ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಭಾರತಾಂತ್ ಸಾಂತ್ ನಾಂತ್!? - ಆಸ್ಟಿನ್ ಡಿ’ಸೋಜ್ ಪ್ರಭು
ಆಪ್ಲ್ಯಾ ಲೇಖನಾಂತ್ ಜೆಮ್ಮಾ ಪಡೀಲ್ ಭಾರತಾಂತ್ ಸಾಂತ್ ನಾಂತ್ ಮ್ಹಣ್ ವ್ಹಳ್ವಳ್ತಾ, ಕಳ್ವಳ್ತಾ, ತಳ್ಮಾಳ್ತಾ, ಹುಳ್ವುಳ್ತಾ, ದಡ್ಬಡ್ತಾ, ಚಡ್ಪಡ್ತಾ ಆನಿ ದೇವಾಲಾಗಿಂ ತೊ ಶೀದಾ ವಿಚಾರ್ತಾ - ಭಾರತಾಕ್ ದೋನ್ ಸಾಂತ್ ದೀ ಉಪ್ರಾಂತ್ ಪಾಪ್ ಸಾಯ್ಬ್ ಭಾರತಾ ಥಾವ್ನ್ ಉದೆತಲೊ ಮ್ಹಣ್!
ಅಳೆ ಜೆಮ್ಮಾ, ದೆವಾನ್ ರಚ್ಲ್ಲೊ ಹೊ ಸಂಸಾರ್ ಮಾತ್ರ್; ’ಸರ್ಗ್ ರಚ್ಲ್ಲೊ ಕಥೊಲಿಕಾಂನಿ’ - ತಾಂಕಾಂ ಜಾಯ್ ಜಾಲ್ಲ್ಯಾ ಥೊಡ್ಯಾಂಕ್ ಮಾನ್ ದೀಂವ್ಕ್ ಆನಿ ತೆ ಭಾರಿಚ್ ಊಂಚ್ ಮ್ಹಣ್ ದಾಖಂವ್ಕ್. ನಾ ತರ್ ಜಾಲ್ಯಾರ್ ಹೆರ್ ಸಮಡ್ತಿಂಚೆ ಸಾಂತ್ ಹ್ಯಾ ಕಥೊಲಿಕ್ ಸರ್ಗಾರ್ ಕಿತ್ಯಾಕ್ ನಾಂತ್? ಕಥೊಲಿಕ್ ಸಮುದಾಯಾಂತ್ ಮಾತ್ರ್ ಸಾಂತ್ ಉದೆತಾತ್ - ಕಿತ್ಯಾಕ್ ಕಥೊಲಿಕ್ ಮಾತ್ರ್ ಹ್ಯಾ ಸಂಸಾರಾಂತ್ ಏಕ್ ಮಹಾನ್ ಸಮುದಾಯ್ - ಸರ್ವಾಂ ಪ್ರಾಸ್ ಊಂಚ್? ವ ಕಥೊಲಿಕ್ ಗಿದಾಂಪರಿಂ - ತಾಂಚಿ ಶಿಕಾರಿ ಭಾರಿಚ್ ಊಂಚ್ ಕಿತ್ಯಾಕ್ ತಾಂಕಾಂ ಆಸಾ ಪಾಜ್ಲ್ಲಿ ಬೋಂಚ್ ವ ತೆ ಜಾಣಾಂತ್ ಆಕಾಸಾರ್ ಉಭಾರ್ ಉಭೊಂಕ್?
ಜರ್ ದೇವ್ ಆಸ್ಚೊ ಎಕ್ಲೊ, ತರ್ ಸಾಂತ್ ಕಿತ್ಯಾಕ್ ಫಕತ್ತ್ ಕಥೊಲಿಕ್ ಸಮುದಾಯಾಂತ್ಲೆ? ತಾಂತ್ಲೆಯೀ ಹಜಾರೊಂ ಹಜಾರ್ ಸಾಂತ್ ಫಕತ್ತ್ ಇಟೆಲಿಂತ್ಲೆ ಆನಿ ಉರ್ಲ್ಲೆ ಫಕತ್ತ್ ಯುರೋಪಾಂತ್ಲೆ? ಹೊ ಸರ್ಗ್ ಕಿತೆಂ ಯುರೋಪಾಂತ್ಲ್ಯಾ ದೆವಾನ್ ರಚ್ಲೊ ಆನಿ ತೊ ಫಕತ್ತ್ ಥಂಯ್ಚಾ ಸಾಂತಾಂಕ್ ಜಮವ್ನ್ ಸರ್ಗಾರ್ ರುಂಭಾ ನಾಚ್ಲೊ ಆನಿ ನಾಚ್ತೆಚ್ ಆಸಾ? ವ ಹರ್ಯೆಕಾ ಧರ್ಮಾಕ್ ತಾಂಚೆಚ್ ಮ್ಹಳ್ಳೆ ಸರ್ಗ್ ಆಸಾತ್ - ಜಸೆಂ ಆಮ್ಚ್ಯಾ ಸಮಾಜೆಂತ್ ವಿವಿಧ್ ಬ್ಯಾಂಕಾಂ; ಸಿಂಡಿಕೇಟ್, ವಿಜಯಾ, ಕಾರ್ಪೊರೇಶನ್, ಕರ್ಣಾಟಕ, ಕೆನರಾ, ಐಸಿಐ, ಎಮ್ಸಿಸಿ, ಬ್ಯಾಂಕಾಂ ಆಸ್ಲ್ಲೆಪರಿಂ - ಹರ್ಯೆಕ್ಲ್ಯಾಚೊ ಮುಳಾವೊ ಉದ್ಧೇಶ್ ಫಕತ್ತ್ ಪಯ್ಶೆ ಜಮಂವ್ಚೊ?
ಆಬ್ರಾಂವ್, ಜಾಕೊಬ್, ಇಜಾಕ್, ಮೊಯ್ಜೆ, ಹೆ ಸಾಂತ್ ಜಾಲ್ಯಾತ್ ವ ತಾಂಚ್ಯಾ ನಾಂವಾಂಚೆ ಸಾಂತ್ ನವ್ಯಾ ಸೊಲ್ಲ್ಯಾ ಉಪ್ರಾಂತ್ಲೆ?
ಜೆಜುಚಿ ಆಜಿ ಸಾಂತ್ ಆನ್ನಾ ಕಸಿ ಸಾಂತಿಣ್ ಜಾಲಿ? ತಿಣೆಂ ಅಜ್ಯಾಪಾಂ ಕೆಲ್ಲಿಂ ವ ಫಕತ್ತ್ ತಿ ಜೆಜುಚಿ ಆಜಿ ಮ್ಹಣ್ ತಿಕಾ ಸರ್ಗಾರ್ ಚಡಯ್ಲಿ? ಸಾಂತ್ ಜುಜೆ ಕಸೊ ಸಾಂತ್ ಜಾಲೊ? ತೊ ಜೆಜುಚೊ ಪೊಸ್ಕೊ ಬಾಪಯ್ ಮ್ಹಣೊನ್ ವ ತೊ ಏಕ್ ಫಾಮಾದ್ ಆಚಾರಿ ಮ್ಹಣೊನ್? ತಾಣೆಂಯ್ ಕಾಂಯ್ ಅಜಾಪಾಂ ಕೆಲ್ಲಿಂ?
ಕ್ರೀಸ್ತಾಂವ್ ಮ್ಹಳ್ಳೊ ಧರ್ಮ್ ವ್ಯಾಪಾರಾ ರುಪಿಂ ಪ್ರಚಾರಾಕ್ ಹಾಡ್ಲ್ಲೊ ಯುರೋಪಾಂತ್. ರಾಯ್ ಕೊನ್ಸ್ಟಾಂಟಿನಾನ್ ಹ್ಯಾ ಧರ್ಮಾಕ್ ಈಟ್ ಘಾಲೊ ಆನಿ ಸಂಸಾರಾಧ್ಯಂತ್ ಹ್ಯಾ ಧರ್ಮಾಚೊ ಪ್ರಚಾರ್ ಜಾಲೊ. ತಾಂಚೆಲಾಗಿಂ ಛಾಪೊ ಆಸ್ಲ್ಲೊ ಆನಿ ತಾಣಿಂ ಧರ್ಮಾಚ್ಯಾ ನಾಂವಿಂ ಪುಸ್ತಕಾಂ ಛಾಪ್ಲಿಂ ಆನಿ ತಾಕಾ ದೆವಾಚೆಂ ಉತರ್ ಮ್ಹಣ್ ಬಿಲ್ಲೊ ದಿಲೊ. ಯುರೋಪಾಂತ್ಲ್ಯಾ ಗಲ್ಲ್ಯಾ ಗಲ್ಲ್ಯಾಂನಿ ಸಾಂತ್-ಸಾಂತಿಣ್ಯೊ ಉದೆಲ್ಯೊ (ಜಶೆಂ ಕಬಡ್ಡಿ ಖೆಳ್ತಾನಾ ಪಾಂಯ್ ವೊಡ್ಲ್ಲೊಚ್ ಜಿಕ್ತಾಗೀ ತಸೆಂ!) ಆನಿ ಕಥೊಲಿಕಾಂನಿ ಆಸಾ ಕೆಲ್ಲ್ಯಾ ಸರ್ಗಾರ್ ತಿಂ - ಮೊಗೊರ್ಲ್ಯಾಂಚ್ಯಾ ಕಾಂಟ್ಯೆಂತ್ ಭರ್ಶಿಚಿ ಮಾಸ್ಳಿ ರಾಸ್ ಪಡ್ಲ್ಲ್ಯಾಪರಿಂ - ರಾಸ್ ಪಡ್ಲಿಂ. ತಾಂಕಾಂ ಬರೊಚ್ ಮಾನ್ ಮೆಳ್ಳೊ, ಪ್ರಚಾರ್ ಜಾಲೊ, ತಾಂಚ್ಯಾ ನಾಂವಾರ್ ಇಗರ್ಜೊ ಭಾಂದ್ಲ್ಯೊ ಆನಿ ತೆನ್ನಾಂಚ್ಯಾ ಪಾಪ್ ಸಾಯ್ಬಾಂನಿ ಜೆ ತೆನ್ನಾಂ ರಾಯಾಪರಿಂ ಜಿಯೆವ್ನ್ ಆಸ್ಲ್ಲೆ, ರಾಯಾಪರಿಂಚ್ ಹೆರಾಂಚೊ ಜೀವ್ ತಾಂಕಾಂ ಜಾಯ್ ಜಾಲ್ಲೆಪರಿಂ ಕಾಡ್ತಾಲೆ, ವಾತಿಕಾನ್ ಮ್ಹಳ್ಳೆಂ ರಾಯಾಳ್ ಪಾಲೆಸ್ ಬಾಂಧುನ್, ಬಗ್ಲೆಕ್ ಶಿಪಾಯ್ ದವ್ರುನ್ (ಆಜೂನ್ ಆಸಾತ್), ಹೆರಾಂಚೆರ್ ಹೊ ಧರ್ಮ್ ಥಾಪ್ತಾಲೆ (ಹಾಂಚೆ ಪಯ್ಕಿಂತ್ಲೆ ಥೊಡೆ ಕಣ್ಣೋಜಿ ಆಜ್ ಸಾಂತ್ಯೀ ಜಾಲ್ಯಾತ್!),
ಮಹಾತ್ಮ ಗಾಂಧಿ ಕಿತ್ಯಾಕ್ ಸಾಂತ್ ಜಾಂವ್ಕ್ ನ್ಹಜೊ; ತೊ ಕಥೊಲಿಕ್ ನ್ಹಂಯ್ ಮ್ಹಣೊನ್? ಮಾರ್ಟಿನ್ ಲೂಥರ್ ಕಿಂಗಾಕ್ ಕಿತ್ಯಾ ಸಾಂತ್ ಕರುಂಕ್ ನ್ಹಜೊ? ತೊ ಪ್ರೊಟೆಸ್ಟಾಂತ್ ಮ್ಹಣೊನ್? ತ್ಯಾ ಪ್ರಕಾರ್ ಜಾನ್ ಎಫ್. ಕೆನಡಿ ಕಿತ್ಯಾಕ್ ಸಾಂತ್ ಜಾಂವ್ಕ್ ನ್ಹಜೊ? ತೊ ತಾಚಿ ಬಾಯ್ಲ್ ಜ್ಯಾಕೆಲಿನ್ ನಾತ್ಲ್ಲ್ಯಾವೆಳಿಂ ವಾಯ್ಟ್ ಹೌಜಾತ್ ಮರಿಲಿನ್ ಮನ್ರೋ ಸಂಗಿಂ... ಮ್ಹಣೊನ್? ಬಿಲ್ಲ್ ಕ್ಲಿಂಟನಾಕ್ ಕಿತ್ಯಾ ಸಾಂತ್ ಕರುಂಕ್ ನ್ಹಜೊ? ತೊ ಮೊನಿಕಾಲಾಗಿಂ ವಾಯ್ಟ್ ಹೌಜಾಂತ್.... ಮ್ಹಣೊನ್? ತಸೆಂ ತರ್ ಸಾಂತ್ ಆಗೊಸ್ತಿನಾನ್ ಸ್ತ್ರೀಯಾಂ ಸಂಗಿಂ ಲಾಡ್ಮೋಡ್ ಘಾಲುನ್ಯ್ ತೊ ಸಾಂತ್ ಜಾಂವ್ಕ್ ನಾಂವೆ? ಥೊಡಿಂ ಬರಿಂ ಆನಿ ಥೊಡಿಂ ಪಿಶಿಂ ಸವಾಲಾಂ ಹಾಂವೆ ವಿಚಾರ್ಲಿಂ ಫಕತ್ ’ಸಾಂತ್’ ಮ್ಹಳ್ಳ್ಯಾ ವಾದಾಕ್ ಲಾಗೊನ್.
ಹಿಂ ಸಾಂತ್ ಮ್ಹಳ್ಳಿಂ ಆಳ್ಮಿಂ ಕಥೊಲಿಕಾಂನಿ ಆಸಾ ಕರುನ್, ಮೊಯ್ಜೆನ್ ಸಿನಾಯ್ ದೊಂಗ್ರಾ ಥಾವ್ನ್ ಪ್ರಚಾರ್ ಕೆಲ್ಲ್ಯಾ ದೆವಾಚ್ಯಾ ಪ್ರಥಮ್ ಉಪಾದೇಸಾಕ್ಚ್ ಮುಳಾಂತ್ ಕುರಾಡ್ ಮಾರ್ಲಿ! ದೇವ್ ಮೊಯ್ಜೆಕ್ ತ್ಯಾ ಉಜ್ಯಾಚ್ಯಾ ಬೊಲ್ಯಾ ಥಾವ್ನ್ ಉಲವ್ನ್ (ಉಜೊ ಕಿತ್ಯಾ ದಾಖಯ್ಲೊ ಥಂಯ್ಸರ್? ತೊ ಕಾಂಯ್ ತ್ಯಾ ದಿಸಾ ಯಮ್ಕೊಂಡಾಕ್ ಭೆಟ್ ದೀವ್ನ್ ಆಸ್ಲ್ಲೊ?) ದಿಲ್ಲ್ಯಾ ಧಾ ಉಪಾದೇಸಾಂತ್ ಪ್ರಥಮ್ ಜಾವ್ನಾಸ್ಲ್ಲೊ - ಎಕಾ ನಿಜಾ ದೆವಾಕ್ ಮಾನ್ ದೀ ಮ್ಹಣ್. ಮ್ಹಳ್ಯಾರ್ ತಾಕಾ ಮಾತ್ರ್ ಮಾನ್ ದೀ ಹೆರಾಂಕ್ ಬೊಂಬ್ಯಾಂ ರೂಪಾರ್ ಮಾನ್ ದೀನಾಕಾ ಮ್ಹಣ್. ಪುಣ್ ಆತಾಂ ತುಮಿಂಚ್ ಪಳೆಯಾ - ಸಾಂತಾಂಚಿಂ ಬೊಂಬಿಂ (ಇಮಾಜಿ) ನಾತ್ಲ್ಲಿ ಕಥೊಲಿಕ್ ಇಗರ್ಜ್ಚ್ ಹ್ಯಾ ಸಂಸಾರಾಂತ್ ನಾ! ಆಮಿ ಹೆರ್ ದಂದ್ಯಾಂ ಪರಿಂ ಹಾಂಗಾಸರ್ ಯೇಜೆಂಟ್ (ಪ್ರತಿನಿಧಿ) ಹಾಡ್ಲೆ - ದೇವಾಲಾಗಿಂ ಉಲಂವ್ಕ್, ತಾಕಾ ನಮಾನ್ ಕರುಂಕ್, ತಾಕಾ ವಾಖಣುಂಕ್ ಆನಿ ತಾಕಾ ಕಾಣಿಕೊ ಅರ್ಪುಂಕ್.
ಹೆಂ ಸರ್ವ್ ಜಾಲೆಂ ಫಕತ್ತ್ ವ್ಯಾಪಾರ್ ವಹಿವಾಟಾಚ್ಯಾ ನಾಂವಾನ್ - ಧರ್ಮಾಕ್ ಮೆಳ್ಚೆಂ ಉದಾಕ್ ಪ್ಲ್ಯಾಸ್ಟಿಕ್ ಬೊತ್ಲಿಂನಿ ಭರುನ್ ವಿವಿಧ್ ನಾಂವಾಂನಿ ಪಯ್ಶ್ಯಾಂಕ್ ವಿಕ್ಚ್ಯಾ ಬಂಡ್ವಾಳ್ಶಾಹಿ ವ್ಯಾಪಾರಾಪರಿಂ. ಜಶೆಂ ಆಜ್ ಹರ್ಯೆಕ್ಲ್ಯಾಚಾ ಹಾತಿಂ ಹಿ ಉದ್ಕಾ ಬೋತ್ಲ್ ಖೆಳ್ತಾಗೀ ತಸೆಂಚ್ ಆಮ್ಚೆ ಸಾಂತ್ ಉದೆಲೆ ಆನಿ ಆಮಿಂ ತಾಂಕಾಂ ದೆವಾಕ್ ಬಗ್ಲೆಕ್ ಲೊಟುನ್ ಆಲ್ತಾರಾರ್ ಮಧೆಂಚ್ ದವರ್ಲೆಂ, ತಾಂಚೆವಿಶಿಂ ದೆವಾ ಪ್ರಾಸ್ ಚಡೀತ್ ಉತ್ರಾಂನಿ ಸದಾಂನೀತ್ ಧುಂಪಯ್ಲೆಂ ಆನಿ ಹ್ಯಾ ಸಾಂತಾಂಚಿಂ ನಾಂವಾಂ ಪಾದ್ರಿಂ ಪ್ರಾಸ್ ಇಲ್ಲಿಶಿ ಬೂಧ್ ಉಣಿ ಆಸ್ಲ್ಲ್ಯಾ ಚಿಲ್ಲರ್ ಭಕ್ತಿಕಾಂಕ್ ಇಲ್ಲೆಂ ಘೊಟ್ಲ್ಲ್ಯಾ ಉಪ್ರಾಂತ್ ಜಾಂವ್ಚ್ಯಾ ಆಮಾಲಾಪರಿಂಚ್ ಜಾಲೆಂ.
ಇಗರ್ಜ್ಮಾತೆಕ್ ಲೋಕ್ ಭಾರಿಚ್ ಭಿಂಯೆಲೊ ಆನಿ ಅಸಲಿಂ ತಾತ್ವಿಕ್-ಸಾತ್ವಿಕ್ ಸವಾಲಾಂ ತಾಣಿಂ ತಾಂಚ್ಯಾ ಕಾಷ್ಟೆ ಭಿತರ್ಚ್ಚ್ ಗುಪಿತ್ತ್ ದವರ್ಲಿಂ - ಭಿಲ್ಕುಲ್ ಉಗ್ತಿಂ ಕರಿನಾಸ್ತಾಂ - ಕಿತ್ಯಾ ತಾಂಕಾಂ ಶೀದಾ ಸರ್ಗಾಗ್ ವಚೊಂಕ್ ಜಾಯ್ ಆಸ್ಲ್ಲೆ ಆನಿ ಆತಾಂಯ್ ಆಸಾ!
ಹಿಂದ್ವಾಂನಿ ನಾಗಾ ಫಾತ್ರಾಕ್ ಸಕಾಳಿಂ ಉಟೊನ್ ದೂಧ್ ವೊತುನ್, ಲಾಗಿಂ ಕೆಳಿಂ ದವ್ರುನ್ ಪಾಟಿಂ ಘರಾ ಪರ್ತಾಲ್ಲ್ಯಾಪರಿಂಚ್ ಆಮಿಂ ಕಾರ್ಕೊಳ್, ಪಕ್ಷಿಕೆರೆ ಇತ್ಯಾದಿ ಸ್ಥಳಾಂಕ್ ಭೆಟ್ ದೀವ್ನ್ ಪಯ್ಶೆ ಕಂರ್ಡ್ಯಾಂತ್ ಲಿಪಯ್ಲೆ, ವಾತಿ ಪೆಟಯ್ಲ್ಯೊ ಆನಿ ಕೊಂತಾಚ್ಯೊ ಮಣಿಯೊ ಬೊಟಾಂ ಕುಸ್ಕಾತಾ ಪರ್ಯಾಂತ್ ಗಳವ್ನ್ ಗಳವ್ನ್ ಪಾಟಿಂ ಘರಾ ಪರ್ತಾಲ್ಯಾಂವ್ - ಫಕತ್ತ್ ತಾತ್ಕಾಲಿಕ್ ಮಾನುಶಿಕ್ ಸಂತೊಸಾಕ್ ವೇಂಗ್ ಮಾರುನ್.
ಹೆಚ್ ಪಯ್ಶೆ ಆಮ್ಚ್ಯಾ ಸೆಜಾರ್ಚ್ಯಾ ತ್ಯಾ ದುರ್ಬಳ್ಯಾಕ್ ದಿಲ್ಲೆ ತರ್ ತೆಂ ಕುಟಾಮ್ ತರೀ ಉಭೆಂ ರಾವೊನ್ ಮುಖ್ಲೊ ಸಂಸಾರ್ ಫುಡಾರಾಚೊ ಕರುಂಕ್ ಪಾವಾತ್; ಏಕ್ ದೀಸ್ ತರೀ ಏಕ್ ಬರೆಂ ಜೆವಾಣ್ ಜೇವ್ನ್ ಆಮ್ಚ್ಯೆಪರಿಂಚ್ ಏಕ್ ಬರೊ ಧೆಂಖ್ ಕಾಡಿತ್, ತೆಂ ಮ್ಹೆಳೆಂ ವಸ್ತುರ್ ಉಂಬ್ಳುಂಕ್ ಏಕ್ ಬಾರ್ ಸಾಬು ತರೀ ಹಾಡಿತ್ ವ ಆಂಗಾಕ್ ಪುಸುನ್ ಆಂಗಾ ವಯ್ಲೊ ಚಿಕೊಲ್ ತರೀ ಧುಯ್ತ್.
ಸಾಂತಾಂಕ್ ಆಮಿಂ ಸರ್ಗಾರ್ಚ್ ಸೊಡ್ಚೊ ಆನಿ ಮಾನವೀಯ್ ಗರ್ಜಾಂಚೆರ್ ಆಮ್ಚಿ ನದರ್ ಖಂಚಂವ್ಚೊ ಕಾಳ್ ಆತಾಂ ತರೀ ಆಮ್ಚ್ಯಾ ಜಿವ್ಯಾ ದೊಳ್ಯಾಂಕ್ ದಿಸೊಂ. ಆಮ್ಕಾಂ ಭಾರತಾಚೆ ಸಾಂತ್ ನಾಕಾತ್; ಭಾರತಾಂತ್ ಆಸ್ಲ್ಲಿ ಸಾಂತ್ಚ್ ಸದ್ದ್ಯಾಕ್ ಮೊಸ್ತು ಪುರೊ! ಜೆಮ್ಮಾಚೆಂ ಮಾಗ್ಣೆಂ ತುಂ ಭಿಲ್ಕುಲ್ ಆಯ್ಕಾನಾಕಾ ದೇವಾ, ಹಾಂವ್ ಹಾತ್ ಜೊಡ್ತಾಂ; ತುಕಾ ಹೆರ್ ಪ್ರಮುಖ್ ಕಾಮಾಂ ಕರುಂಕ್ ಆಸಾತ್, ತಿಂಚ್ ಕರುನ್ ರಾವ್. ನಮಸ್ಕಾರ್ ತುಕಾ!
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
