ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಪ್ರತಿಭಟನ್
ಜೇಮ್ಸ್ ಲುವಿಸ್, ಒಮ್ಜೂರ್: ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ಕರ್ತಾಸ್ತಾನಾಂ ಮ್ಹಾಕಾ ಪಸಂದ್ ಜಾಲ್ಲ್ಯಾ ಕಾಣ್ಯೆಗಾರಾಂಚಾ ಪಯ್ಕಿಂತ್ ಹೊ ಎಕ್ಲೊ. ಹಾಚ್ಯೊ ಕಾಣ್ಯೊ ಸಾಮಾಜಿಕ್ ಸಮಸ್ಸ್ಯಾಂಚೆರ್ ಆರ್ಸೊ ಧರ್ಚ್ಯೊ ದೆಕುನ್ ಜಾವ್ಯೆತ್. ಕಾಣ್ಯಾಂ ಶಿವಾಯ್, ಕಾದಂಬರಿ, ಲೇಖನಾಂ ಬರಂವ್ಚೊ ಹೊ ಅಪ್ರೂಪಾಯೆನ್ ಬರಯ್ತಾ ತರ್ಯೀ, ಹಾಚ್ಯೊ ಎಕೇಕ್ ಕಾಣ್ಯೊ ಪರತ್ ಪರತ್ ವಾಚಿಜಾಯ್ ಜಾಲ್ಲ್ಯೊ.
ಹಾಚಿ ಅನ್ಯೇಕ್ ಮಟ್ವಿ ಕಾಣಿ: ಸವಾಲಾಂಕ್ ಏಕ್ ಸವಾಲ್
ಜೇಮ್ಸ್ ಲುವಿಸ್
"ಬೆಸಾಂವ್ ದಿಯಾ ಫಾದರ್"
ಶೆರ್ಮಾಂವ್ ತಯಾರ್ ಕರ್ಚಾಂತ್ ಮಗ್ನ್ ಜಾಲ್ಲ್ಯಾ ಮ್ಹಕಾ ಕೊಣೆಂಗೀ ಜಾಗಯ್ಲ್ಯಾ ಭಾಶೆನ್ ಜಾಲೆಂ. ಹಾವೆಂ ತಕ್ಲಿ ಉಕಲ್ನ್ ಪಳೆಲೆಂ. ಆಯಿಲ್ಲಿ ವ್ಯಕ್ತಿ ದಫ್ತರಾಚ್ಯಾ ಹುಂಬ್ರಾರ್ಚ್ ರಾವ್ಲ್ಲಿ.
"ಒಳೊಕ್ ಮೆಳ್ಳಿನಾಂಗಿ ಫಾದರ್?’
ತೊ ಉಲಯ್ತಾನಾ ಹಾಂವ್ ಉಡೊನ್ ಪಡ್ಲೊಂ. ಹೆ ವ್ಯಕ್ತಿಚಿ ಒಳೊಕ್ ನಾ ಮ್ಹಳ್ಯಾರ್ ಕೋಣ್ಯ್ ಕಿತೆಂ ಮ್ಹಣ್ತಿತ್?
"ಯೇ...... ಯೇ...... ಭಿತರ್ ಯೇ ಸೊಜಾಮಾ"
ತಾಚೆಂ ನಾಂವ್ ಕಾಡ್ನ್ಚ್ ಉಲಯ್ಲೊಂ ಹಾಂವ್.
ದಾನಿಯೆಲ್ ಸೊಜ್..... ಕಾನೂರ್ ಫಿರ್ಗಜೆಚೊ. ಹೆ ಫಿರ್ಗಜೆಂತ್ ಸಾತ್ ವರ್ಸಾಂ ವಿಗಾರ್ ಜಾವ್ನ್ ಹಾಂವ್ ವಾವುರ್ಲಾಂ. ದಾನಿಯೆಲ್ ಸೊಜ್ ಏಕ್ ವಿಶ್ವಾಸಿ ಮನಿಸ್ ಜಾವ್ನ್ ಮ್ಹಕಾ ಒಳ್ಕಿಚೊ.
ತಾಕಾ ಬೆಸಾಂವ್ ದಿತೆಚ್ ಬಸ್ಕಾ ದಾಕಯ್ಲಿ.
"ಅಪ್ರೂಪ್ ಮನಿಸ್" ಹಾವೆಂ ಉಲೊಣ್ಯಾಕ್ ಬುನ್ಯಾದ್ ಘಾಲಿ.
"ವ್ಹಯ್ ಫಾದರ್. ತುಮಿ ವರ್ಗ್ ಜಾವ್ನ್ ವರ್ಸಾಂ ಪಾಂಚ್ ಜಾಲಿಂ. ಆನಿ ಕಾಂಯ್ ದೋನ್ ವರ್ಸಾಂನಿ ಪರತ್ ತುಮ್ಕಾಂ ವರ್ಗ್ ಆಸ್ತಲೊ. ತಾಚೆ ಪಯ್ಲೆಂ ತುಮ್ಕಾಂ ಪಳಂವ್ಚೊ ಬರೊ ಆವ್ಕಾಸ್ ಮ್ಹಾಕಾ ಮೆಳ್ಳೊ."
ತೊಂಡಾರ್ ಹಾಸೊ ದಾಕವ್ನ್ ಉಲಯ್ಲೊ ದಾನಿಯೆಲಾಮ್. ಹಾವೆಂ ಕಾಪಿಯೆಕ್ ಬೊಟ್ಲೆರಾಕ್ ಉಲೊ ಕೆಲೊ.
"ಮ್ಹಜೆ ಧುವೆಕ್ ಹ್ಯಾಚ್ ಮಯ್ನ್ಯಾಚೆ ತೀಸ್ ತಾರಿಕೆರ್ ಕಾಜಾರ್ ದವರ್ಲಾಂ. ತುಮಿಂ ರೆಸ್ಪೆರಾಕ್ ಯೇಜೆ ಆನಿ ಹೊಕಾಲ್-ನೊವ್ರ್ಯಾಕ್ ಬೆಸಾಂವ್ ದೀಜೆ."
ದಾನಿಯೆಲ್ ಆಯಿಲ್ಲೊ ವಿಶಯ್ ಸ್ಪಷ್ಟ್ ಜಾಲೊ. ಕಾಂಯ್ ತರ್ಯ್ ಗರ್ಜ್ ನಾಸ್ತಾನಾ ಆದ್ಲೆ ಫಿರ್ಗಜೆಸೊ ಲೋಕ್ ಆದ್ಲ್ಯಾ ವಿಗಾರಾಕ್ ಪಳಂವ್ಕ್ ಯೇನಾ ತೆಂ ಮ್ಹಾಕಾ ಸಾರ್ಕೆಂ ಕಳಿತ್ ಆಸ್ಲ್ಲೆಂ. ಜಾಲ್ಯಾರ್ಯ್ ಹ್ಯಾ ಪಾವ್ಟಿಂ ದಾನಿಯೆಲಾಮಾನ್ ಧುವೆಚ್ಯಾ ಲಗ್ನಾಚೆಂ ಆಪವ್ಣೆಂ ಪತ್ರ್ ದಿತಾನಾ ಮ್ಹಾಕಾ ವರ್ತಿ ಧಾದೊಸ್ಕಾಯ್ ಜಾಲ್ಲಿ. ನಿಮಾಣೆಂ ತರ್ಯ್ ಸುಜಿಕ್ ಸಯ್ರಿಕ್ ಮೆಳ್ಳಿ ನ್ಹಂಯ್ಗೀ. ಮ್ಹಜೊ ಸಂತೊಸ್ ದಾನಿಯೆಲಾಮಾ ಲಾಗಿಂ ಉಚಾರುಂಕ್ ಆತ್ರೆಗ್ಲೊಂ.
"ದೇವ್ ಸೊಡ್ನ್ ಘಾಲಿನಾ ಮ್ಹಣ್ಚೆಂ ಹಾಕಾಚ್. ನಿಮಾಣೆಂ ತರ್ಯ್ ದೆವಾನ್ ಆಮ್ಚೆಂ ಮಾಗ್ಣೆಂ ಆಯ್ಕಾಲೆಂ. ಸುಜಿಚೆಂ ಜಿವಿತ್ ಸಂತೊಸ್ಭರಿತ್ ಜಾಂವ್ದಿ ಮ್ಹಣ್ ಹಾಂವ್ ಮಾಗ್ತಾಂ" ಮ್ಹಜೆ ದೊಳೆ ಗಯ್ರೆ ಜಾಲ್ಲೆ.
ಹಾವೆಂ ಆಪವ್ಣೆಂ ಪತ್ರ್ ಉಗ್ತೆಂ ಕೆಲೆಂ.
ಸೊಜಾಮಾಚೆಂ ತೋಂಡ್ ಉಗ್ತೆಂ ಜಾಲೆಂ. "ಕಾಜಾರ್ ಸುಜಿಕ್ ನ್ಹಂಯ್ ಫಾದರ್...... ಸುನಿಕ್....."
ಹಾಂವ್ ಅಜ್ಯಾಪ್ಲೊಂ. ವ್ಹಡ್ಲಿ ಭಯ್ಣ್ ಆಸ್ತಾನಾ ದಾಕ್ಟೆ ಭಯ್ಣಿಕ್ ಕಾಜಾರ್ ಕರ್ಚೆಂ ಮ್ಹಳ್ಯಾರ್?
"ಕಿತೆಂ ಉಲಯ್ತಾಯ್ ಸೊಜಾಮಾ. ಸುಜಿಕ್ ದವರ್ನ್ ಸುನಿಕ್ ಕಾಜಾರ್ ಕರುಂಕ್ ತುಮ್ಕಾಂ ಮನ್ ಆಯ್ಲೆಂ ತರ್ಯ್ ಕಶೆಂ?"
ಹಾಂವ್ ಅಕ್ಷೇಪ್ ಉಲಯ್ತಾನಾ ತಾಣೆ ತಕ್ಲಿ ಪಂದಾ ಘಾಲಿ.
"ಛೆ! ತಶೆಂ ಜಾಂವ್ಕ್ ನುಜೊ ಆಸ್ಲ್ಲೆಂ."
ಹಾಂವ್ ಕದೆಲಾರ್ ಥಾವ್ನ್ ಉಟ್ಲೊಂ. ತೊಯಿ ಉಟ್ಲೊ.
"ಫಾದರ್ ಏಕ್ ವಿಶಯ್" ತೊ ಉಲಯ್ಲೊ.
"ಕಸಲೊ ವಿಶಯ್?" ಹಾವೆಂ ವಿಚಾರ್ಲೆಂ.
"ವ್ಹಡ್ಲ್ಯಾಕ್ ದವರ್ನ್ ಧಾಕ್ಟ್ಯಾಕ್ ಕಿತ್ಯಾಕ್ ಕೆಲೆಂ ಮ್ಹಣ್ ತುಮಿ ವಿಚಾರ್ತಾತ್. ವ್ಹಡ್ಲ್ಯಾಕ್ ಕೋಣ್ ವ್ಹರ್ತಾ ಫಾದರ್? ಆಯಿಲ್ಲೆ ಗೆಲ್ಲೆ ಎಕೇಕ್ ಉಲವ್ನ್ ವೆತಾತ್. ಕಿತೆಂಗೀ ಹ್ಯಾ ಪಾವ್ಟಿಂ ಸುಜಿಕ್ ಪಳಂವ್ಕ್ ಆಯಿಲ್ಲೊ ಗಲ್ಫಾಂತ್ಲೊ ನವ್ರೊ ತಕ್ಲಿ ಹಾಲವ್ನ್ ಗೆಲೊ. ಚೆಡೊ ಬರೊ. ಪುಣ್ ಕಿತೆಂ ಕರ್ಚೆಂ? ಕೊಣೆಂ ಖಿಳ್ ದವರ್ಲಿ ಹಾಂವ್ ನೆಣಾಂ. ಧಾಕ್ಟ್ಯಾಲಾಗಿಂ ಜಾಲ್ಯಾರ್ ಜಾತಾಂ ಮ್ಹಣ್ ಸಾಂಗೊನ್ ಧಾಡ್ಲೆಂ. ಆಯಿಲ್ಲಿ ಬರಿ ಸಯ್ರಿಕ್, ಜರ್ ವ್ಹಡ್ಲೆಂ ಆಸಾ ಮ್ಹಣ್ ಧಾಕ್ಟ್ಯಾಕ್ಯಿ ಕಾಜಾರ್ ಕರ್ನ್ ದೀನಾ ಜಾಲ್ಯಾರ್ ಮುಕಾರ್ ತಾಚೊ ಫುಡಾರ್ ಕಿತೆಂ?"
ತೊ ಉಲವ್ನ್ಚ್ ವೆತಾಲೊ. ಬೊವ್ಶ್ಯಾ ಮಸ್ತ್ ಚಿಂತ್ಲ್ಯಾ ಉಪ್ರಾಂತ್ ಹೆಂ ಮೇಟ್ ಕಾಡ್ಲಾಂ ಮ್ಹಳ್ಳೆಂ ತಾಚ್ಯಾ ಉಲೊಣ್ಯಾಂತ್ಚ್ ಕಳ್ತಾಲೆಂ.
"ತಶೆಂ, ಜಾಲ್ಲೆಂ ಜಾತಾ. ದೆವಾಚೆರ್ ಭೊರ್ ಘಾಲ್ನ್ ಸುಜಿಕ್ ಮೆಳ್ಲ್ಲ್ಯಾ ಪನ್ನಾಸ್ ಹಜಾರ್ ರುಪಯ್ ಪರ್ಯಾರಾಂತ್ ಪಂಚ್ವೀಸ್ ಹಜಾರ್ ಸುನಿಚ್ಯಾ ಕಾಜಾರಾಕ್ ಖರ್ಸುಂಚೆ ಮ್ಹಳ್ಳ್ಯಾ ನಿರ್ದಾರಾನ್ ಹ್ಯಾ ಕಾಜಾರಾಕ್ ದೆಂವ್ಲ್ಯಾಂವ್. ತುಮಿ ಖಂಡಿತ್ ಯೇಜೆ......"
ಮುಕಾರ್ ತೊ ಕಿತೆಂ ಉಲಯ್ಲೊ, ಕಿತೆಂ ಜಾಲೆಂ ಏಕ್ಯಿ ಮ್ಹಜ್ಯೆ ಮತಿಕ್ ಗೆಲೆಂ ನಾ. ಮ್ಹಜ್ಯಾ ಮತಿಪಡ್ದ್ಯಾರ್ ಫಕತ್ ಬಾವ್ಲ್ಲ್ಯಾ ತೊಂಡಾಚೆಂ ಸುಜಿ ದಿಸ್ತಾಲೆಂ.
ಜಡಾಯೆಚಿಂ ಮೆಟಾಂ ಕಾಡ್ನ್ ಮ್ಹಜ್ಯಾ ಕುಡಾಲಾಗಿಂ ಗೆಲೊಂ. ಮ್ಹಜಿ ಮ್ಹಳ್ಳಿ ಆಸ್ತ್ ಆಸ್ಲ್ಲ್ಯಾ ಗೊವೆತಾಂತ್ಲೆಂ ತೆಂ ಫಾಯ್ಲ್ ಕಾಡ್ಲೆಂ.
ಫಾಯ್ಲ್ ಉಸ್ತುಂಚೆಂ ಪ್ರೇತನ್ ಕೆಲೆಂ.
ಕಾನೂರ್ ಫಿರ್ಗಜೆಂತ್ ಕಾಡ್ಲ್ಲ್ಯಾ ತಸ್ವಿರ್ಯಾಂಚೊ ದಾಳೊಚ್ ಮೆಳ್ಳೊ. ಯುವಜಣಾಂಚ್ಯಾ ಪಿಕ್ನಿಕಾ ವೆಳಾರ್ ಕಾಡ್ಲ್ಲಿ ತಸ್ವೀರ್ ಪಳೆಲಿ. ಪೊಸೊಭರ್ನ್ ಹಾಸ್ಚೆಂ ಸುಜಿ ಮ್ಹಜ್ಯಾ ದೊಳ್ಯಾಂಕ್ ಪಳೆತಾ ತಶೆಂ ಭೊಗ್ಲೆಂ. ತ್ಯಾ ಫಾಯ್ಲಾಂತ್ಲಿಂ ಎಕೇಕ್ ಘಡಿತಾಂ ವಿಂಚ್ಲಿಂ. ಆನಿ ತಿಂ ಹಾವೆಂ ಮತಿಂತ್ ಆಟವ್ಂವ್ಕ್ ಸುರು ಕೆಲಿಂ.
ಸುಜಾತಾ.....
ದಾನಿಯೆಲ್ ಸೊಜಾಚ್ಯಾ ಕುಟ್ಮಾಂತ್ಲೆಂ ಮ್ಹಾಲ್ಗಡೆಂ ಚೆಡುಂ. ಮಟ್ವ್ಯಾನ್ ಸುಜಿ ಮ್ಹಣ್ ಆಪಯ್ತಾತ್. ತಾಚ್ಯಾ ಪಾಟ್ಲೆಂ ಸುನಿತಾ. ದೊಗಾಂಯಿ ಪಳಂವ್ಕ್ ಭೋವ್ ಆಕರ್ಶಿಕ್. ಶಿಕ್ಪಾಂತ್ಯಿ ಭೋವ್ ಹುಶಾರ್. ನರ್ಸಿಂಗ್ ಶಿಕಾಪ್ ಕರ್ನ್ ಎಕೆ ಖಾಸ್ಗಿ ಆಸ್ಪತ್ರೆಂತ್ ಕಾಮಾಕ್ ವೆತಾಲೆಂ. ಆಯ್ತಾರಾಚೆಂ ಮಿಸಾಚ್ಯಾ ಕಾಮಾಕ್ ಕೆದಾಳಾಯ್ ಮುಕಾರ್. ಸುಜಿ ಆಸಾತ್ ತರ್ ಥಂಯ್ಚರ್ ಸಂತೊಸ್ ನಿಶೆತಾಲೊ.
ತೊ ದೀಸ್ ಸುಕ್ರಾರ್.
ಸುಜಿಚೆ ಜಿಣಿಯೆಂತ್ಲೊ ವಿಕಾಳ್ ದೀಸ್.
ಸಾಂಜೆಚೆಂ ಸರ್ತೆಚೆಂ ಕಾಮ್ ಕರುಂಕ್ ಗೆಲ್ಲೆಂ. ಸಕಾಳ್ ಜಾಲ್ಯಾರ್ಯಿ ಪಾಟಿಂ ಆಯ್ಲೆಂ ನಾ.
ದಾನಿಯೆಲಾಮ್ ಉಡೊನ್ ಪಡ್ಲೊ. ರಾತಿಚೆಂ ಕಾಮ್ ಆಸ್ಲ್ಯಾರ್ ಸಕಾಳಿಂಚ್ಯಾ ಸಾಡೆ-ಆಟ್ ವೊರಾಂ ಭಿತರ್ ಘರ್ಚೆಂ ದಾರ್ ರಿಗ್ಚೆಂ ಚೆಡುಂ ದೊನ್ಪಾರಾಚಿಂ ಬಾರಾ ಜಾಲ್ಯಾರ್ಯಿ ಘರಾ ಯೇಂವ್ಕ್ ನಾತ್ಲ್ಲೆಂ ತಾಕಾ ಆಕಾಂತುಂಕ್ ಕಾರಾಣ್ ಜಾಲೆಂ.
ದಾನಿಯೆಲಾಮಾಚೆ ಬಾಯ್ಲೆನ್ ರಡೊಂಕ್ ಸುರು ಕೆಲೆಂ. ಧಾಕ್ಟೆಂ ಸುನಿತಾ ಕೊಲೆಜಿಕ್ ಗೆಲ್ಲೆಂ.
ಬಾರಾ ವೊರಾಂಚಿ ಘಾಂಟ್ ಮಾರ್ನ್ ಬೊಲ್ಕಾಂವಾರ್ ಉಬೊ ರಾವ್ಲೆಲ್ಯಾ ಮ್ಹಾಕಾ ದಾನಿಯೆಲಾಮ್ ಖರ್ಶೆವ್ನ್ ಖರ್ಶೆವ್ನ್ ಯೆಂವ್ಚೊ ದಿಸ್ಲೊ.
’ಕಾಂಯ್ ತರ್ಯಿ ಚಡುಣೆಂ ಘಡ್ಲಾಂ’ ಹಾವೆಂ ಮತಿಂತ್ಚ್ ಲೇಕ್ ಘಾಲೆಂ.
"ಕಿತೆಂ ಸೊಜಾಮಾ, ಕಿತೆಂ ಜಾಲೆಂ?" ಹಾವೆಂ ವಿಚಾರ್ ಕೆಲೊ.
ತಾಚ್ಯಾ ಉಸ್ವಾಸಾಚೊ ವೇಗ್ ದೊಡೊ ಜಾಲೊ.
"ಫಾದರ್ ರಾತಿಚೆ ಡ್ಯೂಟೆಕ್ ಗೆಲ್ಲೆಂ ಸುಜಿ ಎದೊಳ್ಯಿ ಘರಾ ಯೇಂವ್ಕ್ ನಾ" ತಾಚ್ಯಾ ತೊಂಡಾರ್ ಆಕಾಂತ್ ಆಸ್ಲ್ಲೊ.
ಹಾಂವ್ಯಿ ಕಾಲುಬುಲೊ ಜಾಲೊಂ.
ದಾನಿಯೆಲಾಮಾಕ್ ಕಶೆಂ ಸಮಾದಾನ್ ಕರ್ಚೆಂ ಮ್ಹಳ್ಳೆಂ ಕಳಾನಾ ಜಾಲೆಂ.
"ಆಶೆಂ ಜಾಂವ್ಚೆಂ ಪಯ್ಲೆ ಪಾವ್ಟಿಂ. ಎದೊಳ್ ಪರ್ಯಾಂತ್ ಘರಾ ತಡವ್ ಕರ್ನ್ ಯೇಂವ್ಕ್ ನಾ ಫಾದರ್. ತುಮಿ ಕಿತೆಂ ತರ್ಯಿ ಕರಾ. ವಾಡ್ಲ್ಲೆಂ ಚೆಡುಂ..."
ತಾಚೊ ತಾಳೊ ಗದ್ಗದೀತ್ ಜಾಲ್ಲೊ.
"ಭಿಯೆನಾಕಾ ತುಂ" ಹಾವೆಂ ತಾಕಾ ಧಯ್ರ್ ದಿಂವ್ಚೆಂ ಪ್ರೇತನ್ ಕೆಲೆಂ.
"ಆಸ್ಪರ್ತೆಕ್ ಫೋನ್ ಕೆಲೆಂಯ್ಗೀ?"
ಹಾವೆಂ ವಿಚಾರ್ತಾನಾ ತಾಣೆಂ ಗೊಮ್ಟಿ ಆಡ್ ಘಾಲಿ.
ಹಾವೆಂ ತುರ್ತಾನ್ ಮೆಟಾಂ ಕಾಡುಂಕ್ ಚಿಂತ್ಲೆಂ. ಆಸ್ಪತ್ರೆಕ್ ಫೊನ್ ಕೆಲೆಂ.
"ತೆಂ ಕಾಲ್ ರಾತಿಚೆ ಡ್ಯೂಟೆಕ್ಚ್ ಯೇಂವ್ಕ್ ನಾ."
ಆಸ್ಪತ್ರೆ ಥಾವ್ನ್ ಮೆಳ್ಲ್ಲೆ ಜಾಪಿಕ್ ಮ್ಹಜ್ಯಾ ಮಾತ್ಯಾರ್ ಘಡ್ಗಡೊ ಪಡ್ಲ್ಲೊ ಆನ್ಬೋಗ್ ಜಾಲೊ.
"ಚೆಡುಂ ಖಂಯ್ ಗೆಲೆಂ? ತಾಕಾ ಕಿತೆಂ ಜಾಲೆಂ?" ಸಬಾರ್ ಸವಾಲಾಂ ಮತಿಂತ್ ಘುಂವ್ತಾನಾ ಮ್ಹಜೆಂ ಪರ್ನೆಂ ಬಾಯ್ಕ್ ಘೆವ್ನ್ ದಾನಿಯೆಲಾಮಾ ಸಾಂಗಾತಾ ಪೊಲಿಸ್ ಠಾಣ್ಯಾಕ್ ಧಾಂವ್ಲೊಂ.
ಪೊಲಿಸ್ ಅದಿಕಾರಿಕ್ ವಿಶಯ್ ಸಾಂಗ್ತಾನಾ ಚೆಡ್ವಾಚೆ ಘುರ್ತ್ ವಿಚಾರ್ಲೆ. ತೊ ಕೊಣಾಲಾಗಿಂಗೀ ಪೊನಾರ್ ಉಲಯ್ಲೊ. ಉಪ್ರಾಂತ್ ತೊ ಉಟ್ಲೊ.
"ಯೆಯಾ...... ಮ್ಹಜೆ ಸಂಗಿಂ ಯೆಯಾ"
ತಾಣೆ ಜೀಪ್ ಚಾಲು ಕರ್ತಾನಾ ಮಿಸ್ತೆರ್ ಕಿತೆಂ ಮ್ಹಣ್ ಸಮ್ಜಾಲೊ ನಾ.
ಜೀಪ್ ಸರ್ಕಾರಿ ಆಸ್ಪತ್ರೆ ಮುಕಾರ್ ಥಾಂಬ್ಲೆಂ....
"ಸುಜಿ....!!!"
ಸೊಜಾಮಾನ್ ಕಿಂಕ್ರಾಟ್ ಮಾರ್ಲಿ.
ನರ್ಸಾನ್ ಸೊಜಾಮಾಕ್ ಕುಡಾಂತ್ಲೆಂ ಭಾಯ್ರ್ ದಾಡ್ಲೆಂ.
ದುಸ್ರ್ಯಾ ದಿಸಾ ದಿಸಾಳ್ಯಾಂಚೆರ್ ದಾಟ್ ಅಕ್ಶರಾಂನಿ ಖಬಾರ್ ಛಾಪುನ್ ಆಯಿಲ್ಲಿ......
"ತರ್ನಾಟೆ ಚಲಿಯೆಚೆರ್ ಅಮಾನುಶ್ ಅತ್ಯಾಚಾರ್"
ಆಸ್ಪತ್ರೆಕ್ ಕಾಮಾಕ್ ವೆತಾಸ್ತಾನಾ ಸುಜಿಚೆರ್ ಚಲ್ಲ್ಲ್ಯಾ ಅತ್ಯಾಚಾರಾ ವಿಶಿಂ ಮೀಟ್-ಮಿರ್ಸಾಂಗ್ ಭರ್ಸುನ್ ಖಬರ್ ಛಾಪುನ್ ಆಯಿಲ್ಲಿ.
ಸೊಜಾಮಾಚ್ಯಾ ಕುಟ್ಮಾಂತ್ ಕಾಳೊಕ್ ಪಡ್ಲ್ಲೊ. ತಾಂಕಾಂ ಸಮಾದಾನ್ ಕರ್ಚೆಂ, ಪರ್ಯಾರ್ ಸೊದ್ಚೆಂ ಕಾಮ್ ಮ್ಹಜೆರ್ ಆಸ್ಲ್ಲೆಂ.
ಖಟ್ಲ್ಯಾರ್ ಆಡ್ ಪಡೊನ್ ಹ್ಯಾ ವಿಶಿಂ ಚಿಂತುನ್ ಆಸ್ತಾನಾ ಬೊಲ್ಕಾಂವಾಂತ್ಲಿ ಕಾಂಪಿಣ್ ಆವಾಜ್ ಕರುಂಕ್ ಲಾಗ್ಲಿ.
ಯುವಸಂಗಾಚೆ ತರ್ನಾಟೆ ದಾರಾರ್ ಉಬೆ ಜಾಲ್ಲೆ.
"ಆಮಿ ಆಶೆಂಚ್ ಸೊಡುಂಕ್ ನುಜೊ ಫಾದರ್. ಆಜ್ ಸುಜಿ ವಯ್ರ್ ಆತ್ಯಾಚಾರ್ ಜಾಲೊ. ಫಾಲ್ಯಾಂ ಅನ್ಯೇಕಾ ಭಯ್ಣಿಚೆರ್. ಹಿ ಶಿಂಕಳ್ ಮುಕಾರುನ್ ವೆತೆಲಿ. ದೆಕುನ್...."
ಯುವ ಸಂಘಾಚೊ ಅದ್ಯಕ್ಶ್ ಪ್ರತಿಭಟನಾಚೆ ತಾನೆನ್ ಉಸ್ಮಡ್ತಾಲೊ.
"ಪೊಲಿಸಾಂನಿ ಅಪ್ರಾದ್ಯಾಕ್ ಕಯ್ದ್ ಕೆಲಾಂ. ನೀತ್ ಆಮ್ಚೆ ಪಾಡ್ತೆನ್ ಆಸಾ."
ಹಾಂವ್ ಸಮಾದಾನಾಚೆಂ ಹಾತೆರ್ ಸೊದ್ಚೆಂ ವೆರ್ತ್ ಪ್ರೇತನ್ ಕರ್ನ್ ಆಸ್ಲ್ಲೊಂ.
"ಸೊಸ್ಣಿಕಾಯ್ ಗರ್ಜೆಚಿ ಫಾದರ್. ಪುಣ್ ಇತ್ಲಿ ನ್ಹಂಯ್" ತಾಣೆ ನಾ ಪಸಂದ್ಪಣ್ ವ್ಯಕ್ತ್ ಕೆಲೆಂ.
ತಾಚ್ಯೆ ಉಲೊಣ್ಯಾಂತ್ಯಿ ರಾಜಾಂವ್ ದಿಸ್ಲೆಂ ಮ್ಹಾಕಾ.
"ಆತಾಂ ಆಮಿ ಕಿತೆಂ ಕರ್ಚೆಂ ಮ್ಹಣ್ಚೆಂ ತುಮಿ?" ಹಾವೆಂ ವಿಚಾರ್ಲೆಂ.
"ವ್ಹಡ್ ಪ್ರತಿಭಟನ್ ರ್ಯಾಲಿ ಕರ್ಚಿ. ತ್ಯಾ ಖಾತಿರ್ ಹಾತ್-ಪತ್ರಾಂ ಛಾಪ್ಚಿಂ. ಸರ್ಕಾರಿ ಅದಿಕಾರಿ ಥಾವ್ನ್ ಮಂತ್ರಿ ಪರ್ಯಾಂತ್ ಪ್ರತಿಭಟನ್ ಪತ್ರಾಂ ದಾಡ್ಚಿಂ."
ತಾಚೆ ಯೆವ್ಜಣೆ ಪರ್ಮಾಣೆ ವ್ಹಡ್ ಪ್ರತಿಭಟನ್ ರ್ಯಾಲಿ ಚಲ್ಲಿ. ಸಬಾರಾಂನಿ ಭಾಶಣಾಂ ಕೆಲಿಂ. ರಾತ್-ದಿಸಾ ಭಿತರ್ ಸುಜಿಚೆಂ ನಾಂವ್ ಹರ್ಯೇಕ್ಲ್ಯಾಚಾ ತೊಂಡಾಂತ್ ವ್ಹಾಳೊಂಕ್ ಸುರು ಜಾಲ್ಲೆಂ.
ಇತ್ಲ್ಯಾ ಸರ್ವ್ ಪ್ರತಿಭಟನಾಕ್ ಮೆಳ್ಲ್ಲೊ ಫಳ್ ಆಮ್ಚ್ಯಾ ಯುವಸಂಘಾಕ್ ಹೊಗ್ಳಾಪ್ ಆನಿ ನಾಂವ್. ಪತ್ರಾಂನಿ ತಾಂಚೆ ವಿಶಿಂ ಹೊಗ್ಳಿಕ್ ವಾಚುಂಕ್ ಮೆಳ್ಳಿ.
ನಿಮಾಣೆಂ ಸರ್ಕಾರಿ ಅದಿಕಾರಿಂನಿ ಪರ್ಯಾರ್ ಜಾವ್ನ್ ಪನ್ನಾಸ್ ಹಜಾರ್ ರುಪಯ್ ದಾನಿಯೆಲ್ ಸೊಜಾಕ್ ಪಾವಿತ್ ಕೆಲೊ. ಆಶೆಂ ಕರ್ತಾನಾ ತಸ್ವಿರ್ಯೊ ಕಾಡ್ಲ್ಯೊ. ಪತ್ರಾಂನಿ ಖಬಾರ್ ಪಾಯ್ಸ್ ಜಾಲಿ. ಹ್ಯಾ ಖಾತಿರ್ ವಾವುರ್ಲ್ಲ್ಯಾ ಮ್ಹಾಕಾಯಿ ಜಾಯ್ತಿ ಹೊಗ್ಳಿಕ್ ಮೆಳ್ಲ್ಲಿ.
ಪ್ರತಿಭಟನ್ ಯಶಸ್ವಿ ಜಾಲೆಂ ಮ್ಹಣ್ ತರ್ನಾಟೆ ಭುಜಾಂ ಫುಲವ್ನ್ ಸಾಂಗ್ತಾನಾ, ಆಪ್ರಾದ್ಯಾಕ್ ಶಿಕ್ಶಾ ಫಾವೊ ಕೆಲ್ಲಿ ಆನಿ ಪರ್ಯಾರ್ ಜಾವ್ನ್ ಪನ್ನಾಸ್ ಹಜಾರ್ ದಾನಿಯೆಲ್ ಸೊಜಾಚ್ಯಾ ಕುಟ್ಮಾಕ್ ಫಾವೊ ಕೆಲ್ಲಿ ಕೀರ್ತ್ ಮ್ಹಾಕಾ ಮೆಳ್ಲ್ಲಿ.
ಹ್ಯಾ ಮಧೆಂ ಸುಜಿ ಸಕ್ಡಾಂ ಥಾವ್ನ್ ಲಿಪೊನ್ ಗೆಲ್ಲೆಂ. ಕಾಮಾಕ್ ಸೊಡ್ಯಾಂ ಮಿಸಾಕ್ ಲೆಗುನ್ ಯೇನಾತ್ಲ್ಲಿ ಖಬಾರ್ ಮ್ಹಾಕಾ ಸಯ್ತ್ ಕಳೊಂಕ್ ನಾತ್ಲ್ಲಿ. ಬಾವ್ಡೆಂ ಸುಜಿ ಖಂಚಿಯ್ ಫಿಕಿರ್ ನಾತ್ಲ್ಲ್ಯಾ ಮೊನ್ಯಾ ಭಾಶೆನ್ ಕರ್ಗಾತಾಲೆಂ ಜಾಯ್ಜಯ್.
ವರ್ಸಾಂ ಪಾಶಾರ್ ಜಾಲಿಂ. ಮ್ಹಾಕಾ ಕಾನೂರ್ ಫಿರ್ಗಜೆ ಥಾವ್ನ್ ವರ್ಗ್ ಮೆಳ್ಲ್ಲೊ. ಸುಜಿಚೊ ಉಡಾಸ್ಯಿ ಗೆಲ್ಲೊ. ಪುಣ್ ಹ್ಯಾ ಘಡಿತಾಂಚೊ ದಾಕ್ಲೊ ಮಾತ್ರ್ ಫಾಯ್ಲಾಂತ್ ವಿಶೆವ್ ಘೆತಾಲೊ.
ಕಾಜಾರಾಕ್ ವಚಾಜಾಯ್ ಆನಿ ಸುಜಿಕ್ ಪಳೆಜಾಯ್ ಮ್ಹಳ್ಳಿ ಆಶಾ ಆತಾಂ ಮ್ಹಾಕಾ ಆಯಿಲ್ಲಿ. ತಾಚೊ ಫುಡಾರ್ ಆಸೊ ಜಾಯ್ತ್ ಮ್ಹಣ್ ಹಾವೆಂ ಸಪ್ಣಾಂತ್ ಸಯ್ತ್ ಚಿಂತುಂಕ್ ನಾತ್ಲ್ಲೆಂ.
**************
ರೆಸ್ಪೆರಾಕ್ ಹೊಕಾಲ್-ನೊವ್ರೊ ಆಯಿಲ್ಲಿಂ. ದೋಗ್-ತೇಗ್ ಯಾಜಕ್ಯಿ ಆಸ್ಲ್ಲೆ. ಮ್ಹಜೆ ದೊಳೆ ಮಾತ್ರ್ ಸುಜಿಕ್ ಸೊದ್ತಾಲೆ.
ಸುಜಿ ದಿಸಾನಾತ್ಲ್ಲೆಂ.
ರೆಸ್ಪೆರ್ ಸಂಪೊಂಕ್ ಹಾಂವ್ ರಾಕೊನ್ ರಾವ್ಲೊ.
"ತುಮ್ಕಾಂ ದೇವ್ ಜಾಯ್ತೆಂ ಬರೆಂ ಕರುಂದಿ ಫಾದರ್" ತಾಳೊ ಆಯಿಲ್ಲ್ಯಾ ಕುಶಿನ್ ಹಾವೆಂ ಪಳೆಲೆಂ. ಸೊಜಾಮಾನ್ ಹಾತ್ ಜೊಡ್ಲ್ಲೆ.
ಸುಜಿ ವಿಶಿಂ ಹಾವೆಂ ಖಬರ್ ಕಾಡ್ಲಿ.
"ತೆಂ ಕಿತ್ಯಾಕ್ ಫಾದರ್? ಕಶೆಂಯ್ ತೆಂ ಆಂಕ್ವಾರ್. ಆನಿ ಘರಾ ಕೊಣ್ಯಿ ಪುಣ್ಯಿ ಜಾಯ್ಜೆಗೀ ನಾಕಾ?"
ಸೊಜಾಮಾಚಿಂ ಉತ್ರಾಂ ಮ್ಹಾಕಾ ಅಢ್ಹೂಕ್ ಲಾಗ್ಲಿಂ.
"ತಶೆಂ ಕಿತ್ಯಾಕ್ ಮ್ಹಣ್ತಾಯ್ ಸೊಜಾಮಾ" ಹಾವೆಂ ಬೆಜಾರಾಯ್ ಉಚಾರ್ಲಿ.
ಸೊಜಾಮಾಚ್ಯಾ ದೊಳ್ಯಾಂತ್ ಆದ್ಲೊ ಉಡಾಸ್ ಉದೆಲೊ ಆನಿ ಉದ್ಕಾಚಿ ಝರ್ ವ್ಹಾಳೊಂಕ್ ಲಾಗ್ಲಿ.
"ಸುಜಿ ವಯ್ರ್ ಅತ್ಯಾಚಾರ್ ಕರ್ನ್ ತಾಚೆಂ ನಾಂವ್ ಪಾಡ್ ಜಾಲೆಂ. ಪಾವಾನಾತ್ಲ್ಲ್ಯಾಕ್ ಪ್ರತಿಭಟನ್ ಮ್ಹಣ್ ರ್ಯಾಲಿ ಕರ್ನ್ ಭಾಶಣಾಂ ಕರ್ನ್ ಸುಜಿ ವಿಶಿಂ ಗಾಂವ್ಭರ್ ದಾಂಗ್ರೊ ಫೆರಾಯ್ಲೊ. ಇತ್ಲೆಂ ಕಳಿತ್ ಜಾಲ್ಯಾ ಉಪ್ರಾಂತ್ ಕೋಣ್ ಪುನೆಕೆಲ್ಲೊ ಕಾಜಾರ್ ಜಾಂವ್ಕ್ ಮುಕಾರ್ ಸರತ್?"
ದುಕಾಂಚ್ಯಾ ಮದೆಂ ತೊ ಉಲಯ್ತಾಲೊ.
"ಪ್ರತಿಭಟನ್ ಕರ್ಚ್ಯಾ ಬದ್ಲಾಕ್ ಕೋಣ್ ಎಕ್ಲೊ ತರ್ನಾಟೊ ತಾಚೆ ಲಾಗಿಂ ಲಗ್ನ್ ಜಾಂವ್ಕ್ ಮುಕಾರ್ ಆಯಿಲ್ಲೊ ತರ್...."
ಮ್ಹಜ್ಯಾ ಕಾಳ್ಜಾಕ್ ಭಾಲಿಯಾಂನಿ ಫಾಪ್ಸಿಲ್ಲೊ ಅನ್ಭೋಗ್ ಜಾಲೊ.
ಸುಜಿಕ್ ಪಳವ್ನ್ ತಾಕಾ ಸಮಾದಾನ್ ಕರುಂಕ್ ಹಾಂವ್ ದರ್ವಡ್ಲೊಂ. ಸಾದ್ಯ್ ತರ್ ಆಮ್ಚೆಚ್ ಫಿರ್ಗಜೆಂತ್ ಬರಿ ಸಯ್ರಿಕ್ ಪಳವ್ನ್ ಕಾಜಾರ್ ಕರ್ನ್ ದೀಜೆ ಮ್ಹಣ್ ಮತಿಂತ್ಚ್ ಚಿಂತ್ನಾಂ ಆಟಯ್ಲಿಂ.
ಕಾಜಾರಾಕ್ ಯೆತಾನಾ ಆಸ್ಲ್ಲೊ ಸಂತೊಸ್ ಆತಾಂ ನಪಂಯ್ಚ್ ಜಾಲ್ಲೊ.
ವ್ಹೊರ್ ಹೊಲಾ ಕುಶಿನ್ ಭಾಯ್ರ್ ಸರ್ತಾನಾ ಹಾವೆಂ ದಾನಿಯೆಲ್ ಸೊಜಾಚ್ಯಾ ಘರಾ ವಚೊಂಕ್ ಯೆವ್ಜಣ್ ಘಾಲಿ.
ಮತಿಂತ್ ಹಜಾರ್ ಭೊಗ್ಣಾಂ ಘೆವ್ನ್ ಹಾಂವ್ ದಾನಿಯೆಲಿಚ್ಯಾ ಘರಾ ಪಾವ್ಲೊಂ.
ರೊಸಾಚೊ ಮಾಟೊವ್ ತಸೊಚ್ ಆಸ್ಲ್ಲೊ. ಉಮ್ಕಾಳಾಯಿಲ್ಲಿಂ ಫುಲಾಂ ಮ್ಹಾಕಾ ಪಳವ್ನ್ ಹಾಸ್ತಾಶೆಂ ದಿಸ್ಲಿಂ.
ಹಾವೆಂ ಭಿತರ್ ತಿಳ್ಳೆಂ. ಕೊಣಾಯ್ಚಿ ಜಾಗ್-ಮಾಗ್ ನಾತ್ಲ್ಲಿ.
ಹಳ್ತಾರ್ ಖೊಂಕ್ಲಿ ಕಾಡ್ನ್ ಆಪುಣ್ ಆಯ್ಲಾಂ ಮ್ಹಣ್ ಕಳಯ್ಲೆಂ. ಸುಜಿ ಜಾಂವ್ ಹೆರ್ ಕೋಣ್ಯಿ ಜಾಂವ್ ಭಾಯ್ರ್ ದಿಸೊಂಕ್ ನಾಂತ್.
"ಸುಜಿ...."
ಹಾವೆಂ ಉಲೊ ಕೆಲೊ.
ದಾರ್ ಬಂದ್ ಕೆಲ್ಲೆಂ.
ಜನೆಲ್ ಉಗ್ತೆಂ ಆಸ್ಲ್ಲೆಂ.
"ಸುಜಿ...."
ಪರತ್ ಉಲೊ ಕೆಲೊ.
ಕೋಣ್ಯಿ ದಿಸಾನಾತ್ಲ್ಲಿಂ ಪಳವ್ನ್ ಜನೆಲಾಚ್ಯಾ ಆಡೊಸಾನ್ ಹಾವೆಂ ಭಿತರ್ ಪಳೆಲೆಂ.
ಸುಜಿಚೆ ಪಾಂಯ್ ವಾರ್ಯಾರ್ ಧಲ್ತಾಲೆ, ಸಮಾಜಿಂತ್ಲ್ಯಾ ಲೊಕಾಚ್ಯೊ ಜಿಬೊ ಧಲ್ಲ್ಲೆ ಭಾಶೆನ್.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
