ಹಾಂವೆ ದುಬಾವಾನ್. "ಮ್ಹಜಿ ಪತಿಣ್ ಆಸಾ....ಮ್ಹಜ್ಯಾ ಮೊಗಾಚೆಂ ಸುಂದರಿ. ಧನ್ಯಾ... ಬಸ್ಸ್‌ಸ್ಟೆಂಡಾಂತ್ ತುಮಿ ಉಲಯ್ತಾನಾ ತುಂ ಥಂಯ್ಸ್ ಸೂಟರ್-ಪೇಟ್ ಲಾಗ್ಸಾರ್ ವಾಲೆನ್ಸಿಯಾಂತ್ ರಾವ್ತಾಯ್ ಮ್ಹಣ್ ತುಜ್ಯಾ ಉಲಂವ್ಣ್ಯಾಂತ್ ಮ್ಹಾಕಾ ಕಳ್ಳೆಂ. ಉಪ್ಕಾರ್ ಕರ್‌ನ್ ತುಂವೆಂ ಮ್ಹಾಕಾ ಕುಮಕ್ ಕರಿಜಾಯ್ ಧನ್ಯಾ... ಧಾಕ್ಟಿಶಿ ಕುಮೊಕ್... ಹಾಂವೆಂ ದಿಂವ್ಚಿ ಏಕ್ ವಸ್ತ್ ತುಂವೆಂ ಮ್ಹಜ್ಯಾ ಪತಿಣೆಕ್ ಪಾವಿತ್ ಕರಿಜಾಯ್..." ತೊ ದೋನ್ ಮೆಟಾಂ ಮುಕಾರ್ ಯೇವ್ನ್ ಮುಂದರ್‌ಸುನ್ ಮ್ಹಣಾಲೊ-

"...ಧನ್ಯಾ... ದಯಾ ಕರ್‌ನ್ ತುವೆಂ ಜಾಯ್ನಾ ಮ್ಹಣೊಂಕ್ ನ್ಹಜೊ. ಹಾಂವ್ ಜಾಯ್ತ್ಯಾ ತೆಂಪಾ ಥಾವ್ನ್ ತುಜೆ ತಸಲ್ಯಾಕ್ ಸದಾಂ ತ್ಯಾಚ್ ಬಸ್ಸ್‌ಸ್ಟೆಂಡಾಂತ್ ಸೊದ್ತಾಲೊಂ. ಏಕ್ ದೋಗ್ ಜಣ್ ಮ್ಹಳ್ಳೆ. ಪುಣ್ ಮ್ಹಾಕಾ ಪಳೆವ್ನ್ ಉಲಂವ್ಕ್ ಸಯ್ತ್ ತೆ ಭಿಂಯೆಲೆ. ಆತಾಂ ಮ್ಹಾಕಾ ತುಜೆರ್ ಭರ್ವಸೊ ಉದೆಲಾ. ಸಬಾರ್ ವೇಳ್ ತುಂ ಮ್ಹಜೆಲಾಗಿಂ ಉಲಯ್ಲೊಯ್ ಜಾಯ್ನಾ ಮ್ಹಣಾನಾಕಾ ಧನ್ಯಾ... ಮೊರ್ಚ್ಯಾ ಮನ್ಶಾಚಿ ನಿಮಾಣಿ ಆಶಾ ಹಿ-ನೆಗಾರ್ ಕರಿನಾಕಾ,"

ತಾಣೆಂ ಪರಾತುನ್ ದಾಂಬೂನ್ ಮ್ಹಳ್ಳೆಂ. ಗರ್‌ಜ್ ನಾತಲ್ಲ್ಯಾ ರಾಟಾವಳಿಂನಿ ಶಿರ್ಕಾಲೊಂಗಾಯ್ ಮ್ಹಣ್ ಭಗ್ಲೆಂ. ಪುಣ್ ಆತಾಂ ಹಾಂವೆಂ ಕೂಸ್ ಮಾರ್‌ಲ್ಯಾರ್ ಮ್ಹಜ್ಯಾ ಮನ್ಶಾಪಣಾಕ್ ತೊ ಮೊಲ್ ಬಾಂದ್ತಲೊ ಮ್ಹಣ್ ಲೆಕುನ್ ಹಾಂವೆಂ ನಾ-ಖುಶೆನ್‌ಶೆಂ ಮ್ಹಳೆಂ-

"ವಾಲೆನ್ಸಿಯಾಂತ್ ಹಾಂವ್ ಆಯ್ಲೆವಾರ್‌ಚ್ ನವೆಂ ಘರ್ ಕರುನ್ ರಾವ್ಲಾಂ ತಿತ್ಲೊಚ್, ಚಡಾವತ್ ಹಾಂವ್ ಥಂಯ್ಚ್ಯಾ ಕೊಣಾಯ್ಕಿ ವಳ್ಕಾನಾ. ಪುಣ್ ತುವೆಂ ದಿಂವ್ಚಿ ವಸ್ತ್ ಕಸಲಿ ತಿ?"

"ಮೂಗುತಿ..."

"ಮೂಗುತಿ... ಕಸಲಿ ಮೂಗುತಿ?" ಹಾಂವ್ ಶೆರ್‌ಮೆಲೊಂ.

"ಮೂಗುತಿ ಭಾಂಗಾರಾಚಿ ಧನ್ಯಾ..." ಮ್ಹಣಾಲೊ ತೊ ಹಳೂ ಸ್ವರಾನ್.

"ಭಾಂಗಾರಾಚಿ?" ಆತಾಂ ಹಾಂವ್ ನಿಜಾಯ್ಕಿ ಭಿಂಯೆಲೊಂ. ಹ್ಯಾ ಮನ್ಶಾಕ್ ಕಶೆಂ ಪುಣಿ ನಿಸ್ರಾಯ್ಜಾಯ್ ಮ್ಹಳ್ಳೆಂ ಹಾಂವೆಂ ಖಂಡಿತ್ ಚಿಂತ್ಲೆಂ. "ಆಶೆ ಸಾಯ್ಬಾ, ಹಾಂವೆಂ ತುಕಾ ಸಾಂಗ್ಲೆಂ ವಾಲೆನ್ಸಿಯಾಂತ್ ಹಾಂವ್ ನವೊ ಶಿವಾಯ್ ತುಜೆ ಥಾವ್ನ್ ತಸಲಿ ಭಾಂಗಾರಾಚಿ ವಸ್ತ್ ವರುಂಕ್..."

"ತುವೆಂ ಭಿಯೆಂವ್ಚಿ ಗರ್‌ಜ್ ನಾ ಧನ್ಯಾ..."

ತೊ ಮದೆಂಚ್ ಉಲಯ್ಲೊ.

"ಮ್ಹಜೆ ತಸಲ್ಯಾ ಭಿಕಾರ್‌ಯಾಲಾಗಿಂ ಭಾಂಗಾರಾಚಿ ಮೂಗುತಿ ಆಸಾ ತೆಂ ಚಿಂತುನ್ ತುಕಾ ತಶೆಂ ಭಗ್ಚೆಂ ಸಹಜ್. ಪುಣ್ ಮ್ಹಜೆಲಾಗಿಂ ತಾಚಿ ಮ್ಹಜ್ಯಾಚ್ ನಾಂವಾರ್ ರಶೀದ್ ಆಸಾ. ಪಾಟ್ಲ್ಯಾ ದೇಡ್ ವರ್ಸಾ ಥಾವ್ನ್ ಹಾಂವೆಂ ಭಿಕ್ ಮಾಗೊನ್ ಜಮಯಿಲ್ಲ್ಯಾ ಪಯ್ಶ್ಯಾಂನಿ ಹಾಂವೆಂ ತಿ ಕರಯ್ಲ್ಯಾ. ಮ್ಹಜ್ಯಾ ಜಿಣ್ಯೆಂತ್ ಆನಿ ಕಸಲೆಯ್ ಅತ್ರೆಗ್ ಉರೊಂಕ್‌ನಾಂತ್. ಸುಂದರಿಚ್ಯಾ ನಾಕಾಕ್ ಏಕ್ ಮೂಗುತಿ ಸೊಬಯ್ಜಾಯ್ ಮ್ಹಳ್ಳಿ ಆಶಾ ಮ್ಹಾಕಾ ತಾಚೆಲಾಗಿಂ ಕಾಜಾರ್ ಜಾಲ್ಲ್ಯಾ ದಿಸಾ ಥಾವ್ನ್ ಆಸ್‌ಲ್ಲಿ.... ಧನ್ಯಾ... ಹಾಂವ್ ಸಮಾದಾನೆನ್ ಮರೊಂಕ್ ಆಶೆತಾಂ. ತುವೆಂ ತಿ ತಾಕಾ ಪಾವಯ್ಲಿ ಜಾಲ್ಲ್ಯಾರ್ ಸಂಸಾರಾಂತ್ ಆನಿ ಮ್ಹಾಕಾ ಕಿತೆಂಯಿ ನಾಕಾ.. ತುವೆಂ ಹೆಂ ಜಾರ್‌ಯೆಕ್ ಹಾಡಿಜಾಯ್ ಧನ್ಯಾ.. ನಾ ಮ್ಹಣೊಂಕ್ ನ್ಹಜೊ. ತುವೆಂ ಹಿ ಮೂಗುತಿ ತಾಕಾ ದಿತಾನಾ ಪ್ರಭಾಕರಾನ್ ದಿಲ್ಲ್ಯಾ ಮ್ಹಣ್ ಸಾಂಗಾಜಾಯ್.... "

ತಾಚ್ಯಾ ತ್ಯಾ ವಿನಂತೆಕ್ ಕಿತೆಂ ಜಾಪ್ ದೀಂವ್ ಮ್ಹಳ್ಳೆಂ ಸುಸ್ತಾಲೆಂನಾ. ತರೀ ತ್ಯೆ ಘಡ್ಯೆ ತಾಚೆ ಥಾವ್ನ್ ಪಾಶಾರ್ ಜಾಂವ್ಕ್ ಹಾಂವೆಂ ತಾಕಾ ಸಾಂಗ್ಲೆಂ-

"ಜಾಯ್ತ್... ಪುಣ್ ಆತಾಂ ಮ್ಹಾಕಾ ತುಜೆಂ ಆಯ್ಕೊಂಕ್ ವೇಳ್ ನಾ. ಫಾಲ್ಯಾಂ ದೊನ್ಪಾರಾಂ ಮ್ಹಜೆಂ ಕಾಮ್ ಜಾತಾಚ್ ಮ್ಹಾಕಾ ತುಂ ಹಾಂಗಾಸರ್‌ಚ್ ಮೇಳ್ ಆನಿ ತುಜಿ ಗಜಾಲ್ ಆಸಾ ತಶಿ ಸಾಂಗ್. ಮ್ಹಾಕಾ ತುಜೆರ್ ಪಾತ್ಯೆಣಿ ಭಗ್ಲಿ ತರ್ ಯಾ ತುಜ್ಯಾ ಕಾಮಾಂತ್ ಮ್ಹಾಕಾ ಕಸಲೆಯಿ ತೊಂದ್ರೆ ನಾಂತ್ ಮ್ಹಣ್ ಖಾತ್ರಿ ಜಾಲಿ ತರ್ ತಿ ಮೂಗುತಿ ಹಾಂವ್ ವ್ಹರ್‌ತಾಂ. ಆತಾಂ ತುಂ ವಚ್ ಮ್ಹಾಕಾ ವೇಳ್ ಜಾಲೊ... ಇತ್ಲೆಂ ಮ್ಹಣೊನ್ ಹಾಂವ್ ಘುಂವ್ಲೊ.

"ಜಾಯ್ತ್ ಧನಿಯಾ, ಹಾಂವ್ ಹಾಂಗಾಸರ್‌ಚ್ ರಾಕೊನ್ ರಾವ್ತಾಂ..."

ವ್ಹಡ್ ತಾಳ್ಯಾನ್ ತಾಣೆಂ ಮ್ಹಳ್ಯಾರೀ ಹಾಂವೆಂ ಪಾಟಿಂ ಪಳಯ್ಲೆಂನಾ. ರಿಸೆಪ್ಶನಿಸ್ಟಾ ಕಡ್ಚಿ ಚಾವಿ ಘೆವ್ನ್ ಮ್ಹಜ್ಯಾ ಕೂಡಾ ತೆವ್ಶಿಂ ಮೆಟಾಂ ಕಾಡ್ಲಿಂ. ದುಸ್ರ್ಯಾ ದಿಸಾ ಮ್ಹಜ್ಯಾ ವಾಂಟ್ಯಾಚಿಂ ಪೇಪರಾಂ ಮುಗ್ದಾತಾನಾ ದೋನ್ ವೊರಾಂ ಜಾಲ್ಲಿಂ. ಜೆವಾಣ್ ತಿರ್‌ಸುನ್, ಗಾಂಧಿನಗರ್ ಯೇವ್ನ್ ರಾತ್ಚ್ಯಾ ಬಸ್ಸಾಚಿ ಹಾಂವೆಂ ಟಿಕೆಟ್ ಘೆತ್ಲಿ ಆನಿ ಹೊಟೆಲಾಲಾಗಿಂ ಪಾವ್ತಾನಾ ಎಕಾಚ್ಛಾಣೆ ಮ್ಹಾಕಾ ತಾಚೊ ಉಡಾಸ್ ಆಯ್ಲೊ. ತೊ ಕಾಲ್ಚ್ಯಾ ಜಾಗ್ಯಾರ್ ಉಬೊ ಆಸ್ಲೊ. ಕಾಮಾ ಮದೆಂ ಮ್ಹಾಕಾ ತಾಚಿ ವಿಸಾರ್ ಪಡ್‌ಲ್ಲಿ. ಆದ್ಲ್ಯಾ ರಾತಿಂ ನೀದ್ ಪಡ್ತಾವರೇಗ್ ಹಾಂವ್ ತಾಚೆವಿಶಿಂ ನಿಯಾಳ್ತಲೊಂ.

ತಾಚ್ಯಾ ಜಿಣಿಯೆಂತ್ ಕಸಲೊಯಿ ಮಿಸ್ತೆರ್ ಆಸಾ ಮ್ಹಳ್ಳೊ ದುಬಾವ್ ಮ್ಹಾಕಾ ಜಾಲ್ಲೊ. ತಾಚೆ ಥಾವ್ನ್ಂಚ್ ಆಯ್ಕೊಂಚಿ ಆತುರಾಯ್ ಮ್ಹಜೆ ಥಂಯ್ ಉಬ್ಜಾಲ್ಲಿ. ಮ್ಹಾಕಾ ಪಳೆವ್ನ್ ತೊ ಹಾಸ್ತಾನಾ ಪರ್‌ತ್ಯಾನ್ ತಾಚೆಂ ತೊಂಡ್ ವಿದ್ರೂಪ್ ಜಾಲೆಂ. ಆದ್ಲ್ಯಾ ರಾತಿಂ ವೀಜ್ ದಿವ್ಯಾಂಚ್ಯಾ ಮಸ್ಕ್ ಉಜ್ವಾಡಾಕ್ ತೆಂ ತೊಂಡ್ ಸಾರ್ಕೆಂ ಝಳ್ಕಾನಾತ್ಲೆಂ. ಪುಣ್ ಆಜ್ ತಾಚೆರ್ ದೀಶ್ಟ್ ಘಾಲ್ತಾನಾ ಮ್ಹಜ್ಯಾ ಕುಡಿಂತ್ ಶಿರ್ಶಿರೊ ಧಾಂವ್ಲೊ.... ತಾಚಿ ಮುಸ್ತಾಯ್ಕಿ... ತಾಚೊ ಜಿನೊಸ್.... ಬಳ್ ನಾತ್‌ಲ್ಲೊ ಹಾತ್ ಚಿಕ್ಕೆ ಉಕಲ್ನ್ ತಾಣೆಂ ಮ್ಹಾಕಾ ಸಲಾಮ್ ಕೆಲೊ. ತಾಕಾ ಪಾಟಿಂ ಹಾತ್ ಉಕ್ಲುನ್ ತಶೆಂಚ್ ಕರುಂಕ್ ಮ್ಹಾಕಾ ಪುಟ್ವಾಲೆಂನಾ.

ಪಳಯ್ತೆಲೆ ಕಿತೆಂ ಚಿಂತಿತ್ ಮ್ಹಣ್ ಭಿಂಯೆಲೊಂ. ತರೀ ಉಲಯ್ಲ್ಯಾ ಶಿವಾಯ್ ನಿರ್ವೋಗ್ ನಾತ್ಲೊ. ಎಕ್ ಮಿನುಟ್‌ಭರ್ ಹಾಂವೆಂ ಆಲೋಚನ್ ಕೆಲಿ, ಆನಿ ತಾಕಾ ತಸೊಚ್ ರಾವ್ ಮ್ಹಣ್ ಸಾಂಗೊನ್ ಹಾಂವ್ ರಿಸೆಪ್ಶನಿಸ್ಟಾಲಾಗಿಂ ಗೆಲೊಂ. ತಾಚಿ ಥೊಡಿ ಸಳಾವಳ್ ಮ್ಹಾಕಾ ಜಾಲ್ಲಿ. ತಾಚೆಲಾಗಿಂ ಮಟ್ವ್ಯಾನ್ ಸಂಗತ್ ಸಾಂಗುನ್ ಮ್ಹಜಿ ಗರ್‌ಜ್ ವಿವರಿಲಿ.

ಸುರ್ವೆರ್ ತಾಣೆಂ ಪ್ರಭಾಕರಾಚೆರ್ ದೀಶ್ಟ್ ಘಾಲುನ್ ನಾ-ಖುಶಿ ದಾಕಯ್ಲಿ ತರೀ ಉಪ್ರಾಂತ್... ತೊ ವಳ್ಕಿಚೊ-ಮ್ಹಜ್ಯಾಚ್ ಗಾಂವ್ಚೊ ಮನಿಸ್ ಮ್ಹಣ್ ಸಾಂಗ್‌ಲ್ಲ್ಯಾಕ್ ತೊ ಒಪ್ಲೊ ಆನಿ ಅಶೆಂ ಹಾಂವೆಂ ತಾಕಾ ಮ್ಹಜ್ಯಾ ಕುಡಾಕ್ ಆಪವ್ನ್ ವ್ಹರ್‌ನ್ ಉಲಂವ್ಕ್ ಸಾದ್ಯ್ ಜಾಲೆಂ. ವಾಚ್ಪ್ಯಾ... ಹಾಚೆ ಉಪ್ರಾಂತ್ ಹಾಂವೆಂ ಬರಂವ್ಚಿ ಕಥಾ ತಾಚೆ ಥಾವ್ನ್ಂಚ್ ಆಯ್ಕೊಂಚಿ ಬರಿ ಮ್ಹಣ್ ಲೆಕುನ್, ತಾಚ್ಯಾ ಉತ್ರಾಂನಿ ಹಾಂಗಾಸರ್ ಲಿಕ್ಲ್ಯಾ.

ಮ್ಹಜ್ಯಾ ಜಲ್ಮಾಚೆಂ ನಾಂವ್ ಪ್ರಬಾಕರ್ ನ್ಹಂಯ್.... ಮಧುಕರ್... ಪುಣ್ ಮ್ಹಜೆಂ ಸವೆಂ ಆನಿ ನಿಮಾಣೆಂ ಕಾಜಾರ್ ಸುಂದರಿಲಾಗಿಂ ಜಾತಾನಾ ಹಾಂವೆಂ ಪ್ರಬಾಕರ್ ಮ್ಹಳ್ಳೆಂ ನಾಂವ್ ಘೆತ್‌ಲ್ಲೆಂ ಜಾಲ್ಲ್ಯಾನ್ ತೆಂಚ್ ನಾಂವ್ ಆತಾಂ ಕಾಯಾಮ್ ಉರ್ಲೆಂ. ಮ್ಹಾಕಾ ಮ್ಹಜ್ಯಾ ಭುರ್‌ಗ್ಯಾಪಣಾಚಾಂ ದಿಸಾಂಚೊ ಸಾರ್‌ಕೊ ಉಡಾಸ್ ನಾ. ಬಾಪುಯ್ ಮ್ಹಜೊ ಮ್ಹಜ್ಯಾ ಬಾಳ್ಪಣಾರ್‌ಚ್ � ಖಂಯ್. ಹಾಂವ್ ದುಸ್ರ್ಯಾ ಕ್ಲಾಸಿಂತ್ ಶಿಕ್ತಾನಾ ಮ್ಹಜಿ ಆವಯ್ ಅಂತರ್‌ಲ್ಲಿ. ಹ್ಯಾ ವೆಳಿಂ ಬೊಂಬೈಂತ್ಲ್ಯಾ ಮ್ಹಜ್ಯಾ ಮಾವ್ಳ್ಯಾನ್ ಮಂಗ್ಳುರಾಂತ್ಲೊ ಆಮ್ಚೊ ಲ್ಹಾನ್ ಘರ್ ಜಾಗೊ ವಿಕುನ್ ಮ್ಹಾಕಾ ಬೊಂಬೈ ವೆಲ್ಲೊ. ತಾಕಾ ವಾಡ್ಚಿಂ ಪಾಂಚ್ ಜಣಾಂ ಚೆಡ್ವಾಂಚ್ ಆಸ್ಲಿಂ. ಫಕತ್ ಚಾರ್ ದೀಸ್ ಮ್ಹಾಕಾ ತಾಣೆಂ ಆಪ್ಲ್ಯಾ ಘರಾಂವ್ ರಾವಯ್ಲೆಂ. ಉಪ್ರಾಂತ್ ಗಾಂವ್ ವಾಲ್ಯಾಚಾ ಎಕಾ ಹೊಟ್ಲಾಂತ್ ಕಾಮಾರ್ ಲಾಯ್ಲೆಂ. ಥಂಯ್ಸ್‌ರ್ ಜೇವ್ನ್-ಖಾವ್ನ್ ಥೊಡೆ ಪಯ್ಶೆ ಮ್ಹಾಕಾ ಮೆಳ್ತಾಲೆ.

ಅಪ್ರೂಪ್‌ಶೆಂ ಹಾಂವ್ ಮಾವ್ಳ್ಯಾಗೆರ್ ಪಾವ್ಲ್ಯಾರೀ ತಿಂ ಮ್ಹಾಕಾ ಹುಂಗಾನಾತ್ಲಿ. ಭುರ್‌ಗಿಂ ಸಯ್ತ್ ವಾಟೆರ್ ಮೆಳ್ಳ್ಯಾರೀ ಲೆಕಿನಾತ್ಲಿಂ. ಆಮ್ಚೊ ಘರ್ ಜಾಗೊ ವಿಕುನ್ ಮೆಳ್ಳೆಲ್ಯಾ ಪಯ್ಶಾಂವಿಶಿಂ ತಾಣಿಂ ಖಬಾರ್ ಸಯ್ತ್ ಕಾಡ್ಲಿನಾ... ವಿಚಾರ್ಚೆಂ ಧಯ್ರ್‌ಯಿ ಮ್ಹಾಕಾ ನಾತ್ಲೆಂ. ಹೊಟೆಲಾಂತ್ ಕಾಮಾಕ್ ಲಾವ್ನ್, ರಾವೊಂಕ್‌ಯಿ ಥಂಯ್ಚ್ ಆಸ್ರೊ ಕರ್‌ನ್ ದೀವ್ನ್ ಮ್ಹಜಿ ಖಬಾರ್ ಸೊಡ್‌ಲ್ಲಿ... ಆನಿ ಹಾಂವ್ ಹೊಟ್ಲಾಂತ್ ’ಏಕ್ ಜೀವ್ ಸದಾಶಿವ್’ ಜಾವ್ನ್ ದೀಸ್ ಕಾಡ್ತಾಲೊಂ. ಹೊಟ್ಲಾಂತ್ ಮ್ಹಜೆ ಬರಾಬರ್ ಕಾಮಾಕ್ ಆಸ್ಚೆ ಚೆಡೆ ಗಾಂವ್ಚೆಚ್ ಜಾವ್ನಾಸೊನ್ ದಿಸಾಕ್ ಕಾಮ್ ಕರ್‌ನ್ ರಾತಿಚೆಂ ಇಸ್ಕೊಲಾಕ್ ವಚೊನ್ ಶಿಕ್ಕಾಲೆ.

ಹಾಕಾ ಹೊಟೆಲಾಚ್ಯಾ ಧನ್ಯಾಚಿಯಿ ಪರ್ವಣ್ಗಿ ಮೆಳ್ತಾಲಿ ತಶೆಂಚ್ ಚಡ್ತಿಕ್ ಕುಮಕ್‌ಯ್ ಮೆಳ್ತಾಲಿ. ಅಶೆಂ ತಾಂಚೆಂ ಸಂಗಿಂ ಮ್ಹಜಿಯಿ ಜಿಣಿ ಮುಂದರ್‌ಸುನ್ ಗೆಲಿ. ದಿಸಾಂಚೆಂ ಕಾಮ್... ರಾತಿಚೆಂ ಶಿಕಾಪ್... ಮದೆಂ ವೇಳ್ ಮೆಳ್ಳೊ ತರ್ ವ್ ರಜೆಚೊ ದೀಸ್ ತರ್ ಆಮಿ ಆಮ್ಚ್ಯಾ ಹೊಟ್ಲಾ ಕುಶಿನ್ ಆಸ್ಚ್ಯಾ ಧನ್ಯಾಚಾ ವ್ಯಾಯಾಮ್ ಶಾಲಾಂತ್ ವ್ಯಾಯಮ್ ಕರ್‌ತಾಲ್ಯಾಂವ್. ತವಳ್ ಆದ್ಲ್ಯಾ ದಿಸಾಂಚೊ ಮ್ಹಾಕಾ ಉಡಾಸ್ ಯೇನಾತ್ಲೊ. ಮುಕ್ಲ್ಯಾ ಪುಡಾರಾಚೊ ಹುಸ್ಕೊಚ್ ನಾತ್ಲೊ. ದೀಸ್ ಕಸೊ ಸುರು ಜಾತಲೊ ಕಸೊ ಆಕೇರ್ ಜಾತಾಲೊ ಮ್ಹಳ್ಳೆಂ ಹಾಂವ್ ಚಿಂತಿನಾತ್ಲೊಂ. ಮ್ಹಜ್ಯಾ ಭಂವ್ತಿಚ್ಯಾ ಸಂಸಾರಾಚಿ ವಳಕ್ ಜಾಂವ್ಕ್ ಮ್ಹಾಕಾ ಥೊಡಿಂ ವರ್ಸಾಂ ಲಾಗ್ಲಿಂ. ಹ್ಯಾ ವೆಳಾರ್ ಹಾಂವ್ ಕೊಲೆಜಿಕ್ ಸೆರ್‌ವಾಲ್ಲೊಂ. ತರ್ನಾಟ್ಪಣ್ ಸುರು ಜಾಲ್ಲೆಂ.

ವ್ಯಾಯಾಮಾ ವರ್ವಿಂ ಆನಿ ಹೊಟ್ಲಾಚ್ಯಾ ಖಾಣಾನ್ ಹಾಂವ್ ಮ್ಹಜ್ಯಾ ಪ್ರಾಯೆ ವರ್‌ನಿಂ ಚಡ್ ಫುಲ್‌ಲ್ಲೊಂ. ಜಿವಾಂತ್ ತಶೆಂ ಮತಿಚ್ಯಾ ಬದ್ಲಾವಣೆ ಸಂಗಿಂ ತಾಳ್-ಮೂಳ್ ನಾತ್ಲಿಂ ಚಿಂತ್ನಾಂ ಮ್ಹಾಕಾ ಧೊಸುಂಕ್ ಲಾಗ್‌ಲ್ಲಿಂ. ಪಯ್ಶೆ ಆಸ್ಲ್ಯಾರ್ ಮಾತ್ರ್ ಮನಿಸ್, ತಸಲ್ಯಾಕ್ ಮಾತ್ರ್ ಮಾನ್-ಮರ್‌ಯಾದ್... ಹೆಂ ಮ್ಹಜೆ ಥಂಯ್ ಧೃಡ್ ಜಾಲೆಂ. ಮ್ಹಜಿ ಕೊಲೆಜ್ ಸಂಪ್ಲಿಂ. ಮ್ಹಜೊ ಧನಿ ಭಾಂಗಾರ್ ಮನಿಸ್. ಹಾಂವೆಂ ತಾಕಾ ಮೋಸ್ ಕೆಲ್ಲೊ ನಾ. ತಾಣೆಂ ಮ್ಹಾಕಾ ಉಣೆಂ ಕರುಂಕ್ ನಾ. ಮ್ಹಜಿ ಕೊಲೆಜ್ ಜಾತಾಚ್ ತಾಣೆಂಚ್ ಮ್ಹಾಕಾ ಆಪವ್ನ್ ಸಾಂಗ್ಲೆಂ.... ’ಮಧುಕರ್... ಆನಿ ತುವೆಂ ಹ್ಯಾ ಕಾಮಾಕ್ ರಾಂವ್ಚೆಂ ನಾಕಾ... ಮುಕಾರ್ ಕಸಲಿ ಆಲೋಚೆನ್ ಕೆಲ್ಯಾಯ್ ತುವೆಂ?’ ಆಲೋಚೆನ್ಯೊ ಜಾಯ್ತ್ಯೊ ಆಸ್‌ಲ್ಲ್ಯೊ ಮ್ಹಜ್ಯಾ ಮತಿಂತ್, ಪುಣ್ ಖಂಚಿಯಿ ಪೊಂತ್ ಪಾಂವ್ಚಿ ತಸಲಿ ಆಲೋಚೆನ್ ಧರ್‌ನ್ ಮುಕಾರ್ ವೆಚೆಂ ತ್ರಾಣ್ ಜಾಂವ್-ಪಯ್ಶೆ ಜಾಂವ್ ಮ್ಹಜೆಲಾಗಿಂ ನಾತ್ಲೆ.

ಬೊಂಬೈ ಆಪಿಸಾಂನಿ ಕಾಮ್ ಕರ್‌ನ್ ದೀಸ್ ಕಾಡ್ಚೆಂ ಜಿವಿತ್ ಭೊಗುನ್ ಹಾಂವ್ ನೆಣಾಂ ತರೀ ಪಳೆವ್ನ್ ಮ್ಹಾಕಾ ಕಳಿತ್ ಆಸ್ಲೆಂ. ಪಯ್ಲೆಂ ಏಕ್ ಕಾಮ್.... ಉಪ್ರಾಂತ್ ಘರ್..... ಬಾಯ್ಲ್..... ಭುರ್‌ಗಿಂ..... ಹಿಂ ಸರ್ವ್ ಚಿಂತ್ನಾಂ ಕೊಲೆಜ್ ಜಾಲ್ಯಾ ನಂತರ್ ಮ್ಹಜೆ ಮತಿಂ ಘುಂವ್ತಾಲಿಂ. ಎದೊಳ್ ಮ್ಹಾಕಾ ತಸಲಿ ಖಂತ್ ನಾತ್ಲಿಂ. ಹೊಟ್ಲಾಂತ್ ಫೊಳ್ಚೆಂ, ಥಂಯ್ಚ್ ಜೆಂವ್ಚೆಂ, ನಿದ್ಚೆಂ..... ಆತಾಂ ಅಸಲೆಂ ಜಿವಿತ್ ಮ್ಹಾಕಾ ಶಿಕ್ಪ್ಯಾಕ್ ಸಜಾನಾತ್ಲೆಂ. ಪುಣ್ ಕರ್ಚೆಂ ತರೀ ಕಿತೆಂ ಸದಾಂಚ್ ಹಾಂವ್ ಚಿಂತಾಲೊಂ ಆನಿ ಸ್ವಪ್ಣೆತಾಲೊಂ. ಬೊಂಬೈಂತ್ ಏಕ್ ಘರ್ ಘೆಜಾಯ್ ತರ್ ಆನಿ ಹಾಂವೆಂ ಪಂದ್ರಾ ವರ್ಸಾಂ ತರೀ ಘೊಳಾಜಾಯ್... ತಿತ್ಲ್ಯಾರ್ ಮ್ಹಜೆಂ ಅರ್ಚೆಂ ಜಿವಿತ್ ಸಂಪ್ತೆಲೆಂ, ತರ್ ಕಾಜಾರ್? ಬಾಯ್ಲ್? ಭುರ್‌ಗಿಂ? ಕುಟಾಮ್.....?.... ಬೊಂಬೈಂತ್ ಶಿಕಾಪ್ ಮುಖ್ಯ ನ್ಹಂಯ್.

ಪಯ್ಶೆ ಕರ್ಚಿ ವಿದ್ಯಾ ಮುಖ್ಯ. ಹೆಂ ಹಾಂವ್ ಜಾಣಾಂ ಆಸ್‌ಲ್ಲೊಂ. ದೆಕುನ್ ತಸಲಿ ವಿದ್ಯಾ ಶಿಕೊಂಕ್ ಆನಿ ತಸಲೆ ಪಯ್ಶೆ ಜೊಡುಂಕ್ ಹಾಂವ್ ಚಿಂತಾಲೊಂ. ಮ್ಹಜ್ಯಾ ಮತಿಂತ್ಲಿಂ ಚಿಂತ್ನಾಂ ಪಾರ್‌ಕುನ್ಂಚ್ ಮ್ಹಳ್ಳೆಪರಿಂ ಮ್ಹಜ್ಯಾ ಧನ್ಯಾನ್ ಮ್ಹಾಕಾ ವಾಟ್ ದಾಕಯ್ಲಿ. ತೊ ಮ್ಹಣಾಲೊ ’ತುಜೆ ಲಾಗಿಂ ಡಿಗ್ರಿ ಆಸಾ. ಪುಣ್ ತಸಲಿ ಡಿಗ್ರಿ ಆಸೊನ್ ಭಾಯ್ರ್ ಥಾವ್ನ್ ಹಾಂಗಾ ಆಯಿಲ್ಲೆ ಹಜಾರಾಂನಿ ಆಸಾತ್.

ಹಾಂವ್ ತುಕಾ ಏಕ್ ಚೀಟ್ ದಿತಾಂ... ತಿ ಘೆವ್ನ್ ತುಂ ಲಕ್ಕಶೆಟ್ಟಿಲಾಗಿಂ ವಚ್... ಹ್ಯಾ ಹೊಟ್ಲಾಚೊ ಧನಿ ಹಾಂವ್ ವ್ಹಯ್... ಪುಣ್ ಮ್ಹಜೊ ಧನಿ ತೊ... ತುಜೆ ತಸಲ್ಯಾ ತರುಣಾಂಕ್ ಪೊಂತ್ ಪಾವಂವ್ಕ್ ತಾಚೆಲಾಗಿಂ ಜಾಯ್ತ್ಯೊ ವಾಟೊ ಆಸಾತ್.’ ಅಶೆಂ ಹಾಂವ್ ಲಕ್ಕಶೆಟ್ಟಿಚ್ಯಾ ವರ್‌ತುಲಾಂತ್ ಶಿರ್‌ಕಾಲೊಂ. ಲಕ್ಕಶೆಟ್ಟಿಚೆಂ ನಾಂವ್ ಹಾಂವೆಂ ಆಯ್ಕಾಲ್ಲೆಂ. ತಾಚ್ಯಾ ದುಡ್ವಾ ವಿಶ್ಯಾಂತ್, ತಾಚ್ಯಾ ಕಾಮಾ ವಿಶ್ಯಾಂತ್, ತಾಚ್ಯಾ ಕಾರ್‌ಬಾರ್‌ಯಾಂ ವಿಶ್ಯಾಂತ್ ಮ್ಹಜೆ ಸಾಂಗಾತಿ ಕೆದಾಳಾಯಿ ಉಲಯ್ತಾಲೆ. ’.... ನಶೀಬ್ ಮ್ಹಳ್ಳ್ಯಾರ್ ಲಕ್ಕಶೆಟ್ಟಿಚ್ಯಾ ಹೊಟೆಲಾಂತ್ ಗ್ಲಾಸ್ ಧುವ್ನ್ ಆಸ್‌ಲ್ಲೊ ತೊ ಆಜ್ ಬೊಂಬೈ ಶಹರಾಂತ್ಲ್ಯಾ ಅರ್‌ದ್ಯಾ ಹೊಟ್ಲಾಂಚೊ ಧನಿ. ವ್ಹಡ್ಲೆ-ವ್ಹಡ್ಲೆ ಹಿಂದಿ ಪಿಂತುರಾಂಚೆ ನಿರ್ವiಪಕ್ ಪಯ್ಶಾಂ ಖಾತಿರ್ ತಾಚೆಲಾಗಿಂ ಯೆತಾತ್. ಜಾಯ್ತೆ ಸರ್‌ಕಾರಿ ಆಡಳ್ತೆದಾರ್ ತಾಚ್ಯಾ ಮೂಟಿಂತ್ ಆಸಾತ್. ಲೆಕ್ ಮಿತ್ ನಾತ್ಲೆಲ್ಯಾ ಕಾಳ್ಯಾ ದುಡ್ವಾನ್ ಬೊಂಬೈಂತ್ಲೆಂ ರಾಜಕೀಯ್ ತೊ ಹಾಲಂವ್ಕ್ ಸಕ್ತಾ...’ ಅಶೆಂ ಉಲಯ್ತಾಲೆ.

ತಸಲ್ಯಾ ಮನ್ಶಾಲಾಗಿಂ ಮ್ಹಜ್ಯಾ ಧನ್ಯಾನ್ ದಿಲ್ಲಿ ಲ್ಹಾನ್‌ಶಿ ಏಕ್ ಚೀಟ್ ಘೆವ್ನ್ ತಾಚ್ಯಾ ಕೊಲಾಬಾಚ್ಯಾ ಬೊಂಗ್ಲ್ಯಾಕ್ ಹಾಂವ್ ಪಾವ್‌ಲ್ಲೊಂ. ಲಕ್ಕಶೆಟ್ಟಿಚೆಂ ನೈಜ್ ಚಿತ್ರಣ್ ಮ್ಹಜೆ ಮತಿಂ ರೂಪಿತ್ ಜಾಲ್ಲ್ಯಾ ಚಿತ್ರಾ ವರ್‌ನಿಂ ವಿಬಿನ್ನ್ ಆಸ್‌ಲ್ಲೆಂ. ಬಾರೀಕ್ ಜೀವ್ ತಾಚೊ ಸ ಫುಟಿ ಲಾಂಬ್... ತೊಂಡ್ ಲಾಂಬ್ಶೆಂ ಜಾವ್ನ್ ಕೆದಾಳಾಯಿ ಗಂಬೀರ್. ಲಾಂಬ್ ಕಾಳೆ ಕೇಸ್ ತೊ ಪಾಟಿಂ ಉಗಯ್ತಾಲೊ. ಧೊವೊ ಪೈಜಾಮ್ ಆನಿ ತಸಲೊಚ್ ಕುರ್‌ತಾ ನ್ಹೆಸ್ತಾಲೊ. ತಾಚೆಲಾಗಿಂ ಸಗ್ಳ್ಯಾ ಬೊಂಬೈಕ್ ಹಾಲಂವ್ಚೆ ತಿತ್ಲೆ ಪಯ್ಶೆ ಆಸ್ತಿತ್ ಮ್ಹಣ್ ಪಯ್ಲೆಂ ಪಾವ್ಟಿಂ ತಾಕಾ ಪಳಯಿಲ್ಲೊ ಕೊಣೀ ಸಾಂಗ್ಚೊನಾ. ಪುಣ್ ಹಿ ಖರಿ ಸಂಗತ್ ಜಾವ್ನಾಸ್ಲಿ. ಕೊಲಾಬಾಚಾ ಬೊಂಗ್ಲ್ಯಾ ಭಿತರ್ ಸರ್‌ತಾನಾ ತಾಚೆ ಭೊಂವ್ತಿಂ ರಾಕ್ಸಾ ಕಾಸ್ತಾಚೆ ಚೊವ್ಗ್ ಜಣ್ ಅಂಗ್‌ರಕ್ಶಕ್ ಆಸ್ಲೆ.

ಚಡ್ ವೇಳ್ ತಾಚ್ಯಾ ಕದೆಲಾರ್ ತೊ ಬಸ್ಲೊನಾ. ಹಾಂವೆಂ ಹಾಡ್ಲೆಲಿ ಚೀಟ್ ಮ್ಹಜೆಚ್ ಕರ್‌ನಾ ತಾಣೆಂ ವಾಚಯ್ಲಿ. ಉಪ್ರಾಂತ್ ಏಕ್ ಮಿನುಟ್‌ಭರ್ ಮ್ಹಾಕಾ ತೀಕ್ಷ್ಣ್ ದ್ರಶ್ಟೆನ್ ಪಳೆವ್ನ್ ಬೊಂಗ್ಲ್ಯಾಚ್ಯಾ ಮೆನೆಜರಾಲಾಗಿಂ ತೊ ಉಲಂವ್ಕ್ ಲಾಗ್ಲೊ. ಹಾಂವ್ ತಾಚೆ ಸಮೊರ್ ಉಬೊಚ್ ಆಸ್ಲೊಂ. ಮ್ಹಜೆಬರಿಚ್ ತಾಚೆ ಅಂಗ್‌ರಕ್ಶಕ್ ತಾಚೆ ಭೊಂವ್ತಿಂ ಉಬೆ ಆಸ್ಲೆ. ತೊ ಆನಿ ಮೆನೆಜರ್ ಕಿತೆಂ ಉಲಯ್ತಾಲೆ, ಹಾಂವ್ ಜಾಣಾಂ. ಫುಗಾಸಾಂವ್ ಹಾಡ್ಚ್ಯಾ ತಸಲ್ಯಾ ವಾತಾವರಣಾಂತ್ ಉಸ್ವಾಸ್ ಬಾಂದುನ್ ಮ್ಹಳ್ಳೆಪರಿಂ ಹಾಂವ್ ಥೊಡೊ ವೇಳ್ ರಾವ್ಲೊಂ. ಎಕಾಚ್ಚಾಣೆ ಲಕ್ಕಶೆಟ್ಟಿ ಕದೆಲಾ ವಯ್ಲೊ ಉಟ್ಲೊ. ಮೆನೆಜರ್ ಆನಿ ಅಂಗ್‌ರಕ್ಶಕ್ ತಾಕಾ ವಾಟ್ ಸೊಡ್ನ್ ಕುಶಿಕ್ ವೊಂದ್ವಾಲೆ. ಉಟ್‌ಲ್ಲೊಚ್ ಕೊಣಾಯ್ಕೀ ಲೆಕಿನಾಸ್ತಾಂ ತುರ್‌ತಾನ್ ಶೀದಾ ಬಾಗ್ಲಾ ಭಾಯ್ರ್ ಚಲ್ಲೊ. ತಾಚ್ಯಾ ಪಾಟ್ಲ್ಯಾನ್ ತಿ ಪಾಟ್ಲಾಮ್‌ಯಿ ಗೆಲಿ. ಕೂಡ್ ಖಾಲಿ ಜಾಲೆಂ. ಕಿತೆಂ ಜಾಲೆಂ ಮ್ಹಳ್ಳೆಂ ಕಳ್ನಾಸ್ತಾಂ ಹಾಂವ್ ಥಂಯ್ಚ್ ರಾವ್ಲೊಂ.

ತಿತ್ಲ್ಯಾರ್ ಶೆಟ್ಟಿಕ್ ಆಪವ್ನ್ ಹಾಡುಂಕ್ ಗೆಲ್ಲೊ ಮೆನೆಜರ್ ಪರತ್ ಆಯ್ಲೊ ಆನಿ ಎಕಾ ಮೆಜಾ ಸರ್‌ಶಿಂ ಆಪಯ್ತಾನಾ ಮ್ಹಾಕಾ ತಾಚೆ ಮುಕ್ಲ್ಯಾ ಕದೆಲಾರ್ ಬಸೊಂಕ್ ಹಿಶಾರೊ ದಿಲೊ. ಮ್ಹಜೆಲಾಗ್ಚಿ ಚೀಟ್ ಘೆವ್ನ್ ತಾಣೆಂ ಪರ್‌ತ್ಯಾನ್ ವಾಚ್ಲಿ. ಮೆನೆಜರ್ ಸಾದಾರ್‌ಣ್ ಮ್ಹಾತಾರೊಚ್ ಮ್ಹಣ್ಯೆತ್. ಪುಣ್ ಜೀವಾಂತ್ ದಢಂಗ್ ಆಸೊನ್ ತ್ಯಾ ಕಾಮಾಂತ್ ಹೆಳ್ಳಾ ಮ್ಹಳ್ಳೆಂ ಪಾರ್‌ಕಿಯೆತೆಂ.

"ಕಸಲೆಂ ಕಾಮ್ ಜಾಯ್ ತುಕಾ?" ತಕ್ಲಿ ಉಕಲ್ನ್ ಮ್ಹಾಕಾ ಪಳೆತ್ತ್ ತಾಣೆಂ ಸವಾಲ್ ಕೆಲೆಂ.

"ಕಸಲೆಂಯಿ ಜಾತಾ...." ಹೊಟ್ಲಾಚಾ ಧನ್ಯಾನ್ ಸಾಂಗ್‌ಲ್ಲೆ ಪರಿಂ ಹಾಂವೆ ಜಾಪ್ ದಿಲಿ.

"ಕಸಲೆಂಯಿ ಜಾತಾ ಮ್ಹಳ್ಳ್ಯಾರ್? ಹಾಂಗಾಸರ್ ಯೆತಾನಾ ಆಪುಣ್ ಕಸಲೆಂ ಕಾಮ್ ಕರ್‌ತಾಲೊಂ ಮ್ಹಣ್ ತುಂ ಚಿಂತುನ್ ಯೇವ್ನಾಂಯ್?"

"ತಶೆಂ ಕಾಂಯ್ ಚಿಂತುಂಕ್ ನಾ... ಮ್ಹಾಕಾ ಏಕ್ ಕಾಮ್ ಜಾಯ್, ತುಮಿ ದಿಲ್ಲೆಂ ಕಾಮ್ ಕರುಂಕ್ ಹಾಂವ್ ತಯಾರ್..." ಹಾಂವೆಂ ಜಾಪ್ ದಿಲಿ. ಕದೆಲಾಕ್ ವೊಣ್ಕೊನ್ ಥೊಡೊ ವೇಳ್ ತೊ ಮ್ಹಾಕಾ ಪಳೆಂವ್ಕ್ ಲಾಗ್ಲೊ. ಹಾಂವೆ ತಿ ದಿಶ್ಟ್ ಬದ್ಲಿಲಿ.

"ಬೊಂಬೈಂತ್ ತುಕಾ ಕೋಣ್ ಆಸಾತ್?"

"ಕೊಣೀನಾಂತ್. ಏಕ್ ಮಾವ್ಳೊ ಆಸ್‌ಲ್ಲೊ ತೊ ಆತಾಂ ಸರ್‌ಲಾ. ತಾಚ್ಯಾ ಭುರ್‌ಗ್ಯಾಂಕ್ ಆನಿ ಮ್ಹಾಕಾ ತಿತ್ಲೊ ಬರೊ ಸಂಬಂದ್ ನಾ..."

"ಗಾಂವಾಂತ್ ಖಂಯ್ ತುಕಾ?"

"ಮಂಗ್ಳುರ್‌ಚ್ಯಾ ಮಂಗಳ ದೇವಿಲಾಗಿಂ. ಪುಣ್ ಮ್ಹಜ್ಯಾ ಧಾಕ್ಟ್ಯಾ ಪ್ರಾಯೆರ್ ಆವಯ್ ಸರ್‌ಲ್ಲ್ಯಾಫರಾ ಮ್ಹಾಕಾ ಬೊಂಬೈ ಆಪವ್ನ್ ಹಾಡ್‌ಲ್ಲೊ ತ್ಯಾ ನಂತರ್ ಹಾಂವ್ ಥಂಯ್ ಪಾಟಿಂ ವಚೊಂಕ್ ನಾ..."

ಹಾಂವೆಂ ದಿಂವ್ಚ್ಯೊ ಜಾಪಿ ತೊ ಕಾನ್ ದೀವ್ನ್ ಆಯ್ಕಾತಾಲೊ. ಮ್ಹಜಿ ಖಂತ್ ಕರ್‌ತೆಲಿಂ-ತುಂ ಖಂಯ್ ಗೆಲ್ಲೊಯ್..... ಕಿತೆಂ ಕರ್‌ತಾಯ್ ಮ್ಹಣ್ ವಿಚಾರ್ ಕರ್‌ತೆಲಿಂ ಕೊಣೀ ನಾಂತ್-ಮ್ಹಳ್ಳೆಂ ಸಮ್ಜೊಂಕ್ ತೊ ಸವಾಲಾಂ ಕರ್‌ತಾ ಮ್ಹಣ್ ಮ್ಹಾಕಾ ಕಳಿತ್ ಜಾಲೆಂ. ಲಕ್ಕಶೆಟ್ಟಿಚ್ಯಾ ವ್ಯವಹಾರಾಂತ್ ಅಸಲ್ಯಾಚ್ ಮನ್ಶಾಂಕ್ ತೊ ಕಾಮಾಕ್ ಘೆತಾ.... ಆನಿ ತಸಲ್ಯಾ ಕಾಮಾಂನಿ ಮಾತ್ರ್ ಪಯ್ಶೆ ಕರ್‌ಯೆತ್ -ಹೊ ಹಿಶಾರೊ ಮ್ಹಜ್ಯಾ ಧನ್ಯಾ ಥಾವ್ನ್ ಮ್ಹಾಕಾ ಪಯ್ಲೊಚ್ ಮೆಳೊಲ್ಲೊ. ’ತಾಚಿಂ ಕಾಮಾಂ ರಿಸ್ಕೆಚಿಂ.

ತುಂ ತುರ್‌ತಾನ್ ಪಯ್ಶೆ ಕರುಂಕ್ ಆಶೆತಾಯ್ ತರ್ ಮಾತ್ರ್ ಅಸಲ್ಯಾ ಕಾಮಾಕ್ ಕಬ್ಲಾತ್ ದೀ. ನಾ ತರ್ ಹೆರ್ ದಿಸ್ಪಡ್ತಿಂ ಕಾಮಾಂಯಿ ತಾಚೆಲಾಗಿಂ ಆಸ್ತೆಲಿಂ... ವಿಚಾರ್‌ನ್ ಪಳೆ... ’ ಅಶೆಂ ಮ್ಹಜ್ಯಾ ಧನ್ಯಾನ್ ತಿಳ್ಸಿಲ್ಲೆಂ. ಪುಣ್ ಮ್ಹಾಕಾ ತುರ್ತಾನ್ ಪಯ್ಶೆ ಕರಿಜಾಯ್ ಆಸ್ಲೆ. ಜಾತಾ ತಿತ್ಲೆ ವೆಗ್ಗಿಂ ಬೊಂಬೈಂತ್‌ಚ್ ಮ್ಹಜ್ಯಾ ಮಾವ್ಳ್ಯಾಚ್ಯಾ ಭುರ್‌ಗ್ಯಾಂನಿ ರಾಂವ್ಚ್ಯಾ ಚಾಲಿ ಮುಕಾರ್ ಹಾಂವೆಂ ಏಕ್ ಫ್ಲೇಟ್ ಘೆಂವ್ಕ್ ಜಾಯ್ ಆಸ್ಲೆ. ಫ್ಲೆಟ್ ಘೆತ್ಲ್ಯಾ ಉಪ್ರಾಂತ್ ಮ್ಹಜ್ಯಾ ಮಾವ್ಳ್ಯಾಚಾ ಧುವಾಂನಿ ಮೊಸೊರ್ ಕರಿಜಾಯ್, ಹೊಟೆಲಾಂತ್ ಗ್ಲಾಸ್ ಧುವ್ನ್ ಆಸ್‌ಲ್ಲೊ ಆಜ್ ಫ್ಲೆಟಾಂತ್ ರಾವ್ತಾ ಮ್ಹಣ್ ಝಳಾಜಾಯ್, ಆನಿ ತವಳ್ ಹಾಂವೆಂ ತಾಂಕಾಂ ಭಿತರ್ ಆಪವ್ನ್ ಮ್ಹಜ್ಯಾ ಫ್ಲೆಟಾಂತ್ ಆಸ್ಚಿ ವಿದೇಶಿ ಟಿ.ವಿ., ಸ್ಟೀರಿಯೊ, ಫ್ರಿಜ್ಜ್, ಗೊಡ್ರೇಜ್ ಹೆಂ ಸರ್ವ್ ದಾಕಯ್ಜೆ. ಆನಿ ತಾಣಿಂ ಮ್ಹಾಕಾ ತಾಂಚಾ ಘರಾಂತ್ ಚಾರ್ ದೀಸ್ ರಾವವ್ನ್ ಧಾಂವ್ಡಾಯಿಲ್ಲೊ ಉಡಾಸ್ ಕಾಡಿಜಾಯ್. ಇತ್ಲೆಂ ಸರ್ವ್ ಹಾಂವೆಂ ಕರಿಜಯ್ ತರ್ ತುರ್‌ತಾನ್ ಜೊಡ್ಯೆತ್ ತಸಲ್ಯಾ ಪಯ್ಶಾಂ ವರ್ವಿಂ ಮಾತ್ರ್ ಸಾದ್ಯ್. ಹಾಂವ್ ಸರ್‌ವಾಂಕೀ ತಯಾರ್ ಜಾವ್ನ್ಂಚ್ ತ್ಯಾ ಬೊಂಗ್ಲ್ಯಾಕ್ ಪಾವ್‌ಲ್ಲೊಂ. ಮೆನೆಜರಾಚೆ ಹೆಳ್‌ಲ್ಲೆ ಗಿದಾ-ದೊಳೆ ಕಿತೆಂಗೀ ಮ್ಹಜ್ಯಾ ತೊಂಡಾರ್ ಸೊದ್ತಾಲೆ ತೆಂ ಮ್ಹಾಕಾ ಸಮ್ಜಾತಾಲೆಂ.

ಥೊಡ್ಯಾ ಮೌನಾ ನಂತರ್ ತೊ ಮ್ಹಣಾಲೊ "ಬೊಸಾನ್ ತುಕಾ ಕಾಮ್ ದಿವ್ಯೆತ್ ಮ್ಹಳಾಂ... ಪುಣ್ ತುಕಾ ಕಾಮ್ ದಿಂವ್ಚೆಂ ವ ದೀನಾಸ್ತಾಂ ರಾಂವ್ಚೆಂ ಮ್ಹಜೆಲಾಗಿಂ ಆಸಾ..."

ತೊ ಥೊಡೊ ವೇಳ್ ರಾವ್ಲೊ. ಹಾಂವ್ ತಾಕಾಚ್ ಪಳೆತ್ತ್ ಬಸ್ಲೊಂ.

ತೊಚ್ ಉಲಯ್ಲೊ- ".....ಲಕ್ಕಶೆಟ್ಟಿಚ್ಯಾ ಹಾತಾಖಾಲ್ ಕಸಲಿಂ ಕಾಮಾಂ ಚಲ್ತಾತ್ ಜಾಣಾಂಯ್?" "ಆಯ್ಕೊನ್ ಥೊಡೆಂ ಜಾಣಾಂ......" ಮ್ಹಳ್ಳೆಂ ಹಾಂವೆಂ ಹಾಳ್ವಾಯೆನ್.

ಉಪ್ರಾಂತ್ ಧಯ್ರ್ ಘೆವ್ನ್ ಹಾಂವೆಂ ಸಾಂಗ್ಲೆಂ -

"ಸರ್... ಮ್ಹಾಕಾ ಪಾರ್‌ಕುಂಕ್ ತುವೆಂ ಚಡ್ ವೇಳ್ ಘೆಂವ್ಚೊನಾಕಾ. ಹಾಂಗಾ ಯೆತಾನಾಂಚ್ ಹಾಂವ್ ಎಕಾ ತೀರ್‌ನಾನಾಕ್ ಆಯ್ಲಾಂ. ಕಸಲೆಂ ಕಾಮ್ ತುಮಿ ಮ್ಹಾಕಾ ದಿತಾತ್ ತೆಂ ಹಾಂವ್ ಕರುಂಕ್ ತಯಾರ್. ಮ್ಹಜೆ ವರ್ವಿಂ ತುಮ್ಕಾಂ ಲುಕ್ಸಾಣ್ ಜಾಂವ್ಚೆಂ ನಾ."

ತೊ ಏಕ್‌ಪಾವ್ಟಿಂ ಮ್ಹಜೆ ಕುಶಿಕ್ ಬಾಗ್ವೊನ್ ಪರತ್ ವೊಣ್ಕೊನ್ ಬಸ್ಲೊ.

"ವೆರಿಗುಡ್.... ತರ್ ತುಂ ವಿಶಯ್ ಜಾಣಾಂಯ್.... ವಿವರ್‌ಸುನ್ ಸಾಂಗ್ಚೆಂ ಕಾಮ್ ಉರ್ಲೆಂ. ಪುಣ್ ಇತ್ಲೆಂ ಮಾತ್ರ್ ಹಾಂವ್ ತುಕಾ ಸಾಂಗ್ತಾಂಕೀ... ಏಕ್‌ಪಾವ್ಟಿಂ ತುಂ ಹ್ಯಾ ವರ್‌ತುಲಾಂ ಭಿತರ್ ಆಯ್ಲ್ಯಾ ಉಪ್ರಾಂತ್ ಪಾಟಿಂ ವಚಾಜಾಯ್ ತರ್ ತುಜಿ ಖುಶಿ ಚಲ್ಚಿನಾ. ಏಕ್‌ಚ್ ಆಮಿ ತುಕಾ ಧಾಡಿಜಾಯ್ ನಾ ತರ್ ತುವೆಂ ಜೀವ್ಘಾತ್ ಕರ್‌ನ್ ಘೆಜಾಯ್."

ತಾಚ್ಯಾ ಉಲವ್ಣ್ಯಾಚಾ ಧಾರಿನ್ ಮ್ಹಜ್ಯಾ ಕಾಳ್ಜಾಂತ್ ತೊಪ್‌ಲ್ಲೆಬರಿ ಜಾಲೆಂ. ಪಯ್ಶೆ ಮ್ಹಾಕಾ ಜಾಯ್ ಆಸ್ಲೆ... ಪುಣ್ ಮೊರ್‌ಣಾಚೆಂ ಚಿಂತುಂಕ್ ನಾಕಾ ಆಸ್ಲೆಂ. ಮರ್‌ಯಾದಿನ್ ಆಟ್ ವೊರಾಂ ಆಫಿಸಾಂತ್ ಘೊಳ್ಚ್ಯಾ ಗ್ರಾಜುವೆಟಾಂಕ್ ಹಾಂವೆಂ ಪಳೆಲಾಂ. ಬಾಯ್ಲ್-ಭುರ್‌ಗ್ಯಾಂಕ್ ಘೆವ್ನ್ ತೆ ಹೊಟ್ಲಾಕ್ ಆಯಿಲ್ಲ್ಯಾ ತವಳ್ ಭುರ್‌ಗ್ಯಾಂನಿ ಮಾಗ್ಚಿಂ ಖಾಣಾಂ ದಿವಯ್ತಾನಾ ತಾಂಚಾ ತೊಂಡಾರ್ ಮಿರಿಯೊ ಪಡ್ತಾಲ್ಯೊ. ಫುಡಾರಾಚಾ ಖರ್‌ಚಾಚೆಂ ಲೆಕ್‌ಚ್ ತಾಂಚೆಂ ಜಿವಿತ್ ಸಗ್ಳೆಂ ಗಿಳ್ತಾಲೆಂ. ಮ್ಹಾಕಾ ಅಸಲೆಂ ಜಿವಿತ್ ನಾಕಾ ಆಸ್‌ಲ್ಲೆಂ. ಫಾಸ್ಟ್ ಮನಿ... ಬಿಂದಾಸ್ ಲೈಫ್ ಹೆಂಚ್ ಹಾಂವ್ ಆಶೆತಾಲೊಂ.... ಮೆನೆಜರಾಕ್ ಹಾಂವೆಂ ಸಮ್ಮತಿ ದಿಲಿ. ಸಬಾರ್ ಸವಾಲಾಂ ತಾಣೆಂ ಕೆಲಿಂ. ತರೀ ಹಾಂವೆ ಸಮಾದಾನೆಚ್ಯೊ ಜಾಪಿ ದಿಲ್ಯೊ. ಆಕ್ರೇಕ್ ಮ್ಹಣಾಲೊ ತೊ

"ಉಡಾಸ್ ದವರ್. ತುಜ್ಯಾ ಡಿಗ್ರೆ ಖಾತಿರ್ ತುಕಾ ಹೆಂ ಕಾಮ್ ಫಾವೊ ಜಾಂವ್ಕ್ ನಾ. ಬೊಸಾಕ್ ತುಜಿ ಪರ್ಸನಾಲಿಟಿ ಪಸಂದ್ ಜಾಲ್ಯಾ. ತ್ಯಾ ಶಿವಾಯ್ ತುಂ ತುಳು, ಕನ್ನಡ, ಇಂಗ್ಲಿಶ್, ಹಿಂದಿ, ಮರಾಠಿ ವಾಚುಂಕ್ ಬರಂವ್ಕ್ ಜಾಣಾಂಯ್ ದೆಕುನ್ ಹಜಾರಾಂ ಲೆಕಾನ್ ಜೊಡ್ಯೆತ್ ತಸಲೆಂ ಕಾಮ್ ಹಾಂವೆಂ ತುಕಾ ದಿವ್ಯೆತ್. ತುವೆಂ ಬೊಸಾಚ್ಯಾ ವಾರ್ಸೊವಾಚ್ಯಾ ಬೊಂಗ್ಲ್ಯಾಂತ್ ರಾವಾಜಾಯ್ ಪಡ್ತೆಲೆಂ. ತ್ಯಾ ಬೊಂಗ್ಲ್ಯಾಕ್ ತುಂ ಗೆಲ್ಯಾ ನಂತರ್ ಥಂಯ್ ಆಯ್ಕಾಲ್ಲೆಂ-ಪಳಯ್ಲೆಂ... ತುಜ್ಯಾ ಕೂಡಿಂತ್ ಜೀವ್ ಆಸ್ತಾ ಪರ್‌ಯಾಂತ್ ದುಸ್ರ್ಯಾಂಕ್ ಸಾಂಗೊಂಕ್ ನ್ಹಜೊ. ಎಕಾದಾವೆಳಾ ಕಾನೂನಾಚಾ ಹಾತಿಂ ಶಿರ್‌ಕಾಲೊಯ್ ತರೀ ಮೆಲ್ಯಾರೀ ವ್ಹಡ್ ನಾ-ತುಜ್ಯಾ ತೊಂಡಾಂತೂನ್ ಕಸಲೆಂಯ್ ಭಾಯ್ರ್ ಯೆಂವ್ಕ್ ನ್ಹಜೊ. ಜರ್ ಹಾಂತುಂ ಕಿತೆಂಯ್ ಉಳ್ಟೆಂ ಘಡ್ಲೆಂ... ಭಿಂಯಾನ್ ತುವೆಂ ಕಿತೆಂಯ್ ಸಾಂಗೊಂಕ್ ಚಿಂತ್ಲೆಂಯ್..... ತುವೆಂ ತೆಂ ಸಾಂಗ್ಚೆ ಆದಿಂಚ್ ಮೊರ್‌ಣ್ ತುಜೆ ಮುಕಾರ್ ಯೆತೆಲೆಂ... ಹಾಕಾ ತುಂ ತಯಾರ್ ಆಸಾಯ್ ತರ್..... ಹಾಂವ್ ತುಕಾ ಕಾಮಾಕ್ ಘೆತಾಂ..."

ಇತ್ಲ್ಯಾ ಸುಡಾಳಾಯೆನ್ ತರೀ ಗಂಬೀರಾಯೆನ್ ಉಲವ್ನ್ ಮೆನೆಜರ್ ಮ್ಹಜ್ಯಾ ತೊಂಡಾಕ್ ತ್ಯಾಚ್ ತೀಕ್ಷ್ಣ್ಂ ನದ್ರೆನ್ ಪಳೆತ್ತ್ ಬಸ್ಲೊ. ಕೂಡಿ ಭಿತರ್ ಮ್ಹಜ್ಯಾ ಕಿತೆಂಗೀ ಚಲ್ತಾಲೆಂ. ಸಿನೆಮಾಂನಿ ಗುಂಡಾಂಚಾ ಹಾತಿಂ ಕಶ್ಟೊಂಚಿಂ ವ ಪೊಲಿಸಾಂಚೆ ಹಾತಿಂ ದಗ್ದೊಣಿ ಭಗ್ಚಿಂ ಥೊಡಿಂ ದ್ರಶ್ಯಾಂ ಮ್ಹಜ್ಯಾ ದೊಳ್ಯಾಂ ಮುಕಾರ್ ಘುಂವ್ಲಿಂ. ನಿಯಂತ್ರಿತ್ ಹವ್ಯಾಚಾ ತ್ಯಾ ಕುಡಾಂತೀ ಹಾಂವ್ ಪೂರ್‌ಣ್ ಘಾಮೆಲ್ಲೊಂ. ಪುಣ್ ತೊಂಡಾರ್ ಹಾಂವೆಂ ಕಿತೆಂಚ್ ದಾಕಯ್ಲೆಂನಾ. ಈಚಿsಣ moಟಿeಥಿ.... ಖiಛಿh ಟiಜಿe.... ಹಾಂವೆಂ ತಾಚ್ಯಾ ಸರ್ವ್ ಶರ್‌ತಾಂಕ್ ಸಯ್ ಘಾಲಿ. ಮ್ಹಜೆಂ ನವೆಂ ಜಿವಿತ್ ಸುರು ಜಾಲೆಂ ವಾರ್ಸೊವಾಚಾ ಬೊಂಗ್ಲ್ಯಾಂತ್ ಹಾಂವ್ ಲಕ್ಕಶೆಟ್ಟಿಚಾ ಅದೀನ್ ಜಾಲ್ಯಾ ಉಪ್ರಾಂತ್ ಮ್ಹಜಿ ಜಿಣಿ ಬದಲ್ಲಿ. ಲಕ್ಕಶೆಟ್ಟಿಕ್ ಬೊಂಬೈಂತ್ ತೀನ್ ಬಂಗ್ಲೆ ಆಸ್ಲೆ. ಪಾಲಿಹಿಲ್ಲ್ಯಾಂತ್ಲ್ಯಾ ರಾಯಾಳ್ ಬಂಗ್ಲ್ಯಾಂತ್ ತೊ ಆಪ್ಲ್ಯಾ ಕುಟ್ಮಾಸಂಗಿಂ ರಾವ್ತಾಲೊ. ಹಾಂಗಾಸರ್ ಆಪ್ಲ್ಯಾ ವ್ಯವಹಾರಾ ಬಾಬ್ತಿಂ ತೊ ಕೊಣಾಯ್ಕೀ ಭೆಟ್ ದೀನಾತ್ಲೊ.

ಕೊಲಾಬಾಂತ್ ಆಸ್‌ಲ್ಲ್ಯಾ ತಾಚ್ಯಾ ದುಸ್ರ್ಯಾ ಬಂಗ್ಲ್ಯಾಂತ್ ಸ್ಮಗ್ಲಿಂಗಾಚಿಂ ಆನಿ ಹೆರ್ ಕಾಮಾಂ ಉಗ್ತ್ಯಾನ್ ಚಲ್ತಾಲಿಂ. ವಾರ್ಸೊವಾಂತ್ಲ್ಯಾ ತಿಸ್ರ್ಯಾ ಬಂಗ್ಲ್ಯಾಂತ್ ಶೆಟ್ಟಿಚ್ಯಾ ಪರ್ವಣ್ಗೆ ಶಿವಾಯ್ ಕೊಣಾಯ್ಕೀ ಪ್ರವೇಶ್ ನಾತ್ಲೊ. ಹಾಂಗಾಸರ್ ತಾಚಿಂ ಗುಪ್ತಿಂ ಕಾಮಾಂ ಚಲ್ತಾತ್ ಮ್ಹಣ್ ಹಾಂವೆಂ ಆಯ್ಕಾಲ್ಲೆಂ. ಬೊಂಬೈಂತ್ಲಿಂ ಶೆಟ್ಟಿಚಿಂ ಹೊಟೆಲಾಂ ತಿಂ ನಾಂವಾ ತೆಕಿದ್ ಮಾತ್ರ್... ಆಪ್ಲೊ ಕಾಳೊ ದುಡು ಧೊವೊ ಕರ್ಚೆ ಖಾತಿರ್!! ಪುಣ್ ತಾಚೊ ಪ್ರಮುಕ್ ವ್ಯವಹಾರ್ ದುಸ್ರೊಚ್ ಆಸ್ಲೊ. ತೊ ಕಸಲೊ ಆನಿ ಕಿತೆಂ ಮ್ಹಣ್ ಚಡ್ತಾವ್ ಕೊಣಾಯ್ಕೀ ಕಳಿತ್ ನಾತ್ಲೆಂ.

ವಾರ್ಸೊವಾಚೊ ಬೊಂಗ್ಲೊ ದೋನ್ ಮಾಳಿಯಾಂಚೊ, ಸಕಯ್ಲ್ ಆಸ್‌ಲ್ಲ್ಯಾಕ್ ವಯ್ಲ್ಯಾ ಮಾಳ್ಯೆರ್ ಕಿತೆಂ ಚಲ್ತಾ ತೆಂ ಕಳಿತ್ ಜಾಯ್ನಾತ್ಲೆಂ. ಶೆಟ್ಟಿಚಾ ಲಾಗ್ಶಿಲ್ಯಾ ಮನ್ಶಾಂನಿ ಮಾತ್ರ್ ಥಳಾಚಾ ಕುಡಾಂಕ್ ಯೆವ್ಯೆತ್-ವಚ್ಯೆತ್ ಶಿವಾಯ್ ವಯ್ಲ್ಯಾ ಮಾಳಿಯಾಂಚ್ಯಾ ಖಂಚಾಯಿ ಖಾಸ್ಗಿ ಕುಡಾಂಕ್ ವಚೊಂಕ್ ಶೆಟ್ಟಿಚ್ಯಾ ಹುಕ್ಮೆ ಶಿವಾಯ್ ಕೊಣಾಯ್ಕಿ ಪರ್ವಣ್ಗಿ ನಾತ್ಲಿ. ತೊ ಬೊಂಗ್ಲೊ ಎಕಾ ವಿಸ್ತಾರ್ ಕಂಪೌಂಡಾ ಭಿತರ್ ಆಸ್‌ಲ್ಲೊ. ಚಾರಾಂಯಿ ಕುಶಿನ್ ಉಬಾರ್ ದೊರೊ. ರೂಕ್ ಝಡಾಂ ದಾಟಾಯೆನ್ ವಾಡ್‌ಲ್ಲಿಂ ಆನಿ ತಾಂಚಾ ಮದೆಂ ಆಸ್‌ಲ್ಲೊ ಹೊ ಬೊಂಗ್ಲೊ ಭಾಯ್ಲ್ಯಾ ಲೊಕಾಕ್ ಪಾರ್‌ಕೊ ಪಾರ್‌ಕೊ ದಿಸ್ತಾಲೊ. ಚೊವೀಸ್ ವೊರಾಂಯಿ ಮುಕ್ಲ್ಯಾ ಗೇಟಿರ್ ಪಾರೊತ್ ಚಲ್ತಾಲೊ. ಬಂಗ್ಲ್ಯಾಚ್ಯಾ ಚಾರಾಂಯಿ ಕೊನ್ಶಾಂನಿ ಚಾರ್ ಆಲ್ಶೇಸಿಯನ್ ಪೆಟೆ ದೀಸ್ ರಾತ್ ಭೊಂವೊನ್ ಆಸ್ತಾಲೆ! ಸುರ್‌ವೆಚೆ ದೋನ್ ಮಯ್‌ನೆ ಅಶೆಚ್ ಬೊಂಗ್ಲ್ಯಾಕ್ ಯೇವ್ನ್ ವಚೊನ್ ಪಾಶಾರ್ ಜಾಲೆ. ಮ್ಹಾಕಾ ನಮಿಯಾರ್‌ಲ್ಲೊ ಸಾಂಬಾಳ್ ಚಲ್ತಾಲೊ. ತೆದೊಳ್ ಪರ್‌ಯಾಂತ್ ಕಸಲೆಂಯಿ ಕಾಮ್ ಮ್ಹಜ್ಯಾ ವಾಂಟ್ಯಾಕ್ ಆಯ್ಲೆಂನಾ ಮಾತ್ರ್ ನ್ಹಂಯ್ ಬಂಗ್ಲ್ಯಾಂತ್ ಕಿತೆಂ ಚಲ್ತಾ ಮ್ಹಳ್ಳೆಂ ಆಯ್ಕೊನ್ ಜಾಂವ್-ಪಳೆವ್ನ್ ಜಾಂವ್ ಮ್ಹಾಕಾ ಕಳ್ಳೆಂನಾ. ಹಾಂವ್ ಸರ್ತೆಕ್ ರಾಕ್ತಾಲೊಂ.

ಆನಿ ಎಕಾ ದಿಸಾ ತಿ ಸರ್ತಿ ಆಯ್ಲಿಚ್! ತ್ಯಾ ಬಂಗ್ಲ್ಯಾಚೊ ಮೆನೆಜರ್ ಮ್ಹಜೆಲಾಗಿಂ ತ್ಯಾ ದೀಸ್ ಘಂಟೊಭರ್ ಉಲಯ್ಲೊ. ತಾಣೆಂ ಮ್ಹಜ್ಯಾ ವಾಂಟ್ಯಾಕ್ ದಿಲ್ಲೆಂ ಕಾಮ್ ಜಾಣಾ ಜಾತಾಚ್ ಹಾಂವ್ ಶಿರಿಂ ಚುಕ್ಲೊಂ. ಅಸಲೊ ಏಕ್ ವ್ಯವಹಾರ್ ಹಾಂವೆ ರಾಂವ್ಚ್ಯಾ ಬಂಗ್ಲ್ಯಾಂತ್ ಚಲ್ತಾ ಮ್ಹಳ್ಳೆಂ ಪಾಟ್ಲ್ಯಾ ದೋನ್ ಮಯ್‌ನ್ಯಾಂನಿ ಹಾಂವೆಂ ಸ್ವಪ್ಣಾಂತೀ ಚಿಂತುಂಕ್ ನಾತ್ಲೆಂ. ಆತಾಂ ತೆಂ ಖರೆಂ ಜಾಲ್ಲೆಂ ಮಾತ್ರ್ ನ್ಹಂಯ್, ಹಾಂವೆಂ ತಾಂತುಂ ಮುಖ್ಯ ಪಾತ್ರ್ ಘೆಂವ್ಕ್ ಆಸ್‌ಲ್ಲೊ. ಹಾಂವ್ ತಾಣೆಂ ದಿಂವ್ಚೊ ಸಾಂಬಾಳ್ ಘೆತಾಂ-ತಾಂಚಾ ಹರ್‌ಯೆಕ್ ಫರ್ವiಣಾಕ್ ’ಹ್~ಜಾಂ-ಹ್~ಜುಂ ಕರಿನಾಸ್ತಾಂಖಾಲ್ ಜಾತಾಂ ಮ್ಹಣ್ ಹಾಂವೆಂ ಪಯ್ಲಿಚ್ ಭಾಸ್ ದಿಲ್ಯಾ. ಆತಾಂ ಪಾಟಿಂ ಸರೊಂಕ್‌ಯಿ ಅವ್ಕಾಸ್ ನಾತ್‌ಲ್ಲ್ಯಾ ಗೊಂದೊಳಾಂತ್ ಹಾಂವ್ ಶಿರ್‌ಕಾಲ್ಲೊಂ. ದಕ್ಶಿಣ್ ಕನ್ನಡ್ ಜಿಲ್ಲ್ಯಾಚ್ಯಾ ಉಪ್ಪಿನಂಗಡಿಂತ್ ಮ್ಹಾಕಾ ಏಕ್ ಸೈರಿಕ್ ಆಸ್‌ಲ್ಲಿ. ತಿ ಸೈರಿಕ್ ಪಕ್ಕಾ ಜಾಲ್ಲಿ. ಹಾಂವೆಂ ಕಮಲಾಕ್ಷ್ ಮ್ಹಳ್ಳ್ಯಾ ನಾಂವಾನ್ ಥಂಯ್ ವಚಾಜಾಯ್ ಆನಿ ತ್ಯಾ ಚೆಡ್ವಾಲಾಗಿಂ ಕಾಜಾರ್ ಜಾವ್ನ್ ದೋನ್ ದಿಸಾಂನಿ ತ್ಯಾ ಮ್ಹಜ್ಯಾ ಹೊಕ್ಲೆಕ್ ಘೆವ್ನ್ ಹ್ಯಾ ಬೊಂಗ್ಲ್ಯಾಕ್ ಪಾಟಿಂ ಯೇಜಾಯ್, ಮ್ಹಜೆಂ ಕಾಮ್ ಇತ್ಲೆಂಚ್! ಮ್ಹಾಕಾ ಸೈರಿಕ್ ಉಲಂವ್ಕ್ ಫೂವಮ್ಮ ಮ್ಹಳ್ಳಿ ಏಕ್ ಸ್ತ್ರೀ ತ್ಯಾ ಗಾಂವಾಕ್ ಪಯ್ಲಿಚ್ ಗೆಲ್ಯಾ.

ಹಾಂವ್ ತಿಚೊ ಪುತ್ನ್ಯೊ ಜಾವ್ನಾಸ್ತಲೊಂ ಆನಿ ತಿ ಮ್ಹಜಿ ಮಾವ್ಶಿ. ಮ್ಹಾಕಾ ಬೊಂಬೈಂತ್ ಜಾಂವ್, ಗಾಂವಾಂತ್ ಜಾಂವ್ ಕೊಣೀ ಸಂಬಂದಿಕಾಂ ನಾಂತ್, ಆಸಾತಿ ಎಕ್ಲಿಚ್ ಮಾವ್ಶಿ. ತಿಚ್ ಮುಕಾರ್ ಪಡೊನ್ ಹೆಂ ಕಾಜಾರ್ ಕರಯ್ತಾ. ಹೊಕ್ಲೆಚ್ಯಾ ಘರ್‌ಚ್ಯಾಂಲಾಗಿಂ ಹಾಂವೆಂ ಕಿತೆಂ ಉಲಯ್ಜಾಯ್... ತಾಂಚಾ ಸವಾಲಾಂಕ್ ಜಾಪಿ ಕಸ್ಯೊ ದೀಜಾಯ್ - ಹೆಂ ಸರ್ವ್ ಮೆನೆಜರಾನ್ ಮ್ಹಾಕಾ ವಿವರ್‌ಸಿಲೆಂ. ಕೊಣಾಯಿ ಕಡೆನ್ ಚಡ್ತಿಕ್ ಉಲಂವ್ಕ್ ನ್ಹಜೊ, ಕಿತೆಂಯಿ ಉಲಂವ್ಚೆಂ ಆಸ್ಲ್ಯಾರ್ ತೆಂ ಪೂವಮ್ಮಂಚ್ ಕರ್‌ತಾ. ಆಪ್ಣಾಕ್ ಬೊಂಬೈ ಎಕಾ ಮಿಲ್ಲಾಚಾ ಆಫಿಸಾಂತ್ ಕ್ಲಾರ್ಕಾಚೆಂ ಕಾಮ್. ಕುರ್‌ಲಾಂತ್ ಏಕ್ ಲ್ಹಾನ್ ಘರ್-ಇತ್ಲೆಂ ಗರ್‌ಜ್ ಪಡ್ಲ್ಯಾರ್ ಮಾತ್ರ್ ಸಾಂಗಾಜಾಯ್.

ಕಸಲ್ಯಾಯಿ ದುಬಾವಾಕ್ ಇಡೆಂ ದೀನಾಶೆಂ ಗಂಬೀರ್ ಆಸಾಜಾಯ್. ಕಾಜಾರ್ ಜಾತಾಚ್ ಹೊಕ್ಲೆಕ್ ಆಪಡ್ಚೆಂ ಸೊಡ್- ಉಲಂವ್ಕ್ ಸಯ್ತ್ ಧೈರ್ ಘೆನಾಯೆ.... ಕಾಜಾರ್ ಜಾಲ್ಲ್ಯಾ ದುಸ್ರ್ಯಾಚ್ ದಿಸಾ ಚೆಡ್ವಾಕ್ ಘೆವ್ನ್ ಹಾಂವೆಂ ಆನಿ ಪೂವಮ್ಮನ್ ಬೊಂಬೈ ವಾರ್ಸೊವಾಚಾ ಬೊಂಗ್ಲ್ಯಾಕ್ ಯೆಂವ್ಚೆಂ! ಉಪ್ರಾಂತ್ ಕಿತೆಂ ಕರಿಜಾಯ್ ಮ್ಹಳ್ಳೆಂ ಪಾಟಿಂ ಪಾವ್ತಾಚ್ ಕಳ್ತೆಲೆಂ. ಹ್ಯಾ ಮ್ಹಜ್ಯಾ ಕಾಮಾಕ್ ಧಾ ಹಜಾರ್ ರುಪಯ್ ಬೋನಸ್ ಜಾವ್ನ್ ಮೆಳ್ತಲೊ! ದೋನ್ ಹಜಾರ್ ಭಾಯ್ರ್ ಸರ್‌ತಾನಾ ಆನಿ ಆಟ್ ಹಜಾರ್ ಪಾಟಿಂ ಪಾವ್ಲ್ಯಾ ನಂತರ್!!

ಹಾಂವೆಂ ದೀರ್ಘ್ ಸ್ವಾಸ್ ಸೆವ್ಲೊ. ಮ್ಹಜ್ಯಾ ಜಿವಾ ಭಿತರ್ ಜಾಂವ್ಚ್ಯಾ ಭಗ್ಣಾಂಚಿಂ ಖುಣಾಂ ಮ್ಹಜ್ಯಾ ತೊಂಡಾರ್ ದಿಸ್ತಿತ್ ಮ್ಹಳ್ಳ್ಯಾ ಭಿಂಯಾನ್ ಹಾಂವೆ ಮೆನೆಜರಾ ಹುಜ್ರಿಂ ಹಾಸ್ಚೆಂ ಪ್ರಯತ್ನ್ ಕೆಲೆಂ. ಪುಣ್ ತೊ ಅಸಲ್ಯಾ ಬಾಂಯ್ತ್‌ಲೆಂ ಪೂರಾ ಉದಾಕ್ ಪಿಯೆಲ್ಲೊ ಮನಿಸ್ ಹಾಸೊನ್ ಮ್ಹಣಾಲೊ

"ತುವೆಂ ಭಿಂಯೆಂವ್ಚಿ ಗರ್‌ಜ್ ನಾ. ಚಡ್-ಉಣೆಂ ಕಾಂಯ್ ಜಾಂವ್ಚೆಂ ನಾ. ಪೂವಮ್ಮ ಹ್ಯಾ ಸಂಗ್ತಿಂನಿ ಬರಿಚ್ ಹೆಳ್ಳ್ಯಾ. ಹಾಚೆ ಆದಿಂ ಆಮ್ಚೆ ಖಾತಿರ್ ಅಸಲಿಂ ಕಾಜಾರಾಂ ತಿಣೆಂ ಡಜನಾ ಗಟ್ಲ್ಯಾನ್ ಕೆಲ್ಯಾಂತ್. ತುಂ ಮಂಗ್ಳುರ್ ಪಾವ್ತಾನಾ ಬಸ್ಸಾಲಾಗಿಂ ತುಕಾ ತಿ ಮುಕಾರ್ ಯೆತೆಲಿ. ತುಜಿ ಫೋಟೊ ತಿಚೆಲಾಗಿಂ ಆಸಾ. ತಿಚಿ ಫೋಟೊ ತುಕಾ ಭಾಯ್ರ್ ಸರ್‌ತಾನಾ ದಿತಾಂ. ಮಂಗ್ಳುರ್ ಥಾವ್ನ್ ಉಪ್ಪಿನಂಗಡಿಕ್ ತುಕಾ ತಿ ವ್ಹರ್‌ತೆಲಿ ಆನಿ ಎಕಾ ವಳ್ಕಿಚ್ಯಾ ಘರಾ ರಾವಯ್ತೆಲಿ... ಭಿಂಯೆನಾಕಾ-ವೆಳಾ-ವೆಳಾ ಜಾಯ್ ಜಾಲ್ಲಿ ಮಾಹೆತ್ ದೀವ್ನ್ ತುಕಾ ಸಾಂಬಾಳ್ತೆಲಿ. ಹಾಂತುಂ ಚಡ್ ಉಣೆಂ ಭಿಲ್ಕುಲ್ ಘಡ್ಚೆಂನಾ. ತುವೆಂ ಚಿಂತ್ಚೆಂ ನಾಕಾ ಆಮಿ ತುಕಾ ಸೊಡ್ನ್ ಘಾಲ್ತೆಲ್ಯಾಂವ್ ಮ್ಹಣ್, ಕಸಲೊಯಿ ವ್ಯವಹಾರ್ ಕೊಡ್ತಿಕ್ ವ ಪೊಲಿಸಾಂ ಪರ್‌ಯಾಂತ್ ಪಾವೊಂಕ್ ಶೆಟ್ಟಿ ಭಿಲ್ಕುಲ್ ಅವ್ಕಾಸ್ ದೀನಾ. ಆತಾಂ ತುವೆಂ ವಚ್ಯೆತ್, ಆನಿ ಫಾಲ್ಯಾಂ ಮಂಗ್ಳುರ್ ಭಾಯ್ರ್ ಸರ್‌ಚಿ ತಯಾರಾಯ್ ಕರ್ಯೆತ್. ಭಾಯ್ರ್ ಸರ್ಚ್ಯಾ ಎಕಾ ವೊರಾಂ ಆದಿಂ ಹಾಂಗಾ ಯೇವ್ನ್ ತುವೆಂ ಜಾಯ್ ಜಾಲ್ಲಿ ಮಾಹೆತ್, ಟಿಕೆಟ್ ಆನಿ ಪಯ್ಶೆ ಘೆವ್ನ್ ವಚ್ಯೆತ್. ಉಡಾಸ್ ದವರ್, ಹಾಂವೆಂ-ತುವೆಂ ಹಾಂಗಾಸರ್ ಉಲಯ್ಲೆಂ ಆಮ್ಚೆ ಮದೆಂಚ್ ಆಸ್ತೆಲೆಂ. ಸ್ವಪ್ಣಾಂತ್ ಪಾಸುನ್ ತೆಂ ಭಾಯ್ರ್ ಪಡ್ಚೆಂನಾ"

ಇತ್ಲೆಂ ಸಾಂಗೊನ್ ತಾಣೆಂ ವಚೊಂಕ್ ಹಿಶಾರೊ ದಿಲೊ.

ಅಶೆಂ ಹಾಂವ್ ದುಸ್ರ್ಯಾ ದಿಸಾಚ್ಯಾ ಬಸ್ಸಾರ್ ಮ್ಹಜ್ಯಾ ಪಯ್ಲ್ಯಾ ಕಾಜಾರಾಕ್ ನೊವ್ರೊ ಜಾವ್ನ್ ಮಂಗ್ಳುರ್ ಭಾಯ್ರ್ ಸರ್‌ಲೊಂ. ಮೆನೆಜರಾನ್ ಹೆಂ ಕಾಮ್ ಮ್ಹಾಕಾ ಒಪ್ಸಿಲ್ಯಾ ಉಪ್ರಾಂತ್ ನಾಂನಾಂತೀ ದುಬಾವಾಚಿಂ-ಕಾವ್ಜೆಣಿಚಿಂ ಚಿಂತ್ನಾಂ ಮ್ಹಾಕಾ ಧೊಸ್ತಾಲಿಂ.

ಆಪುಣ್ ಶಿರ್‌ಕಾನ್ ತರ್ ಮ್ಹಜಿ ಗತ್ ಕಿತೆಂ ಜಾತಾಲಿ ಮ್ಹಳ್ಳೆಂ ಚಿಂತಾನಾ ಮ್ಹಾಕಾ ಭ್ಯೆಂ ದಿಸ್ತಾಲೆಂ. ಅಸಲ್ಯಾ ಎಕಾ ಕಾಮಾಕ್ ಆಪ್ಣೆಂ ದೆಂವಾನಾಯೆ ಆಸ್‌ಲ್ಲೆಂ ಮ್ಹಣ್ ಭಗ್ತಾಲೆಂ. ಪುಣ್ ಕೆದಾಳಾಯ್ ವ್ಹಡ್ ಗೊಂದೊಳಾಂತ್ ಹಾಂವ್ ಶಿರ್‌ಕಾಲಾಂ ಮ್ಹಣ್ ಹಾಂವೆ ಲೆಕ್‌ಲ್ಲೆಂಗೀ ತಿತ್ಲ್ಯಾಚ್ ಸುಲಬಾಯೆನ್ ಹಾಂವ್ ಸುಟೊನ್ ಗೆಲೊಂ. ರಗ್ಳ್ಯಾಂವಿಣೆಂ ಮ್ಹಜೆಂ ಕಾಜಾರ್ ಜಾಲ್ಲೆಂ. ಜಾಯ್ತೆಂ ಚಿಂತುನ್ - ಜಾಯ್ತಿ ತಯಾರಾಯ್ ಹಾಂವೆ ಕೆಲ್ಲಿ ತರೀ ಕಸಲ್ಯಾಚಿಯಿ ಗರ್ಜ್ ಪಡ್ಲಿನಾ. ಸವಾಲಾಂ ವಿಚಾರುಂಕ್ ಮನ್ಶಾಂಚ್ ನಾಸ್ಲಿಂ. ಹಾಂವೆಂ ಕಾಜಾರ್ ಜಾಂವ್ಚ್ಯಾ ಹೊಕ್ಲೆಚೆಂ ಘರ್ ಆನಿ ಘರ್ಚ್ಯಾ ಮನ್ಶಾಂಕ್ ಮ್ಹಜ್ಯಾ ಮತಿಂ ರಾಜ್ ಕರ್‌ನ್ ಆಸ್ಲೆಂ ಭ್ಯೆಂ ಪಯ್ಸ್ ಧಾಂವ್‌ಲ್ಲೆಂ.

ಏಕ್ದಮ್ ಪಾಪಾಚಿಂ ಮನ್ಶಾಂ ತಿಂ! ಪಾಂಚ್ ಚೆಡ್ವಾಂ ಆನಿ ತೇಗ್ ಧಾಕ್ಟೆ ಚೆರ್ಕೆ. ದಿಸಾಕ್ ಎಕಾ ಜೆವ್ಣಾಚಿ ಗತ್‌ಯಿ ಸಾರ್ಕಿ ನಾತ್‌ಲ್ಲಿ. ಪ್ರಾಯೆಕ್ ಪಾವ್‌ಲ್ಲಿಂ ದೊಗಾಂ ಚೆಡ್ವಾಂ ಬಿಡಿಯೊ ಭಾಂದ್ತಾಲಿಂ. ಆನಿ ತ್ಯಾ ಪಯ್ಶಾಂನಿ ಘರ್ ಚಲ್ತಾಲೆಂ.

ಬಾಪುಯ್ ತಾಂಚೊ ಕಸಲೆಂಯಿ ಕಾಮ್ ಕರಿನಾತ್ಲೊ-ವಯ್ಲ್ಯಾನ್ ನಾಕ್‌ಭರ್ ಸೊರೊ ಪಿಯೆತಾಲೊ. ಆವಯ್ ಸದಾಂ ಪಿಡೇಸ್ತ್. ಪೂವಮ್ಮನ್ ಕಾಜಾರಾ ಬಾಬ್ತಿಂ ಪಾಂಯ್ಶಿಂ ರುಪಯ್ ತಾಂಕಾಂ ದಿಲ್ಲೊ. ತಾಂಕಾಂ ಸರ್‌ಗ್ ಮೆಳ್‌ಲ್ಲ್ಯಾ ತಿತ್ಲೊ ಆನಂದ್ ಜಾಲ್ಲೊ. ಘರಾಂತ್ಲ್ಯಾ ಜೊಡ್ಚ್ಯಾ ಎಕಾ ಚೆಡ್ವಾಕ್ ಭಾಯ್ರ್ ಧಾಡಿಜಾಯ್ ಪಡ್ತಾ ಮ್ಹಳ್ಳಿ ಮಾತ್ರ್ ಖಂತ್ ತಾಂಕಾಂ. ವಾಡ್ಲೆಲಿಂ ಚೆಡ್ವಾಂ ಕಾಜಾರ್ ಜಾವ್ನ್ ಭಾಯ್ರ್ ವಚೊಂಕ್ ಎಕಾ ಪಾಂಯಾಂನ್ ಮ್ಹಳ್ಳೆಪರಿಂ ತಯಾರ್ ರಾವ್‌ಲ್ಲಿಂ. ತಾಂತ್ಲ್ಯಾ ವ್ಹಡ್ಲ್ಯಾಲಾಗಿಂ-ಜಮುನಾಲಾಗಿಂ, ಹಿಂದೂ ಶಾಸ್ತ್ರಾ ಪ್ರಕಾರ್ ಕಸಲಿಯಿ ಗದ್ದಳಾಯ್ ನಾಸ್ತಾಂ ಮ್ಹಜೆಂ ಕಾಜಾರ್ ಜಾವ್ನ್ ಗೆಲೆಂ. ಪೂವಮ್ಮಾಚಾ ಬುದ್ವಂತ್ಕಾಯೆಕ್ ಹಾಂವ್ ಮೆಚ್ವಾಲೊಂ.

ಅಸಲ್ಯಾ ಕಾಜಾರಾಕ್ ತಸಲ್ಯಾಚ್ ಚೆಡ್ವಾಂಕ್ ತಿ ಸೊದ್ತಾಲಿ ಮ್ಹಳ್ಳೆಂ ಮ್ಹಾಕಾ ಸುಸ್ತಾಲೆಂ. ಬೊಂಬೈ ವ್ಹರ್‌ನ್ ಕಿತೆಂ ಕೆಲ್ಯಾರೀ ವಿಚಾರ್ ಕರುಂಕ್ ತಾಂಕ್ ನಾ ತಸಲೆಂ ಘರ್ ತೆಂ ಜಾವ್ನಾಸ್‌ಲ್ಲೆಂ. ಬೊಂಬೈ ಮ್ಹಳ್ಳ್ಯಾರ್ ಆಪ್ಲ್ಯಾ ದೀಶ್ಟಿ ಭಾಯ್ರ್... ಥಂಯ್ ಯೆಂವ್ಚೆಂ ಸೊಡ್ಯಾಂ ತ್ಯಾ ವಿಶಿಂ ಚಿಂತ್ಚಿ ಸಕತ್ ಸಯ್ತ್ ತಾಂಕಾಂನಾಸ್ಲಿ. ಅಸಲಿಂ ಮನ್ಶಾಂ ಕಸಲಿಂ ಸವಾಲಾಂ ಮ್ಹಾಕಾ ಕರ್ತಿತ್? ನಿಜಾಯ್ಕಿ ಸಾಂಗ್ಚೆಂ ತರ್ ಪೂವಮ್ಮನ್ ದಿಲ್ಲ್ಯಾ ಪಾಂಯ್ಶಿ ರುಪ್ಯಾಂ ಖಾತಿರ್ ಕಾಜಾರಾ ವಿಣೆಂಚ್ ತಿಂ ಚೆಡ್ವಾಕ್ ಧಾಡುಂಕ್ ತಯಾರ್ ಆಸ್‌ಲ್ಲಿಂಗೀ ಕೊಣ್ ಜಾಣಾಂ? ಅಶೆಂ ಕಸಲ್ಯಾಯಿ ರಗ್ಳ್ಯಾಂವಿಣ್ ಆಮ್ಚಿ ರಾಟಾವಳ್ ಮುಗ್ದಾಲಿ.

ದುಸ್ರ್ಯಾ ದಿಸಾಚ್ ಪೂವಮ್ಮ್, ಹಾಂವ್ ಆನಿ ಮ್ಹಜಿ ನವಿ ಹೊಕಾಲ್ ಬೊಂಬೈಕ್ ಭಾಯ್ರ್ ಸರ್ನ್, ತಿಸ್ರ್ಯಾ ದಿಸಾ ಸಾಂಜೆರ್ ವಾರ್ಸೊವಾಚಾ ಬಂಗ್ಲ್ಯಾಕ್ ಪಾವ್ಲ್ಯಾಂವ್. ಆನಿ ದೋನ್ -ಆಡೇಜ್ ಮಯ್‌ನ್ಯಾಂ ನಂತರ್ ಪಯ್ಲೆಂ ಪಾವ್ಟಿಂ ತ್ಯಾ ಬೊಂಗ್ಲ್ಯಾಚಾ ಪಯ್ಲ್ಯಾ ಮಾಳಿಯೆಕ್ ಚಡ್ಚೆಂ ಭಾಗ್ ಮ್ಹಾಕಾ ಫಾವೊ ಜಾಲೆಂ. ತ್ಯೆ ಮಾಳ್ಯೆರ್ ಮದೆಂ ಸಾಲ್ ಆನಿ ದೊನೀ ಕುಶಿಂನಿ ದೊದೋನ್ ಆನಿ ಚಾರ್ ವಿವಿಂಗಡ್ ಕೂಡಾಂ ಆಸ್ಲಿಂ. ತಾಂತ್ಲ್ಯಾ ಉಜ್ವ್ಯಾ ಕುಶಿಚ್ಯಾ ಎಕಾ ಕುಡಾಕ್ ಮ್ಹಾಕಾ ಧಾಡ್ಲೊ ಆನಿ ಮ್ಹಜ್ಯಾ ಕೂಡಾ ಮುಕಾರ್‌ಚ್ ಆಸ್‌ಲ್ಲ್ಯಾ ದಾವ್ಯಾ ಕುಶಿಚ್ಯಾ ಕುಡಾಕ್ ಪೂವಮ್ಮ ಆನಿ ಜಮುನಾ ಗೆಲಿಂ.

ಭಿತರ್ ರಿಗ್ತಾನಾ ತೆಂ ಕೂಡ್ ಮ್ಹಣೊಂಕ್ ಕಶ್ಟ್ ಜಾಲೆ. ಸಾರ್ಕೆಂ ಸಾಂಗ್ಚೆಂ ತರ್ ತೆಂ ಏಕ್ ಬೊಂಬೈಂತ್ಲ್ಯಾ ಹೆರ್ ಫ್ಲ್ಯಾಟಾಂಬರಿಚ್ ಆಸ್‌ಲ್ಲೆಂ. ಭಿತರ್ ಏಕ್ ಲ್ಹಾನ್ ಸಾಲ್, ಏಕ್ ರಾಂದ್ಪಾ ಕೂಡ್, ಮ್ಹೊರಿ ಆನಿ ಏಕ್ ಡಬ್ಬಲ್ ಕೊಟ್ ಆಸ್‌ಲ್ಲೆಂ ನಿದ್ಚೆಂ ರೂಮ್.

ಬೆಡ್‌ರೂಮ್ ಏಕ್ದಮ್ ವಿಶಾಲ್ ಆಸ್‌ಲ್ಲೆಂ ಪಳೆವ್ನ್ ಮ್ಹಾಕಾ ವಿಚಿತ್ರ್ ದಿಸ್ಲೆಂ. ವೊಣ್ತಿಚ್ಯಾ ಚಾರಾಂಯಿ ಕುಶಿಂನಿ ಮೊಲಾದಿಕ್ ಪಡ್ದೆ ವಯ್ರ್ ಥಾವ್ನ್ ಸಕಯ್ಲ್ ಪರ್ಯಾಂತ್ ಉಮ್ಕಾಳ್ತಾಲೆ. ಮದ್ಗಾತ್ ದಾಟ್ ಗಜ್ಡಿ ತಶೆಂ ರಂಗಾಳ್ ಉಶ್ಯಾಂನಿ ಸಜ್‌ಲ್ಲೆಂ ಖಟ್ಲೆಂ. ಜಾಯ್ ಜಾಲ್ಲ್ಯೊ ರಾಯಾಳ್ ಸವ್ಲತ್ಯೊ ಸರ್ವ್ ತಾಂತುಂ ಆಸ್ಲ್ಯೊ. ಕಿತೆಂಯಿ ಚಿಂತಿನಾಸ್ತಾಂ ಹಾಂವ್ ವಸ್ತುರ್ ಬದ್ಲುನ್ ನ್ಹಾಂವ್ಕ್ ಗೆಲೊಂ. ನ್ಹಾಣ್ ಜಾವ್ನ್ ಕೇಸ್ ಉಗಯ್ತಾನಾ ನಾಂನಾಂತಿಂ ಚಿಂತ್ನಾಂ ಮ್ಹಜೆ ಮತಿಂತ್ ಘುಂವೊಂಕ್ ಲಾಗ್ಲಿಂ. ಹಾಂಗಾಸರ್ ಚಲ್ತಾ ತರೀ ಕಿತೆಂ? ಆನಿ ಮುಕಾರ್ ಆಪ್ಣೆಂ ಕಿತೆಂ ಕರುಂಕ್ ಆಸಾಗಾಯ್? ದುಬಾವಿ ಸವಾಲಾಂಕ್ ಜಾಪಿ ಮಾತ್ರ್ ಝಳ್ಕಾಲ್ಯೊನಾಂತ್. ತಿತ್ಲ್ಯಾರ್ ದಾರಾಚಿ ಕಾಂಪಿಣ್ ವ್ಹಾಜ್ಲಿ. ಹಾಂವೆಂ ದಾರ್ ಉಗಡ್ತಾನಾ ಮೆನೆಜರ್ ಭಿತರ್ ಆಯ್ಲೊ.

ಸುರ್ವೆರ್ ತಾಣೆಂ ಮ್ಹಜ್ಯಾ ಯಶಸ್ವಿ ಕಾಮಾಕ್ ಹೊಗ್ಳಿಕ್ ಉಚಾರ್ಲಿ. ಉಪ್ರಾಂತ್ ಗಂಭೀರಾಯೆನ್ ಮ್ಹಣಾಲೊ- "ಶೆಟ್ಟಿಚ್ಯಾ ದಂದ್ಯಾಂತ್ ಮುಖ್ಯ ಪಾತ್ರ್ ತುವೆಂ ಆಜ್ ಥಾವ್ನ್ ಖೆಳೊಂಕ್ ಆಸಾ. ಆಜ್ ರಾತಿಂ ಭಾರಾ ವೊರಾಂ ತುಜ್ಯಾ ಹೊಕ್ಲೆಕ್ ಘೆವ್ನ್ ಪೂವಮ್ಮ ಹಾಂಗಾಸರ್ ಯೆತೆಲಿ, ಆನಿ ತುಜ್ಯಾ ಹೊಕ್ಲೆಕ್ ತುಜೆ ಅದೀನ್ ದಿತೆಲಿ. ಪೂವಮ್ಮ ಚಲ್ತಚ್ ತುವೆಂ ತುಜ್ಯಾ ಹೊಕ್ಲೆಕ್ ಬೆಡ್ ರೂಮಾಕ್ ವ್ಹರಿಜಾಯ್, ತುಜ್ಯಾ ಹೊಕ್ಲೆ ಸಂಗಿಂ ತುಂ ಆಜ್ ಕಾಜಾರಾಚಾ ಪ್ರಥನ್ ರಾತಿಚೆಂ ಕಾಮ್ ಸುರು ಕರ್ತಲೊಯ್. ತ್ಯಾ ವೆಳಿಂ ಚಿಂತಿನಾತ್ಲ್ಯೆಂಬರಿಂ ತೇಗ್-ಚೊವ್ಗ್ ದಾದ್ಲೆ ತುಜ್ಯಾ ಬೆಡ್‌ರುಮಾಂತ್ ಪ್ರವೇಶ್ ಜಾತೆಲೆ. ಆನಿ ತುಜೆ ಮುಕಾರ್‌ಚ್ ತುಜ್ಯಾ ಹೊಕ್ಲೆಸಂಗಿಂ ತೆ ಬಲಾತ್ಕಾರಾನ್ ಸಂಬೋಗ್ ಚಲಯ್ತೆಲೆ....."

"ಕಿತೆಂ?" ಹಾಂವ್ ಎಕಾಚ್ಛಾಣೆಂ ಆಕಾಂತ್ಲೊಂ. ಅಶೆಂ ಹಾಂವೆಂ ಚಿಂತುಂಕ್‌ಚ್ ನಾತ್ಲೆಂ...

"ಪುಣ್ ಹೆಂ ಸರ್ವ್ ಕಿತ್ಯಾ ಖಾತಿರ್?" ವಿಚಾರ್ಲೆಂ ಹಾಂವೆಂ ರಾಗಾನ್ ಬೋಬ್ ಮಾರುನ್, "ಸಮಾದಾನೆನ್ ಆಯ್ಕ್" ಮೆನೆಜರ್ ಮ್ಹಣಾಲೊ ಮ್ಹಜ್ಯಾ ಭುಜಾಕ್ ಥಾಪ್ಡುನ್,

"ತಶೆಂ ಹಾಂವೆಂ ತುಕಾ ಸಾಂಗೊಂಕ್ ಆಸಾ ಆನಿ ತುವೆಂ ತಶೆಂಚ್ ಕರುಂಕ್ ಆಸಾ. ಹಾಂತು ಕುಸ್ಕುಟಾಚಿ ಬದ್ಲಾವಣ್ ಜಾಂವ್ಚಿನಾ. ತುಜ್ಯಾ ಹೊಕ್ಲೆ ಸಂಗಿಂ ಮೋಗ್ ಕರುಂಕ್ ತುಂ ಸುರು ಕರ್ತಾನಾ ಚೊವ್ಗ್ ದಾದ್ಲೆ ತುಜ್ಯಾ ರೂಮಾಂತ್ ಪ್ರವೇಶ್ ಜಾತಾಲೆ. ಆನಿ ತುವೆಂ ಆಸ್ಚ್ಯಾ ಸ್ಥಿತೆರ್‌ಚ್ ತುಕಾ ಬಾಂದುನ್ ಘಾಲ್ತೆಲೆ. ಉಪ್ರಾಂತ್ ತುಜ್ಯಾ ನವ್ಯಾ ಹೊಕ್ಲೆಚೆರ್ ತೆ ಅತ್ತ್ಯಾಚಾರ್ ಚಲಯ್ತೆಲೆ. ತುಜ್ಯಾ ಬೆಡ್‌ರೂಮಾಂತ್ ಹೆಂ ಸರ್ವ್ ಚಲ್ತಾನಾ ಚಾರ್ ಕೊನ್ಶಾಂನಿ ಆಸ್ಚ್ಯಾ ಪ್ರೊಜೆಕ್ಟರಾಂ ಮುಕಾಂತ್ರ್ ಹಿಂ ಸರ್ವ್ ದ್ರಶ್ಯಾಂ ಚಿತ್ರಿತ್ ಜಾತೆಲಿಂ."

ಹಾಂವ್ ಸಗ್ಳೊಚ್ ಗಳೊನ್ ಗೆಲೊಂ. ಎಕಾ ಥರಾಚೊ ಅವ್ಯಕ್ತ್ ಶಿರ್ಶಿರೊ ಮ್ಹಜ್ಯಾ ಶಿರಾಂನಿ ಧಾಂವ್ಲೊ. ಹಾಂವ್ ಥಂಯ್ಚ್ ಕದೆಲಾರ್ ಕೊಸಾಳ್ಳೊಂ. ಹ್ಯಾ ಬೊಂಗ್ಲ್ಯಾಂತ್ ಚಲ್ಚೊ ಶೆಟ್ಟಿಚೊ ವ್ಯವಹಾರ್ ಆತಾಂ ಉಗ್ಡಾಪೊ ಜಾಲ್ಲೊ... ಬ್ಲೂ ಫಿಲ್ಮ್... ನಿಶೇಧಿತ್ ಪಿಂತುರಾಂ... ಆನಿ ಹಾಂತುಂ ಪಾತ್ರ್ ಘೆಂವ್ಕ್ ಹಾಂವೆಂಯಿ ತಯಾರ್ ಜಾಯ್ಜಯ್ ಆಸ್‌ಲ್ಲೆಂ. ಮೆನೇಜರ್ ಮ್ಹಜೆ ಸರ್ಶಿಂ ಆಯ್ಲೊ...

"ಭಿಂಯೆನಾಕಾ ವ ಘಾಬರ್ನಾಕಾ...." ಮ್ಹಣಾಲೊ ತೊ ಮ್ಹಜ್ಯಾ ಖಾಂದ್ಯಾರ್ ಹಾತ್ ದವರುನ್,

"... ಸುರ್ವೆರ್ ತುಕಾ ಅಶೆಂ ಭಗ್ಚೆಂ ಸಹಜ್. ಪುಣ್ ಉಪ್ರಾಂತ್ ಸರ್ವ್ ಸವಯೆರ್ ಪಡ್ತೆಲೆಂ. ಹ್ಯಾ ದೇಡ್-ದೋನ್ ವೊರಾಂಚಾ ಕಾಮಾಕ್ ತು ಧಾ ಹಜಾರ್ ಮೆಳ್ತಾತ್ ಮ್ಹಳ್ಳೆಂ ಚಿಂತ್. ಚೆಡ್ವಾಕ್ ಪಯ್ಲೆಂಚ್ ಕಿತೆಂಯಿ ತಿಳ್ಸಿನಾಕಾ. ಕಿತೆಂಯಿ ತುಕಾ ಕಳಿತ್ ನಾ ತಶೆಂ ಆಸಾಜಾಯ್, ಆನಿ ಎಕಾಚ್ಛಾಣೆ ಚಿಂತಿನಾಸ್ತಾಂ ಘಡ್ಚೆಂ ಪರಿಂ ಜಾಜಾಯ್.

ಕಿತ್ಲ್ಯಾ ನೈಜತೆನ್ ಹಿಂ ದ್ರಶ್ಯಾಂ ಚಿತ್ರಿತ್ ಜಾತಾತ್ ತಿತ್ಲ್ಯಾಚ್ ವ್ಹಡ್ ಮಾಪಾನ್ ತ್ಯಾ ಫಿಲ್ಮಾಂಕ್ ಮಾರ್ಕೆಟ್ ಆಸ್ತಾ. ದೆಕುನ್ ಸರ್ವ್ ಸಹಜ್‌ಪಣಿಂ ಜಾಯ್ಶೆಂ ತುಜೊ ಪಾತ್ರ್ ಬರ್‍ಯಾನ್ ಖೆಳೊನ್ ತುವೆಂ ಸಹಕಾರ್ ದೀಜಾಯ್..." ಹಾಂವೆಂ ಕಸಲಿಯ್ ಜಾಪ್ ದಿಲಿ ನಾ. ಉಲಂವ್ಕ್ ಮ್ಹಜಿ ಜೀಬ್ ಸುಟಾನಾತ್ಲಿ ವ್ಹಯ್. ಪುಣ್ ಉಲವ್ನ್ ಜಾಂವ್ಚೆಂಯಿ ಕಿತೆಂಯ್ ನಾತ್ಲೆಂ.

"ತುಕಾ ಪಿಯೆಂವ್ಚಿ ಸವಯ್ ನಾ ಮ್ಹಣ್ ಹಾಂವ್ ಜಾಣಾಂ. ತರೀ ಅಜಿಕ್ ಥೊಡ್ಯಾ ಧೈರಾ ಖಾತಿರ್ ಇಲ್ಲಿ ವಿಸ್ಕಿ ಘೆ.... ಕಪಾಟಾಂತ್ ಆಸಾ. ಆನಿ ರಾತಿಂ ಧಾ ವೊರಾರ್ ತಯಾರ್ ರಾವ್....."

ಇತ್ಲೆಂ ಸಾಂಗೊನ್ ಮೆನೇಜರ್ ಮ್ಹಾಕಾ ಸೊಡ್ನ್ ಬಾಗಿಲ್ ವೋಡ್ನ್ ಭಾಯ್ರ್ ಗೆಲೊ. ಸಬಾರ್ ವೇಳ್ ಬಸ್‌ಲ್ಲ್ಯಾಥಂಯ್ಚ್ ಆಸ್‌ಲ್ಲೊಂ ಹಾಂವ್. ಸವ್ಕಾಸ್ ಮ್ಹಜ್ಯಾ ವೊಚಾರ್ ಹಾಂವೆಂ ದೀಶ್ಟ್ ಘಾಲಿ. ವೊರಾಂ ಆಟ್ ಉತರ್‌ಲ್ಲಿಂ ಆನಿ ಥೊಡೊಚ್ ವೇಳ್ ಉರ್ಲಾ. ಕಿತೆಂಗೀ ಮ್ಹಜ್ಯಾ ಜೀವಾಂತ್ ಭಾಸ್ ಜಾತಾಲೆಂ.

ಪುಣ್ ತೆಂ ಕಶೆಂ, ಕಿತೆಂ ಮ್ಹಳ್ಳೆಂ ಸಮ್ಜಾನಾತ್ಲೆಂ. ಹಾಂವೆ ಕಪಾಟ್ ಉಗ್ಡುನ್ ವ್ಹಿಸ್ಕೆಚಿ ಬೋತ್ಲ್ ಭಾಯ್ರ್ ಕಾಡ್ಲಿ. ಎಕಾ ಗ್ಲಾಸಾಂತ್ ಅರ್ಧೊ ಗ್ಲಾಸ್ ಭರ್ ವೊತುನ್ ಎಕಾಚ್ ಘೊಟಾನ್ ಖಾಲಿ ಕೆಲೊ. ತ್ಯಾ ದೀಸ್ ಮ್ಹಜ್ಯಾ ಜೀವಮಾನಾಂತ್ ಪಯ್ಲ್ಯಾ ಪಾವ್ಟಿಂ ಹಾಂವ್ ಅಮಾಲ್ ಪಿಯೆಲೊಂ.

ವೇಳ್ ಉತರ್ತಾಲೊ, ಅಮಾಲ್ ಚಡೊನ್ ಯೆತಾಲೆಂ. ಆತಾಂ ತ್ಯಾ ಅಮಾಲಾಚಾ ಭರಾನ್ - ಕಿತೆಂಯ್ ಜಾಂವ್ದಿ... ಮ್ಹಾಕಾ ಕಿತೆಂ? ಪಯ್ಶೆ ಮೆಳ್ತಾತ್ ನ್ಹಂಯ್‌ವೇ... ಉರ್‌ಲ್ಲ್ಯಾ ವಿಶಿಂ ಹಾಂವೆಂ ಕಿತ್ಯಾ ಚಿಂತ್ಚೆಂ? ಅಶೆಂ ಮ್ಹಾಕಾ ಭಗ್ತಾಲೆಂ. ಪರತ್ ಹಾಂವೆ ವ್ಹಿಸ್ಕಿ ಘೆತ್ಲಿ ಆನಿ ತ್ಯಾಚ್ಚ್ ವೆಳಾರ್ ದಾರಾಚಿ ಕಾಂಪಿಣ್ ವ್ಹಾಜ್ಲಿ.

ಬೋತ್ಲ್ ಕಪಾಟಾಂತ್ ದವರುನ್ ಹಾಂವೆಂ ವೊರಾಂ ಪಳಯ್ಲಿಂ. ಭರ್ತಿಂ ಧಾ!! ಹಾಂವೆಂ ಬಾಗಿಲ್ ಉಗ್ತೆಂ ಕೆಲೆಂ. ಪೂವಮ್ಮ ಆನಿ ಜಮುನಾ ಬಾಗ್ಲಾರ್ ಉಬಿಂ ಆಸ್ಲಿಂ. ಜಮುನಾಕ್ ಪಳೆವ್ನ್ ಹಾಂವ್ ತಟಕ್ಕ್ ಜಾಲೊಂ. ಪಾಟ್ಲ್ಯಾ ದಿಸಾಂನಿ ಹಾಂವೆಂ ತಾಕಾ ಸಾರ್ಕೆಂ ಪಳೆಂವ್ಕ್ ನಾತ್ಲೆಂ.

ಹಳ್ಳೆಚೆಂ ಚೆಡುಂ ತೆಂ... ತಶೆಂಚ್ ನ್ಹೆಸ್ತಾಲೆಂ. ತಾಕಾ ಪಳೆಂವ್ಚಿ ಉರ್ಭಾ ಸಯ್ತ್ ಮ್ಹಾಕಾ ಭಗಾನಾತ್ಲಿ. ಪುಣ್ ಆತಾಂ... ಬೊಂಬೈಚ್ಯಾ ಫೆಶಾನಾಂಚ್ಯಾ ಚೆಡ್ವಾಂಕ್ ಸೊಡ್ನ್ ದೀನಾ ತಶೆಂ ತೆಂ ನ್ಹೆಸುನ್ ಆಸ್ಲೆಂ. ಪ್ಯೂರ್ ಸಿಲ್ಕ್ ನಿಳ್ಶೆಂ ಕಾಪಾಡ್ ಆನಿ ತಸ್ಲೊಚ್ ಬ್ಲೌಜ್ ಶಿವಾಯ್ ಕೆಸಾಂಚಿ ಸ್ಟೈಲ್‌ಯ್ ಬದಲ್ಲೆಲಿ. ಪೂವಮ್ಮಾನ್ ತಾಕಾ ತಯಾರ್ ಕರುಂಕ್ ಜಾಯ್ತೆ ಕಶ್ಟ್ ಕಾಡ್ಲ್ಯಾತ್ ತೆಂ ಜಮುನಾಕ್ ಪಳಯ್ತಾನಾ ಕಳ್ತಾಲೆಂ. ತೊಂಡಾಕ್ ಕ್ರೀಮ್... ಪೊಲ್ಯಾಂಕ್ ತಾಂಬ್ಡೊ ರಂಗ್... ನಿಜಾಯ್ಕಿ ಜಮುನಾಕ್ ಪಳೆವ್ನ್ ಹಾಂವ್ ಆಜಾಪ್ಲೊಂ. ಗಾಂವಾಥಾವ್ನ್ ಆಯಿಲ್ಲ್ಯಾಕ್ ಆನಿ ಆತಾಂ ಪಳೆಲ್ಲ್ಯಾಕ್ ರಾತ್ ದೀಸ್ ಮ್ಹಳ್ಳ್ಯಾಪರಿಂ ಫರಕ್ ದಿಸ್ತಾಲೊ. ಜಮುನಾ ಮಾತ್ರ್ ಭಿತರ್ ಆಯ್ಲೆಂ. ಪೂವಮ್ಮ ಭಾಯ್ರ್‌ಚ್ ರಾವ್‌ಲ್ಲಿ. ಏಕ್ ಘಡಿ ಮ್ಹಾಕಾ ಪಳೆತ್ತ್ ರಾವ್ಲಿ. ಉಪ್ರಾಂತ್-

"ಬಾಗಿಲ್ ಧಾಂಪಿನಾಕಾ... ತಾಕಾ ಘೆವ್ನ್ ಬೆಡ್‌ರೂಮಾಕ್ ವಚ್" ಅಶೆಂ ಗಂಭೀರಾಯೆನ್ ಸಾಂಗೊನ್ ತಿ ಚಲ್ಲಿ. ಮ್ಹಜೊ ವೇಳ್ ಆಯಿಲ್ಲೊ. ಚಡ್ತಿಕ್ ಚಿಂತುಂಕ್ ಅವ್ಕಾಸ್ ನಾತ್ಲೊ. ಮುಕಾರ್ ಘಡ್ಚ್ಯಾ ಸರ್ವ್ ಘಟಾನಾಂಕ್ ಹಾಂವ್ ಬಲಾತ್ಕಾರಾನ್ ಮ್ಹಳ್ಳೆಪರಿಂ ತಯಾರ್ ಜಾಲೊಂ. ಆನಿ ಜಮುನಾಕ್ ಘೆವ್ನ್ ಹಾಂವೆಂ ಬೆಡ್‌ರೂಮಾಚೆಂ ದಾರ್ ಉಗಡ್ಲೆಂ. ಆಮಿ ಭಿತರ್ ಪಾವ್ಲ್ಯಾಬರಿಚ್ ರೂಮಾಂತ್ ಎಕಾಚ್ಛಾಣೆಂ ಉಜ್ವಾಡ್ ಫಾಂಕ್ಲೊಂ. ವಿಶೇಸ್ ಥರಾಚೊ ಉಜ್ವಾಡ್ ತೊ. ಬೆಡ್‌ರೂಮಾಚಾ ಚಾರಾಂಯಿ ಕುಶಿಂಚೆಂ ಪಡ್ದೆ ಕೊನ್ಶಾಕ್ ವೊಂದಾಲೆ. ಆತಾಂ ಮ್ಹಾಕಾ ಸರ್ವ್ ಕಳಿತ್ ಜಾವ್ನ್ ಯೆತಾಲೆಂ.

ಡಬಲ್‌ಕೊಟಾಚಾ ಮುಕ್ಲ್ಯಾ ದೊನೀ ಕುಶಿಂನಿ ವೊಣದ್ ಆಸ್‌ಲ್ಲಿ ತಿ ಅರ್ಶ್ಯಾಂಚಿ ಜಾವ್ನಾಸ್‌ಲ್ಲಿ. ಸಗ್ಳೊ ಪ್ರಕಾಸ್ ಆಮ್ಚ್ಯಾ ಕೂಡಾಂತ್ ಮಾತ್ರ್ ಆಸ್‌ಲ್ಲೊ. ಅರ್ಸ್ಯಾಚಾ ಭಾಯ್ಲ್ಯಾ ಕುಶಿನ್ ದಾಟ್ ಕಾಳೊಕ್ ಆಸ್ಲೊ. ಥಂಯ್ಸರ್ ಕೊಣೀ ಆಸಾ ಆನಿ ಆಮ್ಕಾಂ ಪಳೆತ್ತ್ ಆಸಾ ಮ್ಹಳ್ಳೆಂ ಮ್ಹಾಕಾ ಸುಸ್ತಾಲೆಂ. ಮ್ಹಜ್ಯಾ ಜಿವಾ ಭಿತರ್ ಕಿತೆಂ ಘಡ್ತಾ ತೆಂ ಧಾಂಬುನ್ ಧರುಂಕ್ ಮ್ಹಾಕಾ ತಾಂಕಾನಾತ್ಲೆಂ.

ತರೀ ಹಾಂವೆ ಆತಾಂ ಮ್ಹಜ್ಯಾ ವಾಂಟ್ಯಾಚಾ ಪಾತ್ರಾಕ್ ತಯಾರ್ ಜಾಂವ್ಕ್ ಆಸ್ಲೆಂ! ಜಮುನಾಕ್ ಹಾಂವೆಂ ಖಟ್ಲ್ಯಾರ್ ಬಸಯ್ಲೆಂ. ತಾಚ್ಯಾ ಭುಜಾಂಚೆರ್ ಹಾಂವೆಂ ವಳೂ ಹಾತ್ ಘಾಲೊ. ಮ್ಹಜ್ಯಾ ಸ್ಪರ್ಶಾಕ್ ತೆಂ ಬಾರೀಕ್ ಕಾಂಪ್ಲೆಂ. ಭಿರ್ಮತ್ ಚೆಡುಂ....

ಮುಕಾರ್ ಕಿತೆಂ ಸರ್ವ್ ಘಡೊಂಕ್ ಆಸಾ ತಾಕಾ ಕಳಿತ್ ನಾ! ತಾಚ್ಯಾ ತೊಂಡಾರ್ ಹಾಂವೆ ದೀಶ್ಟ್ ಘಾಲಿ- ನಿಜಾಯ್ಕಿ ನಿಸ್ಕಳ್ ಆನಿ ಮುಗ್ದ್ ಮುಕಾಮಳ್. ಆತಾಂ ಜಮುನಾ ಖಂಡಿತ್ ಜಾವ್ನ್ ಸೊಬ್ತಾಲೆಂ. ಕ್ಷಣಾನ್ ಹಾಂವೆಂ ತಾಕಾ ಗೊಪಾಂತ್ ಆರಾಯ್ಲೆಂ ಆನಿ ಹಾಂವ್ ಮುಕ್ಲ್ಯಾ ಕಾಮಾಕ್ ಆಯ್ತೊ ಜಾಲೊಂ. ಉಪ್ರಾಂತ್ಲೆಂ ವಿವರುಂಕ್ ಮ್ಹಾಕಾ ಬರೆಂ ಲಾಗಾನಾ. ಪುಣ್ ಸಗ್ಳೆಂ ಮೆನೇಜರಾನ್ ಸಾಂಗ್ಲೆಲ್ಯೆಪರಿಂ ಘಡುನ್ ಆಯ್ಲೆಂ. ಥೊಡ್ಯಾ ವೆಳಾನ್ ತೋಂಡ್ ವಸ್ತ್ರಾಂನಿ ಲಿಪಯಿಲ್ಲೆ ಚೋವ್ಗ್ ದಢಂಗ್ ದಾದ್ಲೆ ತ್ಯಾ ಕುಡಾಕ್ ಪ್ರವೇಶ್ ಜಾಲೆ. ಭಿತರ್ ಆಯಿಲ್ಲೆಚ್ ತಾಣಿಂ ಬಾಗ್ಲಾಕ್ ಖಿಳ್ ಘಾಲಿ. ಮ್ಹಜ್ಯಾ ವೆಂಗೆಂತ್ ಆಸ್ಲ್ಯಾ ಜಮುನಾಕ್ ಕಿತೆಂಯಿ ಚಿಂತ್ಚೆಂ ಆದಿಂಚ್ ಎಕ್ಲ್ಯಾನ್ ತಾಕಾ ಖಟ್ಲ್ಯಾಕ್ ದಾಂಬುನ್ ಧರ್‌ಲೆಂ. ದೊಗಾಂನಿ ಮ್ಹಾಕಾ ಖಟ್ಲ್ಯಾ ಥಾವ್ನ್ ವೋಡ್ನ್ ಘಾಲೊ..... ಆಮ್ಚೆ ಮದೆಂ ಉರ್ಡೊಣಿ ಜಾಲಿ.

ಪುಣ್ ತೆಗಾಂನಿ ಸಾಂಗಾತಾ ಮೆಳೊನ್ ಮ್ಹಾಕಾ ಸುಲಬಾಯೆನ್ ಪರ್‌ತಿಲೊ. ಮ್ಹಜೆ ಹಾತ್-ಪಾಂಯ್ ದೊರಿಯೆನ್ ಬಾಂದ್ಲೆ. ಮ್ಹಾಕಾ ಉಬೊ ಕರ್‌ನ್, ಹಾತಾಕ್ ಬಾಂದ್ಲೆಲ್ಯಾ ದೊರಿಯೆಚೆಂ ಪೋಂತ್, ಬಾಗ್ಲಾಚಾ ಹೆಂಗರ್ ಉಮ್ಕಾಳಾಂವ್ಚ್ಯಾ ಕೊಕ್ಕ್ಯಾಕ್ ತಾಣಿಂ ಬಿಗ್ದಿಲೆಂ. ಆತಾಂ ಹಾಂವ್ ವಿಣ್ಗ್ಯಾ ಸ್ಥಿತೆರ್ ಕೊಕ್ಕ್ಯಾಕ್ ಉಮ್ಕಾಳೊನ್ ಆಸ್ಲೊ!! ಜಮುನಾಚ್ಯೊ ಬೋಬೊ ಆನಿ ಅಕ್ರಂದನ್ ಸಾಂಗ್ಚೆಂ ನ್ಹಂಯ್..... ಘಡ್ಯೆ ಭಿತರ್ ತಾಚಾ ಆಂಗಾ ವಯ್ಲಿಂ ವಸ್ತುರಾಂ ಪಿಂಜುನ್ ತೀರ್ ಜಾಲಿಂ.

ಅಶೆಂಚ್ ಜಾಯ್ಜಾಯ್ ಮ್ಹಣ್ ಪಾಟ್ಲ್ಯಾನ್ ನಿರ್‌ದೇಶನ್ ದಿಲ್ಲ್ಯಾಪರಿಂ ತೆಂ ಘಟನ್ ಮ್ಹಜೆ ಸಮೊರ್ ಘಡ್ತಾಲೆಂ.... ಹಾಂವೆಂ ಎದೊಳ್ ಪಳೆಂವ್ಕ್ ನಾ ತಸಲೆಂ, ಚಿಂತುಂಕ್ನಾ ತಸಲೆಂ -ಸಂಸಾರಾಂತ್ಲೆಂ ನಿಮಾಣೆಂ ದ್ರಶ್ಯ್ ಥಂಯ್ಸ್‌ರ್ ರೂಪ್ ರೂಪ್ ಚಲ್ತಾಲೆಂ. ಚೊವ್ಗ್ ದಾದ್ಲ್ಯಾಂನಿಯಿ ತ್ಯಾ ನೆಣ್ತ್ಯಾ ಕೂಡಿ ವಯ್ರ್ ನಮುನ್ಯಾವಾರ್ ರೀತಿಂನಿ ಅತ್ಯಾಚಾರ್ ಚಲಯ್ಲೊ. ಜಮುನಾ ಕಿಂಕ್ರಾಟ್ ಮಾರ್‌ನ್ ರಡ್ತಾಲೆಂ, ಖಟ್ಲ್ಯಾರ್ ರಗ್ತಾಚಿಂ ಖತಾಂ ದಿಸೊಂಕ್ ಲಾಗ್ಲಿಂ.

ಥೊಡ್ಯಾ ವೆಳಾನ್ ಜಮುನಾ ಮತಿಹೀನ್ ಜಾಲ್ಲೆಪರಿಂ ದಿಸ್ಲೆಂ. ತಾಚಿ ಬೊಬಾಟ್ ರಾವ್ಲಿ. ಪುಣ್ ಮತಿರ್ ನಾತ್‌ಲ್ಲ್ಯಾ ಕುಡಿ ವಯ್ರ್‌ಯಿ ಅಕ್ರಮಣ್ ಮುಂದರುನ್ ಗೆಲೆಂ. ಲಾಂಬಾಯೆಚ್ಯಾ ಉದ್ವೇಗಾ ನಂತರ್ ಸರ್ವ್ ಅಕೇರ್ ಜಾಲೆಂ. ಪಡ್ದೆ ಪಡ್ಲೆ ಆನಿ ಉಜ್ವಾಡ್ ಪಾಲ್ವಾಲೊ.

ತ್ಯಾ ಉಪ್ರಾಂತ್ ಹಾಂವೆಂ ತ್ಯಾ ಚೆಡ್ವಾಕ್ ಪಳೆಂವ್ಕ್ ನಾ. ಮುಕ್ಲ್ಯಾ ಥೊಡ್ಯಾ ದಿಸಾಂ ವರೇಗ್ ತೆಂ ಭಿರಾಂಕುಳ್ ಆನಿ ಮಾರೆಕಾರ್ ದ್ರಶ್ಯ್ ಮ್ಹಜ್ಯಾ ದೊಳ್ಯಾಂ ಮುಕಾರ್ ಯೆತಾಲೆಂ. ತವಳ್ ಹಾಂವ್ ಜಾತಾತಿತ್ಲೆಂ ಅಮಾಲ್ ಸೆವ್ತಾಲೊಂ ಆನಿ ತೆಂ ಘಡಿತ್ ವಿಸ್ರೊಂಕ್ ಪ್ರಯತ್ನ್ ಕರ್‌ತಾಲೊಂ.

ದೀಸ್ ಪಾಶಾರ್ ಜಾಲ್ಲೆಪರಿಂಚ್ ಹೆಂ ಸರ್ವ್ ಸವಯೆರ್ ಪಡ್ಲೆಂ. ದೋನ್ ವರ್ಸಾಂ ಭಿತರ್ ಪಾಂಚ್ ಹಳ್ಳ್ಯಾಂನಿ ಜಮುನಾ ತಸಲ್ಯಾಚ್ ಪಾಂಚ್ ಚಲಿಯಾಂಲಾಗಿಂ ಹಾಂವ್ ಕಾಜಾರ್ ಜಾಲೊಂ. ಎಕಾ ವರ್‌ನಿಂ ಏಕ್ ವಿಭಿನ್ನ್ ಆನಿ ವಿವಿಂಗಡ್ ಥರಾಂಚಾ ಅತ್ತ್ಯಾಚಾರಾಂಕ್ ಹಿಂ ಚೆಡ್ವಾಂ ಬಲಿ ಜಾಲಿಂ. ಥರಾವಳ್ ರೀತಿಚಿಂ ’ಬ್ಲೂ ಫಿಲ್ಮಾಂ’ ಹ್ಯಾ ಕ್ರತ್ಯಾಂ ವಯ್ರ್ ಚಿತ್ರಿತ್ ಜಾಲಿಂ.

ಅಸಲ್ಯಾ ಪಿಂತುರಾಂನಿ ಶೆಟ್ಟಿನ್ ಕೊರೊಡಾಂನಿ ಪಯ್ಶೆ ಕಮಯ್ಲೆ. ಚಡ್ ಜಾವ್ನ್ ತಾಣೆಂ ತಯಾರ್‌ಸಿಲ್ಲಿ ಹಿಂ ಬ್ಲೂ ಫಿಲ್ಮಾಂ ಭಾರತಾ ಭಾಯ್ರ್ ಚೊರ್‌ಯಾಂ ವಿಕುನ್ ವೆತಾಲಿಂ. ನೈಜತಾ ಆನಿ ಸ್ವಾಭಾವಿಕತಾ ತ್ಯಾ ಫಿಲ್ಮಾಂನಿ ಹಾಡ್ಚಾಕ್ ಕಾಂಯ್ಚ್ ನೆಣಾ’ಸ್ಲ್ಯಾ ಹಳ್ಳೆಚಾ ಮುಗ್ದ್ ತಶೆಂ ನಿಸ್ಕಳ್ ಚೆಡ್ವಾಂಕ್ ತೊ ಬಲಿ ಘೆತಾಲೊ. ಮ್ಹಾಕಾಯಿ ದರಬಸ್ತ್ ಪಯ್ಶೆ ಮೆಳ್ತಾಲೆ. ಪುಣ್ ತೆ ಮ್ಹಜೆಲಾಗಿಂ ಉರ್‌ಲೆನಾಂತ್. ಮತಿಚ್ಯಾ ಸಮಾದಾನಾ ಖಾತಿರ್ ನಾನಾಂತ್ಯಾ ವಾಯ್ಟ್ ಸವಯಾಂಕ್ ಹಾಂವ್ ವಳಗ್ ಜಾಲೊಂ. ಚಡ್ ಜಾವ್ನ್ ಬೊಂಬೈಂತ್ಲ್ಯಾ ವೇಶ್ಯಾ ಗ್ರಹಾಂನಿ ಮ್ಹಜೊ ದುಡು ಉದ್ಕಾಬರಿ ಖರ್‌ಚುನ್ ವೆತಾಲೊ. ಹಾಂವ್ ಆತಾಂ ಸುಟೊಂಕ್ ಜಾಯ್ನಾತ್ಲ್ಯಾ ಬಾಂದ್ಪಾಸಾಂತ್ ಮ್ಹಾಕಾಚ್ ಚಡ್ ಆನಿ ಚಡ್ ಅಂರ್ದುನ್ ಘೆತಾಲೊಂ. ಸವ್ಯಾ ಪಾವ್ಟಿಂ ಮ್ಹಜೆಂ ಕಾಜಾರ್ ಉಡ್ಪಿ ಲಾಗ್ಶಿಲ್ಯಾ ಎಕಾ ಹಳ್ಳೆಚಾ ಸುಂದರಿ ಮ್ಹಳ್ಳ್ಯಾ ಚೆಡ್ವಾಲಾಗಿಂ ಜಾಲೆಂ. ಆನಿ ಹೆಂ ಚೆಡುಂ ಮ್ಹಜೆಂ ಸಗ್ಳೆಂ ಜಿವಿತ್ ಬದ್ಲುಂಕ್ ಕಾರಾಣ್ ಜಾತೆಲೆಂ ಮ್ಹಣ್ ತ್ಯಾ ವೆಳಾರ್ ಹಾಂವೆಂ ಚಿಂತ್‌ಲ್ಲೆಂಚ್ ನಾ.

ಸುಂದರಿ ತಾಚ್ಯಾ ಬಾಪಾಯ್ಚ್ಯಾ ಪಯ್ಲ್ಯಾ ಬಾಯ್ಲೆಚಿ ಏಕ್‌ಚ್ ಧುವ್. ಬಾಪುಯ್ ತಾಚೊ ದುಸ್ರ್ಯಾಪಣಾಕ್ ಕಾಜಾರ್ ಜಾಲೊನಾ ತರೀ ತಾಣೆಂ ದವರ್‌ನ್ ಘೆತ್ಲೆಲ್ಲ್ಯಾ ತಾಚಾ ದುಸ್ರ್ಯಾ ಬಾಯ್ಲೆಕ್, ತಿಚ್ಯಾ ಸರ್‌ಲೆಲ್ಯಾ ಘೊವಾ ಥಾವ್ನ್ ಜಲ್ಮಾಲ್ಲಿಂ ತೆಗಾಂ ಭುರ್‌ಗಿಂ ಆಸ್‌ಲ್ಲಿಂ. ಉಪ್ರಾಂತ್ ಹಾಚೆಥಾವ್ನ್ ದೊಗಾಂ ಜಾಲಿಂ. ಆನಿ ಪ್ರಾಯೆಕ್ ಪಾವ್‌ಲ್ಲೆಂ ಸುಂದರಿ ತ್ಯಾ ಘರಾಂಬ್ ಜಡ್ ಜಾಲ್ಲೆಂ. ಮಾವ್ಶೆಚಾ ಹಾತಿಂ ಕಶ್ಟೊಂಚ್ಯಾ ಆನಿ ಅಣ್ಕಣ್ಯಾಚೆಂ ಶಿತ್ ಜೆಂವ್ಚ್ಯಾ ಸುಂದರಿಕ್ ಪೂವಮ್ಮಾನ್ ಮ್ಹಜೆಲಾಗಿಂ ಕಾಜಾರ್ ಕರ್‌ನ್ ಘರಾ ಥಾವ್ನ್ ಸುಟ್ಕಾ ಜೋಡ್ನ್ ದಿಲ್ಲಿ. ಹೆರಾಂ ಕಾಜಾರಾಂ ಬರಿ ಹೆಂಯಿ ಜಾವ್ನ್ ಗೆಲ್ಲೆಂ ತರೀ ಚೆಡ್ವಾನ್ ಮಾತ್ರ್ ಮ್ಹಜೆಂ ಅಕ್ಕಲ್ ಪಿಡ್ಡ್ಯಾರ್ ಕೆಲೆಂ. ಕಸಲೆಂಗೀ ಆಕರ್‌ಶಣ್ ಮ್ಹಾಕಾ ತಾಚೆ ಥಂಯ್ ವೊಡ್ತಾಲೆಂ.

ಆದಿಂ ಕಾಜಾರ್ ಜಾಲ್ಲ್ಯಾ ಮ್ಹಜ್ಯಾ ಹೊಕ್ಲಾಂಕ್ ಪಳೆಂವ್ಚಿ ಮ್ಹಾಕಾ ಭಗಾನಾತ್ಲಿ..... ಪುಣ್ ಹ್ಯಾ ಚೆಡ್ವಾಕ್ ಪರತ್-ಪರತ್ ಪಳೆವ್ಯಾಂ ಮ್ಹಣ್ ಜಾತಾಲೆಂ. ತಶೆಂ ಕಾಂಯ್ ವಿಶೇಸ್ ಸೊಬಾಯೆಚೆಂ ನ್ಹಂಯ್ ತೆಂ. ಪುಣ್ ಕಸ್ಲಿಗೀ ಸಕತ್ ಮ್ಹಜಿ ನದರ್ ವೊಡ್ಚಿ ತಸಲಿ ತಾಚಾ ತೊಂಡಾರ್ ಆಸ್ಲಿ! ಬೊಂಬೈಚ್ಯಾ ಬಸ್ಸಾರ್ ಮ್ಹಜ್ಯಾ ಮುಕ್ಲ್ಯಾ ಸಿಟಿರ್ ಪೂವಮ್ಮ್ ಆನಿ ಸುಂದರಿ ಬಸ್‌ಲ್ಲಿಂ. ಪೂವಮ್ಮ್ ಜನೆಲಾಲಾಗಿಂ ಬಸ್ಲೆಲಿ ಆಸ್ತಾಂ ತಿಚ್ಯಾ ಉಜ್ವ್ಯಾಕ್ ಬಸ್‌ಲ್ಲ್ಯಾ ಸುಂದರಿಚೆಂ ಅರ್ವಾಸ್ ತೊಂಡ್ ಮ್ಹಾಕಾ ಸಾರ್ಕೆಂಂ ದಿಸ್ತಾಲೆಂ. ಕಾಜಾರಾ ದಿಸಾ ಹಾಂವೆ ತ್ಯಾ ತೊಂಡಾ ವಯ್ರ್ ತಿತ್ಲೆಂ ಗಮನ್ ದಿಲ್ಲೆಂ ನಾ. ಪುಣ್ ತಾಕಾ ಘೆವ್ನ್ ಬೊಂಬೈ ಭಾಯ್ರ್ ಸರ್‌ತಾನಾ ಹಾಂವೆಂ ತಾಚ್ಯಾ ತೊಂಡಾರ್ ಸಾರ್ಕಿ ದೀಶ್ಟ್ ಘಾಲಿ. ಮುಗ್ದ್ ಉರುಟ್ ತೋಂಡ್ ತೆಂ. ತಾಂಬ್ಶಿ ಗೊರ್‌ಸಾಣ್ ತ್ಯಾ ಕಾತಿಚಿ. ದೊಳೆಯಿ ತಾಚೆ ಪರ್‌ಜಳಿಕ್ ಆಸೊನ್ ವ್ಹಡ್ ಆಸ್ಲೆ.

ಪುಣ್ ತ್ಯಾ ಮುಖಾಮಳಾರ್ ಉಟೊನ್ ದಿಸ್ತಾಲೆಂ ತಾಚೆಂ ನಾಕ್! ವಿಶೇಸ್ ಎಕಾ ಥರಾಚಿ ಸೊಬಾಯ್ ತ್ಯಾ ನಾಕಾಕ್ ಆಸ್‌ಲ್ಲಿ. ಮೊಂಡು ನಾಕ್ ತೆಂ. ನಾಕಾಚಿ ಲಾಂಬಾಯ್ ರುಂದಾಯ್ ಹಳ್ತಾಚಿ. ಪುಣ್ ನಾಕಾಚಿಂ ಫುಡಾಂ ಮುಕ್ಲ್ಯಾ ಕುಶಿನ್ ಉಟೊನ್ ರಾವ್ಲ್ಯಾಂತ್ ತಶೆಂ ಆಸೊನ್, ನಾಕಾಚೆಂ ಪೊಂವ್ ಆಕಾಸಾಕ್ ಪಳಯ್ತಾ ಮ್ಹಳ್ಳೆಪರಿಂ ಪಾಟಿಂ ಬಾಗ್ವಾಲೆಂ. ತ್ಯಾ ನಾಕಾ ವರ್‌ವಿಂಚ್ ಜಾವ್ಯೆತ್ ಎಕಾಥರಾಚಿಂ ಪೊಕ್ರಿ ಖುಣಾಂ ತೊಂಡಾರ್ ಉಟೊನ್ ದಿಸ್ತಾಲಿಂ.

ವ್ಹಯ್..... ತ್ಯಾ ನಾಕಾ ಖಾತಿರ್‌ಚ್ ಜಾವ್ಯೆತ್ ಪರತ್-ಪರತ್ ತ್ಯಾ ತೊಂಡಾಕ್ ಪಳೆವ್ಯಾಂ ಮ್ಹಣ್ ಮ್ಹಾಕಾ ಭಗ್ತಾಲೆಂ. ಬಾಪಾಯ್ಕ್ ಸುಂದರಿಚೊ ಚಿಕ್ಕೆ ಚಡ್ ಮೋಗ್ ಆಸ್ಲೊ ಜಾಯ್ಜಾಯ್. ತಾಕಾ ಘೆವ್ನ್ ಆಮಿ ಭಾಯ್ರ್ ಸರ್‌ತಾನಾ ತೊ ತಾಕಾ ಪೊಟ್ಲುನ್ ಧರ್‌ನ್ ರಡ್‌ಲ್ಲೊ. ಸುಂದರಿಯ್ ರಡ್‌ಲ್ಲೆಂ. ಉಪ್ರಾಂತ್ ಧುವೆಕ್ ತಾಣೆಂ ಆಮ್ಚೆ ಸಂಗಿಂ ಧಾಡ್ಲೆಂ. ಆಪ್ಲ್ಯಾ ಧುವೆಕ್ ಆಪುಣ್ ಕಸಾಯ್ಗಾರಾಂಚಾ ಹಾತಿಂ ದೀವ್ನ್ ಧಾಡ್ತಾಂ ಮ್ಹಳ್ಳೆಂ ತ್ಯಾ ಭಿರ್‌ಮೊತ್ ಗರಿಬಾಕ್ ಕಿತೆಂ ಕಳಿತ್? ಬಸ್ಸ್ ಧಾಂವ್ತಾಲೆಂ ಆನಿ ಹಾಂವ್ ಚಿಂತಾಲೊಂ.

ವಾರ್ಸೊವಾಚಾ ಬೊಂಗ್ಲ್ಯಾಕ್ ಪಾವ್ಲ್ಯಾ ನಂತರ್ ಹ್ಯಾ ಚೆಡ್ವಾಚಿ ಗತ್ ಕಸಲಿ? ತಾಚಿ ಬೊಬ್..... ತೆ ಆಕ್ಲಾಸ್.... ಹಾಂವೆಂ ಮುಕಾರ್ ಮುಕಾರ್ ಪಳೆಂವ್ಕ್ ಆಸಾತ್! ಬಾರೀಕ್ ತೆಲ್ತಿ ಕೂಡ್ ತಾಚಿ ಥೊಡ್ಯಾ ವೆಳಾ ಭಿತರ್ ತ್ಯಾ ಚೊವ್ಗಾಂಚೆ ಹಾತಿಂ ಪೂಡ್ ಜಾತೆಲಿ. ತ್ಯಾ ಪ್ರೊಜೆಕ್ಟರಾ ಸಮೊರ್ ತಾಚ್ಯಾ ಹರ್‌ಎಕಾ ನಿಸ್ಕಳ್-ನಿರ್ಮಲ್ ವಿಶ್ವ್ಯಾಂಕ್ ತೆ ಘಾಸ್ ಮಾರ್‌ತೆಲೆ. ಮ್ಹಾಕಾ ಹಿಂ ದ್ರಶ್ಯಾಂ ಸವಯೆಕ್ ಪಡ್ಲೆಲಿಂ ವ್ಹಯ್. ಪುಣ್ ಆಜ್ ಸುಂದರಿಕ್ ಮುಕಾರ್ ದವರುನ್ ತೆಂ ನಿಯಾಳ್ತಾನಾ ಮ್ಹಜ್ಯಾ ಜಿವಾಂವ್ ಏಕ್ ಥರ್‌ಶೆಂ ಭಗ್ಲೆಂ. ಹಾಂವೆಂ ಪರ್‌ತ್ಯಾನ್ ಸುಂದರಿಚೆರ್ ದೀಶ್ಟ್ ಘಾಲಿ. ಕಿತೆಂಚ್ ಕಳಿತ್ ನಾತ್ಲಿ ತಿ ಶೆಳಿ ಆಪ್ಲ್ಯಾಚ್ ಚಿಂತ್ನಾಂನಿ ರೆವ್ಡೊನ್, ಧಾಂವ್ಚ್ಯಾ ರೂಕ್-ಝಡಾಂಕ್ ಆಜಾಪೊನ್ ಮ್ಹಳ್ಳೆಪರಿಂ ಪಳೆವ್ನ್ ಬಸ್‌ಲ್ಲಿ.

ಮ್ಹಜಿ ದೀಶ್ಟ್ ತಾಚ್ಯಾ ನಾಕಾರ್ ಗೆಲಿ. ತೆಂ ಸೊಬಿತ್ ನಾಕ್ ತೆ ರಾಕ್ಕೊಸ್ ಚಾಬೊನ್ ಪಿಡ್ಡ್ಯಾರ್ ಕರ್‌ತಾತ್ ಕೊಣ್ಣಾ.... ಎಕಾಚ್ಛಾಣೆಂ ಕಾಳ್ಜಾಕ್ ಸುರಿ ತೊಪ್‌ಲ್ಲ್ಯಾ ಬರಿಂ ಜಾಲೆಂ ಮ್ಹಾಕಾ! ದೊಳೆ ಧಾಂಪುನ್ ಹಾಂವ್ ಸಿಟಿಕ್ ವೊಣ್ಕಾಲೊಂ ಆನಿ ತಿಂ ಚಿಂತ್ನಾಂ ಮತಿಂತ್ಲಿಂ ಧಾಂವ್ಡಾಂವ್ಕ್ ಉರ್ಡಾಲೊಂ. ಪುಣ್ ನಾ.... ತಿಂ ದ್ರಶ್ಯಾಂ ಬಲಾತ್ಕಾರಾನ್ ಮ್ಹಜೆ ಮುಕಾರ್ ಯೆಂವ್ಕ್ ಲಾಗ್ಲಿಂ....... ಸುಂದರಿ ಬೋಬೊ ಮಾರ್‌ತಾಲೆಂ. ದೊಗಾಂನಿ ತಾಚೆ ಬಾವ್ಳೆ ಖಟ್ಲ್ಯಾಕ್ ಧಾಂಬುನ್ ಧರ್‌ಲ್ಲೆ. ಎಕ್ಲ್ಯಾನ್ ಪಾಂಯ್ ವೋಡ್ನ್ ಧರ್‌ಲ್ಲೆ.... ಆನ್ಯೇಕ್ಲೊ ತ್ಯಾ ಕುಡಿರ್ ಅಕ್ರಮಣ್ ಕರ್‌ತಾಲೊ.

ಸುಂದರಿ ಕಿಂಕ್ರಾಟ್ ಮಾರ್‌ನ್ ಮ್ಹಾಕಾ ಕುಮ್ಕೆಕ್ ಆಪಯ್ತಾಲೆಂ.... ದೆದೆಸ್ಪ್ರಾರ್ ಜಾಲೊಂ ಹಾಂವ್ ಏಕ್ ಘಡಿ ಬಸ್ಸ್ ರಾವವ್ನ್ ಜಾತಾತಿತ್ಲಿ ವಿಸ್ಕಿ ಘೊಟುನ್ ಯೆಂವ್ಯಾಂಗೀ ಮ್ಹಣ್ ಭಗ್ಲೆಂ. ಆಜ್ ಕಿತ್ಯಾ ಅಶೆಂ ಜಾತಾ? ಕಿತ್ಲೆಂ ವಿಸ್ರೊಂಕ್ ಪ್ರಯತ್ನ್ ಕೆಲ್ಯಾರೀ ವಯ್ರ್-ವಯ್ರ್ ತಿಂ ದ್ರಶ್ಯಾಂ ಕಿತ್ಯಾಕ್ ಉಡಾಸಾಕ್ ಯೆತಾತ್?

ಮ್ಹಜಿ ದೀಶ್ಟ್ ಪರತ್ ಸುಂದರಿಚೆರ್ ಗೆಲಿ. ದಾವ್ಯಾ ಕುಶಿಚ್ಯಾ ಜನೆಲಾಂತ್ಲ್ಯಾನ್ ಭಾಯ್ರ್ ಪಳೆತ್ತ್ ಆಸ್‌ಲ್ಲಿ ತಾಚಿ ದೀಶ್ಛ್ ಎಕಾಚ್ಛಾಣೆಂ ಮ್ಹಜೆರ್ ಘುಂವ್ಲಿ. ಆನಿ ಲಜೆವ್ನ್ ತೆಂ ಹಾಸ್ಲೆಂ. ಹಾಂವ್ ಕೆದ್ನಾಂಯಿ ಗಂಬೀರ್ ರಾವೊಂಕ್ ಪ್ರಯತ್ನ್ ಕರ್‌ತಾಲೊಂ. ದೆಕುನ್ ಜಾಯ್ಜಾಯ್ ತೆಂ ಮ್ಹಾಕಾ ಪಳೆವ್ನ್ ಹಾಸೊಂಕೀ ಭಿಂಯೆತಾಲೆಂ. ಎದೊಳ್ ವರೇಗ್ ಎಕ್ ಸಬ್ದ್ ಸಯ್ತ್ ಹಾಂವ್ ತಾಚೆಲಾಗಿಂ ಉಲಯ್ಲೊನಾಂ. ತೆಂ ಚೊರ್‌ಯಾಂ ಮ್ಹಾಕಾ ಪಳೆವ್ನ್ ಹಾಸೊಂಕ್ ಪ್ರಯತ್ನ್ ಕರ್‌ತಾ ತೆಂ ಹಾಂವ್ ಜಾಣಾ’ಸ್ಲೊಂ. ಆತಾಂ ತಾಚಿ ಮ್ಹಾಕಾ ಭಿರ್ಮತ್ ದಿಸ್ಲಿ. ಹಾಂವೆಂಯಿ ಹಾಸೊ ಪಾಟಿಂ ದಿಲ್ಯೊ. ಹಾಂವ್ ಹಾಸ್‌ಲ್ಲೊಂ ಪಳೆವ್ನ್ ತಾಕಾ ಭಗ್ಲೆಲ್ಯಾ ಸಂತೊಸಾಚಿಂ ಖುಣಾಂ ತಾಚ್ಯಾ ತೊಂಡಾರ್ ಪರ್‌ಜಳ್ಳಿಂ. ನಾಕ್ ತಾಚೆಂ ಫುಲ್ಲೆಂ. ಆತಾಂ ತೆಂ ಆನಿಕೀ ಸೊಬಿತ್ ದಿಸ್ಲೆಂ.

ಎಕಾಚ್ಛಾಣೆಂ ತಾಣೆಂ ಆಪ್ಲೊ ಹಾತ್ ಮುಕಾರ್ ವೊಡ್ಡಾಯ್ಲೊ.... ತ್ಯಾ ಹಾತಿಂ ಚಣೆಂ ಆಸ್‌ಲ್ಲೆಂ, ಕಿತೆಂ ಕರುಂ? ಮ್ಹಾಕಾ ತಕ್ಷಣ್ ಗಮ್ಲೆಂ ನಾ. ಹಾಂವೆಂ ತೆಂ ಘೆತ್ಲೆನಾಂತ್ ತರ್ ಚೆಡುಂ ನಿರಾಸ್ತೆಲೆಂ. ತಾಕಾ ದುಕಂವ್ಕ್ ಮ್ಹಾಕಾ ಬರೆಂ ಲಾಗ್ಲೆಂ ನಾ. ಹಾಂವೆಂ ಚಣೆ ಘೆತ್ಲೆ... ಆನಿ ದೊಳ್ಯಾಂನಿ ಹಾತಾಂನಿ-

"ತುಜ್ಯಾ ಕುಶಿಚಿ ಮೊಟಿ, ಪೂವಮ್ಮ ಪಳೆಯ್ತ್ ಚತ್ರಾಯ್’ ಮ್ಹಳ್ಳೆಂ ಬರಿ ಹಿಶಾರೊ ಕೆಲೊ. ತಾಕಾ ಕಿತ್ಲೆಂ ಸಮ್ಜಾಲೆಂ ಹಾಂವ್ ನೆಣಾಂ... ಪುಣ್ ತ್ಯಾ ಉಪ್ರಾಂತ್ ತವಳ್ ತವಳ್ ಮ್ಹಾಕಾ ಪಳೆಂವ್ಕ್ ಆನಿ ಹಾಸೊಂಕ್ ಸುರು ಕೆಲೆಂ. ಹಾಸ್ತಾನಾ ತ್ಯಾ ತೊಂಡಾಕ್ ಪಳೆಂವ್ಚಿಚ್ ಏಕ್ ಮಾಝಾ! ಕಳಾತ್ ಜಾಲ್ಯಾರ್ ಪೂವಮ್ಮ ಎಕಾಕ್ ಏಕ್ ದುಬಾವ್ ಕರಿತ್ ಮ್ಹಳ್ಳೊ ಉಡಾಸ್ ಆಸ್ಲ್ಯಾರೀ ತ್ಯಾ ತೊಂಡಾಂಕ್, ತ್ಯಾ ನಾಕಾಕ್ ಪಳೆಂವ್ಚೊ ಸಂದ್ರಾಪ್ ಹಾಂವೆಂ ಹೊಗ್ಡಾಯ್ಲೊಚ್ ನಾ.

ಬಸ್ಸ್ ಧಾಂವ್ತಾಲೆಂ. ವೊರಾಂ ದೊನ್ಪಾರಾಂಚಿ ಬಾರಾ ಜಾತಾನಾ ಆಮ್ಚೆಂ ಬಸ್ಸ್ ಕುಂದಾಪುರ್‌ಚ್ಯಾ ಎಕಾ ಹೊಟ್ಲಾ ಮುಕಾರ್ ಜೆವ್ಣಾ ಖಾತಿರ್ ರಾವ್ಲೆಂ. ಹಾಂವೆಂ ಲಾಗ್ಶಿಲ್ಯಾ ಬಾರಾಕ್ ವಚೊನ್ ವ್ಹಿಸ್ಕಿ ಘಡ್ಯೆನ್ ಖಾಲಿ ಕೆಲಿ ಶಿವಾಯ್ ಆನ್‌ಎಕ್ ಕ್ವಾರ್ಟರ್ ಪಾರ್ಸೆಲ್ ಕರವ್ನ್ ಸುಂದರಿ ಆನಿ ಪೂವಮ್ಮ ಜೆವ್ಣಾಕ್ ಬಸ್‌ಲ್ಲ್ಯಾ ಮೆಜಾ ಸರ್‌ಶಿಂ ಆಯ್ಲೊಂ. ಸುಂದರಿ ಮ್ಹಜ್ಯಾ ತೊಂಡಾಕ್‌ಚ್ ಪಳೆವ್ನ್ ಆಸಾ ತೆಂ ಮ್ಹಾಕಾ ಕಳ್ತಾಲೆಂ ತರೀ ಪೂವಮ್ಮ ಮಾಕಾಚ್ಚ್ ಪಳೆವ್ನ್ ಆಸ್ಲಿ ಜಾಲ್ಲ್ಯಾನ್ ಹಾಂವ್ ಗಂಭೀರಾಯೆನ್ಂಚ್ ಬಸ್ಲೊಂ.

ಬಸ್ಸ್ ಪರತ್ ಚಾಲು ಜಾಲೆಂ. ಬಸ್ಸ್ ಸುಟ್‌ಲ್ಲೆಂಚ್ ಸುಂದರಿನ್ ಪಾಟಿಂ ಘುಂವೊನ್ ಆಪ್ಲೊ ಉಜ್ವೊ ಹಾತ್ ಮುಕಾರ್ ಹಾಡ್ಲೊ. ತಾಚಾ ಹಾತಾಂತ್ ದೋನ್ ಚೊಕ್ಲೆಟಾಂ ಆಸ್‌ಲ್ಲಿಂ. ಮ್ಹಜ್ಯಾ ಪಾಟ್ಲ್ಯಾನ್ ಮುಕ್ಲ್ಯಾನ್ ಬಸ್‌ಲ್ಲೆ ಪಯ್ಣಾರಿ ಆಮ್ಕಾಂ ಪಳೆವ್ನ್ ಹಾಸ್ಲೆಂ. ಮಾಕಾಚ್ಚ್ ಕಳಿತ್ ನಾಸ್ತಾಂ ಮ್ಹಳ್ಳೆಪರಿಂ ಹಾಂವೆಂ ಚೊಕ್ಲೆಟಾಂ ಘೆತ್ಲಿಂ. "ದೊನೀ ನ್ಹಂಯ್-ಏಕ್ ಮ್ಹಾಕಾ ಜಾಯ್’ ಮ್ಹಣಾಲೆಂ ತೆಂ ಆನಿ ಅವಾಜ್ ಕರ್‌ನ್ ಹಾಸ್ಲೆಂ. ಭಿಂಯಾನ್ ಮ್ಹಜೊ ಜೀವ್ ಮುಯೆತೆದೊ ಜಾಲೊ. ಪೂವಮ್ಮ ಪಳಯ್ತ್ ತರ್?

ಹಾಂವೆಂ ವೆ-ವೆಗ್ಗಿಂ ಏಕ್ ಚೊಕ್ಲೆಟ್ ತಾಕಾ ಪಾಟಿಂ ದಿಲೆಂ ಆನಿ ’ಆವಾಜ್ ಕರಿನಾಕಾ-ಬಸ್’ ಮ್ಹಳ್ಳೆಬರಿ ಹಾತ್‌ಭಾಸ್ ಕೆಲಿ. ’ನಿರ್‌ಬಾಗಿ ನೆಣ್ತೆಂ ಚೆಡುಂ.....’ ಚಿಂತ್ಲೆಂ ಹಾಂವೆಂ ’.... ಆತಾಂ ಕಿತ್ಲ್ಯಾ ಸಂತೊಸಾನ್ ಆಸಾ.... ಆಪುಣ್ ಸುಖಾಕ್ ಪಾವ್ಲ್ಯಾಂ... ಬೊಂಬೈಂತ್ಲ್ಯಾ ಸುಖಾಳ್ ಫುಡಾರಾ ಖಾತಿರ್ ನೊವ್ರ್ಯಾ ಸಂಗಿಂ ಭಾಯ್ರ್ ಸರ್‌ಲ್ಯಾಂ ಮ್ಹಣ್ ತೆಂ ಚಿಂತಾ ಜಾಯ್ಜೆಯ್..... ಮುಕಾರ್ ಕೆದಿ ವ್ಹಡ್ ನಿರಾಶಾ ತಾಕಾ ರಾಕೊನ್ ಆಸಾ...’ ಹೆಂ ಚಿಂತಾನಾ ಮ್ಹಜಿ ಮತ್ ಪಿಸಾಂತುರ್ ಜಾಲಿ.

ಶೆಟ್ಟಿಚೆಂ ಕಾಮ್ ಜಾತಾಚ್ ತ್ಯಾ ಚೆಡ್ವಾಂಕ್ ತೊ ಹೆರಾಂಕ್ ವಿಕ್ತಾಲೊ. ಆನಿ ಅಶೆಂ ಹಾತಾ ಥಾವ್ನ್ ಹಾತಾಕ್ ಪಾವೊನ್ ನಿಮಾಣೆಂ ಚಿಂವೊನ್ ಕಾಡ್‌ಲ್ಲಿಂ ಚಿಂವ್ಡಾಂ ಕಶಿಂ ಖಂಚಾಯಿ ತಿಸ್ರ್ಯಾ ವರ್‌ಗಚ್ಯಾ ಗಲ್ಲೆಕ್ ಪಾವ್ತಾಲಿಂ. ನಿರಾಶೆಚೊ ಏಕ್ ದೀರ್ಘ್ ಶ್ವಾಸ್ ಸೊಡ್ಲೊ ಹಾಂವೆಂ. ಹ್ಯಾ ಚೆಡ್ವಾಚಿಯಿ ಗತ್ ತಿಚ್ಚ್... ಹಾಂವೆಂ ತಾಕಾ ಬಚಾವ್ ಕರುಂಕ್ ನ್ಹಜೊಗೀ? ಎಕಾಚ್ ಫರಾ ತಕ್ಲೆಂತ್ ಘಡ್ಗಡೊ ಮಾರ್‌ಲಲೊ ಅನುಭವ್ ಜಾಲೊ ಮ್ಹಾಕಾ.

ಹೆಂ ಚಿಂತಾಪ್ ಮ್ಹಜ್ಯಾ ಮತಿಂತ್ ಕಶೆಂ ಆಯ್ಲೆಂ? ಹಾಂವೆಂ ಸುಂದರಿಚೆರ್ ದೀಶ್ಟ್ ವ್ಹೆಲಿ. ಗೊಮ್ಟಿ ಲಾಂಬ್ ಕರ್‌ನ್ ಮುಕ್ಲ್ಯಾ ರಸ್ತ್ಯಾಕ್ ತಿಳುನ್ ಆಸ್ಲೆಂ. ’ಸುಂದರಿಕ್ ಹಾಂವೆ ಬಚಾವ್ ಕರುಂಕ್ ಜಾಯ್ನಾಂಗೀ?’ ಪರತ್ ತೆಂಚ್ ಸವಾಲ್, ಮ್ಹಜಿ ಚಿಂತ್ನಾಂ ಬದ್ಲುಂಕ್ ಹಾಂವ್ ಸಿಟಿವೈರ್ ಹುಳ್ವುಳೊನ್ ಸಾರ್ಕೊ ಬಸ್ಲೊಂ. ಹಾಂವೆಂ ದೊಳೆ ಧಾಂಪ್ಲೆ. ಆತಾಂ ತಿಂಚ್ ಆದ್ಲಿಂ ದ್ರಶ್ಯಾಂ..... ಪಡ್ದೆ...... ಉಜ್ವಾಡ್......

ಪ್ರೊಜೆಕ್ಟರ್..... ಕಿಂಕ್ರಾಟೊ..... ದೆವಾ..... ದೆವಾ..... ತಕ್ಲಿ ಖಂಚಾಯಿ ಪಾತ್ರಾಕ್ ಆಪ್ಟಿಯಾಂ ಮ್ಹಣ್ ಭಗ್ಲೆಂ. ಕಾಂಯ್ ತರೀ ವಾಚ್ಯಾಂ ಮ್ಹಣ್ ಹಾಂವೆಂ ಕುಂದಾಪುರ್ ಘೆತ್‌ಲ್ಲೆಂ ಮ್ಯಾಗ್ಜಿನ್ ಸೊಡಯ್ಲೆ ದೊಳೆ ಅಕ್ಶರಾಂ ವಯ್ರ್ ಆಸ್‌ಲ್ಲೆಂ.....

ಪುಣ್‌ಮತ್ ಮ್ಹಜಿ ದುಸ್ರ್ಯಾ ಕಾಮಾರ್ ಆಸ್‌ಲ್ಲಿ. ಹಾಂವ್ ಸುಂದರಿಕ್ ಘೆವ್ನ್ ಧಾಂವ್ತಾಲೊಂ... ಪಾಟ್ಲ್ಯಾನ್ ಸುರಿಯೊ ತಲ್ವಾರಿ ಘೆವ್ನ್ ಶೆಟ್ಟಿಚೆಂ ಗೂಂಡಾ ಧಾಂವೊನ್ ಯೆತಾಲೆ......

ಆನ್‌ಎಕ್ ಕಡೆನ್ ಏಕ್ ಘರ್.... ಧಾಕ್ಟುಲೆಂ ಸೊಬಿತ್ ಏಕ್ ಘರ್! ಹಾಂವ್ ಆನಿ ಸುಂದರಿ ತಾಂತುಂ ಜಿಯೆವ್ನ್ ಆಸ್ತಾಂ, ಎಕಾಚ್ಛಾಣೆಂ ಪಾಕ್ಯಾಚೆ ನಳೆ ಕಾಡ್ನ್ ಶೆಟ್ಟಿ ಗೂಂಡಾ ದೊರಿಯಾಂನಿ ಸಕ್ಲಾ ದೆಂವಾಲಾಗ್ಲೆ! ಸುಂದರಿಕ್ ತಾಣಿಂ ವ್ಹರ್‌ನಾಶೆಂ ಹಾಂವ್ ತಾಚೆಲಾಗಿಂ ಝಗಡ್ತಾಲೊಂ....

ಚಿತ್ರಾಂ ಮ್ಯಾಗ್ಜಿನಾಚೆರ್ ಧಾಂವ್ತಾತ್’ಶಿಂ ಭಾಸ್ ಜಾತಾಲಿಂ. ಹಾಂವೆ ಮ್ಯಾಗ್ಜಿನ್ ಧಾಂಪ್ಲೊ. ಚಿಂತಾಂ ಚಿಂತಾಂ ಬಸ್ಸ್ ಧಾಂವ್ತಾಲೆಂ..... ವೇಳ್ ಉತರ್‌ತಾಲೊ....

ಸುಂದರಿ ವಾರ್ಸೊವಾಚಾ ಬಂಗ್ಲ್ಯಾಕ್ ಲಾಗಿಂ ಜಾತಾಲೆಂ. ಸಾಂಜೆಚ್ಯಾ ಪಾಂಚ್ ವೊರಾರ್ ಬಸ್ಸ್ ಶಿರ್ಸಿ ರಾವ್ತಾನಾ ಹಾಂವ್ ಎಕಾ ದೃಢ್ ನಿರ್‌ದಾರಾಕ್ ಆಯ್ಲೊಂ.

ಸಾಂಜೆಚಿ ಕಾಫಿ ಪಿಯೆಂವ್ಕ್ ಪ್ರಯಾಣಿಕ್ ದೆಂವ್ತಾನಾ ಹಾಂವೀ ಉಟ್ಲೊಂ. ಪೂವಮ್ಮ ಉಟ್ಲಿ ನಾ, ಆಪ್ಣಾಕ್ ಕಾಂಯ್ ನಾಕಾ - ಹ್ಯಾ ಚೆಡ್ವಾಕ್ ಜಾಯ್ ತರ್ ಆಪವ್ನ್ ವ್ಹರ್ ಮ್ಹಣಾಲಿ. ಹಾಂವ್ ಸಬ್ದ್ ಕಾಡಿನಾಸ್ತಾಂ ಬಸ್ಸಾ ವಯ್ಲೊ ದೆಂವ್ಲೊಂ. ಮ್ಹಜ್ಯಾ ಪಾಟಾಪಾತ್ ಸುಂದರಿಯಿ ಆಯ್ಲೆಂ. ಹೊಟ್ಲಾಂತ್ ಎಕಾ ಕೊನ್ಶಾಂತ್ ಮ್ಹಜ್ಯಾ ಮುಕ್ಲ್ಯಾ ಕದೆಲಾರ್‌ಚ್ ತೆಂ ಲಜೆನ್ ಬಸ್ಲೆಂ. ಹಾಂವೆಂ ತಾಚಾ ತೊಂಡಾರ್ ಆತಾಂ ಸಾರ್‌ಕಿ ದೀಶ್ಟ್ ಘಾಲಿ. ತಾಚೆಂ ನಾಕ್ ಮ್ಹಾಕಾ ಹೆಡಾಯ್ತಾಶೆಂ ಭಗ್ಲೆಂ. ಅಪರಿಮಿತ್ ಸೊಬಾಯ್ ತ್ಯಾ ನಾಕಾಚಿ! ಪಾಟಿಂ ಕಾಡಿನಾತ್ಲ್ಯಾ ಮ್ಹಜ್ಯಾ ದಿಶ್ಟಿನ್ ಸುಂದರಿಕ್ ಸಲ್ವಯ್ಲೆಂ ಆನಿ ತಾಣೆಂ ತಕ್ಲಿ ಪಂದಾ ಘಾಲಿ.

"ಕಿತೆಂ ಜಾಯ್ ತುಕಾ?" ಹಾಂವೆಂ ವಿಚಾರ್‌ಲೆಂ. "ಕಿತೆಂಯಿ ಜಾತಾ.... ತುಂವೆಂ ಸಾಂಗ್‌ಲ್ಲೆ!" ತಕ್ಲಿ ಉಕಲ್ನಾಸ್ತಾಂ ತಾಣೆಂ ಜಾಪ್ ದಿಲಿ. ಹಾಂವೆ ವೇಯ್ಟಾರಾಕಾ ಕೆಳಿಂ ಹಾಡುಂಕ್ ಫರ್‌ಮಾಯ್ಲೆಂ. ಸುಂದರಿಕ್ ತಾಕಾ ಮುಕಾರ್ ಜಾಂವ್ಚ್ಯಾ ಅಪಾಯಾಂಚೊ ಹಿಶಾರೊ ದಿವ್ಯಾಂಗೀ ಮ್ಹಳ್ಳೆಂ ಚಿಂತಾಪ್ ಮ್ಹಜೆಂ ಥಂಯ್ ಉದೆಲೆಂ. ಪುಣ್ ತಕ್ಶಣ್ ಹಾಂವೆಂ ತಿ ಆಲೋಚನ್ ಸೊಡ್ಲಿ. ಭಿಂಯಾನ್ ತಾಣೆಂ ಕರ್‌ಚ್ಯಾ ವರ್‌ವಿಂ ಪೂವಮ್ಮಾಕ್ ದುಬಾವ್ ಜಾಯ್ತ್ ತರ್ ಚಿಂತ್ಲೆಲಿ ಮಾಂಡಾವಳ್ ಪಿಡ್ಡ್ಯಾರ್ ಜಾತೆಲಿ.

ಆತಾಂ ಕಿತೆಂಚ್ ಸಾಂಗ್ಚೆಂ ನಾಕಾ. ಹಾಂವ್ ಎಕಾ ನಿರ್‌ದಾರಾಕ್ ಪಾವ್‌ಲ್ಲೊಂ. ಶೆಟ್ಟಿಚಾ ಹಾತಾ ಥಾವ್ನ್ ಸುಂದರಿಕ್ ಬಚಾವ್ ಕರ್‌ಚಿ ಮಾಂಡ್ಣಿ ಹಾಂವೆಂ ಕೆಲ್ಲಿ. ಏಕ್ ದೀಸ್ ನಾ ತರ್ ಎಕಾ ದಿಸಾ ಹಾಂವೆಯಿ ಶೆಟ್ಟಿಚ್ಯಾ ಪಂಗ್ಡಾ ಥಾವ್ನ್ ಭಾಯ್ರ್ ಯೇಜಾಯ್ ಆಸ್‌ಲ್ಲೆಂ. ತೀನ್ ವರ್ಸಾಂಚೆಂ ಮ್ಹಜೆಂ ಜಿವಿತ್ ತಾಚೆ ಖಾಲ್ ಕಾಂಠಾಳ್ಯಾಚೆಂ ಜಾಲ್ಲೆಂ. ಸುಂದರಿಕ್‌ಯಿ ಬಚಾವ್ ಕರ್‌ಚೆಂ, ಸಾಂಗಾತಾಚ್ ಆಪ್ಣಾಕ್‌ಯಿ ತಾಂತ್ಲೆಂ ಸುಟಂವ್ಚೆಂ ಏಕ್ ಯೋಜನ್ ಮ್ಹಜ್ಯಾ ಮತಿಂತ್ ರೂಪಿತ್ ಜಾಲ್ಲೆಂ. ಹಾಂವೆಂ ಕೆಲ್ಲಿ ಮಾಂಡಾವಳ್ ವ್ಹಡಾ ಅಪಾಯಾಚಿ ಮ್ಹಳ್ಳೆಂ ಹಾಂವ್ ಜಾಣಾಸ್ಲೊ ತರೀ ಭಿರ್‌ಮೊತೆನ್ ತಾಚೆರ್ ಜಯ್ತ್ ವ್ಹೆಲ್ಲೆಂ. ಕಸಲ್ಯಾಯಿ ಅನ್ವಾರಾಂಕ್ ಫೂಡ್ ಕರುಂಕ್ ಹಾಂವ್ ಆಯ್ತೊ ಜಾಲ್ಲೊಂ.

ಬೆಳ್ಗಾಂವಾಂತ್ ರಾತಿಂ ಬಸ್ಸ್ ಜೆವ್ಣಾಕ್ ರಾವ್ಲೆಲ್ಯಾ ವೆಳಿಂ ಸುಂದರಿಕ್ ಘೆವ್ನ್ ಪೂವಮ್ಮ ಥಾವ್ನ್ ಫಳಾಪಳ್ ಘೆಂವ್ಚಿ ಆಲೋಚೆನ್ ಹಾಂವೆಂ ಕೆಲ್ಲಿ. ಕಿತೆಂಯಿ ಕಳಿತ್ ನಾತ್ಲ್ಯಾ ಸುಂದರಿಕ್ ಆತಾಂ ಹೆಂ ತಿಳ್ಸಿಲ್ಯಾರ್ ತಾಚಾ ತೊಂಡಾರ್ ವ ಚಾಲಿಂತ್ ಜಾಂವ್ಚ್ಯಾ ಬದ್ಲಾವಣೆಂನಿ ಪೂವಮ್ಮಾಕ್ ದುಬಾವ್ ಜಾತಾಲೊ ಮ್ಹಣ್ ಲೆಕುನ್ ಹಾಂವೆ ತಾಕಾ ಕಿತೆಂಚ್ ಸಾಂಗ್ಲೆಂನಾ. ಕಾಫಿ ಪಿಯೆತಾಚ್ ಆಮಿ ಪರ್‌ತುನ್ ಬಸ್ಸಾರ್ ಬೊಸ್ಲ್ಯಾಂವ್. ಬಸ್ಸ್ ಪರ್‌ತ್ಯಾನ್ ಬೊಂಬೈಕ್ ಮುಕಾರ್ ಧಾಂವ್ತಾನಾ ಹಾಂವ್ ಬೊಂಬೈ ಥಾವ್ನ್ ಪಾಟಿಂ ಧಾಂವೊನ್ ಯೆಂವ್ಚಿ ಆಲೋಚನ್ ಮುಂದರಿಲಿ. ಸವ್ಕಾಸ್ ಕಾಳೊಕ್ ಪಡೊನ್ ಯೆತಾಲೊ.

ಆಟ್ ವೊರಾಂಚೆರ್ ಹಾಂವೆಂ ಪಾರ್‌ಸೆಲ್ ಬಾಂದುನ್ ಹಾಡ್‌ಲ್ಲಿ ವ್ಹಿಸ್ಕೆಚಿ ಭಾಯ್ರ್ ಕಾಡ್ಲಿ. ಉದಾಕ್ ಕಾಂಯ್‌ಚ್ ಭರ್‌ಸಿನಾತ್ಲೆಂ ತೆಂ ದ್ರವ್ಯ್ ತಾಳ್ಯಾಕ್ ವೊತ್ಲೆಂ. ನಂತರ್ ಬಸ್ಸಾರ್ ಪೆಟ್ಲೆಲ್ಯಾ ಮಸ್ಕ್ ದಿವ್ಯಾಂಚಾ ಉಜ್ವಾಡಾಕ್ ಹಾಂವೆಂ ಮಾತ್ಯಾ ವಯ್ಲ್ಯಾ ಕಂತಾಳಾಂತ್ ದವರ್‌ಲೆಲಿ ಸೂಟ್‌ಕೇಸ್ ವಳೂ ಸಕಯ್ಲ್ ಕಾಡ್ಲಿ. ಸೂಟ್‌ಕೇಸ್ ಭಾಯ್ರ್ ವ್ಹರುಂಕ್ ಅಸ್ಪದ್ ನಾತ್ಲೊ. ಪುಣ್ ಸೂಟ್‌ಕೇಜಿಂತ್ ಮ್ಹಜ್ಯಾ ಕಾಮಾಕ್ ಜಾಯ್ ಪಡ್ಚೆ ಥೊಡೆ ಪಯ್ಶೆ ಆಸ್‌ಲ್ಲೆ. ತಿ ನೊಟಾಂಚಿ ಆಟ್ಟಿ ಕಾಡ್ನ್ ಹಾಂವೆಂ ಬೊಲ್ಸಾಂತ್ ಘಾಲಿ. ಆನಿ ಸೂಟ್‌ಕೇಜ್ ಆಸಾತಸಿಚ್ ಪಾಟಿಂ ದವರ್‌ಲಿ. ಉಪ್ರಾಂತ್ ಚತ್ರಾಯೆನ್ ಹಾಂವೆಂ ಪಯ್ಶೆಂ ಲೇಕ್ ಕೆಲೆಂ....

ಶೆಂಬೊರಾಂಚೆ ಪಾಂತ್ತಿಸ್ ನೋಟ್ ಆಸ್‌ಲ್ಲೆ. ಭಾಯ್ರ್ ಸರ್‌ಚ್ಯಾ ಆದಿಂ ಮೆನೆಜರಾಲಾಗಿಂ ಪಾಂಚ್ ಹಜಾರ್ ಮುಂಗಡ್ ಘೆತ್‌ಲ್ಲ್ಯಾನ್ ಬರ್‌ಯಾಕ್ ಪಡ್ಲೆಂ. ಶೆಟ್ಟಿಚ್ಯಾ ದೊಳ್ಯಾಂ ಥಾವ್ನ್ ಪಯ್ಸ್ ಪಾವೊಂಕ್ ಹೆ ಪಯ್ಶೆ ಸದ್ದ್ಯಾಕ್ ಪುರೊ ಮ್ಹಣ್ ಹಾಂವೆಂ ಲೆಕ್ಲೆಂ. ಬಸ್ಸ್ ರಾತಿಚ್ಯಾ ಸುಮಾರ್ ಸಾಡೆ ನೋವಾಂಚೆರ್ ಬೆಳ್ಗಾಂವ್ ಜೆವ್ಣಾಕ್ ರಾವ್ತಾನಾ ಉರ್‌ಲ್ಲಿ ವ್ಹಿಸ್ಕಿ ಖಾಲಿ ಕರ್‌ನ್ ಹಾಂವ್ ಉಟ್ಲೊಂ. ಮ್ಹಜೆಂ ನಶೀಬ್ ಬರೆಂ ಆಸ್‌ಲ್ಲೆಂ ಜಾಯ್ಜಾಯ್. ಪೂವಮ್ಮ ಆತಾಂಯಿ ಸಿಟಿ ವಯ್ಲಿ ಉಟ್ಲಿನಾ, ತಿ ಅರ್‌ದ್ಯಾ ನಿದೆಂತ್ ಆಸ್‌ಲ್ಲಿ. ಆಪ್ಣಾಕ್ ಪೋಟ್ ದೊನ್ಪಾರಾಂಥಾವ್ನ್ ಸಾರ್ಕೆಂ ನಾ. ಮ್ಹಾಕಾ ಕಾಂಯ್ ನಾಕಾ. ತುಮಿ ಜೇವ್ನ್ ಯೆಯಾ... ಮ್ಹಣಾಲಿ ತಿ....

ಹಾಂವ್ ಬಸ್ಸಾ ಥಾವ್ನ್ ದೆಂವ್ಲೊಂ ಆನಿ ಮ್ಹಜ್ಯಾ ಪಾಟಾಪಾಟ್ ಸುಂದರಿ, ಆಮಿ ದೊಗಾಂಯಿ ಹೊಟ್ಲಾ ಕುಶಿನ್ ಮುಕಾರ್ ಗೆಲ್ಯಾಂವ್. ಬಸ್ಸ್ ರಾವ್‌ಲ್ಲೆಂ ಹೊಟೆಲಾಚ್ಯಾ ಮುಕ್ಲ್ಯಾ ಮಾರ್‌ಗಾರ್, ಬಸ್ಸಾರ್ ಬಸ್‌ಲ್ಲ್ಯಾಂಕ್ ಹೊಟೆಲಾಚಿ ಮುಕ್ಲಿ ವಾಟ್ ಸಾರ್‌ಕಿ ದಿಸ್ತಾಲಿ.

ಬಸ್ಸಾ ಥಾವ್ನ್ ಪೂವಮ್ಮ ಆಮ್ಕಾಂ ಪಳೆಯ್ತ್ ಆಸ್ತೆಲಿ ಮ್ಹಳ್ಳೊ ಅಂದಾಜ್ ಮ್ಹಜೊ. ಹೊಟೆಲಾಚಾ ಬಾಗ್ಲಾರ್ ಪಾವ್ತಾಚ್ ಹಾಂವೆಂ ವಳೂ ಘುಂವೊನ್ ಪಳಯ್ಲೆಂ. ಎಕಾಚ್ಛಣೆಂ ಕಾಳ್ಜಾಂತ್ ಮ್ಹಜ್ಯಾ ಧಸ್ಕ್ ಜಾಲೆಂ. ಬಸ್ಸಾಥಾವ್ನ್ ದೆಂವೊನ್ ಪೂವಮ್ಮ ಹೊಟೆಲಾ ಕುಶಿನ್ ಯೆತಾಲಿ. ಹಾಂವ್ ರಾವ್‌ಲ್ಲೊಂ ಪಳೆವ್ನ್ ಸುಂದರಿಯಿ ರಾವ್ಲೆಂ. ಪೂವಮ್ಮ ಆಮ್ಚೆ ಸಂಗಿಂ ದೆಂವೊನ್ ಆಯಿಲ್ಲಿ ತರ್ ಮ್ಹಜೊ ಉಪಾವ್ ದುಸ್ರೊಚ್ ಆಸ್ಲೊ. ಪುಣ್ ತಿಣೆಂ ಆಪುಣ್ ಯೇನಾ ಮ್ಹಳ್ಳ್ಯಾನ್ ಸರ್ವ್ ಸಾರ್ಕೆಂ ಜಾಲೆಂ ಮ್ಹಣ್ ಲೆಕ್‌ಲ್ಲೆಂ ಹಾಂವೆಂ. ಆತಾಂ ಕಿತ್ಯಾಕ್ ತಿಣೆಂ ಆಲೋಚನ್ ಬದ್ಲಿಲಿಗಾಯ್?

ತೊಂಡಾರ್ ಕಿತೆಂಯಿ ದಾಕಯ್ನಾಸ್ತಾಂ ಹಾಂವ್ ತಿಕಾಚ್ ರಾಕ್ತಾಂ ಮ್ಹಳ್ಳೆಪರಿಂ ಥಂಯ್ಚ್ ರಾವ್ಲೊಂ. ತಿ ಲಾಗಿಂ ಪಾವ್ಲಿ ’ವಚಾ ತುಮಿ ಜೆವಾಣ್ ಕರಾ... ಮ್ಹಾಕಾ ಚಿಕ್ಕೆ ಕೂಡಿಚಿ ಗರ್‌ಜ್ ತಿರ್‌ಸುಂಕ್ ಆಸಾ...’ ಅಶೆಂ ಮ್ಹಣೊನ್ ತಿ ಕಾಕ್ಸಾಚೆ ವಾಟೆನ್ ಮುಕಾರ್ ಗೆಲಿಂ. ತಿ ಆಮ್ಚೆ ಸಂಗಿ ಆಯಿಲ್ಲಿ ತರೀ ಹಾಂವ್ ಹ್ಯಾಚ್ ಸಂದರ್‌ಬಾಕ್ ರಾಕ್ತಾಲೊಂ...... ತಿ ತಸಲ್ಯಾ ಎಕಾ ಗರ್‌ಜೆನ್ ಸುಂದರಿ ಥಾವ್ನ್ ವಿಂಗಡ್ ವೆತೆಲಿ.

ತ್ಯಾಚ್ ವೆಳಾರ್ ಸುಂದರಿಕ್ ಘೆವ್ನ್ ಪರಾರಿ ಜಾಂವ್ಚೆ.... ಅಶೆಂ ಹಾಂವೆಂ ಲೇಕ್ ಘಾಲೆಂ. ಆತಾಂ ಜಾಲ್ಯಾರೀ ಘಡ್ಲೆಂ ತಶೆಂಚ್. ತಿ ಆಮ್ಚ್ಯಾ ದೊಳ್ಯಾಂ ಭಾಯ್ರ್ ಜಾಲ್ಲಿಚ್ ಸುಂದರಿಚೊ ಹಾತ್ ಹಾಂವೆಂ ಆರಾಯ್ಲೊ. ಎಕಾಚ್ಛಾರಾಂ ತೆಂ ಘಡ್ಬಡ್ಲೆಂ.

ಪುಣ್ ಹಾಂವೆಂ ತಾಕಾ ಕಿತೆಂಚ್ ಉಲಂವ್ಕ್ ಅವ್ಕಾಸ್ ದಿಲೊನಾ. ಹಾತಾಕ್ ಧರ್‌ನ್ ವೋಡ್ನ್ಂಚ್ ಮ್ಹಳ್ಳೆಪರಿಂ ತಾಕಾ ಹಾಂವೆಂ ರಸ್ತ್ಯಾಕ್ ಹಾಡ್ಲೆಂ. ಬಸ್ಸಾ ಥಾವ್ನ್ ಚಿಕ್ಕೆ ಪಯ್ಸ್ ವರೇಗ್ ಆಮಿಂ ಸರಾರಾಂ ಚಲೊನ್ಂಚ್ ಗೆಲ್ಯಾಂವ್, ನಶೀಬಾನ್ ಮುಕಾರ್ ಏಕ್ ಖಾಲಿ ರಿಕ್ಶಾ ಮೆಳ್ಳಿ. ತಿ ಹಾಂವೆಂ ರಾವಯ್ಲಿ, ಸುಂದರಿಕ್ ಲೊಟುನ್ ಮ್ಹಳ್ಳೆಪರಿಂ ರಿಕ್ಶಾರ್ ಬಸವ್ನ್ ಬೆಳ್ಗಾಂವ್ಚ್ಯ್ ಬಸ್ಸ್‌ಸ್ಟೆಂಡಾಕ್ ರಿಕ್ಶಾ ಧಾಂವ್ಡಾಂವ್ಕ್ ಹಾಂವೆಂ ಫರ್‌ಮಾಯ್ಲೆಂ.

ಧಾ ಮಿನುಟಾಂ ಭಿತರ್ ರಿಕ್ಶಾ ಬಸ್ಸ್‌ಸ್ಟೆಂಡಾಕ್ ಪಾವ್ಲಿ. ಸರ್ವ್ ಆಮ್ಕಾಂ ಜಾಯ್ ತೆಂ ಘಡೊನ್ ಯೆತಾಲೆಂ. ಬಸ್ಸ್ ನಿಲ್ದಾಣಾಂತ್ ಏಕ್ ಟ್ಯಾಕ್ಸಿ ಉಬಿ ಆಸ್ಲಿ. ಜಾತಾ ತಿತ್ಲ್ಯಾ ವೆಗ್ಗಿಂ ಹುಬ್ಳಿ ಸೊಡ್ಲ್ಯಾರ್ ಜಾಯ್ ತಿತ್ಲೆ ಪಯ್ಶೆಂ ದಿತಾಂ ಮ್ಹಣ್ ಸಾಂಗ್‌ಲ್ಲ್ಯಾನ್ ಡ್ರೈವರ್ ಒಪ್ಲೊ. ಅಶೆಂ ಆಮಿ ತ್ವರಿತಾಯೆನ್ ಹುಬ್ಳಿ ಪಾವ್ಲ್ಯಾಂವ್.

ಸುಂದರಿಕ್ ಕಿತೆಂಚ್ ಸಮ್ಜೊಂಕ್ ನಾ. ಆಮಿ ಬಸ್ಸ್ ಕಿತ್ಯಾಕ್ ಸೊಡ್ಲೆಂ? ಕಾರಾರ್ ಕಿತ್ಯಾಕ್ ಪಾಟಿಂ ವೆಚೆಂ? ಹೆಂ ಕಾಂಯ್ಚ್ ತಾಕಾ ಕಳಿತ್ ನಾತ್ಲೆಂ. ’ಆಪ್ಣಾಂಚೆಂ ಬೇಗ್ ಬಸ್ಸಾರ್ ಆಸಾ’ ಮ್ಹಣಾಲೆಂ ತೆಂ ಏಕ್ ಪಾವ್ಟಿಂ... ’ವ್ಹಡ್ ನಾ- ಹಾಂವ್ ತುಕಾ ನವಿಂ ಕಾಪ್ಡಾಂ ಘೆವ್ನ್ ದಿತಾಂ’ ಮ್ಹಳ್ಳೆಂ ಹಾಂವೆಂ ಉಪ್ರಾಂತ್ ತೆಂ ಕಿತೆಂಚ್ ಉಲಯ್ಲೆಂ ನಾ. ಹುಬ್ಳಿಚಾ ಎಕಾ ಹೊಟ್ಲಾಂತ್ ಆಮಿ ತಿ ರಾತ್ ಸಾರ್‌ಲಿ. ಸುಂದರಿಚೆರ್ ಹಾಂವೆ ಬೊಟ್ ಸಯ್ತ್ ಲಾಯ್ಲೆಂನಾ.

ತಸಲಿ ಹುಮೆದ್‌ಯಿ ಮ್ಹಾಕಾ ನಾತ್‌ಲ್ಲಿ. ಹಾಂವ್ ದುಸ್ರ್ಯಾಚ್ ಚಿಂತ್ನಾಂನಿ ಮಗ್ನ್ ಜಾಲ್ಲೊಂ... ಸುಂದರಿ ನಿದ್ಲೆಂ. ಹಾಂವ್ ಸಗ್ಳಿ ರಾತ್ ಘಡ್ಯೆನ್-ಘಡಿ ವಿಸ್ಕಿ ಮಾರ್‌ನ್ ಮುಕ್ಲೆಂ ಯೋಜನ್ ನಿಯಾಳ್ತಾಲೊಂ. ಹೊಟ್ಲಾ ಥಾವ್ನ್ ಭಾಯ್ರ್ ವಚೊನ್ ಏಕ್ ಕಾರ್ ಹಾಂವೆಂ ಭಾಡ್ಯಾಕ್ ಕೆಲೆಂ. ಆನಿ ಸಕಾಳಿಂಚ್ಯಾ ಆಟಾಂ ಭಿತರ್ ಆಮಿ ಹುಬ್ಳಿ ಉತ್ರೊನ್ ಮಂಗ್ಳುರ್‌ಚ್ಯಾ ವಾಟೆಕ್ ಲಾಗ್ಲ್ಯಾಂವ್.

ಆನಿ ಹಾಂಗಾ ಥಾವ್ನ್ ಮ್ಹಜ್ಯಾ ಜಿವಿತಾಚೊ ರಸ್ತೊ ಬದಲ್ಲೊ. ಹಾಂವ್ ಆತಾಂ ಸಂಸಾರಿ ಮನಿಸ್ ಜಾಲ್ಲೊಂ. ಸುಂದರಿ ಸಂಗಿಂ ಮ್ಹಜಿ ಜಿಣಿ ಹಾಂವೆಂ ಸುರು ಕೆಲ್ಲಿ. ಮಂಗ್ಳುರ್ ಪಾವ್ತಾನಾ ಥೊಡೆ ಪಯ್ಶೆಂ ಮ್ಹಜೆಲಾಗಿಂ ಆಸ್‌ಲ್ಲ್ಯಾನ್ ನಾಗೋರಿಚಾ ಗರೋಡಿ ಪಾಟ್ಲ್ಯಾನ್ ಆಸ್ಚ್ಯಾ ವಠಾರಾಂತ್ ಥೊಡೆ ಪಯ್ಶೆ ಮುಂಗಡ್ ದೀವ್ನ್ ಏಕ್ ಲ್ಹಾನ್ ಬಿಡಾರ್ ಹಾಂವೆಂ ಭಾಡ್ಯಾಕ್ ಘೆತ್‌ಲ್ಲೆಂ. ಸುರ್‌ವೆಚೆ ಥೊಡೆ ದೀಸ್ ಸಂತೊಸಾನ್ಂಚ್ ಪಾಶಾರ್ ಜಾಲೆಂ ಮ್ಹಣ್ಯೆತ್. ಹಾತಾಂತ್ಲೆಂ ಪಯ್ಶೆ ಮುಗ್ದೊನ್ ಯೆತಾನಾ ಮ್ಹಾಕಾ ಫುಡಾರಾಚಿ ಖಂತ್ ಸುರು ಜಾಲಿ.

ಪುಣ್ ಮ್ಹಜ್ಯಾ ಅದ್ರಶ್ಟಾನ್ ಜಾಯ್ಜಾಯ್ ಆಮ್ಚ್ಯಾ ಸೆಜಾರ್‌ಚ್ಯಾ ಎಕಾ ಮನ್ಶಾಚ್ಯಾ ಮ್ಹಿನತೆನ್ ಕೊಡಿಯಾಲ್‌ಬೈಲ್ ಎಕಾ ವಕೀಲಾಲಾಗಿಂ ಗುಮಾಸ್ತಾಚೆಂ ಕಾಮ್ ಲಾಗ್ಲೆಂ. ಸಾಂಬಾಳ್ ಉಣೊ, ಪುಣ್ ಹಾಂವೆಂ ಪರ್‌ವಾ ಕೆಲಿನಾ. ನಶೀಬ್ ಆಸ್ಲ್ಯಾರ್ ಬರೆಂ ಕಾಮ್ ಮುಕಾರಿಂ ಮೆಳ್ತೆಲೆಂ ಮ್ಹಣ್ ಚಿಂತುನ್ ಕಾಮಾಕ್ ಲಾಗ್ಲೊಂಚ್. ಆತಾಂ ಮ್ಹಜೆಂ ಜಿವಿತ್ ಸಂತೊಸಾಚೆಂ ಜಾಲ್ಲೆಂ. ಸುಂದರಿ ಸಂಗಿಂ ಆದ್ಲೆಂ ಸರ್ವ್ ಹಾಂವ್ ವಿಸಾರ್‌ಲೊಂ. ಬಸ್ಸಾರ್ ಹಾಂವೆಂ ಧೈರ್ ಘೆವ್ನ್ ಘಟ್ ಮನ್ ಕೆಲ್ಲ್ಯಾನ್ ಕಿತ್ಲ್ಯಾ ಬರ್‌ಯಾಕ್ ಪಡ್ಲೆಂ ಮ್ಹಣ್ ಹಾಂವ್ ಚಿಂತಾಲೊಂ.

ಶೆಟ್ಟಿಚೊ ಉಡಾಸ್ ಯೆತಾನಾ ಮ್ಹಜೆಂ ಕಾಳಿಜ್ ಕಾವ್ಜೆಣೆನ್ ದಡ್ದಡ್ತಾಲೆಂ ತರೀ ಮಂಗ್ಳುರ್ ಥಾವ್ನ್ ತೊ ಆತಾಂ ಸುಮಾರ್ ಮೈಲಾಂ ಪಯ್ಸ್ ಆಸಾ- ತ್ಯಾ ಶಿವಾಯ್ ಹಾಂವ್ ಬೆಳ್ಗಾಂವ್ ಥಾವ್ನ್ ಮಂಗ್ಳೂರಾಕ್‌ಚ್ಚ್ ಧಾಂವೊನ್ ಆಯ್ಲಾಂ ಮ್ಹಣ್ ತಾಕಾ ಕಶೆಂ ಕಳಿತ್? ಥೊಡೆ ದೀಸ್ ಬೊಂಬೈ-ಬೆಳ್ಗಾಂವ್ಚಾ ಸುತ್ತುರಾಂನಿ ಸೊದಯ್ತಾಲೊ, ನಂತರ್ ಆಪಾಪಿಂ ವಿಚಾರ್‌ತಾಲೊ-ಅಸಲ್ಯಾ ಚಿಂತ್ನಾಂನಿ ಹಾಂವ್ ಮ್ಹಾಕಾಚ್ ಧಯ್ರ್ ದಿತಾಲೊಂ. ಸುಂದರಿ ಬೋವ್ ಖುಶಾಲ್ ಆಸ್ಲೆಂ. ತಾಚ್ಯಾ ತೊಂಡಾಕ್ ಪಳಯ್ತಾನಾ, ಹಾಂವೆಂ ಆದಿಂ ಕೆಲ್ಲ್ಯಾ ಸರ್ವ್ ಕರ್ಮಾಂಚಿ ವಿಸರ್ ಪಡ್ತಾಲಿ. ಎಕಾ ಚೆಡ್ವಾಕ್ ಪುಣಿ ತ್ಯಾ ಯೆಮ್ಕೊಂಡಾ ಥಾವ್ನ್ ಹಾಂವೆ ಸುಟ್ಕಾ ದಿಲಿ ಮ್ಹಳ್ಳೆಂ ಚಿಂತಾನಾ ಮ್ಹಾಕಾ ಸಮಾದಾನ್ ಭಗ್ತಾಲೆಂ. ಸಂತೊಸಾನ್ ಆಮಿ ದೀಸ್ ಸಾರ್‌ತಾಲ್ಯಾಂವ್.

ಸುಂದರಿ ಸಂಗಿಂ ಬಸೊನ್ ಉಲಂವ್ಚ್ಯಾ ಆಶೆನ್ ಹಾಂವ್ ಕಾಮಾ ಥಾವ್ನ್ ಧಾಂವೊನ್ ಯೆತಾಲೊಂ. ತಿತ್ಲ್ಯಾಚ್ ಅತ್ರೆಗಾನ್ ಸುಂದರಿ ಮ್ಹಾಕಾ ರಾಕೊನ್ ಆಸ್ತಾಲೆಂ. ತ್ಯಾ ನೆಣ್ತ್ಯಾ ಮುಗ್ದ್ ತೊಂಡಾರ್ ಆಸ್ಚ್ಯಾ ತ್ಯಾ ಸೊಬಿತ್ ನಾಕಾಕ್ ಪಳಯ್ತಾನಾ ಮ್ಹಜಿ ಪುರಾಸಣ್ ಧಾಂವ್ತಾಲಿ. ತ್ಯಾ ನಾಕಾ ವರ್‌ವಿಂಚ್ ಮ್ಹಜ್ಯಾ ಜಿಣ್ಯೆಂತ್ ಬದ್ಲಾವಣ್ ಜಾಲ್ಲಿ. ಘರ್ ಕರ್‌ನ್ ಸಾಂಗಾತಾ ಜಿಯೆಂವ್ಚ್ಯಾ ಜಿವಿತಾಂತ್ ಮೆಳ್ಚೆಂ ಖರೆಂ ಸುಖ್ ಹಾಂವೆಂ ಭಗುಂಕ್ ಕಾರಾಣ್ ಜಾಲ್ಲೆಂ ತೆಂ ನಾಕ್.... ತಾಕಾ ಹಾಂವ್ ಜನ್ಮ್-ಜನ್ಮಾಂತರ್ ಋಣಿ ಜಾವ್ನಾಸ್ತೊಲೊಂ ಮ್ಹಣ್ ಹಾಂವೆಂ ನಿಚೆವ್ ಕೆಲ್ಲೊ.

ಪುಣ್ ಏಕ್ ಉಣೆಂಪಣ್ ತ್ಯಾ ನಾಕಾರ್ ದಿಸ್ತಾಲೆಂ. ತೆಂ ನಾಕ್ ಮೂಗುತಿ ನಾಸ್ತಾಂ ಬೋರ್ ಆಸ್ಲೆಂ. ಲ್ಹಾನ್‌ಪಣಾರ್ ಕಾಡ್‌ಲ್ಲೊ ಬುರಾಕ್ ಥಂಯ್ ಆಸ್‌ಲ್ಲೊ ತರೀ ತಾಂತುಂ ಏಕ್ ಮೂಗುತಿ ಆಸ್‌ಲ್ಲಿ ತರ್ ತ್ಯಾ ನಾಕಾಕ್ ಆನಿ ಕಿತ್ಲಿ ಸೊಬಾಯ್ ಯೆತಿ ಕೊಣ್ಣಾ. ಸುಂದರಿಕ್ ಪಳಯ್ಲ್ಯಾ ನಂತರ್ ಮ್ಹಜ್ಯಾ ಮತಿಂತ್ಲಿಂ ಚಿಂತ್ನಾಂ ಹಿಂ. ಅಸಲಿ-ತಸಲಿ ಮೂಗುತಿ ನ್ಹಂಯ್, ಭಾಂಗಾರಾಚಿ ಮೂಗುತಿ ತ್ಯಾ ನಾಕಾಕ್ ಸೊಬಯ್ತೊಲೊಂ- ಮ್ಹಳ್ಳಿಂ ಮ್ಹಜಿ ಗುಪಿತ್ತ್ ಆಶಾ ಜಾವ್ನಾಸ್ಲಿ.

ಪುಣ್ ಭಾಂಗಾರಾಚಿ ಮೂಗುತಿ ಕರಂವ್ಚಿ ಮ್ಹಳ್ಯಾರ್ ಉಣ್ಯಾರ್ ತಿನ್ಶಿಂ-ಚಾರ್‌ಶಿಂ ರುಪ್ಯಾಂಚಿ ಸಂಗತ್. ಆತಾಂಚಾ ಮ್ಹಜ್ಯಾ ಪರಿಸ್ಧಿತೆಂತ್ ತಿ ಅಸಾದ್ಯಾಚಿ ಗಜಾಲ್ ಜಾವ್ನಾಸ್ಲಿ. ವಯ್ಲ್ಯಾನ್ ಆಮ್ಚೊ ನವೊಚ್ ಸಂಸಾರ್ ಜಾಲ್ಲ್ಯಾನ್ ಮಯ್‌ನ್ಯಾ-ಮಯ್‌ನ್ಯಾಕ್ ಘರಾ ಜಾಯ್ ಜಾಲ್ಲ್ಯೊ ಗರ್‌ಜೆಚ್ಯೊ ವಸ್ತು-ಬೊಶಿಯೊ, ಕೊಪಾಂ, ಆಯ್ದಾನಾ, ಕದೆಲ್, ಬಾಂಕ್ -ಇತ್ಯಾದಿ ಎಎಕ್‌ಚ್ ಘೆತಾಲೊ ತರೀ ಹರ್‌ಎಕಾ ಮಯ್‌ನ್ಯಾಂತ್ ಥೊಡೆ ಪಯ್ಶೆ ತರೀ ಉರವ್ನ್ ತ್ಯಾ ನಾಕಾಕ್ ಎಕ್ ಮೂಗುತಿ ಕರ್‌ನ್ ಘಾಲ್ತಾಲೊಂ ಮ್ಹಳ್ಳೊ ನಿಚೆವ್ ಹಾಂವೆಂ ಕೆಲೊ. ಕಶ್ಟಾಂನಿ ತರೀ ಸಂತೊಸಾನ್ ಆಟ್ ಮಯ್‌ನೆ ಪಾಶಾರ್ ಜಾಲೆ. ತ್ಯಾ ಎಕಾ ಸಕಾಳಿಂ ಹಾಂವ್ ಸದಾಂಚೆ ಪರಿಂ ಬಸ್ಸಾ ಥಾವ್ನ್ ಹಂಪನ್‌ಕಟ್ಟಾ ದೆಂವೊನ್ ಕೊಡಿಯಾಳ್ ಬೈಲ್ಚ್ಯಾ ವಾಟೆನ್ ಘುಂವ್ಚ್ ಖಾತಿರ್ ರಸ್ತೊ ಉತರ್‌ಚೆಂ ಆಟ್ಟಾಣೆ ಕರ್‌ತಾನಾ, ಮುಕ್ಲ್ಯಾ ರಸ್ತ್ಯಾರ್ ದೀಶ್ಟ್ ಪಡ್‌ಲ್ಲಿಚ್ ಮ್ಹಜೆಂ ಕಾಳಿಜ್ ರಾವ್ಲೆಂ.

ರಾವ್ಲೆಲ್ಲ್ಯಾಕಡೆನ್ ಹಾಂವ್ ರೂಕ್ ಜಾಲೊಂ. ಮುಕ್ಲ್ಯಾ ರಸ್ತ್ಯಾರ್ ಮ್ಹಜೆಬರಿ ರಸ್ತೊ ಉತರ್‌ನ್ ಹೆವ್ಶಿನ್ ಯೇಂವ್ಕ್ ರಾಕೊನ್ ಆಸ್‌ಲ್ಲಿ ಏಕ್ ವೆಕ್ತಿ-ಘಡ್ಯೆನ್ ಹಾಂವೆಂ ತಾಚಿ ವಳಕ್ ಧರ್‌ಲಿ. ಜನ್ನಾ -ಲಕ್ಕಾಶೆಟ್ಟಿಚೊ ಬೋಡಿಗಾರ್‌ದ್! ಕಿತೆಂ ಕರುಂಕೀ ಮ್ಹಾಕಾ ತಕ್ಶಣ್ ಮತಿಕ್ ಆಯ್ಲೆಂನಾ. ಘುಂವೊನ್ ಪಾಟಿಂ ವಚೊಂಕೀ ಅವ್ಕಾಸ್ ನಾಸ್ಲೊ. ರಸ್ತ್ಯಾ ಮದೆಂ ವಾಹನಾ ಉಣಿಂ ಜಾಲ್ಲಿಂ ದೆಕುನ್ ತೊ ತುರ್‌ತಾನ್ ಹ್ಯಾ ವಾಟೆಕ್ ಯೆತಾಲೊ. ತಕ್ಶಣಾಂಚ್ ಹಾಂವೆಂ ಖಂಯ್ ನಾತ್‌ಲ್ಲೆಂ ಧಯ್ರ್ ಘೆತ್ಲೆಂ ಆನಿ ಶೀದಾ ತಾಕಾ ಪಳನಾತ್ಲ್ಯಾಬರಿಚ್ ಮುಕಾರ್-ಮುಕಾರ್‌ಚ್ ತಾಕಾ ಉತರ್‌ನ್ ತೆವ್ಶಿಲ್ಯಾ ವಾಟೆಕ್ ಪಾವ್ಲೊಂ. ಪಾಟಿಂ-ಘುಂವೊನ್ ಪಳೆಂವ್ಚೆಂ ಧೈರ್ ಮ್ಹಾಕಾ ನಾತ್ಲೆಂ. ಹಾಂವ್ ಮ್ಹಜ್ಯಾ ವಾಟೆನ್ ಚಲ್ತಾಲೊಂ ತರೀ ಮತ್ ಥಾರ್‌ಯಾರ್ ನಾತ್ಲಿ.

ಆಫಿಸಾಕ್ ಪಾವ್ತಾಚ್ ಸ್ಧಿಮಿತಾಕ್ ಯೇಂವ್ಕ್ ಥೊಡೊ ವೇಳ್ ಲಾಗ್ಲೊ. ತಾಣೆಂ ಮ್ಹಾಕಾ ಪಳೆಲೆಂಗಾಯ್? ಪಳೈಲ್ಯಾರ್ ಉಲಯ್ಲೊನಾ ಕಿತ್ಯಾಕ್? ವಳಕ್ ಪುಣೀ ಮೆಳ್ಳಿನಾಂಗೀ? ಯಾ ಪಳೆವ್ನ್ ಪಳೆನಾತ್ಲ್ಯಾಪರಿಂ ನಟನ್ ಪುಣಿಂ ಕೆಲೆಂಗಾಯ್? ನಾಂನಾತಿಂ ದುಬಾವಿ ಚಿಂತ್ನಾಂ ಮತಿಂತ್ ಘುವೊಂಕ್ ಲಾಗ್ಲಿಂ. ಹಾಂವ್ ಮಂಗ್ಳೂರಾಂತ್ ಆಸಾಂ ಮ್ಹಳ್ಳಿ ಖಬಾರ್ ಶೆಟ್ಟಿಕ್ ಪಾವ್ಲಿ ತರ್ ಆಪ್ಲ್ಯಾ ಜಣಾಂಕ್ ಧಾಡ್ನ್ ಸಗ್ಳೆಂ ಮಂಗ್ಳೂರ್ ವೊಮ್ತೆಂ-ಉದಾರೆಂ ಕರ್‌ನ್ ಶೆಟ್ಟಿ ಮ್ಹಾಕಾ ಧರಯ್ತೊಲೊ ಖಂಡಿತ್.

ಹ್ಯಾ ಉಪ್ರಾಂತ್ ಮಂಗ್ಳೂರಾಂತ್ ರಾಂವ್ಚೆ ಕಶ್ಟಾಂಚೆಂ ಜಾಲೆಂ. ಕಠಿಣ್ ನಿರಾಶಾ ಮ್ಹಾಕಾ ಭಗ್ಲಿ. ಸುಖಾಚೆಂ ಮ್ಹಜೆಂ ಜಿವಿತ್ ಎಕಾ ಪಾಂವ್ಡ್ಯಾರ್ ಆಸ್ತಾನಾಂಚ್ ಅಶೆಂ ಘಡ್‌ಲ್ಲೆಂ ಚಿಂತುನ್ ದೆದೆಸ್ವಾರ್ ಜಾಲೊಂ ಹಾಂವ್. ತರೀ ’ಜನ್ನಾಕ್ ವಳಕ್ ಮೆಳ್ಳ್ಯಾ ಯಾ ನಾ’ ಹೊ ದುಬಾವ್ ಮ್ಹಾಕಾ ಧೊಸ್ತಾಲೊ. ತಾಚೆರ್ ಮ್ಹಜಿ ಪಯ್ಲಿ ನದರ್ ಪಡ್ತಾಂ ತೊ ಮ್ಹಾಕಾಚ್ ಪಳೆವ್ನ್ ಆಸ್ಲೊ. ಪುಣ್ ರಸ್ತೊ ಉತರ್‌ತಾನಾ ಹಾಂವೆಂ ತಾಚ್ಯಾ ತೊಂಡಾಕ್ ಪಳೆಂವ್ಕ್ ನಾ, ತೊ ಮ್ಹಾಕಾ ಪಳಯ್ತಾಲೊ ಯಾ ನಾ ತೆಂಯಿ ಮ್ಹಾಕಾ ಕಳಿತ್ ನಾ.....

ಹಾಂವ್‌ಚ್ ಕಾಂಯ್ ಭೆಶ್ಟೊ ದುಬಾವ್ ಕರ್‌ತಾಂಗಾಯ್? ಸುಂದರಿ ಸಂಗಿಂ ಆದ್ಲ್ಯಾಂ ಸರ್ವ್ ಸಂಗ್ತಿಂಕ್ ಹಾಂವ್ ವಿಸ್ರೊನ್ ಯೆತಾಲೊಂ. ಆತಾಂ ಪರತ್ ಭಿಂಯಾಚೊ ಶಿರ್ಶಿರೊ ಮ್ಹಜ್ಯಾ ಶಿರಾಂನಿ ವ್ಹಾಳೊಂಕ್ ಸುರು ಜಾಲ್ಲೊ. ಶೆಟ್ಟಿಚಾ ಪಂಗ್ಡಾಂತ್ ಆಸಾತ್ ಚಡಾವತ್ ಜಣ್ ಮಂಗ್ಳುರ್‌ಚೆ.... ಜನ್ನಾ ರಜೆರ್ ಗಾಂವಾಕ್ ಆಯಿಲ್ಲೊ ಜಾಯ್ಜೆಯ್. ಆತಾಂ ಕಿಂತೆಂಯಿ ಜಾಂವ್, ಜನ್ನಾನ್ ಮ್ಹಾಕಾ ಪಳಯ್ಲೆಂಚ್ ಜಾಲೆಂ, ಪುಣ್ ಸದ್ದ್ಯಾಕ್ ತಾಕಾ ಮ್ಹಜೆಂ ಆಫಿಸ್ ಯಾ ಮ್ಹಜೆಂ ಘರ್ ಖಂಯ್ ತೆಂ ಕಳಿತ್ ನಾ.... ಕಸಲಿ ತರೀ ಬಂಧಬಸ್ತ್ ಕರಿಜಾಯ್.

ರಜೆರ್ ಆಯಿಲ್ಲೊ ಜನ್ನಾ ಪಾಟಿಂ ವೆತಾಸರ್ ಪುಣೀ ಆಪ್ಣೆಂ ಚತ್ರಾಯ್ ಘೆಜಾಯ್. ಅಶೆಂ ಮ್ಹಾಕಾಚ್ ಥೊಡೆಂ ಸಮಾದಾನ್ ಕರ್‌ನ್ ಘೆವ್ನ್ ಹಾಂವ್ ಮ್ಹಜ್ಯಾ ಕಾಮಾಕ್ ಲಾಗ್ಲೊಂ. ದನ್ಪರಾಂ ತೀನ್ ವೊರಾರ್ ವಕೀಲಾಸಂಗಿ ಕೊಡ್ತಿಚೆಂ ಕಾಮ್ ಮುಗ್ದೊನ್ ಆಫಿಸಾಕ್ ಪಾವ್ತಾನಾ ಆಫಿಸಾಂತ್ಲ್ಯಾ ಸ್ಟೆನೊನ್ ಮ್ಹಾಕಾ ಏಕ್ ಮಾರೆಕಾರ್ ಖಬಾರ್ ಸಾಂಗ್ಲಿ. ಅರ್‌ದ್ಯಾ ವೊರಾ ಆದಿಂ ದೋಗ್ ಜಣ್ ಆಫಿಸಾಕ್ ಆಯಿಲ್ಲೆ ಮಧುಕರ್ ಮ್ಹಳ್ಳ್ಯಾಕ್ ವಿಚಾರ್‌ನ್, ಪುಣ್ ಸ್ಟೆನೊನ್ ತಾಂಕಾಂ ತಿಳ್ಸಿಲೆಂಕೀ ಮಧುಕರ್ ನಾಂವಾಚೊ ಹಾಂಗಾ ಕೊಣೀ ನಾ...

ಪ್ರಬಾಕರ್ ಜಾಲ್ಯಾರ್ ಆಸಾ ಮ್ಹಣ್. ಉಪ್ರಾಂತ್ ಮಧುಕರ್ ನ್ಹಂಯ್-ಪ್ರಬಾಕರ್‌ಚ್ ಜಾಯ್ ಜಾಲ್ಲೊ ವೆಕ್ತಿ ಮ್ಹಣ್ ತೆ ಒಪ್ವಾಲೆ. ಮ್ಹಜೆಂ ಘರ್ ಖಂಯ್ಸರ್ ಮ್ಹಣ್ ತಾಣಿಂ ವಿಚಾರ್‌ಲೆಂ. ಪುಣ್ ಚೆಡ್ವಾಕ್ ಹಾಂವ್ ಗರೋಡಿಲಾಗಿಂ ರಾವ್ತಾಂ ಮ್ಹಣ್ ಮಾತ್ರ್ ಕಳಿತ್ ನಾತ್ಲೊ. ದೆಕುನ್ ತಾಣೆಂ ಖಂಯ್ಗೀ ಗರೋಡಿ ಲಾಗಿಂ ರಾವ್ತಾಂ ಮ್ಹಣ್ ಮಾತ್ರ್ ತಿಳ್ಸಿಲ್ಲೆಂ. ತ್ಯಾ ನಂತರ್ ತೆ ಚಲ್ಲೆ. ತಾಚೆ ಥಾವ್ನ್ ಹಿ ಖಬಾರ್ ಆಯ್ಕೊನ್ ಹಾಂವ್ ಎಕಾಚ್ಛಾಣೆಂ ಲಾಗ್ಶಿಲ್ಯಾ ಕದೆಲಾರ್ ಗಳ್ಳೊಂ. ಚೆಡ್ವಾಲಾಗಿಂ ಹಾಂವೆಂ ತಾಂಚಾ ಜೀವಾಚಿ ಪರಿಚಯ್ ವಿಚಾರ್‌ಲಿ. ತಾಣೆಂ ಸಾಂಗ್‌ಲ್ಲ್ಯಾ ಪ್ರಕಾರ್ ದೊಗಾಂ ಪಯ್ಕಿ ಎಕ್ಲೊ ಖಂಡಿತ್ ಜಾವ್ನ್ ’ಜನ್ನಾ’ ಜಾವ್ನಾಸ್ಲೊ! ತರ್ ಜನ್ನಾನ್ ಕಾಮ್ ಸುರು ಕೆಲಾಂ. ಹಾಂವೆಂ ಆಫಿಸಾಚಾ ಘಡಿಯಾಳಾರ್ ದೀಶ್ಟ್ ಘಾಲಿ. ವೊರಾಂ ಸಾಡೆಚಾರ್ ಜಾತಾಲಿಂ. ಜಿವಾಂತ್ ಭಲಾಯ್ಕಿ ನಾಂ ಮ್ಹಣ್ ಸಾಂಗೊನ್ ಹಾಂವ್ ಉಟಾಉಟಿಂ ರಿಕ್ಶಾ ಧರ್‌ನ್ ಘರಾ ಪಾವ್ಲೊಂ.

ದಾರಾಕ್ ಖಿಳ್ ಘಾಲ್ಲಿ. ಮ್ಹಾಕಾ ತಕ್ಶಣಾ ಉಡಾಸ್ ಆಯ್ಲೊ... ಸುಂದರಿಕ್ ಥೊಡ್ಯಾ ದಿಸಾಂ ಥಾವ್ನ್ ಪಾಂಯಾಂಚಿಂ-ಹಾತಾಂಚಿಂ ಬೊಟಾಂ ವೊಳ್ತಾಲಿಂ....

ಚಿಮ್ಟೆ ಕಾಡ್ಲ್ಯಾರೀ ದುಕಾನಾ ಮ್ಹಣ್ ತೆಂ ಮ್ಹಣ್ತಾಲೆಂ. ದೆಕುನ್ ಹಾಂವೆಂಚ್ ತಾಕಾ ಆಜ್ ದಾಕ್ತೆರಾಲಾಗಿಂ ವಚೊನ್ ಪರೀಕ್ಶಾ ಕರಯ್ ಮ್ಹಣ್ ಸಾಂಗ್‌ಲ್ಲೆಂ. ಘರಾ ಕುಶಿಚ್ಯಾ ಸ್ತ್ರೀಯೆಕ್ ಸಾಂಗಾತಾ ಘೆವ್ನ್ ವಚ್ ಮ್ಹಳ್ಳೆಲ್ಯಾನ್ ಹಾಂವ್ ತಾಂಚಾ ಘರಾ ಗೆಲೊಂ. ಭುರ್‌ಗಿಂ ಭಾಯ್ರ್ ಸೊಪ್ಯಾರ್ ಖೆಳ್ತಾಲಿಂ. ತಾಂಚಿ ಆವಯ್ ಸುಂದರಿ ಸಂಗಿಂ ಗೆಲ್ಲಿ ಜಾಲ್ಲ್ಯಾನ್ ಹಾಂವೆ ತಾಂಚಾ ಆಜ್ಯೆಕ್ ಉಲೊ ದಿಲೊ. ಥೊಡ್ಯಾ ವೆಳಾನ್ ಭಾಯ್ರ್ ಆಯ್ಲಿ ತಿ....

"ಅರೇ..... ಆಜ್ ಕಿತೆಂ ವೆಗ್ಗಿಂ ಆಯ್ಲೊಯ್....." ಮ್ಹಣಾಲಿ ತಿ ಹಾಸೊನ್,

"ಚಿಕ್ಕೆಂ ಪಯ್ಲೆಂ ಪಾವ್‌ಲ್ಲೊಯ್ ತರ್ ತುಜೆ ಈಶ್ಟ್ ತುಕಾ ಮೆಳ್ತೆ. ಧಾ ಮಿನುಟಾಂ ಆದಿಂ ತುಕಾ ವಿಚಾರ್‌ನ್ ಗೆಲೆ ಮಾತ್ರ್." ತಿಚಿಂ ಉತ್ರಾಂ ಆಯ್ಕೊನ್ ಪರ್‌ತ್ಯಾನ್ ಹಾಂವ್ ಕಂಗಾಲ್ ಜಾಲೊಂ. ಜನ್ನಾ ತರ್ ಹಾಂಗಾಂಯಿ ಪಾವ್ಲಾ? ಚಿಂತಾನಾಂಚ್ ಜಿವಾಂತ್ ಮ್ಹಜ್ಯಾ ಕಾಂಪ್ ಸುಟ್ಲಿ. ಮ್ಹಾತಾರೆಲಾಗಿಂ ಸಾರ್‌ಕಿ ಖಬಾರ್ ಕಾಡ್ತಾನಾ ತಿ ಮ್ಹಣಾಲಿ:

"ಸುಂದರಿ ಆನಿ ಹ್ಯಾ ಭುರ್‌ಗ್ಯಾಂಚಿ ಆವಯ್ ದಾಕ್ತೆರಾಲಾಗಿಂ ಭಾಯ್ರ್ ಸರ್‌ನ್ ಗೆಲ್ಲ್ಯಾ ೧೫ ಮಿನುಟಾಂನಿ ದೋಗ್ ತರ್‌ನಾಟೆ ರಿಕ್ಶಾರ್ ಆಯ್ಲೆ. ಪ್ರಬಾಕರಾಚೆಂ ಘರ್ ಖಂಚೆಂ ಮ್ಹಣ್ ತಾಣಿಂ ವಿಚಾರ್‌ಲೆಂ. ತಿಂ ಘರಾ ನಾಂತ್ ಮ್ಹಳ್ಳೆಂ ಹಾಂವೆಂ. ತೊ ಕಾಮಾಕ್ ಗೆಲಾ ಆನಿ ತಾಚಿ ಬಾಯ್ಲ್ ದಾಕ್ತೆರಾಲಾಗಿಂ ಗೆಲ್ಯಾ. ತುಮಿ ಕೊಣ್ ಮ್ಹಣ್ ವಿಚಾರ್‌ಲೆಲ್ಯಾಕ್ ಆಮಿ ತಾಚೆ ಈಶ್ಟ್ ಮ್ಹಣಾಲೆ ತೆ. ಚಡ್ತಿಕ್ ಕಾಂಯ್ ಉಲಯ್ನಾಸ್ತಾಂ ತಾಂಚೆ-ತಾಂಚೆ ಭಿತರ್ ಕಿತೆಂಗೀ ಪುಸ್ಪಸ್ಲೆ ಆನಿ ಆಮಿ ತೊ ಘರಾ ಆಯ್ಲ್ಯಾ ಉಪ್ರಾಂತ್ ಯೆತಾಂವ್ ಮ್ಹಣ್ ಸಾಂಗೊನ್ ಆಯಿಲ್ಲ್ಯಾಚ್ ರಿಕ್ಶಾರ್ ಚಲ್ಲೆ...."

ಇತ್ಲೆಂ ಸಾಂಗೊನ್ ಮ್ಹಾತಾರಿ ಭಿತರ್ ಗೆಲಿ. ಹಾಂವ್ ತುರ್‌ತಾನ್ ಮ್ಹಜ್ಯಾ ಬಿಡಾರಾಕ್ ಆಯ್ಲೊಂ. ಮುಕಾರ್ ಕಿತೆಂ ಕರುಂ ತೆಂ ಮ್ಹಕಾ ಕಳ್ಳೆಂನಾ. ಹ್ಯಾ ಘರಾಂತ್ ಫುಡೆಂ ರಾವ್ಲ್ಯಾರ್ ಮ್ಹಜ್ಯಾ ತಶೆಂ ಸುಂದರಿಚಾ ಜಿವಾಕ್ ಅಪಾಯ್ ಆಸಾ ತೆಂ ಖಂಡಿತ್ ಮ್ಹಳ್ಳೆಂ ಹಾಂವ್ ಜಾಣಾ’ಸ್ಲೊಂ. ಜನ್ನಾನ್ ಸಕಾಳಿಂ ಮ್ಹಜಿ ವಳಕ್ ಧರ್ಲ್ಯಾ. ಬಹುಶಾ ತೊ ಮ್ಹಜ್ಯಾ ಪಾಟಾಪಟ್ ಯೇವ್ನ್ ಮ್ಹಜೆಂ ಆಫಿಸ್ ಪಳೆವ್ನ್ ಪಾಟಿಂ ಗೆಲಾ. ಉಪ್ರಾಂತ್ ಆಪ್ಲ್ಯಾ ಸಾಂಗಾತ್ಯಾಕ್ ಘೆವ್ನ್ ಪರತ್ ಯೇವ್ನ್, ಹಾಂವ್ ನಾತ್ಲೊಂ ಪಳೆವ್ನ್ ಸ್ಟೆನೊಲಾಗ್ಚೊ ಮ್ಹಜ್ಯಾ ಘರ್‌ಚೊ ಅಂದಾಜಾಚೊ ವಿಳಾಸ್ ಘೆವ್ನ್ ತೆ ಗರೋಡಿಕ್ ಆಯ್ಲ್ಯಾತ್. ಆನಿ ಸೊದುನ್-ಸೊದುನ್ ಮ್ಹಜ್ಯಾ ಘರಾಯಿ ಪಾವ್ಲ್ಯಾತ್-ಆಸೊ ಹಾಂವೆ ಅಂದಾಜ್ ಕೆಲೊ. ಮ್ಹಜೆಂ ಘರ್ ತಾಣಿಂ ಸೊದುನ್ ಕಾಡ್ಲ್ಯಾ ನಂತರ್ ಆಮಿ ಹಾಂಗಾ ರಾವಾನಾಯೆ... ಹಾಂವೆ ಆಮ್ಸೊರಾನ್ ಗರ್‌ಜೆಚ್ಯೊ ವಸ್ತು ಸರ್ವ್ ಬೆಗಾಂತ್ ಆನಿ ಗೊಣ್ಯೆಂತ್ ವ್ಹರುಂಕ್ ಜಾಂವ್ಚ್ಯೊ ತಸಲ್ಯೊ ಭರ್‌ನ್ ಘೆತ್ಲ್ಯೊ.

ವೇಳ್ ಕಾಡುಂಕ್ ಉಪಾವ್ ನಾತ್ಲೊ, ಖಂಚಾಯಿ ವೆಳಾರ್ ತಾಣಿಂ ಪರತ್ ಯೆವ್ಯೆತ್ ಆಸ್‌ಲ್ಲೆಂ. ಮಾರೆಕಾರ್ ಮನಿಸ್ ಜನ್ನಾ ಖಂಚಾಯಿ ಸಂಗ್ತಿಕ್ ಪಾಟಿಂ ಸರ್‌ಚೊ ನ್ಹಂಯ್, ಆತಾಂ ಹೆಂ ಕಾಮ್ ಶೆಟ್ಟಿಚೆಂಚ್ ಜಾಲ್ಲ್ಯಾನ್ ಶೆಟ್ಟಿಕ್ ಖುಶ್ ಕರುಂಕ್ ಕಿತೆಂ ಕರುಂಕೀ ತೊ ತಯಾರ್ ಆಸ್ತಲೊ. ಜಾತಾತಿತ್ಲ್ಯಾ ದರ್ವಡಾನ್ ಹಾಂವೆಂ ಥೊಡೊ ಸಾಮಾನ್, ಸುಂದರಿಚೆಂ ಬೇಗ್, ತಾಚಿಂ ಗರ್‌ಜೆಚಿಂ ವಸ್ತ್ರಾಂ ತಶೆಂ ಮ್ಹಜೆಂಯಿ ವಸ್ತುರ್ ಸರ್ವ್ ಆರಾಯ್ಲೆಂ. ರಸ್ತ್ಯಾಕ್ ಯೇವ್ನ್ ಏಕ್ ರಿಕ್ಶಾ ಹಾಡ್ನ್ ಸರ್ವ್ ಸಾಮಾನ್ ತಾಚೆರ್ ಭರ್‌ಲೊ ಆನಿ ಘರಾಕ್ ಭೀಗ್ ಘಾಲ್ನ್ ಕೊಣಾಯ್ಕೀ ತಿಳ್ಸಿನಾಸ್ತಾಂ ಹಾಂವ್ ಭಾಯ್ರ್ ಸರ್‌ಲೊಂ. ಕಂಕ್ನಾಡಿ ಎಕಾ ಖಾಸ್ಗಿ ದಾಕ್ತೆರಾಲಾಗಿಂ ವೆತಾಂ ಮ್ಹಣ್ ಸುಂದರಿನ್ ಮ್ಹಾಕಾ ಸಾಂಗ್‌ಲ್ಲೆಂ. ಪುನ್ಯಾನ್ ಹಾಂವ್ ಥಂಯ್ ಪಾವ್ತಾನಾ ತಿಂ ಭಾಯ್ರ್ ಯೆತಾಲಿಂ ಮಾತ್ರ್. ಸುಂದರಿಕ್ ಹಾಂವೆಂ ರಿಕ್ಶಾರ್ ಬಸೊಂಕ್ ಸಾಂಗ್ಲೆಂ. ಸಾಂಗಾತಾ ಆಯಿಲ್ಲ್ಯಾ ಬಾಯ್ಲೆಕ್ ತುರ್‌ತಾನ್ ಎಕಾ ಸಯ್ರ್ಯಾಗೆರ್ ವಚುಂಕ್ ಆಸಾ ಮ್ಹಳ್ಳೆಂ ನೀಬ್ ದೀವ್ನ್ ತಿಕಾ ರಿಕ್ಶಾಕ್ ಪಯ್ಶೆ ದೀವ್ನ್ ಧಾಡ್ಲೆಂ.

ಹಾಂವ್ ಆನಿ ಸುಂದರಿ ಶೀದಾ ವಾಲೆನ್ಸಿಯಾಚಾ ಸೂಟರ್‌ಪೇಟೆಕ್ ಆಯ್ಲ್ಯಾಂವ್. ಥಂಯ್ಸರ್ ಥೊಡಿಂ ಬಿಡಾರಾಂ ಖಾಲಿ ಆಸಾತ್ ಮ್ಹಣ್ ಹಾಂವೆ ಆಯ್ಕಾಲ್ಲೆಂ. ನಶೀಬಾನ್ ಚಡ್ ತಕ್ರಾರ್ ನಾಸ್ತಾಂ ದೊನ್ಶಿಂ ರುಪಯ್ ಮುಂಗಡ್ ದೀವ್ನ್ ಎಕಾ ಕುಡಾಚೆಂ ಬಿಡಾರ್ ಆಮ್ಕಾಂ ಲಾಬ್ಲೆಂ. ಹ್ಯಾ ವೆಳಿಂ ಖಂಚಾಯಿ ಮಾಟ್ಯಾಂತ್ ರಿಗೊನ್ ಬಸೊಂಕಿ ಹಾಂವ್ ತಯಾರ್ ಆಸ್ಲೊಂ. ಸುಂದರಿಚಾ ಮೂಗುತಿ ಖಾತಿರ್ ಪಾಟ್ಲ್ಯಾ ಥೊಡ್ಯಾ ಮಹಿನ್ಯಾಂ ಥಾವ್ನ್ ಉರಯಿಲ್ಲೆ ಪಯ್ಶೆ ಆತಾಂ ಉಪ್ಕಾರಾಕ್ ಪಡ್ಲೆ. ಏಕ್‌ಪಾವ್ಟಿಂಚಾಕ್ ಆಮಿ ಆನ್ವಾರಾಂತ್ಲೆಂ ಸುಟ್ಲ್ಯಾಂವ್, ಪುಣ್ ಮುಕಾರ್ ಕಿತೆಂ? ಕಾವ್ಜೆಣೆನ್ ಆನಿ ಭಿಂಯಾನ್ ಥೊಡೆ ದಿವಸ್ ಪಾಶಾರ್ ಜಾಲೆ. ಭಾಯ್ಲ್ಯಾ ರಸ್ತ್ಯಾರ್ ಏಕ್ ರಿಕ್ಶಾ ರಾವ್ಲಿ ತರ್ ಮ್ಹಜೆಂ ಕಾಳಿಜ್ ದಡ್ದಡ್ತಾಲೆಂ. ಹ್ಯಾ ವೆಳಾರ್ ಸುಂದರಿ ಮ್ಹಾಕಾ ಧಯ್ರ್ ದಿತಾಲೆಂ. ಶೆಟ್ಟಿಚಿ ಗಜಾಲ್ ಹಾಂವೆಂ ಥೊಡಿ-ಥೊಡಿ ತಾಕಾ ಸಮ್ಜೊಂಚಾ ರಿತಿರ್ ಸಾಂಗ್ಲೆಲಿ.

ಪುಣ್ ಹ್ಯಾ ಪರಿಸ್ಥಿತೆಚೊ ದಾವ್ ಮ್ಹಾಕಾ ಲಾಗ್ತಾ ತಿತ್ಲೊ ತಾಕಾ ಭಗಾನಾತ್ಲೊ. ಹಾಂವ್ ಶೆಟ್ಟಿಕ್ ಪರಿಪೂರ್‌ಣ್ ವಳ್ಕಾತಾಲೊಂ. ತಾಚೆ ಹಾತಿಂ ಆಮಿ ಪರ್‌ತ್ಯಾನ್ ಶಿರ್‌ಕಾಲ್ಯಾಂವ್ ತರ್ ತೊ ಕಿತೆಂ ಕರಿತ್ ಮ್ಹಣ್ ಜಾಣಾಂ’ಸ್ಲೊಂ. ಮ್ಹಾಕಾ ಮ್ಹಜ್ಯಾ ಜಿವಾಚಿ ಖಂತ್ ನಾತ್ಲಿ. ಮೆಳ್ಳ್ಯಾರ್ ಮ್ಹಾಕಾ ಧರ್‌ತೆಲೆ ಆನಿ ಜಿವೆಶಿಂ ಮಾರ್‌ತೆಲೆ..... ಮಾರುಂದಿತ್! ತಾಕಾ ಹಾಂವ್ ತಯಾರ್ ಆಸ್ಲೊಂ! ಪುಣ್ ಸುಂದರಿಚಿ ಗತ್ ಕಿತೆಂ ಜಾಯ್ತ್?

ಹೆಂ ಚಿಂತುನ್ಂಚ್ ಹಾಂವ್ ಚಡ್ ಆನಿ ಚಡ್ ವಿರಾರ್ ಜಾತಾಲೊಂ. ದೀಸ್ ಪಾಶಾರ್ ಜಾತಾಲೆ. ಹಾತಿಂ ಆಸ್‌ಲ್ಲೆ ಪಯ್ಶೆ ಕಿತ್ಲ್ಯಾ ಸುಕ್ಶಿಮಾಯೆನ್ ಖರ್‌ಚಿಲ್ಯಾರೀ ಖಿರೊನ್ ಯೆತಾಲೆ. ಕಿತ್ಲೆ ದೀಸ್ ಭಿತರ್‌ಚ್ ಬಸ್ಯೆತ್? ಪರತ್ ಮ್ಹಜ್ಯಾ ಆಫಿಸಾಕ್ ವೆಚಿ ಆಲೋಚನ್ ಹಾಂವೆಂ ಸೊಡ್‌ಲ್ಲಿ. ಮಂಗ್ಳುರಾಂತ್ ಆನಿ ಹಾಂವೆ ರಾಂವ್ಚೆಂ ಅಪಾಯಾಚೆಂ. ಬೊಂಬೈಂತ್ ಶೆಟ್ಟಿಚಾ ಪಂಗ್ಡಾಂತ್ ಆಸ್ಚೆ ಸರ್ವ್ ಮಂಗ್ಳುರ್‌ಚೆ. ತೆ ಜನ್ನಾ ಬರಿ ಯೇವ್ನ್-ವಚೊನ್ ಆಸ್ತೆಲೆ. ಖಂಚಾಯಿ ವೆಳಾರ್ ಆಪ್ಣಾಕ್ ಪರತ್ ಹಿಚ್ ಗತ್ ಯೆತೆಲಿ.

ಹಾಂವೆಂ ಏಕ್ ಧ್ರಡ್ ಆಲೋಚನ್ ಕೆಲಿ. ಸುಂದರಿಚ್ಯಾ ಬಚಾವೆ ಖಾತಿರ್ ಹಾಂವೆಂ ತಾಚೆ ಥಾವ್ನ್ ಥೊಡ್ಯಾ ತೆಂಪಾಕ್ ತರೀ ಪಯ್ಸ್ ಆಸಾಜಾಯ್. ಸುಂದರಿಚಿ ವಳಕ್ ಪೂವಮ್ಮಾಕ್ ಶಿವಾಯ್ ಶೆಟ್ಟಿಚಾ ಪಂಗ್ಡಾಂತ್ಲ್ಯಾ ಹೆರಾಂಕ್ ನಾ. ತಶೆಂ ಜಾವ್ನ್ ಆಪ್ಣೆಂ ಲಾಗಿಂ ನಾತ್ಲ್ಯಾರ್ ಸುಂದರಿಕ್ ಕಸ್ಲೊಯಿ ಅಪಾಯ್ ಆಸ್ಚೊ ನಾ.

ಖಂಯ್ ತರೀ ಪಯ್ಶಿಲ್ಯಾ ಶ್ಹೆರಾಂತ್ ಘೊಳ್ಚೆಂ ಆನಿ ಮಯ್‌ನ್ಯಾ-ಮಯ್‌ನ್ಯಾಕ್ ಪಯ್ಶೆ ಧಾಡ್ನ್ ಸುಂದರಿಕ್ ಪೊಸ್ಚೆಂ. ಪುಣ್ ತೆಂ ಎಕ್ಸುರೆಂ ರಾವಾತ್? ಮ್ಹಾಕಾ ಕುಶಿಲ್ಯಾ ಬಿಡಾರಾಂತ್ ರಾಂವ್ಚ್ಯಾ ಮ್ಹಾತಾರೆಚೊ ಉಡಾಸ್ ಆಯ್ಲೊ. ತಿಕಾ ತಿಚಿಂ ಮ್ಹಳ್ಳಿಂ ಕೊಣೀ ನಾತ್ಲಿಂ.

ವ್ಹಡಾಂಗೆಲ್ಯಾ ಘರಾಂನಿ ಕಾತ್ತೆ ಚಾಕ್ರಿ ಕರ್ನ್ ತಿ ಆಪ್ಲೆಂ ಪೋಟ್ ಭರ್ತಾಲಿ ಆನಿ ರಾತಿಂ ಯೇವ್ನ್ ಘರಾ ನಿದ್ತಾಲಿ. ಹಾಂಗಾ ಪಾವ್‌ಲ್ಲ್ಯಾ ಥೊಡ್ಯಾಚ್ ದಿಸಾಂನಿ ಸುಂದರಿಕ್ ತಿಚಿ ಈಶ್ಟಾಗಾತ್ ಜಾಲ್ಲಿ. ಸುಂದರಿಕ್ ಧಯ್ರಾಕ್ ತಿ ಆಸ್ತೆಲಿ. ಜಾಯ್ ಜಾಲ್ಲ್ಯಾರ್ ತಿಚಾ ಪೊಟಾಚೊ ಖರ್ಚ್‌ಯಿ ಆಮಿಂಚ್ ಪಳೆಂವ್ಚೊ......

ಅಸಲ್ಯಾ ಚಿಂತ್ನಾಂನಿ ಮ್ಹಜಿ ಆಲೋಚನ್ ದೃಡ್ ಜಾಲಿ. ತ್ಯಾ ರಾತಿಂ ಜಾಯ್ತೆಂ ಸಮ್ಜಾವ್ನ್ ಆನಿ ವಿವರ್ಸುನ್ ಮ್ಹಜಿ ಆಲೋಚನ್ ಹಾಂವೆಂ ಸುಂದರಿಕ್ ಸಾಂಗ್ಲಿ. ಸುರ್ವೆರ್ ತೆಂ ರಡ್ಲೆಂಚ್.

ಪುಣ್ ಹಾಂವ್ ಚೊರಿಯೆನ್ ತರೀ ತವಳ್ ತವಳ್ ಯೇವ್ನ್-ಕರ್ನ್ ರಾವ್ತಾಂ ಮ್ಹಣ್ ಸಾಂಗ್ಲೆಲ್ಯಾನ್ ನಿಮಾಣೆಂ ತೆಂ ಒಪ್ಲೆಂ. ಆನಿ ಅಶೆಂ ಮ್ಹಜ್ಯಾ ಹಾತಿಂ ಉರ್‌ಲ್ಲೆಂ ಏಕ್ ವೊಚ್ ಮೆಳ್ಳೆಲ್ಯಾ ಮೊಲಾಕ್ ವಿಕುನ್, ಥೊಡೆ ಪಯ್ಶೆ ಸುಂದರಿಕ್ ದೀವ್ನ್, ಎಕಾ ರಾತಿಂ ಹಾಂವ್ ಬಸ್ಸಾರ್ ಬಸೊನ್ ಬೆಂಗ್ಳುರ್ ಪಾವ್ಲೊಂ. ಬೆಂಗ್ಳುರ್ ಮ್ಹಾಕಾ ಕೊಣೀ ನಾತ್ಲಿಂ.

ಕಾಮ್ ಸೊದುನ್ ಥೊಡೆ ದೀಸ್ ಭೊಂವ್ಲ್ಯಾ ನಂತರ್ ಶ್ಹೆರಾಕ್ ತೆಂಕುನ್ಂಚ್ ಆಸ್‌ಲ್ಲ್ಯಾ ಕಾಚರಕನಾ ಹಳ್ಳಿ ಮ್ಹಳ್ಳೆಕಡೆನ್ ಎಕ್ ಪೋಲ್ಟ್ರಿಂತ್ ಕಾಮ್ ಮೆಳ್ಳೆಂ. ಥಂಯ್ಸರ್ ಪಾಂಚ್ ಹಜಾರ್ ಕುಂಕ್ಡಾಂ ಆಸ್‌ಲ್ಲಿಂ. ಹೆರ್ ಪಾಂಚ್ ಜಣ್ ಮ್ಹಜ್ಯಾ ಸಂಗಿಂ ಘೊಳ್ತಾಲೆ. ತಾಂತ್ಯಾಂಚೆ ಲೇಕ್ ದವರ್ಚೆಂ ಕಾಮ್ ಮ್ಹಜ್ಯಾ ವಾಂಟ್ಯಾಕ್ ಪಡ್ಲೆಂ ಮಾತ್ರ್ ನ್ಹಂಯ್ ರಾವೊಂಕೀ ಥಂಯ್ಸರ್‌ಚ್ ಆಸ್ರೊ ಮೆಳ್ಳೊಂ.

ಆತಾಂ ಹಾಂವ್ ಎಕ್ಸುರ್‌ಪಣಿಂ ದೀಸ್ ಸಾರ್ತಾಲೊಂ. ಹಾಂವ್ಂಚ್ ರಾಂದುನ್, ಹಾಂವ್ಂಚ್ ಜೆವ್ತಾಲೊಂ. ಸದಾಂನೀತ್ ಪಯ್ಶಿಲ್ಯಾ ತ್ಯಾ ಕಾಳೊಕಾಚಾ ಬಿಡಾರಾಂತ್ ಎಕ್ಸುರೆಂ ಜಿಯೆಂವ್ಚ್ಯಾ ಸುಂದರಿಚೊ ಮ್ಹಾಕಾ ಉಡಾಸ್ ಯೆತಾಲೊ. ಹ್ಯಾ ಬಿರ್ಮತ್ ಚೆಡ್ವಾಕ್ ಮ್ಹಜೆನಿಮ್ತಿಂ ಕಸಲಿ ಸ್ಥಿತಿ ಪ್ರಾಪ್ತ್ ಜಾಲಿ ತೆಂ ಚಿಂತುನ್ ಹಾಂವ್ ಸದಾಂ ಕಳ್ವಳ್ತಾಲೊಂ. ಹಾಂವ್ ಬೆಂಗ್ಳುರ್ ಪಾವೊನ್ ಧಾ ಮಯ್‌ನೆ ಸರ್‌ಲ್ಲೆ.

ಏಕ್ ದೀಸ್ ಪುಣಿ ಮಂಗ್ಳುರ್ ವಚೊನ್ ಸುಂದರಿಕ್ ಮೆಳೊನ್ ಯೇಜಾಯ್ ಮ್ಹಣ್ ಚಿಂತಾಲೊಂ ತರೀ ಮ್ಹಜಿ ಆಶಾ ಪಾಟಿಂ ಪಡ್ತಾಲಿ. ಸಾಂಬಾಳ್ ಮ್ಹಾಕಾ ಬೋವ್ ಉಣೊ ಆಸ್ಲೊ. ಮ್ಹಜೊ ಖರ್ಚ್ ಕಾಡ್ನ್ ಥೊಡೆಂ-ಥೊಡೆಂ ಹಾಂವ್ ಸುಂದರಿಕ್ ಧಾಡ್ತಾಲೊಂ. ಹಾತಿಂ ಕಾಂಯ್ಚ್ ಉರಾನಾತ್ಲೆಂ. ಗಾಂವಾಕ್ ವೆತಾನಾ ಸುಂದರಿಚಾ ನಾಕಾಕ್ ಏಕ್ ’ಮೂಗುತಿ’ ವ್ಹರಿಜಾಯ್ ಮ್ಹಳ್ಳಿ ಆಶಾ ಜಾವ್ನಾಸ್ಲಿ. ತಿ ಪೋಂತ್ ಪಾವಾನಾತ್ಲಿ ಜಾಲ್ಲ್ಯಾನ್ ಹಾಂವ್ ಗಾಂವಾಕ್ ವೆಚೊ ದೀಸ್ ಪಾಟಿಂ ಪಡ್ತಾಲೊ. ನಿಮಾಣೆಂ ಎಕಾ ದಿಸಾ ಹಾಂವೆಂ ಗಾಂವಾಕ್ ವೆಚಿ ಆಲೋಚನ್ ಕೆಲಿ! ಮೂಗುತಿ ತಯಾರ್ ಜಾಲ್ಲಿ!! ಬೋವ್ ಕಶ್ಟಾಂನಿ ಹಾಂವೆ ತಿ ಕರಯ್ಲಿ.

ಸಬಾರ್ ದೀಸ್ ಹಾಂವೆ ತ್ಯಾ ಖಾತಿರ್ ಉಪಾಶಿಂ ರಾವೊಂಕ್ ಪಡ್‌ಲ್ಲೆಂ. ಪುಣ್ ಮೂಗುತಿ ಮ್ಹಜ್ಯಾ ಹಾತಿಂ ಮೆಳ್ಳೆಲ್ಯಾ ಸಂತೊಸಾನ್ ಹಾಂವೆಂ ಭಗ್‌ಲ್ಲೆಂ ಕಶ್ಟ್ ಸರ್ವ್ ಮ್ಹಜ್ಯಾ ಉಡಾಸಾ ಭಾಯ್ರ್ ಗೆಲ್ಲೆ. ಹಾಂವೆಂ ಧನ್ಯಾಲಾಗಿಂ ಚಾರ್ ದೀಸಾಂಚಿ ರಜಾ ಮಾಗ್ಲಿ. ಮ್ಹಾಕಾ ತಿ ಮೆಳೊಂಕ್ ಕಶ್ಟ್ ಜಾಲೆನಾಂತ್. ಆನಿ ಎಕಾ ದಿಸಾ-ಧಾ ಮಯ್‌ನ್ಯಾಂ ನಂತರ್ ಮೂಗುತಿ ಘೆವ್ನ್ ಗಾಂವಾಕ್ ವೆಚೆ ಖಾತಿರ್ ಬಸ್ಸ್‌ಸ್ಟೆಂಡಾಕ್ ಪಾವ್ಲೊಂ. ಕೆದಾಳಾ ಗಾಂವಾಕ್ ಪಾವ್ತಾಂ ಆನಿ ಕೆದ್ನಾಂ ಮ್ಹಜ್ಯಾ ಸುಂದರಿಕ್ ಗೊಪಾಂತ್ ಆರಾವ್ನ್ ತಿ ಮೂಗುತಿ ತಾಚಾ ನಾಕಾರ್ ಸೊಬಯ್ತಾಂ ಮ್ಹಳ್ಳಿ ಆತುರಾಯ್ ಮ್ಹಜ್ಯಾ ಜಿವಾಂತ್ ಭರ್‌ಲ್ಲಿ.

ಪುಣ್ ಬಸ್ಸ್ ಯೆಂವ್ಕ್ ನಾತ್‌ಲ್ಲೆಂ. ಸಾಡೆ-ನೋವ್ ವೊರಾಂಚೆಂ ಬಸ್ಸ್ ಸುಟೊಂಕ್ ಆನಿಕೀ ಅರ್ದೆಂ ವೋರ್ ಉರ್‌ಲ್ಲೆಂ. ಮ್ಹಜೆ ಬರಿ ಹೆರ್ ಪಯ್ಣಾರಿ ಥಂಯ್ಸರ್ ಬಸ್ಸಾಕ್ ರಾಕೊನ್ ಆಸ್ಲೆ. ಹಾಂವ್ ಮ್ಹಜೆಂ ಏಕ್ ಧಾಕ್ಟೆಂ ಬೇಗ್ ಹಾತಿಂ ಉಮ್ಕಾಳಾವ್ನ್ ಹೆವ್ಶಿಂ-ತೆವ್ಶಿಂ ಪಾಸಾಯೊ ಮಾರ್ತಾಲೊಂ. ತ್ಯಾ ವೆಳಾರ್ ಏಕ್ ಸಂಗತ್ ಘಡ್ಲಿ. ಎಕಾಚ್ಛಣೆಂ ಏಕ್ ಪ್ರಾಯ್ವಂತ್ ಮನಿಸ್ ಮ್ಹಜೆಲಾಗಿಂ ಯೇವ್ನ್ - "ತುಕಾ ಸ್ಟೆಂಡಾಚಾ ಗೇಟಿಲಾಗಿಂ ಕೋಣ್‌ಗೀ ಆಪಯ್ತಾ" ಮ್ಹಣಾಲೊ.

’ಕೋಣ್‌ಗಾಯ್?’ ಚಿಂತ್ಲೆಂ ಹಾಂವೆಂ. ಧನಿ ಪುಣಿ ಕಸಲ್ಯಾಯಿ ಗರ್ಜೆನ್ ಆಯ್ಲಾಗಾಯ್? ಯಾ ಪೊಲ್ಟ್ರಿಚೆ ಕಾಮಾಗಾರ್ ಪುಣೀ ಸೊದುನ್ ಆಯ್ಲ್ಯಾತ್? ಕಿತೆಂಯಿ ಚಡ್ತಿಕ್ ಚಿಂತಿನಾಸ್ತಾಂ ಹಾಂವೆಂ ತ್ಯಾ ಮನ್ಶಾಬರಾಬರ್ ಮೆಟಾಂ ಕಾಡ್ಲಿಂ. ಆಮಿ ದೊಗೀ ಸ್ಟೆಂಡಾಚಾ ಗೇಟಿಲಾಗಿಂ ಪಾವ್ತಾನಾ- ಕ್ಷಣಾನ್ ಕಸಲೊಗೀ ದುಬಾವ್ ಮ್ಹಜೆ ಮತಿಂ ಪಾಶಾರ್ ಜಾಲೊ. ಆನಿ ಹಾಂವ್ ಥಂಯ್ಸ್ ರಾವ್ಲೊಂ.

ಪುಣ್ ವೇಳ್ ಉತರ್‌ಲ್ಲೊ. ಹಾಂವೆಂ ಕಿತೆಂಯಿ ಚಿಂತ್ಚೆ ಭಿತರ್ ಚೊವ್ಗ್ ಜಣ್ ಬಳಿಶ್ಟ್ ಜಿವಾಚೆ ಮ್ಹಜೆ ಭಂವ್ತಿಂ ಕುಡ್ಸಾಲೆ, ತಾಂತ್ಲ್ಯಾ ಎಕ್ಲ್ಯಾನ್ ಹಾತಿಂ ಆಸ್‌ಲ್ಲೊ ಸರಳ್ ಮ್ಹಜ್ಯಾ ತಕ್ಲೆಕ್ ಉಬ್ರಾಯಿಲ್ಲೊ ಮಾತ್ರ್ ಮ್ಹಾಕಾ ಕಳಿತ್. ಹಾಂವ್ ಸನಿನ್ ಜಾತಾನಾ ಎಕಾ ಕೂಡಾಂತ್ ಹಾತ್-ಪಾಯ್ ಭಾಂದುನ್ ಘಾಲ್ಲ್ಯಾ ಸ್ಥಿತೆರ್ ಧರ್ಣಿರ್ ಪಡೊನ್ ಆಸ್ಲೊಂ! ಬೆಂಗ್ಳುರಾಂತ್ ಹ್ಯಾ ವೆಳಿಂ ಘೊಡ್ಯಾ ರೇಸ್ ಚಲ್ತಾಲೊ. ತ್ಯಾ ಖಾತಿರ್ ಶೆಟ್ಟಿ ಆಪ್ಲ್ಯಾ ಪಾಟ್ಲಾಮೆ ಸಂಗಿಂ ಬೆಂಗ್ಳೂರ್ ಪಾವಲ್ಲೊ. ತಾಕಾ ರೇಸಿಚೆಂ ಜಬ್ಬೊರ್ ಪಿಶೆಂ ಆಸ್ಲೆಂ. ಆನಿ ರೇಸಿಕ್ ಆಯಿಲ್ಲ್ಯಾ ವೆಳಾರ್ ರಾಂವ್ಚಾ ಖಾತಿರ್ ಬೆಂಗ್ಳುರಾಂತ್ ತಾಚೆಂ ಘರ್‌ಯಿ ಆಸ್‌ಲ್ಲೆಂ. ಹಿ ಸಂಗತ್ ಮ್ಹಾಕಾ ಕಳಿತ್‌ನಾತ್ಲಿ.

ಶೆಟ್ಟಿಚಾ ಪಂಗ್ಡಾಂತ್ಲ್ಯಾ ಕೊಣೆಂಗೀ ಎಕ್ಲ್ಯಾನ್ ಮ್ಹಾಕಾ ಬಸ್ಸ್‌ಸ್ಟೆಂಡಾಕ್ ಯೆತಾನಾ ಪಳಯ್ಲೆಂ ಆನಿ ಮ್ಹಜ್ಯಾ ದುರಾದೃಷ್ಟಾನ್ ಹಾಂವ್ ತಾಂಚೆ ಹಾತಿಂ ಶಿರ್ಕಾಲ್ಲೊಂ. ದೊಳೆ ಉಗಡ್ತಾನಾ ಶೆಟ್ಟಿ ಮ್ಹಜೆ ಮುಕಾರ್ ಬಸ್‌ಲ್ಲೊ. ಆನಿ ತಾಚೆ ಪಾಟ್ಲಾವ್ದಾರಿ ಚೊವ್ಗ್ ಜಣ್ ತಾಚೆಂ ಭೊಂವ್ತಿಂ ಹಾತ್ ಬಾಂದುನ್ ರಾವ್‌ಲ್ಲೆ. ಲಾಗಿಂ ಲಾಗಿಂ ದೋನ್ ವರ್ಸಾಂ ನಂತರ್ ಮ್ಹಜಿ ಆನಿ ಲಕ್ಕಶೆಟ್ಟಿಚಿ ಮಿಲಾಗತ್ ಜಾಲ್ಲಿ. ಬೆಂಗ್ಳುರ್ ಪಾವ್ಲ್ಯಾ ಉಪ್ರಾಂತ್ ಮ್ಹಾಕಾ ಶೆಟ್ಟಿಚೊ ಉಡಾಸ್ ತವಳ್ ತವಳ್ ಯೆತಾಲೊ ವ್ಹಯ್...

ಪುಣ್ ಹಾಂವ್ ಮ್ಹಜ್ಯಾ ಕಾಮಾ ಶಿವಾಯ್ ಹೆರ್ ಖಂಯ್ಸ್‌ರೀ ಭಾಯ್ರ್ ವಚಾನಾತ್ಲೊಂ ಜಾಲ್ಲ್ಯಾನ್ ಮ್ಹಾಕಾ ತಾಚಾ ಭಿರಾಂತೆಚಿ ವಿಸರ್ ಪಡ್‌ಲ್ಲಿ. ಶೆಟ್ಟಿ ಮ್ಹಾಕಾ ಪಳೆವ್ನ್ ಹಾಸ್ತಾಲೊ. ತಾಣೆಂ ಹಾಸ್ಚೆಂಚ್ ಅಪ್ರೂಪ್, ಗಾಂಟಿ ಬಾಂದ್‌ಲ್ಲ್ಯಾಬರಿ ಕೆದಾಳಾಯ್ ತಾಚೆಂ ತೊಂಡ್ ಗಂಬೀರ್, ತಾಣೆಂ ಹಾಸ್ಚೆಂ ಪಳೆಂವ್ಕ್ ಮೆಳ್ತಾಲೆಂ-ವಾರ್ಸೊವಾಂತ್ ತಿಂ ಬ್ಲೂ-ಫಿಲ್ಮಾಂ ಪಳೆತಾನಾ ಮಾತ್ರ್. ಚೆಡ್ವಾಂನಿ ಕಿಂಕ್ರಾಟ್ ಮಾರ್ತಾನಾ ತಾಣೆಂ ಅವಾಜ್ ಕರ್ನ್ ಹಾಸ್ಚೆಂ ಆಸ್ಲೆಂ. ಆನಿ ಆತಾಂ ತೊ ಮ್ಹಾಕಾ ಪಳೆವ್ನ್ ಧಾದೊಶಿ ಹಾಸ್ತಾಲೊ.

ಇತ್ಲ್ಯಾ ತೆಂಪಾ ಉಪ್ರಾಂತ್ ತರೀ ಮ್ಹಾಕಾ ಧರ್‌ಲ್ಲೊ ಸಂತೊಸ್ ತಾಚಾ ತೊಂಡಾರ್ ದಿಸ್ತಾಲೊ. ಆತಾಂ ಹಾಂವ್ ಕಿತೆಂಯಿ ಚಿಂತ್ಚ್ಯಾ ಸ್ಥಿತೆರ್ ನಾತ್ಲೊಂ. ಮ್ಹಜೆಂ ಅಂತ್ಯ್ ಲಾಗಿಂ ಪಾವ್ಲಾಂ ತೆಂ ಮ್ಹಾಕಾ ಕಳಿತ್ ಜಾಲ್ಲೆಂ. ಇತ್ಲ್ಯಾ ಕಶ್ಟಾಂನಿ ತಯಾರ್ ಕೆಲ್ಲಿ ಮೂಗುತಿ ಸುಂದರಿಕ್ ದಿಲ್ಯಾ ಉಪ್ರಾಂತ್ ತರೀ ಮೆಲ್ಯಾರ್ ವ್ಹಡ್ ನ್ಹಂಯ್ ಆಸ್‌ಲ್ಲೆಂ ಮ್ಹಣ್ ಮ್ಹಾಕಾ ಭಗ್ತಾಲೆಂ. ಸರ್ವ್ ಆಕೇರ್ ಜಾಲೆಂ.

ಮ್ಹಜಿ ಆಶಾ ಜಾವ್ನ್ಂಚ್ ಉರ್‌ಲ್ಲಿ. ಶೆಟ್ಟಿಚಿ ತನ್ಕಿ ಸುರು ಜಾಲಿ. ತಿ ಕಸಲ್ಯಾ ವರ್‌ಗಾಚಿ ತೆಂ ಹಾಂವೆಂ ವಿವರ್ಸುನ್ ಫಾಯ್ದೊನಾ. ತಾಚಾ ಹಾತಿಂ ಶಿರ್ಕಾಲ್ಯಾರ್ ಕಿತೆಂ ಸರ್ವ್ ಭೊಗುಂಕ್ ಮೆಳಾತ್ ಮ್ಹಣ್ ಹಾಂವೆ ಲೇಕ್ ಘಾಲ್ಲೆಂಗೀ ತಿ ಸರ್ವ್ ದಗ್ದೊಣಿ ಹಾಂವೆಂ ಭೊಗ್ಲಿ. ಹಾಂವೆ ಉಸ್ಳಾವ್ನ್ ಹಾಡ್‌ಲ್ಲಿ ಚಲಿ ಖಂಯ್ ಆಸಾ ತೆಂ ಸಾಂಗ್ಚ್ಯಾ ಖಾತಿರ್ ಆನಿ ಮ್ಹಜೆಂ ತೊಂಡ್ ಸುಟಂವ್ಚೆಂ ಖಾತಿರ್ ಮ್ಹಜ್ಯಾ ದೊನೀ ಕಾನಾಂಚೆ ಪಾಳುಂ ತಾಣೆಂ ಸುರಿಯಾಂನಿ ಅರ್ದಾಂ ಕೆಲಿಂ. ನಾಕ್ಶ್ಯಾಂಚ್ಯಾ ಇಡ್ಯಾಂನಿ ಸುವಿಯೊ ತೊಪ್ಲ್ಯೊ. ಪಾಂಯಾಚಾ ತಾಳ್ವೆಕ್ ದಾಗ್ ದಿಲೊ. ಹಾಂವ್ ಸಾಂಗೊಂಕ್ ತಯಾರ್ ನಾತ್ಲೊಂ. ಮ್ಹಜ್ಯಾ ವಾಂಟ್ಯಾಕ್ ಉರ್‌ಲ್ಲೆಂ ಏಕ್‌ಚ್ ಸಮಾದಾನ್....

ಸುಂದರಿ ಶಾಬಿತ್ ಆಸಾ ಮ್ಹಳ್ಳೆಂ. ಆನಿ ತೆಂ ಹೊಗ್ಡಾಂವ್ಕ್ ಜಾಂವ್ ಕಬೂಲ್ ನಾತ್ಲೊಂ. ಶೆಟ್ಟಿ ನಿರಾಶಿ ಜಾಲ್ಲೊ. ತಾಣೆಂ ತಾಚಾ ಜಣಾಂ ಕರ್‌ನಾಂ ಮ್ಹಾಕಾ ವಿಣ್ಗೊ ಕರಯ್ಲೊ ಆನಿ ಮ್ಹಜ್ಯಾ ಜನಾನಾಂಗಾಚೆರ್ ಖೊಟಾಂವ್ಕ್ ತಾಂಕಾಂ ಫರ್‌ಮಾಯ್ಲೆಂ.

ಸೊಸುಂಕ್ ತಾಂಕಾನಾತ್ಲಿ ಇಜಾ ಹಾಂವೆಂ ಭಗ್ಲಿ. ತಾಣೆಂ ಸುವಿಯಾಂನಿ ತ್ಯಾ ಜಾಗ್ಯಾರ್ ತೊಪುನ್ ತೆಂ ಖಂಚಾಯಿ ಉಪ್ಕಾರಾಕ್ ಪಡಾನಾಶೆಂ ಕೆಲೆಂ, ತರೀ ಹಾಂವೆ ಸಾಂಗ್ಲೆಂನಾ. ತಾಂಕಾಂ ತಾಂಕ್ತಾ ವರೇಗ್ ತಾಣೆಂ ಪ್ರಯತನ್ ಕೆಲೆಂ ತರೀ ಮತ್ ಚುಕ್ತಾ ಪಾಸುನ್ ಹಾಂವೆಂ ತೊಂಡ್ ಸೊಡ್ಲೆಂನಾ..... ಎಕಾ ಮಯ್‌ನ್ಯಾ ಉಪ್ರಾಂತ್ ಸರ್‌ಕಾರಿ ಆಸ್ಪತ್ರೆಚಾ ಎಕಾ ಖಟ್ಲ್ಯಾರ್ ಹಾಂವ್ ಮತಿರ್ ಆಯ್ಲೊಂ. ಸಗ್ಳಿ ಕೂಡ್ ಮ್ಹಜಿ ಬ್ಯಾಂಡೇಜಾಂನಿ ಗುಟ್ಲಾಯಿಲ್ಲಿ. ಶೆಟ್ಟಿಚಾ ಮನ್ಶಾಂನಿ ಹಾಂವ್ ಮೆಲಾಂ ಮ್ಹಣ್ ಲೆಕುನ್ ಮ್ಹಾಕಾ ರಸ್ತ್ಯಾರ್ ಉಡಯಿಲ್ಲೊ ಜಾಯ್ಜಾಯ್. ಬೆಂಗ್ಳುರ್ ಶ್ಹೆರಾಭಾಯ್ರ್ ರಾಜ್ ರಸ್ತ್ಯಾಚಾ ಎಕಾ ಪೊಂತಾರ್ ಮ್ಹಜಿ ಕೂಡ್ ಪಡೊನ್ ಆಸ್ಲಿ. ಉಸ್ವಾಸ್ ಆಸ್ಲೊ ಪಳೆವ್ನ್ ವಾಟ್ಸುರ್‌ಯಾಂನಿ ಮ್ಹಾಕಾ ಆಸ್ಪತ್ರೆಕ್ ದಾಕಲ್ ಕೆಲ್ಲೊ. ದಾಕ್ತೆರಾಂನಿ ಮ್ಹಜಿ ಆಶಾ ಸೊಡ್‌ಲ್ಲಿ. ಪುಣ್ ಹಾಂವ್ ವಾಂಚ್ಲೊಂ......

ಸಾತ್ ಮಯ್‌ನೆ ಹಾಂವ್ ತ್ಯಾ ಆಸ್ಪತ್ರೆಂತ್ ಆಸ್ಲೊಂ. ಹಾಂವೆಂ ವಾಂಚ್ಲ್ಯಾರೀ ಪ್ರಯೋಜನ್ ನಾ ಮ್ಹಣ್ ದಾಕ್ತೆರಾಂಕ್ ಕಳಿತ್ ಆಸ್ಲೆಂ. ಮ್ಹಜ್ಯಾ ಕೂಡಿಚೆ ವಿಶ್ವೆ ಮ್ಹಜೆ ಅದೀನ್ ನಾತ್ಲೆ. ಹಾತಾ-ಪಾಂಯಾಂಚ್ಯೊ ಶಿರೊ ಅಸ್ಕತ್ ಜಾಲ್ಲ್ಯೊ. ತರೀ ಹಾಂವ್ ಜಿವಂತ್ ಆಸ್ಲೊಂ! ಸಾತ್ ಮಯ್‌ನ್ಯಾಂನಿ ಹ್ಯಾಚ್ ಸ್ಥಿತೆರ್ ಹಾಂವ್ ಆಸ್ಪತ್ರೆ ಥಾವ್ನ್ ಭಾಯ್ರ್ ಆಯ್ಲೊಂ. ಖಂಯ್ಸರ್ ವಚೊಂಕೀ ಮ್ಹಾಕಾ ಠಿಕಾಣೆಂ ನಾತ್ಲೆಂ. ಶೆಟ್ಟಿಚಿ ಭಿರಾಂತ್ ಆತಾಂ ನಾತ್‌ಲ್ಲಿ. ಹಾಂವೆಂ ಸುಂದರಿ ಸರ್‌ಶಿಂ ವಚ್ಯೆತೆಂ. ಪುಣ್ ಆತಾಂ ಮ್ಹಜೆ ವರ್‌ವಿಂ ಸುಂದರಿಕ್ ಕಸಲೊಯ್ ಫಾಯ್ದೊ ಜಾಂವ್ಚೊ ನಾತ್‌ಲ್ಲೊ.

ಎಕಾ ವರ್ಸಾ ಥಾವ್ನ್ ಹಾಂವ್ ಹಾಂಗಾ ಭಿಕ್ ಮಾಗೊನ್ ದೀಸ್ ಕಾಡ್ತಾಂ. ಸುಂದರಿಚಿ ಕಸಲಿಯ್ ಖಬಾರ್ ಹಾಂವ್ ನೆಣಾಂ. ಪುಣ್ ಹಾಂವ್ ಜಾಣಾಂ ತೆಂ ಮ್ಹಾಕಾ ರಾಕೊನ್ ಆಸ್ತೆಲೆಂ. ತ್ಯಾ ದೆಕುನ್ ಹಾಂವೆಂ ಭಿಕ್ ಮಾಗೊನ್ ಪರತ್ ತಿ ’ಮೂಗುತಿ’ ತಯಾರ್ ಕೆಲ್ಯಾ.... ತಿ ಸುಂದರಿಚ್ಯಾ ನಾಕಾರ್ ಸೊಬಾಜಾಯ್.... ತಾಣೆಂ ಮ್ಹಾಕಾ ಆನಿ ರಾಕ್ಚೆಂ ನಾಕಾ... ದುಸ್ರ್ಯಾ ಕೊಣಾಯ್‌ಲಾಗಿಂ ಕಾಜಾರ್ ಜಾಯ್ಜೆಯ್ ಮ್ಹಜೆ ವರ್‌ವಿಂ ಪಿಡ್ಡ್ಯಾರ್ ಜಾಲ್ಲೊ ತಾಚೊ ಫುಡಾರ್ ತಾಣೆಂ ಪರ್ತ್ಯಾನ್ ನಂದನ್ ಕರಿಜಾಯ್......

***************

ಮೊಗಾಳ್ ವಾಚ್ಪ್ಯಾ -ಪ್ರಬಾಕರಾನ್ ಮ್ಹಾಕಾ ಸಾಂಗ್ಲೆಲಿ ಕಾಣಿ ತುಮಿ ವಾಚ್ಲಿ. ಪ್ರಬಾಕರಾನ್ ಸುಂದರಿಕ್ ಮೂಗುತಿ ಪಾವಿತ್ ಕರುಂಕ್ ಮ್ಹಾಕಾ ನಮಿಯಾರ್‌ಲೆಲೆಂ ಜಾಲ್ಲ್ಯಾನ್ ಹ್ಯಾ ಕಾಣಿಯೆಚೆಂ ನಿಮಾಣೆಂ ಪೊಂತ್ ಮ್ಹಜ್ಯಾ ಹಾತಿಂ ಉರ್‌ಲಾಂ... ಹಾಂವೆಂ ತೆಂ ತುಮ್ಕಾಂ ಸಾಂಗಾಜಾಯ್ ಪಡ್ಲಾಂ. ತ್ಯೆಚ್ ರಾತಿಂಚಾ ಬಸ್ಸಾರ್ ಹಾಂವ್ ಗಾಂವಾಕ್ ಪಾಟಿಂ ಪಯ್ಣ್ ಕರ್ತಾಲೊಂ. ಹಾಂವ್ಂ ಗಾಂವ್ ಸೊಡ್ನ್ ಪಾಂಚ್ ದೀಸ್ ಜಾಲ್ಲೆ. ಚಡ್ ದೀಸ್ ಘರಾ ಭಾಯ್ರ್ ರಾವೊನ್ ಸವಯ್ ನಾತ್‌ಲ್ಲ್ಯಾ ಮ್ಹಾಕಾ ಏಕ್ ಪಾವ್ಟಿಂ ಗಾಂವಾಕ್ ಪಾವ್ಯಾಂ ಮ್ಹಳ್ಳಿ ಆತುರಾಯ್ ಭರ್‌ಲ್ಲಿ....

ಬಾಯ್ಲ್ ಬುರ್ಗ್ಯಾಂಕ್ ಮೆಳ್ಚಿ ಆತುರಾಯ್ ತಿ ಸಹಜ್ ಜಾವ್ನ್ ಮ್ಹಾಕಾ ಆಸ್‌ಲ್ಲಿ ತರೀ ಪ್ರಬಾಕರಾಚಾ ಸುಂದರಿಕ್ ಪಳೆಂವ್ಕ್ ಹಾಂವ್ ದ್ರವಡ್ತಾಲೊಂ. ಎದೊ ವ್ಹಡ್ ಸಾಕ್ರಿಫಿಸ್ ಪ್ರಬಾಕರಾನ್ ಭೆಟಯ್ಲಾ ತರ್ ಸುಂದರಿಚಾ ನಾಕಾಚಿ ಸೊಬಾಯ್ ಕಸಲಿಗಾಯ್? ರಾತಿಂ ಪಯ್ಣಾಚ್ಯಾ ಸಗ್ಳ್ಯಾ ವಾಟೆರ್ ಹಾಂವ್ ಹೆಂಚ್ ನಿಯಾಳ್ತಾಲೊಂ. ಆಪ್ಲ್ಯಾ ಜಿವೆತಾಂತ್ಲಿಂ ಘಡಿತಾಂ ಮ್ಹಾಕಾ ವರ್‌ಣುನ್ ಸಾಂಗ್ತಾನಾ ಪ್ರಬಾಕರಾಚೆ ಆಟೆವಿಟೆ ಹಾಂವೆ ಪಳಯ್ಲೆ. ಬೋವ್ ಕಶ್ಟಾಂನಿ ಮ್ಹಾಕಾ ತಿ ವರ್‌ಣಿತಾಲೊ. ಹಾಂವೆಂ ಸುಂದರಿಕ್ ತಿ ಮೂಗುತಿ ಖಂಡಿತ್ ಜಾವ್ನ್ ಪಾವಿತ್ ಕರಿಜಾಯ್ ಮ್ಹಳ್ಳ್ಯಾ ಖಾತಿರ್ ತಾಚಿ ಗರ್‌ಜ್ ತೊ ಮ್ಹಾಕಾ ವಿವರ್‌ಸಿತಾಲೊ. ತಾಚಿ ನಿಮಾಣಿ ಆಶಾ ತಿ ಜಾವ್ನಾಸ್‌ಲ್ಲಿ. ಕೊಡ್ಸಾಣೆನ್ ಭರ್‌ಲ್ಲಿ ತಾಚಿ ಕಾಣಿ ಆಯ್ಕೊನ್ ತಾಕಾ ಸಂತೊಸ್ ಕರ್‌ಯಾಂ ಮ್ಹಣ್ ಹಾಂವೆಂ ತಾಕಾ ಸಾಂಗ್‌ಲ್ಲೆಂ

"ಪ್ರಬಾಕರ್, ಹ್ಯಾ ವಿಶಿಂ ತುಂ ಖಂತ್ ಕರಿನಾಕಾ.... ತುಜಿ ನಿಮಾಣಿ ಆಶಾ ಹಾಂವ್ ಖಂಡಿತ್ ಜಾವ್ನ್ ಜ್ಯಾರಿ ಕರ್ತಾಲೊಂ. ಫಾಲ್ಯಾಂ ಗಾಂವಾಕ್ ಪಾವ್‌ಲ್ಲೊಂಚ್ ಪಯ್ಲೆಂ ಹಾಂವ್ ಸುಂದರಿಕ್ ಸೊದುನ್ ಕಾಡ್ತಾಲೊಂ. ಆನಿ ತುವೆಂ ದಿಲ್ಲಿ ಮೂಗುತಿ ತಾಕಾ ಪಾವಿತ್ ಕರ್ತಾಲೊಂ...." ಹಾಂವೆಂ ತಾಕಾ ಭಾಸ್ ದಿಲಿ.

ತ್ಯಾ ವೆಳಿಂ ಅಪರಿಮಿತ್ ಸಂತೊಸ್ ತಾಕಾ ಜಾಲ್ಲೊ..... ಆಪುಣ್ಂಚ್ ಆಪ್ಲ್ಯಾ ಪತಿಣೆಕ್- ತಿ ಒಪ್ಸಿತಾನಾ ಭೊಗ್ಯೆತ್ ತಸಲೊ ಸಂತೊಸ್. ಥೊಡ್ಯಾ ವೆಳಾನ್ ಖಂತಿನ್ ತೊ ಮ್ಹಣಾಲೊ-

"ಧನ್ಯಾ..... ಮೂಗುತಿ ದಿತಾನಾ ತುವೆಂ ತಾಕಾ ಸಾರ್ಕೆಂ ಸಮ್ಜಾಯ್ಜಾಯ್..... ಮ್ಹಾಕಾ ತಾಣೆಂ ಭಿಲ್ಕುಲ್ ರಾಕೊನ್ ರಾವಾನಾಯೆ.... ದಯಾಕರುನ್ ಮ್ಹಜಿ ಆತಾಂಚಿ ನೀಜ್ ಹಕೀಗತ್ ತಾಕಾ ಸಾಂಗಾನಾಕಾ.... ತೆಂ ಖಂತ್ ಘೆತೆಲೆಂ... ಬದ್ಲಾಕ್ ಸಾಂಗ್ -ಪ್ರಬಾಕರ್ ದುಸ್ರೆಂ ಕಾಜಾರ್ ಜಾಲಾ... ಉತಾರ್ ದಿಲ್ಲ್ಯಾ ಪರ್‌ಮಾಣೆಂ ಮೂಗುತಿ ಧಾಡುನ್ ದಿಲ್ಯಾ ತರೀ ತಾಚಿ ವಾಟ್ ರಾಕೊನ್ ಕಾಂಯ್ ಫಾಯ್ದೊನಾ ಮ್ಹಣ್ ತಾಕಾ ತಿಳ್ಸಿ. ಆನಿ ತಾಣೆಂಯ್ ಕೊಣಾಂಯ್‌ಲಾಗಿಂ ಕಾಜಾರ್ ಜಾಂವ್ಚ್ಯಾಂತ್ ಮ್ಹಜಿ ಆಡ್ಕಳ್ ನಾ ಮ್ಹಣ್ ತಾಕಾ ಸಮ್ಜಾಯ್..."

"ಜಾಯ್ತ್" ಮ್ಹಳೆಂ ಹಾಂವೆ ತಾಚಾ ಸಮಾದಾನಾ ಖಾತಿರ್, ತಾಚಾ ಪತಿಣೆಕ್

"ತುಂ ದುಸ್ರೆಂ ಕಾಜಾರ್ ಜಾ" ಮ್ಹಣ್ ಹಾಂವ್ ಸಾಂಗೊಂ? ಪುಣ್ ಮೂಗುತಿ ಪಾವಿತ್ ಕರ್‌ಚಿ ಆಲೋಚನ್ ಮಾತ್ರ್ ಹಾಂವೆಂ ಖಂಡಿತ್ ಕೆಲ್ಲಿ. ಕಿತ್ಯಾಕ್ ಸುಂದರಿಕ್ ಆನಿ ಚಡ್ ಜಾವ್ನ್ ಪ್ರಬಾಕರಾನ್ ವರ್‌ಣಿಲ್ಲ್ಯಾ ತ್ಯಾ ನಾಕಾಕ್ ಪಳೆಂವ್ಚಿ ಆಶಾ ಮ್ಹಾಕಾ ಲಾಗ್‌ಲ್ಲಿ. ವ್ಹಡಾ ಸಂತೊಸಾನ್ ಪ್ರಬಾಕರ್ ಮ್ಹಜ್ಯಾ ಕುಡಾ ಥಾವ್ನ್ ಭಾಯ್ರ್ ಸರ್ನ್ ಗೆಲ್ಲೊ. ಹಾತ್ ಪಾಂಯ್ ತಾಚೆ ಥಾರ್‌ಯಾರ್ ರಾವಾನಾತ್ಲೆ. ವರ್ತ್ಯಾ ಕಶ್ಟಾಂನಿ ತೊ ಚಲ್ತಾಲೊ ತರೀ ತಾಚ್ಯಾ ತೊಂಡಾರ್ ಆತಾಂ ಸಮಾದಾನೆಚೊ ಪ್ರಕಾಸ್ ಫಾಂಕ್‌ಲ್ಲೊ. ಬಾಗ್ಲಾರ್ ರಾವೊನ್ ತಾಣೆಂ ಮ್ಹಳ್ಳೆಂ-

"ಆನಿ ಜಾಲ್ಯಾರ್ ಹಾಂವ್ ಮೊರ್ತಾಂ ಧನ್ಯಾ. ಲಕ್ಕಶೆಟ್ಟಿಚ್ಯಾ ಹಾತಾ ಥಾವ್ನ್ ದೆವಾನ್ ಮ್ಹಾಕಾ ವಾಂಚಯ್ಲೊ ಹ್ಯಾಚ್ ಖಾತಿರ್! ಆಶಾ ಸಂಪೈನಾಸ್ತಾಂ ಹಾಂವೆಂ ಮೊರಾನಾಯೆ ಮ್ಹಳ್ಳ್ಯಾ ಖಾತಿರ್!! ಆನಿ ಜಾಲ್ಲ್ಯಾರ್ ಹಾಂವ್ ಮೊರೊಂಕ್ ತಯಾರ್ ಆಸಾಂ....... ಸಂಸಾರಾಂತ್ ಆನಿ ಮ್ಹಾಕಾ ಕಸಲಿಯಿ ಆಶಾ ನಾ.... ತುಕಾ ಮಸ್ತು ದೇವ್ ಬರೆಂ ಕರುಂ...."

ಮ್ಹಣೊನ್ ತೊ ಭಾಯ್ರ್ ಸರ್ನ್ ಗೆಲ್ಲೊ. ದುಸ್ರ್ಯಾದಿಸಾ ಫಾಂತ್ಯಾರ್ ಹಾಂವ್ ಮಂಗ್ಳುರ್ ಪಾವ್ಲೊಂ. ತ್ಯಾ ದೀಸ್ ಮ್ಹಾಕಾ ರಜಾ ಆಸ್‌ಲ್ಲಿ ಜಾಲ್ಲ್ಯಾನ್ ಪ್ರಬಾಕರಾನ್ ದಿಲ್ಲೆಂ ಕಾಮ್ ಮುಂದರ್ಸುಕ್ ಹಾಂವೆಂ ಯೆವ್ಜಿಲ್ಲೆಂ. ಇಕ್ರಾಂ ವೊರಾಂ ಭಿತರ್ ಮ್ಹಜೆಂ ಇತರ್ ಕಾಮಾಂ ತಿರ್ಸುನ್ ಹಾಂವ್ ಚಲೊನ್ಂಚ್ ಸೂಟರ್-ಪೇಟ್ ಪಾವ್ಲೊಂ. ಮುನ್ಸಿಪಾಲಿಟಿಚಾ ಇಸ್ಕೊಲಾ ಪಾಟ್ಲ್ಯಾನ್ ಥೊಡಿಂ ಬಿಡಾರಾಂ ಆಸ್‌ಲ್ಲಿಂ. ಪುಣ್ ತಸಲಿಂ ಬಿಡಾರಾಂ ಲಾಗ್ಸಾರ್‌ಚ್ ಸಬಾರ್ ಕಡೆನ್ ದುಸ್ರಿಂಯಿ ಆಸ್‌ಲ್ಲಿಂ.

ಆತಾಂ ಖಂಯ್ ಮ್ಹಣ್ ಸೊದ್ಚೆಂ? ಕೊಣಾಲಾಗಿಂ ವಿಚಾರ್‌ಚೆಂ? ಆಕ್ರೇಕ್ ಜಾಲ್ಲೆಬರಿ ಜಾತಾ ಮ್ಹಣ್ ಹಾಂವ್ ಇಸ್ಕೊಲಾ ಲಾಗ್ಸಾರ್‌ಚ್ ಆಸ್ಚ್ಯಾ ಬಿಡಾರಾಚಾ ಲಾಯ್ನಿಕ್ ಪಾವ್ಲೊಂ. ಸುರ್‌ವೆಚೆಂ ಘರ್ ಮ್ಹಣ್ ಪ್ರಬಾಕರಾನ್ ಸಾಂಗ್‌ಲ್ಲೊ ಉಡಾಸ್ ತಶೆಂ ತ್ಯಾ ಬಿಡಾರಾಲಾಗಿಂ ಗೆಲೊಂ. ದಾರ್ ಉಗ್ತೆಂಚ್ ಆಸ್ಲೆಂ. ಪುಣ್ ಮುಕ್ಲ್ಯಾನ್ ಕೊಣೀ ದಿಸ್ಲಿಂನಾಂತ್. ಥೊಡೊ ಆವಾಜ್ ಕರ್‌ತೆಚ್ ಮದ್ಯಮ್ ಪ್ರಾಯೆಚಿ ಏಕ್ ಸ್ತ್ರೀ ಭಾಯ್ರ್ ಆಯ್ಲಿ. ತಿಚ್ಯಾ ತೊಂಡಾರ್ ಹಾಂವೆ ಪಳಯ್ಲೆಂ. ಸಾಂಗ್ಚೆಂ ತಸಲೆಂ ನಾಕ್ ನ್ಹಂಯ್ ತೆಂ, ಬದ್ಲಾಕ್ ಬಾರಾದಿಕ್ ತ್ಯಾ ವ್ಹಡ್ ನಾಕಾರ್ ತೆದಿಚ್ ವ್ಹಡ್ ಮೂಗುತಿ ತೊಪ್‌ಲ್ಲಿ ಆಸ್‌ಲ್ಲಿ.

"ಕೋಣ್ ಜಾಯ್ ತುಕಾ?" ಮ್ಹಣಾಲಿ ತಿ ತುಳ್ವೆನ್ ರಾಗಾನ್‌ಶೆಂ. ಹಾಂವ್ ತಿಚ್ಯಾ ತೊಂಡಾಕ್ ಪಳಯ್ತಾ ತೆಂ ಲೆಕುನ್ ತಿಕಾ ರಾಗ್ ಆಯಿಲ್ಲೊ ಜಾಯ್ಜಾಯ್. ಮ್ಹಾಕಾ ಮ್ಹಜಿಚ್ ಲಜ್ ಭಗ್ಲಿ. ತ್ಯಾ ವಠಾರಾಂತ್ ಹಾಂವ್ ಪ್ರಬಾಕರಾಚೆಂ ಬಿಡಾರ್ ಸೊದ್ತಾನಾ ವಾಟೆರ್ ಮೆಳ್ಳೆಲ್ಯಾ ಸ್ತ್ರೀಯಾಂಚ್ಯಾ ತೊಂಡಾರ್ ಸುಂದರಿಚೆಂ ನಾಕ್‌ಯಿ ಸೊದ್ತಾಲೊಂ!

"ಬೆಜಾರ್ ಕರಿನಾಕಾ" ಹಾಂವೆಂ ಮ್ಹಳೆಂ ತುಳ್ವೆನ್ ಸಮಾದಾನೆನ್

"ಹಾಂವ್ ಸುಂದರಿ ಮ್ಹಳ್ಳ್ಯಾ ಸ್ತ್ರೀಯೆಚೆಂ ಘರ್ ಸೊದುನ್ ಆಯ್ಲಾಂ. ತಿಚ್ಯಾ ಘೊವಾನ್ ಮ್ಹಾಕಾ ಬೆಂಗ್ಳುರ್ ಥಾವ್ನ್ ಧಾಡ್ಲಾ. ಹಾಂಗಾಸರ್ ತ್ಯಾ ನಾಂವಾಚಿಂ ಕೊಣೀ ಆಸಾತ್‌ವೇ?" ಥೊಡೊ ವೇಳ್ ತಿ ಚಿಂತಿತ್ತ್ ರಾವ್ಲಿ ಉಪ್ರಾಂತ್-

"ಸುಂದರಿ ಕೋಣ್ ಸುಂದರಿ?" ತಿಣೆಂ ಮ್ಹಾಕಾಚ್ ಪಾಟಿಂ ಸವಾಲ್ ಕೆಲೆಂ. "ಹಾಂಗಾ ಸುಂದರಿ ಮ್ಹಳ್ಳಿಂ ಕೊಣೀ ನಾಂತ್ - ಓ ತ್ಯಾ ಮುಕ್ಲ್ಯಾ ಘರಾ ಸುಂದರ್ ಮ್ಹಳ್ಳೊ ಚೆಡೊ ಜಾಲ್ಯಾರ್ ಆಸಾ...." ತಿಚೆಲಾಗಿಂ ಉಲವ್ನ್ ಕಾಂಯ್ ಫಾಯ್ದೊ ನಾ ಮ್ಹಣ್ ಮ್ಹಾಕಾ ಭಗ್ಲೆಂ ತರೀ ಹಾಂವೆಂ ಆನ್ಯೇಕ್ ಸವಾಲ್ ಕೆಲೆಂ

"ತುಮಿ ಹ್ಯಾ ಘರಾಂತ್ ಯೇವ್ನ್ ಕಿತ್ಲೊ ತೇಂಪ್ ಜಾಲೊ?"

"ಏಕ್ ವರ್‌ಸ್ ಜಾತಾ...... " ಮ್ಹಣಾಲಿ ತಿ ತಕ್ಷಣ್.

"ತ್ಯಾ ಆದಿಂ ಹಾಂಗಾ ಕೋಣ್ ರಾವ್ತಾಲಿಂ..." ಹಾಂವೆಂ ಆನ್ಯೇಕ್ ಸವಾಲ್ ಕೆಲೆಂ.

"ಹ್ಝಾಂ,.... ವ್ಹಯ್.... ಮ್ಹಣಾಲಿ ತಿ ".... ಆಮಿ ಯೆಂವ್ಚ್ಯಾ ಆದಿಂ ಏಕ್ ಸ್ತ್ರೀ ಹಾಂಗಾ ಆಸ್‌ಲ್ಲಿ ಖಂಯ್. ತಿಚೆಂ ನಾಂವ್ ಹಾಂವ್ ನೆಣಾಂ. ಪುಣ್ ತಿಚೊ ದಾದ್ಲೊ ಬೆಂಗ್ಳುರ್ ಆಸ್‌ಲ್ಲೊ ಖಂಯ್. ತುಂವೆ ಸಾಂಗ್ಚಿಂ ತಿ ಸ್ತ್ರೀ ಜಾಂವ್ಕ್ ಪುರೊ. ಪುಣ್ ತಿ ಆತಾಂ ಹಾಂಗಾ ನಾ. ತಿಣೆಂ ಹೆಂ ಘರ್ ಸೊಡ್‌ಲ್ಲ್ಯಾನ್ ನ್ಹಂಯ್‌ವೇ ಆಮಿ ಹಾಂಗಾ ಆಯ್ಲ್ಯಾಂವ್? ತಾಂಚೆ ವಿಶಿಂ ಮ್ಹಾಕಾ ಚಡ್ತಿಕ್ ಕಾಂಯ್ ಕಳಿತ್ ನಾ...."

ತಿಣೆಂ ಸಾಂಗ್‌ಲ್ಲೆಂ ಆಯ್ಕೊನ್ ಹಾಂವ್ ನಿರಾಶಿ ಜಾಲೊಂ. ತರ್ ಸುಂದರಿಕ್ ಆನಿ ಖಂಯ್ಸ್‌ರ್ ಸೊದ್ಚೆಂ? ಹೆಂ ಘರ್ ತಾಣೆಂ ಸೊಡುಂಕ್ ಕಾರಾಣ್ ಕಿತೆಂಗಾಯ್? ಅಶೆಂ ಚಿಂತಾನಾ ಎಕಾಚ್ಛಾಣೆಂ ಮ್ಹಾಕಾ ಪ್ರಬಾಕರಾನ್ ಸಾಂಗ್‌ಲ್ಲ್ಯಾ ಮ್ಹಾತಾರೆಚೊ ಉಡಾಸ್ ಆಯ್ಲೊ. ದೆಕುನ್ ಹಾಂವೆಂ ವಿಚಾರ್‌ಲೆಂ. "ಕುಶಿಚ್ಯಾ ಬಿಡಾರಾಂತ್ ಕೋಣ್ ರಾವ್ತಾತ್?" "ಥಂಯ್ ಕೊಣೀ ನಾಂತ್... ಎಕ್ಲಿ ಮ್ಹಾತಾರಿ ಮಾತ್ರ್ ಆಸಾ" ಮ್ಹಣಾಲಿ ತಿ ಸ್ತ್ರೀ.

ಮ್ಹಾಕಾ ಥೊಡೊ ಭರ್‌ವಸೊ ಉದೆವ್ನ್ ಆಯ್ಲೊ. "ತರ್ ಸಾರ್‌ಕೆಂ...." ಮ್ಹಳ್ಳೆಂ ಹಾಂವೆಂ ತಿಕಾ. "....ಕುಶಿಚ್ಯಾ ಘರಾಂತ್ ಎಕ್ಲಿ ಮ್ಹಾತಾರಿ ರಾವ್ತಾಂ ಮ್ಹಣ್ ಬೆಂಗ್ಳುರ್‌ಚ್ಯಾ ಮನ್ಶಾನ್ ಮ್ಹಾಕಾ ಸಾಂಗ್ಲಾಂ. ತಿಚೆಕಡೆನ್ ಮ್ಹಾಕಾ ಉಲಯ್ಜೆ ಆಸ್ಲೆಂ...." ಮ್ಹಳ್ಳೆಂ ಹಾಂವೆಂ- ’ತುಂ ತಿಕಾ ಚಿಕ್ಕೆ ಭಾಯ್ರ್ ಆಪಯ್’ ಮ್ಹಳ್ಳ್ಯಾಪರಿಂ ನಟನ್ ಕರುನ್. ಮ್ಹಜ್ಯಾ ಸವಾಲಾಂಕ್ ಜಾಪಿ ದೀವ್ನ್ ತಿ ಥಕ್ಲಿ ಆಸ್ತೆಲಿ. "ತಿ ಹುಶಾರ್ ನಾ -ಭಿತರ್ ನಿದ್ಲ್ಯಾ.... ತುಂಚ್ ಆಪಯ್ ತಿಕಾ...."

ಜಡಾಯೆನ್ ತಿಣೆಂ ಮ್ಹಳೆಂ ಆನಿ ಭಿತರ್ ಚಲ್ಲಿ. ವ್ಹಾಣೊ ಭಾಯ್ಲ್ಯಾ ಮೆಟಾರ್ ದವರುನ್ ಬಾಗ್ಲಾಲಾಗಿಂ ರಾವೊನ್ ವಳೂ ’ಅಜ್ಜೇ’ ಮ್ಹಣ್ ತುಳ್ವೆನ್ ಉಲೊ ದಿಲೊ. ಭಿತರ್ ಥಾವ್ನ್ ಕಸ್ಲೊಯಿ ಆವಾಜ್ ನಾ. ದುಸ್ರ್ಯಾ ಪಾವ್ಟಿಂ ಆಪಯ್ತಾನಾ ಇಲ್ಲಿ ಪಿಂರ್ಗೊಣಿ ಮಾತ್ರ್ ಆಯ್ಕಾಲಿ. ಧೈರ್ ಎಕ್ಟಾಂವ್ನ್ ಹಾಂವ್ ಆಡ್ ಆಸ್ಲೆಂ ಬಾಗಿಲ್ ಲೊಟುನ್ ಭಿತರ್ ಗೆಲೊಂ. ಭಿತರ್‌ಲ್ಯಾ ಕಾಳೊಂಕಾಂತ್ ಏಕ್ ಮಾಂದ್ರಿ ಸೊಡಯಿಲ್ಲಿ. ಆನಿ ತ್ಯಾ ಮಾಂದ್ರೆರ್ ಕೋಣ್ ತರಿ ಎಕ್ಲಿ ನಿದ್ಲ್ಯಾ ದಿಸ್ತಾಲೆಂ. ಹಾಂವೆಂ ತಿಚೆಲಾಗಿಂ ಸರೊನ್ ಪರತ್ ’ಅಜ್ಜೆ’ ಮ್ಹಣ್ ಉಲೊ ಕೆಲೆಂ. ಪರ್ತ್ಯಾನ್ ಪಿಂರ್ಗಾಲಿ ಆನಿ ಉಪ್ರಾಂತ್ ಖೊಂಕ್ಲಿ ಕಾಡ್ನ್ "ಏರ್ ಅವ್" ಮ್ಹಣೊನ್ ಉಟೊನ್ ಬಸೊಂಕ್ ಪ್ರಯತನ್ ಕರಿಲಾಗ್ಲಿ.

"ನಾಕಾ ನಾಕಾ ತುವೆಂ ಉಟ್ಚೆಂ ನಾಕಾ" ಮ್ಹಳೆಂ ಹಾಂವೆಂ ತಕ್ಷಣಾ ತಿ ಆಡಾವ್ನ್, ತ್ಯಾ ಬರಾಬರ್ ಹಾಂವೆಂ ಪಾಟಿಂ ಘುಂವೊನ್ ಯೇವ್ನ್ ಮುಕ್ಲಿಂ ದೋನಿ ಬಾಗ್ಲಾಂ ಸಾರ್‌ಕಿಂ ಉಗ್ತಿಂ ಕೆಲಿಂ- ಭಾಯ್ಲೊ ಉಜ್ವಾಡ್ ಥೊಡೊ ಭಿತರ್ ಸರ್‌ಲೊ ಜಾಲ್ಲ್ಯಾನ್ ಕುಡಾಂತ್ಲೊ ಕಾಳೊಕ್ ಭಾಯ್ರ್ ಧಾಂವ್ಲೊ. ಹಾಂವ್ ತಿಚಾ ಲಾಗ್ಸಾರ್‌ಚ್ ಬಾಗ್ವೊನ್ ಬಸ್ಲೊಂ.... ವಳೊಕ್ ಧರ್‌ಚ್ಯಾ ಖಾತಿರ್ ಮಾಟ್ಯಾಂನಿ ಆಸ್‌ಲ್ಲೆ ದೊಳೆ ತಿಚೆ ಭಾಯ್ರ್ ಯೇಂವ್ಕ್ ಉರ್ಡಾತಾತ್ ತಶೆಂ ದಿಸ್ತಾಲೆಂ. ’ಕೋಣ್‌ಗಾಯ್’ ಮ್ಹಳ್ಳೆಂ ಸವಾಲ್ ತಿಚಾ ಮಿರಿಯೆಲ್ಲ್ಯಾ ತೊಂಡಾರ್ ಉದೆಲ್ಲೆಂ. ಹಾಂವೆಂ ಚಡ್ ಲಾಂಬಾಯ್ ಕೆಲಿನಾ.

’ಅಜ್ಜೇ’ ಮ್ಹಳೆಂ ಹಾಂವೆಂ ತಿಕಾ ವಳೂ ತಾಳ್ಯಾನ್.... ತುಕಾ ಮ್ಹಜಿ ವಳಕ್ ನಾ.... ದೆಕುನ್ ಘಡ್ಬಡ್ನಾಕಾ..... ಪುಣ್ ಮ್ಹಾಕಾ ತುಜಿ ವಳಕ್ ಬೆಂಗ್ಳುರಾಂತ್ ಆಸ್ಚ್ಯಾ ಪ್ರಬಾಕರಾನ್ ಸಾಂಗ್ಲ್ಯಾ..... ಆನಿ ತಾಣೆಂಚ್ ಮ್ಹಾಕಾ ಹಾಂಗಾಸರ್ ಧಾಡ್ಲಾಂ... ಪ್ರಬಾಕರಾಚಿ ಪತಿಣ್ ಸುಂದರಿ ಖಂಯ್ ಆಸಾ....? ತಿಚಾ ತೊಂಡಾಚೊ ಛ್ಹಾರೊ ಬದಲ್ಲೊ.... ಗೈರ್‌ಯಾ ದಿಸ್ಟಿಂಚಿ ಅಸ್ಕತ್ ದೊಳೆ ಮ್ಹಜಿ ವಳಕ್ ಧರುಂಕ್ ಪರ್‌ತುನ್ ಉರ್ಡಾಲೆ. ಹಾಂವ್ ತಿಕಾ ಆನಿಕೀ ಲಾಗಿಂ ಸರೊನ್ ಬಸ್ಲೊಂ ಆನಿ ಮಾಂದ್ರೆರ್ ಆಸ್‌ಲ್ಲೊ ತಿಚೊ ಹಾತ್ ವಳೂ ಧರ್‌ಲೊ ತಿಕಾ ಧಯ್ರ್ ಲಾಬೊಂದಿ ಮ್ಹಳ್ಳ್ಯಾ ಉದ್ದೇಶಾನ್.... ಜಾಯಿತ್ತೊ ವೇಳ್ ತಿ ಮ್ಹಾಕಾ ಪಳೆಯ್ತ್ ರಾವ್ಲಿ.... ಉಪ್ರಾಂತ್ ಮ್ಹಜ್ಯಾ ಸವಾಲಾಕ್ ಜಾಪ್ ದಿಂವ್ಚ್ಯಾ ಬದ್ಲಾಕ್ ಆಪ್ಲೊ ಹಾತ್ ಮ್ಹಜಾಂತ್ಲೊ ನಿಸ್ರಾಂವ್ಕ್ ತಿಣೆ ಪಾಟಿಂ ವೊಡ್ಲೊ...

"ಅಜ್ಜೇ.... ತುವೆಂ ಭಿಯೆಂವ್ಚಿ ಕಾಂಯ್ ಗರ್‌ಜ್ ನಾ..... ಹಾಂವ್ ಪ್ರಬಾಕರಾಚೊ ಈಶ್ಟ್.... ತಾಣೆಂ ಮ್ಹಾಕಾ ಸಗ್ಳಿ ಸಂಗತ್ ಸಾಂಗ್ಲ್ಯಾ" ಮ್ಹಳ್ಳೆಂ ಹಾಂವೆ ಪರ್ತ್ಯಾನ್ ತಿಕಾ ಧೈರ್ ದೀವ್ನ್ "ಸಾಂಗ್...... ಸುಂದರಿ ಖಂಯ್ಸರ್ ಆಸಾ?"

"ಕೋಣ್ ಸುಂದರಿ?" ತಿಣೆಂ ಮ್ಹಾಕಾಚ್ ಪಾಟಿಂ ಸವಾಲ್ ಕೆಲೆಂ. ಹಾಂವ್ ಶಿರಿಂ ಚುಕ್ಲೊಂ, ತರೀ ಸಾಂಬಾಳುನ್ ಮ್ಹಳೆಂ

"ಕುಶಿಚ್ಯಾ ಬಿಡಾರಾಂತ್ ರಾವ್ತಾಲೆಂ ತೆಂ... ತಾಕಾ ತುಜಾ ಅದೀನ್ ಸೊಡ್ನ್ ಪ್ರಬಾಕರ್ ಬೆಂಗ್ಳುರ್ ಗೆಲ್ಲೊ...." ತಿ ವಳೂ ಪಿಂರ್ಗಾಲಿ ತರಿ ತಿಚೆ ದೊಳೆ ಮ್ಹಜ್ಯಾ ತೊಂಡಾಕ್‌ಚ್ ಪಳೆತಾಲೆ.

"ಹಾಂವ್ ಕೊಣಾಯ್ಕಿ ವಳ್ಕಾನಾ" ಮ್ಹಣಾಲಿ ತಿ ಥೊಡ್ಯಾ ವೆಳಾನ್. ಉಪ್ರಾಂತ್ ತಿ ನಿದ್‌ಲ್ಲ್ಯಾ ಕಡೆನ್‌ಚ್ ಇಲ್ಲೆಂ ಹುಳ್ವುಳೊನ್ ಪರ್ತ್ಯಾನ್ ಪಿಂರ್ಗಾಲಿ...

"ಮ್ಹಾಕಾ ಕಾಂಯ್ ತಾಂಕಾನಾ" ಮ್ಹಣಾಲಿ ದೊಳೆ ಧಾಂಪುನ್ ಆನಿ ಹಾತ್ ಭಾಶೆನ್ ’ತುಂ ವಚ್’ ಮ್ಹಳ್ಳ್ಯಾಬರಿ ಹಿಶಾರೊ ಕರ್ನ್. ಹಾಂವ್ ಕೆಲ್ಲಿ ಚೂಕ್ ಮ್ಹಾಕಾ ಆತಾಂ ಸಮ್ಜಾಲ್ಲಿ. ಎಕಾಚ್ಛಾರಾ ಸುಂದರಿಚೊ ಪ್ರಸ್ತಾಪ್ ಕಾಡ್‌ಲ್ಲ್ಯಾನ್ ಮ್ಹಾತಾರೆಕ್ ಮ್ಹಜೆರ್ ದುಬಾವ್ ಜಾಲ್ಲೊ..... ಉಪ್ರಾಂತ್ ತಿಣೆಂ ಹಾಂವೆಂ ಖಂಚ್ಯಾ ರೀತಿನ್ ಸಮ್ಜಾಯ್ಲ್ಯಾರೀ ಸಾರ್‌ಕಿಂ ಜಾಪ್ ದಿಲಿನಾ.... ತರೀ ಹಾಂವೆಂ ಹಠ್ ಸೊಡಿನಾಸ್ತಾಂ ಘುಂವ್ಡಾವ್ನ್ ಘುಂವ್ಡಾವ್ನ್ ಥೊಡಿಂ ಸವಾಲಾಂ ಕೆಲಿಂ... ಏಕ್ ಪಾವ್ಟಿಂ ಮಾತ್ರ್ ತಿ ಮ್ಹಣಾಲಿ.

"ತೆಂ ವರ್ಸಾಂ ಆದಿಂ ಘರ್ ಸೊಡ್ನ್ ಗೆಲಾಂ... ಖಂಯ್ ಗೆಲಾಂ ಆಪ್ಣಾಕ್ ಕಳಿತ್ ನಾ"

ಚಡ್ತಿಕ್ ತಿಣೆಂ ಮ್ಹಾಕಾ ಕಿತೆಂಚ್ ಸಾಂಗ್ಲೆಂ ನಾ. ನಿರಾಶೆನ್ ಹಾಂವ್ ಥಂಯ್ ಥಾವ್ನ್ ಪಾಟಿಂ ಆಯ್ಲೊಂ. ಆನಿ ಕಿತೆಂ ಕರ್‌ಚೆಂ? ಬಗ್ಲೆಚ್ಯಾ ಥೊಡ್ಯಾ ಘರಾಂನಿ ಹಾಂವೆ ವಿಚಾರ್ ಕೆಲೊ. ಪುಣ್ ತಾಂಕಾಂ ಕೊಣಾಯ್ಕಿ ಸುಂದರಿಚಿ ಖಬಾರ್ ಕಳಿತ್ ನಾತ್ಲಿ. ಮ್ಹಾತಾರಿ ಜಾಣಾ ಆಸ್‌ಲ್ಲಿ ತರೀ ಸಾಂಗೊಂಕ್ ತಯಾರ್ ನಾತ್ಲಿ. ಮ್ಹಾಕಾ ಭಾರಿಚ್ ನಿರಾಶಾ ಭೊಗ್‌ಲ್ಲಿ. ಸುಂದರಿಕ್ ಪಳೆಂವ್ಚಿ ಮ್ಹಜಿ ಉರ್‌ಬಾ ನಿಂವೊನ್ ಗೆಲ್ಲಿ.

ಪ್ರಬಾಕರಾನ್ ವರ್‌ಣಿಲ್ಯಾ ತ್ಯಾ ನಾಕಾರ್ ದೀಶ್ಟ್ ಘಾಲ್ಚಿ, ಏಕಾ ತರ್‌ನಾಟ್ಯಾಕ್ ಆಪ್ಲೊ ಜೀವ್ ಪರ್‌ಯಾಂತ್ ಹೊಗ್ಡಾಂವ್ಕ್ ಕಾರಾಣ್ ಜಾಲ್ಲ್ಯಾ ತ್ಯಾ ನಾಕಾಚಿ ಸುಂದರತಾ, ತಾಚಿ ಸಕತ್ ಪಾರ್‌ಕುಂಚಿ ಆಶಾ ತಿ ಬೆಂಗ್ಳುರ್ ಥಾವ್ನ್ ಹಾಂವೆಂ ವ್ಹಾವವ್ನ್ ಹಾಡ್‌ಲ್ಲಿ ತಸಲಿಂ ಆತಾಂ ಚೂರಾನ್ ಚೂರ್ ಜಾಲ್ಲಿ. ಖರ್‌ಚಿಲ್ಯಾ ವೆಳಾಚೊ ಆನಿ ಭೊಗ್‌ಲ್ಲ್ಯಾ ನಿರಾಶೆಚೊ ಆಟವ್ ಕರಿತ್ತ್ ಹಾಂವ್ ಘರ್‌ಚ್ಯಾ ವಾಟೆಕ್ ಲಾಗ್ಲೊಂ. ಆನಿ ತವಳ್ ಮುಕಾರ್ ಥಾವ್ನ್ ಯೆಂವ್ಚೊ ತ್ಯಾ ವಠಾರಾಚೊ ಟಪ್ಪಾಲ್ ಪೆದೊ ಮ್ಹಜ್ಯಾ ದೀಶ್ಟಿಕ್ ಪಡ್ಲೊ. ಹಾಚೆ ಕಡೆನ್ ಖಬಾರ್ ಕಾಡ್ಯೆತ್ ಮ್ಹಳ್ಳೆಂ ಮ್ಹಜ್ಯಾ ಮತಿಕ್ ಸುಸ್ತಾಲೆಂ ಆನಿ ತಾಕಾ ರಾವವ್ನ್ ಹಾಂವೆಂ ಸುಂದರಿ ವಿಶ್ಯಾಂತ್ ತಾಚೆಲಾಗಿಂ ವಿಚಾರ್‌ಲೆಂ. ತೊ ಸುಂದರಿಕ್ ವಳ್ಕಾತಾಲೊ.

ತೀನ್ ವರ್ಸಾಂ ಥಾವ್ನ್ ತ್ಯಾ ವಠಾರಾಕ್ ಕಾಗ್ದಾಂಚೆಂ ಬಟ್ವಾಡೆ ತೊಚ್ಚ್ ಕರ್ತಾಲೊ ಜಾಲ್ಲ್ಯಾನ್ ಪ್ರಬಾಕರಾನ್ ಧಾಡ್‌ಲ್ಲಿಂ ಮನಿಯೋರ್ಡರಾಂ ಸುಂದರಿಕ್ ತೊಚ್ಚ್ ಪಾವಯ್ತಾಲೊ. ತಾಚೆ ಥಾವ್ನ್ ಥೊಡ್ಯೊ ಸಂಗ್ತಿ ಕಳಿತ್ ಜಾಲ್ಯೊ ಮ್ಹಾಕಾ. ’ಸುಂದರಿ’ ಎಕಾ ವರ್ಸಾ ಥಾವ್ನ್ ತ್ಯಾ ಘರಾಂತ್ ನಾ. ತಾಣೆಂ ಘರ್ ಸೊಡ್ಚ್ಯ್ ಸಾತಾ’ಟ್ ಮಯ್‌ನ್ಯಾಂ ಆದಿಂಚ್ ತಾಕ್ ಯೆಂವ್ಚೆ ಪಯ್ಶೆ ಬಂದ್ ಜಾಲ್ಲೆ. ತ್ಯಾ ವೆಳಾರ್ ಕೆದಾಳಾಯ್ ತಿ ಆಪ್ಣಾಲಾಗಿಂ ತೆ ಕಾಗ್ದಾಂ ವಿಶ್ಯಾಂತ್, ಪಯ್ಶ್ಯಾಂ ವಿಶ್ಯಾಂತ್ ವಿಚಾರ್ತಾಲೆಂ. ಪುಣ್ ಉಪ್ರಾಂತ್ ತಾಣೆಂ ವಿಚಾರ್‌ಚೆಂಚ್ ಸೊಡ್ಲೆಂ.

ತೆಂ ಘರಾಂತ್ ಆಸ್ತಾಲೆಂ ಜಾಂವ್ಕ್ ಪುರೊ ಪುಣ್ ಆಪ್ಣೆಂ ತಾಕಾ ಪಳೆಂವ್ಕ್ ನಾ ಮ್ಹಣಾಲೊ ತೊ. ಪುಣ್ ಪಾಟ್ಲ್ಯಾ ಎಕಾ ವರ್ಸಾ ಥಾವ್ನ್ ಸುಂದರಿನ್ ಘರ್ ಸೊಡ್ಲಾಂ ಮ್ಹಣ್ ಸಂಗತ್ ತೊ ಜಾಣಾ ಆಸ್‌ಲ್ಲೊ. ಹಾಂವೆಂ ತಾಕಾ ಮ್ಹಜಿ ಗರ್‌ಜ್ ವಿವರ್‌ಸಿಲ್ಲಿ. ತಾಚ್ಯಾ ಘೊವಾನ್ ಆಪ್ಣಾಕ್ ತಾಚೆಲಾಗಿಂ ಗರ್‌ಜೆನ್ ಧಾಡ್ಲಾಂ ಮ್ಹಣ್ ಸಾಂಗ್ಲೆಂ ಆನಿ ಕುಶಿಚ್ಯಾ ಘರಾ ಮ್ಹಾತಾರಿ ಭಿಯಾನ್ ಆಪ್ಣಾಕ್ ಸಂಗತ್ ಲಿಪಯ್ತಾ ಮ್ಹಣೊನ್‌ಯಿ ತಿಳ್ಸಿಲ್ಲೆಂ. ಟಪ್ಲಾಲ್ ಪೆದೊ ಮ್ಹಾಕಾ ಪಳೆವ್ನ್ ವಳ್ಕಾತಾಲೊ ಜಾಲ್ಲ್ಯಾನ್ ಮ್ಹಾಕಾ ಕುಮಕ್ ಕರುಂಕ್ ತಯಾರ್ ಜಾಲೊ.

"ಸುಂದರಿ ಖಂಯ್ ಗೆಲಾಂ ಮ್ಹಳ್ಳೆಂ ಮ್ಹಾತಾರೆಕ್ ಖಂಡಿತ್ ಕಳಿತ್ ಆಸ್ತೆಲೆಂ" ಮ್ಹಣಾಲೊ ತೊ.

"ತುಜಿ ತಿ ವಳಕ್ ನಾತ್‌ಲ್ಲ್ಯಾನ್ ಭಿಯೆಲ್ಯಾ ಆಸ್ತೆಲಿ... ಮ್ಹಜೆ ಸಂಗಿಂ ಯೇ, ಹಾಂವ್ ತಿಕಾ ಸಮ್ಜಾಂವ್ಕ್ ಪ್ರಯತನ್ ಕರ್ತಾಂ" ಅಶೆಂ ತಾಣೆಂ ಮ್ಹಾಕಾ ಪರ್‌ತುನ್ ಮ್ಹಾತಾರೆಚಾ ಘರ್ ಆಪವ್ನ್ ವ್ಹೆಲೊ. ಸುರ್‌ವೆರ್ ಮ್ಹಾತಾರಿ ಪೆದ್ಯಾಕಡೆನ್‌ಯಿ ತಶೆಂಚ್ ಉಲಯ್ಲಿ. ಅಕ್ರೇಕ್ ತಿಣೆಂ ತೊಂಡ್ ಸೊಡ್ಲೆಂ.

"ಸುಂದರಿನ್ ಹಿ ಗಜಾಲ್ ಕೊಣಾಯ್ಕಿ ಸಾಂಗೊಂಕ್ ನ್ಹಜೊ ಮ್ಹಳಾಂ" ಮ್ಹಣಾಲಿ ತಿ ಖಂತಿನ್‌ಶೆಂ, ಉಪ್ರಾಂತ್ ತಿಣೆ ಖರಿ ಸಂಗತ್ ಸಾಂಗ್ಲಿ.

"ಸುಂದರಿ ಹುಶಾರ್ ನಾ. ತೆಂ ವರ್ಸಾಂ ಥಾವ್ನ್ ಕಂಕ್ನಾಡಿಚಾ ಕಾತಿ ಪಿಡೆಚ್ಯಾ ವಾರ್‌ಡಾಂತ್ ದಾಕಲ್ ಜಾಲಾಂ. ಪ್ರಬಾಕರ್‌ಚ್ ಆಯ್ಲೊ ತರೀ ಆಪುಣ್ ಖಂಯ್ ಆಸಾಂ ತೆಂ ಸಾಂಗೊಂಕ್ ನ್ಹಜೊ ಮ್ಹಳ್ಳಿ ತಾಕಿದ್ ತಾಣೆಂ ಆಪ್ಣಾಕ್ ದಿಲ್ಯಾ" ಮ್ಹಣಾಲಿ ಮ್ಹಾತಾರಿ. ಆಯ್ಕೊನ್ ಆಂಗಾರ್ ಶೆಳೆ ಉದಾಕ್ ವೊತ್‌ಲ್ಲ್ಯಾಬರಿಂ ಭಗ್ಲೆಂ ಮ್ಹಾಕಾ. ಹಾಂವ್ ಥಂಯ್ಸ್ ಕುಸ್ಕೊನ್ ಬಸ್ಲೊ. ಉಪ್ರಾಂತ್ ಹಾಂವೆಂ ತಿಕಾ ಜಾಯ್ತಿಂ ಸವಾಲಾಂ ಕೆಲಿಂ ತರೀ ತಿಚೆ ಥಾವ್ನ್ ಇತ್ಲೆಂಚ್ ಕಳಿತ್ ಜಾಲೆಂಕೀ ’ಪ್ರಬಾಕರಾಚೆ ಪಯ್ಶೆ ಯೆಂವ್ಚೆ ಬಂದ್ ಜಾಲ್ಯಾ ಉಪ್ರಾಂತ್ ಸುಂದರಿ ಬೋವ್ ಕಶ್ಟಾರ್ ಆಸ್‌ಲ್ಲೆಂ. ತ್ಯಾಚ್ ವೆಳಾರ್ ತಾಕಾ ಪಿಡಾ ಸುರು ಜಾಲ್ಲಿ. ಪುಣ್ ಪಿಡಾ ಜೂನ್ ಜಾತಾಸರೀ ಸುಂದರಿನ್ ಆಪ್ಲ್ಯಾ ಪಿಡೆವಿಶಿಂ ಮ್ಹಾತಾರೆಕ್ ಸಾಂಗ್ಲೆಂನಾ. ಘರಾ ಭಿತರ್‌ಚ್ ತೆಂ ರಾವ್ತಾಲೆಂ.

ಉಪ್ರಾಂತ್ ಎಕಾ ದಿಸಾ ಮ್ಹಾತಾರೆಚಾಚ್ ವೊತ್ತಾಯೆಕ್ ತೆಂ ಕಂಕ್ನಾಡಿ ಆಸ್ಪತ್ರೆಕ್ ಗೆಲ್ಲೆಂ. ಆನಿ ಆತಾಂ ಥಂಯ್ಸ್‌ರ್‌ಚ್ ಆಸಾ. ಆಸ್ಪತ್ರೆಂತ್ ದಾಕಲ್ ಜಾಲ್ಯಾ ಉಪ್ರಾಂತ್ ಮ್ಹಾತಾರೆನ್‌ಯಿ ತಾಕಾ ಪಳೆಂವ್ಕ್ ನಾ. ಪೋಸ್ಟ್‌ಮೆನಾಚೊ ತಾಚಾ ಕುಮ್ಕೆ ಖಾತಿರ್ ಹಾಂವೆಂ ಉಪ್ಕಾರ್ ಭಾವುಡ್ಲೊ ಆನಿ ಹಾಂವ್ ಘರಾ ಪಾಟಿ ಆಯ್ಲೊ. ತಕ್ಲಿ ಮ್ಹಜಿ ಜಡ್ ಜಾಲ್ಲಿ. ಪ್ರಬಾಕರಾನ್ ತಾಚಿ ನಿಮಾಣಿ ಆಶಾ ಪೊಂತಾಕ್ ಪಾವಯ್ತಾಂ ಮ್ಹಣ್ ಹಾಂವೆಂ ಭಾಸ್ ದಿಲ್ಲಿ. ಪುಣ್ ಆತಾಂ ಹಾಂವೆ ಕಿತೆಂ ಕರ್‌ಯೆತ್?

ಜಾಯ್ತೆಂ ಚಿಂತುನ್ ನಿಮಾಣೆಂ ಹಾಂವ್ ತ್ಯಾಚ್ ದನ್ಪಾರಾಂಚಾ ಚಾರ್ ವೊರಾಂಚೆರ್ ಕಂಕ್ನಾಡಿ ಭಾಯ್ರ್ ಸರ್‌ಲೊ. ಆಸ್ಪತ್ರೆಂತ್ ಮ್ಹಾಕಾ ಥೊಡ್ಯಾಂಚಿ ವಳಕ್ ಆಸ್‌ಲ್ಲಿ ಜಾಲ್ಲ್ಯಾನ್ ಸುಂದರಿಚಿ ಖಬಾರ್ ಮೆಳೊಂಕ್ ಕಶ್ಟ್ ಜಾಲೆನಾಂತ್. ಹಾಂವ್ ಕಾತಿಚ್ಯಾ ಪಿಡೆಚ್ಯಾ ವಾರ್‌ದಾಂತ್ ಆಸ್ಚ್ಯಾ ಸಿಸ್ಟರಿಕ್ ಭೆಟ್ಲೊಂ ಆನಿ ಸಂಗತ್ ವಿವರ್ಸಿಲಿ. ಸುಂದರಿಚಾ ಘೊವಾನ್ ಆಪ್ಣಾಕ್ ಧಾಡ್ಲಾಂ ಆನಿ ಸುಂದರಿ ಲಾಗಿಂಚ್ ಆಪ್ಣಾಕ್ ಖಾಸ್ಗೆನ್ ಉಲಂವ್ಕ್ ಆಸಾ ಮ್ಹಣ್ ಹಾಂವೆಂ ತಿಕಾ ಸಾಂಗ್ಲೆಂ.

"ಹಾಂಗಾಸರ್ ಎಡ್ಮಿಟ್ ಜಾಲ್ಲ್ಯಾಕ್ ತಿಣೆಂ ಎದೊಳ್ ಕೊಣಾಕ್‌ಯಿ ಭೆಟ್ ದೀಂವ್ಕ್ ನಾ" ಮ್ಹಣಾಲಿ ಸಿಸ್ಟರ್.

"ಕಿತೆಂಯಿ ಗರ್‌ಜೆಚೆ ಸಾಂಗೊಂಕ್ ಆಸಾ ತರ್ ಮ್ಹಜೆಲಾಗಿಂ ಸಾಂಗ್. ಹಾಂವ್ ತಿಕಾ ಸಾಂಗ್ತಾ ಮ್ಹಣಾಲಿ ತಿ ಪಯ್ಲೆಂ. ಹಾಂವೆಂ ತಿಕಾ ಮೂಗುತಿಚಿ ಖಬಾರ್ ಸಾಂಗೊಂಕ್ನಾತ್ಲಿ. ಮೂಗುತಿ ಖುದ್ದ್ ಹಾಂವೆಂಚ್ ಸುಂದರಿಕ್ ದೀಜಾಯ್ ಮ್ಹಳ್ಳಿ ಮ್ಹಜಿ ಆಶಾ ಜಾವ್ನಾಸ್‌ಲ್ಲಿ. ದೆಕುನ್ ಹಾಂವೆಂ ಮ್ಹಳೆಂ-

"ಸಂಗತ್ ತಿ ಘೊವಾ-ಬಾಯ್ಲೆ ಮದ್ಲಿ ಸಿಸ್ಟರ್, ತಿಚ್ಯಾ ದಾದ್ಲ್ಯಾನ್ ಸಾಂಗ್‌ಲ್ಲೆಂ ತೆಂ ಹಾಂವೆಂಚ್ ಖಾಸ್ಗೆನ್ ತಿಕಾ ಸಾಂಗಾಜಾಯ್ ಪಡ್ಲಾಂ. ದೆಕುನ್ ಕಶೆಂಯ್ ಪುಣಿ ಮ್ಹಾಕಾ ತಿಚೆಲಾಗಿಂ ಭೆಟ್ಚೊ ಅವ್ಕಾಸ್ ಕರ್ನ್ ದಿಲ್ಲೊ ತರ್ ತುಜೊ ಉಪ್ಕಾರ್ ಜಾತೊ.... ದೋನ್ ಮಿನುಟಾಂ ಮಾತ್ರ್ ಹಾಂವ್ ತಿಚೆಲಾಗಿಂ ಉಲಯ್ತಾಂ..."

ಹಾಂವೆಂ ಪೊರಾತ್ತುನ್ ವಿಚಾರ್‌ಲ್ಲ್ಯಾಕ್ ಸಿಸ್ಟರಿಕ್ ಥೊಡಿ ದಾಕ್ಷೆಣ್ ಜಾಲಿ ಜಾಂವ್ಕ್ ಪುರೊ. ದೆಕುನ್ ’ಆಪುಣ್ ಪ್ರಯತನ್ ಕರ್ನ್ ಪಳಯ್ತಾ ಮ್ಹಣೊನ್ ಆನಿ ಮ್ಹಾಕಾ ಬಸೊಂಕ್ ಸಾಂಗೊನ್ ತಿ ಭಿತರ್ ಗೆಲಿ. ಥೊಡೊ ವೇಳ್ ಹಾಂವ್ ಸಿಸ್ಟರಿಚಿ ವಾಟ್ ಪಳಯ್ತ್ ರಾಕೊನ್ ಬಸ್ಲೊ.

ಪ್ರಬಾಕರಾಚೆಂ ಕಾಮ್ ಆಜ್‌ಚ್ ತಿರ್ಸುನ್ ಸೊಡಿಜಾಯ್ ಮ್ಹಳ್ಳ್ಯಾ ಹಟಾಕ್ ಹಾಂವ್ ಪಡ್‌ಲ್ಲೊಂ. ಕಿತ್ಲ್ಯಾ ಕಶ್ಟಾಂನಿ ತರೀ ’ಮೂಗುತಿ’ ಸುಂದರಿಕ್ ಪಾವಿತ್ ಕರಿಜಾಯ್ ಆನಿ ಪ್ರಬಾಕರಾಕ್ ದಿಲ್ಲಿ ಭಾಸ್ ಪಾಳಿಜಾಯ್.... ಸಕಾಳಿಂ ಥಾವ್ನ್ ಹ್ಯಾಂ ಸಂಗ್ತಿ ಪಾಟ್ಲ್ಯಾನ್ ನಾಚೊನ್ ತಕ್ಲಿ ಮ್ಹಜಿ ವಿರ್‌ಯಾರ್ ಜಾಲ್ಯಾ. ಸಿಸ್ಟರ್ ಥೊಡ್ಯಾ ವೆಳಾನ್ ಪಾಟಿಂ ಆಯ್ಲಿಂ. ತೊಂಡ್ ತಿಚೆಂ ಗಂಬೀರ್ ಆಸ್‌ಲ್ಲೆಂ ಪಳೆವ್ನ್, ಮ್ಹಜೆ ಕಾಮ್ ಜಾಂವ್ಚೆಂನಾ ಮ್ಹಳ್ಳೊ ದುಬಾವ್ ಮ್ಹಾಕಾ ಉಬ್ಜಾಲೊ. ಆಪ್ಲ್ಯಾ ಕದೆಲಾರ್ ಬಸೊನ್ ತಿಣೆಂ ಮ್ಹಳೆಂ

"ತೆಂ ಭಿಲ್ಕುಲ್ ಆಯ್ಕಾಲೆಂನಾ. ಕೊಣಾಯ್ಕೀ ಭೆಟ್ಚೆಂ ತಾಕಾ ಖುಶಿ ನಾ. ಹಾಂವೆಂ ತಾಕಾ ತುಜಿ ಗಜಾಲ್ ಸಮ್ಜಾಯ್ಲ್ಯಾ. ಆನಿ ಮ್ಹಜ್ಯಾ ವತ್ತಾಯೆಕ್ ಮಾತ್ರ್ ದೋನ್ಂಚ್ ಮಿನುಟಾಂ ತುಕಾ ಉಲಂವ್ಕ್ ತೆಂ ಮೆಳ್ತೆಲೆಂ."

ಹಾಂವೆಂ ಸಮಾದನೆಚೊ ಉಸ್ವಾಸ್ ಸೊಡ್ಲೊ ಆನಿ ಸಿಸ್ಟರಿಚೊ ಮನಪೂರ್ವಕಿಂ ಉಪ್ಕಾರ್ ಭಾವುಡ್ಲೊ. ಉಪ್ರಾಂತ್ ತಿಣೆಂ ಮ್ಹಾಕಾ ಭಿತರ್ ಆಪವ್ನ್ ವ್ಹೆಲೆಂ. ಎಕಾ ಧಾಕ್ಟ್ಯಾ ಹೊಲಾಕ್ ಆಮಿ ಪಾವ್ಲ್ಯಾಂವ್. ಥಂಯ್ಸರ್ ಮ್ಹಾಕಾ ರಾವವ್ನ್ ತಿ ಬಾಗ್ಲಾಂತ್ಲ್ಯಾನ್ ಮುಕಾರ್ ಗೆಲಿ. ಲಾಗ್ಸಾರ್ ಕೊಣೀ ನಾತ್‌ಲ್ಲಿ ಪಯ್ಸ್ ಥಾವ್ನ್ ಥೊಡ್ಯಾಂನಿ ಉಲಂವ್ಚೊ ಆವಾಜ್ ಮಾತ್ರ್ ಮಾತ್ಸೊ ಆಯ್ಕಾತಾಲೊ. ಹಾಂವ್ ಸಿಸ್ಟರಿಕ್ ರಾಕೊನ್ ಧಮ್ಮ್ ಬಾಂದುನ್ ಮ್ಹಳ್ಳ್ಯಾಬರಿ ರಾವ್ಲೊಂ. ಭೊಂವ್ತಣಿ ವಕ್ತಾಂಚೊ ವಾಸ್ ನಾಕಾಕ್ ಆದಾಳ್ತಾಲೊ. ಥೊಡ್ಯಾ ವೆಳಾನ್ ಪಾಟಿಂ ಆಯಿಲ್ಲ್ಯಾ ಸಿಸ್ಟರಿನ್ ’ತೆಂ ಆಯ್ಲೆಂ ಉಲಯ್’ ಮ್ಹಳ್ಳೊ ಹಿಶಾರೊ ದಿಲೊ ಆನಿ ಮ್ಹಾಕಾ ಉತರ್ನ್ ತಿ ಪಾರ್ಲಾರಾಕ್ ಪಾಟಿಂ ಗೆಲಿ.

ಹಾಂವೆ ರಾವ್‌ಲ್ಲ್ಯಾ ಹೊಲಾಚಾ ಬಾಗ್ಲಾರ್ ದೀಶ್ಟ್ ವ್ಹೆಲಿ. ಏಕ್ ಸಾವ್ಳಿಶಿ ಥಂಯ್ ಆಯ್ಲಿ ಆನಿ ಬಾಗ್ಲಾರ್ ರಾವ್ಲಿ. ಹಾಂವ್ ಲಾಗಿಂ ಗೆಲೊ ನಿಳ್ಶಾ ದೆಗೆಚ್ಯಾ ಧೊವ್ಯಾ ಕಾಪ್ಡಾರ್ ಏಕ್ ಸ್ತ್ರೀ ಥಂಯ್ಸರ್ ಬಾಗ್ಲಾಚಾ ದಾರ್ವಾಟ್ಯಾಕ್ ವೊಣ್ಕೊನ್ ರಾವ್‌ಲ್ಲಿ. ಮ್ಹಾಕಾ ಪಾಟ್ ಕರ್ನ್ ತಿ ರಾವ್‌ಲ್ಲಿ ಆನಿ ಪಾಲೊಂವ್ ತಿಣೆಂ ಮಾತೆಂಭರ್ ಘುಟ್ಲಾಯಿಲ್ಲೊ. ಕಶೆಂ ಉಲವ್ಣೆಂ ಸುರು ಕರ್‌ಚೆಂ ತೆಂ ಮ್ಹಾಕಾ ಕಳ್ಳೆಂನಾ. ಹಳ್ತಾಚಿ ಏಕ್ ಖೊಂಕ್ಲಿ ಕಾಡ್ನ್ ಹಾಂವೆ ಮ್ಹಳೆಂ. "ತುಜೊ ಪತಿ ಪ್ರಬಾಕರ್ ಮ್ಹಾಕಾ ಬೆಂಗ್ಳುರಾಂತ್ ಮೆಳ್‌ಲ್ಲೊ." ತಿಚೆ ಥಾವ್ನ್ ಕಸಲಿಯ್ ಪ್ರತಿಕ್ರಿಯಾ ಆಯ್ಲಿನಾ.

"ತಾಣೆಂ ತುಕಾ ರೆಕಾದ್ ಧಾಡ್ನ್ ದಿಲ್ಯಾತ್... ಆನಿ ತುಜಿ ಖಬಾರ್ ಸಮ್ಜೊನ್ ಘೆಂವ್ಕ್ ಮ್ಹಾಕಾ ಸಾಂಗ್ಲಾಂ" ಹಾಂವೆ ಚಿಕ್ಕೆ ವ್ಹಡ್ಲ್ಯಾನ್ ಸಾಂಗ್ಲೆಂ. ತರ್‌ಯಿ ಕಸಲೊಯ್ ಆವಾಜ್ ಮುಕಾರ್ ಥಾವ್ನ್ ಆಯ್ಲೊನಾ. ಆತಾಂ ಆನಿ ಕಿತೆಂ ಉಲಂವ್ಚೆ ತೆಂ ಮ್ಹಾಕಾ ಕಳಾನಾ ಜಾಲೆಂ. ಸುಂದರಿಚಿ ಪಾಟ್ ಮಾತ್ರ್ ಮ್ಹಾಕಾ ಪುಡ್ ಕರ್ನ್ ಆಸ್‌ಲ್ಲಿ ಜಾಲ್ಲ್ಯಾನ್ ತಾಚ್ಯಾ ತೊಂಡಾರ್ ಜಾಂವ್ಚಿಂ ಖುಣಾಂ ಸಯ್ತ್ ದೆಕೊಂಕ್ ಮ್ಹಜ್ಯಾನ್ ಅಸಾದ್ಯ್ ಜಾಲೆಂ. ಘೊವಾಚಿ ಖಬಾರ್ ಸಾಂಗ್ತಾನಾ ತಾಕಾ ಸಂತೊಸ್ ಭಗ್ತಾ ಯಾ ರಾಗ್ ಯೆತಾ ತೆಂ ಹಾಂವ್ ಪಾರ್‌ಕುಂಕ್ ಸಕಾನಾ ಜಾಲೊಂ. ಹಾಂವೆಂ ಬೊಲ್ಸಾಂತ್ಲಿ ಮೂಗುತಿ ಗುಟ್ಲಾಯಿಲ್ಲಿ ಕಾಗ್ದಾಚಿ ಪೊಟ್ಲಿ ಭಾಯ್ರ್ ಕಾಡ್ಲಿ ಆನಿ ತಿ ಸೊಡಯ್ಲಿ.

"ತಾಣೆಂ ತುಕಾ ಏಕ್ ಕಾಣಿಕ್ ಧಾಡ್ನ್ ದಿಲ್ಯಾ" ಮ್ಹಳೆಂ ಹಾಂವೆಂ ದೋನ್ ಮೆಟಾಂ ಮುಕಾರ್ ಕಾಡುನ್, ಮ್ಹಜ್ಯಾ ಮೆಟಾಂಚೊ ಆವಾಜ್ ಆಯ್ಕೊನ್ ಸುಂದರಿ ರಾವ್‌ಲ್ಲ್ಯಾಕಡೆನ್ಂಚ್ ಚಿಕ್ಕೆಂ ಹಾಲ್ಲೆಂ ಆನಿ ಪರ್ತ್ಯಾನ್ ತಾಣೆಂ ಪಾಲೊಂವ್ ಮಾತ್ಯಾಕ್ ಸಾರ್‌ಕೊ ವೊಡ್ಲೊ. "ತುಂ ಉಲಯ್ನಾಂಯ್ ಕಿತ್ಯಾಕ್...?

ತುಮ್ಚಿ ಸರ್ವ್ ಸಂಗತ್ ಪ್ರಬಾಕರಾನ್ ಮ್ಹಾಕಾ ಸಾಂಗ್ಲ್ಯಾ. ತುವೆಂ ಮ್ಹಜೆಲಾಗಿಂ ಭಿಯೆಂವ್ಚಿ ಗರ್ಜ್ ನಾ" ಹಾಂವೆಂ ಮ್ಹಜೊ ತಾಳೊ ಆನಿಕೀ ವಾಡಯ್ಲೊ. ಆತಾಂ ಸುಂದರಿಚೆಂ ಮಾತೆಂ ಸಕ್ಲಾ ಬಾಗ್ವಾಲೆಂ ಆನಿ ತೆಂ ಹುಸ್ಕಾರ್ನ್ ಹುಸ್ಕಾರ್ನ್ ರಡೊಂಕ್ ಲಾಗ್ಲೆಂ. ಥೊಡೊ ವೇಳ್ ಹಾಂವ್ ಮೌನ್ ರಾವ್ಲೊಂ. ರಡ್ಣೆಂ ಥಾಂಬ್ತಚ್ ತಾಚೊ ಬಾರೀಕ್ ತಾಳೊ ಮ್ಹಾಕಾ ಆಯ್ಕಾಲೊ "ತೊ ಕಸೊ ಆಸಾ....?"

"ಪ್ರಬಾಕರ್ ಬರೊ ಆಸಾ, ಸದಾಂನೀತ್ ತುಜೊ ಉಡಾಸ್ ಕಾಡ್ತಾ" ಹಾಂವೆ ಜಾಪ್ ದಿಲಿ.

"ದಯಾಕರ್ನ್ ತಾಕಾ ಮ್ಹಜ್ಯಾ ಪಿಡೆಚಿ ಖಬಾರ್ ಸಾಂಗಿನಾಕಾ. ತೊ ಥಂಯ್ಸ್ ಪಯ್ಸ್ ಆಸೊಂದಿ...... ಆನ್ಯೇಕ್ ಕಾಜಾರ್ ಜಾಂವ್ದಿ.... ತಾಣೆಂ ಮ್ಹಜ್ಯಾ ಖಾತಿರ್ ಎದೊಳ್ ಕಶ್ಟಾಲ್ಲೆಂ ಪುರೊ..." ತೆಂ ಪರ್ತ್ಯಾನ್ ರಡ್ಲೆಂ.

ಚೂಪ್ ಧಾರಿಯೆಚಾ ಸುರಿಯೆನ್ ಕೊಣ್‌ಗೀ ಮ್ಹಜ್ಯಾ ಕಾಳ್ಜಾ ವಯ್ರ್ ಸವ್ಕಾಸ್ ಗೀಟ್ ವೊಡ್ತಾ ತಶೆಂ ಮ್ಹಾಕಾ ಭಾಸ್ ಜಾತಾಲೆಂ. ದೋನ್‌ದುಬ್ಳ್ಯಾ ಕಾಳ್ಜಾಂಚ್ಯಾ ಮೊಗಾಚ್ಯಾ ಗ್ರೇಸ್ತ್‌ಕಾಯೆ ಮುಕಾರ್ ಹಾಂವ್ ಮೌನ್‌ಪಣಿ ಸಾಕ್ಸ್ ಜಾವ್ನ್ ರಾವ್‌ಲ್ಲೊಂ. ಪರ್ತ್ಯಾನ್ ಸುಂದರಿಚ್ ಉಲಯ್ಲೆಂ

"ತುವೆಂ ತಾಕಾ ಕಿತೆಂಚ್ ಸಾಂಗೊಂಕ್ ನ್ಹಜೊ. ಹಾಂವ್ ಮೆಲ್ಯಾಂ ಮ್ಹಣ್ ತುವೆಂ ತಾಕಾ ತಿಳ್ಸಿಜಾಯ್, ನ್ಹಂಯ್ ತರ್ ತೊ ಪರ್ತ್ಯಾನ್ ಕಾಜಾರ್ ಜಾಂವ್ಚೊನಾ. ಮ್ಹಜೆ ಖಾತಿರ್ ತುಂ ಹೊ ಏಕ್ ಉಪ್ಕಾರ್ ಕರ್‌ಶಿಗೀ.....?"

ಸುಂದರಿ ಸವ್ಕಾಸ್ ಉಲಯ್ತಾಲೆಂ. ತೆಂ ಉಲಯ್ತಾನಾ ತಿತ್ಲ್ಯಾಚ್ ಸವ್ಕಾಸಾಯೆನ್ ಮ್ಹಜ್ಯಾ ಕಾಳ್ಜಾಚೊ ಶಿರೊ ಧರ್ನ್ ತೆಂ ವೊಡ್ತಾಲೆಂ. ಹಾಂವ್ ತಾಕಾ ಕಸಲಿ ಜಾಪ್ ದೀಂವ್...? ತರೀ ಹಾಂವೆಂ ಮ್ಹಳೆಂ

"ಆನಿ ತೊ ಪರ್ತ್ಯಾನ್ ಮ್ಹಾಕಾ ಮೆಳ್ಚೊ ನಾ ಕಾಲ್‌ಚ್ ಪಯ್ಲ್ಯಾ ಪಾವ್ಟಿಂ ಬೆಂಗ್ಳುರಾಂತ್ ತೊ ಮ್ಹಾಕಾ ಮೆಳ್‌ಲ್ಲೊ ಆನಿ ಹಾಂವ್ ತುಮ್ಚ್ಯಾ ಘರಾ ಲಾಗ್ಸಾರ್‌ಚ್ ವಾಲೆನ್ಸಿಯಾಂತ್ ರಾವ್ತಾಂ ಜಾಲ್ಲ್ಯಾನ್ ತುಜಿ ಖಬಾರ್ ತಾಣೆಂ ಮ್ಹಾಕಾ ಸಾಂಗ್‌ಲ್ಲಿ. ತಾಣೆಂ ತುಕಾ ಪಾವಿತ್ ಕರುಂಕ್ ಏಕ್ ವಸ್ತ್ ಮ್ಹಜೆಲಾಗಿಂ ಧಾಡ್ನ್ ದಿಲ್ಯಾ.... ಆನಿ ತಿ ತುಕಾ ದೀಂವ್ಕ್ ಹಾಂವ್ ಆಯ್ಲಾಂ....."

ಸುಂದರಿನ್ ಲಾಂಬ್ ಏಕ್ ಶ್ವಾಸ್ ಭಿತರ್ ಘೆವ್ನ್ ಭಾಯ್ರ್ ಸೊಡ್‌ಲ್ಲೊ ಆವಾಜ್ ಆಯ್ಕಾಲೊ. "ಕಸಲಿ ವಸ್ತ್ ತಿ....?" ವಿಚಾರ್‌ಲೆಂ ತಾಣೆಂ ವಳೂ ತಾಳ್ಯಾನ್.

"ತುಂಚ್ ಪಳೆ, ತಿ ತುಂವೆಂ ಪಳಯ್ಲ್ಯಾರ್ ತುಕಾ ವರ್‌ತೊ ಸಂತೊಸ್ ಭಗ್ತಾಲೊ ಮ್ಹಣ್ತಾಲೊ ಪ್ರಬಾಕರ್.... ಧರ್ ಘೆ....." ಆನಿಕೀ ದೋನ್ ಮೆಟಾಂ ಮುಕಾರ್ ವಚೊನ್ ಹಾಂವೆಂ ಮೂಗುತಿ ಘೆತ್‌ಲ್ಲೊ ಮ್ಹಜೊ ಹಾತ್ ಮುಕಾರ್ ವ್ಹೆಲೊ. ಆತಾಂ ನಿಮಾಣೆಂ ತರೀ ಸುಂದರಿಕ್ ಪಳಂವ್ಚೊ ಸಂದರ್ಬ್ ಮ್ಹಾಕಾ ಲಾಬ್‌ಲ್ಲೊ. ತೆಂ ಸವ್ಕಾಸ್ ಮ್ಹಜ್ಯಾ ಕುಶಿನ್ ಘುಂವ್ಲೆಂ. ಆತಾಂ ತೆಂ ಮ್ಹಾಕಾ ಫುಡ್ ಕರ್ನ್ ರಾವ್‌ಲ್ಲೆಂ.

ತಾಣೆಂ ತಾಚೊ ಹಾತ್ ಮುಕಾರ್ ಹಾಡ್ತಾನಾ ಹಾಂವೆಂ ತಾಚ್ಯಾ ತೋಂಡಾರ್ ದೀಶ್ಟ್ ಘಾಲಿ. ಥಟಾಕ್ಕ್ ಜಾಲೊಂ ಹಾಂವ್! ಎಕಾ ಘಡ್ಯೆಕ್ ಮ್ಹಜೊ ಉಸ್ವಾಸ್ ರಾವ್ಲೊ ಆಸ್ತಲೊ ಮೂಗುತಿ ವೊಡ್ಡಾವ್ನ್ ಸುಂದರಿಕ್ ದೀಂವ್ಕ್ ಮುಕಾರ್ ವ್ಹೆಲ್ಲೊ ಹಾತ್ ಮ್ಹಜೊ ಕಾಂಪ್ತಾಲೊ. ಪ್ರಬಾಕರಾನ್ ವರ್‌ಣಿಲ್ಲೆಂ ತೊಂಡ್ ಪಳೆಂವ್ಕ್ ಅತ್ರೆಗ್ಚ್ಯಾ ಮ್ಹಜ್ಯಾ ದೊಳ್ಯಾಂ ಮುಕಾರ್ ಆತಾಂ ತೆಂ ತೊಂಡ್ ರೂಪ್ ರೂಪ್ ದಿಸ್ತಾಲೆಂ... ಪುಣ್ ತ್ಯಾ ತೊಂಡಾರ್... ತ್ಯಾ ತೊಂಡಾರ್.... ನಾಕ್‌ಚ್ಚ್ ನಾತ್‌ಲ್ಲೆಂ! ನಾಕಾಚ್ಯಾ ಜಾಗ್ಯಾರ್ ವ್ಹಡ್ ಏಕ್ ಬುರಾಕ್ ಆಸ್‌ಲ್ಲೊ. ಕೊಡಾಚಾ ಪಿಡೆನ್ ಸುಂದರಿಚೆಂ ಸೊಬಿತ್ ನಾಕ್ ಗ್ರಾಸಿಲ್ಲೆಂ! ಆನಿ ತ್ಯಾ ನಾತ್‌ಲ್ಲ್ಯಾ ನಾಕಾ ಖಾತಿರ್ ಹಾಂವ್ ಸುಂದರಿಕ್ ಮೂಗುತಿ ವೊಡ್ಡಾಯ್ತಾಲೊಂ.....!

ಬ್ಯಾಂಡೇಜಾಂನಿ ರೆವ್ಡಾಯಿಲ್ಲೊ ಸುಂದರಿಚೊ ಹಾತ್ ಮುಕಾರ್ ಯೆಂವ್ಚ್ಯಾ ಆದಿಂಚ್ ಹಾಂವೆ ಮ್ಹಜೊ ಹಾತ್ ಪಾಟಿಂ ಹಾಡ್ಲೊ. ಹಾಂವೆ ವೇಳ್ ಕಾಡ್ಲೊ ನಾ. ಆನಿ ಥಂಯ್ಸರ್ ರಾವೊಂಕ್ ಮ್ಹಜ್ಯಾನ್ ಸಾದ್ಯ್ ನಾತ್‌ಲ್ಲೆಂ. ಎಕಾಚ್ಛಾರಾ ಹಾಂವ್ ಥಂಯ್ ಥಾವ್ನ್ ಘುಂವ್ಲೊಂ ಆನಿ ಹೊಲಾ ಥಾವ್ನ್ ಭಾಯ್ರ್ ಧಾಂವೊನ್ ಆಯ್ಲೊಂ! ಪಾರ್ಲರಾಂತ್ ಸಿಸ್ಟರ್ ನಾತ್‌ಲ್ಲಿ. ದಾಂಬುನ್ ಧರ್‌ಲ್ಲೆ ಭೊಗ್ಣಾರ್ ಮ್ಹಜೆ ಎಕಾಚ್ಛಾಣೆ ಕಾಟ್ ತುಟ್‌ಲ್ಲ್ಯಾಬರಿ ಫಾಸಾಳ್ಳೆ. ಆನಿ ಹಾಂವ್ ಲಾಗ್ಶಿಲ್ಯಾ ಬಾಂಕಾರ್ ಕುಸ್ಕೊನ್ ಗಳ್ಗಳ್ಯಾಂ ರಡ್ಲೊಂ.

ಪಾಟಿಂ ಕಥಾದಾಯ್ಜ್ ಪಾನಾಂಕ್

ಪಾಟಿಂ ದಾಯ್ಜ್ ಪಾನಾಂಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications