ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ವಿಮರ್ಸೊ ನ್ಹಯ್ - ಏಕ್ ಪ್ರಶಂಸಾಪತ್ರ್!
ಎಕ್ ನದರ್:
ಕೆವಿನ್ ಡಿ’ಮೆಲ್ಲೊ ಕಾರ್ಕಳ್/ಕುವೇಯ್ಟ್.
ದಾಯ್ಜ್ ಅಂತರ್ಜಾಳಿರ್ 2004 ಇಸ್ವೆ ಥಾವ್ನ್ 2007 ಇಸ್ವೆಭಿತರ್ ಪರ್ಗಟ್ ಜಾಲ್ಲ್ಯಾ, ವಲ್ಲಿ ಕ್ವಾಡ್ರಸಾಚ್ಯಾ ಸಂಪಾದಕೀಯ್ ಲೇಖನಾಂಚೊ ಸಮಗ್ರ್ ಸಂಗ್ರಹ್ ’ಮೊಳ್ಬಾವಯ್ಲಿಂ ಸ್ವಪ್ಣಾಂ’ ಬುಕಾರುಪಾರ್ ಆಯ್ಲೆವಾರ್ ಪರ್ಗಟ್ ಜಾಲ್ಲೊ ಕೊಂಕ್ಣಿ ಸಾಹಿತ್ ಸಂಸಾರಾಂತ್ ಏಕ್ ಭೋವ್ ವಿರಳ್ ಜಾವ್ನಾಸ್ಚ್ಯಾ ಹ್ಯಾ ಪರಿಗತೆಂತ್ ಹ್ಯಾ ಬುಕಾನ್ ಏಕ್ ವಿಶಿಷ್ಠ್ ಸ್ಥಾನ್ ಆರಂಭ್ ಕೆಲಾಂ ಮ್ಹಣ್ಯೆತ್.
ಹಾಂಗಾಸರ್ ಬುಕಾಚೊ ವಿಮರ್ಸೊ ಕರ್ಚಿ ಗರ್ಜ್ ಮ್ಹಾಕಾ ದಿಸಾನಾ, ಎದೊಳ್ಚ್ಚ್ ಹ್ಯಾ ಬುಕಾಚ್ಯಾ ಪ್ರಸ್ತಾವನಾಂತ್ ಎಚ್ಚೆಮಾನ್ ಭೋವ್ ಪ್ರಭುದ್ದ್ ರಿತಿನ್ ಬುಕಾಚೊ ವಿಮರ್ಸೊ ಕೆಲಾ. ತಶೆಂಚ್ ಹೆರ್ ಸಭಾರ್ ಸಾಹಿತಿಂನಿ ಆಪಾಪ್ಲಿಂ ಭಗ್ಣಾಂ, ವಿಚಾರ್, ಅಭಿಪ್ರಾಯೊ ಉಚಾರ್ಲ್ಯಾತ್. ತರ್ ಪರತ್ ವಿಮರ್ಸೊ ಹಾಂಗಾಸರ್ ನಾಕಾ, ಪುಣ್ ಅಸಲೊ ಅಪ್ರೂಪ್, ಭೋವ್ ವಜನ್ಭರಿತ್, ಗರ್ಜೆಭರಿತ್ ಬುಕಾವಿಶಿಂ ದೋನ್ ಪ್ರಶಂಸೆಚಿಂ ಉತ್ರಾಂ ಬರಯ್ನಾಂ ತರ್ ಆಮ್ಚೊ ಹ್ಯಾ ಆಳ್ಶಿ ಆನಿ ಭೇಫಿಕಿರ್, ಸ್ವಾರ್ಥಿ, ಬೇಜವಾಭ್ದಾರಿ, in-different ಸಮಾಜೆಚೊ ಏಕ್ ಸಾಂದೊ ಜಾವ್ನಾಸ್ಚೊಂ ಹಾಂವ್, ಬೂಕ್ ವಾಚ್ಲ್ಲ್ಯಾ ಉಪ್ರಾಂತ್ಯೀ ಕುಸ್ಕುಟ್ ಮ್ಹಜೆ ಥಂಯ್ ಬದ್ಲಾವಣ್ ಹಾಡಿನಾತ್ಲ್ಲೊ......... (ಕಿತೆಂ ಮ್ಹಣ್ ವೊಲಾಂವ್ಚೆಂ ಮ್ಹಣ್ ಸಮ್ಜಾನಾ) ಜಾಯ್ನ್!.
ವಲ್ಲಿ ಕ್ವಾಡ್ರಸಾನ್ ಕೊಂಕ್ಣಿ ಸಾಹಿತ್ಯಾಚ್ಯಾ ಹೆರ್ ಪ್ರಕಾರಾಂನಿ (ಕಾಣ್ಯೊ, ಕವಿತಾ, ಕಾದಂಬರಿ) ಭರ್ಪೂರ್ ಕೃಷಿ ಕೆಲ್ಯಾ ತರ್ಯೀ, ತೊ ಭೋವ್ ಆಪ್ತ್ ಜಾತಾ ಆಪ್ಲ್ಯಾ ಹ್ಯಾ ವಿಚಾರಾತ್ಮಕ್ ಲೇಖನಾಂಧ್ವಾರಿಂ. ಪ್ರಸ್ತಾವನಾಂತ್ ಎಚ್ಚೆಮಾನ್ ಸಾಂಗ್ಲ್ಲೆಪರಿಂ ವಿಚಾರಾತ್ಮಕ್ ಲೇಖನಾಂ ಬರಂವ್ಕ್ ಖಂಡಿತ್ ಜಾವ್ನ್ ಸಲೀಸ್ ನ್ಹಯ್. ಪಯ್ಲೆ ಸುವಾತೆರ್ ಲೇಖಕಾಕ್ ವಿಚಾರ್ಭರಿತ್ ಮನೋಭಾವ್, ದುಸ್ರೆ ಸುವಾತೆರ್ ಸಮಾಜಿಕ್ ಜವಾಭ್ದಾರಿ, ಹುಸ್ಕೊ ಆಸೊಂಕ್ ಜಾಯ್. ಎಕಾಚ್ಚ್ ಉತ್ರಾನ್ ಸಾಂಗ್ಚೆಂ ತರ್ ನಿಸ್ಕಳ್, ನಿಸ್ವಾರ್ಥಿ, ನಿಷ್ಕಪಟ್ ಮನೋಭಾವ್ ಆಸೊಂಕ್ ಜಾಯ್. ಹೆ ವಯ್ಲೆ ಶೆಗುಣ್ ವಲ್ಲಿ ಥಂಯ್ ಆಸ್ಲ್ಲೆವರ್ವಿಂಚ್ ತಾಚ್ಯಾ ಲಿಖ್ಣೆಥಾವ್ನ್ ಹಿಂ ಲೇಖನಾಂನಿ ಜಲ್ಮ್ ಘೆತ್ಲ್ಯಾಂತ್.
ಹಾಂಗಾಸರ್ ಹ್ಯಾ ಬುಕಾಂತ್ ಆಟಾಪ್ಲ್ಲಿಂ ತೀಸ್ ಸಂಪಾದಕೀಯ್ ಲೇಖನಾಂ ಎಕೇಕ್ ಕರ್ನ್ ತುಲನಾತ್ಮಕ್ ನದ್ರೆಂತ್ ಪಳೆಂವ್ಕ್ ಹಾಂವ್ ಆಶೆನಾ. ಬಗಾರ್ ಸಮಗ್ರ್ ಜಾವ್ನ್ ಪಳೆತಾನಾ ಹಾಂಗಾಸರ್ ಬಂಡಾಯ್, ಆಕ್ರೋಶ್, ನಿಷ್ಟುರ್ಭರಿತ್ ಪಿಂತ್ರಾವ್ಣಿ ಚಡಿತ್ ಮಾಪಾನ್ ಝಳ್ಕಾತಾ. ಲೇಖಕ್ ಹಾಂಗಾಸರ್ಚ್ ಚಿಕ್ಕೆಶೆ ಆಮ್ಸೊರ್ಲಾ ಯಾ ಘುಸ್ಪೊಡ್ಲಾ ಮ್ಹಣ್ ಮ್ಹಜೆಂ ಭಗಾಪ್. ಬಂಡಾಯ್, ಆಕ್ರೋಶ್, ನಿಷ್ಟುರ್ಪಣ್ ಬರೆಂಚ್. ಪುಣ್ ವಿಪರ್ಯಾಸ್ ಹೊ ಜಾವ್ನಾಸಾಕೀ ಆಜ್ ಹ್ಯಾ ಸಮಾಜೆಂತ್ ಜಿಯೆಂವ್ಚ್ಯಾ ಹ್ಯಾ ಲೊಕಾಕ್ ತಶೆಂಚ್ ವ್ಯಕ್ತಿಗತ್ ಜಾವ್ನ್ ಹೊ ಪರ್ನೊ, ಚಿಕ್ಕೆಸೊ ಬೆಳ್ಶೆಲ್ಲೊ ಪ್ರಕಾರ್ ಯಾ ಥೀಮ್ ಜಾಲಾ!. ಸಮಾಜ್ ಮ್ಹಣಾತ್ "ವ್ಹಾಹ್!... ವ್ಹಾಹ್!!.... ವಲ್ಲಿನ್ ಬರೆಂ ಕರ್ನ್ ಬರಯ್ಲಾಂ! ಸತ್ ಬರಯ್ಲಾಂ!! ಧಯ್ರಾನ್ ಬರಯ್ಲಾಂ!!!.. ವ್ಹಾ.. ವ್ಹಾ.. ಶಹಬ್ಬಾಸ್ ವಲ್ಲಿ!". ಅಶೆಂ ಮ್ಹಣೊನ್ ತ್ಯಾ ಬಂಡಾಯ್, ಆಕ್ರೋಶಾ ಪಾಟ್ಲ್ಯಾನ್ ಆಸ್ಚೊ ಮಾನವೀಯತೆಚೊ, ನಿಸ್ವಾರ್ಥ್ಪಣಾಚೊ, ಜವಾಭ್ದಾರೆಚ್ಯಾ ಮೌಲ್ಯಾಂಚೊ, ವ್ಯಕ್ತಿಗತ್ ವ್ಯಕ್ತಿತ್ವಾಂಚ್ಯಾ ಬದ್ಲಾವಣೆಚೊ ಖರೊ ಇರಾದೊ ವಿಸ್ರೊನ್ ಸೊಡ್ಚೊ ಅಪಾಯ್ ಆಸಾ!
ಹ್ಯಾ ಸಮಾಜೆಕ್ ಹ್ಯಾ ಲೊಕಾಕ್ ಸುಧ್ರಾಂವ್ಕ್ ಕಾಂಯ್ ತಿತ್ಲೆಂ ಸಲೀಸ್ ನ್ಹಯ್. ದೆಕುನ್ ಲೇಖಕಾಕ್ ಮ್ಹಜಿ ಏಕ್ ಖಾಲ್ತಿ ಸಲ್ಹಾ - "ಮಾನೆಸ್ತ್ ವಲ್ಲಿ, ತುಜೆಂ ಪ್ರೇತನ್ ಪ್ರಾಮಾಣಿಕ್ ಮ್ಹಣ್ಚ್ಯಾಂತ್ ದುಭಾವ್ ನಾ. ಸಮಾಜೆಂತ್, ಲೊಕಾ ಥಂಯ್ ಚಿಂತ್ಪಾಂತ್ ಆನಿ ಕರ್ನೆಂತ್ ಬದ್ಲಾವಣ್ ಯೇಜಯ್ ಮ್ಹಳ್ಳೊ ತುಜೊ ಇರಾದೊ ನಿರ್ಲಿಪ್ತ್ ಸ್ತರ್ ಆಸೊಂದಿ. ಕಸಲ್ಯಾಚ್ ಉಧ್ವೇಗಾಂನಿ, ನಿರೂಪಣೆಂತ್ ಫಕತ್ತ್ ಭಾವನಾತ್ಮಕ್ ಪಿಂತ್ರಾವ್ಣಿ ನಾಕಾ. ಆಸ್ಲ್ಲೆಂ ಆಸ್ಲ್ಲೆಪರಿಂ ಸೂಕ್ಷ್ಮಾತೀತ್ ಸೂಕ್ಷ್ಮ್ ನದ್ರೆಂತ್ ಭೋವ್ ಸರಳ್, ಸೊಂಪ್ಯಾ, ನಿರ್ಲಿಪ್ತ್ ಸ್ತರಾಂತ್ ಪಿಂತ್ರಾವ್ಣಿ ಕರ್. ವಾಚುನ್ ಜರ್ ಬದ್ಲೊಂಕ್ ಮನ್ ಆಸ್ಲ್ಯಾರ್ ಸಮಾಜ್ ಬದ್ಲಾತೆಲಿ. ವೆಕ್ತಿ ಬದ್ಲಾತೆಲಿ. ಧಾಖವ್ನ್ ದಿಂವ್ಚಿ ವರ್ತಿ ಜವಾಭ್ದಾರಿ ತುಜೆತಸಲ್ಯಾ ವಿಚಾರಾತ್ಮಕ್ ಲೇಖಕಾಚಿ ತರ್ ಬದ್ಲೊಂಚಿ ಜವಾಭ್ದಾರಿ ವಾಚ್ಲ್ಲ್ಯಾ ಸರ್ವಾಂಚಿ ಜಾವ್ನಾಸಾ. ವಾಚುನ್, ಸಮ್ಜೊನ್ ಘೆತ್ಲ್ಯಾರೀ ಬದ್ಲೊಂಕ್ ತಯಾರ್ ನಾತ್ಲ್ಲ್ಯಾ ’ಬದ್ಲಾನಾತ್ಲ್ಲ್ಯಾ ಪರ್ಜೆವಿಶಿಂ’ (ಪ್ರತ್ಯೇಕ್ ಜಾವ್ನ್ ಕೊಂಕ್ಣೀ ಪರ್ಜಾ ?) ಕಿತೆಂ ಮ್ಹಣ್ ಸಾಂಗ್ಚೆಂ?.. ನೋ ಕಮೆಂಟ್ಸ್.....
ಪರತ್ ಮಾನೆಸ್ತ್ ವಲ್ಲಿ ಕ್ವಾಡ್ರಸಾ ತುಕಾ ಮ್ಹಜೆ ಶುಭಾಶಯ್.. ತುಜ್ಯಾ ಲಿಖ್ಣೆಥಾವ್ನ್ ಅನಿಕೀ ಚಡ್ ಆನಿ ಚಡ್ ವಿಚಾರಾತ್ಮಕ್ ಲೇಖನಾಂ ರಚನ್ ಜಾಂವ್ದಿತ್. ಮುಳಾವ್ಯಾ ಮಾನಸಿಕ್ ಪರಿವರ್ತನಾಚ್ಯಾ ಪ್ರಕ್ರಿಯೆಕ್ ಅಸಲ್ಯಾ ಲೇಖನಾಂಚಿ ಭೋವ್ ಗರ್ಜ್ ಆಸಾ. ಮುಳಾವೆಂ ಮಾನಸಿಕ್ ಬದ್ಲಾವಣೆಚೆಂ ವಾರೆಂ ಅಸಲ್ಯಾ ಲೇಖನಾಂ ಥಾವ್ನ್ ಖಂಡಿತ್ ವ್ಹಾಳ್ತೆಲೆಂ. ಬದ್ಲೊಂಕ್ ಆಶೆತೆಲ್ಯಾಂಕ್ ತುವೆಂ ಕರ್ಚೊ ಹೊ ವ್ಹಡ್ಲೊ ಉಪ್ಕಾರ್ ಜಾಯ್ತ್.
ಅಖೇರ್ ಕರ್ಚ್ಯಾ ಪಯ್ಲೆಂ - ಹೊ ಬೂಕ್ ಅಪ್ರೂಪ್ ಸಂಗ್ರಹ್ಯೋಗ್ಯ್ ಬೂಕ್. ಹರ್ಯೆಕ್ಲ್ಯಾನಿ ಚುಕಾನಾಸ್ತಾಂ ವಾಚಿಜಾಯ್ ಜಾಲ್ಲೊ ಬೂಕ್. ವಲ್ಲಿ ಕ್ವಾಡ್ರಸಾನ್ ದೆಖ್ಲ್ಲಿಂ ಮೊಳ್ಬಾವಯ್ಲಿಂ ಸ್ವಪ್ಣಾಂ ಹಕೀಗತೆಂತ್, ವಾಸ್ತವಿಕತೆಂತ್, ಕಾರ್ಯರೂಪಿಂ ರುತಾಂ ಜಾಂವ್ದಿತ್ ಮ್ಹಳ್ಳೆಂಚ್ ಮ್ಹಜೆಂ ಮಾಗ್ಣೆಂ!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
