ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 4. ಪ್ರೆಶ್ಶರ್ ಕುಕ್ಕರ್
ಸ್ಟೇನ್ ಅಗೇರಾ, ಮುಲ್ಕಿ ಕೊಂಕ್ಣಿ ಸಾಹಿತಿಕ್ ಸಂಸಾರಾಂತ್ ಮಟ್ವ್ಯಾ ಕಾಣ್ಯಾಂಕ್ ತಶೆಂಚ್ ಕಾದಂಬರಿಂಕ್ ಫಾಮಾದ್. ವಾಚ್ಪ್ಯಾಕ್ ಹಾಚೊ ಕಾಣ್ಯೊ ವಾಚ್ತಾನಾ ಆಂಗಾಚಿ ಲೋಂವ್ ಉಭಿ ಜಾಯ್ಶೆಂ ಕರ್ಚಿ ಶ್ಯಾಥಿ ಹಾಚಾ ಕಾಣ್ಯಾಂಕ್ ಆಸಾ ಮ್ಹಣ್ ಜಾಯ್ತೆಪಾವ್ಟಿಂ ಹಾಣೆಂ ರುಜು ಕೆಲಾಂ. ಸ್ಟೇನ್ ಅಗೇರಾಕ್ ಗೊಂಯ್ಚಿ ಕೊಂಕ್ಣಿ ಭಾಶಾ ಮಂಡಳ್ ಥಾವ್ನ್ ಪ್ರಶಸ್ಥಿ, ತಶೆಂಚ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ಥಿಯ್ ಲಾಭ್ಲ್ಯಾ.
[ಹಿ ಕಾಣಿಂ ರಾಕ್ಣೊ ಹಾಫ್ತ್ಯಾಳ್ಯಾಚೆರ್ ಪರ್ಗಟ್ಲ್ಯಾ]
ಸ್ಟೇನ್ ಅಗೇರಾ
ಆಯ್ತಾರಾಚೊ ಸಕಾಳ್. ಸಾಡೆ ಪಾಂಚ್ ವೊರಾಂಚೆರ್ ದೊಳೆ ಉಸ್ವಾತಾನಾ ತಾಚೆ ಗಿನ್ಯಾನಾಕ್ ಪಯ್ಲೆಂ ಆಯ್ಲೆಂ ದನ್ಪರಾಂ ರಾಂದ್ಪಾಚೆಂ ಪ್ಲಾನ್. ಫ್ರೀಜರಾಂತ್ಲೆಂ ಬೀಫ್ ಭಾಯ್ರ್ ಕಾಡ್ನ್, ವಯ್ಲ್ಯಾ ಸೆಲ್ಫಾಂತ್ ಆಸ್ಚೊ ಪ್ರೆಶರ್ ಕುಕ್ಕರ್ ಸಕ್ಲಾ ದವರುಂಕ್ ಆಸಾ. ತಾಂಚೆ ಘರಾ ಬೀಫ್ ರಾಂದ್ತಾನಾ ಮಾತ್ರ್ ಪ್ರೆಶರ್ ಕುಕ್ಕರಾಚೆಂ ಕಾಮ್. ನಾ ತರ್ ಕುಕ್ಕರ್ ಕೊನ್ಶಾಕ್.
ಲೀನಾನ್ ಮಿಸಾಕ್ ವೆಚೊ ಕಾಯ್ದೊ ಸನ್ವಾರಾ ತಿರ್ಸಿಲ್ಲೊ. ಅಯ್ತಾರಾ ಸಕಾಳಿಂ ಘೊವ್ ಆನಿ ಭುರ್ಗ್ಯಾಂಕ್ ರಜೆಚೊ ದೀಸ್ ಜಾಲ್ಲ್ಯಾನ್ ತಿಕಾ ದೊಡಿ ಡ್ಯೂಟಿ. ಕಾಮ್ ಕಿತ್ಲೆಂ ಕೆಲ್ಯಾರ್ಯಿ ಅಕೇರ್ ಜಾಯ್ನಾತ್ಲ್ಲೆಂ.
ಲೀನಾಕ್ಯಿ ಆಯ್ತಾರಾ ಮಿಸಾಕ್ ವಚೊಂಕ್ ಆಶಾ ಜಾತಾಲಿ. ಕಾಜಾರಾ ಪಯ್ಲೆಂ ತಿ ಇಗರ್ಜೆಂತ್ ಕಾರ್ಯಾಳ್ ಆಸ್ಲ್ಲಿ. ಯುವ ಸಂಘಾಂತ್ ಆನಿ ಕೊಯೆರಾಂತ್ ತಿಚೆಂ ಕಾಮ್ ಸಕ್ಡಾಂಕ್ ಪಸಂದ್ ಜಾಲ್ಲೆಂ. ಆತಾಂಯ್ ಆಯ್ತಾರಾ ಮಿಸಾಕ್ ವಚೊನ್ ಜೋರಾನ್ ಕಂತಾರಾಂ ಗಾವ್ಯಾಂ, ಇಜ್ಮೊಲಾಚಿ ವಾಟ್ಲಿ ಘೆವ್ನ್ ಭಂವ್ಯಾಂ, ಮಿಸಾ ಉಪ್ರಾಂತ್ ಸೊಡೆಲಿಟಿಂಟ್ ಪಾದ್ರಿ ಆನಿ ಹೆರ್ ಸ್ತ್ರೀಯಾಂ ಸಂಗಿಂ ಗಜಾಲಿ ಕರ್ಯಾಂ ಮಣ್ ತಿಕಾ ಕೆದಾಳಾಯಿ ಭೊಗ್ತಾಲೆಂ.
ಹೆಲೆನ್ ಆನಿ ಗ್ರೇಸಿ ಸಂಗಿಂ ಮೆಳೊನ್ ಖಬ್ರೊ ಉಲೊನ್ ರೆಸ್ಟೋರೆಂಟಾಂತ್ ಅಂಬಡೆ, ಗೋಳಿ ಭಜೆ ಖಾವ್ನ್ ಮತ್ ಧಾದೊಸ್ ಕರುಂಕ್ ತಿ ಆಶೆತಾಲಿ. ಇಗರ್ಜೆಂತ್ ಆಯ್ತಾರಾಚಾ ಕಾರ್ಯಾಂಕ್ ತುಲನ್ ಕೆಲ್ಯಾರ್ ಸನ್ವಾರ್ ತಿಕಾ ಚಾಪ್ಪೊ ದಿಸ್ತಾಲೊ. ಕಾಯ್ದೊ ಪಾಳ್ಳೊ ಮಣ್ಚೆಂ ಸಮಧಾನ್ ಶಿವಾಯಿ ಮತ್ ಉದಾಸ್ ಉರ್ತಾಲಿ. ಸುಟ್ಕಾ ನಾತ್ಲ್ಲಿ. ಕಾಜಾರ್ ಮಳ್ಯಾರ್ ಆಶೆಂ ಮಣ್ ಕಳಿತ್ ಆಸ್ಲ್ಲೆಂ ತರ್ ಕಾಜಾರ್ಚ್ ನಾಕಾ ಆಸ್ಲ್ಲೆಂ ಮಣ್ ತಿಕಾ ತವಳ್ ತವಳ್ ಭೊಗ್ತಾಲೆಂ.
ಸುಟ್ಕಾ?
ಕೊಲೇಜಿಂತ್ ಶಿಕ್ತಾನಾ ತೆಂ ಲಾಂಗ್ ಜಂಪಾಂತ್ ರಾಜ್ಯ್ ಮಟ್ಟಾರ್ ಚಾಂಪಿಯನ್. ಕೊಲೇಜಿಂತ್ ಸಂಗೀತ್ ಆನಿ ನಾಟಕಾಂನಿಂ ಇನಾಮಾಂ ಜೊಡುಲ್ಲಿಂ. ಇಗರ್ಜೆಂತ್ ಕೊಯೆರ್ ಆನಿ ಯುವ ಚಟುವಟಿಕೊ ಮಣೊನ್ ತಿಚೆಂ ಹಾಸ್ತೆಂ ಉಡ್ತೆಂ ಚಲನ್, ಸ್ವಭಾವ್ ಆನಿ ಉಲೊಣೆ ಜಾಯ್ತ್ಯಾಂಕ್ ತೊಪುಲ್ಲೆಂ ಆಸಾ. ತೆಂ ’ಚಾಲು’ ಮ್ಹಣ್ ಖಬ್ರೊ ಜಾಲ್ಲ್ಯೊಯಿ ಆಸಾತ್. ’ಹ್ಯಾ ಪಿಸೊಳ್ಯಾ ಲಾಗಿಂ ಕಾಜಾರ್ ಜಾಲ್ಲ್ಯಾ ಚೆಡ್ಯಾಚಿ ಕಿತೆಂ ಗತ್-ಗಿ? ದೆವಾನ್ ರಾಕಾಜಾಯಿ.’ ಅಸಲೆಂ ಸದಿಳ್ ಉಲೊಣೆ ಲೀನಾಚಾ ಕಾನಾಕ್ ಪಡ್ಲ್ಲೆಂ ಆಸಾ. ಇಗರ್ಜೆಂತ್ ಪಯ್ಲೆಂ ಮೆಕ್ಸಿಲಾಗಿಂ ಆನಿ ಉಪ್ರಾಂತ್ ಡೊಲ್ಫಿ ಸಂಗಿಂ ತಾಕಾ ದಾಟ್ ಈಷ್ಟಾಗತ್ ಆಸ್ಲ್ಲಿ ಮಣ್ ಗಾಂವ್ ಜಾಣಾಂ. ಲೀನಾನ್ ನೆಗಾರ್ ಕೆಲ್ಲೆಂ ನಾ. ತೆಂ ತಾಂಚೆ ಸಂಗಿ ಪಿಕ್ಚರಾಕ್ ಆನಿ ಐಸ್ಕ್ರೀಮ್ ಪಾರ್ಲರಾಂಕ್ ಗೆಲ್ಲೆಂ ಆಸಾ. ತಿ ಈಷ್ಟಾಗತ್ ಶಾಶ್ವಿತ್ ಜಾಂವ್ಕ್ ಸಕ್ಲಿನಾ. ಬಹುಶಾ ಮೆಕ್ಸಿ ಆನಿ ಡೊಲ್ಫಿಕ್ ವೇಳ್ ಪಾಶಾರ್ ಕರುಂಕ್ ಲೀನಾಚೆಂ ಪಿಸೊಳೆಂ ನಡ್ತೆಂ ಉಪ್ಕಾರಾಕ್ ಪಾವ್ಲೆಂ. ಪುಣ್ ಜಿಣ್ಯೆ ಸಾಂಗಾತಿಣ್ ಜಾಂವ್ಚೆ ಗೂಣ್ ಝಳ್ಕಾಲೆನಾಂತ್. ತೆ ತಾಚೆ ಥಾವ್ನ್ ಪಯ್ಸ್ ಗೆಲೆ ಯಾ ತೆಂ ತಾಂಚೆ ಥಾವ್ನ್ ಪಯ್ಸ್ ಗೆಲೆಂ ಮಣ್ ನಖ್ಖಿ ಸಾಂಗೊಂಕ್ ಕಷ್ಟ್.
ತಾಕಾ ಇನ್ಸುರೆನ್ಸ್ ಕಂಪೆನಿಂತ್ ಕಾಮ್ ಜಾಲೆಂ. ವರ್ಸಾ ಭಿತರ್ ಜೆರ್ಮಿ ಸಂಗಿಂ ಕಾಜಾರ್ ಜಾಲೆಂ. ಭುರ್ಗಿಂ ಜಾಲಿಂ. ಕಾಮ್ ಸೊಡುಂಕ್ ಮನ್ ನಾತ್ಲ್ಲೆಂ ತರೀ ಜೆರ್ಮಿಚಾ ವತ್ತಾಯೆಕ್ ಭುರ್ಗ್ಯಾಂಚೊ ಫುಡಾರ್ ರುತಾ ಕರುಂಕ್ ಕಾಮ್ ಸೊಡಿಜಾಯಿ ಜಾಲೆಂ. ಖಾಸ್ಗಿ ಕಂಪೆನಿಂತ್ ಊಂಚ್ಲ್ಯಾ ಹುದ್ದ್ಯಾರ್ ದಾಟ್ ಪಾಗ್ ಜೊಡ್ಚಾ ಜೆರ್ಮಿಕ್ ಲೀನಾಚಿ ಕಮಯಿ ಗರ್ಜ್ ದಿಸ್ಲಿನಾ. ಲೀನಾಕ್ ಪಾಕಾಟೆ ಕಾತಾರ್ಲ್ಲೊ ಆನ್ಭೋಗ್ ಜಾಲೊ ತರೀ ಖಂಚಾ ಸ್ಪಿರಿತಾನ್ ತಾಣೆ ಹೆಂ ಸೊಸ್ಲೆಂ ಮಣ್ ತೆಂಚ್ ನೆಣಾ. ಘರ್, ಘೊವ್ ಆನಿ ಭುರ್ಗಿಂ ಮಣ್ಚಾ ವರ್ತುಲಾಂತ್ ತೆಂ ಕ್ರಮೇಣ್ ಮಿಸ್ಳೊನ್ ಗೆಲೆಂ.
ಕಾಜಾರಾ ಪಯ್ಲೆಂ ಪಿಸೊಳೆಂ ಮಣ್ಚೆಂ ಬಿರುದ್ ಘೆವ್ನ್ ವಾಡ್ಲ್ಲೆಂ ಲೀನಾ ಸವ್ಕಾಸ್ ಜವಾಬ್ದರೆಂತ್ ಸೊಸ್ಣಿಕಾಯೆಚಿ ಇಮಾಜ್ ಜಾಲೆಂ. ಉತ್ರೊಣ್! ಹಿ ಉತ್ರೊಣ್ ಕೆದಾಳಾ ಕಿತ್ಯಾಕ್ ಕಶೆಂ ಜಾಲಿ ಮಣ್ ಲೀನಾ ಲಾಗಿಂ ವಿಚಾರ್ಲ್ಯಾರ್ ಜಾಪ್ ಆಸ್ಚಿ ನಾ. ಸರ್ವ್ ಅಪ್ಣಾಯಿತ್ಲ್ಯಾಕ್ ಘಡ್ಲೆಂ. ಬೆಡ್ಡಾರ್ ಕೂಸ್ ಪರ್ತಿತಾನಾ ಸಟ್ಟ್ ಕರ್ನ್ ತೆಂ ಬೊಸ್ಲೆಂ. ವೊರಾಂ ಸಕಾಳಿಂಚಿಂ ಸ. ಅರ್ಧ್ಯಾ ವೊರಾನ್ ಜೆರ್ಮಿ ಉಟ್ತೊಲೊ. ಬ್ರಶ್ ಕರ್ಚಾ ಪಯ್ಲೆಂ ಏಕ್ ಕಪ್ಪ್ ಚಾ ಪಿಯೆನಾಸ್ತಾನಾ ತೊ ನಾಣ್ಯೆಕ್ ವಚಾನಾತ್ಲ್ಲೊ. ತೆಂ ಕಷ್ಟಾಂನಿ ಉಭೆಂ ಜಾಲೆಂ. ಆಳ್ಸಾಯೆನ್ ಏಕ್ ದೀಸ್ ತರೀ ನಿದ್ಯಾಂ ಮಳ್ಯಾರ್ ಆವ್ಕಾಸ್ ನಾತ್ಲ್ಲೊ. ಪಂದ್ರಾ ಮಿನುಟಾಂ ನಾಣ್ಯೆಂತ್ ಪಾಶಾರ್ ಜಾಲಿಂ. ಕಿಚನಾಕ್ ಯೆಂವ್ಚಾ ಪಯ್ಲೆಂ ರಾಹುಲ್ ಆನಿ ರೆನ್ನಿಕ್ ತಾಣೆ ಉಟಯ್ಲೆಂ. ಭುರ್ಗ್ಯಾಂಕ್ ನೋವ್ ವೊರಾಂಚಾ ಮಿಸಾಕ್ ಧಾಡುಂಕ್ ಆಸ್ಲ್ಲೆಂ. ಧೊಂಕುಳ್ನ್ ಉಟಯ್ತಾಂ ಪರ್ಯಾಂತ್ ತಿಂ ಜಾಗೆಂ ಜಾಯ್ನಾತ್ಲ್ಲಿಂ.
"ಕಿತೆಂ ಮಾಮ್ಮಿ, ಆಯ್ತಾರಾ ಸಮೇತ್ ಸಮಾ ನಿದೊಂಕ್ ಸೊಡಿನಾಂಯಿ." ರಾಹುಲ್ ಪುರ್ಪುರ್ಲೊ.
ಕಿಚನಾಕ್ ಯೇವ್ನ್ ಫ್ರೀಜರಾಂತ್ಲೆಂ ಬೀಫ್ ಭಾಯ್ರ್ ಕಾಡ್ಲೆಂ. ಆದ್ಲೆ ದೀಸಾ ವಾಟುನ್ ದವರ್ಲ್ಲೆಂ ಪಿಟಾಚೆಂ ತೊಪ್ಲೆಂ ಫ್ರಿಡ್ಜಾ ಥಾವ್ನ್ ಭಾಯ್ರ್ ದವರ್ಲೆಂ. ದೂಧ್ ಹುನ್ ಕೆಲೆಂ. ಚಾ ಕರುಂಕ್ ಉದಾಕ್ ತಾಪಯ್ಲೆಂ. ಚಾ ತಯಾರ್ ಕರ್ನ್ ಜೆರ್ಮಿಚೆಂ ಮಗ್ಗ್ ಘೆವ್ನ್ ತೆಂ ಬೆಡ್ ರೂಮಾಕ್ ಗೆಲೆಂ. ತೊ ಬಸೊನ್ ಚಾಯೆಕ್ ರಾಕ್ತಾಲೊ. ಚಾಯೆಚೆಂ ಮಗ್ಗ್ ದಿತಾನಾ ತಿಕಾ ಪ್ರೆಶರ್ ಕುಕ್ಕರಾಚೊ ಉಡಾಸ್ ಆಯ್ಲೊ.
"ಮಿಸಾಚಾ ವಸ್ತುರಾಕ್ ಇಸ್ತ್ರಿ ಆಸಾ?" ಮಗ್ಗ್ ಘೆತಾನಾ ಜೆರ್ಮಿನ್ ವಿಚಾರ್ಲೆಂ.
"ಇಸ್ತ್ರಿ?" ಲೀನಾ ಗಡ್ಬಡ್ಲೆಂ.
"ತುಂವೆ ಉಡಾಸ್ ಕೆಲ್ಲೊ ಬರೊ ಜಾಲೊ."
"ನಾಸ್ಟ್ಯಾಕ್ ಕಿತೆಂ ಮಾಮ್ಮಿ?" ಭಾಯ್ರ್ ಯೆತಾನಾ ರೆನ್ನಿಚೆಂ ಸವಾಲ್.
"ಪಾನ್ಪಾಳೆ." ತೆಂ ಪಾಟಿಂ ಕುಜ್ನಾಕ್ ಆಯ್ಲೆಂ.
ಖಾಲಿ ಪಾನ್ಪಾಳೆ ಕೆಲ್ಯಾರ್ ಭುರ್ಗ್ಯಾಂಕ್ ಆನಿ ಘೊವಾಕ್ ದೆಂವಾನಾತ್ಲ್ಲೆ. ಪಾನ್ಪಳ್ಯಾ ಸಂಗಿಂ ಬುಡೊನ್ ಖಾಂವ್ಕ್ ಚೆಟ್ನಿ ಅವಶ್ಯ್ ಜಾಯ್ ಆಸ್ಲ್ಲಿ. ಪಾನ್ಪಾಳೆ ಭಾಜ್ತಾನಾ ತಿಣೆ ಸಾಂಗಾತಾಚ್ ಮಿಕ್ಸರಾಂತ್ ಪುದೀನಾಚಿ ಚೆಟ್ನಿ ತಯಾರ್ ಕೆಲಿ. ನಾಸ್ಟೊ ತಯಾರ್ ಕರ್ನ್ ಮೆಜಾರ್ ಮಾಂಡ್ಲೊ. ಘೊವ್ ಆನಿ ಭುರ್ಗಿಂ ಸಾಂಗಾತಾ ಜಮ್ಲಿಂ. ತಾಂಚೆ ಸಂಗಿಂ ಬೊಸೊನ್ ಅಪ್ಲ್ಯಾ ಪೊಟಾಚಿ ಸೆವಾ ಕರುಂಕ್ ತಿಚೆ ಲಾಗಿಂ ವೇಳ್ ನಾತ್ಲ್ಲೊ. ವಸ್ತುರಾಕ್ ಇಸ್ತ್ರಿ ವೊಡುಂಕ್ ಆಸ್ಲ್ಲಿ. ತಾಂಚೆ ಮೀಸಾಕ್ ವೆತಾನಾ ಘಾಲ್ಚಾ ವಸ್ತುರಾಕ್ ತಿಣೆ ಇಸ್ತ್ರಿ ಘಾಲಿ.
"ಹೆಂ ಕಿತೆಂ ಮಾಮ್ಮಿ, ಅಂಗ್ಲ್ಯಾಚೊ ಮಿರಿಯೊ ವಚೊಂಕ್ ನಾಂತ್. ತುಂ ಆಶೆಂಚ್ ಪಿಟೊ ಆಸ್ಚೆಂ ವಸ್ತುರ್ ನೆಸೊನ್ ಭಾಯ್ರ್ ವೆತಾಯ್ಗಿ?" ರೆನ್ನಿ ಪುರ್ಪುರ್ಲೆಂ.
ಲೀನಾನ್ ಜಾಪ್ ದಿಲಿ ನಾ. ಅಸಲ್ಯೊ ಖೊಡಿ ಆಯ್ಕೊನ್ ತಿಕಾ ಸವಯ್ ಜಾಲ್ಲಿ.
"ದನ್ಪರಾಂ ಕಿತೆಂ ರಾಂದ್ತಾಯಿ?" ಘೊವಾನ್ ನೆಸೊನ್ ತಯಾರ್ ಜಾತಾಚ್ ಲೀನಾ ಲಾಗಿಂ ವಿಚಾರ್ಲೆಂ.
"ಬೀಫಾಚಿ ಕಡಿ, ಶಿತ್ ಆನಿ ಸಲಾದ್ ಪಾವಾನಾಂಗಿ?" ತಿಣೆ ಜಾಪಿಚೆಂ ನಿರೀಕ್ಷಣ್ ಕೆಲೆಂ.
"ಮಾಕಾ ಸಾಂಗೊಂಕ್ ಉಡಾಸ್ ನಾ." ಜೆರ್ಮಿನ್ ತಿಳ್ಸಿಲೆಂ.
"ಮ್ಹಜಾ ದಫ್ತರಾಂತ್ ಸಾಂಗಾತಾ ಕಾಮ್ ಕರ್ತಾ, ಅಗ್ನೆಲ್ ತುಂ ಜಾಣಾಂಯಿ? ಅಗ್ನೆಲಾಚಿ ಭಾಯ್ಲ್ ಕುಳಾರಾ ಗೆಲ್ಯಾ . ಹಾಂವೆ ತಾಕಾ ದನ್ಪರಾಂ ಜೆವ್ಣಾಕ್ ಅಪಯ್ಲಾ. ಸಲಾದಾಕ್ ಬಿಟ್ರೂಟ್ ಘಾಲ್. ಸಾಂಗಾತಾಚ್ ತೆಂಡ್ಲಿಂ ಸುಟಿ ಕರ್ನ್ ಮಾಸ್ಳಿ ಭಾಜ್. ಬೀಫಾಚಾ ಕಡಿಯೆ ಸಾಂಗಾತಾ ತರ್ನೊ ನಾರ್ಲ್ ಘಾಲ್ನ್ ತಾಂದ್ಳಾಚೊ ಭಾಕ್ರ್ಯೊ ಕೆಲ್ಯಾರ್ ಬರೆಂ ಆಸ್ಲ್ಲೆಂ. ವಿಸ್ಕಿಚೆ ಬೊತ್ಲ್ ಹಾಡ್ನ್ ದವರ್ಲ್ಯಾ. ಥಂಯ್ಸರ್ ಮೆಜಾರ್ ಆಸಾ. ಆಯ್ತಾರಾ ಇಲ್ಲೆಶಿ ಮಝಾ ಕರ್ಯಾಂ." ಕೋಣಾಕ್ ಮಝಾ ಆನಿ ಕೋಣಾಕ್ ಸಜಾ!
ಲೀನಾ ಮತಿಂತ್ ಪುರ್ಪುರ್ಲೆಂ. ಪ್ರೆಶರ್ ಕುಕ್ಕರ್ ಕಾಡುಂಕ್ ನಾ ಮಣ್ ತಿಚಾ ಗಮನಾಕ್ ಗೆಲೆಂ. ನಾಸ್ಟೊ ಕರ್ತಾಚ್ ಪ್ರೆಶರ್ ಕುಕ್ಕರ್ ಕಾಡ್ಯಾಂ ಮಣ್ ತಿಣೆ ಚಿಂತ್ಲೆಂ. ತಿ ಮೇಜಾ ಲಾಗಿಂ ಆಯ್ಲಿ. ಘೊವ್ ಆನಿ ಭುರ್ಗ್ಯಾಂಚೊ ಬೊಶಿಯೊ ಆನಿ ಗೊಬ್ಳೆ ತಿಣೆ ಉಕಲ್ಣ್ ಸಿಂಕಾಂತ್ ದವರ್ಲೆ. ತಿಣೆ ಪಾಟಿಂ ಯೇವ್ನ್ ನಾಸ್ಟೊ ಕೆಲೊ. ಎಕ್ಲ್ಯಾಕ್ ಬಸೊನ್ ಖಾಂವ್ಕ್ ತಿಕಾ ರುಚ್ಲೆಂ ನಾ. ತಿಚಿ ಕೊಫಿ ನಿಂವ್ಲ್ಲಿ. ದೋನ್ ಪಾನ್ಪಾಳೆ ಕಷ್ಟಾಂನಿ ಗೀಳ್ನ್ ತಿಣೆ ಮೇಜ್ ಸಾಫ್ ಕೆಲೆಂ. ಪ್ರೆಶರ್ ಕುಕ್ಕರ್?
ತಿಕಾ ಉಡಾಸ್ ಆಸ್ಲ್ಲೊ. ಖಳಾ ನಾತ್ಲ್ಲೆಂ ಕಾಮ್. ತಿಕಾ ಕಾಂಟಾಳೊ ಆಯ್ಲೊ. ತಿತ್ಲ್ಯಾರ್ ಸೊಭಿತ್ ಥರಾನ್ ನೆಸೊನ್ ಅಂಗಾಕ್ ಸುಗಂಧ್ ದ್ರವ್ಯ್ ಮಾರ್ನ್ ರಾಹುಲ್ ತಿಕಾ ಸೊಧುನ್ ಆಯ್ಲೊ.
"ಮಾಮ್ಮಿ ಫಾಲ್ಯಾಂ ಮಾಕಾ ಸ್ಪೋರ್ಟ್ಸ್ ಆಸಾ. ಮ್ಹಜೆ ಧೊವೆ ಮೊಚೆ ನಿತಳ್ ಕರ್ನ್ ದವರ್ಶಿಗಿ?" ತಾಣೆ ವಿನತಿ ಕೆಲಿ.
"ವೇಳ್ ಆಸ್ಲ್ಯಾರ್ ಪಳೆಯ್ತಾಂ." ತಿಣೆಂ ಆಶ್ವಾಸನ್ ದಿಲೆಂ.
ಘೊವ್ ಆನಿ ಭುರ್ಗಿಂ ಮಿಸಾಕ್ ಗೆಲ್ಲ್ಯಾ ಉಪ್ರಾಂತ್ ತಿಣೆಂ ತಾಂಚೆ ಕೂಡಾಂನಿ ಭಂವ್ದಿ ಮಾರ್ಲಿ. ಬೆಡ್ ರುಮಾಕ್ ಪಾವ್ತಾನಾ ಮೆಜಾರ್ ಆಸ್ಚಿ ವಿಸ್ಕೆಚಿ ಬೋತ್ಲ್ ತಿಕಾ ಸಾರ್ಕಿ ದಿಸ್ಲಿ. ದನ್ಪರಾಂ ಜೆವ್ಣಾಕ್ ಅಗ್ನೆಲ್ ಯೆತೊಲೊ. ಅಪ್ಣಾಚೊ ಆಯ್ತಾರ್ ಸುಶೆಗಾತ್ ಆಚರ್ಸುಂಕ್ ಜೆರ್ಮಿನ್ ಮಾಂಡ್ಣಿ ಕೆಲ್ಯಾ. ತ್ಯಾ ಅಗ್ನೆಲಾ ಸಂಗಿಂ ಅಪ್ಣಾಚಾ ಘೊವಾಕ್ ಕಿತ್ಯಾಕ್ ಈಷ್ಟಾಗತ್ ಮ್ಹಣ್ ಲೀನಾ ನೆಣಾ. ಪುಕ್ಕಟಾಚೊ ಸೊರೊ ಘೊಟುಂಕ್ ಆನಿ ಜೆವಾಣ್ ಅಂಬ್ಡುಂಕ್ ಧಾಂವೊನ್ ಯೆತಾಲೊ.
ಅಗ್ನೆಲ್ ಆನಿ ತಾಚೆ ಭಾಯ್ಲೆಕ್ ತಾಂಕಾಂ ಘರಾ ಅಪವ್ನ್ ಸುಧಾರ್ಸುಂಚಿ ಖಭಾರ್ ನಾತ್ಲ್ಲಿ. ಘೊವ್ ಆನಿ ಭಾಯ್ಲ್ ಏಕಾಚ್ ಕಾಸ್ತಾಚಿಂ. ಜೆರ್ಮಿ ಆನಿ ಭುರ್ಗ್ಯಾಂಚಿಂ ಕುಡಾಂ ತಿಣೆಂ ಸಮಾ ಮಾಂಡ್ಲಿಂ. ಹೆಣೆಂ ತೆಣೆಂ ಪಡೊನ್ ಆಸ್ಚಿಂ ಪೇಪರಾಂ, ಬೂಕ್ ಆನಿ ವಸ್ತುರ್ ಸಾರ್ಕ್ಯಾ ಜಾಗ್ಯಾರ್ ದವರ್ಲೆಂ. ಮೆಳೆಂ ವಸ್ತುರ್ ಆರಾವ್ನ್ ತಿಣೆ ವಾಶಿಂಗ್ ಮೆಶಿನಾಂತ್ ಘಾಲೆಂ.
ಪ್ರೆಶರ್ ಕುಕ್ಕರ್?
ತಿಕಾ ಉಡಾಸ್ ಆಯ್ಲೊ. ರಾಹುಲ್ ಆನಿ ರೆನ್ನಿಕ್ ದೆಕ್ತಾನಾ ತಿಕಾ ಅಪ್ಲೆಂ ಭುರ್ಗೆಂಪಣ್ ಉಡಾಸಾಕ್ ಯೆತಾಲೆಂ. ಜವಾಭ್ದಾರೆಚೆಂ ವ್ಹೊಜೆಂ ಕಿತೆಂ ಮ್ಹಣ್ ನೆಣಾಸ್ತಾನಾ ಪಾಶಾರ್ ಕೆಲ್ಲೆ ತೆ ಸ್ವತಂತ್ರ್ ದೀಸ್. ಕುಜ್ನಾಕ್ ಸಾರ್ಕೆಂ ದೀಷ್ಟ್ ಘಾಲ್ಲೊ ತಾಕಾ ಉಡಾಸ್ ನಾತ್ಲ್ಲೊ. ಕಾಜಾರ್ ಜಾತಾ ಪರ್ಯಾಂತ್ ರಾಂದಾಪ್ ಕರ್ಚೆಂ ಸೊಡ್, ಸಮಾಕಟ್ಟಾರ್ ಏಕ್ ಕೊಪ್ ಕೊಫಿ ಸಮೇತ್ ತಾಣೆ ಕೆಲ್ಲಿ ನಾ. ಶಿಕಾಪ್, ಖೆಳ್, ಸಿನೆಮಾಂ, ಭಂವ್ಡಿ ಆನಿ ಈಷ್ಟ್-ಇಷ್ಟಿಣ್ಯೊಂ ಮಣೊನ್ ದೀಸ್ ಉಭೊನ್ ಗೆಲ್ಲೆ. ಇನ್ಶುರೆನ್ಸ್ ಕಂಪೆನಿಂತ್ ಕಾಮ್ ಮೆಳ್ಲ್ಲ್ಯಾ ಉಪ್ರಾಂತ್ ತರೀ ತೊ ಉಡ್ತೊ ಉಬ್ಚೊ ಆನ್ಭೋಗ್ ತಿಣೆಂ ಸಾಂಡ್ಲ್ಲೊ ನಾ.
ಕಾಜಾರ್ ಜಾವ್ನ್ ಆನಿ ಕಾಮ್ ಸೊಡ್ನ್ ಅಪ್ಣೆಂ ಅಪ್ಣಾಕ್ಚ್ ಹೊಗ್ಡಾಯ್ಲೆಂ ಮ್ಹಣ್ಚೊ ಚುರ್ಚುರೊ ತಿಕಾ ತವಳ್ತವಳ್ ಧೊಸ್ತಾಲೊ. ತಿಣೆ ಕಾಮ್ ಕರ್ಚಾಂತ್ ಜೆರ್ಮಿಚೊ ಪಾಟಿಂಬೊ ನಾತ್ಲ್ಲೊ. ತ್ಯಾ ಶಿವಾಯಿ ಘರ್ಚೆಂ ಕಾಮ್ ಇತ್ಲೆಂ ಜಾಲ್ಲೆಂ ವೆಳಾಚಾ ಅಭಾವಾನ್ ತೆಂ ಜಾಯ್ತೆಂ ಕಷ್ಟಾಲ್ಲೆಂ. ಭುರ್ಗಿಂ ಲಾನ್ ಆಸ್ತಾನಾ ತಾಂಚಿ ಸೆವಾ, ಇಸ್ಕೊಲ್, ಶಿಕಾಪ್ ಆನಿ ಹೋಮ್ವರ್ಕ್ ಇತ್ಯಾದಿ, ರಾಂದಾಪ್, ಘರ್ ನಿತಳಾಯಿ, ಘೊವಾಚಿ ಚಾಕ್ರಿ, ಪಾರ್ಟಿ ಅನಿ ಲೊಂಡ್ರಿ ಮಣೊನ್ ತಿಕಾ ಉಸ್ವಾಸ್ ಸೊಡುಂಕ್ ಸಮೇತ್ ಸಾರ್ಕೆಂ ವೇಳ್ ಮೆಳೊಂಕ್ ನಾತ್ಲ್ಲೊ. ಆತಾಂ ಭುರ್ಗಿಂ ವಾಡ್ಲ್ಲಿಂ. ಸಾಂಗಾತಾಚ್ ತಾಂಚೊ ಬುಟ್ಟ್ಯೊ ಚಡ್ಲ್ಲ್ಯೊ.
ಪ್ರೆಶರ್ ಕುಕ್ಕರ್?
ತಿಚೊ ಉಡಾಸ್ ಪಾಟಿಂ ಆಯ್ಲೊ. ಕುಜ್ನಾಕ್ ಯೇವ್ನ್ ತಿಣೆ ಭಾಕ್ರಿ ಕರುಂಕ್ ತಾಂದುಳ್ ಭಿಜಾತ್ ಘಾಲೊ. ಬೀಫ್, ತೆಂಡ್ಲಿಂ, ಟೊಮೆಟೊ, ಪಿಯಾವ್ ಆನಿ ಹೆರ್ ಶಿಂದಾಪ್ ಕೆಲೆಂ. ನಾರ್ಲ್ ಸೊಲ್ನ್ ಕಾಂತ್ಲೊ. ಫೊಡಿ ಕೆಲ್ಲೆಂ ಬೀಫ್ ಧುವ್ನ್ ತೊಪ್ಲ್ಯಾಂತ್ ಘಾಲ್ನ್ ವಯ್ರ್ ಸೆಲ್ಫಾಂತ್ ಆಸ್ಚಾ ಪ್ರೆಶರ್ ಕುಕ್ಕರಾಚೆರ್ ತಿಣೆ ದೀಷ್ಟ್ ಘಾಲಿ.
ಸ್ಟೂಲಾರ್ ಚಡೊನ್ ಕುಕ್ಕರ್ ಲಾಗಿಂ ವೊಡ್ತಾನಾ ತಿಕಾ ಆಧಾರ್ ಚುಕ್ಲೊ. ಹಾತಾ ಥಾವ್ನ್ ಕುಕ್ಕರ್ ನಿಸ್ರೊನ್ ಸಕ್ಲಾ ಧರ್ಣಿಕ್ ಅಪ್ಟಾಲೊ. ಪಡ್ಲ್ಲೊ ಕುಕ್ಕರ್ ವಿಂಚುನ್ ತಿಣೆಂ ಧುಲೊ. ಸ್ಟೀಲಾಚಿ ವಸ್ತ್ ಫುಟನಾ ಮ್ಹಣ್ಚಿ ಸಾಮಾನ್ಯ್ ಜಾಣ್ವಾಯಿ ತರೀ ಸ್ಟೀಲಾಚಿ ವಸ್ತ್ ಅಪ್ಟಾಲ್ಯಾರ್ ಮೈಕ್ರೊಸ್ಕೊಫಿಕ್ ಫುಟ್ ಉಬ್ಜೊಂಕ್ ಸಾಧ್ಯ್ ಆಸಾ ಮಣೊನ್ ತಿಣೆಂ ಶಿಕ್ತಾನಾ ವಾಚ್ಲ್ಲೊ ತಿಕಾ ಉಡಾಸ್ ಆಯ್ಲೊ.
ಪ್ರೆಶರ್ ಕುಕ್ಕರ್ ಸ್ಪೋಟಿತ್ ಜಾಲೊ ತರ್? ತಿಚೆಂ ಆಂಗ್ ಕಾಂಪ್ಲೆಂ.
ಉಪ್ರಾಂತ್ ಕಿತೆಂಗಿ ಚಿಂತುನ್ ಹಾಸೊನ್ ಕುಕ್ಕರಾಂತ್ ಮಾಸ್ ಆನಿ ಉದಾಕ್ ಘಾಲ್ನ್ ತಿಣೆ ಶಿಜೊಂಕ್ ದವರ್ಲೆಂ. ಪಯ್ಲಿ ಊಬ್ ಯೆತಾಚ್ ತಿಣೆ ಕುಕ್ಕರಾಚಿ ಗುಡ್ದಿ ಘಾಲಿ. ಥೊಡ್ಯಾ ವೇಳಾನ್ ಶಿಳೊಣಿ ಆರಂಭ್ ಜಾಲಿ. ಊಬೆಚಿ ದಾವ್ ಕುಕ್ಕರಾಂತ್ ಭರೊನ್ ಸ್ವತಂತ್ರ್ ಜಾಂವ್ಕ್ ಕಷ್ಟಾತಾಲಿ. ಕುಕ್ಕರಾಚೆ ಭಾಂದ್ಪಾಸ್ ಲೀನಾಕ್ ಅರ್ಥ್ ಜಾತಾಲೆ. ಕ್ಷಣಾನ್ ಕ್ಷಣ್ ಗರ್ಮಿ ಚಡ್ತಾಲಿ. ಕಿತ್ಯಾಕ್ಗಿ ಆಜ್ ಕುಕ್ಕರಾಚೆ ಶಿಳೊಣೆಂತ್ ಬದ್ಲಾವಣ್ ಝಳ್ಕಾಲಿ ಲೀನಾಕ್. ವಾಲ್ವಾಂತ್ ಕೋಯ್ರ್ ಶಿರ್ಕೊನ್ ಗರ್ಮಿ ಭಾಯ್ರ್ ಯೇಂವ್ಕ್ ಕಷ್ಟಾತಾ ಮಣ್ ಭೊಗ್ಲೆಂ ಲೀನಾಕ್. ಸಾಮಾನ್ಯ್ ಜಾವ್ನ್ ಭಾಯ್ರ್ ಸರ್ಚಾ ಶಿಳೊಣೆಕ್ ಆನಿ ಆಯ್ಚಾ ಭಾಂದ್ಪಾಸಾಕ್ ತಫಾವತ್ ಆಸ್ಲ್ಲೊ. ಸೆಲ್ಫಾ ಥಾವ್ನ್ ಸಕ್ಲಾ ಪಡ್ತಾನಾ ಕುಕ್ಕರಾಚೊ ವಾಲ್ವ್ ಚೆಂಚೊನ್ ಬುರಾಕ್ ಆಶೀರ್ ಜಾಂವ್ಕ್ ಸಾಧ್ಯ್?
ಪ್ರೆಶರ್ ಚಡೊನ್ ಕುಕ್ಕರ್ ಫುಟ್ತೊಲೊ? ಲೀನಾಕ್ ನಿಜಾಯ್ಕಿ ಭೆಂ ದಿಸ್ಲೆಂ. ಬಹುಶಾ ಹೆಂ ಅಪ್ಣಾಚೆಂ ಕಲ್ಪನ್ ಆಸ್ತೆಲೆಂ ಮಣ್ ತಿಣೆಂ ಮತಿಕ್ ಸಮಧಾನ್ ಕೆಲೆಂ. ಭಾಕ್ರೆಂಚೊ ತಾಂದುಳ್ ತಿಣೆ ವಾನಾಂತ್ ಘಾಲ್ನ್ ವೀಜ್ ಸಕ್ತೆಚೊ ಬುತಾಂವ್ ದಾಂಬ್ಲೊ. ಘಾಟ್ನೊ ಘುಂವೊಂಕ್ ಲಾಗ್ಲೊ. ಆಖ್ಖೊ ದೀಸ್ ಘೊವ್, ಭುರ್ಗಿಂ, ರಾಂದಾಪ್ ಆನಿ ಘರ್ ಮಣೊನ್ ಲೀನಾಕ್ ಜಿಣ್ಯೆಂತ್ ಭಾಂದ್ಪಾಸ್ ಜಾಲ್ಲೆ. ತೆಂ ಥಕ್ಲ್ಲೆಂ.
ಹ್ಯಾ ಫುಗಾಸಾಂವಾ ಥಾವ್ನ್ ಮೆಕ್ಳೆಂ ಜಾಂವ್ಕ್ ಮನ್ ಅತ್ರೆಗ್ತಾಲೆಂ. ಸಾಧ್ಯತಾ ಝಳ್ಕಾನಾತ್ಲ್ಲಿ. ಅಪ್ಣಾಕ್ ಕಿತ್ಯಾಕ್ ಸಾಧ್ಯ್ ನಾ? ಹೆರ್ ಸ್ತ್ರೀಯೊ ಕಾಜಾರಾ ಉಪ್ರಾಂತ್ ಕಶೆಂ ವೇಳ್ ಸೊಧುನ್ ಉದ್ಯೋಗ್, ಕಿಟ್ಟಿ ಪಾರ್ಟಿ, ಕ್ಲಬ್ಬ್, ವಾಕಿಂಗ್, ವ್ಯಾಯಾಮ್, ಖೆಳ್, ಸೊಡೆಲಿಟಿ, ಕೊಯೆರ್ ಮಣೊನ್ ಅಪ್ಲೆ ಹವ್ಯಾಸ್ ಮುಕಾರ್ಸಿತಾತ್? ಅಪ್ಣಾಕ್ ಕಿತ್ಯಾಕ್ ಹೆಂ ಸಾಧ್ಯ್ ನಾ? ಘರ್ ಪರಿವಾರ್ ಮ್ಹಣ್ಚಾ ಚಕ್ರವ್ಯೂಹಾಂತ್ ಅಪುಣ್ ಕಿತ್ಯಾಕ್ ವೊಳ್ಸೊನ್ ಕರ್ಗೊನ್ ಗೆಲ್ಯಾಂ?!
ಕುಕ್ಕರಾಚಿ ಗರ್ಮಿ ಸಾರ್ಕೆಂ ಭಾಯ್ರ್ ಯೇನಾತ್ಲ್ಲೆ ಜಿನ್ಸಿಂ ಲೀನಾಕ್ ಭೊಗ್ಲೆಂ. ಸ್ಟೋವ್ ಆಫ್ ಕರ್ನ್ ತೊಪ್ಲ್ಯಾಂತ್ ಮಾಸ್ ಶಿಜಯಾಂ ಮಳ್ಯಾರ್ ಬೀಫ್ ಮೋವ್ ಜಾತೆಲೆಂ ಮ್ಹಣ್ಚಿ ಗ್ಯಾರಂಟಿ ನಾತ್ಲ್ಲಿ. ಪ್ರೆಶರ್ ಕುಕ್ಕರಾಚಿ ಕಿತ್ಯಾಕ್ ಅಪ್ಣಾಕ್ ಇತ್ಲಿಯಿ ಖಂತ್???
ಕುಕ್ಕರಾಂತ್ ಗರ್ಮಿ ಭರೊನ್ ಸ್ಫೋಟನ್ ಜಾಂವ್ಕ್ ಸಾಧ್ಯ್ ಮ್ಹಣ್ತಾತ್ ತರೀ ಅಪ್ಣಾಚಾ ವರ್ತುಲಾಂತ್ ಅಸಲೆಂ ಸ್ಪೋಟನ್ ತಾಣೆಂ ಆಯ್ಕೊಂಕ್ ನಾತ್ಲ್ಲೆಂ. ಸರ್ವ್ ಸಮಾ ಆಸಾ ಮ್ಹಣ್ ತಿಣೆಂ ಅಪ್ಣಾಕ್ಚ್ ಭರ್ವೊಸೊ ದಿಲೊ. ಮಿಸಾ ಥಾವ್ನ್ ಜೆರ್ಮಿ ಆನಿ ಭುರ್ಗಿಂ ಪಾಟಿಂ ಯೆಂವ್ಚಾ ಪಯ್ಲೆಂ ಘರ್ ನಿತಳ್ ಕರ್ಯಾಂ ಮ್ಹಣ್ ತಿ ಸಾರೊಣ್ ಘೆವ್ನ್ ಕಾಮಾಕ್ ಲಾಗ್ಲಿ.
ಬೆಡ್ರುಮಾಕ್ ಯೆತಾನಾ ತಿಕಾ ವಿಸ್ಕೆಚಿ ಬೊತ್ಲ್ ಆಕರ್ಶಿತ್ ದಿಸ್ಲಿ. ಸಾರೊಣ್ ಸಕ್ಲಾ ಗಳವ್ನ್ ತಿಣೆಂ ವಿಸ್ಕೆಚಿ ಬೊತ್ಲ್ ವಿಂಚ್ಲಿ. ಆಮಾಲಾವಿಶಿಂ ತಿಕಾ ಚಡಿತ್ ಆನ್ಭೋಗ್ ನಾತ್ಲ್ಲೊ. ಕೋಲೆಜಿಂತ್ ಶಿಕ್ತಾನಾ ಹೊಸ್ಟೆಲಾಚಾ ಚೆಡ್ವಾಂ ಸಂಗಿಂ ಏಕ್ ಪಾವ್ಟಿಂ ಬಿಯರ್ ಘೊಟುನ್ ಉಪ್ರಾಂತ್ ಭೊಗ್ಲ್ಲಿ ತಕ್ಲಿ ಫಡಾಫಡ್ ತೆಂ ಜಿಣ್ಯೆಂತ್ ವಿಸ್ರೊಂಕ್ ನಾತ್ಲ್ಲೆಂ. ಜೆರ್ಮಿ ಅಪ್ರೂಪ್ ಪಿಯೆತಾಲೊ. ಥೊಡೆ ಪಾವ್ಟಿಂ ಪಿಯೊನ್ ಜೀಬ್ ಆಡ್ ಪರ್ತಾಲ್ಲಿ ಆಸಾ. ಪಿಶ್ಯಾಂಪರಿಂ ಧೆಂಕ್ಣೆ ಘಾಲ್ಲೆ ಆಸಾತ್. ಪುಣ್ ಹೆಂ ಭಾರಿಚ್ ಅಪ್ರೂಪ್. ತೊ ಪಿಯೆಲ್ಲ್ಯಾ ವೇಳಾರ್ ಭುರ್ಗಿಂ ಚುಕೊನ್ಯಿಂ ತಾಚೆ ಲಾಗಿಂ ಉಲಯ್ನಾತ್ಲ್ಲಿಂ. ಪಿಯೆಲ್ಲ್ಯಾ ಉಪ್ರಾಂತ್ ತಾಚೆಂ ಚಿರಿ-ಪಿರಿ ತಾಂಕಾಂ ಪಸಂದ್ ಜಾಯ್ನಾತ್ಲ್ಲೆಂ. ಥೊಡೆಪಾವ್ಟಿಂ ತೊಚ್ ವೊದ್ದುವಾರಂಟ್ ಕರ್ನ್ ತಾಂಕಾಂ ಧೊಸ್ತಾಲೊ. ಪಿಯೆಲ್ಯಾರ್ ತಾಚೊ ಸ್ವಭಾವ್ ಕಿತ್ಯಾಕ್ ಬದ್ಲಾತಾ ಮಣ್ಚಾ ಸವಲಾಕ್ ತಿಚೆ ಲಾಗಿಂ ಜಾಪ್ ನಾತ್ಲ್ಲಿ. ಬಹುಶಾ ಜೆರ್ಮಿಚಿ ಮತ್ ಸ್ವತಂತ್ರ್ ಜಾತಾಲಿ ಜಾಯ್ಜಯ್.
ತಿಕಾ ಕಿತೆಂ ಭೊಗ್ಲೆಂ ಮ್ಹಣ್ ತಿ ನೆಣಾ. ಬೊತ್ಲೆಚಿ ಗುಡ್ದಿ ಕಾಡ್ನ್ ತಿಣೆಂ ಏಕ್ ವ್ಹಡ್ ಘೊಟ್ ಘೆತ್ಲೊ. ತಾಳ್ಯಾಕ್ ಘಾಟ್ ಸೊಸುಂಕ್ ಜಾಯ್ನಾಸ್ತಾನಾ ತಿಕಾ ಬಳಿಷ್ಟ್ ಖೊಂಕ್ಲಿ ಆಯ್ಲಿ. ಜೆರ್ಮಿ ಆಶೆಂ ಶೀದಾ ಪಿಯೆನಾತ್ಲ್ಲೊ. ಉದಾಕ್ ಯಾ ಸೋಡಾ ಭರ್ಸುನ್ ಪಿಯೆತಾಲೊ. ತಿ ಕುಜ್ನಾಕ್ ಪಾಟಿಂ ಯೆತಾನಾ ಕುಕ್ಕರಾಚೊ ’ಪಸ್ಸ್...ಪಸ್ಸ್..’ ಆವಾಜ್ ತಿಕಾ ವಿರಾರ್ ಕರುಂಕ್ ಲಾಗ್ಲೊ. ಗರ್ಮಿ ಭಾಯ್ರ್ ಯೇಂವ್ಕ್ ಕಷ್ಟಾತಾಲಿ ಜಾಯ್ಜಾಯಿ. ಭಿತರ್ಲಿ ದಾವ್ ಚಡ್ಲ್ಲಿ. ಕೆದೊಳ್ ಪರ್ಯಾಂತ್ ಹಿ ಬಂಧಡ್?
ತಿಣೆ ಫಿಕಿರ್ ಕೆಲಿನಾ. ಏಕ್ ಗ್ಲಾಸ್ ವಿಂಚುನ್ ತಿ ಪಾಟಿಂ ಬೆಡ್ರುಮಾಕ್ ಪರ್ತಾಲಿ. ಲೀನಾನ್ ಗ್ಲಾಸ್ ಮೆಜಾರ್ ದವರ್ಲೊ. ವಿಸ್ಕಿ ವೊತುನ್ ತಾಂಬ್ಲೆರಾಂತ್ಲೆಂ ಉದಾಕ್ ಭರ್ಶಿಲೆಂ. ತಿಣೆ ಆಮಾಲ್ ತಾಳ್ಯಾಕ್ ದೆಂವಯ್ಲೆಂ. ಆತಾಂ ತಿಕಾ ಖೊಂಕ್ಲಿ ಆಯ್ಲಿ ನಾ. ಥೊಡ್ಯಾ ವೇಳಾನ್ ತಿಣೆ ದಿಸ್ರೊ ಘೊಟ್ ಘೆತ್ಲೊ. ಉಪ್ರಾಂತ್ ತಿಸ್ರೊ.
ಆತಾಂ ತಿಕಾ ಮತ್ ಆನಿ ಕುಡಿಚಿ ಜಡಾಯಿ ಉಣೆ ಜಾಲ್ಲೆಪರಿಂ ಭಾಸ್ ಜಾಲೆಂ. ಏಕ್ ವಿಚಿತ್ರ್ ಧಾದೊಸ್ಕಾಯಿ ಭೊಗ್ಲಿ. ಪಾಳ್ಣ್ಯಾಂತ್ ಧಲ್ಲ್ಲೊ ಆನ್ಭೋಗ್. ವಿರಾರಾಯಿ ಪಯ್ಸ್ ಗೆಲ್ಲಿ. ಸರ್ವ್ ಆರಾಮ್. ಸಂಪೂರ್ಣ್ ವಿರಾಮ್. ಗ್ಲಾಸ್ ಖಾಲಿ ಜಾತಾನಾ ತಿಣೆ ಆನ್ಯೇಕ್ ಪೆಗ್ಗ್ ವೊತ್ಲೊ.........
ವೊರಾಂ ಸಕಾಳಿಂಚಿಂ ಸಾಡೆ ಇಕ್ರಾ ಉತ್ರಾತಾನಾ ಮೀಸಾಕ್ ಗೆಲ್ಲೊ ಜೆರ್ಮಿ ಅಪ್ಲ್ಯಾ ಭುರ್ಗ್ಯಾಂ ಸವೆಂ ಪಾಟಿಂ ಘರಾ ಪಾವ್ಲೊ. ರೆಸ್ಟೋರೆಂಟಾಂತ್ ಪೂರಿ ಭಾಜಿ ಆನಿ ಚಾ ಪಿಯೊನ್ ಮಾಸ್ಳಿ ಮಾರ್ಕೆಟಿಕ್ ಭೆಟ್ ದೀವ್ನ್ ತಿಂ ಆತಾಂ ಘರಾ ಭಿತರ್ ರಿಗ್ಲಿಂ. ಘರ್ಚಾ ದಾರಾಕ್ ಖಿಳ್ ಘಾಲುಂಕ್ ನಾತ್ಲ್ಲಿ ಪಳೆವ್ನ್ ತೊ ಅಜಾಪ್ಲೊ.
"ಲೀನಾ ರಾಂದಾಪ್ ಜಾಲೆಂ?"
ಜೆರ್ಮಿನ್ ಉಲೊ ದಿಲೊ. ಲೀನಾಚಿ ಜಾಪ್ ನಾತ್ಲ್ಲಿ. ಕಿಚನಾಕ್ ವಚೊನ್ ತಾಣೆ ತಿಳ್ಳೆಂ. ಪ್ರೆಶರ್ ಕುಕ್ಕರ್ ಸ್ಟೋವಾಚೆರ್ ಉಸ್ಮೊಡ್ತಾಲೊ. ಘಾಟ್ನೊ ಭಾಂದ್ಪಸಾನ್ ಘುಂವ್ತಾಲೊ. ಜೆರ್ಮಿನ್ ಭಾಯ್ಲೆಕ್ ಉಲೊ ದೀವ್ನ್ ಸರಾರಾಂ ಮೆಟಾಂ ಬೆಡ್ರುಮಾಕ್ ಕಾಡ್ಲಿಂ. ರಾಹುಲ್ ಆನಿ ರೆನ್ನಿನ್ ಪಾಟ್ಲಾವ್ ಕೆಲೊ.
ಬೆಡ್ರುಮಾಚೆಂ ದ್ರಶ್ಯ್ ದೆಕ್ತಾನಾ ತಾಂಚಿ ಝಿಂಟ್ ಉಡ್ಲಿ. ಉಗ್ತೆಂ ಆಸ್ಚಿ ಸೊರ್ಯಾಚಿ ಬೊತ್ಲ್. ಮೆಜಾರ್ ಆಡ್ ಪರ್ತಾಲ್ಲೊ ಗ್ಲಾಸ್. ಸೊರ್ಯಾಚಿ ಘಾಣ್. ಸರ್ವ್ ಖಂತ್ ಬೆಜಾರಾಯಿ ವಿಸ್ರೊನ್ ಬೆಡ್ಡಾರ್ ನಿದೊನ್ ಆಸ್ಚೆಂ ಲೀನಾ.
"ದೆವಾ ಮ್ಹಜಾ!" ಆಕ್ಲಾಸ್ಲೊ ಜೆರ್ಮಿ.
"ಲೀನಾ ಕಿತೆಂ ಜಾಲಾಂ ತುಕಾ?" ಭುರ್ಗಿಂ ಭಿಯೆಲಿಂ. ಜೆರ್ಮಿನ್ ಭಾಯ್ಲೆಚೆರ್ ವೋಲ್ ಪಾಂಗುರ್ಲಿ.
"ರೆನ್ನಿ, ಕುಜ್ನಾಕ್ ವಚೊನ್ ಸ್ಟೋವ್ ಆನಿ ವಾನ್ ಆಫ್ ಕರ್." ಜೆರ್ಮಿನ್ ಫರ್ಮಾಯ್ಲೆಂ.
ಬಾಪಾಯ್ಚೊ ಉಲೊ ಆಯ್ಕೊನ್ ರೆನ್ನಿ ಘುಂವ್ಚಾ ಪಯ್ಲೆಂ ಕುಜ್ನಾ ಥಾವ್ನ್ ಭುಯ್ಕಾಂಪ್ ಜಾಲ್ಲೆ ಜಿನ್ಸಿಂ ಏಕ್ ಬಳಿಷ್ಟ್ ಆವಾಜ್ ಜಾಲೊ. ಧರ್ಣ್ ಕಾಂಪ್ಲಿ. ಜೆರ್ಮಿಚಾ ತೋಂಡಾ ಥಾವ್ನ್ ಭಿಯಾನ್ ಉತಾರ್ ಭಾಯ್ರ್ ನಿಕಾಳ್ಳೆಂ ನಾ. ಫಕತ್ ಏಕ್ ಚಿಂತಾಪ್ ಮತಿಂತ್ ಪೆಟ್ಲೆಂ.
ಕಾಂಯ್ ಪ್ರೆಶರ್ ಕುಕ್ಕರಾಚೆಂ ಸ್ಪೋಟನ್ ಜಾಲೆಂ????
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
